رواية بين سلاسل العادات للكاتبة كفاية كاظم الفصل السادس عشر
-الا اكتلة بية.
لازم المسدس بيدة جسمة كلة يختض من العصبية گلبي وگع بين رجلية راح يطين روسنا صرخ بصوت عالي وجهها دمم.
-انعععل اليوووم الضليييت بييية هنناااااا انعلللللل ابوووووي لابووووو اااامييييي اليوووم الااااا اووودييك لجهنمممممم
دخل جاسب كوة يجر النفس فتح عيونة على وسعهن يعاين للمسدس ويرجع يعاين لانمار هز براسة وتقدم علية درت عيووني لنوف تختض مثل السعفة ودموعها تصب حضنتها ارجف وياها.
جاسب: -نمر شنهي سالفتك على كيفك ذبة من ايدك ترة مو لعبة هذا
ضحك بصوت ودفعة وطلع رحنا نركض وراه لاگوة ولدنا التمو علية يريدون ياخذون السلاح من ايدة وهو مجلب بية.
-مسسوينيييي مضحكةةةة لامةةةة محمدددد عوووفوونييييي اكتلللللة واخللللص
عباس: -صگد تحجي بيك شي حبيبي ابووووك هذا ابوووك
-ذااالنيييي ومخبللللنيييي يمتهاااا صاااار ابوووويييي
لازم المسدس بثنين ادية وعباس لازم ادية يريد يطلعة منه.
انمار: -عووفوونييي رراح اددوووس الزززناااد
عباس: -لاتصير خبل عوفة مو وكتها حنة بيا حااااال
نوف: -طلعت اركض رجلية ترجف كلبي يدك بجنون دشداشتة مشكوكة والوجة يريد ينفجر من العصبية لازم المسدس بيدة واصبعة شوية ويطخ الزناد روحي نمردت تخيلتة مدد بالكاع والدم تارسة صرخت بصوت عالي جرج بلاعيمي.
-رررااااح تمووووت لاااااا انهاااارررر لاااااااااااااا.
ركضت الة مجموعين علية ويصيح بصوت عالي فاقد جرتني وحدة دفعتها حيلي رايح ضغطة اصبع ويروح بيها گلبي بعد مايتحمل اموت بساعتها ادفع باجسادهم الضخمة اريد مكان افوت منة.
جاسب: -نمرررر لاتسوودن وخررر اصببببعك نمرررر
انمار: -كاااافيييي مليييييتتتتت ملييييتتتتت وييييننن توووصل بيييية بعدددد يتجاااوز علييية جداااام اليسسسوى والماااا يسوووى.
ثارت طلقة شهكت بصوت عالي ووكعت بالكاع جوة رجليهم عقلي فصل ما اسمع شي بس عيوني بالگاع شفت الدم بالكاع هنا متت صرخت گلبي مشتعل نااار
-ليييييشششش انهاااارر ليشششش عفتتتتنييييي.
سفانة: -وگفت عن التنفس جمدت بمكاني لاالبية اشوف خافن انكتل واحد بيهم ولا البية اروح لنوف الطاحت جثة هامدة فصلت عن العالم فززتني صرخة عايشة رمشت بعيوني توضح عندي الرؤية حاضنتة لصدرها وتملخ بخدودخة طحت ذابة حملي على البنات تنفست من شفتهم مابيهم شي الطلقة صارت برجل انمار شخطتة وطلعت.
عائشة: -سودة بوجههي امووت وراك يمةةة ينمرر شبعتنييي ضيممم ووولك يو جاييية بگلبك يو جاييية بطنك وينننن انطييي وجهيييي.
انمار: -ما اموت ولا يصير بية شي نسيتو انة عار والعار مايصير بية شي
لازم رجلة وغمض عيونة بالم فرعت عايشة وانطت شيلتها لعباس شد رجلة تحضن وتشم وتنحب بنفس الوقت.
انمار: شوووفووو البتتتت شماااالهاااا
التفتنا لنوف الطايحة مسبلة اديها نسيتها صخام الصخمني التمينة عليها فاقدة نرش ندك على وجهها حاضنتها امها وتصرخ نحير بانمار الرجلة تنزف لو بيها شالها سجاد وطلع بيها ضلت امها مفرفحة.
-هند: سودة بوجهي جهالي تطشروو شلوووون بييية ولجج يمةةة الحگيلييي شيصييررر گلبييي راااح ابنيي وبتي راح تروح من ايدييي
جدة حكمة: -ويلاة يمة ويلاة خايبين منين تهل علينة المصايب الله واكبررر
حضنتها امها تخفف عنها وانمار طلع وراهم يسحل برجلة دخلنة عمتي جوة غسلنا وجهها بماي وشربناها حباية ضغط لا حول ولا قوة الابالله واحد شيحجي وشيكول.
سجى: -هسة هذا فويزان (فايز) شعندة وي انمار والله مايستحي فشلنة جدام الوادم شيكولون علينة
سفانة: -اوووف اوووف
رغد: -والله مايستاهل نمر شسالفتهم وياة حاقديين علية وهذا ابوة مجلوب علية شو وي المجسب مثل العسل چا هذا وحد
سجى: -گبل بس وي انمار هسة مرتة شيخلصها منة
التفات: محد طاگهاا على ايدها وگلها العبي شاطي باطي هاي العقوبة تستاهل اكثر من هيج الصراحة ماتستاهل نمر اووف.
سجى: -اشو انتي تحجين بكيفج هي لو عدها شي جا ماخلوها
التفات: - عدها سوالف من جوة ليجوة وعادل شايفها بعينة وي واحد تتمضحك ومو بس هيج موبايلها بية اشكال والوان.
سفانة: -شفتي بعينج لاتضلمين بختج نوف مو مال هاي الثوالف البت فقيرة لاتحجين عنها.
التفات: -فقيررة ههههاااي ياهي هاي الفقيرة نوفة حبيبتي انتي الفقيرة كوة تحجين مو هاي العيارة شايفة وعايفة.
سجى: اشو ولا جنها اختج تحجين عليها صدك انتي ماتستحين جا هي منين وانتي منين غير سمعتها من سمعتج ولو انتي سمعتج بالكاع
التفات: -سجيوة احترمي روحج وكضي السانج
كامت سجيوة صارت جدامها صارت جواها تريد بس تحجي متحامية عليها هسة احنا بيا حال وذني يتناكرن دخلت بنصهم.
-مو وكتها ثجيوة
عدلت شالها وطگگت رگبتها.
سجى: -شوفي التفات لسانج ضبية وحجاية وحدة ما اريد اسمع منج لا على نوف ولا غيرها استحي على روحج تحجين على البت وهي بمصاب. عشتو عود انتي اختة امدة هيج اخت.
غمتها بثنين اديها وطلعت ماتكدر التفات تحاجيها تخاف منها بس هي تردها على حلگها اجة فارس دشداشتة صايرة تراب اخذتلة ملابس خليتهن بالحمام ورجعت لكيتة متمدد على الكرويتة وعاصر راسة بين ادية.
-كوم اثبح خليت ملابثك.
هز راسة ورجع يعصر بية ضليت بمكاني اعاينلة ابدي احضنة بس استحي اي والله استحي منة ماعندي ذيج الميانة وياة صح زوجي بس ماكدر ابادر باي شي بعدني مامتعودة علية كزوج، رفع راسة عاينلي عيونة كوة فاتحهن صايرات دم.
-ماتجين حدي.
بلعت ريك ورحت كعدت بصفة سحبني علية حضني وضم راسة بصدري وجهي اشتعل نار حتى الهوة اگطعة من اصير بگربة مرات اگول يطلع حلم مامصدگة دارت ولفت بية ورجعت للهاوية گلبي امنيتي اعرف البگلة هم يحبني، بعدها رحيل محتلة جزء بداخلة. هل ياترى يجي يوم واسئلة ذني الاسئلة لو كالعادة ابلعهن وينهشني التفكير بيهن.
-ضميني شبيج
ابتسمت وشددت ايدي علية: -راسي راح ينفجر
-اثويلك مثاج.
عضيت شفتي اكرة الكلمات البيها حرف الراء والسين من احجيهن اموت بدمي، مدد بحضني وخلة ايدة على عيونة صرت العب بشعرة السرح وداخلي فراشات طايرة لخاطر الله شكد شايلتلك مشاعر شلون اطلعهن الك.
-اي عفية رصي رصي
سويتلة مساج باصابعي وكالعادة لازم يشاركني بالحديث مايخليني ساكتة.
-مو كتلج ما تعدي على خير.
-كلت
-تفشلنة جدام العالم. راح يموتني هذا عمي يعني رجال شكبرة وشكدة ومتزوج شمالك وياة شحس من طگة.
-عليمن العركة.
-محد يدري هما دوم يتناگرون بس مو مال يطگة وياريت بس هو هسة ساجت شعليك ابنك حتى تطگة استغفرالله ما اريد احجي زايد.
-چا ثاجت شعدة
-حجة بحجتين، يلا اكوم اسبح واناملي جم ساعة
راح يسبح ضليت افسر العركة بكيفي انمار يطلع سلاحة ويريد يكتل ابوة السالفة مو هينة ولا سالفة طگة الموضوع اكبر من هيج بس محد ينطي حجي.
كمت طلعتي ملابس اسبح تبهذلنة طلع ودخلت وراة سبحت وطلعت لكيتة نايم الله يساعدة نهد هد مشطت شعري ورشيت عطر گلبي يلوب رحت يم البنات بلكت وصل خبر عنهم طولو، تانيت هواي عيوني غفلت رجعت لحجرتي نمت على صفحتي
فز گلبي من سحبني علية ماعبالي گاعد خلة راسة برگبتي يبوو متت شينيمني هو مرتاح ونايم وانة ضالة اتحرمس بمجاني لا اكدر اگلب گوة نمت.
گعدت وي الفجر صليت ورجعت لحد الان ماجايبين نوف طار گلبي رحت لگيت عمتي كاعدة دمعتها على خدها ورضية گاعدة يمها تصبر بيها. رحت اسوي ريوك لعمامي اجت شروق عيونها حمرر.
-اكلج نوف شو ماكو لحد الان
-شروق: -ما دريتي صاير عدها انهيار اخخخ
-انهيارر!
-اي خية ضربتين على الراس توجع بس يكولون زينة
-وانمار شلونة؟
-زين مابية شي خيطو رجلة الطلقة باللحم و.
گطعت كلمتها من دخل عمي قحطان(ابو فارس) وساجت كعدو.
-ها بوية شلونجن.
-الحمدلله
-دومجن
سويتلهم الريوك ورجعت لحجرتي روحي طالعة البيت ماينكعد بية بعد اجواء فاتحة كعدت اقرا قران لبين ماكعد فارس گوة يتحرك رحت اسويلة ريوك.
عباس: -شنهي عفت اخوك ومرتة وحيدتهم
جاسب: -مارضة اضلن وياة
عباس: -وانته بكيفة غير رجلة مخيطة ومرتة ماهي طيبة
جاسب: -دخل اتريك وارجعلة صاير غثيث كلش
فارس: -ها يابة شلونكم نمتو لا الولد وين؟
جاسب: -مغسولين وجة وگفة شلونة بوية راح اموت نمت ساعة بالچادر وطفرت لكيت الجلب يلحس برجلي
عباس: -چلب يلحس برجلك هاي شلك بيها
جاسب: -جا شنهي اجذب يو الزمة بين ماتجي رفستة رفسة طير نومتي يو عاضني شسوي بروحي
عباس: -تصير جلب مجلوب اصلي
فارس: -بس لو ادري الجلب وين لگة رجلج
جاسب: -يابة نايم وحجي عماد بصفي ومنا ابو العمارة خفت لا ازگطهم طلعت رجلية من الجادر اثاري انعجب بيهن الحباب
فارس: -عاد غسلتهن لا.
جاسب: هاا اي چا شلون
عباس: -عود نصدگك
نزار: -ها الربع مجتمعين صلوات
جاسب: -تعال حبيبي ابو اللول تفضل
نزاز: -چا اتفضل ومجان ماكو
جاسب: ؛ بگلبي مجانج حبيبي تعال اكعد
نزار: -لا خلفلة عليك كرسي جدتي نوفة يكفي ويوفي
كملت الريوك خليتة كدامهم
نزار: ثفانة وياج جاي ثبيلي.
متت بدمي الا جدام فارس شكد غثة خزرة فارس خزرة.
فارس: -ماتصب لروحك بيك مرض.
نزار: -ها ها على كيفك شبيك اتشاقة وياها ثفانة اختي من زمان انة اشاقيها مو هيج ثفانة
عضيت شفتي وهزيت براسي شحجي وياه هذا الصراحة متعودة علية اذا وحدنة عادي بس جدام احد اضوج.
فارس: -عزيزي بعد لا تشاقة وياها
عباس: -هيوو راح تگلبها اخبار على كيفك
سويت ريوك واخذت للنسوان لكيت البنات بالمطبخ كاعدات يتريكن.
نزار: -شلونج ست سجااء
سجى: -هلا بنزار قباني
نزار: -منين هذا بنجرجي
فارس: -لا بگال.
نزار: -اي شلونة الانگليزي وياج يگولون تلبگ لبگ حتى بالبيت تحجي كلة انكليزي يگولن مو انة
سجى-: yes of course
نزار: -بووياااا فلك عمي بعد ماتعاينن بوجوهنة وحدة دكتورة والثانية انكلوز
فارس: -دكافي كوم وياي عيب الجادر فارغ
جاسب: -انة راح اعقم روحي عوفوني
نزار: -شتعقم كوم وياي جا امشي وحيدي
جاسب: -مو انعس ما نايم
نزار: -سودة بوجة الواكف على راسي كوم هناك نام هسة تجي الملاية تخليك تدك على الدفتر.
طلعو الولد وبدا الشغل جاي ماي رجلينة طاحت للتسعة اجة انمار ونوف كوة تمشي خطية حتى هو يكز مايسحك على رجلة تلگيناها من عده واخذناها. لحجرتها لفت روحة ونامت مدري تمثل النوم واستمرت على هذا الحال اسبوعين گوة تاكللها لگمة
لافة روحها ونايمة نسحلها منا ترجع تتغطى منا خطية عمتي مگابلتها وكاعدة منا تحزن على ابنها الراح لو على بتها تريد ترجع ومحتارة بنوف.
-يمة حاجيني
-كولي اسمعج
-راح ارجع
-ارجعي
-ماتروحين وياي.
-تؤ تؤ تؤ
-ليش امشي وياي
-المن راجعة اخوي وراح جوة التراب انطم الگة مكانة فارغ شسوي بروحي احير
بلعت غصتها ومسحت دموعها بشيلتها: -جا اني مو امج
-اي
لافة روحة حتى راسها ضامتة صارت علينة شوفة وجهها.
-كومي ارجعي وياي
-انت. ظرتة يجي ونروح سوى بس عافني عافني
تبجي خانكة روحة حتى لاتبين شهگاتها
-كومي خل اشوفج گبل لا اروح
-بعدين مو هسة هسة كلكم اطلعو بعدين اطلع.
طلعت عمتي مكسور خاطرها وكلبها من يوم الجت بية من المستشفى عزلت روحها ماتحجي وي واحد حتى شروق تضل يم راسها شكثر تبجي تحجي تسولف وهاي ساكتة كلش وجعني كلبي عليها.
انعصر گلبي من طلعت صايرة عضم وجلد عيونها داخلة جوة والفص مال عيونها صاير احمرر وي نوف جانت تخبل خدودها متفحة وردة وذبلت.
راحت لحضن عمتي امها تبجي وهي ساكتة بس ترمش بعيونها.
هند: -يمة صرت اخاف عليج ارجعي وياي.
-لا. لا ما ارجع ابقى هنا بعد ما ارجع
-گلبي يضل متعلعل عليج هاي مو حالة ارجعي لمدرستج وكملي حياتج شلون بلة تموتين روحج ورة اخوج
-هو اني متت بيوم المات متت من عفتة هناك بالمگبرة البعيدة طميت روحي بيدي ورجعت جثة مابية روح
-دخيلك يا على يمة لاتسودنيني عليج ابجي لاتحبسين بكلبج وتحركين روحج
-يلا يلا اني ارجع لغرفتي الله وياج
صوتها يرجف ماتكدر تحجي كلام مفهوم رادت تدخل لغرفتها وكفت.
سجاد: -نوفاانة حبيبة اخوها تعاليلي
مطيتنة ضهرها اجتافها تهتز تشهك وتبجي دخلت وسدت الباب تبجي بصوت عالي.
-حبيبتي افتحي الباب خل اشوفج قبل لا اروح
-روح ما اريد اشوفك
-ينطيج كلبج نرجع مكسورين الخاطر والخسارة خسارتين.
-اني الخسرت كلشي خسرت مبقى عندي شي راح اخوي وراح كلشي حلو وياة.
-الله يرحمة كلنا على هذا الطريق امر الله هذا نموت رواحتنا حرام الله مايرضاها ادعيلة اقريلة قران لاتعذبينة حياوي مايكدر يشوفج زعلانة
-صح بس راح وعافني بقيت وحدي عافني واني جنت منتظرتة ياخذني وياة
-تريدين تجين تعاي ويانة يلا جهزي نفسج
-ما اكدر اروح
-لعد احنة راح نروح ماتشوفينة، ديري بالج على روحج واتذكري دائما عندج سند وراج ما نعوفج للموت
شهگت بصوت عالي غصت بالبجي: -كافي بجي حرام عليج تعذبينة كاافي.
گام سجاد يكسر باب الگلب يمسح دمعة تنزل عشرة راد يطلع من المطبخ وطلعت تركض وراة طفرت حاضنتة وتبجي بصوت عيوني راحت شهل محنة الشايلينها احس گلبها راح يوگف اخذها من ايدها غسل وجهها وشرباها ماي كوة تجر نفس وجهها صار احمر طماطة.
مجلبة بيدة تشهك ماتكدر تحجي
-روحو وي سايق يمشي على كيف. سيارة السيارة عوفها لاتشتري امشي عبرية ختولي لاتجيب سيارة.
يمسح على وجهها يهدي بيها دخلو مهند وعبدالله تحضن بيهم واحد واحد ما وكفت دموعهم شسوو بية ورمن عيوني واني اعاينلهم.
-لاتعوفونة وحدة خطية يستاحش مو تنسونة ترة هذا اخوكم اكلنا سوى وكعدنا سوى وضحكنا لاتنسونة
فقدت تبجي كل شوية ينگطع نفسها يسكتون بيها خطية سكتو من شافو حالتها ترجف وتبجي.
-عوفو غرفتة فارغة وملابسة لحد ياخذ منهم لاتاخذون ملابسة عوفونهم مايقبل توصخونهم.
تذكروة وسولفو بية حتى ماتنسوى وين ماتكعدون سولفو بية جيبة طارية مو تنسونة حبابين.
-اي بس اسكتي لا گلبج يوكف على كيفج شگلنة قبل شوية مو گلنا لاتبجين تأذينة
-اي اي ما ابجي هو اني ما ابجي بس عيوني مريضات ماعرف شبيهن يبجن هسة يسكتن. بعد مراح ابجي بس هو مات بعد ميرجع بعد ماشوفة ولا احضنة ولا ولا يسولف وياي ارريدةة جيبولياااة ليش عافني ها ليش عافنة مو احنة خطية سرى مو خطية هم ليش عافنة وراح ها ليش.
شهگاتها گطعن گلبي حضنها دموعة تنزل بغزارة يمسح راسها يريدها بس تسكت گلبها وگف.
-كافي نوفة لاتعذبينة اكثر
ابتعدت تمسح بوجهها وترجف مشت لغرفتها وتحجي بصوت يرجف.
-الله وياكم ارجعو لبيتنا اني هنا زينة زينة.
راحت تركض وعمتي راحت وراها شوية وطلعت تگطع الگلب عيونة مايسكتن الخسارة خسارتين هم بتها وهم ابنها ودعناها ورجعو لبغداد شايلين حزن الكون اما نوف الها عالمها الخاص بس يطلع انمار تسد الباب لو تنكلب ماتفتحة لا تاكل ولا تشرب انتهت خلفلة على انمار يوكلها صار يرجع علمودها كلش تعلقت بية.
سرى
يموت الانسان بموت اليحبهم صرت اشوف الدنيا سودة مضلمة مابيها لون ولا طعم ماحس بشي حتى طعم الاكل ما احس بية ماتت روحي وشيعتها بيوم شيعو حبيب روحي وصديق طفولتي. يافرحة ما دامت كلشي ماشفت منة بعدني ماشبعت من عطرة ولا لعبت بشعرة السرح شلون اعيش واني فاقدة روحي ودافنتها.
من يوم الفاجعة ولهذا اليوم محسوبة عايشة اتمنى اموت وارتاح روحي كل شوية تطلع راح انجن صورتة ماتروح من بالي ضحكتة نضراتة عطرة حركاتة متت شتعلت روحي بقة بيني وبين الجنون خيط واحد ماكدر اسوي شي واحد يحطون الاكل كدامي يجي بالي شلون اكل وهو ميت ماكدر استوعب ولا اتحمل الفكرة بقت رحمة ربي التنقذني.
ادوية ومغذيات ابر ذني المبقياتني عايشة اخ يا وجع گلبي شيحملة دا موت من القهر هذا اليسمونة الموت البطيء داحس بية.
صورتة بالي اتخيلة واتذكر سوالفة وحركاتة وابتسم حافضتة وحافضة كلشي بية عقلي مخزن كلشي يحبة غمضت عيوني وانتبهت للمغذي خلص كوة تحركت كطعتة وغمضت عيني بلكت انام شوية بين الحقيقة والخيال مرني طيفة يمسح على راسي عيونة حمرة تنفست بقوة اريد احجي اريد احضنة بس مكدرت حتى حجي مكدرت احجي.
باوعلي بنضرة عتب وتعب كلش ضايج عاتبني ونزلت دموعي.
-شسويتو بية جاي تعذبوني سرى جاي اتعذب بسببكم من جهة انتي ومن جهة نوفاانة ومن جهة سجاد كلكم جاي تعذبوني ليش هيج تسوون بينة
-نحبك حياوي احنة كلش مفتقدينك ارجعلنا نريدك.
-عوفوني مرتاح مكاني عاجبني خوش مكان احسن من هنا بس انتم جاي تخربون عيشتي بحزنكم وبجيكم ما اريدكم تبجون اني ابتعدت صح خلوني ذكرة حلوة بكلوبكم.
انتي امي سجاد اخوتي نوف سرى نوف ساعدوها نوف مو زينة لاتعوفونها توكع ساعدوها.
-تريدك نوف ماتكدر تحمل غيابك
-تتعود تتعودون كلكم بس لاتبجون وتعذبوني عيشو حياتكم ارتاحو مثل مامرتاح اني ارجعي لدراستج سراوي ترة ازعل عليج
قبل راسي احس ماكاعد احلم حقيقة هذا هو حياوي زايرني بالحقيقة عصر ايدي بين اجفوفة رجعتلي القوة بجسمي النحيل.
-لاتبجون كليلهم لايبجون اني زين مابية شي ونوفانة ساعدوهااا.
فزيت من الحلم كلبي يدك بقوة وجهي يصب عرك صاير نار عيوني تفتر بالغرفة وينة قبل شوية جان هنا ادور بالغرفة بلكت الگة اله اثر رغم متاكدة حلم
صبت دموعي وصب كلبي حنية وياة شلون مايريدني ابجي دخيلك ياربي ساعدني وهون فراگة علية.
فتحت الشباك دخل الهوى بارد يعاكس بشرتي ويطفي نارها مسحت دموعي واخذت نفس طويل دخل لگلبي الكئيب نوع من الطمئنينة واني اسمع لاذان الفجر صوت عذب يهدي ضجيج الروح المتعبة رحت غسلت وتوضيت لبست ازار الصلاة ولزمت المصحف الشريف اقرا كلماتة العظيمة انتعشت روحي اذن صليت ورجعت اقرالة قران بمكان ما ابجي واعذبة هم اشغل عقلي وهم اريحة.
-وٌبًشُر آلَصّآبًريَنِ آذِآ آصّآبًتٌهّمً مًصّيَبًةّ قُآلَوٌ آنِآ لَلَهّ وٌآنِآ آلَيَهّ رآجّعٌوٌنِ.
تنفست بقوة شسويت بروحي وبية كملت جزء وهديتة الة طلعتلي ملابس ورحت اخذت دوش
جهزت روحي خلص اليوم اداوم مااريد اكسر بية وصاني ارجع وقبل لايروح وصاني عليها ارجع واتخرج اخذ الشهادة نيابة عني وعنة اخ ياعزيز روحي حتى تخرج ماتخرجت.
تلونت بالاسود مضهري وداخلي حضرت ملازمي وگلبي نارة مشتعلة بس احس من قبل نزلت للمطبخ بغير نفس سويت ريوك اكلت لكمة وكعدت صافنة بالفضاء.
نهى: -اللهممم صلللل على محممددد والللل محمددد ياااايييي هااي صدك سراوي رجعتي
ابتسمت بحزن وهزيت راسي حضنتني طايرة فرح ممصدكة تعبتها وياي وتعبت امي فوك تعبها خطية ركضتلها نهى تبشرها اجت ترفرف بشيلتها تبوس وتحضن بية بس ذني الاطلع بيهن من الدنيا ربي يحفظهم الي.
-فدوة اروحلج بنتي حبيبتي ارجعي سراوي القوية الحياة ماتوكف على شخص حتى الله ميقبل بالحزن عفية عليج زين تسوين.
هزيت براسي ماكدر احجي صوتي رايح اتصلت بالخط دقايق عدت واجة طلعت اكمل مابدينة بية لازم اخلي وقت لحلمنا وقت الة مو كل الوقت اخلصة حزن هذا تفكيري طول ماوصلت للجامعة.
امشي بروح مفقودة اتذكر من نمشي سوة اتخيلة گدامي بكوتة الطويل وشعرة النازل على عيونة اخلط بين ذيح الايام وبين الجاي اعيشة اباوع للطالبات احسهن يباوعن علية واتذكر ماموجود وياي كعدت على احد المسطبات حيلي وقوتي خانني.
اتخيلة يمشي وي اصدقائة اباوع لأصدقائه يباوعولي السواد مغطيهم دموعي تنزل اتخيله بينهم يدير وجها يباوعلي ويرجع يدنك مسحت دموعي ورحت لمحاضرتي كلها تقدملي التعازي مو لازم المفروض التهاني ولازم اكون فرحانة وضحكاتي تارسة الدنيا اخ منج يالدنيا نزلتيني من فوك الغيم للگاع شخليتي بية تكسرت وطلعت روحي.
احاول اركز بالمحاضرة وارجع انسى والتفت لمكانة عبالي الكاة يباوعلي بس الكة مكاني فارغ الرب رحمني وانطاني القوة وماخلاني انهار بنص الطلاب
طلعت من المحاضرة نفسي مگطوع گوة اسحب الهوى مرت من يمي تگلب بشعرها علامات الحزن على وجهها اتذكر شكد جنت اتعارك وياة من وراها جنت احسب تاخذة مني ماحسبت للموت حساب
-البقية بحياتج مثواة الجنة ان شاء الله
-ان شاءالله.
-صيري قوية ميحب يشوفج بهذا حالج.
مسحت دموعي وحجيت الغصة خانگتني
-ياريت لو ماخذتة مني تدرين لو لو افكر انطية الج او لغيرج ويحترك گلبي بس كون عايش واشوف طولة.
طبطبت على ضهري: -لاتتخيلين اقبلي بالواقع هذي الحياة فراك تعب ضيم لازم نتقوى.
شكد اثرن كلماتها بيها وحبيتها لان راح حياوي بعد عليمن انغار منها مستندة على صديقتي تواسي وتحاول تطلعني من الاني بية شلون اقنعهم روحي هو اكو واحد ينسى روحة لا ينساها مر اليوم من اصعب الايام رحت لبيت عمتي.
واكفة بالباب مرت عشر دقايق ربع ساعة نص ساعة عدل واني على نفس الوكفة انتظر يفتح الباب واشوفة ينملن عيوني وارجع افرغهن حتى توضح عندي الرؤية اريد اتحرك وادك الباب ماكدر شي مانعني يرفض يستقبل فكرة بعد ما اشوفة.
-ليش واكفة هنا
گلبي طار ورجع حط مسحت دموعي وبلعت ريگ
-هلو عبدالله اجيت ادخل مواگفة.
ماكدر اباوع بشكلة يذكروني بية دخلت للبيت تنفست بقوة اشم عطرة بالبيت احس بية موجود اسمع انفاسة ضحكاتة صوتة كل ما اتقدم اكثر احس بيهن وينك اطلعلي اجيتك يبو ملگة يرد الحيل.
بين الحقيقة والخيال فرق بسيط جدا ما اريد اعيش بالخيال وبنفس الوقت ما اريد اعيش بدنيا مابية هو
تلگتني امة حضنتني تشم بية وتنحب بصوت عالي
صرت اهدي بيها.
-عمة الله يخليج كافي مو زين تأذينة.
-يمة يحياوي ياضوة عيوني خطيبتك تلگاها تعال يمة لاتعوفها حايرة بزمانها يبعد حيلي خذيت حيلي اصبر وواوسي روحي لو اصبر الناس.
-عمة اروحلج فدوه كافي بجي داتأذينة بجيج البارحة اجاني زعلان منا.
سولفتلها الحلم ضربت على رجلها ومسحت دموعي گلبي يرجف ماگدر ابجي وارتاح رحنة للمطبخ نكمل الثواب المسويتة عمتي تطبخ واني اساعدها اجة مهند وعبدالله يصبون ويانة برياني دجاج اكلتة المفضلة عاف عبدالله البيدة وطلع نسمع بس صوت صريخة العالي شنصبر دخيلك يا اللهي ارحم گلوبنا راح تخلص من القهر.
اجة سجاد سلم واخذ الاكل هو ومهند يوزعونة صعدت لغرفتة ايدي ترجف ما اريد ادخلها واتسودن وفعلا تسودنت اصرخ واضرب بنفسي من اتخيلة افتر وادور حول نفسي مثل المجنونة ساعة اشر بيدة اكول هنا قرينة ساعة ادير وجهي هنا حجينة كذا سالفة هنا تشاقينة هنا نتعارك سوة وسجاد يضوجة بسوالفة هنا دخلت علية ينزع.
وكف كلبي اجر النفس جر رحت للكنتور حيلي بايد ودمعي يجوي خدي جوي ادية ترجف فتحت الكنتور وانهاريت ملابسة معلگة بعطرهن مايلبس الا ماركة عمت عيني عينك طمها تراب وعيني صلفة.
اشم بملابسة بحرگة اريد اخليهن بگلبي احتفظ بيهن اشمهن كل ما اشتاق تعبت من البجي اجت صورتة كدامي واتذكرت كلامة بالطيف استحيت على روحي ليش اعاندة حتى وهو ميت ما اخلية يرتاح بس المشكلة مو بيدي شكد احاول ماكدر.
اخذت عطرة المفضل خليتة بصدري وطلعت مسحولة روحي وصلني سجاد لبيتنة طاقتي صفر سبحت وطلعت ورقة وقلم انظم وقتي بيها.
كتبت وقت الفلاني ادرس بية الوقت الفلاني اخلصلي شغلة بهلوقت اقرالة قران واخر شي افكر بية واسولفلة على كلشي مال القلم وكتب.
- الك بروحي عشگ ماينحسب لو كعدت العالم تعد ماينحسب عشگي الك يماخذني بس الك كلي الك اكعد لا تخليني اتأملك، ياطبيب روحي اني بعازتك منين اجيب لجروحي دوة لو عزلت، ياخذني الك ذاك الحنين بس ارجعلي خاطر اغفى مرتاحة زين.
انتهى اللقاء لكن الوعد لم ينتهي الحب الذي لك سيبقى يزداد عاما بعد عام مهمى طالت الايام على لقائك سوف ابقى بانتظار لقاء يجمعنا نم ياحبيب روحي فروحي تحرسك فقط نم بسلام ودع الروح تلقي السلام.
سابقى بانتظار يوم يجمعنا عند رب كريم عشق الطفولة لن ينتهى. وعد من تلك الطفلة الى ذالك الفتى الملفت للنظر.
(كتبت هاي الفقرة كوة عن نفسي اكتب وينكطع عن الهوى ).
نوف: -انام وافز وارجع انام يوم اسوء من يوم احس بنفسي تروح لطريق مخربط تدمرت كلش مااسوي شي عندي قدرة على النوم فضيعة اكعد منعسة ما اريد احجي ولا اكل ولا اتحرك بس انام حتى الصار مرات انساه. احلام بشعة تخيلات سوداوية اتنرفز من اسمع صوت يمي ما اطيق بشر يمي.
يسحب بالغطا مني مجلبة بية بقوة اتعجب بنفسي ساعات ماكدر احرك ايدي وساعات تجيني قوة رهيبة وبسرعة تختفي.
-كووميييي لا تخلليني اطلعلج وجهيي الثاانييي
-وليي ماااا وليييي عوفنييي انااام عووفوونييي
-شلوون وياااج
رفع الغطا مني الهوى ضرب جسمي لميت ادية لصدري بردانة مغمضة عيوني بقوة وراصنة على سنوني بعصبية.
-خررب بيكممم كلكم كلكم اشتعلتو بنار ونفط الله يحرگكم ويهلكممممم عووفوونييي شترريدوون منيي.
شالني بحضنة من الكاع اضرب بصدرة اريدة يرجعني بردت ماهتملي طلعت لساني علية مرات اوعى على نفسي جاي احجي كلمات رذيئة كلش ومن اشوف ردة فعلة ابقى ابجي حتى لا يأذيني ساد حلگي بيدة دخلني بالحمام وسد الباب وكفت رجلية بالكاع ما احس بيهن دفعتة من صدرة بقوة اشار على الباب كوة احجي كلمتين.
-اطلع اطلع ما اريدك اني، اسبح روح روح.
لزمني من جتفي كعدني على الصبة دفرت رجلة برجلي فتح عيونة على وسعهن رجعت ليورة اترقبة بتوتر.
-گتلك اني اسبح اطلع اعرف اسبح
دار وجهة يستغفر باوعلي بنظرة طويلة درت عيوني منة.
-اسبحي عدل افركي جسمج اذا ما مليفة اسبحج من جديد
هزيت براسي طلع طفرت سديت الباب وراة اتنفس بقوى كعدت بزاوية الحمام لامة جسمي وسرحت بالفراغ عقلي فارغ مابية اي شي لا اهلي ولا نفسي.
ولا ذكرة فارغ تماماً ماحسيت شكد مر وقت طفرت من مكاني من دك الباب بقوى سديت اذاناتي بيدي مزعج كلش.
-كملتي
-شعليك شعليك
-اللهم طولج ياروح ترة افتح الباب عندي مفتاح راح اجيبة
-لا لا جاي اسبح هسة هسة اكمل
ادية ترجف اجيب الليفة منا توكع منا سبحت شلون ماجان وطلعت ارجف لافة روحي دخل وراي كعدت على السرير احجي بدون تفكير.
-حقراء كلكم حقراء ابوك وكلهم حتى انت حقير ماتعوفني نايمة جلا.
سد حلگي بيدة اباوع بعيونة بقوة عكسي نظراتة تايهة مايعرف شلون يتصرف.
-شبيك تخبلتي شكر صيري عاقلة ليش تخليني اتخبل عليك
-ملح اني خوش ملح مندوزي يشحط مو شكر خوش مو شكر
جسمي يختض اريد اسيطر علية ماكدر اخذني من ايدي شمر مخدة كعدني عليها يمشط شعري ما اهتملة ابد لو هو يمشطلة ويكومني لو ابقى يوم كامل على كعدتي بدون اكل ما اجوع.
-فوك حملي تحملت وين اروح والله حرت اوووف
-اوووف اووووف اووووف.
-جاي تخوفيني عليج شمالج ولج يرالدلج واحد كاعد يشوف ضيمج ليش تسوين بروحج هيج
-لتدخل بية تمام مشطلي وبس اريد انام نعست
-لفت شعري وسحلني من ايدي للكنتور طلع بشت وشال يريد يلبسني ادفع بية ما اريد اطلع من البيت
-عوفني الله يهلكك عوفنيييي
-لاتخافين الله هالكني من زمان
طبگني على الحايط مثبت رجلية اصارع بية بقوى فحطت بيدة احس گلبي يدك بقوة استسلمت اتنفس بقوى لبسني وطلعني من الغرفة يسحل بية واني اصارع.
الضوة دخل بعيوني اشوف الدنيا ترمش ساعة سودة وساعة عادية اتنفس سريع طلعني بوسطهم صعدني بسيارتة الاخذني بيها مرة صعدت وكعدت ضامة روحي واهز. اتصلت بشخص.
-اي وين صاير بالضبط ها اي اندليت بس كون موجودة.
-وين ماخذني
-لعفج
-وين صايرة
-بتلفات الدنيا
-رجعني رجعني
سكتت گلبي لزمني كعدت عاقلة مخلية ايدي على گلبي.
-لا اله الا الله يارب صبرني وخلصني استغفرالله
-لا تصير متدين مثل حياوي متكدر.
رجعت راسي على الجامة دموعي تنزل اشتاقيتلة للحظة ردت اگلة اتصل بية وكطعت كلمتي من تذكرت ذاك اليوم اعصر براسي استرجع الصار ما مصدگة مات وبعد مايرجع.
-لا لا جذابين اني اجذب ههههههه
اضحك واحجي وي نفسي كلام مامفهوم لحد ما طبكت السيارة نزلني ارجف بيدة سحب نفس عالي
وشد على ايدي.
-ما ناقص. رجيف روحي هواي.
التلفت بالمكان زرع وبيوت طين متباعدة عن بعض بمسافات اجة باتجاهنة ولد شاب سلم على انمار وطلعت وراة حجية صرت بضهرة مجلبة بية.
-هلا بنمر والوياة يمة نورتو ديرتكم وبيتكم
حضنتة تبوس بية باسها براسها وبيدها: -هلا بيج سلطانتي مشتاگين
-يابعد چلاي وحشاي تشتاگلك مكة منين هاي الغزالة البحلك
طلعني من ورة ضهرة جلبت بصدرة ارجف خايفة من الكل احسهم يريدون يأذوني مسحت على راسي وحجت بصوتها الحنون.
-هلا بيج حبيبة شمالج مستوحشة انة سلطانة انتي ياهي
حجيت بصوت يرجف: -نوف نوف
-تعيشين يحبوبة تعاي وياي
-لا لا لا
جلبت بانمار بقوة اشرلي بعيونة روحي فلتت ايدي ورحت وي الحجية اخذتني لبيتها دافي وصغير مفروش زوالي مخططة بالوان ازرگ وابيض علكت عيوني على الحايط بية صورة الائمة مجتمعين كلهم
-ذولة يحبوبة شفعائنة يوم القيامة انخيهم واتنخي بيهم دوم.
التفتت للصورة رافعة اديها تدعي.
-هنا يعلي يبو الحسن ماتطلع علت هاي الفرخة جا هو نمر عايز ضيم يبو الحسن مثل مارديتة لية ردها لية.
اخذتني بحضنها تمسح على راسي وتسولف وياي مرات اجاوبها ومرات اسكت ما الكة جواب الها جاب الولد جاي كعد انمار كدامي اخذ الصينية صب جاي النة كلنا حط استكاني كدامي يهتز بيدي نزلتة من ايدي ضليت اباوعلة يشرب سحبني اله شربني من استكانة ورجع صب مرة ثانية شكد ماينطيني اشرب خلو كدامي صحن كعك اخذت وحدة اكرط بيها هسة يلا حسيت بالجوع شبعت مسحت حلكي بردني.
كمت انعس كلش طفيت تمددت بحضن الحجية وغفيت كعدت انمار يكعد بية مشيت وياة مغمضة عيوني ماتحلمت ولا فزيت اول مرة انام مرتاحة من بعد فترة طويلة.
كعدت لفراشي بوجهي ومنا الدنيا ليل ما حسيت بشي.
سفانة: -كعدت الفجر صليت ولاگاني انمار صبح علية وصاني على نوف.
-فديوة (فدوة) ديري بالج عليها مدري شبيها بس اخلص شغلي افرغلها راح تسودن اكعديها لاتخلينها نايمة وديلها ريوك انة ما اطول.
-والله انقهر عليها شكثر احاول وياها بس مايفيد
-الله كريم بس اليوم اخلص شغلي واصفالها لو انة لو هي
طلعت محترك كلبة الله يساعدة شيصير بلع العركة وضل بالبيت علمودها وخاصة من راحت عمتي هند صاير يبات بالبيت والا ما يلفي.
رجعت ندهت فارس وغفيت كعدت الصبح فارس طالع طلعت للمطبخ البيت يصوصي بعدهم الجهال ماكاعدين سويت ريوك اخذة للديوانية واجت اسراء طبعاً اسراء من الفاتحة مارجعت لاهلها.
-خليلي مخلمة وياج.
اخذت صحن وصبت جاي وكعدت تتريك اخذت الصينية محد موجود من عمامي بس حبوباتي خليت الصينية جدامهن وكعدت اتريك.
-سفينة وياج حضري الفرخة ناخذها لسيد يقرا عليها
جدة حكمة: -داست من اخذوها للمكبرة زعم تشخط البت
نوفة: -ياهو الكايللهم ياخذونها فرخة صغيرة وينها وين النجف والمكابر هساع تلكين تلبس بيها جن والعياذ بالله.
حتى ريوكي ماكملتة طفرت رحت لغرفتها اكعدها ما لكيتها رحت للحمام فارغ نزلت ادور بالغرف خميت البيت خم گلبي انعصر وين راحت لبست عباتي ورحت للبستان ادور عليها بلكت الكاها كاعدة تشم هوى صفگت ايد بيد حلكي يبس رجعت مبهوت وجهي مرت ساعة وهي ماكو البيت انخبص خبص.