رواية بين سلاسل العادات للكاتبة كفاية كاظم الفصل الرابع والأربعون
سجى.
مر اسبوعين على زواجنة كاي زوجين عشاق وماتخلة من المناكر اكيد جنت بالمطبخ اريد اسوي غدة ما اسمع اله الباب تعطر رحت اركض اشوف شكو واحس نغزني من سمعتها تصيح الحگي رجلج
حجيت بهلع: -يمة شبية رجلي
وجهها احمر والعباية واكعة من راسها جمدت اطرافي لزمتني تعت بية للشارع وتخرط بخدودها
ام ارفد: -راح يكتلة الحگية ولج يخسر شبابة بالسجون
رديت بذهول: -يكتلمن؟
-عاصم عاااصم مووتة موتةةةة.
خطيت عتبة الباب وهي راح تركض تحشم بالناس بقيت بمكاني اشوف الهوسة ناس اجت تركض يطلعون عاصم من ارفد كوة طلعوة منهم من شفت وجههة شهكت كلة دم اخذتة الناس يشوفون الدم وارفد لازال يتهدد ويريد يرجعلة لو ما الناس الازمتة رافع اصبعة يصيح بصوت عالي...
ارفد: - بس تطب المنطقة موتك على ايدي يصير
والناس تهدي بية دخلت جوة من خزرني ضليت بالحوش اربط خيط بابرة شنو سبب هاي العركة اباوع لعمتي ماكو مارجعت وين راحت.
كمت افتر شوية ودخل صاير بارود اول مرة اشوفة هيج ماحجيت وياة شي دخل جوة يخابر ويهدد رحت كملت الغدة وبيومها اجت ناس كبار لبيتنا حسب مافهمت عاصم رجل امة ارفد يريد يطلكها منه وهو مايقبل مختفي من فترة طويلة وهسة رجع ومثل مفتهمت بين فترة وفترة يتردد للبيت وارفد جان جنونة لان جان معذب امة وماخذ املاكة.
عمتي بقيت يم بناتها اسبوع تقريبا وهو مايتحاجة جاي نتعشة مدنك راسة وعاكد حاجبة هزيت بيدي وكمت من مكاني اشو ولا شافني لبست عباية وكعدت كدامة لزمتها من بيدي وتحمحمت.
-ارفع راسك خالة لاتستحي ماكو واحد غريب
رفع راسة فاز عبالة مرة غريبة باوع بوجهي وطكها بضحكة: -خبالو ولا تجوزين
-شلونك خالة شخبارك
-والله يا خالة بحال الضيم
-افاا شمالك بحال الضيم جا موش انت عريس سمعت
-عاصم الچلب خل بيها عريس.
-اشتعلت روحة ابن المصموط شعدة وياك
-دعوفي السالفه تلعب روحي من طارية
-امك شوكت ترجع
-هم عوفيها
-والله خالة انت غثة مو مال واحد يحجي وياك ضل ضل كالب وجهك هيج الطم بثنين اديك
-بس السانج خالة
-اودعناكم خالة والله يبردكم.
كمت والعباية صارت جواي طاحت من راسي جنت لابسة تراك صيفي لان البيت فارغ وماخذة راحتي باللبس شفتة يباوعلي عوجت حلكي واخذت العباية ومشيت باتجاة الاستقبال حسيتة سحبني من ضهري ضربت ايدة عدة مرات...
-دعوفني ياءء ياءء ولك مرة غريبة انا مو سجيوة
وراي ضبة زعاطيط
ضحك بصوت عالي ودارني علية لازمنة من خصري
-هسة عليمن تضحك اكو شي يضحك!
ارفد: -لا يابة
رجع كذلتي ورة اذني: -شني هاي سجيوة
-شني.
-جاي تسوين اغرائات وانا اكول هالبت ماعدها مشاعر
-يا اغرائات عيني شلابسة بدلة رگص اشو تراك
-جا التراك هين! غير ضابج ضب وهاي شعرج مسويتة ذيل حصان يفتر وراج
-لا هذا ذيل زمال.
خليت ايدي على حلگي ضحك ومد ايدة يمشط بية باصابعة: -ايباخ والله سرح
-ديلا عيني ابو السرح اريد امشي شذكرك بية هسة اودعناكم خالة
سحبني للغرفة يضحك: -يبوو ارفد يبووو
-وجع شمالج يبوو ما يبووو.
-مو صوجك صوجي انا اضحكك واطلعك من جو الكابة لو مخليتك على صفنتك مو احسلي
-شفتي هذا اليسوي زين
-صدك لو كالو سوي زين واشمر بالشط
-بت اللذين السانج هلبت يعرف يحجي غزل بس شطولة كلشي مامستفاد منة
-تؤبرني ابن عمي مشان الله اتركني
-اهلين بت عمي ولو تامريني
ضحكت بصوت عالي...
-سجوة
-ها
-هيج نامي
-لا اشو الا تحجي
-ام السان العرمة احبج
-هسة شني هذا غزل ذم
-غزل يبا
-ها جا خوش حتى انا احمم
-شبيج انتي؟
-هاي.
-خرب غيرتج من تزوجنا ولحد هسة ماكلتي احبك
-مو شسمة اسحتي احجي
-اي تستحين واضح المستحة عمي انا رجال فقير اتحسر على الكلمة
-ديلا احبك
-تحجينها من ورة خشمج
طفرت من مكاني صرت فوكة خانكتة واصيح: -احبك احببك تسمع سمعت مو يا ناس انا سجيوة احب الاملح الصاك
كلبني وصار فوكي عاقج وجهي بيدة: -ياهو الاملح
-مو عليك
-اعلمج شلون تكولين عني املح بعد
-لا ارفد بداعتهم مو نيتي lm sorry
-تفيدج.
طلعت فستان بسيط ونسقت وياة شال ماخليت مكياج بس شوية حمرة لان اخواتة ورجولتهن راح يجون كشخت ورحت اجهز بالضيافة شوية واجن رجعن امهن راحن ومر يومين ارفد مايحاجي امة وهي ماحاولت وياة ولا الها غرض بية.
ماعدنا شي البيت هادء وحياتنا من بعد ذاك اليوم هدأت.
جنت بالحمام اسبح ارفد طالع وعمتي عفتها بالاستقبال اتابع برامج جاي اليف والجو هادء سمعت حركة بالبيت حسيت اكو شي كملت بسرعة وطلعت المنشفة فوك راسي ردت امشي لغرفتي وجذبني الصوت جاي من الاستقبال رحت باتجاهة امشي بخطوات بطيئة وداخلي يكلي لا لا ترحين بس فضولي يكلي روحي وصلت لباب الاستقبال جان مفتوح وانصدمت بالجاي اشوفة جسمي قشعر
والحرارة صعدت براسي...
نو.
اكثر من اسبوعين مرن على تواجد سرى بالمستشفى مخلينها بغرفة خاصة والطفل كذلك يرى حالتها خطرة واما الطفل تعبان وايامة ناقصة بية امل يعيش احسن من امة المنتهية
الاجهزة مشكلة بيها من كل صوب ومحد يدخللها
غير الكادر الطبي
لا ليلي ليل ولا نهاري نهار حجايتها تاكل بكلبي وهي توصيني على طفلها كلبي يوجعني اخاف يصير التتمناة وتلحك اخوي...
الكل يدعي الها بالسلامة محد يخليها وحدها امي واخواني كل يومية يجون من غير زوجها الخابص الدنيا والقلق ماكلة اكل كاعدين بالاستراحة اني وانمار وسلينا واخوها على جههة اباوع لانمار وجههة مقتحن وبالة مشغول اموت من اشوفة هيج سحبت ايدة خليتها بين ادية امسد عليهن باوعلي ابتسم بتعب رفعت راسي وصدت عيوني على سيلي عيونها علينة من انتبهتلها كامت طلعت.
الجو كأبة كلش وانمار باقي وي باهر عفتهم من شفتهم يتناقشون بمواضيع الشغل امشي بالممرات
شفت سيلي تمشي بسرعة رحت وراها ماعرف ليش
اريد الحك بيها ماكدر جانت نيتي اسولف وياها
صدمتني من شفتها تبجي منهارة وصلت يمها خايفة واسمع الممرضة تكلها: -بعدج شابة حرامات تسوين هيج احتمال يصير بيج شي ياما بنات ماتن ليش سامعة بالموضوع عادي والله خطر
ضربت على خدها بقوة وجهها احمر دم.
سلينا: -يخرب كلشي حياتي وحياة غيري ماريدة مارريدة ليش هيج والله مامسوية شي والله
بقت الممرضة تهدا بيها واني رحت مافهمت الموضوع ولا وضحلي بس من هدات كالت: -احس نفسي مخنوكة على سرى ماعرف تعيش او لا
-ان شاءلله تعيش سرى قوية تعيش تعيش
بينت مصدكة كلامها ورحت وياها لمكانة كعدت بصف انمار مد ايدة ورة ضهري وهمس: -جوعانة؟
-لا خاف انت جوعان؟
هز راسة وميلت راسي على جتفة باهر جان يفتر ويحجي مكالمة انتبهت لسلينا طفرت تركض مخلية ايدها على حلكها فكرت صار وياها شي ردت اكوم وكعدني انمار...
انمار: -عوفيها
-خاف بيها شي خطية
-مايخصنا
وجهها انكلب كلاب بس ينافخ وعينه على الطريق الفاتت منة بعد فترة رجعت وعيونها مركزتهن بعيونة بهل لحظة زارني شعور سيء وحسيت نفسي اختنكت ماحسيت غير انمار كام من مكانة طلع بقيت اباوع وراة رجعت نضري لسيلي...
-انتي زينة.
-اي تعبانة ارجع للبيت مع السلامة
-الله وياج حبيبتي
بعد فترة قصيرة اجة باهر وجهها احمرر وايدة ترجف وكف كدامي يريد يحجي مايكدر حتى يحجي نهضت من مكاني مسح كصتة وكال...
باهر: -الطفل زين كالو عادي تشوفونة، ترحين وياي
هزيت راسي ورحت امشي وراة حالتي مو احسن منة، الفرحة غزت روحي والساني يلهج بالحمد وكفت اقدامي وعيوني راحن لطفل صغير كانة لعابة بشرتة حمرة خليت ايدي على حلكي اضحك وابجي بنفس الوقت...
شالة باهر بحضنة يضحك وعيونة مدمعة
باهر: -شوفي شلون صغير!
-اي كلش
-احمد حبيبي اني ابوك صدكني راح احبك بكد الدنيا واعيشك احلة عيشة ابوك اني ابوك
مسح عيونة بطرف كفة واني اشهك من يذكر اسم احمد سرى عافتلنا حياوي النسخة الصغيرة!
يهز بية ويشم من بعيد ريحتة لزمت ايدة الصغيرة قشعر بدني: -حبيبي اندعي لماما تصير زينة اليتم مر ماينجرع ادعي لربك يكوم امك بالسلامة.
اخذو الطفل صحتة متحسنة بس الرئة ماكاملة عيني على باهر احسة ابوة من صدك توالت الايام بس الطفل نشوفة باهر طاير من الفرح بية بس فرحتنة ناقصة بامة كلنا نتمنة اليوم التشيل رضيعها بحضنها ويشتم عطرها...
قبل لا اطلع بلغونا الدكاترة تكدرون تشوفونها عسى ولعل كلامكم ياثر بيها لان جسمها مايستجاب للعلاج وكال الدكتور نصً: -المريضة ماتقاوم للحياة
رافضة تعيش.
سمحو لشخصين وكانت من حصتي وحصة باهر دخل قبلي ماطول دقايق دخلت بعدة كلبي يدك بقوة كعدت يم راسها ودموعي نزلن على حالها
سحبت اصبع ايدها بس هو الوحيد الخلصان من الاجهزة: -طفلج بانتظارج يدور على ريحتج بالناس
لاتكسرينة وتعوفينة بيد الناس صدكي مايعيش براحة لو كلشي توفر اله لاتحرمينة من حنانج
سرى كومي لخاطرة ابدي وياة حياة جديدة انسي الماضي.
احمد ينتظرج لاتعوفينة بغلاة اخوي عندج اليتم صعب سرى لاتعوفينة وراج وتصيرين انانية قاومي
حتى تشوفين ضحكتة.
خلص الوقت وطلعت منهارة عليها ما اكدر اتحمل فكرة رحيلها مر اسبوع وهالاسبوع جان من اسوء الاسابيع المرت علية روحي طالعة النفس كوة اسحبة سرعان ماتغير حالي بعد ماسمعت خبر بان سرى فاقت من الغيبوبة ماتنوصف ذيج الفرحة
وهذا اليوم تسجل من الايام العظيمة بحياتنا.
تحسنت حالتها والفضل لرب العالمين ثم لباهر العلاج كلة من الخارج اشتراة اكثر واحد بينة فرحان خاصة بالطفل...
اخذوها لبيتهم لان الحارث جان معتقد بانة حفيدة والكل يعتقد الا البعض المقربين على باهر جانت اجواء مثالية اجواء الفرحة ملت المكان بوجود الطفل احمد...
كاعدة مقابيلها امسح بعيوني من الفرحة مخلية ابنها بحضنها وتلعب بشعرة الناعم ضحكت ومسحت عيوني: -خاب هو وين الشعر.
باستة براسة بقوة وشمتة: -يصير عندة بس يكبر افييش يا روحي وراحتي
دخل باهر مبتسم اجة اخذة من ايدها بهدوء قربة على خشمة وغمض عيونة يشتم بية ابتسمنة اني وسرى وحدة تباوع للخ فتح عيونة يضحك ويباوعلنة...
باهر: -ريحتو تجنن هيج مختلفة ماعرف شلون بس حيل حلوة
سرى: -ريحتة الاطفال الاصغار هيج
باهر: -سغى اريد اخذة وياي لكل مكان اووف بس ماكدر شلون ورطة هاي استاذ احمد من هسة اخذ بالي ومشاعري كلها.
بوسة ورجعة لحضنها يباوعلة من بعيد يتاملة: - انتيشة هالطفل
سرى: -هههه سبيعي بعد
باهر: -اروحلة فدوة بكد جف ايدي سرى الضاهر من وراكم انطرد من شغلي
سرى: -الضابط باهر ابو المهمات الصعبة يطردونة شنو بكيفهم أصلاً العراق ينهجم اذا طلعوك
ضحك بصوت عالي: -اي هيج من زمان ارجعيلنا بس خوفتينة عليج
سرى: -اسفة بس مو بيدي
باهر: -اعتذارج مامقبول منا لمن تسويلي حلاوة
سرى: -صار بس اصير زينة.
طلع باهر بعد ما ودع احمد للمرة الالف علاقتة بسرى جانت نضيفة تماماً حسيتهم اخوة اصدقاء خوفة وحرصة عليها وعلى الطفل جان كلش جبير واكدلي بان سرى بايدي امينة حتى امن من اهلها الما انجاب طاريهم...
صحتها ترجع بالتدرج علاج ورقابة طبية لحالتها رادلها وقت وترجع سرى القديمة بس عندها طفل.
سديت المكالمة من امي ورحت سبحت طلعت اركض انطي اكل للقطط ناسيتهن بدون اكل ضحكت واني اشوف اهتمامي بيهن هسة لو ذني اطفال كلهن شيصير صارت عندي رغبة مو طبيعية للاطفال وخاصة من بعد ماشفت طفل سرى والحاح امي...
اسئلة تجول براسي ليش مايصير طفل احتمال بية فد مشكلة لازم اراجع دكتورة...
اجة انمار تعبان مثل كل مرة سبح ونام ضليت احوس علية صار العصر ماتحملت جبت عودة اسنان صرت امشيها على جسمة بهدوء بلكت يكعد.
وفعلا كعد لزم ايدي سحب العود شمرة وكلبني صاير فوكي...
-يمة انهار حختنك لا عليك الله
-ياهو كلج تتحارشين بية مودي عليج زلمة نايم
-واني شلي غرض ماتكمل نومتك
-ماتكلين لروحج جا
-جا عندي موضوع وياك
-يتأجل فيما بعد
-لا عليك الله والله ضروري
-احجي بس اذا خطة حتى تفلتين اخنگج بشعرج
-لا والله مو خطة بس وخر خليني اسولف
دفعتة مني كعد سحبني علية محاوطني بدية
: -شوف اريد اروح للدكتورة
-بيج شي!؟
-لا بس علمود الجهال.
ذب نفس حسيتة ضاج حسيت نفسي انكطع الف فكرة تجي بالي مو جان خابصني هسة شغيرة!
نترت بية بصوت عالي: -شبببيك لييش هييج؟
-شمسوي!
-كل ما اكلك على الاطفال تكلب خلقتك
شكلة تغير فجاة صار عصبي عصرني من زندي بقوة: -كاتلةةةة روحج على الاطفال مو؟
بقيت ابلع بريكي مصدومة من ردة فعلة سحب اذني وكال كلام مادخل براسي: -اطفالي مايبعدون عن عيوني اذا صاررو.
كلبني واخذني بعنف ولاول مرة هيج يعاملني كل شوية يتغير اسلوبة عافني ابجي بحركة احس جسمي مكسر لفيت روحي مكسور شي بداخلي مامتعودة على اسلوبة الهمجي...
دقايق مرت ورجع شالني للحمام بقيت ادفر بية اخر شي استسلمت. كعد ينشف بشعري ويمشط بية بسرعة كانة مستعجل صحت بية بصوت عالي
-عوفني يلا رروح مامحتاجتج
دار وجهي علية صاك على سنونة صاح بوجهي
: -شبيييبج تبجين؟
خليت ايدي على وجهي ردت امشي ماخلاني سحبني بحضنة يبعد ايدي رفع راسي ومسح وجهي: -وخر يلا وخر مارريدك
-مو تريدين جهال انتظري شهر وتجيج النتيجة
-يا نتيجة؟
-اشتعلو ال، مبروك عليج الحمل مدامتي
-ومنو كلك اني حامل
-جا مساع شجنا نسوي
-ليش هي بس اليوم
-كون افتح عقلج واطلع المطاية النايمة
بقة يحجي ويحاول يغير من نفسيتي حسيت اكو شي مو تمام ورفضة للاطفال مو عن عبث خايف من شي جانت جملة جهالي يتربون جدام عيني.
متكررة كلش ضحكت واخذت عضة من التفاحة
-انوب جهال
انمار: -ديلا الفاهية اكرمينة بسكوتج
-ترة زعلانة عليك عود عطلة وكذا وكاعدة بالبيت لاطلعت لاطبيت
-ادللي احلة طلعة حضري روحج
-اي بس قبلها نروح نشوف سرى
هز راسة باي بستة بخدة وطفرت بدلت على اخر حباية اخذت الطريق انكد علية...
-وصلنة لبيتهم خربانة ضحك علية سلمت على صفية ومشيت اشوف سرى روحي مفرفحة على ابنها دخلت ابتسامتي مزينة ثغري لكن سرعان ما تلاشئت من الشفتة بقيت جامدة بمكاني.
رغد...
يوم عن يوم اصر على الطلاق اريد باقرب وكت اتطلك بس جيب اليسمعني ويوكف وي قراري الكل رافض هالشي وضدي ماعدا رحمن الوحيد الواكف بصفي يطمني وينطيني الامل...
-احس كرامتي بالكاع مسحوكة
رحمن: -ماعاش اليقلل منج ومن كرامتج فوك الراس
-فدوة خوية خل يطلكني والله نفسيتي ادمرت من وراة
-يجرالج التريدينة بس يراد صبر.
مسحت دموعي ورجعلي الامل لو بشي بسيط من بعد ماشوف كلامهم ورفض قراري اتيقن اعيش كل عمري تحت رحمتة واسمة يبقة مرتبط باسمي
مثل كل مرة يجي ما يسال عني ولا يجي يشوفني
بس بالاسم زوجتة وحتى هالاسم ماريدة. سمعتة جوة موجود جاي من الدوام النة طبعاً هو مايجي لبيتنا الا مرة بالاسبوع استقر بشقتة وبشغلة.
رجف كلبي من سمعت صوتة شفتة دخل لغرفتنا الصارتلي تفريغ حزني مو اكثر دخلت وراة بواهس مكسور لازم احجي وياة من ذاك اليوم بعد ماواجهتا ولا حجيت وياة...
فتحت الباب لكيتة يطلعلة ملابس حول نظراتة تجاهي وعيونة تفتر بتفاصيلي رجعت الباب وراي ودخلت متضاهرة القوة متسالة شلون احجي وداخلي وخارجي يرجف اطبك بصابعي سوة بادر بالكلام وكال: -بحلكج حجي اشمرية
-ماعندي اي حجي وياك بس اكلك طلكني.
لم شفتة للداخل وشمر الملابس من ايدة على الجرباية اجة باتجاهي واحس اطرافي ثلجت سحبني بقوة من ايدي مقربني علية رجفت بين ادية ودفعتة بضعف.
-عوفني لا تلزمني ماجايتلك حتى تخلص ليلة براسي
ابتسم باستهزاء وعفس ملامح وجهها
جاسب: -وانا ما إلى نفس بيج ولا ميت عليج
-طلگني شكو رابطني باسمك مالك نفس بية هههه حتى انا مالي نفس بيك.
حسيت خدي صار نار اثر جف ايدة لزمت خدي وابتعدت بس سرعان ماتغير البني ادم الى وحش يجهش بعالي صوتة ويردد بخبال مالج نفس بية مو
عيوني ادور الباب احس تيهت مكانة رجلية ترجف من تصرفاتة شال المزهرية سواها تراب رفعت رجلية ورحت اركض لا يضربني بشي يدمرني
وصلت للباب وسحلني من شعري شمرني على الجرباية جمعت حيلي وكمت من شفتة يخلع ملابسة دفعني وشك ثوبي من الطول للطول صرخت بصوت عالي ضربني كاتم نفسي بيدة.
اخذني بالقوة والغصب بهليوم شكو ذرة حب بكلبي تجاهة ماتت وتبخرت بالهوى كلبي صار اسود حاقد كارة اله ولطارية...
الباب يندك اخذ اليريدة وطلع تاركني احس بنفسي وحده قذرة ماجني زوجتة لفيت نفسي وحركت مشاعري وشكو خط رجعة مسحتة صارت عركة جبيرة وانتهت باختفائة وبقة موضوع طلاكي يجول بكل السان يقابلوني بالرفض واقابلهم بالاصرار وماعرف بالتالي اي القرار اليتحقق...
مرت ايام على هذا اليوم رغد القديمة ماتت وانخلقت انسانة جديدة ميتة من الاحساس والمشاعر بعد الخذلان الحصلتة من فئة الرجال احرمهم على نفسي طول العمر...
بديت اشتغل على نفسي واعيش بلا مبالاة شيصير خل يصير وطز بالكل اهم شي نفسي ودراستي رجعت فتحت الموضوع وي سجى وطارت بالسمعتة فرحت وايدتني دخلت الامل الروح الميتة وصار عندي شي مهم وهدف لازم اركز عليهن واكيد بعد التعلمتة صارتلي عبرة ودرس ومو اي درس درس صعب اخذ من حيلي وصحتي وعمري...
خبرت رحمن وكال السنة التجي تدرسين الثانية احس روحي فراشة وطايرة طلبت من سجى تدبرلي ملازم Pdf مرحلة ثانية ماقصرت دزلتي وصرت اقرا ليل والنهار.
كاعدة بالمطبخ جاسب ارتاحيت منه مايوصلنة ولا اشوف شكلة الغثة دخل نزار يحجي بصوت عالي غمني بثنين ادية وكعد كبالي هزيت ايدي وغلست عنة مركزة بالتليفون...
نزار: -ماتكومين تصيحين هاي العوبة
-ياعوبة
-زهيران ام اذان امداني محسوبة علية مرة امدااني.
ضرب كصتة بقوة كتمت ضحكتي وفزيت من صاح بية: -شنيييي شوو ماكلتيلي شبيييك
-ها صدك شبيك
-اريد اتزوج شنية ضوجة حتى المسلسلات وخلصت وين اروح عاد اضحك على زهيران خوش تضحك
-جا ماتزوج
-هو ياهو اليطيها هذا رجلج المجسب تف علية امداج يو ماطلكتية غثة غثة يكلي ماعدنة نسوان اختي مانزوجها
-شفت شلون غثة جا انا ليش اريد اتطلك
-اطلكي احسلج عمي الله يساعدج مدري شلون متحملتة يوووع شلون شكل بعد الله شيسوي بية اكثر من هيج.
-جا ماحاجيت عمي على زهرة
-مو صخام بكيفة الشغلة يكول اريدها تكمل دراسة تصير ثورة خاب دطير دكتورة الخايس
-اكلك لا تجيب سيرتة ترة تلعب روحي فوك ماهي لعبانة
-ديلا يلا شلون شكل تالي عمري اجيج اشكيلج وين راحت سجيوة الوردة زلفها جنة جربوع لازك على الحايط ايباااخ والله البيت اضلم عليها حتى كمت ما اجيكم
-اي والله ذكرتني بيها حتى راح ابجي
-ابجي ولج هاي سجيوة مو كان من كان من اجي تصيح هلا بابو الجمال الرباني.
-كصدك نزار قباني
-راحت من ادينا
صار يضرب على رجلة ويكول: -ضلت بس صورهم مانعرف خبرهم راحم من ادينا شكد بجينا ومايردون، والعشنة بهواهم اذونة بجفاهم راحو من ادينا شكد بجينا ومايردون...
دموعي صارن ينزلن من وحدهن والشهكة تطلع من كلبي صدك ممكانها فارغ جانت محلية البيت بسوالفها هسة النهار كلة وحدي اباوع لنزار بدل المود وصار يصفك بثنين ادية ويكول...
-وزهورة وشحلاها وكصايبها وراها وبنيتي وشحلاها ونزار وراها.
التفتت عليها واكفة بالباب شعفتها صاعدة وتضحك مكيفة الفطير فتح نزار ادية ثنينهن وهي اجتلة تاشر بيدها بهلو سحبها لحضنة ضليت فاتحة عيوني كمت من مكاني وصرت كدامهم...
-هاي شيصير هنا شبيك نزار
نزار: -شنشول حضرتج تف عليج اخذيها الحضنج هسة شني طار نصها هاج الفرخة
دفع زهراء علية مفهية يسويلها حركات بوجهة مو بس هي تضحك حتى اني وياها على الواهس.
كعد وهي ضلت واكفة جاي الاحظ تعاملة تغير وياها وهي هم كل مايجي تكشخ وتروح يمة تفتر
نزار: -هسة زهرتي شريدج
زهراء: -شتريد
نزار: -نتابع مسلسل سوة حتى ثنينة نعيش الاجواء ونتناقش بالمصايب عاد مو بس انا انسطر واضل افكر شبيهن هيج سوو
زهراء: - ادلل
نزار: -فدوة يمة فدوة للبنات عشرة واكول كليلات
دخلت حبوبتي وهو طفر.
جدة نوفة: -ها ولك نزير طاك كلبك تريد تعرس سمعت.
نزار: -جا شني وحد عن العالم ضال وحيدي بالدار ختمت المسلسلات والبرامج على ايدي انطوني مرتي اتونس عليها شني صار بية جفاف كلمن ومرتة بس انا حتى الله مايرضاها
-حگك يحبوبة انا هم اريد افرح بيك انت وعبيس
-رحمة لذاك الشايب لا تجلبين بعبيس هذا شايف وعايف الا انا المسكين حتى بالمسلسل ماشوف لقطة جريئة ترة اذا مازوجتوني لعنتي تحل عليكم
جدة نوفة: -خاب مال الغسل لعنتك دكوم مني.
نزار: -انتي تريدين رجل اجيبلج شايب حتى شاب هم اذا تريدني بس زوجيني
-ولك ازوجك بس فكني من شرك
نزار: -رايح ثلث كبدي
باسها براسها واخذ ايدها باسها وخلها على كصتة ضربتة راجدي طلع بالباب يشمر بوسات ويكول
نزار: -هاي الجن بس انتي رغيدة ولي مو عوزي رجلج المخبل لاتاخذين من بوساتي
ضحكت علية وعلى سوالفة مايوم اجة اذا ماغير نفسيتنا كلنة...
ذبيت البيدي ورحت اشوف هدوة باجر اول يوم تبدي امتحاناتها بية...
-ها يابة شلونج
-ها هلو رغد هلو
-دكولي يا الله وارفعي راسج شني السالفة لاتنسين كل القريتية تاليها
-شسوي والله خايفة
-ادري منين هي امتحانات حالها حال غيرها
-اريد مثل نوفة اطلع معدل صيدلة
-ان شاءلله ليش لا بس اعتمدي على الله وقبل لاتدخلين للامتحان اقري هذا الدعاء
{ربي اشرح لي صدري ويسر لي امري واحلل عقدة
من لساني يفقهو قولي}.
هدى: -كملت مراجعة اول امتحان اسلامية بيها هواي حجي وشروحات بين ماخلصت انسطرت ثاني يوم داومت جاوبت والكل جاوب لان اسئلة الدور الاول سهلة العربي كذلك سهلة اسئلتة بس المصيبة الرياضيات من كد ماقريت بيها كمت اشوف ارقام بالجو طايرة عفت الكتاب بقالي موضوع شوية صعب...
نزلت لكيتهم يتعشون اكلت قليل ورحت كعدت بالحوش اريد راسي يستعدل واروح اكمل حسيت ايد على راسي رفعت راسي ونبض كلبي بقوة ابتسمت وطلعت مني جملة مامتوقعتها...
-شلونك عبسي
ابتسم وضحك بخفة صفنت اتذكر صارلي شكد ماكايلتلة عبسي لو عبيس حتى باسمة ما اصيحلة
دنكت راسي.
عباس: -زين بشوفتج شلونج انتي
-يعني
-مو زينة ليش يابة تضغطين على روحج لايصير بيج شي ونروح نحتار بيج
-احتار بروحك لاتخاف ما اخذ من وكتك حتى تحتار بية.
كعد بصفي درت وجهي للجهة الثانية سمعت طكة الجداحة شوية واجتني ريحة الجكاير احس عيوني يروحن لصوبة يردن يشوفن ملامحة
جنت اسرق منة نظرات الا ان تركزت عيوني بعيونة ماكدرت التفتت بعد عيونة لزمني مادري شلون نطقت ولا اجت على بالي هاي الحجاية
-احبك عبسي
صفن بعيوني واني جني مبندة بغير عالم ماواعية على روحي شحجي رمشت بعيوني بتعب لاكتني عيونة الحمر مايفرقن شي عن جمر الجكارة.
اجتني كفخة على راسي وعتني ورجعتني للواقع وحجم الخطا الارتكبتة ردت اكوم وسحبني وكعني بالكاع طفة الجكارة بيدة ركزت عيوني فاتحتهن بقوة لزمت ايدة ورفعتها بسرعة...
رجع ليورة شوية وكال: -لاتحبيني عليج الله.
التهي بدراستج مافيدج انا طلعي معدل عالي افتخري بروحج ادخلي جامعة الزمي شهادتج بيدج ومن بعدها الراتب بوكتها راح تعرفين روحج شكثر انتي انسانة مهمة بوكتها بس تحسين بقيمة روحج وتعرفين كدرج واهميتج.
سوالف الحب والزواج يحسنج حالج حال غيرج ماكو شي يدعي للفخر جبتي طفل كبرتية شفتي فلانة حبلت رحتي حبلتي وتخلصين عمرج بهذا القاع اريدج تطلعين بعيد بعيد طيري مادام عندج جناج وراج صكر.
كمت من مكاني بسرعة بلعت ريك وكتلة: -مو مثل البالك ترة مثل كبل نيتي من جنت اكلك هيج اتذكرت ايامنا واجت على بالي اكثر جلمة اكلها الك.
عفتة ورحت اركض احس وجهي نار بس اريد اوصل للغرفة اختل بيها دموعي ينزلن عشرة عشرة شصخمني شنطقني الله ياخذني على هاي السالفة المابيها خير...
مر اليوم بالف ياعلي اجة يوم الامتحان جنت مسطورة من كد المراجعة راسي يوجعني وضعيتي مامستقرة جاي امشي ومادري شلون طلعت بوجهي ستوتة ضلمت الدنيا بعيني مادريت شصار ماصار فتحت عيوني صار كبال عيني عباس دنك باسني بكصتي.
عباس: -شلونج بنيتي زينة.
رمشت بعيوني احس راسي ثكيل اباوع لنفسي اني شبية؟ رجلي معلكة ومجبسة وايدي كذلك احس روحي انقبضت حسيت روحي بحلم هسة اكعد واروح امتحن غوركت عيوني ورفعت ايدي السليمة لراسي مضبر صرخت بحركة بعد ماتاكدت اني مسوية حادث وراح تفوتني الامتحانات.
كاعد يم راسي كل شوية رافع ايدي وبايسها
عباس: -تعوضين بنيتي لا تبجين بية ولا بيج
هدى: -عندي امتحانات ليش هيج فدوة كول حلم.
عباس: -عسى ان تكرهو شيئاً وهو خير لكم كولي الحمدلله من طلعتي سالمة بذني ولا بغيرها
-وامتحاناتي شلون بيهن
-دور ثاني بوية شبيج تلطمين
-صعبة الاسئلة والله صعبة الله ياخذني شلون ما انتبهت للصخام
حسيت كل تعبي راح بلحظة جنت مقررة امتحن كل المواد دور اول بس صار المو على البال حطم كل امالي واحلامي هالحادث حايرة بوجعي وبضيمي اضل بس ابجي منا وجع ومنا قهر وصاحباتي جاي يمتحنن واني لا...
امتحاناتي تاجلن للدور الثاني كلهن حصرة علية المشية رغد مبتلية بية ونفسيتي صايرة صفر، كاعدات البنات يمي شروق بيدها ماعون بية ليمون وملح...
شروق: -احح ولجن حامض حامض
هدى: -لعبتي روحي شكو تاكلين
شروق: -مدري اشتهيت
رغد: -حتى انا اشتهيت دجيبي
شروق: -جني حامل ولجن
رغد: - يا الله شني حللتي
شروق: -لاع مو وكتها صدك شو رغيدة تاكلين وماكو خيرج
رغد: -اذب حركتي بالاكل خيري مثلا
شروق: -المجسب ماناوي يطلكج تدرين.
رغد: -الله كريم انشوف وين توصل وياة
هدى: -صدك لو كال ذاك الرجال عوفي هاي سوالف الحب والزواج يعععع كومن من وجهي
شروق: -شبيج هي لا اجي اكوملج
هدى: -شتسوين لج
شروق: -اوكلج ليمون شسوي مثلا
هدى: -عبالي تعاي رغدة طلعيني فدوة
طلعني البنات يمهم جوة جانو مسوين كعدة عمامي رغد عافتني من شافت جاسب ضل هو عيونة وراها اجة سلم وكعد رحمن يباوعلة بحقد من بعد الصار خربت علاقتهم كلش صارو واحد مايسلم على الثاني...
رحمن: -شوكت تطلك اختي حضرتك
جاسب: -مايخصك مرتي هي
رحمن: -شوف جاسب سكتتلك هواي واجيتك بكل الطرق البت ماتريدك تريد تشوف حياتها خانكها شكو ويا ريت محترمها مخليها للكفخات...
جاسب: -ها خوش تريد طلاك صار اطلكها بس بالاول اتزوج
الكل انصدم عبالنة يتشاقة بس اتضح العكس من التفت لامي وكاللها برود: -عمة بت اختج اذا اخطبها ينطوها الي
جاوبتة امي بحيرة: -والله يا يمة مادري.
رحمن طفر صاير نار حسبنة راح تصير عركة بس ابوي دخل رفع اصبعة رحمن موجة تهديد لجاسب
رحمن: -تزوج اربعة بس اختي مو من ضمنهن وحك على الفحل اسوي الدم للرجاب بس تحاول تلعب
مارد علية طلع وضل جاسب يسال امي على بت خالتي واصر يخطبها صارت لخة بالحجي تمنيت اشوف رغد وشني ردة فعلها صحت امي اخذتني يمهن واشوفها تشهك بصوت عالي وشروق حاضنتها وزهراء تبجي وياها تمنيت سجيوة تجي وتواسيها رحت اتصل بيها موبايلها مغلق...
رغد: -والله ما انكسر لا يفرح انا رغد ماعاش اليكسرني اكسرة وشوفن
دخل رحمن عيونة حمر حضنها تبجي بحضنة وتكول: -ما انكسر والله مانكسر لاتغركم دموعي اركص بعرسة بس هاي دموعي حسافات ينزلن
علي المثله مايكسرنة
رحمن: -مادام انا اخوج ماعاش اليكسرج والله لاخلية يطلگج واخليج اميرة زمانج وكولي اخوي ماكال صيري قوية واليبيعج برخص بيعية بخسارة.
جانت ذني الكلمات الهن اثر جبير مر اليوم على رغد اسود بس الفاجأنة ثاني يوم كانما ماكو شي تضحك وتسولف تحاول تضم حزنها بكلبها...
كاعدة اكل بروحي من الوجع محد يمي بس اني بالغرفة بجيت لحد ما راسي صدع خليت راسي اريد انام واسمع صرخة شكت اذني...