رواية بين سلاسل العادات للكاتبة كفاية كاظم الفصل الخامس والعشرون
-وعد الحر دين واليرشج بماي ارشة بدم منا ورايح ماخلية ينطق باسمج.
هالعبارة جانت مكتوبة جوة الفيديو معقولة انمار دز هالفيديو!
عيوني غوشن عقلي افكارة متضاربة شنو الجمعهم بمكان واحد سحبت نفس ونزلت اخذت الموبايل الوگع مني، ايدي ترجف عدت الفيديو اكثر من مرة
يلا استوعبت.
واكف گوة على طولة ادية مشدودات بسلاسل بالحايط مثل السجناء من يعذبونهم راسة نازل والدم ينزل منة سوط يضرب بقوة على صدرة العاري غلقتة اتنفس دقايق مكدرت اتحمل هيج منظر رجعت كملتة.
فيديو بدون صوت صار گدامي رجال منطيني ضهرة لابس اسود يضرب بية بقوة فقد ماتركة الا اجو ولد سحلوة منة بقة جثة هامدة خلص الفيديو وبسرعة انحذف الحساب كلة.
انمار يعذب بعادل اي هذا جان عادل متاكدة من طولة دخيلك ربي بس لايموت ويدخل انمار سجن وجيب اليطلعة. اسئلة تطرح نفسها وين لگة عادل صح هو من يوم الخطفني تحلف بية وانطاني وعد ياخذ حقي منة بس وين لگاة. كلشي غريب عادل تاجر ممنوعات الشرطة تدور علية وين حصلة انمار بسهولة! زين ليش مايبلغ علية الشرطة ويفضها.
دموعي تنزل من خوف گلبي يوجعني على انمار خفت يصير بية شي بسببي المقطع ميروح من بالي بية كمية جبيرة من القساوة تعبت من التوتر والتفكير والتجأت للنوم ماخبرت احد بالشفتة اصلا ماعندي دليل منو يصدگ كلامي وخفت لاتصير مشكلة واحنة ماناقصين.
فتحت عيوني بانزعاج تصيح فوك راسي.
-شروق: ولج اكعدي الدنيا غروب
-عوفيني نايمة مالي حلگ
-حبوبتي ماترضة تنامين هسة تكول مايصلح
-اي عادي نعسانة روحي عني.
-رايحة خلي الجناني تنام بصفج طالعة هسة اني بس مثل ماكتلج الجناني هسة تطلع
بقيت وحدي ماكدرت انام خايفة شمرت الغطة ونزلت اركض بعدة النوم بعيوني ردت اغلط عليهن وشفت جدة حكمة كاعدة يمهن صاحتلي اروحلها.
-هلا بيج حبوبة كعدتي من النوم
-اي خفت من الجنانوة يطلعلي
-مايصلح يحبوبة نومتج وي المغربية
-اي صح تخوف
هدى: -جدة هسة گليلي بالبداية نكول الحمدلله تلاثة وتلاثين مرة مو.
زهراء: -لا خايبة بالبداية الله اكبر مو حبوبة هيج الصح
هدى: -لا انة الصح
نوف: -عن شنو تحجن؟
جدة حكمة: -عن تسبيح ام الحسن فاطمة الزهراء عليها السلام بالبداية الله اكبر 34 وانوب تكول
الحمدلله 33 وبعدين 33 سبحان الله شكثر يصرن ذني
شروق: -مية
جدة حكمة: اهى مية هذا كمل ورة كل فريضة صلاة تسبحين بية واهم شي كبل لا تنامن
نوف: -شنو جدة هذا اول مرة اسمع بية احجيلي عنة شنو فائدتة.
-هذا يحبوبة تسبيح افضل الخلايگ يكلج اليسبح بية ورة ااصلاة وجبت لة الجنة وكبل لاتنامين تسبحين بية الملايكة تضل تستغفر نيابة عنج ماطولج نايمة...
نوف: -عجيب يعني اليل كلة يسبحون ويستغفرون نيابة عني!
هدى: -اي ولج شكد حلو هالتسبيح من جنة صغار تعلمناة بس مرات نخربط بية.
جدة حكمة: -وضن الاوذان يلة كومن صلن.
كملنا توضينة ورحت صليت وي البنات امشي واحفظ بالتسبيح واخيرا حفضتة رحت قريت دروسي الباقيات باجر اداوم خلص فاتتني هواي دروس لملمت غراضي ورحت انام سبحت السبيح حسيت بالراحة شي لطيف.
كعدت وي الفجر طلعت ملابسي سبحت ورحت صليت جهزت نفسي للدوام ونزلت اقرا شوية كوة اجمع بطاقتي حتى يصيرلي واهس شوية وكعدت سجى وراها رغد.
رغد: -ها نوف صرتي زينة
-الحمدلله احسن شوية.
سجى: -يا الله انتبهي لدراستج امتحانات الشهرية راح تبدي واي شي مافاهمتة كولي نشرحة الج
نوف: -مشكورة حبيبتي ربي يسهللجن
رغد: -تجهزنا وطلعنا اعد الطريق دقيقة دقيقة اليوم حاسم بالنسبة إلى منتظرة كلمة من حسن حجة وي امة وين راح القلق سيطر علية ماريد شي بس ننجمع بالحلال مو بيدي حبيتة وحبي الة جبير كلش جبير اول مرة احب ان شاءلله تنتهي هالعلاقة بالزواج.
نزلت بسرعة حتى سجى ماحجيت وياها كالعادة.
وصلت للمكان النلتقي بية اروح وارجع شوكت يجي البنات اليفوتن يعاينلي بنظرة استصغار لان دائما يشوفنة سوة نسولف بس للامانة ماعدنة شي حتى ماخلية يتعمق بكلامة وياي بس تبقى الناس تاخذ نضرة مو حلوة على كل اثنين مايجمعهم رابط حقيقي.
-واخيرا نورت
حسن: -هلا صباح النور حبيبي
-صباح القلق والتوتر حسن كلش خايفة حتى من انام اتحلم جاسب يلزمني ويحرمني حتى من الدوام
-شخبصتينا بجاسب فد شخصية هو شني امج ابوج جاسب.
-بت عمة ومستحيل يسكتلي لو يدري عندي علاقة بولد مثل ما انت ماترضة على بنات عمك هو هم
-دعوفينة منة والله لعبت روحي
-الموضوع مهم كلش سنة ونص احنة على تواصل بالبيت والبلدوام كافي طولت علاقتنة يوم عن يوم احس الكل راح يدري وساعتها يطيح حضي
-اووووفف
-ها حسن حجيت وي امك
-اي
-يا الله شكالت
-قافلة ماتقتنع شسويلها
-شني يعني فهمني
-ماترضة بيج كتلها عليج تكول على گص ركبتي بت خالتك حاجزتها الك من زمان.
-بتتت خااالتك شني بت خالتك وانة انت مو تحبني من الصغر لو شني
-احبج وميت بيج بس شسوي اعارك امي حتى لو عاركتها مايفيد حتى لو هي رضت ابوي مايرضة
-ابوك مايرضى وامك ماترضى وانت شني موقفك بهالسرعة تخليت عني اهلك ماقنعتهم جا اهلي شلون
-دعوفي السالفة هسة كتلج من نتخرج نحجؤ بية واقنعهم.
-بعد سنتين ونص بهاي الفترة ماتحاول تحجي وياي لو تجي تشوفني اكيد لا نحجي ونسولف لاانت تكدر تبتعد ولا انة وتالي الله يسلط علية المايرحم ويكسرني بمجاني
-والله اني اريدج بس اهلي هسة شوية قافلين بس يرادلي وكت احاول اقنعهم بية
-ضل اقنعهم وانة خل يطيح حضي
عفتة ومشيت گلبي متشعوط ماكو نتيجة ادري بروحي اتبهذل مافكرت من البداية.
-اوكفي يمعودة بس خل نحجي.
-خلص انهي كلشي هسة راح انطيك حظر وعود ورة التخرج تعال دك بابي
-شعلتي كلبي اوكفي
امشي بسرعة صايرة نار فتحت عيوني على وسعهن من جرني من ايدي نترت ايدي ودرت وجهي علية عاكدة حواجبي بعدني ماحاجية وما اشوف الا جاسب نايم فوكة دك بوكسيات.
رجلية ماشالتني هاي النهاية المافكرت بيها حسن ناعم وهذا ضخم موتة تموت بوكسيات حسن ماحرك ايدة ادفع بية اجر قوتي راحت راح يموت الولد التمت الطالب تفازع بيهم محد يكدرلة نهاة نهي لو ما الامنية اجت سحلتهم جان كتلة خلاص.
حسن راسة كلة دم كوة واكف راد يوكع ماكدر من كد ماضربة لزموة الولد يمشون بيه كلبي وكع بين رجلية قريت الفاتحة على روحي خزرني عيونة تجدح نار هزلي براسة يتوعدلي حسيت الهوة ضاع مني.
لو ميتة ولا هاي الدگة السويتة حب وين اكو حب بهلوكت اليحب من البداية يدگ الباب ولا توصل لهلمواصيل هسوني يلا فكرت بعقلي مثل البشر وعرفت قيمة السويتة راح ادفع عمري كلة في سبيل غلطة صغيرة غلطة هسة عرفتها ماجنت معتبرتها غلطة دائماً جنت اكول هسة انة شمسوية واذا حجيت ماجنت اسمع لنصيحة واحد مشاعري سيطرت علية ومن المشاعر تسيطر على الشخص لازم يدارك نفسة لان المشاعر تذبنة بداهية تفوق توقعاتنا...
وين جنت ليش ماحسبت حساب لهذا اليوم ليش مانهيت كلشي من البداية واذا اعترفلي ليش وكعت على وجهي مايفيد الحجي بهذا الوكت مسحت دموعي الطلاب كلها تباوعلي بعين الصغيرة ويتهامسون ردت الكاع تنشك وتبلعني شسويت بروحي رحت لقسم سجى عقلي مشوش شدخلة للجامعة وهو مو طلاب حضي الفكر.
بعدني ماواصلة القسم ولاگاني ينفخ نار رجلية جمدن وانة اعاينلة وحش مو بشر يذبحني حلال.
ماكو مهرب منه سحبني من ايدي العضم راح ينكسر كد ما ضاغط علية.
بس دموعي تجري شحجي وشكول حتى ماكدر ادافع لروحي شمرني بالسيارة وصعد شغل بكل سرعتة ساكت يدور على مكان حتى ينفجر بوجهي
كلمة مانطقت من الخوف السيارة طيرها بينة تشاهدت على روحي بالدرب ودعيت الله يغفرلي
غلطتي الماجنت محسبتلها حساب.
رنا: -احسج تحبين هاي المادة
سجى: -للامانة اي لان مابيهة حفظ بسرعة تنقري
رنا: -اتخذت خطوة
-كون بيها خير
-اي ولج قررت اشد حيلي وانافسج بالسعيات
-يا الله حتى تسويلي واهس
-اممم احسج تحبين الدراسة
-لا بالعكس حتى فترة السادس ماقريت زين ترة انة ذكية بس ماشديت حيلي جا معدلي مفول
-اكو وحدة ماتحب الدراسة وسعياتها كلة كاملة لو عالية كلش
-بس لاتحسديني صلي على محمد عين الحاسود بيها عود.
-هههه شبيج ترة عيني بارد ماحسد
-ماكو واحد عينة باردة حتى الام تحسد خلفتها مرات الواحد يحسد روحة لهلسبب يو المقابل يصلي على محمد يو يكول ماشاء الله حتى مايضر المقابل واذا ماكالهن انت فشلية حتى مايصير بيج شي
-شبيج والله مو قصدي
-خايبة ومرض عوفي قصدي ومو قصدي اخذيها قاعدة واتعلمي
-هههههه والله عندج سوالف
-بعد احنة ناس عرب متعمقين بهاي السوالف.
-والنعم منكم نرجع لسالفتنا شلون ماتحبين الدراسة وتقرين ودرجاتج عالية
-جانن اكو بنات ثنين بسلفنا صاحبات وبنات عم بنفس الوكت اكبر مني بس نحجي وياهن وحدة منهم جانت تكول المن ندرس اول وتالي للرجل والطبخ والعيال شكو متعبين رواحتنا وندرس رجلي ينطيني فلوس وانة الصدك جنت أيدها.
-حلو وبعدين.
-صاحبتها الثانية تتعارك وياها وتكول مايفيد المرة الا شهادتها حتى لو تزوجت وصار عدها جهال شهادتها تفيدها تصرف على روحها وعلى جهالها ولو جان رجلها غني كلشي يصير، يموت يتمرض تطلك دنيا هاي عاد عدها شهادة تدورلها شغل بيها وتعين روحها
-كلامها منطقي
-جنة مسوينها محتوى شكد نضحك عليها تفكيرنا سطحي البنية بطلت وتزوجت وهاي كملت هاي الحياة انكطعت اخبارهن عنا بس دنيا هاي
-التقيتي بوحدة منهن.
-احنا سلف واحد لكيت امها سالتها على بتها التزوجت كالت رجلها استشهد الله يرحمة وهي وجهالها عدنة حصرة عليها الربع جهالها يباوعون لخوالهم انقهرت عليها وسالتها على الثانية بعد هنا بنات عم تحسرت وكالت بالمستشفى ممرضة تشتغل وخير من الله معيشة روحها واهلها.
من جد وجد ومن زرع حصد
-صح كلما تعب الانسان على نفسة بالبداية يرتاح بنهاية المطاف
-اتفق وياج خية
-رجعتي كلمة للولد.
-ماحجي وياة اذا كال انتي حاجية گليلة تريد تكمل ماتكدر
-يعني
-مالي خلگ الزواج اريد اكمل بلكي وضيفة شي شيايتين
-ههههههههههههههههه
-ومرض شبيج
-ههههه لج كلامج يضحك عندج مفردات مخترعتهن
-ههههه اي صح هذا حجيي انة شسوي.
سلمت عليها وطلعت هي عدها خط تتأخر اتصلت برغد خطها مغلق الساعة بالوحدة مثل هسة مكملة تمشيت لقسمها سألت ولد مخلصة محاضرتهم بثنعش ونص وين راحت كلبي لعب بس لاقشمر عليها هالملعون واخذاها روحي راحت وانة منا ماماكلة شي ردت اطيح من طولي اتصل بواحد منهم شگلة ماكو رغد تصير مصيبة.
اشتريت بطل ماي شربت شوية ورحت للكراج بلكت الگاها بالسيارة بس حتى لو راحت تنطيني علم مو گبل رجعت اتصلت مرة لخ نفس الشي ضل عدي امل الكاها جدامي رحت لمجانة الدوم يطبگون سيارتهم بية مالهم اثر ردت اطيح من طولي مو من عوايدهم كل يوم بالوحدة هنا هسة راح تصير ونص.
راسي انفجر ماكو غير التفكير الوصخ ببالي دخيلك ربي استرنا التفتت وراي فازة.
ارفد: -امشي اوصلج
-شكو ليش انت توصلني
-دصعدي هسة تضلين هنا.
-لا ما اصعد على اي اساس هسة يجي واحد من الولد
-محد يجي جاسب كالي اوصلج بدربي
-ليش شني صار عليك الله وين رغد
-تخربطت واجة اخذها للبيت
-صخااام الصخمني شبيها البتتت
-مابيها شي بس دوخة بسيطة تلكين ضغطها هبط جي ماماكلة شي
-خرب بليسها مو اكلها اكلي كبل لاتطلعين ماتسمعلي غبية
صعد بسيارتة فتحلي الباب ماصعدت وياة ابتعدت ادگ على المجسب اشوف رغد شبيها اول ما اجاني صوتة گال: -خل ارفد يوصلج.
سمعت صوت صرخة وراة راسا سدة بوجهي الدم وگف بعروگي بس لا رغد يمة شصاير رجعت ادك علية ماحصلتة ماحسيت الا ارفد فوك راسي يصيح.
-الشمس الشمسس مو زينة
-صاير شي راح اموت يلحمززة احضرني
-مابيج شي بس اصعدي لا تطيحين
صعدت ارجف شغل السيارة وراسي صار طبل ميت فكرة اجت على ببالي يمة زعم كضها طالعة وياة حتى يكتلها موت وهو شلونة وياها.
ارفد: -شبيج وجهج اصفر
-معليك
-رجعت حليمة لعادتها القديمة
-صخيمة احسن
-اي احسن.
-مالي خلگك اسكت عني والحمزة راح انجلط
-لا على بختج كلشي ولا يصير بيج شي
-يلحمزة استرر
-دخيلك يالحمزة شكو
-كلشي ماكو بس اسكت لا لاتسكت احجي شصاير
-شصاير
-اهووو اسئلة يرجع يسئلني لاتزغلط كلي شصاير
-العب وياج حتى ازغلط عليج
-لا ماتلعب بس گلي يمتها خابرك المجسب اءءء اقصد جاسب
-صدك ماتستحين شني المجسب زلمة شكبراتة شواربة تارسة وجها تكليلة مجسب
-هسة انت شعليك ابنة ونحجي علية براحتنة
-بس هذا حرام التنابز باللقاب.
-هسة غير يسكت الاملح شجلب
-ياهو ولج الاملح بس لا اني
-ها لا. لا مو انت اصلا انت املح لا ابيض انت مو عليك
-لا انة مو ابيض
دار وجهة علية خازرني: -خاب شبيك مو عليك الاملح
-خوش تصيحيلي املح وراي
-الصدك اي
-والنوبة تعترفين صدك ماتستحين
-اهووو انة ماعرف اجذب كبل اكول
-ماتطيني اسم الخبطة التخلين منها حتى اصير ابيض مثلج
-خبطةةةة
-اي الناس للناس شو ضجت اريد اصير ابيض
-انة ماخلي خبطات من الله بيضة.
-سبحانك ربي هم بيضني وياك على الواهس
-يلة اسف والحمزة بعد ماعيدها لاتضوج مو كصدي اعيب عليك اصلا الابيض مو حلو فاهي الاملح سيد الالوان
-شني
-قصد سيد الاناقة
-ها خوش
-اي الحمدلله يا الله صلحت غلطي اغفر ماتبقى من ذنوبي
-خاب سجيوة انتي عقلج طابگة بية فيوزات تدرين بروحج
-اي ادري اسكت لاتحجيني مو وكتك خليني افكر
-فكري على راحتج.
ثول الصابني اجم مرة كلت بعد ماحجي وياة شلون بلساني المصيبة كلمة وحدة تخليني انطلق، كلبي طاح بدية اخذت الملزمة اهفي على وجهي.
-بيج شي
-لا بس صار شي عليك الله گول
-مشاكل عائلية تصير
-يا عائلية صخام الصخم وجهي طلع البالي صحيح
خليت راسي بين رجلية وصرت ابجي اول مرة بحياتي ابجي جدام واحد السالفة جبيرة عدنة بس لاتروح بيها هاي العوبة ردت نصحت مافاد شسوي ادري بالنتيجة كلش زين.
ابجي بصوت عالي صاحبتي ماكدر اشوفهم يحاجونها واسكت وياهو اليكول مايشركوني وياها وثنينة نكعد بالبيت. طبگت السيارة صار فوك راسي يحجي.
-كافي شني السالفة ترة ماصار شي شبيج
-راح يكتلونها
-دكولي يا الله كبل فاولتيلها شني مسوية مكسورة اشو البت فقيرة ماعدها شي لاتخافين
-المجسب لزمها سووااها المجسب طلع عد كلمتة
-في اقصى حالات الحزن والخوف السان الدلالة ماعافتة
رفعت راسي مسحت وجهي بعباتي.
-بعد خشمج امسحية.
-انجب يلة ارجع لمجانك وصلني
-والله لو عدي سلطة عليج جا شلتج وركعتج بالكاع على هذا السانج
-على كيفك بينتين ابو عشر ادين
شمر علية بطل الماي ورجع يسوق ماحجيت وياة شي الساني طالع عن الطريق حرت شلون اعدل اسلوبي واعوف كلمة انجب وصلني وراح طبيت للبيت بوجهي لحجرتنا مالكيت رغد سالت البنات كالن بعدها بالمستشفى هستونة خابرناها.
-يا مستشفى؟
-سفانة: مادري والله
-دخيلج يم الحسن راحت البت ررراااحت.
مددت بالكاع ابجي وادك على رجلية وجهي صار نار
سفانة: -يااء ولج شبيج ترة البت زينة كال بث الضغط هابط ومشكليلها مغذي
سجى: -يحجن شكل والحقيقة الادري بيها شكل ثاني كلها ملتمة علية تسكت بية حسيت كلبي وكف من البجي هاهي كلت ذبحاها واخذها يعالجها.
سرى
حاولت انتحر اكثر من مرة بس مخافة رب العلمين منعتني احس نفسي ملوثة فعلا تلوثت من انسان يتسمى انسان مجرم مختل عقلي مايعرف شنو معنى الانسانية، جسمي يون علية من الالم بعد مادمرني ماسئل عني الله ياخذة لو ياخذني وارتاح.
سحلت نفسي كوة غيرت ملابسي ورحت ادور على علاج الثلاجة مابيها بس مسواگ روحي شاطت من الوجع كعدت بالكاع دخلت بنوبة بكاء طويلة گلبي تگطع ماكدر اكمل حياتي وي وحش مايعرف الرحمة كلشي ياخذهة غصب واببشع طريقة كرهت جسمي وروحي من وراة.
رفعت عيوني على اثر خطواتة واكف گدامي بيدة مفتاح سيارة يفر بية باصبعة غمضت عيوني لعبانة نفسي منة ومن وحشيتة.
-يحلو شلونك اليوم
سكتت عنة كلبي ورم قهر وحرگة.
-ليش متجاوب ابني.
رجعت ليورة من خلة ايدة على شعري.
-شبيك فزيت
-اريد علاج علاج اررريد حمووت
-شبسرعة تموت بعد وقت حتى تموت
رفعت راسي مبتسم بوجهي شعل النار بية يضحك على وجعي على دماري.
-عسى الله لايوفقك وينتقم منك شر انتقام عسى لا تهنيت بشبابك ولا شفت طعم الراحة
-هههههه خوش دعاوي كملي
-ان شاءلله تبجي دم مو دمع على خسارة اغلى شي عندك مثل ماخذت اغلى شي مني ريتك لاتهنيت طول عمرك.
حجيتهن بحرگة گلب ودموعي تچوي خدي كام مني بعد ماشفت خلقتة رجعت راسي لحضني روحي تلوب من الالم.
-هاج
-ولي من خلقتي
رفع راسي بقوة رگبتي انشنطت باوعت بعيونة بقوة خلة المي وشريط حب كدامي وراح يفتر بالمطبخ
اخذت الشريط قريتة خاف مخدرات بس طلع لا علاج عادي مسكن الالم اخذت منة حباية وشربت مي بقيت بمكاني ماكدر اتحرك. يشتغل ويغني اجنبي سطرني سطر.
-يحلو مو احجي وياك.
فتحت عيوني روحي شاطت يدوس على اصابع رجلي بسطالة مردهن مرد عطت متألمة...
-من احجي وياج جاوبيني لاتسكتين
-حسبي الله ونعم الوكيل الله ينتقم منك
عصر فكي بيدة ركبتي انكسرت يدير براسي حيلي بايد حتى ماكدر احرك ايدي.
-لا تحجين شي من هذا القبيل ولاتتجاهليني ديريبالج اول واخر تحذير ثاني مرة تشوفين شي بشع.
رجع يكمل شغلة بنفس الحماس ويغني امسح بدمعة تنزل عشرة الله ياخذك عادل على الوضع الوصلتني اله.
دلهار-: انتي رقيقة بزيادة ماتشبهين اخوج
-اخوي يشبهك وثنينكم مامحسوبين على البشر
-السانج لا اكطعة واطبخة وواكلة الج
رجفة سرت بجسمي من سمعت كلامة جان جدي بشكل اذن لاي درجة خطر سكتت عنة مالي طاقة
مر وقت سكنت من الم وشوية غفيت فزيت من سحبني كعدني على الكرسي مقابيل الطاولة ياكل بشراهية اكل اجنبي ماعرف صيني مشكل تارس الطاولة ميلت حلگي روحي لعبت.
-اكلي
-ماريد سم
-اشو تاكلين سم وبيدج.
تغيرت نبرة صوتة للتهديد اكلت كوة عن نفسي من يوم الجيت بية ولجاي لازم اكل بالقوة اكلت شوية ماحسيت بطعم الاكل كمت بسرعة اسحل بروحي رحت لوحدة من الغرف سديتها علية وتمددت على السرير ابو النفرين بيها كلشي هنا عجيب غريب
بغرفتة سرير ابو النفرين وهنا هم وبعد اكو غرف هواي كل وحدة شكل بس اليحير محد يجي بية فارغ هالبيت بس مرة شفت بنكلادش ثنين ينضفن
غمضت عيوني وغفيت فزيت من حسيت بية بقربي
ابتعدت عنة.
-وين.
-بس عوفني
-ماعوفج المن جايبج
-ماتحس انت حساااااس ماااكو حساس مرريضة محتاجة دكتورة شكو جايني
-تعبان
شمر نفسة بحضني نزلن دموعي على وجهها رفع ايدة يمسح بدموعي خليت ادية على وجهي انفجرت بجي وين اروح وما يلمسني كرهتها لنفسي بسببة.
-لاتبجين
-بسببك عوفني ومابجي
-عيونج حلوات لونهن مميز مامر علية من قبل.
ارفع براسة من رجلي بس اريدة يوخر ماكو لازك روحة ولا يحس ويشوفني مطايقتة ويبتعد بالعكس يلزك اكثر.
-كلهن لون عيونهن اسود بس انتي تختلفين بيضة شعرج بية شگار شكلج مميز
ياخذ خصل من شعري يلفها على اصبعة درت وجهي عنة.
-الكل يتقاتل على قربي ليش انتي تنفرين
-لان ما احبك ولا اريد واحد يتقربلي حتى لو بالحلال
-سنة ونص من مات وبعدج تحبينة
گلبي دگ بقوة يريد يخرج من القفص الصدري جاي اخونة وبالحلال ليش الا بهلطريقة اتعاقب لو مصايب الدنيا واكعة على راسي الا هالمصيبة وكسر الوعد غصبن عني.
صوت شهگاتي ملة الغرفة حسيت انياط گلبي تگطعن قهرر وحررگة الهج بأسمة ورسمة ببالي مايروح هذا الراح يموتني بكل لحضة اتخيلة وازيد حرگة.
-محظوظ وهو ميت وتحبينة كل هالحب شنو مسوي بدنيا حتى كل هالوفاء الة بكل لحضة اتقربلج اسمع اسمة
-حبيب روحي موتها لروحي بروحتها يا وفاء ياحب ياعشق عبرتهن وياة وصلت مرحلة الجنون بية حتى مرحلة الهيام عبرتها
-شمعنى الانسان يحصل هالكثر من الحب بيش مختلف.
-يستاهل اوفيلة عمر كامل حبي الة مو عادي ولا حب يوم ويومين حياوي مجان انسان جان ملاك مو نفسكم شياطين، حتى الشياطين متعجبة عليكم.
دموعي تنزل لا ارادي ماكدر امنعهن كام مني وكعد وزحف ليورة ضهرة على التاج سحبني وياة حاضني ومشدد علية ابعد بية بكل قوتي ماكدرلة...
-الاسود من يلتقي بالابيض يخرب لونة ولون الابيض.
لاهو يعود اسود ولا الابيض يبقى ابيض بس تعرفين واحد يختلف للاحسن بيهم وهو الاسود يخف سواده ويصير رمادي
-بعد مادمر غيرة
-صح
-وخر مني ماطايقتك
-مو مشكلتي
-لعبت نفسي من نفسي
-ما يهمني
سكتت عنة يريد بس يحجي بعد خبل ما الومة
-احجي حتى انسة الشي الجيت علية
- ماعندي شي احجية وياك تعبانة عوفني
-مو مشكلتي تعبانة هذا وقت راحتي اخلصة واروح لشغلي
-اناني حيو.
سكتت من خزرني عقلي فارغ شنو ممكن احجي وياة اي حديث يناسب هيج بشر ماكدر اخاطر بصحتي اكثر لازم اخترعلي فد موضوع ماطلع براسي غير.
-شكد عمرك
-اربعين
كلبت عيوني اكيد يجذب شكلة صغير، بس مستخف بعقلي.
-وين اهلك
-خارج العراق
-عندك اخوات اخوان
-ميخصج
-تتاجر بالمخدرات
-ميخصج
-اسكت عني لعد
-كملي اسئلة احسلج
-قررف
-حياتي وحياة اليدخلها
-شوكت اخلص منك
-من تموتين تخلصين او احتمال صغير اموت
-عن قريب ان شاءلله
-اكص لسانج.
-بعد ما احجي
-ارجعي احجي شي
-اسمك شنو
-روميو
-هه
-عجبج مو
-كلشي يخصك مايعجبني
-حتى اليالي الفاتت سوة
دفعتة بكل قوتي وكمت منة نفسي يصعد وينزل صوت ضحكاتة ترست المكان وكعت بالكاع اتذكر الصار ودموعي تنزل. سمعتة يخابر بشخص يحجي وياة برود.
-دلهار يعرف شغلة مايصير بية شي ياخذونة الجماعة شوية يضيفونة ويرجعونة سليم تؤ ماكو شرطة بالموضوع هسة يرجع مثل الحصان يلا كمل شغلك ولا تعلمني بشغلي.
طلع وبعد مارجع ليلة كاملة ارتاحيت منة كعدت على صوت الشاحنات شفتة من بعيد يحجي بالتليفون وياة شخص ملفوف راسة بابيض وايدة مكسورة مجبرها.
رديت البردة من شفتة انتبة كعدت بسريري محتارة بزماني فوك الساعة دخل للغرفة نزع حذاتة وشمر نفسة يمي على الرغم هاي مو غرفتة سحبني بصفة حضني ونام اليل كلة مانمت تمنيت عندي الجرأة واقتلة بس المشكلة اخاف.
بين الصاحية والغافية فزيت لكيتة بوجهي ميل راسة وگال بابتسامة.
-مرحبا وياج شعواط.
لامة روحي لصدري دموعي حرگني يروح ويرجع يدفرني يشوغ روحي شكو شي موجود بالشقة كسرة ومابرد گلبة عيونة تطاير شرار.
-اكتتتلج موووت ومايبرد دمي شسويلج افصخ راسج عن جسمج
-والله ماسويت شي بس احجي وياة بيش تريدني احلفلك ما لامسني
رفعني من شعري گطعة بيدة روحي تطلع وترجع
-ماسويتتي شي صح ماااااسسويتيييييي.
شمرني بالكاع سمعت طگة عضامي ابجي واتوسل بية يعوفني بس العكس يسوي خنگني متت بيدة كمت ارافس اريد اشم الهوى، حررني من قبضتة طحت بالكاع اتنفس بقوة.
اختفى لدقايق ورجع دفرني وكعد بصفي يدخن ماحجيت شي وياة بقيت على هالوضع لمن خلص باكيت كامل الغرفة انترست دخان اختنگت. روحي شاعت من لسعني بالجكارة.
-شفتي هاي الحرارة لاشي من نار گلبي ابدي احرگج ليش ولج شعجبج منه ليش خنتي الثقة النطيتها الج مو دافعتلجن وخليتج تكملين ودست على كلبي وكلت لا رغد شاطرة خليها تكمل حلمها حرام علية اكعدلها بس طلعتي كك ماتستاهلين
بس دموعي تنزل ماحاولت احجي كافي تعبت من ورى غبائي خلشوف تاليتها شني دار وجهة رفس برجلة المزهرية لزگها بالحايط تقرب مني رجلة ثناها بالكاع وهمس بذني بغضب.
-راح اسكت وما احجي شي محد يدري بالصار بس بشرط
-شني الشرط
-تنسين شي اسمة جامعة
شهكت وفتحت عيوني على وسعهن نزلت على رجلة اتوسل بية وابجي.
-لا جاسب عليك الله لادكولها كلشي ولادراستي اموت والله اموت بس تبطلني كول غيرها لاتسويها بية
-بكيفج خيرتج بين روحج وبين دراستج لاتصيرين غبية الروح اهم من الدراسة
-لا لا دراستي جاسب فدوة ارواحلك لاتبطلني والله امووووت.
-راح اخابر ابوج والكلة على الصار وهو اليشوف شغلة انة بعد مالي دخل بيج
-لا لا ابوووي يكتلني فدوة لا دگله والله يفهمها غير شي لا دكلة فدوة لعمرك والله يكتلني.
-ها هية عوفي الجامعة احسن ما يموتونج
اتعس لحضات عمري صارن بسبب غبائي وعدم تفكيري لبعيد مافكرت الضحك والسوالف ادفع ثمنهن دم گلبي وتعب عمري كلة.
وصلت للبيت الضهر الكل نايم محد موجود طلعت بوجهي لحجرتي لاگتني سجيوة وجهها اصفر ذبيت روحي بحضنها ميتة بجي. ماينفع شي لا الوم ولا الحجي انحكم مصيري بساعتها.
اسبوع كامل نايمة بالفراش نهضت روحي شفت الساعة بالعشرة الصبح طلعت للمطبخ بس نسوان عمي البنات بالمدرسة سويتلي ريوك اكلتلي لكمة ورحت اخذت علاجي.
رفعت عيوني المورمة على فتحة الباب دخل يباوعلي بطرف عينة وكف فوك راسي وحجة من ورة خشمة.
جاسب: اليوم اسمع بالخبر منتشر بالبيت
هزيت راسي ودموعي تنزل الموت ارحملي شجنيت على روحي طلع وعافني انحب طلعت ملازمي ضميتهن لصدري گلبي تگطع...
الوقت يمر بطيء اجن البنات من المدرسة يسالن عن صحتي كوة جاوبتهن كوة انتظرت سجيوة ترجع واخيرا اجت وجهها مغيم والدمعة بطرف عينها ابتسمت الها بحزن اجت حضنتني وتبجي.
سكتتها واخذت نفس مسحت وجهي وكتلها على قراري.