رواية بين سلاسل العادات للكاتبة كفاية كاظم الفصل الثاني والعشرون
-يلا متانينج استعجلي
نوف: -اي يلا بس اكمل انتظروني شوية
تلمست بيدي الكلادة شميتها ودموعي تنزل گلبي انمرد مرد مسحت دموعي خل اوفرهن بعد وراي طريق طويل، وكفت بالباب غمضت عيوني اباوع بكل مكان بلغرفة هنا تدمرت هنا تعذبت هنا بجيت هنا صرخت هنا متت هنا عشت شنو الشي الحلو العشتة بيج ماتگليلي شعندي باقية؟ استنشقت عطرة الباقي اثر منة وطلعت اركض لايعوفوني.
لكيت الكوستر طابگ بالباب مقبطة عيني صدت للاخير رحت كعدت بية وحركو ذكريات ماتعوفني حدمرني فوك دماري اتذكرة من اخذني للنجف مكعدني بحضنة وحاضني لصدرة غطيت وجهي بالشال وخليت راسي على الجامة شبسرعة دارت سنتك شلون عشنة سنة بدون مانشوف وجهك الحلو
هسة كون يلاگيني ويفتر بية مثل ماجنا يفرني ويصيح نوفانة اخ ياخوية المصايب التمن علية من بعدك راح شمعة حياتي.
اجواء حزن كئيبة صوت نعي يذوب الگلب حزن وشوق دموعي تنزل بغزارة مرت سنة على فقدان قطعة من روحنا اخ ياحياوي ياخوية الزمن يمشي وانت مابية...
جدة حكمة: -خيبة انة جبت الولد وكبريتة ياما تعبت علية وعاتبيتة يمدلول لاتگطع بية وحشميتة اثاري الولد تراب مغطية ريتة ريتة يمة دفانك دفني وتراب المكبرة طمني يمدلول ويمدلول صحبانك مرو علية.
ودگو الباب وانة رمية وانتطر جواب سألوني عليك ودموعي سجية راح الولد يلتسالون وتراب غطاها العيون وراحت ذيج ضحكات السنون وصرنا نحن للمايحنون.
يهلشبان منين درب المگبرة خلينة اجزي وعلى اوليدي ارد ابدي وحيد ويستاحش الليل ادري.
امسح بدموعي الغرگت وجهي وافكر بامي شحالها هسة شصار بيها منو يواسي منو بيهم، دموعنة خلصت وماخلص الطريق شكد طويل لان بية احبابنة كلها نامت وغمضت عينها الا اني دمعتي ماوكفت ابد اشتاقيتلة واشتاقيت لايامنة عندي الة كومة حجي محتاجة نكعد ونسولف واجفص بالحجي مثل قبل الف اخ بالكلب احنة الضيعنة وطن مو اخو وخلاف الوطن صرنة غربة.
النجف الاشرف يرحب بكم دقيقة دقيقة اعدها شوكت اوصل، لازماتني البنات من الجانبين عيوني ماشوف بيهن من كثر الدمع امشي وراهن واخيرا ليس اخرا شفت اخوي مبتسم شعرة نازل على عيونة فلتت روحي من البنات ورحت اركض...
-حيااااوي اجييتك ماعفتتتتك طببببت واجيت جنتتت مرريضة والله العظيم.
عثرت وكعت على كبرة رفعت روحي لصورتة امسح وجهها المبتسم: -هلو حياوي اني نوفانة شنو نسيتني اي صح صار هواي ماشايفني بس والله جنت مريضة محد يجيبني هسة اجيت امشي ويانة نروح لبيتنا نلعب ونتعارك بعد مانعوف بيتنا ابد نرجع يم امي وسجاد بقو وحدهم خطيه اكيد اشتاقو النة.
احجي بهدوء منتظرة رد بس وين صايرة الصور ترد گلبي تشعوط بنار صرخت بصوت عالي وطحت مفرفحة روحي اجيب بالتراب واشمر على نفسي ساعة اروح للگبر امسح بية من اتخيل مدفون جوة ارجع اتخبل گوة سحلوني منة.
كعدت على بعيد منة اباوعلهم ملتمين على قبرة لميت روحي لصدري التراب مغطيني صوتي مطبگ ماكدر احجي شي بس اشرلة بيدي عينة علية اي والله اخوي مبتسملي احسة يحاجيني اشرتلة بيدي ومسحت دموعي لزمت بيدي صم تراب كوة حجيت بلاعيمي توجعني.
-صرت مثل هذا التراب لا إلى لون ولا واهس بشي رحت وارحت ايامي الحلوة صفيت وحدي حتى هو عافني اخذني وياك وحن علية المن ضالة لا الناس ناسي ولا الزمن ضاملي شي حلو ريت الزمن يرجع وابجيلك بجي مربع.
مابية حيل اليعيني اعتلى الصريخ عرفتة صوت امي الحنينة غمضت عيوني گلبي تگطع من الحزن صوت اخوتي يصرخون ويعاتبون كاعدة بمكاني ودموعي تنزل مر وقت طويل خلص حجيهم ونهضت روحي.
شفت سجاد مترب ترب شمرت روحي علية اشهگ بصوت عالي، التمينة يم كبرة نسولف جنا كاعد يسمعلنا.
-راح الحنين شلون عايش بدونة وين تطلع بياشارع وكلشي بية ذكرة الة
سجاد: مااخطى خطوة بدونة راحت ايامي الحلوة ايام الونسة راحت وي صاحبي واخوي حسدنا وضيعنة الوكت صرنة كل واحد بصفحة.
مهند: -البيت اسود مظلم مثل گلوبنا المتروسة سواد اله ماشفنا الفرح من يوم الرحتو بية.
عبدالله: -لا احنة العايشين نفس الناس ولا متنة وياة كلشي يذكرنة بية مر شهر كلنا نتعود مرت اشهر مرت سنة تعودنة على البجي ماتعودنة على غيابة خلصت كلوبنا وماخلص بجينا
سجاد: -هدومة معلاگات بالكنتور عطرهن فواح اطيب من ورد الجوري منو يلبسهن ياكشخة الشباب ياريتك ضليتلي سند وضهر بعدنا ماكبرنا شبسرعة رحت.
نوف: -مستعجل اخونة كلش استعجل بروحتة راح الجان واعدني يضل وياي للدوم اخذة الموت وعافني ميتة على شوفة عيونة.
هند: -طيفة مرني يوصيني بيج شكد يعزج اخ ياديرة محنة يايمة ياعريس ماشفت العرس ولافرحت بيك مثل الشبان دميت گلبي بروحتك شما صار وشمادار الزمن يكبر ماينسد جرحك بگلبي.
سجاد: -حياوي حساس خاف يزعل علينة اسكتو لاتحجون شي يزعلة
نوف: اي صح يزعل واذا زعل صعب نراضية اسكتو اسكتو لاحد يحجي.
مهند: -اقرولة الفاتحة
سجاد: -فاتحة بگلبي ناصبلة من يوم الراح
نوف: -ودعوة وداع حار ومو تنسونة
سجاد: -انسى اسمي وما انساة روحي جان واخذها بروحتة
هند: -بسكم راح اموت حجيكم مرد روحي مرد.
سكتنة ومسحنا دموعنة من شفنا حالة امي ودعناة بدموعنا وحرگة گلوبنا عفت روحي وراي عيني ضلت علية كوة سجاد يمشي بية كعدنا نستراح مكسورين ملجومين واحد يواسي بالثاني بعيونة رادو يرحون ودكيت رجل اروح وياهم بس عمامي ماخلوني فرفحت روحي من البجي المن باقية يمهم انمار وراح
حاضنتني امي لصدرها تمسح بعيوني همست بذني.
-ارجعي هسة واني اجي وراج اخذج واذا ماخلوج اشتكي عليهم لاتنسين انتي بالجنسية بنتي محد يكدر يحجي واخواني اتگاطع وياهم علمودج بس لاتبجين.
-شوكت هذا الحجي يصير
-شوكت ماخابرتيني اسويها حتى علاقتي بيهم ماريدها لخاطرج انحرم من شوفت امي
ضلت هاي الكلمة ترن بذني ودعتهم ورجعت مكسورة روحي.
-حسبي الله ونعم الوكيل
-انجبي لاتتحسبين على اخوج
سرى: -ماتحسب علية وهو سبب بهذالنا ابنج تاجر ممنوعات والشرطة تدور علية هسة
-الله يكون وياة
سرى: -ههههههه الله مايكون وي شخص يدمر العالم دمر نوف والف وحدة مثلها ويكون وياة حلوة هاي.
عفتهن محترك دمي نهى صار فترة كلش طويلة ماحجي وياها شكد تعتذر وتتوسل بية عادل مهددها بس شنو الفايدة البت تدمرت لو گايلة ماوصلت لهلمرحلة ياترى لو شفتها هم اكدر احط عيني بعينها؟
رحت اسحل بالجنطة مفرفحة روحي وين نوصل بعد وكفت بالشارع ودخلو ولد يطلعون الغراض اي غراض غراضنا صفت بالشارع بايع البيت حضرتة ومشتريلنة غيرة بثمن رخيص كلش وبمنطقة الله اليعلم وين صايرة.
طبگت سيارة حمل جبيرة خلو بيها الغراض ومشت غمضت عيوني ودموعي نزلت اباوع لبيتنة راح نعوفك عمر عشنة بيك ضحكنا بجينا كبرنا شكد بية ذكريات شلون نعوفهن الاستقبال شكد احبها احس بيها عطر حياوي واسوالفة اكعد واتذكر حجية وايامنا المضت اجمل واحلى اللحضات موجودة بهلبيت الله لايوفقك عادل كلة بسببك بهذالنة اجت سيارة صعدو بيها اهلي بقيت واكفة كلبي يلعب احس الجاي يخوف ومدمر عاط بية ابوي رحت اسحل بروحي صعدو الجنطة وانطلقنة.
مكان مجهول ناس مجهولة مستقبل مجهول طول الطريق دموعي تجري حاضنة سرى ونبجي، طريق طويل استغرق ساعات عدة واخيرا استقرينا بمنطقة شعبية بحتة بيوتها وتفاصيلها تخوف طبكت السيارة كدام بيت نزلو غراضنا بقيت مفهية معقولة هنا نعيش.
نهى: -سرى شنو بس لاهذا البيت
سرى: -اي يمكن هو
-خلنرجع لعبت نفسي شلون نعيش هنا
-ماعرف وماكو رجعة.
عيونها مدمعة مابيدنة شي ولد مانعرفهم يدخلون بغراضنة التفتت لرجال يباوعلنة بنضرة قذرة درت وجهي اخذت نهى من ايدها على صفحة طول الوكت يباوعولنة، تشكر منهم بابا ودك صدرة يباوعلنة.
-اي شي تحتاجون احنة براس الخدمة.
دخلنا للبيت لعبت نفسي قديم وصغير كلش بية غرفتين ومطبخ وصالة وحمامات طابق واحد جان بية اثاث بسيط بقت ملابسنا بجنطها وين نخليها ابوي شوية وطلع رجع العصر كلش بيدة عشة منو اله نفس ياكل رواحتنا ماطايقينها اكلو هو وامي واحنا بقينا صافنين على الوضع طلعت بالكراج اجانة صوت عرك الجيران ذاك الصوت العالي والغلط والفشار دخلت جوة نهى مصدومة شنو من بشر كعدنا بنصهم.
ضلمت الدنيا واندك الباب كلبي انقبض منو الاجانة بهلوقت بس لاذولة الولد اخذت نهى وسديت باب الغرفة علينة واحدة تباوع بوجهة الثانية بخوف.
نهى: -منو الاجة بس لا حرامية
-وين اكو حرامي يدك الباب هسة يطلعون الجوارين
دقايق وسمعنا صوتة فتحنة الباب حاضنتة امي تبوس بية شكلة متغير للاسوء يوحي على الاجرام هيج حسيتة راحتلة نهى تسلم علية صار اشهر ماشايفينة بقيت بمكاني اباوع علية كلش ضايجة.
منة ومحملة علية ليش شناقص يروح يشتغل بهيج شغل هاي نتيجتها تبهذلنا.
عادل: -ها ست سرى شنو ماتجين تسلمين
سرى: -لا ماريدك ولا اريد شوفتك ليش بعت بيتنا وجبتنا هنا وين تريد توصلنا
عادل: -للقمر هههههه عيشي وحسي بالناس الفقرة كافي ماشبعتي عز
-شوف منو يحجي احس بالناس الفقرة الله عليك عاش لسانك خوش تعرف تواسي الله اعلم شضاملنة
عادل: -كل خير حبيبتي ليش ضايجة اتعايشي وي الوضع.
صار يمي حضني يضحك الصراحة خفت ادري بية راح يدمرنا بحقارتة.
-اختي حبيبتي لاتضوجين دراستج وتكملينها مابقالج بس سنة وحدة مو ليش لابسة اسود لحد الان روحي انزعية مايصير
وخرت منة: -لاتدخل مايخصك
عادل: -اووف اووف لعد يخصمن اسوود تنززعية ماات الولد صارلة سنة
سرى: -وبعدين
عادل: -تعيشين حياتج خيتي.
عفتة ورحت الغرفة مالي خلگة يريد انزع اسود لو يموتني هذا شي راجعلي دقايق وراح بقينة بهذا البيت متبهذلين حتى غراضنة بايعها وماخذ فلوسها رجعت اداوم طبيعي وسرى كذالك بس ابد مامرتاحين كل مانطلع نشوف جماعتة بالدربونة يباوعولنة لو يمشون ورانة لازمين گلوبنا منهم والمنطقة ناسهم مو صاحين كل يومية عركة وصياح وعياط.
ضامة الرسالة لصدري اشتم عطرة ودموعي تنزل رجعت اقراها للمرة الالف ارتاح من اقراها اتخيلة هو يحجي وياي بلعت ريگي وحجيت بصوت واني اقرا.
اخر ماتبقى.
كلمات اعتذار بخطي يدي.
لا اعلم ماذا ساقول كل مالدي معقد جدا لا يوجد حل لاي شي لزم على الرحيل بهذا الوقت.
الماضي دمرني ودمر الانسان البداخلي جريمة قتل امي امام ناضري قتلتني حادث اخوتي افجع روحي وادخلني في حالات جنون لها بداية ليس لها نهاية ليس هذا فقط عذاب ليس منة ضرب اهانة جلد حبس حرمان كل هذا في مقتبل عمري ماتت روحي
ليس لدي ماتبقى دعيني احافظ على ذرة العقل الامتلكاها واخطة نحو النور عسى ان القاه.
اما انتي زهرة بيضاء ذو رائحة فواحة لا استطيع اضعكي في ارضي المليئة بالشوك. لاتحزني ولاتبكي على غيابي عيشي كما شئتي واجعليني ذكرة جميلة
مسافات طويلة تفصلنة حياة مختلفة لكل منا لااعرف هل الزمن يجمعنا مرة اخرى؟ ياترى عندما نلتقي هل تتقبليني؟
سأخط طريقي بحبري اما الدفاتر القديمة لا اعلم اين اضعها. عيشي لاجلك ودعيني انا وحالات جنوني نعرف اين الطريق يشير لنا...
احتفضي بها كذكرة. انمار.
رجعتها لمكانها لاتتنگع بدمعي كعدت ابجي بگلب محروك اشتاقيت اسمع صوتة اشتاقيت لرسمة سنة او اقل بشوية احنا سوى باسوء حالاتي ماعافني اغلط اسب اضرب ابجي ماعافني وكف وياي بفترة مرضي عودني علية وراح. رغم عتبي علية بس اتمنالة الراحة والسعادة وين ميروح لانة انسان يستاهل.
مسحت وجهي واخذت ملابسي اسبح بكل مكان اله ذكرة شلون انساة وما احن اله كل مكان يشهدلة هنا جان يسبحني مرات واعية ومرات لا سديت الباب وكعدت اشهگ وعقلي يتنقل بين الذكريات جنت بيدة طفلة عاف طفلتة شكد گلبة قاسي عود وصيتة مايعوفني عضيت اصبعي بحرگة خلص مادام نساني وراح هم انساة واردها بالمثل ليش داعذب نفسي وهو عايش لنفسة.
سبحت وكملت رجعت لغرفتي نشفت شعري ورحت للمراية عيوني حمر وجهي ملعوب بية لعب خليت زيت لشعري ونزلني دموعي جان هو يمشطلي. طول هالفترة ماكدرت اتخطى كلشي يذكرني بية ويبجيني وتالي وي گلبي اشلعة وارتاح حتى بعد مايوجعني علية. لفيتة شلون ماكان شمرت روحي على السرير بلكي شوية تغفى عيني وانام.
بين الحلم والواقع ايد تلامس شعري طفرت مفزوعة عبالي هو اجة بهتت ملامحي وبقيت صافنة بوجهها
عائشة: -اسم الله يمة
-هاي انتي.
-اي يمة جا شعبالج
-الحقير اجة
رجعت تمددت وخليت ادية جوة راسي غمضت عيوني.
عائشة: -ليش تحجين علية نمر مو حقير ولا عدة حقارة
-تؤ حقير كلش
-اعذرية تعب انمار هواي تعبوة خلية يرتاح
-محد مرتاح حتى اني تعبانة من وراة
-محد يوصل للعاشة والشافة نمر.
كعدت على حيلي من شفتها تريد تحجي.
-جان نمر عمرة سنة تقريباً وشلنة من الانبار للناصرية
-من الانبار!
-اي الانبار كتلنا واحد وشردنا صرنا جيران تلكونا بالهلا والمرحبا ونعم الجيران صرنة اهل رغم جنا مامتوقعين اهل الجنوب يستقبلونة لان سنة بس طلع العكس اهل خير وطيب مايهمهم الطوائف صرنة اهل ناس تسير على ناس صرت وي صفية ام نمر صاحبات ونمر جنت اعزة كلش جنا نسولف كلشي وهو يلعب جدامنا.
-ليش قتلوها.
-اخو مرت حمزة جان يحبها وراداها بس هي رفضتة جانت تشكيلي منة حتى ورة ماعرست ماجاز منها من نذالتة وحقارتة طلع عليها حجي واتهمها وي واحدمن السلف واختة ايدتة.
-نذلين
-راحت بدم بارد جهالها ضلو وراها صغار مثل الطيور انمار حاير بيهم على گلبة لسة اتذكرهم شكد جان يعزهم مو هين ابد مو هين ماتو بيدة.
سكتت تبجي واني دموعي بللن ملابسي انقهر گلبي يتگطع قهر عليهم.
-لحگو امهم ربج يجوز رحمهم واخذهم ضل نمر تسودن كلش ايسو منه بهاي الفترة خطبوني
-اتزوجتي رجل صديقتج!
-اي اهلي اطوني اله ماكدرت احجي ماجانت المرة تكول لا عمري جزة العشرين بوكتها واخذتة فتحت عيني على نمر حرت بية هالولد اله معزة جبيرة بكلبي.
-ابوة جان يعذبة ويحملة مسؤلية الصار
-كلش يكرهة حرت وياة اتعارك وازعل من وراة ومايفيد يكتلنة ثنينة شاف الضيم وياة وهسة وبعد ماارتاح من وراة
-ريت الله لايوفقة.
-مايصير تدعين على الناس
-لايصير الضالم والموزين يصير ندعي علية وهواي هم انهار ماعرف هسة وين بسببة
-نمر بالخير لاتخافين علية
-تعرفين وين راح كلج!
-لا والله وماكالي شي بس كالي اريد اشوف حياتي حتى ماكالي راح امشي
-هسة هو وين
-الله اليعلم جنت اضن يم اخوالة بس من خابرتهم كالو مو يمنة
-لعد وين راااح ساافر لييش محدد مهتتم اله
-هاي مو اول مرة يعوف البيت
-ليش جان يختفي هيج
-اي بس مايطول هالكثر بالزايد اسبوع ويرجع.
-زين ليش بس اريد افتهم
-كل سنة نفس اليوم الكتلو امة والماتو بية اخوتة ويتسودن كلش من جان صغير ولهسة ماخلينة سيد مااخذناه مافاد يهجرنا ومن يرجع تبدي الطلايب وتعودنا على هالوضع.
-واني؟
-شبيج انتي
-شنو مصيري اريد ارجع لاهلي المن باقية هنا
-سدي السالفة هسة مابينة حيل طلايب وهل تشوفين عمامج مسودنين واخوانج صغار لايطاگگون ومابينة حيل نخسر واحد بلكت الله ويرجع وتصفة الاوضاع.
-يروح بكيفة ويرجع بكيفة عبالة اريدة وميتة علية بسيطة اني الة اول مايرجع يطلكني عافني بوقت كتلة لاتروح وارجعلة امداني
-حجي كلة حجي الله يلم شملكم
-بالاحلام
دمعتي على خدي مانشفت نمت على هالوضع واستمر الحال مر شهر كامل على ديرة السنة البنات نزعولهن الاسود بس اني بقيت معارضة على شنو نازعتة وداخلي منطفي. سفانة تعبها الحمل كلش تلعب نفسها من كلشي وسجى ورغد عدهن امتحانات اما الباقيات طلعن اعفاء فتحو الهم...
كاعدة وياهن صارن صديقاتي المقربات طلعني من وحدتي النهار كلة سوى ناكل نشرب كلشي نسوية سوى. لازمة ملابسي ومنتظرتهن يخلصن.
-ماصار هيج يلا زهراء خلصينة صارلج شكد تسبحين المي خلص
زهراء: -شمالجن هسة اخلص بس لاتحسبلي
هدى: -انة اسبح نوفة فدوة
نوف: -انجبي اني قبلج محضرة ملابسي روحي انزلي جوة اسبحي
هدى: -رايحة الغسل اي والله
نوف: -غسل اليغسلج عگروگة
هدى: -امشي سحلية راح اغسل ههههههه.
نزلت جوة اسبح انة مامتعودة الا بالفوك جي عمامي مايسبحون بية دفرت الباب برجلي ودخلت اغني.
-سلم علية بطرف عينة وحاجبة ادى التحية زين يعرف واجبة يموواااة يمووواااة
-وسمااا گبل زرگتي
درت وجهي عيوني طاگتهن روحي اشتعلت بنار شفتة وراي يسبح يبوو يا فشلة الفشلة ملابسي طاحن بالماي عفتهن مامهتمة وصعدت اركض گلبي يدك بكل قوتة طلعت زهرة من الحمام سفطتها راجدي ضلت فاتحة عيونها.
زهراء: -يااء شبيج وياي.
نوف: -صدك ليش ضربتيها
رجعت لنوف سطرتها راجدي بقت مفهية بوجهي
هدى: -كلة من وراجن جفتت علية الحمااااام
زهراء: -اصخام الصخمج ياهو هذا
هدى: -عبسي يبووووو يمووووة راح ابجي ولجن تفشلتتتت شلوون اشوفة
نوف: -عزاا يمة موخوش موقف
زهراء: -احممم يعني شفتي كلشي
هدى: -انجبي بس لا جان لابس يمة كلبي راح اموت
نوف: -ماصار شي جنتي متدرين عود من تشوفينة اعتذري منه وخلص
هدى: -هو شني اعتذررر يبووو كون احتركت انوبة اغنيي.
نوف: عدت على خير كافي
هدى: -شفت الحمام فارغ وهاي نوف تواسي بية شوية وتبجي بعد زركت روحي بالحمام وسديت ضلت ادك وتصيح وانة ولا يمها اضحك.
نوف: -العگروگة التفتر بالخيس لو تموتين متصيرين نضيفة
هدى: -طلع لسانج الخوينسة مو جنتي خوش بت وماتحجين
نوف: -لييش حقييرة صارلي شكدد منتظرة السررة يوصلني تففف عليج مزاعلتج بعد
هدى: -سهلة سهلة يلة باي.
اختفى صوتها معناها راحت سبحت وخلصت ماكو ملابس صخام بوجهي شلبس شلون نسوة هاي ادك بالباب واصيح بلكي وحدة تسمعني ماكو حتى لو يسمعني يجوز يغلسن.
-يهلعرب ردو علية شمااالكم شنييي ماضلت بكلوبكم غيررة ووولكم ردو علية نووفاااانة العگررروكة وييين رررحتيييي
عباس: -وسم شمالج تصيحين
-عبسي روح صيح وحدة من البنات فدوة
-رايح يلا بس لاتصيحين
-خوش
ضليت متانيتة شوي ورجع: -ماهنا البنات.
-جا وين طارن حلقن بالسما شبيك عباس شوفهن زين
-يمكن حلقن فضيها شتريدين
-ها هيج صيح امي
ضليت ساكتة گلبي انشلع هاي حوبة نوف اخذت دورها شورت بية المفلوكة رجعت اسبح بالمي شوية وسمعت صوتة.
-افتحي الباب
-ياااء
-اخذي اهدومج شمالج
-ها عوفهن علگهن وروح
-وين اعلگهن يطيحن.
ضليت الطم شلون فشلة طلع هدومي يبوو علية فتحت الباب ومديت ايدي اخذتهن منة سديت الباب وغميت كصتي ايدي كلها طلعتها غسل الطمني كون بدلت بسرعة رحت للحجرة مشطت ولفيت شعري طلعت ادور على ذني الزوج صايرات رفگة كلش.
خميت البيت كلة مالگيتهن طلعت برا البيت شفت ولد واكف يدخن ركزت بية نفسة صديق عباس التكول علية زهرة صاك طلع صدك صاك ابتسملي من شافني اعاين علية رحت اركض شكد ثولة هسة شيكول عني.
سمعت صوتهن يضحكن لكيتهن خربانات ضحك وجدة نوف تسولف وياهن.
جدة نوفة: -ها فريرية وين جنتي
-بالبيت وين صدك شعدجن طالعات وانتي حبوبة وياهن
جدة نوفة: -خاب شني تحاسبيني يمغسولة ردنا نشتم هوى حرام يو مو حرام
هدى: -على كيفج حبوبة هسة شكلت
زهراء: -حبوبة كملي بعدين شصار
جدة نوفة: -گصو لحيتة يجدة
طاحن من كد مايضحكن وحبوبتي هم تضحك متت حركة اريد اعرف عليمن مايحجن رجعن اعاينلهن مقلصة عيوني يسولفن وياها ومنسجمات كلش.
راحت حبوبتي تحجي وي الولد وحنة طبينة جوة نتعارك.
عباس: -ها ولجن منشنشات
هدى: -عليمن گصدك
عباس: -مرت انمار صايرة احسن من گبل وانتي زهيران طالعة من الكأبة
زهراء: -لا بعدني كأيبة اريدن اطلع حباب
عباس: -خوش بس اشوف الولد شيريد اطلعجن تحضرن راحت نوف تركض تسبح بدلنا بسرعة وضلينا متانينة رجع مايتحاجة ينتر بينة نتر صعدنا وياة حتى الهوة گطعنا ماعرفنا شمالة وحدة تأشر للثانية بعيونها.
-ترررريدينة موووش؟
جفلنا كلنا ويامن يحجي رجع صاح بعصبية.
-انعجببب بيييج ستتت هدووة بالمبااارك عليييج
كلهن يعاينن بوجهي انصدمت شيگصد هذا.
عباس: -امدداج غببرررة اذاا رضييتي تصيررين خددامة بيج خير عوفي الزواج وكملي دراستج الغبررة
زهراء: -شني عليش تحجي فهمنا
ضل ساكت نص الدرب الا كال.
-صاحبي خطب هدوة من جدتي
هدى: -وجهي اشتعل نار ضليت ساكتة نزلنا اشترن ويضحكن وانة جامدة مستحة.
-بعدج صغيرة شيلي هاي الفكرة من راسج ختولي انة اوكف بضهرج واخليج تكملين بس ارفضيه
هزيت براسي وميلت منة جان شكلة كلش عصبي بيدة جكارة يريد ياكلها اكل طلعت هالروحة من خشمي عكسهن وصلنا للبيت بعدنا بسم الله شوية وكالت امي.
-ها يمة اجتج ذيج القسمة الزينة شلون ولد شدكولين
ابد ماتوقعت بهلسهولة ضليت لا اخذ ولا انطي تدخلت حبوبتي وكالت جلمات كسرن خاطري.
-البنية اول ماتكبر تعرس هم يلة تشوف حياتها والقسمة الجايتج يحبوبة زينة الولد كعد وياي وحطاهن جدامي كلهن ماضم شي علية عدة بيت وحيدة وراتب خير من الله ماناگصة شي، شدكولين
رحت اركض لحجرتي شبيهم ذولة من كل عقلهم مايرحون يزوجون الاكبر مني انة شكو غصيت بحسرتي ونزلن دموعي التمن علية يحجن علية.
شروق: -مايجبرونج والله شني بكيفهم لو بكيفج
زهراء: -اي صح بكيفج شني شبيج محد يجبرج على شي.
نوف: - والله لو جبروج على الزواج نحرگ البيت عليهم خل يموتون معليج اني موجوده
ضحكت على حجيها من كل عقلها تحجي اجت سجيوة وجهها اصفر.
سجى: -ها ولجن شكو طيحتن كلبي
زهراء: -ماكو شي حجي
سجى: -لا تخافين وعلى الفحل العبلج بيهم طوبة بس يجبرونج على شي لاتكولين محد وراج انة موجوده اعتبريني زلمة واليحاجيج اكسر راسة وكولي ماكالت.
هدى: -كفو من شواربك خوية
سجى: -اصيرلج اخو جم هدوة عدنة.
حضنتني طبطب على ضهري شكد احبها صح نتعارك بس من يصير شي تنگلب مية وثمانين درجة، مر اليوم عادي كعدنا الصبح البيت هوسة.
-شكو خير
شروق: -راح يخطبون لعباس.
بلعومي انشحط الدمعة وكفت بطرف عيني مدري ليش بس ماكدر اشوفة يتزوج احسة خاص بية اي والله حتى جنت اغور زهرة اغور الكل بية ماعندي غيرة كلش متعلقة بية ركضت للحجرة دموعي تصب وگلبي محترك ماطلعت بعد منا لمن طبت علية سجيوة كعدت بصفي تحجي عيونها مدمعة حاسة بحرگة گلبي.
سجى: -ليش هداوي مو كتلج عوفية شوفي الاحسن منة
هدى: -ماكو احسن منة لاشفت ولا راح اشوف.
سجى: -صدگي اكو وهاي مشاعرج مؤقتة مال مراهقة باجر تصير عدج عادي وتتعجبين على روحج شلون جنتي هيج تحبينة راح تتأكدين هاي مشاعرة واهتمامة اهتمام ابوة لا اكثر. لاتفضحينة مشية عليج العباس تخلينة علج بحلوگ ذني المايسون فلس
-مو بيدي ماگدر من سمعت گلبي اشتعل نار
-تگدرين هدوة تگدرين طلعي هاي الفكرة من راسج عوفية يشوف حياتة ادعيلة بالفرح لاتنفسينة.
-والله اتمنالة الخير عليمن انفسة الله يوفقة وهاي مشاعري مثل ماگلتي مراهقة.
-عفية باختي القوية تسوين الاحسن منه الله ضاملج واحد يحبج ويسعدج
-ان شاءلله
حاولت اتأقلم وي الوضع وباركتلة حالي حالهم بس عيوني يفضحني احاول ماافكر بالسالفة.
شروق: -شبيج هدوة
-مابية شبية
شروق: عيونج حمر ويدمعن
-حساسية
-اخذيلهن علاج لافرد نوب يصيرن
-ان شاءلله.
صارت الخطبة گوة لازمة روحي مدري شبية حتى مشاعري ماعرفهن تجاهة هسة لو يكلولي اتزوجية ماارضة والله ماعرف مشاعري شني.
نوف: -بنات شلبس
شروق: -عدج هواي هدوم البسي اليعجبح
نوف: عندي الوان اريد اسود ناسقلي
زهراء: تعاي انة اكلج شتلبسين البسي هذا القاط بوية جنج محامية تطلعين
شروق: اي والله كلش يلوگلج
نوف: -وشعري اعوفة مفتوح
شروق: -لا يابة محد يرضة للحنة عود
زهراء: -ها نوف شو نسيتي اخوي نمر ولاتجيبين طارية.
نوف: -وحده بوحدة هو البتعد عني مو اني براحتة خلي يعيش عود من اكبر شوية واتخرج اطلگة
شروق: -كفو من اختي الذيبة
زهراء: -لا مو كفو خطية نمر
نوف: دعوفي اسد وخليني ابدل
هدى: -كلهن لبسن ضليت بس اني رحت للبنات سفانة تلوب روحة تلعب خطية كلش تغيرت وذني حابسات رواحتهن يقرن.
-ماتروحن شني
-وين عدنا فلك للعرس هسة هي خطبة
-خوش جا اقرن زين.
طلعت قميص من رغد عدها اشكال علبو جامعة واخذت بنطرون وشمرت شال على شعري رحتلهن لكيت شروق وزهرة يتحمرن.
-هاي شني صدك ماتستحن حمر وكحل وفلك
زهراء: -بدون حجي زايد تعاي خلي واسكتي عنة
-اي ليش ماخلي اخلي
خطيت الكحل بعيني اشو اخذني الواهس جريت المسكارة والحمرة ولطخت لطخ.
زهراء: -خاب كون انة ولد حتى اصوفرلجن شني طلعتن تسودنن
شروق: -اي والله شني هاي صاكات انتن شوفن نوف.
صوفرنا بصوت لابسة قاط اسود كلة جاي فيت عليها والكعب عالي وجنطة صدك تفلش.
-خرب وجهك نمر اكو واحد يعوف هذا الجمال كلة ويمشي
نوف: -اي رجلي الماكدر احجي عنة
شروق: -الصراحة عجبتيني بهاي الشغلة ولا مرة ذميتية جدامنا
نوف: -على شنو اذمة اختار حياتة الله اليعلم بيا دولة هسة الله يسعدة
زهراء: عااااع سويتيها دولة هسة تلگنة بالعمارة يو البصرة فلك الصابجن
هدى: -هسة انتي شحارگج امشي لا اطيرج من جدامي.
نزلنة نركض عبالنة عافونة لكيناهم مجتمعين بالمطبخ صوفر نزار بصوت عالي وضربة رحمن على ضهرة.
نزار: -طلعتن بنات صاكات والله زين عبالي ماعدنا بنات حلوات دهر فرجن
رحمن: -حلگك اشگة بس تحجي انوب جدامي الا اخرب خلقتك
نزار: -وانت شبيك حارگ دمك بنات عمي واشاقة وياهن
رحمن: -لا تشاقة ولا هاي احترم روحك
نزار: -خايبة شريقة اصلا انتي طالعة زوعة ولا حلوة كلهن حلوات الا انتي
رحمن: -تسوة راسك الخايس.
صارو مالخ كلنا كمزنا على الصوت عبالنة واحد من عمامي.
جاسب: -زعاطيط شمالكم مال الغسل شلون شكول مدلول وشنشول
رحمن: -عريفي على كيفك بهداي بهداي
جاسب: امداكم اي والله شني ها وين البنات بس انتن ترحن
شروق: -اي البنات عدهن امتحانات
رحمن: جا خوش لاتضلن هنا اطلعن وياي
رحنا وراة لاگانة عباس طالع يخبل شواربة مقوسة ومزين اللحية بس العطر يفتر وراة بلعت غصتي وضلينة واكفين متانين سيارة تاخذنة طالعات گبلنا.
درت وجهي بعدة على وكفتة عينة علينة وجكارتة بحلگة درت وجهي عنة اعصر باصابعي صعدنة بسيارة صغيرة كعدت وحده فوك الثانية تكسرنا تكسرت بين ماوصلنا لاهل العروس نزلنا ودخلنا جوة.
زهراء: -كون اجيب سجيوة تكعد تصنفلي
شروق: -زهيران طالعة عينج ولسانج شني سالفتج
زهراء: -من اجت هديوة خربت اخلاقي انة جنت حبابة
هدى: -طاح حضح انة شكو صدك ماتستحين
نوف: -كافي لاتتعاركن خلنشوف منو شنو يلة حبايب وياي نشبع شوف من العروسة.
شروق: -زلمتها انتي
نوف: -امشن واسكتن.
هدى: -رحنا ورة نوف العروس لابسة فستان يعني شكلها مقبول بس عمرها جبير يعني خمسة وعشرين اقل شايفتها مرة يعني تنبلع مشت مراسيم الخطوبة المعتادين عليها خلصو ودخل عباس هنا اختنگت من شفتة بصفها دخيلك ربي لاتفشلني جدامها انوب امي لو لمحتني تموتني لبساها الحلقة وهي هم كوة مصبرة روحي اعصر بيدي وماكو. عابس وجهها يرسم ضحكة جذبية على وجهها عكسها تماما طايرة من الفرح ماتكدر تضم فرحتها اختنكت ماكدرت اضل اكثر طلعت للمطبخ فارغ شربت ماي وطلعت برا طخيت بزلمة درت وجهي علية نفسة الخطبني مبتسم.
-يا ول غسل شمالك تضحك
-خاب شمالج وياي
-دطير شعدي وياك
رحت طالعة روحي ادور السيارة الجينة بيها لكيتها وصعدت بيها كوة لازمة دموعي بس ابجي يسيل الكحل واصير جنية التفتت للجامة تندك.
-شبيج ليش طلعتي احد ضوجج
-ماعليك
-يبوو عنودية وعصبية
عاينتلة بطرف عيني شبية هذا خبل زلمة شگداتة شكبراتة راح من وجهي ضليت وحدي متانيتهن يطلعن انفتح الباب درت وجهي علية عاگد حاجبة
-عباس: بيج شي
-لا
-جا ليش هنا وحيدج
-متانية البنات.
-ماضليتي يمهن
-ماريد بكيفي
-اي عمي بكيفج محد جارلة سيف عليج
راح ورجع جايب البنات وياة.
شروق: -ماريدن بالنص اريد يم الجامة
نوف: -اني يم الجامة لاتصيرن لوتيات بالجية كاعدة يم الجامة هسة ارجع لمكاني بدون كلام
زهراء: -واحنا تحصرنة حصر امداجن وامدة اليطلع وياجن
هدى: -هسة فضنها اصعدن مالنة خلگجن
كعدن بالنص طول الدرب وحدة تدفع بالثانية وصلنا وكبل رحنا نسولف للبنات على العروس والاحداث.
رغد: -حلوة حلوة.
نوف: -اي صح بس اعتقد الفستان نشاز وي لون بشرتها
زهراء: ولج شنهاي النشاز
هدى: -هاي مال مثقفين ماتفيدج غلسي
نوف: -شوية تسريحتة مو عدل بس اوكي حلوة
زهراء: -ماتعرفين الذوق مو كلش حلوة
هدى: -بعد شيسكتجن بعد ناكل نشرب نام مو حلوة لا حلوة هسة احنة شعلينة راح تنامن وياها عوفن البت
سجى: -كفو من اختي هيج اريدج شامخة مثل الجبل مايهزج ريح
رغد: -شوف الجبل واكف ولا هزتة ريح شوف النخل عالي لو تموت مايطيح.
سجى: -غسل لهلحلگ عود هم تعرف تغني
شروق: -صوتج مزنجر لاتحاولين
رغد: -شحجي وياجن ماكول بس غير الله يهديجن
نوف: -عبالي حتدعي علينا
رغد: -لا يابة مو هسة لان يكلج ياداعي الك ثلثين الدعاء
سجى: -يلا فارجن نريد نقرا
هدى: -هسة فوك مانطلعهن من جوهن ونحجيلهم.
نوف: -بدلت ورحت يم البنات تعودت عليهن وخايفة كلش لا افارگهن صارت بية خوفة من التعلق بس للامانة طلعني من جوي ابد مافكر بالصار وياي اضحك واشاقي بس من يجي اليل احن واون.
رحت لعائشة تخابرلي على امي مشتاقتلها كل يومين تتصل بية لو اتصل بيها كلش فرحانة بية من تحسنت
وخاصة من اسولفلها على البنات وعلاقتي بيهن.
-انطيني منو يمج من اخوتي
-بس عبيد الله
نوف: -ها عبيد شلونك وجهك محصف.
عبدالله: -ها نوفة ام البزازين شبية وجهي تعيبين علية انتي احلى مني
-لا عمي وين انت الجمال والزين كلة وعلى طاري الزازين اعتقد انقرضن شو مكاعد اشوفهن
-يفترن بالشوراع مسويات عصابات حتى صرت اخاف منهن
-ههههه حلوات والله
-اي كلش وجهج فايح شتخلين شتاكلين ماتكليلي سر المهنة
-قهر حزن بجي حرگة اجمعهن واخذهن قبل لاتنام ويصير وجهك يجنن
-كلش ماريد خليني هيج وجهي محصف
-سجاوي وهنودي وين.
غصت بالكلمة ردت اكول حياوي اخذت نفس وذبيت حسرة: -يبوو لاتفخين بوجهي راح تفكريني
-اي علساس انت شلونك ملياردير
-لعد شعبالج حبيبتي لعلمج هسة خابروني من تركيا مدراء الاعمال.
انطلق عبيد بسوالفة الماتخلص ضحكت شكثر ورزلتة ورزلني غيرت جو وياة شوية وسديتة منة.
اخذت الموبايل ورحت انطية لعايشة.
-اسفة بس.
رجعت خطوات من شفت شكلة القذر اي ماحبهم ولا اطيقهم واليوم اليتواجدون بية ماطلع ابد.
-تعاي بوية تعاي خلنشوف طولج.
رجعت كوة عن روحي اشوفة شيريد
: -تفضل
-وين صخامج
-للاسف ماعندي صخام
-دافعلة وهو عايفها يخوط ويلوط والله عدة حض وين مايروح يلكة ناس تدافعلة
-وانت شكو
-بعدج ماتعرفيني زين اكص لسانج واشمرلة للجلاب بس تتجاسرين بالحجي وياي
-شوكت تجاسرت انت سالت واني جاوبت
-طاح حضكم ثنينكم و.
كطمت كلمتة من دخلت عايشة جنت واكفة بالباب باوعتلي بنضرة خيولي مدت ايدها ليورة سلمتها الموبايل ورحت صاحتلي جدة حكمة هي ونوفة كاعدات بالمطبخ.
-جدة ماتذبين الاسود مايصح لابستة كافي دارت السنة وراحت ذبية مايصير
انطني محاضرة كاملة وامي هم شكد حجت علية اذبة التمن علية استلمني هنا كلهن ذبن بس الحجيات اخر شي صار الموضوع اجباري. اخذتني عايشة للسوك لازم البس جديد.
-اووف اووف اووووف واحد مايقرر شي بهلبيت.
شروق: -كافي نوف صدك مايصير وهو الحزن الرسول فرضة تلث تيام مو سنة ونص راح تصير انة مو هل وياج وذبيت ترة الحزن مو بالاسود
تنازلت ورحت لبست صايتي ولفيتلي شال طلعنا للسوك اول مرة اشوف سوگهم شعبي بس حلو صارلي فترة طويلة ماشايفة هيج اشياء المرة ماقصرت شكو شي يعجبني تشترية وتدفع فلوسة عرك صرنا اني هم عندي فلوس ماعايزة بس ماقبلت.
وكفت اگلب بالمحابس الرجالية عجبتني وصارت عيني على رجال لابس سترة طويلة سودة وكلة اسود كلش طويل وضخم شعرة طويل ولابس فوك راسة شفقة سودة انتبهت ليدة مخليها بخصرة لازم اسلاحة وبيدة موبايل صغير قربة لحلگة وگال.
-نيشنة الهدف.