رواية بين سلاسل العادات للكاتبة كفاية كاظم الفصل الثاني والأربعون
بلسان رغدة
ذنوبنٌا نحّب.
من گلبنا، .
أنصلي للوادم نوافل.
واحَنا ماكامّل فرضنا.!
من زمان جان بالي ازور اول ماكتلة كال ادللي اجر كوستر واخذ البيت كلة لان صار فترة طويلة مارايحين لعتبات المقدسة.
ايدي حاضنة ايدة وطايرة من الفرح ركز عيونة بعيوني وگلبي يدگ بقوة همس: -احبج
رصيت ايدة بقوة واكتفيت بالابتسامة مشكلتي ماعرف ارد هي كلمة وحدة بس تضيع من راسي.
تلاشئت ابتسامتة ودنك راسة مشينة خطوة بخطوة وايد بيد وصلنا كبال الامام...
-تروح تزور
-بس أمنج يم سجيوة
-چا انا اندل لاعبالك اضيع
-يله روحي ورجعي لهنا مو تضيعين
هزيت راسي ورحت طايرة وحدي عفناهم ورانة ابتسامتي شاكة حلگي وداخلي حب جبير لجاسب افكر شلون احسسة بية بعد اليوم...
زرت وصارت الما محسبتلها ضعت بالامام دخلت من بوابة ومن ردت اطلع شمروني من غير بوابة.
اروح منا وارجع منا كل شوية سائلة اليشتغلون بالعتبة واوصفلهم المكان راسي انسطر والوقت تاخر...
تنفست براحة من شفتة من بعيد واكف وموبايلة على اذنة يخابر رحتلة امشي بسرعة دار وجهة نزل موبايلة غلقة وخلة بجيبة اجة ناحيتي وعثرت بالعباية كومني يصيح: -اسم الله
رفعت عباتي لراسي وصار يعدل بشعري الطالع وحجابي النازل مامنتبهتلة اباوع بشكلة مگلوب گلاب حجيت الهث: -ضعت ذني اليشتغلن خلني اطلع من غير باب.
ماجاوبني وحتى ماباوع بوجهي راح كدامي يمشي بهتت ملامحي ومشيت وراة بتعب وصلنا الهم لكيتهم مجتمعين رحت يم سجيوة والبنات...
سجى: -ها ولج وين جنتي
-ضعت يمة متت من الخوف كلت هسة وين الكاكم
سجى: -الحمدلله من شفت وجهج الفاهي بس المجسب شماله گالب خلقتة
-والله مادري بس هم حقة يمكن خاف علية.
رحنا للمطعم وطشينا اني والبنات بنفس الطاولة والولد بيمينة سجى جانت تراسل شربت مي وخليت ايدي على خدي تعبانة عيوني يحرگني ومنا هوة بارد فركتهن اكثر من مرة صارن يدمعن كمت غسلت وجهي ورجعت لكيت الاكل على الطاولة اكلنا وردنا نكوم...
جرتني سجيوة من ايدي بقوة للحمامات: -ولج ايدي شمالج راح تنكسر
وجهها مخطوف: -شفتية ولج
رغد: -ياهو!؟
-حسن المسربت
-حسن!
-جان كاعد كبالج وجة بوجهة شني ماشفتية.
-لا والله اصلا مامركزة بالجدامي
-جا ودموعج هاي عليمن
فتحت عيوني على وسعهن بصدمة: -شتكصديين؟
-البالج
بهتت ملامحي والساني انعكد لزمت راسي احسة انضرب: -شكاعد تلغين شني نسيتي انا ياهو ومرتمن
-بدون دراما يا جلمة ردي لمجانج بس هيج توقعتج من شفت عيونج حمر نعتذر ست
عافتني وطلعت كالبة خلقتها ارتجيت على المغاسل مصدومة شلون تفكر بية بعدني احبة وابجي علمودة هي اكثر الناس تدري شني هو وشلون كرهتة بسبب السواة بية...
طلعت من صاحولي مشيت حيلي بايد وكفت على صفحة راحو يشربون جاي وماحس الا انسحبت من زندي بقوة...
اريد الحگ بية وامشي بالكاع ماكدر اخطي بسبب سرعتة: -اخخ ايدي على كيفك راح تنكسررر
شبيك جاسب اوكف واحجي الرايدة.
ماسمعلي ولا وكف الا لمن وصلنة للكراج شمرني على الكوستر انرطمت بيها زندي موتني جانت الساحة فارغة ماحس الا راجدي دار وجهي صفح بنص صدمتي انصدمت اكثر من الكلام الكالة...
-ارتاحيتي من شفتية وسولفتي وياة مو؟
-شتحجي انت
-لانعل اهلج واحد واحد وانعل الساعة الاخذتج بيها عبالي تنعدلين بس تضلين مثل ذيل الجلب عمره ماينعدل
-ليش تسب شمسوية
خنگني من ركبتي انكطع عني الهوة وضلت رجلية ترافس بالتراب: -گح. تتواعدين وياه اذا ماموتج بيدي فلا اتسمة باسمي اذا ماخليتج تتمتين الموت هاي اذا ما انتحرتي بيدج.
الدنبوس نبت بلعومي روحي شاطت بين ادية دفعني بوسط الكوستر على وجهي طلعت الدنبوس وايدي انترست دم اللهث كوة اتنفس ودموعي تنزل على خدي نهضت روحي ورحتلة منهارة...
-جاسب والعباس ابو فاضل مادري بية جاي اخذني للعباس احلفلك مادري بية ولا شايفتة
ضحك باستهزاء ودفعني جوة: -كالو للحرامي احلف كال اجاني الفرج العباس مايشور بكح. مثلج
گلبي احسة صار نصين شلون تقنع انسان انت مظلوم شلون تشرحلهم ويصدكون نيتك.
دخلت جوة ورحت كعدت بالكرسي الاخير شفتهم اجو غطيت وجهي بالعباية ودموعي تصب احسها نااااار يجون كلبي مو خدي صاحبة روحي ماصدكتني جاسب يصدكني...
عيوني ماغمضن ولا كطعن دمع لمن وصلنا للبيت احسهن صارن جمر ماشوف بيهن...
ياترى شمنتظرني بعد كلت انفتحت بوجهي رجعت تنسد من كل البيبان!
من بعد الصار اكو حياة الي؟!
نوة.
طلعت من الحمام انشف بشعري لكيته كاعد يشتغل بملفات ومندمج بيهن رحت للغرفة زيتت شعري وجبت المشط بيدي: -انهار حبيبي مشط شعري
مارد فاصل للاخير: -نهوري انهار
نمرر نموررري
رفع عيوني صوبي عكد حاجبة وكال: -شني ولج شتحجين
-اسم الله حبيبي ماحجيت شي بس جنت اصيحك
-شوفي شكر اسمي عوفية بحالة قيمة ماضلت اله لو تضلين تكولين انهار وتمشينها لو لا تلعبين بكيفج
-تمام.
بوزت شفتي وطلعت للحديقة ضايجة كعدت بالمرجوحة وكمت امشط بية لحظات واجة باسني بخدي بقوة وسحب المشط من ايدي لايدة.
حسيتة مستعجل لان صار يمشط بسرعة: -على كيفك وياة ترة يوجعني. اذا عندك شغل روح كملة اني امشط
-مادامني موجود انا امشطلج بنيتي شعندي غيرج
-بس يتعب شعري هواي خل اكصة
-حتى اكص ركبتج
-يبوو انهار والله ثخين يفحطني من امشطة
-محد عاتب عليج تمشطينة انا امشطة
-بس انت مو دائماً موجود
-انتظريني شيرادلها هاي.
-البنات ويانة بالكلية كاصات شعرهن والله يخبل عليهن
خنگني بالشقة من ركبتي وكال: -شكر بوية استر على روحك شجلبتي اكص ماكص لان هاي انا احب
-عود صدك تحبة لو تشاقة
-افاا شلون ماحبة غير ميت بية اتذكر اول مرة شفتج ضفيرتج تفتر وراج بيومها حجيت عليج لان ما لابسة حجاب
-جنت صغيرة
-وين صغيرة لابوية مو صغيرة بس عقلج صغير
-شلون يعني
-يعني معلوماتج مقارنة وي البنات البعمرج كلش بسيطة وسطحية.
-ها افتهمت اي مو ماعندي اخوات وامي ماتتطرق لاي مواضيع واني هم ما اسئل ماعندي فضول مرات اسمع مقتطفات اكول هسة اني شعلية سائلة ومتعبة نفسي
-ههههههه اهم شي ماتعبين نفسج
-اي والله النفس عزيزة
سكت يمشط شوية وخلة راسة يم اذني: -بداعتي لاتكصين شعرج بيوم ولا تفكرين بالسالفة خلية رمز يذكرج بية كل ماتعاينين لروحج بالمراية افتحية اتذكريني واضحكي
-تمام صار ماكصة ابد اعوفك مبتلي بية ههههه
-احلة ابتلاء وربي.
-سويلي ضفيرة
-ادللي
-مو هاي العادية هاي الفرنسية مدري الهندية
-شنهي بوية شكالولج علية كوافير هي هاي ونعمة من الله اعرفها
-لا حبوبي فدوة سويلي منها
-ديلا يابة اسويلج بس شلون تصير
شرحتلة شلون يسووها بقة يضفر ويحل واني كاعدة على نار بعد فترة خلاها على جتفي.
-تفضلي خاتون ان شاءلله تعجبج
-الله حلوة بس مامضبوطة كلش.
راح كدامي يقطف ورد ناعم طالع بالحديقة اجة باتجاهي مبتسم واخذ ضفيرتي يخلي بيها طلعلي زلف برمة باصبعة وباسني وشمني: -افيشش ياريحة الجنة تنكرطين انتي شني طركاعتج
كمت اضحك رحت شفتها بالجامة خليت ايدي على حلكي اضحك تجنن مسويها احلى من البالي رجعتلة لكيتة كاعد بالمرجوحة بستة من خدة وخربطت شعرة: -l love you
-احبج يابعد جبدي هيج يله تحس بروحك متغزل.
سوالي مجال كعدت بصفة حضني وخليت راسي على جتفة: -حبيبي شوكت تروح للناصرية؟
-ورة العزيمة
-كلش حلو لعد نخليها على الجمعة حتى السبت تروح والاحد انت موجود
-هو هيج
-يلا كوم مو عجبتك الكعدة كمل شغلك واني اكمل قرايتي
كعدت صباح يوم الجمعة مخبوصة شسوي بالعزيمة ماريد اخوتي يعيبون علية كدامة وخاصة عبدالله يفضحني سويت ريوك ورحت طلعت ملابسة وكعدتة يسبح رحت ابحث باليوتيوب عن العزايم اشوف شنو الاكل اليطبخوة...
شمرتة من ايدي من دخل سحبتلة كرسي كعد وضليت واكفة فوك راسة: -ماتجين تاكلين
-مااشتهي بعدين اكل اگلك صدك فكرت شنسوي
-انتي فكرتي
-اي شوف نجيب مواعين مثل الصينية ونترسهن تمن ونخلي عليهن دجاج وخبز بالاخير نغطيهن بية ونجيب فواكة ولبن
غص بالگمة يضحك رحت ادك على ضهرة صبيت كلاص مي شربتة: -هسة شبيك ياعيني على شنو دتضحك
-مدا اضحك بس داكول
ضربتة بخفة على زندة ورفعت حاجبي: -لتعيب علية احجي عدل.
-بت اللذين شعدنة صياني تمن وعلى انتي تضحكين مو طبيعية
-يا هسة شبيك وياي غير هذا الموجود شفتة باليوتيوب
-ادري فاتحة لو عرس لو خطبة حتى نسوي مفطح شبيج باباتي
-اهو مو صوجك صوجي اني افكر
-والله متعبة روحج النسوان تحضر وتطبخ
-يلا جيب اطبخ كايلتلك لا لو ماعرف
-ايبااخ صرتي تعرفين تطبخين انوب عزايم
-اي عيني تعلمت خو ماابقة بمنيتك
-افا هاي شوكت منيت عليج لا شكر مامترجيها منج
-يلا اسفة بعد ماعيدها بكيفك.
رجع يكمل اكلة ويضحك بوزت شفتي وكعدت مكابلتة: -عدلي حلگج لج
-اهوو ولا دكول بشر ديفكر ديلا
-شبيج بوية مخبوصة كلشي جاهز يجي
-من المطعم
-تؤ طباخ يسوي اشكال تشوفين بعينج ابداعة
للضهر اخوتي موجودين وعزم ولد خالة عزمت سرى كالت متكدر تجي تعبانة عزلت غداها كلت ادزة بيد باهر...
ابتسمت واحس بالفخر من انمار وكرمة عزيمة من عزيمة سمج مسكوف تمن احمر دولمة مرك لحم وبامية من غير النواعم والفواكة...
هند: -معزب نسيبي الله يحفظة
نوف: -نمر هذا شتريدة يصير.
-همتلة بية دارية وياج مو تلتهين بس بروحج
-اكيد لا اصلا كلة علية المواعين والطبخ والتنضيف وملابسة اغسلهن واكويهن وارشهن عطر وارجع اخليهن كلشي بخانة ومن يخلص اكل اسويلة جاي راسا وراها بشوية حلويات وفواكة اقدملة مدللتة اني
-اي عفية ببنيتي ماريدة يحجي علية هو اني جنت الطم اريدج تتعلمين بس انتي شاردة اوديج تطبخين الكة مهند يطبخ وانتي تسولفين علية.
-ايام زمان من جنت زعطوطة هسة صرت ام بيت وينحلف براسي حتى يسميني ام فلان مو باسمي
-صدك يمة ماناوية تخلفين الزلمة هم يريد جهال وهو مو صغير.
-ها اي اي اكيد نجيب بس بعد من الله مو بيدنة
-ونعم بالله ان شاءلله يترس بيتكم جهال عبالي انتي مانعتة
-لا وين امنعة هو كلشي بكيفة اني عبد المأمور شيكلي اكلة تم
-عفية بيج يمة الله ماقصر النهار كلة ادعيلج تصيرين مرة عليج مسؤؤلية
-الحمدلله الف الحمدلله مايقصر ربج.
درت وجهي للسنك فتحت البوري غسلت وجهي صخنت من كثر الجذب شوية ودخل عبدالله شمر روحة على القنفة لازم بطنة...
عبدالله: -بوية بطني ولج يمة بطني
هند: -محد كايلك اكل هواي
عبدالله: -ماكلت هواي أصلاً لكمتين
هند: -جا شمالك كون ماماكل
عبدالله: -يمة بتج هاي الفاهية خلتلي بالاكل شي خلتني اتزوهر
نو: -هسة اني ماعندي شغلة ولا عمل افكر اخليلك سم ماعرف شنو
عبدالله: -اي سم سممم يمة سممم تسممت من وراها.
نو: -شوف عبيد تسكت عني الا اعدمك العافية
عبدالله: -والله وطالعلج السان الفاهية تعدمني ياناس ياعالم تعالو شوفو اختي الربيتها من جانت بالكماط تاليها تتجاوز علية وتطردني من بيتها
نو: -هسة اني شوكت طردتك ليش تجذب حتى امي كاعده همزين جان سويتها صدك
عبدالله: -يمة سمعتي لا ماسمعت اصلا امي جانت فاصلة ليش مادريتي امي صايرة تفصل عن الدنيا ووين يلا تنتبة النة
-عود هاي صدك.
عبدالله: -يلا يمة كومي هاي بتج طردتنا من بيتها وتجاوزت بحقي لا وانوب تكلي من كثر الاكل هيج صار بيك ماشايف قصدج مو يلا بعد مانطب لبيتج الفاهية ام العكاريگ
ضليت مفهية علية شحجي وياه يحجي صدك صرت اشك بنفسي كايلة اباوع لامي ساكتة وصافنة دخلو سجاد ومهند وهذا صار يلطم...
نو: -والله ماكلت هيج جذاب
دك على صدرة ونشغ: -يعني اني چذاااب شفتو تكلي جذاب رجال شكبرني تجذبني.
نو: -عبدالله لاتلفق تهم علية كلت بطنك توجعك ماكلت شي امي الحجت
لزم بطني وصار يتلوة ويصيح: -اخ يمة بطني بطني تكطع بية ولكم خلتلي سم ادري بيها تريد تخلص مني
كفخة سجاد على راسة: -من الاكل الاكلتة خبطت خبط يكول ماشايف اكل السفرة عزلتها على ايدك فشلتنة كدام الشباب حيل بيك
عبدالله: -هي هاي خوتكم تفوو عليكم يا واطين خل نرجع للبيت واشوف شغلي وياكم
سجاد: -عود لا تقصر الحمام من ذاك الصوب.
كوة كتمت ضحكتي خلصنا الوقت تحشيش على عبدالله راحو الولد عزلنا البيت كلنا خلينة يلمع كعدو ورحت سبحت وكعدت يمهم امي راحت نامت
متغيرة هواي احسها مكسورة تدور بعيونها علينة ساكتة لابضحكة ولا بسالفة تتخيلة وتذكر مكانة الفارغ كلنا نتخطة حتى لوقت معين الا هي الربت والكبرت دارتة اكثر منه كلنة جانت تباوع لطولة وتقرا المعوذات...
عبدالله متوسط الكعدة شامر ادية على القنفة ويحجي بفخر...
عبدالله: -لعلمكم اني اكثر واحد انيق وحلو بالقسم اني ماانكر واكول بس اني وبس هم اكو ولد مرتبين بس من يوصلون يمي اطلعهم كسر احح خو البنات يراقبن بية اروح للكافتريا وراي افتر وراي تخيلو اذا ما ادخل محاضرة هنا مايدخلن تضامنن وياي
جنت استمع واضحك على سوالفة سويتلهم عصير قدمتلهم: -شفت الجو حمة كلت اسويلكم عصير فريش وبارد
عبدالله: -اني ماشرب خاف مخليتي بية شي
نو: -لتشرب.
ردت اخذ الصينية سحب الكلاص مني خلة كدامة
عبدالله: -عوفية مايصير اردج عيب بحقي كرجال ارد مرة
نو: -رحمة الله والديك
كعدت بصف انمار خازرتة ابتسمت لمهند تمنيت اشوف سعيدة الحظ التتزوجة جميل بشكل هادء خدوم اي شي يريدة يسوية بسكوت بدون مايكل لاحد...
انمار: -سجاد ماتزوج مو كبرت
سجاد: -بعدني دخل اشوفلي بيت بموقع قريب على شغلي ودوام ذولة
انمار: -هاي سهلة كول لكيت بيت.
سجاد: -مو هيج الحجي يابة اني ماتزوج اذا ماكلبي يدك ويعشگ
انمار: -انا اكول عوف هاي السالفة الحب يجي بعد الزواج هسة اختك وين حبيتها من تزوجتها صارت الروح والرية
عبدالله: -ولج نوفانة وين سويتي السحر للولد كليلي اسم السحارة عندي شغلة بلكت تسويها
نو: -حبيبي سحر عيوني كافي
عبدالله: -ايباااخ هنا شلون مطفيات اليشوفهن يكول نايمة
نو: -عبيد اسكت عني لا اكوملك املخك.
عبدالله: -وين اكو بت تملخ ادري انمار شمتزوج خوية حضك مصخم طحت بوحدة فاهية كلشي ماتعرف
نو: -هسة اعرف ماعرف المهم يحبني ويعشقني
عبدالله: -غير خلفلة على السحورة
صرت عصبية من ورة كلامة مو اني ادري اني وعبدالله مانكعد بمكان اذا مانتمالخ سحبني انمار لحضنة وباسني براسي.
انمار: -احلة عطايا الرحمن بنيتي وام بيتي
عبدالله: -من باجر ادورلك سيد يفك سحورة خطية هاي خاتمتلك ختم بعد ماتشوف غيرها.
كومت مهند ورحنا للحديقة طلعت البزازين انطيتهن اكل جنت حابستهن خاف امي تشوفهن وترزلني...
-اسفة حبيباتي تعذرني جنت مشغولة
درت وجهي اله يباوعلي مبتسم: -عليك الله مو حلوات
مهند: -يخبلن
-احبهن تعلقت بيهن
-مثل ميمو اتذكر من ضاع كلنا ندور علية حياوي كل مايشوف بزون ركض وراة ويصيح لك ميمو تعال ابو الغيرة البت تسودنت عليك
مررت ايدي عليهن ودمعت عيوني: -جانت ايام حلوة وهو محليها.
تغير الجو بسرعة البرق من دخل عبدالله: -ام بيتت واضح ام بيت بزازينج ذني لا إله إلا الله انمار مضطهد بس يخاف يحجي حسيت بية
نو: -شبيك عبيد تريد تطلكني وترجعني وياك
عبدالله: -يععع ارجعج وياه شبية تسودنت أصلاً ماطب للبيت وانتي بية ماصدكنة خلصنة منج انوب ترجعيلنة لا انمار نوفانة خوش نوفانة ماتلكة مثلها لو تفر الكون.
ماطولو هواي شوية وراحو البيت فرغ وحسيت بوحشة عليهم شيصير لو كلنة نجتمع بيت واحد يمكن نعيش احلة عيشة...
ورة العشة كلت لانمار ياخذني لسرى ماكال لا اخذني فوراً جانت تعبانة كلش ومن اسئلها تكول
سرى: -هو هذا الحمل مابية راحة
-بس شكلج كلش متغير
-يمعودة منو المهتم
-صدك ماعرفتي جنس الجنين
-لا والله بعدني ذيج المرة كالت مامبين كاعدة كعدة
-شتحبين ولد لو بنية يجي
-ثنينهم نعمة بس اريد ولد
-ليش شمعنى ولد؟
-حتى يكدر يعيش بهالدنيا محد يكدر يغصبة على شي وماتحكمة عادات وين مايروح يعيش وكل ما يتالم يصير رجال ناجح
-حلو زين شناوية تسمينة
-بعدين تعرفين خل يولد بالاول
دخلت سيلي بيدها الضيافة: -شكرا سيلي
سلينا: -ادللي حبيبي كملو شجنتو تحجون
نو: -على حمل سرى
سلينا: -متعب هالحمل اوووف الله يكمل على خير صدك وانتي تكملين دراستج يلة تفكرين بالحمل؟
-ماعرف بس هسة مامفكرة.
سلينا: -الله كريم حبيبي ان شاءلله يمشي كلشي مثل ممخططة
بقيت ساعة عدها او اقل وبعدها رجعنا بعد ماوصيت سيلي عليها جانت كلش لطيفة ومبينة شكثر تحبها وعلاقتهن قوية للحظة غرت.
رجعني انمار الصبح لاهلي وراح لاهلة بقة يومين جان على اساس يوم ويرجع حسيت هالروحة كلش غيرتة رجع انمار القديم يتصفن هواي وطول الوقت ضايج...
بين ماكملت قرايتي رحت تحضرت لكيتة غاط بسابع نومة كعدت يمة اباوع لملامح وجههة صاير تراب حواجبة معكودة حتى وهو نايم تلمستهن اوخر العكدة دنكت بستة ونمت...
طفرت من النوم مخروعة على صوتة العالي يصيح الدم جمد بعروكي من شفت حالتة لازم راسة بثنين ادية ويشلع بشعرة بقوة تقربت اوخر ادية دفعني بقوة كلبني من الجرباية كل ما اروحلة يضربني بدون مايحس على نفسة كعدت على صفحة دموعي تنزل على حالتة شبيدي وشسويلة.
مغمض عيونة ويضرب نفسة بعشوائية: -عووفووهااا عوووفوها دم دمممم وولكم لييش لييش تعالوو هيييج السياررة اجتتتكم لاااااااا لا تموتون لا ولكم لا تعوفوني
رجعتلة اصارع وياه بس اريد اسيطر علية حضنتة بقوة ضميت راسة لصدرة ودموعة تنزل نارر.
-ما اسامحهم دمرونااا هسة عندي اخو زلمة بطولة واخت عرروس، وينهم وينهم هسة صفوو بالمكابر كل واحد بصووب خلهم يرجعوون كليلهم يريدكم.
والله احبهم ليش عافوني كليلهم اجيبهم هنا يعيشون وياي وياي
-اسكت حبيبي كافي كافي محد يرجع هسا هما بالسمة طيور طايرين عايشين بقصر احلة من هذا البيت...
-منو كلج منو ها
-هما كلولي
-شفتيهم حلوين مو
-اي يخبلون
-صح كلهم حلوين بعد سولفيلي سئلو علية
-اي سئلو اكيد
-كتيلهم مشتاكلكم ويريدكم
-اي كتلهم
-هما يحبوني مو
-اي يحبوك وهواي هم
-انا مربيهم ابوهم يعتبروني جنت اسبحهم وانيمهم
وكلشي اسوي.
جان فاقد مايحس بالكلام اليكولة كل مايسالني اجاوبة الا ان هدأ بيدي مثل الطفل غفة على صدري مسحت وجهة الينگط عرك ورتبت شعرة المتهلس امسح بدموعة ودموعي تصب على حالة
اواسي الشخص اليواسيني والمصبرني على الفراك
فعلاً لو كالو اكثر شي مألم الفراك سالو الامام على علية السلام وهل هناك اشد من الموت؟
فقال نعم فراق الاحبة اشد من الموت.
شما كبر الانسان وكون حياتة يبقة نقص الاشخاص الخسرهم...
كعدت افكر شنو العلاج الحالتة اكيد ماكو علاج بس لازم اكو شي يخفف عنة تذكرت كلامة من يحجي على اخوانة ويكول جنت ابوهم وشلون طلب مني طفل يمكن لو اجيبة طفل يسد نقصهم شوية ويشوفهم بية...
قررت من هالليلة اسوي طفل وكلشي يدبر الدراسة والحياة اكيد متوكف على شي هواي اكو امهات وهنا يديرن مسؤلية...
تلمست حرارتة جسمة ناار مشتعل حاولت اكعدة يسبح مايكعد بكل الطرق صرت الوب من الخوف خاف ينشمر ردت اتصل بامي من الخوف بس كلت اخوفهم وياي...
رحت جبت بادية ترستها مي بارد واخذت خاوليات انكعهن واعصرهن وارجع انكتهن خليت واحد على ضهرة وسويت لخ على جبينة ضليت للصبح انكع واعصر شي على رجلية وعلى ادية الساعة الاربعة ضبط يلا فكتة الصخونة كعدتة يصلي فتح عيونة بتعب ورجع غمضهن مسحت كصتة وبستة بعيونة.
-سودة علية بية ولا بيك
ابتسمت بتعب ورجع غفة صليت ورجعتلة اتفقد حرارتة مانمت للصبح حضرت ملابسة جهزتلة الحمام كعد على صوت المنبة كوة يمشي حضرتلة ريوك ورحت حضرت نفسي للدوام...
لكيته صافن على الاكل حضنتة من ضهرة وبستة بخدة: -شلونك زين صرت
ماجاوبني غمض عيونة بمعنى احسن كعدت بصفة اسويلة لفات صغار: -اكل يا عيني مو ايدي انشنطت
فز من صفنتة وعكدت حواجبة: -لا انا اكل اكلي انتي.
شفتة ياكل شوية ارتاحيت صح مو مثل كل يوم اكلة بس شال جزء من القلق شلت المواعين غسلتهن ورجعتلة يشرب جاي...
-بشنو دتحس
-راسي يوجعني
صرت ورة ضهرة ودخلت اصابعي بشعرة اسويلة مساج باصابيعي حسيتة كلش ارتاح.
انمار: -عاشت ايدج
-اددل حبيبي
سحبت راسي وطبعت بوسة على جبينة رحت لميت غراضي على السريع: -اليوم داوم لو تبقة بالبيت؟
-اداوم طبعاً عندي شغل هوسة صايرة
-ها يعني توصلني
-لا روحي وي السايق اجاج بالباب.
ضجت بداخلي بس مابينت ودعتة وطلعت بالي وياة مو على بعضة ياترى راح لقبرهم لو شنو صار وياة بالضبط؟
كملت دوامي ورجعت كذلك السايق اول مادخلت للبيت لكيتة بالباب واكف بيدي جنطتين سحبهن واجة صوبي رجف كلبي وبدون ماسلم علية كتلة: -
-وين تريد تروح؟
كعدت من النوم راسي يريد ينفجر من الالم عيوني اريد افتحهن ماكدر لزمت راسي بقوة وكمت للحايط ادك بية: -اسكت اسكت اسكت اسكت
انسحبت وانشمرت بوسط الغرفة فتحت عيوني افرزن ملامحة اشوفة بس مو بصورة واضحة رحتلة مشيتة مامتوازنة لزمتة من صدرة دفعني ورجعت علية جلبت بقوة...
رغد: ليش تشك بية والله ماحبة والله ولا ادري بية ولا شفتة جاسب اني احبك والله احبك وماعندي غيرك.
ماحسيت الا على راجدي يصحيني لزمت خدي مشمورة على الفراش ابتعد من تقرب يمي يتوعد بغضب: -والله التحلفين بية لاطلع الجذب والخيانة من عيونج بس اصبريلي
من هذا اليوم تمرضت وسجى حايرة بية نايمة بغرفتهن ومن وحدة لوحدة حرارتي نار ابر وعلاج ومافايد احس گلبي متهشم وطاقتي مصفرة طول هالفترة ما اجة ولا شافني...
-سجى والله مابالي ليش ماتصدكون حتى انتي ماصدكتنيني بس كليلي شلون احب غيرة من بعد ماعشكتة.
-مصدكتج والحمزة ادري بيج ماعندج شي بس صار سوء فهم
-انتي مامصدكتني بس لان مريضة تكولين هيج سجى والله انا مو نفس ماتفكرون ترة انا ماجرمت بس انخدعت والخدعني ذكر وعرفت غلطي وتندمت ليش رجعت للصفر
حضنتني تسكت بية ودموعها صارن بحضني
سجى: -كون ينكص لساني من كتلج هيج والله مو كصدي بس من شفتج تبجين وهو جان كبالج هيج فكرت كون ينكص لساني والله ياخذني لو اخذتج بغير كصد.
-حقة من يشك مو اذا شاف كلشي ضدي بس لازم ابررلة احسن مايصير الاسوء
-ارتاحي هسة عوفي السالفة استعيدي عافيتج والله كريم
رجعت لغرفتي من صرت زينة جان بالدوام رحت رتبت روحي وكعدت على الجرباية غمضت عيوني انفتح الباب رفعت راسي تفاجأ بوجودي ورفع حاجبة دار وجهة عن شوفتي وراح صوب الكنتور ماحجيت وياة كلت خل يسبح ويرتاح...
اجة ينشف بشعرة طفة الضوة وراح لمكانة زحفت من مكاني ورحتلة خليت ايدي علية بهدوء: -جاسب اريد احجي.
حسيتة مثل الوحش طفر علية خنكني بقوة وصار فوكي كاطع نفسي عيونة حمر طاكة بوجعي وايدة تضغط على ركبتي بقوة حجة من بين سنونة كلام متقطع: -لاتجيبين طاري اسمي لا موتج يصير على ايدي جاسب مات هذا واحد ثاني ديري بالج تتگربين صوبة.
وخر مني شبة فاقدة نزلت من الجرباية ارجف وارجف كوة اجر الهوى طلعت خفت يرجع يسويلي شي ويموتني ثاني يوم التحق هو ورحمن خفف الزحمة عني...
-شلون شسوي كليلي فدوة
سجى: -عوفية من وحدة يهدأ ويرجع بلكي هاي الروحة ترجعة بشر براسة حظ
رغد: -ماضن صار وحش خاف اول ماتزوجنة بكلبة شوية رحمة هسة ماكو دوم
-انتي مو دكولين مايحاجيني ولا يعاين بوجهي
-كلش يكش وجهها يكول شايف شي نكس.
-دخل يطير بكيفة يحلل الامور هسة شلون ما افتهمت منج الصدك هو هم يجي وتشرحيلة وهو يحجي البداخلة وتتناقشون وتصفون على حل شمالكم مادري.
سجى: -گلبي مورم قهر على رغدة حضها مصخم شلون ارتاحت هسة دخلت بحرب طاحنة ياخوفي ماتطلع منها...
الولد عدهم واجب والبيت صنطة بس عباس نزل ومخلي راسة وي ياسر (ابن خالتي) بس يخوزر بية وعيونة وراة وراة مادري شلون الولد متحملة...
الثلاثي ملتهي بالدراسة امتحانات شهرية ومايشيلن روسهن سفانة جانت يمنة سوت العشا رادت تروح جلبت بيها ترستلها جدرية عشا الهم
شوية واجة فارس ياخذها.
فارس: -ها ولج سجوة شلونج
-بخير الحمدلله انت شلونك
-جدامج زين
-دوم يارب
-ارفد شلونة وياج ماحددتو شوكت العرس مو طلعت رواحتنا
-ها بوية شكو طلعت روحك صاير شي
-متعاركين بعدكم
-شني هاي العركة شغلة جديده اشو ماسامعة بيها.
-وين يكدرلج الزلمة تغبلين اكبر راس دهر حتى تخوفين صايرة
اخذ سفانة يضحك شبية هذا اكيد ارفد كايلة شي بسيطة انا اعلمك الاملح...
ثاني يوم داومت جان بحث تخرجي ناقشتة وجان هو ضمن الكاعدين الدكاترة اسئلتهم واحد اصعب من الثاني ذبيت نفس وباوعتلة ارتبكت من ضحكو الدكاترة...
ارفد: -يابة الاسئله منين جايبينها من المريخ
جاوبوة بضحكة: -يابة استاذ جنا نختبرها على كيفك ويانة نتشاقة وي مدامتك.
وجهي انصبغ دم انحرجت صار الكلام كدام الطلاب وكلها صارت تباوعلي قلة اليدرون بخطوبتنا هسة صارت كلها تدري يلة هو اني راح اتخرج...
كملت البحث الضال نايم على كلبي كل فترة ومأجلينة ارتاحيت منة...
مريت على الكافتريا اخذت عصير كعدت بالحديقة خليت القصبة اشرب صافنة فزيت من كعد بصفي
نزلت العصير من ايدي...
-شلونج ست
-هلو استاذ انت شلونك
-ممتاز
-حلو.
رجعت اشرب عصير سحبة من ايدي وشربة كلة فتحت عيوني على وسعهن وعفست وجهي: -ترة جنت اشرب بية
-ترة مو اعمى انا
-ماتلعب روحك
-ههههههههه تلعب روحي منج شني حتى الله يكلبها بية
-ولا شوية
-خاب غير عسل
درت وجهي عنة اخفي ضحكتي الجت فجاة درت وجهي علية شفتة يراسل بولد قلصت عيوني اباوع للبنات التمر فاتت وحدة بس شلون وحدة...
هزيتة من ايدة فز وكال شكو
-ولك شوف ذيج البت بساع راح تروح.
عكد حواجبة درت وجهها عليها واشرلتة: -ذيج ام الاخضر بووووية شلون بت غزال خرب روحج مو بت طركاعة هاي اشلون اهلها يخلونها تطلع دهر صابها على هالجمال
-يعني هسة انتي تكليلي باوع للبنات وعركج وطلايبج لان يجن يحجن وياي
-ذنيج بنات وهاي بت شوف حبيبي اذا اجتك بنية حلوة اغطيكم بعباتي أصلاً اكيف بس مال تجي وحدة حلكها صفح وجلحة ملحة لاطختلك الكريم كلة لا هنا اسمحلي العب بخلقتها وبخلقتك
-عقلج ضارب.
-دعوف عقلي وعاينلها خرب ولك لو انا منك اروح انطيها رقمي
-بيج شي انتي
-هو ياهو اليجي يبلس اخضر فدوة لطولج
-بس عوفيها
- ايبااا ويكلك البنات يغارن من الحلوة
-البنات انتي كلتيها مو انتي
-شقصدك يعني اااانا مو بنيةةة. تشك بااانوثتي وتطعن بيهاااا
-استغفرالله ربي افتهمتيني غلط ردت. اكلج انتي شيخة البنات
-فدوة لكلبك وانت هم شيخ الشباب
-شيخ الشباب جوعان
-ماضل شي جم شهر وتفض
-اضل جوعان اشهرر!
باوعت بوجههة وعضيت شفتي اني وين احجي وهو وين ضحك وكرص ايدي بخفة...
-نيتج سودة ماجنت اقصد سوالفج اريد اكل
ضعت بملابسي من الفشلة كمت لميت غراضي
وعفتة وراي بدون حتى ماكلة رايحة لزمني من ايدي وكفني: -رحمة لاهلج لاتتوترين تضلين ماتشوفين دربج مثل الثور ترحين منا ومنا لو تركعين الحايط لو تعثرين على وجهج.
ضليت بس ارمش بعيوني ابتسمت بفشلة وهو من شافني سكت رحنا للمطعم سالتة عن اهلة كال امي مو زينة حالتها شوية طايحة وكايمة
-سلامتها ماتشوف شر اروح
-الله يسلمج تسال عليج خابصتني بيج
-فدوة لكلبها مرني اسلم عليها من رجع
-صار من عيوني
خلصنا وطلعنا لبيتهم جانت امه يمها مرة وسط بالعمر تداريها سلمت عليها وضليت بالنص ساعة يمها ترخصت وكمت ارفد فوك راسي ينگ.
طلعتلة كال عندي شغلة الج
-روح جيبها.
-جا ماتردين تشوفين غرفتج مجهزها من زمان
-لا عود للعرس اشوفها فرد مرة
-براحتج جا اروح اجيب الشغلة واجي
راح والفضول اكلني لحكتة كلت خل اشوفها لاتضل بنفسي وصلت بلباب مفتوح والبيت فارغ مديت راسي ماموجود دخلت كلني باوعت بيها واني جاي استكشف طاوقني من ضهري حسيت الدم جمد بعروكي نزع العباية جنت لابسة قميص وبنطرون كابوي دارني علية ضربتة على صدري...
-احترم مو شفتني اجيت كلت خل استغلها ترة تعرف سجيوة كلش زين مو من هذا النوع صح انت رجلي بالشرع بس دير بالك تتجاوز حدودك وياي
ضحك بصوت وسند راسة لراسي توترت بالزايد.
-ليش انا ماعرف سجوة حتى اختاريتها من دونهم مرة تحفظني وتصوني لو ابتعدت عنها سنين
وداعتج ماتجاوز بس افك شوكي شوية تسمحيلي.
باوعت بعيونة يطلب الاذن مني رمشت بعيوني والتهم شفايفي ماكو دقايق ودفعتة كلت لاياخذة الواهس عدلت شكلي ولبست عبايتي سحب جنطتي خلة بيها مصرف...
عفتها عندة وطلعت للسيارة بوجهي كعدت ليورة ماتجرات بعد الصار اكعد بصفة شافني ضحك درت وجهي عنة شمرلي جنطتي وطول الطريق يضحك علية...
الايام تمشي بدون تغير وياريت باقية مثل ماهية لان التغيير يضر كل واحد بينة هسة احنا كلنا بالمنتصف بعدنا ياترى ماذا بعدة وهل المنتصف يقودنا الى النهاية ام اكو نقطة تعيسة قبل النهاية كلنا نوكع بيها!
كاعدين نلف دولمة للغدة اليوم ينزلون الولد والبيت مختبص من جان عباس وهسة ذولة نهيالهم جو مريح بعد التعب لازم نعيشهم اجواء بيتية مريحة.
خليت جدر الدولمة على النار وكفت اغسل بالمواعين الوصخة ماحس الا صوت شروق هز البيت هز عفت البيدي ورحنا نراكض الدرج صار شطولة لكيت رغد كبلي واصلة شفتها متجمدة بمكانها دفعتها وشفت المنظر كزبر جسمي ريتني ماشفتة...