رواية بين سلاسل العادات للكاتبة كفاية كاظم الفصل الثامن والثلاثون
صوت الاغاني والردح تصد بالمكان
واحنة بين نركض وبين نشتغل ونهز شوية من يدخلون الولد نبطل ونرجع نشتغل...
البيت فرغ نص راحو للسوگ يشترن ويرجعن الملابس ونص راحن وي العروس ورغد اخذها جاسب مدري وين والبنات فوك يعزلن عفتهن.
سجى: -كفشتي صاعدة للسگف وشادة شالي على خصري حتى دشداشتي ماتضل تسحل وراي بالكاع طلعت امسح بالطارمة الولد نص بالديوانية ونص طالعين يحضرون النواقص للعرس الوضع امان...
اكرف بالماسحة واغني.
-حبيبي وراح للبصرة وخلي بالگلب حسرة لاعيني تنام الليل ولا گلبي غفى وارتاح.
-يابصرة الاروحلها واعوفج وداعتج ما اتزحزح شبر على ريحتج ضال
التفت فاتحة حلگي وعيوني سوة ياگاع انشگي وبلعيني شطلعك حضي المزفت بيدة جكارة مورثها والكشخة فول عضيت شفتي بحركة وايدي راحت لكفشتي الم بيها وارجع زلوفي ورة اذني ابتسمت بوجهة ولوحتلة بيدي هلو وبگلبي اگول اهوو هذا شجابة هسة
-هلا بسجوة شلونج وردة.
-ها انت شجابك هنا
-علمودج
اشوفة يخزرني غمضت عيوني بفشلة وكتلة بتلبك
-خاب شوف جنت انضف ما لحكت اصخم هاي
عض شفتة وگال.
-ادري هاي بس ضمي الهاي
-يا هاي
-الهاي
اشر على صدري مبتسم واخذ نفس من الجكارة دنكت وشفت ثوبي طافر والدلعة عريضة نصة طالع بلعت ريك ومن الفشلة ردت اشرد بعد صرت ماشوف دربي ردت ادخل للمطبخ انركعت بالحايط حسبالي الباب لزمت كصتي بوجع راسي صارت بية وشة متت من الوجع كمت ابجي واكمز روحي شاطت...
لزمني من ضهري سحبني من الحايط يفرك بكصتي
-شو خل اشوف
-فقدددت الذاكرةةة عووفني عووفني راسي صار اسوود بعد كلشي انمسح من راااسي
-سجيوة اثبتي وافتحي عيونج
-ما ماااا روح روح عوفني امشي ماعرفك بعد انتتت يااهو
ساعة يلزم ايدي ساعة راسي واني ابجي ومتسودنة من الفشلة انضرب عقلي...
-هسة غيررر تفتح عينها ولج افتحي خاف صار شي بعيونج.
مغمضة عيوني ابجي واشهك: -يعني اذا صرت ما اشوف تعوفني ولك ارفد تعوفني وتنسة كلشي تنسة دعائي اللك بايام شدتك ومحنتك ليش ارفد طلعت خاين وجذاب الله ينتقم منك
فتحت عيوني اضرب بصدرة وابجي احس روحي صارت نار خليت ايدية على صدرة وايدة لكيتها على خدي صفنت بعيونة وهو هم صفن مشهد رومانسي حتى بالافلام الهندية ماصاير
همس: -سجوة شمالج وياي
-انت ماتريدني انا شعلية
-هذا يا مطي الكالج
-اني كلت لروحي مساع.
-وانتي ليش تسمعين حجي المطاية
-مو هاي كلت شفتني مبهذلة وكفشتي صاعدة للسگف گلت ماتفيدني اني استاذ جامعي والبنات اشكال خل اشوفهن واعوفها
-هاي المطية كالتلج هم
-اي
-جا بعد لا تسمعين لروحج حتى لاتتبلين على الناس خوش
فتحت عيوني مستوعبة اني المطي دفعتة من صدرة وتخوصرت: -هااي عليمن المطي شقصدددك ولك
-ولك!
-انا مطي
-لا مطية
-شكلتتت عيددد شني شصاير بالدنيااا تكلي مطية عينك عينك ياكاع انشكي وبلعيني.
-انا شكو انتي كلتي على روحج مطية بيش طالبتني
-شوكت انا كلت اكو واحد زمال يكول على روحة مطي
ضحك بصوت عالي صفنت اتذكر روحي صدك حجيت سودة بوجهي خزرتة بطرف عيني وهزيت بيدي رحت اكمل مسح واسمعة يكول...
-ليش ماتلبسين بدلة رگص مو احسلج
-شلون
-البدلة استر تطلع شغلة وحده ياصدرج يا زرورج مو هذا ثوبج مطلع حتى الس. والزرور صفح يتلامعن وبيهن طگع زرك
-راساً حجيت: -مو سويت شيرة.
نشغت بصوت وشمرت الماسحة من ايدي فتحت الشال الشادة بية خصري وخليتة على راسي ورحت اركض جرني من ايدي احس كلبي وگف فر عيونة بالمكان ورجع باوعلي بابتسامة نقر باصبعة على صدري الطالع دفعني بالمطبخ وطبگ الباب وراة ضليت مصدومة من كلشي صار
طحت بالكاع كلبي يدك بقوة جني بحلم الصار مو حقيقة اكيد...
رحت امشي على كيف حيلي رايح وبس اتصفن اخذت ملابس رحت سبحت وكعدت امشط بشعري عيونة ببالي مايروحن بيهن سحر عجيب رحت بصفنة طويلة...
فزيت على صوت الهوسة اكيد رجعن مشطت بسرعة ونزلت كل وحدة مبسطة بملابس الها ويكدرن
مالحكن يشترن الهن خلصنها لجهالهن يبدلن ويغرمن
كعدت اتفرج وانطي رايي: -ادري اصفر مشتررية صدك تحجين انتي صفررة وانوب اصفر شتصيرين ليمونة كركم
-ما لكيت بس هذا خايبة لا تكسرين واهسي شمالج.
-حلو حلو اتشاقة وياج هي صفرة ولابسة اصفرر
-ياءءءء
-مو عليج وداعت عمي الغالي
كمت منهن بعد ماجلطتهن اعيب على ملابسهن لو الكاهن بلاش ماخذهن الوان صارخة يلبسن على كلً الناس اذواق...
رحت اشوف البنات وين خاتلات لكيتهن بغرفة سفانة القديمة الملابس منثورة وهديوة ممدودة فوكهن بيدها كتابها تقرا وزهراء تشمر فوگها وسفانة تخابر بفارس...
-ادرري مهررجان ماتكوومن
هدى: -ولي بعد وكت
-ولج يابعد وكت هسة ورة الغدة تجي العالم.
هدى: -عود خوش هسة اكوم بس احفظ شوية
-من زيزي ولج زهيران رغدة وين ولت
-جا غير راحت وي رجلها
-اي ادري بس وين اخذها هذا صدك يحجي
-والله مادري
بعدني بالباب واجتني الجهال تصيحني: -ها شكو
-صاحبج يصيحلج
-غسل كون صاحبي صار رررجلييي زلمتتتي
رحت اعدل بروحي بجامة المطبخ هسة هذا شيريد فوك الفشلة الصارت طلعت زلف واحد من الشال مدري شحسيت بس عود حركات انوثية رحت للديوانية لكيتة واكف بالباب مديت راسي
.
-ها
-ها.
-شني ها غير تحجي شرايد
-سلامتج
-جا اذا سلامتي شكو صحتني
- اريد سلامتج حتى اخذها وياي
-هه هه صاير كلش سخيف
-مو بسخافتج وردة
-ها انا وردة
-وردة الورود
ضحكنا ثنينة على حجينا دخلت يمة سحب ايدي خلة فلوس
-هاي مصرف الج
-ها شكراً بس
-انجبي وعود ردت شسمة بس الوضع مايساعد
-ها اي چا اكلك لاتكشخ هواي بالعرس
-ليش وردة
-يا طلابة الوردة كلبي مامرتاح الهاي الجلمة احس بيها لغز خاف تتمسهد(استهزأ) علية اضنك
-شلون تخليني احجي حجي.
-جا كاضتك ماتحجي
-بسيطة هينة خلصت خبزتج هنا يسجوة اذا ما اطلع الغضة والمضة وهذا السانج اخلية يمشي سايد واحد
-على بختك سيد ترة لساني ماشي عدل مايخالف القوانين شبيك وياة
بعدنة نحجي وسمعنة صوت نزار يريد يدخل طلع وطلعت وراة عكد حواجبة نزار باوعلي ورجع باوع لارفد سلم علية ورجع خازرني: -اكلك ارفد انت صاحي بلة
ارفد: -شقصدك وضح
-اكو واحد عاقل ماخذ وحدة مثل سجيوة صدك تحجي.
سجى: -وشبيها سجيوة عيني هو وين يلكة احسن مني مو ارفد
ارفد: -اي يابة وين الكة احسن منج
نزار: -بزلفج هذا جنة جربوع لازگ على الحايط
ضميت زلفي شلون نسيتة خزرت ارفد داير وجهها يضحك ضربتة على جتفة صاح نزار...
-شوف شوف لاه لاه بلة هاي مرة جنها جدتي نوفة حتى جدي مات ناقص عمر من وراها هسة انت ابتليت بيها اححح ولك انا توسلو بيه بس ازوجها بس كتلهم مخبل حتى تموتني بدفرة
سجى: -اي مو انت ا...
نزار: -عيب مو مناة الولد شيكول عليج
سجى: -هو انت شخليت خاب تروحلي فدوة ولجدتي بسيطة ينزير انا الك الا...
صرت عصبية انهديت علية وارفد سحبني علية حاضني من ضهري...
ارفد: -يابة انت شكو انا احبها بكل حالاتها و خبالاتها
دفعت ايدة بعصبية حسيتة يضحك علية اجة فارس جان يباوعلنة ابستم وكال...
-شبيكم وي فخر العشيرة عمي هاي سجيوة دولة وعلم شتريدونها ترهم حلالة طلايب ام الطلايب حالة نادرة حافظ عليها ترة بس يصير بيها شي تنقرض
ارفد: -بعيوني اخليها شعدي غيرها جم سجوة عندي.
خزرتة بطرف عيني مبوزة شفتي عض شفتة رفعت حاجبي وعفتة ومشيت...
الوكت يركض ركض بدلت وتمكيجت ورحت دكيت على جاسب وين اخذ البت شو مايرد...
رحنة بدلنة بس لبس مستور لان زفة وناس طابة وطالعة اباوع لزهراء تخلي حمرة وفاتحة شعرها.
-شني ماتلبسين شال
-لاع
-ترة زفة شني ماتلبسين بكيفج
-اي بكيفي انتي كلتيها هي زفة يلا تعاي ننزل
-ديلا امشي نشوف وين تصفة
نزلنة جوة لكيناها خبصة زهراء صارت كدامي تتمختر بمشيتها وتنثر بشعرها وكفت بمكانها ورجعت التفتتلي سويتلها شكو ورحت يمها لكيت نزار بالمطبخ دخلنا سوة راحت كعدت على الكرسي وهو ضل يحوص ماكدر يسكت وغرد...
-اكلج شسمج شني ما ترحين تلبسين شالج مو راح العالم تجي
زهراء: -ما البس اصلاً.
-هو شني بكيفج ماتلبسين شعدنة عرس
-اي عررس جا ماتشوف
-انجبي لاتخليني اتعامل وياج بغير طريقة
زهراء: كمت من مكاني صرت كدامة رافعة حواجبي كتلة بتحدي: -شتسويلي مثلاً
عصر فكي بيدة بقوة احس رگبتي انشنطت صاك على سنونة بعصبية ويحجي: -زهيرران لاتتحديني ترة بعدج ماشايفة شكلي الاصلي اندمج والله اندمج جري عدل
دفعت ايدة ماكو ماينزلها دمعت عيوني وهمست بخفوت: -شبيك توجعني.
دنك عيونة لشفتي مرر اصبعة على شفتي فهيت بعيوني رفع اصبعة احمر خزرني وگال: -فلا تستحين اريدج تحسين ماكو شعدج مخلية الحمرة كلها معررسة
-مو عدنة عرس
-عرس جدي انسمط بكبرة
سحبني من ايدي ماتوقعت ابد الراح يسوية اخذني للسنك وفتح البوري دنك راسي ثبتة بيدة وصار يفرك وجهي اختنگت من المي اريد اوخر ماكدر رفع راسي كوة اسحب النفس وجهي يصب مي وشعري تنگع نزلت دموعي وضربتة على صدرة وصرخت
-لييييش ليييش خررربت وجهييييي.
مسح وجهي ورجع شعري يلم بية دفعتة وابتعدت ابجي: -الحقيررررر ليييش شمسويتلك
-كضي السانج لا اجي اكصة واعلمج الحقير شيسوي مكيفة الفطير بالحمرة والكحلة شوفوني
-نزززار والعباسسس اندمممك
-شتسوين بوية
رافع حاجبة بانتصار ومبتسم رحتلة اضرب بية بحرگة لزم ادية ودارني صار ضهري بصدرة خلة راسة يم رگبتي وهمس بصوت ناصي...
-زهيران اسستري على رويحتج ترة كوة ساكت عنج
-وخررر منييي وخررررر ولج سجيوووة تعاي طلعيني منة.
-راحت صخيمة وصوتج نصية لا ادفنج
-مو بكيفك والله لاگول لاخواني عليك
احسة صار نااار كز على سنونة وكال: -خليهم يفيدونج طاح حضج الصفررة
طلع وبقيت شكلي مگلوب گلاب ودموعي تنزل انوب كلها شافتنة من تعاركنا متت من الحرگة رحت اركض للغرفة سديت الباب وكعدت امسح بدموعي يخلص العرس ولو اني لو هو بعد مامنها نفصخ العقد واخلص منة مستحيل اكمل وي واحد مستفز...
رجعت اخلي مكياج بعنادة والمشكلة مايصير مثل ماجان لو الايلاينر يطلع اعوج لو حواجبي تك صاعد ونازل امسح واسب بية الوكت راح يروح واني بعدني اجت هديوة تصيحلي...
-ولج يلة راح نروح للزفة
-يلة هسة بس اخلص ولج يمممة
-دمشي هيج هسة الا تخلين
-ما ما الا اخلي هسة اكمل تانيني فدوة مو تعوفيني
-اي بس مو تبطين.
راحت ورجعت مسحت وجهي باستعجال خليت من جديد ماضبط مسحتة وخليت خفيف حتى عيوني مارسمتهن بس كحلة خليتلهن وشوية حمرة سحبت شال خليتة على راسي لا هذا الفكر يسويلي سالفة ويعطلني لفيتة كلاوات ونزلت فتحت عيوني على وسعهن محد بالبيت طلعت اركض للحوش طالعين لكيتهم فتحت الباب محد بس كم سيارة...
حيلي باد احس گلبي جمر عافوني وراحو واني صارلي شكد احضر كعدت بالكاع وصرت ابجي واناشغ بصوت عالي جني جاهل ماخذين فلوسة.
حسيت ايد صارت فوك راسي رفعت راسي شفتة كدامي لابس دشداشة لونها حبري ضاكة على جسمة ولاف على راسة جراوية بيجية بطريقة حلوة كصيتة كص طالع يموت عفس وجههة وكال...
-شمالج تبجين
حجيت واني اشهك: -عافوني كلة من وراك
-جا انة شعلي
-انت خربت مكياجي ورحت اخلي من جديد وعافوني
-المكياج السبب شفتي هو العطلج لو طالعة بهذا شكلج مو رحتي هسة
-اي اطلع جني خلسة من دون البنات
-احلة البنات شمالج انتي.
سحبني من ايدي كومني مسح دموعي وعبر ايدة ورة ضهري حاضني باوعت لايدة باستغراب ورجعت باوعتلة ضحك وكرص خدي...
-ماشايفة شبيج هههه
-شني
-هيج
ضليت مفهية اباوع بعيونة عطرة بخشمي بللت شفتي عيونة مركزة بوجهي مرر اصبعة فوك شفتي وابتعد يعدل بساعتة...
-يلة ترحين وياي للزفة
-صدددك عود
-اعدلي شالج وغطي شعرج بالاول وانة اخذج.
لبست شالي عدل والضحكة شاكة حلكي طلعت وراة اخذني بسيارة اخوة للصالون شغل اغاني عالية وكل وعدل الجامة وكل شوية خازرني شبية مادري عجيب هالبشر ماينعرف شيريد...
وصلنة للصالون الشارع مسدود سيارات بس الفاجئني جانن سيارتين مزوقات التفتت علية
-اكلك شو هاي سيارتين المن
-لرحمن وجاسب
فتحت عيوني بصدمة مر وقت يلا استوعبت صرت اضحك فرحانة واخيراً اخوي سوة زفة مثل العالم
خطية رغد اكيد هسة فرحانة.
-ياااي هسة يعني انا اختت العررريس
-اي ولج شفتي
-كللللش اكلك ماعرف اهلهل
-اهلهل بدالج
طلع راسة من الجامة وهلهل بصوت عالي ورجع دخل راسة وكال: -ها شلون هلهولة
-تخببببببببل
رفع شعرة بغرور وكال: -مثلي حتى هلهولتي تخبل
-هو وين اكو زلمة يهلهل
-انا.
خزرتة ودرت وجهي للجامة طلع جاسب لابس قاط اسود يموووت علية دخل رغد للسيارة مايبين منها شي حرك سيارتة المزورقة باحمر وطلع رحمن كذلك دخل شروق للسيارة والنسوان منا ومنا يعدل بدلتها خاف يطلع منها شي حرك والسيارات حركت...
خليت ادية على اذاني ورجعت ضميت روحي بالكشن الجو اشتعل طلق حركو الجو حرك متت خوف ومنا السيارة تمشي سريع وين يلا هدا الجو
رفعت راسي من كال...
-ها ولج شني خفتي.
-لا ماخفت بس كلت لاتجي طلقة براسي
-حتى تموتين واسويلج فاتحة بيدي انصبلج جادر من الطول للطول واشرف على الطبخ الا هبر مو شلون ماجان اخلي العالم تاكل وتترحملج لان متِ ايباخ ويجون يكلولي البقية بحياتك وانا اسوي روحي منكسر عليج ويجي شيخ كرشة كدامة يكلي بتي الك بس لا تبجي شني عمي گليلة النسوان
-عود صددك هيج تسوي اذا متت.
-اي صدك ولا تنسيني الجاي مهيل واخلي شكر زيادة مو مر ومحد يشربة بيدي اوزع للناس شتريدين مني بعد بس موتي
دمعت عيوني ودرت وجهي للجامة هسة هذا شحجي وياة موتني ونصب فاتحتي ومكيف.
-بس لا ضجتي يمعودة انتم السابقون ونحن الاحقون كلنة على هذا الدرب شنسوي هنيالك يافاعل الخير
-يلة اسكتتتت زفةةة عدنة زفة
سكت يسوق بسرعة ويضحك طبكت علينة سيارة بيها هديوة وسجى ياشرلي سويتلها بيدي بسيطة.
هدى: -خايبة سجيوة هاي زهيران شمالها
سجى: -نزار الله يسلمة ماقصر وياها لعب بيها طوبة
-عااااع وانا اكول شبيها
-غسل وجههة تعاي وشبعي ضحك عليهم صاير نار
هدى: -متت ضحك من سولفتلي شسوة نزار...
درت وجهي للجامة اصفك واهلهل طبكت بصفنة سيارة كلها شباب وشلون شباب يخبلون لابسين دشاديش بيض والغتر ضليت مفهية عليهم كرصتني سجيوة...
-ومرض شبيج وياي
-دهر صابج ولج لاتخزينة ذولة صحبان رحمن والمجسب
-عااااع يعني ضباط.
-جا ماتشوفين شواربهم
-يممة فدييت يخبلوون اويلي
درت وجهي واحد منهم رفعلي بحواجبة ابتسمت وسويت روحي ما اباوعلة راحت سيارتهم صارت كدامنة ضلت عيني وراهم مدري شبية استخفيف فزيت على صوت عباس يكول...
-سدددي الجااااامة وميلييي منهاااا الا اجي اكص ررراسج واعلمممج شلووون تمدينةةةة.
عگدت حواجبي اباوعلة يريد ينفجر شبية هذا باوعتلة صارلي شكد ماشايفتة شني سالفتة شو حليان بالزايد لابس دشداشة بيضة وغترة وشواربة مطولهن زيادة ضليت مفهية علية احس كلبي يريد يطلع هو يصيح واني ولا يمة سحبتني سجيوة وسدت الجامة صفنت اعيد شكلة ببالي استغفرالله منين طلعتلي مو نسيتك وعفتك وراي بس گلبي چلب من يشوفة يفز...
ضلت عيوني على الجامة وكل مامر منة يخزرني ويسوي بيدة بسيطة تجاهلتة وكملنة الزفة جانت اجمل واضخم زفة السيارات لاتنعد ولا تحصى يكول السلف كله جاي ما ضال واحد بيتة...
الشباب كلها سلاحها بيدها كل شوية مشعلين الجو رف كلبي علية من شفتة مطلع ايدة من الجامة يرمي بمسدس شهل الفخامة الشايلها بشخصيتة احترگت روحي عود كلت نسيتة شنسة وهو كل فترة يطلع عروض جديدة...
وصلنة لبيتنة ونزلنة ركض ركض نزلو العرسان وصارت خبصة ركص وهوسات وبرا رمي شوية العرسان وطلعو ضلينة يم البنات بدلاتهن البيض وحدة تكل للثانية اني احلة منج سجيوة لازمة رغد الطايرة من الفرح تسولف وياها وتضحك واني ضليت يم شروق اعدل بالبرگع مالتها...
-ولج شني كيكة والعباس تنكرطين
-خايفة هدوة شني اريد امي.
ذبيت نفس انقهرت عليها من شفتها عيونها مدمعة تريد تبجي البنية تحتاج امها بهيج مناسبة لزمت ايدها وعصرتها...
-لاتبجين شروق الله عوضج بية شبيج هذا رحمن مو واحد ثاني يحبج ويخاف عليج اكثر من روحج
ضليت شوية يمها وصاحولي لبست شالي وكمنا ننقل اكل للعالم خلصنا ضل بس المي نقص طلعت بالحوش يغص ويبلع من الجهال والشباب صحت حسام ابن خالتي هم جاي...
-ها هدوة
-حسام جيب صندوگ ماي بسرعة
-عمي شطالعة تخبلين.
-هههه شكراً هسة دروح جيب ماي
-يلة هسة اجيب ماطول
راح وضليت متانية ماشوف ولد غربة اباوع للجهال واضحك يتعاركون على اللحم صحت بيهم ودخلتهم جوة رجعت طلعت وماحسيت الا انرفعت من الكاع لازمني من زندي بيد وحدة رجلية انرفعن من الكاع شمرني بنص المطبخ عكدت حواجبي شوية ويريد يضربني صاح بوجهي خلسني خلس...
-شعدددج طالعة يم الشباااب.
دخل حساب دار وجهها علية بقة الولد يباوعلي وهذا يريد يفترسة خلة الصندوگ بالكاع وصاح بية عباس
-نسووووان مفررعة وووين طاااااب
دنك راسة وطلع مستحي شكد جذاب اصلا كلها لابسة حجابات وبس نسوان عمي بالمطبخ بس هو يكرهها شوية ورجع رفع اصبعة بتحذير وكال...
-اطلعي بعد وشوفي افصخ راسج عن جسمج بسيطة الا اعيد تربيتج من جديد بس اصبريلي
خلة وطلع ضليت مفهية اريد افتهم شمسوية شبية هذا...
زهراء: -اكلج ذولة شبيهم هو ونزار اشو بس يهددون
-مامسوية شي شبية هيج يحجي
-جا حتى انا مامسوية شي
ضلينة وحدة صافنة بوجة الثانية، طلعنا للنسوان هاي التريد خاشوكة وهاي خبز وماي والتريد فواكة والتريد جدرية تخلي الاكل بيها انسطرنا سطر نركض منا ومنا علما راحن حلينة نهد ومتنا جوع رحت لامي
-يمة اريد اكل راح اموت جوع
-وين جنتي هو ضل اكل هاي النسوان تخلي
-بس لاتكليلي ماضل حتى انتحر يعني صارلنة شكد نشتغل واكل ماكو.
-شسويلج وين جنتي اكلي اي شي
-والله ماريددد بعد شني حتى الله مايرضاها عشة ماتخلونة
كعدت كالبة وجهي مو سالفة هاي اشوفة يغسل على السنك خزرني درت وجهي ماناقصتة خليتة يروح وطلعت بالحوش شالي شامرتة صفح كعدت على صفحة حيلي بايد وراسي مسطور من الهوسة رفعت راسي شفتة كدامي دنك علية رجعت ليورة بحركة سريعة لف شالي على ركبتي خنگني بية احس بلاعيمي طگن...
-زمااااالة مو كتلج لاتطلعييين حماااارررة الاااا تسوووين العكسسس
كمت ارجف كوة اتنفس راد يضربني رحت اركض دخلت جوة كلبي صار بلعومي يمة هبطني شبية هذا ناوي يجلطني خليت ايدي على بلعومي شكول عليك هسة...
دخلت زهراء تصيح لازمة ماعون اكبر منها مخليتة على صفحتها خلتة كدامي وكعدت...
زهراء: -صارلي ساااعة ادور علييج وين وليتي
-هنا اي الله جابج.
وخرت الخبزة شلون منظر يرد الروح لحم هبر ايدي ترجف من الجوع اكلنة اني وياها: -منين حصلتية ولج غير خلص
-مو انا عبيس جابة كال الجن
شركت باللكمة اخذت بطل اللبن شربت منة: -هو جابة المن
-كال اانا وانتي
كملت اكلي بس مدري شبية فهيت شوية واجة نزار
-ها صبايا شلونجن
زهراء ضلت تاكل ماردت علية: -زينين
ضربها على راسها وكال: -شبيج ماتريدين حتى بهاي
زهراء: -بكيفي
-امداج العوبة
طلع من جيبة موز ولبن وقواطي ببسي خلاهن وطلع.
اكلنة لمن طلع من خشمنة غسلنة ورحنة بالهول الدك والركص مشتغل شروق وجهها اصفر بس رغد لا بعد هاي شايفة وعايفة جدتي تركص وتهوس وحكمة كاعدة يم شروق تحجي وياها صعدوهن كل وحدة لغرفتها وشوية ودخلو العرسان والرمي اشتغل...
شروق: -فرحة ممزوجة بحزن ورهبة رغم فرحتي الجبيرة غصة بلعومي من اسمع النسوان تكول وين امها ونصهن يعرفن بالصار ويضلن يتبسبسن ويباوعلي بعين الصغيرة كوة عن روحي تحملت عفت كلشي ورة ضهري حرامات تخرب فرحة العمر الجنت اتمناها...
عدلت بدلتي انفرشت حولية سحبت كبوسي على وجهي من سمعت الهلاهل احس گلبي صعد لبلعومي من التوتر غمضت عيوني بقوة واحس جسمي ثلج انفتح الباب حسيت روحي راحت اسمع خطواتة وكلبي تزيد دكاتة...
اسمع نفسة العالي سحبني من ايدي كومني مدنكة راسي كلشي ما اشوف رفع الكبوس ورفع راسي بيدة ركزت عيوني بعيونة ورجفت ابتسم وبادلتة الابتسامة مرر اصبعة على خدي رجف جسمي همس بصوت ناصي.
-شروقي
-ها
-ضوي حياتي
-غالي والطلب رخيص
-شمس الشتاء ماذا فعلت بغلام لم يجد رداء
-دفتة من البرد
-دفيني ولميني من كلشي.
فتح ادية يباوعلي بعيون مدمعة ومايل راسة دخلت بحضنة بهدوء حاوطني وقفل ادية خلة راسة بركبتي ومرت دقايق طويلة على هذا الوضع بديت اغفة من التعب وحضنة دافي خليت ايدي على صدرة شفتة يهتز وبية ومايشدني اكثر يريد يدخلني بضلوعة همست...
-رحماني
مارد بس صوت شهكاتة اعتلت دفعتة بخفة شادني على گلبة: -رحمن شوية افتح ايدك، اريد اشوف عيونك رحماني.
ابتعد عني وراساً دار وجهة درتة علية يمسح بعيونة ابتسمت بحزن ومرر ايدة ورة ضهري سحبني علية رفعت راسي وكتلة بحسرة: -شبيك رحمن خوفتني ليش تبجي
-ما ابجي بس فرحان
-جا الفرحان يبجي
-يحتار شيسوي اليفرح
-ها
-وداعت عيونج السبن حالي سنين وسنين
كعدني على الجرباية وبقة حاضني عيونة ليكدام وعيوني بية اباوع بتفاصيل وجههة من يسولف.
-جنت احب الليل احسبلة شوكت يجي ورة العشة بس تنام العجايز اخذ فراشي واسوي روحي نمت بس الصدك اضل سهران وياج وي تفاصيلج
اتذكر حركاتج ضحكتج لمعة عيونج من تصير بالشمس جنت اتمنى الم شعرج الاشگر اشوفة يلصف بالشمس ويحركني وياة بس يجي الليل اعيد الموقف واعدلة بيدي حتى باحلامي وتخيلاتي ماباوعتلج بغير نضرة كلشي جان عذري اكتفي بابتسامة هادئة ولمسة ايد وارجع اكول حرام واجبر روحي انام بس ماكدر...
كل يوم كل يوم اتخيلج يلة اغفة مايوم نمت بدون مااذكرج...
شدد حضنتة ورجع باسني براسي ذب حسرة ودار وجههة عيونة بيها دموع فطر گلبي ونزلن دموعي من بدا يتذكر اكثر فترة تعذبنا بيها...
رحمن: -تدرين لو ما اخاف من النار جان هسة ميت فكرة انتحر اي انتحر ولا اتزوج اخت محبوبتي وانحرم من شوفة عيونها شلون وشلون روحي احتركت وامي كل يوم تلح علية واتكول خربت البت وهسة ماتريدها الا اگل لابوك جنت اتسودن احلف اريد اشيل روحي وادكها واتوسل بيها ماتوصل خبر لابوي لان ادري لو سمع بالسالفة يخليني اخذها بساعتها وبوكتها ينحكم علية بالموت مدى الحياة.
خليت اصبعي على حلكة ودموعي تنزل بغزارة-اس اس كافي هاي انا يمك الله ماتغفل عينة على عبدة سبحانة مدبر الامور
نزل اصبعي وحجة راساً نزلن دموعة: -من كد ماطلبتج من رب العالمين حسيتة ملني رحت ماخليت سيد لا امام لا نبي حتى الملائكة حشمتهم وكتلهم رايد روحي اموت اذا مانجمعت بيها.
تدرين بيوم حددو الخطبة من اختج رحت مثل المخبل لموسى ابن جفعر (ع) طحت ببابة وحشمتة بوكتها نمت من الحركة حسيت صوت زلمة يكول نطيك احسن منها تدرين شكتلة...
شهگنا ثنينا حضنتة بكل قوة جر نفس وكمل...
-كتلة هي الاحسن كال ليش شمعنة كتلة من هي طفلة كلتلها انتي إلى شلون اخلف بوعدي واخليها تروح لغيري.
-كد الوعد زلمة كفو من يوم يومك انت كفو ماحبيتك عبث ولا دموعي النزلت لواحد مايسوة لا بالله كل شهكة جنت تستاهل عيوني تنعمي وماتشوف غيرك
حضني بقوة جانت حضنة طويلة تمحي كل شوگ كل تعب كل حزن مر علينة.
راح جاب اكلنس مسح وجهي نزع سترتة شمرها ونزع الرباط فتح اول دكم القميص وكال: -راح اتوضا تتوضين
-لا متوضية
-جا حضري المصلايات.
راح وكمت فرشت السجادات وخليت ترب كعدت انتظرة دخل ينشف بوجهة وشعرة مبلل ابتسمت اجة كرص خدي وكفنا نصلي.
خلصت صلاة ودعاء وهو بقة عفتة شفتة يطول اكيد ناذر الف ركعة...
اخذت سيت نوم ابيض لبستة يوصل جوة الركبة لبست علية روبة واخذت مي غسلت وجهي ومسحتة عفتة بدون مكياج رشيت عطر ورشيت بودرة لجسمي لايطكع التفتتلة بعدة يصلي طلعت الصينية محضرينها شلت الغطا عنها بيها اشكال رتباها ورحت كعدت على الجرباية اباوعلة بعدة يصلي خليت ايدي على خدي وهوى السبلت بارد غفيت ماحسيت على روحي فتحت عيوني شفت روحي بحضنة رمشت بعيوني بثگل دنك باسني...
-تكومين نتعشى
-اي
-بس شوية.
كالها واخذ شفتي اندمجت وياة وتممنة كلشي...
عصر ايدي عيونة كلها خوف: -اذيتج شروق عليج الله كولي انا زمال اذيتج مو
-لا حشاك بس هو طبيعي الوجع
-لا مو طبيعي بس انا زمال طاح حضي امشي اخذج للدكتورة
-مو لهدرجة هسة شوية واصير زينة لاتخاف
-زين اجيبلج حبوب شي منا منا
-لا مامحتاجة بس شوفلي الحمام.
لفيت الغطا علية وهو راح جاب ملابسي يبلس بية اخذهن منة ماكو متخبل شالني اخذني للحمام متت من المستحة ضميت راسي بصدرة بلة شافنة واحد
-هسة بلة طلعو وشافونة
-مرتي حلالي
-استحي استحي
-لا تخافين اليوم محد يصعد فوك حتى البنات نزلن جوة
-هسة يطلع جاسب ويشوفنة
-مايطلع للصبح هسة حتى تلكين مفتاح الباب وين شمرة
دخلني للحمام ولح الا يسبحني بالكوة طلع بقة واكف بالباب وكل شوية ودك الباب: -ها خو مايوجعج شي.
-لا بس صوتك فضحتنا
ياما يخلصني واطلع راد يشيلني: -شني السالفة عدي رجلين امشي عليهن
-مو خاف تتاذين
-مابية شي بس من ورة حجيك راح اموت
ضحك ودخلني للغرفة راح يسبح رحت مشطت شعري واسمع الجيلات والهلاهل اكيد راواهم النيشان امة ماترتاح ولا تنام الليل بس كملت شعري جا ارش عطر ودخلن باركلي...
جدة حكمة: -بالمبارك يحبوبة بيضتي وجوهنا الله يترس حضنج جهال ان شاءلله متهناية.
ام رحمن: -هسة شوية ارتاحيت لو طالعة مثل اخواتج جان شمرتج بنص الشارع هاي اذا ماذبحوج صدك ياهو اليكول هذا النيشانج مو دمة هو
فتحت عيوني بصدمة احس جسمي صار نار قبل لا واحد يحجي هز الغرفة بصوتة العالي فززنا كلنة.
رحمن: -يييييييييييمة شتحجييييين صاااااحيييية اااااانتي
تقدم عيونة دم يريدن يطلعن من محجرهن صارت تمتمت حتى ماتعرف تحجي صاح بصوت عالي
-بننننص حجرررتي وتحجيييين بعرررررض مررررتي.
شنييييي من بشررررر وحگ علييي ابن ابي طالب لو مو امييييي ذبحتتتتج موووت
-جا انة ماكلت...
-اطلعييييي بررررااااا لاتررراوينيييي ووووجهج
-ولك انا امك يرحمن تطردني على مود مرررتك
-تحجييين بشرررفي وتطعنييين وتريديلييي اسكتللللج اطلللللللللللللعي.
سحلنها من الغرفة وطلعنها ضليت بمكاني اطگطگ من الخوف شكلة صار يخوف الوجة دم ودماراتة طگن خفت منة وعلية ضليت حبوبتي تحجي وياة احسة فاصل بغير عالم طلعت وعافتنة راح كعد على صفحة رحت وراة...
خليت ايدي على ضهرة والثانية دخلتها بشعرة المبلل ماكدرت احجي دنكت بستة بخدة سحبني من ايدي طيحني بحضنة ايدي حاوطت رگبتة...
-لايصير بيك شي
-لو صاير بية شي ولا سامع هذا الحجي ومنين من امي جا شحال الغريب.
-الله يسامحها تريد تغثني مو اكثر لاتزعل خطية ماشفتها شصار بيها
-عوفينة منهم
-ها چا احبك
-ههههه شكد قديمة تشدين حيلج تكولين احبك
-چا شسوي
-ارويني
قربت شفتي لشفتة واخذها مكمل بشوگ ولهفة حتى الاكل نسيناة...
(انتهة وعد الطفل بالزواج من فتاةٍ طفولتة).
رغد
المفاجئة المحضرها إلى جانت احلة مفاجأة بدلة بيضة وزفة فخمة ماخلاها بنفسي وسواها...
واگفة كدام المراية اعدل بالحمرة واضحك فتح الباب ودخل ضحكت وهو ابتسم حسيت على روحي اليوم على اساس دخلتي رحت كعدت بمكاني مدنكة راسي بخجل رفعت عيوني اشوفة شيسوي.
اشوفة باقي بس بالقميص فاتح الدكم كلهن رجع راد يفتح الحزام طفرت من مكاني وصحت بية
-ها هااا شني دكول يا الله غير عرسان جدد كبل نزعت.
ابتسم نص ابتسامة وباوعلي بطرف عينة وكال
-چا وين اكو عروس تكمز من مچانها
-چا وين اكو عريس ينزع حتى مايعاين بوجهة عروستة
-غير شايفها وشابع منها
-ها هيج
برطمت ورحت كعدت على الجرباية كالبة وجهي اجة كعد بصفي يكرص بية ضربتة على ايدة وخزرتة
-ايد لو عگرررب شبيك بس تكرص
-تعاي ابوسج بس مو تكولين شبيك بس تبوس
-اهو هاي اني شلون رجعتلك وادري بيك غثيت
بس كلتها كلبني على الجرباية صار فوكي: -هسة اعلمج الغثيث شيسوي.
-مو عرسان دكول يا الله خلينة نعيش الشعور بعدني ماحسيت بالبدلة البيضة ولا شفت روحي بيها زين
عصر فكي باسني بشفتي وكام راح للكنتور عدلت كعدت خليت ايدي على صدري اتنفس خنگني يمة ثگيل.
اجة بيدة علاكة شمرها يمي وكعد فتحتها طلع علبة بيها تليفون ضحكت مامصدكة لزمتة اكلب بيه.
-هاي الي
-چا لجدي
حضنتة من ركبتة اضحك بعدني عنة شوية وصار يمشي اصبعة على وجهي همس: -رغدة
-روحها
-نتعاهد ونخلي شروط اليخالف الشروط يتندم
-اممم.
-تحبيني بكل وكت تحفظين بيتي بغيابي ماتلفضين اسم غيري على لسانج ولا تعاينين لغيري تتحمليني والج بالمثل
-صار اتفقنا
-ماطول اتفقنا خل نشوف شغلنة
-جسوبي
-انجبي لج شني زعطوط كدامج اشحك حلكج اذا عدتي ثاني مرة
برطمت شفتي ودرت وجهي زعلانة سحبني علية واني ادفع بية: -ززعلت هي كوة يلة عوفني
-شوف هاي الفطيرة اعوفها وهو بالايام العادية ماعوفج مو عريس وخسران فلوس القاط والرباط
والكيك والشربت
-والتمن واللحم والمشمش.
-والكشمش لاتتسينة
-جااااسب
-شعواط گلبة
-امممم
-احجي عدل لا اعدل خلقتج
-ياءء عود عرسان
-اشو طايحتلي نعلان نعلان وكلشي مامحصل لابالجديد ولا بالقديم
سحبت التليفون فتحت كامرة وملت علية: -ابتسم
اخذنا لقطات شكددد ونصهم لعب بيهن لعب كعدت اكلب بالصور هزيت ايدي: -استفتاحية خير بهاي الصور ديلا بلا
-حتى من يطگج جفاف ارجع گلبي بيهن.
عيبت علية بشفتي وراد يسحبني طفرت اركض وبدلتي شكبرها لزمني من خصري دارني علية يباوعلي بنضارات شيطانية خليت ايدي على صدرة وصرت اسد بدكم القميص وخر ايدي وحسيت البدلة وكعت وايدي تجول على ضهري همس بذني خلاني اتحجر من المستحة...
-كومي لج
-وين
-سوي رياضية
-اهوو تعبانة اريد انام
-اكو وحدة تاكل اكل دسم وتنام جفت
-غسلت اسناني وسبحت كافي
-لا مو كافي دكومي
-ووين ووين
-ارركصي
-شني شو بلة ماسمعت
-سمعتي عدل يلة اركصيلي.
-شكالولك عني السلطانة هويام
-انتي كلتيها سلطانة وتركص لرجلها انتي شني عذرج
-تعبانة
-منين تعبتي ممكن تشرحيلي
-جاسب سوالف الضباط عوفهن على صفحة اريد انام
-وشبيهم الضباط ولج
-يموتون على النسوان التركص
-ول ول يابة ماطولج حجيتي بعد مالج حجي وياي خاف تكولين ليش
-قصدك تروح...
-اي يابة مرتي حارمتني
طفرت من مكاني طلعت شال شديتة على خصري ونثرت شعري: -اريد اغاني عليمن اركص
-علية
-قصدي اغاني شي.
ورث جكارة سحب منها نفس وكال: -الحفلة والجو مشتعل من خصرك يشيب الطفل بس انت وحدك بالحفل هز يالكمر شعر شعر
-لاه لالالالالاالا
-اغنيتج المفضلة
-شلون سمعة خايسة راح اكعد بطلت
-مو بكيفج خيرتج وانتي اختاريتي
مامنها كلت اهزلي جم هزة واخلص من شرة شو كلشي مافاد فوك هزي اخذ حگة...
مرت الايام هادئة كلها طاقة وحب بس ماندري دوم لو لا...
سرى
الانقلاب الصار بحياتي كلش جبير اخذني لعالم ثاني عالم مابية اثر لاهلي شكد اسئل باهر يكول ماعرفت شي وضالة بنار عليهم...
اما عيشتي كاعدة بيت الرجال بعد ماتسجلت باسمة شرعاً وقانوناً...
يجي بس بالليل ينام بالغرفة على صفحة وبالنهار اذا اختة موجودة مايرجع مامن علية بس اذا وحدي يرجع بوقت الغدة ومن غير الاتصالات يخاف على صحتي المدهورة يوم عن يوم اتعب رغم العلاج الاخذة بس بعد هذا اختياري وفضلت الطفل على نفسي...
اليوم سلينا يمنة شكد ارتاح من اشوفها شلون بنية حبابة بس حض ماعدها...
كاعدة على الكرسي كدامي علاجي اخذت منة وعيني راحت الها تحضر بالغدة ابتسمت اباوعلها باعجاب سبحان الله تمتلك مقومات الجمال شكار عيون زرگ بياض جسم منحوت مابيها شي مو حلو حتى استحي اباوع بيها...
رغم جمالها المالة مثيل واليشوفها يحسدها ويكول هنيالها بس حياتها تعيسة مخلصتها دراسة وكل اليجونها ترفضهم...
-اكول سيلي
-عيونها كولي
-البارحة اخوج حجة وياي على الخطابة الاجوج شدكولين.
دارت وجهها مطعون احمررر بيدها السجينة ترجف اشرت بيها وكالت بعصبية: -والله اقتل نفسي وما اتزوجة لهذا بالذات
-بالله ماردت احجي وياج بس اخوج اصر وكال يريد يعرف السببب
-ماحبة اكررررهة اكررررهة اعرف هو معطل الزواج علية وكل اليجوني يهددهم يريدني امل واقبل بية بس صدكي ياسرى لو ابقة العمر كلة بلاية زواج ماقبل بية
-براحتج عمري ومادام مارايدتة ابقة مصرة على رايج وان شاءلله يمل ويجوز منج
-ميجوز صدكيني.
ذبت حسرة ورجعت تكمل بهدوء حسيت بغفيان اعراض العلاج هذا اترخصت منها وكمت ذبيت روحي على فراشي ونمت بسرعة...
ماعرف شكد مر وقت كعدت صار كدامي منطيني ضهرة العاري غطيت راسي بالغطا وسويت روحي نايمة حسيت بية فوك راسي شوية وكال.
-سغى كومي عاد سغى سرى
خليت ايدي على حلكي اضحك ساعة يلفظ الراء وساعة لا لحد الان ماتاكدت لدغة او فعلاً عاش بالموصل وتعلم منهم...
مطيت روحي وهمهمت: -يلا يول شبلاج لحد هسة نايمة.
زادت ضحكتي حول انباري عجيب هالرجال كل شوية كالب على محافظة يحجي وخرت الغطا افرك بعيوني وكوة ضامة ضحكتي...
باوعتلة لابس ملابسة ومشط شعرة انيق الى درجة
وكله مرتب يمشي ويرتب.
-هلو باهر
-هلو سغى شلونكِ
-زينة الحمدلله اليوم جاي من وقت
-خبصت شغلي من وقت واجيت اخذتي علاجك
-اي متشوفني نايمة العلاج كلش قوي
-اووف منك بس اريد اعرف وين توصل ومعاكِ وين ياخذك عنادج والامبالاة العندج.
-متاكدة ياخذني لنتيجة حلوة بس هاي شسمة اثبت على لهجة ياتكول عنادك وتستمر يا عنادج وكلامك يصير بالكاف
ضحك ودنك راسة يمسح بركبتة رفعة عيونة الخضر يلمعن: -ماعرف هي هيج تصير كثير حاولت استقر بس ماكدرت لهيج صرت ميز تنمر من رفجاني وانوب انتي علية
-ههههه لا والله اشاقة وياك لاتاخذ بالك اصلا كلامك شي مميز
-عاد كون يفهمون هلشي مو بلة
-اي والله هههههه.
ضحك على ضحكتي وسحب كرسي كعدت وراح جاب مي خلاة كدامي بدا ياكل لحد هذا الوقت استحي اكل وياة بس اكول عيب منة لذلك اكل وياة
-لعد سيلي وين
-صعدت لغرفتها تعبانة
-خطية سوت الغدة وانوب عفتها وحدها
-متعودة تحب الوحدة والاماكن الفارغة كثيغ
-جانت عايشة هنا
-لا ببيت والدي بس دائماً تجي هينة اي كلتيلها عن الموضوع
-اي ورفضت
-مو جديدة توقعتها ترفض بس الحارث لح احجي وياها للمرة المليون
-ليش مصر الحارث على هالزواجة.
-بيها اله مصلحة على كلّ ابلغة بالرفض
-صدك باهر ماعرفت شي عن اهلي
-اكيد مسافرين بس وين ماعرف
-يعني شي مايدخل العقل وين راحو وعافوني
ذبيت الخاشوكة بحركة احس كلبي يوجعني خليت ايدي على راسي. : -يول شبلاج عيشي هالسنة ولا تضوجين نفسج باي شي اولدي بخير وسلامة وبعدعا ابدي رتبي حياتج
-ليش الاموات الهم حياة.
-خلي عندج امل ولو بنسبة واحد بالمية مو لازم نصدك كلام الاطباء وننسى اكو رب واكو معجزات خلي ثقتج بربج جبيرة واني متاكد راح تكونين بخير
-كل ما افقد الامل ترجعة إلى شكراً لوجودك وشكراً لكلامك المليان طاقة ايجابية
-ولو ادللي سغى
ابتسمت وهو راساً خزرني يعرف من يلدغ الراء ابتسم فمرات يتعمد يلدغ بيها...
كملت اكل وكمت اغسل مواعين صح مابية حيل ونحلانة بس على كيفي...
-يلا كدامي شوفيلج مسلسل بين ما اغسلهن واجي وراج
-لا اني اغسلهن
-تؤؤؤ
سحب الجلافة من ايدي واخذني يدفع بية كعدني على القنفة وشغل البلازمة خلة الريموت بيدي ورجع للمطبخ مسحت دموعي ماتحمل تصرفاتة هاي دائماً يحرجني ويشتغل بمكاني ولو اني مامحركة شي كلة نضيف بس المواعين ومايقبل الا هو يغسلهن...
اتذكرت شراب الاعشاب السويتة رحت للثلاجة طلعتة وخليت منة بكلاص كعدت اشرب واباوعلة شكد حلو من يشتغل ولا يستنكف وعندة منصب وكذا يطبخ يغسل ملابسة ينضف البيت قلة الموجودين مثلة...
دار وجهة علية رشني بمي بللني: -عش ساكتة ماتحجين
-شحجي مدكلي احس عقلي فارغ
-املية شنو شغلج
-تعبانة
-بلا كسلانة
-هاي اني الكسلانة لو انت صارلك شكد بالمواعين هنا شوية.
-وين شوية غير اغسلهن عدل ماخلي بيهن شي قابل نفس غسلجن النسوان بس تريدن تخلصن
-انوب كلبت علينة
-تستاهلين انتي الجبتيها النفسك
-اروح اشوف المسلسل
-يلا وراج جاي ما اخليج ترتاحين
ابتسمت على سوالفة شكد حباب ومؤدب اليشوفة يكول نفسية وهو العكس تمام مرح كلش...
كعدت اشاهد الملسلسل شوية واجة شايل صينية خلاها على الميز كدامنة وصار يباوع وياي اخذلة شوية وكال.
-شنو هاي شو مافهمت شي
-اي مو فاتك اعلان
-اشعملو سولفيلي.
بقيت اسولفلة عن الاحداث الصارت وهو مندمج رجعنا نتابع بسكوت خلص وكال راح انام للعصر اكعديني
راح وضليت اتابع بالمسلسلات اضيع وقتي وامنع نفسي من التفكير عزلت الهوسة ورحت كعدتة طلع ورحت اسوي عشا كعدت سيلي تكلب بشعرها
-مسائو يحلو
-هلو سيلي صح النوم
-يصح بدنج حبي
كعدت على الكرسي تكلب بفونها ميلة حلكها بانزعاج شمرت الفون وكالت: -طلع باهر
-اي من زمان
-اوووف ضايجة حطلع عود اذا اجة بلغية
-انطية خبر كلشي يصير
-تمام.
راحت ونزلت مبدلة على اخر حباية جنها ملاك سويجها بيدها سلمت وطلعت بقيت وحدي رحت شغلت البلازما على سورة البقرة وكملت العشا...
انتضرتة رجع بس فاجئني رجعو ثنينهم ووجوهم مايكصها السيف راحت لغرفتها وهو راح للمغسلة يغسل وجهة بعصبية صاير شي بس مالي حق اسئل كعد على الكرسي يفرك براسة ويتأفاف...
-شلون تطلع بكيفها وحدها سرى بلغيني ثاني مرة قبل لاتتحرك
-ترة سيلي مو طفلة ليش هالتشدد.
-نخاف عليها لان اعدائنا كثيرة لاتنسين احنة ناس مو عاديين
-من حقكم اذن
راح ورجع سابح ومبدل وهي اجت وراة كعدو الاكل جاهز اكلنة بدون كلام راحت سيلي تغسل المواعين ساكتة مايبدر منها صوت جاب باهر علاجي انطانياة شربتة وسنحت...
ماكعدت الا لثاني يوم لكيت البيت فارغ لا باهر ولا سيلي استغربت مايطلع اذا مايكعدني زين سيلي وين
راحت اتصلت بيهم ميردون خفت صاير شي عليهم...
نو
ماحسيت الاسيارة كبالي شهكت بصوت وكفت كبالي ردت اوكع بالكاع اجت تدعمني نزل منها شاب باوعت بوجهة مو غريب شايفتة بس مدري وين
اباوع للسيارة الجانت واكفة تحركت بسرعة خلت التراب وراها التفتت علية كدامي...
-انتي زينة
-اي زينة بس
سكتت ومشيت بسرعة مو مال اخذ وانطي وياة رحت وكفت على الشارع منتظرة سيارة تاخذني
ماحس الا طبك سيارتة كدامي صرت اطكطك من الخوف نزل ولد ثاني غير ذاك هذا احس ملامحة مطبوعة ببالي...
-نوف اصعدي اوصلج
-منو انت ومنين تعرفني
-ابن خال انمار مرة اخذتكم للزيارة
رفعت حواجبي اتذكرتة خليت كتبي على صدري وباوعتلة: -تذكرتك بس شعندك جاي هنا
-علمودج
-اني ليش
-اصعدي وافهمج كلشي
-تؤ على اي اساس اصعد وياك هسة تجي سيارة
-اصعدي مو وكت عنادج لو ما جاي جان هسة انتي بخبر كان
-شقصدك
-جانو مراقبينج
فتحتت عيوني بخوف: -منو ذولة وليش
اصعدي واسولفلج ماتريدين تعرفين حياة انمار
-ها
-اصعدي.
من ذكر اسمة كبالي فهيت صعدت بدون ما افكر بشي حركت السيارة وكتلة: -يلة احجيلي
-اسمعي راح احجيلج من البداية وعن كلشي صار.
انمار عافج حتى يكون مستقبل الج والجهالكم بالهلفترة صار محامي والة اسم والقضاية التجية خطرة لمسؤلين وناس كبار لهذا السبب ابتعد عنكم ومارجع للبصرة خلال تلث سنوات اصدقائهم والخصم عرفو وتاكدو هو ابن الحارث الجان مسافر.
محد يندك بية لو يهددة لو جان باقي بالبصرة ماوصل لربع الوصلة هسة جان بداية شغلة هددوة بواحد منكم وانتو هواي ما شاء الله...
رجلج سبع سوالة اسم يرهب اليسمعة وكدر يحافظ على اهلة بس انتي شلعتي كلبة كم مرة حذرناة يعوفج بس ماسمع
-ليش حتى يعوفني شقصدك هو بالفعل عافني.
-عافج حفاظاً عليج من هالشكول العطلانة كملتي دراسة اعداية تحت رقابتة كل فترة ديز ناس يشوفج او اخاف واحد عرفج مرتة ويصيرلج شي لا اكلج ولا تكليلي دولبتية كلش
-هسة هو وين ومنو ذولة الناس
-خصمة لازم قضية ضدهم ومايكدرون يندكون بواحد منة بس من شافو انمار يروح يشوفج بالجامعة عرفو بيج حبيبتة وكامو يراقبونج شايفة السيارة الجانت طابگة هاي متحضرتلج حتى يخطفوج ويهددون انمار بيج
-مفهمت.
-كال فاهية بس ما كال ثولة خرب انة شلون دخلتي صيدلة عجيب
لزمت راسي احسة انسطر صحت بية بعصبية احس الدم يغلي بعروكي: -ووووينة هووو
-على كيفج مسافة الطريق
-رجعني لبيتنة امي مريضة هسة تخاف علية ويصير بيها شي
-لا تخافين محد يصير بية شي
-استغفر الله نزلني يلة ماروح لمكان هسة تطلع نذل مثلهم
-تمونين رجلج منو شابعنة اهانات اجيتي تكمليها علينة مرت المحامي انمار.
لغيت وحجيت ينزلوني بس بدون فايدة احس روحي بمتاهة متوترة وخايفة من الراح يصير احس اعضاي ترجف واعصابي تلفت...
دقايق جانت تمحي سنين...
طبكت السيارة بمكان راقي كلة زرع نزلت افر بنفسي واستكشف المكان انتبهت للولد كال: -ديري وجهج ام البزازين
خزرتة بطرف عيني ودرت وجهي اشوف شكو بهتت ملامحي احس اطرافي انشلت احس نفسي بحلم مو حقيقة...
لابس قاط اسود كامل وكل مايقترب توضح ملامحة المأسرات روحي وگلبي الشيب ماشي براسة غمضت عيوني ورجعت فتحتهن لكيتة كدامي مسافة صافن بوجهي مايحرك جفن همست شفتي ترجف...
-انهار
ماجاوبني بقة على جمودة بس عيونة تتحرك بملامحي شمرت روحي بحضنة وصرخت بصوت عالي بية قهر وعتب سنين...
-انهاااااار لييييش عفتتتني موو تدررري ماعندييي غيررررك كسرررتني بررروحتك والله كسرررتني لييش ماخذتنيييي ويااااك هااا لييش خليتني اتعذب بفراگك ليش من كتلك احبك تيهتني
وخرت راسي من صدرة ماتحرك ساكن ولا حجة بكلمة ضربت على صدرة بحركة ودموعي تهطر هطر.
-عفتتني بوقت متعلقة بيك ظااالم النفس ماحن كلبك علية ماتذكرتني بليل ماحكتك رجلك من ذميتك ما گلبك وجعك من بجيتلج ماعينك رفت من اشتاكيتلك ماغصيت من اتذكرت الاكل النسوية سوة لاسنة ولا سنتين حرمتني من بس من شوفت عيونك حتى من صوتك حرمتني ليششش مو تدرري اذا اتعلق بشخص من يبتعد اتاذة علية مو تدررررررررري ليييييييييش عفتننننننننننني ورااااااك احجييييييييي.
لزم ادية يهدي بية فرفحت بيدة ابجي واصرخ اعاتب والوم روحي شاغت ابد ماتخيلت ردة فعلي من اشوفة راح تكون بهلطريقة...
غسل وجهي بمي بارد وشربني عيوني منزلتهن بالكاع اريد اسكت ماكو كل هذا الصار وماحجة كلمة وحده همس بصوت ناصي صوتة رجف عضاي ورجعني سنين ليورة...
-لاتبجين شكر
-نسيتها لشكر ادري بيك وكملت حياتك وصرت محامي معروف هم
-اكو واحد ينسة روحة؟ حياتي ضلت مثل ماعفتيها اما الباقي سواد عيونج جان السبب.
-بردت المشاعر تدري وصرنة ذكرة بس كل واحد كمل حياتة ماترهم ننجمع بوقت كل واحد صار بينة قالب ثالج
-نار وداعت عيونج السود بكل وكت متلهف لشوفتج
-اش اشش لاتحجي تدري بية اتاثر بسرعة ماريد ارجعلك ولا اسمعلك روح انهار بعيد عني كمل كلشي وحدك مثل ما بنيتة وحدك
كمت اركض رحت للسيارة محد موجود دكيتها بقوة
وصحت بحركة: هيييي انتووو وين رررحتووو تعااالو رجعووني لاهليييييييي هسسسسة.
فتح باب الصدر كال اصعدي محد موجود راحو
-اريد لاهلي
-اي اوصلج
يحجي بهدوء ماحسيتة طبيعي شغل السيارة طول الطريق امسح بدموعي ويرجعن ينزلن شرجعك حركت مشاعر سنين جانن دافية هو انت نفسك الجنت تمشطلي وتسبحني وتوكلني بيدك نفسك الجنت مهتم بادق تفاصيلي اشك نفسك انت...
ماحجة ولا حاول يبرر او يشرح شي طول الطريق ساكت بس يذب حسرات كل ماريد احجي اسكت ماعندي حجي وياة كل البكلبي حجيتها غمضت عيوني والدموع شلال خليت ايدي على عيوني
-انمار: ولقاء احدنا من نار والاخر من ثلج.
كفي دموعك يا سكر فنحن في البداية لاتحكمي على الكتاب وانتِ لاتعرفي الحكاية...
مسحت دموعي بس صوت شهكتي ضل مجلب درت وجهي للجامة بدون ماحجي شي وهو كذلك تفاجات من اخذني لبيتنا الجديد شلون عرف احنة شلنة بس ماسألتة نزلت بسرعة حتى غراضي عفتهن وراي بعدني ماداكة الباب وفتحو دخلت اركض بوجهي لغرفتي اريد شي يحتويني وما لكيت غيرها...
سديت الباب وكعدت على ركبي ابجي بحركة احس روحي جاي تنهار ماعرف شسوي بية ولوين رجعني بشوفتة رجعني لذيج الايام السودة الشي الوحيد الابيض بيهن هو جان بس من راح بقة بس سواد.
مر اسبوع بهذا الاسبوع حابسة روحي بالغرفة وبس دموعي تنزل لو صافنة واهز لا داومت ولا تحركت وسويت شي ماسمعت لاي شخص حتى امي نو القديمة رجعت لا بس رجع الماضي والمة...
لامة روحي لصدري والغرفة ضلمة اندك الباب مرة مرتين بالثلاثة يلة كلت: -منو
-اني سجاد
-شرايد
- امي تخربطت
طفرت من مكاني فتحت الباب لابسة تشيرت اسود نص ردن عريض وبجامة عبدالله وشعري منكوش
لزمتة من ايدة بخوف: -تخربطت لو ماتت
-استغفر الله شبيج وياها بس تخربطت روحي شوفيها
-الله عليك ما ماتتت.
هز راسة ورحت اركض لا حول ولا قوة اخاف تموت صرت اخاف على كل واحد بينة كل يومية اتفقدهم يلة انام اشوفهم يتنفسون فكرة الخسران على بالي دوم...
رحت يمها وجهها اصفر رفعت ايدها مررتها على خدي
: -شلونج ماما
-من وراج مو زينة
-اسفة
حضنتني وصارت تلعب بشعري غمضت على ريحتها
-شبيج يمة تخبلتي حابسة روحج
-تعبانة يوم
-اسم الله عليج من التعب سولفي المتعبج
-هو يوم رجع من بعد ما عافني حرگ روحي يوم حرگها
-سودة علية.
-ماما ماعرف شنو صار بية من شفتة كبران مو هو ماما هذا غيرة ذاك جان مثل ابوي احن منج علية
-اسمعيلة بالاول حتى تحكمين علية يمة اسمعيلي زين...
-اي اسمعج
-الولد اجة وحجة ويانة كلشي سواة لمصلحتج لاتكسرين بية وتضيعين تعبة مال سنين
-ماكدر كلبي يوجعني
-قوي گلبج ييمة وشوفي الولد لاتكولين ليش عافني وانتي تدرين العيشة شلون جانت جانت عاجبتج
-لا
-اسس حياة تناسبج اشتغل ودرس وتعب وهسة رايدج لا تعوفينة
-هو عافني.
-عافج حتى يعيشج بنعيم مارادلج الذلة
-ضايعة
-كومي اسبحي وبدلي نروح للزيارة بلكي نفسيتج ترتاح
كمت بدلت وطلعنة زرنة احس نفسيتي رتاحت اباوع للحمام يذبولة حنطة وياكل ويطير ضحكت ورحت شمرتلة...
ماطولنة ورجعنا للبيت مر اليوم وثاني يوم بدلت ردت اروح للدوام وكفني سجاد رافع حاجبة...
-شبيك
-تدرين بالصار لو مغلسة
-ليش هو شنو صار...