رواية بين سلاسل العادات للكاتبة كفاية كاظم الفصل الثامن والأربعون
سرى...
فتحت عيوني بصدمة من شفت نهى گدامي وجهها اصفر لزمتها من ايدها بخوف: -شصاير نهى
بعدت ايدي وابتعدت تتنفس سريع احس رجلية انشلت اجو على بالي اهلي خفت صاير بيهم شي لزمتها من جتفها ودرتها علية: -احجييي شبيج وولج
نهى: -مابية شي بس اجيت اشوفج انتي وابنج
-منو جابج وليش وحدج؟!
رفعت راسي على الصوت شفتة ازاد (اخو باهر) وكف يباوع لنهى وكال: -رجلج خابر علية اجيبها الج.
نهى: -اي مو اتصلت على باهر كال راح ادزلج واحد ياخذج
ازاد: -يلا اني اروح من تردين ترجعين انطيني خبر
راح وعيون نهى وراة تلاحگة ضربتها على جتفها فزت تباوعلي بخوف: -شعندج وي ازاد كولي
-والله ماعندي شي وياة
حجيت محذرة بعصبية مكتومة: -نههههى احجيي الصدك شعنددج وياة
خليت اديها على وجهها وصارت تبجي احس گلبي حيوكف الموضوع مو خالي هدأتها ودخلتها جوة قبل لا احد ينتبة علينة انطيتها مي شربت وكعدت تفرك بصابيعها...
سرى: -يلا احجي شمسوية هالمرة
رفعت عيونها مدمعة: -عليج الله صدگيني شوفي سرى والله كبرت مو مثل قبل وكمت افكر عفت سوالف الحب والمراهقين
-اصدكج من تحجيلي الصدك
كعدت بصفها لازمة ايدها اهديها.
نهى: -تذكرين احمد
-عزااا بس لا ذاك الجان تراسلينة وعادل لزمج.
-نفسة هو شوفي من لزمني اخوي الله يرحمه وكتلني انتهت علاقتي بية وذاك يوم وهذا يوم بعد الصار بينة مو قليل سافرنة وعشنة بضيم وعوز بعد العز ذاك حتى نسيت الولد بس هسة من رجعنا لبيتنة
كام يحوم علية ومن سمع بعادل ماكو صار يهددني بصور قديمة عندة
لطمت على صدري ونشغت: -شنو من صور دازتلة يمعزاية
نهى: -والله ثنين عاديات بملابس البيت وقديمات كلش حتى من جنت صغيرة بس هو الحقير لاعب بيهن اليشوفهن يكول جدد و.
سكتت واني نترتها من ايدها: -مامستورات غير
هزت راسها دفعتها وكمت من مكاني الدنيا تفتر بية لزمت راسي بوجع وهي لحكتني تحجي وترجف
-شوفي سرى شوفي والله ماعندي شي وياة جنت مراهقة وطايشة وتعرفين حتى جانن عاديات ماحسبت حساب لهيج وقت
رمشت عيوني بثقل واردفت: -باهر عرف انفضحنا مو انوب ناس غربة شيفكر بينة ماكلتي لروحج
نهى: -والله ماكتلة شبيج بس كتلة اريد اشوف اختي كال هسة ادزلج واحد دز اخوة لان جان قريب و...
فتحت عيوني بصدمة: -بس لا سولفتيلة!
-هو عرف والله من شاف شكلي ضل يحجي هواي بعدين كام ينطي احتمالات وسولفتلة لان خفت يصير شي وهو وعدني مايحجي وكال يمي
دنكت راسي مغمضة عيوني لزمت ايدي ماحاجيتها شوكت تبطل شيطنة قبل عادل تخاف منة هسة منين تخاف كمت من مكاني: -طيني روسنا ماوصيج عود الجو الج ماكو على راسج رقيب ابوي بالدوام وانتي...
صرخت بوجهي كاطعة كلامي ودموعها تنزل بحركة.
نهى: -اشفتينييي لهدرجة ماعندي اخلاققق عوود انتي اختي وهييج تحجين شحال الناس الغربة من تسمع كتلج ماضي ليش جاية تحاسبيني علية
مسحت دموعها بعنف واخذت جنطتها باوعت بعيوني حمرة وكالت: -اخر مرة اجيج بشي واگلج مشاكلي اني احلهم ولاتخافين مانزل راس ابوي واحرك دمة بعد كل الشافة ابقي بخير واسمعي اخباري من بعيد ماريد منج شي وحتى هذا اخو رجلج هم راح اكلة لايدخل بعد بالموضوع.
راحت لاحمد باستة وطلعت ضليت جامدة بمكاني وابلعم طلعت وراة مالكيتها ضليت اكل باصابيعي من الندم شلون انطاني كلبي احجي وياها بهالطريقة وهي جاية حتى اسمعها...
رحت شفت البيبي لكيتة نايم عفتة لايفز وطلعت للمزرعة كعدت بفي شجرة مخلية ايدي على راسي احس جسمي نمل حيلي راح رفعت عيوني بتعب اشوف ازاد فوك راسي...
-ها ازاد شرايد
-اريد اطلع كلت اوصل اختج بطريقي لان الحرس ماكاعدين.
كمت من مكاني بتعب واردفت متفاجاة: -نهى راحت قبل ربع ساعة او اكثر
رفع حاجبة والتفت نص التفاتة: -بس الحرس مامحتركين منو الاخذها
راح يمشي سريع واني وراة بالي كلة وي اختي وين راحت بس لا صار عليها شي بسببي شكل لروحي اذا تأذت طلعت شفتة يحجي وي الحارس يسالهم بخوف لون وجهها انخطف.
ازاد: -البنية الجبتها وين راحت؟
جاوبة واحد من الحرس ياشر ليكدام: -راحت من ذاك الطريق ماكدرنة نمنعها لان مو من اهل البيت.
جاوبة بصراخ: -وااانتم حمييررر ماتعررفون اليدخل بيتنة حياتة تصيررر بخطررر
الحارس: -ماوبلغتنة بهيج شي
راح لسيارتة يجدح نار واني صرت ارجف من الخوف بس لايصير عليها شي طلعت اركض ورة ازاد صاح بوجهي خلسني خلس: -ارررجعيييي للبييييت لاتطلعييين وررراي
-اختي اختي
-راح اشوفها بلكي هنا تمشي لان ماكو سيارات
-اوكف اخذني وياك
-اررجعي ماعوزني مشاكل ور رجلج الخبل اختج ماطايرررة عود اخابر الحراس ينطوج خبر من الكاها.
شخط السيارة وعافني وراة بخوفي وحيرتي بس الحرس بالمكان خفت ورجعت رغم هما حتى مايرفعون عيونهم بس منظرهم بالاسود واجسامهم الضخمة ترعب...
رجعت كعدت بمكاني انتظر دقايق اذا ماكو خبر اتصل بباهر يشوفلي الوضع باوعت بالمكان اني وين دخلت شنو هذا القصر والناس الغريبة تحسهم الغاز شغلهم وضعهم الاعرفة الحارث رجل سياسي بس يتهيئلي غير شي لان تهديدات توصل وكل فترة الجو يشتعل كبار وصغار تطلع شنو الموضوع محد يعرف ومن اسئل محد يجواب...
مرت دقايق الوب بروحي اموت من الخوف من اتذكر شكل ازاد وخوفتة طلعت برا وبدون ماحجي شي دك موبايل احد الحراس رفعة جاوبة وكال بصوت خشن
-مدام يكول الاستاذ اختج وياة رجعها للبيت
هزيت راسي وابتعدت عنهم رجعت للغرفة البيت هادء بس الخدم وصفية بغرفتها لكيت موبايلي يرن فتحت الاتصال بسرعة: -ها نهى انتي وين
جاوبت برود: -راح ارجع للبيت باي.
كطعت الاتصال بوجهي حقها تزعل مني بعد الكلام السمعتة رحت طلعتلي ملابس سبحت عسى ما استعيد نشاطي اخذت فيتامينات مشطت شعري وتعطرت كعدت مخلية طفلي بحضني هادء مايبدر منة صوت ابتسمت ومررت اصبعي على خدة...
-سبحان الموضوع نسخة حياوي هاي من كد ما اتنسة بية طلعت نسختة حبيبي انت اجمل شي بعدة هو.
رفعت راسي اذا بية كدامي جان يستمع لحديثي ماعرف شحسيت بوقتها بس جان احساسي صعب سلم وتقدم ثنة ركبة واخذة من حضني يبوس بية ويلعب علية كعد على السرير يسولف علية كانة شخص جبير: -حبيبي ما اشتاقيتلي اني اشتاقيتلك كثير ايمتة تكبر تا اطلعك وياي محضرلك كثير شغلات حلوة يلا عاد اكبر.
احس گلبي انعصر من اشوف تعاملة وي ابني كانة ابوة شي واحد باقي وتكمل حياتنا او تدمر وهي مشاعري تجاة باهر اذا تغيرت تغيرت حياتنا واذا بقت على حالها هم راح تتغير اريد باهر تصير عندة عائلة حقيقية زوجة تحبة واولاد غير احمد...
باهر يستاهل ينحب رجل صاحب غيرة غيور طيب كل الصفات الحلوة بية قدملي هواي اشياء واني بدوري اقدملة حياة حلوة...
مر اليوم وتلاها عزيمة كانو الولد مجتمعين واحنا اضافة الى انمار ونوفة البيت جان متوتر ماعرفت شنو السبب بس شفت باهر صاير نار طلع قبل الغدة
حضرت نفسي على اخر حباية بدلت لطفلي واخر شي اخذت علاجي طلعت اشوف سيلي المختفية
دكيت باب غرفتها اكثر من مرة مااجاني رد بعدني واكفة وصرخ احمد هزيتة اسكت بية: -اش حبيبي اش يعمري اسم الله
انفتح الباب وضليت ارمش معقولة هاي سيلي!
حسيتها شبيهتها جانت عيونها مورمة وحمرة والشعر منثور بطريقة عشوائية وي ذيج الجانت ملفتة للنظر
سالتها بخوف: -شبيج سيلي ترة خوفتيني عليج
ماجاوبت ومسحت خد احمد رادت تدخل ودفعت الباب بيد ودخلت خليت ابني على سريرها لكيتها متفاجئة من تصرفي: -مااطلع الا تحجيلي شبيج كولي اي شي لا تخليني بقلق.
تمشت كدامي شمرت روحها على السرير وضمت راسها بالمخدة اعتقد تبجي كعدت يمها واسمعها تكول بحركة كلب: -شووكت اخلص من هذا المستنقع القذررر تدمررت حيااتي بسبب شغلهمم كل هالخير والعزز وعايشين بجحيم شيصير لو حالنا حال العالم
تعبت من ورة هاي الحياة خسرت هواي لو اعرف هيج جان رحت وي امي حتى لو مجانت تريدني.
صابني ذهول من حالتها وطريقة كلامها حرت شسوي حتى كلام ماعرف احجي استمرت تبجي لدقايق واني كلبي متكطع عليها سلينا بنية لطيفة ماتقل من اخوها باهر بس متعوبة هواي الدمع مايفارك خدها
راحت تسبح بقيت على كعدتي اخذت ابني بحضني اهز بية طلعت بالبرنص خليتها تبدل وطلعت مجرد مانزلت لغرفتي اخلي طفلي بسريرة اشتغل الرمي على بيتنا الخوف امتلكني حضنت طفلي لصدري وصرت اضرب سن بسن من الرهبة ارهاب هجمت يربي منو ذولة...
دقايق والرمي سكت عفت ابني بسريرة وطلعت اشوف شنو الموضوع البيت صارت بية ضجة بسبب ولدنا طالعة داخلة مافتهمت شكو رحت اسئل صفية لكيتها مخبوصة بسرعة وكلشي رجع لمكانة رجع الوضع كما كان ولا قبل شوية الخبصة...
صفية تحضر بالغدة وي العاملات رحت اسالها: -شصار ليش هالرمي قبل شوية؟
جاوبتني وهي تشتغل: -شي طبيعي يا ماما مجرد رمي بعيد عنا
-بعيد! ليش موجان على البيت.
-لا بعيد بس انتي هيج حسيتية هاي عدهم اسلحة يجربونها مو اكثر
طلعت من بعد ماصاحولها ولدها بقيت يم العاملات كل وحده بشغلها ذني لو شيصير ماينطقن حرف واحد بس وحده بيهن جبيرة حجت وهي متخوصرة
-عيشي وشوفي يا گلبي هيج حالات
سرى: منو ذولة الرمو
-اعداء الحارث
-اذا اعدائة ليش يرمون البيت شهلتصرف الغريب
-بعدج جديدة على الوضع اتذكر مرة البيت خالي من الرجال فهجمو علينة و.
سكتت من دخلت صفية باوعتلها وهزت راسها حجت موجهة الكلام الي: -ماما روحي شوفي زوجة انمار تخربطت بسبب الخوف
ذبيت البيدي ورحت اركض لكيت انمار مخليها بحضنة ويبوس بيها رجعت ليورة وطلعت استحيت منة منا لمن اجة علية كال روحي يمها اخذت ابني يبجي ورحتلها جانت منتهية بسبب الخوف...
تطمنت عليها وطلعت ارضع ابني شبع ونام رحت اتغدة واحنا كاعدين صار المو علبال زواج انمار من سيلي جنت بقمة الصدمة اما نوف جانت في قمة الانهيار ماكدرت اتحرك من السمعتة وشفت حالتها التكطع الكلب...
مر اليوم سيلي طلعت من البيت ماعرف وين حتى مالحكت افهم شي منها نوف جانت منهارة عيونها ماتفتحها رحتلها للبيت اكثر من مرة لاتحجي ولا تفتح عيونها انمار جان كوة واكف على طولة رحتلة فاير دمي...
سرى: -رجعها لاهلهاا شمنتظررر تمووت ماتشوف شصايرر بيهاا تريدهاا تمووت حتى تااخذ راحتتك وي سليناااا
خلة ايدة كدام وجهي ورجع خطوات ليورة صوبها يردد بصوت ناصي: -كافي كافي...
كعد يم راسها يبوس بيها بخبال ويبعد شعرها عن وجهها يحجي وياها بانكسار: -ضلي وياي لا تعوفيني مو كتلج لاتعوفيني لاتصيرين مثلهن وتروحين بعيد عني مو روحي صارت بيج لاتكسريني اموت بلياج.
هزيت راسي وضحكت بخبال: -شبييييك انتتت صااحي صااحي تزوج عليهااا وتريد تبقة وياك والله ثم والله بس تصحة ماتخليك تباوع بشكلها روح لمرتك حامل خطية ابنك
مارد علية بكلمة جان شبة منهار ونوف ماتدري بالدنيا تكعد تاكل لكمتين وتغمض عيونها المغذي بيدها وجهها مصفر جانت مثل العبة بيدة يوكلها يغسللها يمشيها...
تخربطت احوالي مو هينة علية اشوفها بهالحال التفكير اكل عقلي بهلموضوع والمشكلة ماكو سيلي حتى افهم منها ليش اتزوجتة اكيد اكو حلقة ناقصة بالموضوع من اشوف انكسار انمار اتاكد هو هايم بيها
واكفة ارتب بالسرير طلع باهر من الحمام ينشف بشعرة اباوعلة متغير كلش حتى كلام مايحجي وكف كدام المراية يمشط بشعرة واني حجيت...
-اكول باهر شنو سبب زواج اختك من انمار يعني هيج صار فجاة محد يعرف وانت شلون وافقت على زواجها من شخص متزوج!؟
-كلشي يصير عدنا خلص سدي الموضوع تزوجو وخلص والبت حامل نروح نطلك
ذب المشط من ايدة بقوة طلع صوت باوعلي عاصر ايدة وكال بعصبية: لا تجيبين طاري للموضوع ثاني مرة انتهى خلص ماكو اي سؤال.
طلع معصب بقيت صافنة اكيد الموضوع ورة سبب وسبب جبير ضليت ورة نوف اطمئن عليها ومن اتصلت بسجاد وسولفلي الصار قررت اروحلها
تجهزت اني وطفلي بعد مانطيت علم لباهر ماعترض
طلعت برا منتظرة واحد من اخوانة يوصلني لان مايقبل اروح وي الحرس...
اجة ازاد سلم واخذ حياوي بحضنة: -يلا امشي اوصلج
صعدت وانطاني ابني حرك السيارة وعدل الجامة
صوبي تحمحم وكال كلام خلاني مصدومة ماعرف شحجي...
نو...
عيوني تفتر بالغرفة والافكار تتناطح براسي لزمت راسي بوجع ضربت علية بقوة: -كافيي كافييي لاتخافيننن كاافي
خليت ايدي على بطني والحقد تارس گلبي نزلت دموعي مسحتهن بعنف واردفت كازة على سنوني.
-الرضو والما رضوو مايهموني هاي حياتي وحدي طفل ماريد منة باوع تسمعني مو ادري بيك تسمعني شوف لاتضوج مني اني كل الراح اسوية لمصلحتك راح ادوس على روحي وخوفي وضعفي في سبيل ماشوفك بالمستقبل متعذب انت ملازم تجي على الدنيا ولعدة اسباب...
ماريد شي يربطني بابوك الخاين القذر ماريد شي مشترك بينة وهو انت ومو بس هاي راح ياخذك مني لو صرت راح يحترك كلبك وكلبي وهو المستفاد ابنة كدام عينة.
راح تتعذب هواي واكثر مني هم سامحني حبيبي بس هذا لمصلحتك ماريدك تتعذب واني اتعذب وياك
روح بسلام الدنيا ماترحم...
سحبت التليفون شغلت قصيدة اسمعلها وروحي تنمرد.
-روح الله وياك ييمة الدنيا ماترحم
بالدنيا شتريد اذا اولها تتيتم
ماكو غير الجروح اسمع چلمتي ورحي
الدنيا ماترحم
-خلص سامحني رفعت راسي اخاطب رب العالمين ودموعي تنزل: -لاتغضب علية ماكدر اتحمل امانتك جبيرة ونهايتها معروفة تهد الحيل سامحني.
نهضت ورحت باتجاة الكنتور طلعت لبسة للدوام هما وصلوني لهذا الحل ماقبلو انزلة وكفو وياي اروح وحدي ومناك تدبر المهم اتخلص منه.
طلعت من الغرفة والهلاهل بدت تمطرني ابتسمت اشوف عبدالله يهلهل اجة باتجاهي يدبج بالكاع ويهوس ضحكت على شكلة.
عبدالله: -واخيرررا اشرقت وانورت دكتورتنا الحلوة نورتينا
-من كلبك هذا الكلام
عبدالله: -لا والله مجاملة وينج حلوة يععع شكلج يسد النفس صاير كبل شلونج ادور هسة داخلة بحالة كأبة.
ضربتة بيدة: -انجب ما داخلة بحالة كأبة وشكلي حلو لا تعيب
سجاد: -يغار منج ضلع الضلع اشو تعاي اشوف وجهج الحلو
رحت سحبني من ايدي لازم وجهي يدير بية: -ايباااخ غير تخبلين
عبدالله: -جنها ابو بريص ميت باب الحمام
من سمعت هيج راسا رحت اركض للحمام ذبيت من راسي احس معدتي انشلعت غسلت وجهي وهما وراي سحبني مهند يمسح بوجهي واني بس دموعي تنزل...
عبدالله: -امشي ناخذ للدكتورة تنطيج علاج حتى بعد ما تستفرغين.
سجاد: -لا تصير زمال غير حامل شي طبيعي
عبدالله: -هسة صدك صرتي ابو بريص باب الحمام
-انجب حقير كلة من وراك والله بعد لو حجيت هيج شي استفرغ بوجهك
كش وجهة وطلع يدردم ويسوي ايععع كعدت يمهم امي نايمة ماخذة علاجها عبدالله يخوزر بية ويعبس بوجهة واني الزم بمعدتي شكلك تلعب نفسي دخل مهند بيدة كلاص عصير اخذتة من ايدة وكال...
مهند: -سويتلج عصير fresh (طازج) من النت طلعت الوصفة
-عاشت ايدك حبيبي تسلم.
عبدالله: -جا ماسويتلي وياك مادكول اكو ناس تشتهي عود انت هم اخوي تف عليك
مهند: -البت حامل وتلعب نفسها انت شبيك هم حامل
خزرة بطرف عينة مدد رجلية كدامي كل وحدة شطولها شربت شوية من العصير صدك يخبل قدمتة اله: -هاك اشرب لاتطلع بالطفل
عبدالله: -واني شبية اشرب من حلكج يععع وخرية مني
-طبك مرض فوك ما انطيك
هزيت ايدي وشربتة اخذ الكلاص مهند التفتت لسجاد يباوعلي: -كول عندك حجي
-شوكت داومين حرامات تضيع سنة عليج.
-لا شنو تضيع باجر اداوم ماكلتلكم
سجاد: -اي عفية باختي السباعية حتى افتحلج عيادة بس تتخرجين وتاخذين خبرة
عبدالله: -اسواق افتحلها احسن هاي اذا فتحت صيدلية اني اتبرة منكم هم تعال من ورة اختك مات افلان وادفع فصل انوب ابيع كلياتي واضل مكابل وجهها الفاهي.
طفر علية سجاد يكفخ بية ويجعص بوجهها واني اضحك سهرت وياهم شوية ورجعت لغرفتي شمرت روحي على الفراش ودموعي غركت وجهي ماكدر انام اذا ما ابجي ابجي على ايامي الخلصت وياة على حبي اله احس گلبي يوجر نار كارهتة ومفتقدة حضنة محتاجة يلمني بية...
شوكت اكرهك وانساك بعد كل السويتة روحي تفرفح عليك!
كعدت على صوت اذان الفجر مادري شوكت نمت كوة نهضت روحي احس جبل براسي توضيت وصليت خلصت صلاة وضليت كاعدة على المصلاية رفعت ايدي جان بالي اكول ربي نسيني انمار وطلع حبة من گلبي طلعت من الساني ربي زيد حبة بگلبي
خليت ايدي على حلكي ودموعي تنزل بغزارة شنسة انسى الاهتمام الحب الغزل الخوف اللهفة الحنية شنسة منة دمرهن بخيانتة وزواجة علية.
راسي احسة ساطرني من كثر التفكير بشنو قصرت وياة؟ مضوجتة؟ مزعلتة؟ شنو المو زين سويتة وياة!
دك المنبة واني على نفس الكعدة اندك الباب كمت افتحة طلع مهند: -صباح الخير
-صباح النور
-اجيت اكعدج عبالي بعدج نايمة شلونج انتي زينة؟
-هزيت براسي زينة احس بلاعيمي مطبكة ماكدر احجي گرص خشمي وراح طلعت ملابسي رحت سبحت واجيت امشط شعري نشفتة ونزلت دموعي اتخيلة واكف بضهري يمشط بسرعة اخاف اتاخر.
نشفتة وعفتة مابية حيل امشطة اباوع لوجهي اصفر شفتي بيضة جوة عيوني هالات سودة...
خليت مكياج خفيف ورشيت عطر لبست ربطتي وافتريت كدام المراية جنت لابسة سترة سودة نص الفخد توصل وجواها تشيرت ابيض وبنطلون كابوي كاجول بوت ابيض وجنطة كذلك بس الربطة مشجرة اخذت بيدي علبة صبغ اضافري وطلعت لكيتهم يسوون ريوك وهم يتحضرون للدوام...
بين مايجهز الريوك كعد اصبغ اضافري من لا چارة مندمجة بيهن فزيت على صوت عبدالله يصيح.
-من الصبح الله اكبررر هسة نريد نتريك
دنكت عيوني اكمل وسجاد كلة: -عبيد مو اكوملك شعليك بيها انلصم
عبدالله: -امري لله انلصم والصبر منك ياربي
اجيت اتريك ومجرد شميت ريحة البيض معدتي كلبت.
رشيت عطر واخذتة وياي ضليت واكفة بالكراج بين ما اجة مهند ياخذني بطريقة اما الباقين بقوا
طول الطريق ساكت طبعة هادء كلش بس حنين طبك على الاسواق بقيت مناظرتة اجة خلة بيدي علاكة متروسة حلويات...
-مايصير تبقين بدون اكل اكلي منهن ومن تخلصين اول محاضرة اكلي بالكافتريا
هزيت براسي وكملنا طريقنا لازم ايدي وصلني لجامعتي وراح اخذت محاضرة وحدة وطلعت من الجامعة گلبي يوجعني بس لازم اجازف...
اخذت تكسي ورحت لعيادة دكتورة سجلت اسمي وكعدت گلبي يريد يطلع من صدري العيادة بيها مراجعات قليل لان الصبح اجة سراي ورحت للدكتورة متوترة بدا حديثنا وكتلها...
-اريد انزل الطفل دكتورة.
رفعت حاجبها وسالت بشك: -ليش تريدين تنزلينة؟ زوجج وياج جاي
-انفصلنا هو مايريد الطفل كلي نزلية
-ماكدر ماما بعدج صغيرة
جان مو هذا السبب الرئيسي لرفضها مالحيت وياها ورحت لغير عيادة ونفس الكلام لازم زوجي وياي لان الاجهاض خطر طلعت من الدكتورة دموعي تنزل
الحقد عماني ماريد اشوفة فرحان بابنة اريد احرك كلبة وانهي كلشي بينا...
كعدت على الكرسي ومرة جبيرة تنضف العيادة اجت يمي تهدي بية سالتني وحجيتلها عن كلشي هزت راسها وباوعت بالمرر كعدت يمي وحجت بصوت ناصي بس اني وياها نسمعة...
-انزلج الطفل بس كون عندج فلوس
-انتي تنزلينة؟
-لا يمة الجدة (القابلة) تنزلة الج المرة قديمة بالشغلة ومسوية هواي نسوان مثل حالتج
رجف گلبي خوف بس تجاهلتة: -بس اني وحدي خاف ماتستقبلني الا مرة وياي
-اني وياج اكلها جنتي بس تنطيني
-ادللي عندي فلوس بس روحي وياي.
اتفقنة على الموعد والسعر اخذت رقمها وكالت انتظري مني اتصال بين ما احجزلج كتلة بس كون لا يوم جمعة ولا سبت علمود الدوام
-صار بس كون تعاي من الصبح
مادري شنو من قوة گلب عندي وافقت على كلشي في سبيل اخلص من طفل ماجاي للدنيا ومالة ذنب بكلشي جنت اريد انتقم واكسرة لان ادري كلش زين راح يتاذى اذا سمع وهذا الشي الاريدة...
رجعت للجامعة قبل الوقت مر مهند رجعنا للبيت ومر اسبوع على اتصال وي المرة جهزت الفلوس وجهزت نفسي مثل ماكالتلي احس عقلي مبنج عندي اموت عادي ولا اجيب الطفل...
كاعدة اباوع لاهلي بنظرة اخيرة خفت يصيرلي شي بس رغم هذا ماهتميت طلعت ثاني يوم للدوام ومناك رحت للمرة بكذا مكان...
جانت مرة تهمها الفلوس ماعرف شلون سلمت نفسي بيدها اجرت تكسي وصعدنا لبيت القابلة جان بعيد عن الجامعة عصرت ايدي بخوف وسالتها...
-خالة خو ماياخذني النزف
-لا خالة هسة تشوفين بعينج القابلة والنسوان الحاجزة عدها واذا تريدين اسئلي عليها جا هي متخرجة وتشتغل بالمستشفى مو لبالج ماتعرف شي
اطمنت نوعاً ما بس ماانكر خوفي وصلنا لبيتهم جلبت بعبايتها حيل واهلي خطرو بالي كملت مشيتي ودكت الباب اجانة صوت يكول جاي وخطفت سيارة مثل البرق صارت جوة رجلية شوية واندعمت...
التفتت بخوف واحس اطرافي لزمت بعباة المرة حيل ونزلت دموعي هي ماجانت تضن هاي السيارة جايتني جان عدها الوضع عادي بس من شافتني
استغربت حجيت بفزع: -خالة فدووة احميني لاتنطيني.
رغد...
احس گلبي طار من شفت سفانة تركض وتصيح ابني ماااات مااات ابني
دخلت جوة تفزع بالموجودين من الولد ركضت وراها لكيتها تملخ بروحها وتصرخ طلع عباس يركض لبيتهم وهي وراة وصلت لباب الحوش وطاحت لازمة رجليها دخل نزار ومن شاف عباس راح وراة يصيح
-كضنها لاتصرخ لاتطيح.
رحت لزمتها حيلها باد صار وجهها ليمونة كوة تتنفس غسلنا وجهها وشربناها ماي راحت رضية ورة عباس وهديوة هم لحكتها طببناها جوة وهي مثل الطير المذبوح ترردد مات مات اختنك صار ازرگ گطع نفسة
-دكولي يا الله
اتصلنا بعباس مايرد ورضية ناسية موبايلها متنا خوف وهي حالها يرثى اله اجة نزار شايل على مشتريلة انطاه الها اخذتة بحضنها تشهك وتبجي
سفانة: -يمة اخوك راح اخوك فرفح بدية من عمت عيني.
نتصل ومحد يرد سفانة تخربطت ونزار اخذها يشوف ضغطها عافت ابنها يمي مصدوم من الهوسة خليتة بحضني اسكت بية تاخرو كلش اتصلت بنزار
-هاي وين رحت سفانة زينة
نزار: -زينة زينة بس يخلص المغذي تجي سكتي ابنها
-ساكت لاتهتم بس كلي امير شلونة
-خابرت عباس يكول بالطوارىء ماخذينة منة
-صخام الصخمني بس لايصير بية شي
-وجهة الفكر لاتفاولين بالشر مو صوجج صوجي انا احجي وياج يلا ولي.
سدة بوجهي الغثيث ضليت ادك والولي لعلي: -دللول يالولد يبني دللول عدوك غريب وساكن الجول
ماحسيت شوكت نزلن دموعي مسحت عيوني لكيت على نايم صحت لزهراء اجت شلتة خلتة بغرفتي ورة شوية اجت سفانة حتى ماتكدر تمشي مجلبة بنزار كعدت بدون نفس عيونها جامدة...
طول الوكت هي على اتصال وياهم وعباس يجاوبها: -هسة نجيبه مابية شي
سفانة: -لا بية شي تجذبون علية
عباس: -يابة هسة نجي بس على كيفج.
سوينة عشة محد اله نفس بس الكبار اكلت لان ناس مرضة الساعة العشرة بالليل وماكو مخلينة على اجهزة التنفس...
سفانة نايمة وابنها على بحضنها رفعت عيوني لهدى شايل الطفل بحضنها وعباس بصفها ابتسمت على منظرهم وشلون مهتم للطفل كلساع يوخر الجرجف عن وجها انطتة إلى اخذتة منها منتهي كوة يتنفس
كعدتها على كيف خطية شصار بحالها ضلت اليوم يمنة لان فارس عندة شغل يبات برا...
ضليت الليل كلة سهرانة وياها خاف يصير شي بابنها.
منا لمن صبح الصبح يلا رحت لغرفتي ذبيت روحي شمر نمت بسرعة...
فتحت عيوني على اثر اصبع ينقر براسي رفعت عيوني وغمضت: -شتريدين
هدى: -مو عدج قراية خاف ماتلحكين كلت اكعدج
-يلا هسة كايمة
كمت وراها جسمي مكسر لو ما الامتحانات فلا اكوم غسلت ورحت اتريك خدرت الجاي وكعدت منتظرتة سمعت صوت برا ماخليت بالي صبيتلي جاي وكعدت اتريك ذبيت اللگمة من حلكي من شفت جاسب بملابسة العسكرية خزرني ودخل جوة وجهها معصب.
دخلت مرتة وراها دموعها عشرة عشرة لازمة بطنها البمكاني تكرها وتحقد عليها الا اني استخطاها شخصيتها وي شخصيتة ماتقوم بنية فقيرة كمتلها
اشوف اشبيها...
-شبيج من صباحية الله
مريم: -بطني توجعني راح اموت عفية خل وحدة تاخذني للدكتورة جاي انزف
شهكت وعفست وجهي التفتت صار كبالي عفست وجهي وكلت بوجهة: -همجي ماشايف الغسل
هز راسة بتوعد وطلع برا كعدت عايشة تلبس بجواريبها والبت منتهية بالبجي هزيت ايدي وكعدت.
-الله خلصني من هيج شكول الف الحمدلله والشكر ربي
بست ايدي وجة وكفة وخليتها على كصتي باوعتلة خازرني وينفخ دخان خليت ودخت جوة رحت لغرفتي إلى هي غرفة البنات غرفتي اني وياة ما اوصلها...
اخذت موبايلي من الشحن وطلعت دفتري الخص المادة بين واني جاي اكتب ومندمجة انفتح الباب رفعت راسي شفتة هو خزرتة بطرف عيني ورجعت اكتب ماجني اشوفة...
نرفزني من دنك كبالي ثاني ركبتة عدلت كعدتي وخزرتة: -خير شتريد.
عصر فكي بيدة كاز على سنونة يحجي: -عبالج ترتاحين مني وراج وراج مثل كوابيس الليل لاتحلمين وتتسبعين جدامي
نزلت ايدة بقوة ودفعتة صاير اعصاب: -لا تمد ايدك علية نفسييي تلعبب منك ومن طااريك
باوعلي بنظرات متلاعبة وسحبني علية راساً خليت ايدي على حلكي سادتة بقوة جن جنونة وماحس الا راجدي دار وجهي كام من مكانة واني وكفت لازمة خدي: -مسووي روحك زلمةةة امدة الزلممم اذا مثلك.
راد يهجم علية واني شلت المزهرية شمرتها عليه صارت برجلة و طشرتها بالكاع صرخت قبل لا يضمني بين انيابة بهلحضة دخل عباس عاكد حواجبة باوعتلة متوسلة بية
-طلعة مناااااا شكووو جااايني
تقدم عباس علية بخطوات رزتة سحبة من قميصة دفعة من صدرة عيونة متلهبة نار...
عباس: -شعنددك يمهاااا
جاسب: -وانتتتت شكووو مرررتي
عباس: -دنجببب ررغد تنساهااا ما دامك تزوجتت غيررها كمل حياتك وياهااا لو رايدهااا ماجبت فووك راسهااا.
جاسب: -عباس لا تتدخل بينة
-خليني محترمك لا اراويك وجهي الثاني اطفي عيونك ثنيهن بساعتها مادام البت ماتريدك ماتعاين بوجهااا فاهم
جاسب صار وجهها احمرر دفع عباس من صدرة وكال: -مو على مزاجك ومزاجها بكيفي شوكت ماريدها اجيها
شهكت من عباس ضرب جاسب بوكس طشر وجهها مارد علية جاسب لان اكبر منة عافة وطلع ضل بس عباس ورث جكارة ورثها وصار ياخذ منها نفس باوعلي وكال برود...
-ماتريدينة مو لا انا غلطان.
-لا ماغلطان ماريدة ولا اريد كاع التريدة فكوني منة خلية لايكرب صوبي ويلتهي بحياتة
-هو هذا الراح يصير اقري زين واهتمي بالبطنج اذا ماتريدينة انا اربية
طلع واني ضليت واكفة كلبي يدك بقوة لزمت خدي نار كون كسر بيدك ان شاءلله ماكلت بالصار خفت يوصل لرحمن ويهد علية خطية هو تعبان يجي هم يلة يشوف مرتة...
ضليت اقرا من طكني الجوع نزلت للمطبخ لكيت الجدورة على النار صبيتلي وكعدت اجت هدوة كعدت يمي...
-شبيج وجهج اصفر دومج تلطمين
هدى: -لا مو شوفي هاي حايرة بالتقديم مادري معدلي شيجيب
-انتي شتريدين تروحين شهاوية
-مادري معدلي مو عالي
خزرتها وسحبت تليفوني ابحث اقسام تناسب معدلها دخل عباس كال: -هدوة بوية چويي (جاي) سويلي
هدى: -ادلل هسة
-مايدلل عليج ضالم
كعد كدامي يطحن جكاير اختنكت وكتلة: -شسالفتك وي الجكاير خنگتني
-سالفتي وي الجكارة سالفة لو ماهي مصبرتنة جان مادري وين هجيت.
هدى: -اليسمعك يكول ارملة وكاعدة وي عيالها يدكون عليها اشو زلمة بكيفك تطب وتطلع وعدك شغل وفلوسك بجيبك شتريد تشتري بدون منية احد
-ذني مصدر حتى نعيش خارجياً نلبس ونكشخ نضهر للوادم بمضهر مرتب بس يضل داخلنا مخدوش وهوسة ماترتبة الفلوس ولا تريحة الطبة والطلعة
هدى: -چا شتريحة؟
-بعدج صغيرة من تكبرين اكلج
اجت يمة متخوصرة ورافعة حاجبها: -انا مو صغيرررة لا تضل مجلبيلي صغيرة صغيررة كبرررت كبررت.
-شوكت كبرتي شو ماجاي اشوف
-عيني راح ادخل جامعة حتى خاف تكول صغيرة
راحت صبت جاي وجابتلة كلاص جاي طفة الجكارة واخذ رشفة وهي عيونها علية وتاكل بشفايفها صافنة صاح بيها: -وين صافنة
اجت كعدت كبالة وخلت اديها على خدودها متقدمة علية: -اكلك شقدم هسة حيرانة
-عبالي حرانة، مادري انتي شهاوية
-اريد اروح كلية عسكرية لو ضباط شدكول
خرزها ورفع حاجبة: -وشمعنى كلية عسكرية.
-حتى اصير قوية والبس الزي هيج احس فخرر وانوب اشتغل وي ضباط شواربهم طوال مثل شواربك وفلوس هواي ها شكلت اقدم؟
-الكليه العسكرية تريد نسوان مو فصم بكدج
-هسة شبيك وياي انا مو فصمة
-بكد الطلقة انتي وينج وين العسكرية لازم طولج مايعتدى 160 وانتي ماشاء الله بطول جف ايدي ام الضباط طالعة عينها افكسها الج
ضربها على خدة هي تضحك وهو متنرفز شرب الجاي دفعة وحدة وكام غسل الكلاص ورجعة لمكانة راد يطلع راحت وراة...
-هسة شني عبسي شو ماكلتلي مو راح يسدون التقديم
-عوفيها علية انتي تريدين هندسة احتمال جبير يقبلونج
-بكيفك بس كون وضيفة بيها فلوس حتى اتعارك وي رجلي ما اروحله
هز ايدة وطلع عافت السالفة وراة هو قدملها من الاعلى للادنى وبعد اسبوع وتطلع نتائج القبولات.
كعدت الصبح مثل اي يوم للدوام خابرتني سجى كالت حضري لحفلة تخرجي نظام جامعتنة حفلة التخرج ماتصير بالمرحلة الرابعة حتى لا يتاثر الطالب ويهمل دراستة عود من ينجح من الرابعة السنة البعدها يتحتفل على راحتة ويمكن هذا احسن قرار بالجامعة.
كلت العصر لو غير يوم اشتري ملابس للحفلة لازم اروح وياها رجعت بيومها من الدوام تعبانة وصارت الهلاهل باذني...