رواية بين سلاسل العادات للكاتبة كفاية كاظم الفصل الأربعون
سرى
كاعدة وحدي بالبيت اتصل ومحد يجاوب القلق نهش گلبي اتذكر كلامة من يگول اعدائنا هواي خفت لاصار شي بسيلي لو بيه.
مر وقت طويل واني على نفس الكعدة من الخوف نسيت اخذ علاجي كوة كمت حسيت الدنيا تفتر بية
وصلت لباب الثلاجة وكعت...
هاي حالتي اذا ماخذ العلاج جسمي يموت بقيت على وكعتي بس عيوني تتحرك ودموعي تنزل بالكاع احس بروحي تحتضر اريد واحد بجانبي حسيت روحي تطلع وعيوني شوية شوية ينسدن.
لمسات خفيفة على خدي وهمسات قريبة مني اريد افتح عيوني ماكدر بين الوعي والا وعي حركت شفتي اليابسة: -اريد مي
ماعرف منو الشربني المي رجعت غفيت كعدت بعد فترة راسي يأذيني باوعت لديناتي زرگ مزرفات وكانولة ومغذي بايدي...
-يا الله واخيراً كعدتي
دورت بعيوني الذبلانة اله كاعد بصفي وشكلة مخربط اول مرة اشوفة هيج ماكدرت احجي بس هزيت راسي.
-الحمدلله على سلامتج قلقتينة عليج.
اشوف الخوف بعيونة نزلت دموعي وميلت راسي للغطة ضميتة احس روحي غريبة بهذا العالم ماعندي سند لو متت منو يغسلني منو اليزور قبري شعور الغربة يذبح وين اهلي عني صفيت بطرگ روحي التعبانة والناس الغربة تهتم بية...
كل مايحجي واسمع نبرة صوتة المليان خوف ازيد بجي اسمع سيلي اجتي تهمس قريب مني وتطبطب على ضهري بحنية تذكرت نهى احس گلبي ورم لا اخت ولا اخو الناس الغربة احن منهم علية...
سلينا: -نعتذر منج لان عفناج وحدج بس صدكي مجان بيدنا لا ارداي صار التاخير حقج علينة
-على شنو تعتذرين اني إلى اعتذر لان زدتكم وياريتني صاحية
-لتكولين هيج سراوي الله يشهد انتي مثل اختي اذا متشيلج الكاع نشيلج فوك روسنا
كلماتهم اهتمامهم دوة لجروحي بوقت شحت الادوية...
العلاج حسن من حالتي شوية كاعدة على القنفة وسيلي بضهري واكفة تمشط بشعري احس ايدية بايدة.
سلينا: -حسويلج ضفيرة شدكولين
-براحتج اي شي.
-عووع سررى انطي رايج بشي عاد
-هنا كم شهر خليني اعيشهن شلون ماكان
-ليش تحجين هيج مامتوقع شي بعد
-احسن بروحي يوم عن يوم تنهار كلام الاطباء بمكانة جسمي ميتحمل
-الله كريم دعوفي هالموضوع القالقج على الخالي بلاش واتحضري نروح
-وين
-لبيتنا
-قصدج لبيت الحارث
-صفية اكلتة لراسي تريد تشوفج واخوية كللها من تصير زينة يلا كومي خلص صبرها للمرة حتنتحر بينة هم متزوج بالسر وهم ميريد احد يشوف مرتة.
باهر مبلغهم متزوجني من زمان حتى سيلي متدري بالموضوع وعبالها الطفل منة متدري الطفل ناتج من اغتصاب بشع عن طريق عقد باطل حسبي الله ونعم الوكيل.
لفت شعري وكمت بدلت لكيتها منتظرتني بكامل اناقتها ابتسمت الها اجت كرصت خدي تضحك
سلينا: -ابتسمي قرة عينة لاخوية بيج
صار بوجهنة بقة صافن بوجهي واني كذلك انتبة لسيلي التعدل بسترتها تحمحم وكال: -يلا اتزهبو
شلونها حبيبة اخوها
-زينة.
راحتلة تحضن بية وتكرص بخدودة: -شهل جمال امي لا وفوكاها تخجل من واحد يتغزل بيك لك ابني انت انتاجك مو عادي ميتكرر
باهر: -بعقلج شي؟ دمشي عوفي وجهي لا اخرب خلقتج
ضحكت وعدلت شعرها كالت: -ترة سراوي مو تنغارين احنة هيج من زمان
-لا يابة منغار بالعكس افرح من اشوف خوتكم الله يحفظكم لبعض
-ويحفظج النة.
طلعنا وهما طول الطريق يضحكون ويسولفون احس سيلي شخصية ثانية عكس مجانت اضحك لضحكهم وادعي الله يديم المحبة بينهم درت وجهي للجامة افكر.
شيصير لو عادل جان زين ويانة يمكن عشنا احلة عيشة بدون رعب وقلق كل فترة يطلعنا سالفة لاهو اتزوج الانسانة الرادها ولا حافظ علينة وعلى نفسة
طشرنا كل واحد بديرة...
امي ماضن سالمة لحد هذا الوقت ادري بيها تحبة اكثر من عدنا كلنة خاف ماتت بسبب الحزن انجلطت غمضت عيوني والدمعة طاحت مسحتها بسرعة لاينتبهون الحزن بالگلب يصدع...
المكان والجو ذكرني بدلهام وايامة السود نفس الجو باوعت للبيت حتى نفس الهيئة احس كلبي نغزني ماعرف شلون سيطرت على نفسي ومشيت عادي...
دخلنا سلمنا على صفية المرة المحبوبة من اول ماشفتها حبيتها بقت تستقبل بية وترحب...
قدمونا الضيافة وبقينا نتسامر الحديث احنا الثلاثة فقط دارت المواضيع عن تعارفي بباهر وزواجنا فقط ماتطرقت لاهلي ولا سالتني عنهم ريحتني لو سائلة شراح اجاوبها...
جانت كعدة حلوة بس بدقايق خربت بسبب الضيوف الاجتهم طفرت صفية منزعجة وكذلك سيلي صعدت فوگ الخدم تروش رايحة راجعة.
كمت اريد اروح للحمام واسمع وحدة من الخدم جبيرة بالعمر واكفة وتحجي بصوت عالي متذمرة.
-اووف من عياررة البنات وشبية الولد وين تلكة احسن منة منصببببب فوگ فوگ وابن عمها جمالة اقبلي وفضي النزاع مو الاخوة راح يتخاربون من ورة الحية الصفرة مايعجبها العجب
سكتت من اجت صفية واني كملت طريقي افتهمت الموضوع وعرفت الولد اليتقدملها وترفضة ابن عمها يصير رجعت كعدت المكان ملل بس الخدم طلعت خارج البيت الحماية مطاوقة المكان وسيارات رحت على صفحة بعيد عن البيت...
المكان رطب وريحة الطبيعة مذهلة مرت دقايق والتفتت على صوت سيلي: -هاي انتي هنا
-اي ضوجة فكلت اطلع شوية
-حقج لو مجايين الغثة جان تونستي ونسة تجنن
اجت كعدت بصفي مخلية ايديناتها على خدها
سكتت ماردت اسئل واعتبر فضولية سولفت من وحدها.
سلينا: -شكد اكرة ولد عمو وياهم عمو
-ليش انتي عندج عمام؟
-اي بس واحد بالانبار
-باهر مگايلي عنهم
-مينطاقون كلش شيسولف عنهم شفتي الهوسة السووها
-اي انسطرت.
-يعني ماكو هيج بشر لزكة كم مرة رفضتة ورجع يخطب
-ابن عمج
-عيععع تلعب نفسي منة ماطيقة هي كوة شنو قحط بنات روح شوف غيري
-احتمال منعجب بشكلج
-هههههه منعجب لج هذا مهوس بية من جنت صغيرة يريدني بس اني ماريدة الله يقرضة
-وهسة شنو صار
-رفضتهم طبعاً وطلعو زعلانين
-يعني بعد متتحاجون
-طبعاً لا عمو وبابا ميتزاعلون لان شغلهم سوى، دكومين وياية
-وين
-هنا نفتر شوية.
كمت نتمشى شوية ودخلنا بمكان بية لوفة صار كدامنا اسطبل بية خيل راحت سيلي كدامي طلعت فرس امتطتة واجت يمي ابتعدت شوية وضحكت
-ميأذي شبيج
-اعرف بس ماحب اتقرب علية
-على راحتج بس انصحج تحاولين تتقربين للخيول
اباوعلها راحت بالفرس ابتسمت على منظرها جنها من ذني الروسيات حقة ابن عمها ميت عليها طلعت هي ليكدام واني رحت اشوف الخيل الابلسطبل
بية تلث خيول واحد ابيض واسود وثالث جوزي
التفتت لصوت باهر: -هاي يولو انتي هين.
-سيلي جابتني
-اجت لابن كلبها
-الفرس قصدك؟
-ليش اكو غيرة
دخل انطاهن اكل ويلعب بشعرهن: -ها شكر اشلونج يول عش ماتسالين عني لو بس انمار، اني هذا صديجي لك هلا يابة مشتاقين
الفرس الاسود يصهل بيدة وهو يروض بية الا ان هدا بيدة التفت علية: -دحكي هين هذا العزيز ابن العزيزة
ضحكت وهو طلعة بالمزرعة امتطاه واجت سيلي صارو يتسابقون سوة ويضحكون مرت هاي الساعات وجانت الفرحة نصيب لكل منا...
رجعنا للبيت بقينا للعشا جان الحارث ويانة مترأس الطاولة وباهر مقابيلة متصدر...
فتحو مواضيع عامة يتناقشون بيها ورة العشا بشوية رجعنا لبيتنا نمت بسرعة وعفتهم كاعدين...
علي حلم مررعب كعدت مزاجي سيء وروحي احسها تطلع اجة باهر وماقبل اي نقاش اخذني للدكتورة...
من اصعب اللحضات انتظر سراي صاحو باسمي كلبي انقبض يكول رايحة للاعدام بالوكالة بنظرات طمني ومشيت بس كلام الدكتورة خلاني افقد الامل وارتعب...
-من هسة نكلج احتمال ماتكملين لا انتي ولا طفلج من البداية ماسمعتي الكلام هسة مايفيد شي فقط علاجج التزمي بية.
جسمج تعبان وطفلج وضعة مو تمام وحتى لو اجة للدنيا على خير مايطلع سليم مشوهة احتمال ولازم تلتزمين بموعد الجلسات حتى نتلاحگ الوضع اذا طلع من السيطرة واتمنالج الصحة والسلامة.
ياصحة ياسلامة بهذا كلامج طيرتي عقلي كلة بسبب دلهام دمر بنية جسمي بحبسة إلى بدون اكل وشرب بسبب تعذيبة حسبي الله حتى من خلصت منة مارتاحيت اتذكرت كلامة من يكول ماراح ترتاحين وفعلا ما ارتاحيت...
طلعت اناشغ ودموعي تنزل بغزارة لازمة بطني وروحي مشتعلة نار...
طلعت خارج العيادة جان منتظرني من شافني فتح عيونة بخوف واجة اخذ بيدي يحجي بقلق.
باهر: -عش تبجين لا سرى لا تنكسرين خليج قوية.
-باهر حنموت حتى الطفل مراح يشوف الحياة بس يمكن شي زين نروح سوة
-الله موجود هو يقرر ويدبر الامور مو انتي
-اريد امي فدوة حباب بس اشوفها حتى لو من بعيد
-بس احصلها اجيبها الج بس اسكتي
سحبني من ايدي جاب بطل مي غسل وجهي ومسحة بشالي اخذتة منة شربت وصعدت وياة طول الطريق يهدي بية عبالة خايفة مايدري يوم عيد من اخلص من الدنيا لان الشفتة مو قليل هسة الكاتلني اهلي الضاع خبرهم عني بليلة ويوم.
ميتين عايشين اريد خبرهم...
وصلنة للبيت وسيلي من شافتني تفاجأت وماقصرت بكلامها واهتمامها مرت الايام وبطني تكبر كعدت وي الفجر النوم طاير من عيني لو ما الادوية جان ماغمضت عيني.
رحت سبحت واشوف جسمي والاثار البية كل مرة مااركز بية اباوع لاثر الطلقة شيصير لو مكانها بكلبي هسة مرتاحة ليش كل هالعذاب...
عيوني صارن جمر من البجي مستحيل الواحد ينسى الماضي لو ينسى الالم...
ايام مأساوية جانت العشتة اشبة بكابوس مرعب اتمنة افقد الذاكرة وانسة حياتي الماضية بكبرها.
طلعت لكيتة يسوي الريوك صبحت علية ركز بوجهي وذب نفس ماحجة راح جاب علاجي اخذت منة وخلة الريوك كدامي...
تريگنا وطلع بعد ماوصاني على علاجي طار نص اليوم جنت كاعدة اقرا قرآن من شفتة يحوص رايح راد صدقت ودرت وجهي علية...
-هلو
-هلا سغى اشلونك
-الحمدلله، محتاج شي
-اتزهبي تا نغوح
-وين
-مفاجأة
-تاخذني لاهلي
-لا بس شخص كثير تحبينو.
نو
ميلت راسي واحس كلبي طار اخر شخص متوقعة اشوفة...
بقيت متجمدة بمكاني تتقدم باتجاهي سرى لامو هي هاي وحدة ثانية ملامحها مغيمة وجهها طافي مابيه حياة سرى جانت كلها طاقة...
شهكت واجت حضنتني تبجي بصوت عالي مابادلتها بقيت مفهية بعدتها عني اركز بملامحها: -صدك انتي سرى لو وحده تشبهينها، شبيهتها مو؟!
-نوفانة
شهكت فاتحة عيوني على وسعهن: -مو سرى انتي لا لا لج سررى مو هيج انتي سراوي نفسج.
تحاضنا حضن مال سنين وين رجعتني شوفتها لايام المحنة اشوف بيها حياوي...
شوگ ولهفة عتب مال سنين مخلية راسها بصدري حاضنتها وامسح بدموعي انتبهت لبطنها واحس گلبي نار صعب من اشوف البنية الجانت روح اخوي بيها متزوجة وناسيتة شهكت بصوت عالي...
-سرى حياوي نسيتية
-نسيت روحي ومانسيتة
-وهذا البطنج.
شهكت وصارت تحجي كلشي صار وياها ماعدا مرضها وضع طفلها كلبي اشتعل نار، عليها هاي اني بس سمعت الصار وياها وهيج شحال هي العاشتة...
حرت اسكت بروحي لو اسكتلها خفت من شفت حالتها حتتخربط ركضت جبتلها مي غسلتلها وشربتها مي حاولت اغير من نفسيتها واخذتها للمطبخ اسوي كهوة واسولفلها عن حياتي حاولت ماجيب سيرة اخوي لان تاكدت طارية يأذيها...
سويتلهم الضيافة اتصلت بانمار اجة ياخذها اجة تقرب مني مسح على خدي وباسني بعيوني
انمار: -لاتبجين يابرحة التين
ابتسمت على جملتة رحت لسرى صبيت كهوة وبقينة نسولف كلشي بخاطرنا وكل شوية كامزة للثلاجة مطلعة شي...
-سرى تاكلين انهار سواها طيبة جربيها
-عزاا ولج نوفة مخلية الرجال يطبخ
-مرات مو دائماً هاي شبيج شيطبخ يكتل روحة يسوي تمن ومركة
-لابلة
-هههههههه والله رجلي كفو فديتة مقدر ضروفي
-قصدج مقدر فهاوتج.
-هاي شبيكم وياي ترا اني مو فاهية سررى
-لاوين عبدالله فاهي
-عبدالله منو هذا
-بس لانكرتي اخوج
-عيعع هذا العكروگ اخوي وين يوصل لاخواني ابو البنات
-انوب
-ولج شحجيلج مسويني ميز تنمر ويحش بية كدام انهار مامخلي سالفة عوجة ما يحجيها اله ولا يكول اختي يمووتني حركة لا والنوب يصادق بنات بالجامعة وياه وكل يومية مضروب بوري حل حتى حل
-هاي بعدكم على سوالفكم
-اني مالي شغل بية بس هو يحرك علية يخلي انهار يضحك ويتنمر.
-لج انهار لو انمار رجلج
-بالجنسية انمار بس اني متعودة على انهار احسة احلة
-خو ليش سويها ابحار
-لا مايرهم انهار احلة ههههههه
اجت سكر هي وجهالها كدامها يتمشون: -كل الهلا تعاي حبيبتي سلمي على الخطار لج سكر هاي اختي وصديقتي المقربة
-شنو هاي نوف
-شبيج مداشوفينهن بزازين اعرفج سكر روز ولوز ذني بناتها يحبايب هاي سراوي تعارفن
-عبالي كبرتي وصار عندج عقل نفس الخبال بعدج.
-لا وين عقلت وصرت نادرة وام بيت ورجال اسئليهن علية عليج الله سكر بختج وبخت بناتج اني مو اشتغل ومرات اطبخ والمواعين هم اغسلهن مرات
-مبين كلش اكص ايدي اذا مو حتى المواعين يغسلهن انمار
- لا والله اغسلهن بس اذا يشوفني اقرا وتعبانة هو يشتغل
-بس لاتستغلينة خطية
-اي والله خطية بس شبيدي علية بس اتخرج ابقة اشتغل بمكانة
-هم حضة هذا
-يبوو شنو كلها تحجي علية
-دكومي وكوميني وياج
-وين ووليش
-ولج بنطي دتوجعني
-ها يلة.
نهضت وسحبتها: -شثكلاتج مدكليلي
-وين ولج بالعكس مو ثكيلة
-هم صح انهار اثكل منج
كفختني على راسي بوزت شفتي مفاهمة شي شفتها عبست وجهها وتعصر ببنطها احس الالم بية لزمت ايدها بخوف: -شنو يوجعج اسويلج شي اساعدج
-لا عادي هسة يروح الوجع
-اكلج الطفل يأذي مو
-نوف احجي عدل رحمة لابوج
-يعني قصدي اذا صرت حامل هم اتاذى هواي لو طبيعي شوية
-طالبة صيدلة انتي لو زراعة بس فهميني.
-والنبي ادري بس اريد اعرف شنو تحسين حتى اتخيل اذا توجعت ولعبت نفسي مافكر اجيب طفل
-لا والله
-والله شنو اني اخاف ما ماا شنسوي بالاطفال عود بالمستقبل نزوج عبيد واخذ منة طفل
-لحكتي هالمسكين تاخذين منة طفل الله اكبر على راسج والله فلا متغير بيج شي نفس الثول والفهاوة
-اني مو فاهية يلا خوش
-خوش يابة دمشي صيحيلي باهر
-وين ووين ووين
-للبيت ارتاح وانتو ارتاحو
-مااخليج تتحركين عتبة الباب ابقي يمي.
-لايمعودة على بختج غير مرة نجيكم وانتو هم تعالو النة
-عود صدك تحجين
-دمشي اذا ابقة يمج الطفل يطلع من خشمي
-يا عود هاي ليش ترة والله اني حبابة اسئلي سكر
-هاي سكر بدال ميمو فلا ارتاحلهم جنهم عصابة
-لعد شعبالج لج لو تشوفين شمسوين بانهار تخيلي جنت حابستة بالغرفة بس يطلع اشمر علية سكر اخليها تخرمشةة
-عزا بعينج وين واصلة انتي متعديية مرحلة الخطر الله يساعد الرجال هسة يعوف البيت ويهج.
-لا ميسويها يحبني حتى يحب بزازيني بس ميكول
خطية يضم بكلبة
-خل امشي الباب نوف الباب طلعيني ماكدر اتحمل بعد
-حتجيبين عادي اني اجيبج لاتخافين يمي
-غلف كبسولة ماتصيرين مو دكتورة امشي من وجهي
طلعت اضحك وراها لكينا باهر وانمار بالحديقة ركزت بية شكلة يجنن مبين علية ابن عز بهاي اللحظة تمنيت سرى تحبة وتعيش وياه ماكو واحد يحبها ويحافظ عليها مثلة تمنيت تكمل حياتها مثلنا.
ودعتها ورجعت طلعو وبداخلي صار فراغ جبير رحت للغرفة بوجهي طلعت الهتفون واخذت فوني طلعت للمرجوحة لاكاني انمار ابتسمتلة وتعديتة
كعدت بالمرجوحة وخليت الهتفون باذني بحثت باليوتيوب وطلعي قصيدة يطير الصاف رجف كلبي ودست عليها غمضت عيوني اسمعها واحس كلبي يتكطع دموعي نزلن من ينعاد المقطع.
-يطير الصاف وياك وديني
اشوف احباب غياب عن عيني
سفرهم طال وانا بهلحال
اشوف احباب غياب عن عيني.
دموعي تنزل مثل المطر هم يجي يوم وانساة؟
ليش كل ماينذكر طارية احس هستوة مات شوكت ياربي تبرد كلوبنا وتخلية ذكرة حلو بحياتنا...
دائماً وابدا يبقى لجمة بكلوبنا.
حسيت على ايدينات تطاوقني بقوة رجعت راسي لصدرة الصاير بضهري طبع بوسة بكصتي وصار يمشط شعري باصابعة همس باذني.
-لاتعودي الى الماضي باي لحظة ركزي على المستقبل فقط، الذين تركناهم لم يعودو فاذن لماذا كل هذا العتاب.
-من فتحت عيوني للدنيا لكيتة كدامي بكلشي جان إلى ماجان مجرد اخ جنت احجيلة عن كلشي واشاركة بادق التفاصيل جان كلشي وراح وياة كلشي ومدري شلون عشت وحدي
شهكت واحس دموعي جمر ينزل على خدي
-اشتاقيتلة انهار اريد اسمع ضحكتة حتى لو مرة اريد احضنة بس مرة وحدة مو هواي ليش مدايجيني حتى بحلم عباله نسيتة والله ماناسيتة بكل وقت اتذكرة واسولفلة عن يومي.
سحبني من مكاني لمني بحضنة شكد بجيت وحجيت احس روحي راحت ماعرف شوكت نمت كعدت على صوت المنبة راسي يريد ينسطر
نهضت اخذت ملابس للدوام واخذت حمام رحت للمطبخ لكيتة يحضر بالريوك ريحة المخلمة تجيب التايهة.
-صباحو
-صباح النور والسرور
عاف البيدة واجة باسني: -شلونج
-زينة انت شلونك
-اذا انتي بخير انا بمليون خير
بستة بخدة وكتلة: -احبك
-والكافل عابر مراحل الحب وياج
-الطاوة حتحترك مو وقت غزل
-الصبح افضل وقت للغزل تدرين.
-ادري بس احنة ناس عدنا اشغال الصبح فانأجلها لليل
-يا ليل هذا اشو الكاج نايمة على الاوراق هاي بدال ماتنامين على صدري
-يو انهار لتجذب مو كل نهاية اسبوع عزاا انهاار احتركت المخلمة يبوو عليك وعلى سوالفك.
ضحك وراح يكمل المخلمة كعدت على الكرسي كلشي جاهز اريد اسويلي شي ماكو ضميري انبني وكمت احوس حتى احس نفسي مساعدتة فتحت الثلاجة شطلع الاجبان والزيتون محضرة شفت الليمون طلعت وحدة اخذت سجينة بعدني ممكطعتها وكال: -هاي شني
-ها ليمون
-يا سبحان الله ماعرف اسمة ليمون تدرين
-اه
-خرب بعقلج المهتلف
-يا شبيك انهار
-حموضة من الصبح شبية بعد
سحب الليمونة من ايدي ضليت مفهية رجعها للثلاجة
-هاي ليش عود
-شني اليش تعاي اكلي.
-ترة انت متخليني اشتغل خاف باجر تبقة تحجي علية وتكول مرتي ماتعرف تسوي شي
-اويلاة
-هسة اشهد البزازين عليك خاف تحجي علية كدام اهلي بعد مالك حق ردت اساعدك وانت مخليتني
-هسة غير افهم بيش ردتي تساعدني وانا ماخليتج
-اسوي اقراص ليمون ازين بيهن الطاولة
ضرب كصتة بيدة وصاح: -من امداااني.
رحت كعدت وسحبت الخبز اكل وهو يخوزر شفتة ياكل سريع عرفتة يريد يخلص بسرعة وتبقة المواعين علية اكلتلي لكمتين وطفرت عرف نيتي وكام ركضت وركض وراي سحبني من شعري للمطبخ
-اخ اخخ شعري حبوبي عوفة
-لا حبوبي ولا دبدوبي تريدين تشردين وتخلين المواعين علية
-شبيك حبيبي وراي دوام هسة الكلية تعزل
-اي مو هي مدرسة وتعزل لج انتي شني من بشر ماعندج احساس الريوك وسويتة المواعين هم تريدين تعوفينهن وتشردين بس كليلي احساسج وين.
-ميت
-انبش كبرة واطلعة امشي الفاهية صدك لو كالو لحد يتزوج البيضة فاهية تعلك عل
-خاب دروح هي منو تقبل بيك خلفلة علية اتزوجتك وين تلكة مثلي
-وليش محد تقبل بية اشو محامي وجواي سيارة وبيت
تقربت علية سحبتة من تشيرتة: -حبيبي هذا البيت إلى ولجهالي مو الك
كال بغمزة: -هما وينهم جهالج
-بعدهم بالطريق
ضحك بصوت عالي صارن خدودي دم درت وجهي ونزلت دموعي طاوقني من ضهري وخلة راسة بركبتي: -شكر
-مسويني مضحكة بس تتنمر علية.
-افاا انا مسويج مضحكة!
-اي انت تضحك وتصنف علية زعلت عوفني يلا
-الزعلان نراضية
بعد شعري عن ركبتي وصار يبوس بية خنست حتى صوتي ماطلع ابتعد وكال: -اشتعلو الوكت طار من وراج تموت على البوس والسوالف المسربتة
فتحت عيوني على وسعهن درت وجهي لكيتة واصل للغرفة صاح: -اغسلي المواعين واعزلي المطبخ تاخرنا.
ضربت رجلي بالكاع بحركة جذب علية عزلت المواعين غسلتهن بسرعة وعزلت المطبخ جاي ارش بالمعطر واجة عطرة سابقة يعدل برباطة عكدت حواجبي: -وين رايح عيني شنو عندك عرس
-لا شغل
-لعد الشغل هيج رايحلة
-شني اول مرة تشوفيني مو كل يومية البس قاط
-ادرري كليومية.
رحت صرت كدامة شمرت المعطر ومديت ايدي لشعرة بقة مفهي علية عبالة اعدلة خربطت شعرة وعصرت وجهة بيدي خربطت الرباط وردت اشيل الفلونكة لزم ايدي عاكد حواجبة بغضب نتر من بين اسنونة: -شمالج تسودنتي
-متطلع بهذااا شكلك فاهم
رفع حاجبة ضربتة بصدرة واحس روحي نار راسا طاحت دموعي اجة يريد يلزمني صحت بية.
-عوفنييي انت متهتم لمشاعرري
-غير تفهمنا ام المشاعر شصاير.
سحبني من ضهري واني ابجي ورافس بيدة كوة سكتني مدري شجاني احس گلبي نار مشتعلة بية
-شبيج
-اغار اغااااااااار تفهم اغار عليك البنات من يشوفنك شيكولن منين جاي هذا قاط ورباط وعطرك يعططط كلها تشتمة وفوكاها تضحك وتطلع غمازاتك كلها كلها تضل تباوعلك ماريد يباوعلك
حك طرف حاجبة كوة ضام ضحكتة: -جا شسوي
-لا تكشخ المن كاشخ للقاضي اشو كلها مجرمين ومتهمين شعندك كاشخ هيج
-شلون اروح بتشيرت تريديني غير محامي.
-البس قميص قديم شبيها واذا يعني الا جديد وقاط وشعرك يلمع
-لا اله الا الله اطينة شلون
خليت ايدي على وجهي سحبني لحضنة باسني براسي ورفع وجهي بوسني بخدودي وعصر فكي
-عمت عيني اذا ا لغيرج خاب انا ماعول يخلص الشغل واجي اشوفج واشبع من فهاوتج تحجين صدك!
-گلبي يحترك من اشوفك هيج بس اغلس عنك هسة ماكدر اخاف عليك من عيون الناس خاف يحسدونك.
ضحك بصوت عالي وطلعن غمازاتة ابتسمت وخليت اصبعي بيهن باس ايدي ولزم وجهي: -فرحة گلبي وبنيتي الكاتلتني بخبالها لاتفكرين هيج انا الج كلني عقلاً وقلباً، جعل محد غيرج يغار
اخذ شفتي بين سنونة اندمجت وياة وامتص غضبي رحت بدلت لكيتة يكلب بالملفات منتظرني رفع راسة من دخلت ابتسم وكال...
-اذا انتي تغارين انا اموت من الغيرة بس اسكت ماريد اخرب واهسج
-اني ماخلي ميكب ولا البس ضيگ يعني ما الفت النظر نفسك.
اجة يمي كرص خدي وباسني: -فاتنتي كلج ملفتة للنظر
ابتسمت وخليت ايدي بيدة طلعنا وصلني بسيارتة وراح لشغلة بالرجعة اجة السايق اخذني.
ذبيت ملازمي وغراضي على صفحة اخذت ملابس ودخلت للحمام طلعت لافة المنشفة علية ميتة جوع رحت للمطبخ اسوي اكل إلى واله من يرجع يلكة اكل
شغلت اليوتيوب بحثت على اكلات عراقية سهلة عجبني تبسي دجاج كلت خل اصير ام بيت شناقصني قابل...
قطعت الخضروات ومشيت وي الفيديو خطوة خطوة واخيرا خليتة بالفرن كعدت فحطانة طلعت من اليوتيوب واتصلت بية مارد خليت راسي على الطاولة ومدري شلون غفيت.
تحلمت البيت يحترك كعدت مخروعة گلبي يريد يوكف ركضت طفيت الفرن فتحتة شفتة مستوي خليت ايدي على صدري اتنفس واحمد الله...
رفعت عيوني شفتة كدامي يباوعلي باستفهام ابتسمت بتعب دخل خلة جنطتة على الطاولة وكال
-شبيج شني هاي الريحة.
رديت بتلبك: -ما احتركنة والله لحكت علية قبل لانحترك
رفع حاجبة مامفتهم انسحبت من ايدي والمنشفة وكعت شهكت ورفعتها بسرعة ناسية روحي بعدني مامبدلة ضليت لازمتها من ناحية صدري.
-انزعي
-شنزع شبيك
-كلشي شايف شبيج راح تموتين
-دروح مني لاتطلعلي بسوالف مسربتة مو صرت ام بيت وجاي اطبخ
-وين اكو ام بيت لافة منشفة على جسمها وطالع وينة وينة
ضربتة على صدرة ضحك ولزم ايدي: -عوفني شبيك جوعانة
-تعاي نتعشة
-هنا نتعشة.
-لا بالغرفة العشة احلة
-جوعانة ميتة من الجوع يبوووو ولج سكرر الحگيلي راح يسحبني
-بس تشيلينها اشمرها خارج المنطقة
-عوفني واني ما اجيبها عليك
-بحضج وبختج
-ترة بس تسمع صوتي تجيب بناتها وتجي تطفر عليك تخرمش وجهك شلون داوم بعد حتى كشختك تخرب
-صوچي مدللج دولي خل اكل الفاهية اليوم طابخة خل انشوف وانقيم
-حضر بين ما ابدل
-هسة طبختي بهذا لبسج كملي بية
خزرتة بطرف عيني ورحت بدلت رجعت لكيتة واكف على الطباخ: -شدسوي.
-يلنادرة ام البيت من سويتي تبسي ماخطر ببالج التمن
-يا شوف شلون نسيت معبالي يسون علية تمن
-خيعوني
-ديلا بخبز ناكل لاتبقة تحجي علية ترة اصيح
-ترة اجيج
-لا كمل طبخك الشيف انمار المحترف فديتك
-ضلي تلوكي حتى اخليج تاكلين وياي
-احنة وياك واحد حبيبي اذا تشبع انت اني شبعت فديتك ابو بيتي المعدل النادر الله يخليك إلى ولجهالي
-على هاي فهاوتج حتى جهال ماريد يطلعون يشبهونج ويجلطوني بالفهاوة.
-حبيبي عوف البيدك وروح اسبح اني اكمل بدالك
-والله احس روحي بحلم لو انتي بيج شي تطبخين وتتغزلين ثنينهن مفعلتهن مااصدك
سحبت الخاشوكة من ايدة ورفعت رجلية بستة بخدة: -روح اسبح يبعد بيتي
قلص عيونة وبوز شفتة دفعتة كوة راح يهز براسة حتى مايشجع الواحد يتغير ويتعلم شغلات...
بين ماطلع جهز الاكل كعدنا ناكل خلصنة اخذت المواعين اغسلهن وهو ينضف بالطباخ كملنا كلشي ورحنا ننام هلكانين تعب ضمني بحضنة وكال.
-شلونج بالمد جاوبتي
-نص ونص
-شني هاي نص ونص يو اي يو لا
-يعني دبرتها درجة نجاح
-وباقي المواد شلونج بيهن
-مو زينة صعبات كلش
-بس تنجحين بيهن
-اي والله مدري شلون انجح هههه
-ثولة لاتحسدين روحج غير النهار كلة تقرين
-هم صح
مشة ايدة على بطني كزبر جسمي باوع بعيوني وكال
-الصيدلة سالفتها مطولة عمر تضل
-ها اي بس خمس سنوات
-خمس سنوات ابني بطولج، اذا حبلتي هسة بالعطلة تجيبين مو خوش وكت
-ها شنو شنو
-اريد طفل زعطوط صغير.
-اخاف خيولي شتسوي بية اني عندك
-ليش انتي طفلة؟ اريد طفل افتحي عقلج
-يتعب الطفل مايخلينا ننام بالليل
-معليج علية اني افتر بية
-ومنو يغسلة اني ماكدر اخاف صغير
-نجيب مربية
-لا ميصير يربة بيد الناس الغربة
-وشلون رايج يعني ماكو اطفال
-بس الفاينل عود افكر
-ترة هذا افضل وكت حسبتلج
-ما عندي امتحانات بعدين نفكر عوف السالفة انساها.
غمضت عيوني وكلبت وجهي للجهة الثانية حسيت كلبي يدك ببلعومي شلون سالفة هاي منين طلعتلي هسة اني روحي ما مدبرتها انوب طفل والله نموت سوة قشعر جسمي طلعت السالفة من راسي وغفيت
نسيت هالموضوع بكبرة وهو هم مارجع فتحة وياي بس ياريتني سامعة كلامة...
جنت كاعدة انطي اكل للقطط درت وجهي مكتف ادية وصافن اشرتلة بيدي: -هلووو يحلو وين بالك
-ها شكر
-بشنو دتفكر شاركنة
-افكر اسوي عزيمة
-فكرة حلوة بس منو التعزمة.
-شوفي هو المفروض نعزم اهلج من زمان بس من ورة شغلي المايخلص ودراستج الليل والنهار ماسويت
-يعرفون بية ماكاعدة لتخاف ميزعلون نعزمهم بغير وقت
-افكر اعزم خالي والولد شدكولين
-براحتك حبيبي كل الهلا يمتها العزيمة
-اخابرهم هسة على باجر
-تمام اتصل
-اجيب طباخ لو طباخة للاكل
-احس الطباخة احسن اشرف عليها وترتيبها احلة
-خوش جا اخابرها.
راح دخل جوة واني بقيت على كعدتي الصراحة ضجت هسة لو اعرف اطبخ مو شوية يحس بالفخر زوجتة محضرة العزيمة حتى اني احس بكوني ام بيت اووف كلة من ايدي شكد تلح علية امي اتعلم مايفيد الولد تعلمو واني لا...
رحت وراة غسلت ادية اكثر من مرة ورحت نشفتهن كدامة حتى يعرف غاسلتهن لان تلعب نفسة منهن بس ميگلي...
انمار: -باجر معزومين عد بيت خالي الحارث
-يا غير احنة عازمينهم.
-غير مرة نعزمهم اصر الحارث نجي هم يتعرفون عليج وعندي شغل وياة
-يمتها باجر مو؟
-اي جهزي نفسج
شعور غريب زارني يمكن لان اول مرة حروحلهم بقيت انسق وكل شوية رايحة لانمار: -منو الاحلة هذا لو هذا؟
-هذا ضيگ والثاني كلش فخم مايرهمن
-لعدد شلون هسة شلبس ماروح يلة بطلت
ضحك: -تضحك على ماساتي انهار
-روح انمار عليش اضحك حجزتلج فستان الصبح يوصل
-اووي فديتك
رحضت حضنتة وبستة: -الطف رجال بالدنيا.
-شمحصل هالرجال الفقير بس تسفيط حجي
كرصتة من خدة: -لعد شتريد اكثر من هذا
-عود مسوية انجاز
-كلني انجازات انهارو
-طشري باحرف اسمي وبدلي الحرف المايعجبج اصلا بدلي اسمي اخاف ماعاجبج ومستحية يومية مغيرة حرف بية
-ههههه لا وداعتك انت واسمك تخبلوون
-صايرة لسان ولا اعرفج
-مو اختلطت بالناس شوية انتبة لكلامهم واطلع على افكارهم مو نفس قبل بس جو البيت ومااحجي هواي
وكعني بحضنة واخذني يبوس...
كعدت من الصبح اتصلت باهلي وبسرى شوية سولفنة سويت الريوك وعفتة بين مايكعد رحت سبحت لكيتة كاعد صحبت علية وكعدت اتريك
شوية واندك الباب راح يفتحة اجة شايل بيدي طلبية عرفتها الفستان من شكل الغلاف انطانياها وكعد يكمل اكلة فرحت كلش كلشي منة يفرحني حتى الكلمة فتحتة وطلعت الفستان...
فتحت عيوني منبهرة من جمالة قماش ولون وتصميم يجنن رحت بوجهي لبستة واضحك لونة ضرب على بشرتي...
باوعتلة مرتجي على الحايط مكتف ادية ومبتسم يتأملني افتريت وحجيت بفرح: -انهار مو اشبة الاميرات صرت
-اميرتي انتي احلة منهن
ركضتلة حضنتة بقوة وبستة بخدة: -احبك كٌلش هواية
-على كيفج يبت بغداد بهداي بهداي ترة انا زلمة رجيج اطيح بحجاية
-واني بنية فطيرة وفاهية اتقشمر بنضرة هم على كيفك وياي يبن الناصرية.
ضحكنا ثنينة راح بدل وبين ماكملنة اخذنا صور عفت روحي وخليت راسي وياة كزكزت على سنوني وكتلة: -شكد حلو انت يفدوة
-حرام عليج ولد الناس مو لعبة ترة الله يرجعها باخوانج وانتي تعرفين الشرف غالي
-احبك هي گوة
-ترة انا ابن ناس واهلي شيوخ هسة اخليهم يدگونگم وياخذون منكم فصل مليارين
-مليارين علمود كلمة
-اي احنة فصلنة مليارين
-انطيك مليارين بس مو هيجي عاد بيها بوسة.
-ربي استرني هاي البت ماتدور ستر دخيلك ربي راح تاخذ شرفي واهلي يكتلوني ويغسلون عاري
طحت بالكاع اضحك بصوت عالي وجهي صار دم من الضحك طلعني يدك على ضهري ويضحك...
اخذنا الطريق تحشيش وضحك لو نتعارك لو نتغزل
وصلنا للبيت وانبهرت من جمالة معقولة هذا بغداد!
اي ليش لا بغداد كلشي بيها كل واحد يشوف بيئتة وبس...
دخلنا وجانت الانظار علينة استقبلونا بالترحيب الحار كلش خجلت...
لكيت سرى كاعدة يم بنية بقيت مفهية بيها من الجمال الشايلتة ابتسمت وكامت سلمت علية وكالت اسمها سيلينا ويدلعونها سيلي كعدت وياهن جانت كعدة حلوة سيلي لطيفة كلش عكس شكلها تبين مغرورة فعلاً الشكل مايحكم...
بين ماصار الغدا انمار اختفة جانت نظرات الحارث على باهر يمنعة من الخروج وهو كاعد على اعصابة.
بدا ياكل و الولد والباقين اكلو بقة بس باهر يحرك رجلة بتوتر واني انكطعت شهيتي لان انمار ماكو وشفت الوضع مايبشر بخير...
شوية وطفر باهر وارتعش گلبي من...