رواية المنجمة للكاتبة كفاية كاظم الفصل السادس والعشرون
شهب.
رجفت ادية وگلبي دك بقوووة احس اطرافي ترجف خليت الجهاز بيدة انتظر ردة فعلة حتى اعرف اضحك افرح لو ابجي من تشتد ملامحة كلب الجهاز بيدة رفع عيونة وبعدم فهم كال.
قبس: شنو؟
طكطكت اصابيعي بتوتر وبصوت يرجف كتلة
اني حامل
ابتسم نص ابتسامة يفر الجهاز بيدة اشر بيدة وكال: شبيج متاثرة بالصيام هاي اول يوم الج دتعالي نامي بحضني.
بلعت ريك وسحبت الجهاز من ايدة كعدت بصفة ثانية رجلي حضني عندة عادي عبالة اتشاقة وياة بيدي الجهاز وباصبعي اشر علية عيونة وي حركتي
شهب: شوف هذا خطين يعني اني حامل اذا خط واحد مو حامل بس هسة اني حامل والله حامل
باوع بوجهي مستغرب عد كعدتة وسحب الجهاز يياوع بية عاكد حواجبة شمرة على الميز ومسح وجهة يباوع بية.
قبس: شوفي اني ماعرف بهيج سوالف يعني صدك هذا جهاز يحجي مايجذب؟
مضبوط كلش نجمة تجذب وهو مايجذب.
صفن بوجهي بقيت مبهوتة حتى كلبي احسة وكف تقربت علية لزمتة من زندة هز راسة يكلي.
شلون حامل
مادري بس اخواتك كللي شلون اعرف نفسي حامل وصدفة صفنت وطلعت حامل والله ماعبالي صدك حامل بس طلعت حامل
عض شفتة يضحك ضربني على خدودي وعصرهن
دنك راسة يمرر ايدة على بطني.
والله ياسنجوبة ماعرف اصدك لو لا
حتى اني مامصدمة شوية بس بعدين نصدك من تلعب نفسي منك وتكبر بطني.
رفع راسة رافع حواجبة يكلي مستغرب وياشر على نفسة: تلعب نفسج مني؟
اي مو الحوامل هيج يصير وياهن
لا والله بيج شي حبيبتي
والله
بقوة مرد خدي كاز على اسنانة
قبس: بس اني غير ماتلعب روحج مني حتى لو حامل
لزمت ايدة ابعدها عني بفهاوة كتلة واني صافنة علية: اعرف والله انت كتلة من النظافة والجمال و
سكتت من شفت ملامح وجهة وضحكتة المرسومة لزم راسي يكلي: كملي بعد شنو
دنكت ارجع بكذلتي وبهمس كتلة
نسيت بس حلو.
رفعت عيوني مستغربة من ردة فعلة وعصبيتة ماعرف شصار وياة راح بعيد عني يصيح علية
بعد لا تحجييين سمعتي ابقي هزي براسج وصيري خرسة احسن
كمت من مكاني مهضومة والدمعة بطرف عيني برطمت شفايفي وكتلة: مو انت كلتلي كملي بعد ماحجي صدك
ضرب على كصتة يحجي وي نفسة
مو رررمضان ررمضان لا هاهية خوش نكمل صيامنة على هالرنة هو اني المفروض ما اجي للبيت ورة الفطور يلا ارجع.
بقيت بمكاني جامدة حتى ماعرف شكول كلش انقهرت شسويتلة اني ابقة ساكتة على طول يريدني! نزلت دموعي ودرت وجهي امسح بيهن احسة وراي مباشرة حضني من ورة ودارني علية مسح دموعي وايدي على عيني مخليتها وتك خازرتة بيها، باس راسي وكصتي وابتسم.
قبس: هسة حتى ماخليتيني اعيش الشعور
اريد استوعب انتي حامل واني راح اصير اب
ضحك بصوت عالي منزل راسة يحاجيني
راح العب بفقار طوبة بس يصبرني الا اخلية يباوع لابني من بعيد.
شنو انمونة هسة يتزوج ويجيب بعد جهال يصيرون عندة اكثر منك
سالفتة داجة الاستاذ يخلص الليل بالسطح
مسحت عيني وكتلة
شنو يسوي بالسطح
يباوع للنجوم
وشنو يستفاد اذا باوعلهن ينطنة مرادة؟
ابتعد مني يضحك رحت وراة من سكت كتلة
هسة شبيك تضحك ترة مكلت شي هو غير سئلتك
رحمة لاهلج بعد لاتسالين هيج اسئلة يعني مابيجن وحدة ذكية وتلكفها
ترة اخواتي كلهن اذكياء خاصتاً كواكب عدها افكار تخوووف
هي وينها شو ماكو؟
زعلانة علينة هي ونيزك تعاركن بس ترجع ماتبقى دوم زعلانة
اندار راح للميز سحب الجهاز يباوع بية اندارلي يكلي: اكو احد يعرف بالخبر؟
لا انت اول واحد هي جوري جابتة وانطتنياة بس ماتعرف
شعجب الخوينسة طلع منها شي
حبابة لاتحجي عليها
هسة شكلت غير هي خوينسة نسخة اخوها هما ولد جواد لو طكة لو اطلع مخة ورد مخبلة هي ورضا وذولة صامتين
ضيغم حباب ترة
هسة شجاب نعيل بالنص عوفية يولي
اوكي
مد ايدة وكعد على الجرباية صاحني يكلي.
تعالي احجي وياج
رحت بهدوء كعدت بحضنة طاوقني يلعب بخصلات شعري ويسولف.
خوما تنزلين جوة هواي
هئ عندي تليفون العب بية بس مرات من ماكو احد أصلاً اني استحي منهم وذني ما اطيقهن
اي عفية احسن ذولة صح عمامي بس ماعرف عنهم شي والدنيا كلشي بيها وتميم شاب ابتعدي منه لاتصادفينة
اوكي
عصر شفتي بيدة برود يكلي
قبس: حافظي على نفسج اكلي زين بعد لاتصومين لاتتحركين هواي علمود الطفل لايصير بية شي اتذكري اكو روح بطنج هسة.
تلمست لحيتة بيدي وطيف ابتسامة على وجهي بخفوت سالتة: فرحان
باس ايدي وهز راسة عيونة تلمع فرح
مامتوقع اتزوج ولا توقعت تحملين كلشي مامتوقعة الحمدلله رزق من الله هذا هواي يحلمون بالابوة
سحب المخدة خلاها جوة ايدة وغمض عيونة مبتسم بقيت يمة من نام يلا نزلت رحت لغرفة نيزك لكيتها كاعدة تكتب بدفتر استغربت كعدت يمها اباوعلها مندمجة تكتب ذبت حسرة وشمرت القلم بقوة سدت الدفتر وبعدتة بعيد عنها تعصر بعيونها.
شبيج نيزك؟
مابية شي
سحبت الدفتر اخذتة من ايدي تهز راسها لا
شنو كاعدة تكتبين؟ شعجب
فتحت عيونها حمرة وذبلانة بصوت تعبان كالت
ضرغام كلي حاولي تكتبين الكتابة تخفف الالم جربت كلامة زاااد الالم زاااد
باوعت للدفتر بفضول وبهمس كتلها
اتمنى اقراة
جنت اكتب لاختج الثولة راح يجي يوم وتقراهن الا ابجيها وهاي حركة كلبي توصلها
ترجع تشتاق وترجع.
كامت من مكانها اكو دولكة مي بيها شوية غسلت بيها وجهها اديها ترجف اعصابها تالفة سحبت كتاب مفاتيح الجنان وهي تكلب باوراقة كالتلي.
نيزك: بعدج تقرين زيارة عاشوراء؟
رفعت عيونها تباوعلي منتظرة اجابة هزيت راسي ب لا ابتسمت بقهر ودنكت عيونها تدور بالصفحات
نيزك: امي الله يرحمها شكد جانت توصينا بية نسيتن شنو؟ جنتن صغار لا زين عمرجن بوقتها.
تدرين امي من جانت شابة تقراة وحتى جانت تكول بركتة رافقتني وتلمست اثارها بحياتي
بدراستي توفقت تزوجت رجال ماكو منة، يموت عليها ابوي جان تكول استمريت بية لان اعرف شكد بية اجر بالدنيا والاخرة تدرين امي توظفت اول ماتخرجت؟
شهب: اعرف
جانت تكول هذا توفيق الحسين حفيد و حبيب گلب رسول الله () دائما تسولف وتكول اقرنة دوم تزيد حسناتجن وتنمحي الذنوب ببركة الامام
واذا تردن التوفيق استمري على قرائتة.
تقربت منها طكطكت اصابعي ترددت احجي بس من شفت نظراتها الحنونة حجيت.
شهب: انتي اكثر وحدة تحب هالسوالف مال الادعية واكثر وحدة ملتزمة بالدين من شفتج وشفتيني تصلين الفجر والصلاة بوقتها وغيرها بس ماشفت نتائجها بيج يعني ما ارتاحيتي رغم مامسوية معصية لو شي مو زين
احنا بشر مامعصوم اكيد نغلط بس نتوب ونستغفر افتهمت قصدج
شهب: اي ليش الزينين ماعايشين براحة.
نيزك: مرات نلاحظ ناس كلش زينين بس الحياة معاكستهم مامرتاحين والاشخاص المو زينين عايشين براحة يجي واحد ضعيف الارادة يكول ليش بس اني شوف فلان حتى مايعرف القبلة وشلون عايش فلوس وجهال وعز وجاة واني كلشي ماكو!
هو مايعرف ان رب العالمين يحبة واليحبهم يختبرهم بمرض بمشاكل بلاء يشوفهم يصبرون يبقون يحمدونة لو لا، كل الانبياء والائمة ما ارتاحو بالدنيا وحياتهم صعبة ماجانو اغنياء ليش لان رب العالمين يحبهم واختبرهم فازو بالاختبار بالتالي اكرمهم بجنات ونعيم عن الدنيا والبيها الله يعوض عن كل دمعة يعوضنا فرح وسعادة لاتخافين راح يعوضنا
يعني العايشين مرتاحين وماعدهم مشاكل ومرض وكلشي متوفرلهم الله مايحبهم؟
لا لا مو الكل قال تعالى: لئن شكرتم لازيدنكم
اكو شاكرين يزيدهم خير اما البعض الاخر الكافرين فيزيدهم حتى يزدادو طغياناً يمتعهم بالدنيا حتى يعاقبهم بالاخرة الامام على عليه السلام يكول: اذا رأيت نعم الله تتوالى وانت تعصية فاحذر.
هنا السالفة تصير تخوف
ابتسمت وهي ضحكت خدودها حمر تكلي
اعذريني صرت شيخ براسج
لا بالعكس حلو الصراحة ماجنت متوقعة هيج تعرفين
يعني مرات اقرا كتب عدنا قديمة مالت امي.
بس ها مو تنسين اقري قرآن برمضان ابدي من هسة وبالليل اقري زيارة عاشوراء
ان شاءلله
كلتها وطلعت ادري بروحي ما التزم بيهن القرآن اقرا شوية بس الزيارة انساها اتذكر جنا نلتم وهي جانت تقراها اكثر من مرة بصوت مسموع وكواكب تصيح بيها.
كواكب: هي طمع تقرينها تلث مرات
تبتسم وتكلها: اربع مرات اقرا زيارة عاشوراء مرة اقراها لابوي واهديها اله ومرة لامي جانت كلش تحبها
كواكب: ومرة لجد جدي وجدتة مو.
نيزك: لا مررة إلى ومرة الج لان ادري بيج ماتقرينها
كواكب: ترة بعدني عايشة مامتت تقرين نيابة عني الزيارة
نيزك: حتى لو اقراها مو بس اني تنمحي ذنوبي
من تشوفنة خازرينها تصيح بينة
نيزك: انتن اقرنها بس هاي العوبة تتكهرب اقرا بدالها بين ماتنعدل
ابتسمت بحزن متذكرة ذيج الايام الشي الحلو بيها جان جمعتنا والله كلشي هناك موت بطيء نسوانهم يخوفن مو بس زلمهن.
رجعت اغمغم بكصتي شلون نسيت اكل لنيزك فتحت الباب ودخلت التفتتلي سديت الباب ورخيت ضهري
نيزك ما كتلج اني حامل
توسعت عيونها وابتسمت فرح خلت ايدها على حلكها مامصدكة اجت باتجاهي ضحكت فتحت اديها حضنتني تكلي.
نيزك: صدك حامل شهوبة!؟
اي قبل شوية سويت تحليل وطلع خطين حتى قبس هم مثلج هيج كال بالبداية
حضنتني تضحك وتطبطب على ضهري ابتعدت مني مغطية وجهها انطتني ضهرها تبجي رحت صرت كدامها انزل اديها ابوس بيهن.
شهب: والله حبجي فدوه اسكتي
مسحت وجهها احمر باستني براسي ودموعها رجعت نزلت ماتحملت وبجيت وياها مسحت دموعي تكلي.
من الفرحة والله ماتدرين شنو شعوري هسة شهوبة الصغيرة الخايفة مجلبة بينة هسة حامل
راح احبة واهتم بية والله واصير ام زينة جهالي يحبوني مثل اموري.
نيزك: بستها كلبي يدك بجنون احلى خبر سمعتة لحد هذا اليوم وهي فرحانة كلش شهب كلش حنونة واحسها راح تصير احلى ام، وصيتها وصعدت لغرفتها بقيت واكفة كدام المراية مخلية ادية منا ومنا رفعت راسي اشوف وجهي احمرر ابتسم ورحت للحمام غسلتة طلعت صار ضرغام بوجهي نزلت عيونة على ملامحي رفع حاجبة لزمني من معصم ايدي سحبني علية.
شبيج نازك ليش تبجين
هزيت راسي
عليمن ابجي على حظي
شبية حظج
مصخم وملطم شبية.
نترت ايدي منه مشيت سحبني من خصري يضغط علية فتحت عيوني متوجعة: شبيييك وخرر
ضرغام: لاتعامليني بهذا الاسلوووب بهذا الاسلوب لا تعااامليني
باليعجبني اعاملك
عامليني بشي يستاهل
ادلل
مسحت على خدة رخت ملامحة يباوع لايدي ابتسمت ورفعت ايدة بسرعة انفتحت رفعت حاجبي وكتلة بهدوء: مو رمضان حبيبي روح نام روح نام
بلع ريك يرمش بعيونة
ياا ترة ماسويت شي بس خليت ايدي على خدك شكووو.
هزيت ايدي مشيت سحبني من ملابسي اشر على رگبتي بصعوبة حجة يكلي: اريد اشتم عطرج بس اشتمة وانام
يبطل صيامك حرام
لا ميصير هو الشم حرام
مو حرام منو كلج لاتضلين من وحدج تفتين
ماخلاني حتى احجي خلة راسة برگبتي ذاب ثكلة علية كوة لزمت روحي وباقية واكفة على طولي عبالك نام هزيتة من جتفة.
راح اوكع شبيك امشي نمتتت.
ولاكانة سمع حرت شسويلة هسة مال ادفرة بس خطية خرب غيرتج كواكب احنة وياج نفس الاسلوب من وحدة ابتعد دايخ شمر روحة على الفراش بصوت ناصي كوة ينسمع كال.
طفي الضوة واطلعي
رحت يمة وكفت: غرفتي ما اطلع اذا تريد انت اطلع
اممم تعالي نامي يمي اشم بيج واخدر
احس وجهي اشتعل نار ضربتة على ضهرة اهتز صدرة يضحك.
فاسد انت شوف الفاضك
شكلت مو صايم ومخلي بالي هالشي
تخدر مخدرات هي
شمة ركبتج مفعولها اقوى من المخدرات.
ابتعدت منه ارجف هذا واعي على روحة شجاي يحجي طفيت الضوة وفتحت الباب اريد اطلع كال
ماطول شردتي مني سويلي دولمة مشتهيها من ايدج واكعديني قبل الفطور بشوية
ماجاوبتة سديت الباب ورحت للمطبخ لكيت ياسمين وسهلة ونسوان عمهم كاعدات كل وحدة بيدها شغلة والكدورة تارسة الطباخ فتحت الثلاجة
نيزك: عمة ضرغام مشتهي دولمة يريد اسويلة
سهلة: سوي على كدة مسوين خير من الله.
اخذت سلة اخلي بيها خضروات اخذت الغراض الاحتاجهن وطلعت بالحديقة اسوي لان باردة ويفتح النفس منظرها، لكيت الجدورة الكبار والنار مشتغلة سندس واسيل وام حسن يطبخن كعدت اشتغل وهنا يباوعلي.
سندس: مو مسوين فطور المن تسوين
واني اكشر حجيت
ابو اسد مشتهي دولمة يكول من ايدج الحلوة سويلي
اسيل: اوي حبيبي اختار اسم ابني اسد يعني اني ام اسد.
احس سجينة ونبتت بنص صدري جان بالي اضوجها نسيت هي حامل منه واني الراح اضوج وانقهر واموت.
سندس: بعد شتردين حتى اختار اسم الولد
اسيل: فدوه اروحلة ادري بية طاير من الفرح ابنة الجبير مني فرحتي ماتنوصف
هزيت ايدي گلبي يفوور بس مابينت برود كتلها
نيزك: اسد اسم ابنا خانم يكول يلوكلج ام اسد بس عيونج تصكرر صكرر اني الاسد ذوبتني الغزالة
ام تميم: مو رمضان
اسيل: هي تعرف رمضان هسة تلكينها طاردها لان شامرة روحها علية.
ضحكت بصوت عالي نزلت السجينة من ايدي
نيزك: تمنيت والله تمنيت تشوفين شلون طردني هههههههههههاااااي لج يكلي خدرت من شميت ركبتج
سندس: شنو هالطياحة الحظظ ماضل مستحة
نيزك: ميخصج انتي جاي نحجي للتكول طردني ماتدري خفت على صيامة وشردت
خلت ايدها على بطنها تمسح بيها
اسيل: خل يتونس بيج مرجعة لام جهالة
نيزك: دروحي خل يعترف بيج غير بوستي الرجلين وشايلج وراكعج.
اسيل: انييي اعلمممج بسيييطة الا اعلمممج منوو الشالهااا وركعهااا
راحت معصبة احس كلبي برد اني هذا مو اسلوبي ولا طريقة كلامي بس ردت احرك كلبها سندس بقت تحجي علية واموت واعرف ليش هيج ذابحة روحها عليها.
اكول سندس انتي شعليج خابصة روحج عليها تعرفج تعرفينها يكول هي بنتج واني مادري!
سندس: من يوم الاجت لهذا البيت اعتبرتها مثل بتي بنية ماعدها احد اني مرة اخاف الله واهم شي اليتيم عدي بنات يتامة واعرف الشعور.
نيزك: الله ينطيج على كد حسن نيتج
كملت ثرم وكمت الف كعدت هي على صفحة تكلب بتليفون كاعدة على كرسي بعيدة مني مندمجة اسولف وي روحي وچني بدنيا ثانية فزيت على صريخها تنكت بثيابها وتركض للشارع تصيح
عكرررب يمةةة عكررررب
طفرت مخروعة وهي نزعت ثوبها بقت بالداخليات تملخ بروحها طلعت كلها التمتت عليها يسترن بيها توخرهن وتصيح.
ولجننن عكااارب هنا ذني طااحن نامن على بلعووومي
ذهب: منيلج هالسالفة وين اكو عكارب بيتنا.
سندس: اكلها عكاارب يمشن بجسمي ولكممم يبووو راح اتخبل وانتي تجذبيني
ذهب: انوب مو عكربة وحدة
حفصة: خاب شني تجذبينها ماتعرفين تحجين المرة منتهية وانتي تصيحين ماكوو مال الغسل وخرري منا وخرري
ذهب: خاب كوون غسل اليغسلج مال اهفج على وجههج بس اكلج كون غمة التغمجن ياغماااات
غمتهن ذهب بثنين اديها ودخلت جوة حفصة تصيح: ولجن شفتتنها شفتن شلون تغمغم بينة ولج ذهببب ليش نجي نتكاون.
ام حسن: يلا عمة اسكتي عنها مو وكتها دنيا العصر ورانا فطور نفطر على عركات
حفصة: بدت بيها ذهب جا خل تصبرلي
وسندس شمرت اديها وجهها انطعن احمر غسلن وجهها بمي بارد وركبتها حمررة.
حفصة: كرصنج يمفلووكة كولي ناخذجج
سندس: لا مانكرصت بس مشن ونغزني احس انغززت
اجت دعاء تركض شافت امها صارت تدك على وجهها وتصيح: ماتاخذونها للمستشفى تردونها تمووت امي تسممت راح يمشي السم بيهاا الحكولها.
حفصة: صيحي واحد من عمامج ياهو موجود خل يجي ياخذها
راحت تركض دخل تميم صاحن بية
اخذ عمتتتك اخذهاا راح تمووت
تميم: كلمن بيومة احاجي ملك الموت اخذ منة عطوة
دعاء: يممة انت حاقد لو تموووت مايهمك
اسيل: اروح اكعد ضرغام ياخذها
صرت كدامها فاتحة ادية مانعتها تمشي
ضرغام نومة ثكيل كال لاتكعدوني
اسيل: ماتشوفين المررة راح تموت
تميم: اني سيارتي مابيها بانزين من هسة اكلجن لا تباوعلي هيج
كالها ودخل كلهن يباوعلي وسهلة تكلي.
اكعدي ضرغام ياخذها بساعج لاتموت المرة
راحت اسيل تريد تكعدة رحت اركض صرت كدامها وصلت للباب فحطانة باوعتلي بتعجب كتلها
اني اكعدة اخاف يضربج بس تكعدينة
دخلت وسديت الباب خليت ضهري اتنفس بسرعة فحطت، رحت اكعد بية ولايحس.
ضرغام اكعد يصيحونكك
سحبني علية انكلبت على الجرباية نهصت اريد اكوم صار فوكي: ضرغام ضرغام يصيحونك سندس انكرصت تسممت
شعلية بيها.
خلة ادية منا ومنا مطاوقني وراسة بركبتي سكتت اتنفس سريع وهو ثكلت انفاسة اندك الباب بقوة ولاتحرك اجة صوت اسيل تصيح.
وينك صرغااام المرة راح تموووت اكعددد اخذهااا
ضرغام: اشتعلللل ابوو ضرررغام مووو منطمررررررررررررررررررررررر
خليت ايدي على اذني احس الطبلة انشكت من صوتة اختفى صوتها كرصتة من زندة اضرب بية بخفة: صوتك شعلوة اذني راااحت
نامي لج لاتكرصين
عمي عووفني اريد اكمل شغلي جدر الدولمة بعدني ماكملتة.
بطلت ماريد دولمة
وتعبييي بية عمي عووفني يبووو اختنكتتت
مارد علية صحت باذنة
ابو حاجب المطبوررر وخرر
ام عيوون الطاكة اركدي
مو اني مي خابط حتى اركد
خبطتي كلبي ومشاعري واحاسيسي خبط
ضحكت امنع صوت ضحكتي يسمعة اخذت شوية حتى نعست كوة قاومت ما انام حسيتة نام اريد انهض ماكدر همست.
ضرغام فدوه كووم
ليش ماتخليني مرتاح؟
هي مال راحة هسة
ترة اني كلشي ماشفت منج
هسة عوفني وكلشي بوكتة حلوو
وعد
وعد.
نهض ابتعدت اركض للباب كبل حتى ماالتفتت وراي جسمي تكسر يكول مو عظام حديد طلعت لكيت البيت صنطة ام حسن بالمطبخ كلتلي.
يمة انمونة ماكعدتي ضرغام ياخذها هي حالة مستعجلة
واني شعلية ماسمعتن صوتة اعتقد وصل للجيران
هاي اذني توجعني احسها انزرفت محتاجة طبيب ضروري
اسيل: شهلعيارة كلة من وراج ماخليتية
سهلة: هو ضرغام هيج عصبي واذا نام كون ماكو بكة تطخة.
نيزك: اي والله ياعمة ولا بكة ترفسة ولاتكرصة منو الاخذ سندس للمستشفى
ام حسن: ولدي اخذوها بسيارة صاحبهم المكبسل
سهلة: هو صدك مكبسل
ام حسن: لاخية منين اكو منه خوش ولد بس هي تكول مكبسل
رحت اكمل دولمتي شهب ولا نزلت مبين قبس مجلب بيها مثل ابن عمة دخل ضيغم هو وفقار سوى سلمو وراحو بعد مانزلو شوية ورجعو جايبين سندس
حسين: الحمدلله على سلامتج سندوسة
محسن: لو ما المكبسل جان متي بسمج مسمومة
خزرتهم دعاء تكلهم.
ماكارصتها العكرب لاتضلون تشمرون بالحجي
فتح عيونة حسين يدك على صدرة
حسين: سندوس تصدكين بهذا الحجي ولجن بذني سمعت الدكتور يكول شابعة سمم تتفق وياي محوسن
محسن: اتفق وياك ضلعي حتى اني سمعتة كال نخاف على نفسيتها لاتكولون
سندس: اي اي ولكم حسيت بيهن يدبن على علباتي ونغزني نغززني مامعقولة ماكرصني حسيتهم يجذبون علية الدكاترة.
حسين: اكيد يجذبون عليج يلا يلا سلامات الحمدلله احنا موجودين اخذناج وصديقنا جكليتة المكبسل تكولين علية شفتي شلون طلعلج طلعة وانتي تحجين علية
محسن: تحجي علينا ولو ما احنا جان ماتت كلها ماتقربت الها بس احنا ااخ شكد مواقفنا رجولية اشهد يالززززمن اشهدووو يا اهل هذااا البيتتتت
دعاء: ديلا كافي كاافي لاتضلون تعيرون
اخذت امها ودخلن جوة حفصة خزرتني ودخلت شبيها هاي الناس اجن البنات يساعدني بالصب.
وحسين ومحسن كاعدين يباوعون بموبايل واحد
حسين: مرت ابن عمنا تاج راسة شكيتي بطني بدولمتج بربج صبينا وياج
ريا: هي البنية مسويتة لزوجها ماتشوف جدرية صغيرة طابخة
محسن: هسة انتي منو محاجيج شكووو عيني شكووو كلبي شكوو نحاجي بام البيت
ريا: وهسة اني شكلت مو داحجي الصدك
شبيكم ماشايفين
حسين: انتي ابقي لازكة باختج وخرسات احسن سچن سچ من هسة روحن اقرن للسنة التجي تتفق وياي محوسن.
محسن: اكيد اتفق اكيد روحن اقرن ماناقصينجن كافي علينة الكوبرا
حسين: ولاتخلن راسجن براسنا
رفل: شبيكم اكلتوهااا وشربتوها شبيكم بس تردون تحجوون كافي لغووة زايدة
حسين: انتي رفيلة اسكتي معليج يلا
رفل: هسة اترس جدرية ماي وارشكم انتو وموبايلكم هذا العاووج
حسين: رفيلة لاتخليني اكوملج
حسن: يلا بلا كوووم شتسوي؟
ثنينهم طفرو من دخل حسن خازرهم بقوة كام حسين يضحك بخوف طفر باسة بخدة لزمة من خوانيكة يحجي بوجهها.
حسن: شتسويلها تكوملها؟ هاا كوول ماتكوول
كام محسن سحب حسن من ضهرة يريد يبعدة من اخو يكلة: شبيك يكوملها ينطيها كلاص عصير للفطور مو حسوني
حسين: وتمر ولبن للفطور
محسن: اي دعووفة
سحب روحة كوة يريد يضربة من كثر مو عصبي باوع لرفل خازرها بقوة وصاح باخوانة.
شعدكم كاعدين يم النسووان ماتطلعون برااا
حسين: عمي هي النسوان كعدت يمنا تتفقين وياي مرت ابن عمنا وتاج راسة
نيزك: اتفق وبشدة.
حسين: يروحلج فدوة ابن عمنا جنا جاموس اسود
خزرهم حسن طفرو برا باوع للبنات وكلهن بحدة
حسن: شبيجن بس تراددن وياهم ماتعرفن بيهم بس يدورون مشاكل
رفل: واحنا نسكتلهم ان شاءلله روح ضبوهم عدل انطوهم تربية شوية بدل ماتحجي وياي
حسن: احترمي نفسج ولا تتجاوزين اخواتي لاتحجين عليهم وحتى مايحاجونجن لاتلاسنن
كالها وطلع وراهم بقت هي واخواتها يحجن عليهن
ورد: بنات كافي شنو السالفة راح ياذن امشن نصب هم يلا.
راحن يصبن واني حضرت السفرة ننقل بالاكل ومايخلص صارت سفرة ضخمة طويلة متنوعة باشكال الاكل اول واحد نزل فقار شايل بنتة يبوس بيها ويسولف عليها كعد بصفة ضيغم يلاعب بود
ضيغم: ودود تحبيني لو تحبين عمو قبس اكثر؟
فقار: انت تروح وترجع على هذا السؤال هو حتى قبس ماكو يمك
ضيغم: ادربها من هسة حتى من اسالها كدامة تكلي انت واحرگ كلبة ها عمو كولي ضيغم احبة؟
فقار: تغص بس تلفظ اسمك دعوف البنية.
ضيغم: انت اسكت معليك تحبيني كولي؟
هزت راسها اي وهو يضحك فرحان رفع شعرة ومن باوعلي صعدت فوك هسة شيكول اباوعلة دخلت كعدت ضرغام راح يغسل واني اخذت ملابس ابدل اخذت عطر رشيت صاح بية.
هسة شكو بدلتي
كلني ريحة طبخ.
توضيت اذن الاذان صليت ونزلت خلصو صلاة وكعدو يفطرون كعدت بصفة وامير خلاة بحضنة شهب اجت بصفي ومنا قبس جاعصها علية يباوع بالوجوة خاف واحد يباوعلها يكول عبالك مرتة مدري منو وردة اجت بيدها ماعون حلويات تباوع ماكو مكان.
ورد: وين اكعد اني
قبس: تعالي يمي حتى اترس ماعونج
ضيغم: تعالي حبيبتي هنا
سوالها مكان لزكت روحها يمة خطية يجيب اكل ويخلي كدامها سحب ماعون الحلويات مالتها خلاة وراة.
ورد: جيبة اكل شوية منه احس گلبي طاك عليهن
ضيغم: كملي اكلج حبيبتي بعدين
ماعاندت احسها تسمع كلامة كلش اخذت امير من حضن ضرغام ماقبل ينزلة كلي.
عوفية اوكلة افتح حلككك هم هممم
ذهب: زيبگ ماتخلين لرجلج من هذا الاكل
ها
ضرغام: ماريد يابة اني ميت على اكلها مااشتهي غيرة
حسين: اي والله مو مرة طركاعة
كطع كلامة من شاف شلون ضرغام مطگك عيونة خاف الولد يبرر: طركاعة بالطبخ اول مرة اكل دولمة هيج طيبة اقصد تخبل.
رفع الماعون بيدة وخلة دولمة بحلكة اخوة يصبلة لبن يشرب بية.
محسن: هاك حبيبي لاتغص
ضرغام: وغصتهم ان شاءلله
ام حسن: حسين مايقصد شي شبيك تريد تاكلة
حسين: اختنا ام امير وتاج راسك اكيد
خليت ايدي على كلبي من ضرغام خفت لايكوملة وهذا فطير يحجي بدون مايفكر اسيل تخزر بينة بحقد ودعاء توكل بود.
دعاء: اجت الطيارة اجت يلا حبيبي افتحي حلكج
ود تاكل من ايدها وهي من تاكل تصفكلها بطفولية دكلها: هييي فزتييي.
هو كمل الفطور وكلها نهضت الولد طلعو بالحديقة كراسي وطاولات هذا الايركل وهذا اليدخن يسولفون بينهم كل ثنين سوى صافين.
نغسل بالمواعين ونعزل شهب ماتقربت من عدنا صاحت بيها دعاء: ماتجين تشتغلين ويانة شنو على راسج ريشة
سكتت تباوعلي
نيزك: اني جاي اشتغل كل هلبنات مايكفن!
دعاء: لا كلنا ناكل ونشتغل ماكو وحدة تتعزل روحي شيلي الجداري انقليهن للحديقة
شهب: قبس ميقبل
دعاء: خوش تعرفين تتحججين روحي حبيبتي انقلي.
غسلت ايدي ردت احجي ودخل قبس باوع لشهب قبس: اني مو كتلج لاتنزلين امشي اصعدي وبعد لاتنزلين
دعاء: ماتشوفنا جاي نشتغل شنو وحد عنا خل تساعدنا لو بس تعرفون تاكلون
باوعلها من فوك ليجوة وبرود جاوبها
واني شكو بيجن؟ عددجن هواي مكفيات وموفيات الشغل تنفضا هالفاهية تشيل شي يوكع شي ومنا لحظة لحظة شردتي تسوي؟
دعاء: بس تنقل الكدورة
رفع اصبعة يحجي بصوت مسموع
قبس: ممنوع منعاً باتاً تخلنها تشيل اي شي ثكيل يماااااااااااا.
دخل جوة كاعدات بالصالة بقة واكف بالباب وكال
قبس: يما مرتي لاتخلينها تشتغل وتشيل شي سمعتي سمعتن
ياسمين: ها قيس شنو سالفتك اليوم
قبس: ذهب البنية حامل بعد هاي يمج ادري بامي ماتدبرها
بصوت عالي صاحت
ذهب: يعععع صدك حامللل مرتككك؟
قبس: اي حامل
هلهلت بصوت عالي رجت البيت رج وهو لا ارادي ابتسم كامت امة تبوس بية وتبارك لشهب انكلب البيت صار معايداات ومباركات ورد تطگ باصبعها واكفة يمة تكلة.
لك هلا راح تصير ابو ولو ماحبك بس راح احب ابن شهووبة وووبا
كفخها على راسها
قبس: دولي تحبين ابني مودي عليج
ورد: هاي ليش تضربني مو جاي اطگلك اصبع وفرحانتلك؟
سحبها يبوسها براسها ويمسح على ضهرها
يلا امشي حبيبتي اعتذر
ورد: يلا وصل وصل
سحبت نفسها ورجعت تطك اصبع ذهب حاضنة شهب ضحكتها تارسة وجهها.
ذهب: اترسج ذهب ترس بس تجيبين هيج وفرحو كلبي بخلفتكم بعد ذولاك الناس الله يفرح كلبي بيهم.
دنكت راسي وابتعدت من دخلو الولد.
ضيغم: اكو احد تزوج؟ خطب؟ انخطب؟ اسمع هلاهل
فقار: واجينا نعرف سبب الهلاهل
ذهب: ولكم حبوبا باركو لقيس بعد روحي راح يصير، ابو
واحد باوع بوجهة الثاني مصدومين وقبس رافع حاجبة مبتسم.
فقار: صدك لو جذب
قبس: فقار احجي عدل احسلك
فقار: ها ها والله مو قصدي بس اسال يعني صدك
قبس: اي صدك
ضحك فقار بفرح وحضنة يدك على ضهرة يباركلة وخرة ضيغم يباركلة.
ضيغم: جهاز الطفل علية من هسة وتخليني اطلعة وابوسة والعب وياة
قبس: اني مو نفس ذولاك الناس ممنوع المس ادلل حبيبي
ذهب: هو انت ما ارتاح الا ازوجك ولك ضيغم لكيتلك مرة انطيني كلمة حتى اخطبها الك.
ضيغم: الله كريم
عافهم وطلع وذهب تصيح وراة
الا اخطبها واخليك تاخذها غصباً ماعليك
تقرب منها فقار بهدوء يكللها
عوفية مو هسة
ذهب: انت تريدة نفسك راح تصير شايب وعايش وحدك بتك من واحد لواحد
فقار: انوب رجعت علية طالع اني.
طلع قبس واسمع صوت طلق طفرت وردة والبنات يشوفن منو الرمة ماطلعت شوية ورجعت فحطانة تسولفلي.
لج تدرين منو هذا الرمى؟
نيزك: لا وين ادري ماتشوفين ماطلعت
لج هذا تميم بجيبة مسدس بس سمع طلعة ورمى بالجو بس تخيلي مسدس بجيبة شيسوي!؟
نيزك: والله ماعرف
اطلبة الف وربع الخايس غلس عليهن
نيزك: شنو مداينتة!
ورد: اي ولج خطية مفلس شافني اكل حلويات طلبني انطيتة فلوس كتلة انت اشتري خطية بلة عجبة شي هاي واني لو عندي انطية ازيد
خزرتها بطرف عيني
نيزك: انتي ونجمة شاربات شي؟
ورد: احلى بنية بالعالم اختتج
صعدت لغرفتي اموري يلعب ويكمز برا مسوين جمعة حلويات صواني جايبين بدلت لامير وراح لشهب الولد طلعو وهي وحدها بقو يتابعون مسلسلات رمضان.
سبحت ولبست تراك مريح رطبت وجهي وادية لبست جادر الصلاة وبقيت اقرا قرآن صدقت واخذت الموبايل اتصل بشهب ماترد اريد تجيب اموري لبست فوك ملابسي ورحت لغرفتها لاكتني اسيل طالعة تفتر مخلية مكياج صااارخ وروب فوك ملابسها من شافتني فتحتة بالغلط طلعن رجليها من فوك بقيت مصدومة من حركاتها التخزي وتفشل خلت ايدها على بطنها.
اسيل: ماشفتي ضرغام؟ كال انتظريني شو تاخر.
هزيت ايدي عفتها ودخلت لغرفة شهب ارجف من فوك ليجوة لزمت صدري افرك بية احس كام يوجعني من انتبهتلي شهب طفرت تركض.
شبيج نيزك شكو يمة وجهج مطعون طعن
ماكدرت حتى احجي سحبت امير وطلعت اجت وراي اول مادخلت الغرفة نزعت البشت وكعدت على الجرباية اباوع لادية ترجف.
انطيج علاجج ها نيزك؟
هزيت راسي موقف صغير وجعني هاي لا شفتة يمها ولامتقربلها شحال لو شفتهم سوى يمكن موتي على اديهم.
اخذت علاجي وطمنت شهب كتلها تاخذ امير لسهلة من شافتني زينة راحت لغرفتها شوية ورجعت فاتحة كام وي نجمة جانت تحجي وياها شوية حاجتني وكالت خالي يريد يسلم عليج شهب طلعت صاحولها بقيت وحدي.
هلو خالو شلونج شخبارج
ابتسم بس ماكدرت احجي شي ملامحي تحجي
انت شلونك خالي
اذا انتن بخير اني زين
ذبيت حسرة بتعب كلي
شنو الاوضاع يمج خالي؟
مو زينة.
خالي والله مابيدي شي اتحملن وعيشن وي ازواججن وعيالجن تعذرني خالي اني بعد ماكدر استقبلجن غير خطار اخاف عليجن والله لو ميتة بيدهم شلون اباوع بوجهة اخواتج خالي اتحملن عيالجن لاتزعلن ولاتجني حتى خطار اني اجيجن
بين فترة وفترة
حسيت صدري نار ماكدرت احجي شي بس خلص قفلت التليفون اجت شهب اخذتها بس راحت دخلت بوجهي للحمام انفجرت بجي بعد مالنة مكان بهذا الكون معقولة هاهية بس بيت ضرغام يلمني؟
ماكو سند بس هو؟! اني ما اتحمل ويريدوني اتحمل يردون يموتوني.
فحطت تعبت كملت سبح الباب مقفول اسمعة يندك بخفة واليدة تتحرك تقربت من الباب بصوت تعبان همست: منو؟
ضرغام: افتحي الباب شبيج
غمضت عيوني ودرت حول نفسي بحيرة والتفكير اكلني تقربت اهمس بصوت مسموع: انتظرني ربع ساعة عادي؟
ضرغام: افتحي الباب
محضرتلك مفاجاة انتظر شوية.
ابتعدت عن الباب وهو مادك بعد بحيرة رحت فتحت باب الكنتور اشكال ملابس وفساتين مال العرس مالبستهن وكعت عيني على الاحمر الخبص روحة علية سحبتة بدلت وخليت مكياج خفيف فتحت شعري ورشيت عطر ماكو دقايق ورجع دك الباب صرت ورة الباب كال.
الو ماكملتي.
طفيت الضوة وشغلت انارة خافتة صرت ورة الباب وفتحتة دخل يدور بعيونة علية شافني فتح عيونة على وسعهن سحبني لحضنة مدنك يباوعلي عيوني تعلكن بوجهة شهك وغمض عيونة من بعيد يشتم عطري بخفة ضربت خدة باس ايدي يحجي بهمس
نيزك هاي إلى ماصدك
رفعت رجلية شوية وهمس بذنة
هالليلة بس هالليلة كلني الك
رفع حاجبة راد يحجي ماخليتة بستة...
مخليني على ايدة وكل شوية بايسني
كون كل يوم مثل هاي الليلة ولو راح يصير السحور مافهمت شي.
رفعت نفسي بستة بخدة وعدلت حاجبة المطبور بستة همست: احب حاجبك المطبور
واني
مايهم اي لو لا
لا يهم صدكي يهم
دكيت خشمي بخشمة وهمست
مايهم لان بعد هالليلة انت تحدد هالشي تحدد اني اهمك لو لا؟ تحبني لو مجرد وهم.
راد ينهض ماخليتة كملت بنفس نبرة الصوت
نيزك: اني مريضة ما اتحمل حركان كلب هاليلة ياما راح تنعاد مثل كل ليلة ياما...
رسمت دوائر على صدرة وكملت
ماتنعاد للابد
لزم وجهي بثنين ادية.
ضرغام: ليش تحرميني منج والله نفسي بيج مالي نفس بغيرج هاويج اني هاويج
اذا هاويني تنزل تاخذ شهود وكدام الكل تطلك اسيل وتطردها من البيت تروح تشوفلها بيت تكعد بية من تجيب اذا تريد اخذ ابنك ها شدكول؟
نجمة...
بين الدوام والبيت مخلصتها احس الشغل ماخذ كل وقتي ومنسيني الدنيا جنت عبالي السكرتيرة بس تشخبط بس طلع صعب الشغل، كاعدة اشتغل وماملحكة استاهل غير صايرة مهملة وتكوم علية الشغل باوعت لمكتب استاذ فقار ماموجود طالع عندة اجتماع برا الشركة مدعو واستغربت من ما اخذني وياة بقيت اكمل العندي.
جان بيدي ملف صعب علية شغلة اتصلت بية يساعدني بية رد علية.
ها بابا.
استاذ والله دخت بالملف الازرگ احس بية نقص ماعرف اشتغلة
اي صح بية نقص تلكين اوراقة بمكتبي دوريهن بالجرارات
تمام شكراً استاذ
ادللي بابا
سدبت الاتصال وكمت متكسرة من الكعدة والله لو ما العيب اتمدد واشتغل بدال هذا المكتب جان جابولي قنفة عاد اعلك رجلية واشتغل براحة.
فتحت الخانات ادور على الاوراق الوصفهن إلى مكتبة شكد مرتب ونظيف خو عطرة يكول مرشرشة بالعطر هسة غير التهي بالشغل واعوف هاي السوالف طلعت ملفات كلبتهن مو هنا فتحت اخر ملف بية صندوك طلعتة وكعدت بالكاع فتحتة وانصدمت من الشفتة بية.
حلقة كلها دم قديم يايس عليها مبينة مالت بنية من تصميمها ماكدرت الزمها وياها حذاء تك صغيرة مزرفة محروكة يمكن بيها رماد ودم واضح لان جانت باللون الابيض وبعد اقلام حمرة متكسرة وقديمة محبس رجالي جان بعيد عنهم منقوش بية كتابة بس ماتبين من بعيد من فضولي لزمت قلم وسحبتة صار قريب مني بس ماكدرت الزمة دنكت عيوني اقرا المكتوب بخط كوة يبين
سندي فقار.
ماعرف شنو من شعور صابني من شفتهن بس خفت وحسيت وراهن قصة شنو ذني معقولة هيج يخليهن بمكتبة.
رجعتة لمكانة وسديت الخانة والكلمة انحفرت براسي سندي فقار هاي هدية لو شنو!؟ ومن منو ياترى؟
اخ يلفضول ااخ الا انطرد يلا ارتاح نفضت راسي من الافكار ودورت الاوراق لكيتهن الرجال عازلهن على صفحة بس اني ثولة اخذتهن وكعدت اكملهن
شوية واندك الباب دخل اجة يمي.
ها نجوم شلونج.
استاذ مو زينة كلساع اطلع الككو اريد اكل وانسة اني صايمة
ضحك يمسح بلحيتة
فقار: جيبي علبة الككو يمي اخليها
آة
مدلي ادية طلعتها مترددة انطيها اله احبها والله احسها مثل ابني اخذها من ايدي.
استاذ خليها يمك مو تنطي منها لبنتك وتخلصها
ها اوكي انطيها بس شوية مو كلهن هنا الحلويات مو زينة للاطفال
فقار: المفروض تعوفينها على هذا كلامج
ضربت خدي
يااااا اني طفلة شنووو؟
مشة ماجاوبني كمت من مكاني لحكتة.
استاذ ثاني مرة انتبة لكلامك بس هالمرة سماح الك
كعد بمكانة طلع ملفات رفع عيونة واني خازرتة
فقار: مايلوكلج التخوزر اكعدي
جرحت مشاعري
شكلت آه
آه
ها نجوم عيني سالمين
جاي اعيب عليك
وتكول مو طفلة تشمر تشمر بكلامها
مثلك انت هم تشمر واني اسكتلك وبالعة
رفع عيونة باستغراب كتفت ادية وحجيت
وتكلي بابا هم ماتكول للبنات بابا ترة انتبهت بس اني تكلي بابا واحنا نفس العمر تقريباً
وانتي على هاي ضايجة؟
هنا هواي بس نسيتهن.
يزعجج من اكلج بابا؟
لا بس يعني ليش دكلي والله اني جبيرة وانت شفت عمري
ضحك بهدوء
فقار: اعرف نجوم والله هي مو بالعمر بس اني استلطفج احسج مثل ود
رخة جسمي وانرسمت ابتسامة على وجهي
يعني استاذ تعتبرني مثل بنتك؟
احسج انتي ود تشابهن صراحة اخاف عليج مثل ما اخاف عليها
اااالله شكد حلو استاذ اني هم راح اعتبرك مثل ابوي
رجع جسمة ليكدام
فقار: لانجوم لا مو هيج
استاذ مو ابوي ميت ماعندي ابو.
كلتها وبرطمت عيوني دمعت كام من مكانة ايدة ليكدام خلاها: لاتذكرينة نجوم خلص براحتج شتعتبريني اعتبريني
شكراً لعد
ذب نفس مرتاح اشرلي علكرسي
اكعدي نشتغل
كعدت وهو يكلب بالاوراق طلع ثنين خلاهن كدامي وفوكاهن خلة القلم باوعت بيهن كلي
تاكدي من صحتهن
تمام
كعد يشتغل بملف واني اشتغل واحجي
استاذ اليوم ليش ما اخذتني وياكم
مايستوجب
ها يعني ما افيدكم
تقريباً اي
جيد جيد.
اندمجت بالملف رفعت عيوني يباوعلي نزل عيونة على الملف زحفتهن كدامة وذبيت نفس
ككملتهن استاذ
اخذهن يباوع بيهن
فقار: اكو نجوم عادي اسئل سؤال
اسئل استاذ انمونة هو سؤال
اكو ليش مامتزوجة؟
فتحت عيوني مستغربة حك راسة مبتسم باحراج همس: اعرف تافهة او يمكن مو وقتة بس حبيت اسأل
والله استاذ استغربت من السؤال بس يلة ميخالف صدك هو اني ليش مامتزوجة؟
هو جاي اسئلج
والله ماعرف ليش
يمكن لان بعدج صغيرة.
لا استاذ بس يمكن لان محد جاي خاطبني
بهتت ملامحي صافن بوجهي
استاذ اني اكلك ليش محد يخطبني اولاً لان اني ما انطي وجهة واركض ركض هو غير الحب يصير من نظرات اني كلشي ما اشوف بس المكان الاروحلة والشخص المقصود
ها
اي والله وبعد هم عمي محد يحبة بالمنطقة ويمكن اليجي يسال علينة الناس تشردة لان عمي ماينجرع يكلك هذا يسويلي مشاكل
صح
اي بس اني لو اريد اتزوج بس اباوع للناس واسوي حركات ونظرات اتزوج.
عوفي هاي السوالف بعدج صغيرة روحي كملي شغلج يازواج يا اعجاب امشي ولا تباوعين لواحد
نجمة: كتلك من اريد اتزوج مو هسة
كملت شغلي وبالطلعة ميس اتصلت بية كالت منتظرتج بالكافية رحتلها مشي لان قريبة عن الشركة الشمس سمطتني سمط دخلت باردة واني حرانة لكيتها كاعدة تصفح بالتليفون كدامها كلاص عصير رحتلها كعدت.
شيلي عصيرج يالماتستحين الناس صايمة وانتي اكلي واشربي
ميس: مسيح مسيح
حتى لو مسيح هم صومو حرام عليكم.
كافي نجوم حتى العصير راح اشيلة
اشرت للنادل اجة رفعة هو وكلاص المي بقت الطاولة فارغة.
نجمة: ميس دصومي ويانة
ميس: ان شاءلله اصوم بس خلصيني
الشمس سمطتني سمط ماتخافين ربج بية جبتيني مناك لهناك
اعتذر، بس خل احجي الغي اهذي امسلت نجووم
سكتت نجوم سكتت
ذبت نفس وشبكت اصابعة باوعت بعيوني ومالت راسها.
نجمة راح اتزوج
هلا هلا زفيناة بصاية حيدرر طبت يالزهرة اتلكيها
طبت يالزهررة راح اتعلم الركص لخاطرج ابدع بعرسج ابدع.
رجعت شعرها ليورة ورجعت ضهرها على الكرسي
ميس: لعد حضري روحج عن قريب كلش
سكتت سويت نفسها رجعت ضهري ليورة
نجمة: اي هسة شنو صدك جذب لو تشاقين وياي شنو سالفتج بالضبط؟!
ميس: والعباس نجوم راح اتزوج بهاي الايام
رفعت حاجبي مامصدكة اباوع بشكلها ماتجذب المصيبة.
نجمة: صدك ميس راح تزوجين وبدلة وكذا وهلاهل؟
اي صدك
يمممة يااا يااا ما اصدك ولج منو هذا وشنو ماشنوو؟
ميس: التقينا بتركيا وهيج طلبوني من اهلي ابوي وافق وبقت علية وافقت
هيج هيج هيج
اي والله نجوم هيج
بس لاتعيشين بتركيا
لا بس العرس هناك فترة ونرجع
والركص شلون اركص من الموبايل؟
روحي وياي يخلص العرس وترجعين
منو الياخذني منو اليجيبني منو اليخليني
كلشي بوقتة سهلة تدبر
بقينة شوية نسولف مصدومة مامصدمة ميس راح تتزوج بهلسرعة بالي اسالها بعدها تحب قبس بس اخاف تفهمني غلط. التفتت وي ميس على ولد واكف يم طاولتنة.
مرحبا بنات
ميس: هلو زيد شلونك
سحب كرسي كعد وكال
زيد: الحمدلله انتي شلونج
ميس: بخير
زيد: شلونج نجمة
ماجاوبتة باوعت بوجهة ميس كالت
زيد يشتغل بشركة ×××× عمة صاحب الشركة
زيد: معقولة ماتعرفيني!؟
لا اول مرة اشوفك أصلاً
هاي شنو مو حظرنا اجتماع سوى معقولة ماشفتيني
لا والله مامنتبها عليك
زيد: المهم هسة شفتيني اني زيد
نجمة: جيد
زيد: وانتي نجمة
انحرجت وتحججت بالصيام تعبانة عفتهم يحجون وطفرت لخالي.
اجواء رمضان يمنة كئيبة احسها مالي نفس بشي واني كاعدة اتذكر ايامنا وجمعتنا شلون جنا كلنا نجتمع نتسحر لو نفطر اني اطبخ ونيزك تجي تساعدني لو من نكعد نتسحر نمشي على روس اصابعنا حتى لايكعد امير.
دموعي تصب عشرة عشرة البنات ارتاحيت منهم بس كواكب اشتاقيتلها يا ناااس طك كلبي عليها
انتظرت الصبح يطلع ساعة ساعة وقبل لايكعد خالي طلعت مرتة دكلي.
وين خالة من الصبح
للدوام خالة
بعد وقت!
لا مو رمضان قدمو الوقت يلا اني طالعةة
الله وياج حبيبتي
طلعت بوجهي لبيت دراهم احس گلبي يفرفح على شوفتها وصلت رحت للاسواق اشتريت حلويات وريوك ادري بيها ماتصوم اخذت صمون حار وكلبي يريد يطلع من مكانة.
المنطقة فارغة تخوف كلها درابين وصلت بيتها دكيت الباب باخر فترة انكسر مردود رد دخلت
البيبان الجوة قوية تقفلهن ولو هو محد يتقرب الهن.
شفت دراجتها ودموعي نزلت مسحتهن وصحت.
لج كواكب اني اجيت نجمة اختج ام العلووم اجت هههههههه جبتلج علوم تخببل اطلعي
بقيت واكفة انتظر تطلع تفرك بعيونها الحلوة وتطلعلي بس ماطلعت وخابت امالي طلعت دراهم تقربت عليها.
صباح الخير خالة كواكب نايمة
دراهم: كواكب وين هي؟
انفاسي انخفظت وعيوني توسعت بخوف واني اسمع سؤالها وتعابير وجهة.
نجمة: وين كواكب غير يمج اجيت اشوفها
انكطع نفسي وكلبي حسيتة مايدك من كالتلي.
دراهم: كواكب صار زمن ماشايفتها سالت عنها الاعرفهم كالو راحت يم اخواتها عاشت وهسة اني زعلانة عليها وشايلة عتب ليش كطعت بية!
وكعت العلاكة من ايدي واحس اعصابي بادت
نجمة: خالة شداتحجين كواكب يمج وين تروح صار فترة ماشايفينها ومن نسال عليها بالشغل.
دراهم: ولجن كواكب لاسبني(يوجعني) گلبي عليها ادري بعيونهم تجذب وصدكتهم كواكب ماكو يحبوبا لاشايفة طولها ولا هي هاي دراجتها هنا مشمورة كل يوم اتنوعلها اكول هسة ترجعلها
غوشت عيوني حسيت الدنيا وكفت بعيني والله وكفت وصارت ظلمة دراهم تحلف ماشايفتها وين راحت كل هالفترة المن اكول والمن احجي بس تسمع نيزك تنجلط بمكانها والله بس تسمع تموت وشهب هستوها حامل.
مسحت عيوني رفعت العلاكة اطلع الحلويات واراويها: عود جبتهن الها ها يماا اختي وين واحنا ماندري عنها وين راحت
لطمت وجهي بحركة اصرخ
وين اختيي دراهم؟ كواكب ماترووح وتعوفج ولا تعوفناا مكيفين نكول يمج ماتريدنا تكوول وينها اختي ميتة عايشة دراهم خاف خاف
الساني انعكد ماكدرت اكمل لزمت ايدي بقوة تردد
لاتحجين ماميتة عايشة بس واكعة
رجلية ماتن ماكدرت اوكف عليهن ضربتني على وجهي انتهيت.
دراهم: وياي اسمعيني عدل ماتكولين لاحد كواكب ماكو ولا تكولين اختفت اخواتج لاتكليلهن ينصقعن خطية
شلون نخبر الشرطة تدورها؟
لا لا انتي لاتسوين شي واحد هو واحد يكدر يساعدها واحد هو واحد بس يهتم بقضيتها هي قدمتلة خدمة وهو يهم ويسعى حتى يرجعها بس هذا الواحد تخبرينة باختفائها.
كواكب...
طريق مجهول، خوف، عصابات، تهديد خطر يحاوطني من كل جانب بس ماعندي غير التنفيذ مجبورة انفذ مجبورة اشتغل وياهم كلشي مو بيدي وكلام بلقيس يدك براسي.
خليت بجيبي جيس مامعروف شبية بس جنت متاكدة بية ممنوعات عقلي يكول لاتنفذين ومن اكلة انطيني طريقة اطلع منهم يعجز وامشي ورة كلبي الرجيج اي احس بروحي مو ذيج كواكب التتعارك وي الهوى راحت ذيج كواكب.
اجيت ادخل للمكان المطلوب الحارس ماخلاني ومثل ماكال الاعرج سويت طلعت بطاقة دخولية باوعلها يلا خلاني افوت دخلت بممرات هواي ناس هواي بنات وين الكة هاي المرة اباوعلهن وحدة وحدة واتذكر كلامة وهو يوصفها.
الاعرج: شعرها طويل اسود مثل الليل بيضة طويلة جسمها مفصل كل اليشوفها ينسحر بجمالها احلى وحدة بيهن
كواكب: وليش مو هي تجي تاخذهن منك؟
حتى ماتنلزم لو احد يشك بيها لان العيون عليها.
ماتكدر انت لو واحد منكم يوصللها؟
كلنة معروفين هناك نحتاج وجهة جديد وانتي هالوجهة الجديد ماعليج علامات وحتى لو سالو عليج محد يكدر يجيب عنج معلومة وحدة لان مايعرفون انتي مو منهم
رجعت للواقع على صوت عركة وصياح البنات عالي طلعت وحدة لاضخمة لازمة بنية من شعرها بالكاع منزلة راسها وهي تصرخ ركعت راسها بالكاع وداست علية بقوة لابسة كعب والدم صار نافورة ولا وحدة بينهم ادخلت وطلعتها كلهن بس يباوعن الها.
صاحت بصوت عالي والبنية تتوسل وتصرخ جواها
ماعيدها بس هالمرررة عيفينيييي خاتوون
الخاتون: عاقاات تعضن ايد التوكلجن
مو سويتجن بشررر
انصقعت بمكاني مذهولة من كمية العنف والكلام الرذيء شكد عشت واشتغلت بالشارع ولد الشوارع مايحجون ربع كلامهن ولايوصلن لمستواهن.
اجت بنية عمرها تلاثينات بيدها صوندة سلمتها للخاتون اطك بعلجها تكلها: طلعيلها جلد ثاني وخل تسردلج الاكو والماكو
مشت والبنية زحفت تبوس برجليها تتوسلها.
ميار ميار ساعديني فدوه
دفعتها برجلها تكلها
مايفيد لاتتوسلين
مشت صفنت عليها شنو من جمال شايلتة شنو من شخصية بحياتي ماشايفة هيج وحدة حلوة وكل مواصفات الجمال موجودة بيها للحظة استوعبت هي نفسها المفروض اسلمها العلاكة او الاصح البضاعة هي ممنوعات ليش اغشم روحي واكول غير شي.
مشيت وراها وهاي باقية تجلد بالبنية بكل قوتها شعر راسي وكف شلون مرة تكون بهاي القسوة المرة مو لازم تكون عدها رحمة انسانية هاي تشوفها تصرخ وكانها تتلذذ بعذابها شياطين مو نسوان ذني.
مشيت ورة ميار والزلم تطب وتطلع وين ماعرف نعلعلة عليك الاعرج مالكيت مكان اخيس من هذا دخلت لغرفة صحت وراها وكفت اندارت تباوعلي بغرور وصلت يمها باوعت منا ومنا.
ها
الاع
خلت اصبعها على شفتها
اش لاتنطقين اسمة ادخللي جوة كدامي.
خفت وترددت ادخل صاحت بية دخلت سدت الباب طلعت العلاكة من جيبي مدت ايدها اخذتها فتحتها وكلبتها باصابعها.
لا مضبوط لحظة الفلوس اجيبها
راحت للكنتور باوعت بالغرفة شنو من اثاث شنو من فخامة اباوعلها طلعت شدات فلوس تحسب بيهن دك تليفونها سحبتة فتحت خط وخلتة على اذنها.
الو يابة الو عيوني
لا هاي هي اليوم الدولة يسيس ب
ضحكت بصوت عالي عايق هسة يلا عرفت معنى ضحكة العايقات كملت تلعب بالفلوس بصبعها.
اي هاهي وصلت يمي يمشيها الكم عدكم غير شي اخلية يخلصة بطريقي، سهلة يطلعة ولايهمك حتى لو اعدام هو ملف يحترك باي عيوني باي
سدتة واجت بيدها شدة فلوس تضربهن بالهوى وصلت يمي سحبت اوراق من الشدة خلتهن بيدي
هاي الج وذني للغالي وياهن بوسة مني
كليلة ادوخة واسطرة ومثل ماذل ينذل
اخذت الشدة وعفت الاوراق بيدها طلعت وهي تصيح وراي: جديدة على الشغل اوي كتكوت لج اخذي لايستغلونج ليش بلاش ليش.
ماجاوبتها ولا انداريت طلعت واجو ثنين سحلو البنية سحل منتهية دمها بقة بالكاع طلعت من المكان تقيئت احس معدتي انكلبت مشيت بسرعة لسيارة الاعرج لكيتة بمكانة سحبت بطل مي على الكشن اخذتة اغسل حلكي روحي طلعت.
شمرت الفلوس بوجهة رفعت اصبعي اصيح بية
اخرررر مررة اروح لهيج مكان تسمعني
اخذ الفلوس باسهن غمض عيونة يشتم بيهن
الاعرج: عطرها بدولارات من فرنسا ميارة العيارة
كعدت احجي وياة
خليني ارجع منين ما اجيت.
يعني احنا انتهينا
كتلك ماحجي لاحد عنكم و.
كافي ماتطلعين غير ميتة منا ننتهي تنتهين ماكو مكان تطلعين منه احتفظي بكلامج الج
سكتت مو اني الاتوسل بواحد مثلة بحقد وغل نطقت: راح اطلع وادمركم واخرب شغلكم انتو دمرتو نفسكم بيوم الجبتو وحدة نفسي ملعونة وغصبتوها على الشغل عبالكم استفاديتو ماتدرون نهايتكم.
كل واحد اذاني ما بقة لعنتي دمرتة كل واحد حرك گلبي انتهى وتشرد وانت قريب يومك اشوفة.
الاعرج: علوية وتشورين من بخت جدج
مو علوية بس مجربة اي واحد ما مأذيتة ياذيني يصير، بية شي انتو تعتبرونها شارة وحوبة اني اعتبرها لعنة وراح تلحگك لعنتي
ضحك ركزت بالطريق عبالة استهزا مشت السيارة جنت اباوع بالطريق من بعيد شفت سيارة حديثة بيها ولد لابس قميص ابيض احس گلبي يريد يطلع من صدري تخيلتة ضيغم بس للحظة مو ضيغم
كواكب: اخذني اشوف غضنفر لاتجذب علية وعبالك اسكت.
مارد علية طبك السيارة كدام بيت تعبان اصلا مو بيت بس بالاسم نزلت سبقت دكيت الباب طلعلي ولد شاب باوعت بوجها وكتلة.
حمزة
ام دجة متحلف بيج ليش دجيتيني؟
ابن النعال غير خطفتني
راد يضربني شردت جوة والاعرج يصيح بية
لك حمزة عوفها لاتخلي عقلك بعقلها هاي لسانها متبري منها.
دخلت ادور بالبيت على واحد اسمة غضنفر شهكت من شفتة وطحت بالكاع شبة غضنفر شخص تعبان مريض منتهي المرض والتعب ماكلة نايم ويون من الوجع صدرة طالع ملفلف ملبسينة شورت منتهي مغذي بيدة معلكين وكانونة.
نزلت دموعي وبصوت يرجف حاجيتة
غضنفر اني كواكب اجيتك حاجيني
هو عايش بس بغير عالم مسحت دموعي لكيت حمزة يم راسي واكف يباوعلة صحت بية.
شبية غضنفر شبيةةةة
حمزة: طلقة دخلت بصدرة شبية تعبان شوية ماتشوفينة منتهي.
منتهي ماتاخذونة مستشفى تردونة يموت تباوعون علية يموت يلا ترتاحون خسر دم هواي تصاوب ولكم انتو بشر حشا الحيوانات اذا اكلكم انتو حيواناات
حمزة: انجبي لج لاتغلطين لا امدج بصفة
مد امك ال
طفرت من مكاني شلت جاكوج بالكاع رفعتة بوجها
بس تمد ايدك افلش راسك
رجع يم غضنفر يخلط بابرة ضربها اله بالمغذي
عود دكتور انت مسوي روحك نعلعة الخلفونك وشمركم علينة ماتاخذونة لدكتور صخااام
اشتعلت روحج ياجلبة بت سطعش جلب اسكتييييي.
انعل اهلك واحد واحد هسة افلش راسك واعلمك شلون تغلط يا نعال
طلع بقيت يم غضنفر خليت ايدي على كصتة شوية حرارتة مرتفعة باصابعي نغزت وجهها.
غضنفر حاجيني اجيتك ولك متت من وراك لحد الان مامصدكة عايش انت حاجيني لا اكتل روحي
فتح عيونة رمش بيهن وغمضهن ابتسم وبصوت خافت كال يون.
شكوني كواكب شكوني متت اني علمودج حتى بعد ماتحجين علية وتعفيني بس مامتت عار اني
لا انت بزون بسبع اروح امداك ولك عايش طلعت
ههه شفتي.
اي شفتك تريد تموت شكلك يلعب الروح جنك بزون ناكع بالخيس
روحي ولج لاتشمتين بية خليهم يضربوني بعد ابر
اخذك وياي اداريك
تعصرين بحلكي طماطة خايسة اموت بساعة بس ابقى وياج ولي منا
اجة حمزة وياة واحد صاح بية طالعة روحة
حمزة: ديلا انتهت الزيارة اطلعي خل الدكتور يشوف شغلة
مشيت وباوعتلة من فوك ليجوة كتلة
انت دكتور فيران شو شكلك مايكول دكتور
مسح حمزة على ايدة يكلي.
هاي وحدو انطوها عين المفروض يكصون لسانها ويشمرونة للجلاب
كواكب: تاكلة اذا انطوة الك
هجم علية وغضنفر صاح
عوفها ولك عوفها
اليتسمة دكتور يصيح بية
لاتحجي ممنوع الكلاممم
كواكب: بعد اضربة راجدي مو خطية مرررررريض تعالجة لو تكفخ بية جايبينك
حمزة: يلا اطلعي انتي
كواكب: تريدون تطلعوني حتى تاخذون اعضائة
حمزة: خو ناخذ اعضائج كلهن نشطات عرج ماطاكج
تفلت علية وطلعت اركض لكيت الاعرج واكفلي
الاعرج: ها مو كتلج ماميت شفتية.
نعلعلة والديكم شمخلين بية شلون ولد جان اصحة من المطي حتى مايكدر يحجي
درس بسيط اله هذا
يمعود خل ناخذة ويانة ندارية بين مايطيب ويصير بية حيل ناخذة لمستشفى احسن مايموت وخطيتة بركبتكم
امشي اصعدي كلهم هيج مو شي جديد ذاك قامة يصول ويجول وهو هم بيوم طاح ازيد من غضنفر
لو ميت ومخلصنة
امشي لا اهفج
وغضنفر؟
نجية غير مرة بس يصير احسن وبمهمة غير.
صعدت وحرك للمنطقة دخلت للبيت لكيت بلقيس زركة حتى ماحطت عينها بعيني دخلت للغرفة وقفلتها عليها كتلني الجوع استحي اكلها اطلعي اطبخي فتحت الثلاجة طلعت موز وخبز صرت الف واكل اجة الاعرج شافني خزرتة وصحت بية.
كون كسر بيدك ليش هيج مسوي بيها
الا بهاي ميخصج لاتدخلين
ديلا هسة شناكل سم من وراك اكل موز وخبز واجيبلك شدات
امشي لج ماصارلج يومين يمنا ربحنا براسج.
دك الباب دفرة افتر ورجع غمني وطلع شبعت ورحت نمت بحلك المبردة لفلفت روحي وحتى اعيش هالعيشة لازم اتذكرهن بالي ابوس ايديها الترفات شوفة عيونها الحلوات اشتاقيت والشوك كتال امير ومن يكول تواتب لو نجمة وعلومها ومن تضحك خدها ينحفر اشتاقيت لشهبة لكلشي اشتاقيت حتى لمحمود لذاك السوك بعد مااجو بالي واحد واحد ابتسمت بحزن اتخيل لو ذيج السيارة بيها ضيغم وشايفني شيصير؟
رفعة شعرة، من يتأفاف، عيونة الملونة، عطرة والله احسة بخشمي بعد مادريت بالدنيا للثاني يوم ونفس المنوال الاعرج وسوالفة القديمة اجيب فلوس
وعلمني اوزن ممنوعات وحسب الكميات والطلبات
خليت غاية براسي وشغلت عقلي وخططت طريقي
بس الصار عكس ما اني متخيلة وعكس كلشي ردتة
دزاني الاعرج لنفس المكان وهم اوصل كمية لميار.
رحت سلمتها وطلعت وكفت بمكاني وكف كلبي واني اسمع صوت سيارات الشرطة يدوي بالمكان والصريخ كب وكلها تطافر.