رواية المنجمة للكاتبة كفاية كاظم الفصل السابع والعشرون
يعوضني الدمع واني الخسرتة هواي!؟
نجمة.
عيوني غوشن وكلبي يدك بقوة مشيت مو بوعيي عقلي مو براسي والخوف مسيطر علية بس كلام دراهم يدك براسي محد يكدر يساعدها غيرة، بس يطلع الخبر تختفي اخبارها كالتلي لاتخبرين احد بين ماتنعرف سالفتها ومكانها.
وصلت للدوام عكس كل يوم بملامح تعبانة خايفة وجهة مصوفر كل الشافني سالني عن حالتي اكتفيت ارد ب الصيام مدوخني.
مكتبة فارغ ماجاي للشركة رحت لمكتبي انتظرة بين مايجي اشتغل وشاردة بغير عالم احس شوية وينغمي علية من الخوف والندم اذا صار شي بيها لو خسرناها من ادينة مستحيل نعيش طبيعي نبقى نلوم بارواحنا كواكب اختنا وصية اهلنا سندنا جانت بوقت ماعدنا سند شلون هيج غفلت عنا وانكطعت اخبارها.
رفعت راسي باوعتلة كدامي شمرت القلم من ايدي ورمشت بعيوني يحرگني من البجي ملت راسي وعيونة تتفحصني بخوف وقلق...
فقار: شبيج بابا؟ اليوم مو مثل كل يوم صاير وياج شي؟
هزيت راسي لا والدمعة بطرف عيني اصبر بروحي ماتنزل كدامة خلة ادينة على المكتب ساندهن مركز بوجهي يكلي.
بيج شي كولي بسرعة كولي
احد مضوجج؟ ماذيج؟ انعل والديهم والله.
اريد احجي واكلة لا ماكدرت خليت ادية على وجهي وانفجرت بجي صار يلوب يريد يسحبني علية ويرجع لو يخلي ايدة على متني ويتراجع سحبت كلنس وكمت من مكاني انطيتة ضهري مسحت وجهي واخذت نفس حسيت بية وراي ضبيت ايدي بقوة والتفتت علية.
فقار: وكفتي كلبي نجوم شنو صاير وياج؟
ماكو شي استاذ
فتح عيونة بعصبية كال
شنوو ماكو شي وهذا حالج وهااي دموعج!؟
اخذ نفس مسح وجهي وبهدوء رجع كال.
لاتخافين وياج اني اساعدج بكلشي واكف وياج سولفيلي لاتترددين
شردت منه بنظراتي وتحركت خطوات عنة
نجمة: استاذ تعرف اهلي متوفين فاليوم اتذكرتهم وافتقدتهم لان رمضان اذكرت ايامهم
كعدت بالمكتب اجة وراي سحب كرسي تفاجات من كعد بصفي مقدم نفسة ليكدام ادية بحضنة يكلي وجهة يبعث حنان ودفو.
فقار: الله يرحمهم ويغفر الهم ويسكتهم فسيح جناتة اليوم راح اتصدق عنهم بس يانجوم لاتبجين اني متفهم شعورج صدكي مو سهل تنسينهم واكيد بهذا عمرج تحتاجينهم بس لاتسوين هيج بروحج
اعتبريهم موجودين بالسما باوعيلهم واحجي وياهم يسمعونج
ابتسمت بحزن وهزيت راسي
فقار: مايلوكلج الحزن نجوم ابتسمي واضحي سولفي تعودنا نشوفج هيج حتى لو ضايج انسى من اشوف طاقتج
ياا صدك
ضحك بهدوء يكلي
حتى صرت اعرف فصلاتج واذا ما كلتي ياا استغرب.
يااا
ضحك ضميت شفتي بيدي وهو يضحك
نجمة: هو ما انتبة اكولها
عادي كوليها حلوة منج
يااا
كام من كرسية يضحك
فقار: شفتي بعد لاتبجين حتى تضحكيني
مو قرد اني؟
غزالة انتي عيب هالحجي
شكراً استاذ
ولو يدلل الغزال
راح لمكتبة يكمل وطبعاً شكد محترم هالرجال بحيث شغلنا بغرفة وحدة ولامرة سولف بموضوع غير الشغل واحسن شي مسوية خلة حاجز بينة لا اشوفة ولايشوفني وفد مرتاحة بتصرفاتي وبحركاتي ابد ما احسب حساب لشي.
مرت ربع ساعة طلعت اشوف ضيغم وهم ماموجود رجعت لاستاذ فقار اسئلة عنة.
استاذ ضيغم شوكت يداوم؟
رفع حاجبة باستغراب كال
شرايدة منه
هيج
شنو الهيج غير افتهم؟!
استاذ هسة كلي يداوم لا حباب كلي
رجع ضهرة ليورة مقلص عيونة يباوعلي
ليش تسالين؟
عندي شغل وياة
بس انتي شغلج وياي
اعرف مو موضوع شغل شي شخصي
زادت علامات التعجب والصدمة على وجهة حتى صار ماعرف يحجي كملت اكلة.
اذا مايجي كلي.
هز راسة لا عفتة بفضولة رجعت كملت شغلي وطلعت لسمار هذا قبس بس اسئلة علية يسويلي الف سالفة.
مشيت اريد ادخل شفتهم سوى رجعت ليورة شنو اريد يوم الكاة وحدة ماكو صاح سمار وراي رجعت
تعالي نجمة الشمال
مديت راسي كتلة
اريد امشي كوم
وين تمشين لكربلا
لا للنجف تروح؟
وياج اروح حتى اذا تردين اصير دفان
خزرة قبس يريد يضربة هو عرف ابتعد عنة يضحك خزرت قبس من كلي.
روحي كملي شغلج.
وانت شكو؟ ترة ما اشتغل عندك بس تخزر بية عوزك بس تكتلني كوة مصبرة روحي عليك شبيك هيج حاقد علية وتكرهني
ما انتظرت يرد علية رحت امشي سريع فاير دمي منه يستفزني باسلوبة يكول عبالك اختة الصغيرة يريد يكفخني يلا يرتاح وكفت وذبيت نفس من لاكاني على شافني ابتسم.
هلو على اكلك شفت ضيغم؟
هز راسة لا وطلع تليفونة كتب ودارة علية
علي: اليوم مايداوم عندة اجتماع
زين شوكت يخلص ماتشوفة الي
كتب وانطاني اقرا
سهلة هسة اشوفة.
عفتة يراسل رفع راسة باوعلي شافني اطكطك باصابعي كتب قريت كاتب.
اصبري شوية ويرد مادام راسلتة مايطول
ان شاءلله
تلفتت الممر فارغ وهو يكتب دار التليفون اخذتة منة اقرا.
علي: العطر اخذة فقار وصيتلج غيرة
كتبت اله
خيولي يكول خايس مال ولد مايصير تخلي منه البنات الحلوات
سحب مني التليفون كتب
احجي ترة اسمع لا تكتبين
ضربت كصتي وهزيت راسي
اسفة نسيت
رن تليفونة باوعلي مبتسم كتب ودارة الي
علي: هذا ضيغم شكلة؟
اريدة بموضوع.
هز راسة وكتبلة كمل ودارة إلى كاتب ضيغم
بعد ساعة نلتقي وين تحب؟
نجمة: مارريد بالشركة خارجها
ضيغم: تمام نلتقي بكافتريا
انطيتة التليفون مبتسمة بوجهه
شكراً على والله انت كلش حباب
الله يوفقك
ابتسم يخلي ايدة على صدرة ترخصت ومشيت لاكني البنات يمكن جانن واكفات يباوعلنة او هستوهن اجن ابتسمت وكملت طريقي روان صاحتني.
اكلج نجومة شبيج
هيج بس تعبانة
لعد اخذي اجازة
مايحتاج.
عفتهن ورجعت للمكتب كملت الشغل بس اريد يخلص الوقت قبل الساعة تحركت من مكاني
استاذ اريد اطلع كملت الشغل ما اطول هواي
اشرلي على الباب روحي
طلعت صارت بوجهي سما مشت بصفي تحجي وياي: اوكفي شبيج تركضين
اريد اطلع
وي علي؟
التفتلها فاتحة عيوني هزيت راسي وبحدة نترت
لااا
عبالي، صدك شنو بينكم علاقة شبسرعة مو قبل فترة سولفتلج عنة
رفعت اصبعي بوجهها وبعصبية حجيت
لاتبقين تحجين من كيفج علاقة شنو؟!
ماتحترمين نفسج عيب عليج عيب على مثل اخوي وزميل إلى حالنا حالج
مشيت مامنتظرة منها تبرير اني بيا حال وهاي بيا حال بطرانة وصلت للكافتريا كعدت والنادل يفتر علية كتلة بس مي هو اني صايمة مايعرفون رمضان لان اكو ناس من غير ديانات وناس ماتصوم فمفتحين عادي.
رفعت راسي من دخل ثنين بنات كاعدات مبينات مسيحيات من جمالهن عيونهن تعلكت بية يباوعلة ويحجن وصل يمي كمت بوجهها.
السلام عليكم
وعليكم السلام اهلا استاذ.
اشرلي اكعد كعدت وهو كعد يباوعلي منتظرني احجي طكطكت اصابعي وبلعت ريكي بتوتر من كال.
سولفي العندج لاتترددين
استاذ ساعد اختي حباب
عدل كعدتة ورفع شعرة نزل
يا اخت؟ شكو؟
استاذ اختي مختفية صارلها فترة محد يعرف شي عنها رحت اليوم اشوفها دراهم تكلي عبالي وياجن صار فترة ماشايفتها واحنة ماشايفينها كطعت علاقتها بيها
ضيغم: وحده وحدة كواكب شبيها كواكب؟
دنكت راسي ودموعي نزلت شهكت اكلة.
راحت كواكب مختفية ماعرف مخطوفة محد يعرف اثرها ودراهم تكول بخطر خل يساعدها
ضيغم: بس لاتبجين اسكتي افهم منج واحجي وياج وحدة وحدة
سحب كلنس وانطانياة اخذتة من ايدة مسحت وجهي وادية ترجف.
ضيغم: شكد صارلج ماشايفاتها؟
فترة طويلة
زين ليش شعجب كاطعات!
هي ماتريدنا تعاركت وي نيزك كلتلها اذا اجيتني اعوف المكان واتية من وراجن عوفني بحالي لاتسالن علية ولا توصلن
رفع حواجبة مستغرب
ضيغم؛ هي هيج كالت!
اي وهواي قست بكلامها وي نيزك بساعتها طاحت نيزك من الحركة وحتى ماسالت عليها ولا راحت وراها للمستشفى ومن نيزك دزت عليها خالي سمعت بحالتها ما اجت ولا وصلت
تعرفين من اختج نايمة بالمستشفى اجت وراها ضهرها لازمتة كوة تمشي اليشوفها يبجي على حالتها صعد ضغطها كامت ماتشوف دربها وكعت من الدرج وبيومها وصلت الموت تنفض نفض من الصخونة حالتها حالة بذاك اليوم
منو كلك؟ صدك تحجي شلون عرفت؟
ضرغام خابرني اخذ امير وبقيت وياة هي اجت اني الما اعرفها حسيت بخوفها ومحبتها الجن شلون تصدكن؟!
ه هي كالت ه هواي حجت كالت تعبت منجن ماريدجن وهواي اني ماصدكت والله كلت بس تعدي اروح اشوفها ولان بمطنقة دراهم اخاف واحد يطلعلي منهم كل مرة تتاجل الروحة
شكالت دراهم؟
حذرتني كالت لا تكلين لاي احد هي ماكو كالت بس ينتشر الخبر تضيع يضيعونها
وبعد.
كالت روحي شخص واحد ماكو غيرة يساعدها دزتني عليك كالت انت مطلوب الها هواي
ما ناسيها والله صدك مطلوبلها اساعدها بس غير اعرف عنها
هسة شلون ضيغم فدوه حباب ساعدها والله كواكب خطية وماتستاهل التعب الله اليعلم وين صارت هسة
عندج شي بالج
احتمال سالم خطفها او واحد من ولدة
السبب
شردتنا منهم سراج رايد شهب يمكن يريد ينتقم منها لان خلتها تتزوج وتعوفة وهي قبلها صارت مشكلة وياهم وبالاساس هما مايحبونها.
كام من مكانة نهضت سالتة وكلبي ممرود
شنو راح تسوي
مسح على وجهة ورفع شعرة ذب حسرة وكال.
اسوي كلشي اسوي
استاذ حباب مو تعوفها وتمل
ابتسم بحزن بلطف كلي
صيحيلي ضيغم ماكو داعي تكليلي استاذ اعتبرج مثل وردة
دمعت عيوني حتى ماكدرت احجي شي طلعت وياة وقبل لا امشي بطريقي سالتة: وين رايح بس لاتبلغ الشرطة؟
لا رايح لبيت دراهم.
شغل السيارة وراح اخذ گلبي وياة كون يلكة اخبارها بجاة ام البنين رجعت للشركة كملت شغلي وقبل لا اطلع سألني استاذ فقار.
شفتي ضيغم
اي
حلو حلو.
عفتة ينقر بالقلم على مكتبة وطلعت اجرت تكسي وخليت راسي على الجامة افكاري تروح وتودي وكفت السيارة رفعت راسي اشوف ليش شهكت بخوف من شفت سيارة كاسرة علينة والباب البصفي انفتح ردت اتخربط من شفت سالم بس مو ذاك سالم متبهذل شكلة يريدني انزل عيوني تعلكت بالسايق يباوعلنة توسلتة بعيوني هز راسة لا نزلت وكلني ارجف ابو التكسي حرك عافني وحدي وياة متواجهين عيوني صدت على سيارتة بيها ولد عمة ثنين يباوعولي بحقد قريت الفاتحة على روحي ودموعي نزلت من الخوف.
شلونج نجمة؟
عوفني اروح فدوه والله ما مسوية شي اني
ما اسويلج شي جيبي الفلوس واخليج ترحين
مد ايدة يحرك بيها وعينة على الجنطة جلبت بيها قوي شفتي ترجف حتى ماكدر احجي كل ما اباوعلهم سحب الجنطة من متني فتحها يدور بيها
نجمة: م ما بيها ه هواي فلوس
اخذ الموجود كلة عافلي بس خردة وشمرها علية
خلة الفلوس بجيبة.
سالم: باجر تجيبين الباقي سمعتي
رجعت ليورة وبخوف كتلة
ماعندي بعد.
تقدم سحبني من ملابسي يعت بية عتت وجهة قريب علية يريد ياكلني.
سالم: تجيبين الفلوس لا اطلع روحج من نعلعلة على الخلفوجن من وراجن تبهذلة وشاردين الف گ يدور علينة گ ولفيتن على زلم خليتنهم يذبحون رواحتهم عليجن ابني من وراجن تخبل خل اختج يشبع بيها ذاك
قشعر جسمي من الكلام الكالة دفني ليورة همزين ماوكعت لزمت روحي وهو يهدد.
باجر صيري مرة وماتجيبين باقي الفلوس الا انعنع ضلوعج واخليج مكفخة لصبيحة تزوجج لسراج بدال اختج ال
هزيت راسي كلني ارجف ابتعدت ارجف تقدم لزمني من وجهي بقوة كاز على سنونة يحجي بعصبية.
بس تصيرين ذكية ماكو غيرج يطيح بيها والله يا نجمة لاخلي سراج يدخل عليج ويملخج تملخ.
هزيت راسي وجسمي يرجف رحت اركض وعيوني من الدمع كمت ما اشوف بيهن شلون يحجي وياي هيج ليا مرحلة وصلت من الحقارة والدنائة مو اني بنت اخوك من امك وابوك!
عثرت وانسمطت على وجهي بالكاع ايدي تكردت شاغت روحي كمت اباوع خاف واحد يباوعلي الشارع فارغ نكتت روحي وبالزايد كمت ابجي
مشيت جسمي متكسر اريد اعبر ادور على سيارة شهكت واكفة بمكاني وابو الدراجة لزم بريك بقوة باقي شوية ويدعمني صاح علية بعصبية.
شبيج ثولة ماتشوووووفين لو داعمج
مسحت دموعي بيدي وصحت بوجهة
مو ثولة اني حرام عليك تصررخ بوجهي
مشيت وهو وراي يحجي
شبيج اوكفي بيج شي اني ودراجتي كدامج
روح مني روح
هسة عليمن تبجين عيونج حلوة حرررامات
خفت وصرت اركض ركض ناقصني اني جانت ناقصة كملت من حسيت بية وراي انداريت اصيح بية.
امشي منا لا الم عليك الناس
دار وجهة منا ومنا وصفك بيدة يكلي
هي وينها الناس؟
باوعت المكان مابية بشر طريق سيارات وهسة حتى سيارات ماكو اشتعلت روحك سالم ماوكفتني الا هنا مسحت وجهي واني ارجف.
روح منا حباب والله اني يتيمة وكوة عايشة
اوف سودة علية خاب انقهرت عليج هاج دراجتي روحي بيها للبيت
نزل منها مصدك روحة مشيت عنة وين بعد اروح بس اعبر ماتجي بذاك الصوب سيارات وكفت بعيد دايرة وجهي منة.
مو كتلج هاج دراجتي
روح ولي ماعرف اسوق
حرامات
كعد على دراجتة وبقة واكف بمكانة صحت بية.
ماتررروح عوفني لزكت
غيرتي ماتسمحلي اعوف بنية نفسج وحدها بالطريق بلا طلعلج واحد مو خوش
وانت مصدك روحك خوش
هسة اني شسويت اصعدج واروح
هزيت ايدي هذا يحجي صدك ومن تمر سيارة اشرللها وهو صار ليكدام يوكف بالسيارات ماتوكف
اندارلي يباوعلي.
الشمس حمستج حمس يبوووووووو
ميخصك
ضحك بصوت واجت سيارة ثنينة ناشرللها وكفت طار كلبي من شفتها مو تكسي هاي شلون وكفتها رجعت ليورة واشرت بيدي.
ماروح يولد كلة يمشي منا.
ابتعدت عن السيارة صرت وراها وهي بعدها واكفة صرت اطكطك من الخوف شهكت وفزيت من شفت ولد وراي رحت اركض ليكدام حتى ماحجة بعدة مشة وراي وكفت من كال.
زيد: اوكفي نجمة
انداريت علية اباوعلة باستغراب شايفتة هذا بس نسيت اسمة.
شبيج زيد اني نسيتيني شبسرعة!
ها خوش
واكفة شفتج وطبكت
ها اي اريد سيارة توكفلي
وانتي شوصلج هنا اكو واحد هنا يدور سيارات
بعد صارت.
بلعت ريكي من اجة صاحب الدراجة باوعلة من فوك ليجوة وكل لزيد: ها شكو شو تحجي وياها
باوعلي زيد يكلي: هذا منين تعرفينة؟
هزيت راسي لا وكتلة قبل لاياخذ نظرة
راد يدعمني وبقة واكف هنا
زيد: شكو واكف انت
ابو الدراجة: وانت شعليك تعرفها؟
زيد: اي
ابو الدراجة: اكلج اعوفج وياة لو ابقى اوكفلج سيارة غيرة؟
اشرت بيدي ترجف وصوتي ازيد
لا روح روح شكراً
خز زيد ودك صدرة
خادم
شغل دراجتة وراح مبين شكد حباب وخوش ولد.
بقينا اني وزيد بالشارع اشرلي على السيارة
اصعدي اوصلج
لا شكراً هسة تجي سيارة
ماتجي سيارات اجرة اخذيها مني
تجي
عفتة ومشيت وين اوصل بعد وكفت بمكاني وهو بمكانة ماتحرك صاح علية التفتت علية.
زيد: اوصلج شبيج
هزيت راسي لا هو اني اعرفك تعرفني البارحة شفتك وكلشي ماعرف عنك اصعد وياك تخبلت راح صعد سيارتة وبقة واكف احس راح اوكع من طولي الشمس زرفت راسي وجهي انطعن سيارات صدك ماكو فتح الجامة وصاح علية.
اصعدج لججج.
مشيت للسيارة صعدت وراة هي باردة ثلج واني صايرة نار احس دخت وراسي افتر حتى من حجة ماسمعتة انطاني بطل مي يكلي اغسلي وجهج
اخذتة من ايدة باررد ثلج واضح. ماصايم لان مشىروب منة فتحت الباب مديت راسي غسلت وجهي ودخلت امسح بية سديت الباب تحرك
زيد: عود انتي ليش تعاندين؟ كتلج اصعدي اصعدي.
سكتت مارديت علية انطيتة المكان على الشارع كتلة يذبني غمضت عيوني احس راسي راح ينفجر وعيوني موتني بعدها الرجفة مجلبة بية الحمدلله ماحجة لان شافت حالتي بقة ساكت وصلني كلي
اوصلج لبيتكم
لا شكراً هنا وصلت
نزلت سديت الباب فاتح الجامة مطلع ايدة لبست جنطتي وكتلة: باي
نلتقي مرة ثانية.
كالها وخلة اصبعة بخدة مافهمت شيقصد وصلت للبيت بوجهي للحمام ذبيت روحي منتهية مر اليوم ولثاني يوم طلعت ماخذة وياي مبلغ انطيهن لصخام حتى يفك مني ويعوفني بحالي.
واكفة انتظر سيارة طبكت يمي سيارتة بدون مقدمات مد ايدة باوعتلة بحقد وطلعتهن انطيتهن اله حسبهن ورفع حاجبة ماعاجبة الوصخ.
سالم: قليل هذا خليهم يزودون راتبج عود
راتبي كلش زين
عدهم فلوس خير من الله وسلميلي على اخواتج.
حرك گلبي خلاني اتفرفح بمكاني دعيت علية بكلب محروك كون لايتهنى بيهن ولاياكلهن صعدت سيارة ورحت لدوامي لكيت ضيغم واكف برا يدخن رحت علية ذب الجكارة من شافني اجيتة.
صباح الخير
صباح الخير نجمة
ها بشر شنو صار؟
اريد غضنفر؟
منين اجيبة الك؟ تعرفة؟
اعرفة شلون ماعرفة اريد اتاكد منه متاكد يعرفها شكد سالت عنة ماكو مختفي
شعلية غضنفر يجوز مايعرف شي
مو يم سالم محد واصلها
شلون عرفت؟
دراهم تكول.
وانت تصدك بيها هي منجمة لا اكثر منو كال كلامها صح!
اصدك بكلام المنجمات
الموضوع مو بهاي السهولة حتى نعوف كلشي واضح ونمشي ورة توقع
اتاكد من غضنفر اول بعدين اشوف شنو اسوي
وهسة وين تلكاة هذا؟
يمكن لكيتة.
كالها وراح
رجعت للمكتب استغربت استاذ فقار ماموجود بس مشغل قصيدة بتليفونة زادت حيرتي تقربت اسمعها وهي تنعاد.
كل ما اشوفك بالطيف.
لازم تمر نسمة صيف
من نومتي تصحيني
ما ادري يلغالي شصار. لاهدهد يجيب اخبار.
واني الهجر ماذيني
يلنام بعيني حزن
بالصدفة يغمضلي جفن
واصرخ مثل گلبي الجرحتة
ناحن حمامات السفر وبناظري جمرة ومطر
ليلة بالف ليلي السهرتة
ارجع ولو ساعة ردت خاطر اكلك من رحت
جم خاطر بخاطر كسرتة
التفتت علية من دخل وجهة مبلل مي فاتح دكم قميصة وحالة متبهذل اقترب عيونة حمر وملامحة ذبلانة طفى التليفون ايدة ترجف بخوف سالتة
شبيك استاذ؟
باوع بعيوني وكال
مو بس امي حتى اني نجوم
شنو
حتى انتي ماتفهميني.
كول استاذ والله افتهم اني
رايدج نجوم.
كواكب. :
كلبي يدك بقوة واحس رجلية ثلجت اباوع بالمكان كلها تتطافر وصوت سيارات يدوي بالمكان ركضت لوحدة من الغرف طلعت جيس الممنوعات من جيبي ركضت شمرتة ورة القنفات وطلعت اركض حرت منين اطلع والشرطة جفتت رمت طلقت الريد ينهزم وكف بمكانة.
دخلو بيدهم اسلحتهم موجهينها علينا والصريخ كب لزم واحد منهم بنية تصرخ لبسها فاضح خبزها خبز وسحلها برا وهما يطلعون بينا واحد واحد سحبت روحي بهدوء ودخلت لوحدة من الغرف ركضت على الشباك افتح بية وجفلت بمكاني من واحد من الضابط صاح بية.
ولا حررررركة
رفعت ايدي باستسلام كوة اجر النفس جرر انداريت رافع السلاح بوجهي تقدم علية وسحلني طلعني برا سحبت نفسي منة اتوسل بية ادري بيهم مايرحمون.
سيدي فدوه عوفني اني مو وياهم ماتشوف شكلي ولبسي فدوة خليني امشي لا تاخذني على المركز
بصوت عالي زمخ بية
امشييي ولا صوووت اسمععع
ولا كانة يسمعني شمرني بالسيارة وي الموجودين اخذونا للمركز لزمت راسي احس الدنيا دارت بية وضاكت ضاكت علية هاي ثاني مرة ادخل للسجن
اخذونا مثل الغنم يحودون بينة حود منو يسمع لو اريد احجي وياة قسمونا مجموعات وقبل لا ياخذوني باوع بوجهي الضابط يكلي.
بنية لو ولد
بنية والله بنية
احس ولد.
لا والله بنية بس لان كاصة شعري ولابسة ولادي اني بنية
دفعني وي البنات للسجن شمرونا وحدة خرت وطاحت جوة الرجلين محد من الموجودات اهتمتلها كل وحدة كعدت بمكان يباوعلها من بعيد
زحفت الها ماكدرت الزمها تلعب روحي دورت بعيوني على مي اخذت ورشيت على وجهة ماكعدت عفتها ورجعت لمكاني اباوعلها حالي حالهن التفتنا كلنة على باب السجن ينفتح دخل الشرطي باوعلنا وصاح.
سمية وين سمية.
كامت وحدة ضخمة جبيرة بالعمر راحت وياة بعد مارجعت مر الوقت خليت ادية جوة راسي اباوع بشكولهن عدهن عادي بس وحدة منهن صوفرت تاكل باصابعها وهنا يباوعلها بخباثة من اجة الشرطي صاح: وئام
جلبت بيهن خايفة وترجف دخل الشرطي سحلها واخذها وذني يحجن بينهن.
تستاهل حيل بيها.
ماكو لا ساعة ولا ساعتين انفتح باب السجن وشمروها عبالك جثة وجهة ازرك والدم تارس وجهة لا من ايدها ولا من رجلها التمينا عليها غسلن وجههة خافن من شافنها تون بوجع رجعو اخذوهن وحدة وحدة بالاسماء بقيت اني وتلث بنات مادزو علينة تعبت وغمضت عيوني.
وين تاليتها معقولة هاي النهاية اسولفلهم كلشي واطلع منا راح ارجع لاخواتي لحياتي العادية اخلص من الاعرج وشغلهم الخايس!
غفيت على امل اكعد الكة روحي بمكان غير هالمكان يم ناسي واخواتي كعدتني مرة باوعت بوجهة دنكت تحجي وياي بصوت ناصي.
شوفي لج يسألونج تكليلهم دخلت ادور على صديقتي اسمها غدير اني وامها ندور عليها شاردة او يمكن ضايعة مانعرف سبب اختفائها كلولنا روحو وشوفوها بهيج اماكن واني اجيت لان ناس اكدتلي هي هنا وانتو اجيتو
رفعت اصبعها بوجهي تكمل كلامها بتهديد وتحذير
ممنوع تكولين غير هالكلام
اكول الاعرفة وبس ليش اجذب؟
ابتعدت مني تضحك وتاشر بيدها
لج غبية محد يطيح غيرج الاعرج يطلع منها مثل الشعرة من العجين ضباط ورتب تغطي علية بفلوس وبتهديد جايبهم انتي التروحين بيها بالرجلين ماكو غيرج يطيح بيها
عدلت كعدتي اسمعلها
غدير حققو وياها صدك بنية شاردة من امها تشتغل هيج شغل من تجين تحجين هيج تنحسم قضيتج وتطلعين بسهولة احسن ما تتلطخين بتهمة مخدرات وجيب اليطلعج منو يهتملج ذني راح ينلعب بيهن لعب.
اشرت عليهن بيهن موجودات بس شكولهن زركة وشعرهن منتفينة يونن ون بلعت ريكي يابس باوعتلها.
انتي منو؟ تعرفيني
عوفج مني هسة راح ياخذونج يحققون وياج تردين تطلعين كولي هالكلام العلمتة الج ماتردين سولفي العندج واذا طلعتي يصفونج.
كالتها وابتسمت بخباثة التفتت بخوف من دخل الشرطي يصيح بية اكوم ما كال اسمي لاحظت اني وكم بنية يمكن مايعرفونة اخذني يسحل بية لغرفة التحقيق حسيت كلبي وكف والذكريات هجمت براسي عافني وراح بقيت كاعدة اباوع للحيطان ورجلية ترجف فزعت والتفتت بخوف على اثر صوت الرجلين دخل ضابط طول بعرض مطلع بس عيونة طكطك اصابعة وافتر علية بقيت ثابتة بمكاني.
سحب كرسي شخط الكاع كزيت على سنوني كعد يباوعلي حاولت اثبت مظهري الخارجي بس للحظة غيرت رأيي وصرت ارجف صدك تمثيل ماعرف بعد تاهت علية كدامة دفتر باوع بية وبصوت خشن مرعب كال...
اسمج
كواكب
اي كواكب سولفيلي شنو جابج لهيج مكان وشلون تعرفتيي علية.
شبكت اصابع ايدي ودنكت راسي كلمة يصفونج ادك باذني بين اكول الحقيقة يصدكوني يطلعوني زين اني اذا كلتها ابقة سالمة منو يكول اني ليش ما اطلع حتى لو احجي الجذب بلقيس تكلي الشرطة ماتلزمهم عدهم علاقات ومصالح اذن كلام المرة صحت رفعت راسي وبصوت يرجف كتلة.
سيدي جيرانة وصديقة امي المقربة بتها اسمها غدير البنية صديقتي بليلة ويوم اختفت واني ماتهون علية امها اشوفها تدورها اكو ناس وصفولنا هيج اماكن حتى نلكاها وهاي اجيت اشوفها وصارت المداهمة.
باوعلي من فوك ليجوة
حتى بملابس عادية طلعت حتى لا يشوفوني بنية
غدير تجي تشوفج تعرفج
اكيد غير صديقتها ليش تنكرني.
كلتها واحس گلبي صار بين رجلية حتى خفقان احس شكل عندي ابين طبيعية بس من التوتر والخوف راح اموووووت كام طلع صاح بصوت عالي.
جيبولي غدير بسرررعة
هنا صدك ردت اتخربط كلت بس يشوفني هيج يشك بزيادة بقيت العب باصابعي وعقلي فصل عن التفكير هو يباوعلي وشوية دخلو بنية رفعت راسي تباوعلي واني اتوسلها بعيوني اذا كالت ماعرفها تنتهي حياتي كلها.
االضابط: فوتي غدير وباوعي بالبنية زين
ها تعرفينها؟
وكف فص عيني باوعتلي ورجع تباوعلة حتى الهوى انكطع انتهيت انتهيت اني.
غدير: سيدي هاي البنية الكاعدة هنا صديقتي اسمها كواكب شلون ماعرفها
الضابط: اطلعي
راح سلمها ورجع كعد بيدة دفتر كلب بية اريد بس اشوف وجهة ملثم مايبين شي ومن يحجي ارجف من قوة صوتة.
االضابط: كواكب ثاني مرة ادخلين سجن
هزيت راسي اي واعظامي ترجف: اي سيدي هاي المرة الثانية
المرة الاولى الدخلتي بيها السجن شنو جانت تهمتج؟
ماعرف.
طعن ومحاولة قتل طلعتي منها بكفالة حلو
سيدي ابن عمي ومرتة اعتدو على اختي وضربوها تعاركنا ردت احمي نفسي منه لان رجال قوي اذا يلزمني يسوي بية مثل ماسوى باخواتي دافعت عن نفسي بالسجينة ومرتة تعاركنا عركة نسوان ضربتها براسها لو محاولة قتل ماطلعت بسهولة
سكت يقرا بالدفتر
كام من مكانة اجة شرطي كمت وياة
شنو شوكت اطلع هذا ليش عافني؟
االشرطي: كمل وياج
يا الله شوكت تطلعوني
ماعرف امشي.
رجعني للسجن ويوم كامل مر واني كاعدة بمكاني
رجع الشرطي صاح باسمي وكال.
اجاج الكفيل اطلعي.
نيزك.
باوع بعيوني وعدل كعدتة سحبني لحضنة ابتعدت عنة رجعني وكاني اعرف الراح يحجية.
كول خيرتك اني تريدني اريدك؟ ماتريدني ماريدك
ضرغام: بس افهمي نيزك خل احجي وبعدها انتي قرري واحكمي
بلعت ريك كلبي يفور وخرت من حضنة احس وجهي يريد يطك سحبني من ايدي مايقبل ابتعد
بس خليني اتنفس بعيد شوية
اتنفسي بحضني
ماريد حضنك
تردينة ومرجعج اله
رفعت حاجبي عيوني يردن يطكن بهدوء مصطنع كتلة: شنو قصدك؟
الله كتبلنة ننجمع شئتي ام ابيتي كل الصار مو صدفة من اجيتي للمعرض ولا من اجرتي بيتي وحتى من رحتي تطبخين ورجعتج وياي مو صدفة باختصار شما صار نرجع لان هذا قرار مو احنا اختارينا
كلشي باختيارنا الطير مايبقى عد سجانة بس يدجلة ريش يطير بعيد وهسة انت جاوب على سؤالي لاتلوفها
ذب نفس ولزم وجهي بثنين ادية احس روحي راح اطك ويصعد ضغطي.
ضرغام: شوفي الصار مو ذنب احد الصار ذنبي اني اني المافكرت ولاحسبت حساب هذا اليوم جنت اتزوج ولان ماريد اكمل وياها اخذها بالسر برضاتهن واسيل هم ذنبها ذنبها قبلت زواج مؤقت تعرف غايتة وتعرف نهايتة ثنينة غلطانين بس الطفل مو ذنبة
دفعتة من صدرة وبحركة كتلةة
واني هم مو ذنبي
هز راسة يكمل.
ضرغام: وانتي هم مو ذنبج تتزوجين وتجيج مرة مو ذنبج يخرب عرسج والطفل هم مو ذنبة تدرين تكلي بس اجيب ابيعة واحرك گلبك واني اختفي تخيلي ابني من لحمي ودمي يعيش متبهذل بسببي
يمشي ويدعي علية شلون اقبلها!
اني ما احجي عن اليوم احجي عن المستقبل افكر واحسب لبعدين مستقبل طفل انتي ابنج شكد تحبينة؟ شكد مستعزة بية ولو تعوفين الدنيا ماتعوفينة اني مثلج صح ما صاير ولا شايفة بس احبة صح بالبداية ماردتة يمكن من عصبيتي ولان عاندتني وما اخذت حب مانع بس هسة صار ومابقة شي ويجي على الدنيا
سكت يشوف ردة فعلي هزيت راسي وشمرت ايدية اشرحلة.
اني ما كلت على ابنك اعرف الضنى غالي بس اني مشكلتي ذيج ماريدها اكرهك اذا تحجي وياها لو تباوعلها مو تتقربلها والله اعوفكم وطز بكلشي
ما اتقربلها انطيج كلمة ولا اعترف بيها تجيب اتصرف وياها بس خل اشوف ابني
وعد رجال ماتعتبرها مرة هي صح مرتك بس تخسرني اذا حسبتها مرة بس اني ماتشوفها.
هز راسة موافق على كلامي كمت من مكاني اخذت ملابس وسبحت عيوني نار احسهن اعرف بروحي انانية تعبت اريد اصير انانية بلكت اعيش براحة خل افكر بنفسي وبمستقبل ابني وحياتي كل واحد ياخذ نتيجة اغلاطة وهي غلطانة مو اني.
طلعت مهضومة وشكلي يبين بية الزعل سحبني اله لزم راسي رفعة: لا تخليني اشوفج بهذا الحال والله گلبي يضل يوجعني عليج
اني تعبانة وانت تعبتني
اعتذر منج.
بعدت راسي اضحك خفيف لكيتة مركز بضحكتي وطيف ابتسامة خفيف على شفتة.
ضرغام: اذا الاعتذار يضحكج كل ساعة اعتذر
لا مو هيج بس احس ما يلوكلك الاعتذار
اول بشر اعتذر منه انتي
شدعوة
خزرني وراح يسبح كملت ودكيت الباب
ضرغام خلص بسرعة صار السحور
انزلي انتي وراج اجي.
بقيت منتظرتة كمل ونزلنة سوى احسة غير عن كل يوم فرحان حتى ملامحة متغيرة لا عاكد حواجبة ولايخوزر كعد بالصالة رحت شفت اموري نايم بستة وغطيتة رحت للمطبخ كلها كاعدة تحضر سحور اخذت صينية انقل بيها للسفرة وردة فرشتها واسيل عيونها تكص بية كص تجاهلتها
وكعدت يم ضرغام بين ماالكل يلتم.
صار صوت الطبل قريب وقوي كلش عبالك بيتنة شوية ودخل حسين لابس طبل باوع منا ومنا واشر بيدة اجة اخوة يركض.
حسين: يلا امشي لايلزمنا.
مشو يردون يصعدون صاح بيهم ضرغام رافع ايدة
ها شكو شنو هذا؟
صعد حسين هو وطبلة يركض بقة محسن
ماتشوف؟ اختي رجلج نظرة ضعيف يمكن صار اعمى
ضرغام؛عمى بعينك يا زمال مو اكوملك ازورگك
محسن: شكد عنيف المفروض تحترمني لان نسيبك اني
رفع حاجبة ضرغام يكلة
منين صرت نسيبك
محسن: اني ومرتك صرنا اخوان كالت انت اخوي بعد مو نيزك؟
ابتسمت واحس كلبي انشرح بكلامة
نيزك: فدوه اروحلك حبيبي
خزرني ضرغام بقوة فاتح عيونة.
نيزك: ترة صغير معتبرتة مثل اخوي لا تخنزر هيج
ضرغام: امشي منا لا اطيح حظك هيلكية
محسن: مو خوش نسيب احترم لا ناخذ اختنا منك
طفر بية ضرغام وهو ركض فوك لزمتة من ايدة احجي وياة بهدوء.
شبيك وياهم ليش هيج تعاملهم ترة كلش حبابين ودمهم خفيف
مكاسرينة بماي ورد عمي اسكتي واستري عليهم
صغااار
صغار! عمرة 18صغير هذا؟!
اي صغير اني مو بكدهم.
هز ايدة وسكت يهز برجلة درت وجهي عنة هذا صاحي ياريت كبار لو عدهم فساد اشو بس يدردمون، نزلو ثنينهم كعدو عاقيلين شوية واجو ابوهم فحطان اجة عليهم يصيح.
وين جنتو؟
حسين، محسن: بالقنفة
حسين: لا اقصد بغرفة ذهب على القنفة نايمين
عدنان: ولك عليمن تعبرونها
شردو لغرفة ذهب يصيحون
ذهيبة الحكي افزعينا
طلعت وهما وراهم صاحت بابوهم
شمالك وياهم
عدنان: فحطوني صارلي ساعة ادور عليهم بالشوارع خليني اجلدهم جلد.
حسين: هو يا شوارع غير جنا كاعدين يم ذهب نسولف عليها ماتحجين ذهوبة
ذهب: ها
محسن: جنا نسولفلج قصة ولاي حلب شبسرعة نسيتي
ذهب: صدك ولكم جان جانو يسولفون قصة والي حلب واجاهم الوالي الجديد سلب ونهب
حسين: وقدمو للحاكم طلب كاللهم جيبولي صندوك بية نصة فضة ونصة ذهب
محسين: و.
عدنان: انجب انت لا تكمل لا اعوج حلكك.
راح للمطبخ يغسل بوجهة وهما بعدهم مجلبين بيها اندارو لزموها منا ومنا اخذوها كعدوها وهما مطاوقينها منا ومنا.
ذهب: ليش مفحطين ابوكم وين جنتو؟
حسين: نجمع اجر وحسنات شهر رمضان شهر الطاعة والغفران واحنا جنا طالعين نسوي احب الاعمال الى الله نكعد العالم للسحور
ذهب: خوش تسوون حبوبا
حسين: بس لاتكولين ترة ابوي مايقبل
سكتو من رجع كعدو على السفرة يلكطون التمو وكعدنا نتسحر شهب مانزلت بس قبس بعد ماتصوم لان حامل.
نعمان: شلونج خوية سندس كالو انكرصتي
سندس: همزين مامتت العكارب نامن علية
حسين: واحنا نقذناها لو ما احنا هسة ناصبين فاتحتها تدرون؟ حقكم وين تدرون
محسن: سندس منو الاخذج للمستشفى بربج سولفي
سندس: يا هذا الولد طلع حباب وخوش صاحي
حسين: وانتي اخذتي غيبتة تكولين مكبسل ماتدرين السيارة هاي عازتها
تميم: دكافييييي شكد تلغووون اكلو واسكتو لو ماتعرفووون
حسين: ماعاجبك كوم منا هو بيتك
محسن: هو انت حتى ماصايم اكبر جذاب.
خزرهم يريد يضربهم وهما يستفزونة بنظراتهم صاحت بيهم حفصة تميم اكل شوية وكام طلع
ياسمين: فقار وضيغم مايجون يتسحرون؟
قبس: برا يتسحرون
اسامة: يمة باجر اني مسافر ان شاءلله
ذهب: خو انت ماتكعد تفتر من مجان لمجان اذا ماتريد العراق ضل هناك وي الاجانب
اسامة: ويكول ماتدري
باوع لهاجر تباوعلة بنظرات تعبانة نكت ادية وكام
اسامة: سفرة عامرة
ضرغام: يمة جاي.
كالها وانطاها الكلاص سحبتة اسيل يمها القوري صبتلة شلت كلاصي ورفعت ايدة خليتة بية
نيزك: اشرب حار
اسيل بقت مادة الكلاص يباوع لايدها ولايدة بية كلاص رفعة كلها: ماريد عندي
شربة وسكت رجعتة تتوعدلي بنظراتها دنكت مبتسمة عبالك خضت معركة وانتصرت شرب الجاي وهو بارد حتى موحار خلصة وكام واني ادري بية يريد يشرب بعد بس مايكدر يكول.
خلصو وكمنا نغسل المواعين حميت الجاي وصبيتلة كلاص جبير انداريت لكيتها وراي.
اسيل: عبالج انساها الج
خير شكو
مثل ماهو رجلج هم رجلي احترمي نفسج وجري عدل
ضرغام بس اني مرتة خليها بالج
عفتها ومشيت وردة تصفك
ورد: ام العيون الصگارة صاكرتهممم وخالستهممم لك عاشووو
ضحكت ومشيت والله عدها سوالف وروحها حلوة دخلت لغرفتي لكيتة يلعب بتليفونة سحبتة منه رفع راسة خازرني مديتلة الكلاص اخذة ومدلي ايدة انطية التليفون اخذتة وطفرت يم الشاحنة اخذت الشاحن بيدي واشرتلة.
اشحنة
مو متروس شحن.
حتى لو زيادة الخير خير
شكلتة وباوعت بية شجان يتابع لكيتة داخل بكروب سيارات الوانها تخبل اخذني الواهس اكلب بيهن فاتحة عيوني مندهشة.
ضرغام: ها ارتاحيتي عبالج اباوع للنسوان
هزيت راسي وكطعتة من الشحن هو متروس انكشفت بعد كعدت يمة ومسحت راسي بضهرة
ضرغام: خرب لاتسوين هيج رمضان
ماسويت شي عيني
كعدت بحضنة شلت ايدة خليتها على جتفي مررت بتليفونة وهو يباوعلي ويشرب بالجاي
شكد حلوة هاي السيارات شنو راح تشتري.
جبت اخر الموديلات متوفرة بالمعرض
ههه والله ذكرتني من اجيتك بقيت اللطم كلت هسة اني شجابني بالسيارات الراقية
نزع شالي وسحب خصلة من شعري يشم بيها
ضرغام: لان انتي راقية
واوووو والله طلعت تعرف ترد بكلام حلو
شعبالج لعد
اختفتت ملامحي وصفنت بوجهة من شافني هيج شرب الجاي دفعة وحدة واشر براسة شكو
لزمت وجهة بيدي وبهدوء احجي.
بصراحة ما ازعل والله هو ماضي عادي كول
شنو اكول.
يعني هم مرتك الاولى غيد اي غيد هم تحبها لو يعني تتغزل بيها وهيج مثلي
اذا اكلج لا تكليلي جذاب
ماكول جذاب بس جاوب
غيد جانت صغيرة وزواجنة تقليدي ماحبيتها عادي رجال ومرة حتى علاقتنا مو زينة خلصناها مشاكل هي تعاندني واني عصبي مابقينا هواي وانفصلنا
ليش انفصلتو؟
اضربها
رفعت حاجبي بتعجب
صدك تضربها؟ ليش؟
كتلج تعصبني واني عصبي اكتلها
واني هم اعصبك ماتحاجيني
وانتي هم تحسبين روحج مرة.
فتحت عيوني على وسعهن لزم وجهي بقوة يديرة منا ومنا.
انتي طركاعة طاحت على راس ضرغام
انتي عقاب كسرتي القوانين
نيزك: مايصير رجال يضرب مرة
كتلج هي طفلة تعصبني
وانت
هم ماجنت جبير من تزوجت المهم الله يوفقها
عليك الله هم تتذكرها لو تحبها
انتي هواي حجيتي اليوم
كوول
لزم راسي رجعة علية واخذ شفايفي ابتعد كلي
قبل لا ياذن نصبر ارواحنا
كول هم حبيتها
والعباس والزهرة وام البنين ماحبيتها ولا اتذكرها
ونسوانك
شبيهن صخامي
هم تحبهن.
رجع يبوسني وخرت منة خليت ايدي على شفايفي اتنفس بسرعة.
لاتصير لوتي جاوب
ماكو جواب الاحبها اخذتها كدام الناس ماكو رجال يحب وحدة ومايعترف بيها
سحبني طفرت اركض وصلت للباب كتلة
راح ياذن اجيبلك مي وارجع
عطشانج اني يا ماي هذا اليرويني
طلعت وطبكت الباب حتى الهوى ضاع مني واحس وجهي نار صار ورد والبنات كاعدات بية فارغ كلها طشت اخذت مي شربت اجة على يريد يصعد صحت بية.
علاوي اخذ المي لضرغام.
اخذة مني وراح طلعت برا اشتم هوى جذبني صوت فقار وضيغم قريبين مشيت اشوفهم كاعدين صفة ضيغم حاضن فقار من ضهرة يمسح علية ويسولف وياة عفت كلشي وركزت بالتشيرت من كام شفتة ابو الجماجم هذا مال كواكب شجابة اله اجة يدخل واني عيوني على التشيرت باوعلي وكال.
شبيج
هذا التشيرت منيلك؟
شنو عجبج.
لا هذا مالت اختي مستحيل انساة اشترتة جانت كلش فرحانة تراويني تكلي بية جماجم شكد دورت علية يلا لكيتة حتى جانت ماتلبسة كد ماتحبة
سبحان الله تؤمة هذا
وين اكو هيج يبيعون يمكم
لكيتة بارقى المولات بس اذا رايدتة انزعة الج
هزيت راسي لا ومشيت بعيد دموعي نزلن لا ارادي ولا انسى ذاك اليوم واني ارزل بيها لان تحب السجاجين والجماجم...
كواكب: لكيت هذا بعد الكة تشيرت ابو السجاجين هيج بية سجينة لو خنجر جاي صفح شحلاتة فدوووووة
ضلي بهاي سوالفج الخايسة
اتمنى الزم سالم وادجة براسة
افف كواكب عوفي هاي السوالف
وابتعدت كواكب ضلت بس سوالفها وضحكتها براسي ماتفاركني لحظة وي الاذان دعيتلها من كل كلبي والله يحنن كلبها وترجع النة.
شهب: ثاني يوم قبس كلي نروح نعقد محكمة وبلغ ضرغام يروح يعقد ويانة احنا لحد الان ماعاقدين، نيزك راحت تبدل واني سحلت ورد ولا تتحرك رفست كرصتها ولا حست يكول ميتة مو نايمة اخذت جوري لغرفتي تختارلي باوعت بالملابس طلعتلي فستان ابيض بية ورد ناعم وردي فاتح والشال والجنطة بلون الورد رحت البس وهي تختارلي الاكسسوارات طلعت اباوع بالمراية واضحك.
حلو هالفستان
جوري: يجنن وانتي محليتة تعالي البسج.
مديت ايدي لبستني ساعة فضية وياها اسوار ومحبس رشيت عطر ورطبت ادية وهي تمكيجني
شهب: مو تخلين هواي مكياج بسيط
اعرف
كملت صرت اضحك احس اريد اطير المكياج كلش ناعم والحمرة بناتية ماتبين عدلت شالي كمزنا ثنينا من دخل قبس جمدت البنية مبحلقة عيونها عافت شالي وزحفت ليورة تريد بس تطلع.
قبس: وين ست جوري وين؟
حوري: ها مو شنو اريد اطلع كملت
قبس: اوكفي لج خل اشوفج شلاعبة بشكلها
شهب: ما لاعبة البنية جانت تعدل بشالي.
تقرب مقلص عيونة مركز بوجهي اندار عليها تريد تبجي: ها ولج الخوينسة شمسوية بيها
جوري: باي اني رايحة
اشرت بيدها وطكتها ركضة بقيت فاتحة حلكي وهو يضحك فتحت شالي من جديد وسالتة
شهب: ليش تخاف منك؟
تستحي وتخاف ثنينهن
اي ليش
مرة كالو تزوجها وهي نرعصت منا مرعوصة
جنت اكتل وردة وهي تخاف تفلت مني بقت هيج لحد اليوم تشرد مني
هي بت عمك شعجب ماتزوجتها؟
مو يمها حاسبها مثل اختي.
هزيت راسي كملت شالي وعيونة تاكل بية ذب حسرة باوعتلة ضايج بهمس كتلة: شبيك
هسة تكولين معقد بس اني ما اتحمل احس ضغطي يعلك من اشوفج كاشخة والناس تباوعلج
باوعت لفستاني وكتلة
هو فستان مستور هم
اي بس بارزج
ذب نفس عالي فرك وجهة برطمت شفتي ولزمتة من زندة: حلو علية خليني فرحانة بية ترة ازعل واني عروس
عروس وحامل
من وراك اني شعلية
هسة صرت مو زين
كرص خدي ملت راسي على زندة.
اروح بية ما انزع ابد بس تكلي غيرية اكول للقاضي عمو ما اريدة معقد
رفع حواجبة يضرب على خدودي
قبس: امشي لج لا تتماوعين لا ابطل ما اخذج
اوكي
استغفر الله استغفر الله
مشة متعصب ضحكت بالكتمان خاف يسمعني ويبطل كملت بسرعة وطلعنا نيزك ويانة اموري كام يبجي لان ثنينة رايحين فر بية ضرغام وبوسة يكلة
اذا تبقة هنا اجيبلك حلويات والعاب
امير: دول والله
والله
يلا امسو.
مسح عيونة يسويلنا باي بوستة نيزك وضرغام يباوعلة ويذب حسرات.
قبس: يلا نروح بسيارتي
ضرغام: لا بسيارتي
انجب شنو بسارتك وياي امشو
ضرغام: دروح بسيارتك واني بسيارتي
قبس: امداك اي والله ولا يتنازل
راحو بسيارتهم طلعنا وراهم بنص الطريق لعبت نفسي لزمت قبس من ايدة اسحب بيها التفتلي
شبيج
حتقيء
ياستار الزمي روحج
طبك السيارة وفتح الباب ركض فتح بابي ونزلني درت وجهي اريد اتقيء ماكدر انطاني مي شربت منه وبقة يفتر وراي.
ها.
اكلك ماكو خلنمشي
حاولي منا منا خاف تجيج من نمشي
لا بعد راحت
صعدنا وحرك اول ما شاف اسوك جابلي عصاير وحلويات اخذت علج ما اكلت شي.
قبس: اشربي العصير مادامة بارد
اخذتة شربت شوية منه رجعت راسي ليورة وغفيت حسيت بية يكرص بخدودي فزيت عدل شالي ونزلنا مشينا سوى اباوع للمخطوبين لازمين ادين بعض ردت الزمها وترددت نزلت عيوني على ايدة اخذ ايدي بقوة لازمها احس فراشات بطني.
دخلنا المحكمة رجفة سرت بجسمي وكلبي يدك بقوة يكول عبالك مامتزوجين ولا هسة اني حامل
لكينا نيزك وضرغام قبلنا واصلين دخلنا وهما الشهود
بدا القاضي يحجي وصل.
القاضي: شهب جبار هل تقبلين الزواج من قبس اسامة بمقدم قدرة 30 مليون ومؤخر قدرة
75مليون؟
فتحت عيوني بصدمة اباوع لنيزك مثلي مصدومة باوعت لقبس وكلت: نعم موافقة.
رجع سال قبس وانطة الموافقة بعدها صار العقد لنيزك وضرغام واحنا الشهود وهم نفس المقدم والمؤخر طلعنا ونيزك سالت مباشرة.
منو خلة هالكد الحاضر والغايب؟
ضرغام: ذهب من زمان شارطة علينة هيج
سكتت تهز براسها باوعتلي باركتلي وضرغام يدك على ضهر قبس يباركلة.
ضرغام: راح تصير اب وجاي تعقد خو كملها وجيب ابنكم وياكم
قبس: اذا هيج ننتظركم وهم ناخذكم انتو وجهالكم ويانة
ضرغام: اياا ك.
مشينا والهلاهل تارسة المحكمة والجكليت نسوان تطش بية الا احنا عبالك رايحين للسوك طلعنا من المحكمة وفتحت حلكي من شفت سمار وصافي تقدمو علينا سمار بيدة جيس جكليت طش من بعيد شمر على الولد فشخهم ويهلهل بصوت عالي لزم ضرغام راسة يغلط علية.
سمار: صلاوات على النبي صمون حار ولبلبي
كلولششششش
غمة ضرغام بثنين ادية واخذ نيزك من ايدها قبس فتح جكليتة ويضحك صاح بية.
سمار: صايم ولك صيامك ولو انتو كلشي عكس يعقد برمضان جان خليتها على محرم
جاب الجكليتة وخلاها بحلكي صافي حك راسة يكلة: هسة شنو اباركلك مو احنا لعبنا لعب بعرسك
سمار: ميخالف خل نباركلة ونعيشة الاجواء
باركولة عبالك بعدة مامتزوج راح سمار ورة ضرغام يركض صاح بية: شتررريد
جكليت انطيكم واولي
فرغ الهم بالسيارة ورجع النة انطاني الجيس اخذتة وقبس يخزر بية حضن صافي وكال وهو يباوعلي.
سمار: مبروك اختي منا العيال ومنج المال
ضحكت وقبس دفرة صار يحلف مامتقصد يكلبها بقة صافي واكف كلة قبس: انت شجابك
صافي: هذا ابو سميرة جابني يسحل بية نروح نفرحة ونفرح بية
سمار: حبيبي قبقوقي شعندي غيرك
قبس: روح مني لا تبيض
ضحك وسحبني من ايدي صاح ورانة سمار
اوكفو خل اسمعكم شعر لو هوسة محضرللكم
قبس: انجب ولي منا.
سمار: شيكول الشاعر ابو سميرة الكبير الاول على العراق صعدت اني وجروحي كوستر شمات صاح شامت واصل انت وجروحك اوكفو بعد وحدة بس وحدة
قبس يباوعلة مستهزأ وهو يعدل بشعرة ويتحمحم عايش الدور.
سمار: صرت خلفة بغيابك البخ جروح بس جرحك جبير يحتاج خباطة
صعدنا بالسيارة شغلها وهو يكلة: دكول الله
قبس: وسما
سمار: ماتقدرون مواهبي بس تلك الفتاة ام خد المحفور
قبس: مو اجيك احفر راسك
طلع قبس عاكد حواجبة بعصبية يكلي.
كلي لاختج لاتحجي وي هذا الفاسد
نجمة
بس اشوفها تحجي وياة الزكها بالحايط هذا مال واحد يحجي وياة مال واحد يتفل بوجهة هو وشعرة الخايس ينزلة من النت وذيج مامصدكة عبالها المتنبي يلقي شعر الها.
سكتت مارديت علية عود اذا اتذكر اكول لنجمة وهي مناك تتعارك وياة، طبك على مطعم جابلي اكل فتحتة اكل وهو طلع برا يخابر ويدخن من خلصت صعد شغل السيارة ساعة السودة الاكلت بيها معدتي خبطت كوة صبرت روحي اول ماوصلت للبيت رحت اركض لاقرب حمام ذبيت من راسي لحكتني نيزك مسحت وجهي واخذتني لغرفتي.
اسويلج عصير فواكة تاكلينها
لا بس اريد نام.
اخذت حمام بدلت بملابس مريحة ونمت قبس مانزل وياي طلع للشغل للعصر بدلت وطلعت لكيت البيت هوسة كالعادة لاكتني وردة تطك اصبع والضحكة شاكة حلكها فتحت اديها تصيح بفرحة
ولج طلعت ناجحةةةةة
ضحكت ورحت احضنها باركتلها تكلي
اريد هدية فلوس منج ومن رجلج مو تنسين
صار بعيوني
راحت تفتر تجمع فلوس بمناسبة نجاحها وصلت لتميم كاللها: هم انطيج
ورد: هو انت الالف مارجعتة خطية ماعندك ما اخذ منك.
كالتها ودخلت جوة بقة يهز بيدة وعيونة وراها مشيت بسرعة من شافني اجة ضيغم راحتلة وردة تركض حضنتة ورفعت راسها تكلة.
نجحت اني
باسها براسها فرحان
ضيغم: عفية بالسباعية
الهدية الهدية
مد ايدة بجيبة طلع ورقة اخذتها وباستة بخدها تصيح: احلى اخو بالدنيا اخووي لك عاشو الاثكال.
راحت تفتر بالصالة تحسب بفلوسها شوفوني، باوعت بالمطبخ الكاونتر متروس مواعين مقبلات وسلطات اريد اطلع ودخلت نيزك فحطانة وجههة احمر مالحكت اسالها شبيج ودخلت دعاء وهاجر شايلة ود تصرخ وجههة مطعون دم يسكتن بيها ماكو بس تبجي ماكو دقايق ودخل فقار اخذاها يبوس بيها ويشم جلبت بية تصرخ وترجف تسودن عليها اخذها وطلع من البيت.
صعدت لغرفتي بس خلص الفطور وبطلب من قبس كدامهن كال اصعدي فوك بعد مانزلت من تاخر الوقت نزلت هو ماكو طلعت اشوف البنات جوا مالكيتهن ردت امشي لغرفهن وكفت من شفت ضيغم لازم قبس من خوانيكة وجهة مطعون احمر يصيح بية بعصبية مكتومة.
ضيغم: ماتلوم الا نفسسك خطوة وحدة ماتخطي
دفعة عنة بقوة ورفع ايدة ياشر بحركة ويهدد
قبس: لاتدخل بية لا تخليني امد ايدي عليك كوة لازم روحي
رجعلة يضرب بية ويكلة.
ضيغم: اضرررربني يلا اضررربني اني اريدك تضرررربني لك غبيييي انت غبيييي لاتدمر مستقبلك بيدك
عافة قبس وطلع من البيت رجعت دخلت جوة ولليل مارجع قبس اتصل بية مغلق تليفونة كلبي كام يوجعني سالت امة عنة كالت
هاجر: وي اصدقائة تلكينة رمضان ولمات شباب وتليفونة يمكن مخلص شحن
رجعت لغرفتي غفيت ماحسيت الا الصبح وهو كالع.
نزلت على صوت ود تبجي من لاسبب لاتقبل تمشط شعرها ولا تاكل وكلها حايرة بيها وتركض شوية تسكت يم دعاء وابوها حتى الشغل ماطلع بس يعوفها تبجي وتبقى تملخ بشعرها نيزك خطية متخبلة عليها وهي ماتريد احد وجههة صار اصفر ذبلت البنية بليلة ويوم وفقار تخبل عليها.
صار يطلعها وياة ويغيرلها جو يلة صارت احسن جنت هستوني كاعدة من النوم طلعت اريد اسوي ريوك انخمش گلبي من سمعت صرخة نيزك تصيح
يمة اااااااااابني.
بعد اريد اكوم ماكدر رجلية ماتن طلعت شايلتة بحضنها وحلكة يذب دم اسود وجهة وايديها اتلطخت كلب عيونة وكعت بالكاع تصيح.
ولك يمة ااااااميررررررررررر.