رواية المنجمة للكاتبة كفاية كاظم الفصل الخامس
كواكب: ركضت والسجينة بيدي متروسة دم وايدي متلطخة بدمهم القذر عفت اخواتي بنص الهوسة ورحت بس رجعت ماكدرت اعوفهن خاصة نجمة حالتها خطرة من بعيد باوعتلهن اشوف الجيران اخذوها هي وشهب والشرطة ملتمة خفت لايلمحوني ابتعدت عنهم وهرولت بكل سرعتي انسجن وهما عايشين يا وسفة علية لو اكتلهم كلهم وادخل سجن لو اني اعلمهم واحاسبهم بدنياهم هاي بت الشوارع شوفو شمحضرتلكم بس اصبرولها.
وكفت رجلية يم بيتها دخلت بسرعة غسلت ادية من الدم والسجينة هم غسلتها نشفتها ورجعتها بمكانها رجعت افرك بدية ونار بگلبي مشتعلة هيج يسون باخواتي مستحقرينهن لان ماعدهم احد ااخ يا نار كلبي.
اول عثرة الج يمعثورة
التفتت عليها والخوف بعيوني واكفة تباوعلي وتهز براسها رحت اصير كدامها.
دراهم اخواتي ما يسلمن منهم اريد احميهن واخلصهن منهم
شعملتي بيهم.
ماسويت شي بس خليت بيهم اثر يتذكروني بيه كل ما ينسوني والله لو ما اخواتي جان هسة بجهنم مشمورين رجع يكبسل رجع ويريد يعتدي على اختي ومرتة ال وياة اخ لو ناحرتها مايبرد گلبي بيها ماكو هيج سقوط ونذالة
يكفي العملتية بيهم الايام جاية والسوالف جثيرة وراج
هههه رجعت دراهم تحجي بلهجتها الاصلية
ماكو حد ينسى اصلة
لا صح ماكو
دشي جوة ازهبلج المقسوم
لا ادخلي انتي اني ابقى هنا اريد اشتم هوى اختنكت.
بقيت واكفة واتامل منظر السما بس حتى بهاي مالي حق اتأمل اندفر الباب ودخل ضحك من شافني كلبت عيوني وهو اجة يمي
تلاكت الوجوة واخيراً
ههههه شلون وجوة مغسولة غسل من الرحمة
غضنفر: وجهج هم لا تنسين
كواكب: ادري بروحي جني وجه مجداية لا تخاف ما ناسية
قهقة بخفة ورجع يباوع بعيوني كال
بعدج على حطتج لا عندج اهل ولا بيت
شنسوي امر الله هذا
كتلج تعاي وياي اشتغلي بس انتي ماعندج عقل تفكرين
عوفني عوفني هسة اني بيا حال.
فرصة الج هاي
انت شكو جاي هنا
دائما اجي بلكت اشوفج وهاي شفتج
ارتاحيت من شفتني بشر؟
هونج علية هونج
هزيت ايدي وطلعت من البيت عفتة وراي امشي بالشارع والف تفكير براسي هسة اني ما اريد شي بس اعرف اخبار اخواتي وصلت للتقاطع رفعت الثام على وجهي خاف الشرطة تدور علية صدك لو كامرات تصورني كعدت على جهة اباوع للحركة اشوف بنية ولد صغار بيدهم سطلة وصل مسح يمسحون جام السيارات ابتسمت ورجعت بذاكرتي لذاك اليوم.
ها محمود شبيك صحتلي
محمود: كواكب اروح شوية وارجع اشتغلي بمكاني
صار ادلل
اني هسة اجي ما اتاخر
اخذت السطل متروس مي وزاهي وبية اسفنجة شمرت الوصلة على متني وكفت بالتقاطع كل ما اشوف سيارة حديثة اروحلها واكول.
خالي امسحلك الجام؟
بيهم يرفضون وبيهم ينقهرون ويوافقون بس يحبون يساعدون شفت سيارة حديثة رحتلها جان كاعد بيها ولد شاب كذلتة نازلة على عيونة وبس يتأفأف دكيت الجامة التفتلي وفتحها عطرة و الهوى البارد لفح وجهي مشغل تبريد والجو يسمط يمي دنكت راسي
كواكب: امسحلك الجامة
باوعلي من فوك ليجوة وباوع للازدحام بعدة يطول
كواكب: بسرعة امسحها ما اطول.
هز راسة اي ورفع الجامة غسلتها على السريع ونشفتها بوصلة بازة بسرعة صارت تلمع انداريت على الثانية مسحتها بسرعة فتح الجامة ومد ايدة بيها عشرة مديت ايدي بجيبي اطلع خردة وهو كال.
ضغيم: اخذها كلها الك
لا شنو السالفة هواي عشرة هسة ارجعلك الباقي.
حرك السيارة وشمر العشرة علية خازرني بضوجة جذبني عيونة لونهن اخضر مخلوط بصفار صفنت بيهن وماحسيت غير السيارة متحركة والعشرة بالكاع دنكت شلتها وكفت على صفحة السيارات تحركت واني بقيت صافنة وگلبي عاصرني عصر.
هاي جانت اول صدفة واول مرة اشوفها رحت لنفس مكاني الجنت اوكف بيه على امل اشوفة ماعرف ليش حبيت اشوفة بنفس المكان الجنت اوكف بية وهو يمر كل يوم من نفس الطريق ونفس الوقت اعتقد عندة دوام كل ما يفوت ابقة اباوعلة من بعيد عاكد حواجبة ويرفع بشعرة ينتبهلي كم مرة بمرة واني ابقة اباوعلة حتى من ينتبهلي نزلي الجامة واشرلي رحتلة جان ازدحام.
ضيغم: شنو سالفتك ليش تباوعلي؟ محتاج شي.
اني بنية مو ولد باوعت بعيونة وصفنت ضحكت
وكتلة انت محتاج شي؟
عفواً
شنو اسمك انت
ضيغم
راح يعثرونك اقرب ثنين الك الجنت وياهم قبل لا تطلع احذر منهم ولا تمشي على عماك جاي يحيكون ورة ضهرك راح يطعنونك عن قريب بس انت اغلبهم والوي ايدهم.
بقة صافن بوجهي تحركت السيارات واني تحركت عفتة مافاهم شي بعدها اختفيت من المكان وهو جان يدورني واستغربت من كالي محمود يسال علية عرفت وصلتلة الفكرة فكر بكلامي فكر وراد يتاكد من تحليلة وثاني لقاء بعد الصار اول كلمة كالها
انتي منجمة؟
رجعت للواقع على السواق يتعاركون وبذاك الغلط واحد يسب بالثاني مشيت ادور محمود وشفتة من بعيد هم جاي من الدوام بنفس الاناقة المعتادة من بعيد شكلة يجذب صارت عينة بعيني ابتعدت عنه لان شغلي انتهى وياة رحت اشتريت جرخ وكفت يم كشك يبيع جاي صبلي استكان جاي اخوط بيه واجة صوتة باذني.
رجعتي يا كواكب
خير
اكو شي اسمة اسلوب مامار عليج
لا مامار علية هيج شي مو تدري بيه بت شوارع يا اسلوب هذا؟ كول شرايد؟
سلامتج بس ليش ملثمة
مطلوبة للشرطة
صددددك
ههه والله دچيت سراج ونعلت ابو اصلة ومرتة هشمت راسها بالحايط سويتة نافورة هسة علية دعوتين ضدي
التفتت اشوفة مبحلق عيونة بصدمة ابتسمت على ملامحة وغطيت الجرخ بالجاي اكلتة كال.
منو ذولة شسوولج؟
اني محد يكدر يسويلي شي اندكو باخواتي ولا تسال زايد
وهسة شنو حتسوين؟
بعدني هسة، تريد جاي؟
يا جاي انتي شلون عايشة وي برودة اعصابج هاي تفترين بالشارع ومطلوبة للشرطة!
ماتشوفني ملثمة وين يعرفوني
منو هذا الدچيتية؟ شنو يصير منج؟
ابن عم اخواتي
انتي امج مزوجة ثنين؟
ماعرف والله
شلون ماتعرفين اكو واحد مايعرف امة شكد متزوجة
اي اني
سكت واني خلصت البيدي انطيت ربع لابو الجاي وباوعتلة: -هسة انت صح
مشيت وعفتة وراي ادري بية فضولة كاتلة كتل دايخ بيه وبحياتي المخربطة لا الها اول ولا الها تالي صاح وراي.
اساعدج؟
لا مو هسة ترى مانسيت اني اطلبك دين.
رجعت لبيت دراهم دنيا الغروب والدربونة ضلمة صايرة كعدت بعتبة الباب اسمع الاذان بعيد بس يوصل قليل خليت راسي بحضني والغراب صاير كدامي يباوعلي شلت حصوة شمرتها علية يلة طار بس بقة يحوم على البيت دخلت جوة من شفت البزازين التمن لا يطفرن علية.
راح الغراب
راح غضنفر
كواكب: شعندة جاي اليوم
انتي تعرفين ليش اجة
اريد اكل جوعانة شسويتي
روحي حمية وتعاي ناكل سوى.
عفتها تسبح ورحت للمطبخ حميت الاكل وكعدنا ناكل بس خلصت لفيت روحي ونمت هي ضلت كاعدة تقرا بالكتب العدها فزيت الصبح غبشة كلش گلبي يفور نار عليهن شصار وياهن اريد اعرف راح اموت طلعت ماخذة الشارع راجعة حتى ماكدرت اكل من سوت دراهم الريوك وصاحتلي.
دراهم: هسة شبلاج ما تكليلي
اريد اعرف اخبارهن نيزك مو بخير دراهم روحي شوفيهن فدوه
اني اروح!
اي اي فدوة بس اعرفي اخبارهن هنا صبيحة وافنان يعرفنج ويحبن هاي السوالف روحي الهن
بس خل اكل
وكفت على راسها وكفة حضرت عبايتها وجواريبها حتى قندرتها الجوبلس (نايلون) خليتها كدامها ماخلتني امشي اوصلها كالت ابقي بالبيت وصفتلها البيت بالمضبوط وبقيت كاعدة بالكراج اشوف الغرابين تفتر جبت ماعون الحنطة رشيتلهن وهنا نزلن يلكطن بقيت اباوعلهن اندك الباب رحت افتحة ثنين نسوان كتلهن
تفضلن شرايدات
نريد دراهم.
ماموجودة طالعة
شوكت تجي خالة
كواكب: هسة ما تطول
خلينا ننطرها بين ماتجي
فتحتلهن الباب دخلن لغرفتها جبتلهن ماي وبقيت واكفة اباوعلهن كتلهن.
شنو مشكلتجن بالضبط
تجي دراهم وهي تعرف
اي بس ترى دراهم ما تسوي سحورة واعمال هي بس تكشف تسبح الما تخلف تسوي جلسة للجهال التبجي تمتن تسوي حروزة من العين من كلام الناس كطع لسان هاي السوالف وكلهن ادعية من الكتب المعروفة لو ايات قران انتن جايات للمكان الغلط.
بقن وحدة تباوع بوجهة الثانية مبهوتات وجوهن ضحكت وكتلهن.
مبين عندي التريدنة ودراهم مو شغلها هذا لا تنتظرن على الخالي بلاش
عفتهن وطلعت ماكو شوية وطلعن بدون مايحجن شي هي فعلاً دراهم ماتسوي اعمال باطلة تقرا قرآن وعدها كتب ادعية بس يبقى الكشف والتبى بالمستقبل حرام اني ماعرف بهاي السوالف بس نيزك تكول مايصير واحد يكشف او ينجم.
اندك الباب بهمجية رحت افتحة واندفرت وكعت على وجهي فتحت عيوني بصدمة.
شبيج نيزك صافنة؟
نجمة: ولج هااي ترجف لا تنجلط شوفي وجههة شلون احمر اركضي اركضي جيبيلها مي
راحت شهب تركض جابت مي غسلت وجههة وشربتها وهي على صفنتها بقت بقينا اني وشهب وحدة تباوع بوجهة الثانية.
شهب: شنو صار وياها؟
ماعرف سمعتها صرخت اني
حتى اني بس مادري شبيها اطلعي شوفي شكو وارجعي
يلة.
طلعت من الغرفة انحبسنا بيها حبس يكول سجن عساها بحضهم فوك هذا الضيم، شفت هوسة بالكراج رحت اشوف شكو ودخلو سراج لازمينة يمشونة امة وياه رجف جسمي خوف وي شوفتة شلون راح تمر الايام بعد الصار واحنة بنفس البيت عايشين راح يسكت سراج لو امة تسكت.!
دخل وهو يباوعلي ويبتسم بخباثة كال: -خل تحظر روحها.
مافهمت شنو كال اخذوه لغرفة امة ونور سمعت افنان تسال عليها كالت صبيحة بعدها بالمستشفى والله كل ما اتذكر شلون لازمتني اموت من الحركة حيل تستاهل والله كواكب كون تنباس ايدها على السوتة بيهم اجتني افنان تكلي.
شلون صرتي ولج
مو زينة راسي يوجعني
ضوكن وجع ابني شلون فلشتن راسة تفلش راسجن بنفس الطريقة هاي حوبتة هاي
كلبت عيوني عنها مو صاحية هاي شلون تفكر طاح حظج وحظ ابنج وياج ردت اروح للغرفة وصاحت وراي.
وين وين للمطبخ ساعديني العالم رايحة راجعة شطير اني
اني كوة امشي بس اتحرك انسطر ماكدر راسي يأذيني ترة خيطوني اربع خياطات مدري تسعة وهاي ايدي ماتشوفينها ملفوفة شلون اساعدج بحلكي
طلع طلع السااانج اطول من النعال اااامشي صيحي اخواتتج يساعدني لو من هسة اخذن دور العرايس.
دخلت جوة وهي لحكتني تصيح بيهن يكومن شهب خايفة تطلع بقت تباوع لنيزك كامتلها دفعتها وسدت الباب افنان تخبببلت تخبببلت شلون تدفعها هيج صارت ادك على الباب ونيزك عاطت بيها.
نيزك: ووولج اااامشي لا اجي اطييح حظججج
بقت تغلط وتسب باهلي نيزك تخبلت طلعتلها وكمشتها من شعرها وهي هم سحبت شعر نيزك بهاي الاثناء وما نسمع غير صوت عمي رج الصالة رج سكتن ثنينهن.
سالم: ووولجن زعااااطيط خوو ما زعاااطيط تتعاركن شبيييجن.
عوفهن يبردن كلبهن وعوفهن
كلنا التفتنا للمصدر الصوت الخشن ابتعد عمي وظهرت مرة عجوز نيزك اصتكت بمكانها حتى رمشة مارمشت انخطف لونها ورجف جسمها اما افنان ابتسمت وعدلت شالها راحتلها تبوسها براسها وتسلم عليها رادت تاخذها لغرفتها بس ماقبلت كالت خليني اكعد هنا جابتلها مخاد خلتهن ورة ضهرها وراحت تركض للمطبخ.
دراهم: تعاي حبوبة اسلم عليج.
صاحت لنيزك راحتلها باوستها وكعدت يمها بقن يسولفن بصوت ناصي واني بمكاني اباوعلهن ما اسمع شي شهب مادة راسها تشوف شكو من باوعلها عمي دخلت راساً.
جابتلها افنان مي شربت وصاحتلي
دراهم: تعاي حبوبة تعاي احبج
رحتلها دنكت عليها باستني اشرتلي اكعد يمها كعدت اباوع لنيزك شبيها راح تموت نيزك خايفة كلش خايفة وهي ماتخاف بس من يصير شي جبير بس الله اليستر گلبي لاجمني اني.
طلعت صبيحة سلمت عليها وكعدت يمها كالتلها.
دراهم ماتشوفين جف ايدي
خلت الف دينار بيدها وقدمتها لدراهم اخذتة من ايدها وباوعت بيها رجعت باوعت بوجوهم كلهم حتى عمي سالم جان واكف كالتلهن.
دراهم: اكو بوكة جبيرة بهذا البيت ومشاكل صايرة باخر فترة
صبيحة: المشاكل انحلت بس البوكة احجيلنة عنها وكون تعرفين البايگ شتردين ننطيج
افنان: اي والله يدراهم كون تطلع لاترسج ذهب
دراهم: البايگ من هذا البيت ماكل من زادكم وشارب من مايكم
سالم: واحد بينة قصدج ماخذهن؟
اي منكم وبيكم
سكتو تلاثتهم وهي كامت كالت لنيزك
اخذيني حبوبة للحمام
انطتها ايدها نيزك لزمتها بس ترجف صبيحة تباوع بوجهة افنان وافنان تباوعلهم كالت
جنكم بكتوهن وهل ضليتو ساكتين سالم تسويها بيه؟
هز راسة عمي سالم بأسى وبقة ساكت رجعت نيزك ودراهم كالت: -اني امشي جانت عندي شغيلة ومريت بيكم كلت اشوفكم
افنان: حجية ما تكشفيلنا بعد؟ ماتبينلج البايك زلمة مرة شكد عمرة ملامحة.
دراهم: لا يحبوبة اني ما اعرفن الغيب بس مرات يتهيألي بالواحد ومرات تصيب ومرات تخيب
سالم: دراهم انتي ماتجذبين كلامج بمكانة بس كون تگليلنة التعرفينة والتبينلج
دراهم: التبينلي كلتة الكم بعد اعرفو اوادمكم
طلعت وهما وراها طلعو كالتلهم
خافو الله ولا تسوون البراسكم ترة الظالم عقابة جبير يم ربة
راحت ونيزك رجعت للغرفة ماتحجي شي لفت راسها ونامت حتى ابنها مالها غرض بية بقة يم شهب هي حايرة بيه خطية.
شهب: اكلج نجوم خاف كواكب بيها شي صار ونيزك ماتكول
اسم الله شبيها؟ بس لا انسجنت؟
يمكن اي ماتشوفين نيزك شحالها هي تتخبل عليها
يجوز اي
بقينا على نار گلبنة يم كواكب المانعرف اخبارها بالسجن هسة لو اذوها مانعرف شي الله يكون بعونها ويحميها، راسي موتني من الوجع وايدي بالزايد شربت علاج يخف الوجع شوية بس مايروح وجهي مورم وحالتي حالة
طلعت ماتحمل الكعدة هم الم وهم كاعده ردت اطلع للكراج وصاحتني صبيحة.
ها.
خل اخواتج يحظرن روحهن
وين شكو رايحن؟
للعقد وين بعد هي خطبة هو عرس
يا عقد؟ منو راح يتزوج!
سراج راح يعقد على شهب ويوسف على نيزك احسن ماضالات لاشغل ولا عمل عاد يستفادون منهن
شنوووووووووووو
ضربتني على وجهي ثولتني ثول
صبيحة: وسممم خفة هالصوت وتغسل مفضوحة بت القندرة
فتحت عيوني مصدومة
نجمة: شتحجين انتي شنو يتزوجن بكيفجن هييي.
كلي لنيزك عمج يكول لو ما يرضن ينطي ابنها لاهلة ويزوجها واحد غريب ماتضلن كاعدات نزوججن ياهو اليجي بس شهب لا تضل لابني ماطول بنفسة ما اخليها
راحت وعافتني ارجف ارجف من القهر والصدمة كلامها ماكدر استوعبة نيزك تزوج يوسف وهي تموت منه ليش تزوجة هو من شابة ماتزوجها مو هسة!؟
لو شهب التتخبل من سراج تتزوجة شلووون شلووون بس اريد استوعب ماكدر بعد؟
اجة يوسف رحتلة لو بيدي اسطرة راجدي كتلة
صدك السمعتة يوسف؟
شنو سمعتي.
عمي يريد يزوجك نيزك؟
اي ليش بيها شي اني اخوها وحرام مثلاً
نيزك نيززززك هاي نيززك اختي تتزوجك؟
ولك هي تموت منك تمووووت
واني اموت عليهااا اموووووت
لك يوسف انت عاقل مو مثلهم ارفض ارفض لان تعرف نيزك شنو بعد الصار كرهتك
والله ذبحتنييييي بالصار جنت صغيررر وبكيف امي كالتلي لا تاخذها عفتها تروح
انت تعرف مو بس هاي تعرف نيزك ماتحبك ولا تطيقك شلون تاخذها شلووون.
تقبل مجبورة تقبل ابنها ماتكدر تعوفة واني اربية احبة امير واعتبرة مثل ابني والله
مو صاحي انت مو صااااااحي
دخل جوة ولا كانة شبيهم ذولة صدك يحجون يزوجونهن بالغصب ثنينهن ما راضيات ولا راح يرضن صرت الوب بمكاني شلون لو شهب عرفت بالخبر تسودن والله لو تنتحر بس تعرف.
مر اليوم واني ميتة والله ميتة الدنيا طالعة من عيني اباوعلهن وگلبي متگطع عليهن نيزك هاي طيحتها لان خيروها بابنها وهو روحها هاي روحها امير لو يرجعونة ويزوجونها لواحد غريب لو يبقة عدها وتتزوج يوسف شلون يفكرون لزموها من الايد التوجعها اخ يوسف كل ما اكول خطية اطلع اني الخطية.
خليتها بكلبي وسكتت اخاف شهب تدري وهي اول وتالي يگللها وتخبل علينة، طلعت ورة نيزك اريد احجي وياها بعيد عن شهب لكيتها تحجي وي عمي وتتوسل بية رجعت لذاكرتي نفس المشهد هاي ثاني مرة نيزك تتوسل بيه بهاي الطريقه مرة من زوجها وهاي المرة حالتها تكسر الخاطر كسر والله اليشوف حالتها يبجي عليها دموعها تصب وجهة احمر تتوسل بية.
نيزك: عمي فدوه لاتزوجنة فدوه غصبتني مرة وخسرت كلشي لاتغصبني مرة ثانية اني واختي والله تتخبل واني وياها
سالم: انتن ماتدرن الناس اكلت وجهي وصاير علج بحلوك اليسوى والما يسوة متعافيات بنات جبار متعافيااات ولج مطلكة وابنج وياج منو اليرضة بيج غير الشايب والشاب لو ياخذج ثانية لو مطلك وماشايلتة الكاع مو زين شاب قبل بيج وابنج يتربى كدام عينج شتررريدين
ماريد يوسف ما ارررريدة.
للغريب تونين وتحنين وخررري غاااد عنييي
نيزك: ما اتزوج وشهب ما تتزوج مو بكيفكم احنااااا مو بكيفكممممم شفتونااا ماعدنا اهل كلتمممم ناكلهن.
رجع عليهن من شعرها سحبها وصار ينطيها راجديات صرخت بصوت عالي وي صوتها حرت شلون اطلعها منه شلون ملخها تملخ واني بطرك ايد وحدة اصيح بعلو صوتي بس كون يعوفها وماعافها سطرني راجدي طفة عيني بية احسها طفت والله كمت ما اشوف بيها صبيحة وافنان واكفات يباوعن متشمتات وشهب ركضت عليها تريد تطلعها منه دفع نيزك بعد ما نهاها ورجعلها لزمها من شعرها وهي صرخت لازمة ايدة والله احس فروتها انشالت.
شهب: بنااااات القندرررة تترضن بولد عمجن وتنجبببن واااانتي شهبببب انتييي بالذاات الناس كلهااا تدري ملعوب بيج لعب محد يدك بابجن بعد ابن عمج يريدج ترضين بيه لا ازوجج لشايب عمرة بالستين وكولي سالم ما كال ارفضن وشوفن
دفعها تكومت على وجههة بالكاع دموعها تتناثر على وجناتها كامت لنيزك تكوم بيها ماتبين ملامح وجههة
من الضرب كامت بيها مابيها.
صبيحة: عساجن بالمرض فوك ما نفگجن ضالات بالدار تكسر هالراس اليابس نيزك تكسر
ضربت على الكاع بحركة وصرخت بيهن
نيزك: وحق تراب ابوي اااذا مااااا نعلت شرفكممم وخليتكممم تتلاطمون ما انحسب بت جبار التاكلون بخيرة ااني اعلمكم شلون تزوجونة بالغصب
صبيحة: فوتي فوتي خفة لهلوجة شيسوي بيج الله بعد.
افنان: ولج اذا ما اجيب مرة فوكج واخليج خدامة الها ما اتسمى افنان الا اطلع القضى والمضى منج نيزك بس اصبريلي ضامتلج ضمة شكبرها بس صبر كم يوم يا نيزك الا اكسر راسج
كل وحدة بيهن تعد وتصف ولا تكول بناتهم وياكلون بخيرنا يكول اعدائهم يحيرون شلون يدبرلنا المشاكل.
مر اليوم مثل السم كل وحدة حايرة بروحها وبضيمها شهب متخبلة حتى اكل ما تاكل ونيزك مدري تحير بيها مدري بروحها بابنها اني الالم ذبحني وحتى دوام ما داومت بعد.
كاعدة بالمطبخ اسوي جاي ودخلت صبيحة كالت
راح نروح للزيارة باجر حاجي اخواتج يكومن للحفافة وراها نعقد خليهن يحظرن رواحتهن بنات افنان راح يجن يجهزنهن.
ينخمش كلبي كل ما ينجاب طاري هالموضوع معقولة يصير صدك اني من يمي اتخبل راحو مو بغرض الزيارة اخذهن عمي يحلفهم بالعباس هما مابايكين الفلوس والبيت كله اخذة بس احنا ما كالولنا نروح وياهم.
رحت للغرفة لكيت نيزك تلبس بعبايتها وتقنع بشهب
نيزك: امشي شهب امشي نظف وجوهنا ونعدل
شهب: تخبلتتتتي اااانتي مووو
اس اس صوتج لاترفعينة خوش لاتصيحين
شهب: تعاي نجمة اسمعي شتدكول اسمعي تريدني اوافق.
بقيت مصدومة اباوعلهن من صدك تحجي نيزك ابد مامبينة تتشاقة شكلها قبلت وتريد شهب توافق وشهب متخبلة.
نيزك: يلا هسة تمشين وياي؟ اطلعي شوية من البيت اتنفسي راح تخيسين بهاي الغرفة
طلعت صايتها ولبستها هي والشال شهب مصدومة من تصرف نيزك بس تبجي اخذتها تسحل بيها سحل بالصالة.
يلا منو التاخذنة للحفافة نروح وحدنة؟
افنان: هسة اوكفي خابرت على بنتي تجي تاخذج اشوفج رضيتي!
نيزك: فكرت بعقلي وكلت الولد يحبني وعلى كولتجن شاب والف وحدة تتمناة وفوك كل هذا بيتنا محد يحاجينا منو؟ انتي وتخافين مني العب عليجن لعب واصير الكل بالكل واختي هم وياي بعد شكو ليش ما اقبل
افنان: احلام العصر هاي هههههههه يابة نيزك يابة شايفه كواكب ما اكرههة بكد ما اكرهج وعد مني وعد اخبلج واخليج تركضين بالشوارع وخدامة لمرة يوسف
نيزك: هاي اذا شاف غيري يوسف عود زوجية.
نزل هو من فوك بقة مصدوم بكلام نيزك باوعتلة وكالت: -مو صدك يوسف عيونك ما تشوف غيري اذا تزوجنة؟
يوسف: هسة اني وما شايف غيرج مو من نتزوج
افنان: وووولكم من هسسسة يلاغم تتسرسح عليهااا ربحتتت ربحتتت والله اتبرة منككك
طلعت نيزك تضحك وافنان تخبلت خبلتها يوسف راح وراحها فرحان يكلها.
يوسف: احسن شي سويتية فتحتي صفحة جديدة الراح راح والله ادللج ادلل انسيج العشتية صدكي
نيزك: واثقة بيك اني.
طلع سراج ايدة على بطنة مكان الضربة شهب من سمعت صوتة صارت ورة نيزك ترجف وهو كال.
سراج: شهبتي ماضل صبر بس كم يوم وتصيرين بين ادية اووف
يوسف: اني اشوف لو تتأجل شوية بعدة جرحك اخضر
سراج: هسة لو انزف هم اتزوجها ماعليكم بيه تاجيل لا تاجلون يكفي هي كدامي
طلعت نيزك بسرعة وشهب لافتهة بحضنها انهارت البنية.
كواكب: اندك الباب بهمجية رحت افتحة واندفرت وكعت على وجهي فتحت عيوني بصدمة وصحت
نعلعلة على اهلككككك شبيييييك
ماحاجاني راح يركض لغرفة دراهم رحت وراه اشوفة بيدة سلاح توسعت عيوني بخوف وسالتة
شتسوي بيه غضنفر؟
غضنفر: يفترون وراي يردون يكتلوني واني بطرك روحي
منو ذولة؟
طلع ما حجة شي مستعجل وصل يم الباب ورجع علية يحجي بخوف.
غضنفر: مراقبيني هسة شوية ويطبون للبيت خاف ياذونج كواكب
ها.
امشي وياي امشي حتى لو طلعتي يتلكونج هسة يطبون للبيت وراي
دولي اروح وياك
خلة مسدسة بجيبة ودنك شالني من رجلية خلاني على ضهرة صرخت ودفرتة ماكو هيج دقايق والسيارة متحركة بينة عدلت نفسي واباوع للطريق بخوف يسوق بكل سرعتة ويباوع من الجامة.
كواكب: اشتعلت ررروح الخلفوووك وين ماخذنيييي
صوتج وسم وقز القرررط
بگلبك وبگلب الخلفكككك وووين ماخذذذني.
صرخت بخوف من اشتغل الرمي علينة من ورة صار يجي بالجامة الاخيرة والسيارة على ساعة تنكلب من سرعتها حسيت نهايتي هنا.
كواكب: ما اررريد اموووت غضنفر ماررريد لككك اخواتي ما مأمنتهنننن بعدنيي ما ماخذة بحقنة ولا لاگيتهمممم
ماتموتين بس انجبييي اخذي المسدس اخذية
شمر المسدس علية لزمتة بيدي: -شسوي بية
ارمي عليهم بس ايدج طلعيها لا تراوين وجهج
ماعرف ارمييي.
مسحوب اقسام بس اضغطي على الزناد هسة بس ترمين ينسحبون لان عبالهم ماعندي سلاح
اخذتة منه وباوعتلهم ورانة بمسافة طلعت ايدي من الجامة ورميت طلقتين بسرعة دخلتها لايرمون عليها ايدي ترجف رجف راسي انضرب بالكشن من لاف السيارة بسرعة رهيبة منا لربع ساعة متت يلا وكف السيارة بمكان اشبة بالخرابة نزلت بسرعة احس معدتي تريد نتشلع والمسدس بيدي خليتة بحضني وكعدت افرك بيها كوة اجر النفس جان متتت.
درت وجهي علية يخابر شلت المسدس ورميت جوة رجلة صار يطفر ويصيح.
لججج خبلة خبلة راااح تموتيني
ابن القندررة لو ميتة من ورررراك الا تورطني ويااك ماكدرت تقنعني اشتغل شغلك الخايس كلت خل اسحبها شوية شوووية
لا كواكب وروح امي لا بس صارت فجأة اتركي السلاح لاتكتليني
نعلعلة. خل اسكت خل اسكت
تسوين فضل
كمت افتريت بالمكان ورجعتلة على وكفتة
كواكب: رجعني يلا عندي شغل
يا شغل هذا ام المخضر وماتت سبتي بالشوارع.
ضربتة على ضهرة بوكس وهو يضحك كال
ماتجين تشتغلين وياي فلوس ولج فلووس تنامين وتكعدين عليهن
ههه دباع شكلك الاجرب ما عدلتة بالفلوس
لا ضامهن حتى اتزوج بيهن
هههه منو التقبل بواحد مثلك
وحدة مثلج ماعدها احد تفتر بالشوارع
ااااانعل ابوووك انجبببب انجببببب
شلت طابوكة من الكاع وهو لزم ادية اخذها مني احس نار شعلت بگلبي نزلت دموعي بقهر وهجمت علية اضرب بية بكل قوتي وهو مخليني على راحتة.
كواكب: ااااني مووو بتتت حرررام مو بت حرام ليش ماتفهمووون ليششش
كلها تكول هيج، زين فكري لو انتي مو بت حرام وعندج اهل ليش هيج بالشارع تظلم الدنيا ماعندج مكان ترحيلة اسابيع تنامين بالشوارع محد يسال عليج لو ما دراهم هسة انتي هم بالشارع
راح يجي يوم والكة اهلي الصدك وافتر عليكم واحد واحد واكلكم ذولة اهلي اني مو بت حرام
ضحك بصوت عالي واني امسح بعيوني واحجي بحركة: -خاصة انت اجيبهم واكلك ذولة اهلي.
غضنفر: اذا صدك مو بت حرام وراج اهل وين تلكينهم بهاي الدنيا الجبيرة؟
هذا الله هذااااا موجود ويشوف كلشي هو يجيبهم ويخليني التقي بيهم ولو مرة بعمري
لا تعيشين بوهم كواكب
احنا النخلق الوهم ماكو وهم
عيشي حياتج وانسي اصلج الا متى تبقين تركضين ورة المسميتهن اخواتج هنا يعيشن ببيوت ويخلفن وانتي؟
اني احرسهن وادافع عنهن لحد كطع النفس.
لا لا هذا مو انصاف انتي هم عيشي اني مستعد اتزوجج ونبدي من الصفر تدرين اكدر اتزوج اي وحدة
اي ماتروح تزوج منو الازمك
لازمني اريدها بدون اصل مثلي وما لكيت غيرج رسمتج بالي
اخربط وجهك مو بس الرسمة الرسمتها بالك
انوب تخرب على العنف
اخرب على امك الس
رحت للسيارة صعدت وهو بقة يخابر صحت علية بصوت عالي يلا اجة بمكانة.
يعني صوتي انبح واني اصيح عليك ماتسمع اطرش كون طرش اليطرشك
غضنفر: امنت المكان بت المسموط.
انعلللل اهلككك لاتغلط على اهلييي
هههههههههههههههههههه بس لو ادري هما وينهم
امشي امشي صار عندي جالي كد ما باوعت بوجهك
غير تستقر لميس
هه ترة شايفتها لميس هم جنها ولد مثلي
همزين معترفة بروحج جنج ولد
وجهة البعيجي اشتعلت رواحكم تشبهون البعيجية.
نزلني على الشارع وهو راح بطريقة رجعت للبيت لكيت دراهم جاية ويمها نسوان وياهم طفل صغير بس يبجي بقيت اباوعلهن قرت على الطفل وكتبتلة حرز ومي وبخور يلة راحو رحت يمها كعدت وكلبي يدك بقوة.
ها دراهم شصار وياهن
سولفتلي الكلام الكايلتة الها نيزك واني تخبلت يردون يزوجونهن ومن ذولة الحثالة جسمي صار يرجف من عرفت حالتة نيزك وشلون مهددينها بابنها طفرت ودراهم جلبت بيه ماتخليني اتحرك.
عوفينييي دراهم عوفينيي كل واحد طلقة براسة اخلي وخل انعدم وهنا يعيشن براحة وبعز مثل ماجانن
العقل يمة العقل المن الله انطاة للبشر غير يفكر بية
شفكر بس كليلي شفكر استولو على كلشي املاك وخلو ابوي جبار يوقعن عليهن وهما على فراش الموت نيزك وزوجوها غصب هسة هم راح تنعاد وترجع مخبلة النة
روحي اكعدي وي روحج وفكري زين كبل لاترحيلهم.
تركت ايدي باوعتلها طيف ابتسامة على وجههة طلعت من البيت ماكو غير الاجرام براسي والقتل شلون اخلصهن منهم ماكو غير هاي الطريقة لعنت الشيطان ورحت اتختل متلثمة ولابسة شفقة على راسي مابين شي مني مريت من معرض السيارات والحظ الفكر جانو واكفين برا ثنينهم يسولفون البعيجي وضيم المعثور بذاك اللبس والاناقة شكولهم تلمع مثل حظي اغسل ملابسي وارجعهن علية اللهم لا حسد صارت عيون ضرغام بعيوني خزرتة بحقد وهو كال.
ضرغام: انعمن هالعيون بس تخوزرين
ابن القندررة منو اليمك تريد اسد عيوني من اشوف وجهك الازرك
لاتباوعين لوجهي الازرك اذا ماعاجبج
تدري اني من اجوع ماعندي فلوس اشتري اكل فافضل حل اباوع بشكلك حتى تنسد شهيتي
كور ايدة بغضب والمعثور يضحك راد يحجي ضرغام كلة ضيغم: -يمعود عوفها لاترتكب بيك جريمة هسة هي تريد تكتل شكو واحد يغثها حتى فرد مرة تدخل سجن
كواكب: تحياتي للربتك على هيج عقل.
ضيغم: لاتلزمج الشرطة مو مطلوبة شكو تفترين
ميخصك
ضيغم: مو احجي من مصلحتج شبيج بابا
عود شكراً
ضيغم: ما ينتازلون عن الدعوة؟
لا راح يضاعفونها ابشرك
ابتسمت ومشيت اسمعه يكل لضرغام
والله ينكسر خاطري عليها هسة شنو ذنبها هاي اني بس اذب الصوج بالخلفها وشمرها هاي الشمرة
ضرغام: يمعود تعيش ماعليها
ضيغم: يا عيشة هاي على ساعة تموت هي هم عايشة مثل البشر
ضرغام: دروح روح الحكها حتى تشخط وجهك الحلو بالسجينة.
مشيت بسرعة ابتعدت عنهم وكعدت على صبة خليت راسي بين ادية ودموعي صارت تنزل بقهر ينقهرون علية ليش ينقهرون يذبحوني والله انذبح بس اشوف واحد ينقهر لو يباوعلي بنظرة شفقة اني راضية ومقتنعة بحياتي لان لو اريد اعترض شسوي شنو اليتغير بيها راح اعيش مرتاحة مثلاً؟ والله اني ماريد شي من هاي الدنيا الجبيرة بس اخواتي يعيشن بخير والگة اهلي الجابوني حتى اثبت للناس اني مو بت حرام بس ذني الاريدهن من الله عسى ما اموت ابشع موتة وابشع حياة اعيشها قابلة بس كون مايطلع كلامهم صح واني مو بت حرام بس اشوف اهلي كون حسرة بگلبي تبقة للموت.
مسحت دموعي ورحت من بعيد احوم على بيتهم الحمدلله ماكو كامرات مراقبة بالفرع ماخذة راحتي بس كون اسمع اخبارهن، طكني الجوع ورحت للاسواق اشتري شي جنت دايرة وجهي على الحلويات واسمع صوت صبيحة جمدت بمكاني اسمعها تحجي وي المرة الكاعدة تبيع بالاسواق وتكلها.
صبيحة: لا خالة ما لكينة الفلوس راحن باجر ناخذ البيت نحلفهم بالعباس واليحلف جذب تتوقعين العباس يخلية سالم بمكانة يسطرة.
لا دخيل اسمة ماكو واحد يحلف بية جذب ويطلع من حظرتة سالم
اي شنسوي حتى واحد يخفها شوية واحد يتهم بالثاني ضالين
حقكم وعلى السالفة الصارت
ماكتلج معزومة على الخطوبة لابني سراج من بت عمة ويوسف هم نعقدلة هو واختها الثانية
هي الصارت السالفة عليها.
اي هي تعرفين بنات شابة وماتكعد راحة تلبس وتكشخ تتغاوة عليهم وهما شباب شيخليهم ما يلزمون رواحتهم كلنا مادام واحد رايد الثاني نزوجهم احسن من هاي الفضايح خليهم بالحلال يشوفون دربهم
لا هاي خوش تسون بنات هلوكت ماتعرف العيب تصيح بس تعالي بالمبارك عليكم خية
يلة اني اروح اودعناج خية
الله وياج ام سامر.
وجهي احسة يريد ينفجر من الحركة ولج صبيحة اخواتي يشمرن برواحتهن هنا غير يتفلن دم مهن غير شهب ماتطلع للحمام وحدها، مدري شلون لزمت روحي وما لزمتهن ركعت راس براس حتى ماشتريت طلعت هيج والمرة تصيح وراي.
شو ما اشتريت خالة
ماريدد
بس صارلك ساعة تكلب
بكيفييي
اي والغسل.
اليغسلجن كون بالمغيسل طلعت من المنطقه ورجعت لبيت دراهم هناك عاد اكلي لكمة صح دراهم مرة جبيرة بس قوية اشوفها وتطبخ لو النسوان يودلها اكل مايخلى بيتها، واخواتي راجعتلهن ما اعوفهن الهم.
نيزك: اسحب بشهب التون وترجف طول الطريق حاضنتها واهمس باذنها.
نيزك: ما اخلية يلمس شعرة من راسج وغلاتج عندي اسكتي شهبة خليني اعرف شغلي
شهب: راح يزوجوني اله والله هو هو يشرب يكبسل وحتى نور جان يموتها مايحس على نفسة والله انتحر بس تصير صدك
اني وياج هم انتحر اذا صارت صدك بس ركزي وياي ترة اني هم هيج سويت وزوجني لان البجي مايحل شي العقل هو يحل كلشي شهب
شناوية تسوين
هسة بس خل اشوف كواكب واعرف اشتغل.
خاف كواكب انسجنت
مادري هو اريد اشوف وين صفت بعدين اتصرف
وين رايحين احنة هسة
للصالون مدري للحفافة المهم خليها تشتغلنا واسكتي خليهم يطمنون شكلك قنعنة لان يدرون ماعدنة حل
زين شلون تطلعين تشوفين كواكب ذني مايخلنج
اطلع مو بكيفهن شوفي من اشرلج تماوعي هناك واني اكلهن مريضة اروح اجيب علاجها
شبيجن بس تبسبسن
نيزك: ها عيني جنت احجي على شهب واقنع بيها
اي هيج من البدايه عاد سوة بنفس البيت وهو يحبها سراج.
صح يحبها ويتحارش بيها وحاول اكثر من مرة يعتدي عليها مريض هذا
يعمودة لاتحجين هيج كدام اختج هما هيج الزلم بعد ماتشوف دربها واختج حلوة
كال زلم نعل ذولة نعل وين الزلم حيوانات يمشون ورة غريزتهم مايهمهم احد ذولة.
امشي واحجي بيني وبين نفسي وصلنا للصالون وشهب سكتت بس الرجفة لازمتها من سمعت صوتة الحقير دخلنا وجان قليل نسوان بلشت بية بالبداية نظفت وجهي وعدلت حواجبي صار وجهي احمر ويلمع لمع صارلي شكد ما جاية انظفة وين ذولة يخلون الواحد يتنفس.
غمزت لشهب وهي ساحت طفرت عليها امثل خايفة سالتني بنت افنان شبيها كتلها: -مخلص علاجها اذا ماشربتة تتخربط وتصير زركة يمعودة منو يحتار بيها هنا كبل رادلها مستشفى اذا تاخرت بعد وما اخذتة
فلك هسة شنسويلها
اروح اجيبلها العلاج هو مخلص من البارحة ماتشوفين وجهة اصفر
اي بس اني ماعندي فلوس
اني عندي فلوس يلة رايحة ادورة الها
بس مو تتاخرين
اشوف اشوف.
طلعت اضحك على اختي طلع بيها البلة سوت روحها مواتة خلتها تتسودن كالت راح تطيح علية، سرعت خطواتي وغطيت وجهي بالعباية خاف واحد منهم يشوفني ويلعب بيه جولة، اول مكان رحت ادورها بية السوك جان شبة فارغ ماموجودة بيه وحتى محمود مالكيتة رحت افتر قريب من السوك عيوني دورها بكل صوب وهل يعقل ادور اختي بالشوارع؟!
ماحسيت غير واكفة يم المعرض وكفت اجر نفس وطلع ضرغام بسيارتة شافني طبكها ونزل اجة يمي.
ضرغام: ها اليوم هنا خيرج؟
والله اجيت ادور اختي
هم كواكب
ماكو غيرها ماشايفها وياك
لا، بس سؤال ليش هي مو وياجن بنفس البيت؟ انتن مو اخوات؟
اي اي بس سالفة طويلة هسة اني مستعجلة
وجهج احمر هم مسخنة هالمرة بدال ابنج
لا بس جنت بالحفافة
غمضت عيوني بفشلة من حسيت على نفسي فتحت عيوني وابتعدت كال: -لا تستحين انوب بالزايد تحومرين هسة واذا رحتي للحفافة شابة ومن حقج.
انت وين تحجي واني وين هما يردون يزوجوني غصب وهذا يكلي من حقج
يزوجوج غصب ليش انتي مو متزوجة!
لا مامتزوجة منفصلة خووش شلون عالم كلشي ما تستفاد منها
عفتة ورحت لبيت دراهم امشي سريع وصلت لبيتها دكيت الباب بقوة ومديت راسي اصيح
لجججج كواكب وينج انتي اطلعييي اذا موجودة
دقايق وطلعت بحلكها عضم تكرط بية شافتني وشمرته وركضت غسلت اديها على السريع ولبست برجلها اجتني سحبتها علية وحضنتها ابوس بيها وامسح بشعرها.
نيزك: مشتاقتلج انيي
حتى اني بس صاير شي
راح يصير دريتي مو
اي وباجر حضرن رواحتجن كلجن بعد ماتضلن يمهم
وين نروح كواكب وييين؟
لا تخافن اني عندي فلوس اخذجن لخالي همام
لا لااااا كواااكب كلشي ولا اخوالي ماريدهم يسمعون بينة تعرفينهم شماتة وما يردونة بعد الصار
اي بس همام ماله علاقة بيهم هو يحبجن وبعيد عنهم لا يرحولة ولا يشوفونجن
اخاف من اسمع بطاريهم كواكب
لاتخافين ما تطلعن هيج اني امن عليجن.
كتلي عندي فلوس منيلج وشكد؟
ماعليج هسة روحي ومن يطلعون للزيارة تحظرن رواحتجن ممستمسكات جناسي كلشي اخذنة وياجن
كواكب خايفة ولج شلون هيج نطلع
اني هذا العندي والله شسويلجن اكثر من هيج؟ نيزك تعرفين سالم البراسة ينفذة تتزوجن؟ عندج قابيلة يوسف يتقربلج
اجرم بية والله بس يمد ايدة ادخل سجن بيه
شهب عدها قابلية تتزوج سراج وتعيش وياه بغرفة وحدة؟
تنتحر والله.
ماكو غير هذا الحل روحن يم خالجن وهمام بالذات ما يفكرون بية لان منسي وهم مايفكر ترحن لاخوالجن بعد الصار لان يعرفون علاقتكم منتهية
بس اخاف من العواقب
كلشي بيه عواقب خياراتهم وقراراتهم الخبيثة وراها عواقب تضر الكل يا نيزك نسيتي زواجج وشكد عانيتي تريدينة ينعاد؟
لا لاااااا لاااا
ارجعي هسة باجر نهايتها لاتخافن اني ادبرها.
رجعت ارجف وخايفة صح ماكو غير هذا الحل وجنت افكر بية لان اعرف عمي قرر واحنا نفذ بس من صارت صدك خفت شلون اطلع واخذهن بس هم ما اكدر نبقة وياهم بنفس البيت على يوم الكة اختي مغتصبة وتنتحر بعدها اني شنو الاستفادة الربح بيمن؟ نجمة المسوينها خدامه الهم لو الكواكب التفتر بالشوارع ماعدها كاع تلمها؟
ما انكر الخوف ولا انكر العواقب الراح تصير من ورة هذا القرار بس مجبورة ماعندي اي حل وخالي همام راح يستقبلنا هو يحبنا كلش اكيد يستقبلنا مامعقولة يعوفنا بالشارع خل احاول واشوف شلون تصفى وربك يحلها.
دخلت للصالون واستلمتني بت افنان
وين صرتي مو تاخرتي
شسوي غير ماكو علاجها والصيدليات معزلة هسة
عاد جبتية
لا ماكو كالو باجر يتوفر شلون صرتي شهب
شهب: زينة كلش
يعني مايتحاج علاج
شهب: اي.
لكيتها مشتغلاتها منظفات وجهة طلعت تبرج برج عين الله تحرسها هذا الجمال كلة لواحد مكبسل ومتزوج ومرتة موجوده وفوك كل هذا تحت رحمة صبيحة وافنان يعني ما تخلص عمت عيني اي والله لو اخليهم يسوون البراسهم.
رجعنا للبيت ومر اليوم هادئين ساكتين گلبي يرجف رجف بلغت اخواتي بالقرار شهب كيفت بس نجمة تخبلت تخاف نجمة صارت ترجف من الخوف.
نيزك: نجمة احنا مصيرنا واحد لو كلنا نطلع لو مانطلع وتخسرينا تبقين خدامتهن بدون سند بهاي الدنيا اني مصيري سجن وشهب هاي كدامج تنتحر شكم مرة بعد ما تحارش بيها سراج حاولت واحنا بكل مرة نلزمها؟
مو انتي نفسج لكفتيها بالحمام تريد تكطع وريدها تخسرينا كلنا وكواكب من الاساس خسرناها نتحسر على شوفتها والشوارع اشكال بيها.
لو تدخل سجن لو تنكتل واقع حال هذا القتل والاغتصاب وغيرها كلهن بالشارع وكواكب لو ما شكلها يشبة الولد وما يجذب النظر عليها
نجمة: بس خايفة
كلنا خايفين بس هما مايفكرون بس برواحتهم كتل وكتلونا جبر وجبروني زوجوني بالاكراة وخبلوني مو رجعت شبهة صاحية؟ شوفي حالنا شوفية جسمي ازرك مطگع منين ما الزمة انتي حالج شوفية حتى الدوام الجنتي تغير من تروحيلة بهذا حالج بطلتي وكعدتي.
احنا هنا مالنة عيشة يحركون بكلبي واموت على روحي وعليجن اموت من اشوف شلون ذالينج لو شلون يطلعون ويطبون وياكلون احسن الاكل واحنة هذا الاكل الاكل ما ينطونة ياكلون دجاج واحنا طماطة واليكتل بفلوس اهلنا يا عيشة هنا ياعيشة
ابني ربع ماعندي انطية مصاصة ماعندي اشتريلة وتالي وتالي نهايتها شنو؟ الله وكيلجن هذا الله يشهد علية لو ما زوجنا عمي ليوسف وسراج يبيعنا بفلوس لشياب وهو كال وعند كلمتة تعرفنة سالم.
نامت شهب على رجلي وابني بحضني العب بشعرة ونجمة اجت من الصفحة الثانية دنكت ابوسهم واحد واحد كلنا خايفين وضالين الماء امامنا والنار خلفنا الما غركنا بالماي تاكلنة النار هي خربانة خربانة بكل الاحوال.
جمعت غراضنا بسكوت وطلعنا نتصرف عادي سوينة اكل ردت ادخل صاحني يوسف كلبت عيوني كال
شوية احجي وياج بالحديقة
خير
خير ان شاءلله.
طلعت وراة وكفت كدامة مكتفة ادية لصدري اكثر شخص بالدنيا حاقدة علية واكرها هو يوسف لو بيدي اشرب من دمة وامثل بجثتة هم ما ارتاح
يوسف: لاتباوعيلي هيج بعدج حاقدة علية
وللموت والله
انسيج
ماكو شي اسمة انسيج تكدر تنسيني الخذلان العشتة بسببك؟ لا ماتكدر حبيتك اكثر من روحي علقتني بيك خليتني احبك بشكل جنوني وتالي؟
تخليت عني بگلب بارد توسلت بيك بجيت بست حتى ايدك وكتلك اني مو بس احبك اني روحي بيك لاتخليهم يزوجوني اني الك مو انت تحبني!
وزوجوني غصب عني عيني عليك ضلت كلساع اكول هسة يخرب العرس ويكول اني احب نيزك رايدها اني ابن عمها اولى بيها بدلة عرسي والزفة صايرة واني عيني مكسورة والله والله زفتي وصلت واني عندي امل اكول هسة ياخذني كدام العالم ويكلهم إلى هاي الييي تحبني واني احبهااا بس ما سويتها.
وتزوجت هذا كلبي ماااات مااااات بيومها بيوم دخل علية بالغصب عشت اتعس سنين عمري بسببك ومن صرت مطلقة وابني بحضني رجعت تخطبني ههههههههههههههههه شلون حلوة هاي ماقبلت بيه وحدي قبلت بية اني وابني!
يوسف: كافي كافي الفات مات امي كالت بس تاخذها اتبرى منك وزعلت علية واني كلشي ولا زعل امي جنت جاهل ماعرف افكر وماعرف حتى مشاعري بس هسة لا ماكو شي يمنعني اخذج
تضل جبان وبحجي امك لو شما يمر دهر تبقى جبان.
عفتة ومشيت دخلت للغرفة لميت روحي ارحف ارجف كل ذرة بجسمي ترجف من الحركة ما انسة ذيج الايام بكد ما حبيتة كرهتة اضعاف اضعاااف لان مو رجال ومايستاهل ذرة من الحب الحبيتة اله توسلت بيه توسلت دموعي واني اتوسل بية يتزوجني بس عافاني برود عافاني وعاف حبي اله مال سنين عافة
واني الجنت اموت بطارية صرت اموت من ينجاب طارية.
جابتلي شهب مفاتيح الجنان خلتة بحضني ابتسمت وفتحتة على زيارة عاشوراء كملتها وقريت زيارة ابا الفضل العباس صرت اقرا بزيارتة ودموعي تنزل بس هو اليدري بكسرتي بكل يوم سولفتلة عن مشاعري سولفتلة عن العشتة هو وياي اول باول جان اني ماعندي اخو ودوم اكلة صيرلي اخو يابو فاضل وفعلاً كل ما احتاج شي الكة لساني يلهج باسمة وتنحل الطلابة.
كل يوم كل يوم اقرا زيارةعاشوراء وزيارة ابا الفضل ارتاح واحس زايرتة واني دهر ما داخلة ضريحة من وراهم حتى من الزيارة حارمينة كملت زيارتة وبست العلك البيدي منه خليت راسي بالكتاب احس اشتم عطرهم بيه نمت واني بهذا الوضع.
حسيت على البنات يغطني ويعدلن نومتي نمت مرتاحة الهج باسمة كعدت وي صلاة الفجر صليت وشهب فزت وراحت توضت صلت كدامي نجمة خطية راسها ساطرها والعلاج يخليها تنام ماتدري عفناها نايمة ماكعدناها للصلاة.
كملت شهب لفت روحها بالبطانية صافنة تقربت اغطي امير منتهي سودة علية من صارت الهوسة وليجاي حتى صوتة رايح لا يحجي ولا يطلب شي
مثل قبل انتهى الله لايوفقهم اتخبل لو صار بية شي.
طلعت سمعتهم يتريكون ويحظرون للزيارة سويت مثرودة لامير كعد ودخلت ما حجيت شي وياهم كعد وكلتة واني ضليت اروح وارجع منا لمن طلعو وبنات افنان بقن بالبيت يمكن وحدة منهن بايتة من البارحة.
طلعت راحو وبت افنان نايمة بغرفة امها لان الدنيا الفجر بعدها رجعت لغرفتنا شهب مبدلة ومبدلة امير نجمة كعدت تلبس واني ماعندي شي بس البس عباتي لبستها وطلعت اتاكد من الوضع اشرتلهن يطلعن طلعت شهب شايلة امير ونجمة ترجف وعيونها مدمعة تسحل بجنطة اخذتها منها وطلعت وراهن بغراضنة الشارع فارغ يصوصي مشينة مسافة وطبكت تكسي علينة بيها كواكب كاعدة بالصدر.
صعدت البنات والسايق نزل يدخل الغراض صعدت والسيارة انطلقت بينة واني بس انادي ابو فاضل يعديها النه.