رواية المنجمة للكاتبة كفاية كاظم الفصل السادس
انسحب الظلام واشرقت الشمس دفأ الجو بس ارواحنا باردة طفت المشاعر من قلوبنا وارواحنا المتعبة الهدوء كان سيد المكان بس صوت قلوبنا التتراقص بخوف تنسمع.
اعين مليئة بالدموع تخشى ان تسقط ندم تارة واصرار على الرحيل تارة اخرى، تنهدت بحزن واني اباوع بوجوهن واقراهن درت وجهي على الجامة احتار بيمن افكر وبيمن ابدي هواي هنا هواي براسي اريد بس الوقت حتى انبشهم نبش.
شوكت نوصل كواكب؟
التفتت على نيزك وهزيت راسي جاوبتها بصوت مبحوح
بعد شوية
نيزك: انتي تندلين بيتة؟
اي اندلة شبيج غير رحتلة مرة حتى يساعدج ولو ماهو انتي ما تطلگتي
بلعت ريكها بخوف وعصرت امير بحضنها تشرد بنظراتها مني عبالها ماحس بخوفها ولا ادري كل ماينجاب موضوع زواجها لو اسم زوجها ترجف خوف لحد الان عواقب الزواج الاجباري مدمر نفسيتها شلون اجازف بيها مرة ثانية.!
واخيراً وبعد وقت تعب نفسيتهن وصلنا المنطقة جانت راقية بمعنى الكلمة دليت السايق منين يفوت وصلنا لبيتة واسترجعت ذاكرتي ذاك اليوم الدكيت بابة طالبة مساعدتة وما ردني وخيبني ما انسة وكفتة ويانة للموت ابقة ممتنة اله ودينة برگبتي مستعدة ادفع حياتي ثمن حتى ارجعة هو النقذ نيزك من مستنقع مليان بالوحوش البشرية نهشو لحمها نهش جبيرهم وصغيرهم ماعدهم رحمة ولا حظ ولا بخت لو ما هو جان نيزك مو ويانة.
دفعت الكروة ونزلت بيدي جنطتي لبستها بظهري واخواتي نزلن نيزك لافة امير بعباتها لف يكول راح يلكفونة منها وتسحب بالبنات عليها نزل السايق غراضنا وراح بقينا بنص الشارع مايتجرأن يتحركن خطوة خايفات يردهن اي خالهن يردهن لان اخوالهم مو كفو واسوء من سالم للاسف، سحبت الجنط كدامهن وكتلهن.
لا تضلن واكفات بالدرب اتحركن.
وكفت الجنط يم الباب ودكيت الجرص مرة مرتين وكفت اباوعلهن بعد شوية ويبجن والله يرجفن يكول ماخذتهن للكصاب يكصبهن شكد يخافن هاي احنا بعز النهار شحال اني بنص الليل وافتر بالشوارع!
رجعت ادك الجرص من جديد شبيهم ذولة نايمين مثل هسة هما يكعدون لان عدهم دوام دكيت الباب بيدي عطرتة تعطر اجن اخواتي تقربن مني وجوهن تتلاطم كلمة وحدة مني ويكلبنها مناحة صحت بيهن بحركة.
كواكب: شبيييجن ما تگللي شبيجنننن تتلاطمن بعد بعد ابجن مااااا تبجن
نيزك: صوتج صوتج العالم نايمة
كواكب: هم كالت العاااالم هم ولجن اني شعلية بالعالم راح تخبلنيييي اخر همي العالم
نيزك: كواكب ليش مايطلعون ليش
مادري مو جاي ادك شبيهم ذولة مكبسلين
نيزك: استغفرالله استغفرالله كواكب راح اموت من الخوف
كواكب: دوومج انتي ميتة من الخوف شكبرج تصيرين بعددد هاي بدال ما تقوين اخواتج تخوفينهن بالزايد.
نيزك: ارجعي شوفي وين راحو ذولةة
رجعت ادك بالباب ومحد يطلع شمرت جنطتي من ضهري وتسلقت الباب اباوع بالكراج حتى السيارة ماكو والباب مقفل بقفولة بهتت ملامحي وطفرت انكت بدية خليت عيني بعين نيزك المليانة خوف
نيزك: ها وينهم؟
مو هنا
ابتعدت اشيل جنطتي وهي تخبلت لزمتني من متني تصيح بية: -شنووو مو هنااا شنووو
اهدي اهدي اني محسبة احساب لكلشي لا تخافين هسة احلها.
كواكب كواكب وياي ررركزي وياي هسة حسو بغيابنا وخابرو عمي شنسوي هسة شنسوي اذا خالي مو هنا وين نروح
نبتت اصابعي بزندها وهمست باذنها
صووتج صوتج اذا ايسنة من خالي اشوفلجن بيت للايجار نكعد بية ونسكت
منين فلوس ناجر بيت
عندي فلوس حتى اشتري بيت مو بس أجر بس صبرج علي
فتحت عيونها بصدمة وسحبتني عليها بقوة
نيزك: منيلج فلوس بس لاصرتي تشتغلين بالحرام
والله خبصتيني بالحلال والحرام
منين جبتي الفلوس منين.
جاوبتها بابتسامة خبيثة
بگتهم الفلوس اني الاخذتهن محد باكهن طفرت عليهم وبگتهن ولا تكولين حرام وحلال فلوس ابوي ذني وهما باكوهن منيلهم ذولة الفكر فلوس هما حتى اكل ماعدهم يشترون حلال اهلنا او اهلجن اخذتة وراح اعيشجن بية
نترت ايدها مني بقت مصدومة واخواتي يسمعن مامصدكات ابتسمت نجمة ما مصدكة كالت
قبل لاتباك الفلوس سمعت حركة حتى خفت عبالي جني
كواكب: اي وانتي جنتي بالحديقة تنوحين مثل الصخلة الارملة.
نجمة: هههه اي بس ولاتوقعتج انتي عبالي هما باكوهن ولج خليتني الناس مالخ بينهم
كواكب: اني كلتلهم من طردوني كتلهم اخلي بيتكم عالية سافلة واخليكم محد يباوع بوجهة الثاني وسويتها بفترة قصيرة كلش وحتى سامر بالسجن من وراي
نجمة: ضحكت ومشت للشارع بقينا مذهولين معقولة بنية هيج سوت بيهم لعبت بيهم لعب بس سامر شلون هي ورة سجنته مافتهمنا!؟
شالت جنطتها لبستها بضهرها وكالت.
اني رايحة ادور بيت للايجار ابقن هنا مو تتحركن اني هم ما اتاخر بلكت خالي يرجع بين ما اجي
راحت ونيزك كعدت على الرصيف وابنها بحضنها بس تنود بية تكلة: -دللول يبني دللول عدوك غريب وساكن الجول دللول
نجمة: عوفي امير شبيج مجلبة بية خنگتية خنگ
نيزك: يمة غابت شمسنا وعدمن نبات بلا وليان صفينا الراح والراجع يباوع علينة غطينا وياج يمة غطينا ولو تراب المكبرة بارد علينة.
شبيج نيزك كولي يا الله شبيج لاتخافين ماطول كواكب ويانة تنحل فلوس وعدنا بعد شكو؟ ندبرها صدكي ماطولنا سالمين وسوة
سحبت اموري من حضنها امشية الشارع فارغ بس احنا كاعدين صاحت نيزك من مكانها
اذا مارجعت كواكب نرجع للبيت نطلعلنا سالفة منا منا احسن ما يسحلونا من يرجعون
شهب: انتن ارجعن اني ما ارجع لو تموتن ااااروح وي كواكب اعيش.
كامت نيزك سحبتها من زندها تصيح بوجهة بعصبية: -لا تقارنين رروحج وي كواكب ااانتي ووين وهي ووين لجج هاي ذيبة ذيبة تمعط معط محد يتجرا يباوع بوجهة انتي الفاهية تدبرينها كواكب وي الجلاب عايشة ومايهمها ترجعج للشط وترجعج مو عطشانة لا ناسية العطش كالت مثل كواكب كالت
نزلت دموعها شهب وكالت بحركة.
شهب: والله والله بس ارجع اشمر روحي كدام السيارات واموت حتى اخلصصص منكممم تعببت من هاي العيشة خااانگيني خنگ لا اطلع لا امشيي لا مدرسة عايشة برعب وحابسة روحي بالغرفة هيي هاي هم حياة مليت اريد اعيش مثل العالم
صفكت اديها نيزك بيأس وكعدت بمكانها تكول.
اني بعد مالي دخل بيجن عيشن شلون ماتريدن هاي الشوارع وجولن بيها براحتجن خلني احافظ على ذرة العقل البراسي مسحولين مسحولين روحن رروحن اختارن دروبجن هي موتة موتة
خلت راسها بحظنها وشهب كلبت وجههة ماتحجي شي مسحت وجهعة بس عيونها مغوركة بالدمع حقها والله حقها محد يحس بمعاناتها مخنوكة خنك وساكتة بس وصلت حدها من رادو يزوجونها اله.
بقيت اللعب اموري والطف الجو المشحون التفتت على الباب الينفتح طلعت مرة عمرها يطلع بالوسط تعدل بشالها باوعتلنة وكالت: -خالها انتو جايين على الدكتور همام؟
نجمة: اي خالة ماكو ليش وين راح
والله يا خالة سافر قبل فترة زوجتة مريضة
باوعت بعيون اخواتي باسى نيزك غمتت راسها بحضنها تهز رجلها بتوتر كتلها: -خالة ماعندج رقمة
لا والله يا خالة ماعدنا تواصل وياة هيج من بعيد لبعيد.
هزيت راسي وسكتت كالت: -خاف محتاجات شي الله عليجن
نجمة: سلامتج خالة رحمة الله والديج هسة شوية ونروح بس تجي اختي
دخلت وسدت الباب كعدت على الرصيف وشهب بصفي حضنتها خلت راسها على متني ودموعها نزلت مسحت عيونها الحلوة بيدي اكلها.
نجمة: لاتبجين شهبة كلشي ينحل صدكي ترة هسة اليزوج بالغصب ينحكم ويدخل سجن كلش كلش اذا مالكينا حل نروح نشتكي علية بالمركز.
شهب: هه ترة هو مو وحدة كلها وياه تشهد ضدنا هسة يلوفها علينة واحنا ماعدنا شهود ولا دليل سالم حتى دليل يطلعلج وكلشي يكلبا ضدنا ترة مو سهل هو
عوفي سالم وخيستة والله لعبت رواحتنا منهم هسة احنا شحصلنا منهم عوفيهم خل نرجع مثل قبل
رفعت راسها مبتسمة
شهب: تذكرين نجمة مال هاي الاغنية اني وردة بيضة شكلي جميل
ضحكت وكتلها
نجمة: اي يا محلا جمالي لمن اميل هههه جنتي تكولين اني الوردة البيضة لان بشرتي بيضة مو انتي.
شهب: ترة صح هو اني الوردة البيضة وانتي وردة حمرة لان خدودج حمر مرات يصيرن
نعمة الله اهمشي وردة
امير: واني
انت ورد الورود
اخذتة ابوس بية وادغدغ وهو يضحك بصوت عالي ويريد يفلت روحة مني انفتح الباب نفس البيت المرة الطلعت منه بس هالمرة مو هي لا غيرها مرة جبيرة بالعمر لابسة شيلة سودة وثوب اسود بيدها عوجية خشب ارتجت على الباب وصاحتلي.
تعاي حبوبة تعاي
رحتلها وصلت قريب منها كتلها: -ها حجية محتاجة شي.
بعد جدتج اروح فدوة لهل حسن لا يبعدي ما محتاجة شي بس اسال انتن ليش بالشارع كاعدات جنت كاعدة بالمطبخ اتريك واتنوعلجن من الشاشة كسرتن باب كلبي ما تكليلي سالفتجن شني
ابتسمت بحزن ودنكت راسي كتلها
حجية اجينة لخالنا وطلع مسافر
جا ماترجعن لاهلجن شلون تظلن هنا
والله يا حجية احنا سالفتنا طويلة هسة نروح يمكن
وانا حبوبتجن تسرسح على السولف جيبي اخيتاج وتعالن سولفلي واحنا نشرب چوي (جاي).
ها لا هسة تجي اختي ونروح ما نطول احنا
لا تخافن اني حبوبتجن والزهرة گلبي دوة نار عليجن عرفت وراجن سالفة دشن حبوبة البيت فارغ بس انا ومرة ابني وحفيد واحد بغرفتة ولا اله غرض بالناس صيحي اخياتج
هزيت راسي ماعرف ليش كلبي ارتاحلها شكلها بية قبول عجيب وطريقة كلامها تخبل رحت لنيزك جانت تباوعلنا صرت كبالها اكلها.
نيزك الحجية تكول خلي يدخلن بالبيت محد بية بين ما تجي كواكب احسن ما باقين بالشارع.
نيزك: من كل عقلج نجوم؟ عرفة ولفة امشي كليلها هسة نروح ما نطول
تحركت اروحلها اكلها وهي كان عرفت كلام نيزك اجت علينة بطرك ثوبها تمشي صارت كدام نيزك تكلهة: امشي حبوبا امشي جوة نشرب استكين جاي ونسولف سوالف حبايب بين مايكضي شغلجن جا تظلين هنا بدال هاي اكعدي وي حبوبتج امشي يام الوليد امشي حبوبا.
كامت نيزك وهي اخذت امير من ايدة ولا استغرب يكول يعرفها مشة وياها وكلنة لحكناها يكول صدك بيبيتنا او مرة تعودلنا حتى نيزك جانت معترضة بكلمتين خلتها تمشي وياها، دخلنة بيتهم بية حديقة صغيرة بصف الاستقبال وحمامات بالركن دخلنة مطبخهم بالبداية صاير بس ماشاء لله يخبل اثاثة راقي ونازك بنفس الوقت يفتح النفس نظافة وترتيب بية طاقة ايجابية عجيبة مشغلين دعاء كميل وريحة الجاي المهيل تارسة المطبخ المرة الطلعتلنا واكفة تكلي بيض شافتنا وكالت بابتسامة.
يا هلا ومرحبا نورتن حبايب البيت بيتجن
نيزك: تسلمين عيوني منور باهلة الباري يحرسكم
باوعتلنا المرة الجبيرة وابتسمت كالت
صلوات على محمد وحدة احلى من الثانية اعمارجن متقاربة الوالدة جابتجن على الاربعين
نيزك: لا اني الجبيرة وراي بتلث سنوات صارت نجمة وشهب قريبة على عمره نجمة بفترة صارت
كالت المرة الواكفة على الطباخ
فدوه شلون اسامي تخبل مثل صاحباتها بس شنو معناها ليش هل الاسامي.
كعدنا على الكراسي المحاوطة الطاولة كالت نيزك
وبعد عدنا اختنا كواكب اسمها
يا فدوة الباري يخليجن بس بنات ماعدجن اخو
نيزك: ما عدنا ما تشوفينة متبهذلين بهاي الدنيا
الحجية: سهلة حبوبا سهلة الله الحارس والله الباري سبحانة وتعالى حطن عينجن بعينة وهو يعاين حالجن
نيزك: ونعم بالله حجية هو منتظرين رحمتة علينة
الحجية: تعالن حبوبا احبجن انا هم نسيت ما حبيتجن كومن لية بعد مابية حيل اكوم.
كمنا باستنة وحدة وحدة شلون حجية تنحط بالكلب تمنيتها بيبيتي لو وحدة من اقاربنا كالت
سهلة يما وين ريوگج
سهلة: صار عمة
نيزك: رحمة الله والديج حجية احنا متريكين مانريد شي هسة شوية ونروح
الحجية: خايبة لا تسميني حجية احس روحي عجزت سمني باسمي يحبوبا
نجمة: شنو اسمج حجية
اسمي ذهب
ابتسمت كتلها: -حلو اسمج ذهب فعلاً يمثلج انتي هم ذهب
ذهب: خاب من اروح فدوه لهلحلگ المعسل شلون تحجي يبعدي انتي الذهب.
جابت سهلة الريوك خلتة كدامنة بيض خبط بيض عيون عسل مربى كيمر جبن جاي وخبر تحمي بية بل اوفن خلتة كدامنة نيزك وجهة صار احمر من المستحى.
نيزك: حجية ذهب احنا ما جوعانين هسة طالعين دايمة سفرتكم وبيت العامر ان شاءلله
ذهب: فنجن ترحن اذا ما تكابلني جا انة اريد اسولف عليجن وانتي زيبک مدري شسمج استجني خل البنيات ياكلن وجوهن صفر وانتي وكلي الفريخ البحضنج.
سكتت نيزك تباوعلنة ماعرف ليش اني وشهب اخذنا راحتنا والله حتى نفسيتي تغيرت من دخلت بيتهم تحس اكو سكينة مثل بيتنا مابية خير الحجية ذهب تجيب وتخلي كدامنا اكلنا وهي تسولف وتسال بينة.
ذهب: هذا الوليد ابنمن
نيزك: ابني حجية
ذهب: انتي الزيبگ عندج فرخ دهر دهر ولا مبين منين جبتية من فطر الحايط
ضحكت نيزك تمسح بشعرة وهو يباوع للحجية ويضحك كرصتة من خدة بلطف تكل لنيزك.
ذهب: جا ابوة وين
نيزك بحركة: بجهنمم.
ذهب: يااء فلك ميت الزلمة
نيزك: البس احمر وادك واركص بس يموت وشرط اشغل اغاني والعب جوبي على گبرة
ذهب: يااء فلك
نيزك: من اشتعلت روحة هل ملعون
ذهب: يااء فلك بس لا شاردة منه جنج غزال
نيزك: لا حجية مطلكة نعلعلة روحة حجية واليرحم اهلج لا تجيبين طارية لان تلعب روحي واريد ازوع
ذهب: مبين خيسة ابن خيسة
نيزك: كلش وداعتج انتي اخيس شخص على الكرة الارضية
ذهب: من لفة فلگ كون هيج.
نيزك: اي فدوة اروح لحلكج فلكين وتلث فلكات لفنة وطمنا هالعار ابن العار الفكر ابن الفكر
ذهب: بسج يالزوبك خلي يولي كونة خيسة سولفلي اهلجن وين وهذا الوليد الجان وياجن ليش عافجن كون تكولن ماعدنة اخي انا اعاين عليجن اول ما اجيتن ودكيتن الباب
رفعت راسي اشوف الشاشة مكابلتها الشارع فارغ
نيزك: والله يا حجية هاي اختي مو اخونا راحت تشوفلنا بيت للايجار لان خالي ماكو وسالفتة بطية
ذهب: يا فلك طلعت بنية.
نيزك: اي بنية سودة علية من الشغل والركضة ماطكتها عافية وتشتغل بالسوك بعد لبست ملابس ولد وكصت شعرها الناس ماترحم الابنية
ذهب: يا فلك حتى فلك عمت عين الاغم اختج تشتغل بالسوك وهذا حالها صدك عمت عين الاغم
نيزك: اي والله يا حجية صدك عمت عين الاغم متعوبة اختي كلش متعوبة لا حالها مثل البنات ولا شكلها شكل بنات
ذهب: اهلجن وين يمة.
نيزك: ميتين حجية ادعيلهم بالرحمة والله جانو ناس ماكو منهم امي مدرسة وابوي مدير مدرسة وهيج فد اخيار ويحبون ذاك وهذا ويواصلون الناس كلها سودة علية يا بوية عمت عيني عليج يمة
دكت على رجلها بحركة واحمر وجهه من ذكرهم
ذهب: الف رحمة ونور تنزل عليهم بكل وكت عبن راحو وخلو بنيات مستورات شريفات مثلجن
نيزك: الف رحمة على والديج حجية يلا احنا نترخص والله الكعدة وياج ماكو احلى منها بس احنا هذا حدنا نتشكر منج و.
قاطعتهة تكلها: -خاب ما تسكتين وين مولية اختج الولد ما رجعت عاينيلها منا من تجي عود اطلعيلها هسة ترحين تكعدين بالشارع تانيها يمي
رجعت نيزك كعدت بس تلوب مامرتاحة لان ناس غربة تستحي وماتريد تثكل على احد شربت ذهب جايها وباوعت بوجوهنا كالت
شني ما سولفتلي سالفتجن جا مو كتلجن اني اخرب على السوالف بحلوكجن عظم ما تسولفن اختجن تطول جا وين تلكة بيت بساعة سولفن الوكت طويل
تنهدت نيزك وذبلت عيونها بحزن كالتلها.
شسولف حجية منين ابديلج والله اني كلبي محمل ويريد ينفجر سنين حابسة بگلبي سنيين
ذهب: سولفي يحلوة سولفي جا هي كل حلوة يبجون عيونها منين ماتطيب روحج احجي حبوبا
نيزك: والله يا حجية جنة عايشات اميرات اربع بنات وابوي مدير وامي مدرسة وما احجيلج على لبسنا لو اكلنا لو طلعتنا كلة زين وراقي عايشين احسن عيشة بس ما ادوم الدنيا ولا العز يدوم دارت بينا الدنيا مو خوش دورة وعيشتنا بذل.
جانت امي تعالج على ولد ابوي ياخذها للدكتور تراجع راحو والروحة روحة سوو حادث بالطريق امي ماتت بساعتهة ما قاومت وابوي نقلو للمستشفى بقة اكثر، اسبوع بالمستشفى
ذهب: ويللاة يمة ويلاة
فاق ابوي وحجة ويانة صار عندة وعي كلنا يا الله مابية شي راح يعيش جنا صغار احنة وكلشي مانفتهم هنا عمي النذل مبصمة على كلشي يملكة وراها بكم يوم انطاج عمرة.
مسحت عيونها صارن حمر اني اباوعلها وگلبي يتفتت من القهر جانت ايام مأساوية عشنا بدون روح تمنينة نموت بذاك اليوم دموعي تنزل وشهب كامت للحديقة اخذت امير وياها كملت نيزك بلوعة وحزن وذهب منتظرة على عجل تعرف التكملة.
صفينا لا ام ولا اب بس عمي سالم هو ابونا وهو امنا وهو الذيب وهو الماكلنة باع بيت اهلي واحنا ماندري جنا متخبلين على اهلنا بس انوح اشترى بيت راقي وكعدنا بية من فلوس بيتنا من عرفنا بايع البيت مارضينة وحاجيناه كتلنا كتل بوكتها لان صيحنة وحاجيناه واستمر سالم يلعب بفلوس اهلنا توظف بفلوسهم وشغل ولدة وماخلى وهما جانو ينامون بدون عشا هسة ما كلنا شي خل ياكلون ويلبسون بس يخافون الله بينا بس لا سالم مايخاف ربة انذل مخلوق بعد زوجي وعيالي.
زوجني لابن خالي غصب واني طفلة شفت الويل اخوالي هم انكس منهم ولو ماخالي همام هددهم يشتكي عليهم لان يعنفوني يلة طلكوني بس بعد شنو بعد ما تخبلت الله وكيلج وحامل بطفل واني طفلة
نزلت دمعتها مسحتها بعنف وكملت.
جبت ومرت عمي حطت راسها من راس ابني يا اخذة لاهلة يحيرون بية يا رادت تبيعة وتخبلت تخبلت الله وكيلج لو ما كواكب اني بمستشفى المجانين هي ماخلتهم يتدنولي ويعوفوني بحالي وهم بهذلو احوالها كتل ويكتلونها حتى طرد برة البيت طردوها وخلوها تشتغل وتخلي بيدهم ما تدخل للبيت الا بفلوس ونامت بالشوارع ليلها.
شحجي وشكول شهب بطلوها من المدرسة ونجمة يخدمون عليها تركض ليل مع النهار حتى يرضون ويخلونها تكمل دراسة فوك كل هذا ابنهم عينة على اختي هو متزوج ومكبسل يردون يزوجونها اله لان مرتة مايصير عدها جهال واني يعقدولي على ابن عمي الثاني هم غصب وهل طلعنا من البيت لبيت خالي بلكت يساعدنا ويخلينة عندة
مسحت دمعتهة ذهب بشيلتها وكامت باست نيزك من راسها تمسح على ضهرها بحنية.
ذهب: يحبوبا ما ياكلونها يكلج نام مظلوم ولا تنام ظالم لان ربك وي المظلوم على الظالم هسة انتن الله وياجن والوياة رب الكون محد يكدرة لا سالم ولا ربعة
نيزك: ونعم بالله.
ذبت حسرة بقهر وسكتت هذا جزء بسيط من العشناة والشفناة التفاصيل تموت قهر ولو نذكرها تشعوط رواحنا، رفعت راسي للشاشة اشوف اجت كواكب تمشي شافت مكانا فارغ وهي لطمت على كصتها بحركة عبالها رجعنا شمرت الجنطة من متنها وكامت تصرخ بنص الشارع وتضرب رجلها بالكاع مبين تغلط علينة ضحكت نيزك وكالت: -روحيلها تخبلت عبالها رجعنا
راح يصير عدها سكر من ورانا.
ذهب: حكها والله تحركن الكلب جا هي فوك ما تساعدجن تغدرنها وترجعن روحي صيحيها احبها
طلعت اصيحها شافتني اجتني تركض صايرة نار وجههة مطعون دم صرخت بوجهي بعصبية.
وووووين ررررررحتتتتتن وووووين
صوتج فدوة صوتج هنا يم الحجية تصيحج
يا حجية ولجن شبسرعة تعرفتن على الناااس ودخلتن بيتهم
شبيج هسة مرة جبيرة تموووت تموووت كواكب تفوتج لو ما شفتيها امشي تريدج نيزك يمها.
عتيتها عت وهي تخزر بيه بطرف عينها على ساعة تسطرني على عيني وتطفيها دخلت جوة ذهب واكفة مبتسمة اول مادخلت كالت: -هلا باخوهن هلا بحاميهن والله انا من شفتج كلت ولد بس طلعتي زلمة و كفو بتصرفاتج تسوين زلم مشوربة.
طبعاً نيزك ما سولفتلها على كواكب بايكة الفلوس بس كالتلها شلون تشتغل ودافع عنة وتنكتل، تقربت عليها وكواكب على وجههة طيف ابتسامة باستها براسها وخلت ايدها على ضهرها ماعرف ليش شكل كواكب تغير وجناتها وردت دنكت راسها بخجل اي كواكب تخجل والله شعبالم لان عاملتها بحنية وهي مامتعودة على شخص يعاملها بحنية عدانا لذلك اسلوبها جاف.
ذهب: ها يلنجرة شسويتي
كواكب: رحت ادور بيت للايجار بس ما لكيت.
ذهب: وين راح تاخذين البنوات
كواكب: يمكن اخذهن لبيت دراهم بين ما اشوف بيت
ذهب: وين صايرة دراهم هاي
قريب على بيتنا بس خايفة يجون هناك لان يدرون دراهم مرة وحدها واحنا نأمن ونروحلها وخاصة احنة نعرفها يتوقعون نروحلها ويلكفونا
جا انتي نجرة مافكرتي بغير حل
كواكب: فكرت هسة اخذ اخواتي لمنطقة اعرفها بيوتها رخاص اجر بيها واني اعيشهن اشتغل من الصبح لليل والله ما اخليهن يحتاجن شي.
كفو من اصلج بعد بيتي انا تعجبني النساوين النجرة والصلفة بس منيلج فلوس ايجار؟
عندي حجية مدبرة امري مو كواكب التخطي خطواتها بدون تفكير
ذهب: عمت عين الاغم من يسمع بطاريج
ابتسمت كواكب تباوع لنيزك طولت صفنتهن كالت ذهب: -شرايجن تأجرن بيت هنا قريب عني حتى اجي عليجن اسمع سوالفجن الحلوة وانتن هم تجن علية
كواكب: يا ريت والله خاصة المنطقة أمنة بس ماكو مساع جنت يم الدلال ماكو بيوت للايجار اكو كم بيت كبار وغالية.
ذهب: انا عندي بيت فارغ اكعدن بية بين ما الله يفرجها عليجن
كواكب: نأجرة حجية كلشي بفلوسه مانكعد بية بلاش اذا توافقين نكعد بية؟
صار يالنجرة اليريحج سوية كلمتج تمشي انا مرة فقيرة اسمي ذهب
كواكب: والله والنعم منج ذهب بت الذهب
ذهب: فلك فلك ولا يكول بت بس وجهج حلو عويناتج تلصف لصف شوية لو تطولين شعرج وتلبسين ثياب ترجعين بنية احلى البنات.
ضحكت كواكب وكلنة ضحكنا على كلامها صدك كواكب لو تكعد وتطول شعرها وتغير لبسها تصير تخبل هي معانيها حادة وحلوة بس مخبره شكلها بلبس والشعر، عافتنا ذهب ودخلت صاحت بصوت عالي: -هيوووو عليششش ولككك علييش ماتسممعععع تعااال اررريدك
رجعت توكف ويانة تكل لكواكب: -حبوبا اسويلج لفة تاكلينها
كواكب: اي والله سويلي ترة اني ما استحي اذا جوعانة حتى اذا اشوف فاتحة ادخل بيها اكل
ذهب: عظامة طلعتي.
هو الياكل بالفاتحة يطلع عظام شنو هاي لاا ترة عادي واني اهم شي بطني لان لو ما اكلت ماعرف افكر واشغل عقلي
ذهب: بالعافيه يبعد حيلي
سوتلها لفة ترستها جبن وكيمر ومربى صاحت بيها كواكب: -بسج حجية راح تصعدين السكر عندي
ذهب: يااع جا انتي عندج سكر
والله راح يصيبني عن قريب هاي اذا ما بية واني ماحاسة بية
ذهب: يلة اكلي اصبلج جاي
لا هيج ما احبة اكلج هذا البيض محد ياكلة بعد؟
ذهب: لا ياهو الياكل هسة ينذب بالزبل والله انقهر على النعمة كون عندي بطن واكل مثل كبل بس شسوي اباوع واتحسر
اني اكل بدالج ولا يهمج سويلي لفة لان تعرفين لازم الواحد يوازن باكلة لفلة حلوة ولفة مالحة
ذهب: على گلبي انتي والزهرة اكلي حبوبا عوافي والشحم دافي جا مثل اختج سادة حلكها يكول احسب عليها
ضحكت تاكل بالفة دخل ولد شاب شافنا رجع ليورة صاحتلها: -تعال حبوبا عليش ذني مثل اخياتك لا تستحي.
دخل مستحي شكد حلو شكلة ويا حياء شايل وهدوء واضح علية مدنك عيونة ما رفعهن ابد
خلت ايدها ذهب على متنة تكلة.
حبوبا عليش ذني مثل اخواتك اريدك توديهن لبيت الساقط ابن الساقط العايفة متروك تاخذ المفاتيح من غرفته وتاخذ البنيات اله يكعدن بيه
هز راسة وراح شوية ورجع مبدل ملابسة ومعدل شعرة دخل بيدة المفتاح اشر براسة يلا.
ذهب: امشن وراة حبوبا عليش خوش عليش مو مثل اخوة الساقط سقوط لا هذا عليش اشرف وانزهة واحد باحفادي يروحولك فدوة ذولاك الصايعين والدايحين والساقطين
سحبتة تبوس بية وهو مبتسم مبين شكد تعزة الواحد يكولها لله الولد ينحب بسرعة هسة اني اول مرة اشوفة بس حبيتة طلع وطلعنا وراة بعد مانيزك مطرت ذهب باشكال الشكر والله ماعرفنا شلون نشكرها كواكب بيدها لفتها تاكل لكمة من هاي وترجع لذيج اشرت لذهب بيدها تكلها.
عمي خلي الصياغ يعزلون ذهبهم مغشوش طلع هنا الذهب الاصلي
ذهب: يااء دهر دهر
كواكب: خاب وعلى فد حبيتتتتج هاي ثاني مرة يدك گلبي مرة لدراهم ومرة الج والله ذهب انتي خوش ذهب ما مغشوش
ذهب: يروحولج فدوة احفادي بخويطهم ماعدا عليش ترحيلة فدوة
كواكب: صار بس هذا لان حباب مبين اما الباقين ما اقبل اروحلهم فدوة.
ضحكنا كلنا ومطرتنا الحجية ذهب باشكال الدعاوي الحلوة حتى نفسيتنا تغيرت وگلوبنا لانت وين احنة محرومين حتى من هيج كلام العدنة يدعن علينة بالعمى هاي الغريبة شلون ردت روحنا وطلعتنا بموقف ما ننساة للموت منو يسوي سوايتها ويدخل لبيتة بنات من الشارع مامعروفة قصتهن؟
علي يمشي كدامنا واحنا وراة شوية مشينا مو هواي كم بيت وكف كدام باب فتح باب الشارع ودخل جوة الباب بقة مفتوح نباوعلة فتح البيبان رجعلنة بدون مايحجي شي دخلت وراة كواكب تشوف البيت طلع وهي وراة سلم المفاتيح الها وراح صاحت وراة.
تعال اوكف ما كتلي شكد ايجارة مبين غالي كول شكد
التفتت عليها ورفع اكتافة بمعنى ماعرف صاحت بية كواكب: هو شنو ماتعرف غير شكد حتى ادفع نكعد بلاش شلون ترهم.
هز راسة اي والابتسامة مافاركت وجههة ابتسامة هادئة تبعث الاطمئنان بالمقابل رفع شعرة الكثيف وحرك اكتافة بمعنى ماعرف وراح بدون كلام.
كواكب: -يااا ياااا شفتن وولجن ما يرد علية لبسسني وووولككك علييييش ما تحاجيني
وكف والتفتت سوى حركة بيدة ما فهمتها حتى اخواتي ما فهمن كالت شهب: -هذا اخرس يكلجن ماكدر احجي.
بهتت وجوهنا وهو اشر على شهب يهز براسة ياكد كلامها سوى باصبعة اوكي بمعنى كلامج صح اوووي يروحي مثل الكمر مو ولد والله وما يحجي سودة بوجهة البال ميس راحتلة كواكب تكلة.
اسفة صيحت عليك عليك العباس سامحني فدوه سامحني ولا تشيل بكلبك علية ماعبالي ماتحجي
هز راسة لا وابتسم كالت شهب: -شبيج ما زعلان يكول.
هزلها براسها يايد كلامها وراح نيزك سحبت كواكب ودخلن للبيت بعدها احنة دخلنا انبهرنا من البيت صح صغير كلش بس مأثاث من كلشي وراقي من كلشي جاهز كل الغراض بية ذبينا غراضنا وكعدنا على القنفات الموجودة بالصالة.
نيزك: ما شاءلله
نجمة: ولا حول ولا قوة الا بالله
شهب: والله اكبر
كلنا باوعنا الكواكب وكفخناها شردت تصيح
ااخ ااخ شبيجن ملاية لو ختمة
نيزك: هسة دكمليها وكولي الحمدلله انمونة خو ما انمونة.
كواكب: دعوفي الصمونة بطني وكليلي هذا البيت شكد سعرة يطلع
نيزك: والله مادري غير تشوفين ذهب شتكول حتى نعرف ناجرة لا
نجمة: بنات فدوة اجرنة خلينة نعيش مرتاحين كم يوم بية وانام هنا على القنفات اااااالله لكككككك اااالله
تمدتت على القنفة ارافس ماعرف اجتابني شعور فرح على سعادة على حماس احس العيشة هنا غير
كواكب: هاي شبيها الفرخة كضوها تخبلت علينة
نجمة: كواكب بداعة نيزك اجرية النة
نيزك: اني شعلية تحلفينها بداعتي.
نجمة: حتى تكشفينها على حقيقتها اذا تحبج ما ترفض
كواكب: بعد لا تفكرين ولا تحجين رجائاً ابقي ساكتة مثل قبل
نجمة: ولا يخلن الواحد يتحمس ويحلم
نيزك: اسكتتتتن اسمعني زيين كواكب تعالي تعالي يمي
كواكب: من بعيد كولي شتردين
الفلوس شلون بكتيهن
هههههههه لعبتي هاي من نامت طفرت عليكم افنان نومها فطيسة واني اندل المفتاح واندل مكانهن هاء اها صارن بقبضتي
شهب: والله لو نموت مانفكر بيج انتي اخذتيهن.
كواكب: اي ولا هما يفكرون بية لان طارديني ومو بالبيت هسة عوفنا من هذا الحجي الفلوس خير من الله اشوف البيت شكد ايجارة ادفع واشوفلي شغلة نطلع فلوس منها
نجمة: ونعييييش عيييشة سعيدة بنااات اني من هسة ما تشتغل اريد ارتااااح
كواكب: واني ماعرف اشتغل وكلشي ما اسوي من هسة اكلجن
نيزك: هسة بس خل نستقر اني اشتغل بس لا تتعاركن
نامت شهب بصفي وامير فوكنا راحت نيزك تدور بالبيت تشوفة كالت: -بنات هاي غرفة مقفولة.
كواكب: عوفيها يمكن بيها غراضهم هسة اروح اتفاهم وي المرة وارجع
راحت كواكب واني اكمز بالبيت واضحك فد فرحانة هيج وكون نبقة عايشين هنا دوم والله ويرادلها حظ وبخت جبير رحت فتحت الثلاجة بيها مسواك ومعلبات هواي ضحكت بصوت عالي اصيح للبنات
ووولجن تعاالن شوفن هذا بيت كلشي بية حتى مسوواگ.
اجت نيزك ما عاجبها الوضع كالت: -هذا البيت جانو كاعدين بيه ناس قبل فترة مو طويلة مامعقولة هذا البيت للايجار بعدة بغراضة شي غريب شلون اجرتة
نجمة: شنو الغريب نيزك يمكن انتقلو لغير مكان وعافوة بغراضة شبيج ذولة ناس طاكة عدهم غيرة شايفة بالمسلسلات يغطون الاثاث من التراب ويسافرون
نيزك: كلتيها نجمة مسلسلات والله كلبي مامرتاح لهذا البيت.
يووووووووووو انتي مامرتاحة للدنيا كلها الا تخلين احتمالات سلبية اكعدي واسكتي بفلوسج
راحت ما حاجتني تطلع ملابس لاموري تبدله واني كعدت على الطاولة افر بعيوني شهب نامت على القنفة واني ايدي توجعني وراسي لازم افتح الخياطات بدت تأذيني خرب بيهم لا دوام داومت حتى الشركة ماشفتها بعد امداهم اي والله يوم واحد داومت فكروني وكعدوني هسة اروح بيدي هاي لو وجهي المحصف.
اكيد ميس هسة تنوح علية يا روحي يا ميوسة صدك هسة متخبلة ماتعرف اخباري واني غبت فرد غيبة بالعادة ابد ما اغيب ولا عندي موبايل اطمنها دخلت كواكب كتلها.
ها انطيتيها فلوس
اي وكالت الغرفة عوفنها بيها اثاث سالتها عليها
اكلج كواكب موبايلي مو تدرين بية صارلة قرن واحترك اريد موبايل والله استحي داومت شركة وموبايل ماعندي حتى هسة صديقتي ماتعرف شي عني ولا ادري شاخذو ما اخذو.
صار بعيوني اشتريلج ارقى موبايل من ذهب افنان الساقطة
ولازم اروح للمستشفى راسي يأذيني وايدي اشوف شكد وتنحل
العصر نجمة ذكريني
نزلت ورحت وراها اضحك واحضن بضهرها نيزك مددة بالكاع وابنها بحضنها كعدت كواكب سحبت امير من حضنها ونامت بمكانة تكلة.
كواكب: كافي خالة ماشبعت انطي مجال لغيرك صارلي دهر ما شايفة اختي
دنكت نيزك باستها تمسح على شعرها وتبعدة من عيونها امير انتحس وهجم على كواكب يسحب بيها.
هي تحرگ بكلبة تحضن نيزك ضربني امير يكلي.
وهريها هتولي ما اهبها
كواكب: ااااااه هيج صارت اموري ماتحبني وولك
امير: اتي سبيرة عوفي نانا اني زعير (صغير)
كواكب: لا والله ويني وين الكبر تعال نام بحضني العب وياك ختولي نانا كالبة خلقتها گلب وويع
نيزك: انوب كلبتي علية الخايسة
كواكب: انجبي لج صح اني بالشوارع افتر بس مو خايسة اسبح عد دراهم وابدل ملابسي هم
نيزك؛ اسفين يابة اشاقة وياج.
كواكب: اخر مرة هالمرة سماح تعال اموري قطعة من الگلب روح خالتك وعمرها
اخذتة تلعب بية وهو يضحك فرحان خطية هسة يلة طلع صوتة جان مصدوم من الصار والهوسة الكلساع صايرة مرت ساعات من العمر تنحسب كلنا متجمعين نايمين سوى نضحك ونحشش سعادة ملت كلوبنا بهاي الساعات القليلة سوينا اكل كلنا مجتمعين نتشارك ونحظر اكلنا ويا محلاة من اكل رغم بساطتة بس بية نكهة تخبل من ايد نيزك هاي لان فرحانين.
شكد حلوة هيج الحياة ناقصها امي وابوي رجعنا مثل قبل ماخذين حريتنا بالبيت نضحك بصوت عالي نسولف نتعارك نلبس براحتنا نيزك لابسة تراكات وضافرة شعرها يسحل وراها ضحكت على شكلها طلعت تجنن جانت مبهذلة بالدشاديش العراض والشال ماتنزعة دقيقة من ورة عيونهم النكسة.
اجلنا روحتنا للمستشفى تكول نيزك بعد وقت مو هسة مر اربع ايام على وجودنا بهذا البيت كواكب طلعت تجيب مسواك ملثمة تلثم تخاف من الشرطة وهم منهم.
اني جنت بالاستقبال كاعدة على القنفة اباوع لنيزك تمسح بالكراج لابسة تراك قديم عدها نص ردن يخبل عليها مقسم جسمها تقسم وشعرها ضافرتة مدنكة تمسح ودندن بصوت مسموع ابتسم على شكلها الحلو ونفسيتها الانفتحت.
انفتح الباب فجاة ودخل رجال جمدت بمكاني من الخوف رجلية ماتن نيزك بقت مصدومة حتى ماتحركت بس فاتحة عيونها والرجال يباوع عليها بصدمة جان طويل ضخم شوية و اسمر عكد حاجبة وكال باستغراب: -انتي شجابج هناااا.
نيزك: ااانت شجابببكككك هناااااا
ضرغام: صووتج صوتج لج هذا بيتي
نيزك: بيتك شنو هذا بيتنااااا
منين صار بيتج بالحلممم لج ماتكليلي شجابج
بيتنا هذا اجرناه.
فجاة نيزك كطعت كلامها ودخلت تركض جوة هسة يلا حست على روحها وانتبهت لملابسها اموري طفر من ايدي طلع واني بقيت مايشوفني بس اني اشوفة شاف امير وفتح ادية يكلة تعال اموري صار يضحك بصوت وراحلة يركض رفعة من الكاع يبوس بية بقوة ويلاگفة يضحك فرحان من شافة فحط شالة بحضنة يكرص بخدودة ويبوس بادية ويرجع يعضهن.
ضرغام: حلووويات وولكك شنووو كيييكك ااانت.
طلعت نيزك لابسة عباية وجههة احمررر من بعيد حاجتة: -ترة هذا البيت اجرناة مالك حق تدخل بهلطريقة واحنا ماندري
ضرغام: اشم ايدي ماجرين بيتي واني مادري غير محد كلي الله وكيلج اجيت ادخل ومن شفتج عبالي جاي اتحلم البيت فارغ صارلة فترة
اي حجية ذهب اجرتة النة كالت فارغ
ضرغام: كون صهروها وعادو شغلها من جديد تسوي المصايب ومحد يدري مامبلغتني ماجرة البيت
اي بس لاتحجي عليها ترة خوش مرة.
لا حقج خوش مرة اني المو خوش يلا اني بعد استرخص صرت غريب اطلع بس غراضي مو شمرتنهن عاد
قصدك البلغرفة
اي البلغرفة هو البيت كلة غراضي
مافتحنة الغرفة بقيناها مقفولة اذا تحتاج شي ادخل اخذ والبيت اذا تريدة كللنة حتى نشوف بيت نطلع بية
لا يابة ابقو اني ما كاعد بية اتصرفو باليعجبكم اخذي راحتج
نزل امير وطلع لحكة امير دنك علية كلة تروح وياي
هز راسة امير يضحك كال لنيزك: -عادي اخذة شوية وارجعة.
ترددت وهو كال: -شوية شوية
نيزك: بس مو تتاخر لا تجي كواكب وتسويها عزا علية
ضرغام: وهي شعليها ابنها قابل
ماتعرفها بعد
رب اليعرفها مايحتاج تعلميني بيها يلا اخذ اموري وارجعه
راح اموري وياة مكيف وفرحان سدت نيزك الباب ونزعت عبايتها خلت ايدها على كلبها تتنفس رحتلها وشهب اجت وراي سالتها.
منو هذا نيزك
شوف الصدف شوف سبحان الله طلع البيت بيتة والله مامصدكة
هسة غير تكول منو.
ضرغام هذا ولد صاحب معرض سيارات هناك يم السوك شوية مرة رحت ادور على كواكب وكالولي شوفيهم يمكن يعرفون مكانها رحت سالته عليها ودلني بيها
وكواكب وين تعرف هيج شكول
ترة كلش حباب اخذ ابني للمستشفى والله خوش ولد حتى دفع الفلوس وجاب علبة حلويات لاموري خوش ولد
قصدج رجال لان جبير مو مال ولد.
نفس الشي بس لا تجيبن طاري لكولكب اروحلجن فدوة ترة كبل تسحلنا من البيت وتروح تجهول بينة لو تكعدنا بالشارع ولا تكعد بيتة تموت منه بودها تكتلة موت
شهب: هي كواكب شلون تعرفت علية وليش تكرها
نيزك: مادري صاحبة مدورلها شغل اعتقد تعرف صاحبة وعن طريقة تعرفة ماصار بينهم توافق الضاهر
نجمة: والله صدفة يابة شوف طلع بيتة بس ذهب شلون تاجرة بدون ماتكلة.
نيزك: يمكن ما كاعد يمهم واتصرفت منها لان شافتنا محتاجين كالت ليش فارغ خل يكعدن بية
بقت نيزك تتنظر امير تلوب رايحة راجعة ماكو شوية واندك الباب فتحتة اسمعها تكلة: -ليش اشتريتلة والله مو زين علية
ضرغام: خل ياكل ماعلية
تشكرتة ودخلت بيدها اموري مخلي العلاكة على كلبة رفع راسة لامة يكلها بابتسامة: -هادا هباب اني اهبة
شالتة تبوس بيه تكلة: -هو منو المايحب ابني الحلو اليموووت منووو.
نزلتة اجاني يركض فتح العلاكة طلع كيكة انطانياها
امير: هاي زبتها الس
بست ايدة وراح لشهب انطاها نستلة وكعد بحضنها ياكل.
نيزك: -مو تخلنة ياكل هواي انطية وحدة واخفيهن عنة
اندك الباب راحت فتحتة اجت كواكب بيدها مسواك انطته لنيزك تعزلة واجت يمي كرصت خدي وطلعت من جيبها علبة فتحت عيوني مامصدكة موبايل جابتلي صرت اكمز من الفرح وكواكب تصيح بية
ووولج ررراسج لا تنفتح الخياطات.
نجمة: رب الما انفتحن من ضرب سالم ينفتحن من التكمز عوووفيني فرحانة عووفيني موباااايل يمة ما اصدددك صاررر عندييي
حضنتة على كلبي ابوس بيه اتذكر ميس اشترتلي موبايل بس ماكدرت اخذة لان غالي شكد حاولت وياي كتلها اذا ما رجعتية ازعل عليج الله يذكرج ياروحي يا ميوسة بالخير فتحتة يخبل بناتي بية كفر نااازك ولزكة مخليتلة كواكب
كواكب: بية خط وفعلت نت هم شوفي دروسج لاتبقين هيج.
دمعت عيوني من الفرحة حضنتها اجعص بيها وابوس
والله انتي كواكب احسن البنات واحسن الناس انتي تصحين تكونين ابو وجد وعم وخال
كواكب: هسة جاملي وكليلي خالة وعم وجدة لو كلة مذكر
نجمة: لا والله مو قصدي أصلاً انتي احلا البنات والطفهن اختي الغالية الاموت بيها
كواكب: بس لاتحمين رجائاً
نجمة: والعباس كواكب انتي تخبلييين وام البنين أصلاً جاي احجي الحقيقة حتى كصت شعرج تجنن
كواكب: بعد غير الموبايل محتاجة شي كليلي.
سلامتج كبدبددد
نيزك: كواكب شوفيلنا شغلة نشتغل بيها حتى لو بالبيت نشتغل اني وشهب كاعدين وانتي بعد ماتطلعين بعيد اكعدي ويانة لاتنسين مطلوبة للشرطة انتي
كواكب: يمعودة طزز بيهم وطززز بالشرطة التدافعلهم خيولون جلاب
نيزك: حجي يفيدج منا ورايح نشوف شغلة وهذا حالج تغيرينة لبسج اسلوبج شوية شوية من تكعدين ويانة يتغير
كواكب: خاااب دطيررري
نيزك: يااااا ولج هاي عليمممممن كوواكب.
كواكب: عليج ترة ردت اعفط بس كلت عيب هاي نيزك النازوكة مو مال اجرها بزبج
نيزك: حتى اشگ حلگج هاي سوالف الولد بطليها
كواكب: عود خوش
كلبت عيونها وطلعت تفتر بالكراج تحوس صدك هاي مامتعودة تكعد بالبيت حقها والله مخلصتها بالشارع اوووف نيزك جانت تكشر خضروات وتخلي بصينية وشهب تغسل بالسلگ وتنظفة خليت موبايلي على الشحن.
اليوم دولمة اااامممممم
نيزك: اي روحي افرشي حصيرة بالكراج هناك نسوي.
اخذت حصيرة فرشتها وهنا جابن غراضهن وحاجاتهن كعدنا كلنا نسوي وكواكب تلكط بالكشمش
وكلساع نيزك صايحة بيها: -خرب كواكب خلصتيهن
كواكب: شبيجن هو كشمش خل اكلة منو الياكلة ترة محد يحبة وخاصة وي الدولمة ذيج المرة مرة جابت لدراهم دولمة وغضنفر ما اكلها لان بيها كشمش بس الحمدلله ضلت بس الي
نيزك تلف وتحاجيها: -منو هذا الاسمة اصعب من حياتي؟
واحد يجي يم دراهم
اي
شنو ايييي شنووو
وانتي ليش تعصبتي جاي اسئلج منوووو.
ووواحد تنخاة يجيبلها بخورات وغيرها مرات اشوفة يمها
خزرتها نيزك بطرف عينها وسكتت تكمل لف اخذت امير توكف بالشارع صاحت بيها نيزك: -ووولج ادددخلي شعندج واكفةةة بالباب ولد انتي وولد
دخلت وركعت الباب وراها تذمر وتصيح: -اهووو شلون سالفة نيززك لا تخنگيني اني متعودة مو مثلجن اطللع
نيزك: كتلج منا ورايح تتعودين على وضعنة
كواكب: بطرانة والله باجر ادور شغل هاي الكعدة ماتعجبني الفلوس راح ناكلهن ونظل نصفح بالحيطان.
سكتت عنها نيزك لان تعرفها عصبية وهي عصبية وحدة اضرب من الثانية، سوت نيزك جدريتين دولمة وخلتهن على النار ثنينهن رحت اسالها: -المن طابخة جدرين
نيزك: من كعدنا بالبيت وليجاي كل يوم سهلة تجيبلنا صينة والله استحي ارد المواعين فارغة كلت اسوي صينية اخذها الهم
خوش تسوين والله
بقت تسوي بالتمر بقيت اساعدها سوت مقبلات وزلاطة وتمر كرات بالسمسم وفواكة خلصت ذني ونصت الجدر راحت تسبح وكالت ابقي يمة بس يستوي طفية.
كواكب: اكلج نجمة
ها
اني اريد اطلع
وين مولية ماتكعدين
شوفي ترة اني ميت سالفة براسي لاعبالج فارغة مثلجن خرررب ااانة
ان واخواتها شعليها
كفختني على ضهري وطلعت ترافس بالحيطان كالت شهب: -ارتاحيتي الا تكفخج لج هاي مال شقة
شقة لو فندق
هههههههه ماتضحك
لا تجذبين ضحكتي
امداج
امداج انتي الفاهية.
عيبت علية وراحت تلعب اموري هي شهب هاي شغلتها وكلت امير بدلتلة نومتة سبحتة حايرة بية اكثر من نيزك اجت نيزك مبدلة كالت روحي بدلي ترحين وياي
رحت اركض لبست صاية ولفيت شالي على السريع طلعت شالت الصينية على راسها وطلعت لاكتنا كواكب رفعت حواجبها وتخوصرت صاحت.
خيرررر وين ررايحات
نيزك: اروح اشوف ذهب وارجع مواعينهم سويتلهم اكل عيب يرجعن فارغات
كواكب: جيبن اني اخذهن انتن ارجعن.
نيزك: شهب كتلج اريد اشوف ذهب واحاجيها بشغلة
كواكب: شوفن كلجن لا عبالجن تمشن براحتجن لان ماعدجن واحد يردجن والله والله اكسررر ضهرررجن كسررر بس تعاندني وترحن بكيفجن راح اخليجن بس هالمرة يلا مو تتاخررن يلة
طلعنا نيزك تهز بيدها واني كوة حابسة ضحكتي يمة لو ضحكت شيخلصني وعلى ذني اخواتي طبكات
نيزك: خبلة خبلة هالبت
دسكتي هسة انتي شلونج
انجبي نجوم
انجبت نجوم.
سكتت عنها اني بت فقيرة اسكت احسلي وصلنا بابهم دكيت الباب شوية وفتحة الولد الاسمر نسيت اسمة ابتسم ونيزك كالتلة: -السلام عليكم
ضرغام: وعليكم السلام هلا تفضلي بس جيبي انزل من راسج
الصينية نيزك شايلتها فوك راسها اخذها منها واخذ نفس عالي كال: -هو صح ليش مكلفة نفسج وتعبانة بس اجت بوكتها ميت جوع هاي دولمة؟
نيزك: اي دولمة، اكلك هذا بيتكم
بيتنا تقريباً
شنو تقريباً اي لو لا؟
اي بيتنا
الحجية ذهب وسهلة شيصيرون منك.
سهلة امي والحجية ام ابوي
دخل للمطبخ وتلكتنة ذهب بوستنة وذاك الاستقبال الحلو استقبلتنا دخلتنا جوة وماقبلت لان جايبين اكل ضرغام جان يكلب بالدولمة كال.
هسة لان اني راح اكل كلتي لا تجيبن لا بوية جيبن اني اكل
ذهب: دهر دهرك يمدهور جا انت بس للاجل اهمداك
ضرغام: الكرامة وصلت لراس الشارع شبيج ذهب شبيج ماتكليلي
ذهب: طاح حظك وحظ ابوك الاغم
ضرغام: رحمة الله والديج ابنج وتمونين علية ما اعاتبج.
ذهب: عوف لعليش وياك مو تسرطة سرط
ضرغام: اهمشي عليش
تروحلة فدوة لا والله سبع فدوات، تعالن يمة تعالن امشن وياي نكعد نتسامر شوية
ضرغام: اني ما اكل بشر ماتكعدن هنا ترة اني هم اسلطن على السوالف
ذهب: لا هلة ولا مرحبا بيك ارجع منين ما جنت عبنك ترفع ضغطي حتى بسوالف النسوان يخلي راسة
ضرغام: ما اخلي راسي بس اذني شبيج نحاسة
امشي مزنجر ويحجي علية
الله يعابيج يلماتخافين من الله كدام البنات تتنمرين علية.
غمتة ذهب واحنا نضحك عليهم حتى هو يضحك مبين علاقتهم هيج كعدنا بالصالة على القنفات وسهلة اجت سلمت علينة تنهدت نيزك وكالت لذهب
بيبي اني اريد اشتغل بس حايرة ماجاي تجي براسي فكرة اجيت اخذ شورج تعرفين اني ما مكملة دراسة وحتى اخواتي بس نجمة تدرس فمحتارة بالشغل
افا تحتارين وذهب موجوده
والله خطرتي بالي كلت اكيد تطرح علية فكرة.
وصلتي يمة والف رحمة على البطن النگلتجن عبن تدورن شغل بالحلال شوفن الشريف يلكة شغل بس شوية يطول خلگ انتي من گلتيلي اريد شغل خطرت براسي تشتغلن بالبيت تبيعن خبز تدرن الفرن بعيد والمنطقة كلها تشتري انتن مبينات نادرات تخبزن وتبيعن
نيزك: بس شلون الناس تعرف احنا نبيع.
ذهب: اني اخبر الدلالة تخبر اهل المنطقة وانتن لا تظلن على شغلة وحدة هم اطبخن كبة دولمة هاي الشغلات البسيطة واهل المنطقة كلهم موظفين يحبون هيج شغلات وانتن بالبيت يجون يشترون منجن
الف رحمة على اهلج والله ماي بارد ونزل على كلبي جنت مترددة من هيج فكرة لان اكول منو ياخذ وشلون يعرفون
الدلالة تنشر على الحالة وكل نسوان المنطقة متابعاتها وانتي هم اكتبي لافتة على البيت والله الرازق.
ابتشرت نيزك وبينت اسنانها جابت سهلة جاي وكعدت ويانة شربنا الجاي ونيزك ترخصت كالت ابني يبجي دخلنا المطبخ وضرغام بعدة على وكفتة ياكل
ضرغام: اول مرة اكل دولمة هيج طيبة
نيزك: بالعافيه
اني اول زبون الج كل يومية تحظريلي جدر دولمة نفس هذا
ان شاءلله.
يريد يحجي ومن شاف ذهب سكت رجعنا لبيتنا ركضت على الموبايل صار بية شحن خليت بية رقم ميس شكد اتصلت ماكو ماحافظة حساباتها بس الرقم مافتحت علية خط شكد ضجت عبالي ترد والله مشتاقتلها العوبة.
تعشيت وشربت علاجي مالي خلگ من الالم نعست نمت و كعدت الصبح راسي يوجعني بعد ماكدر اتحملة الخياط ياذيني كالت كواكب بدلي اخذج لبست بسرعة وطلعنا للمستشفى رادت نيزك تجي بس ماخلتها كواكب كالتلها ابقي بالبيت.
دخلنا كصينا باص ورحنا ننتظر سرانة كالت كواكب خل نصعد بالمصعد ايدتها مابية حيل امشي رحنا وكفنا كدامة جان نازل انتظرنة دقايق وانفتح رفعت راسي وفتحت عيوني بصدمة اخر شخص بالعالم اتوقع اشوفة اليوم اباوع لكواكب هم نفس حالتي مصدومة تباوع مامصدكة لزمت ايدها وهما نزلو من المصعد يباوعولنا.