رواية المنجمة للكاتبة كفاية كاظم الفصل الثاني عشر

رواية المنجمة للكاتبة كفاية كاظم الفصل الثاني عشر

ضرغام اختي تستاهل
كلتها ونزلت دموعي عبرني وطلع لسالم اسمة يحجي بصوت عالي وبتهديد يگلة.
ضرغام: خاف قبل عرضت عليك فلوس مقابل التنازل هسة اختلف الحجي اطلعها وربع ما تشوف
سالم: التكدر علية سوية
ضرغام: اطلعها وهذا الاسبوع مو اكثررر
اختفى صوتهم واني دخلت جوة كعدت ماعندي طاقة بعد اجة هو يباوعلي من بعيد رفعت راسي اشوفة ودموعي تنزل من شافني هيج اجة بدون تردد صار كبالي رفع راسي يمسح بدموعي ويكول.

ضرغام: اطلعها وداعت عيونج
اروح اني ارجع لسالم ما تتحمل التحقيق
ضرغام: انطيت فلوس لضابط التحقيق ما يأذيها
بس
خلة ايدة على حلكي مانعني اكمل نهض يكول
تبقين هنا وهي تجيج
طلع بعد ما شفتة لميت روحي وكعدت بالغرفة شهب تباوعلي بكسرة دنكت راسها ودموعها نزلت تكول بشهكة: بسببي هسة هي بالسجن اني بخير بس هي مو بخير اذا ما طلعت نرجع نيزك كواكب ما تستاهل.

هزيت راسي مأيدتها كمت من مكاني من سمعت هوسة طلعت اسمع سالم رجع من جديد او هو بعدة ما رايح رجف گلبي وباوعت لنجمة اشوفها ترجف وهو يحاجيها.
نجمة عمي ارجعي وياي منتظرج
هزت راسها لا ودموعها تنزل بخوف وببنبرة لطيفة يكلها: ليش نجمة اني ما مأذيج بشي احبج اني لا تسوين مشكلة اخواتج متزوجات ببيوت زلمهن انتي شعندج كاعدة عدهم؟
صحت بعصبية: ماااالك دخللل بيهااا امشي منا لا ارتكب بيك جررررريمة
ضحك بصوت وكال باستفزاز.

هاي اختج مو وذيج المسكينة طيحتن حظ حظها شمرتنها شمرة الجلب
ذهب بالباب واكفة ما طلعت صاحت
تروح منا لا اجي البسك شيلتي يالاغم
سالم: حجية دمة ولحمنة نطالب بيه ترضين على روحج بناتكم عد الغريب؟
ذهب: الغريب احسن منك يالاغم لو بيك حظ وخوش زلمة ما طلعن للغريب يحتمن بية بس انت اغم ولدك اغم منك
سالم: مالي حجي وي النسوان اروح احجي وي كباريتكم واخذ نجمة حظري روحج راجعلج.

ذهب: اعلى ما بخيلك اركبة يالاغم من كون غمة التغمك وتغم المثلك يالعار السكط
نزلت اشكال المسبات بية رحت لنجمة احظن بيها وهي ترجف بيدي رحت لميت كل ملابسها وغراضها انصكرت صكر حتى لسانها نبلع اخذت موبايلها اتصلت بميس تجي تاخذها
ماكو نص ساعة وسيارتها بالباب طابگة طلعتلها شهب فتحت الباب دخلت سلمت ونجوم داكتها بالكاع اكلت روحها اكل واني احجي عليها.

ترحين وياها محد يعرف لا سالم ولا غيرة بس تنحل السالفة وتطلع كواكب من السجن المجن مرة ثانية روحي هسة
نجمة: اخاف يرجعني ويذب حركتة بية افنان وصبيحة والله يموتني
نيزك: حتى اطلع رواحتهن كلهن بيدي دمشي امشي
ميس: الطميي وملخي روحج اوووي شبيج عيني شكو امشي وياي اونسج ونسة عالمية غيري جو
نيزك: مثل ما كالت ميس غيري جو روحي بين ماتنحل لا تفكرين بينة.

سحبتها ميس وذهب جانت بس تباوع انتبهنا الها من كالت: كون تريدين تضلين وي اخواتج نهايتج مثلهن
رفعت حاجبي عرفت قصدها تزوجها من احفادها نجوم والبنات مافهمن رساً كتلها: لا حجية تروح نجوم سهلة سالفتها هي أصلاً واصلة السن القانوني ورافعة دعوة عليهم محد يكدر يأذيها.

طلعت نجوم وي ميس واني كلبي نار ذهب تباوعلي بعتب سكتت ماحجيت شي وياها لحد الان ماشفنا الا خير منها ومن احفادها بس مانعرف بعد شنو وراهم وهذا الزواج شنو نهايتة حياتنا احنا الاثنين مجهولة ما اريد نجوم هم تنظم النة لحد الان اكل بروحي من اتذكر اني عقدت على ضرغام وكواكب تكرهة وتحذرني منه كلمتها بذني ترن.

الا ضرغام لا تتقربين منه شكد خايفة منة كواكب ما حذرتني بدون سبب ولا، كرهتة بدون سبب من شفتة ولحد هذا اليوم اني ماشايفة منه الا كل خير مواقفة كلهن رجولة لحد اخر موقف صح ضوجني بس ما انكر زينة وياي.
اخ يا كواكب وشتعرفين عنة اكيد ما تقبل على الصار وراح تتصرف والله اني وياها شتكلي انفذ
رحت لبست عباتي وبقيت واكفة بالصالة سهلة تكلي: وين يمة
نيزك: خابري ضرغام اريد اطلع يجي ياخذني لو اروح وحدي.

ذهب هنا ماحجت شي ولا كان جاي يصير شي حتى ما سألتني تسبح بسبحتها وتباوع للشارع من البلازما.
خابرت سهلة ضرغام تكلة: يمة هاي نيزك تريد تطلع
صاح بعصبية: وووووين تروح ووووين؟
سحبت الموبايل منها اجاوبة بحدة
اريد امشي اشوف اختي تاخذني لو اطلع
مو هي اختج بالمكتب كاعدة
ضررررغام اطلع؟
حتى احرگج واحرگ البيييييت يماااااااااا.

وخرتة من اذني صوتة طرشني طرش امة اخذتة مني تهدي بيه هو عليمن هيج عصبي هسة صيحت واني بمكاني: ضرغام لا تصيييح كول تجي لو لا؟
جااااااايج
غمضت عيوني كوة لازمة اعصابي يصيح بوجهي الخايس كعدت انتظرة وامة تگلي بهدوء تفهمني
سهلة: يمة على كيفج وياة ضرغام عصبي سايسية مسايس مخبل هذا
علي روحة مخبل اني مالي علاقة بيه ولا انحسب علية مرة ترة هي مليوصة لوص مو مال اكعد وتجيني الاخبار.

سهلة: ما ترهم هيج عصبي بعصبية انلاصت
ذهب: عصبي على روحة مو على بت الناس
سهلة: يمة يكول ولا تعرفينة بلاعيمة طگت
ذهب: عوفية يستاهل خلية يشوف النسوان الصدك
لفيت روحي بالعباية وسهلة طلعت مقهورة اني وذهب ثنينا بقينا ساكتين اموري اجة حضني وذهب صاحتلة تبوس بية وتلعبة كاعد بحضنها طلعت شهب وجهة صاير دم عبالي ضرغام اجة كمت اشوفة قبس سلم علية ودخل سلم شاف اموري خربط شعرة وكرص خدة كعد.
قبس: ها ذهب ردتيني؟

ذهب: الحجي الحجيتة خو ما طاح بالكاع؟
سكت يفرك بوجهة ويباوع لشهب واكفة بالباب
رجع يباوعلها ويحجي بنتر ينقر على راسة باصبعة.
قبس: بس ما تطلع منا
ذهب: سهلة يبن ابني بس خلي براسك هذا الزلمة كرامتة فوگ كلشي
كام معصب وهي لحكتة تحجي وياه بالباب مدنك راسة يسمعلها ويحرك رجلة بتوتر وعصبية باوعت لشهب تباوعلة بتركيز رفعتلها حاجبي وهي دنكت لامير متوترة كتلها.
ماتشوفينة شكو جاي لو شعليج؟
ها لا اني مدخلني.

دخلت جوة واني بس ردت اشوفها شدكول دخل ضرغام وهما بمكانهم باوع بوجوهم وكال.
ضرغام: اشم ريحة خطط
قبس: امشي ولي مني
ضرغام: اول تالي تجي علينة
ذهب: من يصير بيتك بالاول عود اسألة
ضرغام: هسة اني شكلتتتت
ذهب: خفة هالحس امشي لا تتحاسب على التأخير
رفع راسة خزرني واجة يصيح: شكوو لابسة عباتج وووين
تقربت منة احجي بهدوء وهذا مو طبعي بس لان اشوفة عصبي خو هم احجي وياة بعصبية ونگب
باوعت بعيونة واحجي.

نيزك: ضرغام اخذني اشوف اختي حباب
لانت ملامحة وهو مركز بوجهي كال بهدوء
هسة جنت هناك جاي نشتغل بقضيتها
اكو شهود الجيران حجو الصار وصارت ثقوب نكدر منها نوصل لنتيجة
احنا هم نشهد اني ونجمة وشهب كلنا شهود والبنات بوقتها حققو وياهن بساعتها استجوبتهن الشرطة
ضرغام: الضابط الحقق وياهن طار
رفعت حاجبي بتوتر كتلة: شلون يعني.

ضرغام: مو بس سالم ورة السالفة هما ذولة النعالات ولد عمج بكل حيلهم يدفعون الاكو والماكو بس حتى تبقى بالسجن.
ليش هي ماعدهم شي وياهم
عبالهم يلزمونجن من ايدجن التوجعجن وهي كواكب يسوونها وحدة بوحدة يطلعونها بس حتى ترجعن الهم مو يم كواكب هما
وهسة
ارجع اشتري الضابط سهلة بس اوصلة كم يوم
واذا ما كدرت ترجع الضابط.

بجيبي اخلية يرجع يفتح الملفات القديمة بيها اقوال اخواتج والجيران هم اقوالهم موجوده وتقرير بحالة اختج هم
رجعت ليورة ارجف ورجلية احسهن مايشيلني همست بصوت راخي: اريدها
تجي
اجة يريد يلزمني وسيارة طبكت بالباب طلع مستعجل وقبس قبلة يصيح بصوت عالي
خيرررر شكو
ضرغام: سااالم شتريد ليش تخليني اهينك
سالم: اريد نجمة طلعها
ضرغام: شلون بيك انت.

طلعت اشوف منو جاي واني بعباتي شفتة هو ويوسف وياة صارت عينة بعيني ذبلت ملامحة بحزن من شافني خزرتة بحقد وحاجيت سالم بصوت عالي.
نيزك: تحلم تشوووف نجمة واذا عبالك بالبيت تعال ادخل شوفة محد هنا انساها لنجمة انساها
سالم: اني ماعندي شي وياها خل ترجع محد اله غرض بيها لان نعرف انتن لعبتن بعقلها والا هي اعقل وحدة بيجن.

ضحكت وهزيت ايدي اريد احاجيه وضرغام دفعني جوة وطبك الباب بكل قوتة سحبتني سهلة تلطم على وجهة وتكلي: المن طلعتي شيخلصنا
عقدت حاجبي اكلها: هو وين طلعت اني
دخلت جوة اموري يبجي اخذتة اسكت بيه وابوسة شوية وجفت ضرغام للغرفة صاير نااار باوع لشهب اشرلها تجي تاخذ امير وهو يمسح بوجهة يريد يطگ طلعت شهب بيدها امير تركض طبك الباب واجة واني واكفة بمكاني مابية حيل وكوة واكفة بس ثابتة وصامدة.

النعال ابن النعال شيريد منج؟
منو
شيرررررررريد منج شيرررررررريد جاوبيييي
تقرب، علية يصيح بوجهي خفت ما انكر شكلة يخوف دفعتة من صدرة وكل ما ابتعد يتقرب الا ان طخيت بالكنتور صار بضهري خليت ايدي احجي بهدوء وتحذير.
اخر مرة تصيح بوجهي احجي بهدوء ضرغام
انععععل ابو ضرغام انعععل ابووووة.

راح يدفر بالميز والحايط يصيح خليت ايدي على اذني خايفة منة شبية هذا مخبل لو تخبل على حضي، بعد ما شبع ادفر وارتاح بالحايط رجعلي بهدوء مصتنع يكلي.
القندرة ابن القندرة شعندة وياج
ملامحة تريد تاكلني اكل راص على اسنانة بقوة جاوبت واني الرعشة احتلتني: ماعندي شي وي يوسف
اني كلت اسمة لو تخبل بالزايد يضرب بالكنتور بيدة ويصيح بخبال: لا تذكرررين اسمة بلسااانج لا تجيبينة.

عفتة وكعدت مابية حيل وهذا بطران مادري شيحس ماكول اسمة شكول لعد؟ هسة لو صدك مرتة كلت يغار اشو صارلي يومين من صرت مرتك وبالاسم هم.
اجاني يريد يحجي واني صحت بية بعصبية
نيزك: لا تخليني اخذ ملابسي واهج شردت من سالم الگة سااالم الثاني كدامي
وكان كلامي جان راجدي خلاة يوعة ويحس على نفسة مسح وجهة وبصوت ناصي هادئ كال.
اني اعتذر ما لازم اصير عصبي عليج المعذرة منج.

طلع فوراً بقيت مذهولة بية شكد غريب هالرجال اعصار صار قبل شوية لفيت روحي بالغطا دخلت شهب تركض خايفة تشوفني وتكول.
ضربج؟
هزيت راسي لا رفعت حاجبي اكلها: ماعاش اليمد ادية علية نيزك ماتت بذيج الظلمة خلفت نيزك جديدة تفترس وتملخ اكبر راس ماتهاب ولا تخاف احد غير ربها
حضنتني تبوس بية وتكلي: الله لا ينطيهم لاحكينا يردون نجمة.

ونجمة هالمسوينها خدامة وعبالهم فقيرة وبطاعتهم تسحل شواربهم بس تصحلها الفرصة وتلكة من اليسندها دروحي شوفي لو شيسولها سالم ماترجع
هو عبالة ترجع برضاها هم
هه دخلت مراكز حتى تشتكي وتخلي الهم حد شيحجون ذولة
راح تبقى يم ميس
لا بس يجي خالي تبقى يمة هما غصباً عليهم مايحجون شي
لفيت راسي ونمت اي اني انام من انقهر وما اريد افكر بشي سلبي النوم ياخذني وياة ولا احس بعد.

بين الحلم والحقيقة ايد تمسح على وجهي تخيلت ابوي لان محد عاملني بحنية غيرة همهمت ما اريد اكعد من الحلم على الانفاس الدافية بوجهي فتحت عيوني بذبول بوجهي مباشرة ضرغام صاير يباوع بملامحي بتررركيز شلت ايدي لزمها وايدة يحضن بيها وجهي يكلي.
ابقي خل انام وروحي لا تتحركين هسة
باوعت للباب مسدود باوعتلة باستغراب وبصوت خافت كتلة: شتسوي يمي
مادري
شلون ماتدري وانت جاي بفراشي
هاي روحي جابتني غصباً عني.

رفعت حاجبي وابتسمت بهدوء كتلة
ضرغام بعدنا بالبداية ونهايتنا معروفة ليش ادور قرب مسافر بس تجي طيارتة يعوفك
اني الوطن ولو تلفين محطات الكون ماترتاحين الا بحضني وتشتمين ريحتي
ضحكت بصوت وهو ابتسم مركز بكلامي
عندك ثقة غريبة ما انصحك بيها
مرر ايدة على خدي بهدوء يكلي: كلامي صحيح
باوعت لايدة من يمشيها ورجعت سويتلة مثل الحركة ذبلت ملامحة كتلة بحدة: اني ما تأثرت بلمساتك ليش تتأثر بلمساتي؟

صفن بعيوني وسحبني قبل لا ابتعد حسيتة مو طبيعي.
ماعندج شعور وانتي بحضني؟
تصدك اذا اكلك لا
دفعتة ابتعدت شوية عدلت كعدتي اكلة
لا يغرك شكلي اني جسد بلا روح ماعندي مشاعر ههههه جثة اني ما انصحك بية الحقد والكرة تارسات روحي ترس وحبي قليل كلش قليل يكفيني واخواتي ويخلص بعد
باوعتلة مبهوت ابتسمت بوجهة رمش بعيونة وكلي
مايبقة شي على وضعة
االصحراء لو شكد ما تسگيها مي ما تخظر وتبقة صحراء
لا دكولين هيج.

ضرغام اني والله ما افيدك
ردت اكوم جلب بية سحبني يكول
بس نسولف سوالف بدون حتى لمس
بللت شفتي وهزيت راسي خليت راسي بين رجلية اكلة: يلة سولف اني مو مال سوالف
مال مشاكل انتي؟
اي والله بحيث مايمر يوم اذا ماتعاركت واعصابي دوم ترجف
ارجفهم وحگ حيدر
هزيت راسي بدون ما اكول شي صار هدوء وهو كال: سولفيلي شلون تزوجتي؟
درت وجهي علية وباستهزاء كتلة: حدد التقصدة شنو شلون تزوجتي عيب هالسؤال.

وجهة احتقن احمررر صار رغم هو اسمر بس بين بية اباوع لايدة ترجف كورها وكال بصوت هادئ عكس شكلة.
يعني تقليد تزوجتي؟
هزيت راسي اي وكملت: هما زوجوني اني صغيرة ما افتهم خالاتي ونسوان خوالي هنا لفنها وزوجني لابن خالي تقليد
اسمة سلوان
رجف جسمي خوف وگلبي زادت دكاتة من ذكر اسمة الخايس ابن الخايس كمت من مكاني بسرعة وطلعت من الغرفة بكبرها ارجف اسمة يرجفني بس ينجاب طارية لو اشوفة شيصير بية!

اربع سنوات ما شايفتة بذيج الليلة الما مثلها ليلة اخر مرة اشوفة بقة مثل الكابوس هو وذيج الليلة كملت حملي وجبت وشلت ابني بحضني كلها وحدي وربيتة هم وحدي امير حتى مايعرف اسم ابوة ولاهو يطلع ويشوف الاباء ويسئلني خايفة وشايلة هم لو يكبر شوية ويشوف الاطفال عدهم اباء شكلة على ابوة الماكو اخس منه واقذر.

مر اليوم واني حتى من الغرفة ما طلعت بعد ثاني يوم الصبح شفت ضرغام ماباوع بوجهي من شاف امير شالة يبوس بية وطلعة برة رجع امير مشتريلة كعدت يم ذهب نتريك وگلبي نار ما اتحمل بس اليوم رفعت راسي اشوف ذهب فاكة حلكها تباوع للشارع صرت اباوع وياها اشوف خالي رجع لبيتة بقيت جامدة بمكاني اركز بشكلة هاي سنين اني ماشايفتة بس تذكرتة.

دخل للبيت هو وزوجتة واطفالة واني ارجف طاري اخوالي يمر مثل السم علية يگطع احشائي تگطع ردت اكوم ماكدرت ذهب تحجي بفرحة تكلي.
خيبة رجع خالجن دشوفي
هزيت راسي وجهي مايتفسر كمت كعدت بالصالة وشهب تحجي وياي علية فرررحانة واني مو وياها عقلي رجع لذيج الايام البيها هو من هدد وصيح عليهم علمودي.

شهب وذهب كالن نروح نشوفة ماحجيت شي اخذت ابني لگلبي وخليت شهب تروح وحدها راد يروح وياها ماقبلت وامير ابد مو مثل الاطفال بس اكلة شي ينفذة لا يبجي ولايعاند راح طلع العابة يلعب بيهن سهلة تشتغل كمت كتلها.
خالة ما تخابرين ضرغام تشوفينينة شسوى
راحت خابرتة وفتحت الصوت مشغول كالتلي تخابرينة انتي
هزيت راسي لا: انتي احجي وياة
بس لا البارحة ضربج؟
شحدة
انفتح الخط راساً كال: عمي صدك شحدي.

سهلة: ها يمة ضرغام وين انت هسة؟
ضرغام: اريد البشارة من ذولاك الناس
باوعت بوجهي اشرتلها تستجوبة
سهلة: كول يمة بشرنة وياك
باجر كواكب تطلع من السجن
احس گلبي طار من مكانة ضحكت اكتم بحلكي وسهلة تكلة تضحك فرحانة.
سهلة: جنك على بشارة يمة
ضرغام: البشارة ماريدها منج يمة انتي شعليج
باوعتلي وضحكت كالتلة: لكيتم الملف
ضرغام: ضيغم لكة الضابط واشتراة
سهلة: هو الضابط وين جان.

بفلوس اشترو منقول الضابط ومحد ينطي مكانة بس هسة الولد طلعوة من البارحة هما يدورون عنة
سهلة: هما الولد شوكت اجو
البارحة ضيغم وفقار رجعو حتى ما ارتاحو كبل استلمو السالفة
الله ينطيهم العافية ان شاء الله.

دموعي تنزل بغزارة لازمة كلبي بيدي يريد يطلع من مكانة ماصدك انحلت وباجر اشوفها رحت توضيت ودخلت اصلي واحمد الله من الفرحة حتى ماعرف شكد صليت التفتت على شهكات شهبة سلمت وفتحت ادية اجت شمرت روحها علية حضنتني تبجي واسمع ذهب تهلهل بصوت عالي اجت علية دنكت باست راسي فرحانة اكثر مني
ذهب: ولج سهلة سوي كليجة وزعي للجيران
انا بعدني بس تطلع اسوي عشا لوجهة الله ناذرة واريدها تاكل بعد روحي ما اكلت اكل العزيمة.

شهب وي سهلة تسوي كليجة واني عيوني بس تهل دمع اريد بس اسكت ماكو اموري يجي يمسح دموعي ويبوس عيوني يكلي: لا تبسين نانا اتي سبيرة
بست ايدة راح وهم يرجع علية يعيد السواة رحت اغسل وجهي بمي بااارد عيوني صارن نار جاي انشف وجهي وشهب وراي كالت بتوتر.
خالي همام يريد يسلم عليج
هزيت راسي وبتردد رحت علية طلعت من بعيد سلمت علية داخلي يرجف كل ما اسمع صوتة يذكرني بحالتي القديمة.
شلونج نيزك؟

هزيت راسي زينة مدنكة ما اريد اباوعله ماحسيت علية الا يحضني بكل قوتة ويبجي بصوت عالي بجيت بحضنة بقهر وهو يكلي.
همام: خالي تاكلين بگلبي والله بگلبي ماترحن من بالي
شردت من سالم انتو الاخوال ما رحمتوني لو ضالة عد سالم عمري كلة ولا جايتكم اخوالي ما رحمتوني الكافر ماسووة سوايتكم وياي
همام: من يوم الطلكتج منهم كطعت علاقتي بيهم كلهم لليوم ماعرف اخبارهم.

عفنا العتب والكطع الصار ودموعنا عبرت عن البداخلنا من ضيم بوسني يتعذر ويمسح بعيونة
راح لذهب يتشكر منها هنا دخل ضرغام واني بحضنة خزرنة بغضب عيونة يردن يطلعن ماحجيت اني شي بس خالي عافة وراح يسلم علية مد ايدة وضرغام عيونة علية يخزر بية.
سلم علية وخالي ختمها ب: خالي بيتي مفتوح الجن وكلشي تحتاجن جوة رجليجن يجي تجن وياي احطجن بعيوني
ضرغام: مشكور ماتقصر بس البنات تزوجن بعد يجنك خطار.

خالي ذهب حاجيتلة كلشي من راحتلة صار عندة علم باوعلي وكال: خالي اريدج عندي اشوفج
قبل لا احجي ضرغام كال: ان شاءلله نجي نزورك بالبيت بس هسة هي تعبانة على غير يوم
طلع خالي وهو يوصل رسالة مبطنة اله ما رايداتهم تطلكن اني موجود دخلت جوة اساعد بيهن شي على الخفيف لان مابية حيل من راحت لليوم.

اتصلت بنجوم سولفتلها الصار للعصر اجت لخالي كعدت واكفة بالباب احس روحي جاي تنعصر شفت ضرغام موجود بالبيت بس ابد ما حاجاني حتى بوجهي ما يباوع رحت لبست عباتي ومن شفتة مالة خلگي كتلة راح اروح اني وعلى اجيب غراض من البيت كلت الكلام وطلعت اجة يمشي وراي مباشرة حتى بعدني ما كايلة لعلي صاح بية.
ضرغام: امشي كدامي يلا عوفي الولد.

ذبيت نفس وطلعت بدون لا ارد علية يمشي بصفي واني كل ما اوصل للبيت گلبي ينعصر سبقني ضرغام فتح الباب كوة لازمة دموعي ما تنزل دخلت وبدون لا اباوع بوجهة كتلة.
ابقة هنا هسة اجي.

مشيت ودموعي نزلن ايدي على حلگي اضم بشهگتي هنا جنا نشتغل ونضحك دخلت للصالة شمرت روحي على القنفة اتذكرها جنا ننام سوى هنا شكد جنا فرحانات هي تكول اني اعيشجن ماخليجن بعوز خليت ايدي على وجهي اطلع الكابتة بجيت وبجيت وعيوني راحت من البجي كلبي محترك على اختي منو اليطفية.
حرت امسح بوجهي من شفت ضرغام كدامي سحبني يحضني بدون مقدمات ويبوس براسي
يردد.
هانت لا تبجين.

احس صارلي اشهر ما شايفتها جبت عمري اركض وراها وارجعها للبيت ما اخليها بعيدة اني
كافي ولج گلبي كام يوجعني من بجيج
اختي هاي اختي ضرغام
كون كلها تحب اخواتها مثلج
احنة مالنا غير بعض بهالدنيا
رفع راسي يمسح بوجهي حاوطة بدية بجدية كام
ضرغام: اذا طلعت كواكب شتسوين؟
خل تجي بالاول بس خل تجي
لا ترحين مو بكيفج.

باوعتلة بعدم فهم وكمت من مكاني اخذت الغراض الرايدتهن وخاصة غراضها سودة علية حتى ماعدها ملابس هواي تحسرت اشم بملابسها من طلعت صار بوجهي يكلي.
ضرغام: هذا البيت الج يبقى ارجعن مثل قبل لو تبقن يم ذهب
ما حجيت شي والله ماعندي شي احجية عقلي مايفكر بشي هزيت راسي وعبرتة جلب بيدي سحبني علية بقوة ضاغط على معصم ايدي
ضرغام: اذا ما تريديني تبقين بالبيت ما اجي اني بس بالليل انام بالاستقبال ما اكدر اعوفجن.

نترت ايدي منه ما انترت بهدوء كتلة: الله كريم عوف ايدي ضرغام دا اتأذة
تركها وبلعت ريكة وكف بالكراج يدخن منطيني ضهرة بقيت بمكاني اباوعلة اتذكر اول يوم شفت مكفاة بيها ابتسمت اندار علية نفخ الدخان ابتسم ياشر على المكان واجة يتقرب يكلي.
ضرغام: من شفتج بذاك اليوم وانتي لزگتي براسي شكد حاولت اطلعج ما افكر بيج ولا اتذكر منظرج بيومها بس عجزت
بهتت ملامحي وهي يكمل كلامة صار بوجهي.

ضرغام: ضفيرتج والتراك الابستة تمنيت ما شفتج بيهن
بتردد ماردت اسالة بس طلعت من حلكي وسألتة: ليش
ضرغام: تسأل ليش وهي تطلع العاقل من طورة
مشيت بسرعة من كدامة ماعرف شصار بية بساعتها طلعت للبيت بوجهي ومن لحظتها بعد ماشفتة ولا دخل البيت حتى صوتة ما سمعتة الصبح من غبشة كلنا كاعدين وذهب دك مخابرات وي احفادها اسمعها تكلهم.
هسة رضيت عليكم بعد جبدي لاتقصرون شني الفلوس هاي عازتها للشدايد.

ساعة ساعة احنا مجتمعين ننتظر رجعتها وللظهر ماكو هي.
كواكب: عندما يسكن العالم تعج الارواح بالعويل
اخر ليلة خلف القبضان جانن ليالي ياما ابشعهن تحقيق قاسي اول يوم جان كابوس بشع من ابشع الليالي العشتها يردوني اعترف اني حاولت اقتلهم
بدون سبب الجزء المعروف سراج حاول يعتدى على اختي ومحاولة قمعهم لنجمة ما تنشمل.

اليس لكل فعل ردة فعل، احجي الصار بكل اصرار واتلقى التعنيف لان مايردون احجي هذا الجزء يردون احجي اليعجبهم بس.
جانت ليلة ابشع ليلة تمنيت لو كاتلتهم كلهم حتى من الفرح بوكتها ماحس بالوجع.

اليوم الثاني كلت ما راح تشرق شمسة علية اصراري بكلامي اليوم يجيب نهايتي بس صار عكس ما توقعت محد أذاني ولا عادو التحقيق مرة ثانية وكانهم نسوني ماعرف شكد مر وقت يلا طلعوني يسحلون بية عادو التحقيق وباصرار على كلامي اني بس دافعت لاخواتي.
حاضنة نفسي افكر باخواتي شصار عليهن هسة سالم النذل اخذهن عندة التفكير والخوف عليهن راح يموتني التفتت اباوع للمسجونات بصفي.

بنية شابة وحدة جبيرة الشابة تضحك بصوت عالي وتحجي وي نفسها.
كتلتة بيدي يمة كتلت كتالج شوفي بيدي هاي
غصت بالضحك والثانية تون من الوجع بلعت ريك من اجو سحلوها بعد مارجعت.
الم تقولو لنا ان العالم مليء بالقسوة!؟
ايام من حياتي ما اريد اتذكرهن ولا احجي تفاصيلهن عشت عذاب نفسي احس بروحي تطلع من جسمي بس يصيرن بعيني اخواتي وصوت سالم ما يروح من اذني.

عيوني تصب بدل الدمع دم عليهن احميهن بروحي هنا احتضنني دافعن عني جذبن كلامهم ويدرن بية صدك ما فرقني عنهن جنت اباوع بعيونهن بس اريد المح محبتهن جذبة مثل ماجنت اتوقع بس ماكو جذب حبني بكل روحهن دافعن على اصلي وعني
يا حنينات الگلب موتني رايدجن.
افراج افراج افراج كلشي يصيح افراج يا كواكب اطلعي اركضي الهن شوفيهن وين هنا.
(نتخطى مشاهد السجن بطلب ).

ناس ما اعرفها تركض حايرة شلون تطلعني وناس تدفع كلشي في سبيل تهلكني الزين والشين من الغريب الغريب اجتمعن واول كلمة اسمعها من ذاك الغريب القريت عيونة.
ضيغم: الحمدلله على السلامة
هزيت راسي ممتنة بدون ما احجي شي گلبي معصور عصر روحي مكسورة من جوة التفتت اسمع صوت حنون دافي يكلي: الحمدلله على سلامتج بالنا وياج
بصوت يرجف كتلة: شكراً.

ماكدرت احجي بعد مهضومة اني وحدي بهذا العالم ماعندي اهل لا ام ولا اب كلها غربة اليحن علية واليقسى وياي!
مشيت وهما وراي يحجون يردون يحجوني لان شكلي مو بخير اريد اطيح على وجهي وكون ما اكوم.
ضيغم: اخذج للمستشفى
اريد بس اتخطاهم ما اريدهم يشوفون دموعي الراح تنزل كلامهم اهتمامهم يخلن هوسة بروحي تعج اسمع فقار يكول.
اخواتج بخير اطمني بيت ذهب موجودات.

وكفن رجلية وحيلي خلص بعد ماطول هنا بخير خلي الدنيا تحترك امسح بدموعي وحايرة شحجي وياهم ردت امشي وابتعد عنهم لان حالتي تعبانه ماريد احد يشوفني هيج.
ضيغم: وين رايحة امشي لاخواتج طاك كلبهن عليج
هزيت راسي لا وكفت باوعت بعيونة
اريد اروح لدراهم هسة
عكد حاجبة باستغراب باوع بوجهة فقار ياشرلة بعيونة ميخالف صعدت وياه بالسيارة كوة عن روحي مو مستواي ذولة احسهم يشفقون علية واكثر شعور اكرهة بالدنيا كلها.

اعصر بادية اريد يخلص الوقت واوصل ما اريد اشوف احد.
ضيغم: رجعت الدين كواكب
ماحجيت بس هزيت راسي هو يريد يحجيني بس ماكدر.
ضيغم: سراج الشرطة ادور علية شرد
المفروض هو بالسجن مو انتي السواة مو قليل وانتن بنات صغار.
باوعلي بالمراية اباوعلة اريدة يكمل ابتسم بحزن وكمل: الضابط وطار جان مرتشي بيوم الحادث المفروض سراج ينسجن بعد اقوال اخواتج والجيران تقارير نجمة الطبية تكفي هي واقوالها.

من شافني على وضعي سكت واني والله داخلي نار
والسواة اطلعة منهم اضعاف اشرتلة على الطريق كوة احجي صوتي كد ما اكتم الوجع اختفى.
وصلت لبيت دراهم نزل متعجب بالمكان والبيت يباوع لكلشي باستغراب الباب مفتوح رحت ادخل واضغط على ايدي بقوة حتى اكدر احجي.
من اليوم لا اطلبك ولا تطلبني
غلطانة ابقة مطلوب الج هواي
متنازلة عن الطلب اني
يمتها تجين لا اخواتج
بعدين.

دخلت دراهم كاعدة ايدها على خدها تباوع للغربان التاكل شافتني رفعت راسها كامت من مكانها تلگتني صرت كبالها ماحجيت دكت على ضهري تكلي.
المكان اليرممج متانيج
دخلت لغرفتها تمددت بالفراش لفيت روحي ابجي كلبي وجسمي يونن علية من كثر الوجع البروحي حسيت راح اموت من حسيت بيها قريبة مني رفعت الغطا عني احاجيها ودموعي تنزل.
دراهم شوكت ارتاح شوفي شوفي جسمي
اطلع بالاثار اراويها واشهگ.

اني ادري بروحي اموت بس ما اريد اموت كبل لا اعرف اصلي
ان غداً لناظرة قريب
كلها تأذي بية محد يرحم بية نطفة نكسة اني عبالهم
صرت اهذري واحجي اشكال الحجي هي تسمعلي الوحيدة الما استحي منها الوحيدة الشافت ضعفي بوكت صفيت بالشارع فتحتلي بيتها دراهم منبوذة مثلي محد يحبها.
اليوم والثاني اني بيت دراهم ماطلعت على وضعي خاملة دراهم ما تحاچيني كلمة كلمتين بس.

طلعت من الغرفة هي طلعت بس اني بقيت اباوع للطيور التحط شجرة كبرانة بيتها وتلتم عليها الطيور خاف هي عايزة اندفر الباب ودخل كمت من شفتة اريد ادخل جوة لحكني يركض.
غضنفر: اوكفي ولج اوكفي
خزرتة ما لي خلكة ولا بية حيل احجي وياة
خاب هيووو شفتي جني مو بشر
بهدوء وتعب كتلة: اذا تريد كواكب مو هنا هي
شبح انتي لا بربج واني اكول البيت هذا مسكون
روح ولي للشوارع
تعبت منها اجيتج استريح شوية
مو خلگك اني.

اني هم جنت بالسجن بس طلعت برائة مو بس انتي
ضحك بصوت واني لا ارادي ضحكت كعد كعدت قريب منة يحجي هو واني اسمع.
ولج شگوني شگ ولد النعال
حتى اني هم
هي هاي تاليتها الشوارع
كتلك انعدل بس تظل اعوج
ديلا لاتحجين علية خل اكلج تعرفت على واحد دخل وياي طلعنا سوى من السجن هسة صار صاحبي
اول مرة يصير عندك صاحب
شفتي خرب يومة طاح على جروحي هالتايهة
ضحك هزيت ايدي اضحك مخبل هذا مو صاحي.

اختفت ضحكتي من شفت ضيغم واكف يباوعلنة كمت من مكاني غضنفر يباوعلي مستغرب من شوفتة.
شرايد؟
اجة هاي الكلمة بلساني باوع لغضنغر ورجع باوع بعيوني بخفوت كال: اخواتج يردنج مو اني
رايحتلهن
غضنفر: الله بالخير ابو الشباب
مد ايدة يصافحة وضيغم يركز بشكلة صافحة
وغضنفر يباوعلي يكلي.
لج كواكب هاي النوعية جديدة
كواكب: لا تشمر بالحجي.

عفتهم ودخلت جوة اجهز بروحي ماعرف امشي بدون الشفقة طلعت البس بحذاتي وغضنفر لازمة دك سوالف يضحك الفطير دنجب ما ينجب طلعت اكلة.
ابقة بالبيت بين ماتجي دراهم
غضنفر: اي مو هو بيت المليارديرة خاف ينباگ كله بعيجية حتى محد يجهبة
خزرتة مايفيد طلعت وهو وراي يكلي
وين مولية ولج
مدخلك
طرطور اني وراج
مشيت عفتهم ثنينهم حتى نسيت ضيغم جاي علية الاثول يصير وراي.
غضنفر: ولج تعاي سويلي اكل ميت جوع
سم اسويلك
اكلة بس سوية.

ضحكت واني امشي هذا شحجي وياة ضيغم لحكني بسيارتة يصيح بعصبية: المن جاي اني ماتصعدين لو مانعجب
صعدت اكلة: يرادلكم خلگ انتم
ضيغم: كلبتي وجهج ناقصج بس تاخذين مني راجدي هاي لان خربت الجو عليكم؟
بالضبط
زاد سرعة السيارة ما حجة ولا حرف بنص الطريق كتلة: شبيك بس تنافخ لعبت روحي خاف ناقصة
خزرني عيونة يريدن يطلعن بس مايخوف عكس ضرغام احسة مجرم من يخزر صدك يخوف هالحقير شفتة اني بس اتذكر موجود من طلعت بس ماتقرب الي.

نزلني يم بيت ذهب كتلة قبل لا انزل
شكراً جزيلا
بعدة يخوزر هذا عبالة يخوف ابتسمت وكتلة
ترة ماتخوف من تخزر عيونك يطلعن حلوات اي بس تخوف لا
بقيت واكفة بالباب من شفت ضرغام فتحة خزرتة وهو سلم علية رديت السلام فتحلي الباب وابتعد اول مادخلت شمرت نيزك روحها علية بكل قوتها حاضنتني تبجي والهلاهل صار بذني والجكليت ينطش فوك راسي.

ماعرفت شلون اعبر عن شعوري بهذا الوقت اخواتي يبجن يحضنن بية ويبوسن اني بس اسكت بيهن وابوس ما بجيت ولا دمعت عيوني مو طبعي كدامهن انكسر.
بعد ماشبعن مني شلت اموري بيدي صم جكليت يضحك فرحان اكلتة اكل وهو يكلي: هزا الس.

اخذت الجكليت منه خليتة بجيبي وابتسمت لذهب فرحتها بطلعتي فرحتني اضعاف والله فرحت بشكل عجيب من شفت ناس ما تعرفني فرحانة ومهتمة لامري لهاي الدرجة سحبتني تبوس بية هي وسهلة على فرحان يضحك هالولد ينحب كتلة.
ها عليش شلونك اني فرحانة بشوفتك
ضرغام واكف يخزر بية ونيزك شافتة توترت تسحب بية ادخل جوة حاوطني من كل صوب اباوع بوجوهن خايفات ونيزك وجهة اصفررر وجوة عيونها سواد مو طبيعي بس كم يوم هيج صار بيها.

يسالن ويسحبن بية يريدن احجي بس تجاهلت كلشي وكتلهن واني لازمة گلبي بيدي.
شصار من اجة سالم؟ شلون عافجن؟
وحدة تباوع بوجهة الثانية متوترات وجوهن انخطفت عضيت شفتي بحركة من شفت ايد نيزك ترجف بصوت هادئ عكس البداخلي كلتلهن.
احجن الصار ما اكطع روسجن
لزمت ايدي نيزك بقوة وبقت تحجي بالتفصيل وصلت
شهب عقد عليها قبس
باوعتلها وهزيت راسي تكمل شهب وجهة انصبغ احمر دارت وجهي بيدها ترجف.

نيزك: ضرغام عقد علية بس مؤقت بين ما تطلعين
ابتسمت اي ابتسمت واني داخلي نااااار يا نار هاي بركان بداخلي انفجر ماعرف شلون خارجي هادئ كررت كلامها واني سكتت اريد املخ روحي واملخة بس ما اكدر لان يبقى صاحب فضل علينة.
نيزك: اني والله تربطت ماعرف افكر بعد من كالو انتي بالسجن جنت اتسبع بيج بس من رحتي خفت على روحي وعلى اختي
كالتها ونزلت دموعها حضنتها ادك على ضهرها
كواكب: كلشي ينحل
ضرغام: شنو هوووو الينحل.

خزرتة بطرف عيني دخل معصب سويت روحي ما اشوفة امسح بوجهة نيزك وابوس بيدها اريدها تسكت وهو مكابلني يحوس يريد ينفجر راد يحجي ودخلت ذهب سكت وهي كالت.
ذهب: مسوية اني غدا لوجهة الله من طلعتي ورجعتي لاخواتج
اني مطلوبة الج هواي كثرت زيناتج مابية الاردهن
ذهب: عمت عين الاغم من يسمع بطاريج هو وين اكو مثلج انتي ثنين
ضحكت وهي اجت كعدت بنصنة تكل لضرغام
شعندك مكابلنة ماتولي نسوان نسوان.

هز ايدة ودخل لغرفتة نسمع بس الهوسة شوية وطلع
سهلة اجت تكول: يمة عزمت مثل ما كتيلي
ذهب: خوش سويتي.

شلونج ورد
ورد: منك من الشيطان صدك جذب انت تسالني شلونج ما اصدك؟
شردت من راد يضربني
قبس: مو مال احترام
ورد: لا شبيك بس انصدمت ترة حقي
قبس: امشي ولي بدلي يلا ما ابقة منتظرجن
صار يابة
دخلت اركض اصيح بصوت عالي
ورد: طوووووط طووووط السيارة بالباب يلا استعجلن
طلعت امي تعض باصابعها: رادلج سحلة معدلة ولج فشلتيني الناس مناااا
ورد: يا ناس غير خالاتي
هنا مو ناس ولج
استغفر الله ربي مو هيج.

ركضت بدلت بسرعة اشوف جوري الابتسامة على وجههة جاهزة وجاي تخلي مرطب لاديها قلصت عيوني ورحت يمها اكرص بزندها: خيرج صارلج شكد بس توزعين ابتسامات
جوري: اخذي شكد ما تريدين بلاش هنا
سكتت غصباً علية اسكت لان جوري كلش لطيفة واني ادور مشاكل بس وياها ماكدر لان تبجي بسرعة نزلنا وخالاتي ويانة يرحن قبس جان واكف يدخن يباوعلة ويحجن وي امي.

الناس تشتري الزلم مشترة وانتن متعافيات ولجن هذا الطول والجمال تعوفنا يروح من ايدجن
ياسمين: شسوي ما تريدة خو ما اجبرها
اباوعلها دخلت للمطبخ اباوع لقبس صدك يخبل بس مخبل الغثة رجعن يباوعلة ويتحسرن يكلن لامي: لو عندي بنية انطيها اله بلاش بس انتي ماتعرفين الزين
ياسمين: الله يحفظة لشبابة كلشي قسمة ونصيب
هاي ذهب سوتها عناد بيجن لان رفضتنة وكالت الا ازوجة.

طلعت امي قبلهن جوري مجلبة بظهرها صعدن واني شمرني يمة ارفعلة بحواجبي متحملني كوة واني استغليت هالشي كمت افتح الجام وانزلة لو العب بالغراض بس ينافخ خالاتي هم الله ينطيهن العافية ما خلنة الا يحجن وياة.
يمة صدك خطبت؟
قبس: عقد قرآن
وانتم عادي عدكم تتزوجون بنات شاردات من عمهن وما عدهن اهل؟
قبس: مابيها شي
نشغت ودكت على صدرها تكلة
صدك تحجون انتم شلون باجر تخلفون منهن وتخلوهن ببيوتكم.

ما خلاها تكمل كلامها ونتر بيها
لا تحجييين بشرررف البنااات شرررف البنات لاتحجين بية كااافي لهنا وحدج.
هسة شكلنا غير الصدك حبوبتك داكة روحها احفادي واحفادي تالي تزوجهم بنات مامعروف اصلهن
ضرب ايدة على الكشن يصيح بيها
قبس: من انعععل ابو الاصل شخبصتينييييي اصل وشرف عوفي البنات لاتحجين عليهن ما ناقصين دووخة
سكتت انخرست خرس وامي تعضلها باصابعها والله تستاهل واحد شخصة بالعالم شمعرفة بالدايصير والضروف العدهم.

وصلنا لبيتهم نزلن هنا واني حايرة بصايتي ردت انزل وكرصني من ايدي بقوة طير وذرة مني يكلي
قبس: اكعدي وانجبي بدون حركات
نزلت اكلة: الخايس كون كرصتك حية يا مسموم
ركعت الباب ودخلت اركض قبل لايسحلني ويسويني مضحكة للناس دخلنا سلمنا اني شهبة صديقتي صارت واموري اجاني يركض غزر بية الجبس والحلويات.

كعدنا وجانت بنية يم ذهب لان اعرف سالفتها جانت بالسجن وفقار وضيغم اتكفلو قضيتها يشتغلون بيها رغم لا ابوي وعمي ما قابلين يكلولهم
شلكم بالطلايب ووجع الراس
وهما مايهمهم لا تعب ولا فلوس فقار يصيح
شيصير اذا ساعدناها؟ احد يرضاها على بناتة هيج
يرجع ابوي يكلة: تقارن بناتنة بيهن
ثنينهم ما قبلو على كلامة فقار يكلة بعصبية
فقار: بناتكم عدهن اهل وسند هنا ماعدهن سند والا هنا مو اقل من بناتنة.

شكد ابوي حجة عليهم بس امي تسكت بية تكلة شلك غرض خسران من جيبك شي.
كواكب تخزر بعيونها كبار شكلها تعبان بس مبينة شخصيتها قوية تختلف عن اخواتها بكلشي لبسها كصة شعرها اخواتها لبسهن مستور كلش ويستحن هي لا حتى من دخل قبس شهب شردت ونجمة وراها تدردم اجة هو يم ذهب سلم عليها طالعة روحة مالة خلگ اباوع لكواكب تخزر بية ضحك هو انتبهلها يكلها.
قبس: صدفة حلوة تدرين اني فرحان بشوفتج
كواكب: سبحان الله حتى اني.

خالاتي يخزرن بيها وبكل صلافة كالن
دخيل الله جنج ولد انوب داخلة سجن بذبح مدري كتل
ضحكت تكللهن بفخر: دچ بسجينتي الحادة دچجتة
انخطفت وجوهن ما مصدكات كالن
شلون طلعوج ومخلينج بنصهم شنو انتو ما تخافون شكلها ارهابية.

بالغن هواي بالغن ارهابية هواي عليها هي بنية ضيعفة ملامحة حادة تخبل شعرها كلش قصير لايك لبسها وشكلها ضايفلها قوة جنت انتظر ردها عليهن بس فاجاتني من ضحكت كواكب بصوت عالي وقبس يضحك وياها يكلها: ارهابية اووويلي يابة بعد شتردين
كواكب: كلشي ما اريد بعد على هذا اللقب
ذهب جانت ساكتة صاحت بيهن
كاافي مانريد غثة التغثني اطرردها.

سكتن من دخلو عمامي نيزك شردت جوة بقت هي بس كامت من سلمو وعمي اسامة تحمدلها على السلامة الحلو بعمي اسامة مالة دخل بشي رجال مسالم وهادئ كعدو والولد اجو كلهم بس فقار ماكو
اكيد هسة حاير بحبيبة روحة.
جوري هم وياهن شاردة يكول غريبة بس اني وكواكب اباوعلها وهي تباوعلهم ذهب كالت فاتحة الموضوع.
ذهب: البنات هسة على ذمة ولدكم ضرغام حبوبا نيزك صارت مرتك بالشرع نبدي بسم الله ونسويلكم عرس تاخذها كدام الناس بعد.

باوعلي واني اخزر بية كال لذهب: من زمان اني ردتها حتى كتلج اخطبيها الي
ذهب: بعد ربك دبرها واجت للحلگ
ضرغام: شوكت ما تقرر وترضة نتوكل على الله
كواكب: ماكو عرس هسة يبقن البنات يم ذهب عود بعدين نقرر تكمل وياك لو لا.
ضرغام: مو يمج الحجي وي اختج هي مو طفلة جبيرة وعدها ولد
كواكب: بس اني صاحبة القرار مو هي
ضرغام: شقصدددج؟
ابتسمت بخباثة وهو يريد ينفجر شبية هذا اوي
فرقد: هسة فهمونا الصافي شنووو.

ضرغام: اني البت رايدها كدامكم كلت اريدها كبل بعدكم تتذكرون ما نسيتو
فرقد: لا تضل ترجف سوي عشا واعزم كم واحد وفض السالفة
ضرغام: هو هسة اني شكاااايل
كواكب: كلت هسة ماكو خطوبة هسة تريد تزوجها هي ما تريدك قبلت لان خايفة يكتلونها وقبلت بساعتها على اي اساس تزوجها وهي رافضة
بعصبية يرد عليها
ضرغام: انتي اطلعي منها وهي تصفة.

كواكب: اهدأ تريد تزوج وانت اعصابك ما ضابطها ونيزك عدها ولد كدامكم ابنها وياها تقبلون ولد غريب يتربة عدكم وي جهالكم؟
ضرغام: اني قااابل بيها وابابنها عرفت ابوة وكلشي اعرف عنها قااابل اني بيهااا
نيزك: گلبي يدك بقوة صوتة عصبي ومستقتل علية يحجي شايطة روحة وكواكب برود تحجي وياة بس عجبني كلامها لو اني ما افكر هيج ولا اتجرا احجي الحجتة كدام الموجودين.

كواكب: كدامكم ابنكم قابل نيزك روحها ابنها ولو يصير عدها عشر جهال ما تبدلهم بامير خاف باجر عكبة تكلبون وتكولون رجعي ابن الناس لاهلة
بذاك الوقت مالكم حق العندة كلام يحجية هسة يكولة.
من يمي اسمع صوت ضرغام ينافخ حجة طالعة روحة: فضيها يلا
كواكب: اهدأ نسيبي مو تريد تصير نسيبي اعصابك مو علية ولا على اختي بس تقهرها اخذها وما اخلي الها اثر
فرقد: فوكاها تهدد.

كواكب: حقي عمي لو بناتك هيج تشمرهن هنا صح ماعدهن اهل بس اني موجوده اصير كلشي لاعبالكم تايهات حقهن اخذة اضعاف والزمن يشهدلي.
نزلت دموعي حرارة تطلع من وجهي فخورة اني بيها والله ينشد بيها الظهر مو بنية صدك اعل
كملت تحجي بوضوح وصوت مسموع قوي.
كواكب: فترة اصبر اعتبرها خطبة وراها نسوي عشا بسيط اليعجبكم
ضرغام: بس تبقى بالبيت ما امن اخليهن بيت خالج بلة اجة سالم وسوالهن شي شحصل اني.

كواكب: يبقن لان ادري بسالم ما يسكت لهنا مايطلعن من البيت ماعدا نجمة مالهم غرض بيها
اسامة: واختج الثانية وينها اشو مسلمت علية؟
كواكب: تسلم وتبوس راسك لانك زلمة معدل تستاهل بوسة بالراس
اسامة: والله انتي معدلة
اريد اكمز بمكاني من الفرحة ولكم راح احسد روحي عليها تخلي الواحد يحير شيحجي ساعة تهدد ساعة تمدح فرتهم فررررر.
ذهب طول الوكت ساكتة احسها تريد تنطي كواكب مساحتها حتى تحجي التريدة حجت واخيراً.

تريد البت لابنك يمة اسامة
فتحت الباب شوية اشوف اسامة يباوع لابنة قبس
اسامة: البنية لطيفة واني صار عندي خبرة بالبشر اعرفة من شكلة مايحتاج اعاشرة بكيف قبس
شدكول بابا؟
سكت يباوع بالوجوة اخير شي باوع بوجهة ذهب كال: بس مو هسة اريد فترة بعد.
كواكب: احنا هم نريد فترة كلش زين هيج
كامت ذهب تبوس بضرغام وقبس
ذهب: وعلى مو نسوان طراگيع بعد ذوقي
جواد: هو انتي منو اليكدرلج التريدينة يصير.

ذهب: اخر واحد يحجي اسكت لا احجي غير حجي وياك خليني ساكتة
فرقد: اسكت خوية واتفرج بس
ذهب: وجكليت اكلو هم
من يمها شمرتلهم جلكليت سكتو وقبس طلع من البيت انفتح الباب علية رجعت ليورة صار بوجهي ضرغام رافع حاجبة دخل وسد الباب وراة يهمس بوجهي.
ضرغام: سمعتي خو الحجي تكعدين هنا
هزيت راسي بخوف ضرغام احسة سويجات خو اول ما شفتة كتلكم من حاجبة المطبور هذا رجع ينتر.
معليج بهاي ام دچة لا كلشي وركضتي وراها.

رفعتلة حاجبي سبقني قبل لا احجي وكال
ضرغام: اي ادري اختج
اموري صار بنصنة يرفع بادية اله انتبهلة ابتسم
ضرغام: حبيبي الحلو لكك مشتاقلكك اني
امير: اني اهبك
ضحك وهو رفعة يبوس بية ويشم مخلي خشمة على رگبتة بصوت خافت كلي: نفس العطر
وجهي اشتعل نار عفتة ودخلت يم البنات اشوفة تمدد على القنفة مخلي اموري فوكة يلعب بيه ولا يكول عندة خلك للاطفال استغرب هيج لطيف وي ابني شكلة يكول غير شي.

بعد ما طلعت اشوف كواكب شجاي تحجي وياها بقت كاعدة شتسولف غير تحس وتكوم.
نجمة: اكلج نازوكة صدك تزوجن؟
عيونها مدمعة تسالني مسحت على خدها بحيرة كتلها: ماعرف بس الضاهر اي
نجمة: شلون يعني هسة انتي تردين ضرغام عادي يصير زوجي.
سكتت ماعرف شحاجيها اني مال اصير زوجة مرة ثانية ما اعقلها بس اريد اشوف شلون تمشي الاوضاع افشل لو انجح اتقبل ضرغام لو لا؟
رجعت تسال شهب تكلها
نجمة: وانتي تتزوجين هذا قبس؟

شهب خدودها حمرة ماحجت شي ركضت جوة ونجمة يمي تلطم.
نجمة: نيزك هاي شبيها فدوة هسة ما كالتلي اي لا
نيزك: اي تقبل بية قبس خوش ولد حتى كواكب ارتاحتلة
والله غثة يغث غثث
ورد: ها ولجن تحجن على قبس اي نجمة اي ولج صدك غثة ما ينبلع شوفي شسوة بيدي الحية المسمومة
طلعت ايدها زركها تراويها النة ونجوم خاف جانت تحجي شوية علية داستها بالحجي اطبخ واسمعهن اضحك عليهن شكد غاثهن بس يبقى رجال وصاحب غيرة.

فزيت على ام ضرغام تبوس بية فرحانة تكلي
سهلة: اني محظوظة بيج وين الكة هيج جنة
التفتنا ثنينا على صوت ضرغام يكل لامة
منو كلج تبوسينها؟
يا ولك غير اباركلها
ليش هي اليوم عاقدة راح يصير، عدها طفل وانتي ستوج تباركين
فتحت عيوني على وسعهن مصدومة من كلامة
ضرغام: احجي بلسانج مو بعيونج رحمة على اهلج لا تطگگين عيونج رررحمة
نيزك: احترم نفسك وكلامك لا تشمرة تشمر.

راح ياكل ما مهتم للكلام الشمرة لزمت سهلة اكلها بصوت خافت: خالة والله جذاب ما متقربلي أصلاً اني ما اقبل
سهلة: حلالج يمة اني شعلية
طلعت تضحك واني متفشلة بودي هسة اكتلة يباوعلي ويضحك بخباثة ياكل ويكلي.
امير يريدلة اخو خطية كسر كلبي كتلة شبيدي عليك غير امك ما تقبل شدي الهمة لا يصير بية توحد لان وحدة.

رصيت على اسناني بعصبية شلت السجينة قريب منة احجي وياة وعيوني على الباب خاف يدخل احد: شايف هاي السجينة اشرحك بيها بس تعيد الكلام
ام دچة الثانية لا ذيج ادچ انتي تشرحين اكو فرق
هي دج
شفت شلون
نزلتها وابتعدت من دخلت كواكب اخذتها من ايدها
امشي ندخل جوة نسولف
بستها براسها وضرغام يباوعلنة خزرتة وكالتلي
روح انتي جوة.

خزرتني مشيت جوة ماعرف شحجت وي ضرغام ورة الصلاة تغدو وشربو جاي احنة والبنات نغسل مواعين ونظف راحن البنات وكلمن راح لاهلة اني سلمت عليهم وحتى شهب اسامة يكلها.
زورينا عمو فد يوم
بسرعة حبو بعض شهب كلش احسهة مقتنعة بقبس عكس اني ما طايقة ضرغام ماعرف احسة ينرفزني ومرات لا اذا بقة بعيد عني استلطفة.
كلها راحت كواكب اخذت نجمة وجهي صفر بعد كتلها: وين ماخذتها
جنت يم خالي تروح هناك وهي هم تجيجن مو بعيدات انتن.

نجوم راحت وياها بدون كلام جلبت بيهن حسيت روحي ضايعة شكد جنت فرحانة هسة العكس
كواكب: شبيج حبيبتي يمج اوديها وارجع
اخذن غراضهن وبعد ما رجعتلي لحكتهن بالليل طلعت كواكب بصوت خافت تكلي.
لا تخلين ضرغام يتقربلج ضرغام لا يتقربلج فهمتي
عكدت حاجبي بخوف سالتها: ليش
ما يتقربلج وخلص
هو جان جاي يرجعني طلعت وياة بالي مو وياي شتعرف عنة ليش تكرهة؟ رجعت وضرغام اتفادة حتى هو هم بس امير.

ثاني يوم الصبح اجت نجمة تريد تروح للدوام سلمت علية وراحت جاي اغسل بالمواعين واسمع صوت كواكب وي اموري تحجي عبالي تدخل اجة اموري يركض بيدة ورقة يكلي...
هاي من تواتب الس دالت
عكدت حاجبي ومسحت ادية من المي فتحتها اقراها وجمدت بمكاني.