رواية المنجمة للكاتبة كفاية كاظم الفصل الثالث عشر
يا حلو
نجمة: ولي
ميس: يا جميل
ولي
يا امور
هم ولي
يا كتكوت
ولييي وليييي
كمت من مكاني مطنكرة وعاكدة حواجبي جريت نفس قوي ورجعت اكرر هالشي احس غصة بگلبي وعيوني الغدارات يردن يبجن ويفشلني كدام الناس.
ميس: هسة غير تفهمني شكو
ماكو شي اكثر من الصار
اتخطي شبيج
ماكدر بعدني بالبداية
التفتت عليها والدمعة بطرف عيني ابتسمت بحزن ولزمت كف ايدي تمسح علية بحنان تگلي.
ميس: هاي هي الدنيا هيج شنو بيدنا.
بس اني اريدهن كلهن راحن اتخيلي كلنا جنا سوى بيت واحد نضحك ومتونسين فجأة تطشرنا بقيت وحدي.
حضنتني تمسح على ضهري ضميت وجهي بزندها ودموعي تنزل احس الغصة بروحي خانگتني.
ميس: مو وحدج انتي كلنا وياج اتخطى
كالتها بحدة وثبتت وجهي بديها عيونها بعيوني تكلي: كافي يلا امسحي عيونج ورانا كوووومة شغل ومخططات يلة.
هزيت راسي امسح بوجهي عافتني وراحت بقيت بمكاني اتذكر البارحة ليلة باردة متجردة من الحنية والدفو وحتى السعادة اخواتي مو وياي وحدي بالغرفة لا اموري وسوالفة لا شهب وحنيتها لا كواكب لا نيزك حسيت بالوحدة والقهر لدرجة ما نمت الليل كلة بقيت كاعدة للصبح.
اجت ميس بيدها عصير ومي خلتهن كدامي فتحت المي وانطتني اشرب شالت شعرها وكالت بحماس
ياااااي راح نتخرررج واخيرررراً.
ابتسمت بكسرة وسكتت اما هي بقت تسولف عن الحفلة الراح تسويها وتجهيزات التخرج جنت مستمعة فقط ولا كاني اني هم راح اتخرج حست علية وصاحت بجزع.
وتااالي نجوووم
ماعندي واهس اني اريد بس الشهادة اخذها
يااا ولج
باوعتلها بجدية والغصة بلعومي كتلها
اني اريد بس الشهادة اخذها اشتغل بيها لاتفتحين الموضوع وياي ثاني مرة احتفلي وجهزي تعالي راويني وانطيج رأيي عادي بس لاتفتحين الموضوع.
عفتها ومشيت للقسم يحتاج التخرج فلوس ما اريد اكول لاخواتي هنا كاعدات عد الناس بعدهن بالبداية اني حتى واهس ماعندي مقهورة بعد الصار ماكو شي فرحني.
خلص الدوام ورجعت للبيت وي ميس توصلني للباب يلا تروح وحتى بالروحة هي تاخذني ماعرف شلون ارد جميل هالبنية ثبتتلي هي مو مجرد صديقه هي اكثر من اخت رفيقة دربي ميس
باجر عدنا تطبيق بالشركة مو تنسين
ما اروح بعد للشركة ميس
فتحت عيونها مصدومة
ميس: يااا ولج ليييش؟
ماكدر اشوف استاذ فقار وضيغم كلهم ماكدر اتعامل وياهم بعد
صدك تحجين انتي!
تدرين عرفو كلشي عنا شلون جنا عايشين وشنو وضعنا هسة بيوم رحنا للمستشفى علمود ايدي وراسي كتلهم حادث سوينا هسة عرفو مو حادث راح يشفقون علية ما اروح بعد كملي انتي اني بس استلم الشهادة اشوف شغل الي.
نزلت وعفتها ماتعرف شترد بس تعرف حقي ومن تخلي نفسها بمكاني راح تحس بالاحساس الداحس بية شلون إلى عين اشتغل وي ناس يعرفون ابن عمي ولد عمي بهل قذارة والوحشية يعرفون ماعندي سند هو مو عيب هاي مشيئة الله بس ماكدر لان احسهم يستخطوني.
دا احاول اتأقلم وي الوضع الجديد واعود نفسي نفسيتي سئية الى درجة وصورة امي وابوي براسي ما تفاركني احتاجهم اني.
اجة خالي من الدوام باسني يسألني على يومي.
هو صح لطيف بس بعدني استحي منه لان ما معاشرتة زوجتة لطيفة كلش وجهالة هم كلهم عائلة مثقفة لطيفة احس نفسي غريبة بوسطهم الحمدلله من منطيني غرفة إلى اخذ راحتي او بالاحرى احجز نفسي بيها.
من زوجتة تفتقدني ارسم الابتسامة على وجهي واكفة تسولف عن مرضها وعلاجها كاطعة دك الباب بعدني ما متحركة وماحس الا اموري مجلب بية فحطان وجهة احمر شهكت ورفعتة ابوس بية بفرحة خانگني خنگ يبوس بية يا روحي يعاتبني يگلي.
امير: اتي ليس ما تزين (تجين) يمنا؟
هنا اني حبيبي انت تعال يمي
برطم شفتة ما قابل رجع يكلي بفرحة متذكر شي
امو الهباب زابلي هووواي هلويااات
ياشر بيدة هواي ضحكت اكلة
بالعافية عمري
التفتت لشهب وراي عيونها مدمعة تباوعلنا نزلت اموري وركضت حضنتها اشم بيها راساً دموعها نزلت.
هو شكو تبجين شكووو
ليش ما تجين الحقيرة
بعدني بسم الله من طلعت
حتى لو هاي اشتاقيتلج
حتى اني مكانج بارد.
دخل خالي ملطف الجو واني اعرف بس هالفترة اتعود على الوضع بقو شوية يمنة وخالي راح يوصلهم شهب تكلي نيزك تريد تشوفج طلعت وياها بالباب لكيتها منتظرتني حضنتني تباوع بوجهي بخوف تكلي.
شبيج اليوم من رجعتي من الدوام؟
شبية؟ ما بية شي
شفتج اني من رجعتي لا تجذبين الدمعة بطرف عينج
ابتسمت اكلها
وانتي بالكامرا شفتي الدمعة بعيني بعدها
عبريها بسوالفج لوتية صايرة.
دخلت وياها والقلق والحزن خيم على ملامحها لزمت ايدها بخوف اسألها: شبيج نيزك شكو شصار
دنكت راسها ونزلت دموعها بشهكة جاوبتني
كواكب راحت بعد ما تجي
كالها وغطت وجههة تبجي بحركة بهتت ملامحي وکلبي نبض بقوة هزيتها اكلها: ليش هي وين راحت؟
ما ردت علية اخذت روحي وياها ضربت على رجلها كامت وجههة احمر دم من البجي رجعت بيدها ورقة خلتها بيدي اخذتها ايدي ترجف مكتوب بخط مكسر.
كواكب: ابقن بكاعجن لاتطلعن من هذا البيت الا من ارجعلجن اني ارجع لاتخافن علية موجوده لاتدورن علية لاتسببن بمشكلة جديدة هنا كم يوم.
قريتها ورفعت راسي لنيزك
شبيها هاي وين راحت
ماتنلزم خبلتنييي
كعدت لازمة راسها تعصر بعيونها تقربت عليها احجي: هسة هي يم دراهم مو؟
كالت لا تسئلن كااالت
اذا مو عد دراهم وين؟
بس لاتضل تحوم على سالم هاي عدها موال تريد تغنية ماترتاح تجيب اخرتي تجيبهاااا
من شفتها اعصاب سكتت اهديها.
ترجع ماتعوفنا هي
كوولي شوكت ترجع؟ امنت علينة وراحت انتي عد خالي واحنا بآمان هسة راحت تضيع روحها بافكارها دراهم خبلتهاااا دررراهم كتلها عووفي هالمررة عووفيها لازكتلي بيهااا تشمرها بوسط النار دراهم وما تكول لااا
احس بطني مغصت بعد كلامها نيزك كلش مقهورة تعرف بشنو تفكر كواكب لهذا السبب خايفة عليها
متكتمة بالتعرفة ماتقبل تحجي.
بعد ما سمعت حركة بالبيت طفرت للحمام رجعت مغسلة وجهة طلعت شفت ضرغام ياكل بالمطبخ سلمت علية گلي.
انتي تدربين بالشركة
هزيت راسي باي حجة وهو ياكل
فقار يكول رادلها دفعة تصير توب
شنو يرادلها دفعة سيارة عطلانة اني
غص بالاكل يضحك ركضت اصبلة مي وجهة صار احمرر اخذة يشرب نكت ايدة يصيح.
خرب ابليسج لاتشبهين هيج
غير انت كلت رادلها دفعة
اني شعلية كلت فقار يكول.
عيب علية هيج يكول أصلاً اني شاطرة بسرعة اتعلم حتى هو جان يكلي زينة نجوم
اختلف عليج بسرعة اني هم اشوفج ذكية الله يسامحة ليش هيج يحجي عليج
عكدت حاجبي وبعصبية كتلة
وبعدد شكاال
ما اريد اسوي فتنة
لا كول خلي اسمع
الفتنة اشد من القتل
فتن ميخالف
دررروحي انتي وياة تمالخو شكو اني نقال حجي
بعد ما اروح اني ولا اشوفة بس كلة عيب عليك رجال شكبرك شكدك تجذب وتحجي شكلين
طلعت معصبة وشهب طلعت وراي تسال
شكو شبيج.
نجمة: هذاا الاستاااذ فقاار يحجي علية وكدامي يصيح نجوووم نجووم
هسة شكال شبيج هيج عصبية
مو عصبية اني يلا ولي من وجهي
ياااا
طلعت من البيت هي لازمة الباب إلى من جوة اسمع صوت ضرغام عاط بيها.
ادخليييي جووووة
طبكت الباب بسرعة واني فوك ما معصبة تعصبت اكثر شكو يصيح عليها بعدنا باسم الله هسة واذا فتحت الباب منو بالشارع صدك غثة طلع ضرغام بس هم احسة حباب.
ميس حاولت تقنعني هووواي ارجع للشركة بس نفسي ما انطتني جزت روحي بعد ماكدر اداوم وياهم صح هما حبابين وماغثوني بس من انكشف المستور انتهت الرحلة قبل لا تبدي.
بقيت بالبيت اجهز للبحث التخرج هو كامل ماباقيلة شي بس نلغي وانتهت داومنا اني وميس علمود البحث كملناة هم وانزاح مني حسيت نفسي خفيفة بعد ما عندي شي، جاي نمشي اني وميس ساكتين حتى هي بعد ما شافت مزاجي شلونة وحاولت وياي ماكدرت طنكرت مثلي.
ميس: من هسة لو نحتفل بحفلة التخرج سوى لو ما نتخرج
نجمة: مو بكيفج ميس احتفلي خلي اهلج يجون يفرحون بيج اني اهل وماعندي منو يحتفل بية اخواتي مو وياي نيزك عقلها طاير على كواكب وكواكب ماكو وشهب حايرة باموري ماعندي احد اني
ميس: كلنا اهلج لادكولين هيج.
حضنتني واني الغصة مجلبة بلعومي اشوف الطلاب التتخرج اهاليها تجي وتفرح اتذكر اهلي وگلبي يعصرني اتخيل امي عايشة هي وابوي يجون فرحانين يباركولي بس يبقى تخيل وما تصير حقيقة
رجعت للبيت اشوف البنات مريت عليهم وجعني گلبي على نيزك ترجف ررجف اعرفها متخبلة على كواكب تشتغل ماتكعد تنظيف طبخ ماتخلي واحد يشتغل غيرها شهب جانت تشكي حالها الي.
شهب: شفتيها شلون تركض منا ومنا هيج راح تموت.
نجمة: شعجب ما لحكتها لبيت دراهم؟
ماعرف والله بس هي تسمع الها كالتلها لا تطلعين من البيت ما تطلع بعد
هسة شوفيها ما تتحمل كم يوم وتروحلها بس ما تجي
يمعودة خليها تطلع تشوفها بلكت ترتاح
ذبيت حسرة اباوعلها رجعت اسال بشهب
شلون العيشة هنا
زينة كلهم حبابين بس قاهرني على مايدخل هنا لان احنا موجودات
يااا وين ينام
بغرفتة بس اذا دخل مايطلع واذا طلع ما يدخل بعد
ضرغام شلونة وياكم.
يموووت على امير وامير تعلق بية بشكل غريب بحيث اول ما يجي يشمر روحة علية وهو مايصدك يبقى يبوس بية ويلعبة بس يرتاح شوية ياخذة يشتريلة واموري طاير من الفرح
دمعت عيوني بفرح كتلها
كون يعوضهة مكان الاب امير
غير كون اختج تنطي الرجال وجهة
شلوون
لج عيونة وراها بحيث من تدخل الى ان تطلع هيج صافن عليها وهي نظرة هاي النظررة ما تباوعلة
تتوقعين ضرغام حبها بهاي السهولة؟
ماعرف بس ماشايفة نظراتة شلون تتغير بس يشوفها.
كولي والله
لج حقج انتي ما شايفتهم
اويلييي يحبها
وبس يصيح بيها لاىتشتغلين كافي اكعدي ولا كانها تسمعه
لكك اويلييي
وحتى وصة امة ما تخليها تشتغل
طاح على وجهة هذا
هي اختج صح حلوة بس راسها يابس بس لو تلينة شوية
كمزنا ثنينة من شفنا نيزك واكفة فوك راسنا مكتفة اديها خازرتنة انبلعت لسانتنا حتى مانعرف شنكول بعد.
نيزك: كملن سوالف ليش سكتن
نجمة: هاي هاي جنا نحجي على الشسمة
شهب: اي هو الشسمة جنا نحجي علية.
نيزك: اكول نجمة روحي اقري احسن ماكاعدة يم شهب ام العلوم الثانية.
نجمة: شو اطردين بية ترة مو بيتج هذا
شهب: واني مو ام العلوم نجمة ام العلوم
ضربتها رجعتلي الضربة اخذتني نيزك ادفع بية واني اصيح بشهب: انجبي الفاهية اني ما انقل علووم
شهب: نسيتي لو اذكرج تجمعين السوالف والتسمعينة تجين تنقلينة للبنات
مو صوجج العوووبة
نيزك: امشي يلا كافي ماما
وخرت ايدها مني خزرتها بطرف عيني
انتي لا ادفعين رايحة اني.
اقري زين عود ضرغام مايفيدج خلي يفيد روحة
هزيت راسي طلعت صار بوجهي هو ابتسمت درت وجهي عليها ارفع بحواجبي وهي تخزر بية صاح بينة.
ضرغام: هسة شكو هالخزر
نجمة: نيزك صارلها شكد تحجي بيك خبصتنا شوكت يجي ضرغام ما شوكت يجي الحمدلله اجيت جان صعد ضغطها.
سكتت كلبي يدك بقوة اباوعلة مستغرب يباوعلي مامصدك كلامي رفع عيونة يباوع لنيزك التفتت اشوفها وجهة دم والعيون طاگتهن تهز راسها لا لو تلزمني تموتني هسة اني ليش جذبت هيج مادري!
طلعت امشي سريع فتحت الباب التفتت علية
نجمة: انطيها خبر قبل لا تطلع ثاني مرة
نيزك: نجممممة
شردت العوبة عافتني واكفة افر براسي ولا توقعتها هيج تحجي ضرغام ابتسم وفات مني باوع بعيوني
كال: اكعدلج بالبيت اذا تريديني غير تكولين.
نيزك: ترة هاي خبلة تحجي من وحدها لا تصدك بكلامها
رفع اصبعة رسم على خدي دائرة وكال بذبول
ضرغام: اذا هي تجذب خدوج هم تجذب؟
رجعت ليورة وهو دخل جوة يضحك ويكول
دم گلبي يصعد لراسي بس اشوف اخدودج هيج
ما راح تشوفهن اطمن خاف لا تنجلط
ضحك بصوت عالي يكلي
ضرغام: يا جبل ما يهزك ريح
شفت بعد جبل يا ريح التهزة
عض شفتة يكلي: احب ثقتج هاي
حتى اني احبها
رحت للكاونتر انطيتة ضهري اكلة
اصبلك اكل
من ايدج طبعاً اريد.
شغلت النار احمية ما رديت علية حضرتلة اكل تاخر هواي رحت يم ذهب اكعد يمها وين يلا صاح
تعالي ام عيون
استغفرالله هسة هذا شحجي وياة
ذهب: دمشي شوفية راح تجلطينة كبل لا يتزوجج
هم انتي هسة اني شمسويتلة؟
لا تسويلة شي هو انتي بس عيونج تأدي الواجب
هزيت ايدي وعفتها شبيهم ذولة يمة هسة اني حتى ما انجمع بية وما اطلع وهو موجود الا عندي شغل
دخلت عيوني بكصتي صايرات مليت راسي بنفاذ صبر كتلة: نيزك اسمي لا تبقى تصيحلي بكيفك.
ضرغام: بس تعالي اخذيلج راجدي ثنين باليعجبج بردي كلبج اذا تريدين لا تخلينها بنفسج
نيزك: شنو شفتني انت؟ اني ما اأذي شخص الا يأذني صدك هسة انت شردت من صحتلي
رفع عيونة ورفع اكتافة كال: نسيت
هسة اروح لو تتذكر
دكعدي بلكت اتذكر هسة
خزرتة وهو بدا ياكل بقيت واكفة فوك راسة رفع عيونة اشرلي اكعد كعدت تعبانة ذبيت حسرة وخليت ايدي جوة خدي اباوع بنظرات باردة
ضرغام: خيرج سولفيلي
ما ارتاح اني.
اشتريلج الراحة لو بفلوس بس خليج وياي
ضرغام صدك اذا ارتاح ما اطول هواي تخرب راحتي
هاي قبل مو هسة
نفس الشي البارحة واليوم ماكو بيهن اختلاف
كمت اسويلة جاي كام بسرعة حتى ما اكل هواي سالتة واني اغسل بالقوري: اشو ما اكلت؟
ضرغام: شبعان نصي الجاي هسة اريد اسبح شوية وجيبية وراي.
هزيت راسي خليتة على النار ورحت اسبح نسيتة على النار حتى ماكلت لشهب تطفية طلعت من الحمام المنشفة براسي ركضت طفيتة بسرعة ريحتة تارسة المطبخ صبيت كلاص جاي اجت شهب خليتة بصينية كتلها...
روحي انطية لضرغام بين ما اكمل
شهب: صاحية انتي؟
شكو شكتلج هسة
ترة ضرغام رجلج اني شكو داخلة علية بلة جان بوضع غير لائق
خزرتها بطرف عيني اكلها: الخوينسة يا من تحت السواهي دواهي
منطقي كلامي.
هزيت ايدي ومشيت صدك كلامها منطقي بس اني ما خطر بالي هيج شي دكيت الباب ودخلت لكيتة نايم على وجهة دافن راسة بالمخدة بصوت هامس كلت
ضرغام كاعد؟
همهم ورفع راسة عيونة حمر ملامحة تعبانة شكلة يقهر خليت الصينية على الميز وتقربت منة احجي وياة.
شبيك مريض؟
تعبان
كالها ونهض مد ايدة ياخذ الكوب انطيتة اله طخ ايدي ابتعدت اكلة: شغلك مابية تعب هو انت بس كاعد
هم صح
كلش صح
مشيت اطلع باستعجال كال: تعالي هنا تعااالي.
درت وجهي خازرتة: شكو
بروح اهلج تعالي
شتريد ضرغام
شخليتي بضرغام
عفواً
شهكت من كلبني طحت على وجهي شكد غدار رفعت راسي مصدومة شلون وكعني وما انتبهت
خلة الجاي على الميز سحب المنشفة من شعري خزرتة برود واستهزاء كتلة
اي وبعدين؟
ابتسم يمرر ايدة على شعري خلة اصبعة على حلكة
اش
هههههههه ضرغام جاي اضحكني شنو هاي الحركات.
سحبني من ايدي بقوة يضغط على معصم ايدة تغيرت ملامحة بعصبية يكلي: لا تلعبين علية اسكتي ليش تحجين كلام ماااصخ نييزززك
هسة اني شكلت؟
رص على اسنانة بقوة يزيد الضغط على ايدي غمضت عيوني بصوت هادئ اكلة.
ضرغام ما اقصد شي والله
نيزك لا تستغبين انتي مو صغيرة
صح افهم ولان مفتهمة عقلي يضرب
اسئليني ليش تبقين الاسئلة يمج بدون جواب.
فتح ايدي عدلت كعدتي صار كدامي مباشرة حشرت ضهري بالتاج عيونة تريد تاكلني مديت ايدي على المنشفة سحبها: جججج
شعري مبلل شبيك
عوفية
عضيت شفتي افكر شنو اسالة هسة خليت عيوني بعيونة كتلة.
تريد اتمم الزواج؟
هز راسة لا استغربت كتلة: شتريد لعد؟
تقرب علية باصابعة ياشر على كلبي وعيونة بعيوني
ضرغام: اريدج
ماترهم اذا على الزواج يتم بس كلبي مايصير الك
اني وياج والزمن طويل ماعندي شي انتظر
ميت تعرف ميت رجع عاش؟
هز راسة لا طاوق وجهي بين ادية يهمس
اعرف انسيج كل دمعة نزلت وابجي عيونهم البجت عيونج الحلوة
ماتكدر
باشارة منج اسويها
الماضي انتهى بس بقت اثارة لا تذكرة
بس انتي ما طلعتي منه لهسة؟
دمعت عيوني وايدي رجفت كممت منة اركض ما حاول يمعني عافني اطلع بسهولة طلعت احاول ما ارجع اتذكر شي لفيت شعري وعيوني دور الفراش ركضت اتلفلف بية بقوة مجلبة بية باقل من خمس دقايق نمت والرجفة بجسمي، شلون اكلهم اني مريضة احتاج اتعالج بعدني ما متخطية صدمات حياتي عبارة عن صدمات احتاج علاج ودكتور.
الهي روحي بالشغل ومن ذاك اليوم حتى مايباوع بوجهي ولا يطلب مني شي ماكو شي جمعنا سوى حرت بشخصية هالرجال ساعة مايشوفني بعينة وساعة عيونة ما تشوف غيري!
كواكب الخبلة بگلبي ادك غطت وغطتها ما تبشر بخير احس روحي ترفرف عليها اريد اطلع اشوفها بعد ما اتحمل اكثر من هيج بعد، بيوم كلنا كاعدين اندك الباب شوية ودخلت هي بيدها علاليگ شهكت وطفرت اركض حضنتها وعيوني لا ارادي هلت دمع.
بجيت بحضنها خايفة مخنوكة اريد احجي كلشي احس بية وهي تطمني بتهديدها وكلامها.
كوة بعدتها مني راحت تسلم على البنات ضرغام بس ينافخ ويكلب بعيونة درت وجهي عنهم امسح بوجهي اشتعل نار ماحس الا طوقني يسحبني للمغسلة يغسل وجهي بمي بارد بحركة يكلي.
عليمن هالبجي عليمن عمت عيونج منو الج
ما حجيت شي بس اشهك ضغط على متوني يكلي سهلة مسحت وجهي وابتعدت عنة بسرعة استحيت كدامهم حاضني هيج التفتت كواكب من كلها.
ضرغام: ام دجة عندي عرض الج
كواكب: بلة كولة اسمع
ضرغام: بيتي الج اخذي المفتاح اكعدي بية احس الج
كواكب: عرض حلو ومغري بس شكراً ما اكعد بية
ضرغام: انتي صاحية عزيزتي؟
كواكب: اي عزيزي صاحية والسمعتة صحيح
رحتلها اقنع بيها الصراحة كلام ضرغام كلش عجبني
نيزك: اكعدي كواكب قريب مني ليش شالعة كلبي
كواكب: يابة دراهم مريضة ومحتاجة واحد يمها مو مال اعوفها وحدها وهي مرة جبيرة.
شعليييج بدرراهم انتي شلون جانت عايشة قببل هي عوفيها تووولي
عكدت حواجبها ما قابلة على كلامي
كواكب: اااالا دراهم نيززك ما اقببل اني
من شفتها تعصبت حجيت بهدوء وداخلي يفووور نار
نيزك: روحيلها بين فتره وفترة ماكتلج تكطعين بيها
كواكب: نيزك اسكتي ترة بعد ما اجي اشوفج
سكتت كاتمة الحركة بكلبي بس احجي بعد تسويها وتكطع كلشي ولا دراهم خط احمررر هالمرة عدها راح تموتني بيها، كعدت يم ذهب تسولف باريحية.
ذهب: منين هاي دراهم
كواكب: وحدة عبالهم تسوي سحورة
ذهب: ياا دهر دهرر وصدك هي تسوي
لا وين مكرودة وينها وين السحورة هالفقيرة هاي
ضحكت تبوس بامير اخذتلها شوية كامت تباوعلي كالت: اني رايحة
امشي كدامي
اجت وراي سدت الباب خازرتها وهي سحبت جنطة من جوة ملابسها خلتها بيدي تكلي بصوت ناصي
عوفيها عندج هاي الفلوس
فلوس سالم مو؟
فلوسجن ذني مو فلوسهم
اي اي بس ليش جبتيهن
يفيدنجن بقيهن يمجن
وانتي؟
ما احتاجهن.
لزمت ايدها بتوسل كتلها: اخذيهن كلهن لا تشلعين كلبي هيج ابقي هنا يمنا البيت فارغ اكعدي بية اذا ما يعجبج يم خالي احنا ما محتاجين شي بس محتاجينج
رفعت ايدي باستها تكطع كلبي بهاي حركتها
كواكب: لا تخافين علية اكل ما انوكل اني
الدنيا ما ترحم
لامثالجن طبعاً اي بس اني الدنيا سوتني مثل ماتريد لا تهتمين
كواكب: بستها وكوة سحبت روحي ماعرف شلون اقتنعت اطلع بس بقى كلبها وياي قبل لا اطلع ذهب حاجتني: حضري روحج للعرس.
كواكب: على الخير عرس يا عرس؟
ذهب: شني يا عرس غير عرس اخواتج
ابتسمت باستهزاء وهزيت راسي كتلها: ان شاءلله
خزرت ضرغام وطلعت منهم ركبت دراجتي العزيزة بنت العزيز الصاكة الصايرة احبها اكثر من روحي لو ماهي ما افرفر اني، رجعت لدراهم بدلت بسرعة وكشخت كشخة اي لا عبالكم ترة اني هم عندي ملابس كشخة واكشخ.
خليت عطر وطلعت بنفس الدراجة دعيت ما يلاگيني غضنفر بس الحظ الفكر لاكاني شخطت الدراجة منة بقة يصيح وراي.
لج وووين مووولية مبدلة ملابسج الوصخة ووووين
اااابن الوووصخة الخاااايس مو نفسك انييي
باعلى صوتة صاح وين ضحكت ورجعت علية خطية حسيت بلاعيمة طكت وكفت الدراجة كتلة
لامممك خوووش رايحة اشوفها وارجع
شخطتها وعفتة عبالة اكلة لا بوية اني ماحب اخلي شخص يعرفني زين لا وين جنت ولا وين راح اروح.
وصلت للمكان بعد ما طكني التعب والجوع نزلت اشتريت بطل مي شربت نصة خليتة بالدراجة وبقيت كاعدة انتظرة يطلع حالياً اني كدام الشركة منتظرة الاشگراني صراحة اني معجبة بية عندة كارزما مو طبيعية هالولد ان شاءلله يطلع مثل البالي.
كاعدة على الدراجة بمسافة عن الشركة متاكدة هما مايشوفوني من يطلعون بس اني اشوفهم بعد نص ساعة او اقل يخلص وقت شغلهم ولو تكولون شلون تعرفين وقتهم سالت نجوم بس هي ماحاسة اني سالتها واجيت كذا مرة حتى بس احجي وياة على انفراد بس ماصحت اليوم الحازمة احجي وياة يعني احجي.
طلعن الموظفات وبعض الموظفين الا الروس الكبار ما طلعو اكيد لان هما الرئساء بطلعة وحدة طلعو كلهم اربعة الى خمس شباب ذبيت نفس بضوجة ونزلت من الدراجة اروح احجي وياة ماكو غير حل مايعوفونة وحدة استغفرالله.
مشيت باتجاهم من تقربت عليهم كلهم انصدمو وتفاجؤ بجيتي سلمت عليهم كلهم ردو السلام واول واحد ضيغم كال بخوف وقلق.
صاير شي وياج؟
لا مو هيج
فقار: محتاجة شي؟
مجدية منكم لااا اكيد
قبس: محتاجة فزعة اكيد.
ما احتاج فزعة بس اريدك
قبس: اني؟
لا عروگ اذاني
ضيغم: شتريدين منة؟
انت شعليك بوية اني والنسيب امشي
مشة وياي عفتهم كلهم مبهوتين شبيهم ذولة ماعرف شيحسون من يحجون قبل لا احجي.
سمار: رجعيلي حبيبي الغالي
قبس: هسة صرت غااالي
سمار: احبببك اني من اروح فدوه لهلطول الحلو رجعية يبنية رجعيية
كواكب: راح اشمرة للجنية بكيفي
ضحك قبس وذاك يصيح: حبي الاول اترجاج لا تأذينة.
ضربة واحد منهم سكتة ابتعدنا عنهم وهذا يمشي وراي ساكت وكفت كدامة اكتف ايدي لصدري
كواكب: وين رايح بعد اوكف خلنسولف
قبس: اي نروح نكعد بكافتريا قريبة هنا
لا مايحتاج كم كلمة وامشي ما اطول
وكف يهز راسة يريدني احجي باوعت بعيونة دار وجهة بسرعة دنك راسة يضحك ضغطت على ايدي بهدوء اكلة: ليش تضحك؟
هذا ضيغم يكول لا تخلون عينكم بعينها
بس هيج كال
تقرين العيون انتي؟
هزيت راسي لا وحجيت بجدية لان اعرف بعد ما يباوع بعيوني.
شنو رايك بالزواج؟
يكولون استقرار
وانت شدكول
ما مجرب نجرب ونشوف
رفعت اصبعي وبتحذير مغلف بالعصبية كتلة
اختي مو للتجربة من هسة كول كلمة رجاال رايدها من كل كلبج لو مجبور عليها اني اعرف انت مو بالك الزواج ولا بالك اختي اختصرها وكول الحقيقة
شتريدين تعرفين؟
شهب كلش حساسة غير عنا كلنا احنا نكدر نتخطى ونفش ونعارك بس هي لا رقيقة بلمسات قاسية تنكسر.
سكت ماحجة شي يباوع بشرود بالمكان مركز بكلامي كملت واني احذرة: تتزوجها بدون ماتكسر كلبها لو خاطرها تكدر؟
سكت ما جاوبني كملت
تزوجها بدون ما تخليها تعيسة تكدر؟
هم ما جاوبني كملت
تزوجها تصيرلها سند، امان، تعوضها العاشتة تكدر
بقت ساكت ماجاوبني هزيت راسي فاهمة اجابتة تحركت من مكاني اكلة: شكراً جزيلا.
تحركت بسرعة ركبت دراجتي وانطلقت ماكدر ينطي كلمة خلص ما ياخذها لشهب مو نصيبة مبين بالة مو ياة وشهب احسها مهتمة اله ماريدها تتعلق بية نطفر النهر مادامة كصير.
نيزك: البيت هدوء تام اجة ابو ضرغام سلم شوية وطلع مابقة سهلة ماطلعتلة أصلاً ذهب راحت على اخذها شهب وي اموري يتابعون افلام كوميدية وصوت ضحكهم يوصل يمي عفت البيدي ورحت اشوفهم مديت راسي فحطانين من الضحك يتابعون فلم هندي شفت شوية واني واكفة ضحكت بعد الهنود وسوالفهم، رجعت اكمل شغلي جنت اسوي دولمة للاستاذ صرغام اتصل بامة مشتهية دولمة من ذولاك الناس وذولاك الناس راحت تسوي طبعاً بدون كلام مو حباً بية بس احسة خطية لازم اسويلة.
هدرتها وصعدت السطح انزل ملابسة ومن بعد العقد امة كالت انتي لغرفتة وملابسة اسلمج المسؤلية اني تعبت منه نزلتهن ومن فوك باوعت لبيت خالي واشوف نجوم تفتر وتقرا بيدها لفة تاكل بيها.
لوحتلها ماشافتني نزلت بسرعة اضحك على منظرها دخلت لغرفتة رتبت ملابسة صابني فضول افتح الخانات جنت متخيلة يطلعن ملابس زوجتة القديمة او اشياء تخصها بس صدمني من طلعن ملابس اله من جان صغير وشاب لان الحجم اقل شكد مرتبات ونظيفات عطرهن بيهن.
باوعت لغرفتة اول مرة انتبهلها هيج الصراحة ماعندي فضول عنة حتى ماعرف زوجتة شنو اسمها لو منين هي او هيج اشياء تخصة.
طلعت وكعدت بالمطبخ اباوع من البلازما على الشارع وهم منتظرة الطبخة تكمل واطفيها رجعت ضهري على الكرسي بعد ماجنت حانيتة اجة بسيارتة طاااير وكفت بسرعة ونزل احسة يعارك وي روحة شكلة عصبي اني شلون بية.
كمت لا يصير بوجهي ويذبله كلمة ونتعارك دخلت جوة من يريد اكل اطلع احسن بعدني حتى ما كاعدة دخل بهجوم بيدة اشرلي حتى مايكدر يحجي حسيت نفسي مسوية جريمة ويستدعيني طلعت ما مبينة توتري.
راح للغرفة لحكتة داخلي متردد احسة وراة سالفة اول مادخلت سد الباب وطبكني علية صار كدامي مطاوقني بدية بدون مايخطني انفاسة بوجهي يحجي بعصبية.
بس كليلييي هذا النعال شنو علاقتج بية؟
يا سالفة النعال الما تخلص غير افهم يا نعااال
ابن عمج اكووو غيررررة كوووولي اذا اكو
اخذت نفس اهدي اعصابي تمنيت يوسف هيج يصيح بوجهي مثلك حتى الا ادير وجهة براجدي بهدوء كتلة: ماعندي شي وياة ابني وبس.
صرخ بوجهي بعصبية مثل الوحش لطم على راسة بحركة وصار يضرب اي شي تلوحة ايدة ايدة بالاساس مجروحة تخبلت من شفتة هيج وبنفس الوقت ماكدرت اتحرك خطوة يضرب نفسة ويأذيها بس ما يأذيني عكس سلوان الله ياخذة عكسة.
خليت ادية على اذني وصرخت
بسسسس كاااافي
اجاني يعت بية عت وجهة يصب عرك عيونة خابطات دم وايدة تنزف يسحبني مايحس بنفسة يكلي: لج هذا النعاال يحجي بيج يحجيييي يجيب اسمج بلسااانة.
راد يدفر الحايط بكل قوتي لزمت ادية اثنينهن وخليت راسي بنصهن نزلت دموعي بضعف
كاافي ضرغام ارحممم ررروحك كااافي
لزم وجهي ادية تجوي وترجف من العصبية
ضرغام: كليلي تحبينة انتي عليج الله بروح اهلج كولي والله وحق هو الله ادوس على كلبي بحذاتي وازوجكم بس لو صدك تريدينة مثل ما يكول
خليت عيوني بعيونة ودموعي تنزل
اكثر بشر على وجهة الارض اكرهة وحاقدة علية هو يوسف لا تصدك احبة اني لو يحترك كدامي ما اطفية
بس هو يكول.
جذاب لا تصدكة موتو كلبي هما خلوني مااعرف شنو الحب
ضغط وجهي بدية يردد
تكرهينة ما تحبينة يعني
اي اي اكرهة
سكن بيدي لزمت ايدة بهدوء رفعتها شهكت من منظرها اعاتبة: ليش هيج تسوي بروحك هاي ثاني مرة تضرب نفسك ليش ضرغام
اتخبل اتخبببل من اتعصب ماحس بشي اني
لا تتعصب هيج شوف ايدك شوف
عوفيها ختولي بس ارجعي كولي اني ماحب هذا النعال
اني ماحب هذا النعال
ولا افكر بية
ولا افكر بية
تحبيني إلى نيزك تحبيني.
نزلت عيوني على ايدة كتلة: ايدك اغسلها فدوة
تحبيني نيزك
ضرغام
اي كملي
ترة احنا حتى ما متزوجين شي طبيعي ما احبك ذاك الحب الحب يجي بالعشرة صدك بمرور الوقت احبك اني هسة ما اكرهك والله
حبيني مثل ما احبج
اي احبك بس غسل ايدك
غمضت عيوني وهو اخذ شفايفي بقيت جامدة بيدة ابتعد شوية يكلي: مووتة الج مووتة هو مو نعال كطعتة تكطععع
شجابة الك هو
اجاني يريدج يكول.
كطع كلامة غمض عيوني عظام وجهة تحركن كد ما ضاغط عليهن فتح عيونة يباوع بعيوني بهيام رجع يقبلني من جديد كوة خلصت روحي منة قفل الباب وراح يغسل ايدة من الدم بقيت ارجف بمكاني وين يريد يوصل ضرغام.
لازم اواجهة خل اخلي النقاط على الحروف وافهمة ساسي من راسي واني هم اعرف البراسة شنو احسة غامض ما ينعرف شنو البراسة.
طلع ينشف بوجهة غاسل حتى راسة مسح ركبتة وخلة المنشفة عليها اجة سحبني من ايدي كعد وكعدني بحضنة طاوق خصري بيدة اخذ مني نفس وهو مغمض عيونة كال.
ضرغام: احجي الحقيقة وتبقين وياي؟