رواية وقار الغريب للكاتبة حوراء السعيدي الفصل العشرون
اسراء.
أحس بحرارة أنفاسه تضرب بأذني قبضت أيدي
وبكل ما عندي قوة وجهتله ضربه بنص صدرة والخلاني اصفن
ضربتي ما أثرت بي وبقى واگف بمكانه ولا اهتز شي منه
اسراء: دخيلك ربي
ظافر: اي والله دخيلك ربي
اسراء: يواش بعينك شنووو يوواش دهرر يدهرك من كوون.
سحب نفس بنفاذ صبر
ظافر: أمري لله احچي مثلكم.
أي هيچ وشد حيلك يواش وصخام بعينك
ليش تغلطين؟
چاا شتريد استقبلك بالاحضان
شنو اسمچ؟
همم رجعنا أكو واحد يشتري وحدة مايعرف اسمها
شگد تماطلين بالكلام، وكلامج كله مابي فائدة
خاااااب دررررروووووح.
سحبني من أيدي ضاغط عليها بلعت ريگ
من خزرته تخوف
إذا اكضب هاللسان اشلعه من مكانه
دروووووح شلون خفت
دحگي هين
أنتَ انباري؟
وأخيراً عقلج اشتغل وسئل شي بي حظ
خاااب درووووح
ماعندج غيرها؟
شنو
هالكلمة.
لا عندي اهوايَّ لأن اني نازعة
شنووو
صفي نيتك نازعة أخلاقي
تمنجدنا
شنو هاي تجندنا
غبية تمنجدنا
اي شنووو معناها
انفضحنا.
عليك الله شبيها لهجتنه ماتحچي مثلها لهجتك كلمة تنفهم وعشرة لا.
عوفي اللهجة والأمة الإسلامية وخليني اتفاهم وياچ
بس عوفني
رخى أيده ابتعدت عنه منزله راسي، اچذب إذا أگول ماكو خوف بداخلي
بَس أتصنع مامكترثة اله ولا خايفة من شي گعدت بمكاني وهوَ واگف بعده.
ظافر: هالمكان لازم تطلعين منه
اسراء: عقلك شاخط أنتَ شلون أطلع منا واخواني موجودين بهذا المكان.
رص على أسنانه.
ظافر: يول خالي بسسس افهمي كلامي.
اسراء: ما اريد افهم، اخووواني ما اعووفهم
الله يغربلج، الله يغربلج
ويغربلك هم.
اخر مرة اسئل عن اسمچ إذا ماتگولين افلش معاني هالوجه
مد أيدك جرب بس جرب وشوف شسوي
شتسوين؟
أسويك وصلتين امسح بيك هذا المكان.
كفخني براسي بخفه
شنو هاللسان
اكله اني نازعه أخلاقي يگلي شنو هاللسان
ول خالي عيب البنوات يتلبسن الحياء اله أنتِ نازعته.
هسه أنتَ شرايد مني
هساع غير تنطينه فنتك نتفاهم
يله راح اصير عاقلة
تطلعين ويايَّ منا؟
لا.
اخوانج اني اجيبهم الچ
وتريد اصدگك
وعد رجال الچ اجيبهم الچ
وين اكو زلم كلكم نفس الشي
تدرين بحياتي ما متحمل واحد مثل ماهساع متحملچ.
أحد گالك تجي تشتريني
لعدد يا غبية عاجبج تبقين هنا.
أنتَ الغبي
وبعددديننننن
طلعة منا ما اطلع لو تطلع نخلة براسك
تبقين بالشوارع؟ عاجبج
اي يعجبني من اكون ويا اخواني لو بجهنم هم يعجبني.
راسچ يابس
لدرجة
نهض من مكانه يعدل بسترته أيديه چنهن نمرشه انظف من حياتي
اني رايح وراح ارجع فكري زين.
هوَ انتَ منو علمود اروح وياك ومنين تعرفني؟ وليشش انييي ليشش مو غيري
عادي عجبتيني واختاريتج
اكو نعال يفيدك هم يعجب
فدوة لأخلاقج
أخلاقي ينضرب بيها المثل.
هيَّ الماما بربوك أنتِ شتطلعين.
طبكت حواجبي هذا منين يعرف امي أتقدمت اله بأستغراب
تعرف امي؟
ليش امچ اكو واحد مايعرفها وحدة مثلها فاتحة بيتها للدعارة منووو مايعرفهاا.
عضيت شفتي امنع دموعي تنزل منين يعرفها هيَّ اخر مرة شفتها.
من باعتنا وسمعتها تحچي ويا مأمون تگله راح تسافر.
بَس هيَّ گالت راح اتسافر
انطيچ معلومة، امچ ماسافرت وبعدها بيتكم ومشغلتو لل
وهسه أبالها أتريد تجي هنا وترجع تاخذج علمود تشغلچ وياهااا
منين تعرف كل هذا بالأساس منو أنتَ اول مرة اشوفك
أحب فعل الخير
هه فعل خير
اخر مرة احچي كلامي وطبج طوب تريدين تروحين
يم امچ تهزين بروحج للرايح وللجاي لووو تطلعين مناااا.
واخوووانچ اني اجيبهمم الچ، رايح وبالليل راح ارجع أخذ الجواب منچ.
فتح باب الغرفة وطلع گعدت بمكاني منهارة عليمن گلبي
يتوجع من أمي، لو من مصيبتي الجديدة إلى اتريدني أعوفن اخواني هنا
شلون اعوفهم، اخاف عليهم لو بيوم ماحصلو دخل
مثل ما يريد مأمون يعاقبهم ويضربهم ويمنعهم من الاكل.
نزلت دموعي فكرة اعوفهم صعبة، وفكرة ارجع الأمي
واشتغل بالحرام بعد أصعب، كلشي بسببها كلشي صرت.
سلعة يتاجرون بيها، حضنت نفسي بضعف شسوي هسه
ياربي دليني على الطريق الصح والقرار الصح
مرت الساعات
واني بدوامة الأفكار، رجعوا اخواني من الشغل
بس انطوا ال ميسون إلى حصلوا اجوني يركضون حضنوني.
أسامة: ليش تبچين.
مسحت دموعي مبتسمة بقهر عيوني تباوعلهم وگلبي النار أكلته اكل
اسراء: هيج ضايجة
أصيل: ميسون تگول ودعوا اختكم
اسراء: هيَّ گالت هيچ
أصيل: اي شتقصد.
نزلت دموع أسامة دمرني دمار.
أسامة: لا تعوفينه انتِ مو گلتي ما اعوفكم
حضنته الصدري اني ابچي وهوَ يبچي وأصيل دموعه لمعت بعيونه أخذته هم الحضني
اسراء: أرجع الكم وعد
أصيل: يعني تعوفينه.
حسيت الكلام والأجوبة ضاعت مني ما ادري شجاوبهم.
أخذتهم غسلت وجوهم وجابوا الاكل تغدوا ما اكلت شي مالي نفس
الدنيا شصغرها بعيني صارت، افترت عيوني عليهم ياكلون ويباوعولي
الخوف بعيونهم، خوف اعوفهم واروح نظراتهم نهتني.
لليل وهم مامفارگيني گاعدين يمي رجع نفس الشخص إلى اشتراني.
ميسون: يله جهزي نفسچ لااا تبقين تلعبين.
باوعتلها روحي صايرة بخشمي ومالي خلگ شي
اسراء: يوم إلى اجهزج بأيدي للگبر
هزت بأيدها، طايرة طيور من الفرح أتريد تخلص مني
طلعت باوعت الإخواني، شلون انطيهم جوابي هسه.
اسراء: انتم تثقون بأختكم؟
هزوا براسهم اثنينهم، مسحت دموعهم الصارت تنزل
معناها افهموا كلامي، اني هسه راح اروح ويا هذا الرجال.
هوَ وعدني فترة ويجيبكم يمي، وإذا ماوفى بوعده
وعد مني الكم بنفسي اجي اخذكم، هاا شگلتوا؟
ضلوا واحد يباوع بوجه الثاني
أسامة: خاف ماترجعين
اسراء: ارجع والله ارجع وداعت دموعكم هاي.
دنگ راسه أصيل يمسح بدموعه أردف مختنك
أصيل: اخاف يضربونه
اتحملوا بس هالفترة
خوش بس لا تتأخرين راح ننتظرج.
ديرو بالكم على نفسكم واحد يسند الثاني واحد لا يعوف الثاني
ترجعون من الشغل تگعدون هنا لا تطلعون ماشي ياروحي
اي بس فدوة لا تنسينه.
روحي انتم شلون انساكم.
نهضت من مكاني اجهز باغراضي واتغصص بشهگاتي
شگد دعيت على امي بهل الساعة بگلب متلوع ومحروگ
بهذلتنا وضيعتنا وهسه بسببها راح نفترگ عسا حوبتي وحوبة اخواني ماتتعدا كل شخص ظلمنا.
كملت وعيوني ما أشوف بيهن أصعب ما على الإنسان الوداع
لبست عبايتي وهم واگفين عيونهم حمر من البچي
حضنتهم بكل قوتي ابوس بيهم احنه ثلاثة نبچي بصوت عالي
هالوداع أخذ من حيلي حيل كامل طلعت من يمهم اناشغ.
هم يصيحون ورايَّ ب أسمي، ما التفتت الهم راح أضعف.
طلعت برا وگفت أسحب بالنفس ودموعي مو راضيه توگف
طلع نفس الشخص من يم مأمون، أباوع لهذا المكان
حيطانه كلها إلى بيها ذكريات، بَس للأسف كلها ذكريات سيئة
طلعت وياه، نفس السيارة إلى شفته بيها بذاك اليوم
صعدت وعيوني على البيت، شصعب وداعكم
اتحرگت السيارة
وعيوني بعدها تباوع وراها، تاركه روحي ورايَّ.
أتمنيت ماجايه للدنيا ولا انولدت بيها على هالضيم إلى شفته.
أبتعدنا عن المنطقة، وما ادري النا لقاء آخر لو هايهيه منا وانتهت خوتنه
غمضت عيوني ضلت يوجعني من البچي مشت السيارة
اهوايَّ كل هذا الوقت واني مافتحت عيوني ولا هوَ حچه
مليت فتحتهن، شفت نفسي بنص مناطق. اول مرة أشوفها
ندخل من شارع ندخل بشارع ثاني مامفتهمة شي ولا وين رايحين.
بالاخير دخلنا بنص منطقة بيها بساتين والبيوت قليلة
وگفت السيارة گدام بيت، نزلت بنص أستغرابي واسئلتي وين اني؟ وشنو هذا المكان.
اسراء: وين اني؟ بيت منو هذا.
قفل السيارة ومشى گدامي جاوبني
ظافر: بيتي
اسراء: وان شاء الله تريد ابقى وياك ببيت واحد
ظافر: شكو بيها لعد مو چنتي گاعدة ويا مأمون لو يمي تستشرفين
امده حضي هسه اني هذا حضي وين المابي خير الله يذبه عليَّ
لأن هذا مستواج ويليق بيچ
وهو لأن مثل مستواك اجيت اخذتني بعد الطيور على اشكالها تقع.
اتجاهلني واتجاهل كلامي وگف گدام الباب طلع مفاتيح.
فتح الباب، أشرلي بحاجبه بمعنى ادخلي دخلت گدامه
فتح الباب الثاني دخلت اول مادخلت كفختني ريحة بخور
البيت دافي تحس براحة من تباوعله كلشي هنا بسيط ونازك.
كمزت من شفت مرة گاعدة تصلي لابسه ثوب لونه نيلي ساده و ويا شيله بيضه
ظافر: اگعدي هنا
گعدت ساكتة انخرست خرس وهو نزع سترته گعد گبالي
يباوعلي بطرف عينه، كملت المرة صلاة گام من مكانه باس راسها هيَّ مرة جبيرة.
ظافر: تقبل الله جدة.
طلعت جدته نوب هيَّ شلون مرة صاحبة شخصية
من يمي خفت منها اوعتلي أبتسمت الي.
أمل: منين هل الحديثة؟
ظافر: أمانة جدة تستقبلينها يمچ
أمل: إذا العين ماتوسع الگلب يوسع الها
أبتسمت الكلامها اول مرة شخص يحچي هيچ بحقي.
ظافر: جدة صبيلنا اكل
هزت براسها بهدوء اتقدمت بخطوات إلى وگفت يمي
والإبتسامة بعدها مرسومة على ثغرها اتفاجأت
من دنگت باست راسي خلتني جامدة بمكاني
أمل: كل الهلا حبوبة.
عافتنا وراحت بقيت أباوع وراها حد ما دخلت للمطبخ مبين من الكاونتر الطالع
اسراء: هاي جدتك
ظافر: اي
شسمها
أمل
وأنتَ
ظافر.
التفتت اله
شنو اسمك ظافر لو اظافر
ديله اسمچ عاد شلونه
اسمي يخبل والله ومابي تنمر
شنو اسمچ
ماراح اخليها بنفسك شفتك اهوايَّ أتوسلت علمود اسمي ف أحب اگلك اسمي اسراء
اسراء؟
اي
وين اسراء ليثرب
ما تضحك ترا.
اتمدد على القنفه بطوله وأصابع أيده شبكهن ببعض.
علي فكرة اعرف اسمج چان شغلتي عقلج إلى يعرف امچ مايعرف اسمج
عقلي يفرك ويفر عشرة مثل شووواربك
جيد
سكتت عنه اخزر بي، وهوَ غمض عيونه بقيت افكر منو هذا ومنين يعرفني.
طلعت المرة جدته جايبه الاكل بصينية گعدته واجت اخذتني
گعدتني وياهم، المشكلة مالي نفس بشي عقلي وگلبي يم اخواني
أمل: ماتاكلين حبوبة
اسراء: ما أشتهي
أمل: اكلي يا بعد عيني والله كريم للي شاغل عقلج.
مديت ايدي لزمت الخاشوكة نزلت عيوني للاكل.
مبين هالمرة هم تعرف سالفتي لأن شو ماسئلت شي
هاي لو اني چان سئلت الف سؤال علمود ارضي فضولي
اكلت قليل علمود الفشل وابتعدت، هم ياكلون ويسولفون عن واحد.
أمل: اجه الصبح من دوامه للظهر خابروا گالوله يجي علمود توقيع
ظافر: هو هذا شغلة جدة مايدري بيا وقت يخابروا
كملوا اكل وأخذت المرة الصينية وگفت اريد اتحرك صاح ورايَّ
ظافر: ووينن؟
اسراء: للحمام.
أشرلي على مكان الحمام دخلت اله فتحت حجابي.
غسلت، اني هسه اكلت بس ياترى انتم اكلتوا شربتوا
شجاي اتسون هسه اوف ياگلبي عليكم رجعت لبست الحجاب وطلعت
شفتهم گاعدين يشربون چاي دخلت كعدت انطتني استكان الچاي
لزمته بأيدي اني ما اشربه بس الصبح، أنفتح باب الصالة
رمشت بثكل من إلى شفته، نفسه الشخص إلى جان لابس زي عسكري.
حازم: ول حَي الله
گام ظافر سلم عليه واتحاضنوا، استدار الولد يباوعلي
ظافر: نفسها
حازم: ام عيون النعسانة.
تحمحم ظافر وضربه على ظهره صارت نظرات.
بينهم مافهمتها غلست، گعد يبوس بجدته لعب بيها لعب.
أمل: ياا من فلك طرك عووفني
حازم: شبيچ جدة والله مشتاگلچ
أمل: چا اليشتاگ مايسئل وين شايفتك انا
حازم: غير شغل وحگ ربج راسي ما الحك احكه.
ضل يحضن بيها ساعة حبايب ساعة يتعاركون
بَس هم إذا من الأنبار شو لهجتهم مخربطة ساعة يحچون
جنوبي ساعة انباري مافهمت شوضعهم وشنو قصتهم.
حازم: ظافر تعال ويايَّ أريد اشوفك شغلة.
طلعوا اثنينهم، بقينه اني وجدتهم دارت عليه.
أمل: ساكتة يمه
اسراء: عائلة بينكم
أمل: ظافر وحازم احفادي
اسراء: الله يحفظهم الچ
ويحفظچ بنيتي.
ظافر وأخوه بعد ما شفتهم، اخذتني دخلتني الغرفة
بيها سرير مال نفر واحد راحت جابتلي بطانية حطتها الي
أمل: خاف تبردين بالليل ولو هسه الشتاء بدايته بس خافنچ تبردين
اسراء: شكراً تعبتچ
أخذي راحتج هنا لا تتقيدين
هزيت براسي طلعت سدت الباب، ركضت للباب قفلته.
گعدت حايرة بزماني، اي والله حايرة لا اني يم اخواني.
وعايشة وحياتي مستقرة، ولا هم إلى يمي ولا اعرف
هذا الشخص منو وشيريد بالضبط مني اتمددت
بمكاني بس حطيت راسي على المخده غفيت من التعب إلى حاوطني.
النص الليل گعدت ما ادري شبيَّ مختنگة طلعت من الغرفة
أمشي بخطوات هادئة، أسمع اصوات جايه من الصالة
اتقربت الها وسمعت ظافر وأخوه يسولفون
ظافر: هسه كلشي تمام
حازم: تدري يتاجر بالبنات وياخذونهن للملاهي.
أسمع حازم هالبنت اني جبتها ولازم احقق إلى أبالي
خطر ظافر انتبه.
هيچ الشغل ماراح يمشي
ضلوا يسولفون بس كل كلامهم مُشفر إلى فهمته
اني اشتراني بس عنده غاية من هذا الشي رجعت للغرفة
رجل تطخ برجل من الخوف والرعب منو ذوله اني وين
معقولة ضحك عليَّ، وخلاني اعوف اخواني.
وگفت اكل بأظافيري من التوتر لازم اطلع منا ما ابقى هنا
أشرد منا وأخذ اخواني وانهزم منهم ومن مأمون بأي طريقة
لزمت عبايتي بأيدي بقيت اراقب حد ماتأكدت دخلوا الغرفهم
طلعت أمشي على أطراف اصابيعي وجسمي يرجف من خوفي.
فتحت الباب الداخلي مال المطبخ وطلعت لبست
حذائي ورحت أمشي اتختل ايدي على گلبي غلطتي يا اسراء
ماچان لازم تجين وياه، محد ايسوي فعل خير بهالدنيا اله بمقابل
فتحت باب البيت وطلعت من هذا البيت أمشي بالشارع
مامسموع غير أصوات غريبة تُرعب أبلعم وريكي يبس من الخوف.
صفا.
مر أسبوع كامل من طلعة ريم منا و وارث مارجع للبيت
بَس ما ادري إذا عنده خبر طلعت اولا، وَهج مطنكرة
وخلگها بخشمها حتى ويا عميد الدين تحچي بجفاء.
وهوَ أحسه يريد يحچي وياها بس ماتنطي مجال.
أحس البيت ما ادري شلونه من طلعت ريم وعمتي نجاة منه
كل يوم للفجر ابقى گاعدة، أشوفه يرجع شارب
انطحن طحن بقهري، والله لا ادري بي واحد سيئ ومايستاهل
فلا انقهر ولا إلى علاقة بي، ومن جهه كلام وَهج بعقلي
اخاف أتقرب ويصير تعلق بينه، يمكن اني اگدر امنع نفسي
واخلي ابوي گدامي، بَس هو واضح موضوعه
وهسه هذا الفجر گعدت بالصالة انتظره ومثل العادة.
انفتح الباب وصعد جسمه مامتوازن، اخاف اصعد وراه
وايصير شي غلط بقيت بمكاني، للصبح الكل طلعت الدواماتها وشغلها
غسلت ملابسنا وجففتهم وصعدت اشرهم بالسطح
شريتهن ومشيت اريد انزل صارت عيني على باب غرفته.
عفت إلى بأيدي واخذتني رجليَّ اله ايفان وامها راحن
والناس إلى تجينه تضل باجي سلمى تطلع اعذار
وهوَ اسبوع وبعد محد وصل لأن الكل اجه بالعرس
دگيت الباب، ماكو صوت، رجعت دگيت الباب انفتح الباب.
باوعتله من فوك لجوا نايم بملابسه وعيونه حمر.
آدم: صفا
صفا: صباح الخير
آدم: صباح النور
صفا: شنو نايم بملابس الطلعة
اي اجيت من الشغل تعبان ونمت
سحبت نفس رفعت ايديَّ دفعته بكل ماعندي قوة وهوَ
لأن هسه گاعد وبعده دايخ بسرعة اندفع للداخل سديت الباب وعيونه متشخصه عليَّ.
شنو هذا التصرف صفا
أنتَ الله رزقك بعقل ليششش تدمررر بنفسك
شبيچ غير افهم
ادري بيك جاي تشرب وادري بكلشي.
بلع ريگ وضل صافن مامستوعب كلامي.
منو حچالج؟ عميد الدين مو
للأسف لا، بنفسي شفت كلشي.
وجهه گام ينطي الوان نزلت عيوني على أيده صارت ترجف
أنتَ بخير؟
گعد بالأرض لازم راسه، اتحرگت أريد أتقرب اله بسرعة عاط
لاااا تتتقررربيننن اليييي
آدم شبيك، راح انزل أصيح أحد
لااا تصيحين احدد، اطلعيي منا صفاا.
گعدت گباله وما اگدر الزمه احتاريت شسوي
شفت شلون الجاي اتشربه شلون مأثر على صحتك
كرهتيني؟
لا
ليش
لأن أنتَ مو مثلهم.
اني أشرب من سنين صفا
تگدر تتعالج
حاولت فشلت.
شوف آدم ميخالف بالبداية تفشل بس والقرآن
بعدين راح تنجح بس ساعد نفسك ليش تخلي هالشي
يجيب اخرتك، فكر بأخرتك بغضب رب العالمين
بصحتك، بأهلك إلى من ايشوفونك يشبعون قهر عاجبك؟
زين وامك مو خطية آدم هيَّ اكيد ضحت علمودكم
اهوايَّ وصارتلكم الام والاب ليش تجازيها بهذا التعب.
هوَ اني ما استاهل ينقهرون عليَّ
أنتَ تريد تتخلص من هذا الشي اولا بَس جاوبني؟
اييي.
تمام اني اساعدك واروح وياك للدكتور وبكل خطوة راح اكون وياك هاا شگلت؟
وإذا فشلت
ننجح بعدين
توگفين ويايَّ
اي والقرآن اوگف بس وافق.
أتقرب إلى صار قريب عليَّ وشكل عيونه منتهيه
ليش هالفترة كلها ماتباوعين بوجهي
ما ادري
واستغليتي ضعفي اتجاه ضحكتج وبعد ماخليتيني اشوفها علمود تزيدين نار عذابي
لا مو هيج
لا هيج
والقرآن مو هيج
شگد تحلفين بالقرآن.
هسه شگلت آدم
اويلي عليج يمه.
أبتسمت لكلامه من يگولها يغمض عيونه ويرجع يفتحهن.
اويلي عليج يمه مرة ثانية أضحكي اضحكي من جعل
محد غيرچ يضحكلي اروح نذر لهل الضحكة.
كافي احترم نفسك بصوت ريم
اويلي مشتاقلها.
وگف بمكانه وكل ضني بعد الكلام إلى صار راح ينطيني أجابه تريح گلبي
ماجاوبتني آدم
عليمن
تتعالج؟
لا، وابتعدي عني لا تتقربين الي
شبيككك آدم؟
صفا اطلعيي
ما اطلع
عاجبج ايشوفنه أحد هنا وحدنا ونيته اطير للمريخ
ماكوووو أحد هنا كلها طالعةةة بس النسوان وجوا
اي انزلي يمهن
شوگت نروح
وووويننن ويننن نرووووح.
علمود العلاج
گتلجج ما اتعالجج.
مووو بكيفك آدم
صفا
هاا
لا تخليني اجرحج بكلمة أو تصرف بدون وعي اطلعي فدوة
إذا تنزل هسه دمعة منچ بسببي وحگ العباس ابو فاضل ادمررر
عمي ابتعدي عني اني رجال أشرب وكل سالفة طايح حضهاا عندي
ماراح تتقبليننن واحد مثلي بيوم ولااا تتحملينييي.
اني ما اريد شي منك بس تتعالج
وانيييي اررريدچ بسسس تتقربين اليي ماراح اگدرر
امنعع نفسي منچ، لأن بس اتعالج ترجعيننن تبتعديننن ادررري بالبالج.
بقيت ساكتة وجهي انطعن بالحرارة الصارت تطلع منه
فاهم كلشي، بس مستحيل أتراجع عن قراري لازم يتعالج
ما اگدر اسكت واخلي مكمل يدمر بنفسه.
آدم
احتررررك ابووووو آدم
أنتَ ليش ماجاي تفهمني
ولا أنتِ تفهميني
والله فاهمتك
لاا مافاهمتني لو فاهمتني ماتسوين كل هذا انييي ما اررريدج عووفينيي مالج شغل بيَّ.
نرفزني بكلامه عفته وطلعت والنعال إلى لابسته يزلك
أمشي سريع وابچي ماحس يا لله غير اتزحلكت.
و على ظهري صرخت بصوت رج البيت رج من الألم
اول واحد طلع هوَ اجاني يركض يريد يلزمني ومنع نفسه يباوعلي بخوف.
آدم: شبيچ صفااا
صفا: اخخ يمه ظهررري
ولچ شبيچ فهمينييي
اتزحلگت
صعدن باجي سلمى ونادية وزينب وياهن مرعوبات
باجي نادية: اسم الله ماما اسم الله شبيچ
نزلت دموعي مهضومه من كلامه ومن الألم دموعي تنزل بغزارة
صفا: باجي ظهرري راح امووووت.
سلمى: تگدرين تگومين
لزمتني زينب اتگومني ماگدرت
سلمى: آدم شيلها
آدم: شنوو.
شبيك يمه ماتشوف بنت عمك
اي يمه بس شلون يعني
هيَّ فهمته لأن حرام يلمسني اجت باجي نادية ضربته على كتفه
باجي نادية: گوووم گووم شيلهااا البنيه راح تموووت من الألم عود ذنبكم برگبتي.
أتقرب إلى واتحسه متوتر ومتردد مد ايديَّ جوا ظهري
رفعني من الأرض چلبت برگبته الالم موتني وبس دموعي تنزل
استحي ابقى أصيح اشهگ بصمت
آدم: لا تبچين
صفا: شنو ما ابچي ظهري يأذيني
بقى ساكت رفعت عيوني أباوعله گبل همس وهو ينزل بيَّ.
لا تباوعين هيچ ابقي ضامه بوچهج
نزلني حطني بالصالة وصعد يبدل علمود ياخذني للمستشفى.
زينب: چا بس آدم يأخذها
باجي نادية: اني راح ابقى يم سَند روحي أنتِ وياها زينب
خوش عمه بس خلي اخابر أكرم
راحت زينب تجهز نفسها. هو نزل يركض يدگم بالقميص
آدم: هاا منووو يروح ويانه
سلمى: هسه زينب تروح وياكم.
گعد يم راسي ساكت بس متوتر يهز برجليَّ
آدم: يله يمعووووودة هووو حجاب وعبايه ويننن رايحين
طلعت زينب تلبس بعبايتها.
زينب: اي اي اجيت اعصابك خوية
گام من مكانه رفعني شالني وطلع بيَّ فتح السيارة حطني بيها وزينب صعدت بصفي.
زينب: أن شاء الله ماكو شي حبيبتي
صفا: ظهري موتني اخاف انكسر
زينب: لا اسم الله، أنتِ شصعدچ فوگ مو عفتچ بالحمام
صفا: سويت الملابس ساعة الكشرررة إلى صعدت بيها.
طول الطريق حاطتني بحضنها وأيدي لازمه ظهري بيها
حد ما دخلنا للمستشفى طلعت نفسها إلى بيها أكرم چان واگف يم الباب
بس شافنه أجه علينه.
أكرم: سلامات سلامات خيرچ
آدم: طاحت على ظهرها
تعال تعال دخلها جوا
أخذني دخلني جوا وماكو ازدحام كلش وأكرم ويانه دخلوني للدكتور.
سوالي فحوصات وحولني على الأشعة ورجعوني اله شاف الأشعة گال
الدكتور: لا الحمدلله ماكو كسر هسه اكتبلها علاج وان شاء الله تتحسن عليه
آدم: متأكد دكتور
الدكتور: اي اكيد اتفضل هاي الأشعة تگدر اتشوفها
اخذها آدم منه رفعها يباوعلها ورجع نزلها مطمئن.
وين مايگولون ياخذوني هو يشيلني مايقبل يحطني بالعربانه
رجعنه للبيت دخلني الغرفتنه اني و وَهج حطني بمكاني عطت بألم
آدم: يمعودة شبيچ
صفا: كله بسببببك
آدم: اني شكووو
زينب: عوفها آدم مو وگتها
دخلن سلمى ونادية سكتنا وبس زينب موجودة يمنه.
حط العلاج يم راسي وطلع گعدت يمي باجي نادية لزمت أيدي
باجي نادية: شلون صرتي ماما
صفا: شلون صرت يعني ماتشوفين حالتي
حسيتها نحرجت من أسلوبي گدام سلمى وزينب.
نزلت دموعي والله ما اريد اعاملها هيچ معاملة
بس هيَّ صدمتنا وخيبت ضنه بيها صعب غلطها يتسامح عليه.
للظهر طلع آدم يرجع ريم من جامعتها لأن هو إلى يأخذها ويرجعها
رجعت وَهج من دوامها من شافتني اتخبلت وضلت تستفسر
حجيتلها كلشي حتى على آدم
وَهج: شفتي حتى هو فاهم لچ بابا ذوله تربية عزام
ماينضحك عليهم يفرررونچ فررر بعقلهم لحد الان اصفن اگول
شلون وارث ضحكت عليه نريمان.
صفا: حبابه ساعديني وَهج هذا آدم لازم يتعالج.
وَهج: وبعدچ مُصرة تساعدي
اي
امي جاي تفهمين هوَ شگالچ، جاي يگلج إذا تتقربيله مايمنع نفسه منچ
خلي عميد الدين يحچي وياه.
قلبت عيونها بس جبت سيرة عميد الدين.
شنو متزاعلين
يگلي لا تضمين شي عني وهو وراه طن اسرار
وكل يوم صادمني بسر، ومن اعاتبه يگلي چا مايصير انطيهن
الچ مرة وحدة، ما ادري خبلني بعقله كل ما اگول
فهمت عليه يخليني ارجع لنقطة الصفر.
المهم مايخدعج مثل غيره اتقبلي الوضع
أنشووف.
عافتني وطلعت اتمددت بمكاني والألم بعده بس اخف
من اول ما وگعت بعد ما اخذت العلاج.
ريم.
اسبوع كامل من المعاناة عشتها بيني مابين نفسي
عشت بوسط حرب نفسي، بَس گدرت ارجع العقلي
اني إلى خسرت صديقة عمري بحضني وخسرت أبوي
ادمر نفسي على شخص ما يدري عني ولا يدري بمشاعري
الي صارت مادري شلون كلشي غلط جان من البداية
غلطتي جانت قبلت بهذا الزواج إلى دمرني.
صعدت ويا آدم سلمت عليه، بالروحه زيد يجيبني وبالرجعة آدم بَس صارله يومين ماجاييني
آدم: شلونج ريمه
ريم: الحمدلله وأنتَ.
اتحسر وجاوبني
آدم: زين.
شو بيها حسرة خيرك
صفا طاحت وظهرها اتأذه
شنووو وهسسه شلووونهاا
لا احسن انطاها علاج الدكتور الحمدلله ماكو كسر
الحمدلله، بس أنتَ ليش هيچ ضايج كله علمود صفا
هاا لا بس راسي يأذيني.
شغل السيارة وطلعنه من يم الجامعة وصلني للبيت نزلت كبل دخلت.
للبيت علمود عيوني ماتباوع على بيت جدي اتلگتني امي
نجاة: الله يساعدچ يمه
ريم: هلا يووم
يله راح اصب الغده نتغده اني وياچ
ليش ممتغديه أنتِ
لا انتظرتج
رحت حضنتها بستها بخدها
أبدل واجي.
دخلت أبدل البيت صغير وكافي علينا اني وامي
وجدي مامقصر ويانه هوَ وعميد الدين بدلت ملابسي
وحطيت ملابس الدوام على جهه طلعت الأمي لكيتها مكمله صب
گعدت وياها اكل ساكتة ذكرت آدم من گال على صفا
ريم: يووم صفا واگعة ومتأذي ظهرها.
نجاة: يااا سوده عليَّ خلي اكمل غده وانروحلها.
دنگت على الاكل وجاوبتها
قصدچ أنتِ إلى اتروحيلها وبس
اي يمه نسيت
سلميلي عليها
رجعنا ناكل كملت وگفت اغسل المواعين وهيَّ لبست عبايتها وراحت
كملت المواعين وهالفترة راح تبلش امتحانات نصف السنة
وضغط الدراسة الكل يعاني منه دخلت للغرفة جبت الملازم
وگعدت ادرس فرشتهن بالصالة واحاول اخلي عقلي يركز بدراستي مو بشي ثاني.
اندگ الباب باوعت للساعة ماصارلها اهوايَّ امي من راحت.
تقريباً دقائق طلعت أمشي وگفت وره الباب
ريم: منو؟
آدم: اني آدم
أستغربت آدم ماصارله اهوايَّ من وصلني فتحت
الباب مبتسمة غابت ابتسامتي من شفت الواگف بصفه وارث .
أتصرفت طبيعي ما اريد أيشوف غيابه وفعلته دمرني لو أثرن عليَّ
ريم: أهلاً
آدم: اعذريني بس هوَ جابني جبر وحگ العباس وجدي لو يدري يگطع النعال عليَّ
ريم: ماكو مشكلة، اتفضلوا
دخلوا اثنينهم وارث ساكت مانطق حرف مشيت.
گدامهم الداخل البيت لملمت ملازمي گعدوا بالصالة.
دخلت للمطبخ ايدي صارت ترجف غسلت وجهي شجابك
شرجعك ماتگلي، حطيت مي بالدولكه وكلاص وطلعت الهم
قدمت الهم رجفة أيدي فضحتني ضلت عيون وارث تباوع
الايدي إلى ترجف، شرب ال مي آدم و وگف
آدم: وارث راح انتظر برا بالحديقة لا تتأخر
عافنه وراح بقينه وحدنا گعدت گباله.
ريم: اتفضل
وارث: نگدر نحچي
إذا راجع تبرر، ف مامنتظره منك تبرير
ليش طلعتي من البيت.
علمود ترجعله ليش صاير مشرد علمود ماتشوفني سهلتها الك عزيزي
ريم
رفعت ايدي مستوقفه كلامه
رجاءً اي كلام وتبرير منك ما اريد.
وارث: ريم شلون ينحل إلى بينه إذا ماتسمعين مني
ريم: لعدددد ماافكرررررت بهذااا الشيبي من عفتنيييي بصباحية عررررسييي
هاااا؟ ليششش مافكرررت نتفاهمم ليشششش مانتظررت كم يوووم بس تخلص ايام الزواج
ليشششش وارررث استاهل منككك تفشلنييي هيچ.
أحس نبضي صار براسي من عصبيتي نهض من مكانه.
يريد يلزمني زمخت بي
لاااا تتقرررررب ديررررربالك گلتهاا الك قبل زواجناا
باليووووم الييي تستغلنييي بي راح تختفييي ريم إلى تعررفها
مثل ما اختفى وارررررث إلى أعررررفه
ما استغليتچ يشهد الله ما استغليتچ
لعدد شكوووو سووويتتت هذا الزواج إذا أنتِ نيتك تعووووفنييي.
ضرب الباب بقوا
وارث: مااجااييييي اتفهمووووون ولچ تعررفيننن
شنووووو شخص يشك بيچ، يعنييي يموووتچ على البطيئ بعذابه
ريم: اعذارك مالها فائدة.
وارث: ارجعي البيت جدي شكووو عايشة هنا وحدچ.
ضحكت باستهزاء و احارب بدموعي ماتنزل
ريم: رجاءً لاااا تأخذ دور الرجال إلى خايف عليَّ
بالنسبة إلى اي ثقة بعد ماعندي بيك وإذا تريد نتطلگ
اني جاهزة، ماراح اهتم لا الكلام الناس ولا العمام ولا لأي شخص
لو مخلين عمامي ياخذوونيي ولا ذلتك هااي.
دفعني على الحايط ضرب الحايط بأيده يحچي ويصيح ويضرب
مااا استغليتججج ولااا فكرررت استغلجج ولااا فكرررت حتى اذلج.
تصرفاتك تدل على غير شي.
رفع أيده يتلمس بخدي دفعتها بحقد اباوعله
لاتتجرأ
تغيرتي بأسبوع كامل
إذا اني تغيرت بأسبوع كامل أنتَ تغيرت بين ليلة وضحاها.
لو تعرضتي للخيانة بيوم راح تبقين مثل
ما أنتِ؟
لااا، بسسس ما اروح اتزوووج واحد ثانييي واحرررك بگلب الاول
وأبين اله حياتييي ماتوووگف عليك
اوگفي تقصدين اني اتزوجتج علمود أبين النريمان هيچ؟
لعددد شنووووو
لاااا لااااا وحگ على ابن ابي طالب لاااا ماعندي هالفكرةةةة كلهاا.
اهاا كتلي ماعندك لعددد شكووو مخليهاا تراسلك وبيوم زواجنا مكالماتها تتراگع.
حاضرررها من كلشييي حاضرررها بس چنت ناسييي
رقمهااا الثانيييي ماحضررته وبقت تتصل عليه
وحتى مراسلاتهاا من حساب مو حسابهااا هاچ شووووفييي.
طلع جهازه دخل على المحادثة إلى شفتها بليلة زواجنا حطها گدام عيوني
چان حساب وهمي مو حسابها الاصلي
هسسسه صدگتي وغلاة امي على گلبي وحگ لووعتي هاي
نريمان من يوم إلى طلگتها ما حاچي وياها حررف واحد.
كل هذا مايشفع فعلتك إلى سويتها
غلططط اي غلططط بسسس ماردت أذيج
اندگ باب الصالة اجه صوت آدم بدوو مايدخل
آدم: شنو السالفة خوية اجيت تتفاهم لو تتعارك وياها
ريم: آدم تعاال أخذه منااا ما اريد احچي وياااه
آدم: مرات الشخص يستحق فرصة وإذا ماتريدين تنطين الفرصة أسمعي على الأقل.
رجع وارث يباوعلي
أتسمعيني
لا
لا تقسين هيچ
حذرتك قبل وما اخذت بكلامي اتحمل النتائج.
رفع ايدي حضن وچهي يباوع بعيوني إلى جمرت.
بعدي هذا كله علمود ما أذيج افهميني ريم
اريد اطلگ منك اني وارث
تحلمين
چنت معتربتك شخص مقرب إلى بس هالشي قتلته بنفسك
بعده ما انقتل شي يتصلح كلشي.
دفعته عني اريد اتحرك لزمني مقيدني اني ناعمه وهو ضخم
ما أكدررر عليه صرت ارافس جوا ايديَّ
عوووفنييي واررث شبيك
شلون نتفاهم وأنتِ تشردين مني
وراح اضل اتشرررد وما اسمعع منك كل شخص يتحمل نتائج أفعاله
كرررررهتك تعرررف شنووووو كرررهتك ويله مبروووك.
مو هذا إلى ردته اكرررهك تحقق إلى اتريده.
عافني وطلع گعدت حاضنه نفسي وحررت دموعي
الي سجنتها وحاربت ماتنزل أسمع باب البيت انطبك حيل
راجع بعد ما كسرني هالكسرة تحلم يا وارث والله اراويك
أضعاف العذاب إلى عشته والجاي أعيشه.
مسحت دموعي ورحت غسلت ورجعت حطيت ملازمي ادرس
تركيزي كله اتبخر ودموعي تنزل كل ما تذكر حالته شلون
جانت وشلون متغير بس خلي يستاهل كلشي اني حوبتي مو قليلة.
وَهج.
دخل آدم صعد سريع الغرفته كلنا بقينه أنباوع بأستغراب
عبالنه هيچ، بس فزينا من نزل وبأيده سلاحه وجدي ماكو
طلع يركض لطمت باجي سلمى على خدها
سلمى: يمهه شصايررر
سحبت نفسي منهم دخلت للغرفة سحبت جهازي
ولو ما احچي وياه أخذه موقف منه بس لازم يعرف شصاير.
صفا: شكو شبيكم شنو هل الهوسة
وَهج: ما ادري آدم صعد يركض ونزل بأيده سلاح
صفا: عزززززززا.
اتصل ما يجاوبني، بقيت اكرر بالاتصال ماكو طلعت چانت.
الدنيا غروب وعمتي نجاة طالعة من ساعة من عندنا
دخل أكرم راجع من دوامه اتلگته امه حچتله
ضل يتصل
بيهم ولا واحد يجاوب لا عميد الدين ولا آدم و حتى زيد
مايجاوب لأن هو يشتغل ويا عميد الدين جدي طالع الغير محافظة.
أكرم: شنو سالفتهم ولا واحد يرفع جهازه شصايرر
زينب: والله گلبي راح يوگف نوب آدم ماعنده عقل وأخذ السلاح وهو عصبي منا.
ضل أكرم يتصل يطلع ويدخل ماكو بالاخير گال.
أكرم: خلي اخابر الولد إلى يشتغل ويا عميد الدين أشوفه.
اتصل عليه جاوبه طلع برا يحچي وياه اباوعله من الباب
ضل يحچي بعصبية اول مرة أشوف أكرم بهيچ حالة
رجع للبيت باوعلي، وأجاني احساس الموضوع
يخصني مرات نظرات الشخص تحچي وتكلك أنتَ المقصود.
وَهج: خير ابو رحيق اكو شي؟
أكرم: عميد الدين وبشار متعاركين.
جمدت بمكاني من گال هيچ، شجاب بشار على عميد الدين
و وينهم هسه
ابوچ مدخل بالموضوع وعلساس جاي يحل بي وآدم.
كاسر خشم واحد من جماعة بشار وعميد الدين كاسر أيد بشار وحاجزهم بالمحل مايخليهم يطلعون، اني رايح الهم.
طلع طلعت وراه اركض أصيح بأسمه
أكررم
راد يصعد بسيارته استدار ناحيتي
هاا خوية
انتظرني اروح وياك
شنييي وين رايحةةة العركة صايرة بمحل عميد الدين
وهناك كله زلم اگعدي واسكتييي.
الله يخليك بداعت بنتك لا ترفض طلبي.
ضل يستغفر واعصابه تلفانه
تمام بس ماليييي علاقةةة إذا انعاط بيچ هناك عميد الدين مايقبل ترررا.
مالك علاقة يمي هالشي.
ركضت للبيت دخلت بدلت سريع وانطيت خبر الهم وطلعت
صعدت وياه طلعنه متوجهين المحل عميد الدين
الطريق كله القلق اكل گلبي ليش تعاركوا وبشارر شوداه يم عميد
ياربي اني شردت من بيت الباشا الغير دولة ورجعوا لحگوني
شوووگت اخلص منهم شووگت.
وصلنا المحل عميد الدين الباب مسدود وسيارة ابوي
موجودة وسيارة آدم خابر أكرم مادري علينا فتح الباب
دخلنا جوا عميد الدين يتصايح ويا ابوي.
هو شافني لو اتخبل فتح عيونه بكل وسعهن
عميد الدين: خررررب شتسوووين هناا
بلعت ريگي وأباوع العمال كلهم موجودين وأبوي والباشا
وبشار لازم أيده ويتلاوه بالألم والثاني خشمه ينزف وآدم لازم سلاحه عليهم.
أكرم: گتلهاا عاندت.
عافهم وأجاني لزمني من ايدي گدامهم أخذني بهدوء
عكس وضعه حاجبه مشكوك مجروح وگفني بجهه بعيد عنهم حچه بنبرة هادئه
عميد الدين: ليش اجيتي هنا يُبا وفوگ كلشي خليتيني اعلي صوتي عليچ گدامهم.
وَهج: عميد الدين شصاير ليش هيچ حالتكم
هذا الكلب ابن سطعس كلب اجاني هنا يهدد بنص محلي
واتضاربتوا
مابيَّ شي انا، خلي أكرم يرجعج مو حلوة وگفتچ هنا بنص الزلم
أكلك يازلم يا نسسوان ماتشووف وضعكم
شبي يخبل وضعنه، بشار الزمال مخلي يتصارع ويا الألم اكو احلى من هيچ.
بلا خبال، هذا إلى خشمه ينزف لا يصير بي شي وتتلبس عليكم تهمة.
قصدچ هذا إلى ضاربه آدم
اي
اطلعهم منا بشرط
شنو
ترجعين للبيت شنو زوجة العُمدة واگفتلي بنص الزلم.
هسه أنتَ هذا اليييي هاامك
ليش اكو شي اهم منه؟
اووف عميد الدين
يله يُبا خلي يرجعونج منين ما اجيتي ومن ارجع نحچي
خاف ترجعون تتذابحون
العيد بعده مطول جان ذبحتله بشار
ألتفتنا اثنينا على مصدر الصوت آدم وأبوي يتصايحون والباشا وياهم
عميد الدين: يله ام سَند للبيت هسه اخلي أكرم يرجعج ابقي هنا.
راح بقيت واكفة بمكاني وصوتهم ساعة يعلى وساعة ينصى
وآدم صوته يرعد رعد عمي طلع وارث الهادئ هذا وينه وين الهدوء.
طكه ونص اهوايٌَ عليه، بس يعجبك بالهدات ويا اخوانه اول واحد
تلگاه گدامك وزيد نفس الحالة يضحكك بس من يعصب فنك تتقربله.
اجه أكرم طلعني من المكان مرجعني للبيت طول الطريق
أشوف أكرم حابس ضحكته استغربت شبي وليش هيچ يضحك
وَهج: اكو شي
أكرم: لا ليش
ما ادري اشوفك ضام ضحكتك.
ماتحمل كام يضحك بصوت عالي خلاني صافنه
اعتذر بس ماتحملت والله.
هوَ شكو أكرم
خاب من شفت شلون حاصرين بشارر وجماعته.
ذكرت التمثيل مال الطف من يحصرون الكفار
هسه حال بشار مثل حالهم
يعني شلون مافهمت يعني يمثلون
اي كل المحافظات اتسوي بعاشوراء تمثيل واقعة الطف
بَس اكيد إلى نعرفه شي قليل، واقعة الطف أليمه وماكو مثل فاجعتها.
وصلني للبيت وگال راح يرجع الهم دخلت للبيت اتلگني يسئلني
وَهج: عميد الدين ماقبل ابقى ورجعني أكرم
بقينه ننتظر نومت سَند بصف صفا ورجعت انتظر اتأخروا
دگت ال 11: 30 بالليل يله دخلوا علينا راحت امهم الهم.
خطية خايفة عليهم، ضل يبوس بأيدها عميد الدين، دخل ابوي وياهم.
أشرف: وَهج تعاي بابا
صعدت وياه الغرفته دخلت گعد مترأس الكرسي الگاعد عليه
وَهج: خير
أشرف: خلي بشار ايشوفوف سَند مرة وحدة
وَهج: ولاااا بالأحلام مستحيللل
راح يبقى يوميا مسويلنه مشكلة
عادي ويوميا ينسحل ويطيحون حضه.
تعرفين شي عن عيسى
شي مثل شنو
هالحيوان جاي يختفييي ما ادري وين حتى شغل صار مايجي اله
شمدريني غير هوَ ابنك حبيبك اني وين اعرف.
شلونها علاقتج ويا عميد الدين
عادية
انيي ما اريدها عادية لازم تتقربين اكثرر اله وتعرفين وين حااط الملفات إلى تخصنه.
أن شاء الله احاول
طلعت من غرفته اهز بأيدي والله بطرانين هو عميد الدين
اني بنفسي فرني بعقلي، تريدون انتم تلعبون عليه يامساكين.
صعد عميد الدين باوعتله بطرف عيني
عميد الدين: شنو بعدج زعلانه مني؟
لزمت بالمحجر افر بجسمي عليه واسولف وياه وهو عيونه عليه
وَهج: تقبل اسوي وياك مثل مانتَ اتسووي.
الاسباب تحكم، المهم جاي انطيج خبر بكلشي
متأخر تنطي
تعاي ويايَّ اريد احجي وياچ
ما اريد
عوفي الدلال هسه
ويني وين الدلال اني، شبعت تكفخ من ابوي وعيسى نسوني شي اسمه دلال
يطلع من خشومهم.
مشيت وياه الغرفته دخلت قفل الباب قلصت عيوني أباوعله
شكو قفلته
علمود محد يدخل
هو منو يدخل اشو انتم واحد يحترم الثاني
وينه اخواني اكبر عفطيه من آدم وشيلي ايدچ
بالعكس شفت الاحترام بينكم.
عندي الچ مفاجأة
مفاجأة سبرايزز.
اي سبرايز على گولتچ
شنو؟
فتح الخزنه مالته طلع منها اللابتوب إلى بي كلشي
إذا يوگع بأيد واحد معناها وگع بأيده كنز حطه وگعد أشرلي اگعد يمه مثل عادته.
شنو المفاجأة
الي يحبها گلبچ
فتحه وبقى يحمل حد ما انفتح فيديو طبكت حواجبي
من الموجود فتحت عيوني بقت متشخصه على الموجود
هذا عيسى معلك ومبين متعذب هو صارله يومين مختفي
وَهج: عيسى؟
عميد الدين: طاح بشباكنا اول صيدة.
شلون هيچ عزا عميد الدين أنتَ راح تخبلني.
عيسى راح يبقى بهذا المكان
راح تستغلون أبوي بيَّ؟
خلي انشوف يحبه لا، لو مصالحه اهمشي عنده.
ركزت بالفيديو واحد لابس كله اسود ب اسود مابين شي من وجهه واگف وراه
بس طالع نص من جسمه وضلمه أكثر شي الضوء على عيسى.
وگفت لازمه جبيني
منو معذبه هيج
آدم
شنووووو
آدم ويايَّ خطوة بخطوة وجدي عنده علم بكلشي
گلتله عيسى چان يعذب صفا مو؟
اكيد هاي حبيبة گلبه شلون ما احچيله.
لزمت شفتي اكل بيها واباوعله.
صرت اخاف منك طلعت ذكي كلش ذكي عقلك ينخاف منه.
ضحك بصوت عالي رفع راسه لفوك يضحك وتفاحة آدم بارزه
اجه يمي جر انفي بخفه بأيده
لا أنتِ ذكية بس انا شوي اذكى منچ يُبا
وينننن يمههه خاطفينه خطف تخوفووون.
اكو كم شغلة بس تكمل اسحبي نفسج من الشركة
نعمممم؟
إذا يشكون بيچ ولو ذرة شك اتصيرين بالرجلين
لوووو ايصيررر السفاااح الشركة ما اطلع منها اله واني أخذه إلى دخلت علموده
وانا گتلچ راح تأخذين كلشي.
هايهيه معناها على اتفاقنا، وبعدين ليش اخاف مو بظهري العُمدة لو أتراجع؟
باوعلي بنظرات ماعرفت افسرها
بظهرج هسه وبعد، لو ادري العمر كله ابقى احمي بيچ قابل.
فتحت الباب قبل لا أخطي خطوة للخارج أردف
اخر كلام عندچ؟
أردفت بنفس النبرة إلى قبل كم دقيقة چنت احچي بيها، ثقة، شموخ، صلابة
مو راس واحد اكسررر لااا، اكسر روس واني تربية الخدامة إلى أستنقصوها.
رجعت اله ساده الباب.
أنتَ هذا تخطيطك مستحيل يكون بالجديد عميد الدين
صحيح
يعني من زمان مخطط لهذا الشي
اي
كله علمود ثأر رائد
گتلج عندي ثأر قديم ويا ابوچ
والي فهمته ثأر رائد
مو بَس ثأر اخوج
چاا شنو؟
أتقرب إلى وجهه بوجهي وحچه كلماته إلى صعقتني وعيونه إلى صارت تخوف.
عميد الدين: ابوچ يا وَهج أيده ملطخة بدم صديق طفووولتييي
وهالمرة ما اله أي مهرررب هالمرة مو وحدي هالمرة
زلم بظهري راح يحرگونه بناره وهو على قيد الحياة.