رواية وقار الغريب للكاتبة حوراء السعيدي الفصل السابع والعشرون
صفا
الكل بقى صافن شنو من دخولية دخلتها اني شفتها بالصور
بَس ماتوقعت شخصيتها هيج نسخة من شخصية وَهج
أبوي يمكن أكثر شخص أنصدم برجوعها رد جدي مصدوم
عزام: رونق؟
رونق: تاج راسي جدي
راحتله حضنته سلمت عليه، والكل بعدهم مذهولين برجوعها
سلمت على اخوانها واحد واحد وهم تحت تأثير الصدمة بعدهم
ماعدا عميد الدين شكله طبيعي اكيد يدري بكلشي وإلا
چان حاله من حالهم، رجعت نظراتي على وَهج الواگفة.
وعيونها مثبته بأتجاة رونق مامصدگة إلى گدامها.
عميد الدين: رونا نأجل كلشي هسه خلي نكمل عقد آدم وصفا
رونق: يلاااا.
ومن بين كلشي أبوي اتقدم سحبني من أيدي أحسها أنملخت
أشرف: موووو گلتييي ما أترريدينه.
بلعت ريگ بخوف من شكله وعصبيته
صفا: مووو كلشي نحچي.
أشرف: تاليتيييي وحدة مثلججج تضحككك عليَّ
آدم: عووووف ايدهااااا.
رفع أيده يأشر على آدم وخضني خض
تزوووجين واحد مُدمن؟ لا بابا هذا مو من مستوانا.
ملصت أيدي منه أيده لازمتها وگلبي يأذيني من قهري
صفا: المُدمن هذااا أحسن منك ومن أبنك.
عميد الدين: شحچيناا أشرررف لووو أتريد أنفذ إلى حچيته.
ما أحس غير أنفر وچهي براشدي صرخت
من قوته
طفر آدم من مكانه ورجله تنزف هجم على أبوي وحتى
شرايين رگبته نطت من عصبيته رفع أيده يريد يضرب أبوي وجدي عاط بصوته
آدم: لااااااا تضرررربهاااا اكسرررر أيد أي واحددد
أيمددد أيده عليهااا وحگ العباس ابوووو فاضل.
عزام: مووو أحاچيك آدم.
أبتعد عنه أجاني يعرج برجله وگف گدامي بدون ما يلزمني
آدم: أذاج؟
نزلت دموعي بشعور يفشل، مهضوم، مخذول هزيت براسي
صفا: لا.
اجت رونق تأشر بأيدها بسرعة طابگه حواجبهاا
رونق: نعم نعم ويننن گاعدين شنووو هل الهمجيةةة
تدرري إذا قدمت شكوى بحقك تخيسك بالسجننن يااا عموووو.
أشرف: وحضرررتج شنوو شغلج وجاايه تنطينييي نصائح.
رفعت عيونها للسقف الثواني تعوج بحلگها بخفه رجعت نزلتهن
اتباوعله بنظرات تحدي رفعت حواجبها مبتسمة.
رونق: وياك المحامية رونق هادي عزام.
رفع حاجبه يباوعلها بنظرة أستصغار يهز بأيده
عميد الدين: سيد اعذرنا على الدراما إلى صارت شوف شغلك.
أشرف: صفاااااا
رفعت راسي اله
إذا توافقين بهذااا الزواج اتبرأ منچ واغضب عليچ
صفا: أخجل على نفسك وأنتَ تحچي هذا الكلام
لو چنت أب صالح مو ظالم چنت اتخلى عن كلشي علمود رضاك
بَس أنتَ عمرك ماچنت هيچ ومستحيل اكسر بالشخص الأحبه علمودك.
راح تووووافقين؟
أي
تدفعين ثمن هذا الشي.
إلي أتريده سوي، بظهري أسود يكسرون الظهر الكل شخص يحاول يأذيني
أنتِ جبتيهااا الروحچ انتظررري إلى راح أيصيرر
عميد الدين: لاااا تهدددد.
عافنا وطلع وبداخله اتجاهنا كل الحقد والخبث
ولا أجه أبالي شنو ممكن أيسوي بيوم من الايام
أكرم: آدم لازم اخذك للمستشفى
آدم: هسه عووفنه من المستشفى
أكرم: ما ايصير بابا شووف شلون صارت.
عميد الدين: ناخذك للمستشفى يعالجونهاا ونرجع هنا قابل طايرة.
باوعلي آدم ومبين كاتم ألم رجله.
آدم: تنتظريني صفصف؟
صفا: أي
آدم: عميد الدين أنتَ خليك هنا بين ما ارجع
هز براسه رفعوه أكرم و زيد
طلعوا بي للمستشفى ويا طلعتهم نزل أبوي ماخذ جنطته يريد يطلع من البيت.
وگف بنص البيت وصوته وتهديداته جلجت المكان
أشرف: وَهج طعنتينييي بظهررررري انتظري حساابججج
طلع تارك المكان، اجت وَهج رافعه حاجبها مامنطيه أهمية اله
صفا: راح يحاربج ب سَند
وَهج: عنده سيف وعندنا سيف وأنشوف منو يفوز بالمعركة.
السيد أخذه جدي وطلعوا ينتظرون بالديوان اثنينه رفعنه راسنه
علي صوت شهگة قوية چانت باجي سلمى
لازمها وارث فاتحة عيونها بكل وسعهن وتباوع ال رونق
مشت ب خطوات بطيئه وعيونها مامصدگة بنتها راجعتلهاا.
سلمى: انا بحلم لو بعلم بنيتي رجعت رونق يمه.
اخذتها رونق من وارث عيونها لمعت بدموعها تبوس بايدها
وترجع تحضن بيها اثنينهن يبچن
رونق: أروحلج فدة يا يمة يا طيبة
رجعتي يا بعد طولي، رجعتي يا وحيدتي.
دفنت راسها بحضنها تبچي وصوت شهگاتها ملئ المكان
تعذبت بدونج يمه والله أتعذبت فراگج مو هين چان أستفقدا كلشي وأولهم حنيتج.
چان لقاء مؤذي للكل وبنفس الوقت مُفرح البنات
زينب و ريم هم متفاجأت، رفعت راسها رونق تباوع بالوجوه وبأرجاء البيت كله
رونق: اشتاقيت الكم اشتاقيت الكلشي بهذا البيت كل ذكرياتي هنا
ما گدرت أنسى أي شي منها انام واگعد وهيَّ ويايَّ مانسيت شي.
اجه وارث حضنها هيَّ وامها باس راسها گعد الكل واني طفرت
للغرفة نزعت إلى لابسته كرهته حتى الفستان خايس
مثل هذاك النعال ابن النعال إلى رادوا يزوجونياه
دخلت وَهج ورايَّ بس فاصلة عن سوالفي
وَهج: صفا عود صدك رجعت رونق لو عقلي جاي يتخيل.
جاوبتها واني انزع بالفستان والبس واحد جديد بي حظ
صفا: واقع واقع مو حلم.
بقت تصفن الدقائق، انتبهت عليَّ
ليش بدلتي
غيرر راح أعقد اريد اجهز نفسي زين ولو عقد بنص هالمعارك غريب.
بَس اني قابلة، احم شوفي أستحي احچيها بس اني اريد آدم
يااا تستحينن هووو غيرر بنص الزلم وگلتي للرجال تتزوجني
أخذني الواهس شبيچ والاكشن وهاي صار عندي حماس زايد وطلبت أيده للزواج.
ولازم هسه نخلي آدم يلبس الفستان ونسويله تسريحة لأن أنتِ طلبتي أيده
اوععععع اوعععع لا تلعبين نفسي وأبطل عززززا
اتخيله لابس فستان ومسوي تسريحة ههههههههههاااي
هههههههه خبال.
رحت عليها حضنتها
شكراً وَهج
عليمن.
لأن لو ما أنتِ تتصرفين يمكن هسه اني انعقد عليَّ
اني أعرفج ذكية وماتستسلمين بسهولة فاجئتيني بقبولج
هددني بيچ وب آدم وگال حتى لو حچيتي الهم راح يأذيهم.
هو چان ما يدري شمتتظره هسه صار عنده علم
أنتِ صدك تركتي الشغل وياه
أي بعد ما أله داعي لأن كلشي عندنه صار وأحنا هنا راح نخسره كلشي
معناها رونق الها دور دام رجعت هنا لأن هيَّ محامية
أكيد وإلا شنو هالصدفة ترجع بهذا الوقت.
خلي اجهززز نفسي قبل لا يجون.
صفا أنتِ مقتنعة؟
أي والله مقتنعة خااب شنووو أحبه غيررر اموووت عليه هذا المُتنمررر
الثكل الثكل
محد يدري بينه اني وياج خليني أصير خفيفة يمچ شكوو بيها.
وگفت اجهز نفسي مسحت إلى حاطته ورجعت
حطيت ميك اب من جديد جهزت نفسي بسرعة
حطيت شال على راسي وطلعت ويا وَهج چان الكل گاعد بالصالة
ورونق امها حاضنتها ال گلبها باجي سلمى مامنطيه فرحتها الأحد.
مرت ساعة ورجعوا الولد مضمدين رجل آدم اول ما دخل.
ضل يباوع كبل عاط المگروص ابن المگروص
آدم: ويننننن السسسيد
عميد الدين: بالديوان
آدم: يله يجي يعقدد شووو السالفة طووولت عمي طلعت روووحناا.
هز بايده عميد الدين يضحك طلع ايجيب السيد
زيد: الغسل كون فشلتنه
آدم: هسه احچي ويا السيد بلگي عنده وحدة سنونها مكسرة نكربسها براسك
زيد: اييي مو ضال عنين، هسه مو جاي تتعالج ليش تخليني اشك ماخذلك بطل وجاي
صاح عميد الدين علينا، شو مو صارت صدك بطني.
انمغصت شكو شبيه يمه الحگينيي اخذتني وَهج
قبل لا ندخل طلع عميد الدين سريع باوعلنا
عميد الدين: وَهج ألبسي شي فوگ فستانج ممكن
وَهج: ليش فستاني مو ضيك
عميد الدين: ميخالف ام سَند ألبسي.
هزت براسها تضحك رافعه حاجبها صعدت لبست
بشت فوك فستانها ونزلت، دخلني جوا هيَّ وباجي سلمى
بس ماسوينه أي شي من طقوس الخطوبة لأن كلشي صار بأستعجال
بدأ السيد يعقد ألنا ورجليَّ وايديَّ يرجفن رجيف مو طبيعي.
من التوتر، گعدت وَهج يمي أيد لازمه بيها أيدي وأيد على رجلي
وصل لأخذ الموافقة مني ومن آدم.
السيد: صفا أشرف عزام هل تقبلين بالزواج من آدم هادي عزام ف إذا قبلتي
قولي نعم وأنتَ وكيلي .
من التوتر ال اني بي نسيت كلشي رجع يكرر هم ما حچيت كمزت بمكاني من عاط آدم
آدم: هاااا شنييي هم هدددوچ.
حچيت بصوت ناصي عود خجلانه عشتوا
صفا: لا بس مو من اول مرة لا يگولون عليَّ خفيفة ومامصدگة.
رجع السيد يسئل نطق قلبي قبل لساني بالموافقة
نزلت دمعة فرح على وجناتي
صفا: نعم وأنتَ وكيلي.
أعتلت واطربت مسامعي صوت الهلاهل.
رجع يأخذ موافقة آدم سئله من أول مرة انطاه الموافقة
آدم: موافق سيد موافق بس أعلنها راح يوگف گلبي.
ضحكوا الكل أعلن السيد زواجنا الشرعي وتم كلشي
اخذتني وَهج للصالة أول مادخلت زينب طكتها بهلهولة زرفت أذني
زينب: الف الف مبروووك.
الكل ضل يتبارك إلى حتى رونق اجت حضنتني فرحانة باركتلي.
واني دخلت بمود الخجل بس اضحك الكلمة گوا تطلع مني
صفا: الله يبارك بيكم.
شويَّ ودخلوا الولد هم اتباركولي اجه آدم لازمه زيد
يباوعلي بعيون مليانه أشتياق وحُب باركوله هم
زيد: بعددد بس أنيي بقيت شدووو حيلكم ترا مو ابن البطة السوووده لا تنسوني.
الفرحة صارت فرحتين بهذا البيت اليوم رونق ورجوعها
و عقدنا اني والمُتنمر، أحس نفسي بعالم خيالي مامستوعبه
صرت أله وصار ألي، ومن كم شهر چنت أشوفه بعيوني.
شلون متعذب بحُبه أتجاهي، گعدنا راحت وَهج للمطبخ
عميد الدين لحگها، أبتسمت المنظرهم درت وچهي شفت رونق
هم تباوع وراهم مبتسمة، ضلوا الموجودين يسولفون.
طلعت وَهج من المطبخ وجها صاير احمر گعدت يمي ساكتة
عميد الدين هم طلع و على ثغره أبتسامة گعد بصف جدي
يحاول يخفي أبتسامتة ما يگدر أتقربت الها
صفا: شبيكم
وَهج: منوو؟
أنتِ وعميد الدين
شبيناا مابينه شي.
غمزتلها اضحك
عليناا هالسوالف
انجبي خليج بروحچ وبفرحتج مالج علاقة.
عميد الدين: احم. شبيج ام سَند.
رفعتله حاجب تباوعله بطرف حاجبها
وَهج: سلامتك يااا عُمدة.
هز براسه دار وجهه يسولف ويا جدي وَهج ما ادري شتبسبس بينها وبين نفسها.
عميد الدين: جدي آدم بعد مايرجع للمستشفى راح يكمل علاجه هنا
لأن شافوا سلوكه هم وأيجابياته ويا العلاج ماكو مشكلة يكمله هنا
عزام: هايهيه
آدم: اكيد ماراح اخلي خطبتي هيج تمر
زيد: چاا شتريد العالم أتگاتلت بينهم وانتم عقدتوا شوف التميززز خرب اعراضكم.
آدم: صفا بنيه ومن حقها تفرح بخطوبتها واني هم رايد هذا الشي
ف أنسوي حفلة وهم احنا نفرح وانتم تفرحون بينا
عزام: هايهيه جدي إلى أتريدونه ما يهمني بالدنيا غير فرحتكم
عزام: الله يحفظك النا يا جدي ويطول بعمرك
وبعد نقاش جر بين الكل قرروا ايسون الخطبة بعد يومين
حاولوا ويا آدم بين ماتطيب رجله يسويهاا ماقبل رفض رفض قاطع
وماباقي للموعد إلى حددوا غير يومين وبذني اليومين.
النوم ماشفته الكل انشغل بتحضير الحفلة وباجي سلمى
عزمت كل أهلها، هسه ايفان من اسمع تنجلط جلطة
ثلاثي الابعاد، بس بنفس الوقت ما أگدر استهزأ بحبها
لأن شي مو بيدها وحبت شخص من طرف واحد وما گدر يتقبلها.
طلعنا أشترينا الحلقات اني وياه وباجي سلمى دخلنا للصايغ
طلع مجموعة حلقات النا وگفنه نختار وأمه گعدت على جهه گالت اختاروا بكيفكم.
آدم: لا اوكفي هاي مو حلوة، خلي نجرب الثانية.
لبسنياها ثكيله تختنگ نزعتها.
صفا: ثكيله ما اريدها
آدم: حبي چا شتريدين هذا خامس محل ندخله ومايعجبج شي
صفا: اريد شي بسيط وخفيف، شوف والله آدم مو كلش أهتم الهلشغلات اني.
حتى لو من حقج هذا الشي
رجعنا ندور ومصمم اله أخذ ذهب كامل مو فقط حلقة
ما قبل أي شخص يساعده بالتكاليف كالهم عندي خير من الله
مجمع من شغلي بس القاعة ماخلوا يدفع شي اتكفلوا بيها
اخوانه بينهم كالوله أحسبها هدية الخطبة.
كملنا وأخذنا الحلقات والذهب وأخذلي كله من هذا الزين.
هو منو يلبس الذهب بس بعد هاي سوالف الاعراس
رجعنا للبيت مجهزة كلشي لأن قبلها بيوم طلعنا أشتريت فستان
ويا وَهج والبنات، دخلت رونق راجعه من الصالون
هيَّ وريم مسويات جلسة تنظيف وهالسوالف
رونق: هسه شنو ما الله هداج تروحين للصالون.
صفا: لا لا اني استاذة بالميك اب
الثاني يوم گعدت على صوت الهوسة وهاي رونق هم مزعجه
بس تعيط ولغويه جنها اني تشبه وَهج بالقوة بس بالتفاهه
واللغوة مثلي بس همزين ما عندها فهاوة.
وتفرك فر بكلامها إذا حچت.
بدينا انجهز نفسنا كلنا اجت ويايَّ رونق تساعدني أجهز بنفسي
لأن وَهج سَند مصخن ومتنحس شلع گلبها حتى نفسها مامجهزتها ملتهيه بي.
وَهج: يله ماما أخذ علاج علمود اتطيب وهسه
بالحفلة ترگص ويا عمو يله يا قرة عيني.
تتوسل تواسيل بي علمود يشرب العلاج وسَند مكروه بشكل من يتمرض
طلع روحها يله شرب العلاج بدلتله وطلعته يم عميد الدين علمود تجهز نفسها.
فستاني جان أبيض وتصميمه بسيط وأكثر شي جاي ساده
محد فتح أي موضوع ويا رونق لأن الكل انشغل بخطبتنا
أبوي من يوم العقد بعد ما عرفنا عنه أي خبر وكرهته أكثر من عرفته مرجع شذى.
كملنا كلشي وبدوأ يطلعون للقاعة بقينه اخر شي
وَهج ورونق ويا عميد الدين صعدن واني ويا آدم بسيارته
آدم: اويلي عليج يمه شطالعة ولج ام خشه
صفا: حلوة؟
آدم: تشگين شگ
ضحكت اخذت جهازي بقيت أخذ صور ولقطات إلى وإله.
لزمت أيده هالمرة كلشي بالحلال وفعلاً لو گالوا كلشي
أتسوي بحال يخليك مرتاح اخذت صور لأيدينا نشرتهم ستوري
وأغلب صديقاتي إلى متابعتهم مو عراقيات اكو عربيات من غير دول واكو اجنبيات.
صفا: آدم
آدم: هااا يا بعد الروح
صفا: أنتَ مو گلت راح أسوي كلشي واخليچ تحبيني
آدم: چاا دخوليتي إلى دخلتها عليچ بيوم خطبتج من ذاك ابن العار شنييي.
لاا لااا اريد هيج تخليني احبك بعددد.
غمزلي رفع أيدي باسها وعيونه بالطريق صارت.
تدللين إلى اتريدي أيصير
اووويييي آدم كزكزت عليك
هههههههههه
الله شو ضحكتك حلوة
مو بحلاة ضحكتج
آدم شو أحس نفسي صرت خفيفه من صرت مرتك
عادي هو رجلج خفيف أنتِ شتطلعين.
عندي اهوايَّ سوالف وياك
اني هم تكمل الخطبة واخطفج منهم تقبلين؟
اكيددد
ضحك ضل ايسولف ويايَّ بين ما وصلنا للقاعة نزلنا.
دخلنا للقاعة و على حسب الأصول كلشي مجهزينه
القاعة منفصله الزلم وحدهم والنسوان وحدهم
گالوا علمود تاخذن راحتچن إذا مختلطة تتقيدن.
بدأت الاغاني والأجواء مال الحفلة آدم طلع گالتله امه من ايصير الوقت ترجع تدخل.
باوعت للترتيب مال القاعة كلشي نازك ومثل ما أتمنيت
وهالشي چان متكفل بي عميد الدين گال انتم أطلعوا منها
جهزوا نفسكم والباقي عليه، اجت وَهج طالعة اتشك شك
وبكل مرة يميزها بين الكل شعرها الكيرلي ولون عيونها البُني.
وبعد وقت مَر دخل آدم علمود نبلش نكمل اجواءنا
لبسوا البنات حجاباتهم، دخل بنص القاعة ويعرج برجله.
مامهتم الضحكة شاگة وجهه فرحان وگف يمي جابوا
الحلقات والذهب بدأ يلبسني وكل قطعة بلبسنياها اشوف
شفايفه تتحرك بدون ما اسمع شنو يگول صار عندي فضول أعرف شنو يحچي.
صفا: آدم شنو تحچي
آدم: ادعي من الله يوفقني وياچ
ابتسمت الكلامه لبسني الحلقة ورفع ايدي الشفايفه
بأس أصبعي إلى لابسه بي الحلقة
حافظي عليها مثل ماتحافظين على روحچ صفصف.
لبسته الحلقة بأيده حلقته فضة كملنا هل الشغلات.
ونزلنا نرگص بنص القاعة خلوها بس النا.
صفا: آدم رجلك لا تتأذه.
نزع الستره بقى بالقميص شمرها على رونق صاحت رونق بنص القاعة
رونق: شدهااا بعد اخيتك.
آدم: لا تخافين مايصير شي الرجلي، صفا مو مال نرگص سلو الحچي بينه ما أحبه.
چا شنرگص
تهزيلي واهزلچ
هههههههههه يلاااا
تعرفين؟
هسه أتشوف بعينك.
اشتغل الديجي أغنية الساجدة عبيد صار وره ظهري لازمني من خصري
صرت أتمايل ويا أنغام الاغنية وأيديَّ تتمايل ويا خصري
يلوك المحبس بچفك يا مزيون
حلو شعره يتناثر فوگ المتون.
يحلو الطول يا زينات الشبان
ومن يمشي يتمايل غصن ريحان.
ابتعدت صرت گدامه هو رفع أيديَّ يصفك يضحك عاض شفته
واني گباله مبتسمة واركص بكل احترافية
آدم: أويلي عليج يمه هيچ ناويه تجلطينييي
ضلينا مستمرين
داخلين بالجو اني وياه نرگص
يبو حلو المعاني وحلو الأطباع
من شافته عيوني حبته بساع.
سحبني الحضنه باس خدي بقوة وهو يسحب نفس عميق
آدم: أتسرسح بالكيوتات اني
صفا: عزززا عزززا الناس آدم.
هاا هسه استحيتي بس من هزيتي الخصر ما أستحيتي
غير خطوبتنه.
رفع راسه يباوع بعيوني بهيام وحُب
لو اكو كلمة تعبر عن حبي أكثر من كلمة أحبج چان گلتها
أحبج اني صفصف ميت عليچ.
نزلت راسي خجلانه من أنظار الكل علينا.
رجعني المكاني وهوَ رجع لقاعتهم يم الشباب وَهج
فلا أتهنت بالخطبة أبنها لازمها أما باقي البنات ما قصرن ركصن حد ماتعبن
ضلوا الموجودين يتباركون إلى من خوال وأقارب.
صعدت باجي نادية يمي باستني فتحت علبه بيها قلادة ناعمة
محفور عليها أسمي بنعومه لبستنياها
نادية: الف مبروك حبيبتي ربي يسعدج هالقلادة
من زمان مسويتها الچ ومقررة بيوم خطوبتچ أهديها الج اتمنى تتقبليها.
نزلت دموعي حضنتها
صفا: شكراً باجي
أبتعدت عني تمسح بدموعها مبتسمة نزلت جوا راجعه يمهم
بقت الأجواء مستمرة حد ما خلصت الحفلة الكل رجع للبيت
بنص الطريق آدم غير الطريق.
صفا: وين رايحين
آدم: المكان ردتي تروحيله من زمان.
نسيت وين
هسه نوصل
انطيتهم خبر
عميد الدين يرتبها لا تهتمين مو گتلج راح اخطفج بس تكمل الحفلة
ايفان وعمتي ناهدة ما اجن
بعد أحسن.
وصلنا للمكان اتفاجأت من شفت نفسي يم شط العرب
شگد چان بنفسي اجي لهنا نزلت وياه لزم أيدي
كعدنا بمكان وأيده بعدها لازمه أيدي اكو ناس موجودة
فستاني چان لا مشلتح ولا شي رفع أيدي بأس باطنها.
آدم: احبج
نزلت عيوني
صفا: واني بعد
أنتِ شنو بعد؟
هم مثلك
شنو مثلي.
ملت براسي على كتفه اضحك بخجل.
واني احبك يا مُتنمر
أويلي العباس عليچ
والعباس احبك.
گعد گبالي يضحك وعيونه تلمع
صفا يعني صدك عود صرتي إلى شو مامصدگ
لا صدك عمري وهاك شوف الرابط إلى يجمعنا.
رفعت أيدي إلى لابسه بيها الحلقة وأيده
صفا: هسه صدگت
آدم: يعني شلون هيچ اني مامسوي شي زين بحياتي شلون رب العالمين حقق أمنيتي.
بس أنتَ مو سيئ
مشيت بالحرام
وتبت ورب العالمين غفور رحيم
أنتِ متقبلتني من كل گلبچ؟
لوو ما متقلبتك چان ماجازفت ووصلنا للي اليوم وصلناله
ماراح تضوجين اذا گالولج رجلج چان موزين ويشرب
لا لأن ماضي واني ما يهمني الماضي إلى يهمني هسه.
وگف يمسح بوچهه وتحسه متوتر من شي أحاول اطمنه
بضحكتي إلى گلبه يحبها بس چان شكله وتصرفاته غير
صفا: آدم شبيك؟
آدم: أنتِ متقبلتني بكلشي؟
صفا: اي حياتي شبيك؟ ليش تبقى تفكر بالماضي
آدم: ما ادري خايف، خاف بالمستقبل تتندمين.
رحتله وگفت يمه لزمت أيده.
خلي ننرجع للسيارة تعال.
أخذته من أيده وگلبي انطحن من القهر عليه صعدنا بيها حضنت وچهه
صفا: آدم حبيبي اني متقلبتك بعيبوبك متقلبتك بسلبياتك قبل أيجابياتك
لا تفكر بيوم أخجل منك ومن ماضيك احنا بشر نخطأ
طبيعي الكل يغلط والكل يصحح اغلاطه اني احبك الك
وياك بكلشي ومتأكدة راح تتعالج بالكامل وترجع أحسن من قبل.
نزلت دموعه البارت تنزل على أيدي واني احارب ماتنزل دموعي وياه.
آدم: بس اني بعيد عن رب العالمين اهواي بعيد لا صلاة لا صوم
صفا: اي اي كلشي من جديد نبلش بي راح ترجع تصلي وتصوم
لا تعوفيني بيوم مهما صار بينه
مستحيل أعوفك هاي أيدي ماراح يلزمها غير چف أيدك وعد الك يا حَبيب.
مسح وچهه سحب وچهي باسني بخدودي ضحكت
رجعنا للبيت، الطريق كله ساكتين وافكر آدم لازم يتعالج بالكامل
ويتخلص من كل شوائب الماضي وإلا يبقى متاذي طول عمره.
ريم.
رجعنه من الحفلة بالليل آدم أخذ صفا وراح ما ادري وين
بس عميد الدين گال يريد يحچي وياها وَهج اخذت ابنها هيَّ وياه
وطلعوا بي للطبيب لأن الصخونه ماتنزل رغم خطية ماضل علاج ماشربته مافاد.
نزعت الحذاء الكعب والشال ذبيت نفسي على السرير ميته تعب
أنفتح الباب دخل وارث باوعلي بطرف عينه شبيه هذا والله يا الله
ضل يذب بأغراضه يرگع بيهن رگع فتحت عيوني
أستغفر باوعتله واگف بعده يم الميز مال المراية.
ريم: اكو شي؟
وارث: سلامتج
لعد ليش هالعصبية
أمتصيها
شنوو؟
هيچ، گومي بدلي لا تبقين هيچ.
شويَّ بعد
لا هسه
گتلك بعد شويَّ شبيك
واني گلت هسه
والله والله ما اگوم
هيچ يعني مو؟
مارديت عليه اجه گعد بصفي رفع خصلات شعري من وجهي
فتحت عيوني أباوعله.
ريم: خير ان شاء الله
وارث: لشوگت تبقين هيچ
وشبيه يعني
تصرفاتج مو حلوة ريم، ماعندج احترام إلى عكسي لليوم محترمج.
سكتت ماجاوبت اني ماچنت هيچ، چنت احترم حتى المايحترم.
ليش تغيرت هيچ يمكن بسبب كلشي مريت بي وبسببه
هو إلى منطيني مجال وماضاغط بشي عليه حتى من أتجاوز عليه يسكت.
تجمعت دموعي بعيوني رفعت راسي اله
ريم: اني ما چنت هيچ
وارث: وهو لأن اعرفج مو هيچ جاي اتأذه
ريم: أنتَ صوجك منطيني مجال
وارث: چا شتريدين أمد ايدي عليج وأصير ذكر.
أنتَ شتريد وارث؟
أريدج.
بلعت ريگ وعيوني بعيونه
ما اگدر اصدگك بكل مرة تتقربلي بيها لو تحچي شي
أحسك مجرد تريد تمشي حياتك وتتناسى ماضيك بيَّ.
شوكت تتخلصين من هاي أفكارچ
ما أدري، گلبي متوجع منك من يوم عفتني بصباحية عرسي
حچيتلچ وبررت موقفي واعترفت بغلطي شنو إلى اسوي أكثر ريم
شنو الفائدة وأنتَ بعدك اتشك بكلشي اني حتى الجهاز
ما األزمه بس للضرورة متجنبه المشاكل إلى اتصير بينه.
والحل نبقى هيچ
ما أدري وارث.
ردت أگوم رجعني المكاني، غرس رگبته برگبتي
وأيده تمشي على طول أيدي، غمضت عيوني سحبت نفس من عطرة.
نزلت دمعتي بگد ما أريده، بس إلى يخليني أنفر منه ماضيه
اخاف يستخدمني وسيلة علمود يتخطى بيها نريمان الي
ما أدري هل فعلاً چانت مشاعره وياها تعلق لو فعلاً حب.
ريم: وارث
وارث: هاا برنسس
ريم: ممكن تبتعد
وارث: لا
شنو لا
ريم
هاا وارث
والله جاي أتعالج من الشك لا تخافين مني
مو بيدي هذا الشي.
رفع راسه يباوعلي
هههههههه تذكرين من طحتي بالطين بيوم ما اجيناكم البيتكم للحله.
نزلت دموعي أكثر واني أتذكر ذيج الايام إلى مستحيل ترجع
هزيت راسي ودموعي تنزل على خدي
أي واتفشلت گدامك
منها وأتعلگتي براسي.
طبگت حواجبي ما فاهمه مغزى كلامه
ما فهمت؟
نزل راسه باس طرف شفتي ورمشه طخ برمشي همس بصوته
احچيلج بس تبقين هادئة ولا تچفصين
تقصد اني أچفص؟
لا وين اني إلى أچفص
صحيح والله كلامك كله خوش كلام.
برنسس
هااا
حبيتچ من زمان بس رفضت أعترف النفسي بهذا الشي.
لأن چنت ويا نريمان، بحيث من يوم إلى شفتج حد قبل لا نفسخ
خطوبتنه اني وياها ماچان أبالي غيرج تصدگين
حتى من چانت تحاچيني اغلط بالاسم واگلها ريم وجانت تضوج واتسوي مشاكل.
ما اصدگك للأسف
ليش؟
لأن چنت مرتبط بوحدة
جاي أتعالج يم دكتور ومن سولفتله أگدلي هذا تعلق چان بيها مو حب
والدليل من راحت راحت من بالي بس خلت بداخلي أفقد الثقة بالي حولي
چذاب
شنو ألي أتريدينه علمود أتصدگين
أخذني للزيارة.
طبك حواجبه مستغرب من طلبي.
مو رحنه بالعطلة
هسه هم أريد اروح
بس احنا جاي نحچي بموضوع مهم
هناك نكمل الموضوع.
صفن الثواني بوچهي وگام من فوگي يعدل بملابسه
وارث: تمام الفجر نطلع باجر جمعة عندج وماكو دوام
ريم: تمام عيوني.
طلع ما ادري وين ركضت بسرعة بدلت وشي بداخلي ما اعرف شلون أوصفه
هاي الروحه
راح تثبتلي إذا صدك هو أتجاوز نريمان وچان متعلق بيها تعلق لو جاي يخدعني.
بس ما أدري اذا هالشي إلى راح أسوي صح أولا.
رجعت نمت تعبانة وعيوني ماغمضت التفكير أكل راسي
رجع للغرفة غير ملابسه واتمدد بصفي نام غمضت عيوني
احاول انام، للفجر گعدنا جهزنا نفسنا بعد الصلاة نزلنا جوا
امي وجدي گاعدين طلع وارث منطيهم خبر ودعناهم وطلعنا.
وصلنا شوي متأخرين بسبب الازدحامات وهم الطريق طويل بين البصرة والنجف
وارث: ادخلي للحمامات اني انتظرج هنا
دخلت للحمامات النسوان شگد وبيوم الجمعة الزيارة اتضك.
مو مثل باقي الايام غسلت وطلعت دخلنا زرنا ماگدرت الزم
الشباك صايرة شي فوگ شي زرت من بعيد.
صليت رگعتين اهداء للأمام وطلعت شفته گاعد بالصحن مال الامام
لازم بأيده كتاب الزيارة گعدت بصفه المكان راحة نفسية
شكد ماتسحب نفسق عميق تتمنى ترجع تسحب نفس بعد أعمق
حد ماكمل سد الكتاب باوعلي
وارث: الزيارة مقبولة
ريم: قبل الله أعمالك.
راح يأذن الظهر نصلي هنا ونطلع للمگبرة وبعدها الكربلاء
اي هم گلت هيچ اني
گومي اگعدي گبالي.
سويت مثل ماگال كعدت گدامه مد أيده الجيبه
طلع منها علبه بيها حلقتين حطهن گدامي.
وارث: هااي گدام ابو الحسنين وهوَ شاهد على كلامي من بعد الله
اني رايد أحبج ريم رايد ابدي حياتي من جديد وياچ
أستاهل تنطيني فرصة، وماراح تندمين طول حياتج
بقيت ساكتة محتارة، خايفة انطي فرصة واتندم خايفة اتقبله ويخذلني بعدين.
هااا ريم؟
نگدر نأجل الموضوع؟
ترا ادري بيچ تحبيني لا تنكرين تصرفاتج مو مال وحدة مامهتمة.
حتى لو چنت عايفج بصباحية عرسج مستحيل
وحدة ماتحب وتنقهر مثلج وتتأذه وتقرر تعاقب هيج.
أتهربت من كلامه
ريم: إذن خلي نصلي
صلينا صلاتنا ورحنا تغدينه ورحنا للمگبرة زرت أبوي، و طلعنا متوجهين الكربلاء
وصلنا المغرب الها
وارث: خلي نروح للفندق ونرتاح وبعدها نروح نزور
ريم: بكيفك.
دورنا على فندق زين لأن وارث تلعب نفسه من كلشي عنده اهم شي النظافة
طاحت رجلينا
يله لگينه واحد يقتنع بي اول ما دخلنا أخذ ملابسه وللحمام.
ركضت الجنطتي فتحتها باوعت اللعلبة بيها خايفة من هالخطوة
بس لازم أسويها هايهيه اني هم تعبت صارلي أشهر متعذبه.
رجعتها المكانها وهو طلع من الحمام وگف يسشور بشعره باوعلي
وارث: ماتسبحين
ريم: اي أي هسه راح أسبح
اخذت الملابس ودخلت سبحت وطلعت جهزنا نفسنا
ونزلنا رحنا بالاول للامام الحسين عليه السلام زرناه ونوب للامام العباس عليه السلام.
بچيت اهوايَّ حد ما ارتاحيت باقي خطوة وحدة ويخلص كل هذا.
أخذني للمعطم تعشينا بي أهتمامه نظراته كل تصرفاته
تحچي شي واحد بس شيقنع عقلي ويصدگ
طلعنا نمشي بالشوارع
وأي شي ايشوفه يشتريلي منه
وارث اريد عصير بس أنشربه بالفندق مو هنا
ليش مو هنا؟
لا اريد هناك لأن تعبانة ما اگدر أمشي بعد
تمام برنسس اوگفي هنا اجيب واجي.
بقيت واكفة وهو راح يشتري، أشترى واجه رجعنا للفندق أخذته منه
وارث هذا كعك إلى اشتريته إلى راح أصب تاكل ويايَّ
اي بابا.
هزتني كلمة بابا بس حاولت أسيطر على نفسي.
صبيت العصير بكلاصات وهو مدنگ على
موبايله
أخذت العلبة أيدي ترجف حطيت بكلاصه حباية وحدة
وأخذته حطيته گدامه انطيته الكلاص ضل يشرب بي
وجسمي كله يرجف بخوف وقلق من إلى سويته
هذا علاج امي تستخدمه لأحد أمراضها ومن زمان الدكتور گال خلي اتركه لأن يسبب هلوسه.
شرب نص الكلاص ولزم راسه
هذا العصير يمكن حلو كلش موزين عليه
لا مابي حلا طبيعي
چاا شبيَّ دخت
اخذت منه الكلاص خفت لا يكثر ويتخربط عندي
يعني شنو تحس نفسك دايخ.
يغمض بعيونه ويفتحهن أخذته من أيده نومته على السرير.
وارث
برنسس
أنتَ بخير؟
دايخ
اسفة
اممم وليش
وارث اسئلك سؤال
شنو
أنتَ منو تحب نريمان لو ريم.
نريمان شنووو
چانت حبيتك
ضحكت عليَّ
وريم
اوفف أحبهاا بس تعاند تعبتني
شلون حبيتها وأنتَ چنت تحب
أحبهاا بَس هيَّ جاي تعاقبني أتريد تأخذ ثارها مني.
نزلت دموعي واني أستجوبه بالكلام وهو تحت هيچ حالة
تعرف هيَّ هم تحبك
أي بس ماتعترف ام الكرامة، تخاف على كرامتها
ونريمان.
شبيهااا نعلان كرهتهاا لا تجيبين اسمها.
عفته بمكانه وأبتعدت هسه اتأگدت من كلشي بس يا ترى
راح يسامحني على فعلتي إلى سويتها
هوَ نام
واني گضيت الليل كله گاعدة شعور متناقض لزمت الحلقات بأيدي
وأفكر لازم ابدي من جديد أتعاقب مني اهوايَّ
اتجاوزت عليه
هنته، أستحقرته، چفصت ببطنه وكل هذا أتحمل مني
لو اني مستحيل اتحمل هيچ شي للصبح
ب 9: 00 گعد
لازم راسه بأنزعاج وگف دايخ لزمته من أيده
ريم: بيك شي؟
وارث: خرب شنو هل الدوخه.
تعال غسل
أخذته للحمام غسلت وجها ورجعنا لداخل الغرفة
وگفت گدامه افرگ ايديَّ بتوتر رفع راسه يباوعلي
شبيچ ريم؟
ريم: اني سويت شي بس ما ادري غلط اولا
وارث: مثل شنو
ماتذكر شصار البارحة؟
لا شصار؟
وارث حالتك هاي بسببي
مسح وچهه رافع حواجبه علمود يركز
الدوخه؟
أي.
ضل ساكت بس يباوعلي بأستغراب
شسويتي.
بلعت ريگي بخوف وشفتي رجفت
حطيتلك حبوب مال هلوسه بالعصير.
فتح عيونه على وسعهن دموعي نزلت بخوف بسرعة گام من مكانه.
حطيت أيدي راسي و وچهي خفت يضربني.
وارث: حبوووووب هلوووووسه رررريم مقتنعةةة بكلامچ
ريم: اسفة والله بس ردت اتأكد إذا نريمان بعدها أبالك
لاااا تخلينييي اسبچ واسب حتى نرريمان وووياچ
من حقييي اتأكد اني ما اريد ابدي من جديد وياه شخص مامتأكدة منه
وتگومين تحطين حبوووب لج رريم طلعتييي كارررثةةة أنتِ، بسس فهميني منووو معلمچ على هالسوووالف.
لزمني من كتفي بقوة حسيته انملخ وعيونه تتجادح بعصبيته.
وارث: ماتوقعت توصل بيج المواصيل الهالدرجة
ريم: بسس افهمنيييي وارث
اششش كافي ما أريد اسمع صوتج.
دفعني وطلع من الغرفة، بقيت وحدي لميت نفسي حاضنتها
ودموعي مستمرة تنزل، هو ليش ما يفهم موقفي
نمت ودموعي تنزل ما ادري شلون غفيت لأن الليل كله ما نايمة
فزيت على صوت الباب من انطبگ باوعلي بعدم أهمية.
وارث: جهزي نفسج راجعين
نهضت من مكاني جهزت اغراضنا ساكتة وهذا چان اخر غلط.
اغلطه بحياتي بسبب تطفلاتي وشكوكي طلعت اني المريضة بالشك مو هوَ.
أخذ علبة الحلقات حطهن بجيبه وگلبي اتگطع تگطع
راد يطلع صحت وراه
ريم: وارث
وارث: اتفضلي
الحلقات
ما الهن داعي بعد، وبكيفج إذا تريدين ننفصل من باجر اجيب السيد يفسخ كلشي.
تغير رأيك عن قبل
اني ما سويت إلى سويتي يا ست ريم رغم مرضي وعذابي
والي شفته ماسويت مثلج وغلطي چان واحد
والحمدلله
ماقصرتي خذتي ثارج وزيادة، لهنا وكافي
يا ريم.
الانسان من يقدم شي هم يريد المقابل يقدمله مثل ماهو يقدم اله
غلط وغلطتي، تچفيص وچفصتي، تصرفات غلط بغلط
احترام ماخليتي إلى وكل هذا و وارث اتحمل و گال ميخالف
اني غلطت اتحمل بس مو الدرجة توصلين اتشربيني حبوب علمود تتأكدين من حبج الچ.
اني خليت ابو الحسنين شاهد على
اعترافي الچ بس أنتِ لا چان الچ رأي آخر واني حتى علاج
جاي أتعالج علمودچ وشگد أمر بحالات تدمرني وما ابين الچ.
عميد الدين يدري بكلشي بس هايهيه لهنا اني اليوم اگلج عوفيني
أو براحتج تريدين تكملين دراستج وننفصل إلى يعجبج
بالنسبة إلى طابت نفسي من كل النسوان أنتِ حرة من اليوم.
وَهج.
رجعوا ريم و وارث من الزيارة بس الوجوه ماتتفسر
الكل لاحظهم سئلهم جدي گالوله ماكو شي
وارث بس وصل ريم
طلع بعد ماشفناه وريم حبست نفسها بالغرفة صعدت الها صفا أتشوفها ونزلت
صفا: تگول ماكو شي بس تعبانين من الطريق
رونق: عوفيها.
لليل رونق صعدت النا الغرفتنه علمود تشتغل ويا عميد الدين
خابر ظافر وصار كلام بينهم بخصوص الملفات
وَهج: ظافر لا تتوقع أشرف بسرعة يطيح
ظافر: اكيد ام سَند هو إذا مانقضي على شبكته راح يظل ظهره قوي
عندج هسه الباشا وبعد كم واحد هم بظهره ذوله من تخلص ورقتهم
أشرف هنا تخلص ورقته قابل كلشي سهل.
رونق: هم هسه بالأساس بدأ شغلهم بالعد التنازلي
خسروا أكثر من مشروع خصوصاً المشروع الاخير إلى فلشه باسل.
عميد الدين: المشروع و تهكير أحد الصفحات التابعة للشغل
والقاء القبض على إلى چان أشرف مستفاد براسه
ويمرر شغله ذني ضربين چانن على الراس يوجعن
لذلك هو صار ذكي وراد يزوج صفا لأبن أحد رجال الأعمال
الي حالياً صار شريكة بالشغل لأن يريد ينقذ شغله.
ظافر: هسه لازم نبلش بذوله جماعته ويصيرون
واحد وره الثاني، هسه راح نشتغل بالملهى إلى تابع اله وهم عندي هناك شخص رايده
عميد الدين: هاي إذا لكيتهاا
ظافر: نلگاها وين أتروح.
مافهمت عليمن يحچون سد الخط وبقينه احنا الثلاثة
نتناقش ونخطط وهسه لازم نكون حذرين لأن تركت الشغل من أشرف
وراح يضل ورايَّ حد ما ياخذ ثأرة مني بحساب اني طعنته بظهره.
رونق: شوف عميد الدين هذا الملف چان مسلمنياه رائد
أتوقع هذا طابو لأرض ماخذها غصب عن أصحابها.
أخذه عميد الدين ضل يقرأ بي هز براسه
اي هاي الأرض صايرة ب بوگتها چان مبني عليها بيوت.
وهدد اصحابهاا وخلاهم بين ليلة وضحاها اختفوا وهدم كل البيوت هاي اذا ماگاتلهم.
وَهج: عميد الدين منو الشخص إلى ظافر چان يحچي عنه
عميد الدين: سالفة طويلة
سولفلي، سولفلي.
ضربته رونق على ظهره بخفه
رونق: سوالف لبنت الشريف لا ماتعوفك الليلة
عميد الدين: أنتِ روحي نامي باجر وراچ شغل.
اخذت الملفات إلى عندها وطلعت بقيت گاعدة بمكاني انتظره يسولفلي.
وَهج: يلا عميد الدين
شنو يُبا
منو هاي المرأة إلى ايسولف عنها ظافر.
وحدة تشتغل ويا ابوچ ظافر عنده شغل وياها
شغليش
مبين ماراح تعوفيني
أبداً.
بلش يسولفلي عن ظافر والمرأة وربطها وياه وعن بنتها
الي اسمها اسراء شبعت قهر هو يسولف واني دموعي تنزل
شلون خسرت اخوانها حد ماكمل انتهيت
وَهج: أريد أشوفهاا
عميد الدين: وين أتشووفيها يا يُبا.
حباب عميد الدين
باجر أربعينية اخوانها خلي تكمل وانشوف الوضع وإذا قبل ظافر أخذج
وعد
وعد
الثاني يوم الظهر اندگ الباب مال البيت اجه الباشا.
وبأيدة ظرف شمره بوچهي رفعته اقرأ بي بلعت ريگ واني اقرأ بي
چان بلاغ من المحكمة بيت الباشا رافعين دعوة حضانه علمود سَند.
عقجت الورقة وذبيتها بوچهه
وَهج: أشوف زلمه ياخذ ابني مني
الباشا: تتحدينيييي وَهج
وَهج: وأتحده أكبر راس بيكم لك بابا انتم هسه حيروا بأنفسكم
الباشا: أشرف ماناوي خير وياچ.
ليش هو شووووگت نوواها خيررر ويايَّ
نتواجه بالمحكمة
أن شاء الله
طلع هو وجماعته لزمني عميد الدين.
عميد الدين: ديري بالك تخافين رونق موجودة
ماراح تخلي أحد ياخذ ابني منچ ولا انا اخليهم ورب العرش.
رونق: خلك حثالة لا تخافين بس يكمزون والطفل دامه بعده
صغير ف هو من حقج، هسه اني استلمهم الچ
ا
خليهم يفرون بأذاناتهم.
عافتنه ودخلت جوا
وَهج: رونق شوگت تحچي السر إلى ضامته
عميد الدين: ما ادري تگول مو هسه
هزيت براسي ودخلت جوا جهازي يدك رفعته چان أبوي
فتحت خط وعميد الدين يتصنت لأن فتحت مكبر الصوت.
أشرف: تجين للشغل لووولاا
وَهج: ترررركته
أشرف: مووو بكيفج أتركي اكو عقد بينه
وَهج: نگعه وأشرب الماي مالته.
سديته نزلت رونق من فوگ تركض تضحك وبأيدها الجهاز
بس لبسها عبارة عن سواد ما تلبس الألوان.
رونق: البشارة يمعودين
عميد الدين: يا الله
رونق: واحد من شبكة أشرف تم القاء القبض عليه هسه حازم انطاني خبر.
عميد الدين: الاخبار السنعه
رونق: يله يله مابقى شي ونتخلص من كلشي
هسه أشرف ينجلططط.
وَهج: عندي ملفات أخذتهم من جنت اشتغل وياهم يمكن هم أتفيد
رونق: جيبيهن جيبيهن شمنتظره
رحت جبتهن حطيتهن گدامنا وصرنا نشتغل بيهن
رونق: هذا حتى لعب بالحسابات لاعبين
وَهج: مو شي جديد
عميد الدين: اگلچن گومن گومن
وَهج: وين؟
أنروح البيت ظافر
صدك؟
اي
رونق: اوگف عميد الدين الوضع داچ بين وارث وريم
خلي أنشوفهم بالاول، وضعهم مو طبيعي جداً جداً
وأحنا نحچي سمعنا صوت جدي وعياطه جلجل المكان.
طلعنا ما فاهمين شي وشكو جدي لازم وارث من ياخته ويعت بي.
عميد الدين: شكوووو جدي شصايررر هنااا
آدم: اخوك يمكن فقد عقله
شصايررر
هو وريم قرروا ينفصلون
ضلينه نباوع الريم الگاعدة ساكتة نهضت من مكانها وگفت گدام جدي تحچي بكل جديه.
ريم: كلشي چان غلط من الاول وهسه صار لازم ينتهي كلشي
جدي كاافي لهنا وهذا الزواج إذا يبقى مُستمر راح نتاذه أكثر اني و وارث
وهالمرة اني رايدة الطلاك واني و وارث اتفقنا.
واتفقنا اثنينا على هذا القرار
اذا تحبني صدك يا جدي هالمرة لا تكسر بيَّ.
گعد جدي لازم راسه وعمتي نجاة جررت ريم من أيدها
نجاة: ررريم أنتِ شتحچيننن
ريم: كافي يوووم تعبت وغلطت أهواي بسبب هذا الزواج.
رونق: من كل عقلكم؟ شبيكم، جدي اكبر غلط توافق.
وگف جدي وجهه محتقن
عزام: هذا الزواج سويت كلشي علمود يستمر بس انتم ماحافظتوا عليه
واثنينكم واحد غلط ويا الثاني ف هايهيه إلى تريدونه نفذوا.
ركضت رونق على ريم تحچي وياها.
رونق: شبيچ أنتِ هااا؟ فهمينييي شبيچ تدرررين بي يحبچ وأنتِ تحبي لا تحاولين تضمين هذا الشي
صايرة مشكلة بينكم تنحل كلشي بالهدوء لا اتصيرون بلا عقل.
ريم: انتم ماتعرفون الاغلاط إلى صارت بسبب هذا الزواج ف كافي أرحموني بي خلوا ينتهي
رونق: حبيبتي ريم لا تزعلين من كلامي بس أنتِ بعدج صغيرة
ويمكن مامدركة البعض المواضيع والتصرفات وارث چبير وراح يحاول يتفاهم وياچ.
دارت وجها على وارث تأشرله يحچي
رونق: مووو وارث؟
بقى ساكت وارث يباوع ببرود
وارث: رايح اجيب السيد أحنا بأوامر الدكتورة ريم.
طلع عميد الدين وآدم راحوا وراه أسمع صياحهم
بالساعة رونق وصفا والكل يحاولون يغيرون رأيها بس
هيَّ هالمرة قافلة مو مثل كل مرة وحتى وارث ماحاول يمنعها وموقفة چان بارد اتجاها.
وره ساعة رجع وارث وگف بباب الصالة
وارث: جهزي نفسچ السيد صار هنا
وَهج: عميد الدين فدوة احچي شي لا تخليهم يطلگون.
ضل ساكت ما حچه شي ويباوع الريم بعتب.
عميد الدين: ريم بابا تعاي ويايَّ.
طلعت وياه رحت وراهم وگف يسولف وياها
عميد الدين: إلى سويتي غلط كلش غلط أنتِ
ماتدرين بكل جلسة يم
الدكتور وارث شيصير بي، هو داس على روحه علمودج
بس أنتِ شسويتي قابلتي كلشي بالعناد والاغلاط
وهو من يسولفلي اكله ميخالف اتحملها واجبك
علمها وهو ماقصر اهواي حاول وياچ بس أنتِ ما چنتي تتجاوبين وياه.
ردت ريم بغصه ودموعها تنزل
ريم: صح كلامك أبوية
عميد الدين: تريدين وارث أنتِ.؟
ريم: هو بعد ما ايريدني واهوايَّ أنفرضت عليه خلينا ننهي كلشي لهنا
مالج علاقة بي هو ضايج منج بس ماكرهچ هسه تلگينه ميت لأن راح تطلگون.
لا خلي كلشي ينتهي اني اغلاطي صارت ماتنعد وياه
وحقه وبنفس الوقت ماعندي ثقة ليش اچذب عليك أعيش
وياه وعندي شك وخوف بيوم نريمان ترجع الحياتنه وراح اتعبه ويايَّ
بابا يا نريمان، نريمان راحت انتهت.
اجه آدم دخل
آدم: وارث يگول خلي تجي.
عااط بصوت عميد الدين اول مرة أشوفه هيچ متعصب.
علي واحد من اخوانه من يوم خطوبتنه
عميد الدين: كله ماكوووو طلاگ
عاط جدي بصوت
عزام: عوووووفهم عميددد الدين.
طلعت ريم ويا آدم قافلة كلش، خلو أعصابنه تنتهي
بقرارهم مادري شنو إلى براسهم وگفنا اني والبنات نتسمع
للسيد وهوَ يطلگهم ضل يحچي وياهم علمود بلكي
يتراجعون بس الاثنين قفلوا على قرارهم
وبعد دقائق من الكلام السيد طلب من وارث يرمي يمين الطلاگ عليها.
أباوعلها من الباب وجهه احتقن صار أحمر بس ولا دمعة نزلت منها.
ومنزله عيونها بينما وارث عيونه بيها تحرگت شفايفه يطلگ
بس مستصعب الكلام، غمض عيونه ونطق الجملة.
وارث: أنتِ طالگ...
تم طلاگهم طلع السيد، گام من مگانه وارث يباوعلها
وهيَّ بعدها مغمضة عيونها وگف قريب منها
وارث: هسه أنتِ حره
لا وارث يقهرچ ولا أنتِ تقهري مبروك الچ موفقة بحياتچ أن شاء الله.
فتحت عيونها حمر دم تباوعله حچت بصوت مخنوگ
ريم: الك بالمثل.
طلعت من يمنه هيَّ طلعت منا، وارث وگع بين ايدين عميد الدين.
ركضت رونق اله، لزمت راسي شنو هاليوم المشؤؤم ياربي.
رحت الريم أدور عليها ماموجودة أشرتلي صفا فوگ بغرفتها
صعدت وراها اريد الزمهاا اكلهاا لحم دفرت الباب ودخلت عليها
شفتها گاعدة حاضنه نفسها وتهشگ بدموعها ردت اصرخ واعيط وألوم
بس وضعها مو مال شخص يزودها عليهااا.
وَهج: ليش البچي مو هذا إلى ردتي
ريم: أي
وَهج: اي بعد ليش تبچين لازم تفرحين خلصتي
وگفت تمسح بدموعها، وتهز براسها طلعت جنطتها تحط بأغراضها.
تگدرين تساعديني بأغراضي
رحتلها لزمتها حضنتها ما أحس غير الباب اندفر علينا چانت رونق
بدون مقدمات سحبت ريم من عندي ولزمتها من اكتافهااا.
رونق: ارررتااااح گلبجججج بسسس گولي ارتاحيتيي
شنووووو ناووويات اتدمررررن أخووووي ولچن حررررام عليچن حررررام
شگد تحمممل منچ هاااا شگد ذليتيييي وطيحتي حظ حظه
واتحمل واتحمل لا عبالج بعيدة وما ادري بكلشي لاااا ادري بكلشييي.
وَهج: رونق مو هيچ شييچ.
رونق: لاااا هيچ خليهاااا تصحى على زماانهاا وتفهممم شنووووو خسرررت
أخووووي مووو لعبة ولااا بيوم فكررر يتلاعب بيهااا
بسسسس وين احنا العناد والكرررامة والسوالف الجاهلة مانخلص منهاا
بس اريد افهم ياعالم يا ناس منووو ما يغلط بالدنيا احنا
مو انبياء ومااا نغلط كلنا كلنااا نغلططط.
دفعت ريم رونق وضربت على وجهات تصرخ وتبچي
ريم: كاافيييي كاافيييي لاااا تبقوووون بسس تلووومووون بيَّ.
ركضت لزمت أيديهاا ملخت روحها تملخ وجهاا صار أحمرر
نزلت دموع رونق وهيَّ تگلهااا.
رونق: اني ما اريد أحد يعيش فقد الحَبيب لأن صعب ومو بسهولة تتخطاه
تضل غصه بگلبه بكل يوم تخنگه، وباليوم الف موته يموت وهو حَي عن يا عذاب تحچون انتم.
عافتنه وطلعت فهمت كلامها شنو چانت تقصد بي
وهنا جانت تقصد نفسها وتقصد أخوي رائد.
صعد جدي النا دخل للغرفة إلى بيها أحنا.
عزام: سويتي إلى ابالچ جدي؟ هايهيه بس رجعه العمامچ تشيلينها من بالچ
تبقين هنااا ويا امچ وهذا اخر كلام وياچ.
طلع گعدت وياها أفهمها ريم صغيرة وخلال هالسنة
شافت اهوايَّ شغلات خلتها أتصير بهيچ شخصية والاغلاط تغط بيهن
وَهج: بما انو زواجكم مو كامل ف تعتبرون حالكم حال المخطوبين
لا عدة ولا شي وحتى تگدرين تبقين هنا وياه نفس البيت.
صعدت أمها الها عفتهن و نزلت شفت وارث گاعد بس شكله تعبان.
تعبان كلش الدرجة وچهه شاحب البيت انگلب وأحتله الحزن من جديد
وفوگ كل هذا محد چان واعي للمصيبة إلى راح تجينه من جديد.
لليل آدم طلع علمود يجيب شغلة گال محتاجها وريم
مانزلت من الغرفة صعدلها زينب وباجي سلمى خصوصاً
باجي سلمى رغم كلشي صار إلا هيَّ انسانة حنونه بشكل
ماتعرف الحقد شنو، صعدت وطيبة خاطر ريم بكم كلمة حنونه.
مرت الساعات والهدوء محتل البيت من يمي خفت منه
حتى الاطفال خانسين، دخلت يم عميد الدين وارث.
وَهج: احطلكم اكل، وارث خوية أنتَ عندك سكر ولازم تاكل
عميد الدين: ولو انتعبج صبيلنه وارث هم لازم يتعين اله علاج
لا من عيوني تدللون دقائق ويجهز الاكل.
دخلت للمطبخ شفت زينب و صفا واگفات يسون اكل
وَهج: صفا صبي الريم اكل هم
صفا: هيَّ غير كون تاكل
زينب: تموت روحه شلون بله هذا قرارهم قابل أحد طلگهم جبر والله صدموني لحد الان مامصدگة.
سكتت عنهن وهن يحچن بينهن صبيت الاكل الهم.
وأخذته للصالة اتلگاني عميد الدين أخذه عفتهم وحدهم
طلعت للحديقة شفت رونق گاعدة وحدها والسماعات بأذنها
گعدت يمها، اباوعلها وين ما اتحرگت وگع الجهاز وانفتح
ضلت عيونها عليه وعيوني ضلت بالشاشة مال الجهاز چانت صورة الرائد.
ردت احچي وصوت عميد الدين رج البيت رج طلع يركض وزيد وراه
والتليفون على أذنه يصيح صياح صوته راح وگفنا والرهبة أحتلتنا من گال.
عميد الدين: خااااايب أشررررف جاايك وأشووووف أخووووي ينخدش بخددددش أمحيكككك والكفل زينب العقيلة
أفترت انظاري على باب المطبخ صفا واگفة بي وگعت بين ايدين باجي نادية.
ركضت ال أختي الوگعت فاقدة أضرب على خدهات
وَهج: صفا أمي أفتحي عيونج صفااا
نادية: خلي ندخلها جوا
رفعناها دخلناها جوا وارث رغم حالته بس ماعافهم وطلع وراهم
انتهينا من الايام السود إلى مرت بحياتنا غسلت وجها
اريدها بس تفتح عيونها، فتحتهن نزلت دموعها.
صفا: راح يدمرونه راح ينتقم مني ب آدم.
حضنتها خايفة عليهااا وباجي سلمى انتهت على ابنها
نزلت ريم من فوگ وامها مستغربات من الوضع
مرت الساعات واحنا ننتظر اختي انتهت بين أيديَّ
للفجر رجعوا الولد باوعناالهم على أمل آدم وياهم
بس خابت ضنونه من نزلوا من سياراتهم بدونه
ركضت صفا ال عميد الدين تسئل بي.
صفا: وينه ليش رجعتوا وحدكم عميد الدين
سحب نفس مايخلي عيونها بعيونه
عميد الدين: نلگاه أن شاء الله.
صفا: يعني شنو إلى أفهمه مالگيتوا آدم؟
زيد: غيرررر ابووووج الكلب ما ادررري ويننن خفااااه.
نزلت دموعها بضعف وگعت يم رجلين عميد الدين رحتلها لزمتها
وَهج: صفا قوي نفسج يلگونه والله
وگع بيد المايرحمون شلوون راح نلگااه
يلگونه والله.
بنفس اللحضة اجه صوت أشعار على جهاز صفا چانت لازمته
بأيدها والرقم مو غريب رقم أبوي داز فيديو انتظرته يحمل
والكل التم عليها يريد يفهم عميد الدين صابر على أعصابة بس نريد الفيديو يفتح.
وياريت
ما فتح ولا شفنه الي، وره دقيقة انفتح وعيوني تثبتت
متجحظة بصدمة من الموجود بي ما سمعت غير صرخة صفا
وصرخة عميد الدين إلى رجن المكان وچانن كافلات
تخلي أجسامنا ترجف بخوف ورهبة من إلى شفناه.