رواية وقار الغريب للكاتبة حوراء السعيدي الفصل الثاني
وَهج.
صفنه اثنينه من شفنه ابوي واگع بحضن عيسى ومنتهي
وشذى تضرب على وجها وتبچي حاربت نفسي من انزل
ولا أتقرب الهم بس ما گدرت نزلت اركض ناحيتهم وصلت
اله چان يجر النفس بصعوبة وجهه متعرق وعيسى يرجف
رجيف على حالته، حركت ايدي اتقربله اريد الزمه اتراجعت
دفعتني صفا إلى الخوف اتملك ملامحها بينما اني دخلت بحالة تناقض
صفا: شبيه؟ ليششش هيچ حالته
وَهج: م مستشفى، أخذوا للمستشفى.
مادري شلون طلعت هالكلمات من عندي واني مابداخلي غير الكره اتجاهه.
رفعه عيسى من الأرض وطلع يركض بي صعدت صفا تلبس
حجابها تركض ونزلت طلعت وراهم صفيت وحدي بالبيت
نظرت عيوني حول المكان باجي نادية وين؟ شنو ماحست
علي كل إلى صار، سحبت نفس اتمالك نفسي بي وصرت ادورها
بكل مكان بالبيت سئلت المساعدة گالت ماتعرف وين
صعدت الغرفة سَند اكيد عنده وماگدرت اتركه لأن يخاف من الأصوات العالية.
فتحت باب غرفته ضلمه شغلت الضوء وعيوني تتفحص
المكان أيضاً ماچانت موجودة وينهاا؟ رجعت نزلت ادورها
طلعت للخارج بس مامعقولة تكون گاعدة هنا وهم طلعوا گدامها وماشافتهم
فتحت الباب الخارجي سئلت الحراس إذا چانت طالعة.
وچان جوابهم الي، لا ماشوفها ولا لمحوها طالعة رجعت
دايخه بزماني اني احبها من وعيت للدنيا هيَّ گدام عيوني شفتها
بس هالمرة حيل غامضة عقلي بعض الأحيان يصعب يفسر تصرفاتها.
وما بقى عندي حل غير غرفة الكاميرات دخلت الها
باوعت بالاماكن الموجودة بيها كاميرات ماكو رجعت طلعت
دخلت الغرفتها فارغة اجيت اطلع أستوقفني فتح خزانتها
المفتوحة والملابس الواگعة بإهمال سديت الباب واتقربت الها
يمكن تصرفي غلط إلى هوَ أتقرب لأشياء غيري بس بعض
الأحيان اكو شغلات تجبرنه نسوي هيچ اشياء وگفت باب الخزانة.
اكو صندوق مفتوح أخذته اشوف إلى بي أتذكر مرة
شفتها فاتحته من اتقربت الها سدته وضمته وماعافتني.
اشوف شنو بي، ترددت بداخلي افتحه لأن مو إلى رغم كلشي
بس اتعلمنه بتربيتنه مايصير نتقرب لأشياء مو النا اله بأذن صاحبها
بس باجي راح توگف عقلي بهدوء غموضها عندها اهواي
اسرار متأكدة صح هيَّ زوجة عمي المتوفي بس مابيوم اطرقت
وحچتلنه شلون اجت هنا ولا اي شي يخلي شكوكي تنقطع عنها.
عضيت شفتي وگلبي عبالك خفقان صار بي
وَهج: اسفه باجي مجبورة افتحه
فتحته چان داخله مغلف بقطعة قماش لونها ابيض رفعتها.
وعيوني رفضت تصدق إلى جاي اتشوفه دخلت بحالة
عدم تصديق رفعتها بأيدي مذهوله وعيوني تركزت عليها
ساعة؟ ونفس ساعة امي إلى لابستها اني مستحيل شوصل هيچ
قطعة ال باجي نادية، رجعت ادور بالصندوق لگيت ورقة مكتوب بظهرها 1988.
عصرت عقلي عصر اريد أفسر معنى هالتاريخ فتحت الورقة
وصاعقة صعقتني من شفت المكتوب بخط رائد، اي والله
هذا خط اخوي اني اعرفه وحافظته ركزت بالمكتوب
ذات نهار تغير مالم يكن بالحسبان.
وخاط خطين جوا الجملة، معنى وجود هالورقة شي
سر يخص رائد بس شنو وليش الورقة عند باجي رائد ماچان يحبها
ومات ومحد عرف سبب كرهه الها، من الرغم هيَّ زينه ويانه كلنه حتى ويا عيسى.
هذا الصندوق چان عبارة عن شغلات تخص رائد عقلي
گاد ينفجر بكل مرة اشوف شي يدل يخصه اكو ظرف
سحبته هم فتحته وگعت منه تك ترچية مال أذن لزمتها بأيدي
من الخلف مصبوبة صب ومنقوش عليها هم تاريخ 1988 وياها حرفين RR.
نقرت جبيني أحاول افهم المعنى وشنو هالتاريخ لثواني
فتحت عيوني واني اتذكر ايي هذهِ مواليد رائد هسه ذكرتهاا
وال R حرفه بس ليش منقوش بهذهِ الطريقة ومتكرر مرتين
والله راح اتخبل ليشش ضامتهن عندها وماحچت عنهن باجي شنو وراچ أنتِ.
رجعتهن المكانهن قبل لا تحس عليَّ حطيتهن مثل ماچانن
وطلعت من غرفتها فزيت من صارت بوچهي ضلت تباوعلي
وسئلت بنظرات واضحه عليها الشك
باجي نادية: وَهج؟ شتسوين بغرفتي.
صفنت بيها ياترى شنو إلى ضامته وليش هيچ شخصيتچ
معقولة تطلعين مثلهم غدارة والغل بداخلچ ويجي يوم وتصدمينه بي
مسحت على وچهي احاول اخفي توتري وكل وضعي
وَهج: چنت ادور عليچ وين چنتي؟
باجي نادية: بالحديقة الخلفية
وَهج: يعني ماشفتيهم من طلعوا؟
باجي نادية: منو تقصدين بكلامچ
ابوي وگع وطلعوا بي للمستشفى عيسى وشذى وحتى صفا راحت وياهم
لا ما شفتهم گتلچ بالحديقة الخلفية
وصراخ شذى هم ماسمعتي
لا
اهاا بس صوتها چان كلش عالي.
ما ادري يمكن سمعته قليل عبالي تتعارك
ويا الحجي
هويت براسي أوهمها بأنني اقتنعت بأجوبتها دخلت الغرفتها ووضعها ماعاجبني.
اتأخروا مارجعوا ولا احد اتصل دست على نفسي وخابرت
صفا اسئلها عن حال ابوي وچان الكلام صعب عليَّ بس الدم عمره ماصار مي
وَهج: الو ها صفا شصار وياكم
صفا: صايرة عنده سكتة قلبية ووضعه شوي تعبان
وَهج: اوكي، ترجعين للبيت
صفا: لا راح ابقى هنا بالمستشفى ويا عيسى لأن شذى رجعت.
بطريقها للبيت تگول اختنگ من المستشفيات.
چاا مو نفسها الگطعت روحها عليّ شو صارت ماتتحمل المستشفيات
وَهج
اكو شي غريب
شنو؟
عيسى يسد اتصال ويصعد اتصال ومن اجي قريب عليّ يسكت
أو يبقى يحچي بالالغاز وكلمات مامفهومة
بدأ اللعب
لعب شنو؟
بعدين يله انتبهي النفسچ ولا تحتكين بي خليچ بعيده عنه
سديته منها دام هيچ وضعهم اتخربط معناها عرفوا بفقد الأمانة. راسلت الشخص صاحب هذا الفضل.
وَهج: الواضح صار عندهم علم بسبب قوة الصدمة ابوي بالمستشفى
دزيتها وگعدت تعبانة من هوسة أفكاري وتعقيد الأمور
صار كل تفكيري بالي شفته بالصندوق رفعت ايدي الابسه بيها نفس الساعة
اتصير صدفة؟ لان امي وباجي أتذكر علاقتهن مثل الاخوات
لو اكو شي مجهول، عصرت عيوني الصارن يألمني غمضتهن مادري شلون دخلت بغيبوبة النوم الثاني يله فزيت
شفت جهازي مامجاوبني ابوي طلعوا من المستشفى.
ما اتقربت الهم دخل الشخص إلى نگدر نسمي الايد اليمنى اله ظافر
ظافر: السلام عليكم
رد الكل السلام وابوي طلب من الكل يطلع
من يمه طلعنه
وصفا فضولها اشتغل
صفا: هسه ليش طلعنه علساس مانعرف بقذارتهم
وَهج: ودامچ تعرفين شكو هيچ مفعلة وضعية الفضول عندچ
صفا: اكلچ صاعدة انام البارحة بالمستشفى مانمت
وَهج: تمام
راحت اتنام والي شفته البارحة بعده ابالي دخلت للمطبخ
شفتها كالعادة واگفة وشذى تفتر عليهن تتأمر وباجي مادري.
عليمن أخذه شغل المطبخ وهيَّ من عائلتنه اخذت تفاحة سچينه
گعدت على حافة الميز اگصص بيها.
وَهج: هاا شذى يگولون البارحة صايبچ غثيان من المستشفى وراجعه
شذى: ما احب المستشفيات
وَهج: سبحان الله چاا مو نفسچ چنتي تشتغلين ممرضة لو اني غلطانة؟
شذى: هذا زمان مو هسه
سبحان الله اللهم غير حالنا كما غيرت حال شذى
وَهج مالي خلگ ابتعدي عني رجاءً
شمسويتلچ؟
عضيت بالتفاحة وهيَّ تخزر بشر هيَّ نفس الممرضة الجابها.
ابوي الامي من اتمرضت ومنها وحبته.
شذى: نادية بلا زحمه عليچ تعاي ويايَّ محتاجتچ
طلعن اثنينهن مديت راسي اباوعلهن يمشن ويسولفن بصوت عادي
عضيت العضه الثانية وسمعت صوت عيسى يصيح وصفا تغلط عليّ
ذبيتها من ايدي وصعدتلهم اريد افتح باب غرفتها مقفول اتخبلت
وَهج: عيسى شجاااييي اتسسوووييي صفااا
مافهمت شنو إلى صاير
بس إلى اسمعه جاي يضرب بيهاا اجت باجي وشذى حاولن ويايَّ بس ما يرد على أحد.
صفا: المخنثث تطلع عضلاتك على النسوان من امداك
وهذه يتخبل أكثر ويزيد بالضرب فرفحت روحي والباب ماينفتح
وَهج: فدووة باجي مفتاح ماكووو نسخة الله يخليچ استعجلي
راحت تركض تدور على مفتاح واني ايديَّ انتهت اضرب بالباب كل قوتي
جابوا مفتاح فتحته بسرعة وكُلي يرجف دخلت جوا شفته لازمها
صايرة اجنازه من الضرب خشمها وحلگها ينزفن ضربت
علي ظهره اسحب بي يعووفها مايعوفها مجرم ولزم ضحية.
حتى شذى إلى تكرهنه ونكرها ادخلت بالنص تريد تخلصها منه مانگدرله وصفا ناعمه.
ماچان عندي غير حل واحد صارت عيوني على التحفيه
الموجودة سحبتها وبدون أي تردد ضربته براسه اسمع
بس صوت شهگة ورايَّ ما اهتميتله اختي راح تموت بين أيده
اتخربط توازنه وگع لوره وباجي تصيح
باجي نادية: شسويتيي وَهج
سحبت صفا من عنده منتهيه نزلت دموعي بضعف بنتي هذهِ مو بس اختي
وَهج: صفا اتسمعيني افتحي عيونچ.
ماترد عليَّ اتخبلت ما اگدر انزلها عفتها بالأرض بدمها ونزلت
دموعي تتطافر گدامي وعيوني جمر طلعت بره شفت ظافر يريد يطلع صحت وراه.
وَهج: ظاافرررر
دار بجسمه نزع نظاراته يباوعلي بأستغراب
ظافر: اتفضلي مدام وَهج
وَهج: ساعدني صفا
قبل لا اكمل اتقدم إلى مُسرع
ظافر: شبيها
شنوو شبيها انتواا ماتسمعون صوتهم هيَّ وعيسى
وينها
فوگ
مشى گدامي صعد يركض واني اركض وراه دخل للغرفة.
ضل جامد بمكانه من المنظر صفا مغمى عليها وتنزف وعيسى راسه ينزف لازمته شذى
دار عليَّ مبحلق عيونه بصدمة
منو ضرب عيسى؟
اني قابل منو يعني چاا أتريد اعوفه يموت اختي
راح الصفا يفحص بيها لزم وجها يتفحصه رفع عيونه
مايحتاج مستشفى نعالجها هنا
موووو احناااا دكاااترررة ونعالججج بكيفنههه
رفع حاجبه
ماكو شي خطر
رفعها من الأرض حطها على سريرها وطلب يجيبوله ادوات الاسعافات الأولية.
كام طلع عيسى من الغرفة أخذه الغرفته واسمعه يگله تبقى حيوان
رجع النه وجابوله إلى طلبه بدأ يعالج بيها وفعلاً داواها
بالمطلوب، وگف يباوعلها التفت إلى يتسائل
شنو السبب إلى خلى عيسى يضربها
ما ادري چنت بالمطبخ قبلها هيَّ گالت راح اتنام لان البارحة
چانت ويا الشفيه ابوها صعدت على عياطها
تمام عيني
دنگت راسي اهمس
عمه بعينك گون شكد اكره واحد يگلي عيني
حچيتي شي؟
لااا
هز براسه وطلع رحت گعدت بصفها بست راسها.
وَهج: شصار بينكم وهالحيوان رجع مد أيده عليچ
دخلت المساعدة بايدها ظرف انطتنياه شنو هذا فتحته
قريت إلى بي حطيت ايدي على راسي لا مستحيل هالشي
بلاغ من المحكمة بشار يطالب ب ابنه رافع قضية حضانه
هنا وبهالحظة حسيت فعلاً الابواب كلها انسدت بوچهي
والدنيا اسودت بعيوني ابني هذا لو اعرف اخسر حياتي
ما اسلمه اله رحت الأبوي ودموعي بعيوني ماشوف دربي
عثرت باخر بايه كمت مامهتمه للوجع، وجع گلبي مايتقارن بوجع رجلي إلى تأذت.
دخلت عليّ وياريت مارايحة اله اتعودت بكل مرة يكسرني بيها
وَهج: شنووووو هذااا
أشرف: شنو بابا
حطيت الورقة گدامه
وَهج: شنووووو معنى هذا
اخذها يقرأ بيها ونفس ماتوقعت ملامحه باردة والواضح عنده علم بكلشي
أشرف: وين الغلط ابنه ويريده
ضربت على وچهي مفرفحه
يااا ابنننن هذاااا هاااا ويننن چاان كل هالسنوات
وينن چااان من ابنييي يتمررض وأسهر للصبح اداري بمي عيوني.
وينن چاان من ابنييي كل يووم يكبررر وهوَ بحاجة اب، هسسسه ذكررر عنده ولد فهمنيي بسس وين چان
وانييي جررعتتت المُررر علمود اكبره وما اخليي يحس بغيابه
بالنهاية قبلتي اولا يبقى ابنه ماتگدرين تنكرين هذا الشي وَهج
اني تعبان ف احچي وياه وحلو مشاكلكم بينكم لا تدخلوني بنصكم
ابتسمت بنص دموعي
يا كسرتي منكم شلون راح تواجهون رب العالمين وانتوا كسرتوا.
بنيه باول شبابها، خصيمتكم يوم الحساب وعسا حوبتي تلعب بيكم ووواحد واحد ما ابريكم الذمه
لووو ادري بينكم وبين الجنة بس مسامحتي الله يشوفني بيكم يوم يبرد گلبي منكم
اطلعي برا وَهج
تدلل بس اني مامسؤؤلة عن إلى راح يصير
بيت الباشا أنتِ ووياهم لااا تدخلينييي رفعتي عليهم قضية
رفعوا عليچ هالقضية وراح يساومونچ أما تتنازلين عنها
أما تنطين ابنچ الهم، ومعروف الولد من يكبر يرجع الاهله الابوه.
ف يا بابا ليش متعبه نفسچ ومضيعه شبابچ على طفل آخرته الابوه
كزيت على اسناني
لو ادري اعضه بسنوني واخسر حياتي ما اسلم ابني البيت الباشا
ابوي يگدر يسوي كلشي ويگدر يربحني حتى القضية لأن هوَ
مو اقل منهم بمناصبه وفلوسه ومكانته المعروفه رب إلى خلى
كل شركة تروحلها صفا تنرفض بأمر منه مايگدر الهالشي.
بس اني ادري ليش جاي يسوي كل هذا يريدني اخضعله
رجعت الغرفتي وشعور الخذلان والانكسار محاوطني.
اتصلت على الشخص الوحيد الاستمد قوتي منه لو ما هوَ
اني اليوم ماتكون شخصيتي بهالشخصية تعب ويايَّ بين ماغيرني
هلا بأم السَند
حطيت ايدي على حلگي امنع شهكاتي تطلع بس ماگدرت
يريدون ياخذون ابني مني
شبيچ أبوية اهدئي منو يتجرأ ياخذ السَند من أمه
دزولي تبليغ من المحكمة بشار الكلب رافع قضية حضانه
هذا بشار مستعجل على رزقه
فدووة انصحنيي شسوييي اموووت إذا ياخذون ابني مني.
محد ياخذه منچ دامني اشم الهواء ويخسى كل شارب يحارب حرمة
شكراً ظافر
گتيلي عمه بعينك مو
ابتسمت بنص دموعي رغم وضعي إلى يبچي الصخر
محذرتك من كلمة عيني بس ما اتوب منها
ديله عيني مو زين مني واگولها الچ يولي دحگي هين البنوات
يموتن عليَّ من اگولهن عيني
بس لا تخرط انباري واحچي مثلنه لأن ما افهم عليك
يولي ايمتى تفهمين الله يصگعچ
صدك كلامك ابوي بس عرف بالأمانة اجه يموت
الحجي ربه الثاني الفلوس.
ظافر اني كشفت شغلة تخص رائد
تغيرت نبرة صوته لجديه وترك الملاطفه
رائد؟ شغلة شنو احچي
البارحة من أخذوا ابوي دورت على باجي نادية مالگيتها
و، حچيتله كلشي صار البارحة من الالف للياء
متأكدة من إلى شفتي
مثل مامتأكدة من اسمي
ضل ساكت الثواني گال
لعد هالباجي تعرف شي وساكتة عنه
اني وأنتَ متأكدين تعرف شغلات محد يعرفها
موت رائد مية بالمئة تعرف منو وراه
بذاك اليوم گالت ارجعي للعراق وراح تلگين اجوبتچ هناك
هذهِ ايمتى الكلام.
ماصار اهواي حبستها عندي بالغرفة وضغطت عليها بالكلام، ماحچت شي بس گالت اذا
تريدين اجوبه الاسئلتچ ارجعي هناك تلگينها.
يولي خاف تطلع متفقه ويا الحجي ودتلعب بعقلچ
ما اتوقع، ظافر باجي وراها اسرار محد يعرفهن غيرها
ماكو شي ينضم يجي يوم وينكت كلشي حتى سرنه
اني وياچ اله يوم وينفضح، مساعد الحجي الشخصي ومنبع أسراره
يشتغل ضده هوَ وبنته يولي ورب العرش ليگصبنه گصب اني وياچ
لذاك اليوم تتغير اهواي شغلات.
لا تتصرفين شي غلط انتظري اتصال مني اشوف موضوع بشار
سد الخط تمددت بمكاني عقلي يضرب أخماس ب اسداس.
سافرت بذاكرتي لليوم إلى ربطني ببشار وبكل عائلة الباشا
بشار ابن اهم رجال الأعمال إلى يشتغل وياهم ابوي شخص
حاله من حال ابوي واخوي عديم المشاعر والضمير زير النساء
حياته عبارة عن نسوان، شرب، تعاطي المخدرات
اتمرضت امي بمرض ما اله شفاء الكانسر اهوايَّ حاولنه بشفائها
بس للأسف چان منتشر وصاعد الدكاترة يأسوا من حالها.
ماقبل ابوي تبقى بالمستشفى جابها للبيت وكل شي تحتاجه وفره
جابلها ممرضة خاصة الها تهتم بيها إلى هيَّ شذى.
بس كل هذا چان اله مقابل والدفعه اني اما اقبل بزواجي من بشار
أما امي تبقى بدون أي رعاية واهتمام ضحيت بنفسي لأجلها ووافقت
بهذا الزواج والعذاب هنا صار عذابين عذاب امي إلى كل يوم
اشوفها المرض يعذب بيها وياكل بيها، وعذاب زواجي
الما اتوقع شفت بي يوم واحد حِلو ماحبيته البشار حتى شكله.
يوضح هوَ شگد انسان مشمئز للقرف والرحمه مسلوبه من وجهه.
أشرف: القرار الچ
وَهج: تساوومني بحياة امي؟
أشرف: زواجج بي ربح إلى بشغلي
وَهج: صفقة شغل تدمر حياتي لأجل شغلك، وإذا ماوافقت شيصير؟
امچ حتى من البيت اطلعها
هيچ تجازي امي؟ إلى تحملت كلشي منك
بابا هذهِ الحياة، واني امچ ما اكرها ما انكر عجبتني واتزوجتها رغم
چانت خدامة تشتغل ببيت صديقي طلعتها من مستنقعها التعبان.
ودخلتها لهذا القصر وخليتها تلعب بالفلوس وهيَّ مو بمستواي ولا يمي
اخذتها بس لان عجبتك ههههه والله كلامك يضحك بابا
صريح وياچ، وهسه گدامچ الوقت تفكرين بي وإذا كلش رفضتي اكو حل ثاني لأن مستحيل
اخسر فرصتي ويا بيت الباشا وما احط ايدي بأيديهم.
شنو الحل الثاني؟
انطيهم صفا
ضلت عيوني صافنه بي بدون ماترمش عقلي ضرب من كلامه
معقولة هذا اب يساوم ببناته ويخليهن صفقات شغل بينه وبين شركائه.
هم ذوله وصحاب النفوذ يضحون حتى باولادهم لأجل مصالحهم الشخصية
وبهذا اليوم انلزمت من الايد التوجعني ولوها لوي إلى من جهه
امي ومن جهه اختي، قبلت ادخل هاوية بيت الباشا وشفت
العذاب المضاعف إلى چنت اشوفه ببيت اهلي.
غصبًا عني سلمت نفسي البشار تهديداتهم چانت تتحكم بيَّ
بهذهِ الليلة سلبوا كلشي مني، مرت اشهر على زواجي منه
كلمة عذاب قليلة ماتوصف إلى عشته وياه سَطوَة بعد سَطوَة عشت.
وزاد هذا الشي من طلعت حامل بنص كلشي چان هذا الطفل
كفيل يخلي عيوني ترجع تضحك
بشار: هذاا الطفل تنزليييي مارريده
وَهج: واعي على نفسك بشار تريد اقتل طفل بعده ماشايف الدنيا
بشار: وعسااا لا شاافهاا ماااريد اطفال حذررتچ من الاول
لزمت أيده أحاول اي حاولت اخلي علاقتي تتحسن بي.
بس بكل مرة يثبتلي تفكيري غلط بأفعاله
وَهج: خلينه نبدي من جديد الخاطر طفلنه الراح يجي للدنيا
دفعني على الحايط بحركة سريعة خانگني.
وأنتِ مصدگة اخليي إلى بطنچ يجي
شهگت بالنفس صرت أبلعم الهواء انگطع عني ابتعد عني وگعت بالأرض اگح
الله ياخذك
اتخبل من كلامي لزمني من شعري يسحل بيَّ
مو زين قبلت بوحدة امهااا چانت خدامه
الخدامه إلى گلگم تعيروني بيها اشرف منكم يا انذال
فر وچهي براشدي من قوته احس جهة الضربه انشلت
منوووو الانذال بنت الكلب
خفت لا يسويلي شي ويأذي ابني التزمت الصمت خوفًا من هالشي.
طلع ودخلت امه تباوعلي بحقاره.
سعاد: وين كرامتچ باقيه ويا شخص مريض مثل ابني لو تكيفين
علي النومه وياه يسلتذ بعذابچ وفرحانه بهذا الشي
وَهج: كرامتي ويا كرامتچ شنو الاختلاف إلى بينه؟ الباشا حتى
ينام وحدة وهاجرج فلا تحچين بالكرامة وهيَّ بالاصل ماموجودة عندچ
نظرتلي بنظرات غل وحقد غمتني بايديها الاثنين وطلعت
جسمي كله يرتعش بسبب إلى صار كل فجر يدخل سكران
ويحاول يتقرب إلى بس اگدر اخلص نفسي مادري شلون.
كبرت بطني وكبر حبي لابني بس حتى بعد ما عرفوا ولد مافرحوا
وكرهوا قبل لا يجي للدنيا وحاولوا أكثر من مرة يتخلصون منه
بيوم چنت نايمة مثل العادة لأن صرت بشهري والثكل زاد حتى
ما اتذكر اتنسيت بشي من المصايب والقلق والخوف النفسي
الي عشت بيهن چان عندي المهم احمي ابني أنرفعت من سريري
واني نايمة فتحت عيوني شفته بشار دب الرعُب بداخلي
جان وضعه مو طبيعي مو مثل كل يوم ماشارب هالمرة بلعت ريگ بخوف.
وَهج: بشار.
خفض راسه سحب نفس من رگبتي بعدت راسي عنه
حطيت ايدي على رگبتي مانعته يتقرب إلى ولو بلمسه
بشار: شبيچ
شنو شبيه أنتَ شبيك؟ شنو هالحركات
ماشارب
حتى لو لااا تتقرب الي
تكرهيني
أكثر مما تتوقع ولو يرجع بيَّ الوگت اموت نفسي وما اقبل بيك
عبالي اتصير ادمي واحاول اخليك تمشي على الطريق الصح ونطلع
من مستنقع اهلي واهلك بس أنتَ مثل طينتهم ماتتغير
انجبرت عليچ مثل ما انجبرتي عليَّ
صكيت على اسناني ضربته بقوة بصدره.
چاا ليشششش اتقرربتليييي وكسرتنيييي لووو غريزتك الحيوانيه ماگدرتلهااا
نزلت دموعي اصعب شي يمر بي الإنسان من ينكسر من أهله
ومحد يحس بي ولا يفهمه من بعد رائد ذلونه وكسرونه كلنه
رائد چان الوحيد الحامينه منهم والساندين نفسنه بي
هذا الطفل ما.
عطت بي بصوت عالي ابچي
لااا ترريده انيييي اربييي ابنييي هذا
بس تولدين نطلگ اني بعد ما اگدر ابقيچ يمي أكثر
رفعت عيونه لعيونه بارد حتى بنظراته وحچاها بكل سهولة
تطلگني؟
أي ما اريدچ وَهج اني اريد اتزوج الانسانه إلى احبها أنتِ انجبرت عليچ
وين اكو واحد يحب ويوميا ويا وحدة
صح يوميا ويا وحدة بس گلبي لوحدة الباقيات مجرد نزوه
ما اريد منك اي شي بس ابني وياريت تنتهي هالصفقة إلى صارت
نزلني للأرض وگف يلبس بقميصه راد يطلع واتوقف على كلامي
أتذكر شي واحد ماراح اسامحك حالك من حالهم استغليتوا ضعفي
بأبشع الطرق أنتَ واهلك واهلي كسرة شبابي برگابكم.
ابتسم بعدم اهتمام.
بشار: مامنتظر منچ سماح لأن الله بكبره ماراح يسامحني
علي افعالي فما راح تتوقف حياتي على مسامحتچ
طلع مجرد سد الباب دخلت بحالة انهيار ملخت روحي تملخ
كرهت نفسي وكرهت كلشي عشته كرهت اليوم إلى صرت بي
اتمنيت لو امي ماجايبتني لهلدنيا تمنيت ميته واني بطنها ولا جايه
لهالدنيا وشايفه ضيمها اتمنيت الله ياخذ أمانته بهاليلة واخلص وارتاح
نزلت عيوني على السرير جمدت بمكاني من شفت نزيف صار عندي د.
وبطني سچاچين تگطع بيها لزمت بطني خايفة
ماعندي أحد استنجد بي الكل هنا يتمنى موتي وموت طفلي
اليوم قبل باجر سحبت جهازي اتصل على اهلي
وَهج: الو بابا فدوة تعال مادري شبيه
أشرف: شبيچ يعني روحي بابا روحي عندي شغل مهم
سده بوچهي رجعت اتصل بي استنجد حضرني
الالم صار ينخل بروحي نخل اتصلت ب عيسى لعل هوَ اكسر خاطره
ويجيني فتح خط وصوت الموسيقى العالي والضحك واضح وين نزلت دموعي
عيسى تسمعني.
الووو. هاااا ماجايي اسمع بعدين بعدين اتصلوا
هم سده بوچهي واخ من ويل الحيره الصرت بيها لو والده يتيمه
ولا اعيش بنص هيچ أهل وين اروح وين انطي وجهي
جاي اموت على البطيئ شهگت شهگة مكتومة ممزوجة بخوف
من صار الألم اقوا وگع الجهاز مني طلعت فتحت الباب
أمشي والنزيف أخذني لازمه بطني ودموعي تارسه وجهي.
دگيت الباب على سعاد اجاني صوتها
وَهج: سعاد فدوة ساعديني جاي أنزف راح اموت اخخخ.
وگعت بالأرض ما اگدر حتى اوگف رفعت ايديَّ تهتز مو ترجف
جريت نفس طويل ضربت على بابها أكثر من مرة فتحت بابها
توسعت عيونها على منظري الممر صار كله دم مني بچيت اتوسللها
ابوووس ايدچ ساعديني ابني راح يمووت
دنگت وملامحه بين عليهن الخوف من منظري اليرُعب
ركضت بدلت وطلعت تركض ما ادري وين لهنا وطاقتي خلصت
حاولت اقوي نفسي أكثر بس الغواش بدأ يحتل عيوني
رجعت راسي على الباب والدنيا تفتر بيَّ غمضت فاقدة.
ما ادري شنو إلى صار بعدها، فتحت عيوني بمكان غير عن المكان إلى چنت بي
الكانولا بايدي مشكلة نزلت انظاري على بطني فارغة عيوني تفتر
بالغرفة شفت صفا واگفة يم الشباك
وَهج: ص صفاا
انتبهت عليَّ اجتني تتسائل بقلق
صفا: عيونهاا. تحسين بألم اصيحلچ الدكتورة
حاولت اگعد بس ما گدرت جسمي منتهي والم ببطني حچيت بصوت خافت
وَهج: ابني وين
صفا: لا تخافين بس شويَّ يحتاج راحة
لزمتها أيدها ودموعي اتجمعت بعيوني.
لا تچذبين عليَّ گولي وين ابني
والله مامچذبه نزفتي اهوايَّ مادري شلون عشتي أنتِ وهالطفل
اتلاحگوگم بالدقائق الأخيرة واثنينكم تعبانين تحتاجون راحه
شسميتوا
شسميناه؟ قصدچ شسميتي لأن محد وصل للمستشفى غيري
المهم سميته سَند مثل ما جنتي رايده، وسعاد رجعت البيتها
بس وصلتچ للمستشفى، الزركه بنت الازرك ولا كأنما حفيدهم
ماهتميت بس ما انكر سعاد لأول مرة بحياتها تسويلي شي زين وماراح أنساه الها.
مر اسبوع كامل اني بالمستشفى بسبب المضاعفات الصارت
عندي وابني بعدني ماشايفته وماوصلي لا اب ولا اخ ولا زوجي
ولا حتى أهله طول الاسبوع چانوا صفا وظافر إلى يگول
دزني ابوچ اشوف طلباتكم وما ادري صدك أو چذب ظافر يشتغل ويا ابوي من زمان أحن واحسن علينه
من اهلنه للأسف صرنه بوگت الغريب يحن عليك اكثر من اهلك.
اسبوع بكل يوم عشته وحدي گدرت اگوم على حيلي
وصار الوگت إلى يجيبولي ابني گالوا وضعه متحسن عن قبل.
چانت مشاعري متضاربه مختلطه ما اگدر اشرح عنها بس
شعور السعادة احتلني من دخلوا قدموا إلى وأخذته بين ايديَّ
گلبي خق بشدة مجرد لمست وجناته الترفه سحبت نفس نزلت دموعي
وضحكت عيوني من بعد تعب وعذاب ضحكت بفرح
صادق مو تمثيل هالمرة رفعت راسي الظافر وصفا الواگفين يباوعولي ومبتسمين على ضحكتي أشرتلهم عليَّ
وهَج: راح يكون بيوم من الايام سَند الامه.
فزيت من الماضي راجعه الواقعي على صوت فتحة الباب عرفته هوَ.
بقيت مغمضه عيوني امثل النوم احس بحركتة صعد يمي
يتلمس بوجهي ودموعي النازله يمسح بيهن بايده الكلها ترافه
سَند: ماما
وَهج: قرة عيني
سَند: أنتِ ليش دائمًا تبچين
وَهج: الحياة قاسية
فتح ايدي نام عليها وحضني
تبچين لأن خاله صفصف مجروحه
اممم اي ما احب تنجرح
اني صرت ما احب خالو هوَ بس يضرب بيچن ما احبه بعد
لميته بحضني شديت عليّ لو بيدي اضمه بنص روحي ولا انطي الاحد
نروح انشوف خاله شلون صارت.
هز براسه، نزلت شلته وطلعت بي الغرفة صفا فتحت الباب
عليها چانت راجعه لوعيها وادري بظافر ماقبل نأخذها للمستشفى
لأن راح يصير سين وجيم بالموضوع چانت راجعه لوعيها
راسها ملفوف بضماد واثار الضرب بوجها
وَهج: شلون صرتي صفصف
قلبت عيونها بملل وحركتها عايقتها لأن متأذيه
صفا: عبالچ اسكتله والله بس اصير زينه اله ارجعها اله
شكو ضربچ ممكن توضحين
عيسى ابو خيسة شلون يبرز رجولته وعضلاته بهذهِ السوالف.
بقيت اباوعلها انتظرها تحچي من فهمتني قلبت للجد.
صفا: ضل يغلط بدون سبب وما سكتتله
وَهج: أنتِ مو رحتي تنامين شجابچ عليّ
دخل ياخذ شاحنتي گتله مو عندك شاحنه ضل يغلط ويسب
ما گدرت اسكتله واتعاركنه اخخ الله يكسر ايدك ياعيسى ابو خيسة
سبب كلش تافه هذا اخوچ ما ادري شمدد بعقله
مطي
كافي ارتاحي وحاولي السانچ اتلزمي مو كلشي تردين عليَّ
والله تعبتيني من هالوضع لچ جاي تتأذين إذا بكل كلمة تردين عليهم.
تدرين بيهم ماعندهم شي اسمه تفاهم ورحمه يدفنونچ وأنتِ عايشة
تعال خاله سَند هذهِ امك بيها جناني من عيسى ابو خيسة
راحلها سَند يضحك اتمدد بصفها هزيت بايدي وعفتهم ماتاخذ الحچي.
عبالها طولة اللسان دائمًا مفيدة مرات اتصير أذية الصاحبها
مر يومين وسمعت حديث بين عيسى وابوي انُ داخلين بشغل
وهالشغل راح يربحهم ولليوم يدورون على الأمانة إلى خلتهم
يخافون حتى من دكة الباب ملامح خوفهم وارتعابهم ينعشني.
دخلت الغرفة عيسى ادور على الملف إلى يخص هذا الشغل
عيب عليَّ اخليكم تربحون هذا الشغل واتفرحون اصبرولي بس.
بقيت ادور بكل حذر علمود ما يحس أحد داخل الغرفته
بعد تعب لگيته بس انثولت من نسيت جهازي صعدت الغرفتي
فوگ اخذت جهازي الخازنه بي كلشي بس اكيد ما اصير قشمر وغشيمه ناسخه كلشي لعدة نسخ
كل سوالفهم إلى تعلمتها منهم اليوم اني اطبقها عليهم
مو يگولون النساء ناقصات عقل وجاهلات خلي يشوفون.
شنو ممكن قادرات يسون بعقلهن إلى يستهزئون بي
ومافاهمين معنى الجملة الحقيقية صورت كلشي بي
ممكن يگدر يفيدني رجعت الغرفة عيسى ارجع الملف حطيته
بمكانه ودرت اريد اطلع واتصنمت رجليَّ عن الحركة من الباب انفتح.