رواية وتيرة الأعرج للكاتبة حوراء السعيدي الفصل الرابع والخمسون والأخير
غياهب: تمام اهدأ اهدأ.
أتقربت اله بخوف و هوَ حتى أنفاسه متضاربة سريعة، صدره يعلى و ينصى لزمته من أيده خايفة عليه.
حبيبي ارسلان.
رجع دفعني مثل الشخص الفاقد اللي مو بوعيه.
ارسلان: لاااااا تلزمينييي گتلجج عوووفينييي.
بقيت بمكاني جامدة و صافنة شنو سبب حالته اليوم؟ جلسته اليوم معقولة
بسببها، بقيت خايفة وضعه قلقني و هوَ هنا كُل قطعة بالصالة سواها.
وصل و رماد، كسر كلشي بيها اخذت زاوية گعدت بيها انتظره يفرغ اللي بداخله
صوت صياحه يلوع گلبي قبل لا يلوع بگلبه.
وگف يسحب بالنفس بصعوبة يمسح بدموعه الصارت تنزل، دار وجهه شافني
حاضنه رجليَّ الصدري، و دموعي اخذه مسارها، طبك حواجبه و بعيونه نظرات
أستغراب كأنما چان بعالم غير عن عالمنا فاصل عنه و هسه صحى على نفسه
أسرع بخطواته اتجاهي كنبص گدامي لزم ايديَّ و يتفحصني بنظراته سئل بنبرة خوف.
أذيتج؟ غياااهب تسمعيني احچي ويايَّ أذينج انااا سووويتلج شيء حاچينييي.
صوته يرجف رجيف يدل على خوفه هزيت براسي.
غياهب: لا.
ضمني الحضنه يبوس براسي بشعوائية و هوَ يگول.
اسف اسف غياهب چان غلط مني ارجع للبيت لا تزعلين مني مااا تنعاد و عيونج الغالية عندي.
رفعت راسي اله و گعت دمعة من عينه على خدي غمض عيونه.
جنت بالجلسة؟
اممم.
نهضت من مكاني و شعري مبلل مالحگت أنشفه لو اشيله بالمنشفة من سمعته يكسر.
وگفت و هوَ بعده گاعد نفس الگعدة بضعف و تعب مديت ايدي أطمن بي و أشجعه.
أنطيني أيدك.
بدون ما يحچي او يتردد أنطاني أيده، نهض من مكانه اخذته و صعدنا فوگ وگفته بباب الحمام.
أدخل اخذ حمام دافي علمود ترتاح و نتغده سوا.
ما اكلتي؟
لا انتظرتك.
هز براسه و دخل الحمام، رحت للغرفة طلعت اله ملابس، لزمت بالباب
والرجفة بعدها بجسمي و الهبطة شوگت نخلص من كل هذا العذاب؟
دگيت باب الحمام عليه انطيته ملابسه ورجعت نزلت اجهز بالاكل بين ماكملت
شفته دخل للصالة واجه يمي بوجهه علامات الاحراج مني.
ارسلان: وين المكناسة؟
غياهب: شتسوي بيها؟
سويت الصالة مزبلة.
ابتسمت بوجهه.
فدوة الك عوفها اني انظفها بس نكمل غده.
لا انا انظفها بس انطيني المكناسة.
رفض اني اللي انظفها هزيت راسي بعد عجز باقناعه.
حطيتها بالمخزن فوگ.
طلع بدون ما يحچي شيء نزلها من فوگ و دخل للصالة اسمعه شغلها.
رحت قريبة منه اشوفه لم الكزاز الموجود و طلع ذبة بالحاوية نظّف الصالة كلها
بس صارت فارغة لان أغراضها كسرهن صحتله علمود يتغده.
گعدنا على سفرة الاكل عيوني تراقبه بس يصفن ملامحه ذبلانة رفع راسه الي.
ارسلان: باجر اروح اشتري غراض للصالة صارت مادري شلونها.
غياهب: براحتك.
لزم ايدي بدفو ايده و أردف بنبرة هادئة و حنونة منه.
انتِ أحن رزق رب العالمين رزقني بي.
أبتسمت الكلامه، ما اكل الا القليل و گال راح ينام، اني هم شبعت
الاكل بقى بمكانه كلمن اكل شوية، اندگ جرس البيت سحبت المنشفة لفيت
شعري بيها طلعت افتح الباب لان هو أكيد نام، اسمع صوت حنين اتدردم ويا ابنها
فتحت الباب ابتسمت اريد احجي و شل لساني منظر حنين اللي چان متغير
كله زادت ابتسامتي على وجهي و هيَّ مقابلتني بتغيرها الجديد سبحان اللي مغير الاحوال.
غياهب: اتحجبتي؟
حنين.
أول مرة بحياتي أدخل بحالة تفكير عميقة الهلدرحة قبل لا أخطي هالخطوة
من زمان أبالي خصوصًا بعد كلام درغام ويايَّ بكل مرة عن الحجاب
و اللبس، لبسي ماچان يناسب الحجاب و بعد گدر يرسخ الفكرة بداخلي بنجاح
و أقتناع وچانت أول نقطة خطيتها هيَّ غيرت لبسي و بديت ألبس كله طويل ما يظهر شيء مني و لا يبين مفاتن جسمي.
مرتاحة و اني دا اسوي هالشي و خطيت بخطوة الحجاب چان عندي.
خوف ما ألتزم بي و ما أحترمه ما ترهم ألبسه و أطلع شعري اما البسه
و ما اطلع و لا خصلة من شعري أما أبقى مثل ما اني و هدفي چان غير
و گدرت انجح، من رجعنا من اهلي بالليل الحسن نايم خذاه ابوه نومه بمكانه
بدلت و غيرت ملابسي اتمددت بصف درغام اللي گاعد و عيونه بالجهاز
يكتب و يضحك مديت راسي أباوع ما سمحلي أشوق شي رفع الجهاز مانع عيوني اتشوف شي.
حنين: هاااا شعندددك؟
درغام: احچي ويا مُجاهد بلائي.
اي خليني أشوف شدا اتحجون.
ما ايصير شي خاص ابوية.
و شنو هذا الشي الخاااص خاااف نسوووان؟
رفع حاجبه يباوعلي بتك عين.
شتدرين بيَّ؟
أدري بالضباط يموووتووون بالثلاثينات.
الله و ايدج عندج وحدة ثلاثينية.
گرصته بزنده بكل قوووتي محتررگ گلبي و افرگ بالگرصة فررگ شهگت
من أندفرت و وگعت من الچرباية لزمت رجلي فاتحة عيوني و هوَ لازم مكان الگرصة خازرني.
ووگعتنييي اخخخ رجلي.
شكووو تگررصيننن.
والله اني أعلمك دشوووف شسوي هسه.
نهضت من مكاني اعرج من رجلي رجعت للچرباية جرريته من شعره
لان من ينزل من دوامه مايتقربله فترة اجازته قبل لا يلتحق بيوم يخففه
سحلتههه و هوَ لززم شعررري صرخت بخفوووت.
اخخخ ووولك شعرررري.
عووووفي شعرررري.
مااا.
چاااا حتى انااا ما أعوووفه.
والله الم ملابسييي و أروووح الاهلي.
و شتگوولين بله الاهلج؟
اگلهم يراسل بالنسوووان و مايخليني أشوف و حجته مُجاهد مگرووود هالولد بكلشي حاطينه و مطيحينه براسه.
علي هذا جذبج ربج يحتاارر وين يخليج وياا ابو لهب لووو حرملة.
دعوووووفلي شعررري.
من تعوفين شعررري اعووفنه.
ولك عوووفت رقبتي.
عوفي و اعوفج.
الااا اشكيك الابوية.
شلووون أرجف عاد.
المزنجررر.
ام چفصة.
يمةةة رقبتي ضربها تشنج.
راح أعوفج لان كسرتي خاطري.
عاف شعري و اني نفس الشي عفته، لزمت راسي خزرته ضربته بنص بطنه شو هذا ما أهتز؟ ضحك مستهزأ.
ضربتج فاهية مثلج.
شو بطنك صلبة؟
صلبة لو سائلة.
نياهاهاهاااي.
صرتيلي رماد الثاني.
خليني أشوف شتحچي انتَ و مُجاهد.
بشرط.
أي شنو؟
ببوسة.
أهوووو.
وجعوووو.
شبيكك الفضول موتني خنگنيي يمكن لو حامل چان حتى طلوگ صار عندي.
طبقي الشرط و انطيج الجهاز و صاحب الجهاز.
مااا ارريدده بسيطة.
طلعت من الغرفة أمشي نوب رجلي توجعني المزنجر حتى شقاه مال مخابيل ديلا
علساس مرته شلونها، فرشت اسناني غسلت وجهي بغسول ليلي و رطبته
رجعت للغرفة چان بعده گاعد و عيونه مدمعة من الضحك وجهه صايررر.
احمررر دم و بس يضحك، و الفضول دمررني صرت احووص حوووص
بس اريد أعرف شنو دايسولفون، نمت بهدوء و هوَ مندمج صرت أتقرب على
كيفي بينما هوَ ماحاس عليَّ، شوية شوية بدون ما يحس و الثواني
معدودة سحبت الجهاز من ايده بسرعة ولفيت روحي بالغطى حطيته
جواي و هوَ صار فوگايه يريد ياخذه مني.
درغام: ولللج انطينياااه.
حچيت و اني مجعوصة جواه.
حنين: اشووف بالاول شتحچون يله انطي.
شنووو هالتصرف حنين؟ شبيج طفلة.
هه تذكر نفسك لو ناسي؟ قبل لا جنت خطيبي و لا زوجي وتاخذ جهازي.
غيررر جنت اخاف عليج و اغاررر.
و اني هم هسه أخاف عليك ابو الحسن.
و منيننن؟
خاف وحدة ثولاثينية او اربعينية تقطك.
عكمش وجهه بقرف.
شهلل اللعبان النفس.
خنگنتنييي وخرررر يمةة شثگلك.
عيارة زايدة لا تتعايرين.
گوا دفعته عني اختنگت ايدي على صدري شو هذا نزع التشيرت و نام على بطنه و حچى بنبرة تهديد.
دخلي أشوف يطلع شي من الراح تقري الا أشگ حلگج ام الحسن.
خنست فتحت الجهاز أعرف الرمز مالته و هوَ هم يعرف رمز جهازي
بس و لا مرة اجه فتش جهازي من اتزوجنا لليوم قبل لا اتزوج چان ياخذه بدافع
الغيرة و الخوف لان عندي فطارية زايدة، دخلت على محادثته هوَ و مُجاهد صدگ
حاچي وياه اتربعت بگعدتي على محادثتهم اقرأ و فاتحة حلگي من الصدمة فطست ضحك.
مُجاهد: اگلك ما اريد أفكر بيهاا جاي أخون صاحبي و الكفل زينب مو بيدي وين ما اروح تصير گدامي.
راد عليه درغام.
درغام: أرسلان لو دره تفكر بأخته مايسوي شي بس يسويك وصلتين بالنص
وصلة يدزها العشيرتك و الثانية يدزها الامك هدية.
لاااا تظل تمسلت مو جاي اشكيلك همي.
ابن عمي شيال همي و.
خايبب شوو ولي صوچي احچي وياا واحد مثلك زمال.
يلا خوية لا تضوج نخطبهاا الك شبيك چنك بنت بيت مستورة و مامكسورة و بعدك بالباكيت وين يلگون مثلك.
انعللل والديك درغام كلللب ابن الكلب.
چاا اذا ماگلت الابوي عليك، اگله اللي رحتله و اتعنيتله برجليك يسب بيك.
راح اخلي امي تروح تخطبها شتگول احسن ما ابقى افكر بيها و حرام عليَّ و هم اخت صاحبي.
اتوكل و انا بظهرك ضلعي.
ما ادري شبيه هالبنيه خلتني اسوي سوالف تخزي والكفل زينب.
ليش شمسوي ولك؟
غير خذيت رقمها من جهاز ارسلان وظليت اتصل بيها بس كون اسمع صوتها عبالك
مخدرات اريد بس اسمع صوتها و اسكن روحي بالاخير لزگتني بحظر شگتني و شگت ابوي و هوَ بگبره.
الله يطيح حظك شلون تتصل عليها بلكت انطت رقمك الاخوانها لو الخالها و عرفوك يااا اثول.
مو گتلك سوالفي صارت تخزي خوية و اريد اتلاحگ روحي.
انتَ وينك وين النسوان شجابك شصخمك.
شمدريني يخوي ساعة السودة الرحت بيها للنجف وشفتها.
چا انتَ ما شايفها.
مرة لمحتها من بعيد بس ماركزت و لا اهتميت.
اهااا هاي من چنت ثكيل.
تررا لحد الان انا ثكيل.
من دبش حتى رقم البنيه ماخذه.
ابنن النعااال شلوون اتگول گدام ارسلان غارق بالبحر الازرق وولك
هذا الاعرج يلگطهاا بسرعة متاكد فهم تقصد بنيه بس لو يدري اخته يشگني انا وياك.
گدامن؟
ولك گدام ارسلان.
هوَ لو فاهم يزتنا للنجف انا وياك بصف أبوي.
بقيت صافنة بتعجب و تفاجئ يعني مُجاهد يحب ناز؟ والله و وگعت يا كاره النساء
أجت الجابت راسك، و ناز تلوگله بنيه تخبل و دمها محبوب بس ما ادري اذا اهلها.
و هيَّ يقبلون او لا، رجعت الجهاز و احس فضولي ارتوى أرتاحيت والله.
احنا الفضوليين مشكلة مشكلتنا نموت اذا ما نعرف اللي نريده، حطيت الجهاز يم درغام حچى و هوَ مغمص عيونه.
درغام: أرتاحيتي؟
حنين: كلللششش.
شگلت انا زين؟
شگللت؟
حرف اذا يطلع شسوي؟
شتسوي شو ما أتدكر ذكرني.
راح اگووووملج.
جرب أتسوي شي أخابر ابوية.
أستغفرلله.
نام عيني نام.
گلب على ظهره سحبني الحضنه ضرب راسي بخفة.
نامي يلاا.
عود صُدگ مُجاهد معجب بناز ههههههههههه.
حالي من حالج اتفاجئت بالاول بس من حجيت وياه فهمت منه السالفة.
ليش خايف يخطبها؟
يگول خاف اهلها ماينطوها، ما ادري بعد راح يدز امه الهم بعد فترة تخطبها.
هسه اريد افهم هوَ يحبها لو معجب بيها؟ ترا أكو فرق.
يگول دخلت گلبي هوَ بدأ يحبها بس ما فاهم هالنقطة لان قبل ما داخل بعلاقات.
شوف حبيبي اني برأيي قبل لا يدز امه تگعد انتَ وياه مرة ثانية و تفهم.
مشاعره لان الاعجاب ممكن فترة و يروح اما الحب يختلف.
خوش باحر اروحله و اگعد وياه.
لزمته من خدوده.
عفية بابو الحسن المزنجر.
انچبي.
درغام؟
عيونه.
أريد أتحجب.
چان مغمض عيونه بهل اللحظة بسرعة فتحهم يباوعلي بأستغراب طبك حواجبه بعدم فهم.
شتريدين؟
أتحجب شبيك؟
گعد على حيله يباوعلي بعيون طغت عليهن الفرحة.
عليج علي؟
وعلي.
من كل قناعة؟ مو تلبسي و بعد يومين نزعتي و تگولين ماعرفتله لو خنگني لان احنا ما نلعب أبوية.
لا والله كلش مقتنعة و حابته قراري نهائي وراح يتغير كلشي من البسه و ما راح افكر اقلل من قيمته.
سحب وجهي يبوس بي بعشوائيية فرحان اكثر مني ضحكت على حركاته.
باجر انروح نشتريلج كلشي تحتاجي.
ما يحتاج أشتريت.
ابتعد عني و ابتسامته مازالت بعدها على وجهه.
شوگت اشتريتي.
من كم يوم رحت ويا انوار من گتلك راح اطلع وياها قبل لا تجي من دوامك.
هااا اي ذكرت بس ماگتيلي اشتريتي.
سبرايز على گولت نسيبي.
صاح يضحك.
الااا سبرايزات نسيبج تشلل الواحد و تخلي يصفن مثل المطي.
ضحكت رجعنا نمنا الثاني يوم بدلت و هالمرة غير عن قبل باوعت الدرغام ارمش بعيوني اضحك.
حنين: شلوني بربك؟
درغام: تشگين شگ أوف أوف هسه أرتاحيت من تغير كلشي.
ليش من قبل جنت رايدني اتحجب؟
بصراحة اي بس ماحبيت اضغط عليج.
ابتسمت مشيتله لزمت ايده بستها بسرعة سحبها مني.
شجااي اتسوينن ابوية.
شكراً لان خليتني اخطي هيج خطوة و متاكدة مستحيل اتندم بيوم.
الهدايا من الله.
لزم ايدي و طلعنا سوا، خالي و خالتي گاعدين وبحضن خالتي الحسن توكل بي من شافوني صفنوا متفاجئين.
جابر: اللهم صلِ على محمد وآل محمد.
جوهرة: تخبلين بالحجاب.
زادت سعادتي بكلامهم بوست الحسن.
حنين: خليك عاقل ماما لا تشلع گلب بيبي تمام.
اجه درغام ظل يبوس بي اتريگنا وياهم وطلعنا يوصلني للدوام بنص الطريق گتله.
شوگت تشتريلي سيارة درغام مو حالة هاي هسه مو غياهب عندها.
علمود الگاج داخلة بوسط الحايط.
أعرف أسوق ترا.
يحتاج بعد تتعلمين.
ماعليه والله اني اريد سيارة العندهن سيارات مو احسن مني.
لزم ايدي
و اني برطمت صدگ ضجت صارلي شگد ألح على سيارة ورافض يخاف عليَّ.
لا تضوجين هايهية نشتريلج سيارة و هديتي الج بمناسبة اتحجبتي.
درت وجهي اله فرحانة.
احلف؟ خاف تضحك عليَّ؟
وعلي، نروح الخال ارسلان للمعرض و نشتري منه سيارة خوش عنده سيارات.
احبك.
صارت مصلحتج يمي صرتي تحبيني.
بعد احنا البشر وره مصلحتنا.
ضحك ظل يسولف ويايَّ و يوصي بيَّ هاي دائماً هيج أعترف اني وياه عندنا
خيط رعونية بس من توصل للصدگ نصير عقال و واحد ينصح الثاني
وصلني للمستشفى، نزلت ودعته گاعدة امشي الداخل المستشفى و استوقفني
صوت رجال درت وجهي جان شخص أحد الممرضيم بالمستشفى صارت عيوني
علي درغام بعده واگف و يباوعلنا بلعت العافية لا ينزل و يطربك الدنيا علينا.
حنين: اتفضل.
دكتورة سهام طالبتج گالت اذا شفتها خليها تجي و اعتذر على وقفني وياج هنا خوية بس لان طالع خارج المستشفى.
ما صار شي شي أتشكرك هسه أشوفها.
راح مكمل طريقة ودرغام بعده على وگفته داخل سيارته أشرتله بأيدي
يروح شغل سيارته و مشى دگ جهازي بنفس اللحظة چان هوَ عرفته راح يتصل جاوبته.
حنين: هستوني نزلت يمك.
درغام: احم. هذا الچان الواگف وياج منو؟
ممرض.
أهاا و شيريد.
گال دكتورة طالبتني مكلفته بحال شافني يبلغني و حتى من يحچي گال خوية و راح الرجال.
ها خوش انتبهي النفسج.
انتَ بعد.
سديته منه دخلت للمستشفى اتلگتني انوار كالعادة الضحكة مرسومة على وجهه حضنتني قوي و فرحانة.
وجع خنگتيني.
انوار: شهل الجمااال يخبللل عليج الحجاب.
حبيبتي انتِ إلى تخبلين شكراً بس شنو هاي فرحتج بس لان أتحجبت؟
لِچ لا عندي خبر ثاني.
خير ان شاء الله؟
عيونها تلمع لمع بفرحتهن و هيَّ تگول.
اني حااامل.
حضنتها اضحك.
اووووي فدوة للي راح يصير ماما مُبارك يا عيني.
كللش كلشش فرررحانة.
تستاهلين كل الخير.
بدينا بشغلنا و فرحانين بس انكسرت فرحتي من أتوفت مريضة عندنا
من كم يوم خضعت العملية و نجحت بس صارت عندها مضاعفات لان عندها كم مرض
مُزمن لليوم من يتوفه مريض اتأثر و اكتئاب يضربني و يگلك جماعة الطبية
لازم گلوبهم قوية بس ما اگدر من أشوف اهل المريض مكسورين اتذكر كسرتنا من خسرنا لارين.
انوار: اليوم اني عازمتج على الغدة.
حنين: مالي نفس.
يعني لشوگت تبقين هيج تتأثرين من يتوفه مريض.
قابل بيدي انقهر اني بشر عندي ضمير و احساس و مشاعر مو حايط و ماتهزنب مشاعر الناس و اصواتهم و هم يبچون.
نزلت دموعي حضنتني.
فدوة اروح الگلبج الطيب و الحنون.
أخذتني گوا اتغدينا صدگ مالي خلگ بس ماحبيت اكسر فرحتها بحملها
خلص وقت الدوام طلعت لگيت زوجي واگفلي بصف سيارته مشيت اله.
حنين: لو مخلي السائق يجي.
درغام: گايلج من انا هنا انا اللي اجي اخذج و ارجعج و اذا ماموجود تروحين وياه.
رجعنا للبيت قررت افاجئ غياهب هيَّ قبل هم شجعتني من سولفتلها.
اليوم اروح الغياهب.
روحي انتِ و انا عندي شغل أكمله واجي وراج.
متفقين لعد.
ما نمت رتبت شغلي و كملته للعصر كلش بدلت و اخذت الحسن رحت البيت
غياهب مشينا مشي لازمة ابني من ايده أعلمه يمشي باوعت الباب اهلي
مسدود وسيارته بابا ماموجودة، دگيت جرس بيت غياهب فتحت الباب.
و علامات الصدمة بانت بمحلامها ابتسمت و هيَّ تسئلني اتحجبتي؟
حنين: اييي.
حضنتني تتباركلي دخلنا جوا وهيَّ أخذت الحسن مني چان البيت مبين مسويتله
تعزيلة ريحة النظاافة أتعط بي و لو ما اتفاجئ اختي مهووسة بالنظافة
گعدنا بالصالة باوعتلها وگعت منشفة شعرها بس ما امشط ناشف.
ليش شعرج ما امشط.
رفعت عيونها باتجاه الدرج ورجعت باوعتلي.
غياهب: مالحگت اليوم چانت جلسة عند ارسلان رجع متأذي منها كسر الصالة تكسر منهاررر.
يلا فدوة المهم تخلصون من اللي داتمرون بي و هاي طبيعة العلاج اتحملي وياه.
اتحمل اني بس اليوم متت من خوفي عليه.
الله كريم.
مسحت دموعها مردت گلبي اتسولف وهيَّ مقهورة، الحسن بحضنها
ظل يباوعلها مبرطم يريد يبجي هيَّ انتبهت عليه ضحكتله بنص دموعها ضحك وياها من شافها ضحكت.
غياهب: حبيب خالة فدوة الهل العيون.
اليوم عزمنا نفسنا يمكم اني و درغام.
هلا بيكم عيوني.
نزل ارسلان من فوگ شايل بنته يمكن مايدري احنا هنا لان اني و غياهب
نحچي بصوت ناصي بس التعب واضح بي، ابتسم بوجهي.
ارسلان: هلا ب أم روح الحلوة.
حنين: هلا بيك نسيبي.
شلونج.
الحمدلله، شو انطوني سيلي.
انطانياها اباوعلها ولا اشبه امها وابوها مثل ماگالت غياهب قبل حسب
وصف ارسلان تشبه امه لعد امه الله يرحمها شگد چانت حلوة، سيلي حيل حلوة بس تتنعوص من هسه ظلت تبجي.
حنين: شوو هاكم بنتكم هاي من هسه تتنعوص علينا على كيفج داده هسه شسوينالج هيَّ بوسة.
ارسلان: بنتي رقيقة على امها.
خوية مع احترامي ألك سالفتك ماراهمة اختي منيلها الرقة.
غياهب: مخليتها الج تلحگيني انتِ خيوس.
صرت نادرة من اتزوجت اكوي ملابس و انظف البيت و اغسل مواعين و مهتمة بعائلتي.
بالچاي مالتج.
بول البعير قصدج؟
تعلمي وللج شتسوالج ذاك اليوم خالي نصب عليج فشلتينا هسه هوَ چاي ماعرفتيله؟
ارسلان: عوفيها غياهب هسه قابل شي مهم.
غياهب: طبعاً مهم ابو سيرين باجر عكبة خالة جوهرة تطلع لفد مكان يجيهم
خطار مفاجئ و هيَّ ماموجودة غير جنتها بمكانها يمكن زوجها حب يعزم
اصدقائه غير هيَّ تقوم بالواجب و حنين كبرت مو مثل قبل چانت ذابة اتكالها عليَّ و على ابوية لا هسه هيَّ زوجة وچنه و ام.
امم صح تتعلم ان شاء الله شاطرة هيَّ.
باوعتلي ادري بيها ليش تحچي هيج ماتريدني انحط بمواقف محرجة گدام أحد.
غياهب: علمودج احجي اني صغيرونتي ذاك اليوم لان خوالج ويعرفونج
مرت بضحك بس اتخيلي يصير الموقف ويا ناس غربة.
حنين: اي خوش راح اطلع واتعلم من اليوتيوب او اخلي خالة تعلمني.
هزت براسها مبتسمتلي نهضت من مكانها.
راح اسوي شعري و اغير ملابسي خاف يجي درغام.
صعدت الغرفتها بقينا اني و ارسلان و الاطفال عيونه مانشالت من بنته رفع راسه شافني مركزة عليهم.
ارسلان: أخاف عليها من الهوا.
حنين: امم واضح.
طبك حواجبه مبتسم.
مبروك على الحجاب هسه انتبهت دايخ والله.
الله يبارك بيك الله يساعدك.
حچت وياج غياهيب علمود جلساتها؟
سئلته بس ما انطت جواب.
ما جاي اتساعد نفسها ما ادري شبيها شسوي الها خايف عليها.
انطيها وقت تتقبل كلشي مع الايام.
هز راسه بقبول مر وقت، نزلت اختي مرتبة نفسها گعدت بصف ارسلان.
غياهب: شنو ما نمت؟
ارسلان: لا.
ليش مو تعبان ارتاح.
أشر بحواجبه على بنته.
بس حضنتها و شميتها راح كل تعبي.
لعد هنيالها.
للمغرب كلش دخلنا للمطبخ اني وياها نجهز بالعشه اقترحوا انسوي
مشاوي اجه درغام هم عفت غياهب وطلعت للصالة وگفت يم الباب.
حنين: ابو سيرين ما تخابر عمر يجيب نار و نيروز و يجون.
ارسلان: صار.
خابر عمر و درغام يباوعلي مقلص عيونه لان گتله يجيبون ناز سده ارسلان و گال.
ارسلان: العلوية باجر عمليتها و البنات مشغولات وياها يگول عمر غير مرة.
هااا الله يگومها بالسلامة.
رجعت للمطبخ باوعتلي غياهب.
غياهب: ما يجون مو؟
اي العلوية باجر عمليتها.
طلعنا اللي يريدونه يشونه برا للحديقة و احنا جهزنا الباقي، اخذنا
جهة بعيد عنهم گعدنا و ارسلان و درغام استلموا الشوي.
غياهب: همزين گعدنا بعيدين عنهم خاف بنتي تتحسس.
حنين: غياهب افهمج بس لا تخلين بعقلج فكرة كلشي يأذي بنتج.
بقت ساكتة ما انطت جواب، الى ان كملوا دخلوا الاكل جوا دخلنا احنا هم حهزنا الاكل گعدنا ناكل.
غياهب: لو مخابرين بابا يجي.
حنين: من اجيت اني ماجانت سيارته موجودة.
يمكن بدأ يروح المحلاته بما انُ طلع تقاعد.
يمكن.
سكتنا من درغام بدأ بحديثه.
درغام: اگلك ارسلان.
ارسلان: ها خوية.
ناز اختك الصغيرة مو؟
باوعله ارسلان مستغرب.
أي شبيها؟
اذا يجونها خطابة تنطوها؟
ظل صافن و غياهب هم صفنت بكلامه الواضح درغام حاچي ويا مُجاهد
و متأكد من مشاعره هل فتح الموضوع، ضحك ارسلان بخفة.
ليش المنو تريد تخطبها.
الواحد.
اممم اگدر أعرف هذا الواحد.
أكيد.
أي منو؟
مُجاهد.
أردف ارسلان بتعجب.
مُجاهد؟
اي ليش شبيه مُجاهد؟
مابي شي خوش ولد و النعم منه بس إلى أدري بي ما يريد يتزوج.
هاي قبل مو هسه، چاا بعد كبر شني لشوگت يظل هيج.
انتَ حچيت من وحدة لو هوَ طلب منك.
والله يا خوية تريد الصدگ؟ علساس يجي يحچي وياك بالموضوع
وياخذ الاذن منك علمود يدز امه الاهلك بس ما ادري شوگت يجي فَ گلت
خلي اخصمها انا وياك بدون مايدري خاف عندك أشكال.
بالعكس مُجاهد خوش ولد و يعجبني بس ما أدري عن ناز اذا جاهزة لهيج شي او لا القرار الها مو الي.
غياهب: اگعد وياها و افتح الموضوع و شوف جوابها.
بس غياهب گالت هيج كمز ارسلان من مكانه ركض على درغام سحله من اذنه يجر بيها.
ارسلان: ووولك درررغام چااا گوول ام العيون البحر ما ادري شنو من بسمرت مُجاهد من رحنا نجيب امه گدامي هيَّ اختي؟
غص درغام بالضحك.
درغام: اي هيَّ أعتذر بس ليش الجذب اخوي يحب أختك ورايدهااا بالحلال.
ضربة ارسلان يصيح.
انچب لك نووووب حب هوَ وين شايفهااا وحبهااا شهللل التمسللت.
غياهب: ما فهمت ليش عندك أعتراض اذا يحبها؟
شنووو يحبهااا شبيج غياااهب.
انتَ شبيك ابو سيرين؟ لعد احنا هسه الشلة الگاعدة شلون اتزوجنا
مو كله على حب، بعدين الحب مو حرام و لا عيب و الولد رايدها بالحلال ما راح سوه علاقة لا اجه طلبها بالحلال.
رجع ارسلان يصيح.
وولكم احترموووني على الاقللل اختي هااي شلون تحچون گدامي هيج؟
درغام: خايب دنجب و اگعد انا گابلت عمي سلطان و گتله أحب بنتك.
رجع گعد ارسلان بمكانه و يخزر بدرغام اللي كل شوية ضاحك اگرص
بي اريده يسكت بس شيسكته بعد لگاله سالفة غير ابوية.
غياهب.
فرحت ال ناز شخص مثل مُجاهد يدخل حياتها خوش ولد بس تبقى الشغلة
يم ناز راحوا درغام و حنين رجعت للصالة شفته متمدد و سيلس على صدره.
غياهب: ترا مُجاهد خوش ولد.
ارسلان: أدري بي حتى بيته من كسرته ماحچى شي و لا قبل اخسر شي بس ما اگدر انطي كلمة لازم احجي ويا ناز.
أكيد حبيبي اهم شي رأي البنيه.
باجر عملية العلوية من يطلعوها انروحلهم و احجي وياها.
الثاني يوم اجه مُجاهد فتح الموضوع ويا ارسلان و اسمع الكلامهم خطية
چان متوتر بس ارسلان طمنه بكلامه و گاله الموافقة تحتسب يم ناز مو يمي
و اذا عليَّ اني ماعندي مشكلة هوَ أتفهم الوضع و گاله أنتظر جواب منك.
سووا العملية للعلوية و ولدت طفلها الثاني بالسلامة طلعوها من المستشفى.
ورحنالهم بس دخلنا ناز اخذت سيلي و تكمز بيها ارسلان و عمر يصيحون
وراها خاف توگع بينما هيَّ مطنشة الوضعية، دخلنا للعلوية تحمدنالها
بالسلامة و جانت تعبانة لان عملية.
ارسلان: الحمدلله على سلامتج خوية ام سراج.
غرام: الله يسلمك.
گعدت بصفها.
غياهب: شنو سميتوا البيبي الجديد؟
غرام: إلياس.
عاشت الاسامي.
عفناها ترتاح و الخال ممقصر بشي وياها گعدنا يم مليكة و بنتي صارت من واحد الواحد من ناز ال عمر ال نيروز.
ارسلان: ولكم خظيتوهااا خظط.
عمر رافعها يبوس بيها.
عمر: شني انتِ جنج كيكة ولچ عموو.
نيروز: عمر انطينياها شنو كله عندك.
حطها بحضنها ما يستاهلون اللي صار وياهم بس بعد حكم رب العالمين
رفع راسه عمر تحمحم وفاجئنا بكلامه و قراره بعد ما اجه الخال و انضم الگعدتنا وسراج بحضنه.
عمر: انا قررت أسافر.
ظلوا الولد متفاجئين من قراره.
ارسلان: وين تسافر؟
عمر: الروسيا عندي صديقي هناك وراح يساعدني بالطلعة.
كُميل: وين رايح للغربة خالي؟ هنا وبين أهلك.
نيرود بقت ساكتة و الواضح متفاهمين هيَّ وياه.
عمر: اروح بالاول اذا شفت العيشة هناك ما اتأقلمنا وياها نرجع و اذا عجبنه الوضع نبقى.
بقى ارسلان ساكت و فهمته من ملامحه الموضوع ماعاجبه باوعله عمر بتسائل.
عمر: سكتت ارسلان؟
ارسلان: بكيفك خوية اللي ترتاحله حياتك هاي.
چنك ضجت؟
اضوج طبعاً انتَ أخوي الوحيد و تبتعد عني و تدري بمعزتك عندي بس
هم ما اوگف بوجهك و بقراراتك انتَ واعي وفاهم اكيد تعرف مصلحتك وين.
كُميل: انا ماعجبتني السالفة بس مثل ما گال ارسلان انتَ أعرف بمصلحتك
روح فترة و شوف الوضع عجبك أستقر ما عجبك لم غراضك وتعال.
بقوا يتناقشون بالموضوع و عمر سولفلهم موضوع السفر و صديقه گايله أساعدك
و ختموا كلامهم بالله كريم طلب ارسلان يحجي ويا ناز على أنفراد.
طلعوا برا و مليكة دايرة وجهه بزعل من عمر لان يريد يسافر.
غياهب: نيروزة.
رفعت راسها مبتسمة و هيَّ تلاعب بسيرين.
نيروز: ها غياهب.
عاجبتج فكرة عمر.
ماعندي مشكلة وين ما ايروح اني وياه و مثل ما گال انشوف الوضع هناك بالاول و نقرر.
ان شاء الله خير لعد.
بقينا گاعدين عمر يحاول يراضي بمليكة و الخال يحرگ عليه ويدفع
بيها علمود ما تخلي يسافر مايريده يسافر سراج يكمز بالنص گدام نيروز شلون لازمة سيرين.
نيروز: يمة منك يا سراج شگدد تغارر.
كُميل: هاي غرام راح ينشلع گلبها سراج يغار الصبح من اجينا من المستشفى
وشاف امه لازمة اخوه گضاها بچي و يدفع بي.
غياهب: لان بعده طفل و ايشوف نفسه الكل يحبه و المدلل عندهم فَ يغار.
ردت أرد عليه و اگوله حتى على ارسلان يغار بس قاطعني دخول ناز وجهه
مطعون أحمر دخلت جوا باتجاه غرفتها، دخل ارسلان باوعتله ملامحه.
طبيعية ما ادري اذت فتح الموضوع وياها او لا، لليل رجعنا للبيت سئلته بفضول عن قرارها.
غياهب: شصار على موضوع ناز حچيت وياها اليوم؟
ارسلان: اممم.
اي شنو جوابها؟
والله ما أدري شگلج غياهب.
خوفتني؟
ما وافقت تگول ما جاهزة لهيج شي خللي الولد يدور على غيري ما أناسبه.
ليش شبيها يعني هيَّ و ماجاهزة؟ لهالشي حجيتلها عن مُجاهد انتَ.
اكيدد و حتى گتلها فكري لا تستعجلين ما قبلت گالت انهي الموضوع وياه.
امم وراح تنهي؟
انتظر هالاسبوع بلكي تغير رأيها اذا ما اتغير چا شسوي أبلغ الولد لان منتظر جواب مني.
مر الاسبوع و كل يوم ارسلان يحجي وياها و هيَّ قافلة تگله ما اريد أتزوج
و هوَ يگول مالاگي أحسن من مُجاهد يصونها بس يبقى القرار الها ما يگدر يجبرها
اجوا درغام و مُجاهد النا گعدوا بالحديقة و انفتح الموضوع اباوعلهم
من شباك المطبخ وبايدي سيلي اگدر اسمع الاصواتهم.
درغام: شني ارسلان سويتها قصة عنتر و عبلة صارلنا شگد منتظرين الجواب.
مُجاهد تحسه داخل بتحقيق من توتره و يعصر باصابعه.
ارسلان: مُجاهد انا احچيلك بكل صدگ انتَ خوش رجال و فرحت من طلبت اختي
مني بالحلال و مالعبت من ورايَّ هاي كلش جبيرة عندي ماطعنت بيَّ.
مُجاهد: اللي يمسك يمسني خيي.
الله يخليك تسلم، انا حچيت ويا اختي و اكثر من مرة بس خوية البنيه رافضة فكرة الزواج شلع ماتريد تتزوج.
ملامح مُجاهد الچان بيها أمل أنطفت وجمدت و درغام نفس الحالة بلع ريگ ورجع سئله.
يعني اللي أفهمه منك اختك ما موافقة؟
للأسف أي و الا اتمناها الك مو الغيرك وداعت بنيتي عزيز انتَ عليَّ.
مسح على وجهه حسيته چان منتظر شي وانصدم بشي ثاني، ابتسم مجاملة
وگف ناهض من مكانه مد ايده يصافح ارسلان.
مُجاهد: قسمة هيَّ و الحمدلله چان إلى الشرف تصير حلالي.
سلم و طلع من البيت درغام هم اترخص منه وطلع وراهم ارسلان وصلهم للباب ورجع.
غياهب: أحسه أنقهر ارسلان خطية.
ارسلان: شبيدي عليه.
باوعتله بزعل عليهم بس هم صدگ شبيده عليه ما يگدر يجبر اخته على شي مارايدته.
ناز.
أرسلان من حچى بالموضوع أنطاني صدمة عمر ما اتوقعت بيوم من الايام
يجي شخص و يتقدملي مثلي مثل أي بنيه تنخطب و ما أدري اذا يعرف بحالتي
قبل او لا راح يتقبل كلشي حتى لو چان ماضي يمكن يصير شي يخلي بالمستقبل.
يعيرني بالماضي مالتي، رجعت بذاكرتي لذاك اليوم من شفته بالمستشفى.
ناز: خووفتني؟
رجعة بكتفة للحايط ذاب ثكله عليه و يباوعلي.
مُجاهد: ليش هم كل اللي يخافون يصيرون مثلج؟
ما فهمت؟
شو طريقة كلامج اتخوف عبالك اخوج.
زفرت نفس اهدأ بنفسي لان كمزني بصوته.
شبيج بوية راح تموع روحج.
رفعت عيوني بعيونه ظل صافن بعيوني الثواني غمض عيونه.
لا تباوعين بعيونج.
لعد أباوع براسي شبيك انتَ خوية؟
استغفرلله.
فنح عيونه واني بعدني لازمة بالحايط و ايدي على گلبي.
مُجاهد: اجيبلج ماي؟
ناز: لا شكراً.
بقى واگف بمكانه و عيونه ما أنشلعت مني حتى خفت لان وحدنا بالممر بحياتي
ماواگفة ويا رجال غريب غير اخواني و خالي، نزلت راسي ومشيت بخطوات استوقفني صوته.
مُجاهد: ناز؟
رفعت راسي ردت أگله منين تعرف اسمي بس الحمدلله ماخليته ينبهر بغبائي
و أتفشل اكيد سمعه من الموموجدين ماحبيت افشل نفسي.
ناز: هاا؟
عيونج.
حچيت بسرعة.
مو عدسات والله.
ضحك ضحكته حلوة هيج هادئة چنها ضحكة عمر اخوية.
أدري بيهن مو عدسات.
لعد ليش گلت عيونج معناها.
دارت عيونه بالممر و مال براسه و أردف بنبرة تخلوا من التلاعب.
زراگ عيونج غرگني .
اتجحظت عيوني هذا شلون هيج يحجي وجهي ولع عفته واگف ورحت امشي
سريع اريد اطلع من هذا الممر شنو يحجي ويايَّ هيج على أي اساس و اني اخت صديقة ضحت من تصرفه.
فزيت من أفكاري راجعه لواقعي على صوت نيروز تحچي ويايَّ باوعتلها بشرود.
ناز: هااا؟
نيروز: شنوو هااا صارلي ساعة احچي وين صافنة عيني.
هيج تريدين شي؟
مليكة تريدج.
طلعت وياها ارسلان و غياهب راحوا رحت المليكة گالت بعدين ما ادري
شتريد عاد بالأخير طلعت تريد اغسل ملابسها غسلتهن وشريتهن رجعت
الغرفتي شفت رقم متصل غثتني هالسالفة مال الارقام طلعت الخط و كسرنه گلت بعدين أوصيهم يجيبولي جديد.
غياهب.
بدأت حياة الكل تمشي و طبيعي و كل شخص بينا حياته أستقرت العلوية.
و عائلتها، حنين و عائلتها، عمر و نيروز بدوا يجهزون السفرهم، الا عائلتي
اني مدا تستقر و السبب اني، ارسلان ديتحسن وضعع حتى صار
من ياخذ الجلسات يرجع مرتاح، بس اني مدا استجاب الشي باقية عالقة بالماضي
حسيت بايدين أحتضنتني من وره و اني واگفة يم شباك الصالة طبع قبلة برقبتي وثبت حنكه على كتفي.
ارسلان: ليش واگفة وحدج يحيلي.
غياهب: عفتك انتَ و بنتك براحتكم.
امم تعاي شوية.
أخذني من ايدي گعدني على الكرسي بس ما أحط عيوني بعيونه.
باوعيلي غياهب.
هزيت راسي برفض لزم ايديَّ محتضنهن بين كفوف أيده.
صار إشهر نتعالج بس انتِ ماكو أي تحسن بحالتج و كل ماجاي تتقدمين
للاسوء واذا ملاحظة حتى بنتج ابتعدي عنها بدون ما تنطيني مبرر و عايفج
علي راحتج، نورس تگول من تروحيلها زين منج تطلعين كلمتين.
گتلك راح أفشل.
لان انتِ ما مقتنعة بشي و لا بالفكرة لو مخلية الفكرة أبالج راح تنجحين.
مثل ما خليتيها بعقلص، انا حتى من اتأذيت من الجلسات ما أنسحبت
صمدت ماخليت فكرة الانسحاب أبالي، تعبت غياهب اريد اعيش حياة
هادئة وياج و ويا بنتج لشوگت تبقين بهذا الوضع؟
أحس بقبق راسي يريد بنشال دخلت بحالة أنهيار دفعته من گدامي أرتد
لوره مصدوم من فعلتي فاقدة أعصابي احچي و ابچي و أصيح.
أحاااووول أقنععع نفسي بسسس أفشللل عبااالككك ما أتمنى أتعالج و أصيررر. انسانة طبيعية؟
گام من مكانه يحاول يهديني بس صرت أشيل بروحي و ارگعها بالگاع إضرب
علي وجهي بكل قوتي ما أحس بألم الالم صاير بگلبي قيد ايديَّ.
ارسلان: راح ترجعين على حيلج عزيزة عيوني بس أهدي.
دفعته عني كارهته و كارهه كلشي أريد أهج و اروح المكان مايكون بي أحد اختنگت
مثل الشخص اللي داينخگون بي ويصارع ويا النفس هاي حالتي.
ماااا راااح ارررجع على حيلييي انييي ضعيفة.
غلطانة انتِ أقوى بنيه شافتها عيوني.
هجمت عليه أضرب بي وقابضة على أيدي أضرب من لاوعي.
لاااا تجذببب عليَّ كاااافي تجذبوووون لاااا تضحكوووون عليَّ و توهموووني.
گعدت بالزاوية حاضنة نفسي ابچي عافني وطلع بقيت بمكاني وحدي
أرمش بعيوني بثكل روحي رايحة دموعي تنزل بهذوء نغزات بگلبي صارت.
أدري بنفسي ماراح أعيش مثل الناس طبيعي، صعدت الغرفتي ماعندي
غير هذا الحل اللي صارلي فترة معتمدته، فتحت خزنتي الخاصة ارسلان.
ما يتقرب الها اخذت علبة العلاج طلعت حباية منها اباوعلها اذا عرف اخذ مهدئات
ما أدري شنو راح أيسوي.
بس اذا ما اخذ اني راح اتعب صارلي اسبوع گاطعتهن و كل اعصابي
انتهتت و أتدمرررت منو يصدگ اني الانسانة اللي ضد هيج اشياء صرت اخذ منهن
كمزت بمكاني وايدي صارت وره ظهري ضامة العلبة من انفتح الباب
دخل ارسلان و انظاره تحولت على ايدي بلعت ريگ بخوف من شفته.
سد الباب و بدأ يتقدم باتجاهي عيونه لازالت على ايدي الضامتها وگف گدامي.
ارسلان: شنو هذا الضامته؟
غياهب: و لاشي.
اهاا شو مدي ايدج.
الكلام ضاع مني ورجفة الخوف و التوتر سيطرت عليَّ ماعندي حجج كلشي طار من عقلي حچى بنبرة حادة.
أيدددج غياااهب.
ذبيت الحباية من ايدي و مديتها.
فتحيهاا.
فتحتها بخوف.
شوف م. مابيها شي.
اممم، شو وخري هيج اوگفي هنا.
أشرلي على جهة اوگف بس شلون أبتعد؟ و الخزنة مفتوحة و ممكن يشوف.
العلاج سحبني من ايدي بهدوء يحاول يلزم أعصابه وگفني بعيد عن خزانتي
مسحت وجهي بتوتر والرجفة أحتلتني أتسارعت دگات گلبي من شفته صار يفتش بالخزنة.
ارسلان: أعتذر لان جاي أفتيش باشيائج الخاصة بس مجبور.
لزم العلبة
و أحس بروحي خرطت من خوفها بقى يباوعلها رافع حاجبه دار بعيونه اتقدم رفعها گدام وجهي.
شنو هذا؟
علاج.
أدري علاج مو أعمى ما أشوف بس علاج شنو بالضبط؟
لزمت أطراف اصابعي ماعندي جواب اله.
ارسلان: لا تجاوبين انا راح اعرف الجواب بنفسي بس اذا طلع اللي ابالي صح راح يصير غير شي يا غياهب.
طلع من الغرفة ما اعرف وين راح ركضت وراه طلع بسيارته مالحگت
عليه اني شسويت بنفسي؟ ليش هل الاخطاء الفادحة اللي داسويها ليش
هوَ سوا كلشي في سبيل يتعالج من ماضيه و كلشي مر بي علمودي و علمود سيرين.
بس اني ماسويت شي ماراح يسامحني على فعلتي هاي و هوَ محذرني ما اتقرب لهيج شي.
مرت ساعة كاملة و التوتر اخذ حيز مني انفتح الباب و ارگع بكل قوته لزمت
گلبي من دخل و دمارات كصته ناطة مجرد لمحني اجاني طاير لزمني
من زندي بقوة حسيت ايدي راح تنكسر شريان بعينه ناط أحمر دم عاط بوجهي.
ارسلان: ليششش غيااااهب ليششش؟ بشنوووو قصررررت وياج انااا
تاخذين مهدئااات وللج تدرررين شجاي اتسوين بنفسج انتِ لوووو لا.
ايدي ارسلان عوفهااا داتاذيني.
عيونه تخزر بيَّ شلتني شل.
روحي الاهلج غياهب ما اريد اسوي شي أتندم عليه.
أفضل، من البداية گتلك خليني اروح بس ما قبلت و هددتني.
روحي هسه ما أهددج ابقي شگد ما تريدين.
و سيرين؟
تبقى يمي.
بلعت غصتي مختنگة.
شنو تبقى يمك؟
مثل ما سمعتي.
ما اگدر بدون بنتي لا اتسووي هيج ارسلان.
ضرب ايده بالحايط اتشنج جسمي.
ولللج ياااا بنت تحچين عنهاات شاااايفة رووحج لو لا.
نزلت دموعي، حضن وجهي بايديه اللي يرتعشن دموعه اختلطت بدموعي حچى بهدوء مختنگ.
ليش سويتي هيج غياهب ها؟ ليش ما ساعدتي نفسج؟ ليش عبالج
بس انتِ التعبانة و عشتي حياة صعبة، مرمرتي گلبي، عشت الاصعب
شفت امي تنذبح گدام عيوني، شفت أبوي حسين طلعت روحه گدامي
شفت امي عفاف باصعب حالاتها و انتحرت بسسس ماسويت اللي سويتي
انا شكو تعالجت ها؟ مو علمودج و علمود بنتنا؟ حاچيني غياهب.
هزيت براسي اي دموعي تريد ما تنقص ويا دموعه.
چا ليش رجعتي سويتي هيج جنت شاك بيج بس استحقرت نفسي.
لان شكيت بيج گلت من بديت حياتي بالجديد وياها بنيناها على الثقة و الصدق
وفيت بكلشي وياج ماضميت عنج شي لازين و لا موزين.
انتَ أحسن مني.
أبتعد عني يمسح بدموعه وجهه كله محتقن سيلي خانسة رغم العياط اللي
صار اتقدمت الها اخذتها حاضنتها شنو ذنبها عندها ام مثلي تمنيت
بهل اللحظة اني ميته و بس ارسلان اللي مربيها على الاقل احسن مني حطيتها
بمكانها سحبت جنطتي اريد احط ملابسي سحبها مني يباوع بعيوني بس.
اني شي بداخلي مطفي أحس بروحي متجردة من كلشي.
ارسلان: صح گتلج روحي الاهلج بس مو من گلبي.
غياهب: خليني اروح ارسلان اذا ابقى و اني بهل الوضع راح يجي يوم و تكرهني.
انتِ مخبلة؟ لو شنو شكرررره و اني روحي بيج.
آني خطئت و اتحمل نتيجة اخطائي.
بهل الدقيقة تغير كلشي رفعني شايلني طلع بيَّ من الغرفة ما أدري وين.
ويننن ماخذني ارسلانن؟
اش اسكتي.
دخلني للحمام حطني وگفني جوا الدوش فتح المي البارد دخل ويايَّ بملابسنا اختنگت.
شداتسووووي.
صحيحي شوية.
ردت اطلع رجع سحبني من ايدي رجعني النفس المكان و المي غرگني.
راح اطگج بالگاع استچني.
ساعة كاملة احنا بهذا الوضع سد المي أشرلي على ملابسي انزعهن خزرته.
اطلععع برررا و جيبللي ملابسسس.
هذا البرنص البسي بعدين منين تستحين علساس استغفرلله شلون تحچينا گوا.
أدبسززز.
فوگ شينهااا گوات عينهاا.
طلع من الحمام رگع الباب رگع وراه شويك ودگه دخل انطاني الملابس.
بدلي يلاا.
رجع طلع بدلت و كلي أرجف، طلعت من الحمام جان واگف بايده ملابسه
دخل للحمام بدون ما يخسر نظره عليَّ و لا حتى باوعلي كرهت نفسي بقيت بالغرفة بين ما رجع دخل أشرلي.
ارسلان: اسمعيني غياهب و صدگيني هذا كلامي احچي من كل عقلي
و أدوس على گلبي اذا خليته يتحكم بيَّ بعددد بس أفهميني.
يحجي بكل جَدية.
راح تبدين تداومين ويا المحامي اللي لگيته الج أي أعتراض ما أريد كااافي
ساجنة نفسج بين اريع حيطااان، الجلسات تستمرين عليهااا وراح اتساعدين
نفسج و ترجعيلي غياهب احسن من قبل لا تخسرين نفسج و تخسريني
انا وبنتي ثقي باليوم اللي گلبي يموت منج مستحيل يرجع شي بعد اصحي
علي روحج كافي تدمرين بروحج و تدمريني وياج.
ما اريدد اداوم.
موووو بكيفج.
تجبرني؟
أي أجبرج من اكون مجبور.
ترررا كارهتك و كارهه كلشي.
عادي هرمونات بس تروح ترجعين الحضني.
تمددت بمكاني غطيت وجهي نزلت دموعي من جديد شديصير ويايَّ ليش
كارهته هيج شوف هوَ شدايسوي علمودي و شوف اني شدا ارد عليه حضني
من فوگ الغطى يهمس قريب على أذني.
ارسلان: اسف لان جاي اضغط عليج بس ما خليتيلي أي حل.
غمضت عيوني صابني نعاس و خمول غفيت، فزيت باوعت اثنينا بنفس اللغطى
و الاضوية مخففها سيرين نايمة باوعت النفسي نايمة بحضنه قربت نفسي.
اله سحبت نفس من رقبته شنو هل التناقش الداعيشه مرة اريده و مرة ما أريده
شدني اله من خصري فتح عيونه بنعاس.
ليش تتحرشين بابا؟
لا مو هيج فهمت غلط.
اممم فهميني.
أريد احجي مالحگت رجعني المكاني ملتهم شفايفي بقبلة خلاني جامدة الثواني
اتفاعلت وياه ناسية نفسي و كلشي و هوَ يهمس بأذني أحن كلام يطمني بي رجع همس يم أذني.
لا تكسرين الثقة اللي بينا، الثقة من تنكسر صعب ترجع.
همست بنفس النبرة.
مو بيدي.
رفع ايده يمشيها على شعري تنزل على وجهي ورقبتي عيونه بعيوني.
بيدج كلشي.
والله موبيدي.
اساعدج انا.
بس اني ماساعدتك بشي.
ساعدتيني بس ماتدرين بنفسج الاشياء اللي تشوفيها تافها انا اشوفها شي جبير.
حضنته بكل قوتي و متمنية العالم يتوقف بهل اللحظة ياريت لو أحد يفهم
شداعيش و شدا اعاني داموت على البطيء مسد على شعري.
جاي تفكرين محد فاهمج؟
هزيت براسي اي.
فاهمج انا بس لازم أقسى عليج غياهب و ترجعين اتشوفين الحياة من جديد.
و المهدئات اللي خطأت بيهن.
نصلح الاخطاء ماكو شي صعب انتِ بنية سباعية وراح ترجعين توگفين على رجليج راح تكونين أحلى أم و أجمل زوجة
والله ارسلان؟ يعني راح أكون هيج.
رفع ايده يمسح بدموعي.
راح تكونين بس من انتِ فعلاً تبذلين جهدج وتريدين هالشي اعتبريها معركة ولازم تربحيها.
سيرين وين انبقيها؟
گتلج قبل اذا انا موجود يمي و اذا ماموجود يم اهلي.
صار عندهم طفل ثاني غرام ماتلحگ.
ناز موجودة و امي مليكة موجودة.
تمام، بس منو المحامي؟
حك وره أذنه.
واحد.
أفهم بس منو؟
ماتعرفي.
بيش الساعة نروح باجر؟
بالتسعة.
هزيت براسي للصبح گعدنا أحاول أبدي بداية جديدة اكثر من مرة اگول بداية
جديدة و اخربها ما انجح بينما هوَ لا يكون گد كلمته اللي ينطيها إلى و هنا
أيقنت صبره و أيمانه أقوى مني رغم مصاعب الحياة اللي مر بيها، جهزت نفسي.
لبست رسمي و جهزت سيلي گال ناخذها ويانا هالمرة، نزلت جوا هوَ هم لابس رسمي ولو مو شي جديد هذا نمط لبسه.
چان يخابر بعدني امشي على الدرج سد الاتصال بايدي سيلي اتلگاني و هوَ يگول.
ارسلان: شوية شوية على گلبي ما يتحمل هيج حلويات الام وبنتها.
ابتسمت الكلامه اخذ سيلي مكركز عليها.
شلون بله ناكلج بابا نوب طلعتيلي حلوة شلون بيك ارسلان من تكبررر.
يوميا يجي واحد يگلك اريد بنتك.
خيولون يخسون.
طلعنا من البيت قفلنا الباب طلع ابوية من بيتهم اجه علينا.
سلطان: شلونها بنيتي.
عيالي يقصدني جاوبته مبتسمة.
غياهب: الحمدلله حبيبي.
لا مو انتِ أقصد سيرين بنتي الثالثة.
ارسلان: شدددد.
رد عليه ابوية.
شو ما عاجبك.
لا عمي يعجبني بنتك بنتك هايهية وين تلگى واحد مثلك حتى احسن من ابوها.
عدل ابوية سترته يباوعله بتك عين.
وين رايحين؟
نشوف محامي غياهب راح تبدي شغل وياه.
بانت الفرحة بملامح ابوية.
سلطان: بالتوفيق باباتي.
غياهب: شكراً بابا.
اترخصنا منه وصعدنا بالسيارة و هوَ هم صعد بسيارته طلعنا متوجهين للمحامي اللي ما اعرفه و لا حچالي عنه ارسلان.
غياهب: ارسلان.
ارسلان: حيلي.
هوَ يعني هذا المحامي شلونه؟
مثل لونه.
اخخ ارسلان اخخ.
اخخ غياهب اخخ راح أخليج تشتغلين ويا محامي ويا رجال اخخخ گلبي.
احجيلي عنه شاطر بشغله؟ خوش محامي.
اي خوش محامي و شاطر و الكل يسولف بنزاهة شغله سئلت كم شخص عنه مدحولي بي.
زين شنو اسمه؟
سعد الحلي.
طبكت حواجبي.
هذا اسم مغني.
مابقى شي ونوصل شبيج اشتغللل فضولج ما اعرفج فضولية.
رفعت سيلي مبتسمة اتأمل ملامحها.
غير اعرف ويامن اشتغل يمكن مايعجبني.
بقى ساكت طول الطريق الى ان وصلنا دخلنا للمكان المحامي چان واگف
فاتح الخزانة مالته مال الملفات ومنطينا ظهره دگ ارسلان الياب دار بظهره
اتلاشت ابتسامتي بصدمة و اتبسمرت بمكاني من شفته راهب؟
بقيت اباوع الارسلان جاحظة عيوني اتقدم النا راهب يرحب بينا بابتسامة.
راهب: اهلاً و سهلاً حياكم.
سلم على ارسلان، لا ثواني اني شدا اشوف ارسلان وراهب سوا؟
لا و العلاقة طيبة بينهم كمل سلامه والتفت الي.
راهب: شلونج ام سيرين.
ابتسمت وبعدني بنص صدمتي والله مدا تعقل ابالي راهب و إرسلان
يصيرون اصدقاء و هوَ حتى مرض تمرض من غيرته منه.
غياهب: اهلاً استاذ راهب.
گعدنا وراهب عيونه على سيلي مبتسم رد عليه ارسلان.
ارسلان: عيونك بلا زحمة.
راهب: هههههههههههه أليفة كلش مبينة.
طالعة على أبوها أكيدد.
رفع حاجبه بأستنكار راهب مامقتنع بكلامه.
غياهب: عفواً من رخصتكم أحد يفهمني هسه المحامي الراح اشتغل وياه نفسه راهب؟
ارسلان: أيي مو گتلج سبرايز.
راهب: ان شاء الله ما اقصر وياج خيتي.
حاچاه ارسلان و هوَ مقلص عيونه علينا.
كون كله خوية و خيتي بسّ گدام الناس گولوا استاذ وست عود لان محاميين.
خف علينا ابو سيرين.
خاااب راهب موزين و بلعتك غير دم سنوني انتَ.
شمسويلك انتَ تبالغ بردات فعلك.
چااا انتَ تقبلها واحد يرقم مرتك گدامك.
چانت طليقتك للتصحيح مو زوجتك.
نفس الشي.
أكو اختلاف شاسع حضرة الضابط.
گومي غيااهب اناا صوجي اخليج تشتغلين ويا هذا الاشگر.
و طبعاً هنا يحجون بالشقة اكيد بعدها گلبوا للجَدية وبلشنا نتناقش بعملي
ويا راهب صح عنده سالفة الملحة يلح بس انسان بقمة التواضع و محترم كملنا منه
ودعناه طلعنا و ابالي شلون تغيرت نظرة ارسلان براهب بعد ماجان دم سنونه مثل ماگال.
ارسلان: اليوم ما نرجع للبيت خلينا أنسخت انا وانتِ و سيلي.
غياهب: عوفنا من التسخيت اني لحد الان مصدومة بالصار شلون هيج؟
خلي نصف سيارة بمكان مقبول و نمشي شتگولين.
تمام بيبي.
صف السيارة بمكان مسموح بي ونزلنا نمشي بشوارع بغداد بدأ يسولفلي بموضوع راهب.
ارسلان: من فترة صارت قضية و انا المستلمها و راهب المحامي بيها موكلينه
فشفته هناك و صار كلام بينا بعدين صار بينا تواصل و سؤال و جواب و نقاشات.
و صارتله مشكلة وساعدته بيها اممم من خلال لقائاتي وياه شفته خوش رجال يعني و بدأت تتغير نظرتي عنه.
ايي؟ كمل كمللل.
اخذج الواهس شو؟
كمل عيوني غير افهم الموضوع.
اممم صار حديث بينا عنج و عن شغلج اقترح عليَّ الموضوع شفت الفكرة
راح اتساعدج وتخفف عنج غلط تبقين ساجنة نفسج و ماتطلعين لو الاهلج لو الاهلي
وافقت بدون ما اخذ رأيج لان متأكدة ماراح تكون عندج مشكلة بشغلج و هذا حلمج.
و انا حلمي هسّه ترجعين غياهب احسن من قبل و تصيرين احسن
محامية بحيث اريد من امشي و ينذكر اسمج اريد احس بالفخررر يطلع من خشمي و زوجتي المحامية غياهب سلطان.
بشنو أجازي تعبك ويايَّ؟
بالنجاح جازيني بنجاحاتج.
هزيت براسي عيوني مدمعة و من اليوم صار هدفي واحد هوَ أنجح بعلاجي وبشغلي
خلصنا هاليوم اللي صار من أجمل ايامي و اني بجانبي زوجي و بنتي رحنا.
للمطعم بعدها بقينا نفتر ويشتريلنا أشياءات اني وسيلي اشترالي اكثر شي
احبه الكتب يعرفني شگد احبهن رجعنا للبيت احس بنفسي احسن من البارحة تحسنت.
بديت بشغلي ويا راهب و علاجي مستمر استمريت بي بكل جَدية بدون اي تلاعب
بكل جلسة ارجع منها تعبانة ياخذني ارسلان الحضنه يخفف عني تعبه بتشجيعه
الي و يبقى يستجوب مني علمود ما ابقى كاتمة بالخارج دكتورتي نورس و بداخل بيتي ارسلان صارلي دكتور.
و هذا الشي ساعدني اتقدم خطوة بعلاجي، مرت فترة واجه اليوم اللي راح
يسافرون بي عمر و نيرود و الكل ضايج لان راح يروحون بس هذا قرارهم يبقى
مو من حق أحد يمنعهم وگفنا يم الباب لان نريد نوصلهم للمطار ومليكة
اسم الله عبالك فاتحة عندها لزمت عمر و تبچي حضنها عمر هيَّ حيل تحبه متعلقة بي.
مليكة: راح اتسويهااا صدگ عميرر و اتروح.
عمر: اجي زيارات حبيبتي كافي تبجين و تخليني اروح مقهور.
و الزهرة لو ما اجيت اجيك الشسمها هاي الروسيا اطيحن حظك.
هايهية يمة.
حضن ناز مودعها خطية هم مقهورة نيروز البارحة اجت الاهلها ودعتهم خوالي
و اهلي هم راحت ودعتهم كمل عمر وداعه اخذ سراج يبوس بي و إلياس هم شاله يباوعلهم مبتسم.
عمر: الله يحفظهم الكم.
غرام: راح نشتاقلكم.
نيروز: و احنا هم علوية، والله هاي گدامهم اذا ماعجبني الوضع نرجع.
أشرلها عمر بمعنى تمام طلعنا نوصلهم اني و ارسلان و الخال للمطار.
و ناز گالت الا اجي وياكم غرام ماگدرت اطفالها مقيديها صعدنا كلنا بالسيارة
يفطسون ضحك و الخال شبعهم تكفخ لان حصروا اني گعدت يم ارسلان علمود بنتي ما تنجعص.
ارسلان: ادري متوازين خو ما متوازين خااالي شبيك ما اجيت بسيارتك.
كُميل: عود احنا عائلة وحدة.
كفخ ناز على راسها الخال.
هسه انتِ شكووو اجيتي.
ناز: غيررر أوصل اخووية انتَ شكووو اجيت.
غيررر اوصل ابن اختي.
متعادلين.
دگ جهاز الخال قبل لا يجاوب گال هذا درغام جاوبه گاله العصر تلگاني بالمعرض سده منه.
ارسلان: شيريد درغام.
كُميل: يريد ياخذ سيارة المرته.
غياهب: اه شعجب اقتنع چان رافض فكرة حنين اتسوق يگول رعنه لا تدخلها بحايط و هيَّ اتسوق السيارة.
عمر: تتعلم قابل شيرادلها.
كُميل: چاا انا گلت الغرام اجيبلج سيارة صفنت بوجهي تگلي لا لا ماريد انوب بس يوگفني المرور اطگها ببچية.
ضحكنا شلون يقلد عليها لحد ماوصلنا للمطار ودعناهم و كسروا گلبي
ارسلان و عمر من اتحاضنوا و اثنينهم عيونهم مدمعة رجع عمز ودع الخال
لان ماعباله يجي ويانا هناك ودعه صار وقت طيارتهم نادوا بالمنادات
قبل لا يروحون اخذ عمر سيلي شمها بكل قوته.
عمر: عمو راح اشتاقلج.
ارسلان ما اتحمل طلع گدامنا من المطار بقى يباوع وراه عمر ذب حسرة.
غياهب: يتعود ان شاء الله.
ديربالج عليه غياهب.
من عيوني.
راحوا هم يكملون روتينات سفرهم و احنا طلعنا من المطار راجعين للسيارة
ارسلان گاعد بيها اباوعله عيونه حمر صايرات لزمت ايده سيرين اخذوها الخال
وناز ورانا يلاعبون بيها و هيَّ العيارة تضحك ويطلع منها صوت مجرد
سمع ضحكتها تغيرت ملامحه صار يضحك على ضحكتها و عيونه تتأملها
كأنما مدايشوف غيرها كب ماتضحك يگول.
ارسلان: يا بوية اروح فدوة الهل الضحكة ومنا بدأ مشوار حياتنا.
بعد مرور عدة سنوات.
أنفتح الباب ركضتله سيلس حضنها رافعها الحضنه يفرح بيها و هيَّ شلون
ماتعرف تدلع تركيبتها كله دلع باسته بخده ورجعت باسته بالخد الثاني مالت براسها مبتسمة.
سيلي: دادي.
ارسلان: گولي بابا.
نو دادي.
صوچ امج العلمتج تحجين هالكلمات.
حطت راسها على صدره مثل عادتها اجه يمشي باسني بخدي وهيَّ صرخت.
لاااا تبوثهااا.
اه و ليش غير مرتي.
بوثني اني.
باسها و عضها بخدها جايب الها حلويات و گعدت تسولغ و ترطن عليه بالسوالف.
مالتها طالعة تحجي هواية مثل حنين باوعتلها رافعة حواجبي و اني داشوفها تدلع بحجيها و لازمة ايد ابوها.
دادي انتَ تهبني؟
أموت عليج بنيتي.
باوعتلي بعيونها تسويلي حركات بعيونها عود شوفي يحبني إلى رجعت
حضنته و ارسلان مكيف بسوالفها ميت عليها.
غياهب: من هسه حية انتِ ماما الله يكون بعون اللي تصيرين من نصيبه.
سيلي: تغالين مني (. تغارين مني)
ام السان غلابت النسوان.
ارسلان: اليوم عيد ميلاد الحسن درغام خابرني.
غياهب: اي هم خابرتني حنين.
جبتله هدية ويايَّ.
زين سويت لان سندريلا بنتك من الصبح خابصتني بشعرها كل ما اسوي
الها مايعجبها ما صار مجال اطلع اشتري شي.
اي وليش ماتسوين شعرها عدل؟
لا تصف ويا بنتك عليَّ.
غمزلي يضحك شو هاي تباوعلنا تفر بعيونها گومي ضربت ابوها طابكة حواجبها بانزعاج.
سيلي: ليش تقمزلها.
ارسلان: غير أحبها و أقمزلها بابا.
أقمزلي.
غياهب: وللج ام السان بكلشي مشاركتني.
رفعت ايدها اسويلي حركة باصبعها عود على عنادج موبنيه عفتهم دخلت للمطبخ
اكمل طبخ الغدة اگدر اگول الحمدلله أستقرت حياتنا، ارسلان انتهت جلساته
و گدر يتعايش ويا كلشي و تخطى بس مانسى شي، شغلي انتهى ويا راهب و فتحت مكتب خاص بيَّ.
و الأجمل اني اتحجبت باللسنين الفاتت و الراحة و الرضا غمروني
عمر و نيرو. أستقروا بروسيا بقوا يجون هنا زيارات، رماد هم سافر بأحد.
الدول العربية بعد ماكمل دراسته و خالي عمران بصعوبة اقتنع يخلي يسافر
وخطية بقى هوَ و زوجته وحدهم.
صبيت الغدة مسوية مقلوبة باللحم لان الانسة سيلي ماتاكل الدجاج
صبيت الها بصحن حطيته گدامها رجعته باوعنالها اني و ارسلان.
ارسلان: ليش بابا؟
سيلي: أتل وياك (اكل وياك)
اخذها حطها بحضنه اكلوا بنفس الصحن، گعدت اكل و عيوني عليهم.
غياهب: شنو اخبار ناز؟
ارسلان: جاي تحضر للامتحانات بعد هيَّ كملت السادس هسه تجهز للثالث.
خطية طلعت روحها يله نجحت.
اللي يريد شي يتعبله.
امم هم اتشوف مُجاهد.
بس سئلت هيج كمزت سيلي تصفگ بأيديها.
سيلي: أليددده (أريده)
باوعلها ابوها طابك حواجبه بعدم فهم.
ارسلان: تريدين منو بابا؟
لمت شفايفها مبوزه.
أئمو مووجاهد (عمو مُجاهد)
موجاهد؟ بنيتي شو انتِ تركيبتج تختلف.
اليده دادي.
عيب يابابا شنو تريدي.
ظل يسولف وياها و ياكلون وهيَّ كل شوية گايلتله تريد واحد و الطرگاعة.
تريد زلم مو نسوان و ارسلان لو ماطفلة الا يطگها بالگاع بالاخير چفصت ببطنه عاط بيها.
ارسلان: شبيج ياااا بابااا ساعة مُجاهد ساعة سررراج ساعة الحسن.
خنست تباوعله بعيونها غير تسكت لا وين ماتستلم رفعت ضغطه.
سيلي: أهبهم.
شدددد.
ما اتحملت الوضع ضحكت من گلبي سبحان الله نفس غيرة ابوية و هاي
سيلي اضرب من سوالف حنين و ذكية من خلال تصرفاتها رغم صغر سُنها.
غياهب: مو بيدها اتحب الحلوين اتقبل الموضوع بروح رياضية.
ارسلان: عمي هاي بنتج اذا كبرت شيلزمها.
سيلي: أهبهم اهواني دادي سبيك؟
نهجم بيتج اخوانها والله يابوية مصيبة انتِ و لسانج و عقلج شي ثاني يلا الماما منو قابل.
غياهب: علساس ابوها مقصر.
كملنا اكل و هيَّ شعوطت الرجال بكلامها و من يعيط بيها و اتشوفه
عصب تبقى ترمش بعيونها ببرائه و هوَ ما يتحمل يبقى يضحك، لليل جهزنا نفسنا وگفت أبدللها.
غياهب: هسه من انروح البيت جدو جابر شتسوين؟
سيلي: اسير عاقلة.
عفية ماما عيب لا تسوين وكاحة وهوسه ترا بابا يزعل منه.
هزت راسها علساس مقتنعة وتاخذ الكلام واني ما اضمنها منا للباب
بس توصل هناك تلعب لعب بسوالفها وابن حنين هم ناقص فددد واحددد
وكح ما ينجرررع مطيح حظ حنين و لليوم ماسوت طفل ثاني، كملت
شعرها اللي طالع مثل شعري نزلت من يمي صعدت فوگ المقعد مال
المرايا تشوف بروحها و تتلمس بوجها وگفت وراها لا توگع.
ها ست سيرين.
أهبل (أخبل)
الله يرزقني ثقتج.
بقت ترمش بعيونها هاي حنين الحقيرة معلمتها نزلتها راحت تريد تنزل الابوها.
لا تركضين على الدرج امشي على كيفج.
طلعت تمشي اباوعلها وگفت يم الدرج صرت على جهة علمود ما اتشوفني
بقت تتلفت بعيونها عبالها محد ايشوفها و هيَّ گامت تكمز على الدرج و تنزل فتحت الباب صحت بيها.
ولللج اني شگتللج؟
سبيج ماما غير انتِ دلتيلي امشي على تيفي.
اي؟ وهاي شنو على تيفج.
اثفة.
نزلت تمشي مثل العاقلة لحد مارصلت الابوها شمرت نفسها بحضنه.
مجهز نفسه گاعد ينتظرنا رجعت اجهز نفسي و ارسلان كل شوية صايح يلااا
هوَ علساس مايدري بس تجهيز بنته يستغرق وقت ما يعجبها العجب.
لبست فستان وطلعت وياه شال بس مو نفس للون كسرت بالألوان و حذاء
بلون الشال مكياج خفيف حتى يمكن ما مبين اخذت جنطتي و جهازي و نزلت جوا.
ارسلان: يحتاج هلهلولة كملتي؟
غياهب: شبيك ياعيني قابل ماتعرف بنتك.
سكت ماحچى شي تخوصرتله.
من يووووصل الموضوع يم بنتك تسكت.
حك طرف حاجبه مبتسم.
چا شلون شعندي غيرها.
هزيت بايدي طلعنا من البيت رايحين البيت خالي مشينا مشي لان بنفس
المنطقة صفت سيارة بصفنا باوعنا چان مُجاهد نزل الجامة.
مُجاهد: السلام عليكم.
ارسلان: عليكم السلام.
بنتي توزع ابتسامات اله بس تخاف من ابوها تحجي، نزل مُجاهد
من سيارته اخذها من ارسلان هوَ يبوسها و هيَّ ترجعله البوسة تضحك.
غياهب: ههههههههه سيلي ماما شبيج.
ارسلان: غسلت ايدي من بنتج.
مُجاهد: يلاا تعالوا اصعدوا رايحين البيت درغام مو.
اي
چا تعالوا انا هم رايح هناك.
مارديناه صعدنا وياه وسيرين الا تصعد يم مُجاهد و ابوها يگلها.
ارسلان: بابا مايصير عمو جاي ايسوق.
دگت رجل الا بحضن مُجاهد و مُجاهد رايح عليها يضحك سوتها صدگ
و گعدها بحضنه ساق لحد ماوصلنا البيت خالي، دگينا الباب طلعلنا درغام وگفنا يم الباب مايخلينا ندخل.
درغام: جبتوا هدية الابني لولا؟
مُجاهد: كبر لفك جبناا جبناا.
ترا ما ادخل واحد البيتي اذا ماجايب هدية بعد انا رجال اليوم بنت سلطان هلستني هلس.
ارسلان: هسه شلون نگضيها يم الباب واگفين.
درغام: اتفضلووا اتفضلوا اهم شي جايبين هداية.
گرص سيلي بخدها باسها، دخلنا جوا حنين متأنقة و ابنها نفس الحالة
مجهزين كلشي لحفل عيد ميلاده ابوية و خالتي وبيت خالي عمران
موجودين سلمنا عليهم گعدنا كلنا سيلي عافت مُجاهد وركضت الابوية اللي
يتعامل وياها مقل ما يتعامل ويانا اني و حنين.
سلطان: شلونها حبيبة جدو الحلوة.
سيلي: اوف مو ذينة.
رفع راسه ابوية يضحك غمزلنا ورجع يحجي وياها.
لاااا و ليش مو ذينة.
رفعت روحها سوت هاي الحركة من شخص يريد يشاور بقت تشاور بابوية مادري شنو.
گعدت بصفي حنين.
حنين: عزمت أهل ارسلان كلهم هم.
باوعت المُجاهد الگاعد يسولغ ويا خالي رجعت عليها.
غياهب: وللج مُجاهد هنااا و هسه اكيد ناز راح تجي هم.
نسيت اسئل درغام ما عبالي عازمه.
كل فصل اتسوي اكبر من صماخج.
دختولي ناز ضايجة منها شبيه مثلاً الولد وين تلگه مثل كسرته برفضها ماتعرفين
شگد اتاذه و هاي مرت كم سنة رافض يتزوج وحدة درغام يگول حتى بشغله
كله اعصاب و مايتحاچى من يوم اللي رجعوله الرفض مال ناز خبلللت الولد.
لا تنسين هيَّ ما تحبه مثل ما هوَ يحبها.
نوب بعد قفل على سالفة الزواج يگول هيَّ مرة انطيت نفسي فرصة و ماصارت بعد ما اريد.
اندگ الباب نهض درغام من مكانه يفتح الباب دقائق ورجع وياه اهل ارسلان.
بس مليكة ماجاية دخلت ناز مبتسمة لكن مجرد شافت مُجاهد اتلاشت ابتسامتها
مختفية و هوَ بس شافها نزل راسه بعد ما رفعه و لا باوعلها سلم على الخال.
غرام: وللج حنين خليتينا كلنا سوا رجال غريب گاعدين وياه.
حنين: منو الغريب تقصدين مُجاهد؟
اي
لا داده مو غريب اخو درغام روح بالروح بس الاختلاف هم من غير ام و اب.
كفختها العلوية اللي جمالها زايد ما ناقص الله يستر عليها.
والله عندج سوالف.
لا تتقيدين هوَ حتى مايباوع علينا مؤدب و خلوق.
غياهب: شو مليكة ماجاية وياكم.
غرام: راحت الانسام عمتها جاية الهم و خابرت گالتلها تعاي يمها.
گعدنا احنا على جهة و هم صايرين بجهة اطفالنا گدامنا سراج يخبل
و كبران نسخة امه كلش اما الحسن اخذ ملامح امه و ابوه و بنتي تفتر عليهم
إلياس اخذ ملامح الخال بس العيون عيون امه خصررر يلمعن لمعته حاطته.
غرام بحضنها، وگف مُجاهد بدون مايباوع الجهتنا ناز انخرست خرس و لا سمعنا صوتها من شافته لحد الان.
مُجاهد: اترخص منكم عندي شغل اعذروني ما اگدر أبقى.
درغام: ويننن رايح؟
انطى نظره الدرغام و اتوضحت السالفة و شنو السبب اللي خلاه يروح من درغام باوع الجهتنا رد عليه.
هاااا اييي صح ذكرت اليوم كلفوك بشغلة خوية.
جابر: براحتك ابني أتمنيناك تبقى ويانا.
مُجاهد: غير مرة ان شاء الله.
طلع وياه درغام للباب صارت عيوني على ارسلان حسيته فهم ليش راح بلشت
حفلة العيد ميلاد الحسن جابوا الكيكة وببها شمعة بعمره حطوا بالنص امه
و ابوه فرحانين بي طفى الشمعة بدينا نحتفل و قدمنا الهداية ناز خلقتها
مگلوبة سحبتها من ايدها طلعنا من يمهم للحديقة.
غياهب: شبيج ناز؟
ناز: شنو شبيه؟
من شفتي و اوضاعج كلها تخربطت.
هاا لااا مو ابالي بس هيج وحدي ضجت.
سوالفي هاي ويا اخوج لا تطبقيهن على المدرب هااسوالف.
رفعت عيونها الزرگ وشعرها الناري يصرخ بلونه بياضها يشع.
حسيته راح بسببي.
تحسين؟ لا تحسين اتأكدي.
تشوفين بيَّ غلط؟
اي و هم لا.
شلون؟
انتِ ما انطيني نفسج مجاال اللي تفكرين بي و ناز شبيج انتِ و مو جاهزة مو صغيرة ترى.
هوَ يعرف قبل شنو چانت حالتي؟
يعرف كلشي.
تغيرت كل ملامحها لملامح أندهاش.
يعني يعرف يعرررف بوضعي قبل و أجه خطبنيي؟
ما يهمه الماضي رجال يهمه الحاضر مالتج.
عضت شفتها منزلة راسها الثواني رفعته.
رفضته لان خفت ما يعرف شنو جانت حالتي او من يعرف يبقى يفكر شلون
اخذ وحدة مثلي اخاف يصير شي و يعيرني بالماضي مالتي.
شبيجج نازز؟ شنو هل الاستحقار أتجاه نفسج.
هاي الحقيقة.
غلطانة و انتِ مابيج شي مجرد صارت عندج حالة نفسية قوية أثرت عليج هاي اني لليوم أتعالج و أحاول أتخطى ماضيي اخوج عافني؟ لا بالعكس لليوم هوَ يساعدني اتخلص من الماضي مالتي و اتخطاه واگف بظهري دائمًا، لا عبالج ما غلطت لا غلطت هواي و اني تحت تأثير تعبي النفسي بس جان بكل مرة يسندني شلعت گلبه دمرته خليته يفرفح بقهرره بس ماترك ايدي ما اگلج اتشافيت و تخطيت بالكامل بس وضعي احسن من قبل، اللي يحبج راح يتقبلج بكل حالاتج و بعيبوبج و بكل سلبياتج و ايجابياتج، مستحيل كل هالسنين شگد عشت بتعب و جهد هد حيلي وصلت مرحلة حتى بنتي وزوجي نفرت منهم بس تمسك اخوج بيَّ چان أكبر و أقوى أنطي النفسج فرصة الج حق تتزوجين تكونين أسرة ما ناقصج شي و بكيفج بعد.
طلع ارسلان شافنا واگفات اجه يمنا.
ارسلان: اممم شتسون.
غياهب: نسولف.
بقى ساكت عيونه على اخته اللي بدأت تضرب صفنات و هوَ تركيزه بيها.
ارسلان: تصفنين ناز.
دارت بعيونها ابتسمت.
ناز: شغلة شاغلة بالي و دافكر بيها.
الله لا يشغل بالج بحيرة خوية.
رجعنا دخلنا جوا درغام لليوم ما بطل سوالفه ويا ابوبة و يگابله ظل يصيح مررررتي
گاعدين نضحك بس أحس بشعور صار بصدري كلش زعجني داتصير.
عندي أعراض من فترة بس مغلسة عنهت، ضاق تنفسي و مثل الحرقة تصير عندي
ماجانوا منتبهين عليَّ الا لمن خالتي وجدان انتبهت عليَّ اجتني تركض.
وجدان: بسم الله شبيج ماما؟
أشرت ال درغام يطلع وياخذ الاطفال اخذهم و طلع فتحت حجابي لزم ايدي ارسلان يباوعلي بخوف.
ارسلان: خلينااا ناخذهااا للمستشفى.
عدلت حجابي حنين ايدها ترجف بخوفها اگدر أشوفهم بي ما اگدر احجي.
رفعني من مكاني طلع بيَّ ابوية و خالتي ويانا ساق مثل المجنون و ابوية يصيح
بي لا ننگلب لحد ماوصلنا للمستشفى دخلوني للفحص خالتي و زميلتها
تفحصني طلبت الدكتورة يسولي فحوصات و تخطيط قلب.
وجدان: هاي الأعراض اول مرة تصير عندج؟
غياهب: لا تكررت قبل بس أهملتها.
سئلتني الدكتورة.
الدكتورة: هم يصير عندج دوخة او حالة مثل الدوار؟
اي من كم يوم و اني بالمكتب صارت ويايَّ.
تعرق أرهاق؟ يصيبج.
اي.
قصرتي يا غياهب.
ليش عفواً شاكة بشي؟
ارتاحي هسه بين ماتطلع تحاليلج و التخطيط.
طلعت هيَّ و خالتي بقيت وحدي أفكر شنو اللي ممكن يكون بيَّ، دخل
ارسلان سحب كرسي گعد بصفي حاضن ايدي يبوس بيها و گان لمسته كافلة تطمني أبتسم رغم قلقه.
ارسلان: خوفتيني عليج.
غياهب: مابيَّ شي.
شلون مابيج شي يا عيني شوفي وضعج من شوگت جاي تصير عندج هل الحالة احنا شمتفقين؟
عضيت شفتي من ألم صدري.
عبالي بسبب التعب اللي داواجه بالشغل.
ننتظر التحاليل.
دخل ابوية هم خايف عليه رجعت خالتي طلبت الليلة نبقى بالمستشفى للصبح
انشوف التحاليل ردت أعترض بس ارسلان سبقني و گالها.
ارسلان: هايهية.
الليل كله مگابلني و گاعد انام و اگعد اشوفه گاعد عيونه بيَّ اخر مرة فزيت بيها سئلته على سيرين.
غياهب: سيرين وين بقت؟
يم خالتها لا تخافين رايد ياخذها خالي و حنين ما قابلة.
هسه تلگاها گاعدة خانسة هادئة و خايفة بنتي أعرفها اذا ماموجودين يمها تتغير.
يمها خالتها حبيبتي نامي و ارتاحي.
وانتَ؟
ما أنعس.
غمضت عيوني تفكيري صار يم بنتي و لا مرة عفناها وحدها لو باتت يم
احد للصبح اجت خالتي و الدكتورة طلعنا الغرفتها الخاصة گعدنا بداخلي قلق و هواجيس لازمتني طول الليل.
الدكتورة: هسه شفت فحوصاتج.
ارسلان: ان شاء الله ماكو شي خطر؟
مسحت على وجهه بحيرة ابوية الواضح عنده علم من ملامحه بقيت مركزة عليها.
عندج مشاكل بالقلب و لا سامح الله اذا بيوم ساءت حالتج اكثر ممكن نضطر ندخلج عمليات.
ما همتني نفسي بگد ماهمني وضع ارسلان اللي تغير رد عليها و الكلمك طلعت منه بصعوبة.
خطرة المشاكل عليها؟
الحمل خطر عليها و لازم تتبع علاج.
بقى يحجي و يستفسر عن وضعي نزلت دموعي بضعف و قلة حيلة
و اني داتخيل بنتي يصيرلي شي و اعوفها حضني ابوية.
سلطان: گولي يا الله بابا.
غياهب: لشوووگت ابقى تحت الاختبارر بكل مرررة ارجع اوگف بيهااا على رجليَّ أرررجع أنكسررر.
رب العالمين يحبج و جتي يختبر صبرج و ربنا أذا أحب عبد أبتلاه.
تعبتتت تعبتتتت من هل الاختبارات والله تعبتت اريد ارتاح اعيش بدون ألم مااا اريد اعوووف بنتي.
غصيت بدموعي أشهگ بتعب روحي فرفحت شوگت ارتاح اني شوگت.
وجدان: اهدئي ماما منو گال تعوفين بنتج اكيد اذا اهتميتي بنفسج.
ودرتي بال على حالج و طبقتي كلشي ماراح يصير شي يخوف بس الحمل مايصير لان خير عليج و راح يتعبج.
ما أريد شي اريد ابقى يم بنتي.
رجعنا للبيت راح ابوية يجيب سيرين من حنين و احنا دخلنا للبيت ارسلان ساكت مانطق شي لازم ايدي.
ارسلان: اگعدي ارتاحي.
نزعت الحذاء تمددت على القنفة أحس بأيدي مثل المورمة من سئلت خالتي
گالت أحد أعراض المرض، اجه ابوية اول ما دخلت سيرين.
اباوعلها تدور بعيونها ركضت المطبخ مالگتني عيونها مدمعة رجعت للصالة
مجرد لمحتني اجتني تركض ذبت روحها بحضني حاضنتني بحضنها الدافي.
غياهب: بنيتي.
سيلي: وين لحتي (وين رحتي)
چان عندي شغل، اممم اشتاقيتيلي؟
هزت براسها اي رجعت حضنتها مغمضة عيونها اتمنى اگدر اخليج
سعيدة و ما اسمح الشي ينقص عليج ابوية راح اجه ارسلان گعد بصفي حضني و سيلي نايمة بحضني.
ناز.
فكرت بكلام غياهب وصللنا خبر مرضها الكل ضاج عليها لان ما تستاهل
ماشافت الراحة هالبنيه عبالك احد داعي عليهم بمغربية هيَّ و ارسلان
ماشافوا الراحة اذا يرتاحون فترة تطلع من عيونهم و لازم گلوبهم تفرفح
مرت كم يوم و اريد احجي ويا ارسلان بس متوترة و خجلانة شكله اريد احجي
ويا صديقك و من يگول الولد بعده ينتظرني.
غرام بلشت دوام بمدرسة أهلية لان ماكو تعيينات جهالها هادئين يبقون.
يمي نححت من السادس ابتدائي بالخارجي و هسه داجهز نفسي للثالث
و مرات اگعد ابجب من صعوبة المواد على رغم خالي وغرام ما عايفيني بس مواد الثالث صعبة.
سراج: ناز.
ناز: ها حبيبي.
جوعان.
اي هسه اسويلك اكل انتَ و أخوك روح اگعد يمه.
طلع وبايده طوبته اباوعله گعد يم مليكك و إلياس سويتلهم اكل اخذته الهم
گعدوا ياكلون عقال فدوة، باوعت المليكة عيونها مدمعة حضنتها.
ناز: مشتاقة العمورة مو.
مليكة: اي والله يا يمة هوَ و مريته هم راحوا من بعد ارسلان و مريته.
هيَّ هاي الحياة ملوكة ماكو شي يبقى مثل ما هوَ، اخواني اتزوجوا و
صاروا مسؤولين، ارسلان عنده مرته وبنته و عمر عنده نيروز اللي يعاملها معاملة الأب.
الله يسعدهم چا شريدن انا.
جنت داخلة بمود الحزن و التعاطف ما احس غير جرتني من اذني.
ناز: شكووو يااا.
وانتِ وللج ام شعر المزنجررر ليش رافضة الولد.
يااا ولد هذا؟
صديج ارسلان.
بس خلي نتفاهم.
أكسرن رجليج هسه و الزهرة شبيه الولد شحلاته وخوش ولد يگول أخوج.
الله يحفظه الاهله.
چااا انا شعليه انا اريدن الموافقة منج.
يا موافقة؟ رجعناله الرفض و سديناه للموضوع من زمان هسه الرجال تلگي ديفكر يخطب و شالني من باله.
رجعت جرتني من اذني خلتني اكمز واني بمكاني.
تاااكلين تبننن و الحسين اطيحن حظج، رجع خطبج من اخوج.
سكتت اباوعلها انبلع الكلام حجيت بعدم تصديق.
شنو؟ قصدج رجع خطبني مرة ثانية؟
اي واكسر عوجيتي على ظهرج اذا گلتي لا.
ما انكر شي بداخلي فرح رجعت اسئلها احارب ماتطلع ابتسامتي و انفضح.
اگلج مليكة خاف انتِ مخربطة؟
انجبي من تغسل لهل الوجه الابيض.
هسه هذا مدح ذم.
رفعت عوجيتها واني طگيتها بركضة اركض اخوي عامر دخلت للغرفة ايدي
علي گلبي ظليت اكمز و اضحك بالغرفة اضحك بدون صوت اخاف
تسمعني مليكة عضيت شفتص بخجل و اني اشوفه رجع خطبني و اني رفضته قبل.
بس اختفت ابتسامتي اني ما اعرفه و لا اعرف اطباعه اخاف مايطلع
مثل اخواني، بالليل مليكة العيارة خابرت ارسلان انطته موافقتي بدون ما تسئلني اسمعه يگلها.
ارسلان: سمعتي الموافقة بلسانها مليكة لو من يمج بروح ابوج.
مليكة: دهررر دهررركم فريتوني فرررر.
اجت دخلت يمي وبايدها عوجيتها و التليفون بايدها الثانية.
مليكة: هااك حاچيها.
لطمت على خدي ياگاع انشگي و بلعيني حطتني بموقف محرج عضيت اصبعي بخجل من اخوية.
ناز: هلا ارسلان.
ارسلان: هلا بيج بابا شلونج.
الحمدلله.
ما اريد اطولها عليج مليكة خليتها هيَّ تحاجيج لان يمكن تفهم عليج اكثر
و غياهب سولفتلي عن خوفج مُجاهد يدري بكلشي يخصج ناز و الولد گال
ما يهمه بماضيج ورجع خطبج مني فَ انتِ شنو رأيج؟
بقيت ساكتة اكل باظافري من توتري و مليكة تأشرلي انطي جواب وروحي انسحنت سحننن.
بكيفك.
شني بكيفي قابل انا الراح اتزوجه غير انتِ.
هااا، اييي.
شنو اي؟
يعني هذا شسمه اي هايهية.
ذبيت التليفون على مليكة طلعت من الغرفة خدودي مولعه بالخجل و غرام تتغامزلي.
غرام: ناز بس گولي بلس بيج خير و دللي.
ناز: ولللج اش لااا يسمج خاالي.
يدررب يدرري بكلشي.
هاااا.
هسه عرفت ليش شفتي الرجال بالحلم طلع نصيبج و اني الفاهية عبالي حلم عابر.
گعدت يمها بالمطبخ اسولف وياها.
بس علوية اني ما احبه حب يعني بس لان خوش ولد و عادي مو شرط الا واحد يتزوج على حب.
اعرف عمري مرات الزواج التقليد أحسن من الحب و مرات العكس
كل شخص و قسمته اني و خالج اتزوجنا زواج مو حب بس بعد الزواج
صار الحب بينا، و كُميل حجالي عن الولد گال خوش ولد و حباب و خلوق و ماعندههم شي بس امه واخته وياه بالبيت.
سكتت دخلت مليكة گالت.
مليكة: باجر يجون اهل الولد يطلبونج منه، ام سراج جهزيها وشوفن شناقصجن انجيبه الجن.
غرام: صارر خالة.
طلعت و اني التوتر اشتغل عندي دخلت ويايَّ غرام تشوفلي شي البسه.
باجر طلعت ملابسي اختارتلي فستان مرتب لونه چويتي و گالت ارفع شعرج
شعري مو طويل جايبته تبتر اگص بي الثاني يوم گعدت مخلوسة و بطني
ماغصتني عبالك راح ادخل بحرب، ظلينا نفتر جان يوم جمعة و غرام ماعندها
دوام اتفرغتلي بدأت تجهز إلى ماحطيت و لا قطرة مكياج گاالت مليكة يشوفونج
علي طبيعتج احسن، كملتني بقيت بمكاني احوص بالتوتر.
مرت ساعة واجوا أهله وياهم حنين و خالة ام درغام اباوعلهن من الباب.
هسه شلون أدخل والله استحي، دخلت غرام جهزت الضيافة و أشرتلي.
غرام: يلااا تعاي ورايَّ.
ناز: اخجلل لِچ غرام.
هنَّ بس نسوان مثلنا.
عود انتِ صرتي ام فلان و صرتي ما تستحين نسيتي روحج.
ههههههههه تعلمنا من التجارب و تغيرنا يلا عيني ورايَّ.
طلعت وراها و گلبي الچلب عبالك شعنده يدگ سرريععع دخلنا سلمت عليهن
ورجليَّ گوا واگفة عليهن دحست روحي بصف مليكة و امه تصلي على محمد وآل محمد.
هيَّ و خالة جوهرة حچت ام الولد مبتسمة.
ام مُجاهد: حجية بعد ما يحتاج احجيلكم عن ابني انتم تعرفونه و الوليدات يعرفونه الله يحفظهم.
مليكة: و النعم منه يمه.
مليكة گاعدة عبالك شيخ عشيرة ضيمت ضحكتي لا تنفضح غمزتلي حنين اللوتية.
حنين: وليدنا عركة بالواتساب ماعنده كلش مؤدب و مانغشكم راح يدلل بنيتكم
و يخليها أميرة لا شنو أميرة عمي ملكة صوم وصلاة و.
گرصتها اخت مُجاهد شكلها بريئ و بسيط.
زهراء: ولج اسكتي مُجاهد يگول لا تحجن عني هيج و تطلعني نبي خاف تجي يمي البنيه و تنصدم.
بسسس لا مايصلي اخوج.
لا خيه يصلي الحمدلله بس گال لا تبالغن بالمدح عني لان الجماعة يعرفوني.
والله اخوج شريف وذابها بالصدگ ويا العالم.
ضحكنا كلما و اني مبتسمة مثل الفاهية و الصدمة هنا من گالوا راح تصير
شوفه شرعية صرت الطم دفن شكو شوفة شرعية واحنا شايفين بعض همست المليكة.
ناز: شنو هاي مليكة.
مليكة: لا تخجلين يمة مابيها شي.
طلعن البنات كلهن بقن بس النسوان الكبار گلتلها ما اريد وحدي نزلت عيوني
من شفته دخل سلم و گلبي ما أدري شصارله سلم برزانة و ثكل گعدنا الحمدلله الثول
ما يعرف يطلع بس بهيج مناسبات و تتفشلل عيوني ماشلتها و هم يسولفون
رفعت عيوني اباوعله ابلع بريگي رگبتي انكسرت چان مبتسم ويسولف وياهن.
صفنت بملامحه عينه صارت عليَّ بسرعة نزلت عيوني الحرارة صارت تطلع.
من اذاناتي بعد مارفعت عيوني اغم بروحي بداخلي هسه يگول هاي تباوعلي
ربع ساعة و اترخص طلع، اتفقوا على المهر ماطلبت مليكة هواية للي يكفيلي
و الوالد گالولها على گد اللي تحتاجه احنا مانقصر واول و تالي هوَ راجع
الهم حددوا الاثنين العقد و الحفلة يعني بعدّ يومين؟
راحوا وگفت أتنفس سريع يومين لا مستحيللل شلحگ بيهن صارت ركضة
بركضة حجزنا الكوشة جابوها نصبوها بالصالة طلعنا للصالون اني و غرام.
و غياهب وضعها تعبان ما ادري اذا تجي او لا للعقد بس اتمنيت تجي
حجزنا للصالون اشتريت قفطان لون ابيض و من الصدر بي شغل مرتب اجه اليوم المحدد.
راحت ويايَّ أنسام للصالون وام الصالون تگلي ماتحتاجين مكياج و هنياله
اللي راح تصيرين من نصيبه خلتني اخجل من كلامها اشتغلتلي شغل مرتب مال عقد، اجه خالي اخذنا بالسيارة گال.
كُميل: شو ارفعي هذا عن وجهج خلي أشوفنج.
رفعته مبتسمة ابتسم بوجهي.
الله يحفظج خالي.
وصلنا للبيت دخلت الغرفتي لان بعدهم ما جايين اهل مُجاهد اتصلت بنيروز
اشوفها شلون طلعت فتحت الكام وعيونها فتحتهن بأندهاش.
نيروز: فللك فلك شطالعةة تموووتين وحق الله.
ناز: هههههههه شكراً.
اجه عمر گعد بصفها خجلت ايشوفني بهيج وضع بس بعد شافني عيب ابتعد صوفر بس شافني.
عمر: عمي هذا مُجاهد انا منه حتى صلاة الليل ألتزم بيها لان الله انطاني هيج مرة.
نزلت عيوني خجلانة من كلامه گالتله نيروز.
هههههههه عمر لا تخجل البنيه.
أتغزل باختي.
ناز: ماتجون زيارة؟
عمر: والله ما ادري شوية شغل لازمني بس اذا صارت فرصة الله كريم.
دخلت انسام گالت اجوا اهل العريس انطيتها الجهاز سلمت على عمر و مرته
سدته طلعتني عج الصوت بالهلاهل و ام مُجاهد تقرأ عليَّ ايات قرانية جايبين
وياهم ناس يمكن اقاربهم مرت وقت و گالوا جهزوا البنيه علمود العقد.
رفعت راسي بابتسامة من دخلت غياهب و بنتها كاشخات و طالعات.
يخبلن غمزتلي غياهب من بعيد تضحك ضحكت على ضحكتها طلعوني بمكان
منفصل عن الصالة يعقدولنا فتحوا القران حطيت ايديَّ عليه طبكت حواجبي
بأستغراب من شفت ايدين رجال صارت تحطلي و توزع بالهيل بيم اصابعي بدون
ما يطخني رفعت راسي دمعت عيوني من شفته اخوية ارسلان.
ارسلان: شايفة كل الخير بابا.
كمل و وگف على جهه طلب منهم يدخل مُجاهد و السيد ما اشوف شي بس اسمع.
اصواتهم بدأ السيد بتلاوة الخطبة الشرعية بعدها بدأ ياخذ بموافقتنا.
السيد: ناز حسين اسماعيل هل تقبلين الزواج ب مُجاهد خليل يوسف.
كررها مرة ثانية انطيت موافقتي.
ناز: نعم أقبل.
رجع وجه نفس السؤال المُجاهد.
السيد: مُجاهد خليل يوسف هل تقبل الزواج ب ناز حسين اسماعيل.
موافقته دگت بگلبي قبل لا ينطيها الهم.
مُجاهد: نعم أقبل، چاا صارلي دهر أنتظر هل اللحظة تالي اگلك ما موافق.
الكل ضحك و اسمع الصوت ارسلان يهمسله.
ارسلان: بسيطة گدامي تحچي هيج.
أكتمل عقد زواجنا ذبوا علينا الورد و المي الورد و أعتلى صوت الهلاهل
رجعوني للصالة و الكل بدأ يبارك مر وقت قصير و گالوا راح بدخل علمود نلبس
الحلقات ما اشترينا ذهب بس حلقات، اتقدمت غياهب تعدلي بشعري.
غياهب: يحلوة لا تتوترين.
ناز: هسه راح يوگف گدامي گدام الناس كلها هاي.
قابل راح ياكلج هوَ تلبسون الحلقات.
أجت سيلي وگفت يمنا انتبهتلها لابسة نفس لون فستان غياهب ماروني و.
هيَّ ماشاء الله جميلة لزمتها غياهب من ايدها.
غياهب: تعاي ماما مايصير توگفين هنا.
سحبت ايدها من امها وتخوصرت الها طابكة حواجبها.
سيلي: و ليس؟
مو عمو مُجاهد راح يدخل العروسته.
اخذتها من ايدها دارت وجها إلى دزتلي بوسة بالهوا ضحكت على سوالفها
مو بنية شيطانة، دخل مُجاهد رجعت اجواء الاحتفال بالاغاني و الدبكات
العراقية و الهوسات وگف يمي عطره يهفهف وراه.
مُجاهد: احم. من رخصتكم أريد سيلي تجيب النا الحلقات.
هسه سيلي تحس بالخيانة المعجبة بي تقدمله حلقات خطوبته، اجت تمشي
بهدوء لازمة الصندوق وصلت النا نزل الها مُجاهد المستواها باسها بخدها
و هيَّ حضنته رجعتله البوسة غياهب وجها صاررر احمرر من الضحك
انطته الحلقات وراحت تركض الامها، لزمت الحلقة و ايدي فقدت توازنها
ما ادري ليش احنا العرايس يصير عندنا هل التوتر الفضيع لبسني
الحلقة ملمسه لامسني قشعر جسمي لزم ايدي قبلها و همس.
مُجاهد: أرحمي بحالنا بوية.
ما اگدر ارفع راسي يمةة گلبي الخجل سيطر عليَّ كملنا لبس الحلقات
شهگت بصمت من ايده اتسللت وره ظهري حاضني ابتسم و هوَ يباوع للناس اللي داتباركلنا.
مُجاهد: ليش تحظريني؟
بقيت صافنة مدا افهم عن شنو ديحجي بالضبط.
ناز: حاظرتك؟ وين.
بعدين أفهمج و أعاقبج.
بقيت ساكتة مفاهمته قطعنا الكيكة الجايبيها و المصورة توثق بكلشي
كملنا وطلع بس بقت ابالي شيقصد بدأت تمشي اجواء الحفلة الى ان خلصت.
وبدأت الناس تروح بقت بس عائلتنا حتى حنين راحت دخلوا ارسلان و خالي
اتباركولي، بدلت و مسحت المكياج إلى مخليته دخلت غياهب بايدها كيس حطته گدامي.
ناز: شنو هذا؟
غياهب: زوجج دزه الج.
فتحتها جان جهاز جديد رفعت راسي الها.
بس اني عندي جهاز.
ما ادري هوَ مسلمه الاخوج عادي.
حطيته بالكنتور وطلعنا اني وياها سيلي وسراج واگفين گبال ارسلان
يرگصون و خالي يضور بيهم بقوا بمنا لليل وراحوا، قبل لا انام فتحت الجهاز.
كامل من ناحية كلشي حتى مشحون باوعتله هذا شغال و اكثر من مكالمة عليه
جايتني هذا اكيد هوَ اتصلت بي و هوَ ما ادري ويامن يحجي و يگله حياك الله اجه صوت يحاچيني.
مُجاهد: وين چنتي بوية.
ناز: يم أهلي.
چاا ماگلتي هذا رجال منتظرني.
هفيت وجهي ابين نفسي طبيعية.
ما ادري بيك و شسمه مافتحته هسه شفته.
همس بصوت هادئ.
شبيج متشنجة رخي حبيبي.
هاا؟
ما ادري شبيه استثولت من گال حبيبي تحمحت و جبيني اتعرق.
لا ما متشنجة.
عجبج الجهاز؟
باوعتله جان ايفون.
ليش دزيت عندي جهاز.
هدية اعتبري و شيلي الحظر من رقمي.
يا رقم دخت؟
الچان يتصل بيج انا.
شوگت اتصلت عليَّ انتَ.
امم انا صاحب الارقام اللي جنت اتصل بيج وما احجي.
فتحت عيوني مامصدگة.
انتَ؟
اي والله انا.
حتى خطي كسرته بسببك.
مثل اخوج بس تكسرون سيمكارتات.
بدأ يسولف ويايَّ و يسئلني عن بعض الأمور بالمقابل هوَ يگلي اسئلي
اي شي ابالج ورايدته لا تتقيدين بشي مافتحنا شي من الماضي بطلب منه.
و لا اطرقنا اله، اعترف بالبداية ما گدرت أحبه مثل ما هوَ يحبني بس مع الايام
بفترة الخطوبة صرت اتعرف عليه اكثر و اكتشف بي شغلات بدأت مشاعري
تميل اله و چان العوض إلى و السنيني اللي خسرتها.
غرام.
بكل فرض أصلي أشكر ربي لان طلع كُميل إلى بذاك اليوم هوَ الاساس بتغيير
كل حياتي خلاني أترك كلشي و اتغير، أجاني أجمل طفلين منه
سراج و إلياس
أولادي ما قصر بشي قدملي كل الاحترام هوَ و عائلته خسرت عائلتي.
بس كان العوض هوَ انطاني عائلة ما يتقدرون بذهب، أنطاني بدل الأخ اخوان اثنين
عمر و ارسلان ونعم الاخوان اللي من عرفتهم لليوم ما سمعت منهم كلمة
تضوجني او تغثني و من دگوا صدرهم إلى بوگت ما أهلي تبروا مني چانوا
گد كلامهم ويايَّ، كملت دراستي تغيرت كل شخصيتي اذا اگول ما احس نفسي
سعيدة اجذب السعادة محاوطتني من كل جوانبي صرت العلوية القوية اللي تاخذ حقها مهما كان الدرب صعب.
بس مالوثت نفسي بحقارة الحقد و الكره و الحمدلله ربحي كانت عائلتي.
دخلوا كُميل و اطفالي صوت ضحكاتهم ملت البيت اخذت إلياس من ابوه بوسته اضحك وسراج لازمه بوه.
كُميل: فلسوني مابقى شي ماخذوا و ادري بيهم ما ياكلون.
غرام: اني اكل وياهم.
علوية؟
رفعت راسي مبتسمة.
ها كمولة.
اتقرب يمي يباوعلي بحُب و نفس النظرات اللي ما اختلفت طول هالسنوات.
كُميل: لمعت عيونج و لا تغيرت هاي اللمعة نفسها اللي خذت گلبي منين سنين ام العيون التلمع عاشگج انتِ و هل اللمعة اللي بعيونج.
غياهب.
أتمنيت أخطلكم نهاية قصتي بنهاية مثالية و سعيدة بالكامل لكن القدر
اله رأي اخر و مو دائماً النهايات مثالية و اني اليوم اگول الحمدلله على كل أختيار
خضعت بي من رب العالمين رب العالمين ما يبتلي الا ليشوف مدى صبر
عبده على مصائبه، ارسلان كان ونعم الزوج و الحبيب و الصديق.
أتحملني بأصعب أوقاتي ساندني بوقت اني جنت مرخية قبضة ايدي من علاقتنا
و من كلشي، اتحمل المايتحمله الا القليل بس لأجل خاطري و لأجل مايخسرني
و لازال لليوم يسوي كلشي في سبيل سعادتي و سعادة بنتي بس بقت غصة بگلبي
موت بنتي اللي ماگدرت اتخطاه لليوم اتعالج احاول اتخطى
الموضوع
اتمنيت ميتة بدون ما أشوفها چان ماتعذبت هالگد، مشاكل قلبي اتعبني بين.
فترة و فترة و العلاج مستمرة عليه مرات اتعب اكره الحياة بس اتذكر ربي بشنو أنعم عليَّ
بنتي سيرين أجمل عطايا الله إلى و أرسلان الاعرج العوض اللي صبرت لأجله
خطأ بالماضي لليوم ما ناسية شي بس سامحته من گلبي، نسامح
و ممكن نتخطى بس ما شي ينتسى بالحياة هاي قاعدة لارين غصة بگلبي و گلبه للموت
و بالنهاية اگول الحمدلله لازلت لليوم اتعالج لأجل عائلتي.
مُجاهد و ناز زواجهم اتأجل لأجل اسباب شخصية تخص مُجاهد.
اختي الحمدلله
بنص عائلة وزوج يحبوها و يحترموها عمر و نيروز بقوا و أستقروا يجون زيارات
بين كل كم سنة، سمعت صوت ضحكة سيلي دايتقربون اللي
غلقت الدفتر نفسه اللي كان بالماضي عند ابوية سلمه إلى من زمان مرات
اگعد اكتب بي شغلات محفورة بذاكرتي سديته انفتح الباب ابتسمت الهم.
ارسلان: گومي حضرة المحامية نزيد عمية ناكل شي گتلناااا الجووع.
غياهب: اجيت عيوني.
سديت الدفتر و حطيته بالمجر الخاص بيَّ، نزلت جوا وياهم و الضحك
مالتهم يخليني ابتسم لا ارادياً وگفت اسوي اكل دخل للمطبخ بشفته الجكارة
رفعني من مكاني گعدني على الكاونتر سحب الجكارة من شفته اتقرب قبلني بطرف شفتي.
ارسلان: أولريش أنثى الذئب
غياهب: عيونها.
أحبچ أعشگ كل تفاصيلج
حضنت رقبته اتأمل عيونه بنظراتي.
كلمة أحبك أحسها قليلة بحقك.
أبتسك نفخ بوجهي الدخان اتقرب همس بأذني.
الاعرج: الجكارة اللي تنشرب گدام وجهج تدخل التاريخ محترگة بفخر .
و ها قد جاءَ دَور قَلمي
يختُم لكُم هذهِ الرواية التي
ابتدأت بالأنتِقام و أنتهَت بالحُب
يحمُل بين طياتُها أعمَق التحولات العاطفية
حيث تتوَلد نيران الحقُد الى دفِئ المشاعر
و يَذوب جَليد القسوة أمام العشُق
ماكانَ في البداية مُجرد خطة للأنتِقام
أصبحَ درسًا في الندم و اثبتَ
أن الحُب قادِر على هدِم جُدران الكراهية
و بناء جسور مِن الأمل و في النِهاية.
لا يكون الأنتصار لمن أنتقمَ
بل لمَن أدركَ أنَ الحُب هوَ القوة الأعظم
التي تسَتطيع ان تُغير القلوب
و تَعيد رَسم القدَر بألوان جديدة مُشرقة
وهكذا بعدَما أستنزَف الانتقام كل مُبرراته
لم يبقَ سوى حقيقة واحدة لا يُمكن
إنكارها أن الحُب مَهما تأخر قادر
علي ترميم ما هَدمتهُ الكراهية
لم يكُن اللِقاء صُدفة ولم يكُن
الصراع عبثًا بل كان طريقًا طويلًا
مُتعرجًا قاد قلبين مُنهكين إلى إدراك
أن أقسى المشاعر قد تكون مُجرد.
أقنِعة تختبئ خلفها أرواح تبحَث عن الدُفئ
حين سَقطت آخر جُدران العِداء لم يكُن هُناك
مُنتصِر ولا مَهزوم بل عاشِقان أدركا
أن الحُب ليسَ ضُعفًا بل قرارًا شُجاعًا
وأن الغفران لا يعني النسيان بل التحرر
من قيود الماضي وهَكذا أنتهت الحِكاية
كما لم يتوقع أحدٍ لم يمت الحُب تحتَ
وطأة الانتِقام بل وُلد من بين أنقاضه، أقوى، أنقى، وأكثر خلودًا.