رواية وتيرة الأعرج للكاتبة حوراء السعيدي الفصل التاسع والأربعون
غياهب.
أخذ الورقة مني حطها بالجيب فتح باب السيارة خلاني صافنة بتصرفه.
ارسلان: أصعدي غياهب.
أفترت عيوني للمكان إلى أحنا بي واگفين مو مال نقاش بس هاي
صارن نقطتين النقطة الاولى موضوع الحماية، و هسه النقطة الثانية موضوع هاي الورقة.
صعدت بدون ما احجي شي بس اعصابي تفور فور كاتمتها
اتعلمت من اخطائي بالماضي التسرع غلط مهما كان الموقف.
اجه صعد بمكانه لزمت أيديَّ ببعض ضاغطة عليهن أحاول أسيطر على عصبيتي سئلته بهدوء.
غياهب: ارسلان.
شغل السيارة و رد بدون ما يباوعلي.
اسمعج.
اگدر أشوف الورقة؟
بدون أي تفكير گال.
لا.
معناها احچيلي شنو إلى بيها؟
ما أدري لان ما فتحتها.
أي و أفتحها شمنتظر؟
دار وجهه إلى طابك حواجبه.
وين نروح بالاول الاهلي لو أهلج؟
رفعت حاجبي أتحده نظراته.
الورقة أنطينياها.
كافي حبيبتي ليش تخلين فرحتنا تخرب.
الورقة؟
غياهب.
گلت الورررقة بيبي.
راح أطلع الأهلي بالاول.
الورقة.
ضرب الستيرن بقوا بايده، رغم عصبيته بس مت بينت توتري بقيت ثابتة على موقفي.
ارسلان: اتريدين الورقة مو؟
غياهب: اي.
هز براسه يخزر بيَّ طلعها من جيبه حطها گدامي و صاح.
اتفضلييي.
اخذتها منه عيوني تباوعله بشك قبل لا افتحها قلبتها للجهة الثانية
ابتسمت رجعت رفعت راسي اله و هوَ يباوع للشارع من الجامة.
ارسلان؟
رد بدون ما يباوعلي.
اممم.
لا تتشاطر ويا وحدة دارسة القانون.
رجع يباوعلي بعدم فهم.
ما فهمت.
رجعت خصلات شعري الواگعة لگدام وره اذنب أبتسمت بوجهه
قربت نفسي عليه ايدي رفعتها الصدره نقرت عليه باطراف اصابعي.
اني وانتَ نعرف كلش زين شدا احچي.
شبيج غياهب؟
نزلت ايدي بهدوء على جيب البنطلون لزم ايدي مانعني.
هاي شبيج حبي.
ايدك شيلهاا.
مو نطيتج الورقة.
اه؟ و هيج اني غبية و أصدگ هل الورقة نفسها إلى چانت
علي السيارة و انتَ الاعرج تنطي شيء خطر بسهولة؟ ما حبيت هالحركة منك.
دفعع ايده و گدرت أسحب الورقة الأصلية منه أبتعدت عنه مبتسمة بأنتصار.
من تجذب بعد جذب على واحد قشمر و غبي مو عليَّ.
مسح مكان محياه بقلة صبر ساكت، فتحتها و كلي فضول اعرف شنو
الي بداخلها، طبكت حواجبي بأستغراب من شفت الورقة مامكتوب
شي بيها غير رسمة سهم و بالدم؟ مو بقلم السهم المرسوم بالدم واضح بلعت ريگ و اني اگول.
ش. شنو هذا؟
أخذ الورقة مني يباوعلها صفن مثل صفنتي بيها.
غياهب: شنو معناها ارسلان؟
عصرها بين ايده و أردف.
ارسلان: تهديد مُبطن هذا.
ليش؟ و من منو؟
رفع بانظاره و صدمني من گال.
جدج سالم.
بقيت صافنة و جسمي تشنج أحاول أفهم كلامه.
جدي سالم؟
اي.
بس ليش يخلي تهديد الك؟
لان عرف انا إلى حرگت المعمل و بي مجيد و داز فيديوهات الخوالج يهدد بيهن.
ثواني ارسلان خليني استوعب؟ إلى أفهمه هسه انتَ حياتك بخطر؟
مو بس انا غياهب حتى خوالج مخلي أباله يحاسبهم لان سكتوا عني بخصوص مجيد.
و ضامين هيج شي خطير عليها فرحانين يعني؟ تعررررف
منو سالم لووو لا. ،؟ انسااان مجرم خطيررر مرررته و ذبحها بايده.
غياهب لو حچينا الخوف و القلق يسيطر على الكل سواء انتِ أو اختج أو الباقين.
هسه عرفت ليش أنحطت الحماية و ليش أبوية و خالي چذبوا عليَّ
طلع هيج الموضوع چنت شاكة والله العظيم شكيت دا اتضمون شي.
لزمت جبيني مختنگة.
جاي ندور عليه غياهب جدج مو سهل و الله العالم يجوز اكو.
من جاي يساعده لان ما معقولة الاخطر منه احنا لازمين و ماتعبنا هالتعب
الا جدج اكو شي غريب وراه اكو من جاي يمررله كلشي.
ماجاوبته بعد متأكدة جدي ماراح يسكت مشت السيارة و اني بنص
عاصفة أفكاري طول الطريق دايخة بتفكيري فرحتي بخبر التوأم انكسر
بس مو شي جديد اني گضيت عمري فرحتي ناقصة فزيت على صوته.
ارسلان: غياهب.
رديت بضياع.
غياهب: هاا.
شبيج بابا مو صارلي ساعة أحاجيج؟
ما ادري ما سمعت جنت صافنة.
لزم أيدي يحاول يهديني و يطمني بس شيطمن گلبي بعد.
انا يمج لا تخافين.
ارسلان شلون لعد طالعين احنا هيج وحدنا و الوضع خطر ممكن يسوي شي النا.
منو گالج وحدنا.
لعد؟
أكو حماية ورانا بس بدون ما أحد ينتبه عليهم يمشوون ورانا.
لعد ليش ما شافوا اللي حط الورقة.
و انتِ من كل عقلج سالم بنفسه يجي يحط الورقة؟ جدج شايب بس عقله عقل استخبارات.
زفرت نفس مصحوب بحسرة.
الوضع صار لا يطاااق بقت بنفسي نعيش بهدوء عبااالك مسلسل.
هندي حتى لو مسلسل هم چااان خلصت حلقاته و انحسمت النهاية.
من شافني انفعلت غير الموضوع يريدني اتناساه بس شينسيني.
ارسلان: ما گتيلي شنو ابالج اسماء البناتنا.
غياهب: ما ابالي عقلي اتشوش بهل السالفة ارسلان اني خايفة والله.
عوفينا منها و خلينا نفكر بهل الجميلات إلى بداخل بطنج.
الجميلات؟
هز راسه مبتسم فرحان بيهن.
جميلات ابوهن الا أدللهن دلال محد مدلل بي قبل بناته يشهد ربي.
يمة يمة.
و أدللج وياهن لا تغارين.
ما أغار من بناتي.
اممم عبالي.
أحنا وين رايحين هسه؟
الأهلي مشتاقلهم و هم شو ضايعة أخبارهم، مصرف ناز انطيتي ال عمر؟
ما شفتهم بس بابا وصله اله.
عاشت ايده.
درت وجهي اباوع من الجامة شنو قصة هذا السهم اللي بالدم؟
شنو المقصد من هيج حركة؟ أكيد قصده يقتل أحد و الا ليش يخطه
بالدم بمنو راح يفجع گلبج يا غياهب؟ سالم و أعرفه ما يسكت.
دخلنا بشارع بيت أهل ارسلان و أذن المغرب صابتني قشعريرة.
و اني اسمع المؤذن يصيح الله أكبر ، نزلنا اجه يمشي بصفي حاوطني بايديه من وره.
ارسلان: أبتسمي لا تبقين ضايجة.
غياهب: أبتسم و حياة الكل بخطر؟
الكاتبة رب العالمين يصير و أحنا ما ساكتين عن الوضع جاي انسوي اللي بايدينا.
دگينا الباب طلع النا عمر باوعناله بأستغراب من حالته و وضعه
مو عمر اللي نعرفه سلم علينا و حتى سلامه مو مثل كل مرة دخلنا جوا.
و ارسلان عيونه متبعة اخوه يباوعله بأستغراب من أمره، اتلگتنا مليكة لابسة ثوب الصلاة وبايدها سبحتها.
مليكة: هلا يمة هلا بيكم.
حضنتها و طولت بحضنتي السبب هل الانسانة حنونة و طيبة بكلماتها.
غياهب: مشتاقتلج ملوكة.
بعد روحي فدوة الهل المبسم.
أتقدم ارسلان باس راسها سلم عليها و عمر واگف يباوع بضياع بقت عيون ارسلان تراقبه.
ارسلان: چا وين خالي؟
عمر: بالشغل بعده ما راجع.
دخلنا جوا للبيت اجن البنات ناز و غرام سلمن علينا و اكيد استاذ
سراج بدون مقدمات شمر روحه على ارسلان و اشتغل المباوس
و المحاضن بينهم أبتسمت المنظرهم ردنا نگعد صاحت بينا مليكة.
مليكة: گوموا صلوووا مو گعدتوا.
ارسلان: اييي اييي مليكة هسه نثلي قابل شبينا ما أنصلي.
ولك السربوت أعقل راح إتصير اب.
چاا شمسوي انا مگدرتج بس عليَّ لان شفتيني فقير.
ربي عقله.
يعقلج ويايَّ و يدزلج رجل يخلصنا منج.
بقت ترزل بي بالضحك و هوَ يضحك يتقصد يحچيها، انطى سراج
الأمه وطلع يتوضع علمود يصلي طلع عمر وياه باوعت للبنات استفقدت نيروز بينهم.
غياهب: لعد وين نيروز؟
غرام: بغرفتها.
شعجب مو يمجن هيَّ ما أتحب تگعد وحدها؟
أجت ناز گعدت يمي و تباوعلي بنظرات طاغيها الحزن.
ناز: ليش خالج ما حچالكم؟
عن شنو؟
هم اليوم چانوا عندنا قبل لا يأذن وتجون هم راحوا.
هاا بس شصاير عن شنو يگولون النا.
باوعت ناز للعلوية و رجعت تباوعلي رادت تحجي واجاها صوت مليكة و هيَّ تصلي.
مليكة: الله أكبر.
سكتن البنات ما حچن شي مرت دقائق و دخلت نيروز بقيت صافنة بيها
ما أرمش على شكلها شصاير بي عيونها عبارة عن كتلة من الدم
نهضت من مكاني اباوعلها بخوف و تسائل.
نيروز: هلا غياهب.
حضنتني و ابتعدت عيونها مدمعة وجها شاحب حضنته بين ايديَّ.
غياهب: شبيج نيروزه؟ ليش عيونج هيج صاير بيهن.
نزلت دموعها و هيَّ تباوع بعيوني بهل الاثناء دخل ارسلان و وياه عمر
شافونا واگفين هم ارسلان صارت ملامحه تتسائل مثل وضعي بسرعة باوع ال عمر.
ارسلان: شبيها مرتك؟
تحسر حسرة طويلة.
عمر: خلي نصلي و نحچي.
دخلوا للصالة الثانبة يصلون و الكل راح يصلي من ضمنهم اني كملنا صلاة و اجتمعنا كلنا بمكان واحد.
غياهب: ممكن أحد يفهمنا شدايصير؟
أخذت نيروز الحضني دموعها تنزل بهدوء اتخبلت بس اريد افهم شبيها.
اللحظة شكيت عمر غالط وياها بس الصدمة چانت أكبر من شكوكي كلها حچت من بين دموعها منتهية.
نيروز: اني مريضة.
شهگت بدموعها اجه ارسلان وگف گبالها بدون ما ايطخها.
ارسلان: على كيفج ويا روحج خوية.
رفع راسه الي.
شربيها ماي غياهب.
جابت غرام إلى تباوعلها بقهر شربتها گعد ارسلان يحجي وياها علمود نفهم.
ارسلان: اولاً سلامتج من المرض ثانياً مرض شنو فهمينا على كيفج ويا روحج.
كلنا اتوجهت أنظارنا على صوت عمر المختنگ من صدمنا و گال.
عمر: مرضها كانسر بالرحم.
توسعت عيوني بصمت بسبب كلامه سرطان؟
غياهب: شداتحجي انتَ عمر؟
صحيت على نفسي و من قمة صدمتي على صوت بكاء نيروز
العالي تبچي و كأنو أحد لاسامح الله ميت الها.
نيروز: ما أريد أسويهااا فدوة غياااهب مااا أريد لا تخلوني أسويهاا أدمرر والله أدمرر أفهمووني.
هيَّ تبچي و البنات يبچن على حالها گطعت روحها بالبچي، أحس بعقلي صار ما يجمع.
ارسلان: اكيد اكو علاج لهذا الشي؟
عمر: تخضع العملية قلع الرحم اذا تبقى هيج وضعها يسيء حياتها تصير بخطر.
صرخت نيروز بصوتها بعد كلام عمر الاخير.
نيروز: گتلك ماااا اسووويهااااا.
اجه گعد يم رجليها لزم ايدها عيونه تنزف قهر دموعه تلمع.
عمر: جاي تموتيني نيروز ما اتحمل خسارتج افهميني؟ خسرتج قبل مرة وردت أموت بيها ليش تعاندين؟
اذا أسويها ما راح اگدر أصير أم ما يصير عندنا أطفال دا اتفهم؟
ضمها الحضنه دموعه نزلت ويا دموعها.
ولچ يروحلج فدوة الف طفل و لا يصير بيج شي، ما يهمني هالشي و غلاتج على گلبي.
ردت تغصغص بدموعها.
راح تنحرم من شعور الأبوه بسببي.
قابل وروح أمي و أبوي قابل، انا اريدج الجما رايد شي ثاني ما يهمني يصير عندنا طفل مت يصير.
ابتعدت عنهم طلعت للحمام اغسل بوجهي مختنگة، انفتح الباب دخل ارسلان.
ارسلان: اسم الله غياهب شبيج.
حضنته و دموعي اخذت مسارها بصمت اخاف احد يسمعني اهمس بالكلام همس مختنگة.
غياهب: سرطان ارسلان سرطان سمعت إلى گالوا.
أكو أمل تتعالج بس لو تقتنع البنيه.
ايدي على حلگي امنع صوتي يطلع.
ارسلان: على كيفج ويا نفسج لا تنسين انتِ حامل.
ماتستاهل والله خطية نيروز انسانة طيبة.
إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ.
رب العالمين يختبر الانسان بكيفه لا أعتراض على حكمة و أختباراته.
أكو ناس حالتهم أصعب من حالة نيروز ماكو أمل حتى يتعالجون
و ما يفيدهم أي شي ينتظرون رحمة الله، بس نيروز عندها أمل بس
مستصعبة الموضوع و حقها مو هين تاخذ هيج قرار خلينا نوگف وياها.
فدوة ارسلان خلينا نقنعها اتسوي العملية نيروز معزتها بمعزة
حنيم أموت اذا يصيرلها شي اختي الثانية هاي.
ان شاء الله ما يصير غير المكتوب گومي بنياتي.
گومني يغسل بوجهي عيوني نار تطلع منهن، طلعنا من الحمام رجعنا.
يمهم دخلنا يم الباب رفعت راسها نهضت من مكانها تمسح بدموعها اجتني.
نيروز: بيج شي غياهب؟
حضنتها الصدري كاتمة دموعي ما اريد ازيدها عليها.
غياهب: ماكو شي نيروزتي نسولف اني وياج شنو رأيج؟
هزت براسها اخذتها وطلعنا للحديقة نمشي، گعدنا على الكراسي
الموجودات حطيت ايدي على بطني ابتسمت بوجهه.
غياهب: اليوم رحت للسونار اني و ارسلان.
مسحت دموعها ابتسمت.
نيروز: شطلع؟
توأم بنوتات جاياتي اثنين.
تستاهلين كل الخير يملن حياتج سعادة ان شاء الله.
دائماً چنت أفكر بحياتي الصعبة رغم وجود أبوية بس عشت أيام
صعبة بيها بس هالشي ما خلاني أفقد أيماني برب العالمين چان عندي
أيمان الله ما ياخذ شي الا يعوض بالاكبر و الاحسن، شي ما متوقعي
و لا حتى بخيالنا، مثلاً منو چان يصدگ اني اگدر بيوم أتقبل الشخص إلى عشت وياه ايام صعبة.
شخص يشهد ربي كرهته وصلت مرحلة اتخلص منه و هوَ نايم بسبب.
عذابه، بس بنفس الوقت منو يصدگ نفسه الشخص إلى ترك أنتقامه
الي صارله سنين يخطط اله علمودي اني؟ اختارني اني مابين انتقامه
و حبه، عرف اغلاطه و اتعاقب و تعب هوَ يصحح بيهن، انسان ديبذل
كلشي في سبيل يشوف الابتسامة مرسومة على وجهي و راح يجيني بنات اثنين من نفس الشخص.
الي غير غياهب نفسها غياهب الچانت ما تنزل دمعة منها وحدة من
أمنياتها تنزل دمعة مني علمود أرتاح، غير هواية شغلات بسببه حتى.
الاثار إلى چنت اكره اطلعها صرت اظهرهن بس مع كل هذا اهمشي
ما سمحتله يرتكب خطأ فادح يخلي طول عمره متعذب، المغزى من كلامي
هذا اليوم احنا دا انحارب لأجل نكون عوض للثاني و هالشي كله رب العالمين اله فضل بي.
خسرت امي انطاني أب مستعد يضحي بروحه علمودي، انطاني
زوج شگد ما أوصفه أكون مقصرة، رب العالمين ما ينسى عبده نيروزه
لا تيأسين من رحمته عندج اهل يحبونج وحيدتهم انتِ، عندج زوج.
يوگع قبل لا توگعين الصحة و العافية كنز للانسان يمكن ربج راح ياخذ
هذا الشي منج بس ضاملج سعادة تكون عوضج اضعاف
ركزي بكلامي نيروزه احنا بشر نخضع لاهواية اختبارات بالحياة
و الانسان ربنا يختبره بأعز ما يملك يريد ايشوف مدى صبره على
أمره و حكمة عوض رب العالمين يمحي كل مرارة يعيشها الانسان ينسيج ثقل الايام إلى عشتيها
العوض مر شرط اطفال، مثلاً راحة بال؟ نفسية مرتاحة عندج ناس.
تبتعد عن الاخطاء و المحرمات و تمشي على الطريق الصح هذا هم
عوض لان رب العالمين هنا هداه لهذا الطريق وبالنهاية نگول عوض
ربنا اجمل من كلشي مهما كان لو بمقدار ذرة.
نيروز: كلامج حلو غياهب اتمنى عندي صبرج و قوتج.
و منو گال انتِ ضعيفة اسمعي ماكو انسان ضعيف بالحياة
كل انسان عنده جوانب بحياته نبقى احنا بشر نضعف شي طبيعي
نبچي نتعب نعيش الحزن كل هاي طبيعية الامور دان بشر عنده مشاعر.
و أحاسيس هوَ مو صنم و يكون متجرد من هالمشاعر.
فزينا على صوت ارسلان من ورانا و هوَ يگول.
ارسلان: الله يعوض الدرجة تجعلك تخشى أن تكون مُقصراً في حمده و شكره.
سحب كرسي مبتسم گعد يمنا.
ارسلان: تسمحولي مو؟
غياهب: بعد انتَ گعدت.
خوش اسكتي خليني اسولف ويا زوجة اخوي.
سولف عيوني.
بس لا تحبيني هواي.
ضحكت نيروز على كلامه عرفته متقصد يحجي هيج علمود يضحكها
بدأ يحجي وياها و اني ايدي جوا جدي اباوعله و هوَ يسولف وياها.
شوفي خوية ماكو انسان ما يخسر بحياته اليوم اي واحد اتشوفينه گدامج
و تسئلينه انتَ هم خاسر بحياتك؟ راح ايگلج چا وين أكو بشر ما يخسر
و الخسارة أنواع، إلى يخسرله بشر عزيز عليه، إلى يخسر شغله
الي ينصاب بمرض و يخسر صحته هاي كلها خسارلت بس ربج يعوضه و لو ما تعوض بدنياه يتعوض باخرته
يسدلك باب و يفتحلك باب افضل منه، يعوض الدرجة يخلي
الانسان يفكر انا شلون حزنت قبل على إلى خسرته، ما ادري.
اذا كلامنا راح يخليج تاخذين القرار الصح بس فكري بي، عمر وياج
مو ضدج لو على گص رگبته ما يعوفج و اخوي و مربي على ايدي و اعرفه بظهرج رجال و النعم منه.
نيروز: شكراً الكلامكم ان شاء الله احاول أفك. بي ما تعرفون شگد ريحني كلامكم.
غياهب: أن الله اذا أحب عبداً أبتلاه.
اباوعله حك فوگ حاجبه.
ارسلان: اممم صح شوفي مثلاً هسه انا بلاني بغياهب وراسها اليابس علمود يشوف صبري شگد اتحمل او لا.
هاا ارسلان هاا.
أشاقة حبي شبيج نلطف الجو.
أني أعلمك.
اليوم أبات يم أهلي أعذريني أخاف منج.
باوعتله بطرف عيني اضحك اجه عمر انضم النا و عيونه بنيروز.
عمر: شلون صرتي؟
نيروز: احسن.
طلعت ناز هم اجت گعدت ويانا.
ناز: ارسلان.
ارسلان: ها بابا گولي.
ذاك اليوم اجت جيلان النا.
شتسوي؟ مو محذرينها ما تدخل للبيت.
عمر: استغلت طلعتنا اكيد تدري انا و خالي بالشغل وانتَ ماكو اجت هنا تغث بالبنات.
ناز: بس شنو كسرتهااا الك تكسر هل العايقة.
بقى ارسلان صافن بيها.
شسويتي؟
تگلي ما ناقصني بس المخابيل عود اني مخبلة گتلها لعد شوفي
المخابيل شتسوي شراح اتسوي جبت چفچير وشبعتها اضرب بي
طلعتها الباب البيت و اني اضرب بيها نوب قبل لا اطلعها هاي من گتلتها
تگلي اني اعلمج ما ادري شلون گتلها زيج بصوت اخوية حبيبي و گتلها ما اطلع تربية الاعرج اذا ما كسرتج.
غطى وجهه ارسلان ميت ضحك عليها شلون اتسولف بحماس و تشرح وهيَّ تضحك وياه.
ارسلان: عاشت ايدج بعد اخوج هيَّ جيلان ما ترتاح الا تنگتل
مرة انگتلت من غياهب و هسه منج و العلوية باقية فاهية.
هههههههه غرام تگول انفضحناا و تگولها النيروز گومي خلي نفاككهن و نيروز تگلهاا و لا اگوم.
تربيتي بعد.
غياهب: ناز طلع وره هدوئج مصايب.
غمزتلي تضحك و ترجع بشعرها القصير لوره.
لعد أخليها تسرحو تمرح بكيفها هسه عمر هم مثلي هادئ بس من يتعصب اوعع.
عمر: انچبي.
أحترمني و أحترمك.
و اذا ما أحترمتج؟
ما أحترمك.
تربية ارسلان ما عليج عتب.
أجت مليكة و غرام والله حسيت گعدة الحديقة أحسن من جوا بالبيت رغم الجو بارد.
غرام: متجمعين هنا و عايفينا جوا.
ناز: عود گعدة اخوان.
مليكة: خلونا نتعشى هنا.
ارسلان: خوش فكرة الجو حلو بس لبسوا سراج لا يستبرد لان طفل ما يتحمل.
غرام: لعد البسه واجي.
چا خالي ماله نيه يجي شني.
لا خابرته گال هسه جاي بالطريق بس عالك ازدحامات.
أكره الازدحامات تعطلنا حتى على شغلنا.
راحت غرام دخلت جوا تبدل السراج گاموا عمر و ناز جابوا فراش
لان الكراسي ماتكفي گعدنا بالگاع من فرشوا گعدت بصفث نيروز
حسيتها شوية ارتاحت من حجينا وياها و هم سوالف الولد و ناز
تضحك بيها بدوا ينقلون بالاكل وگف عمر يباوع الارسلان.
عمر: چا ماتگوم ويانا.
ارسلان: انا و مرتي خطار اخدمونه وانجبوا.
مصدگ روحك خطار.
دمشي لك.
راح عمر يضحك انفتح الباب الخارجي دخل منه الخال بايده علاليك.
مال حلويات و بيبسي سلمنا عليه گعد يمنا ضرب ارسلان على ظهره.
كُميل: شلونهم.
ارسلان: ظهري كسرته چا هوَ هيج.
رقيق ما تتحمل عيناي امسح عليك بكلنكس.
رجع ضربه ارسلان بنفس قوة الضربة هم على ظهره صاح الخال.
اشتعلللل شعلان المشعوووول.
بقوا يشاقون بينهم واحد يكبس و و واحد يرفع لحد ما صبوا
الاكل و سراج مگعدينه بيم ابوه وبين ارسلان و هوَ يوزع ابتسامات
النا يدور بوجهه على ارسلان ويرجع يدوره على ابوه ويصفك بايده يضحك.
عمر: ارسلان شنو وضع شغلك.
ارسلان: شبيه؟
ما مفهوم غامض و ما تحجي شي عنه؟
احسن عوفونا من شغلي لان ماراح تفهمون طبيعته.
غياهب: لا اتعبون نفسكم لان اني مرته ما يحجيلي شي.
كُميل: ولك بس لا تطلع اتاجر بالاعضاء.
ارسلان: اي و جهز روحك باجر ماخذك اخذ كلياتك اببعهن.
چا الاعرج انتَ تخوف.
صدگ خالي اريدلي سيارة زينة.
باوعله الخال و سئله.
چا وين سيارتك؟
أريد أغيرها من زمان عندي.
باوعوله الخال و عمر بشك بس غلسوا يعرفونه وراه سالفة.
كُميل: تعال للمعرض وشوف إلى يعجبك.
ارسلان: ذني اليومين جاي الك، استقبلني بالورد و افرشلي السجادة الحمرة.
يوصل الحجي الطرف الساني و اذكر أكو نسوان گاعدة.
أهتز جسم ارسلان يضحك جرت السوالف و الشقة بين الولد
اباوع للعلوية وجها اصفر ما تاكل تنقش بالاكل انتبهت عليها مليكة.
مليكة: ماتاكلين يمة.
غرام: هاا خالة دا اكل.
وينج تاكلين تصفنين خايبة.
مابي شي بس ما اشتهي على الواهس وياكم اكل.
باوعت
گدامي صدر ما دجاج ما أحبه همست الارسلان.
غياهب: ما اكا الصدر اريد الفخذ.
شال الفخذ مالته حطه گدامي رفعت راسي اله.
وانتَ؟
أكل وياج يحيلي.
بقى يسوي لفات و يحط گدامي حچى الخال و هوَ يباوعلنا.
كُميل: والله بنفسي اتشمت بيك ارسلان.
ارسلان: و عليمن.
وجه كلامه إلى الخال.
تدرين شچان يگول غياهب عليج؟
لزمت لفتي اكل بيها و اباوعلهم.
غياهب: شيگول خالي.
كُميل: اسمعي عيناي فد مرة گتله إلى متزوجها مو هينه يا خالي وراح تطيح حظك فنج شگال؟
صاح بي ارسلان.
ارسلان: خالي اگرررصهااا شوية.
ما تنگرص بعد خالك سد بوزك خليني أكمل.
غياهب: كمل كمل خلينا نسمع شچان يحجي بظهري الاعرج.
ارسلان: مااا حاچي شي شبيجج تصدگين بخالي جاي يفتن بينااا.
لا ابو سراج ما يفتن و لا يجذب.
ضحك الخال ضحكة أنتصار و البنات و عمر يباوعون بتركيز حتى نيروز وياهم يريدون يعرفون مثلي.
كُميل: يگلي تخسى هيَّ و أبوهااا.
بسرعة باوعلي ارسلان.
ارسلان: والله و الانبياء و اهل البيت و الكائنات هاي من چااان الحقد غالب عليَّ.
مو بس هيج خالي يسميج ام شعر السلابيج.
لاننن شعرررج سرح و حلو ياروحي شبيكككك خاالي.
شمسوي شبيك خالي صرت تتراجف من الخوف تعال حضن اسلامي.
چا دام طلعت سوالفي الا أطلع سوالفك ويا صاحباتك قبل.
غرام: سوالف شنو؟ هوَ گايلي چان يسولف وياهن سوالف عادية صديقات.
ضرب ارسلان ايد بايد و هوَ يباوعلها بأسف.
ارسلان: يجذب عليج غير حتى تسجيلات عندي و تصوير عليه.
كُميل: أتحداك.
عمر: ارسلان لا تجذب خالي چان يسولف وياهن سوالف عادية ويقصف
بيهن تذكر هاي ام صوت الحلو و خالي گتل روحه عباله شكلها مثل صوتها تالي طلعت چنها غوريلا.
بقوا الكل يضحكون، غير الموضوع ارسلان وهوَ ينطيهم الخبر.
ارسلان: أحنا نسينا نگلكم.
الكل انظاره تحولت علينا.
كُميل: خير ان شاء الله.
باوع عليَّ عيونه تلمع بفرح رجع باوع عليهم.
راح يجينا توأم بنات اثنين.
الكل ضحكت ملامحه بفرح و سعادة حتى عمر و نيروز مصيبتهم
ما منعتهم من فرحتهم اتجاهنا بدأ الكل يتبارك النا مر الوقت ورجعنا
البيتنا و بالي يم نيروز اتمنى تاخذ القرار الصح الثاني يوم خابرتني
حنين تبچي واصللها خبر نيروز و گالت راح يروحلها هيَّ و خالي جابر و زوجته.
انطينه خبر الاهلي عن التوأم ويا فرحتهم هنا ما تقل عن فرحة اهل ارسلان.
مرت كم يوم هادئات و اجنا الخبر نيروز قابلة أتسوي العملية
و أستسلمت للأمر الواقع بعد ما أهلها أدخلوا بالموضوع بس بدون
ما يضغطون عليها اجتني رسالة منها كاتبة.
نيروز: شكراً الكلامج انتِ و ارسلان راح اخطي الخطوة و كلي أمل بالله انتم أحد الاسباب إلى بأقناعي.
فرحت من گلبي صحتها أهم من كلشي بس عمليتها ما قبل عمر
يسويها ببغداد گالوا بالسليمانية أكو دكاترة من خارج العراق.
بيها بدوا بالفحوصات و الروتينات اللازمة العمليتها خالة نادرين
راحت وياهم وضعها يكسر الخاطر على بنتها و خالي هم وياهم بس بقت
أفكاري بسالم و بالراح ايسوي محد يعرف بالضبط شنو إلى راح ايسوي وشضاملنا.
غرام.
طلعوا عمر و نيروز و أهلها للسليمانية بعد ما ودعناهم و قبلها
اجت حنين و عيالها يشوفوها، امتحاناتي ماباقيلها شي و ناز نفس.
الوضع هل فترة استلمناها اني و خالها و انسام هم تجي تدرسها لان عمر و نيروز انشغلوا بوضعهم.
انسام: جبتلج اللي طلبتي.
علوية: رحم الله والديج.
اخذته منها خايفة شاكة بنفسي حامل و خايفة يطلع صدگ
و لو هوَ رزق
من رب العالمين بس اريد سراج يكبر بعد دخلت للحمام أسوي التحليل
المنزلي بقيت واگفة انتظر النتيجة و اكل باظافري من التوتر الى
ان طلعت النتيجة اتقربت اباوع النتيجة أيجابية؟ يعني حامل؟
بقيت صافنة طلعت من الحمام اجتني انسام تسئلني.
انسام: بشري.
باوعتلها مبرزة بزعل.
غرام: حامل.
ضحكت تباوعلي فرحانة.
يا عيني الف مبروك بس ليش زعلانة.
سراج بعده صغير.
ذبت حسرة و هيَّ مبتسمة.
رزق من رب العالمين.
الحمدلله ما متعافية او شي لا ورسول الله بس لان ابني بعده صغير
بس دام رزق رب العالمين اتقبله و اني الممنونة.
ياريت عمر و نيروز ما صار إلى صار وياهم جان مرت اخوي هم تفرح بهل الفرحة بيوم من الايام.
لا تقهريني البارحة ما نمت للصبح و اني افكر بيهم حتى بچي بجيت گعد خالج مخترع عباله شو شبيه.
مقهورة يا علوية على اخوي عمر مايستاهل و لا مرته تستاهل الصار.
المهم ترجعلنا بخير و سلامة اطفالي يصيرون اطفالهم ان شاء الله ماكو فرق بينا.
الله يشافيها و ترجع بالسلامة.
امين.
رحنا المليكة أنطيناها خبر حملي وگفت تهلهل و تبچي على عمر
لان أنحرم من هل الفرحة بس لا أعتراض على أمر ربنا، أخذت سراج گعدته بحضني.
سراج: أماه.
ضحكت شلون يلفظ الكلمة.
ياروح أمك انتَ.
أبوس بي و هوَ ما يبوسني الا بحلگي لحد ما أجه كُميل أنسام
راحت البيتها اكيد بعد ما درست ناز صبيتله اكل لان اتأخر مليكة فرحانة
بحملي بس بنفس الوقت بالها يم عمر و مرته سئلت كُميل عنهم.
مليكة: الدكتور محدد العملية مال نيروز هاي الايام عمر بلغني.
غرام: الله يسهل.
مليكة: هسه طمنتني أگومن أنامن انا.
ارتاحي يمة و نامي.
راحت خالتها بقينه اني وياه و سراج ناز بغرفتها و سراج لعب بابوه
لعب حتى ما خلاه الرجال ياكل عدل ضوجني اگعده يروح يرجع اله
اخذته حضنته لازمته بدون وعي حچيت.
غرام: يمة ياا وكاحتك شلون بيَّ راح أتصيرون أثنين.
عضيت شفتي من أدركت شحچيت رفعت عيوني اباوعله عيونه
علينا و شبه ابتسامة انرسمت على ملامحه.
كُميل: شگلتي؟
احم، شسمه اني حامل.
عليج الزهرة؟
هزيت براسي مبتسمة و لازمة سراج إلى يريد يروح اله بقى ساكت.
بس الابتسامة ما انزالت من وجهه فرحان بالخبر كمل عشه ردت اخذ
الصينية مال الاكل ما قبل اخذها للمطبخ بقيت گاعدة بمكاني
رجع اخذ سراج مني و راح باتجاه غرفة ناز أستغربت شوية و رجع بس ابني مو وياه.
غرام: لعد وين سراج؟
كُميل: عفته يم ناز.
ليش مو اريد انومه راح اجيبه.
وگفت اريد امشي لزمني من ايدي و ايده حاوطتني وجهي بوخ من همي بصوت هادئ.
عوفي يم ناز الليلة.
تمام.
مشيت وياه انسولف دخلنا لغرفتنا حضني و هوَ يگول.
راح يجيني ملاك ثاني منج.
بادلته الحضن فرحت الفرحته عكس قبل لا يعرف جنت مو ذيج الفرحة
بسبب عمر سراج ابني بعذه صغير بس من شفت لمعة عيونه تغير كلشي.
جنت مو كلش فرحانة.
ابتعد عني يباوعلي متفاجئ.
ليش؟
لا تفهمني غلط بس احس چان لازم ناخذ احتياطنا لان سراج صغير.
تخافين ما تگدرين تهتمين بي من يصيرون اثنين؟
هزيت راسي بزعل و رجع حاضني.
انا وياج نربيهم و الحمدلله سراج ما مقصرين وياه لا تخلين هالفكرة ابالج ام العيون التلمع.
يعني راح أكون ام زينة و تگدر تهتم بطفلين؟
اي، بس اوگفي انتِ سويتي تحليل مختبر او لا؟
ها؟ لا بس منزلي.
انروح باجر سوي و نتأكد أكثر. ان شاء الله.
ذبيت حجابي وگفت گدام المراية امشط بشعري إلى صاير بس يوگع
حاوطني حاضني باوعت للفرق بينا چني نملة بصفه.
جنج برغي.
غير انتَ شطولاتك.
من انتِ حامل بسراج و تفترين اباوعلج عبالك بطة و تتگلب.
رفعت حاجبي اباوعله.
أبقى حلوة.
ألعب.
درت وجهي عليه و لا زال حاضني.
خلي نروح السوزان باجر.
چا هيَّ ليش ما تجينا.
سوزان تعبانة كُميل من وفاة أبوية لليوم.
باجر اخذج.
رفعت نفسي بس أريد أوصل اله على أطراف أصابعي بسته بخده.
الله يخليك إلى كمولة.
و يخليج إلى علويتي ام العيون التلمع.
الثاني يوم الصبح حجزنا للعصر و طلعنا من وگت علمود نكمل بسرعة.
و نروح الاختي مدالحك اجي الها رغم الكل ويايَّ بس داحس
مدالحك على شي، دخلنا للدكتورة و سوينا تحليل و طلع حملي مؤكد
و كُميل فرحته ماتنوصف عبالك واحد صارله سنين محروم من الذرية
و هسه رب العالمين رزقه، طلعنا الاختي سوزان و هالمرة سراج ويانا.
كُميل: أوصلج الاختج و ارجع الشغلي.
غرام: ليش ما تدخل ويايَّ؟
ما اگدر غرام الشغل فوگ راسي چان عمر وياي و زين لازمة هسه وحدي.
براحتك.
شوگت اجيج؟
أبات عندها؟
باوعلي بنص نظره ماعاجبه.
لا
ليش؟
شنو تبقين تباتين و انا؟
شبيك انتَ عيني ابو سراج.
تعوفيني وحدي لا هسه تبقين عندها وره العشه اجيج اخذج متفقين لا و الزهرة هسه ارجعج للبيت.
هههههه اشاقة وياك اخجل من زوجها رجال غريب.
عفية ام العيون التلمع فدوة اروح الهل العيون.
سراج هم اخذ لمعة عيوني.
نسختج هذا
يلا انشوف الطفل الثاني يمكن يطلع عليك.
لا اريدهم كلهم من انتاجج هيج كيمر مو انا الاملح.
لعد شنو كلهم بيض و شكر مايصير.
علوية خليهم كلهم يشبهونج علمود احبهم على حبج.
ابتسمت الكلامه سولفنا بخصوص عمر و نيروز يگول عمر يريد يموت
عليها خايف عليها رغم هو اكثر واحد رادها اتسوي العملية وصلنا لبيت سوزان نزل ويايَّ يسلم و يرجع.
دگ الباب طلع زوجها سلمنا عليه اني دخلت جوا و هوَ بقى يحاول
ويا كُميل يدخل هواية لح عليه بس تعذر منه و گاله شغلي اتلگتنا
سوزان لابسة اسود بعدها سلمت عليها اخذت سراج مني تبوس بي مبتسمة بوجهه.
سوزان: بعد خالتك الغالي ابن الغالية لعد رجلج ما يدخل.
ما يگدر عنده شغل لان تعرفين عمر ما موجود.
أوف لا تذكريني هالولد و مرته شگد انقهرت عليهم من سولفتيلي الله يشافي مرته بحق محمد وآل محمد.
الله يسمع منج ميتة قهر عليهم.
تعاي ندخل جوا.
دخلنا اني وياها البيتها وگفت گدام الغرفة إلى اخر مرة شفت ابوية بيها
ذبيت نفس بحسرة و كملت طريقي وياها گعدنا بالصالة دخل ابو سيف زوجها.
فواز: حياج الله خوية.
الله يخليك تسلم.
ابو سراج شگد گتله يدخل مارضى يگول شغل عنده.
اي والله لان ابن اخته هل فترة مو وياه.
هز براسه و الحلو بي مثل ولدنا من يسولفون ما يحط عينه بعينج
و هالشي اعتبره احترام و تقدير إلى منهم.
فواز: اخذن راحتجن انتن اخوات و اكيد وحدة مشتاگة للثانية.
اترخص منه وطلع بقينا اني وياها باوعت السوزان تباوه وراه بملامح حزينة.
بيج شي؟
سوزان: ما ادري شلون متحملني هذا الرجال.
ليش.
نزلت دموعها و هيَّ تسولف.
غرام اعصابي صايرة كلش على اقل شي اصير عصبيةو اكبر المواضيع
حتى لو جانت صغيرة و ابقى اصيح و احجي و هوَ ما يحجي
حرف واحد يسكت عني و بالليل ما يخليني انام الا على أيده.
زوجج فاهم و واعي اكيد فاهم وضعيتج و نفسيتج.
تعبانة غرام.
تعبي ما يقل عنج بس مابيدنا شي.
نزلت انظاري و اني أفكر شلون تغيرت و صرت أتقبل كلشي
يصير بحياتي الحياة و صدماتها و خذلانها تغير الانسان اهواية.
ما تخلي نفس الشخص، بقيت العصرية كلها يمها و أحاول احجي وياها و اطلعها من الجو إلى هيَّ بي.
سوزان: هاي مديحة الزرگة من رجعنا من الاربعين لعبت لعب لان اجيتي.
واگفة اغسل بالخضرة و انسولف.
غرام: شو ماحجيتيلي من اجيتج و لا بالاتصالات.
دختولي بس عبالج سكتت الها؟ العبت بيها لعب.
بالاربعين ردت الزمج دفعتني.
ادري بيها شفتها بس لو ما العالم الا اسحلها بس نم فشل عمتي اخت ابوية و احنا بمصيبة.
محلفتج برسول الله ذاك اليوم شصار؟ ليش ما تقبلين تحجيم شبيج
ترا لو ما فواز يطلب منه انروح من شاف كُميا اتعارك ويا عمي منصور و لا اتروح.
همزين رحتوا چان رجلج لزم منصور ودفنه بصف ابوية على كلامه.
الهلدرجة؟
ابتسمت باستهزاء تهز بايدها.
هم يحجون و اني ما سكتت انفجرت بيهم و لو ما رجلي چان لزموني
ملخوني تملخ بس رجلي وگف بوجهك فوگاها هذا ابن منصور يگول.
الرجلي بتنا و لا تدخل بينا گالهم مرتي و اشوف رجال يوصل الها الا اشگ حلگه.
مصيبة مصيبتهم ورسول الله يدرون كلش زين إلى صار مو ذني ذنب ذاك العار و بعدهم حاقدين عليَّ.
لا تهتمين غرام طُر بيهم عندج رجل و عائلة تسواهم كلهم.
هزيت براسي
و گلبي محترگ منهم عجيب هالبشر گوا لازم يلبسك التهمة لليل كلش
بالعشرة اجه كُميل و اگدر اگول شوية گدرت اغير جو السوزان.
طلبت منها تجيني للبيت او نلتقي بمكان عام و من عرفت عن حملي.
جانت فرحتها غير تگلي يصيرولج العوض، رجعنا للبيت و اكيد مليكة
نايمة لان تنام من وگت على گولت عمر شنو دجاجة و تگعدنا
ويا طكة الابريج والله ما فهمت المعنى كلش لان هم مرات كلامهم
جنوبي بس ناز گاعدة و ما فتحت الباب الا كُميل خابرها تفتحه النا لان ناسي مفاتيح البيت.
ناز: همزين أجيتوا ردت أطگ من الملل و مليكة نايمة بقيت وحدي أفتر.
غرام: أعذريني بس اختي نفسيتها تعبانة بقيت يمها.
باوعتلي بعيونها الزرگ.
امم خليها تجي النا.
گتلها گالت ان شاء الله.
شگالتلج الدكتورة؟
حامل حامل.
صفكت بايديها تضحك.
يا سلام راح يجب بيبي جديد و بنات ارسلان.
كُميل: يا سلام سلم يا حبيبي.
خالو متعشي لو أصبلك عشه.
لا تعشيت، بس اوگفي منو طبخلجن؟
اني لزگتها تلزگ و مليكة غمتني بنص كصتي تگلي هذا طبخج اذا انطي للبشوش تتفل علينا.
ضحك كُميل لان ناز طبيعتها من تحجي فد موقف تبقى تسوي حركات و تقلد و تگلب بعيونها.
كُميل: چا گولي امي نامت بدون أكل.
لا عندنا من الغدة حميته الها.
تعلمي خالي.
مو هسه
چا شوگت من يبيض الديج.
ما ادري بس خلي امتحن و اخلص طلعت روحي هاي شلون درستوا انتم.
لان تاركة انتِ لو مستمرة و كل سنة تداومين ماشفتي هالصعوبة.
گعد يسولف وياها عن المواد و ناز جبيرة بس خطية من الابتدائية
تاركة فحقها مو مثل إلى يدرس مدرسة وفاهم الوضع من صار حادثة امها چانت بعدها ابتدائية.
أجه اليوم اللي نيروز راح أتسوي بي العملية و منين ما تدور وجهك
كلها مالها خلگ و تدع تطلع بالسلامة عمر گايل الخاله قبل العملية بيومين بالليل
نيروز منهارة عنده و احنا لو ما دوامي و شغل كُميل چان رحنا الهم
بس ارسلان راحلهم و غياهب باقية يم اهلها ما قابل ارسلان تروح بسبب حملها.
مر اليوم و احنا ننتظر على نار محد خابرنا و لا طمنا لليل كلش
يلا خابر ارسلان و كُميل عاط بي يتعارك لان ميجاوبه من متصل.
كُميل: اغبياااء أنتم ثووولان صارررلي شگدد اتصل محدد يجاوب؟
ما أدري شگاله ارسلان رجع يصيح عليه.
كاافي تلغي لغي مابي خيرررر، شلونهاا نيروز شنووو وضعها؟
بقينا اني و ناز و مليكة نباوعله گلوبنا راح توگف من الخوف
و القلق غير يحجي شگد دعينا و صلينا بهذا اليوم اتنفسنا براحة من گال.
الحمدلله و الشكر، الحمدلله على سلامتها عمر شلونه؟
حضنتني ناز عيونها مدمعة و مليكة تحمد ربي من أستجاب الدعائنا.
كُميل: عينك عليه لا اتعوفه وحده ارسلان.
سده منه و دار علينا يبشرنا.
نيزوز طالعة من العمليات الحمدلله وضعها احسن.
جاوبته ناز و دموعها بعيونها.
ناز: و عمر؟
كُميل: هوَ و مرته يحتاجون فترة يتقبلون الوضع الله كريم، بس ما يرجعون
هسه لان اكو علاج يخص وضع نيروز يكملونه و يرجعرن ان شاء الله.
مُجاهد: نزلت من دوامي كبل طلعت الجامعة زهراء اختي، چان يوم
خميس بلگي اشوفها و أحصل شي منها نزلت گدام جامعتها
دوامها مسائلي وگفت انتظرها شفتها طلعت هيَّ و وياها بنيه استحيت
اروحلها لان صديقتها وياها وگفن صديقتها منطيتني ظهرها لحد
ما دارت طبكت حواجبي مستغرب وين شايفها؟
ما ادري شبيه بقيت صافن بالبنيه بس اريد اتذكر وين شايفها
وين يله ربطت نفسها صاحبة الحساب الراسلني بيوم ما جبنا ثائر.
و ما جاوبتها، راحت البنيه اجت اختي فرحانة حضنتني دموعها نزلن.
زهراء: و اخيراً اجيت مُجاهد.
مُجاهد: شلونج؟
تعال عندي حجي وياك هواية حتى دزيتلك صديقتي تراسلك علمود تجيني للجامعة.
چا ليش ما راسلتيني منج؟
ما اگدر ابوية فوگ راسي اربعة و عشرين ساعة و جهازي
عنده ما ينطينياه الا من اطلع للدوام و فوگ كل هالضيم فاتح برامجي عنده.
ابوج ابن الكلب.
راح احچيلك بسرعة قبل لا يجي سايقي لان گال اليوم راح يتأخر.
اي احچي.
شوف والله العظيم و داعت رابط الخوة إلى بيناتنا امي انجبرت اتسوي كل هذا.
بقيت صافن اجذب اذا اگولن ماكو شي بداخلي فرح من سمعت كلامها.
بشنو انجبرت خاف جاي تغطيلها.
لا مستحيل والله حلفت بالخوة إلى بينا و تعرف شگد أحبك و أعزك.
فهميني بشنو انجبرت؟ انا من ذاك اليوم لهذا اليوم جاي اموت
لا ليلي ليل و لا نهاري نهار و انا افكر امي عافتني علمود رجلها.
لا لا لا تفكر هيج امي انجبرت.
نجبرت؟ شنو الشي إلى يجبرها اتسوي هيج احجيلي گتلهااا احجيلي اذا مهددج هالزبالة.
بقت صافنة تمسح بدموعها حچت بصوت يرجف.
ابوية هددها اذا ما اطردك و تگطع علاقة بينكم راح يزوجني
الابن اخو الخايس الدايح بالشوارع و يخليني ابطل من دوامي.
هددها بيج؟
أي مُجاهد امي أنجبرت.
بس هم فضلتج عليَّ؟
اعذرها فدوة اعذرها لليوم امي تحن و تون عليك لان كسرتك.
و فشلتي گدام الوادم؟ و كسرتها الخلتهاا بيَّ؟
حقك بس اتمنى تفهم الوضع إلى احنا بي صدگني عايشين بالضيم وياه و هذا احمد يطب و يطلع يضرب بيَّ.
يمدددد ايده عليج؟
نزلت دموعها رفعت شوية. من ردن مال لبسها بقيت صافن ايدها عبارة عن اثار ضرب.
زهراء: شوف كل هذا و ابوية يسكتله و يذب الصوج بيَّ امي گوا تحميني منه.
مسحت وجهي عيوني جمرت.
روحي ارجعي للبيت هسه و لا تحجين شي الامي.
لزمت ايدي تتوسل بالكلام.
سامحها مُجاهد امي ما مرتاحة متعذبة على فراگك.
الله كريم خوية روحي هسه.
عفتها صعدت ويا سايقها طلعت بسيارتي شسوي بيك يا احمد نص
طفولتي عشتها بضيم و عذاب من وراك و هسه تطلع بطولاتك على
اختي الزمال و هيَّ اخته هم هينه، ا دري بي واحد فارغ و دايح ماعنده
لا شغل و لا عما طلعت للكهوة إلى يگعد بيها يابوية بس اريد اوصله.
نزلت امشي عيوني تدرره بنص الناس الگاعدة الى ان ثبتت نظراتي
گاعد يشرب ناركيلة و يضحك مشيتله ما اشوف بعيوني صاح ورايَّ.
ابو الكهوة ما اهتميت سحلته من نص صحبانه، بدون اي كلام نمت عليه.
دگ بوكسات ما ادري وين صارت تجي الضربة بعينه لو بخشمه
أضرب و گلبي فاير منه و من عمايله.
مُجاهد: ابننن الكلللب تتقاوووه على النسوووان.
لزموني جماعة من الموجودين فقدت عليه ما گدروا يشلعوني من فوگاه الا لمن عمي حسن صاحب الكهوة صاح.
حجي حسن: بروح أبوك عووووفه عمي مُجاهد حلفتك بعزازك.
غمضت عيوني زرگته باخر ضربة وگمت من فوگاه سحبني الحجي من يمهم مطلعني برا.
شبيك بوية ليش گتلت الولد؟
عمي جاي يتقاوة على النسووووان على اخته مزورگهت تزورگ.
وانتَ شلك غرض مو انتهت علاقتك بيهم.
طلعع ابوه الكللب يهدد ب أمي.
تعاي ويايَّ.
أشر للعامل ما ادري على شنو خذاني جوا و احمد صحبانه
يرفعون بي و هوَ يسب و يغلط ردت ارجعله بس الحجي اخذني
جوا دخلني بغرفة صغيرة عنده داخل الكهوة.
حجي حسن: اگعد.
گعدت افرگ وجهي مو سهل واحد يعرف هيج اشياء رجل امي من
الصغر متعذب منه اتحملت كلشي علمود امي و تالي فشلتني گدام
خلگ الله و خلتني هالگدوتني گدامهم.
مُجاهد: شسوي عمي؟ گلبي نار من عمايله و عمايل ابوه.
بشنو مهدد امك؟
حجيتله إلى سمعته من اختي بس فاجئني من گال.
چا انتَ هسه السويته غلط.
شنيي غلط؟
هسه احمد من راح يروح للبيت راح يگلهم زهراء گالت المجاهد و هيج و هيج.
صفنت بكلامه متندم انا شلون مت فكرت بهالشي هسه اختي.
تتأذه ردت اگوم من مكاني رجعني صوت الحجي.
اگعددد.
راح تتأذه اختي عمي اجيت بدون تفكير و ضربته.
عوفها يمي انتَ روح هسه و انا اخابرك.
وحگ الكفل زينب اذا اختي يصيرلها شي اموته بايدي.
اهدأ بوية ما راح ايسوي شي گتلك عوفهت وراي احمد حتى ماراح يعرفون انتَ الزورگته.
أعتمد عليك؟
ان شاء الله.
طلعت منه امشي و هذه بعده بمكانه صاح وراي بنص الكهوة.
احمد: بيك خيررررر مو حتى امك تبرت منك.
ردت ارجعله.
بس استوقفني خزرة الحجي رجعت المكاني حجي حسن اعرفه
من الطفولة اشتغلت عنده چان بمثابة اب إلى ينصحني يعلمني و استحي من روحي اكسر كلمته.
غياهب.
بقيت يم أهلي بعد ما ارسلان راح يوگف ويا اخوه اكيد محتاج
أحد يسنده اجت حنين النا و ابنها بس يصرخ و هيَّ كل ثانية
مغمضة عيونها بقلة صبر، لازمة اعصابها اخذته منها خالتي.
وجدان: ادري شبيه ابنج؟
حنين: مكروص.
غياهب: مو وگت شقة ليش بس يبجي.
ما ادري والله حتى جبناله قطرات بعد ما اتاكدنا زينة اله.
الولد فرفح بالبجي حتى خفنا عليه طلع ابوية من غرفته مفزوع عباله
بي شي اخذه من خالتي يحاول يسكته و نفس الوضع حضنه الصدره.
سلطان: ها هاا شبيه حبيب جدو يبجي.
اخذه ودخل بي الغرفته بقينا نسمع بس صوت البچي مالته بس مرت كم دقيقة اختفى و سكت.
حنين: يسكت عند جده و ما يسكت عند امه هذا ابني من هسه بايعني.
غياهب: انتبهي على الولد حنين.
منتبهااا والله شبيكم تحسسوني مهملة.
حشاج ما اقصد هيج بالعكس، بس الطفل يحتاج اهتمام الاصغر تفاصيله.
ايي ايي ادري اني خوش ام ترا لا تغركم خبلاتي.
عندي ثقة بيج صغيرونتي واني اوصيح لمصلحتج.
ابوس الينصح و الراح يصير ام البنات اثنين.
هههههههههه.
صدگ شراح تسموهن.
اممم بعدنا ممختارين اسماء.
هسه يطلعن وجه واحد مثلنا.
ممكن اي و ممكن لا لان اكو توأم ما يتشابهون او اكو شغلات تميزهم عن الثاني.
اييي مثلي اني عندي شامة جوا شفتي و وجهي بريئ اكثر منج.
دنجبي شتقصدين وجهي شيطاني؟
لا غياهب بس يعني الكل يگول وجهج بي برائة اكثر من اختج.
يمكن لان ما فاتحة حلگي اربعة و عشرين ساعة مثلج هيج يحسون.
ضحكت على كلامي و لزمت جهازها.
خلي اخابر رجلي ابو بيتي علساس جاي بالطريق.
شو لحد الان محد خابر علمود نيروزه بالي يمهم.
داشغل نفسي علمود ما اتذكر شي و انقهر رماد گاعد برا خطية.
كسر خاطري من اجيتكم شفته گاعد بالحديقة و لا عبالك رماد إلى نعرفه.
حقه اخته الوحيدة، شو انتِ ممداومة اليوم.
لا داومت منو گال مداومت بس انتهى دوامي.
ها نسيت والله دخت عقلي يم نيروز.
خابرت حنين على درغاك و بقينا گاعدين منتظرين خبر منهم سدته گالت.
حنين: گال دقائق و يمكم.
كمزت من مكانها فرحانة تعدل بروحها انتبهت عليها حتى طريقة لبسها
متغيرة غير عن قبل و صايرة افضل.
غياهب: هسه انتبهت البسج متغير.
ابو الحسن يغار.
ايباااه.
لا شوفي هيَّ شغلة تعلوم و شغلة غيرة اهواية ديعلمني درغام و حابة هذا الشي.
اممم احچيلنا.
گعدت تسولفلي و ما شفتها متضايقة بالعكس مرتاحة و فرحانة.
شوفي مثلاً لبسي بديت أغيره قبل تعرفين لبسي صح مو من هذا
المشلتح بس هم رجليَّ طالعة من جوا لو ايدية طالع قسم منهن
ف هوَ ديساعدني اتغير بس والله مجبرني على شي و يدزلي محاضرات دينية تحجي عن ستر المرأةو دا احاول أطبق باقتناع.
خطوة خطوة اممم و مو بعيدة اتحجب.
كلش حلو إلى دا ايسوي درغام يعجبني بهالشغلات ما يضغط على الشخص و يحاول يبسط الشغلات ميستصعبها.
يؤبر أئلبي ابن عمي شو بحبو.
ابن خالج ترا.
نرهمها عادي.
لا والله صدگ حنين كلش حلو اتمنى تستمرين بي اني صح لبسي
كله طويل و يختلف عنج بس عندي الحجاب.
اذا ما تقتنعين بي و ما تحترمي ما انصحج تلبسي لان أحس هذا
لعب نتحجب و نطلع شعرنا لعد شنو فرقنا عن قبل لا نتحجب هم.
شعرنا طالع اما نلبس صدگ و نحترم اما لا ما يصير نهين الحجاب بهيج طريقة.
الله يهدينا ان شاء الله.
اندگ الباب گامت حنين تركض بعد هذا درغام تكمزله تكمز مو بس
تركضله بقيت گاعدة بمكاني افكر حلو اهتمام درغام ال حنين لاحظته
دائماً يعلمها و احجي بصدق الرجال اشوفه هواية يسعى يعلمها و يوعيها
ما اگول اختي ناقصة عقل بالعكس اني تعجبني ببعض المواقف.
ردات فعلها بس كل انسان و حياته مرات نحتاج اشخاص يوعونا.
و اكثر خطوة حبيتها من داشوف هذا الجانب من الدين و مالي تقييد
و لا صعب، شفتها اتأخرت صحت بصوت.
غياهب: يمعودة وين صرتي نمتي؟
درت وجهي على باب غرفة ابوية هسه يطلع ويسويلهم كببسة
عاد هم شلون اثنين يسون هم وين واگفين او گاعدين طبكت
حواجبي بأستغراب من إلى شفته دخلت حنين و دخلوا اللي وراها
حچيت مستغربة، متفاجئة، بلا وعي طلعت مني كلمة وحدة.
غياهب: انتم؟