رواية مرواد الظلمة الجزء الثاني للكاتبة هيلانا الفصل الثاني
مصطفى: -
چنت راجع بليل من المطعم الجو چان كلش بارد خاصةً وإحنا بلبة الشتاء
الساعة وقتها چانت بال 12 نص الليل چان يوم متعب من بدايته
وچنت محتاج أروح أودي السيارة للعصام كال سيارتة عاطلة وعندة شغل يردهة
وأرد للبيت علمود دوام الصبح.
چنت أسوق وعيني تغالب النوم
وبالگوة أشوف الدرب من الثلج خفت أكمل السياقة بعد ما شفت سيارات هواية رايحة جاية والثلج ينزل كلش قوي.
انجبرت أصفّط على صفحة خاف أندعم وانة أفرك بعيني من ورا النعاس
كلت أنتظر شوي عسى ولعلى تخف
بس اليوم هذا چان مختلف.
لبست السترة وغطيت روحي بيها زين باوعت عالموبايل لگيته اختي دازة مسج
: -وينك مصطفى
وكل رسائل وينك، تاخرت، تعال
ايبااا النسوان شكد يلحن
دزيت رسالة وگتلها يجوز أتأخر حتى لا تشيل همي ورجعت الكرسي ليورا وحطيت إيدي على عيني ونمت.
يا دوب غفيتلي جم ثانية وفاتت براسي هوسة وخيالات سود و أصوات متداخلة كلش هواي
هذا التعب، أدري بي من أتعب راسي يصير
هوسه حتى أصوات الموظفين بالمطعم تصيح براسي
: -أححجي وياك وليدي.
بقيت غافي عبالي صوت براسي رجع الصوت أتكرر وي دكة خفيفة على الجامة
وبنص كل هذا الهوسه صوت ثخين جاي من برة
-: بوية رد عليه أسولف وياك، أگلك توصلني بطريقك
كل الهوسة اللي براسي طارت مثل السراب بس فتحت عيني لكيت رجال جبير يدك على جامة
السيارة باوعت داير ما دايري لگيت السيارات خِفّت وشبه ماكو غيري عالطريق وهذا الحجي نزلت الجامة
: -تفضل عمي
: -توصلني بطريقك
حاولت أتعذرة بس لطش كتلة
: -ميخالف أصعد.
صعد عدلت روحي والكرسي وانة أفرك بعيني لمن صعد بصفي چان لابس دشداشة
غريب لابس دشداشة هنا
ركزت أكثر بي ومن كثرة الظلمة وبرودة الجو ما أنتبهت كلش چنت أشوف ملامح الرجال زين حتى لمن إجاني.
وبنفس ساعة ملامحة عبالك ما أشوفها غريب شكلة كلش
بس اللي شفته بيه كاعد يرجف وتأكدت من هذا لمن سمعت رجفة بصوته گال
: - دخيلك وليدي بس توصلني ولو انه زحمتك بس هالتشوف الجو شلون صاير منكلب وماكو غيرك شفته بعد
: -وين ساكن حجي.
گالي على اسم الفندق الكاعد بي وبديت أتحرك حسب وصفه
مسافة طويلة شفت الضوء من بعيد ووصلنا يم
فندق قديم
باوعتلة ورجعت كتلة: -حجي ساكن هنا
: -ايي يبوي. أنتظرني أجيبلك كروة
: -لا خليها عليه
رجال طاح بلحيتي الا يجيب كروة شافني ما رضيت كال جا أنزل بات وياي طريقك أبعيد والصبح روح
وبالفعل نزلت هو مشى كدامي واني صفيت السيارة يم إستراحة ورا الفندق
استراحة مهجورة خشب بيبانها والشبابيك
گلت أروح أشرب جاي حتى أصحصح شوية.
المكان مكطوع هنا بس ضوء الفندق غابة كله اشجار وسيارات ماكو شلون هذا الرجال عايش هنا
طفيت الجكارة ومشيت للفندق المسافة من المحطة المهجورة للفندق ما چانت طويلة
ما چان اكو أحد موجود ولو لا أضوية الفندق چا كلت الفندق هم مهجور
دخلت ولاكتني غرفة بداية الفندق طلبت جاي من شاب لگيته گاعد جوة
ولابس زي أزرك بدأ يجهزها واني كعدت أكو هواي ناس كاعدة بس شني لبسها غريب كله الوان.
شوية وجاب الجاي اخذتة من أيدة وكعدت أشرب وكل ما ارفع راسي أشوفة يباوعلي
من ألتفت عليه يدير وجهه حسيته منتظرني أكمل
هيج حسيت والحجي الجبتة ماكو يمكن صعد نام
كلت أكمل الجاي وهم أنتظر العاصفة تهود وأمشي ما مستعجل
بس الغرابة بالمكان ما خلتني أرتاح
الناس الكاعدين جوّا
لابسين لبس مو مألوف أبد مو رسمي ولا عادي عبالك موديلات من سنين راحت.
كل شوي أرفع راسي أشوفهم يتهامسون وبنفس الوقت الشاب الأزرك ما نزل عيونه مني لحظة
رفعت الكلاص وكتله
: -عمي مضيع شي بوجهي
ابتسم كال
: -لا وليدي بس چنت حاسك وجهك مو غريب
: - انة وين شايفني
: -مادري بس حسيت شايفك قبل
سكت ورجعت أفكر بيها انة متأكد أول مرة أشوفه حتى الرجال اللي وصلته للفندق بعد ما شفته
شربت آخر رشفة من الجاي وگمت گتله
: -حجي أحسابك
: - لا الحساب أندفع من الرجال
: -يا رجال
: -اللي جابك.
هزيت راسي وطلعت بره دكيت على البيت بس ماكو كلت خاف بالهم يمي
مشيت بين الأشجار وأني أطكطك بالجهاز متجه صوب السيارة
أول ما وصلت شفت على الجامة الأمامية أثر كف مطبوعة بالثلج
مسحتة بيدي و ركبت السيارة شغلتها ومشيت
وصلت للبيت بعد الطريق الطويل
فتحت الباب بهدوء وفتت أول ما دخلت سمعت صوتها
: -مصطفى أجيت
چانت كاعدة منتظرتني ومبين عليها السهر
باوعتلي بعيون كلها قلق.
شجن: - ليش تأخرت لهالساعة من العصر أني أنتظرك دزيتلك مسجات ما جاوبت شنو السالفة مادكول خالتي تقلق عليه وشايف الجو أشلونة
نزعت السترة وكتلها: - كملت شغلي بالمطعم وبعدين رحت أوصل السيارة للعصام وثلج الدنيا كله مسدددة الطرق
شجن: -اي خابر كول ليش تخلينا بقلق عليك ياامي
مصطفى: - هسه تعبان رايح أنام و باچر نحچي
مشيت نمت من التعب وصدك تعبان بحيث بسرعة نخمدت غفيت شوي
ومن غفوتي بدت الصور تتداخل بعقلي.
شوارع والثلج و فجأة شفت بيتنا
بيتنا يحترك وأني اركض أطفي بس شني وحدي ماكو وادم تعاوني
ركضت للحوش بس النار تلتهم الباب ودخان أسود غليظ
حاولت أفتح الباب بس الإيدين ما تتحرك
فزيت من النوم مفزوع
لكيتني عركان هو منو يعرك بهل شتة استغفرالله
وتعبان والهث عبالك جنت اركض
والغرفة ظلمةدورت على الموبايل شفت الوقت ثلاثة ونص بالليل
رجعت نمت جا شسوي تعوذت من الشيطان ونمت.
شجن:
: -زينين كلهم زينين. ديلا على اساس همة جهال وخايفة عليهم
مثبتة المبايل بين جتفي وذاني وشلت القوري من الطباخ كلتلها: -راحوا للمدرسة حيدر واسينات ومصطفى بعدة نايم يبوو صرعتيني بولدج
ضحكت وسديت الخط ماكلة راسي بيهم من الصبح
صبيت جاي ومصطفى نزل من غرفتة
: -هستوني جاية أكعدك
ابتسملي وسحب الكرسي وكعد بدون ما يحجي
: -صباح الخير بعدك نايم لو صحصحت
گالها بصوت نعسان يفرك بعيونة
: -صباح النور خالة.
صبيتله جاي وحطيت كدامه صحن بي بيض
بس ما مد إيده على الأكل ظل
يباوع بالجاي وهو ساكت باوعتله بتردد
: -مصطفى شبيك حبيبي
: -لا ماكو شي
: -لا دكلي ماكو شي شو اليوم هادي
: -جا كل يوم شمسوي
: -جاوب لا تغير الموضوع
لزم ايدي باسها وضحك كال بتلاعب
: -يابة والله ماكو شي بس تعبان من دوخة المطعم والموظفين والحجي الله يسلمه كربسهة براسي
: -لا تضغط على نفسك ماما حبيبي اهم شي أنتَ يا شغل يا على معليكم بيهم.
: -جاا احجيلنة وي اختج ورجلها يفكون ياخة عني
ضحكت وهو هم جان يضحك بس مبين يريد يسكتني هو من النوع سبورتي ويضحك ويسولف
مو ساكت ومغندب ومن البارحه حسيت اكو
شي وجه معبس بس ميطلع منه حجي
بقى يتريك وأني أتذكرت سالفة البزون لكيتة مذبوح ومشمور بالباب
ما ردت أكول خاف يخافون حيدر واسينات
وهم ما أريد أسكت لان اخر مره سوت بي سحر اجوانا بطير حمام مذبوح
هذا الحجي من جانت عمة شمس عايشة ام علي.
وراحت بذاك الوقت وندثرت السالفة
كتلة بنبرة مترددة
: - مصطفى أريد أكلك سالفة
رفع راسه باوعلي باستغراب
: -شنو
: -اليوم الصبح من طلعت أذب الزبالة لكيت بزون ميت يم باب بيتنا
: -وشنو يعني شسويلها اشيعهة
: -مصطفى؟
ضحك وكمل وهو يحرك الخاشوكة بالاستكان
: -جا بزونة ميتة شنسويلها
: -ولك جانت مذبوحة ذبح
: -عادي
: -ولك مصيفي أشبيك اني دفكر مادري خاف عمتك رجعت لسوالفهة القديمة
: -ياهي اجوانا
: -منو غيرهة.
هز راسة ب لا فركت ادية بحيرة: -أنتَ ماتدري بعمتك شلون جانت مخبورة بالسحر واني سبق وشفت هيج شي فماادري
: -خاف حاطتلي
حجاهة وضحك كفخته على راسة بقى يضحك
و كال: -والله جا شعدها المن اتحط
: -لك مو أخاف هاي عمتك فد وحدة متخاف الله ودربها أعوج
: -يجي أبوي ولكل حادث حديث نشوف شكوو
دك مبايلة رفعة تافف فتح خط بعدة ما حاجي وأجه صوت الرجال
: -صباح الخير أستاذي
: -صباح الخير. شكو أحمد.
: -وينك أستاذي هذا الاشكر الامريكي يتأمر عليه وكل ما أحجي ويا يكلي مصطفى خلاني مسوؤل المطبخ
شنو صدك هالحجي مساع يكلي ما عاجبك أستقيل
استاذي يعني ما مقصر يعني حضرتك ولو أزعجك بس شوفلي حل
: -أنتَ هسه بالمطعم
: -لا أستاذي ما رحت
: -جيد أخذلك يومين أجازة وأنه أحلها ولا يهمك
سد الخط وهز أيدة حجة بملل: -رايح أنه خالة
: -بالسلامة حبيبي دير بالك على نفسك ومر على أسينات جيبها وياك من المدرسة من ترجع.
لبس ومشى للشغلة و أني الشك أكل كلبي هاي اجوانا خاف رجعت على سوالفها المكسرة
بس هو عصام وأخذتة بعد المن تحط
كعدت أعزل والبيت فارغ بس أني ومن أبقى وحدي
الذكريات ترجع براسي
مرات احس كلشي فات وراح ومبقاله تأثير
وإنّي اتعودت على الوضع
بس مرات هيج مثل اللي اتذكر إنه اكو شي جواي بعده منتظر شي يصير حتى لو مرة وحدة
جان بنفسي أحس إن اللي اتمناه ممكن يتحقق مو دائمًا يبقى مجرد خيال وأحلام وأمنيات.
ومو دائمًا أبقى أقنع نفسي انه كل هذا طبيعي
وهذا قدري هاهيه
صعدت اعزل غرفة مصطفى بس هي بقت
هو منظم ومرتب دوم غرفتة مرتبة
يرتبها قبل لا يطلع ما يتعبني مثل البقية اكثر واحد عبثي بيهم ومهمل حيدر
طلعت ملابسه اغسلهن وأني دخلي بيهم بالسلة وكع شعر أسود شعر راس من جيب قميصة
صفنت شنو هذا لزمتة بيدي شعر مال أبنية
معقولة مصطفى عندة حبيبة
يعني هاي أسوالف شباب هالوكت اسوار وشعر ولاستيكة مدري شنو عود ذكريات.
خليتها على كلنسة وبالمجر خاف يجي يضل يدور عليها ومبينه سالفة سرية
خلة أخلي براحتة، عزلتها ونزلت شغلت أغنية لام كلثوم وكعدت أسوي غدة
اليوم عندي عطلة وبديت أفكر أستقيل من شغلي وأنتقل لغير ولاية
هواي تراودني هالفكرة وبذات كاعد أتصير صدف وأشوف عصام
ظليت أطبخ وأغني وياها بس فجأة سمعت صوت خفيف فوك مثل حركة بخطوات.
گلت بيني وبين نفسي
: - يمكن هذا مرج.
غلست ورجعت أشتغل بس الصوت تكرر أقرب مثل شي انسحب بعدها دگة خفيفة
بعدين طگ صوت شي أنكسر
سحبت نفسي ببطء وطلعت من المطبخ باوعت لليفوك
صعدت الدرج بهدوء وصلت الطابق الثاني سمعت خرخشة زجاج.
فتحت باب غرفة أسينات أول ما شفت المراية
مكسورة من النص
الكزاز متناثر وبي نص عامر باقي
قربت أكثر كلشي ساكت هدوء بس أحلف سمعت نفس تنفس خفيف
عبالك أحد وراي التفت ماكو أحد دنكت لميت الكزاز من الغرفة ونزلت جوة وأني أستغفر.
مصطفى:
: -هلو
: -هلة منو
: -أني ملاك
: -منين هاي ملاك من ياعمام
: -اشبيك اني الجيت للبيتكم بالليل
: -هاا. ام سجينة؟
: -اي اني المهم اكلك اريد شغل
: -جاا ياهو كايلج أنة أيلول ماسك وين أشغلج بشركاتي
: -يمعود دبرلي اي شغلة على معارفك بت بلدك بالغربة ضايعه ترضاهة
: -شعلية
: -فدوة لعينك تقبل أضل بشغلي الوصخ
: -تعاي أشغلج بالمطعم مالتنة
دزيتلها عنوان المطعم كلت أحطهة وي الطباغين بالمطبخ يم أحمد.
والله فد ساعة وأجت مبتسمه هاي حيل ضاربة ميانة
وصلت وكف يمي
: -مرحبااا اني اجيت
: -اي مو هل واكفة كدامي
: -شنو شراح اشتغل، صدك هذا المكان الكم
: -طبعا النا، صحت على عرفان اجة: -ها أستاذي
: -اخذ البنية. شسمج أنتِ
: -مو كتلك ملاك على الخط
: -يابة اخذ ملاك شوفلها اي شغلة بالمطبخ
: -بس غسل اماعين لا
: -وفوكها تشرطين
: -ماكدر أغسل أماعين عندي حساسية من المنظفات
: -جا شتردين هسه
: -أطبخ
: -تعرفين.
: -اي عادي أطبخ عندي خبرة بالاكلات العراقية
: -لا هيج نحترك المطعم يصير مأتم أحمد بس يشوف واحد يطبخ أحسن منه يخرب كلشي
عرفان: -ها أستاذي شسوي هسه
: - خليهة يمك شوفلها شغل نظيف لا تخليها تمسح طاولات ولا تغسل أماعين هيج تمام؟
ملاك: -كلش تمام مرسي
مصطفى: -يلا حياج الله وأي شي يصير وياج لا تتصلين بيا اتصلي بعرفان هو المسوؤل هنا بمكاني
ملاك: -بس أني اريد أتصل بيك.
حجتها بنظرة مال مايعه لا اله الا الله منين تجيني هالعطلات
: -مرات قافل الجهاز مرات منخمد عرفان دوم متواجد أتصلي بي وأسكتي
: -لا الا أتصل بيك
: -شني السبب
شو هاي تدنت مني وحجت
: -أنتَ هيج كاريزما لو دمك ثكيل؟
: -نص بالنص حسب الموقف، عرفان اخذ ملاك للمطبخ
عرفان: -تمام أستاذي.
أسينات:
راجعين من المدرسة جنطتي على جتفي وعيوني على شارع نفسيتي مكبوتة هالايام وضايجة
يمكن مشتاقة لماما وبابا دوم أضوج من يرحون سفرة هو صح حقهم يرحون يغيرون جو
بس البيت يصير كيئب وما أحس بالامان
اذا بابا ما موجود
فعلا الاب والام مصدر الامان
التفت على أيما تحجي وياي
: - وين سرحانة من الصبح وجهك مو طبيعي.
: - ماكو شي بس يمكن ما نمت زين.
: - يمكن لأنك بتفكري بهال مرج تبعك
: -رجعنا عالمرج؟
: -طبعا لسا ما فهمت شو قصتك معه بتعرفي كل ما تحكي عنه بحس إنك بتحكي عن حدا مو موجود.
: - لأن هو فعلاً مو موجود.
: -شو يعني مو موجود لا تقولي إنك بتشوفيه بالأحلام أو هيك شي
: - انسي يمعودة يمكن خيال
: -ولك شو هالحكي والله رح أخاف منك عنجد أنا ما بحب القصص اللي فيها أشباح.
: -بس هو مو شبح
وكفت ولزمت معصمي التفت عليها بملل
: - يعني شو مو شبح بس بتحسيه موجود وبيحكي معك يا لطيف عنجد شكلك محتاجة دكتور نفسي.
ضحكت صدك خنكتني الضحكة وهي تباوعلي بقلق
: -جديات مرات أحس بي مو دوم بس فجأة احس يمر من يمي أو أسمع حركة حتى لو الغرفة فارغة
فكت حلكها وكامت تضحك بصوت عالي حطيت ايدي على حلكها
: -لا تضحكين والله أحلف هو موجود
: -خلينا نروح نشتري كابتشينو وكرواسون يمكن السكر يرجعلك الواقع شوي خرفتني على بكير
: - والله فكرة يلا أمشي
مشينة أشترينة والجو بارد وهي تسولف عن الحصص والجو رمادي تحسه ومغيم.
: -عنجد اليوم الدرس تبع الرياضيات كان كابوس أنا والله لو ما عيوني حلوين كنت بكيت قدام الأستاذ.
-: هو ما يخاف الله يحچي أرقام اكبر من راسه
مشينة لحد ما وصلت للشارع الفرعي للبيتنا
وهي بيتهم بالبداية قبلي توصل
التفتت سوتلي باي: - ديري بالج على نفسج ايما
: - و أنتِ كمان ديري بالك ع مرجك كمان
ضحكت ومشيت
رجعت للبيت لكيت خالة مسوية الغدة وبيتنا دافي
بوستها وصعدت فوك أغير ملابسي.
أتفاجت بمراية غرفتي مكسورة هاي شوكت أنكسرت
طلعت من الغرفة طلت على خالة من فوك
: -خالة شنو كاسر امرايتي
: -وكعت
: -شلون وكعت
: -مادري لكيتها واكعة
: - مرج اكيد
: -شمدريني بعد
رجعت للغرفة ادردم وأحجي يعني مايصير هيج
كل يوم شغلة أنوب امراية غرفتي
خلة يجي بابا وأكولة بس طبعا ما أتوقع يسوي
شي بابا معتبرة واحد من العائلة ولا يحجي
بعدني بالغرفة وسمعت دكة قوية على الباب.
سمعت صوت خالة دكلهم. مو هنا. دكلك مو هنا. تمشون لا نطلب الشرطة
نزلت بسرعة لكيت اربع شباب معضلين واكفين باب بيتنا واحد بيهم جنه جون سينا
وكفت بصف خالة وهو كالها
: -وينه تيم
اسينات: -هذا يا تيم التحجون عنه اكيد مخربطين بالعنوان
: -تيم عصام
شجن: -روح شوف وين بيتهم شكو جاينه شدرانة وين تيم وعصام مدري منو
رد علينا بعصبية: -كالوا هذا بيتكم هنا عايش.
شجن: -لا عيني هذا بيت على ال هاشم تكدر تسأل الجيران وياريت تمشون ترا خابرنة الشرطة
طبعا احنا ما مخابرين الشرطة بس عود نخوفهم
لان هنا القانون قوي وصارم وعلى اقل شي غرامة وسجن
عود حاولت أهددهم كالتلهم
: -روحوا منا قبل لا يجي أخوية مصطفى ترا ما أضمن الكم شيسوي بيكم اذا شافكم باب بيتنا
ردت عليهم خالتي: -أتصيرون مودبين وتمشون منا لو أخابرلكم مصطفى يطيح صبغكم.
جان واحد منهم رد علينا: -شو جيبي بلاااا مااانمشي اليوم اذا تيم ميطلع النا هالجبان
شجن: -شمالكم لطشتوا دنكلكم ما نعرفة
صراحة ما ردنة نطيهم عنوان بيت عمو عصام
وهذا تيم ابن عمو عصام حرك ويخلق مشاكل
بمدرستة دوم ينفصل ويرجعة ابو ويتعهد بعد ما يعيدها هسه لو بي خير ويعارك دوم يتكفخ
ما أشوفلك الا سيارة مصطفى أجت عاد خالتي حجت بنوماس: -اجاكم ابن أختي يمرعدكم اليوم يطيح حظكم.
همة كل واحد اكبر من مصطفى مرتين صراحة اني ركضت خابرت على الشرطة
ورجعت بسرعة وكفت ورة خالة وطلعت المبايل دزيت رسالة للعمو عصام
مصطفى حاول يلم الموضوع ويسدة ماكو انوب واحد بيهم تنح يغلط ويسب
وطلعوا إلى تيم وكل شوي وكال هو هذا الجنتي اتهددينة بي
انوب خالتي ما تسكت كالتلهم: -صكاركم ابو الصوف
واحد منهم دفع مصطفى بخفة بيدة ومصطفى عاد هد عليهم
طبعا دخل المعركة بركة دعاء خالتي وتشجيعها هو اكيد راح ينعلس اخوي.
ياربي كون يلحكون علينا الشرطة انوب همة تكابلوا عليه مكابل بوكسيات ورفسات
وسولة هيلة يا رمان وشمروا على بنيد سيارتة
هذا الحجي اني وخالة انعيط
الحمدلله ذولة جيرانة السورين فزعولنة والشرطة وصلت
طلعوا مصطفى من أيدهم أجنازة يون
وخالتي لحكتهم للسيارة بعد ما الشرطة
كلبجتهم واخذتهم غمتهم وتفلت عليهم ورجعت همزين الشرطة ما أخذت خالة هم
دخلنا مصطفى جوة حطينا على القنفة
وجهه وخشمه صاير خريطة.
وعلي اخوي راح بيهه انوب اجة عمو عصام اخذة للمستشفى
ورجعوا بالليل نومنا بالصالة واني وخالة كاعدين يمه يباوعلنا فاتح تك عين كال بصوت متوجع
: -ها ارتاحيتن
طبعا اني وخالة أثنينة ساكتين وحتى تكمل أجوا ماما وبابا على اساس مسوينلة مفاجاة بجيتهم
لكونة أحنا مسويلهم مفاجى وبابا صار نار
كال ما لمصطفى ما تتنازل عنهم الا أطلعها من عيونهم بسيطة.
بابا ما ارتاح خطية اجة منا وراح هو وعمو عصام لمركز بقينا احنا وماما كاعدة يم مصطفى وتبجي
وكل شوي وكالتلة: -ولك لو موتيك أشلون جان سكتت عنهم خيولون
كالها: -غير هاي اختج عمت عليه مرعدهم ما مرعدهم
اسينات: -انوب همة مرعدوك هههههه
شجن: -انجبي اسينات
اسينات: -تمام خالة
شجن: -بعدين اني شدراني ولك حسبالي مثل ابوك وجماعته قبل بزمناتهم جانوا صاركين العمارة اسال امك جا كلت هالشبل من هالسد شدراني يحطوك ويسحلوك.
مصطفى: -بابة انة واوي بس عوفيني هي مل شبل غير دنكات همة واحدهم بكد الكوسر
حجت ماما بلوم: -عفتكم كم يوم وهيج صاير بيكم ادري من اموت شلون بيكم
اسينات: -تاكلنة الواوية
بقينا كاعدين لحد ما اجة بابا وعمو طبعا خالة شجن من اجة عمو عصام صعدت للغرفته ما بقت
كعد بابا يم مصطفى كالة: -يلا بمهاتهة سبع مابيك شي
عصام: -هي هاي اطك وتنطك عادي
مصطفى: -ما ارتاح ولا يهدالي بال اذا ما اخذ حكي.
علي: -صير زين وشدلي حيلك خليهم جم يوم بالمركز من يطلعون وراها نلزمهم نسكطهم
عصام: -وندفعلك غرامة ونطلعك
اسينات: -عمو ترا سبب المشكلة تيم همة جانوا ديسلون عنه وحسبالهم هذا بيتكم
عصام: -بالعباس نقمة طاحوا على راسي ما يفيد بي الدك يرجع يسوي مشاكل
شمس: -خوية حاول تلزمة شي يوم يجيبلك مصيبة هسه هاي سهله
هز راسه عمو عصام محتار فعلا ولدة واحد مريض مقعد والثاني صدك نقمة مثل ما يكول شالع كلبهم.
بس المشاكل من جوة راسة هو راح وبقينه بس احنا
وبابا شوي فك وجهه بعد ما جان عصبي كال لمصطفى
: - عاد طكيتلك واحد منهم لا
مصطفى: -مالحكت اشيل ايد
اسينات: -بابا همة اربعة وكلهم معضلين
علي: -يصير خير بالقران الا أسحكهم سحك بس خيطلعون
شمس: -علي شسالفة هاي عود أنتَ الجبير ابوهم هيج تحجي هسه همة بالسجن وما نتنازل عنهم يتادبون بلا مشاكل تريد تتعارك وياهم هم يذبوكم بتوقيف
مصطفى: -ميخالف أنة أدخل عادي.
بابا ضربة على جتفة بضحكة وكالة: -وأنة أدفعلك غرامة وأطلعك ولو احنا ما راح نخليهم يعرفونة
ماما جانت ما راضية بس بابا مستهضم الا ياخذ حك مصطفى وهذا اخوي مكسر وهم ماخذة الواهس
علي كلام بابا، عفتهم وصعدت انام
تمددت نعسانة وعندي دوام وهسه الساعة
بالثنتين واني ما نايمة يمكن باجر ما اروح أنطي لنفسي اجازة
جنت اسولف وحدي وتحركت البردة
الشبك مفتوح على النص حجيت بشك
: -هذا أنتَ.
ماكو رد. تغطيت وعيوني على السكف خليت الضوء مشتغل ما طفيتة
تغطيت أكثر حاولت أغمض عيوني بس عقلي ما ساكت أفكر باللي صار اليوم
الهوى يدخل خفيف من جهة الشباك
يحرك البردة بهدوء
غمضت عيوني كوة حاولت أنام
النعاس غلبني وغفيت
وفزيت على صوت ماما يم راسي كعدت ماكو أحد
باوعت على الساعة بالاربعة الصبح گمت نزلت من
فوك لكيت مصطفى نايم جوة بالصالة فراشيلة ببنص بمكان الطاولة ونايمة يمة خالة شجن.
شفت مبايلة ديضوي رفعتة جان مكتوب: -ملاك
منو هاي؟ وليش كاعد تتصل بخوية بهيج وكت
شنو متحلمة بي
طفيت مبايلة وصعدت فوك لكيت ماما وبابا نايمين لعد صوت منو إلى سمعتة ياربي يمكن جنت أحلم
رجعت نمت يم خالة ومصطفى نمت بصف خالة وتغطيت وياهم مادري بس خفت ارجع انام بغرفتي.