رواية مرواد الظلمة الجزء الثاني للكاتبة هيلانا الفصل الثاني عشر
شويّة وانفتح الباب دگة خفيفة وبعدين انفتح على وسعه طبّوا العريس وأمّه وياهم المؤمن
عمّتي كعدتني على الجرباية وهو بصفي والمؤمن كاعد على كرسي قريب صوته هادئ بس كلبي يدك
كلشي صار بسرعة حاضر، قبلت، موافقة
ما لحگت أستوعب بعدنا ما مخلصين گالت عمّتي يلا و سحبتني ونزلتني جوّه.
كعدت ووادم ملتمّة عالم، هواي عالم
بنات يركصن لابسات قصير بيض ثلج يضحكن حضريات نازكات مبينات.
الدنبك يدگ وصوت الضحك عالي وأنا بينهن غريبة روحي مو وياي.
تعشّت الوادم وبعدها بلشوا الزلم يطبّون ويطلعون على النسوان عادي كأنو ماكو شي اسمه حرمة بيت
كلهم حلوين مهندمين أنيقين...
واحد منهم دش بالركص البنات التمّن عليه.
: -هجرس هنا، تعال
من وحدة لوحدة يجرجن برجال وهو يضحك ويهز جتف واثق مرتاح مبين يعرفهن.
ما أدري أخوهن لو گرايب بس واضح إنو المكان مألوف إله.
بقوا يركصن ويدكن وكت طويل لحد ما گالت العشرة بالليل.
فجأة كل وحدة لمّت نفسها ومشت لبيتها
عمّتي صعدتني للحجرة
كعدت على الجرباية مرتبكة حلگي ناشف أنفاسي متلخبطة.
هي تشوفني وتعرف، تعرف إنّي بالعة العافية.
وجهي صار أصفر جسمي جامد من الرعب.
گالتلي وهي تبتسم
: - لا تخافين ماماتي الموضوع بسيط
وسكتت شويّة وبعدين كملت
: -أني وصّيت نبيل بيج إنتِ بس صيري مطيعة ولا تشلعين گلبه والأمور تمشي بسلاسة.
هزّيت راسي بدون صوت.
طلعت شويّة وضليت وحدي.
سمعت صوت الدنبك
فهمت صعد
كمت كفيت على حيلي عدّلت الطرحة وخليتها على ويهي.
سمعت خطواته بالحجرة.
الباب انسد.
ما شفته بس هيست
حضوره استوطن المكان.
إيدي بردت جسمي نمل.
شفت إيده ترفع الطرحة عن ويهي.
ما أدري شلون أوصفه
جان كلش كلش حلو.
قاط أسود شعره مشط بريگي حالق ضل شواربه مرتّبة
تمعّن بويهي شويّة عيونه تدور بتفاصيل ويهي وبعدين گال وهو مركز
: - شكلچ يشبه التفاحة الطازجة من فوك.
سكت لحظة قرّب وهمس عيونه بعيوني
: - بس خايسة من جوّه و مأكولة.
بلعت ريكي بغصّة
رمشت أحاول أستوعب كلامه.
الكلمة نزلت عليّ مثل راشدي
لفّ وجهه عني واندار للحمّام.
انسد الباب وراه.
جريت نفس ومشيت بخطوات تايهة.
وكفت كدّام المشوفة(المراية)
هاي مو أني
ويهي غريب عيوني مطفية ملامحي ميتة
ضليت صافنة على روحي وأسأل
شنهي جنت متوقعة عرس حياة أمان
بعد إلى سويتة.
بس هو عليش أخذني إذا يدري بيه ومبين من البداية ما عنده نية زواج وياي
ليش عرّسنة هاذا العرس بداية لشنو
طلع من الحمّام وهو ينشّف إيده بالخاولي ما رفع عينه عليه ولا مرّة
يتصرف عبالك وجودي زايد عن اللزوم
راح للكبت بدل ملابسه بهدوء
تمدّد على الجرباية أنطاني ظهره وسحب الغطا عليه.
عبالك الغرفة بيها شخص واحد مو اثنين.
كعدت مكاني ما أعرف وين أروح على طرف الجرباية إيدي مشبوكة بحضني.
هو ما التفت ما تنوعلي بعد شوية سمعت صوت نفسه يتثاكل نام
نام وظهرة إلى نام وكأني مو موجودة ولا حتى عندة فضول يعرفني او يسألني يحجي وياي كلمة ماكو
تمددت ببطء على طرف الجرباية خليت ظهري للحايط وسحبت الغطا نصه عليه
جسمي يرجف من البرد و من الإهانة.
الساعة ما أعرف شكد بس الليل طويل.
افكر هاي أول ليلة إذا هيچ بدايتها شلون نهايتها
عيوني مفتوحة ماكدريت أغمض.
باردة الحجرة ماكو صوت بس نفس جال نايم بصفي ولا شايفني ولا حاس بيّه غمضت عيوني كوة
الصبح كعدت كبلة وما نمت أصلًا بس گمت لأن ما أعرف شني الصح أسوي
غسلت ويهي ولبست ثوب مرتب
نزلت جوة
السفرة مرتبة صحون متناسقة وكلشي بنفسك موجود على السفرة
أمة جانت كاعدة كبلنا لابسة روب حرير شعرها مرتب نظرتها تمسح المكان وتمسحني ويا المكان
وهو نزل وراي كعدنة صفة وامة اكبالنا
نبيل كعد بدون ما يسلّم.
سحب الاستكان صب چاي وبدة يشرب بهدوء.
أمّه باوعتلي من فوك ليجوة
وبعدين گالت بنبرة ناعمة بس جارحة
: - لبسج شوية يحتاج ترتيب
سكتت كملت
: - إنتِ هسه صرتِي زوجة رجال مهم لازم تنتبهين على نفسج أكثر مو هيچ تطلعين بهاي الملابس
مدّت إيدها للخبز وكملت
: -وبصراحة ماماتي لازم تضعفين شوي.
جسمج شلون أكولج مرعبل عوزج خصر
ماكدريت أبلع الگمة إيدي ترجف بس نزلتها جوة السفرة الدمعة بطرف عيني احسها متعمدة تهيني.
نبيل ولا كلمة عبالك ما موجود
يشرب چايه وعينه على الجريدة بيدة
گالت وهي تبتسم ابتسامة ثكيلة
: - إنتِ بعدچ بت ريف وهذا مو عيب بس لازم تتعلمين شلون تتصرفين بهيج بيوت الذوق الاختيار كلشي ينعكس على سمعة العائلة ماما
هزّيت راسي ب اي
نبيل كمل چايه وگام وكف
: - عندي دوام رايح
لبس بالطوة بدون ما يباوعلي
طلع والباب انسد وراه
أمّه كالت: -اليوم ترتاحين وباجر نطلع نشتري لج ملابس تناسبج.
بقيت كاعدة الريوك كدامي بس ما أكدر وهي كملت فردت المة كمت شلت الصحن مالتي وتوني اشيل
صحن نبيل وهي رفعت صوتها شوي: -لا لا هذا شغل الخدم مو شغلچ أنتِ أصعدي بدلي ملابسج راح يجن أختي وبناتها
: -ماشي
صعدت للحجرة طلعت ثوب احمر بي احزام لبستة وجفيتي سودة وحطيت حمرة سحرية على خدودي
ورجعت جوة كعدت يمها وشوية واين اختها وبناتها
جانظ اثنين ولابسات قصير فوك الركبة تنورات.
وقمصان جنهن توم لابسات تنورات سود وبس القمصان يختلفن وحدة احمر وحدة اصفر ومسويات
نفس گصة الشعر القصير سلمن وكعدن شربن جاي ويسولفن ويه خالتهن بس وحدة منهن التفتلي
: - هاي هي العروس؟
امة ردت: -هيچ جان اختيار نبيل
الثانية ضحكت وحجت
: -البارحة من ورة المكياج تخبل اليوم بينت ملامحج اسفة منج بس والله مو يم ابن خالتي أنتِ ابد أنظلم نبيل افاا عليج خالة ظلمتي أبنج
هي ردت بعدم أهتمام.
: -أختيارة خالة لعد هو أصغير وأعلمة
أمّهن خزرتهن وكالت
: -تخبل البنية بالعافية عليج خية وزين ما أختار نبيل
باوعتلي وكملت
: -معليج يمة بالبنات يشاقن وياج
أمّه نبيل هزّت راسها ببتسامة وهن يضحكن بس امهن ما رضت على تصرفهن أنا ما رديت أصلا
وحدة منهن كالت
: -اي مثل ما كالت ماما حلوة بس شنو يحتاجلج تعديل وشغل
عمتي حجت: -إي بالضبط بعدها تحتاج شغل هواي على نفسها
ضلن يسولفن وأنا ساكتة
عيوني بالكاع وشادة على أصابعي.
يحجن كله بلبس وطلعات وفلانة هيج سوت تدرن بفلانة اتزوجت منو وتدرن هجرس يحب وحدة كردية اوف خيرنة للغريب
حسيتهن حيل عنصريات وما يردن جنه غريبة ولدهن بينهن كون ما ياخذون غريبات
وكفت بهدوء سحبت نفس طويل وحجيت
: - إذا تسمحولي أصعد
ما انتظرت جواب صعدت الدرج خطوة خطوة
طبيت وسديت الباب
أسندت ظهري عليه ونزلت أدموعي بدون صوت.
أنا لو ما الصار وياي والله أطلع الساني وفن اليسكتني بس أنا عيني مكسورة وماكدر أحجي.
دمرت نفسي بيدي وطلعت منزلة راسي من بيت أبوي لا زفة لا هلهولة حتى محد رمة وراي مثل البنات
ما الازم أضل هن أخذلي مدة وأكلة يطلكني ارد يم أهلي وعسى الله يجمعني ببني واربي وأنعيش سوة
وما اريدن شي بعد.
زينب:
هو البارحة جاب مسواك بس اني جنت جوعانة عفت المسواك كله واخذت بس دجاجة
هسه كعدت اكلب بالعلاليك لكيت بيه طماطة وبتية جايب رحمة الله والدية
كليت بالطاوة هو اكو اماعين هنا بس وصخات مزنجرات كوة نضفتهن وهاي طاوة مزنجرة ومحتركة هسه تسوي بيه امراض
كعدت اكل توني وهو اجة رفعت راسي باوعتلة استغربت جيته هو يجي بالليل شعجب راجع من وكت حس على. دمة يمكن.
اجة كعد بصفي نطيتة نظرة و سحبت الطاوة سحبها اقوة حجيت بنزعاج
: -وخر هذا غداي
: -جااا وانا
: -اطبخ لنفسك الا تاكل غداي
رد بضحكة: - جا و أنتِ المن اريدج من كون ما أطبخين الي
: -خدامة الخلفوك اني
: - اخلاقج عالية
: -احسن من اخلاقك العاوية
سحبت الطاوة و خليت عيوني بعيونة بقوة واني اخفي كل توتري
ابتسم باوعلي بنظرات راخية يحجي بهمس
-: أكلي عوافي من تاكلين جن انا ماكل.
درت وجهي واني اسب بي كبر فشلني بخلاقة هي طماطة محتركة راح اخلي ياكل
بلكي يسمم ويموت من التزنجر مال الطاوة كتلة واني ارجع الطاوة بينه
: -يلا اكل
: -شبيج كابة اليوم
: -من وراك تعوفني هنا وحدي وكل شوي واحد داك الباب واني اضل مرعوبة وخايفة انوب قافل الباب حتى ما اكدر اشرد اذا اريد
: -زعلان البرغي على هاي
ضيقت عيوني بستفهام وهو ابتسم
: -منو البرغي؟
: -أكو غيرج
: -لحظه اااحترم نفسك ترا طويلة
: -شگد طولج.
: -ما ادري بس طويلة لا دكلي برغي
: -يلا عمي بسمار
عضيت شفتي حتى ما اضحك احاول ابقة مزعوجة
كال
: هسة گليلي شنسويلج وترضين
-: ما ارضة ليش تعوفني هنا وحدي بلا اجت الشرطة واخذتني أني وجودي
: -منين جودي ياهوو
: -اقصدد جود ابن اااخوك لو ناسي
: -كولي جود
: -ماعلينه هسه اكل وياي لا حسبالك اني بطناوية
: -ما اريد
دفعة ويدخن وعيونة عليه عفت الاكل وكتفت ادية اباوعلة هو شنو عبالة اخجل مثلا اعلمه كال بضحكة.
-: شبيج ضاربة رگن عوزج بس تصجميني
-: ياهو أنت وأصجمك وجهك ما ينطلع بي
-: هههههه على ساس أنتِ شلونج
: -شبية اخبل
-: بهاي الكفشة
عيونة على شعري طالع شوية من الجفية هو صدك تگطع وصار ملتوي وشوي مو حلو الصراحة من
الضيم كضيتها يم بيت عمي اغسلة بتايت انوب يمه حتى بانزين غسلتة موزين باقي عندي شعر نترت بي بضوجة
: -خلصت تصنيف اروح انام؟
: - شعدج نايمة الظهر.
: -لعد شسوي أضل كاعدة أباوع لطولك الحلو لو اذرع گاع يا انام يا أكل يا أبجي هن ماكو غيرهن
هز راسة بأي و راها دار وجهة و طلع بقيت مصفنة بمكاني الحمدلله وشكر شبي هذا
رجعت لغرفة يم اجويدة العب بي وأناغي بس هو ما يضحك احسه مطنكر مثل عمة
أنوب لفيت روحي بالبطانية وانتظر النوم يجيني. بقيت اباوع لسگف
مرت وقت تگلبت ماكدرت انام لحد ما حسيت بي رجع غطيت راسي و مثلت نايمة
صار ضلة فوگي ندس جتفي
: -زينب نمتي گعدي.
: -شتريد
: -خطار أجاج
: -منو
كمت من مكاني طلعت وراه للغرفة الثانية جان الگة صاحبه ويا مرتة هاي الماتستحي هبة
يبو ذولة شعدهم سلمت عليهم
و رجلها عينه بالكاع وجان مستحي
كال وهو يحك راسه بإحراج
: - والله آسفين زحمناكم ويانة
أجياد رد
: - شنهي زحمة هذا بيتكم
هبة ما انتظرت دعوة دخلت و عيونها تلف بالمكان وبعدين رجعت عليّه بنظرة سريعة وحجت
: - إن شاء الله ما جينا بوقت غلط.
: - لا عادي تفضلوا.
سويت الهم جاي وظاهر أكو سالفة جبيرة ورة جيتهم والا مستحيل يجون أنوب هو بيتنا غرفتين
وهي أجت يمي تفتر ماخذة راحتها ومكيفة عبالك جاية على قصر مو بيت طين شبيها هاي وين عقلها
اجت وكفت وراي وأني أصب
: -حطيلي شكر كثيرلي أحب الحلو
: -الجاي
: -اي الجاي وكلشي حلو أحبة
: -اي مبينة
: -وداعتج كلشي أختارة حلوة ذواقة
: - واضح.
: - يعني حتى الرجال أعرف أختار.
رفعت عيوني عليها وكملت بضحكة وهي تاخذ الاستكان.
: - بس مدري اشلون اختاريت هاذا
حجت وأشرت بحواجبها للغرفة عود على رجلها
كبر
بقوا يمنة وعرفت من أجياد راح يبقون كم يوم هنا ليش ما أعرف ما يحجيلي ماااايحجيلي هاالسطل موتني والله عبالك راح أسولف عنه اذا حجة اوف
بس اجياد والرجال مشوا من العصر وبقينه بس احنا وهي تفتر وتعيب على البيت
أشلون عايشين هنا ماجاوبتها كاعدة أسكت بجود اجت بصفي تباوعلة كالت
: -رضعي ليش يبجي
: -ها مو رضعتة قبل شوي
: -على صدرج هو موو
: -اي.
بقت تباوعلة حجت بستغراب
: -شو ما يشبهج أسمر ومعانية ما تشبه معانيج
: -اي عادي طالع على أعمامة وأبو
: -ممم مو عليج بس يعني هم ياخذ صفات من الام هو صح الطفل يشبه اهله بس هم عيونة او فد صفة تجي بالام
: -ما أجت لعد شسوي
: -يلا لا أتضوجين ينطي شبه لخالة أجياد
: -اي، أي صح
: -أنطينيا أشوفة أحب الجهال
لخاطر الله شگد مغثة هسه عوزي أني وجاب هاي فوكي أخذتة خلتة بحضنها وتبوس بي.
بالليل سويت بتيتة سلك وخليت عليها ملح وخبز وهي مكابلتني ناكل سوة سالتها
: -ليش أجيتوا هنا
رد بضحكة: -شنو أثكال عليج
: -لا عيني مو هيج البيت بيتكم بس استغربت
: -ما ادري والله بس معتز كال جاية عليه شكو والامن ملاحگينة
الفضول تربع وكعد يمي حاولت أبوك السانها اذا اعرف معتز شنو شغلة ومن شنو منهزم هم
راح أعرف اجياد شنو يشتغل وليش كاعد ننهزم همة أصدقاء
: -يعني ليش ديلاحكونة.
: -ما أدري شمسوي بس الموضوع مو سهل شغل معتز حساس
: -هو شنو يشتغل
: -بالسلاح
: -شلون يعني بالسلاح
كالت بشك
: -ليش أسالين عن شغل زوجي
: -مو هيج بس فضول
: -ما يقبل معتز أحجي ما يصير نكشف اسرارنا للناس الغرباء
: -لعد شنو اني غريبة غير هالكاعدين بيتنا
: -شبيج عيني عيرتينة تونه اجينه لبيتكم بس يجي معتز اكولة ونروح
: -لا، لا مو هيج بيتكم هذا مثل ما كال اجياد بس يعني سوال سالت عادي لا جاوبين.
حجت بصوت ناصي كأنها تخاف أحد يسمعها
: -الأمن ديلاحگة أي حركة غلط ممكن تجيب مشاكل معتز مو شخص عادي شغله حساس وهو هواي محذرني لذا ما اكدر أحجي
: -اي تمام
سكتت عنها مليون بالمية هو واجياد نفس الشغل
والا شنو بسرعة هو هم تلاحك
بالليل محد. منهم رجع وهي نامت بصف جود بقيت أني كاعدة مر وقت ويمكن نص الليل
سمعت صوت طگطكة بالغرفة الثانية كلت معقولة رجع أجياد باوعتلها نايمة كمت.
مشيت بخطوات مترردة للغرفة ظلمة ماكو غير الضوء الخفيف إلى يجي من الفانوس بغرفتنه
شفت أخيال يم البوفية وحركة معناها كاعد يدور بيه حجيت على كيف اجياد هذا أنت
اول ما سمع صوتي وكف واندار عليه بس وجهه ما مبين بس شكلة أضخم من أجياد شكيت هذا مو
هو كتلة بسرعة منو أنتَ جان أتحرك يريد يلزمني انداريت بسرعة اريد اشرد للغرفة وهو لزمني
من أيدي عتني عبالك شلع ايدي مو عتها بكل قوتة.
وكعني بالكاع وادي التفن على ركبتي بكل قوتة
ضغط بكل حيلة والهوى انگطع عليه ضربتة بدية ماكو حتى صوتي راح بقيت ارفس
أعيوني دمعن وخشمي طك دم من حلات روحي خرمشتة من عيونة وهو جان يوخر براسة ما يخليني الزمة ويضغط على ركبتي راح أموت
فجأة صوت الطلقة أخترق اذاني والدم تناثر على وجهي والله راسه طار نصه عدل أنمرد مرد
ادي رخت وطاح فوكي ودمة دمر وجهي صرخت وأني أحاول أسحب نفسي من جواة بس ثكيل.
وخرت كوة دفعته طاح وزحفت للحايط وأشوفها هبه بيدهة المسدس واكفة باب الغرفة كلش والضوئة عاكس عليها اجتني بسرعة كالت
: -زينب شسوالج
جنت ارجف واحس بدمة على وجهي وادية انصبغن كومنتني واني منهارة ابجي
اخذتني للغرفة كعدت واحس روحي طارت جريمة ثانية هاي وهي تفتر عادي وتشتم بزوجها
دكول شلون عافونة هنا وحدنة وهمة يدرون بلي ديصير شبيهم ذولة.
أدموعي تنزل بدون صوت وهي راحت جابت بطانية وفاتت للغرفة لفت الجثة بيها واجت يمي كالتلي
: -تكومين تغسلين شوفي ملابسج وجهج شصار بيج
: -مات الرجال
ردت بسخرية: -شنو تشوفين طبعاً مات بلا شلوني خوش أنشيل جبتها براسة
: -جان طگيتي برجلة ليش موتي
: -لا خيولي والصراحة معتز علمني أنيشل كله براس كالي ياهو يحاجيج طگي براسة وأكلبي بعدين لو ما ناگدتة جيلة جان موتج اووي لا صيرين مفهية.
مرت وقت تقريبااا بلش الشفاك يطلع وبهل أثناء سمعنا طكت الباب عاد هي طلعت ومسدسه بيدها
شهگت و گمت ابجي بصوت عالي ضامة وجهي برجلية و حاضنة روحي گلبي يوجعني
القهر احس بمرورتة بحلگي بجيت بقوة سمعت صوت الباب نفتح
بس ما گدرت اسكت نهاريت كلش بلحظة وكلشي رجع علية
كأني جنت نايمة و فزيت او توني صحيت على روحي
اعمامي وموت أخوي وكتلت محمد وخالد حتى موت حسن وشلون أنذبح كدامي كله التمتت عليه.
محد تلفني هالتلفة غير أخوالي هم التلفوني بيها وعافوني. اهمالهم و تهميشهم
كل لحظة مرة علية برعب وحدة. عصرت ايدي حييل گمت اضغط على ادية و ازلغ بيهن من وجع
البصدري اريد اسيطر على روحي ماكدر
ارجف حسيت بأيد تلزم ايدي فكاهن ولزمهن بقوة مارفعت راسي
وهو لازم ادية يحجي وياي بس ما مركزة شنو اسمع صوتة ماكدر الگف كلمة وحدة
دفعته وكمت جنت مقهورة منهارة ضايعة واحس كلشي ديصير دمار اني ادمرت وين فتت وي منو.
عايشة وشكم واحد مات لهيسة لزمني من ايدي انداريتلة ابجي جان ديحاول يحجي وياي بسياسة
ما جاوبتة وبالحظه ضعف جنت محتاجة
احد الوذ بي أحتمي بي أبجي بحضنه وما
جان كدامي غيرة هو جنت خايفة ومن الخوف بدون ما أحس كبل حضنته.
هو انصدم بسرعة خلّى إدي ورا ظهره وجمُد بمكانه مثل الواحد المصدوم
وأني أبجي وبنفس لحظه أنفتح الباب ماعرف منو أجة وخرت بسرعة عنه
أمسح بدموعي وارجف عيوني راحت على هبة تباوعلنا بغرابة.
رجعت نظراتي اله بعدة صافن عليّه ابتعد خطوة ومسح وجهه وكال
: - شسويتي زينب؟
گلت باستغراب وخوف
: - شسويت
تلعثمت متفاجئة أتذكرت حضنته كبر طمني أنوب هبة شافتنة
هسه اخذ عليه نظرة مو حلوة عود ردت الزك السالفة كتلة
: -أ، أ، جنت خايفة آسفة، يعني اعتبرها حضنة أخوية
حجيتها وأني أمسح بدموعي ما ادري شصار بيه وگمت اهبد هيج وهو هم جان مصدوم اكثر مني
شگد صارلنا سوة بس أبد ما تقرب منه
رفع حاجبه باستغراب حجة بهمس.
: - حضنة أخوية
: -إي إنت مو أخوية
تنفّس بعمق نبرته هادية بس حازمة وحادة
: - إي أختي المهم هسه أشلونج
: -موزينة ليش عايفني وحدي شوف شصار وهم. هم صارت جريمة ثانية هاي كله من ورة راسك
جان هبة كالت من يمها واكفة يم الباب
: -خطية من الخوف حضنتك عدها اخو تحتمي بصدرة من تخاف
اندار عليها أجياد وهو بعده متشنج كالها
: -أنا وأختي أنتِ شعليج
ما حجت وهو طلع بقيت بمكاني وهي قربت وكفت اكبالي باوعتلي بنظرة فاحصة.
: -بس شفتچ حاضنته هو هيج الوحدة تحضن اخوها
حسّيت الدم صعد لوجهي رجفة إدية فضحتني
قبل لا أجاوب حجت
: -غريبة شو ما داخلة بعقلي سالفة الاخوة
: -شدخلج حضنته ما حضنته ما يخصج
: -حبي علمودج كاعد أحجي و عموماً إذا أخوة ليش الخوف ما بيها شي أحضني براحتج
حجتها وغمزتلي وراحت للغرفة الثانية كبر لفها الادبسزز
ما رديت عليها طلعت برا بوجهي للحمام كعدت على طابوكة بالحمام وشغلت الحنفية اغسل بدية وأبجي.
حسيت بي واكف بالباب التفتت عليه ورجعت اغسل بدية اجة كرفص كدامي وسحب ادية يغسل بيهن بصابونة وانوب غسل وجهي واني دموعي بعيني كال
: -كافي تبجين مو عيونج راحن
: -ما شفت اشلون هبة طكتة جيلة هيج دمة وكع على وجهي وهم لو ما هي جان موتني انت ما تعرف شعوري والله تعبت اني دشوف جرام فضيعه اني
ضايعة كل يوم جاي ياخذ من روحي واملي احس كلشي ظلام بعد ماكو حياة النا هي تاليتنا لو نموت لو
ننسجن واذكرك بهل كلام.
حجة بهدوء وهو يمسح وجهي بالخاولي
: -اثنينهن ما يصيرن
: -والله يصيرن
: -أنتِ ما راح يصيرلج شي ثقي
: -شراح تسوي توكف بوجهه الدولة اذا اجت اخذتني اني عليه جريمة هسه
: -اييي اوگف وداعتج كلشي أسوي علمودج
: -مثلا شنو
: -روحي اكول اغلى من الروح أطيج روحي اذا اطريت
: -واشلون تنطيني روحك هي روح تتطلع من الجسم مثلا
ضحك وضرب بخفة أصبعة على راسي.
: -اذا أجة يوم وأنجبرت أحميج فمستعد أفديج بروحي وشي ثاني محد يدري أنتِ كاتلة ولا احد
شاف واذا لا سامح الله وصارت انا اشيلها عنج وحتى السلاح نضفته لا تخافين وتضلين تفكرين
: -ما ادري خايفة الخوف ياكل ويشرب وياي شكد ماتت ناس اجياد حتى ضميري مات وياهم كمت ما احس بالذنب بس اخاف انرعب
تقرب راد يحضني أنوب رجع مبتعد حك راسة بتوتر وكال
: -يلا تعاي جوة جبتلج عشة.
رجعنه جوة ما أكلت هو منو الة نفس ياكل بس هبة اكلت واجياد اخذ الجثة مدري وين راح يدفنها
بالليل رجع، هبه وزوجها كعدوا بالغرفة الثانية واحنا بهاي جنت متلفلفة بالبطانية وعيني على ضوء الفانوس بصفي وهو متمدد وجود بصفة يناغي بي
أنوب عافة واجة كعد بصفي رفعت عيوني الة كال
: -باجر نروح للبتيرة هناك امن النا ان شاءلله
: -انت وين دتروح كل يوم
: -عندي شغل
: -شنو شغلك
: -عليش أسالين.
: -اريد أعرف شنو هالشغل الماخذ وقتك وعايفنه وحدنة
: -بعد ما أعوفكم
: -ما راح تحجي
: -مو وقتها
درت وجهي عنه رجعت أباوع على الفانوس
كال
: -تعشيتي
: -لا
: -عليش
: -مالي نفس
: -وين عاجبج أعشيج
: -ما اريد
: -نطلع
: -وين نطلع هو انت حابسني هنا
: -لا هساع نطلع وين تردين بس أحجي
بقيت أباوع بوجه هز راسة بمعنى أشبيج كتلة
: -اليوم مات شخص
رد بعدم أهتمام: -مو أول واحد.
: -اعرف بس يعني شنو ما جاي تحسون بحجم الخطر إلى احنا بي غير عقاب رب العالمين
: -جا شسوي
: -أنت شنو سالفتك
: -ياصبر أيوب أكلها أعشيج برة ما ترضى اعوفهه وامشي ما ترضى هسه شتردين
: -ضايجة منك أحس نفسي أثكيلة عليك
حجيتها وبجيت درت وجهي عنه كال بضحكة
: -مشتگي يمج وماادري ياهو كال ثكيلة يابة لا تبجين والله من أشوفج تبجين أنشك شگ
مسحت أدموعي وحجيت: -ما اعرف احس صايرة حساسة.
: -لا مو حساسة بس ما متعودة ان شاءلله تتعودين على الجو
: -ليش اكو ناس بعد راح تموت
: -الله اليعلم
سكتتت ولفيت راسي ونمت هو ضل كاعد ثاني يوم بالليل طلعنا من القرية بسيارتنا وهبة وزوجها هم بسيارتهم
بالطريق مخلية ادية بجيوبي أدفيهم جوء بارد وهو فاتح الجامة نسمات الهواء الباردة
تسببب قشعريرة بخشمي باوعت بالمراية صاير أحمر
خطفت نظرة لة يسوق ساگت تولدت بنفسي حيرة
ليش رايحين لهناك وليش الشرطة تلحكنة اذا مو.
علي جريمة على شنو كاعد يدورون علينا من شنو مهزومين واجياد شنو يشتغل وهواي اسالة براسي
صف سيارتة يم دكانة وبصفها بسطية ورد
دقايق وأجي باوعتله جان جايب علاكة حلويات
تارسها ترس وربطة ورد أبيض فغرت شفتي بدهشة وهو حرگ السيارة
: -شنو هاي
: -شني شوفين أنتِ
: - لا قصدي يعني شسوي بيهن
: -هساع بس نوصل تلگين مجهزلج بيت وبي غرفة تخلينها بغرفتج كلما تشوفينة تذگريني
حجيت وأني أكلب بالوردات بيدي.
: - ليش اني أنساك حتى أذگرك
كال بدهشة-: هااا
رفعت راسي بسرعه أني شحجيت أرتبگت فلت لساني درت وجهي على جامة ضامة روحي بفشلة
: - يابوية ولا أدري هيج تحبيني وأبالج دوم
-: ما أحبك لا أقصد باع زل الساني جنت اقصد أنتَ دوم يمي بعد ليش انساك غير أشوفك أكبالي كل يوم
ضحك وكال: -گثيري من هيج زلات
درت وجهي عليه حاولت أغير الموضوع لان أستحيت كلش بودي أختفي من گدامة
: -ما أحب الورد الابيض
عكد حواجبه بستغراب.
-: ليش عدج مشكله ويا الورد الابيض
-: يكولون يرمز لموت والحزن أني أگرهة والشخص إلى يجيبة يموت اسم الله
-: تخافين عليه أموت
-: ليش رجلي واخاف عليك تموت
: - يابة والله اأصير رجلج بس صبري عليه
: - ميته عليك أني بعدين احنا اخوان لا تنسى هالحجي
: -شمدريني شو هيستج تلمحيلي كلت أخذج
: -لا تفسر من وحدك بعد
مرر أسبابتة على خشمه وأبتسم حجة من يحجي بنبرة هادئة يگزبر جلدي أحس بشعور غريب
: -احنا بخدمة الحلوين صار.
تسللت بتسامة لشفتي يخجلني بگلامة وخرت عيوني عنه بعثرت الوردات
ورجعت أسوي بيهن أريد أشغل نفسي بشي عنه
لان أحس الوضع صاير مدري أشلونة بينه
مر وقت واحنا ساكتين لحد ما دخلنا منطقة وهو كال
: -وصلنة
لتفتت وگف يم بيت شارع فارغ تقريبا منطقه هادئة وصنتة يكول موتة
حتى أطفال بشارع ماكو ولا أي شي تحسها مكبرة النجف وحتى مكبرة نجف هم بيه حرگة اكثر
يمكن لان دنيا الليل يجوز الصبح اكو ناس يلا حتى اذا ماكو مو مهمين.
نزلت وهو هم نزل وبيدة جود وسيارة معتز وهبة طبكت ورانة جان بيت بسيط بس حلو
وماكو جيران اكو كم بيت بس بعيدات عنه
فتنه جوة بي كراسي ومطبخ حلو وجبير
جريت نفس بنتعاش الله ذكرني بغداد مليت من الحياة الجنت عايشتها والبيوت الجنه اكبور
االبيت فرهه يفتح النفس وهبة وزوجها اخذو غرفة جوة واحنا اخذنة وحدة فوك واجياد هم غرفتة بصفنه
جنت مكيفة وذبيت روحي على جرباية أخذتلي شوية أستوعب اني بمكان مرتب وحلو.
كمت سبحت وانوب نمت وجود شمرتة على اجياد
خلي يحتار بي شوية هو مو عمة
نمت نومة ترد الروح ذبيت نفسي ونمت ناسية ومتنسية كلشي اريد ارتاح ليلة.
ثاني يوم
ضوء الشمس الترس الغرفة خلاني ارفع البطانية واغطي راسي احس بخمول دافية وماريد اگوم ولا اتحرك
بس كعدت لكيتة فوك راسي وبيدة جود كال بنزعاج
وهو يمدلي الطفل
: -هاج ترى سوة عندي أنهيار بالمنظومة الفكرية
اخذتة منه أضحك وبعدني بفراشي وهو اجة گعد اكبالي أرتبكت صار وجهي مقابيل وجهة
لزم حنجي بطرف اصبعة شتت نظراتي ضغط عليه حتى انتبه
-: ش. شبيك
گال بهمس: -زينب.
بللت شفتي بتوتر وحسيت عيونة عليهن بطني مغصتني من الارتباك
-: ش. شكو اجتك الحالة خوية
-: جوعان ميت جوع
بلعت ريگي نفضت ايدة بنزعاج ابتسم باوعتلة بضوجة
-: عود شيسمونها هاي صاير مدري أشلونك خفان
-: يسمونها تنحنحي وگومي طبخي ترستلج ثلاجة
حسي بيه يابة گطعني الجوعان
-: ماعرف اطبخ حبوبتي ماعلمتني
-: گومي بابة مايمشن علية مبين من وجهج جنتي مسحولة سحل بيت عمج
كشرت بوجهة بنزعاج گمت رحت للثلاجة اول ما طلعت طمامة وبيض.
سويتهن تگلا خبط وجبتهن وجاي كعدنة ناكل بس أني ويا لان هبة ومعتز نايمين
بس هو صاي كاعد من الصبح، بعدنة ناكل والباب أندك هو عبالك يعرف منو جاي كالي
: -أخذي ريوك وفوتي للمطبخ
كتلة: -منو هذا
: -صاحبي
كمت بيدي الصينية للمطبخ سديت الباب على نص حتى تنصت عليهم وهذا منو الجاي
بقيت يم الباب بس هدوء ولا يسولفون عابت ميتة عليكم هسة
وخرت من باب شوية و بديت اسمع صوتهم خليت تركيزي عليه.
جان ذاك الولد يقنع بجياد وماعرفت عليمن بس اسمع يگلة
بس هالمرة وهمة يأمنون طريق ما يدخلون
وجياد قافل مايقبل ضجت مافهمت اصلا شسالفة بس دوخة وذاك يلح
فزيت من نتر أجياد بعصبية: شلووون تصرف من وحدك كم مرة گتلك لاتتدخل بهيج شغل
بقو يجادلون هواي لحد ما طلع ذاك الولد معصب و يزمخ. لفهمتة اكو شغلة يريدها واجياد مايقبل.