رواية لبوة علي للكاتبة كفاية كاظم الفصل العاشر
لبوة...
اي حدث مهما يكون بسيط يرجعني للماضي الاماكن المغلقة جانت عقاب آلية واكثر عقاب اخاف منه انحجزت ايام داخل غرفة ضلمة صارت عندي عقدة نفسية من هيج اماكن...
جنت اتمنى واحد يطلعني منها ماعرف شنو الذنب الارتكبتة لو الغلط السويتة بلحضة انحجز حتى نسمة الهوى ممنوعة من الدخول حقي من اوصل لهاي المرحلة زين وباقي عندي عقل لحد هذا الوقت.
بعدني اتعاقب على شي مامرتكبتة صعبة كولش تجيك تهمة وانت لأبيها ولاعليها احس روحي تنسحب مني نفس الظلام ونفس الرعب
عشت عمري برعب...
ردت فعلي من المستحيل اسيطر عليها أفقد وراجع لحالتي القديمة كل مااتذكر تجارة المخدرات عقلي يطير من راسي كل ذرة بجسمي ترجف من المجهول دخلت بحالة من الهستريا وبلحظة هدأت حسيت بالسكينة من شفت طيف والدي حاضر وياي بكل شدة لولاة هسه اني بمصحة عقلية...
شفته اجه باتجاهي مسح على شعري وابتسامة حزينة مغطية وجههة باوعلي بنضرات عميقه حسيت بالطمأنينةروحي هدأت ركزت نضري عليه كأني احفظ تفاصيل شكله.
بقيت هادئه حسيت بدفو وحنيته الصار سنين منتضرتها.
ماجان وحدة انتبهت اكو مرة وراه فوگها طير يطير حولها مرسومه ابتسامه ع وجها اليشع نور تباوعلي وترجع تباوع للطير الفوگ راسها رجعت نضري اله أشرت عليها وحجيت.
-هاي نجمتنا؟
هز راسه و رجع نضره الها ضغط على أيدي بقوة وبدأ يرجع خطوات للخلف إلى أن وصل يمها صارو يباوعولي من بعيد...
اريد اصيح الهم احس صوتي ما يطلع، اشرو إلى بيدهمكأنهم يودعوني صارو يبعدون عني اريد اركض ما اگدر احس روحي مقيده عن الحركه، صورتهم بدت تختفي احاول اركض اخيرا گدرت بديت اركضبالتجاه الفاتو منه اركض والتفت بكل صفحه
ماكو منهم اثر اختفوا...
بقيت اصرخ بحركه انتضروني اجيتكم لا تعوفوني حسيت بنار رجعت اشتعلت من جديد بقيت اصرخ بصوت عالي...
احس ايديه شخص مقيدهن مثبتات مااگدر احركهن مغمضة عيوني بقوة بس احس دموعي نار تنزل على خدي الم بروحي مو طبيعي.
حسيت ضربات خفيفه على خدي فتحت عيوني بثقل شفت گدامي الضابط حيدرا راص ع اصابعي الطالعت من الشاش بقوة احسهن نملن...
جان باين ع شكله القلق والتوتر باوعت گدامي ممرضه ودكتورة أدركت أني بالمستشفى تنهدت بتعب...
رجعت غمضت عيوني على أمل اشوفه وارجع لنفس الشعور بس للأسف ما صار اختفت صورتة الاخير، بقت الدكتورة تحجي وياي هي والممرضة يحاولون يصحوني.
احس كل ذره بجسمي توجعني كلبي عيوني راسي
روحي الم فضيع معتل روحي.
فتحت عيوني ب تعب سئلتني الدكتورة.
كم سؤال ماجاوبتها بس هزيت براسي شويه وطلعت والممرضه بدلت المغذي وطلعت وراها بقى حيدرا يم راسي تجاهلت وجودة...
باوعت لاديني ملفوفات بشاش حاولت احركهم بصعوبه الا كدرت نهضت روحي وسديت المغذي شلت الكانونه بحذر رجعت روحي ليورة، خليت اديني ع عيوني ودموعي تنزل نار.
كمية الخذلان داخلي لاتوصف ليش هيج يصير بيه لأن ماعندي أهل فعلا لو جان عندي شخص واحد من عائلتي ماجانت اتعرض لهيج مواقف...
بكل خطوة من حياتي اعرف قيمة الأهل واقدرها أكثر وأكثر وصلت لمرحلة اكول اهم شي بهذا العالم العائلة تحسهم وطن والماعندة اهل ماعندة وطن راح يتعرض للذل للجوع للإهانة...
اسمعه يردد يم راسي كلمات ممفهومه مسحت وجهي نهضت روحي شفتة گاعد مقابيلي بالزي العسكري عيونه تفتر بملامحي...
-لا تخافين مادام انتي ما مسويه شي تطلعين منها
بس اهدي...
لبوة: -ادرفت بهدوء، منو گال خايفه؟
حيدر-جا هاي شتسمينها؟
لبوة: -دنگت راسي أردفت بنفس الهدوء
-المكان أثر عليه مو اكثر عندي تحسس من او فوبيا شتريد تسميها سميها...
مسح وجهه بقوة
حيدر-هسه انتي رتاحي ويصير خير أن شاء
لبوة: -طلع من الغرفه بقيت صافنه بالفراغ بالشي الصار والراح يصير اخذت نفس عميق بديت احس الوجع بدية تذكرت الصورة وكسرتها احس انكسر گلبي گمت أردد يبرالي على ما يعوفني بهل محنه.
شويه ودخل الضابط حيدرا بيده علاگه سحب ميز طلع اكل خلاه فوگاه بدون ما يباوعولي عفست وجهي من شميت ريحة الاكل.
-ليش جايب؟ اصلن اني ما اكل
رد برود...
حيدر -وتضلين بدون اكل ترى وراج يوم متعب
وطويل لازم تأكلين بمشتهاج أو بدون مشتهة
لبوة-ما اگدر اكل...
رفع رأسه مركز عيونه عليه
حيدر-ليش؟
لبوة: -دنگت راسي حجيت بصوت متحشر، ما احب اكل من المطاعم
حيدر -اطمني المطعم كلش نظيف والكادر كذالك ماجايبة من البسطيات البلشارع.
لبوة -مو قصه نظافه بس اني ماحب اكل من برة البيت
جر حسرة باوع بوجهي شال الاكل
حيدر-شتاكلين؟
لبوة: -دنگت راسي ما حجيت شي غمضت عيوني خليت اديه ع وجهي احاول انام...
عرفتة طلع من طبگة الباب عدلت شالي ولفيت قمصلتي علية شويه ورجع انطاني علاگه فتحتها بيها حلويات وعصاير ومي سحبت نستله فتحتها بديت اكل بيها...
فتح بطل مي والعصير خلاة گدامي بدأ يفتح بالحلويات ويخلي گدامي سحب كرسي وكعد مقابيلي أردف.
حيدر -احجيلي منين تعرفينهم؟
وشوداج الهم؟
ذبيت البيدي وعدلت كعدتي اكثر: -مااعرفهم والله بس مازن ابن عمي، طلعت اشوف إيلام قبل لا اروح للدوام سمعت صوت رحت اشوف منو شويه وماعرف شصار لگيت روحي بذيج الغرفه الوصخه...
من ذكرتها اشمئزت نفسي بعدت الاكل من يمي ودرت وجهي...
حيدر-اعترف عليج تشتغلين وياهم
لبوة: -ضحكت برود اعرف الراح يصير وين يوصلني هذا الحقير مااخلص من شرهم ولا ارتاح.
-مو زين من عنده ما گال رئيسه العصابه مالتنة والله زين منة وگال تشتغل ويانة
حيدر-زين ليش اعترف عليج؟
لبوة: سويت حركه بحلگي ما اعرف
حيدر-الوياه گالو ما نعرفها اول مرة نشوفها
بس هو الحجة بيج
لبوة-وهسة شراح يصير؟
حيدر-يحيلونج محكمه وراج تحقيق
لبوة-راح تخلوني بالسجن مووو؟
حيدر-لا راح اقدم التقارير سووها الج المستشفى على ابو، حالتج ما تسمح تتخربطين وتفقدين اقدملج الجلسه والله كريم
لبوة-شوكت الجلسة؟
حيدر-باجر يحققون وياج من بعدها يحيلوج
محكمه
-ليش راح تساعدني وتقدملي الجلسة!
-شغلي هذا
اجة ببالي شلون وصلت للمستشفى ومنو الجابني لهنا مسحت گصتي: -منوو الجابني لهنا يعني شلون
نقلتوني!
-واضحة مايحتاج تسألين
لبوة- عافني طلع معقولة هو شالني استغفر الله يعني ماكو نسوان بقيت وحدي اتصفن بالمصيبة الطاحت على راسي الله واهل البيت اكيد مايعوفوني مليت من الكعدة بس مابية حيل اگوم متكسرة ورة ساعه.
انفتح الباب طفرت من مكاني عبالي هو.
طلعت زينة وجههة اصفر لاتقل عني شي لابسة الابكوت الابيض مسحت وجهي وهي كعدت يمي
ثنينة سكتنة...
-الله يحلها لاتخافين علاء گالي ماكو دليل يربطج بيهم بس هذا القندرة حاشرج بالنص الله ينتقم منة
-إن شاءلله
-شبيج ليش صار هيج وياج
-لعبت روحي ردت اموت والله
-اسم الله عليج ماكو شي لبوة خليج قوية اني راح.
اطلع لان منطيني وقت محدد ديري بالج على روحج وهذا السويتيلة العملية مستلم السالفة لاتخافين حتى لودخلتي محكمة دافعي عن روحج لاتضلين ساكتة.
طلعت زينة تركض ذبيت روحي جني داخلة بغيبوبة بقيت اليوم كله بالمستشفى ماادري بالدنيا رشت طشت...
لثاني يوم من الصبح اجت الدكتورة حجت وياي وطلعت رتبت روحي مبهذلة تبهذل شيصير اكثرمن هيج بية طلعوني من الغرفه بلعت ريگي يمها جنود هواي...
اخذوني بسيارة رجلية كوة شايلاتني من الگاع حيدرا اجة ويانة و علاء وبعد شخص ما اعرفه طول الطريق اندب اهل البيت مستحيل يخيب اليستند بيهم وصلنا للمركز گلبي انقبض رجعت الرجفه اعتلت جسمي...
فتح حيدرا الباب سوه حركه بعيونه يطمني نزلت امشي وارجف مشيت محاوطيني لگيت المركز مليان جنود وضباط هوسه صاير ناس رايحة ناس راجعة عفست وجهي لعبانة نفسي من نضراتهم حسسوني جاية من الملهى والله لو ما وضعي جا شهرتهم...
دخلوني بنفس الغرفه مالت البارحة لعبت نفسي من المكان شويه ودخل واحد ضخم شفته من تصوب حيدرا اجه وياه گعد مقابيلي وحجة.
جلال-لا تخافين تحملي المكان شويه وتطلعين.
لبس قناع ما يبين وجههة عدل الكامرات رجع گعد مقابيلي بدأ يسألني بصوت خشن
-اسمج الكامل؟
بلعت ريگ وصرت العب بالشاش الملفوف
-لبوة على ^^^^^^
جلال-شنو شغلج لبوة؟
لبوة-دكتورة بمستشفى ^^^^.
بدأ يسألني اسئله مختلفه وشنو علاقتي بيهم ومنين وليش انسطرت سطر احس نفسي بمتاها اغمض
عيوني وارجع افتحهن على ساعة اتخربط...
خلصت تحقيق اخذوني للمحكمه مكلبشين ايديه
والضباط دايري جني مجرمه روحي على ساعة تطلع...
حسيت بقرف المكان الناس الحواليه لعبت روحي من روحي احس نفسي تلوثت احس الهوى ملوث...
اتنفس شويه وارجع اگطع وگفت شويه اتنفس روحي رايحة حسيت واحد سحلني من ايدي بقوة عيوني صارت بگصتي صحت بصوت رج المكان رغم مابيه حيل مدري القوة منين اجتني.
-لاتلزموووونيي قذرررررررين لاحدددد
يلززززززمني اااااني ااامشيييييييي وووووحدي لاحددددد يلزززززززمني.
حسيت بنفسي انگطع مغمضه عيوني واتنفس بصعوبه ودموعي تنزل فتحت عيوني احسهم نار شفتهم كلهم يباوعون إلى جنهم ماشايفين بشر لعبت روحي لو يمي نفط ذبيتة علية واحترگت افضل من نضراتهم اعجاب شفقة استهزاء عطف صحت بيهم...
-شبيكمممممم ماااا شاااااايفين لا تباااااااوعولي
هييييججججج
صرت ارعش من العصبية اكو ضابط چبير اشرلهم بيده شويه تفرقو صارت مسافه انطاني بطل مي شربت شويه ورجعته أردفت.
بهدوء: -ني امشي وحدي لحد يلزمني...
هز رأسه ب اي مشيت وهما محاوطيني من كل الاتجاهات الله اكبر مجرمة شمسوية قاتلة دخلوني بقاعة چبيرة متروسه ضباط مطشرين على الكراسي دخلوني بشي مثل الصندوق يشبه القفص تماما.
حسيت روحي بدت تطلع غمضت عيوني روحي توجعني ليش ما اموت كل هذا الالم ليش باقيه عايشه لحد هاي اللحظه صرت فرجة لليسوة والمايسوة من ورة واحد خسيس انگس من الخنزير.
شويه دخل القاضي كلها گامت واني ع وگفتي ما گعدت باوعلت ع المكان كأنه مقبره وليس محكمه كميه التراب والقذارة بيها ما اگدر اوصفه.
صعد لمكاني بقى يباوع بوجهي لبس نضارته يباوع للاوراق واني بلگوة اتنفس شويه حسيت واحد وراي
شد عيوني احس نار شتعلت بيه صحت بصوت عالي...
-لاحدددددد يلزمنيييييييي افتحوووووو عيونييييي
راححححح اموتتتتتت افتحوووووو عيونييييي
افتحووووووهن تريدووووون تخبلونييييييي انتممممم.
نفسي يصعد وينزل كل جسمي يرجف سرت حرارة بسجمي مو طبيعيه شويه حسيت بشخص فتحهن.
وجهي يصب عرگ جسمي يخض مثل السعفه
اجه شخص انطاني مي ما گدرت الزمه ايدي ترجف
بقيت صافنه ع ايدي اخذت البطل منه يخض بيدي
بلگوة شربت منه شويه وگع من ايدي...
غمضت عيوني واردفت بصوت ناصي بيني وبين نفسي مالازم انكسر ما لازم ارجع للماضي ما لازم أبين ضعفي لبوة لازم ترجع لبوة القويه...
فتحت عيوني مسحت وجهي بعكس ايدي باوعت.
للمكان بنضره حاده كلها كرة وحقد شفت من ضمن الگاعدين حيدرا يگول عدها سينما يتفرجون رجعت نضري للقاضي الكل يباوعولي باستغراب أردف القاضي.
القاضي- بنيتي انتي زينه؟
لبوة: -هزيت راسي ب اي بدأ يسألني واجاوبه بهدوء وثقه...
-شوصلج الهم؟
أردفت بصوت عالي مملوء هدوء وثقه
-الساعه بالسته ونص اروح لإيلام قبل لا اطلع للدوام ومن بعدها بساعه اطلع، كل يوم هذا الحجي.
القاضي -منو إيلام؟
لبوة: -رديت بابتسامه، إيلام فرسي.
القاضي-كملي
لبوة: -الاسطبل مالته بستان جدي كلش قريب ع بيتي، قبل لا اروح للدوام رحلته واني يمه سمعت صوت مازن ابن عمي قريب يسولف رحت اشوف شكو...
لگيته وياه أشخاص ما شايفتهم من قبل بهاي الدقايق صارت مداهمه وكل هذا واني مثل الاطرش بالزفه...
القاضي -گلتي بيتي انتي ومنو عايشه؟
لبوة- عايشه وحدي
القاضي -ليش عايشه وحدج؟
لبوة: -أكثر سؤال اكرها واخاف واحد يسألني بلعت ريگي حنضل...
-ما عندي أحد.
القاضي-وين أفراد عائلتج؟
لبوة-ماعندي عائله، اهلي متوفين...
گلت هاي الكلمه ودموعي بدت تنزل خليت ايديه
ع عيوني امنع سقوطهن انكسر گلبي وتفطر بهاي الكلمة.
القاضي -ليش ما عشتي بيت جدج لو بيت واحد من عمامج من توفو اهلج؟
لبوة-بيت جدي عايشين بيه عمامي ثنينهم...
واني وياهم ما نتراهم ابدد لأهمة ولا نسوانهم لذالك عشت وحدي بيت ابوي صاير قريب عليهم...
القاضي -شگد صارلج عايشه وحدج؟
لبوة-الصراحه ما اعرف بالضبط بس الفتره الاستقريت بيها وحدي تماما من دخلت جامعة هيج شي
القاضي-شنو السبب الخلاهم يقبلون تعيشن وحدج وما عارضم الفكرة؟
لبوة-القرار الاول والاخير يرجع إلى محد يگدر يفرض رأيه عليه...
القاضي-شنو سبب اعتراف مازن عليج من حققنا وياه؟
لبوة-اجته فرصه العمر يضيعها من أيده قابل، صح مازن ابن عمي بس احنا أعداء من الصغر ولهذا اليوم والكل يعرف بهالشي...
القاضي-شنو سبب كرها الج؟
لبوة -احتمال وراثه
القاضي-وراثه من منو؟
لبوة: -زفرت الهوى طالعة روحي يلح بالسؤال وين يريد يوصل.
-ورث الكره من ابوة...
القاضي-هو مو عمج إذن ليش يكرهج؟
لبوة-عمي اي صح لكن ما يحبني، يكره اخو ويكرهني لكرهه...
القاضي-شنو سبب إلى يخليه يكرة اخوه إلى هو ابوج؟
لبوة: -غمضت عيوني وفتحتهن بودي الزمة امرعدة شكد يسأل
-ما بيه حيل ارجع ليوم واحد وانت تريدني ارجع 27سنه. مدري أكثر...
تنهدت بحسرة أردفت...
يلا تهون، سبب كرهم هي امي جان عمي يحبها وهي تحب ابوي وأبوي يحبها حاول يفرقهم عمي وتقدملها لكن هي رفضته وگالت اني احب اخوه...
تزوجت من ابوي وهذا السبب إلى خله عمي سلطان يكرة ابوي وكرهني لأن بنته ومازن فتح عيونه شاف ابوة يكرهني شتريده يصير مثلا استمر الكرة من الصغر ولهذا اليوم...
أما بالنسبة ليش اعترف عليه هو يعرف كلش زين
اني راح اطلع لأن ماكو اي شي يثبت اني اعرفهم.
لو اشتغل وياهم هو يريد اوصل لهاي الحاله الاكثر ولا اقل...
سكتت تنفست ورجعت كملت وهو نضره عليه.
يعرف تسوء حالتي من الأصوات العاليه ومن الاماكن الضيگه ومن الهوسه من التجمعات واحيانا من صوت الهمس بين أشخاص ومثل ما تشوف هاي حالتي بلگوة مسيطره ع نفسي واحجي طبيعي.
رجعت كملت والمكان صار هدوء...
تجارة المخدرات أكثر تجارة مربحه ع مستوى العالم والعراق واليشتغل بهاي الشغله يصير تاجر فلوس ومثل ما تشوف ماكو شي ينطبق عليه من هذا الكلام...
اني دكتورة وضيفتي انقذ حياه الناس...
نبذل كل جهدنا من اجلهم وانقاذ حياتهم، أقل عمليه خمس ساعات تستمر واحنة وكفه وحده...
إذا هذا كله أسويه علمود الفلوس كان تركته من اشتغلت وياهم بعد ما احتاج راتب المستشفى ولا اتعب كل هذا التعب...
شغلتين ما يشبهن بعض نرمم صحه البشر وتحطيم صحتهم...
سكتت والمكان صار هدوء تام غمضت عيوني بقوة
اسمع صوت همس بينهم صوت خرخشه اوراق يتناقشون بينهم سمعت صوت الشخص الحقق
وياي وتسجيل بصوتي اخير شي گال...
جلال -سياده القاضي تم اعتراف المتهمه لبوه على وتم تدوين أقوالها قضائيا واعترافها كامل عن الجريمة المتهمه بها.
لبوة: -رجع الهدوء عم المكان وأصوات همسات بدت تعلى مغمضه عيوني واحس دخان يطلع من راسي...
بالي مو يمهم ابد فززني صوت طرقه قوية، گلبي احسه توقف جمدت بمكاني واندب باسد الزهرة
القاضي-تم الحكم على المتهمة بالبرائةةة...
لبوة: رجع الهوى لريتي تنفست براحة، بدت اصوات المكان تعلى فتحتت عيوني الوجوة جامده كلها نضرها عليه طلعوني من القاعه...
المكان صار بيه رجه من كثر الاصوات فتحو أديه
خليتهم ع اذني وامشي وراهم بس اريد اخلص من هاي المهزلة صادفني الضابط حيدرا ببتسامه مرسومه ع وجهه.
حيدر-عدت ع خير امشي اوصلج
لبوة: -ما گلت شي امشي وراة وجني بغير عالم روحي راحت فززني صوته من گال.
حيدر- اصعدي بويه...
لبوة: فتحت عيوني صارت گدامي سيارة سوده عاليه كلشش شلون اصعد وياة اذاني انطرشت فززني صوتة العالي.
حيدر -يلا بويه شمنتضره ما تصعدين
لبوة: ؛اخذت نفس وصعدت بلگوه انتبهت عليه يضحك حجيت بعصبية: -شبيك تضحك؟
حيدر-شني الضحك حرام لو ممنوع.
-لبوة: -حرام اذا السالفه بيها اني واعتبرها جريمه ويحاسب عليها القانون...
حيدر -لا يأبه على كيفج ترى مو عليج بس سالفه قديمة اجت بالي...
خزرته ودرت وجهي، نفسي عالي اباوع لاديه توجعني كلش راسي أحسه يريد ينفجر...
حيدر-بيج شي اخذج للمستشفى؟
لبوة: ؛هزيت راسي بلا اريد افتح الجامه ما تنفتح ماكو بيها دگمه.
-افتحها.
انفتحت الجامة دخل الهوى بارد يتلامس وي بشرتي الحاره ويعاكسها خليت راسي على الجامة وسارحة بافكاري...
بقى يدور براسي السؤال إلى سأله القاضي عن اهلي، اول مرة بحياتي اجاوب ع هذاالسؤال واگول ميتين احس هاي الكلمه سچينه نبتت بگلبي.
شلون گلت هيج؟
معقوله اقتنعت بالموضوع بعد كل هاي السنين؟
اول مرة ائيس منهم أكثر موقف خلاني اگطع الضن بيهم دموعي تنزل بهدوء خليت ايدي ع وجهي احس حرارة تطلع من روحي...
حيدر-ليش كل هذا البچي سالفه غبرة وخلصتي منها أما بالنسبة لوضيفتج ما راح تنضر حتى المستشفى الجنتي بيه اهلي مو نفسه التشتغلين بيه.
لبوة: -سكتت مابدر مني كلام بقيت على وضعي لكن سرعان ما تغييرت من شميت ريحه جگاير
أردفت بعصبيه...
-لادخنننن يلا نزلنننيي اااني ارجع وحدي
حيدر-شبيج بويه ترى هي جگارة
لبوة: -شمراها من الجامه أردفت بعصبيه...
دخنت حتى تستفزني مو ذاك اليوم بالمستشفى گتلك لادخن يلا نزلنيييي.
حيدر-ع كيفج بويه ذبيتها عساها سم أن شاء الله
لبوة: -حجيت رافعه اصبعي محذرته...
لا اتگلي بويه ثاني مرة واصلا اني شكو صاعده وياك اعرفك تعرفني يلا نزلنيييي
حيدر-طلع البركان البداخلج
لبوة-نزززلنييي
حيدر-محسستني راح اخذها واهج بيها
لبوة-شوف.
حيدر-شفت
لبوة -مالي خلگ لا تستفزني نزلني ما اريدك توصلني هي گوه
حيدر-لا بويه مو گوه يلا بس اشوفلج سياره جا بيش تروحين بمطي حتى مطاية ماكو
لبوة-اني شگلت.
حيدر -ها يلا اسف بعد ما اگول بويه
لبوة-افتح كل الجامات
فتحهن بدون كلام صار الهوى يدخل من كل الاتجاهات...
حيدر-عيشتيني أجواء مرعبه بس رادلها حبشكلات حتى تصير تمام...
لبوة: -سكتت ماجاوبته مشى مسافه طبگ السياره ونزل منها
حيدر -ابقي بمكانج لاتنزلين مناه لمن اجيج
لبوة: -سكتت بقيت گاعده طول يلا اجه فتح الباب ونزلت
حيدر-اصعدي بهاي السيارة
انتبهت للسيارة تكسي بيها رجال جبير يسوق.
فتحلي الباب وابتعد ردت اصعد درت وجهي شفته مكتف أديه مرتجي ع سياره مسحت وجهي وحجيت بتوتر
لبوة-شكرا
حجة ماشر بصابعة
حيدر -الثالثه هاي
لبوة-شنو الثالثة؟
ابتسم ابتسامه جانبيه مسح وجهه واردف...
حيدر-ديري بالج ع نفسج
لبوة: -عقجت حاجبي باستغراب اول مرة واحد يكلي ديري بالج على نفسج اففف هذا اليتيم يستغرب الاهتمام من الناس...
صعدت بالسيارة مشت الا حرك سيارته ورانة الطريق طويل متت تعب الا وصلت للبيت.
باوعلت للبيتي غمضت عيوني باريحيه كأني وصلت لبر الامان هذا ملاذي حاميني من العالم وقذارتة دخلت سديت الباب رحت ادور ع الصورة.
لگيتها على ميز الكتب جامتها مكسورة وقطرات الدم متناثره عليها اخذتها بيدي الملفوفة حضنتها وگمت ابجي بحرگه گلب...
-يعني هاي هي خلصت كلشي خلص كلشي راح ومشى بقيتي بس انتي...
بقيت على هل وضع اسمع الباب يندگ غلست مااريد أحد يشوفني بهاي حالتي اخذتلي ملابس دخلت للحمام ماخليت انواع الغسولات تجرثمت بالساعتين الاطلعت.
احس انزاح الغبار عن جسمي حجيت متسائلة شوكت ينزال الغبار عن گلبي؟ شوكت ينزاح واخلص للابد؟
اخذت المشط مابيه حيل امشط شعري أكثر شغله اكرها امشط شعري، مرات امشطه ومرات اعوفه مالي خلگه مشطته بتعب عفته مفتوح.
صليت وأخذت الصورة خليتها بحضني ونمت بدون اكل ما اشتهي اكل شي نفسي مسدودة گعدت
ع صوت الاذان الفجر گمت توضيت وصليت رجعت صليت سجدة شكر من خلصت من هاي المحنة.
حضرت كوب گهوه مااشتهي الاكل طلعت التقارير بقيت ادرس للعمليه بدلت رحت يم إيلام حضنته بس هالمرة غير اكو شي متغير بداخلي.
-ايلام راح كلشي يتغير يا اما للأفضل أو للاسوء
هواي اسألة راح ادورلهن اجوبة يمكن احصل نتيجة.
تذكرت تليفوني وين صفى بيه الدهر جريت حسرة
ورحت للدوام مابية حيل بس اذا بقيت اتذكر الصار وحالتي تتساء لاگتني زينه جانت منتضرتني وجاية قبلي هالمرة.
زينه-شلونج گلب
لبوة-نشكر الله ونحمده
زينة -قلقت عليج حتى حيلي راح كل شويه متصله بعلاء يطمني عنج
لبوة-مابيه شي عرج ما يصيبني
زينه-يعني هسه انتي زينه مابيج شي
لبوة-لو بيه شي اداوم ثاني يوم؟
تبارك -صباح الخير يا صبايا
-صباح النور
تبارك -شلونج لبوو بيج شي احسج متغيرة.
لبوة -الحمد لله مابية الا الخير
زينه -لا تگليلها لبوو ثاني مرة افتهمتي
تبارك -لا والله وانتي شعليج هي بكيفج
زينه-لا عيني بكيفج
تبارك-لابله شنو مسجله باسمج
لبوة -انجبن يلا عندي شغل وانتن طشرن كل وحده
لشغلها...
تبارك ما تدري بالصار زينه ما گايلتها
رحت لدكتور محمد سلمت عليه وطلعت لدكتور
سليم تناقشنا بخصوص العمليه...
دزو عليه من الاستعلامات رحت اشوف شكو انطوني موبايلي گالت البنيه رجال انطانيه أوصله الج...
مشيت لصاله العمليات اليوم عندي عملية للمريض ×××يصير ابو الطفلة يقين استمرت خمس ساعات الحمدلله والشكر بعون الله تمت بنجاح...
انرسمت ابتسامه ع وجهي تمحي اثار التعب تبادلنة النظرات والابتسامه ع وجوهنا كأننا خضنا معركه وطلعنا منصورين منها...
طلعنا من الصاله نزلت الكمامه تنفست براحه لاگونة أهل المريض رجال ومرة چبيرة طمنهم دكتور سليم أن العملية ناجحه والمريض ماعليه خطورة...
اكو شي بداخلي يريد يشوف يقين ورده فعلها بس اللاسف ماموجوده تنهدت بحسرة...
ردت امشي حسيت بشي جلب بيه من ورى درت وجهي شفتها هي نزلت المستواها و حضنتها
بست ادينها الصغار نظرتلها نظرة عميقة احفظ ملامحها الناعمه شكد حنينة هالبنية.
يقين-اشكرنج
لبوة-مااريد الشكر اريدج تدعيلي مثل ما دعيتي لابوج والله استجابلج ادعيلي وياج اصير زينه واخلص من مرضي وهواسي المقرف ادعيلي الله يريح بالي.
يقين- بعد كل يوميه راح ادعيلج والله
لبوة: -ودعتها رحت اخذت اجازه وطلعت ماشفت البنات بدت الدنيا تمطر ماادري وين رجليه ماخذتني امشي والمطر يزغغ ع راسي حجيت واني رافعة راسي...
-ياربي خلصني من الاني بية هواي تأذيت لو تاخذ امانتك لو تريحني من الهم
لازم اتخذ الخطوة يمكن تكون من صالحي أو ضدي من زمان لازم اتخذ هاي الخطوة واستوعب
الصار لازم أشيل الشفرات الموجوده بعقلي.
تنهدت بقهر رفعت راسي وقطرات المطر تداعب بشرتي الحارة...
(اللهم ارفع عني حمل التفكير والترتيب. ودبر لي امري فأني لا احسن التدبير)
اخذت خطوة وما جنت ادري هاي الخطوة جانت اعظم واخطر الخطوات الخطيتها بحياتي والصار ما متوقعته ابد غيرني وغير كلشي بحياتي مسح كل شي متأملتهومستعزا بيه...
بعض الناس تغفى على صدور الوعود آمنه فلا
تيقضها على ضجيج الخذلان.