رواية لبوة علي للكاتبة كفاية كاظم الفصل السادس والثلاثون
غزل: -
بيتنة صاير خراب كل روح مابية كولشي مايبشر بخيرر وضع امي وضع اخوي حيدر من راحت لبوة ولهذا اليوم مانشوفة ابد واذا رجع نعرفة من صوت التكسير...
الساعة بالوحدة بالليل گاعدة يم راس امي خاف تتخربط اخذت ايدها قست ضغطها وسكرها
طبيعي تنهدت بقهر فركت صدري وطلعت بالحديقة.
باوعت للمرجوحة ودموعي نزلن مثل هيج وقت طلعت اشرب مي سمعت صوت ضحك كتلني الفضول اشوف شكو مشيت على كيف مديت راسي وخليت ايدي على حلگي شفت لبوة تركض ورة حيدر بالحديقة وشعرها طاير وراها وضحكاتها عالية وكفت وحطت ايدها على گلبها فحطانة حجت وهي تتوعد لحيدر...
لبوة: -بسيطة اني اعلمك ابو دحام شلعت گلبي شلع تعال اصعد خل ادفعك يلةةة
-اهووو چم مرة گايلج عوفي هاي السالفه زعطوط ودفعيني.
-عادي مو الا زعطوط شبيك احجي لمصلحتك ياعيني تتونس والله
-هسه صارت المرجوحة تونسني
-اي
-لا
-مو هي بكيفك
-لا بكيفج تريدين تونسيني تعاي بوسيني
-اصعد وادفعك وابوسك شگددددد
-يعني شكد،؟
-بكيفك بس ادفع هواي هااا
-اممم نشوف
صعد حيدر بقت تدفع بية وهو مجلب وكل شوية وصاح بيها: - راح توكعيني
-لاتخاف ماتوگع
منظرهم يخبل ترجع مسافة وتروح ركض تدفع بية حسيتها طفلة شوية وكف المرجوحة وگام صاحت بية وهي ترفع بشعرها.
-بعد يلا ارجع.
تقدم وسحباها صارت بحضنة اشر على شفتة ويفر براسة: -يلا نفذي
مت بدمي من شفتهم يتباوسون طگيتها ركضة للغرفتي حتى مي مشربت لفيت روحي بالبطانية وميتة ضحك على منظرهم وسوالفهم اوففف هسه كلمن بگاع محد يدري عن الثاني شي...
انفتح الباب وطفرت من مكاني بلعت ريگي ورجعت كذلتي ليورة دخل حيدر حتى ماباوعلي ولاحجة وياي كبل صعدت لغرفتة رجعت گعدت بالحديقة وبجيت بقهر...
حيدر لحد الان مايحجي وياي ابدد من راحت لبوة ولليوم يمكن لان بس اني بقيت وياها ومامنعتها وحتى البيت مايدخلة بس باليل أسبوعين مرن وهو لاليلة ليل ولا نهارة نهار مرات اشوف تصرفاتة اگول موصاحي يمكن شارب...
مرة طفرت على اثر طبة قوية طلعت اشوف شكو لكيت گدامي خراب خراب عدنة معرض كزاز مخلينة بالصالة الفوگ صاير عبارة عن تراب والغراض صايرة طشار يحجي بصوت عالي ويتوعد...
-بسسسس لوو ادرري وينننن رحتيييي ياگووووا.
اخذججج لبوووة وينننن تطيررريننن اجيبجججج اجيبججج
كسر كولشي موجود و حجة انواع الكلام وطلع اعتدنة على الوضع يكسر ويصيح يطلع باليل مايرجع بس يسبح ويطلع وامي صحتها ابد مو زينة...
تنهدت ورفعت راسي للسمة وبالي كولة يم لبوة وين هي هسة وشصاير بيها طفلها عايش لو سقط،؟ حتى خالتها ماتعرف شي عنها ولا رايحتلها ولاعمامها ولالبيتها رايحة حيدر ماخلة مكان ولحد الان يدور عليها اوفف ارحمها ياربي ماتستاهل ابد من دخلت لبيتنة انطتة طاقة جنها ملاك ابتسامتها ماتفارك وجهة...
صعدت لغرفتي غطيت ازل وبقيت احوس طلعت للكراج لگيت حيدر مدخن باكيت كامل تاكلهن اكل رجع فتح الثاني والحديقة صايرة دخان مايبين شي وين جان حيدر اخذ فترة كولش طويلة مايدخن حتى احنة لاحضنة هالشي وهسه شيصير، بيه ياربي رحمتك بهلولد من اشوفة اموت قهر ماارتاح ابد...
جانت امي تسولفنة عنة وعيونها تلمع بالفخر تكول سبع وليدي ماخلة شغله ماشتغلها في سبيل يعيشنة ومايشوفنة محتاجات حتى من يجي من الكلية يروح يشتغل...
الفترة الارتاح بيها من تزوج ملامحة بين عليهن الفرح والراحة و من تحجي لبوة يباوعلهة وعيونة تلمع شصار وياة وگام يضربها اخخ...
رحت نمت وگعدت على اثر صوت عالي فركت عيوني وطلعت غرفتي فوگ صايرة شفتة يخابر وصوتة عالي كل كلمة يسمعها يرجع يركع الباب بقوة اخير شي دفر الباب و طلع...
رحت غسلت ونزلت يم امي خطيه لكيتها شادة راسهة وعيونهة مورمة من البچي رحت حضنتها وبستها من راسها.
-كافي يمة مو زين على صحتج كولشي ينحل بس كولي يالله
-الله يسمع منج بس شلون إلى عين واباوع بوجة خالة لبوة من سألتني عليها حرت شگول وشسولف اكلها لبوة مسجونة ومكتولة بيتي شلون اباوع بوجة البت بعد شدگول علية وهسه هي وين بيا گاع،؟
-لاتخافين يمة لبوة مو بس اسم اكيد هسه هي بخير ولبوة مستحيل تاخذ بخاطرها عليج وكل الصار انتي ماالج دخل بية...
-الله يسهلها وترجع بسلامة
-إن شاء الله.
-يمة روحي شوفي اختج خاف محتاجة شي عدها امتحان باچر
-يلا رايحة
رحت للمطبخ احضر اكل لازل خطية بدت امتحاناتها بنص هاي الهوسة شصاير، بيها من جهة هاي الهوسة ومن جهة الاسئلة وصعوبتهة الله يسهل الهم ويخلصهم من هلضيم.
اخذت الها صينية خليتها يمها ونزلت رحت افتح الباب يندك بهمجية اكيد هاي ديمة عابت شكلها ماعافتنة ابد كل يومية جايتنة هي وبتها استغفر الله
فتحتة ودخلن كبل...
رحت للمطبخ اغسل المواعين اجت روان تحجي بمياعة...
روان: -اكول حب وين وصلت المسح.؟
-شسوين بيها،!
-اريد انضف غرفة حيدر والطابق الفوك
-وشكو تنضفين غرفة اخوي احد مودي عليج.؟
-شبيج حبي ماتشوفين بيتكم شصاير بية
-هاج اغسلي المواعين لعد وياج اطبخي اذا تعرفين بس مو تسممينة.
ذبيت السيم من ايدي وغسلت وصعدت فوگ انضف بغرفة حيدر وروحي بخشمي طافرة مو غرفة خراب ماكو شي بيها عامر المراية مكسورة التحفيات اوففف سمعت امي تصيحلي عفتها على النص ونزلت
-ها يوم صحتيلي.؟
-جيبي حبوبي
-صار
رحت جبت علاج امي انطيتة الها وبقيت كاعدة يمهن استمع لحديثهن...
ديمة: -خية جا جنتج وين راحت.؟
بسمة: -الله اليعلم
حوراء: - بت شابة وين راحت مثلا لا عد خالتها لا بيت عمها ترة واضحة السالفه.
ديمة: -جا هو حيدر ليش حابسها وكل شوية كاتلها اكيد سامع لو شايف شي ومن شافت هذا الوضع خابرت صاحبها اخذها
بسمة: -شهل الحجي منين تجيبنة البنية ماعدها هيج سوالف
روان: -عمة انتي متعرفين بهيج سوالف العراق طاشة بية سالفة الخيانة وانتي طيبة وفقيرة وتمشي عليج بسرعة
ديمة: خية انسوها بعد وين تكضونها راحت خل وليدج يشوف دربة
-شتقصدين بيشوف دربة.؟!
-البت راح يصير شهر وهي ماكو خو مايضل طول عمرة منتظرها خل يتزوج ويعيش حياتة واذا لگاها بدرب يغسل عارة
حوراء: حتى اني هيج اكول زينة العقل حجيج
بسمة: انتن شلون تحجن هيج ماتخافن من ربجن عدجن بنات والدنيا دوارة
ديمة: -خية جا تجيبين بناتنه المتربايات والمايطلعن من باب البيت وي جنتج العايشة وحدها وتبات بالمستشفيات شايفة وعايفة بنياتنة وين هي وين.
حوراء: -والله هو متعافي عدنة بنيات يخبلن وراح للغريبة لايعرف شبيها مابيهة دخليها تفيدك هسة
روان: -عمة هو ماراحلها هي الاجتة اكيد مدري شمسويتلة وسحبتة الها
ديمة: -الله يعلم يمة الله يعلم
غزل: - متت حرگة احس الشعواط گام يطلع من اذاني اباوع لامي الضغط علگ عدها من ورة كلامهن تخوصرت وگفت بالباب وصحت بيهن.
: وهسةةةة خلصتنننن حجييي طلعتنننن سمجنن اطلعننن برةةة تريدينن تموتننن اميي بحجيجن هذا يلا كل وحدة لبيتهااا روحنن التهن برواحتجننن وعوفنة بحالنةة
حوراء: -بعدج بطول النعال وتطردينة من البيت شني هو بيتج لو بيت اختي هذا قليلة ادب
ديمة: -اعذريهة خية عقلها ملحوس بعدها متاثرة بجنتهم وهيج متحامية ودافع عنها
روان: -حبيبتي احنة ماجايين نشوفج عيب عليج احنة اجينة على عمتي كالو مريضة.
غزل: -مريضة عوفنها مو تلطشن بيها شفتنها تطمنتن عليها مع السلامة وفرصة سعيده الله وياجن امي تريد ترتاح يلة يمة كومي.
اخذت امي لغرفتها وانطيتها حباية ضغط وعفتهن يلغن گطيعة ان شاء الله طلعن وطبگن الباب قوي فار دمي من حجن بعرض لبوة وين يروحن من الله كولشي ولاواحد يحجي بعرض بنية شريفة متزوجة جانت او لا دمعت عيوني وينج لبوة تعاي وشوفي الحجي ولو انتي ماتهتمين بس تلعبين بيهن جولة شديت شالي لام البنين ونخيتها بكلب محروگ ياخذ حق لبوة منهن وتطلع برائتهة گدام الكل لان هسة كلها تحجي بيها وكل شخص يحجي شي...
صعدت اكمل غرفة حيدر بقيت الم بالگزاز كنستها ورجعت امسح بيها لكيت المكتب مكلوب كلاب رحت ارتب الكتب وانضمهن رجعت للكنتور رجعت الملابس لمكانهن بقة بس الميز مرايتة مكسورة ويهتز جانت جواة كاشية صغيرة راجعة ليورة مديت ايدي اطلع الكاشية گلبي طار مدري شكضيت طلعت ايدي الترجف بسرعة شميت ايدي لعبت نفسي شنو هذا.؟
مديت الماسحة وكرفتة باتجاهي طلعت صرة وصخة وريحتها نتنة اسم الله الرحمن شنو هذا بغزتة بخشبة الماسحة وطفرت من مكاني واني ارجف رحت لامي اركض وارجف لگيتها نايمة ندهتها بصوت ناصي.
-يمة يمة يوم
فزت مرعوبة وجهة اصفر خليت ايدي على راسها اهدي بيهة: -ماكو شي لاتخافين بس عندي شغلة كومي شوفيها
-شنية الشغلة،؟
-كومي وتعرفين
اخذتها من ايدها وصعدتها للغرفة اخذتها واشرتلها على الصرة لطمت على صدرها ونشغت...
-سحرررر هذا.
-سحرر،!
-اي يمة سحر ولج اكول اخوج شگلبة اثاري مسحور
-وهسة شنسوي.؟
-صخام الصخمني روحي جيبي موبايلي بسرعة
رحت اركض لكيت الموبايل على الميز اخذته وصعدت طاير طلعت ازل كتابها بيدهة وشعرها مكفش سوتلي بيدها شكو
-لجج تعايي شوفيي المصيبة
ازل-يا مصيبة.!
-تعاي وشوفي بعينج
رحت اركض وازل اجت وراي لگيت امي گاعدة بالگاع حيلها بايد انطيتها الموبايل ماعرف بيمن اتصلت ضلت تحجي وياها واحنة كولشي مافاهمين.
بسمة: -اي خية هاهية صارر انتظرج مو تبطين علية
سدت الموبايل وگامت على حيلها.
بسمة: -يمة غزولة ولو تعبتج روحي جيبي علاگة سودة وانتي ازولة روحي خابري اخوج گليلة امي تخربطت
ازل بقت تباوعلها مصدومة حقها البت الكيمياء كافية عليها نزلت اجيب علاگة وصعدت فوگ وازل اتصلت بحيدر اخذت امي العلاگة وكرفته الصرة بيها نزلت جوة وراحت لفراشهة عشر دقايق وجفت حيدر وجهة اسودد
حيدر: -امي. ويننن شبيهة،!؟
اشرتلة على غرفتها راح يركض علاقة بامي خلال هالفترة كولش مهزوزه ساعة يرجع حيدر القديم وساعة يتسودن حتى مرة راد يضربها بس اكيد هذا تاثير السحر واگص ايدي اذا مو طلعت البالي رحت وراة اشوف شراح يصير...
بسمة: -يمة حيدر امشي وياي انت مسحور وشفت بعينك هذا الفلك
حيدر: -عوفي هاي كلاوات شسوين بيها
-ياكلاوات يمة ماتشوف شصاير بحالك جا هذا شني
-عوفي هاي السالفه تولي وراي شغل جايبتني مناك عبالي بيج شي.
-ولك حيدر لا تخبلني اكلك هذا سحررر شني ماتفهم ماتشوفف امشيي وياي ناخذك لسيد يفتحة
-ياسيددد ماروححح عوفييي هايي الكلاوات
-ياكلاواتتت ولك شسمي هايي حالتك ومرتك ليش تكتلها بدون سبب والبنية مامسوية شي ماتكلييي
-لاتجيبيننن طاريي بلوةةةةة لااحرگ البيتتت على راسكممم عوفوهاااا مااريدددد اسمععع اسمهاااا.
طلعت من الغرفة لاانرگع بشي لان ماخلة شي ماكسرة طلعت برة واشوف الباب يتعطر يندگ بشي صلب خليت ايدي على كلبي يمة مداهمة شنو هاي
خليت شالي على راسي ورحت ارجف لو تكتلوني ماتلگون قطرة دم بية حياتنة صارت رعببب
فتحتة واندفعت صفح بقيت بس ارمش بعيوني شكاعد يصير دخلت مرة عباتها طايرة وراها جنها باتمان وبيدها ربد (خشبة متينة للمايعرفها).
باوعت الباب مفتوح على حيلة رجعت الباب شفت علاء واكف بالباب بهتت ملامحي اكيد هاي امة رجعت علية صاحت بصوت عالي...
أم علاء: -ولككك عليوي ماتطبب منين مستحي من الماكللل شعرهاا الجريذي لو من الصفررة تعاللل كض وياي هذا الثوررر الهايجج
غميت روحي بداخلي الف مرة هسة احنة بيا حال وانتي هيج تحجين شكول عليج خالة دخل علاء ورحت اشوف الهوسة الصارت...
أم علاء: وحگ سيدد محمدد يحويدرر اذا مامشيت وياي اخليهمم يسحلونكك سحللل تمشي برجليك لو اخليهمم يشيلونككك
حيدر: -خالةة عوفينييي وراييي شغللل يانعاللل رايح تفترننن بيه بينن السحاراتتت
أم علاء: -خيب انته شو ماتعرف تحجي لا اجي اردمك على حلگك هذا الاعوج الضاهر مسوياتلك سحر اسرائيلي وهيج گاب على الفرخة الله يساعدها وشردت من يمكك.
حيدر: -لاتجيبيننن طاريهااااااااا ماشردتتتت الااااا اسحلهااا واطلعهااا من جوةةة الگاععع لبوةةة ماشردتتتتت منييي
-خيب غسل لهل حلگ انت مامنك فايدة وانة ادري بابني فاهي جبت ربعك كلهم واذا مامشيت وياي برضاك افلش راسك بهذا الربد واخذك دمك يصب يلا بطينة...
صرت على صفحه مختلسة گلبي راح يطفرر من مكانة احسة على هيئة وحش حقها لبوة من مشت يريد يكسر كولشي كدامة زين هو شخله ماكسرة شوية ودخل جلال وياة صديقة الخ باوعت بوجهة بهتت ملامحي مالازم اباوع بوجهة الدمعة صارت بطرف عينة عفتة رحت للمطبخ.
شوية وطلعو سوة كلهم وحيدر مجتفينة جتف وام علاء مخلية الربد بضهرة يكول بندقية والله هالمرة عدها سوالف تضحك بنص الزلگ راحو وامي طلعت وراهم تلبس بعبايتها...
بقة البيت خراب يسد النفس گعدت بالكاع ودموعي نزلن اجت ازل حضنتني وبقينة نبچي...
-روحي اقري محد يفيدج المشاكل انحلت ماضل شي
-ياقراية اروح اعزل البيت
-انچبي اني اعزلة شنو شغلي روحي انتي
شديت ثوبي ورحت لغرفة امي نضفتها سويتها تلمع رجعت على الطابق الارضي كولة نضفتة حيلي راح
صار العصر وهما ماكو رحت سبحت وسويت اكل
تغدينة اني وازل ورجعت اغسل المواعين وهما ماكو.
طلعت بالكراج افتر حيل تاخرو وين الا اجو رحت فتحت الباب ودخلت ام علاء تحجي.
ام علاء: -بس يو ادري ياگح جان رتاحيت والله الا اعلگها من اعطوبهة تعلگ
دخلت امي وراها روحة منتهية دخل حيدر لازمة علاء من صفحه وجلال من صفحة وجهة اصفرر
روحة رايحة صعدوة لغرفتة وبقت امي وام علاء يتناقشن بالموضوع واني استمع الهن.
أم علاء: ديررر بالجن تگولن مسويلة سحرر هنا دفنن السالفة فتهمتن يو لا
بسمة: -هاهية خية وين اكول.
أم علاء: اكص ايدي اذا ماطلعن كرايبج مسوياتلة حتى ياخذنة
بسمة: -الله العالم شيريدن منه
أم علاء: -يععع بعدج تكولين شيريدن منه جا هنا ميتات علية من حجن وي لبلابة بيوم الخطبة عرفتهن ميتات علية سودة علية يمة لبلابة الحبابة الحلوة ام صاحبة الضحكه الما تفارگ ويهج وين رحتي...
بسمة: الله يكون وياها
أم علاء: -خاب كون اكض حويدر وافشخة بس طلع مسحور لو مامسحور جا ربدتة ربد هيج يسوي بلبلابة سودة بويهك.
بسمة: -خية انتي ماشايفته يموت عليهة جنهم بلابل بس بعد تعرفين السحر وتاثيرة حتى اني امة تسودن علية
أم علاء: -لاتهمين مادام اني بيها اطلعها من عيونهن كل وحدة شاركت بهاي السالفة وشبياتي مو علية
اذا ماطلعتهن يزحفن زحف وهذا ربدي
خلت الربد كدامها وتخاطبة يگول شخص.
-يمة حضر روحك للطلابة صارلك هواي مامشتغل اجاك الشغل الزين اريدك تاخذ حيف لبلابة الحبابة.
دارت وجهة إلى وصاحت بية بصوت عالي وي صيحتها نزلو الولد مت بدمي ماتبطل هالمرة التنمر
-انتييي ام الشعرر المگطومم جيبينةة مية ريگي يبس واكفة تباوعين جنج فزاعة خضرة
دنگت راسي من الفشلة انوب يم جلال خر. بحضي
المصخم اخذتلهم گلاصات مي من المجمدة وانطيتهم...
جلال: -نعل بابهاتهن شفتي خالة شلون استفرغ
ام علاء: هو من زوع بعد ماعلية مشرباته بنات المصموط
علاء: -اي بس غير نعرف ياهنا المسوياتلة.
جلال: -يمي اني اعرف شلون نكشفهن ونطلعهن بالجرم المشهود
ام علاء: -اي يلزرگ كول بلة خل نشوف شلون تفكر
جلال: -نخلي كامرات بالغرفة واكيد راح يسون ثاني مرة ونكمشهن
ام علاء: -خاب تعال احبك طلعت احسن من عليوان خوش تفكر
جلال: -شعبالج خالة
علاء: - خطر جلولة
ام علاء: -يلة اطلعو لاتگابلونة نريد نسولف وانتم مو تضلون فاهينن شوفو شغلكم دورو الفرخة عبن حبلة وهي صغيره منا.
جلال: ليش ضل مكان مادورناة لو سالنة عنها بيه ماكو فص ملح وذاب
علاء: -معقولة مامتصلة بخالتها تطمنها
ام علاء: -جا زوينة صاحبتها مامخابرتها ولاداگة عليها مو انوب خالتها
بسمة: بيش تخابر اذا موبايلها ماخذة عندة
جلال: -لاتهمين بقة احتمال واحد إن شاءلله يصير بس رادلة وكت شوية على الاقل نندل مكانها
علاء: -انساة مايصير هذا احتمالك الفاشل ترة ماگاعدين نصور فلم هندي وبكيفنة نتحكم بالسيناريو.
جلال: -وداعة حمدية ام اللبن ينجح هذا الاحتمال ويصير البالي بس بذاك الوكت اذلكم ذل
علاء: -دمشي تذلنة الخايس
طلعم وهما يتناكرون وام علاء گاعدة على الكرسي ومقلصة عيونها دگت رجلها وصاحت
- يععع شلون نسيت يلا امشن وياي
رحت وياها على الواهس واني مافاهمة شي ولا اعرف بالجاي يصير دفرت الغرفة وصاحت بية
: -روحي صيحي الولد خل يجون بساع عفية بنيتي.
شبيها هاي عدها انفصام ساعه تمدح وساعة تذم رحت اركض رديت شالي وفتحت الباب خليت ايدي على عيوني احجب الشمس.
-خالتي تصيحلكم فوگ
جلال: -هاي امك جنها بهاباتي كل شويه براي مساع طردتنة عجيب
-انجب لاتحجي على امي
صعدو فوگ وحيدر رايح بنومة حقة ليش هو نايم شايف النوم شلونة...
ام علاء: تعالو يمة اريدكم تكلبون الغرفة كلاب وهذا الخشاب تسونة خشبة خشبة
بدقايق تحولت الغرفه الى خراب الخشاب كلة فصخوة صاح علاء بصوت عالي.
-يمةةةة تعايي شوفيي شلكيت
كلنة التمينة علية الكنتور موخرة من مكانة وجان ملفوف علية قطع وماعرف شنو غريب بس اكيد سحر
أم علاء: -جا شكال البهلول يريدن يسودنن الفرخ الله لايوفقهن ان شاء الله
جان هذا اليوم هو يوم رعب بالنسبة النة طلع اكثر من سحر مخليات بالغرفة غسلنة البيت كولة غسل ماصاير وداير واجة سيد باليل قرة على حيدر وبقة يستفرغ كل هذا الحجي ومحد يعرف وغرفة حيدر خلة بيها كامرات نشوف شلون تصفة...
مر اكثر من اسبوع حيدر نوعا ما صار احسن بس اكيد بعدة يدور على لبوة لحد الان مالگة شي وازل خلصت امتحانات واني سجلت بدورات وماشية حياتنة بصورة عادية اعتقد اكو شي غلط گاعد يصير بس شنو محد يعرف...
جنت اقرا بالحديقة العصر طلع حيدر على اخر حباية عطرة سابقة مدنك راسة ويعدل بساعتة بقيت صافنة علية باوع علية وابتسم دنگت خجلانة لان احس بالذنب واتجنب احجي وياة...
حيدر: -ها غزولة شلونج بابا.
دنگت العب بالكتاب ودموعي طفرن صارلة هواي ماحاجي وياي مسحت عيوني وگمت من مكاني لزمني من ايدي وجرني علية حضني حسيت اخوي رجع...
حيدر: -كافي بابا لاتبجين
-اسفة مو قصدي والله
-انسي كلشي وركزي بدراستج
-إن شاء الله
مسحت دموعي وخرت منه صار عندي فضول اعرف وين رايح من بعد تردد حجيت: -اكول وءءين رايح
-لخطبة جلال.
من سمعت ردت اوگع من طولي وگع الكتاب مني نزلت اخذة من الكاع وايدي ترجف دخيلج يم البنين لايحس علية گوة تماسكت دموعي دخلت جوة اركض واتعثر بدون لا ارد عليه دخلت لغرفتي وقفلت الباب حسيت روحي راحت صوت شهكاتي عالية دخلت للحمام وقفلتة علية لااحد يسمعني...
حسيت كلبي انمرد جلال راح يتزوج واني الورطت روحي بحبة امداني ليش هيج سويت بروحي ليش تعلقت بية لهلدرجة ماخذت نصيحة لبوة كلامها كلة صحيح محد وگع بيها غيري.
اندك الباب وطفرت من مكاني.
ازل: شنو تسبحين
-لا العب دعبل
-ولاتجوزين من سوالفج كبر
صدوك كبر إلى إن شاءلله هاي مشاعري لازم تموت بمكانها مالازم احد يعرف بيها طلعتي ملابس ورحت سبحت واحس روحي بايدة رحت صليت ركعتين لام البنين ونخيتها تخلصني من مشاعري تجاهة وانساة بعد...
مر يومين واجة حيدر جايب مسواگ مال عزيمة سمج مسگوف دجاج شوي وخبز حار علاگة وصمون
واشكال عگدت حواجبي وحجيت بتسأل.
-شنو عدنة عزيمة.؟
-اي يابة.
-المن
-لبيت جدي
-شنو المناسبة.؟
-ماكو مناسبة بين الاهل
طلع وحجة باستعجال: -سون بس تمن وهذا فرغنة راح يجون
تنهدت بقهر لا اله الا الله هسه تجي العگارب والحياية مالي خلگهن ابدد رحنة نحضر سم ببطن جم نفر اكيد تعرفونهم شوية واجت عشيرة كلگامش
والهوسة ترست المكان الكل جاي من بيبيتي واخوالي العشيرة كلها جاية باوعت لروان حلگهة شوية وينشگ من الضحك وكلعادة المكياج والبس الاور اجت تصب بالاكل يگول هي ام البيت...
واني روحي صايرة بخشمي عفت المطبخ وطلعت لاگاني اخوها استغفر لله مو شكل نظراتة مقرفة تخلي الواحد يتفل على روحة صعدت لغرفتي ولهيت نفسي بالقراية شوية وصاحولي اتغدة والمشكلة ماطايقة الكل كعدت يم امي اكل بهدوء اباوع لحيدر يجيب ويخلي گدام ديمة السيمة اذا اباوع عليها اعوف الاكل كلة بقيت مدنگة گملت وطفرت اسوي جاي...
اجت روان هي واختها يغسلن بالمواعين شهل الندارة النزلت فجأة صبيتلي گلاص جاي وبقيت اباوع الها شلون تغسل خوط لوط تذكرت لبوة احلف عليها تضل بالمواعون خمس دقايق بحيث اتعجب تطلع الجداري تلمع خليت الكلاص على السنك ورحت للصالة الكل متجمع بعد هنا صاحبات البيت...
نزل حيدر من فوك يضحك باستهزاء ويهز براسه صاح على روان بصوت حنون هي ااجت تركض وكوة مسيطرة على روحها متت من الحركة بس لاحيدر يخطبها كولشي يصير وهي خلال هالفترة تتردد النة وحيدر يسولف ويضحك وياها بقت تباوع لامها ويضحكن
حيدر: -تفصلي يابة اكعدي
روان: شكراً
حيدر: -جمعتكم كلكم لان عندي خبر الكم حلو وخل نكول مفاجأة.
باوعت لروان ساحت ارتچت على اختها ورايحة بغير عالم استغفر الله شهل الاخلاق كل وحده تحب هيج تسوي شو اني من سمعت بجلال خطب صرت ماباوع بوجهة...
الكل كاعد بالصالة راح حيدر شغل البلازما وخلة بيها فلاش.
الحجية: -شني حبوبة تريد تطلعنة فلم
حيدر: اصبري ماي عيوني اصبري.
شكل الفلاشة وشغل موبايلة والكل مركز وياة شوية وشتغلت بقينة نتفرج شنو هاي كامرة مخليها بغرفتة انفتح الباب ودخلت روان مدت ايدها ورة الكنتور ورجعت ابتسمت بمكر طبعا غرفة حيدر رجعت لوضعها السابق بس مدري شلعبو بيها طلعت من صدرها تراب مدري شنو رشتة على اطراف الحايط
شوية وطلع غير مشهد هم روان بس غير ملابس بس هلمرة مي تمشي وترش بية وتقرا...
لحضة صمت عمت بالمكان الكل يتسأل طبعاً اني ماتفاجات لان جنت متاكدة هي وامها منو اله مصلحة يفرق بين لبوة وحيدر غيرهن اذا هي تگلة ماتصير، لغيري بقيت مستمرة اتفرج على العرض.
حيدر: شفتو العرض كلكم احب اشرحلكم عن انستكم روان واكيد مو وحدها اكو شخص ساندها على هيج شغل.
كلكم عرفتو بالفترة الاخيرة شصار بيني وبين زوجتي وطلعت من البيت وكل واحد منكم بقة يحجي شكل وعلى اساس اني اضربها لان عدها علاقة وي شخص وشردت وياة هذا كلامكم طبعاً
جنت اضربها بدون سبب بس هسة اكيد وضح كلشي الكم.
الحجية: -قصدك يمة روان مسويتلك سحر تگلب على مرتك
بسمة: اي يمة ومو سحر واحد ومثل ماشفتي بعينج
ابني تسودن تسودن
ديمة: شنيييي قصددجج احنةةة سحاراتتت على شنييي نسوييي سحررر مانخافف من الله.
الحجية: -جا هاي شسمنها مو هاي بتج الترشرش
حيدر: اني حياتي انگلبت ومرتي من وراجن ماادري بيها فيا خالي تشوف شغلك لو اسحلهن للمركز
محسن: -لايابة يامركز اليوم اغسل عارهن بيدي اكول فلوسي وين راحت اثاري طلعتي تسوين سحورةة للعالم
ديمة: -جذابينننن يتهمونننيي باطللل الله لايوفقهمم كلةة جذببب
محسن: -اليوم اعلمج الجذب على اصولة
حيدر: -رجائا مو بيتي اخذها لبيتكم وشوف شغلك بس شني اليضمن مايرجعن يسون من جديد.
محسن: بعد ربع مگطع مايشوفن ولا الهن طلعة من البيت وانتي بت الجلب اذا ماعرستلج بهذا الاسبوع اطلع كوا
البيت صار هوسة ناس تجر وناس تعر خالي سحل مرتة وبنتة وهنا يصرخن ويدعن والباقي طلع وراهن من بعد مابيبي حجت وي امي وحيدر اوففف افتكينة منهن...
مرت الايام طبيعية مابيها روح واني مخلصتها معاهد وقراية وازل مابقة شي على نتيجتها وحيدر هادء بشكل مالة اي صوت بالبيت، طلع من البارحة العصر للزيارة ولحد الان بعدة ماراجع نزلت سمعت امي تحجي بالموبايل رحت اشوف وي منو تحجي اول ماوصلت سدتة وبقت تبچي.
-ها يمة شكو شصارر
-شيصير بعد بينة اكثر من الصار ولج البت محد يدري بيها كل هاي الفتره حتى خالتها مامخابرتها خاف صار بيها شي لاسامح الله.
-اسم الله يمة ليش تحجين هيج إن شاءلله مابيها شي
-اذا مابيها شي ليش ماخابرت خالتها وحدة من صاحباتها ولج هاي زينة تدگ وتلطم ماتدري بيها وهي حتى صاحبات ماعدها وين راحت گلبي نارر عليها
-اطردي الافكار السلبية من راسج ماكو شي من هذا بس لبوة تاذت من اخوي هواي حتى من رادت تطلع گالت اذا ابقى حتى طفلي اخسرة
: -سودة بوجهي وعساها بحضجن وبختجن الله لايوفقهن إن شاءلله لعبن بينة لعب.
-لاتخافين الله ماينسة وكولشي راح يرجع لصاحبة الزين والشين
رحت افتح الباب ماشاء الله شغلي كولة على الباب عاد لو ينطوني راتب هم خوش دخل حيدر عيونة دم وجهة املح كل روح مابية سلم على امي وصعد لغرفتة ماطلع منها الا العصر رحت سويت جاي وكعك شوية اكل ورن موبايله فتحاة بسرعة وضهرت ابتسامة على وجهة...
حيدر: -زين عفية عليك جبت رقم السيارة
الله حيووو وجايبة يمك كون بس مو خلستة اهااا.
عندك الرقم، دزليياة بسرعة. ابو الحسن مايقصر
جايك انتظر لامابية حيل اسوق تمام الله وياك
سد الموبايل وطلع وابتسامة على وجهة.
بقت براسي تساؤلات معقولة لكاها لا هو ماگال هيج يحجي على رجال بس منو ياترى.!؟