رواية لبوة علي للكاتبة كفاية كاظم الفصل السابع عشر
حيدر: -ها يلمهرة تريدين تتعرفين على النفر الجديد هههه عليمن طالعة ولج ما علمتج اني هيج اثگلي شويه يله تعاي نشوف سعيد الحظ الراح يسكن بقربج...
مشيت للاسطبل البيه مهرة وجان اشوف لبوة من
بعيد كأنها القمر في وسط السماء هالبت تشع شع من بعيد ضاوية لاحظتها انتبهت لوجودي دارت وجهها ومشت سريع صحت وراها بصوت عالي...
-لبوووووة.
لبوة: شلون حظ عندي ما اريد اخذ وانطي وي الناس بس يطلعولي صفح صاح باسمي وي حضي شجابة هسة هذا وكفت وهو اجة گلت بكلبي اهووو وين ما اروح يطلع بوجهي حجيت بضجر: - شتريد
حيدر: دارت وجهة احس دارت الدنيا عليه، لون عيونها زيتوني والحمار محاوطهن وخشمها الاحمر تطلع الواحد من طورة مبين على شكلها باچية
: -على كيفج ما رايد شي بس اگول شعجب جاية لهذا المكان
لبوة: اعتقد هذا الشي ما يخصك
حيدر: هذا إيلام مو؟
لبوة: اي.
جان لازم بيدة سرج الفرس عافه وراح للايلام بقة يمسد على شعرة وعيونه صار لونهم غريب صارت بيهن برقة انتبهت لايدة لا والله ركزت احس گلبي نقبض الذكريات كامت تتنقل بية إلا أن وصلت للتوجع گلبي جان بيدة اثر جرح عميق ذكرني بشخصي المفضل...
فصلت عن العالم بطبعي من اذكر شي يبقى تركيزي وياة انسى كل شي موجود فززني صوته من من گال...
حيدر: بيج شي!
لبوة: ها لا...
ما زلت مستمرة بالنظر لايدة انتبه عليه رفع أيده من إيلام بوجهة اسئلة حجيت بصوت متحشر: - شبيها ايدك
حيدر: اعتقد هذا الشي ما يخصج والاعرفه انتي
مو فضوليه
لبوة: صحيح ماعندي فضول بس.
حيدر: بس شنو
لبوة: ها لا هيج
انتبهت لنفسي وغيرت الموضوع
-هاي الفرس المنو
حيدر: اعرفج عليها مهرة هاي لبوة لبوة هاي
مهرة
لبوة: بدون سخافة
حيدر: وين السخافة بالموضوع كل ماهو تعارف
لبوة: تحب الخيل؟
حيدر: اعشقهن
لبوة: ليش؟
حيدر: حبيتهم بسبب شخص جان يحبهم ولا زال
لبوة: من شوكت عندك؟
حيدر: من زمان من جان عمرها اسبوع
لبوة: امها ماتت؟
حيدر: ما اعرف أجن من الخارج صغار أعمارهن اشهر وبيهن اسابيع
لبوة: ليش الا هي؟
حيدر: بيها شي مميز جذبني
لبوة: تحبها؟
نزل شعرة وابتسم.
حيدر: مو احس اليوم فضولج زايد بالطبيعة ما تحجين وإذا حجيتي على گد السؤال لا زايد ولا ناقص
لبوة: صح بس هالموضوع ينتاب فضولي
لذاك سالت مو اكثر
حيدر: شعجب جايبة إيلام لهنا؟
لبوة: افضل اله
حيدر: صح افضل اله بس شلون راح تبعدينة عنج
لبوة: اول وتالي يبتعد عني المو هو اني ابتعد
حيدر: لحسن الحظ إيلام راح يسكن يم مهرتي
لبوة: حلو اسمها يعني ايلام بامانتها
حيدر: ها يلمهرة تامنين عليه
لبوة: گامت تصهل كأنها تگول اي ابتسمت وتقربت عليها مسدت شهرها الصاير أشهب وي ضوة الشمس همست باذنها يلمهرة ايلامي منا ورايح بمسوليتج ديري بالج عليه اباوع لعيونها حسيتها
فهمت الكلام...
دخلو إيلام ومهرة للاسطبل وموجود بالداخل تلث خيول اباوعله منطلق وياهم حتى نسى وجودي برد گلبي من ناحيته احس امنت عليه فززني صوته...
حيدر: شگد راح يبقى؟
لبوة: شبيك كل شويه مفززني
حيدر: انتي شبيج كل شويه وصافنة ترة الصفنه مو الج
لبوة: اذا مو إلى فاكيد الك
حيدر: ما جاوبتي على سؤالي شگد راح يبقى
لبوة: forever and yet do not ask
(للابد، وبعد لا تسال)
حيدر: l try as much as possible
(احاول قدر المستطاع).
لبوة: عفتة بمكانه ورجعت للبيت لگيت گدام بيت جدي ناس ملتمه وسيارات هواي صوت الهلاهل عالي عرفت هاي زفة ريان...
اباوع من بعيد هاي الناس كلها گرايبي واني عشت وحدي اركز بوجوهم اريد اعرفلي واحد بيهم ماكو ما اعرف احد بيهم لعبت نفسي من تجمعهم...
دخلت للبيت سديت الباب وتنتجيت علية عيوني دور بالبيت فارغ كالعادة صوت الإبرة تنسمع بيه...
شكد اتمنى من اجي للبيت ادگ الباب واحد يفتحة إلى مثل باقي الناس مرات ابقى اتخيل اهلي موجودين واني وأخوي نتعارك واروح لبوي وهو يروح لامي وتصير حزازيات بينهم...
لو من اجوع انتظر واحد يگلي گومي اكلي سويتلج اكل ابقى حوالي الساعات بدون اكل واصلة بيه ايام وجود الأهل من أكبر وأهم وأعظم النعم بحياتنا...
شغلت قرآن وعليته عسى ولعل يروح هل الاحساس الاجاني فجأة ما اريد انقاد باتجاها بديت انظف بالبيت رغم نظافتة رشيت معطر شغلت بخور رحت للثلاجة طلعت قطعة سمج وسويت مطبگ وثررمت زلاطة طلعت تمر صبيت عصير طلعت خبز رتبت سفرة رتيب دقيق...
مالي نفس اكل سويت كل هذا حتى اضيع وقت واشغل نفسي لا اكثر مااريد انقاد لشعوري لكن للاسف ما گدرت رحت وراة مشيت بخطوات مترددة وصلت للكنتور وگفت گدام خانة مقفولة اني شجاي اسوي وين اريد اوصل ماادري...
طلعت المفتاح فتحت الباب بادين ترجف احس روحي متشوقة على هدمها صار گدامي صندوگ حجمة وسط ملفوف بقماش كأنه بيه كنز ثمين...
شلتة بيديني الترجف وخرت الغطة من عنده لكيت بيه قفل ومفتاحة بيه، رجلية ما عانني گعدت بالگاع خليته بحظني فتحتة واني احجي بصوت
مبحوح: -كل من ورة حيدرا الا يطلع بوجهي وأشوف هذا الأثر هسه إذا فتحتهن ارجع للصفر ليش لازم اراجع الماضي وشجان بية لازم انساة بشينة وزينة...
فتحت الصندوگ صارن گدامي تلث دفاتر تصاميمهن قديمة بس كشكل نظيف ومرتبات سحبت اول واحد غمضت عيوني وفتحتة كاني افتح جروحي بيدي تلمست الغلاف فتحت اول صفحة مكتوب بيها: -
ما اريد شي حباب بعد ما اتعارك وي الجهال ولا اسوي وكاحة بس تعال
كان الخط مكسر خط طالب ابتدائي نزلت عيني
بالاسطر مكتوب: -.
حبيبي تعال حباب مو گلت انتظريني شوف صار الليل وصوت الكلاب تخوف صارت ظلمة والله اني اخاف الليل يخوف وكل واحد نايم يم اهلة بس اني وحدي وهاي امك نايمة ماتسمع شي
الصفحة الثانية مكتوب بيها: -
صار هواي حسبت بكد ايدي وما اجيت حسبت بكد النجوم وهم ما اجيت ليش أنته تجذب عليه بعد
مزاعلتك ومن تجي ما احجيلك قصة
اختنگت وصوت نفسي صار عالي ودموعي تنزل بغزارة دكات گلبي تخفق بجنونها المتعارف عليه.
ما ردت اكمل لأن اعرف شمكتوب بية زلگ من حظني
وانفتح على الورقة ما قبل الأخير مكتوب بخط احسن من البداية خط مرتب وجميل: -
ما احبهم اهلك كلهم حقراء من البارحة ولليوم بدون اكل شوف حتى معدتي كامت تصيح مثل العصافير.
ما ردت اكمل الباقي ما اريد اتذكر شلون جنت احارب الجوع البرد، الكلام الجارح، الضرب، الاهاين الخ...
يمكن اليشوفني ينبهر بجمال منظري شكلي المهتمة بيه طريقة لبسي عطري أناقتي شخصيتي القوية
طريقة كلامي لكن مازلت طفلة ما طلعت من الماضي بعدني بيه محد يعرف شنو العشتة، والأشياء التحديتها محد يعرف من يجي الليل الف روحي بالبطانية حتى ما اسمع هدوء الليل حتى الهدوء اله صوت بس العايش وحيد سامعة...
محد يعرف لحد هذا اليوم اخاف من تمطر بالليل اخاف من ترعد من كولشي اخاف لكن ما أبين لشخص ولا مرة حجيتهن لاحد ما عدا صديق طفولتي االما اعرف اسمة
مخصصة اله وقت كل يوم بالليل افكر بيه اول صديق إلى جان انرسمت ابتسامه لا تلقائية على وجهي وسحبت الدفتر الثاني وضميتة قوي هذا الدفتر كاتبة بية عنة كولشي يصير وياي اكتبة حتى ما أنساه...
جان اكبر مني بست أو سبع سنوات اول مرة التقيت بيه بالبستان جنت العب وي إيلام لأزمة المشط وامشط بشعرة اريد ارسمه وتاركة شعري مفتوح شفت شخص مخلي رأسه بحظنه تقربت شفتة يبچي ويحچي.
: -يا ربي لا تموتها إذا راحت منو النه اني واخواتي
نضيع ندمر فدوة ربي عوفها النه نتطشر من بعدها تطشرنا مرة لا طشرنا مرة ثانيه
: -ما تموت لا تخاف.
رفع رأسه وفتح عيونة الحمر على وسعهن: -شوف اني گتله لا تأخذها ما راح يأخذها هو حباب خليت
ايدي على گلبي وغمضت عيوني ادعيله
: -شتسوين؟
: -علي گالي من تريدين تحچين وي شخص تحبينه هيج سوي واني حاچيته
: - منو الحاچيتيه؟ ومنو علي؟
أشرت للسماء وابتسمت: -علي ابوي
حچة بصوت مبحوح: -شتسوين هنا؟
: -هذا مكاني أنته شتسوي هنا؟
: -ضايع
: -هههه كلنة ضايعين
: -شتسوين بالدفتر؟
: -ارسم
: -شترسمين؟
: -بكيفي ما اعرف ارسم حلو تعرف ترسم؟
: -تؤ
: -حباب ارسملي إيلام صديقي شوف اني ما عندي اصدقاء بس هو ارسمة الي
: -گتلج ما اعرف ارسم
: -كلكم حقراء وصخين محد يحبني ويلعب وياي
شعندك جاي لمكاني يله اطلع منا هذا المكان محد يدخلة بس اني يلا اطلععع مناااا
: -اوكفي يلا خل ارسمج
: -هيييييي هسه اجيب إيلام واجي
رحت جبت إيلام وخليته گدامه طايرة من الفرح اول مرة واحد يتقبل يحجي وياي: -يلا ارسمني اني وايلام.
: -هذا هو إيلام!
: -اي هذا ايلام صديقي
وكفت بصف إيلام وبدأ يرسم يأخذ منه نظرة ويرجع يرسم حجة وهو يرسم: -شلون الفرس وأگف وما يتحرك شمسويتلة
: -هو هيج يفهم جاي ترسم بيه يلا شنو ما كملت
: -شكمل إذا بس كفشتج رادلها يوم كامل ارسم
بيها
: -لا تكول كفشتي هذا شعري مو كفشه
: -الشعر مشط ومظفور مو هيج الهوى يلعب بيه حتى راح يتگطع
: -ما عليك عوفه اني احبه هيج
: -ليش امج ما تمشطة الج؟
دنگت راسي العب باصابيعي اكرة هذا السؤال المعلمة تسألة إلى الجهال يضحكون علية لان ماعندي ام دمعت عيوني شوية وابچي: -امي راحت
: -وين راحت؟
: -بعيد صارت وي النجوم
أشرت للسمة بيدي گام على حيله وعيونه الحمر نترسن دموع: -اسف مو قصدي اصلا شعرج حلو المشطتيه والبقيتة هيج لايگلج
: -عادي كلها تعيب عليه ويحجون مو بس انت واصلا اني ما اهتم
: -عفية لا تهتمين بأحد زين مو تأخر الوقت ابوج اهلج يدورون عليج هسه.
: -ما عندي بس على وراح هم صالة هواي ما رجع جذب عليه كال هسه ارجع وما رجع يلا ارسمنا ولا تحجي هواي
بقة يرسم شوية وانطاني الدفتر.
: -هاج كملت
: -مو هيجججج مو هيج ما تعرفون شي بس هو يعرف
: -وعد ارسمج مرة ثانية هسه امي مريضه بالمستشفى من تطيب اجيج ادعليها وياج
: -راح ادعيلها هواي بس تجي مو
: -وعد اجي بس وين الكاج
: -هنا هذا مكاني
: -يله اني رايح وروحي لبيتكم راح يصير الليل ما يصير تبقين هنا
: -تمام.
عافني وراح صحت وراة: -باييييي
سوالي بيده باي بيومها حسيت بالفرح ولأول مرة واحد يحجي وياي صح جان مبين اكبر مني بهواي بس رغم هذا فرحت اول مرة واحد يسألني ليش ما مشطة شعرج ليش باقية لهذا الوقت كلها تضحك عليه، رجعت للبيت دنيا الغروب شفت بيبي زمرد فرشت سجادة صغيرة بالگاع رحت اسئها وراوي فضولي: -شتسوين بيها بيبي؟
: -اصلي عليها يچده
: -ليش تصلين وشلون؟
: -نصلي لرب الكون بمثل هالوكت موعد رب العالمين منتظرنة بيه لزوم نحضر رواحتنا اله
: -يعني يشوفنه هسه ويحقق الشي النطلبه من عنده
: -چدة هو بكل وكت يشوفنا ويسمعنه بس بهاي الاوكات (الأوقات)يسمعنه ويستجاب دعائنا أكثر
من اي وكت
: -اذا اسوي مثلج واطلب من عنده شي يطينياه
: -ينطيه إذا چان شي زين النه وللناس
: -اريد اسوي مثلج.
ضحكت واخذتني وياها علمتني شلون اتتوضا وبدت تشرحلي شلون نصلي واني ذكية بسرعه تعلمت ولأول مرة اصلي كان عمري عشر سنوات
دعيت من كل گلبي أمه تصير زينة وما تعوفة ويبقه وحده مثلي اليوم كله ادعيلها منا لمن نمت...
گعدت الصبح بنشاط كل ما اذكر عندي صديق تنرسم الابتسامه على وجهي
سعاد: -شعندج من صباح الله تتمضحكين
لبوة: -وانتي شعليج
سعاد: -ولج هاي عليمن انتي كل ما تكبرين يطول لسانج بطول النعال وتراددين اني اعلمج.
لبوة: -روحي علمي روحج بالاول
گلت هاي الكلمه و اجاني راچدي فر وجهي فر رفعتني من شعري گطعتة: -اخخخخخ شعرررييي الوصخةةةة عوفي شعري
سعاد: -اني اكتلج حتى اربيج وترجعين تغلطين بت النعال لانعل ابوج لابو امج عافوج على گلوبنا ما اخذوج وياهم وخلصونا من شرج إذا اليوم هيج من تكبرين شتسوين
لبوة: -لا تغلطينننن على اهلييي
سعاد: -اصبري يبت ام عيون الخضر اني اعلمج.
لزمتني من زندي بقوه وشمرتني على الطباخ جابت سچينه خلتها على الطباخ وشغلته جفلت بمكاني هالمرة كلها شر: -شسوين بيها
سعاد: -الزگها على السانج الوصخ مثلج حتى بعد تغردين وتطربينه
لبوة: -اني مو وصخة انتو الوصخيننننن
ضربتني راچدي وجرتني للطباخ لازمتني بيد والايد الثانية لازمه بيها السچينة مخليتها على النار
سعاد: -هسه اني اعلمج شلون تحچين بعد
لبوة: -عمههههههه بيبيييي رااااااح تحرگنيييي
ضربتني راچدي وتفلت بوجهي.
سعاد: -انعل عشيرتج واحد واحد بت
لبوة: -كمت اعيط بعلو صوتي رفعت السچينة
قربتها من وجهي اختفة صوتي قربتها لدرجة لهبتني حرارتها غمضت عيوني بقوة سمعت
صوت فاطمة احس روحي ردت اجه الامان المنتظرتة.
فاطمة: -لج هاي شتسوين شبيج انتي مخبلة تريدين تحرگينها ما تخافين من الله طفلة بكد جهالج مستكدره عليها لأن محد وراها
سعاد: -لا كل ساعة تتنطنطين احترمي نفسج والتهي بروحج
لبوة: -جرتني فاطمة من أيدها ختلت ورة ضهرها.
خانسة رفعت اصبعها بتهديد
فاطمه: -قسما بالله العظيم وروح ابوي إذا ثاني مرة مديتي ايدج الها لو حاچيتيها الا اطيح حضج واعلمج الأمهات شتجيب
سعاد: -شو بله تعاي شوفيني شتجيب كمت اطكطك
من عدچ
فاطمة: -ما اريد اتعامل وياج بغير طريقة لأن انتي اكبر من عندي واحترم فرق العمر البينه عوفج من البت شتريدين اني موجوده تريدين شغل چنچ على شغل بس لا تحاجينها.
سعاد: -وانتي شحارگ حمامج شفتيني مرة حاجيت جهالج لا تدرين ليش لان اذا غلطو انتي موجوده ابوهم موجود يادبهم بس هاي ياهو الها تمشي على خر اذنها
فاطمه: -امنا بالله تعلمينها مو تادبينها لبوة مادبه بس اليدوس بطنها نعرف تأليها ما تسكتله المفروض تحتوينها لأن ما عدها أهل ولج بيها حسنه عند الله مو لازمه سجينه حاميتها وتكليلي
أدبها
سعاد: -هاي مو مال عين واغاتي ما تمشي بالضرب.
فاطمة: -ما تضربين جهالج شو مازن مامخلي سالفة طايحة حظ ما مسويها لو بس راجعة انتي ورجلج عليها راح تسودنونها حتى البيت ما تلفي اله من وراكم
سعاد: -من ورانا شني هي سايبة تحب الدياحة
لبوة: -اسمع جدالهن واني ساكتة بس اكثر شي يضوجني ويقهرني من يكولون ما عدها أحد ارجع واكول بين نفسي هو عندي هسه يجي ما يعوفني
علي إثر الصوت اجت بيبي كوة تمشي واضح التعب على شكلها المرض متعبها حجت بصوت
تعبان.
زمرد: -شبيجن ليش صوتجن عالي منا العالم شيگولون علينه
سعاد: -ماكو شي عمه نتناقش على الشغل
زمرد: -يمه الشغل ما يخلص وهو مو انمونه اتعاونن بينجن واحنه مو ذيج العايلة وهل تشوفني
لو اگدر اشتغل ما قصر بس بعد الحيل ضاع
فاطمه: -لاعمه صدگ چذب على گولتج انمونه بيناتنه نتقاسمه ولا يهمج
سعاد: -عمه محتاجه شي اسويلج ريوگ
زمرد: -لا يمه ما أشتهي هذا السم يخلي روحي تزوهر ها چدة لبوة تريكتي بعدج.
فاطمه: -لا هسه اسويلها ريوگ
زمرد: -ما تقصرين ام ادهم الله يحفظلج وليداتج
فاطمه: -هسه اني شسويت لبوة مثل بنتي الله
يشهد شتريدين اسويلج ريوگ يا حلوة
لبوة: -حچيت بهمس ما اريد
فاطمه: -شلون ما تريدين روحي لغرفتي هسه اسويلج ريوگ واجي وراج
لبوة: -حسيت بقهر وحرگه على الكلام السمعتة سوتلي الريوگ واجت كعدت گبالي
فاطمه: -ليش ما تأكلين
لبوة: -ما أشتهي
فاطمه: -مايصير لازم تأكلين علمود تصيرين قويه.
لبوة: -شوكت يجي على ياخذني منكم واخلص اني ما احب بيتكم وخصوصاً هاي السعلوة هي وابنه ورجلها
فاطمه: -يتاخر من تكبرين حيل راح تعرفين هو وين لبوة انتي بنيه حبابه عوفي سعاد وابنها كل ما تشوفينها تحاشيها ولاتحچين وياها
لبوة: -اني ما حاچيه وياها هي اجتني
فاطمه: -يمه لسانج هاي سعاد مو وجهة نعمة اني مرة شكبرني وعندي جهال وما خلصانة منها مسايستها مسايس كل يوميه مطلعتلي سالفة ومخليه عمج يكتلني الا انتي.
لبوة: -هو مو عمي واني ما احبه
فاطمه: -ما يصير تحچين على الأكبر منج بهالطريقة عيب
لبوة: -ليش اليضرب مرة مو عيب عليه
فاطمه: -ولج انتي منين جايبة هلسان ما ينكدر عليج اليسمع حچيج يكول هاي عمرها عشرين والله بنات العشرين ما يحچن هيج
لبوة: -تريديني اسكت الها ما احب اسكت لواحد ابوي كالي إذا واحد يحاچيج لا تسكتيله كل واحد تعاملي وياه باخلاقة.
فاطمه: -راح احسدج ولج شني هاي تدرين بدي شسوي هسه بدي اگرطج گرط يربي صبرني هم جمال وهم لسان بس عايزج طول أن شاء الله البطني يطلع يشبهج
لبوة: -ليش انتي حامل
فاطمه: -اي بس مو تگولين محد يدري
لبوة: -ما اگول وعد راح احبه والعبه وياي واسويله اكل وانومه اخليه يصير اخوي
فاطمه: -يا عمري شو تعاي لحضني ويگولون ليش تحبينها امشط شعرج
لبوة: -لا ما اريد
فاطمه: -يصير حلو
لبوة: -هو هيج حلو
فاطمه: -وين رايحة كملي اكلج.
لبوة: -شبعت.
ردت اكلها رايحة لصديقي بس سكتت رايحه يم إيلام
فاطمه: -مو تمشين بعيد ومن يصير الغده تعاي چا اجيتج بس تدرين محد يرضه اجيج
لبوة: -هزيت راسي ومشيت لمكاني المفضل كعدت مسافه يم إيلام خليت راسي بحضني وعيوني انترست دموع من اتذكر ابوي جان يسويلي ريوگ
بيض وطماطة شكد اكل
علي: -كافي بويه ما يصير تأكلين هواي
لبوة: -ما ما خليني اكل أنته شعليك هم تسوي اكل طيب وهم تكلي لا تأكلين شنو هاي.
علي: -بوية يلسانج ولج عليمن طالعة السانج بطولج
شو بله باوعيلي لا والله اطول منج يله كافي مو زين على معدتج
لبوة: -هسه حطيت عينك على اكلي أنته مو خوش ابو ولا خوش صديق أنته ابد مو خوش
علي: -ام لسان گومي وراي شغل اريد اغسل المواعين
لبوة: -كمت كمت بس هاي، اخذت خبزه وسويت لكمه چبيرة مسحت البقة بالطاوة
علي: -راح تصيرين دبه وانتي منا گصيرة بعد حتى مشي ما تمشين
لبوة: -صدوككككك
علي: -والله شبيج قابل اچذب عليج.
لبوة: -ذبيت الگمة من ايدي وكعدت على صفحة اباوعله شلون يغسل المواعين جنت سمينه النهار كله اكل بس من راح ضعفت كمت ما اعرف شنو اكل إذا الگة اكل ما الكة ما اكل، عزل المطبخ وشألني يبوس بيه
علي: -ديري بالج على روحج ولا تسكتين من يحاجونج بنتي اللبوة
لبوة: -انته ليش سميتني لبوة كلها تعيب على اسمي
علي: -اني ما سميتج اله من شفتج مثل اللبوة تأكلين اليحاجيچ بسنونج
لبوة: -هو اني جنت صغيرة حيل شلون اعارك.
علي: -هههههه لا مو هيج جنت مسميج بالبيان اسم وصار عمرج خمس سنوات وانتي ما عندج جنسيه
وامج تصيحلج لبوة وانتي ماشية عليج من سويت الجنسيه بدلت البيان وخليت اسمج لبوة
لبوة: -يعني حلو
علي: -انتي حلوة عيونج حلوة شعرج حلو كلشي بيج حلو
لبوة: -طالعة عليك
علي: -تشبهين امج عيونها بياضها بس امج جانت فقيرة ما تحچي بس هاي ماخذتها مني
لبوة: -يعني اني أشبه ابوي البطل
علي: -روحة للبطل يله اني راح اروح للشغل.
لبوة: -وترجع مو
علي: -وعد ارجع ما اتاخر
لبوة: -عفيه بسبعي...
گاعده وأتذكر ايامنه الحلوة دموعي تنزل وابتسم من تمر سوالفة على بالي حسيت بشخص گدامي مسحت دموعي بسرعة عبالي مازن
رفعت راسي انرسمت ابتسامة على وجهي.
: -أنته اجيت
: -اي اجيت وجهج خير تدرين امي صارت زينة وراح يطلعونها
: -اي هاي البارحه هواي هواي دعيتلها وحتى صليت وكلت اله ما يموتها وتضل تبچي عليها
: -شكرا الج يوجه الخير راح اسميج وجه الخير.
: -ههه حلو وانته راح اسميك صديقي
: -اتفقنا زين ما گلتي ليش گاعدة وحدج هنا
وتبچين
: -كتلك هذا مكاني واني ما ابچي
: -لا شفتج تبچين گليلي ياهو محاچيچ
: -كلهم ما احبهم اريد ارجع لبيتنه
: -ماترجعين ياهو گاضج؟ وهما ياهو الماتحبينهم؟
: -عمامي وسعاد ومازن
: -ليش ما تحبينهم؟
: -هما ما يحبوني يكرهوني
: -ليش اكو واحد ما يحبج ذولة يغارون من عندج لان حلوة
: -اني حلوه!
: -اي شوفي عيونج صاير لونهن مثل البرتقالي.
: -عيوني مو برتقاليات هن خضر هيج على گلي
: -اي صح خضر بس بيهن لون برتقالي ماادري لأن بجيتي وشعرج هم حلو بس لو تمشطينة يصير احلى
: -جان على يمشطة إلى بس هو هسه ماكو ؛من يمشي شسوي افتح شعري ومن يرجع نتعارك اني وياه ويرجع يمشطة إلى وبعدين ما يتأخر يرجع من وقت
: -زين هو وين راح وليش تسمينة علي
: -عادي هو يقبل اسمية على لأن هو صديقي مو بس ابوي بس هو راح للشغل وكال ارجع وبعد ما رجع صارله هواي حيل.
: -زين ليش تبقين هنا وحدج؟
: -محد يريدني ويلعب وياي بس هو جان صديقي وراح
: -خلص اني صديقج من اليوم
: -لا من البارحة صرت صديقي
: -بس اني مو بعمرج
: -عادي مو مهم
: -زين ذاك المشط المن
: -هذا مال إيلام امشط شعره بيه
: -عايفه شعرج وتمشطين بالفرس ههه
: -بس هو صديقي
: -افتهمنا افتهمنا روحي جيبية وتعالي
: -شتسوي بيه
: -امشط كفشتج قصدي شعرج
: -بس...
: -اسسسس ماكو بس روحي جيبيه بسرعة.
رحت جبتة بسرعة وانطيته الة طايرة من الفرح
: -صيري گدامي
: -كعدت
: -اني كلت اكعدي لو صيري كدامي ضعتي بالكاع هسه شلون الوحج
: -لا تعيب وتصيح عليه لا اگوم واكتلك
: -مبينه انتي مو هينه
: -اي هو هيج
: -شعرج حلو بعد مشطية
مشط شعري وضفرة إلى تلمست گصيبتي خاف بيها شعر طالع.
: -الله هاي أنته تعرف تمشط
: -اي امشط لخواتي صغار بس شعرهن مو هيج طويل
: -عدك اخوات
: -اي صغار
: -اني ما عندي
: -يصير عندج لا تخافين.
: -راح تجيني كل يوميه
: -لا ما أكدر عندي شغل ودراسه من أفرغ اجيج
: -شتستغل
: -ابيع بالشارع
: -شتبيع
: -كلشي ابيع اهم شي اعيش امي واخواتي
: -وابوك وين ما يشتغل
: -راح يم ابوج، يلا اني تاخرت راح اروح
: -باي
: -باي
حيل فرحت بوجوده صار يجي نرسم نتعارك بس قليل حسيت بسعاده حقيقيه جنت من اجي العب وي الجهال كلها تطفر ويروحون يلعبون وحدهم ومازن رأيسهم كل ما احجي وي واحد ما يخليه...
حتى سمر إذا حجت وياي تنقلب القيامة عليها وتحصللها كتلة معدلة لكن رغم هذا تجيني بالختلات وهم ترجع تنكتل إلا أن كمت اروح المكان ما تلگاني بية...
كمت ما اهتم لاحد ولا يعجبني شخص ابقى وحدي جان كل وقتي بالبستان يم إيلام عوضني وجود الاصدقاء لكن كطفلة انقهر من اشوف كل الأطفال مجتمعين يضحكون ويلعبون سوة ومن اجي يعوفون المكان الأني بيه انقهر من اشوف شلون اهلهم مشترين الهم ملابس عيد شلون ينطونهم عيديات شلون يلعبون والإبتسامة على وجوهم...
ما جنت مثلهم اتذكر بالاعياد شلون تجي ناس على ناس تعايد والضحكة على وجوهم والأطفال بيدهم عيديات ويجون يمي في سبيل يقهروني
: -شوفي عيني شوفي ملابسنة مال العيد يخبلن وانتي ما عندج ملابس
: -ابوي انطاني عيدية شوفي شكد وانتي ابوج ميت ما ينطيج
: -لا حتى امها ميته محد ينطيها عيديه والله خطية
: -حتى العاب ما عندج ومحد يلعب وياج ههههههه
: -انتي محد يحبج حتى اهلج عافوج وحدج لو يحبوج اخذوج وياهم بس هما ما يحبوج.
لبوه: -هييييي ابوي مو ميتتتت وما عافني هسه يرجع عنده شغل واني مووو يتيمةة افتهمتووو
: -صارلج شكد تگولين يرجع وشوفي شكد صار
وما رجع واصلا مازن گال ميت هههههه
لبوة: -تمشون من وجهي لا ادمركم طين وانعل والديكم
: -ما نمشي بلة شتسوين
لبوة: -هسه اعلمكم شسوي شلت من الكاع قوطيه
ترستهة طين وشمرتها عليهم تدمرت ملابسهم وبوگتها حصلت عيديه تخبل...
أكثر يوم اكرها واضوج منه هو العيد عكس باقي الاطفال تحب العيد ومنتظرته الا اني كل عيد نتعارك اني والجهال الزمهم اشبعهم كتل ويجي عمي الغالي يطلعها من خشمي...
كل عيد يحبسني بالغرفة عقوبة إلى اسوء يوم يمر على يوم العيد بالنسبة إلى يوم مشئوم اگعد من الصبح اروح بين البساتين اشرد حتى محد يشوفني لا سعاد ولا رجلها واحد أتعس من الثاني...
سعاد جانت تكرب عليه بس اني أطلعه من عيونها ما افوته الها صح احصل كتلة تنسيني اسمي بس ما يهمني الطريقة إلى جانت سعاد تعاملني بيها أثرت على نفسيتي لحد هذا الوقت غيرتها من امي وحقدها عليها طلعتها بيه...
جانت اول ما يجي رجلها تشكي وتبجي وهو مناة يحبني فاحصل المقسوم وخاصه ايام العيد لأن بيها تنظيف وشغل أكثر اثنين و وياهم ابنهم كلبي ميت منهم دمرو نفسيتي...
صح كبرت لكن الاشياء العشتها تبقى ماثرة بيه مستحيل تعوفني الكلام السمعتة كطفلة باقي بمخيلتي وإذا احجي بيه بهذا عمري يحترگ گلبي...
بيوم العيد اهج اروح بالبساتين ومرة من المرات گتلني الجوع واني ما اعرف وين اني على گد المسافة المشيتها بقيت گاعده بمكاني افضل اموت من الجوع ولا اطلب من احد اكل رغم طفلة لكن كنت عزيزه نفس گعدت احچي وي نفسي.
: -هسه اني شسويت يا ربي حتى هيج يصير وياي يمكن العصفور لأن مات عبالك اني كتلته والله ما گتلته لكيته ميت من وحده اني ما كتلته
سمعت حركه وراي فزيت بسرعة شفت طفل گاعد على كرسي متحرك گمت من مكاني رحت باتجاهه
: -انته شتسوي هنا؟
امير: -انن تت يي ي ششش تسس ووينن هنن اا
(انتي شتسوين هنا)
: -وانته شعليك
: -ب ب ستا ن نه هه هه ذا(بستانه هذا)
: -هاا هسه اطلع بس أنته ليش گاعد هنا أشرت على الكرسي أحسه ضاج حجيت بأسف.
: -شوف والله مو قصدي أسفه أنته شسمك
: -اام ي رر (امير)
: -حلو اسمك
: -ششك ررا (شكرا)
: - أنته شعندك جاي وحدك هنا واليوم عيد
: -ما اح بهه (ما احبه)
: -ليش؟
: -م ح دد يلعببب وي اي يض حكو ن عل يي
(محد يلعب وياي يضحكون علي)
: -خيولون لا تهتملهم هذولي حقراء وصخين حقودين
: -اننتت يي لي شش هنناا (انتي ليش هنا).
: -شردت من عمي راح يحبسني بالغرفة الوصخة حتى لا اتعارك وي الجهال فوگ ما همه يعيلون بيه يدافعلهم واحصلي كتله بصباح الله تعاي بوسي ايدي الوصخ القذر أيده كلها شعر ويريدني أبوسها والله لو يموت ما ابوسها لو مو يحبسني بغرفه لو مو يضربني ما ابوسها ما ابوسها
: -ان تتي ق ووو يهه (انتي قويه)
: -اي قويه اليحجي وياي ما اسكتله واليغثني اكتله اسحله بالطين وانعل والديه
: -انتتتيي ششگد ععم رر ججج.
: -اشرت بصابعي عشرة وانته
: -سس ب عععههه
: -يعني اني اكبر منك لازم تحترمني وتسمع كلامي منا ورايح يله تصاحب
: -ايييي
مديت اصبعي اله وتصاحبنه ومن ذاك اليوم صار عندي صديق ثاني كمت اروحله لكن جان بيتهم بعيد وسلطان من يدري يبس الخشبه عليه كمت كل ما يروح لبغداد اروحله بالاسبوع مرة...
بيبيته جانت مرة قويه بحيله جنت اسولفلها كولشي يصير وياي تعلقت بيها أكثر من بيبي زمرد جانت تمشطلي شعري الجنت ما المه مخليته مفتوح للهوى وامير نفسيتة تحسنت لأن صار يحجي وي شخص بعمرة جنت انقهر عليه لأن ما يگدر يمشي ونطقة ثگيل.
: -شبيك ضايج
: -شوووف يي مما اككدرر امششيي مثلككمم.
: -مو مهم تمشي المهم عايش وتتنفس رب العالمين هو الاختار شلون يكون شكلك اكو هواي ناس مثلك واكو الاسوء اكو ما يسمعون وبيهم ما يشوفون شي تخيل كولشي ما يشوفون كل واحد عنده نقص يختلف عن الاخر بكل الاحوال لازم نحمد الله واني اوعدك من أكبر اصير دكتورة واعالجك اخليك تمشي
: -تتصييري نن دككتوو ررةةة
: -اي واعالجك بس من أكبر اصير حيل جبيرة
: -ووتصييررين ح لوةةة بعددد
: -ليش اني حلوة
: -اييي.
حجت الحجية ام عباس: -يمه انتي تخبلين ولسانج ينكط عسل مدري منين الله خالقج ما ادري شلون
ذوله الجلاب هيج يسوون بيج انتي لو عندي احطج بشيشية (علبة صغيرة) واضمج من عيون الوادم شو چدة تعاي ليه طيني حبه
: -هااا
: -خاب شني ها تعاي نطيني حبه.
اليوم اتذكرتهم فرد مرة اريد أوفر باقي الذكريات الحلوة لغير يوم لميت الغراض البل صندوك طلعت چنطة السفر رتبت ملابسي وغراضي ما خليت شي بقة كم يوم واسافر سمعت الباب يندگ ياربي منو الجايني هسه رحت افتحة...
غزل: -يمة يمة يوم اين انتي امي الجميلة
بسمة: -هناهنا شتريدين خبصتيني خبص
غزل: -انتي هنا كنت ابحث عنك في كل مكان بحث هنا وهنا وهنا ولم أجدك
بسمة: -والان يا بنتي الجميلة وجدتني ماذا تريدين مني
غزل: -كنت ابحث عنك لانني جائعة
بسمة: -وهل أنا دجاج مشوي لكي تأكلين
غزل: -لا يا أماه يا قرة عيني اريد ان اسئلك ماذا اعدتي لنا الطعام
بسمه: -الفاصوليا والأرز والقليل من المخلل.
غزل: -لا يا اللهي لا اريد ان اكل الفاصوليا
أزل: -هاي شنو هاي طالعات بنشرة الاخبار شو
تحچن كله بالفصحى
بسمه: -والله يمه هاي اختج تحب تغيير جو لطيفة مو بيدها
أزل: -يمه صدوك تحجين اختي صغيرة انتي شبيج
عبالي مشغلات فلم يوزرسيف
غزل: -هلو هلو شنو صغيره ما غيرج الصغيرة
عيني شنو تريدينه كلنا مثلج كأيبين خلينه نضحك نتونس شضال بالدنيا.
أزل: -والله حبيبتي اني مو كأيبة بس عندي دراسة وان شاء الله تشوفين السادس بعينج واتذكريني
بسمة: -بنياتي حبيباتي بدال هذا النقاش الما اله داعي روحن حضرن رواحتجن العصر نروح لاهلي
أزل: -شعدنه رايحين
بسمه: -الحچية عازمتنه
غزل: -مناسبتيش العزيمة
بسمه: -ولجن كافي شني تحقيق خو مو تحقيق الحچية صارلها هواي ما شايفتنة مشتاقتلنة
أزل: -تشتاقلها العافيه حتى اني حيل مشتاقة الها
بسمة: -فدوه اروح لوجهج البريء.
غزل: -يمة تردين الصدگ مرت اخوج ديمة هي وجهالها ما تنطاق توقف على المعدة بس عندج مرت خالي محسن تنگرط گرط
بسمه: -هي هاي طبيعتها بعد شنسويلها يلا اني راح أناملي جم ساعة ومن يجي اخوجن اگعدني عود
غزل: -وين وين انطيني الف وروحي نامي
بسمه: -شتسوين بالالف
غزل: -اريد اشتري اندومي
بسمه: -اوف يهل الاندومي راح يطيح حضج روحي تلگين فلوس بالجيزدان (المحفظة) وياهو اليشتريلج بس لا تريدين تروحين.
غزل: -لا وين اروح علمود حيدر يسويلي اعدام هسه أصيح على عبيس يروح يشتريلي
بسمه: -خل يشتريله ويشتريلج وانتي أزل شتريدين يجيبولج وياهم
أزل: -ما اريد عندي بعدني ما مخلصتهن
بسمه: -يمة انتي كيوت وهاي اختج حوت ما تخلي شي وراها حلگها النهار كله يشتغل جنهة صخل
غزل: -ها خليتي عينج على أن شاء الله والله يالله
اروح اشوف عبيس وين
بسمة: -مو تشهرينه بصوتج
غزل: -عود خوش...
رحت أصيح لعباس ابن جيرانه صغير دائما ادزة يشتريلي صحت من ورة الحايط، عبيس عباس ناس ناس اتسمع صوتي
عباس: -ها ذاي عباث عباث تل يوميه
غزل: -حباب اشتريلي اندومي بالفين واشتري اليعجبك حب نساتل موطه كولشي تريد اشتري
عباس: -ذيبي يله
غزل: -على كيفك عيني شايف روحك شوفة
عباس: -بتيفي
راح عباس واني ضليت احوس بالگراج
وكفت گدام الجام مال شباك الاستقبال العب بشعري اندگ الباب رحت ركض فتحت الباب واني احچي...
اگرطك أكلك هم ما يفيد، شبسرعة اشتريت.
فتحت عيوني بصدمه من شفت جلال گدامي بقيت
فاتحة حلگي بدون اي مقدمات طبكت الباب بوجهة
رحت ادور على شال سمعت الباب يندگ لفيت شال
علي راسي وفتحت الباب على النص شفت عباس
بيده علاگه
عباس: -هات
غزل: -ها جيب حبيبي شكرا
عباس: - بعد لا تيحيني (تصيحيني)
غزل: -اخذت العلاگة من عباس وطلعت راسي من الباب شفتة واكف بصف سيارتة مدنگ راسة بتليفوتة
احم اتفضل شرايد.
جلال: -زاد فضلج بس اجيت على حيدر اتصل بيه موبايله مغلق
غزل: -طالع مو هنا هسه يجي
جلال: -خوش جا اني راح اروح
غزل: -اذا الموضوع ضروري انتظرة اگول اعتذر لأن طبگت الباب بوجهك
جلال: -ما صار شي
غزل: -ها خوش خو ما محتاج شي ثاني
جلال: -لا بس ادخلي منا عالم.
الازرگ فشلاني سديت الباب متفشلة هم ازرگ وهم غثيث ياربي ليش جاي انغث من عنده رحت خليت الاندومي على الطباخ وكمت افتر بالگراج هسه شلون اعرفه راح لو بعدة دنگدت من جوة الباب
شفته على وگفتة گمت بسرعه من الگاع لا يشوفني نفضت ملابسي شويه وسمعت صوت سياره اجه حيدر سمعتهم يحچون خليت اذني على الباب اسمعهم شيحچون.
جلال: -اي يأبه اليوم ماكو نايم بحضن حبيبة الگلب
حيدر: -دكل نعل واحچي عدل.
جلال: -ادگ عليك جهازك قافلة يعني شتفسرها هاي
حيدر: -وداعت سعديه ام اللبن طافي شحن
جلال: -حمديه حمديةةةةة ياامه الاسلام اسمها حمديةةة مو سعديةةة
حيدر: -كافي افتهمنا ولك فضحتنا منا العالم
جلال: -نعلت الله عليك نسيتني السالفة الجيت بيها
حيدر: -الله اليستر من سوالفك
جلال: -لك شني هاي طلعت داهيه كبرى ندري بيك من زمان بس مو هيج شبسرعة وگعو في شباكك
لو تشوف اليوم المركز مختبص بس يسولف بيك.
وخو محمود يشيل روحه ويطگها بالگاع وخاصة من العقيد حچه بيك
حيدر: -محمود هذا يمي بسيطة بس افرغلة
جلال: -ما لگيت شي عليه
حيدر: -للاسف بحوشت وراة تبحوش بس ما لگيت شي
جلال: -لو عندة شي موزين يطلع لا تخاف اذا مو اليوم باچر بخصوص هاي المهمة الكيوت المثل وجهج ينگرط تعزمنه على حسابك عزيمه تشگ شگ
حيدر: -اليسمعك يگول لازم ابو بكر البغدادي
جلال: -ليش الزمناهم هينين ما يفرقون شي عنه
وهسه لا تغلس سويلنة عزيمه بساع.
حيدر: -غير مرة اليوم معزومين
جلال: -مو اگول شغلتك مو خالية راح تلحگ عليوي
وتعرس واضل بس اني بعرسكم الزم چدريه وادگ عليها كلها عرست ضليت بس انا وكلها عرست ضليت بس انا
حيدر: -ما تبطل مسلته رحمة لكهنة المعبد
جلال: -ليش اني مچذب عليك صاحبي عليوي النهار كله جنه سوة لا أفارقة ولا يفارقني بس خطب خطبه بعده ما معرس نساني شگول عليج يلبالي.
حيدر: -غير عرسه بهل الاسبوع ما ضل شي شتريدة يعوف العرس ويكابلك هاي فوگ ما تروح تساعده بتجهيزات العرس
جلال: -ما ينطيني گلبي اعرسله بيدي
حيدر: -اي مو هو حبيبتك
جلال: -لا لهنا وحدك اني ما اخون حمديه ام اللبن خطيه تگعد من الصبح تحلب الهايشة وتسويلي
روب واعوفها لا مستحيل
حيدر: -بعد بيتي وفي الچلب يروحلك فدوة
جلال: -حرامات گطعت كل هاي المسافات اروح
لعليوي ثلث كبدي احسن من وجهك ما بيه شوفة
حيدر: -سلملي عليه.
جلال: -ما يوصل
واگفة اسمع حچيهم والضحكة شاگة حلگي يربي هم ازرگ وهم سوالفة تضحك بس لو ادري هاي حمديه منين خاف تطلع حبيبتة بس هيج يصيحلها
هم ازرگ وعده حبيبة هو صح ازرگ بس يطگ
بالگاع ينلگف لگف خلصو حچيهم واطگها رگضة
للمطبخ لگيت الاندومي محترگ نصة شلت الفوگ
ودخل حيدر.
حيدر: -شلونة الغزال
غزل: -كلش مو زين احترگ الاندومي مالته
حيدر: -المفروض تبقين يمة هو بسرعة يستوي
غزل: -المفروض بس بعد صار إلى صار.
حيدر: -يلا روحن تحضرن العالم منتظرتنة
غزل: -يله هسه اشوفهن...
رحت گعدت امي و تحظرنه منتظرين حيدر نزل لابس دشداشه بيضة وچراويه لافها بطريقتة وصلنه استقبلانه خالي محسن سلمنه عليه ودخلنه لاگتنه ديمة شگد اكرها سلمنا عليها...
وبقت باقي العشيرة سلمنة على بيبي واچت الغثة روان بت خالي ليث ملابسها يريدن ينفجرن عليها
سلمت علينة.
روان: -شلونك حيدر
حيدر: -هلا
غزل: -رد عليها حيدر من ورة خشمة كالعادة حلل.
الحچيه: -ها ولك حويدر شوكت تعرس
حيدر: -انتي تروحين وترجعين عليه ما عندج غير هاي السالفة
الحچية: -طلع الشيب من راسك يمته تعرس وانت وحيد امك هم تريد تفرح بيك
حيدر: -امي من زمان فرحانة بيه لا تخافين
الحچية: -ولك ما تبطل سوالفك اريد اعرسلك گبل لا اموت
حيدر: -ما تموتين ناقصج بس شايب
الحچية: -هسه هذا شحچي وياه
محسن: --لا تحچين وياه شي هاي خصوصية والقرار اله هو يشوف الشي اليناسبة واليرتاحلة.
الحچية: -وشني اليريده بله خاب گول شتريد من مرة
حيدر: -اولا اريدها نظيفة بشكل ثانياً ما تحچي هواي تكون هادئة ثالثاً دارسة ومثقفة عدها معلومات عامة
واحب تناقشني رابعاً ملامحها تريح العين خامساً مابيناتنة فرق عمر هواي كله خمس ست سنوات
الحچية: -وهاي منين نجيبها الك
حيدر: -لاتعبين روحچ خليها عليه
الحچيه: -شخليها عليك محمد راح يعرس هو لا بگدك ولا حذاك وانته بعدك دور
-الله يوفقة لگة التناسبة اني شكو.
الحجية تحچي وي حيدر اباوع لروان بس تباوع اله صارو يحجون بخطبة محمد والله زين راح يتزوج درت وجهي وأزل وكعت من طولها.