رواية لبوة علي للكاتبة كفاية كاظم الفصل الثامن والعشرون
جم ليلة علة ليلة يعز علية النوم
بس حلمك توالي الليل خطاري
:
حيدر...
دائما المصاعب تختار الاشخاص الكفوئين بينة وتحاول تختبر كفائتهم بكل الطرق القاسية حتى تثبت هل هم يستحقون هذا اللقب او لا...
بينة اشخاص اعتادو على مرورة الحياة ونسو طعم الحلو اكتفوا بالمرورة التگطع الزردوم...
لبوة من ذولة الفئة ماصار وياهة شي زين من طفولتها والى هذا يومها الحياة اخذت منها هواي اشياء حلوة وبقى بس اثرهن.
اليوم هي بامس الحاجة لهذا الاثر...
الحزن بعيونها معروف سببة وخصوصآ بمثل هذا الوقت محتاجة اهلها ميزت الغصة البداخلها محتاجة تبوح عنها...
اخذتها وانطلقت للنجف الاشرف حيث هناك كل عزيز ومحب موجود فيها...
احسها مثل الغيمة البيضة آلَمًغُيَمًةّ بهدوها حزن مخفي...
دخلنة مدينة السلام متشابكين الايادي شعور لا توصفة الكلمات...
وكفنة كبال القبة منضرها يبعث سكينة بالنفوس.
تبادلنة النضرات عيونها مرقرقة بالدموع تركت ايدها
ودخلت للضريح...
دعوة وحدة صادقة كانت نابعة من عمق قلبي ان ينزاح كل هما واشوف ابتسامتها ماتفارگ وجهة
والسعادة تلمع بعيونهة...
بعد توديع الاماني واداء الصلوات وقراءة دعاء الزيارة كان الملتقى...
اول ايام شعبان المباركة شارك عدد كبير من المحبين والمولاين لاهل البيت عليهم السلام بهذا الشهر الفضيل.
المكان زحمة كلش رحت اجيب اكل واشتري كم شغلة عجبتني رفضت تروح وياي بقيتها بمكان
ومشيت.
شوية تاخرت بسبب الازدحام رجعت الها لگيتها ماكو دورت المكان مالها اثر تغلغل الخوف داخلي رغم هي مو صغيرة.
صرت ادور بين الناس كل ما اشوف مجموعة نسوان اركز بوجوهن عسى ولعل تكون بينهن...
اختفت غصن الريحان احس روحي شاغت صرت مثل المجنون ادور عليها مثل اب مضيع طفلتة.
تمر بالي اخر نضرة درت وجهي عليها تعدل بعبايتها كل شوية وگعت منها...
وين الگاها بوسط هاي الزحمة خاف صار بيها شي حتى حيلي باد واني افتر توجهت لامير المؤمنين
وطلبت يدليني بيها...
صرت اطب منا واطلع منا شفت مجموعه من الناس ملتمة احس گلبي طار ركضت واني ادفع بيهم.
شفت رياحنتي بحضن مرة جبيرة بالعمر تمسح على خدها حيلي باد كعدت بالگاع يمها واخذت راسها من الحجية وخليتها بحضني وامسح بوجهة وكلني ارجف...
الناس ملتمة وتباوع عليها صحت بيهم واتفرقو بقت بس الحجية يمها ايدي ترجف شصار وياها كلة من وراي شلون اعوفها وحدها...
رشت الحجية عليها ماي فزت من برودتة فتحت عيونها ودموعها نزلت ضمت راسها بحضني وكامت تنشغ...
: كافي يروحي مصار شي لاتبجين
لبوة: -عبالي راح تعوفني وترجع وابقى وحدي من جديد.
حيدر: مسحت دموعها وقبلتها بگصتها: اني اعوفج اعوف روحي وما عوفج صدك تحجين حيلي راح من ما لگيتج...
لبوة: -شفت الحجية ورحت وراها وبعدين دخت الناس دوختني.
حيدر: -درت وجهي اشوف المرة الجانت كاعدة يمي ما لگيتها شبسرعة راحت: جانت مرة جبيرة مخليتج بحضنهة جانت يمج قبل شويه بس هسة راحت.
لبوة: -جنت ادور عليها بس ضاعت مني.
حيدر: -تعاي اشيلج واخذج لمستشفى صيدلية يقيسون ضغطج واسويلج فحوصات.
لبوة: - مابية شي بس دخلت هسة اني امشي.
حيدر: -تگدرين.؟
لبوة: -ايي.
حيدر: -كمت وكومتها مشينة سوة واني ساندها: تعاي اصعدج بعربانة.
لبوة: -ما ريد اني امشي مابية شي
حيدر: -اخذتها لمطعم معروف بنضافتة وترتيبة طلبت اكل وهي صافنة: بيج شي يوجعج شي،؟
لبوة: -لا بس اريد ازور اهلي.
حيدر: -اكلي بالاول واني اخذج الهم...
اكلها يكول طفلة شوية شوية: ماتاكلين اكل بدالج شلون بلة...
لبوة: -مو جاي اكل
حيدر: -اكل العصافير شني اكول ما تسمنين جنج عود اكلي جا اني المن طالبة.
لبوة: -من اطلع مااحب اكل ولا تكول جني عود ترة اني مو ضعيفة...
حيدر: -انتي شاطرة بس بالعرك دكلي نسوان تالي وكت.
خزرتني وبقت تنتف بالاكل كملت وانطلقت بيها للمقبرة.
لبوة: -انت روح لابوك واني اروح لاهلي
حيدر: -لا ماعوفج وحدج خاف يصير بيج شي.
لبوة: -براحتك
حيدر: -نزلنة واشتريت مي ورد وبخور اباوعلها تمشي وتتعثر مخلية ايدها حاجبة الشمس عن وجهة ودموعها تنزل بغزارة...
باوعت شفت قبر ابوها واضح وهي تفتر ماتشوف شي من كثر الدموع لزمت ايدها وعبرت ايدي ورة ضهرها واخذتها امشي بيها لقبر ابوها...
اول ماشافتة نشغت نشغة فطرت گلبي ذبت روحها
علي القبر وصارت تبجي باستهتار صوت شهكاتها ينسمع على بعد عفتها براحتها خلي تفرغ البداخلها
وتطلع وجعها صرت على صفحة وعيوني عليها...
شكد اباء متروسة بيهم دار العجزة ومحد مهتم الهم رغم عدهم ابناء كثير بس المشكلة ماعدهم وفاء.
انانين يفكرون بس بانفسهم عكس لبوة...
من هي طفلة تحجي وي نفسهة تعاتب وتخاطب ابوها جنت استغرب اكول بيها شي اضل اباوع ماكو احد صار عندي فضول ويامن تحجي جانت كل يوم تحجي عنة وعيونها ينملن دموع ولهذا كبرها متاكد بكل خطوة تذكرة...
سنين من ميت واليشوف منضرها يكول البارحة مات...
مسحت دموعها وعدلت گعدتها وهي تخاطبة وخربت ابتسامتها الدموع...
لبوة: -تدري راح اتزوج شوف انخطبت وانت ماكو وحتى اخوانك مااجو حتى امك هم مااجت.
تمنيت انته موجود جا ماصار هذا حالي ولا اريد واحد اكتفي بيك...
بس انت جنت تحس مو انت جنت وياي هنا بكلبي
كل الوقت انتم وياي...
تدري على اليوم مااجيت وحدي هو اجة وياي ماعافني عبالي عافني وبعد ما الكاه بس هو دورني ماعافني نفسك...
تدري لو ما الدرب بعيد تلكاني كل يوم يمك لا والله بكل وقت اجيك وكولشي احجيلك بس دربك بعيد واني اخاف ومااندل...
حتى لو ما اجيك مو تزعل مني انت بكلبي وي النفس ابد ماانساك...
حيدر: -انهارت من البجي ساعة تحجي وي قبر ابوها وساعة تدير لقبر امها تحجي وياها الله اكبر منظر يخلي الماعندة احساس يبجي على حالها...
رحت شلعتها شلع وهي منهارة احسها ثارت مثل البركان جانت بداخلها حمم نارية...
ضميتها لصدري وحضنتها قوي وهي مستمرة تبجي
غسلت وجهة صاير قطعة حمرة وشربتها مي واخذتها بعيد وهي كل شوية ترجع دير وجهة الهم...
علي هذا وضعها ومحبتها لاهلة لو انطي عمري في سبيل يرجعون جا ماقصرت انطيتة بكل بساطة...
بس بعد هذا الواقع اليروح ما يرجع وكلنة يجي يوم ونروح بس تبقة مرارة الفراگ بقلوب المحبين...
اخذتها وانطلقت للبصرة لان حيل تعبت خليتها ورة
مددتها ورجعت اسواق حتى وهي نايمة تنشغ...
هاي البت شگد تعبت بحياتة شوكت ترتاح...
ورة ساعه تقريباً فزت فركت عيونها وحجت بنعاس
لبوة: -صدوك لگيت الحجية.؟
حيدر: -يا حجية هاي،!؟
لبوة: -انت مو كلت لكيتج بحضن الحجية،؟
حيدر: -اي صح.
لبوة: -من كعدت ليش ما شفتها.؟!؟
حيدر: -بعد اني التهيت وياج من كلتي عليها لگيتها ماشية...
ليش انتي تعرفينها،؟
لبوة: -مرة رحت وحدي للنجف وهي جانت هم وحدها ومشيت وياهة لان كولشي مااندل وصلتني للمقبرة ومشت واليوم هم شفتها تمشي وحدها ورحت عليها بس ما لكيتها ضاعت بالزحمة...
حيدر: -رجعت نامت وصلت لگيتها بعدها نايمة بتعب ماحبيت اكعدها شلتها ودكيت الجرس فتحت الباب خالتها دخلتها جوة وصيتها عليها ومشيت...
:
لبوة...
خلال هل كم يوم تغيرت 180درجة نفستي رتاحت الهم كلة نزال من صدري احس نفسي خفيفة بخفة الريشة...
جانت كتلة من الهم والقلق داخلي ومثل ما كال دكتور محمد لازم نغرغ البداخلنة حتى نرتاح...
جنت حايرة بموضوع زواجي هل هو قرار صح
ام لا،؟
جنت منتضرة اشارة وحدة تثبت قراري الحمدلله اجت اكثر من اشارة خلتني استمسك بحيدر وبقوة.
شفت خوفة واهتمامة بية خلاني هالشي مستمسكة بية...
كاعدين اني ورضاوي نتابع سبونج بوب وميتة ضحك على سخافة بسيط وسبونج...
سمعت الباب يندگ محد بالبيت بس اني ورضا الكل عدة دوام رحت افتحة طلعت خالتي ام حيدر وام علاء سلمت عليهن ودخلن جوة جبتلهن مي.
أم علاء: -اي هيج لبلابة نريدج كون تضحكين
لبوة: -هههههههه ادللي اني ما اضحك
بسمة: -الوجة المبتسم لايگلج
لبوة: تسلمين خالة من ذوقج
أم علاء: -شني شو ما مبدلة
لبوة: -ليش شكو.؟
بسمة: -غير تشترين جهاز.
لبوة: ليش اليوم اشو محد كالي.؟!
بسمة: -جا ماضل وكت وانتي بعدج كلشي مامسوية هم يلة نلحگ.
لبوة: -اني ماعندي شي عندي جهاز ليزر مسوية وجهي وجسمي وشعري ما العب بية والتنضيف البشرة اني بالبيت اسوي.
أم علاء: -خاب شني انتي حتى مابيج خسارة مثل ذني تعال انفخلي البراطم وسويلي ماتو والشعر عشر اشكال...
هاي ابن خوي مرتة ماخلت عليهم وهي على حورها وجهة جنة تنكة زفت...
لبوة: -هههههههههه هاي زوم مو مرة
أم علاء: -فدوه الحلگج جا ما تدرين شجبتلج.
لبوة: -مدت ايدهة بجيبها وطلعت علبة صغيرة كولش بيها شي اسود وياه مثل الخشبة...
أم علاء: -هاي كحيلة كحلي بيها عويناتج هذا دوة للعيون مو نفس هاي العوادين العدجن مابيها فايدة وهذا ديرم افركي بية ويطي لون...
لبوة: -شكراً والله كولش عجبني اجربة يصير اخلي من عندة.؟
أم علاء: -جا انه المن جبتة غير الج.
لبوة: -خليت من الكحل لعيوني واخذت شوية من الخشبة فركت شفتي كامت تحرگني بس صار لونها يجنن انصبغت برتقالي طوخ خليت شوية مرطب صار فد شي...
شوية واجت خالتي رحت بدلت لبست فستان عنبي وشيلة لون فاتح كولش واكيد البوت والجنطة مثل الون...
بسمة: -يمة لبوة خاف واحد يذبلة حجاية وهذا حيدر يفلكنة.
لبوة: -والله خالة مامخلية مكياج بس الاخذتهن من ام علاء.
ام علاء: -شني بتنة حليوة تريدينها تصخم وجهة.
بصخام دمشن راح المحلات تعزل.
لبوة: -رحنة للمول بس ماعجبني الملابس مبالغ بيها الونهن وتصاميمهن وحتى السعر اني مايعجبني هيج لبس احبة بسيط ومرتب بدون هل هوسة.
أم علاء: -ها شني يلبلابة ماتشترين من الاصفر من الاحمر.
بسمة: -يمة هذا يلوكلج وهم تلبسينة بالصباحية
لبوة: - جان قفطان لونة كريمي بس مرتب وما مبالغ بية صح ما يعجبني هيج لبس بس استحيت اردة اشترتة الي.
وام علاء على ملابس النوم تدور واني بس فاكة حلگي عليها جابت قميص ازرگ غامق ومدري منين يلبس.
أم علاء: -شوفي لبلابة هذا حويدر يتسودن من تلبسينة اخذة الج.
لبوة: -شنو هذا لا ما اريدة رجعية.
أم علاء: -خاب اسكتي ماتعرفين هذا يمة اشتريناة.
لبوة: -لحظة لحظه شلون شتريتية واني مااريدة
أم علاء: باجر تتشكريني علية بعدج ماتعرفين
لبوة: -اذا عجباج بالعافيه عليج واذا هاي اخذية لزينة هديه مني.
أم علاء: ؛ شفتيني بعد انه ما لبس هو وينة شايفتة وزوينة المكرودة تجي يمي تنام من ورة عليوي المفلوك يركض وراها الفرخ نازل على ساعه يطيح
وهذا مجلب الهة مو انوب تلبسلة...
هلبت ابوة يتعلم منة...
لبوة: -عمتي ذوقها كولش راقي تجيب فساتين طلعة نازكة وتراويني وام علاء شكو قميص مفضوح تشترية بدون ماتگلي تشتري وتخلي بالعلاگة...
أم علاء: -بعد حويدر شيريد اشتريتله كل الالوان مااخلي بنفسة الاحمر والاصفر والابيض والاسود سويتلة قوسي قزح...
بسمة: -ها لبوة اشو ما اشتريتي شي هاي گدامج
شيعجبج نزلي.
لبوة: -تسلمين خالة اصلا اني عندي كومة ملابس
وذني مدري شلونهن مايعجبني ذوقي صعب...
بسمة: -تعاي اخذج لغير مول
لبوة: -سالفة المولات ماتعجبني لا اكو ذوقي ولا قياسي تعاي نشوف المحلات العلى الشارع.
أم علاء: -والله انتي ماتعرفين الذوق هذا الملمع شكثرة وانتي بيضة تصيرين تلالين ملالة.
لبوة: -الناس اذواق ولو تشابهة الاذواق لبارت السلع
بسمة: -يلة مشنة نشوف المحلات
لبوة: -رحنة للمحلات بيهن اشكال فساتين دشاديش بس المشكله ماكو قياسي كل ما يعجبني شي ماكو على كدي حيل ضجت...
بسمة: ؛ جا ماتشترين كدري شوفي عليج
لبوة: -ذني عجبني بس مو قياسي
أم علاء: -دشتري واخذهن الج للخياطة تفصلهن من جديد ههههه.
لبوة: -ليش خالة تضحكين شسوي هذا ذوقي
بسمة: -حضج مصخم يمة
أم علاء: -جا انة ما اضحك عليج احجي صگد
الخياطة تكصة من جوة وتاخذ منة منا خمس اصابع ومنا خمس اصابع ويصير عليج فيت.
بسمة: -شجاج خية مو وكتج
لبوة: -كولش ضجت وطلعت من المحل بكبرة دخلت بمجمع ثاني باوعت بية وطلعت الدمعة بطرف عيني كولشي ما شتريت بس هنا الاختارنة الي...
بسمة: -دتعاي نشرب عصير وبعدين ندور واذا ما لكينة العصر ياخذج حيدر.
لبوة: -راحن شربن عصير واني اشتريت بطل مي.
أم علاء: -خاب شمالج هاج اشربي عصير بردي كلبج
لبوة: -بالعافيه المي يقوم بالواجب...
أم علاء: -جا اني مو كلت هاي البت ماتخسر
بسمة: -هسة نمشي نشتري مكياج وعطور وهاي السوالف وبعدين نشتري ملابس...
لبوة: -تمام
رحنة اشتريت غسولات ومعطرات وميكب وهاي السوالف بس عطر ماشتريت لازم اوصي علية...
شفنة غير محلات عجبني تراكات مابيهن هواي رسم حيل مرتبات وشتريت دشاديش مال بيت صح حلوات بس ماينطلع بيهن بالبيت فضطريت اشتري قماش واخيطة على قياسي وذوقي هذا افضل حل.
الفساتين مال العرايس كلها تور ولمع لو شيصير مااشتريهن كل محل اشتري منة قطعة واطلع.
أم علاء: -خاب شني طاحت رجليلة بعد مااكدر عوفن يمي الغراض وروحن اشترن اني هذا حدي وياجن.
لبوة: -كعدت أم علاء بالمحل كدام المبردة عفنة الغراض يمها ومشينة...
بسمة: -جا و الذهب شوكت نشترية.
لبوة: -خالة المشكله اني مااحب البس ذهب ولا يعجبني اشتري خلي حيدر يشتري على ذوقة بس شي مرتب وناعم...
بسمة: -والله يمة المثلج تصيح نزلي من هذا واريد اثكل شي...
لبوة: -هذا ذوقي بعد ماكدر اغيرة...
اكتمل الجهاز بس اكيد ملابسي وغراضي العندي بالبيت احلا لان هادئات...
خالتي كل شوية ونزلت شي
واني اكلها خلص كافي شسوي بيهن...
بسمة: -مو احسهن شوية،؟
لبوة: -لا خالة ذني كولش كافي واكيد اشتري ما ابقة عليهن.
بسمة: -براحتج بعد
لبوة: -رجعنة لام علاء لگيناها تغفي على التبريد
بسمة: -يلا خية كومي كملنة
أم علاء: -خوش من كملتن اهم شي لبلابة ما زعلانة
لبوة: -لا كلبي على شنو ازعل الملابس تروح وتجي قابل نضل على شكل واحد.
أم علاء: -خاب كون النساوين كلهن عدهن مثل عقلج جا هسة الدنيا بخير بس هنة وين حطلي قطلي وياريت ازلامهن عدهم فلوس...
بسمة: -جا لبوة وذني جنتي عاقلة وفاهمة
أم علاء: -بعد لبلابة هاي
بسمة: -يلا كومن خاربني حيدر يكول براس الشارع...
لبوة: -شلت الغراض وياهن وام علاء ماخذة الحصة الاكبر مخليتهن فوگ راسها وصلنة للشارع لكينة طابگ سيارتة سلمت علية وهو يخزر بيه فتحت
الباب وحطيت غراضي اريد اصعد لزمتني ام علاء من ايدي وصعدت بمكاني.
أم علاء: -عبن انه ماارتاح ليجدام احس الوادم كلها تعاين علية...
لبوة: -خالتي كعدت بصف أم علاء واني بقيت مفهية عليهن...
حيدر: -ما تصعدين.
لبوة: -ها يلة.
صعدت بالصدر وهو كل شوية يتنهد ويهز براسة ضايج مدري شبية...
حيدر: -اشو الغراض شوية
بسمة: -والله يمة دخلت بس ذني وبالكوة اشترتهن
أم علاء: -ماكو على گد لبلابتك هدوم خمينة المحلات كلها كلهن طوال وكبار عليها بس ذولة المطاية شبيهم مسوين كل واحد شكبرة وشكدة مايكولون اكو بنيات صغار...
بسمة: بعد هي حيل ناعمة حجمها خاص...
لبوة: -ماصار شي عندي هواي ملابس وكلهن جديدات
حيدر: سهلة اني اجيبلج
لبوة: -ما يحتاج لا تعب نفسك
حيدر: -افا جم لبلابة عندي
أم علاء: -ها خير اشو بكت اسمي عبن محد يكلها لبلابة بس انه شوفلك اسم ثاني هذا عوفة.
حيدر: -يصير خير خالة يصير خير
أم علاء: -جا شمالك يصير عدك خير بعد لبلابة وعدك
لبوة: -دار وجهة علية عض شفتة وهز براسة.
: بيك شي،؟!
حيدر: -بس الحكلة بعد لو مطوختها هي والحمرة مو احلى تصيرين...
لبوة: مامخلية حمرة وهذا مو كحل هذا دوة للعين مو خالة.
أم علاء: -السالفة الما تعرفها اطلع منها هاي موش حمرة هذا ديرم اني جبتها الها هي والكحلة اصلية بيها فواعد للعين...
حيدر: -جا مخليتيهن الج المن جايبتهن الها.
أم علاء: -هسة انتة شرايد.؟
حيدر: ما رايد شي يابة بس كحلن براحتجن شعندي قابل...
لبوة: -إن شاء الله.
خزرني بحزرة كتالة بس اني ما هتميت بقيت اضحك عباله يخوفني ما يدري بيه اذا طگن عندي اكبر راس اخوفة...
بسمة: -والله خية ام علاء مشكورة تعبتج وياي تدرين بية ماعرف واخواتي ما يقصرن بس السنتهن ما يكضنها شوية.
أم علاء: -اذا ما امشي وي لبلابة جا ويامن وي سعدية ام الملاليج.
لبوة: -كلت بكلبي خل حيدر يشكرج خوش فدتية.
وصلنة نزلت ام علاء وخالتي بسمة نزلن الغراض وسلمن على خالتي رحت اخذت بطل مي لحيدر دكيت الجامة فتحها ورافع حاجبة محد عاجبة...
حيدر: -تعاي اصعدي
لبوة: -ترة اريد امشي بس انطيك المي وامك هسة تجي...
حيدر: -اني شكلت.؟
لبوة: -شكلت.؟
حيدر: -لا اله الا الله اصعدي
لبوة: -من تطلب مني شي كولة بالطف طريقة عندك تمام...
صعدت وطبگ الباب لزم ايدي قوي وصار بوجهي
يباوع لعيونة وشفتي: شبيك.؟
بقة يمرر اصبعة على شفتي وهو يضغط عليها رجعت راسي ليورة انصدم بالباب وهذا عايف مكانة كله وجاعصني جعص...
حيدر: -شبيج راح تموتين بس اريد اتاكد انتي ما مخلية حمرة...
لبوة: -كال الكلمة وبدون سابق انذار اخذ شفايفي يكول ذبو عليه تيزاب ادية بقت ترعش بقيت ادفع بية من صدرة خنگني الهوى انگطع دموعي نزلن
ابتعد عني وهو مبتسم ابتسامة جانبية...
حيدر: -هاي حتى كل ما تريدين تخلين حمرة تذكريني.
لبوة: -عود يريد يخوفني من هسه لو يمشي كلمتة علية لزمت بطل المي فتحتة ورشيتة علية هو طفر ما متوقع مني هالشي...
: هاي حتى ثاني مرة ما تبوسيني بدون ما تاخذ موافقتي جرب وشوف تبوسني ثاني مرة بدون ما تكلي وشوف شسوي بيك...
حيدر: -الله تخيلت إن شاء اللهُ اجربها بغير مكان وطعم الحمرة يخبل عجبني خلي بعد منه.
لبوة: جنت مخلية مرطب بالفرولة رديت بعصبية.
: مو بكيفك هي هيتة كلمن الة هاي مو حمرة هذا مرطب بس بسيطة الا اخلي حمرة طوخ ومكياج واشوفك شلون تلمسني.
فتحت الباب واخذت البطل بية نص شمرت المي كلة علية نگعتة تنگع وهو قص بالضحك...
نزل من السيارة وكف بالشمس يتنشف...
حيدر: -وعلي خبلة مو عاقلة.
لبوة: -سويتلة بوجهي حركة اعيب علية عود هاي اني العاقلة شبية تخبلت دخلت جوة وراها بدقايق وراحو...
رحت سبحت اتصلت بية زينة كولش مشتاقتلها خطية حملها صعب الحركة مو زينة عليها...
: يا هلا ومية هلا بالضلعة
زينة: -هلا بيج بلوتي مشتاقتلج ومشتاقة لطنكوراتج
لبوة: - شكراً جزيلا لحضرت جنابج المحترم
زينة: -شگد شفت عديمين الوفاء بس مثلج ماشفت
لبوة: -شلون.؟
زينة: -يعني اني شگد اجيج وانتي ابد ولا مرة اجيتيني ولا دكولين حامل ماتكدر خل اروح اشوفها
لبوة: -بهاي حقج تعذرين ابد ماكاعدة وتعرفين هوسة العرس شلونها...
زينة: -اي صدوك عمتي اجت تحجي بيج
لبوة: -اي والله خطية تعبتها وياي
زينة: -مدري شنو هل السر المخليها تحبج هلگد
لبوة: -لا تطگيني بعين ترة هي عمتج حبابة وتحب الكل...
زينة: -هم صح اي بلة شجبتي.
لبوة: -رحت طلعت الغراض الجبتهن وبقيت ارواي بيها...
زينة: -مو جنهن قليلات...
لبوة: هو هذا الگيتة وجبت قطع اخذتهن خالتي للخياطة لج ماكو قياسي والباقي يلعب النفس.
علي العموم عندي هواي لبس...
زينة: -وبدلات وصالون حجزتي لا.؟
لبوة: لا باجر احجز بس بدلة بيضة وصالون مااحجز
لو شيصير.
زينة: -يا ولج شلون هسة الخطبة ودبرناها بس هذا عرس زفة تفتهمين شنو زفة
لبوة: -رحمه لجدج لا تلعبين نفسي سالفة الزفة تثير ازعاجي.
زينة: -وتالي وياج شلون يلة بله انطيني حل
لبوة: زينة مو بيدي انتي ماتفهمين علية محد يفتهمني لج اني اتخيل مكان بكد الغرفه بية شكد نسوان وكل ثنين يسولفن سوة...
والحمرة تخليلي من عدها مخلية منها للكل والمسكارة وباودر يعععع مو بيدي تلعب نفسي...
وشمدريني هي نضيفة اني ما متاكدة من نضافتها عدل شلون اخليهة راح تلزم وجهي واني ماعرفها...
وفوگاها سرة وعلى ما اخلص يسحلوني للمستشفى
افففففف هاي السالفة ماتصرفلي ابد...
زينة: -وشلون تعرفين ماكيرة وحدة تمكيج
لبوة: -لا منين انتي تعرفين
زينة: ماادري اسال هند مرت حماي عدهة صديقاتها
اسئلها الج بلكي تعرف وحدة تجيج بالبيت.
لبوة: -بس كون تعرف ترة اذا مايعجبني المكياج مااطلع الهم ابقى على گعدتي
زينة: -هههههههه تسوينها عندج عادي
لبوة: عليج الله اساليها كون تعرف شتريد انطيها وكون نضيفة مو وصخة واديها سود وريحتها طالعة
زبنة: -شلون تهيجني وتخليني استفرغ ع موبايل
لبوة: -اي شسوي لعد مو بيدي
زينة: -وحنة ماتسوين.؟
لبوة: -اذا اسوي حنة راح تجي اقاربهم كلهم نفس الخطبة وذني مدري شبيهن ماارتاحيتلهن خوب شفتيهن بعينج انتي...
زينة: -اي والله مدري شبيهن مضغوطات هسة تلكينهن ميتات علية بس هو ما منطيهن عين...
لبوة: -مدخلني بيهن بس اذا وحدة حاجتني شوفي شسوي بيها ماناقصتهن اني خاب اني زلمة افرة فر مو ذني جنهن ساحرات...
زينة: -ولج عيب شيكولون عليج وانتي بعدج عروس
لبوة: العيب بالجيب ولا اعترف اليرشني بمي ارشة بنار
زينة: -يمة من يمج ويكولون لبوة فقيرة وحبابة.
لبوة: -الماعندة شي وياي احطة على راسي واليحط راسة براسي إلى وياة تصرف ثاني.
.
زينة: -تجاهليهن فترة العرس فقط وبعدين اكبسيهن هههههه خرب يومج لبوة واللة عندج سوالف.
لبوة: -هههههه خوش سوالف عندي لو تشوفين شسويت بحيدر...
زينة: -شسويتي ولج،؟..
لبوة: -لا ماكول تفضحيني بطلت مااكول.
زينة: ؛ لا ولج ماكول فدوة احجي حبابة احجي مبينة جافصة بمصارينة...
لبوة: -لا بس نگعتة مي.
زينة: -يا صدوك تحجين.
لبوة: -خيولي عوفينة من عندة وكولي شتسمين البيبي
زينة: -بعدني وين بس خلية يثبت والله كريم
لبوة: -ماعلية شي لاتخافين هسة يطلع فد وكح ويطفر من الحياطين
زينة: خالتة لبوة بعد عليمن يطلع
لبوة: -وين شفتيني اطفر الحيطان اني شغلتي اتسلق شجر اي بس مو حيطان...
زينة-: هههه اي خية يمتها تحجزين بدلة لو اجييبلج ثوب عمتي تلبسينه بالزفة.
لبوة: -اشو صارت خية مو قبل دادة.
زينه: اي مو بعد تزوجت وراح اصير ام احس كبرت وهنا ماعدنة دادة كلة خية تعود الساني
لبوة: -اهاا صدوك اليوم اروح اجيب غراضي من بيتي وباجر تجي خالتي نروح اني وياها وحدة من البنات نحجز...
زينه: -شايفة الخير قلبي
لبوة: -تسلم ضلعي...
بقينة شوية اني وزينة نحجي دزيت لحيدر مسج كتلة العصر اروح لبيتي اجيب غراضي ورحت لفيت راسي ونمت...
كعدت على المنبة رحت بدلت باوعت لوجهي بالمراية اشو الا اوفي بكلمتي واحط مكياج خليت شوية
وروج بتدريجة العنابي حلوة هيج الالوان...
رمش عليه كتلت لخالتي والبنات طلعت كام يباوعلي مقلص عيونة صعدت وحرك السياره.
حيدر: -شهل كشخة يابة
لبوة: -من زمان اني كشاخة مو اليوم
حيدر: -موقصدي على البس بس شلاعبة بوجهج
لبوة: -وجهي شلاعبة بية،!
حيدر: -اشو اسالج وترجعين تعيدين علية السؤال.
لبوة: -مو قصة اعيد بس اكول شبية وجهي.
حيدر: -تسوين روحج كلش ماتدرين ولا هاي الحمرة ولا عيونج مدري شمخلية بيهن.
لبوة: اذا تعرف بيها حمرة ليش تسال
حيدر: -ترة اني رجال فقير بس انتي تريدين تسويني منحرف وسالفة امص الحمرة عجبتج...
لبوة: -دحترم نفسك لا اراويك جبار بعظمتة شوف ترة كلامك يستفزني واني كولشييي ولا واحد يستفزني.
حيدر: -والله انتي الاستهتار واصل عندج مرحلة مثل بطل الماي نگعتيني بية بس اني اعلمج عندي دواج.
لبوة: -شو بلة خفت احب اكولك اني لبوة ماكلة كتل يابو كتل واخ مااكول وبالنسبة للدوة شغلتي هاي
حيدر: دسكت حبيبي جبار وين الانوثة مطيرتها ماادري
لبوة: جنت محتاجة فلوس وشفت وحدة جنها جبار عرضتها عليها بسعر عالي وبعتها عليها...
حيدر: -دخيلك يا على بس لا بايعة بعد شغلات
لبوة: -اي بعت الاحساس والمشاعر طلعت مصرفي مال سنة بيهن وبعد ماحتاجيت الحمدلله صار راتب بيدي...
حيدر: -هههههههههههه ابوسة للراتب لو ماهو كلشي ماخليتي عود انتي مقتنعة بروحج بعد يومين يزفونج الي...
لبوة: -عود انت مقتنع بروحك بعد يومين اصير مرتك
حيدر: -لا مامقتنع اكول خاف اني بحلم
لبوة: -هنيالك لو صدوك حلم بس المشكلة واقع
حيدر: -الواقع الصارلي سنين احلم بية
لبوة: شقصدك من سنين يعني جنت حاط عينك علية من جنت صغيرة.؟..
حيدر: -لا يابة بس من كبرت صارت صورتج تجي بالي اتخيل شكلج وانتي جبيرة ملامحج عيونج عصبيتج
لبوة: -وطلعت مثل مامتخيلني،؟
حيدر: -واحلى بعد واكثر عصبية من صغرج
لبوة: صدوك اني عصبية.؟
ااشو ماشوف نفسي هيج بالعكس احس نفسي هادئة.
حيدر: -شوفي انتي اكثر وكتج هادئة بس من تحجين لو واحد يسمعج كلمة تصيرين عصبية
لبوة: -خوش لعد لا تضوجني واني ما اعصب عليك
وفضت السالفة...
حيدر: بكيفي هذا الشي راجعلي بعد.
لبوة: وصلنة لبيتي احس كلبي فز من مكانة تحركت المشاعر بداخلي والحنين الة دمعت عيوني ونزلت
صرت مقابيلة كمية حزن تحركت بداخلي تجاهة...
لزمت المفتاح بيدي الترجف انفتح الباب واجت بخشمي ريحتة المميزة الماموجودة باي بيت...
باوعت باركانة احسة ينعيني مابية معنى للحياة عبارة عن جدران ملونة ماجان هيج جنت احس بية روح...
هدوء قاتل دليل على عتاب ملاذي الي.
نزلت دموعي واني اباوع بانحائة...
هذا ملاذي، صديقي، بيتي شهد كل حالاتي وانكساري
فتحت باب الصالة وشهگاتي طفرن ريحتة الدافية تلامست وي روحي عشت بية سنين هذا الكنز التركة على إلى لولاة جنت هسة بقوقعة...
خليت ايدي على عيوني امنع سقوطهن.
الترتيب النظافة العطر كولة على وضعة كانها يئدن الوفاء تجاهي كولشي مامتغير كشكل بس فاقد الدفو والحنية الجنت مانحته الة...
لميت كتبي وغراضي اقلام وتحف ومزهريات هواي اشياء مااستغني عنهم خليتهن بكرتونة...
درت وجهي شفت حيدر بعتبة الباب واگف ويباوع بارجاء البيت حجيت بصوت مبحوح...
: هذا ملاذي احتواني سنين طويلة تحملني منحني الامان رغم عشت بية وحدي لاكن جدران هذا البيت ماحسسني بالخوف حمني من هواي اشياء.
صح بسيط وقديم بس يعنيلي هواي.
تدري بقصور الدنيا ما ابدلة...
اخذ من ايدي الكرتونة المخلية بيها غراض خلاها على صفحة وحضني بقوة كانة يريد يدخلني بيه.
مسح خدي بهدوء...
: اني ملاذج من بعد اليوم...
حسيت بالحنية بصوتة شعور بداخلي هدء سمعت صوت يكول: -اليوم لبوة هنا.؟
جفلت من الخوف حسيت رجفة بجسمي سرت ابتعدت عن حيدر بسرعة...