رواية قوارع وادي الألغاز للكاتبة حوراء السعيدي الفصل الخامس والثلاثون
تبارك .
شهگت روحي بألم و وجع مايشبه أي وجع عشته قبل، وجع بَس مدا يأذي جسدي لا يأذي ويگطع بروحي، تعب، أستسلام الكُلشي و اني أسمع الكلماته الليَّ قذفهن بنص وجهي و كل كلمة منه أشبه بسكين مسننة گطعته الگلبي تگطع.
بقت عيوني ثابتة بدون ما ترمش على الصور الليَّ گدامي، عقلي صار ما يستوعب الليَّ گدامي و الليَّ دا أشوفه، نزلت المستواهن أركز بيهن و أتذكر وين بالضبط ماخذينهن ألنا، أول كم صورة عصرت عقلي وذاكرتي عصر يلا گدرت أتذكرهن هذا لبسي بحفلة عيد ميلاد جَوهر؟
و هذا لُبيد چان ويايَّ مِن خلاني أول مرة أسمع الصوت جُمانة أختي چنا واگفين بالشارع، أييي اييي أتذكر هذا اليوم بيوم ما العجوز وگعت سمارا مِن الدرج، و الصور الباقية بيوم ما نقذني مِن خليفة بالشركة وسحبني للغرفة أكو صور ملتقطة ألنا وهوَ يسحبني لداخلهااا و صور وأحنا طالعين نشتري ملابس ألي قبل لا أبدي بمهمتي الليَّ كلفني بيهاا.
شنو يعني أنكشف كلشي؟ خسرت أختي؟ تعبي ضااع؟ خسرت كلشي؟ بعد ما أشوف وصية أمي؟ الفكرة ذبحتني ذبح ما مهتمة الشيء و لا خفت مِن الواگف فوگ راسي و الليَّ مُمكن يرتكب بيَّ جريمة حاليًا بگد ما أنتهيت و اني افكر اختي ضاعت مِن بين أيديَّ.!
وگفت ورجليَّ أثنينهن يتراجفن، رفعت راسي ببطء و كأنما شايلة جبل فوگ رقبتي بصعوبة رافعته، الرجفة الچانت ملازمتني مِن الطول للطول وصوته صار يتردد بأذني و براسي وهوَ يگول غدارة؟ ملعبة؟ مثل أبوچ؟، حچيت مِن أللاوعي واني طابگة حواجبي بأستغراب معقولة عرف لليَّ بين أبوية و خليفة؟ بصعوبة تحركت شفايفي ناطقة الكلام.
-تبارك: أبوية؟
وبلمحة وحدة وسريعة شهگت بفزع ضامة وجهي بأيديَّ مِن رفع أيده وضرب الحااايط بكل غضب و أردف بصوت مخلوط بين الغضب و الحقد يمكن حقد؟ و يمكن خيبة؟
-جَوهر: هذااا الهااااامچ أبوووووچ؟
بقيت مغطية وجهي و خايفة منه أي أعترف خايفة منه اني صرت لعبة بين أيدين الكُل وهالمواجهة هدت حيلي و خلّتني أموت الف موته بهاي الثواني الليَّ مرت عليَّ، نزل سيل الدموع متجدد على خدودي ويچوي بيهن چوي أحسهن بحرارتهن حفرت محجر عيوني، نزلت أيديَّ احچي مفرفحة
-تبارك: ماااا يهمنييي أحد لااااااا أبوية و لاااااا حتى انتَ.
بهتت ملامحه المطعونة طعن و وخلقته المگلوبة و متغيرة جذريًا عن العادة، رمش بهدوء يبلع بريگه و ملامحه معتليتها الصدمة الثواني رجع مترأسهن الغضب و الحقد مِن أفعالي.
-جَوهر: هم الصور مفبركة هههههههه؟ تبارك كوني مرة وحدة صادقة ويايَّ
-لا مو مفبركة
-ياريتها مفبركة.
حچاها بخنگ و أنطاني ظهره يمسح بوجهه منهزم مِن نظراتي، زادت دموعي و اني أشوف نفسي سبب بخيبة أمله وكسر گلبه، ما تمنيت يصير كل هذا ما تمنيت أكون أحد الأسباب الليَّ راح تكفخة بخيبة أمل چبيرة الهاي الدرجة.!
-مستعدة أحچيلك كل الحقيقة
-أحچي أسمعچ.
بقى منطيني ظهره و أحسه يتهرب يحط عينه بعيني، سحبت نفس ضاغطة على أسناني مِن الداخل و اني أتذكر شلون اني الليَّ وگعت بكُلشي وشلون ماشفت أي مساعدة لا مِن لُبيد و لا مِن ماهر هم أول مِن أخذوني و هم أول مِن أستغنوا عني وصفيت وحدي بنص هالساحة.
-بشرط!
هيَّ كلمة وحدة بَس چان الها تأثير الدرجة أستدار بكل جسمه ناحيتي طابگ حواجبه وعيونه ماتبث غير الغضب و أردف بنبرة أستفهام.
-شرط؟
-أي عندي شرط.
-تشرطين؟ هههههههههه بحياتي ما شايف أنسانة عينها صلفة مثلچ
-براحتك معناها خليك فاهم الأمور مثل ما انتَ فاهمها
كمزت بمكاني و گلبي وگع بين رجليَّ مِن عااط بصوت جهوووري ترس أرجاء المكان.
-لااااااااا تخبليني تباااااااارك
-اني مدا أنكر شيء!
-وبيااااا تنكرين؟ كلشي وااااضح.
أرجف أرتباك و خوف منه بَس دا أحاول أجمع قوتي و أواجهه اني غلطت بحق هذا الأنسان بَس والله مو بيدي هم لزموني مِن الأيد الليَّ توجعني ولوو ذراعي بأختي أااخ اني وين و هاي المصايب الليَّ سويتها ويننن ياريت باقية بعذاب أبوية و لاااا العذاب الليَّ دا أعيشه، الغصه شگت لوزه بلعومي بحرارتهاا.
-لا ما واضح شيء انتَ مُجرد تعرف نص الحقيقة ماعندك أي فكرة عن البدايات و لا عن أجباري بهاي المُهمة و أسبابها الكاملة.
ضحك بدون صوت يهز براسه عود كملي كملي وهوَ محترگ حرگ.
-شتفهميني؟ يلاا احچي يلاااا راح أصير عاقل وياچ و أسمع منچ الحقيقة كلهااا
-ما راح تسمع أي حقيقة مني
فتح عيونه على أختلافي بالكلام وياه بَس اني ما أختلفت عليه ردته يسمع باقي كلامي وشرطي.
-تضحكين وتلعبين عليَّ؟
-گتلك عندي شرط أذا تقبله تسمع بي كُلشي مني
-شرط شنوووووووو؟
وهنا أعتلت ملامحه الأستغراب و الصدمة سوا مِن جوابي.
-راح تسمع مني الحقيقة بحال واجهتني اني ولُبيد سوا گدامك و راح تفهم اني ليش سويت كُل هذا و.
قاطعني بصياااح يضرب بالحاااايط فلششه تفلللش بالضرب، أبتعدت بسرعة عنه لان شكله سببلي الرعب الحقيقي ودب داخل گلبي نطويت بنفسي بالزاوية وهوَ يصيح بصوته الليَّ چنت دائمًا أميزه مِن بيّن الالاف الأصوات.
بَس.! هالمرة نبرته چانت غير عن السابق، هالمرة نبرة صوته چانت عبارة عن نار مزروعة بي بسبب أحساسه بالخيانة و الخذلان، أرتجفت روحي قبل جسمي و الهوا ثگل بصدري و أذني تلتقط الكلامه.
-شسويتي؟ دخلتي حيااااااتي و مثلتي عليَّ و خدعتينيييي، لِچ اني صررررررت أشك لقائي الأول وياااااچ مو صددددفة و چنتواااا مخططين الكلشي ضددددي.
هزيت راسي بدموع بَس أريد افهمه لقاءنا الأول چان صدفة و حتى مدا أذكرره و لا أتذكر اني شااايفته، حچيت بصوت يتراجف.
-صدفة
-ماكووووو شيء صدددفة كلشيييي چذب انتِ كلشيييي بيچ چذب و خدااااااع مخاااااادعة و چذااااابة و ملعبة مثللللل ابوچ
-اني أشبه أبوية أستاذ جَوهر؟
أحس بدموعي صارت شلال تشبهين ابوچ أكثر كلمة أكرها و ما أتمنى شخص يگولها الي، تغيرت نظراتي أتجاهه و كأنما حركت أخر شيء طري داخلي و قابلته نظراتي المغضبة ويَّ نظراته الغضبهن راح يحرگناا.
-أي تشبهينه غدارة وخااااينة مثله
-أمممم
قوست شفايفي مبتسمة بنص دموعي وهزيتله براسي.
-تعرفه الأبوية؟
حچى مكشول ملامحه بقرف.
-ياريت ما عرفته و لا عرفت قذارته
-أممم شعرفت؟
تغيرت نظراته مستغرب مِن هدوئي الليَّ صار و عيوني الليَّ ديعاندن كُلشي و مُستمرات يباوعله ودموعي مرة توگف مرة ترجع تنزل.
-كل شغله ويَّ خليفة
-حِلو معناها صات عندك معلومة أبوية لأي فئة ينتمي حاله حال أبوك و خليفة
-بَسسسسس هذا الشيء ما يشفعععععع انتِ خدعتيني ولعبتييييي وياااااااايَّ انتِ و لُبيد
-بَس انتَ تعرف اني مجبورة على كلشي؟
-أعرررررررف علمووووود اختج بَسسسسس ما أعرف حاااااااطة أيدچ بأيد هذااااااا النذل أبن خليفة يااااريته غيررررر وااااحد چان حمل الحقيقة أهوووون
شهگت مِن خطى بخطوات سريعة سحبني مِن ذرااعي بقبضة قاااسية وحطني گدامه.
-جَوهر: احچي شنووووو علاقتج الكاااااملة بخليفة و أبنه يلااااااا تباااااارك احچي.
حچيت مختنگة ودموعي أخذت مسارها و اني أرجع أشوفه يتعامل ويايَّ بسوء وقسوة للمرة الثانية وشخصية جَوهر الليَّ أعرفهاا أختفت گدامي انسان فاقد عقله.
-تبارك: تطبق شرطي! تسمع كُلشي مني
-تباااااااارك
-باقية بينه هالگد و نخسر بعض أنتبه
أشرتله بأصابعي بمسافة قليلة بَس زرف گلبي و هدمه وهوَ يقذف كلماته الجارحه بنص وجهي.
-خسارتچ أهون مِن العيشة وياچ.
شهگت روحي منازعة بهاي كلماته، أبتعدت لوره ونحجبت الرؤيا عندي بسبب دموعي.
-أذا خسارتي أهون بنظرك ليش تزوجتني؟ ليش عاقبتني بعقااااب حرگ روحي ودمرررتني بي؟ يلاااااا جاوب أستاااااذ جَوهر
سكتت و هالسكتة طالت و بَس صوت أنفاسه العالية مسموعه و صدره يعلى وينصى بيهن، حارت عيونه شتجاوبني و أحتارت أكثر شتبصق عليَّ حقد وكره؟ لو وجع و أذية.
-أحبچ.
جمدت وجمدت الدنيا بيَّ و اني أسمع لصوته ولسانه شنطق مِن كلمة؟ ودگات گلبي لخبطت ويَّ مغص معدتي الليَّ صار وزاد عذابي أكثر مِن كمل كلامه.
-جَوهر: أحبچ و أكره نفسي لأن سمحت الگلبي يحب لاول مرة بحياته، أكره ضعفي گدامچ، أكره عقلي و گلبي الليَّ دايخين بيچ، أكره مرض التفكير الليَّ ركبني بسببج
-تبارك: بَس.
-برأيج اني أستاهل الليَّ سويتي ويايَّ؟
-لا
-بشنو غلطت وياچ؟
-ماغلطت.
- چانت وحدة مِن أمنياتي الليَّ أتمناها بكل يوم أرجع ألتقي بيچ بعد ما شفتچ مرة وآنزرعتي بعقلي، بَس هسه ههههههههه أتمنى لو ما متحققه هالأمنية لقاءنا الثاني أذاني
لمعت عيونه بدموع ما وگعت لعد أذيتي شگد قوية على گلبه و وصلته الهاي المرحلة؟
-تبارك: جَوهر اني.
سكتت گاطمة كلامي و أني أنتبه النفسي شنو حچيت گلت جَوهر بدون أي أضافة رسمية و هذا الشيء خلاه حتى هوَ ينتبه ناحيتي تغيرت ملامحه ونظراته الثواني رجع عاگد حاجبه و وجهه ما يگصه السيف، بلعت ريگ أتنفس سريع أمسح بدموعي و ميتة قهررر عليه مو على نفسي.
-جَوهر: أسمعچ
-راح احچي نص الحقيقة الك
-و النص الثاني تدفني؟
-گتلك تواجهني ويَّ لُبيد و تسمع للباقي لأن نص الاسئلة جوابها عنده
-هوَ وينه قندررررررة!
-ما أعرف.
-مو شريكج شلون ما تعرفين وين مدفووون!
حچاها بأستهزاء بلعتهااا ساكتة لآن ماعندي جواب اله بَس مُستحيل احچيله كلشي وحدي أذا مو بوجود لُبيد لأن كاااافي لهنااا.
-ماعندي معلومة عنه لأن مختفي
-ولازم أصدگ هسه؟
سكتت للمرة الثانية لأن فعلًا ماعندي جواب الكلامه، الموقف الليَّ حطني بي لُبيد موقف غبي و عبارة عن أستحقار و أستهزاء صار محاوطني.
-براحتك ما مجبور
-لاااااااا تگولين براااااحتك.
عفته واگف بمكانه و گعدت بالصالة أتراجف لامة رجليَّ الصدري وسن يضرب بسن مِن الرجيف الليَّ مسيطر عليَّ، لمحت عيني رجليه الوگفت بالباب گدامي.
-جَوهر: لا تشردين
رفعت راسي بهدوء و جسمي صار قالب ثلج.
-تبارك: شتريد؟
-احچي كلشي
-ما احچي كلشي أتذكر شنو گتلك
غمض عيونه بنفاذ صبر يستغفر وسحب الطبلة الموجودة حطهاا و گعد گدامي يباوعلي بنظرات ما فاهمتها مرة تحن مرة تقسى.
-شنو قصتج؟ منو انتِ؟
رفعت راسي بالكامل وسؤاله ما أعرف شلعب بحاالي.! عدلت گعدتي وهوَ گدامي ماتزحزح عيونه صافنة بيَّ و ما شنو الليَّ بداخله يمكن كل مشاعره تغيرت وگلبه الچان ميت بيَّ كرهني و مشاعر الحُب تحولت المشاعر كرّه وحقد.
-بالأول سولفلي شلون وصلت الأبوية؟
-منو المذنب اني لو انتِ؟ علمود نعرف منو الليَّ لازم يسأل.
رفعت حواجبي هازه راسي بهدوء بَس روحي ميتة ميتة لدرجة حتى الكلمات القاسية تهشم گلبي تهشم بَس باقية بمظهر ثابت و أنهياري صاير داخلي.
-علمود أعرف شسولفلك
-عنده أعداء بگد الزبل
-ما أعرف بَس عداوته بخليفة
-سولفي تبارك حتى لو الشيء أعرفه أريد أشوف معلوماتي تتطابق ويَّ معلومات كلامچ هيچ و أطلع اني الغلطان.
نزلت عيوني و أسمع الصوت حسراته يجرهن ويَّ النفس يلچمن بگلبي قبل لا يلچمن گلبه، حرت منين احچي وشحچي وشبقي؟ مسحت دموعي بكف أيدي تتراجف رجعت ضميتها بحضني و البرد يصگ بالعظم.
-تبارك: منو اني؟
-جَوهر: تعبتيني احچي
حچاها بنبرة توسل، رفعت أنظاري ناحيته رغم توتري و أرتباكي بَس گدرت أثبت نظراتي بوسط نظراته و أنطق بصعوبة.
-أبوية قيصر عبد الرحمن أحد رجال الأعمال ب ولاية ^^^^^ صديق خليفة شغلهم سوا و أعمالهم سوا كلهاا، چان يمتلك أملاك مثل ما يگولون تغطي عين الشمس بَس تدريجيًا هالأملاك بدأت تنسحب يوم بعد يوم الى أن خسرها بسبب ألعاب الحرام القمار چان يسد دين ويرجع يفتح دين الى أن گعدنا على الحديدة وصرنا بالشوارع بسبب قلة عقله و قلة سيطرته على نفسه ولعب خليفة
-خليفة ورطه بهذا اللعب مو؟
هزيت راسي بدموع و حچيت مختنگة.
-أبوية أعماله كلهااا قذرة تاجر بالأعمال الغير القانونية أيده بأيد خليفة و محد وگع بيها ودفع ثمن هالاعمال الشنيعة غيري اني و أختي
غصيت بدموعي و هوَ صافن بوجهي ما أعرف نظراته إلى هيَّ استعطاف؟ شفقة؟ لو دا يگول تمثل و صعب أصدكهااا، مد أيده يريد يلزمني بَس منع نفسه بأخر لحظة وقبض أيده بقهررر.
-جَوهر: و أختج؟ شوصلچن يم خليفة.
-أخذنا خليفة رهائن يستخدمنا ضد أبوية لأن صارت عليه ديون و هالديون مبالغ ضخمة لدرجة ماگدر يدفعها كلها اله بَس الليَّ سواه النذل خليفة شيء نكسسس نكسس لدرجة أستصعب الكلام عنه
-شسوا؟
بچيت شاهگة أغطي بوجهي وإني اتذكر خليفة و جماعته شنو رادوا يسون ويانا، مارحموا لا صاحية ولا مريضة.
-جَوهر: تبارك.
زاد نوحي وزاد صوووت بُكائي أكثر و أكثر وروحي تلوعت مد أيده يريد ينزل أيديَّ بَس دخلت بحالة هستيرية و روحي شاااغت منظر أختي بذاااك اليوم و گدام عيوووني مدا ايرروووح مِن راسي وعقلي و ذاااكرتي كلهاا.
-شحچي هاااا شحچي؟ شتررريد تسمععع؟ تريد تسمع خليفةً و جمااااعته شلون جردوناااا مِن ملابسنااا ورادوووا يعتدووووون علينااااا جمااااعي لو شتريد تسمععععع؟ أختي ولك اختي گدااااام عيوني رادوا يسلبون منهاااا اغلى ما تملك وهيَّ مريضة قلب وهم حاطينااااااا بغرفة وحدة منووووووو بيكم يتحمللللل هذا الوووووووجع؟
فتح عيونه بصدمة و كل شهگة تطلع مِن صدري تشگه شگ أمسح بوجهي وترجع دمووعي تنزل وتغرگ ملامحي، ضحكت بنصّ دموعي.
-بعد بعد أسمع بعدد ما خلصت مو انتَ تريد تعرف شنو الليَّ وصلني الهاي المرحلة
حچى بصوت خافت ومصدوم مِن كلامي و كأنما مدا يستوعب الليَّ دا احچي غير صرت ألتمس الغضب مِن لون وجهه الليَّ تغير وعگدت حواجبه.
-جَوهر: شصار بعد؟
-ههههههههه صرت أتوسل بيهم و أبوس بأيديهم و رجليهم بَس علمود يعوفون أختي و ما يتقربولهاا، روحي نذبحت تعرف شنو روحك تنذبح على البطيء! الوجع ما ينحملللللل بَس تحملتهههه علمووودهااا.
انتَ فاهم شعور بنات ما ألهن أي سند؟ تعرف شعور بنيه تحيّر تنقذ حياتها لو حياااااة أختهااا المريضة؟ آختهاااا البقت وصية مِن أمهااا؟ انتَ فاااهم شعور وحدة تمشي بنص الظلام وهيَّ تتراجف منه؟ لاااااااا ما رااااح تفهم لأن مااااا عايشة.
تعرف شعور الأسترخاص الليَّ شفناه و أحنا بين أيدين خليفة و أزلامه؟ تعرف شعور كلماته و هوَ يوگف گدامنا و يباوعلناااا بنظرات الأسترخاااص و القذااارة و يگول الأبو يلعبببب ويتووووونس و البناااااات يدفعن الثمن؟ و الثمن ونستهمم وياناااااا
أبتعدت مِن گدامه و اني أتعثر بخطواتي ماكو قوة ماكو حيل خسرتهن والنفس ضاگ بصدري، رفعت شعري وكُلي يرتعش أمسح بوجهي أسيطر على نفسي.
-جَوهر: ليش سكتي؟
-تبارك: مِن تجيب أبن خليفة گدامي أثنينا راح نكملك باقي الحكاية
-شنو غايتج؟
-غايتي واضحة بهذا اللعب، كلشي نجبرت عليه و كل خطوة خطيتها بهاي اللعبة هيَّ چانت مصدر أمان الأختي
حچيت الكلام بسرعة وعيوني نمردت مرد بدموعي الليَّ مابطلت، مهضووومة مِن الكل و لا واحد وگفلي الكل طعني و الكل أتلاعب بيَّ علمود مصالحه، رفع حواجبه مقدم شفته لگدام يحاول يقتنع بكلامي.
-جَوهر: تنقذين حياة أختج على حساب دمار شخص ثاني شنو وين عقلكم أنتوا؟
-بَس أني ما أذيتك
-هههههههههههههههههههه و الچذب الليَّ عيشتيني بي؟
-أي چذبت بَس اني ما گتلك أبادلك مشاعرك و لا حتى گتلك رايدتك انتَ الليَّ ساومتني حالك حال خليفة و خلّيتني أتزوجك لو ناسي هه محد بيكم بريء لا تعيشون الأدوار الله يخليكم، اني دخلت الشركتك بمُهمة لأجل غاية وحدة
-بَسسسس لعبتي عليَّ انتِ وذااااااك المختل عقليًااااااا.
-كلكم مختلين عقليًا ما بيكم واحد صاحي وعقله براسه
-كاااااااافي كااااااافي تعبتينيي رغم كشف حقيقتج لحدددد الآن ما أشووووووفج صريحة ويايَّ
-حچيتلك نص الحقيقة والنص الثاني تعرف شوگت
تقرب مني عصر معصم أيدي بين كف أيده وعيونه التشحن غضب أخترقتني بخزرة شلتني بمكاني.
-ليش تريدين لُبيد؟ ليشششس ماتحچين
-نص الأجوبة عنده
-عليمن تضحكين انتِ؟ وين أكو واحد يشتغل عمياوي.
-اني مو عمياوي للأسف اني أستخدموني مثل اللعبة لمصالحهم
نتر أيدي وصار يفتر بعقل طاير، أباوعله مِن جوا لجوا بدون لا ينتبه صاير شُعلة و كُتلة مِن الغضب، فزيت مِن مكاني مهبوطة مِن دفر الطبلة وصاااح بصوت عااالي.
-جَوهر: حتى لووووووووو مجبورة ما أگدرررررر أتقبل فكرة شغلللللچ ويَّ ذاااااااك النذل شلوووون قبلتييي شلووووون.
سكتت ماعندي طاقة للكلام بعد الأنهيار الليَّ عشته و ما راح احچي شيء ثاني ألا بوجود لُبيد هايهية نكشف كلشي ما يحتاج بعد ينضم شيء و لُبيد لازم يوضح كلشي النا اني تعبت مِن كُل هاي اللعبة صارلي سنة كاملة داخلة بيهاا، سنة كاملة محرومة مِن أختي
-ليششششش ساااااكتة!
-ماعندي كلام
-تبااااااارك
-كافي تصيح مو زين على أوتارك الصوتية و ماكو فائدة و قراري واحد.
شدّ فكه و هز راسه بتوعد، أشرلي نطلع مِن البيت سحبت اغراضي وطلعنا و قبل لا اصعد بالسيارة وگفني سؤاله.
-جَوهر: لُبيد چان عايش وياچ نفس البيت؟
بلعت ريگ بتوتر مِن سؤاله وهزيت براسي.
-تبارك: مو دائمًا چنت أشوفه قليل
-هه يعني عشتوا بيت واحد؟
-أي.
كمزت فازة مِن ضرب السيارة بقبضة قوية لدرجة صدرت صوت ودار صعد بمكانه، فتحت الباب بصعوبة و ما چنت أعرف للأيام السود الليَّ منتظرتني و لا چنت أعرف جَوهر الليَّ أعرفه أختفى وطلع جَوهر ثاني و وجه ثاني.
الطريق كله تفكيري منو دزله الصور؟ منو الليَّ يعرف حقيقة أبوية و خليفة؟ ما مقتنعة بجوابه مِن گال بحثت وراه متأكدة أكو شخص هوَ الليَّ فتح عيون جَوهر علينا اني و لُبيد و هذا الشخص مِن الشركة لأن الصور ماخوذة النا بنص الشركة بَس منو؟
مديت أيدي لعيوني يأذني مثل المورمات حتى ما اگدر ألزمهن يأذني، باوعتله بطرف عيني عيونه بالطريق وصافن بوجه خاوي و التعب باين بملامحه.
وصلنا للبيت نزلت گدامه و هوَ شخط السيارة ما نزل ويايَّ و لا حتى گال وين رايح، فتحلي واحد مِن الحماية الباب ودخلت جوا للبيت وگفت بطريقي مِن شفت سيلين گاعدة بالحديقة وصافنة بالسماء و بأيدها كوب صافنة وطامسة بأفكارها
كملت طريقي ما ردتها تشوف حالتي وتعب عيوني دخلت للبيت بوجهي الغرفتي صعدت لأن الوقت تقريبًا چان متأخر ب11: 00 بالليل آول مادخلت لمحت على حيدر نايم بمكانه مثل العادة ما ينام ألا يمي.
شمرت أغراضي ودخلت للحمام غسلت وطلعت گعدت بصفه بوسته و العب بشعره الكيرلي، شلون بگلبي اذا أجه اليوم الليَّ يجبرني أترك هذا البيت و أتركك يا على حيدر
نزلت دموعي متجددة تمددت بصفه وضميته الحضني وصدري حاضنته أشم بشعره وعطره الطيب، أيديه الناعمات محاوطاتني بترافه مثل روحه الترفه، وتفكير واحد أجه بعقلي أذا نكشف كلشي ليش يكمل بهذا الزواج؟
غمضت عيوني وسرحت بأفكاري لكلامه بذاك البيت قشعر كل جسمي و أني أستذكر كلمة أحبچ بسرعة فتحت عيوني طاردة الأفكار كلهاا هاي مِن عقلي، تبارك لا تنجرفين أياچ، انتِ بَس تحصلين أختج وترجعيهاا راح تتركين هذا البلد كله وكلشي بي.
ضميت وجهي بشعر على حيدر شاهگة بدموعي شلون حعوفهم شلون حَ أفك تعلقي بيهم هدا؟ نعصر گلبي عصر بحيرة و ضياااع بهاي الليلة، نمت بتعب ودموع للصبح فتحت عيوني بنعاس على صوت ضحكات بريئة وبوسات عشوائية تتوزع على خدودي، أبتسمت مِن شفته هوَ وشعره الكيرلي گاعد يم راسي ويلعب بشعري.
-تبارك: علوشتي
-علي حيدر: صباح الهير
-انتَ الخير كله.
سحبت وجهه بسته بخدوده الأحبهن و وگف يكمز يريدنا ننزل علمود يتريگ سحبني مِن أيدي واني بعدني نايمة مِن تعب ليلة البارحة الگشرة.
-يلا گومي تبارك
-أممم نعسانة بَس شويَّ.
بقى صافن وگاعد مثل العاقل حَبيبي رغم گالوا قبل هوَ حرك و مشاكس بَس ويايَّ غير ولد لطيف ومطيع و مِن لطافته اريد اكله اكل، نزلت مِن سريري منزلته ويايَّ دخلنا للحمام غسلتله و وغسلت اني، أباوع الوجهي عيوني ذبلانات و ممرودات مرد مِن بچي البارحة وراسي يريد يطگ مِن الوجع
-علي حيدر: تبارك
-تبارك: گلبها ال تبارك.
بقى صافن بوجهي أبتسمتله مستغربة أشرلي أنزل المستوى طوله الفصعون سويت مثل ماطلب دا أشوف شبيه بَس خلاني أستغرب و مبتسمة مِن رفع ايده يمشي اصبعه على جفن عيني و هوَ طابگ حواجبه ضايج.
-شبيهن عيونچ
-ها؟
ما أعرف شكو دمعت هوَ اني صايرة حساسة لو حنية هالطفل أثرت بيَّ مِن بين الكل ألتمس گلبي بتصرفه هذا، مسحت عيوني حاضنته.
-تبارك: مابيهن شيء ياروحي علوشتي بَس مشبعانة نوم أروح فدوة الحنيتك.
أبتعدت عنه فرحانة بي أقلتًا طفل گدر يلتمس تعبي ومايحكم عليَّ بشك لو تصرف غلط، غيرت ملابسه الليَّ حاطهن يم راسه، طبعًا على حيدر كُل يوم قبل لا ينام يجيب ملابسه الليَّ حَ يلبسهن باچر ويحطهن بصفه علمود مِن يگعد يلبسهن
-علي أگعد هنا بَس أبدل حَبيبي وننزل.
هز براسه مثل العاقل و گعد على السرير الليَّ رتبته بسرعة و أخذت ملابسي مال الدوام لبست بسرعة و فيرت شعري و سحبت جنطة الميك اب مالتي خفيت تعب عيوني بكونسيلر وطلعت اله أخذته ونزلنا جوا
ما آعرف اذا راح أتصادف ويَّ جَوهر أو لا بَس ماكو مهرب دخلت للصالة الليَّ بالعادة ناكل بيها و چان ماموجود.! بَس البنات گاعدات وخاتون وحامد وحيّان صبحت عليهن بهدوء.
-تبارك: صباح الخير
-خاتون: صباح الظهر.
باوعت للساعة الموجودة بعد وگت واصلًا مثل وقتي بالعادة بَس هاي تريد تلغي مِن الصبح.
-حيّان: صباح الخيرات والليرات شوگت ما يعجبج أگعدي ولبسي الكلام مثل ماتلبسين كعبج كل يوم للدوام
أبتسمتله وهوَ غمزلي يأشر على خاتون، البنات هم ردوا بأبتسامة و سمارا لاحظتها اليوم أفضل مِن ذيچ الأيام و الدليل مجهزة نفسها للشغل، رفعت راسها سيلين وهيَّ تبلغني.
-سيلين: تبارك جَوهر طلع مستعجل گال عنده شغل راح تروحين ويايَّ اني و سمارا
-تبارك: ماكو مشكلة
بديت أوكل على حيدر و عقلي أنشغل بتصرف جَوهر واضح ما طايق شوفتي و لا بالعني و الدليل چان ما يقبل أروح ويَّ شخص غيره للشركة بَس هسه غير عن قبل، طلعت مِن افكاري على حديث حامد ويَّ حيّان
-حامد: شوگت مقررر تبدي شغل بالشركة
مارد عليه حيّان و حاط جهازه على فيديوهات سباق ومركز بيهن، رجع أبوه يحچي وياه.
-مو احچي ويااااااك حيّاااان!
-حيّان: حاليًا مشغولة بمشاهدة شغلات أفضل مِن هذا حديثك أجله لبعدين
-خاتون: عوف هذا المادري شنوووو و ركز ويا أبوك
-حيّان: سيلين هذا البيض انتِ مسويتي مو؟
-سيلين: أي حَبيبي
-طيب حياتي طيببببببب طعمه يخبل
-بالعافية
-انتِ العافية و أهلها يروحولچ فدوة العاااارات الموجودين
-خاتون: شقصدك؟
-حيّان: زمن شنو لزگتي ماتروحين البيتج ماعندج رجل وجهال
-زمن: ها أجه دوري
-دجاوبي.
-بَس يكمل عرس جَوهر رايحة اصلًا طولت حيل
-مو بَس طولتي وغفتي على گلوبنا
-خاتون: حيّان!
لبسها مدري شگد و كلنا نحارب نضمضم بضحكتنا نخاف لا خاتون تعيط بيناا و هوَ حركاته تموت ضحك.
-حيّان: الله سمارا اليوم طالعة حلوة
-سمارا: هبيبي انتَ هم هلو
-أحب النسوان المستهترة مثلچ
-انتَ المستهتر
-انتِ مستهترة طالعة على خاتون
-أيععععععععع
-خاتون: الله يطيح حظكم
-حيّان: انچبي خاتون
-حامد: لك بابا لساانك.
-گوم كمل صبغ شواربك شكو صبغت شعرك وبقيت شواربك شهل النشاز طالع چنك دجاجة ام لونين
-سمارا: ههههههههههههههههههه
-حيّان: سمارا عزميني ضحكتج مو شاطرة بَس تعزمين بذاك الجنوبي الساقط
-ابو شعر الهلو؟
-گاتلچ شعره مدووووخج تدووووخ
-أدوخ مِن أشوفه
-شنوووووووووووو؟
-ههههههههههههه هباب كنان رجال هباب والله
-سمارا أشوفج فالته مثل الأمريكيات
-مثلك
-خاتون: العرگ دساس بعددد هيَّ الماما منو قااابل.
-حيّان: انتِ أنچبي لا تكمزين وتگعدين بنص سوالفنا
-أدبسززز
-أوي
-وجعووووي
-الوجعج عجوز البين
ضربت الميز مال الأكل خاتون وهيَّ تأشر الحامد على حيّان الليَّ مستمتع و منتعش يضحك عليهم.
-هذا السرسري شووووفلك حل ويااااه راح يخبلنيييي
-حيّان: ليش انتِ هم عندچ عقل لِچ انتِ غير مسلمتها مِن زمان وعقلج شايلي وحاطين بمكانه بلوكه
-اذا م...
-انچبي
-حامد: أبن القندرررة شبيك متخبلللل؟
-حيّان: مقبولة لأن شبهت نفسك بالقندرة اني معلية هااا ترا انتَ گلت ابن القندرة
-زمن: كافي حيّان
بقن خوانه يخزرن بي علمود يسكت لأن لسانه وسخ وياهم ومايحترمهم، رقصت حواجبها سمارا مبتسمة بَس لاحظتها كل ما عينها تصير على حامد و خاتون تقل أبتسامتها و تباوعلهم بنظرات كلها غل وكره، رجعت خاتون تحاول تحچي ويَّ حيّان.
-خاتون: أبدي أشتغل ويَّ أخوك وديروا الشركة أثنينكم لعد تريدون بَس خليفة يستولي عليهااا وحاط حتى بنت مرته
-سيلين: للتصحيح بنت زوجته مو موظفة ولا منصبها قليل هيَّ الها بالشركة و مستواها بمستوى أبوية و خليفة تقريبًا
-حامد: تقارنينها بينااا؟ أحنا الليَّ أشتغلنا و تعبنااا طول هالسنوات
ما أهتمتله سيلين و رفعت الكوب مرتشفه مِن الشاي وجاوبته بعدم اهتمام.
-سيلين: حقيقة يصعب أنكارها.
-خاتون: أنطوها حصتها وطلعوها مِن الشركة شلكم بيهاا
-سيلين: زُها مهندسة شاطرة عقلها مُقارب العقل ريسان مِن ناحية التفكير التجاري و هذا الشيء فادنا بالفترة الليَّ داومت بيها
-حيّان: ليش هسه ما تداوم؟
-سيلين: نادرًا لأن مشغولة و أتوقع اذا رجعت شغل مطعمها تترك الشركة لأن رغبتها بأدارة الأعمال ضعيفة حسب ما گالت
-وريسان؟
-هوَ قدم أستقالته قبل بعد ما أعرف أذا حَ يرجع أو لا.
هز راسه حيّان بتفهم و سيلين أشرتلنا لازم نطلع لأن ما باقي شيء للدوام وصيت زمن و حيّان على على حيدر وطلعنا بسيارة سيارتها والطريق كُله أغفي الى أن أنتبهتلي سيلين.
-سيلين: شبيچ حبيبتي تبارك واضح ما شبعانة نوم
مسحت وجهي أحاول أركز وياها لأن النعاس بدأ يسيطر عليَّ.
-تبارك: أي تقريبًا
-ليش شوگت رجعتوا
-ب11: 00 شفتچ بالحديقة بَس ما حبيت أزعجج.
-أممم أي گعدت لأن سمارا نامت مِن وقت وحيّان طلع ويَّ كنان و أنتوا تأخرتوا صح وين رحتوا؟
بلعت ريگ أنظم أنفاسي شجاوبها هسه.!
-الأستاذ جَوهر چان عنده شغلة وكملناها سوا
ضحكت وهيَّ تباوعلي مِن الجامة الأمامية بسبب كلامي.
-هههههههه دعيفي كلمة الأستاذ كلها أيام وبعد تعيشون تحت سقف واحد
سكتت ماجاوبتهاا و گلبي نقبض مِن كلامها معقولة حَ يركب راسه ويكمل بهذا الزواج حتى بعد ما نكشفت گدامه؟
-سيلين: اليوم أخر يوم تداومين بي تبارك لازم نكمل التجهيزات لأن ماكملنا الباقي
-تبارك: تمام
باوعتلي و فاهمة الليَّ دا أسوي مو مِن گلبي بَس سمارا موجودة ما تگدر تحچي، وصلنا للشركة و اني و اني حاطة براسي لازم أشوف ماهر و أبلغه بكلشي صار ولو وجوده وعدمه نفس الشيء اني ما مستفادة منه بشيء هذا الشخص ما أعرف شلون لُبيد يأمني عند شخص مثله.
وصلنا للشركة و كلمن طلعت المكتبهاا وأول مادخلت تلگوني البنات يحچن شلون أداوم وزواجي بعل كم يوم.
-تبارك: بَس اليوم أداوم
-أميمة: لازززم لازززم وضروري غير عروووس
هنَّ فرحانات إلى و يسولفن و يتفقن على شنو حَ يلبسن وشيسون مِن ميك اب وتسريحة شعر ألا اني ضايعة بين لُبيد الليَّ هددني ألغي هذا الزواج و بين جَوهر المتخبل و ماباقي ذرة عقل براسه ويريد يسمع للقسم الثاني مِن هاي اللعبة.
حطت هيفاء گدامي ملفات و هيَّ تگول.
-هيفاء: عفية تبوكة أحتاج توقيع الأستاذ جَوهر عليهن
-تبارك: و ما تروحين انتِ؟
-عندي شغل والله ولازم أكمله و ألا الاستاذ قتيبة يخلّيني أستقيل و اني الممنونة
-تمام هيفاء
أخذتهن منها و طلعت متوجهة المكتبه و ما اعرف اذا موجود أو لا بَس گلبي عبالك عملية خفقان تفعلت بي، دگيت الباب وبقيت واگفة متوترة و فزز گلبي صوته مِن سمح بالدخول.
دخلت چان گاعد گدام مكتبه و نازع السترة معلگها بمكانها و رافع ردن قميصة بترتيب و گاعد گدامه هوايَّ ملفات مال شغل، وگفت بمكاني احچي وياه، رفع راسه بتعب و بمُجرد عيونه لمحتني صار يباوعلي بطرف عينه.
-جَوهر: أتفضلي!
-تبارك: أكو ملفات تخص الشغل محتاجين توقيعك عليهن
-عوفيهن بعدين
-محتاجينهن أستاذ
هز براسه وتقدمت حطيتهن گدامه بَس غثني بروده ويايَّ و تجاهله وكلامه المختصر.
-جَوهر: شغل منو هذا؟
-شغل هيفاء.
أخذهن مني و نبشهن نبش بَس الغريب ما وقع و رفع راسه.
-جَوهر: متأكدة شغل هيفاء؟
-تبارك: أكيد أستاذ
رجع يقرأ و يتأكد منهن يلا وقعهن وسفطهن واحد فوگ الثاني ورفع أيده يأشرلي عليهن بدون لا يباوعلي.
-تگدرين تروحين.
رفعت حاجبي بسبب أسلوبه و ما ناقشته و لا طخيتله راس إخذتهن وطلعت تاركته، رجعت المكتبي نطيتهن ال هيفاء وصعدت للطابق الليَّ بي چان مكتب الاستاذ ريسان و الآنسة زُها اريد أراجع المكان الليَّ بذاك اليوم لُبيد نقذني بي مِن خليفة.
أمشي بالممر و عيوني تتلفت بحذر وگفت گدام الغرفة الليَّ سحبني الها لُبيد بذاك اليوم، هذا المكان مابي و لا كاميرا، صرت أفتر بالممر مالته منو مُمكن يكون صورنا؟ و ليش ساعد جَوهر بهاي الطريقة الغامضة؟
بقيت واگفة بَس ما أستنتجت أي شيء ومحد يعرف غير ماهر و مُستحيل يكون ماهر لأن حَ يفضح نفسه ويانا، رجعت المكتبي بعقل تعبان و أول مادخلت رجلي لداخله گالت أميمة.
-أميمة: الأستاذ جَوهر طالبج تبوكة.
قلّبت عيوني بملل وروحي طالعة هذا حَ يشوفني نجوم الظهر بأسلوبه وسوادينه، مشيت متوجهة المكتبه دگيت الباب و أجاني صوته يرعد و مبين صاير أعصاب.
-جَوهر: أدخللللل
رفعت حاجبي بسبب نبرة صوته المستفِز ودخلت بظهر مستقيم أمشي بدون لا أباوعله لأن أعرف بنفسي أنهااار أذا أباوعله وگفت قريبة منه.
-تبارك: نعم أستاذ گالوا طالبني
شمر گدامي مجموعة شغل و هوَ يصيح...
-منوووووو مشتغلل هذاااا الشغل؟
سحبت الملفات أباوعلهن هذا شغلي و حتى مابي أي تقصير و كُلشي مضبوط بَس الواضح بدأ يدور الزلات ويايَّ الأستاذ جَوهر علمود يخلق مشاكل بينا ويطلع حقده بهيئة رزايل بسبب الشغل.
-اني
-هوَ هذا هممم شغلللل؟
-شبيه
-شوفي بعينچ
-شايفته و أشوفه مُمتاز
-هذا مُمتااااااز؟
-نعم
كملت جدالي وياه بنفس حّدته وعيوني بعيونه رغم نار الكره و النفران الليَّ صايرة بينا.
-گلتيلي مُمتاز؟ لووووو لأن شغلج و انتِ مسويته صار بنظرج كااامل.
-تبارك: تعبانة بي و مدققته قبل لا يوصل الك، أذا عندك ملاحظة احچيلي وين الغلط بالضبط و اني أصححه بدون هاي العصبية كلها
-منووووو عصبي؟
-أبوية
-شهل الزبالة تقارنيني بي؟
-وين المُقارنة؟ أستاذ الواضح انتَ تعبان حاول ترتاح.
وگف فجأة ودفع الكرسي مالته لوره و دار متقدم ناحيتي طابگ حواجبه يباوعلي أحس بديت آخاف منه دا أشوف شخص ثاني مو جَوهر الليَّ تعودت عليه ماباقي بگلبه ولا ذرة حنية و أهتمام قسى الدرجة قساوته هشمت گلبي بتصرفاته.
-جَوهر: لا تباوعيلي بهاي النظرات
-تبارك: شبيها نظراتي؟
-باردة
-هسه أدفيهن
شهگت فاتحة عيوني مِن سحبني بحركة سريعة مقيدني بين أيديه و نظراته العصبية لا زالت مخترقتني.
-لا تستهزِئين
-تمام.
-لا تحدديني بهذا البرود
-تمام
-أكرها لا تگولين هالكلمة
-تمام
رفع حواجبه بيأس وهز براسه، أباوعله وجهه شاحب عيونه بصعوبة فاتحهن صفنت بوضعيته وسألته بصوت مليان قلق و بخفوت.
-تبارك: ما نايم مو؟
-جَوهر: أممم
-ليش؟
-يهمچ؟
-لا
-أممم مو اگول لأن ما معقولة جَوهر مهم عندچ و تسألين عنه
-لا مو مُهم سؤال عابر.
صارت الكلمة تطلع منه بصعوبة رفع أيده يمسح بعيونه مثل الدايخ ومسح على جهة گلبه اللحظة خفت مِن وضعيته حتى أيده الثانية الليَّ لازمتني رخت قبضتها.
-جَوهر: أطلعي برا
-تبارك: أستاذ شبيك انتَ بخير؟
-أي ما بيَّ شيء أطلعي برا
-بَس.
-أطلعي
-دا أحسك مو بخير
-أطلعي گتلچ
-هسه شلزگت أطلعي ما أطلعي شلون ميتة عليك اني.
عيوني تباوعله ومركزة عليه بحذر، بلعت ريگ بقلق دا احسه مو طبيعي و ماباقي شيء، گعد بمكانه يحاول يستجمع قوته، سحب الملف الليَّ بي شغلي وعيونه نزلت عليه قلّب الصفحة الأولى. و الثانية. وبدأ صوته يهدأ وهوَ يناقش بيَّ.
-جَوهر: أتوقع هنا ناقص توضيح
خطيت بخطوات مقتربة منه ونحنيت بظهري نازلة المستواه أباوع وياه بالملف.
-تبارك: وين؟
أشر بأصبعه عليه.
-هذا
-مو ناقص، الشرح بالملحق الثاني تابع للنهاية أستاذ.
باوعلي بطرف عينه و قلّب للجهة الثانية و چان فعلًا كلشي كامل، قوس شفايفه مثل الشخص الليَّ صارت عنده لحظة ندم بسبب تسرعه و جَوهر الواضح مايحب يطلع نفسه غلطان لا مو واضح أكيد هاي الصفة بي ما يتنازل بسهولة.
-جَوهر: زين
-تبارك: بَس زين؟
-يعني مضبوط
-بَس مضبوط؟
-شبيچ تبارك؟
-شغل أسبوع و ماتمدح بي شگد شايف روحك
-كلنا نشتغل قابل بَس انتِ؟
-وشعلية بيكم؟ دا احچي عن شغلي
-أممم
-يلا أمدحه
-أطلعي
-ما أطلع
-وتالي وياچ.
-هسه أحنا متزاعلين بَس هذا مو مُبرر ما تمدح شغلي
-لا والله؟
-أي لأن حياة العمل تختلف عن الحياة الشخصية
-مُمكن تطلعين عندي شغل لازم أكمله
-لا
-أستغفرالله
-صدق الله العلي العظيم
بسرعة رفع راسه خازرني و اني حسيت نفسي چفصت لأن نسيت هاي السالفة لُبيد يسويهاا وياه، نطعن وجهه طعن.
-جَوهر: هوايَّ متأثرة بي ما شاء الله
أشتغبيت الموضوع وسويت نفسي مو فاهمة شيء مِن كلامه.
-تبارك: عفوًا؟ منو تقصد
-شريكج الودود.
-لا وين أكره أخلاقه و أسلوبه
زفر نفس بنرفزة و وجهه و أذاناته صارت دم ورفع أيده مأشرلي على الباب.
-مُمكن تطلعين
-لا
-شبيچ بابا؟
ما مستقتلة على وجودي وياه و لا مهتمة الشيء بَس عاندت ما أطلع بسبب حالته مبين مو طبيعي و على آي لحظة يتخربط و أخاف أطلع و يتخربط ومحد يعرف بي.
-أستاذ
-هاااا تبارك هاااا
-شنو رأيك نقيس ضغطك؟
-مابيَّ شيء
-بَس اني اگول بيك شيء
-لا تلحين تبارك
-حباب.
رفع عيونه يباوعلي بنظرات قهرتني و قهرني أكثر مِن گال.
-أعتذر منچ تبارك بَس ماعندي ثقة بكلشي تحچي وتسوينه حتى اهتمامج هذا أحسه مُزيف
الغصة أخترقت لوزة بلعومي وحاربت أحافظ على هدوء مظهري.
-شكلك تعبان أتمنى تقيس ضغطك و سلامتك.
عفته وطلعت متأذية مِن الحالة الليَّ وصلنالها و مِن فقدان الثقة و لا ذرة ثقة بقت بينا، وگفت أباوع للشركة مِن فوگ الموظفين تروش وكلمن يركض بشغله لو كل واحد لازمله وحدة لو واحد و واگفين يسولفون.
دخلت مِن باب الشركة الآنسة زُها و العيون كلها تحولت عليها، ما ألومهم لأن هيَّ أنيقة بلبسها لدرجة تهتم لأدق تفاصيلها و خير المثال كُحل عينها ترسمة بطريقة مركزة، و اليوم ضاربة ميك اب سموكي لعيونها ولابسة رسمي قاط طالعة فاتنة بجمالهاا وحضورها وهيَّ صاحبة طول تقريبًا سبعينات و مثل ما تعودت الكل ينخرس مِن تدخل بسبب حضورها القوي وشخصيتها وهيَّ ما تنطي مجال لشخص يتجاوز حدوده وياها.
تلگاها حجي حسن أول ماشافته نرسمت أبتسامة على ملامحهاا وصعدوا بالمصعد أثنينهم الواضح صاعدة المكتبها، رجعت المكتبي أكمل شغلي لأن اخر يوم هذا إلى بالشغل لازم أجهز للزفت زواجي
بقى بالي يم وضع جَوهر و كل ما أريد أرجعله أشوفه اتذكر كلامه الأخير لزمت جهازي داخلة على رقم لُبيد مترددة احچيله الليَّ صار؟ بَس خايفة يلعب ويايَّ لعبة جديدة و هوَ نكشف كلشي و اني أريد كلشي ينكشف گدام جَوهر لأن تعبت.
و لُبيد أذا أوصله شيء حَ يلعب لعبة خطرة متأكدة ويطلع نفسه بسهولة و يوگع كلشي براسي، ذبيت نفس بحسرة و أختي؟ شلون راح أخذها منه واني ما كملت المُهمة بالكامل؟ چنت رايدة احچي ال ماهر بَس هذا يوصله كلشي هم و هيچ ضعفت بأفكاري و موضوع سيلين وموقفها مِن راح تعرف كُل شكوكها صحيحة هذا الشيء وحده قاتل بالنسبة الي
لمحتها تمشي ويَّ سمارا و يتناقشن اتوقع بخصوص شغل بسرعة طلعت وراهاا مُجرد سمعت صوتي وگفن أثنينهن.
-سيلين: ها تبارك
عضيت شفتي بأحراج بَس ما أتحمل بعدد.
-تبارك: اگدر أطلب منچ طلب
-تفضلي عيوني
-عادي تروحين تشوفين الأستاذ جَوهر
-ليش شبيه أخوية تبارك؟
-حسيته تعبان
-سمارا: ليش انتَ ما تروح متزاعل وياه؟
بقيت ساكتة اعضعض بشفتي شجاوبهاا هسه و سيلين عافت موضوعنا ورجعت تحچي وياها بأستغراب.
-سيلين: هم رجعنا لل انتَ مو انتِ وتحچين بصيغة مذكر ويَّ المؤنث
-سمارا: شسمه هذا؟
-شنو؟
-اأهبط هبطط بَس اهچي عربي زين.
-تهبطين؟ سمارا قصدچ تخبطين؟
-ههههههههه أي أوف صعب آتركوني اهچي براهتي
أبتسمت سيلين الطريقة كلامها العفوية لان سمارا حيل عفوية وبريئة بتصرفاتها رجعت سيلين مركزة ويايَّ.
-سيلين: تبارك شبيه جَوهر يعني تعب شغل لو شنو؟
-تبارك: لا ما آتوقع تعب شغل
-ليش ما تروحيله انتِ؟
-متعاركين
-أوف منكم تمام رايحة أشوفه.
عافتنا وراحت بخطوات سريعة بأتجاه مكتبه و سمارا لا زالت واگفة تباوعلي مبتسمة غمزتلي بتلاعب وخلتني افتح عيوني وحلگي سوا.
-سمارا: تهبين جَوهر
-تبارك: شنو؟
-هُب هُب
-حُب؟
-أيييييي
-سمارا انتِ ماعندچ شغل؟
-عندي
-لعد حبيبتي ما تروحين تكملينه
-هههههههههههههههههه
ضحكت وياها لا أراديًا شكلها غصبًا عليك يخليك تضحك وتبتسم.
-هههههههه شكو دا تضحكين
-هههههههههههههههههههههههه
-لِچ شبيچ.
دزتلي بوسة بالهوا وراحت المكتبهاا تضحك شبيها هاي؟ أستغفرلله و لا واحد عاقل، رجعت الشغلي وبالي يم سيلين بعد ما رجعت و لا شفتهاا و أخجل إروح اسألها خاف تگول مستقتلة على أخوية ومهتمة اله
بالطلعة يلا عرفت چان وضعه متحسن و سكتت ما كثرت اسئلة عنه، وبدأت الأيام تمشي وكل يوم يخلص أحس بي ياخذ نص مِن حيلي و عمري، و قبل العرس بيوم تحديدًا صار شيء ما تمنيته يصير.
چان الكل گاعد يتناقشون بتجهيزات العرس و المعازيم و البنات مخبوصات و شگد قنعني أروح صالون بَس ما قبلت لأن مالي خلگ هم الفرحانين واني و جَوهر عبالك حندخل جنازة شگد تمنيت يلغي كل هاي التمثيلية بَس مالغاهاا و استمر بيها.
و طول ذني الأيام حرف واحد ما دار بينا و لا يباوع بوجهي و اذا أتواجد بمكان هوَ بي يعوفه ويطلع وحتى الكل بدأ يلاحظ تصرفاته بَس عبالهم متزاعلين بشيء عادي ومنفخين على بعض و زمن كل شويَّ گايله.
-زمن: صدگ چذب ولكم وين أكر عرسان باچر عرسهم لا قبلتوا نسوي حنة لا صخام بعين خاتون و فوگاها متزاعلين شبيكم هااا؟
-سيلين: زمن خليهم براحتهم و هم يتصالحون
-غير نفهم شكو متزاعلين هالزعلة القوية.
بقت سيلين تباوعلي و بتفكيرها متزاعلين بسبب مواضيع قبل و ماعندها فكرة عن الليَّ صار بالفترة الأخيرة و أسفي عليها مِن راح تعرف، الليَّ قاهرني ما تستحق كل هاي الأذية الراح تتلقاها و مُستحيل تسامحنا عليهاا.
مجرد فكرة نهتني وگطعته الگلبي شگد زمن حاولت تصالحنا اني و جَوهر بَس بادت عملياتها بالفشل و أستسلمت، بَس اليوم جَوهر گاعد گدامي بدون لا يباوعلي يتناقش ويَّ حيّان عن تجهيزات العرس، حفل زواجنا مو بقاعة لأن الاستاذ جَوهر ما يحب القاعات بهيچ مناسبات و جهزوا كلشي هنا بيتهم لان بيتهم يعادل القاعة
-علي حيدر: تبارك
فزيت مِن أعصار أفكاري على صوت هالنتفة بأيده جهازي تقرب مني يتملق يضحك.
-تبارك: ها حَبيبي
-فتحي.
عرفته يريد يشاهد أفلام كارتون لان معودته كل يوم أنطي وقت نص ساعة أو ساعة يشاهد ويغير جو لأن ما يقبلون يبقى لازم جهاز أوي جهاز بي مشاهدة الوقت طويل طبعًا هاي تعليمات جَوهر ما أنكر هالشخص عنده حرص و أهتمام أتجاه ابنه مو طبيعي و بحياتي ماشفته عند أحد يهتم لأدق تفاصيله و اذا موجود ما يغيب عن عينه على مدار الساعات المتواجد بيهاا عينه عليه، مأدي واجبه ك أب مِن ناحية كلشي و ما مقصر وياه.
فتحته اله و عبالي راح يگعد يمي بَس راح گعد يم أبوه و كل شويَّ گايله.
-علي حيدر: بابا شوف شوف
و وجه جَوهر الصاير ما يگصه السيف ما يبتسم غير ويَّ أبنه.
-جَوهر: ها وليدي
رفعه حطه بحضنه يسولف وياه و شيحچي على حيدر جَوهر يگله صح أبتسمت المنظرهم بَس الثواني أختفت أبتسامتي ويَّ أبتسامة جَوهر الليَّ قلّت و أختفت تدريجيًا مِن أجه صوت أشعار على جهازي.
بلعت ريگ ومغص قوووي صاب بطني و معدتي و اني أشوفه اخذ الجهاز مِن على حيدر و واضح دخل عليهاا، مسحت رقبتي بتوتر و أيدي سرت رجفة بيهاا، أراقب بملامحه شلون تغيرت، تغيرت لدرجة راح تنفجررر و شريان جبينه نط بطريقة تخوووف و ترعب الگلب
أجت سيلين گعدت يمي تشوفني شنسوي مِن ميك اب باجر البنيه تحچي ويايَّ بَس اني عشت الرعب المكتوم بهاي اللحظات خفت لُبيد داز شيء ماكو غيره يخلّي جَوهر يوصل الهاي المرحلة مِن الغضب.
نزل على حبدر مِن حضنه و گعده بصف حيّان الليَّ تغيرت ملامحه بمجرد شاف حالة أخوه و الزاد خوفي أكثر وراح يوگف گلبي مِن حط جهازي بجيبه وطلع.
-سيلين: تبارك مو احچي وياچ
درت وجهي عليها بضياع و مِن الخوف حتى دوخة صارت عندي.
-تبارك: أي وياچ
-شبيچ تبارك وجهج صار ليمونه؟
-ما أعرف دخت شويَّ تعبانة صاعدة الغرفتي ارتاح
-أممم تمام عمري لان وراچ گعدة فَ أرتاحي.
عفتهم وطلعت مِن الصالة أدور على جَوهر بالبداية طلعت للحديقة الليَّ مجهزينهاا علمود باچر مالگيتله أي أثر، طلعت للباب الخارجي سألت الحماية اذا طلع منا أو لا بَس جاوبوني لا ما طلع
رجعت الداخل البيت معناها أكيد بغرفته، غرفته الليَّ صارلي شگد هنا بَس ما وصلتلها و لا إلى نفس أدخللها، صعدت فوگ أمشي متوجهة الهاا دكيت الباب ماكو آي صوت داخلها، فتحتها أبلعم باوعت الداخلها بدون لا رجليَّ يدخلن الها ماموجود!
وين راح جَوهر؟ أحس دخت دورت كل البيت عليه مالگيته رجعت أمشي الغرفتي وروحي رايحة فتحت الباب وعيوني منزلتهن بيأس بَس شهگت بصمت فاتحة عيوني مِن شفته گاعد ومتربع بنص غرفتي.!
-تبارك: أستاذ جَوهر؟
دخلت للغرفة سادة الباب ورايَّ و هوَ نهض مِن مكانه الگاعد بي ورجع المغص متجدد ببطني و اني أشوف الجهاز بين أيده، حاولت أبين نفسي طبيعية بَس ماگدرت وحكيت رقبتي بتوتر، تركزت أنظاره على حركتي، وگف گدامي بملامح جامدة وعيون ترمش بهدوء
-جَوهر: تريدين تشردين مِن يوم عرسنا؟
تبسمرت بمكاني و الرجفة سرت بأطراف رجليَّ مِن حط شاشة الجهاز بوجهي وعيوني جمدت بالشاشة، الرقم واضح و الطامة الكبرى الجهاز مفتوح يعني يگدر يقارن الرقم ويعرف المنو بَس الليَّ بلع الساني هوَ الموجود داخل المحادثة.
حسيت الدم نسحب مِن وجهي و اني أشوف الحيوان لُبيد داز أخر محادثة بينا و هوَ يگلي لازم تلغين هذا العرس ب أي طريقة وبسبب ضغطه عليَّ چنت راده عليه تمام حتى لو أشرد بيوم العرس و ما اخلي يكمل و كاتب جوا صورة سكرين المحادثة هذا كلامج الأخير راح تطبقي لو تكملين هذا الزواج؟
شهگت مِن ركع الجهاز بالحاايط مفلشة تفلليش مِن قوة الضرربة وحچى مِن بين أسنانه بعصبية مكتومة و عيون خاابطة دم.
-جَوهر: وبعدد وبعددد تريدني أثق؟ جاااي تصدميني تباااااارك
حچيت بصوت يتراجف گوا طلع مني.
-مو مثل ما مفكر بَس خلّيني أفهمك
-أش كااافي كااافي حچي فاااارغ كااافي تعبتينيييي بتصرررفاتج كل يوووووم شيء تعبتينييييي والله تعبتينييي
نزلت دموعي ويَّ كلماته ونزلن غصب عني اني مدا أتحمل أشوف هالأذية كلهااا بسببي.
-جَوهر: سكتي؟ هم سكتي بكل مررررة سااااكتة ما جاي تحچيلي كلشي و حتى الليَّ تحچينه ما اگدررر أثق بي.
عافني وطلع ساد الباب بكل قوة گعدت منهااارة مِن الوضع كله، كلشي دا يضغط عليَّ مِن كل النواحي و أيديَّ مربطة مدا اعرف شسوي، أنفتح الباب ودخلت سيلين فتحت عيونهاا متفاجئة مِن وضعيتي المُزرية و مالي عين أحطها بعينها گعدت گدامي لازمة أيديَّ و تسألني بقلق.
-سيلين: شبيكم تبارك؟ ليش جَوهر هيچ متعصب شصاير بينكم.
نزلت أنظاري الرجليَّ أناشغ مناشغ بدموعي و گلبي محترگ حرگ لعبااانة نفسي مني و مِن ظروفي دا أعيش وجع بحياااتي ماعشته وجع يشبه وجع اليوم الليَّ خسرت بي أمي.
-تبارك حبيبتي أهدي
ضمتني الحضنها تهدأ بيَّ بَس هذا الشيء بالعكس زاد أنهياري و اني أشوف تعاملها ويايَّ، تعاملهاا الليَّ أبدًا ما أستاهله منهاا اني حالي مِن حال لُبيد هم خدعتهاا وچذبت عليهاا
-تبارك: اني تعبت تعباانة سيلين كلهاا ضدي.
-أسم الله شبيكم شصاير بينكم انتِ و جَوهر
عضيت شفتي و دموعي مُستمرة ماعندي الجرأة احچي شيء و بيا وجه احچيلهاا مثلًا؟، گومتني مِن مكاني دخلتني للحمام تغسل بوجهي وترفع بشعري بأهتمام لا يتدمر مي ورجعتني للغرفة تمددت بمكاني وغطتني لأن صرت ارجف وسن يضرب بسن مِن البرد
-هسه أجيج.
طلعت مِن الغرفة ما اعرف وين راحت، لفيت نفسي بالغطوة ودموعي ماوگفت تعبتتتتتتتتتتتتت والله تعبتتتتتتت صرخت صرخة مكتوووومة واني أدفن راسي بالمخدة حسيت بلعووومي انشحططط و تگطع راسي حيطگ
دخلت سيلين و عيني لمحت بأيدها القرآن الكريم سكتت أون بصمت گعدت يم راسي وهيَّ تمسد على شعري.
-سيلين: راح أقرالچ قرآن شوية ترتاحين ان شاء الله عليه
نزلت دموعي أكثر وهيَّ ماتدري بهذا تعاملها دمرتني حچيت بهمس.
-تبارك: ما أستاهل هذا تعاملج والله
وگفت أيديها عن الحركة ورفعت راسها بهدوء تباوعلي بعدم فهم.
-سيلين: شنو قصدچ؟
-ما أستاهله
-لا تحچين هيچ اذا على جَوهر لا تخافين تبارك جَوهر يحبچ ويجي يوم ويتفهم كلشي سويتي
-و انتِ؟
مِن انهياااراتي الليَّ دا آعيشها صرت ما منتبها الكلامي وشنو دا احچي بَس الليَّ چان يهمني أرضي ضميري الليَّ يعذب بيَّ و اني أباوع لهل الأنسانة.
-اني ما زعلانة منچ بسبب الليَّ سويتي ويَّ جَوهر متفهمتج لأن عشت نفس شعورچ
نزلت نظراتي ما فهمت قصدي عبالها احچي عن موضوعي ويَّ جَوهر، فتحت القران وبدأت تقرأ سورة البقرة و أيدها على راسي، تقرأ بكل سكينة و هدوء الدرجة كل جسمي هدأ و عيوني صارت تغفي مِن الراحة و النعااس الليَّ حاوطني و ما أعرف شلون نمت عفتها مُستمرة تقرأ و عقلي يتعاصر بالأفكار.
ما گعدت الا ثاني يوم و عساااني ماگعدت و لا فاتحة عيوني الخنگة ذبحتني ذبح بهذا اليوم مِن غير تذمر خاتون عليَّ و بَس تحچي و ما عاجبها شيء بَس كل هذا ما چان مُهم عندي
أجوا الماكيرات الليَّ حجزتهم سيلين للبيت لأن ما عندي نفس أطلع و بدلة زواجي الچان موصيها جَوهر إلى بتصميم خاص ماشفتها و لا فتحتهاا رغم شگد سيلين حاولت ويايَّ بذيچ الأيام.
بدو البنات العاملات يشتغلون بينا كلنا أنجمعنا بغرفتي اني و سيلين و زمن وسمارا، ناس تسوي أظافرها و ناس شعرها مثل سمارا و ناس مكياجها وكلهن متحمسات وفرحانات الا اني الغيمة السودة محتلة ملامحي و شتحط البنيه الليَّ تشتغلني ما أعارضها لأن ما مهتمة الكل هذا
-زمن: تبارك شو ساكتة؟
-سيلين: أكيد تعبانة لأن ذني الأيام تعبت بيهن.
سدتها إلى وهيَّ تطمني بعيونها، هنَّ يسولفن واني ساكتة و خايفة لا لُبيد يسوي شيء ال جُمانة لأن هددني بيها لو صار هذا الزواج آنسى شيء اسمه جُمانة بعد
أنفتح الباب ودخلن البنات زُها و مينا شايلات فساتينهن المغلفة بايديهن.
-مينا: العمااا شو صايعات عم تتجهزوا بدونااا
-زُها: شفتي شلون صايعات يا مينا
-عم شوف يخرب بيتن شو مابيستحوا.
ضحكوا البنات سلمن عليهن و اني بمكاني ما اگدر اتحرك لأن ديسون بأظافري يرتبوهن الي، وگفت زُها مبتسمة تباوعلي ومقلصة عيونها.
-زُها: ما شايفتج بالميك اب الثگيل لأن بحفلة خطوبتكم اني چنت بالعراق
-سيلين: هسه راح تشوفين جمال چنتنا
-تبارك: حتى لو طلعت حلوة ما أتوقع أوصل لجمالج
-زُها: ليش عيني قابل اني الليَّ عيوني شيرازية و مُميزة؟ لو بياضس بياض الثلج؟ لو شعري بُني طبيعي لو
-سيلين: نسيتي عندك تك غمازة.
-زمن: ونسيتن شمرة حواجبها شگد حلوة
-سمارا: ونسيتوا رشاقتها الليَّ كُل بنات الشركة يتمننها
-زُها: و تگول ما أوصل الجمالج تبارك اني اليوم متنازلة الچ مِن غروري لان بصراحة ملامحج مُميزة و جَذابة مُستحيل أكون احلى منچ
-تبارك: ههههههه شكرًا
-زُها: بَس ترا اني أموت
-مينا: ولك زُهاااا بيكفي عم تحكي يلاااا جهزي نفسك
-أيي اييي لا تصرعينااا ولي على لسااانك وليييي.
صارن أثنينهن يرطنن سوري، زُها واضح شگد متاثرة بصديقتهاا بحبث ضابطة لهجتها مثلهاا ضبط، طلعت مينا فُستانها مِن السحابة لونه بنفسجي طوخ وهيَّ صاحبة ملامح ناعمة، غمزتلها زُها تضحك.
-زُها: همزين طويل مالنا خلگ للمشاكل
-مينا: لك عجبني وحياة الله لو مانو عاجبني بلبس هداك الثاني القصير
-وتخلينااا يتخبل عليناا
-بيخرس وبيسد تمه
-تمه ما بينسد لما يشوف التنوة القصيرة ينرعص أبو رعصه
-سمارا: مينا.
كُلهم البنات باوعولها مبتسمين حتى مينا بَس خلتهاا تشيل روحها وترگعها مِن گالتلها.
-مينا: شو حبيبتي أحكي تؤبري قلبي
-ماهر يهبچ
جمدت مينا بمكانها و ضحكتها كلها أختفت خزرت سمارا الليَّ تضحك بشيطنة.
-مينا: أخرسي وليك
-والله يهبچ مو سيلين
فتحت عيونها سيلين السمارا تأشر على نفسهاا بتعجب.
-سيلين: عزا بعين العدو لِچ سمارا اني شكو حطيتيني بالنص
-تذكرين بخطوبة جَوهر؟ شلون چان يباوعلها
-لا لاااا ما أتذكر شيء اني.
-ليش تچذبين؟
-لِچ كااافي ألصمي فضحتي الولد
-سمارا: هتى حتى سمعت شاهر يصيهله يصيحله ابو تنورة
-مينا: كيييييف؟
دارت وجها زُها مختنگة بالضحك و سيلين صارت تلطم لطم وتخزر بسمارا لأن فضحته فضيحة و هوَ فعلًا مبين مُعجب ب مينا الليَّ وجهه نقلّب دم ما آعرف غضب لو لأن سمارا المفضوحة فضحته گدامها و گالتلها يحبچ
-سمارا: يهبچ يهبچ
-مينا: أخررررسي وليك العمااا شو شرشوحة و ما بتستحي
-شنو يعني شرشوهة؟
-زُها: يعني مرجوحة تتمرجحين بيهاا
-سيلين: ههههههههههههههههههه كافي بنات خلونا نكمل تجهيز معليكم بكلام سمارا
-زمن: بَس ترا سمارا والله العظيم كلشي تحچي صحيح حتى لو چفصت چفصاتها صحيحة
-سمارا: I Love
-گامت تتنعوص عليَّ دگولي أحبچ وفضيهااا
-أهبچ
-هههههههههههههههههه اني همات أهبچ سمارا حبيبتي.
رجعن يسولفن بينهن و يتجهزن و اني البنيه بدأت ترسم بملامحي هيئة شكلي غير عن داخلي، بَس زُها هيَّ الليَّ أشتغلت على نفسهاا ما قبلت الماكيرات يسولها شيء و هيَّ فعلًا ما أحتاجتهن لأن چانت شاطرة
ركزت بخصلة الشيب الموجودة بشعرها غريب ليش تصبغ شعرها كله و ما تصبغها هوَ صح منطيتها مظهر جَذاب ر مُميز بَس أستغربت بَس يمكن هيَّ تحب هذا الشيء وعبالك زمن گاعدة بعقلي وعرفت شنو الليَّ يدور داخله.
-زمن: لِچ زُها أم شيبه
ضحكت زُها و هيَّ واگفة تخط بعيونها بالكُحل.
-زُها: ها زمزم
-هاي الشيبه شنو مخليتها فيكة
-أحبها
-شتحبين بيهاا مخربة شعرچ
رفعت أكتافها زُها مبتسمة بمعنى ما أعرف وطلعن البنات يلبسن فساتينهن و اني لحد الآن مامكملة باقي بَس شعري وبدوا بالشغل بي، طلعت زُها بدلتي حطتها إلى على السرير وهيَّ مندهشة بأعجاب.
-زُها: واو بدلتج كُلش حلوة تبارك منين أخذتيها.
-تبارك: أختيار جَوهر مصممها يم شخص تصميم خاص
-ذواق أممممم
-أتمنى أشوفچ ببدلة العرس
قلّت أبتسامتها المرسومة على ملامحها و كأنما ذكرتها بشيء غلط، أبتسمتلي بخفة وسحبت نفس طويل أخذت فستانها ودخلت للحمام، بقت عيوني مركزة ببدلتي ما أنكر تبهر بجمالهاا و تصميمها بَس نفسي ابدًا ما متقبلة ولا فرحانة بشيء.
كملت ساعات الآنتظار وصار لازم ألبسها، و لأن البنات آنشغلن و مينا طلعت نازلة جوا بقت بَس زُها هيَّ الساعدتني بلبسها وتجبرني أبتسم مِن تتغزل بيَّ.
-زُها: أويلي عليك جَوهر اليوم يصير ما يندل طريقه مِن يشوف هذا الجمال
-تبارك: ههههههههه معقولة؟
-شنو
-يعني صدگ طالعة حلوة الدرجة مايندل طريقه
-حبي هوَ انتِ بدون هاي الترتيبات مخليته ما يندل دربه مو اليوم عرسكم وطالعة عبالك حورية
-شكرًا المدحج آنسة زُها.
-ماگتيلي هذا جمالج متوارثته منين بالضبط
-أمي
-ما شاء الله بَس والله تبارك انتِ تموتين بجمالج اني مِن اول يوم شفتج بي أنبهرت بيچ
-ههههههههههههههههه
ضربتني على كتفي وتضحك وتعدل بشعري.
-دا احچي صدگ ترا
-أمممم لعد اني اول مشفتج خفت منچ وحتى گلت ال جَوهر ما أريد أشتغل وياها
-يا منعولة على گولت شروق الشمس
-هههههههههههه تجي مو؟
-أكيد راح تجي هيَّ وريسان
فتحت عيوني ما مصدگة.
-صدووووگ الأستاذ ريسان حَ يجي؟
-أي عزمه جَوهر
-ثواني! جَوهر عزم الأستاذ ريسان؟
-أي
-متأكدة؟
-يمعودة أي
-هااا
-حقج تستغربين لأن اني مثلچ بَس شنسويلهم مثلًا
رغم وضعي المأساوي بَس حبيت اتلاطف وياها و أشوف غيرتهاا عليه.
-تبارك: هَلا بي ان شاء الله يلاگي فتاة أحلامه و نفرح بي هم
رفعت عيونها تباوعلي الثواني أبتسمت بوجهي بَس حسيتها غصب عنهاا.
-زُها: أي يستاهل ليش لا
-هوَ خوش رجال
-واني خوش مرة والله
-يعني شنو قصدچ؟
-هم أريد رجل
-هههههههههههههههههه.
-عبالچ ما أدري بيچ بيوم عرس براء شلون تباوعيلي واني أباوعله و أكيد فهمتِ كلشي
-هوَ يعرف؟
قوست شفايفها و حسيتها خجلت مِن الموضوع لان وحدنا و الكل طالع.
-ما أعرف
-حباب أستاذ ريسان
-بَس شايف روحه.
وصلت الطرف الساني اگلها مثل جَوهر بَس سكتت لا تشك بشيء، أكتفيت بالأبتسامة و أنطيتها ظهري ترتبلي ال طرحة مالتي، كملت كلشي أخذتني گدام المرايا أشوف نفسي بعد ما تجهزت بالكامل، رفعت راسي ببطء و أني أباوع النفسي، بلعت ريگ و خيط دمع زار مدمع عيني و اني أتذكر جُمانة شگد تمنت وبنفسها چان دائمًا تگول أريد أشوفج ببدلة العرس و أشوف شلون حتطلعين
فزيت مِن أنفتح الباب ودخلت خاتون صايرة بارود بأعصابها.
-خاتون: أرتاااااحيتي مِن فشلتيناااااا
طبگت حواحبي ما مفتهمة ليش هيچ تباوعلي بحقد ولو بيدها تگطعني بأسنانها حطتني زُها وراها حاميتني منهاا.
-زُها: خير؟
-لاااا تدخلين انتِ
-مُمكن نفهم شكو؟ شمسوية البنيه وفشلتكم؟
-اسئليهااااا اسئليهاااا وين أهلهاااااا شنو طالعة مِن فطر الحاااايط الناااس يسألون عنهم وبنت منووو ومنو أهلهاا وشنو نسبهاا واحنا مانعرررررف نجاوب الله لا يوفقك يا جَوهر منين جبتهاا وحطيتها براسناااا
موتتني بكلامها و كأنما ما موضحيلها قبل هالعجوز أهلي وين رفعت حاجبي مبتعدة مِن گدام ظهر زُها.
-تبارك: وضح الچ جَوهر قبل ليش تروحين وترجعين على هذا الموضوع؟
-خاتون: وينهاااا اختج وينننن؟
-وانتِ شكو بأختي؟ شنو اختي الراح تتزوج لو اني؟
-و الناااس؟
-مالها علاقة بينا الناس
ضحكت مستهزئة وهيَّ تصفگ أيد بأيد.
-واضح دايحاااات وماكو مِن يلزمجن وتچلبن بالزلم تچلوب
فتحت عيوني مبحلقتهن على كلامها وطعنهاا بينا والغصة تكومت ببلعومي واني أشوف منو يجي يباوعلنا بعين الأسترخاص و يحچي علينا، دفعتها زُها مِن يمي بخفة مبعدتها عني.
-زُها: أنتبهي الكلامج شنو وين عايشة انتِ و الفاظج تخزي بهذا الشكل؟ المفروض يكون لسانج محترم و انتِ مرة چبيرة بالعمر الچ هيبتج و وقارج
ماردت عليها عافتها وطلعت، لزمتني زُها أحس بروحي نمردت مرد بسبب كلامهاا الحز بخاطري وهيَّ تطعن بينا.
-زُها: لا تهتمين الكلامها هاي مسمومة ويَّ الكُل هيچ.
هزيت براسي و حتى ماسألت و لا تدخلت بحياتي الشخصية زُها أكتفت بكلامي بقيت گاعدة بمكاني وهيَّ نزلت جوا، مر وقت ما يقارب الساعة دخلت سيلين سألتني اذا محتاجة شيء أو لا و تطمنت عني وراحت
وگفت بوسط البلكونة أشاهد للمسرحية، الأغلبية مندمج بالأجواء و أصوات الموسيقى الصاخبة، أختنگت أكثر رجعت الداخل غرفتي أفتر بفستان زفافي المنحوس.
وبين تعداد الدقائق و أندفر الباب، أتبسمرت بمكاني مِن دخل ساحبني ناااحيته أرتطم جسدي بجسده، عيونه منظرهن يخوفني لأن مِن الله وخلقته الربانية بيهن خيط كحل وسووود مثل سواااد حياتي.
-جَوهر: أمشييي گداااامي
-تبارك: وين؟
-لااااا تسألين
-بَس اليوم زواجنا!
غمض عيونه بنفاذ صبر وفكه يرجف وجبينه متعرق بكثرة مو عادية و لا طبيعية.
-زواج؟ شنو بَس لاااا مصدگة روحج اني أتزوج وحدة مثلچ؟
بلعت ريگ و حبست دموعي هالمرة معاندة ما أخليها تنزل بَس وحدة مثلچ؟ ليش شبيَّ اني وينطقها بهذا الأحتقار؟ صدري ضاگ و دگات گلبي زادت، جاوبته بهدوء عكس البراكين و النار المشت بصدري.
-عقدنا بالشرع
-وشنوووووو يعني عباااالج تسيطرين عليَّ بهذا الشيء؟ ببساطة هسه اگدر أنهي كلشي مو فد شيء عائق
-لعد يلا سويها شمنتظر؟ لو خايف مِن...
مالحگت أكمل كلامي ودفعني مرتدة لوره ونظراته تنگط شر، وعااط بصووووت رج المكااان رج بَس مُستحيل أحد يسمعه و أحنا بهذا المكان و الأجواء مال العرس.
-منووووووو بدأ باللعب؟
-اني
-منو راح يتعاااقب؟
-اني و انتَ
-ليش الأثنين؟
رفعت أيديَّ صفگت صفگتين مُتتاليات.
-شنو لازم مصدگ انتَ أنسان ملاك مثل شكلك هاا؟ أقبح البشرية هوَ انتَ ديربالك تنسى شيء
حچى بتعب وكُل الجَدية بكلامه.
-أموتج و ما أهتم
قوست شفايفي بأستهزاء.
-يلا شتنتظر لووو.
-لو شنو؟
-جبااان واااحد جباااان
أختفت حركة شفايفي مِن ضحك بصوت هالي وصوت ضحكته جلجلت المكان.
-اني أحب أستلذ بفريستي و للأسف نصيبج تكونين فريستي
صفنت بشكلة بجمود هذا الشخص بدأ يظهر وجهه الحقيقي ويعجز اللسان و العقل يوصفونه، رجع سحب أيدي او نگدر نگول خلعهااا مِن قوّة السحبة غمضت عيوني بألم.
-جَوهر: أمشي يلاااااا
-تبارك: وينن رايحيننن؟
-شعلييييچ؟
-ها هاج جنونك وحقيقتك بهذا اليوم.
-أشششششششششششششش أكره صوووتج أسكتي
وبشطارة عقله وتخطيطه طلعنا مِن المكان مال بيتهم مِن الباب الخلفي بدون لا أحد يعرف بينا ويا خوفي الليَّ أبالي يعرف ألا يدفنا و أحنا عايشين، دفعني الداخل السيارة وصعد منطلق بيَّ ما أدري وين؟
يسوق بكُل سرعة جنونية و لا عبالك أكو سيارات موجودة گدامنا، وصلنا بعد عدّة ساعات گدام بيت بأحد الولايات الليَّ تنتمي للبلد العايشين بي، نزل قبلي فتح الباب و حچى بجزع.
-أنزلي
-ما.
حط أيده على خصره فوگ مكان السلاح الليَّ لمحته عنده ورص على أسنانه ونظرات الغل تتجول بيني وبين الشارع الواگفين بي.
-أفرغه برااسچ
-بَس حچي وتهديدات فارغة كُلشي ماكو
-أول مرة أشوف هيچ واحد مستعجل على جهنم ودخولها
-المُهم أخلص منكم جهنم رب العالمين أحسن مِن جهنمكم
-حتى لو متي أحط گبري بصف گبرچ ما تخلصين مني أو يحطونا بگبر واحد
-الله يثبت علينا العقل و الدين.
نزلت مستسلمة للأمر و الواقع المرير، ألتفت أيده حول خصري وهمس قريب مِن أذني بكلمة قشعرت جسدي نتيجة سماعها.
-حبيبتي
باوعتله بنظرة كُلها ملل ما أستبعد صار عندي آنفصام شخصي بسبب هالمجنون الليَّ تورطت بي، الثواني رجع حچى و هنا خلى جنوني يتضاعف ويَّ جنونه.
-سلميني نفسچ بدون أي مشاكل، لعب وخلصنا خاف الچ نية ترجعين تلعبين ما أخسر غير طلقتين وحدة هنا أشر على راسي و وحدة هنا أشر ناحية قلبي وشرط ببصماتج يكون التلفيق و القتل و هيچ الكل يصدگ انتحرتي وحدچ متفقين.!
-هههههههههه شنو بعقلك انتَ؟ شلون أقتل نفسي بهاي الطريقة؟ لا وبراسي و قلبي بأماكن تنهي حياتي بدون ما أطول
-سهلة بَس الواضح عقلچ ما أستلم الفكرة
-فكرة شنو؟
أبتسم بأبتسامة باردة و خاوية مِن كلشي، بقيت ثابتة بوگفتي رغم الرعشة الملازمتني و الراح تفضح أطرافي.
-طلقة بالراس براسچ، وطلقة بگلبي الليَّ خذتي ودمرتي يأيدچ
-مِن عقلك؟
-يبچون علينا يومين أو بالأكثر أسبوع وينسونا هذا حال البشر.
سحبني مِن أيدي وفتح الباب مال البيت، بيت ما أعرفه و لا شايفته قبل دخلني جوا و هوَ يقفل الباب علينا، بنفس اللحظات جهازه أحترگ بالأتصالات الواضح لاحظوا اختفاءنا، فتح خط وهوَ يختم الأتصال بجملة وحدة.!
-جَوهر: نعم سيلين. أي ويايَّ. ماكو عرس ألغى و اذا تحبون أحتفلوا أنتوا وحدكم. أنتبهي على على حيدر.
سد الاتصال و البنيه اسمعها صارت تصيح عليه متخبلة مِن تصرفه وهوَ حتى ما أنطى مجال يخلّيها تحچي، نزع السترة مالته شمرها على الكرسي وگعد وحط السلاح بين أيده.
-جَوهر: مدام تبارك ليش خايفة مِن زوجج مو تگولين إليوم زواجنا تعاي نحتفل يلااا يللاا تعاي
-تبارك: مصدگ روحك طلعت انتَ المريض النفسي مو لُبيد هسه اتأكدت مِن كل كلامه الچان يحذرني بي منك
-حِلو ليش شنو حاچيلج عني تشوقت أسمع.
-يكفي طلع وجهك الثاني و چنت خادعني ببراءة هذا الوجه
-انتِ هم مُخادعة و هيچ متعادلين
مشيت بخطوات تتراجف أحاول ما أبينله خايفة منه بَس راح أموت وگلبي يوگف مِن الخوف منه، شهگت بفزع أتراجف مِن نسحبت ضامني الصدره بكل قوة و أيده تمشي بهدوء على طول ظهري، بقيت جامدة بمكاني ماطلعت مني أي ردت فعل مصدومة مِن تصرفه.
-جَوهر: لا تعوفيني حتى لو رجعتلج أختچ.
نزلت دموعي و اني أتذكر كلشي سوااه ويايَّ بتصرفاته سقط حتى حقه مني وصلني مرحلة أخاف منه و كارهته ولعبااانة حتى نفسي منه، همست بصوت مبحوح.
-تبارك: ا. اني م. ما أريدك
حچيتها بنبرة مليانة خوف وتتراجف منه، الأمان الليَّ چنت أحسه وياه تحول المصدر خوف يرعبني، رخت قبضة حضنته مبتعد عني بهدوء بملامح الها أكثر مِن تفسير، بقى يباوع بعيون مذبلها الحزن
-جَوهر: تبارك
-تبارك: نعم؟
-كملي حقيقتج بعد ما أتحمل عقلي تعببب مِن التفكير ارحمي بحاااالي هالمرة جاي أسوي شغلات غلططط بغلطط
-أريد لُبيد موجود
-شنو الفرق؟ فهميني
-ح تسأل اسئلة أجوبتها بَس عنده
مسح وجهه بعصبية متنرفز و بهل الثواني أندگ باب البيت، تغيرت ملامحه مستغرب، مسحت وجهي مِن دموعي و هوَ باوعلي بملامح كلها علامات أستفهام، حط السلاح وره ظهره وطلع يفتح الباب.
مشيت وراه بخطوات اني وبدلتي همزين مو مِن هاي المنفوشة چان صرنا مضحكة لأمة محمد بالبهذلة الليَّ تبهذلتها، وگفت خافية نفسي وره الجدار الموجود بنص المُمر وبقيت مركزة منو الليَّ أجه معقولة عرفوا مكانه؟
ما أتوقع جَوهر منتظر أحد لأن ملامحه ما تدل على شيء و چان مستغرب مِن دگات الباب الليَّ نطرقن، رفعت راسي أباوعله منطيني ظهره واگف يحچي ويَّ الليَّ گدامه بَس مدا اگدر أشوف منو بالضبط.!
-جَوهر: تفضلي منو حضرتج؟
بنيه؟ بقيت عاگدة حواجبي بأستغراب مثل نبرة صوته مِن سألها، و هنا الصدمة چانت.! رجفت روحي ويَّ رجفة گلبي ورجليَّ، بلعت ريگ بصعوبة و أحس بلساني ثگل واني أسمع للصوت الليَّ ظهر، صوتهاا الحافظته مثل ما حاافظة أسمي وملامحهاا.
-جُمانة: جُمانة أخت تبارك.!