رواية المنجمة للكاتبة كفاية كاظم الفصل الخامس عشر
كواكب: ما نبقة يمهم بعد
گلتها اباوع بعيونها ذبلت ملامحها بخوف تضغط على ايدي بصوت هامس تگلي.
نيزك: لعبب هي لعب شنو مانبقة يمهم!
هذا الموجود
لج انتيي مخبلة الناس حمونا واستقبلونا مستحيل نسوي بيهم هيج
رصيت على اسناني اضغط على ايدها بقوة بعدني مامجاوبتها وقطع كلامنا وجود ضرغام شايل امير عيونة صارت علية بغضب خازرني رجعتلة الخزرة ونيزك تباوعلي بخوف عبالها سمعني واخر همي يسمع لو لا.
ضرغام: تعالي امشي واخذي ابنج
وجة كلامة لنيزك وانطاها امير بقة واكف منتظرها تروح وياة باوعتلي بخوف ومشت كدامة امير بحضنها بقة هو كدامي رفعلي حاجب وكال.
ضرغام: شتردين انتي؟
كواكب: اخذ الاشياء التخصني
رفع اصبعة بوجهي وبعصبية نتر
ضرغام: وحق ربج امحيج من الوجود بس احطج براسي
شنو تهددني هههههه يلة بلة موتني هو اني مامتت بساعتها اموت على ايدك!
ابتعدي عن حياتنا وشتردين انطيج.
اريد اختي اخذها ماتبقة وياك لان اعرف انت شنو
جاي ارتب باوضاعي بس لاتبحوشين ورااي
ذيل الجلب ماينعدل
خزرتة بحقد وهو كوة لازم نفسة عني لو بيدة يملخني ويفوخ گلبة بية عفتة ورحت صعدت وي ميس ونجوم وشهب كاعدات ليورة صاحت علية
ميس: مكانج بالصدر هنا عيني
صعدت والاغاني علكتها تغني وتنثر بشعرها تباوع لنجوم وذيج مطنگرة ابتسمت فرحانة لفرحتهن احس نجاحهن نجاحي.
ميس: نجوم مصدكة خلصنا من الدوخة
نجمة: بعدني مامصدكة.
ميس: صدكي عزيزتي دكي واركصي
مو متزوجة
تتزوجين ليش لا
تزوجي انتي بالاول بكدج انتي
والقرآن نفس العمر بس اني اضخم شوية وانتي مدكورة
نجمة: المسيحين تبرو منج
هسة القرآن بس الكم؟
كواكب: للكل اكيد
نجمة: والرب اي.
ضحكت على سوالفهن ذني بس يتداهرن على اقل شي، التفتت اشوف نيزك كاعدة بالصدر يم ضرغام وامير يصفك بيدة فرحان نيزك تضحك وياة احس گلبي جمر نيزك عدها استعداد تبقى وي الشخص الغلط مرة ثالثة دخل الشخص الغلط بحياتها بس الفرق متاملة بضرغام حياة غير وهو مثلهم هم يكسر گلبها والكسر مضاعف اذا حبتة اني ماكدر اشوفها هيج واعوفها للخراب كوة رجعتها طبيعية تسولف وتضحك ما اريد ترجع لذيج الحالة.
انتبهتلي حتى ابتسامتها خفتها درت عيني منها واسمع البنات يحجن وياهم لان سيارتهم بصفنة ماشفت وجهة بعد ولا التفتت عليهم الى ان وصلنة للقاعة نزلنا وماجنت متوقعة هيج شي ميس مجهزة حفلة شگاگيييية ومحضرة اشياء تبهررر
حتى فساتين جايبتلنة واكيد اني ما ابدل ملابسي
ونيزك هم ماتبدل وضرغام اشوفة يكلها لاتبدلين ابقي بصايتج حلوة عليج.
نيزك: البنية جايبة فستان مستور
ضرغام: خيولي لاتلبسينة لبسج حلو هسة الولد يجون.
وخرت اذني منهم ومشيت اشوف البنات يبدلن ويتمكيجن وكفت مكتفة ادية وابتسامة على ثغري مرسومة اول مرة احضر مناسبة فرح حتى اخواتي ابد ما رايحات لمناسبة تفرح.
ميس سحبت نجوم تمكيجها وهي ادك رجليها بالكاع: خفيف مو تلطخييين بية
ميس: انطرشتتتت ولج اااي
ماريد مثل مكياجج
ميس: والعباس اييي
نجمة: دخيلج يا امنا العذرا
ميس: بس انجبي خل ارتبج.
سكتت كوة عن لايخرب المكياج كملتها وكلنا انبهرنا من شكلها المكياج هادئ بس الروج لون غامق كلب خلقة المكياج راحت تلبس فستانها الاسود كلوشة من جوة صدرة مرصع بالخرز
للعلم كل الفساتين بلون واحد وهو الاسود بس ميس تصميم فستانها يختلف عبارة عن فستان بينصل بارز مفاتنها على كصة السمجة طويل بس ردنة قصيرة وي تسريحتها ومكياجها طلعها شكل ثاني وكانها شاردة من مجلة عالمية للجمال.
اما شهب الجميلة نفس تصميم نجمة باعتبار محجبات الشي اليختلف المكياج واكيد ميس مكيجتها وكانها فنانة ابدعت برسم ملامحها طلعت بشكل جميل ماكدر اوصفة باي طريقة.
فرحتهن ماتنوصف وحدة احلى من الثانية جانن وكانهن اميرات دينزي اتمنى ما اطلعهن بهذا شكلهن واخلي واحد يشوفهن بس ماكدر اكسر بيهن لان اني غيورة عليهن.
ميس تسحب بنيزك ومصرة الا تمكيجها يابة كلشي ولا هاي الطركاعة تتمكيج انوب ضرغام موجود ياااكلها خرب بعيونة اليوم تصير بالنعل اني وياة اذا هيج، الحمدلله من نيزك بس رسمت عيونها والمكياج كلش خفيففف ورغم هذا طلعت تشگ شگككك خرب بالمكياج بدون مكياج واني اشوفهن يخبلن.
ميس: اروح فدوه ااااني ولجن شطلعتن
نيزك: مو بجمالج عيني
ميس: امشي لج هسة هذا ضرغام يتخببل على عيونج
نيزك: ياااا. هاي شدراج
ميس: ماكو خصوصية وياي.
ضحكت تباوع لنجوم سوت روحها ماتسمع ام العلوم نيزك وجههة انصبغ واني كوة عني ساكتة بداخلي ماخليت سبة ماسبيت الساقط ضرغام
ميس: بقيتي بس انتي كواكب يلا لاتشلعين كلبي راح تجي المعازيم
كواكب: ما اشلع كلبج ولا تشلعين كلبي بالي اخلي روج اااااحمرررر وعيوني دج ادججهن بالكحل
نيزك: بس عووفي الدج حتى بهاي كواكب!
كواكب: اي غير اوصفلها يعني طوخ الكحل
نيزك: كولي ارسمي عيوني ابرزيهن اتعلمي
كواكب: دولي.
ميس: عوفنها ولجن ما اقبل اااني تغثنهااا
نجمة: ترة نسحلج هنا ونطلع الحفلة من عيونج عوفي اخووونا عوفية
كلنة ضحكنة على كلمة اخونا كالتها بدون قصد العوبة إلى فخر اكون اخ لتلث بنات وحيدات بلا سند.
ميس طبقت البراسي رضيت على شكلي بشكل وفرحت لان اول مرة اخلي روج او اي شي على بشرتي من بعد سنين طووويلة من جنا مراهقات نخلي من جانت حياتنا وردية قبل لا نشوف سالم وخلقتة الزفررة.
كلبت شعري بيدي احسها شووووية طولان ماواكع بيدي مكص اكصكص بية للاسف واني بنصهن رن الموبايل بجيبي وكلهن فاتحات عيونهن يباوعلي طلعتة من جيبي موبايل صرصر يسمونة ليش ماعرف بس هو غضنفر هيج كلي من انطانياة.
طلعتة ونيزك تسال بية: منيلج هذا
مو مالتي
اي ادري منين وهذا منو المتصل بيج
غضنفر
كلتها وطلعت فتحت خط: الو
غضنفر: ها ام دجة وين انتي
بالقاعة
يااااا قاعة اشتعلت روحج
اشتعلت روحك اانت خوش.
ولج بس لا راح تتزوجين واني ما ادري؟
عفية هسة منتظرة العريس
صخام الصخمني ليش غدرتيني
حظك بعد
انجبي وكولي وين انتي ترة لابس قاط اريد اركص مو كلتي معزوم
ها بس لاتجي للجامعة
اي غير بت الناس التكولين اختي تخرجت وعزمتيني بس انتي تلبسين قاط وتجربين الشعور وحد عنج اني.
غصة صارت بلعومي من كلمتة اني كتلة راح اروح وهم كتلة تعال بس بالشقة ماعبالي صدك يجي كال ماعندي ملابس اريد اشتري فكرتة يتشاقة لان ماينعرف صدكة من شقاة صاح بيه.
ولج يلا هسة البنات راح تخطفني وتهددني اتزوجهن لحكي علية بشرفج اني
زبالة وين يلكطن زبالة
جكليت وداعتج الرعنة
اوكف شوية
طفيتة بوجهة ورحت لميس كتلها
ميوسة عادي اعزم نفر
اكيد عادي قلبي
بس ولد ها
لج هي ولد وبنات راح تجي كل الهلا بضيفج
خوما تصير احراج.
يااا ولج غير اهلهلة بس يجي
ابتسمت بامتنان واخواتي يردن ياكلني الفضول الف صعد قبل لايموتن كتلهن: غضنفر راح يجي
نيزك: هما ثنين بس لو تعوفينهم كلشي يصير بخير
اذن ما اشوف الخير لان ما اعوفهم
عفتها كالبة خلقتها واعرف بيها تموووت من غضنفر ودراهم رغم غضنفر ماشايفتة بس مرة بس لان تعرفة من خلال كلامي عنة اذكرة بالغلط وهيج منتحسة منه وهو فد حباااب اليشوفة يحبة رغم صفحتة سودة.
اتصلت علية انطية العنوان واصفلة المكان بالتحديددد، مر وقت والبنات جهزن طلعن يفترن بالقاعة المعازيم بدت توصل اهلها واقارب امها وابوها شباب وبنات كبار وشوية اعمارهم جبيرة بس الواضح عليها الثراء والراحة ميس ترحب بيهم بابتسامة اكلوها اكل بنظراتهم الخايسة طبعاً بعض الشباب الجاية سحبت اخواتي كلهن على صفحة بعيدة عنهم ضرغام يحجي وي ابوها وامها الواضح يعرفون بعض.
اجت وجبة ثانية بنات وشباب فكيت حلكي واني اشوف لبسهن الاوفر ومكياجهن الصااااارخ اعتقد مامخليات مكياج الا وحاطاتة على وجههن والبس ما احجي عنة لان يخزي مال حفلات بنات اي لان كلش قصير وضيگ ولا يكول عايشين بالعراق.
نجمة: تففففف لاهلا ولا مرحباااا ولجن همم اجن العوووبات
نيزك: صوتج نجمة
نجمة: هم غااادة وطيبة خرب حموووضة يمة معدتي
شهب: صدك ولج مبينات غثثة مثل ما سولفتي عنهن.
نجمة: حاقودات ما اسولفلجن يكول مسويات سفرة لام البنين لان بطلت عبالهن اصير المديرة بس اتوضف
نيزك: هنا وين يعرفن ام البنين دخليها
نجمة: وين عايشات مايعرفنها لج هذا سمار كلي حتى ثواب موزعاات اله
ضحكنا عليها وهي من كل عقلها مصدكة كلام سمار رغم مبين يضحك بس هاي فطير بسرعة تصدك اجت ميس جايبتهن سلمن على نجوم اباوع لطريقة كلامهن الحموضة صعدت عندي هم مو بس عند نجوم.
روان: ماعرفتينا الحلوات منين.
نجمة: اخووااتي ذني
روان: يروحي فدوة ماشاء الله
سلمت علينة بلطف هالبنية ماتشبهن بشي لطيفة كلش واضح عليها، كعدت بيدي كلاص عصير واباوع على المعازيم والناس التجي طبقة مخملية صح مضاهرهم تلمع لكن مملين وسوالفهن ماتنجرع كلامي للبعض بس احس اغلبهم هيج نكد ماعرف يمكن اني ماحب اجوائهم.
وبلحظة البوابة انسدت بشباب طول وضخامة فخامة طاقية عليهم اناقة هيبة الانظار توجهت عليهم والنظرات تاكلهم اكل مو بس البنات لا كل الموجودين يباوعولهم منبهرين ومايحتاج اكول منو لان احفاد الليث ماينوصفون.
سلام حار صار وبعض البنات انسحبن حتى يصيرن قريبات منهم القاعة انملت بالسواد واكيد هذا تنسيق ميس بنات وشباب اسود لانها تعشق هالون واغلب طلاتها بيه.
نجمة: خرررب شوفن الوااااكة راحن يركضن عود شيستفادن ذني.
نيزك: معارف او علاقات بشي يفيدهن شغل مثلاً
نجمة: اكبر لوكياات راحن يسلمن على اووستاذ فقااار اووستاذ قبس المگسب
خزرتها شهب ماقابلة ضربتها تكلها
نجمة: بكيفي احجي علية لاتخوزرين والله زمن تمنعني ما احجي
نيزك: واني هم ما اقبل تحجين لان ولد لطيف وراح يصير نسيبج.
عبست وجهة ساكتة تباوعلهم بعد ماخلصو سلام انظارهم تحولت علينة وكانهم متفاجأين البعض متفاجا يمكن لان كلنا تواجدنا هنا ضرغام لازم اموري وما كتلكم هم لابس قاط وشطالع كيكة اخ لو بيدي ما اخلي بشر يلمحهم الغيرة هاي والطبع راح يموتني واني شباب.
نجمة: بنات بس اجو علية
شهب: غير انتي خريجة والحفلة باسمجن
نجمة: لا فدوه كليلهم بعدني ما متخرجة يمة
شحجي وياااهم لو باركولي.
نيزك: كولي شكراً لحظوركم تسلمون من هذا الكلام
نجمة: ما فدووة انتن جاوبن بمكاني
كطمت كلامها من صارو قريبين بعددهم سلمو سلام واحد كمت من مكاني ارد السلام احتراماً الهم عيب واني كاعدة طلعت اعرف بالعيب شفتو.
باركولها كلهم وفقار يشدد
مادام تخرجين اشتغلي بابا
نجمة: ان شاءلله استاذ
سمار: ولج جنج فصمة احس شكلج مو شكل خربجة
نجمة: لا ترة زين والله يعني يبين على شكلي
سمار: متوسطة يبين.
فقار: بس لا تبالغ وعوف البنات براحتهن
سمار: اويلييي يابة نجمة منين ذني الحاتاتت
كلهم خزرو يردون يملخونة هو مبين فطير هذا الثاني يشمر كلامة بدون تفكير نجمة وجهة انصبغ متوترة ماعرف شبيها بابتسامة تكلة.
اخواتي ذني
سمار: دخيل محمد
كطع كلامة قبس وهو يدك على ضهرة يكلة
قبس: مرت ضرغام ام امير والثانية كاطع مهر عليها فانجب
فتح عيونة متفاجا بعدين استوعب يهز براسة.
سمار: انتن صيرن على صفحة مختووبات بس احجي حجاية اندفن بالمجاري بقيتن ثنين عادي احجي وياجن؟
نجمة: اي عادي
فقار: اني اكول نتطشر مو سمار
سمار: روحو انتو اني اريد اشوف ذني اويليي اجنبية هاي
جان يقصدني رفعت حاجبي باستهزاء بكلبي وين الاجنبية بس اول مرة احجيها طالعة حلوة اني خررب بالشوارع فقار ابتسم بوجهي يسألني
شلونج كواكب
الحمدلله انت شلونك
فقار: مشلوع گلبي
كواكب: ماعاش اليشلع كلبك.
ابتسم بهدوء وضيغم يخزر بية لان ماعبرتة وياة ولد هادئ مبين ساكت مايحجي شي كلة.
ضيغم: امشي صافي ذولة اهل بينهم
صافي: صدقت بس سماري ناخذة
قبس: لاول مرة اكلك اخذ نعالك وامشي
سمار: الله لا يسامحكم على هذا التجريح والكلام القاسي ساشكيكم الى الله
قبس: بس الزم لسانك وروح
سمار: ساذهب لكن ساخذ النجمة هيا نجمة
فقار: شلون يزحلگ بالطين
سمار: هسة يمكمممم اني زميتلي اريد اسولف وياها حرام.
فقار: هي كم يوم داومت شوكت صارت زميلتك
سمار: هسة انت شدخلك ما تگلييي
ذب نفس بوجهة متنرفز وكالب خلقتة اجيت اباوع بعيونة بس جية غضنفر كطعتني وخلت عيوني علية تندار ابتسمت لا ارادي واني اباوعلة لابس قاط اسود مثل قاطي بس اكيد يختلف رجالي والحذاء تلمع والشعر والتسريحة طالع يموووت لايقل عنهم فخامة رحتلة من شفتة يباوع بالوجوة بيدة علب ثنين.
اشرتلة بيدي كلت لو ماشافني اروحلة لمحني اجة باتجاهنا سلم بصوت جهوري كلهم تسالمو وياة باوع بالوجوة مايعرف منو المتخرجة سحبت ميس اكلة.
هاي ميس صاحبة الحلفلة
غضنفر: تشرفنا بمعرفتج انسة شايفة الخير
ميس: تسلم يعمري
شال علبة هدايا فخمممة والتغليف نااازك الصراحة انصدمت بطلعتة هاي قدمها لميس يكلها.
غضنفر: شي بسيط يبقى ذكرى
ميس: جيتك كلش كافي شكراً جزيلا.
فرحت لان رحبت بية بطريقة كلش حلوة اشرتلة على نجمة: اختي نجوم
خزرنة رجعتلة الخزرة همزين سكت وما كال اختهن بس الحمدلله ماكال لان بس كدامي يتخابث باركلها وسلمها الهدية وكف بصفي يسولف وي ضيغم.
غضنفر: كلت ما اشوفك بعد تصدك
ضيغم: تصدك حتى اني
غضنفر: الصدف تلعب دور
انسحبو الولد وهو وياهم بسرعة يذب ميانة ويتعرف على الناس هو وسمار اباوعلهم يكول اصدقاء من زمان كلبوها ضحك وسوالف واني اضحك على ضحكتة.
يهمج.
التفتت على نيزك بثقة جاوبتها: اكيد
ليش شمعنى
رفيق الدرب
ماتعوفين هاي الدرروب ولج والله اعيشج احسن عيشة بيت كلة الج اكعدي بية بصفي ويمنا وشغل ادبرلج بمكان محترم عيشي حياتج مثلنا الى متى تبقين هيج انتي ليش ادفرين النعمة برجليج!؟
ما اعوف اصلي اني والدنيا كلها مايهمني بيها شي غير اصلي والشوارع هي الترجعني لاصلي اذا اعيش مثل ماتكولين بعد للموت ما الكاهم ولا اعرف اني بت منو.
من كل عقلج انتي شتسوين باصلج وين تلكينهم هاي دنيااا دنيااا مو احنا اهلج اخواتج احنا نفديج بروحنا يا اهل ذول التدورين عنهم؟
ما اريد اعيش واني الافكار تاكل بية بت حرام؟ شمروني؟ مايردوني؟ عايشين حياتهم مرتاحين؟ عندي اخوان اخوات؟ ميتين اهلي؟ من ياعشيرة؟ اريد اعرف اموت اذا ما اعرف اني عايشة بس حتى اثبت لنفسي وللناس اني عندي اهل حتى لو بت حرام هم عندي اب خو ما طلعت من فطر الحايط اريد جذرري.
ذبلت ملامحها بقهر وعيونها دمعت واني الغصة بلعومي اعيش مجهولة الهوية المنطقة كلها تعرف اني مو بتهم سالم يكلهم بت حرام كاسب بيها اجر مبقيها بيتي كلهم عيروني باصلي كلهم يباوعولي بطرف عينهم وبيهم مايباوعولي ماعيش اني وانسى كل هذا ما اكون اسرة وجهالي يتعيرون بسببي أصلاً وين اكو واحد يتزوج بت شوارع!
بدت الحفلة ميس الا تسحب نجوم وياها وهي لاطشة بالكاع تستحي اشتغلتت الاغاني وانخفضت الاضاءة صار ركص مو طبيعي سمار اولهم سحب صافي وياة صديقات ميس وطلاب وياهم واقاربهم ذبو لحم احنا بس نباوع عيني على فقار يسولف وي ابو ميس وضرغام لازك بنيزك كالب خلقتة الزفرة.
شعجب مارحت تركص
غضنفر: مو مهيلگ اني
اليركص مهيلك صار؟
خفيف
اويلييي على الثگيل ولا عرفتك
اثگل مني ماكو
واضح ابو الشوارع
غير تسكت ام البيوت
اسواك.
بهذا شكلج تسوين الخلفوني
دنجب
حمرة حمررة ومكحلة العيون جنهن عيون بزون خررب
باهلك ان شاءلله
ان شاءلله امين
دمشي وي الزلم لاتلطش بية
خزرتة كاتم ضحكتة الاجرب عود يصير شخصية وكذا نيزك عيونها علية وعيون ضرغام عليها وشهب عيونها على قبس شطلعت هاي ابتسمت ورحت اخلي كيك بصحن.
هلو
ضيغم: اهلا
االاكل اهم شي خوش تسوي من اجيت تاكل
مليت الماعون لكيتة صافن بوجهي نترت بوجهة
خير ياطير
الطير يكول لو تمسحين الحمرة قبل لا تاكلين.
ليش؟
مايصير تاكلين وانتي مخليتها امسحيها بالبداية ترة تدمرين ومنا ناس مو حلو
مدلي كلنس واني صافنة علية يحجي صدك هذا لو يتشاقة.
كواكب: صح غشيمة بهاي السوالف بس ما اصدك بيك عادي ياكلن وهنا مخليات حمرة
نصحتج بس انتي ماتسمعين الكلام
رفعت كتفي وهو كال: حمرة طوخ غير طلعة منج هاي
ياصخام الحمرة شجلبت دشوف كلها لاطمة ومتصلخة رجعت علية
لان اول مرة اشوفج مخلية بهذا الشكل
ان شاءلله تنعاد
ليش لا عيديها بس بغير مكان.
ولو تطولين شعرج شوية
فتحت عيوني على وسعهن وتخصرت ابتسم يكلي
اشاقة وياج.
عبالي
بس الشعر الطويل يلوكلج جربي
عبست وجهي لعبانة نفسي شعر طويل كال كعدت على طاولة قريبة وهو واكف فوك راسي رفعت عيوني اكلة.
شلونك مرتاح؟
لا
اتخطى
صديق عمري ما اتخطى طعنتة.
هنا اتفق كلشي ولا شخص متعود علية وثاق بية تالي يطلع هيج طلعة بس خيولي
هو خيولي
اي عفية سويلة دفرة من عقلك
ابتسم وعيونة راحت على الموجودين
ضيغم؛ انتي عازمة هذا الولد.
غضنفر؟
اسمة طويل
مو اسمة هذا
رفع حاجبة واني دنكت اكل كال
شلون تعرفتو؟
تعرفت علية
تؤ تؤؤؤ ولج انتي ترفعين الضغط يعني اسالج ترجعين تسالين لو ماتجاوبين
عمي انت شتريد مني صح اني ملتقية بيك واعرفك بس ماكو شي يجمعنا حتى اسولفلك التريدة هسة اني مايحقلي اسالك وانت يحقلك ماتجاوبني
لوفيها لوفيها هسة اصدقاء نفس غضنفر حلو الاصدقاء تعرفين اني عندي اصدقاء من مختلف الجنسيات والبلدان واغلبهم تكون حياتهم مختلفة
حلو.
فضولي يريد يعرف الغريب وانتي غريبة احب تكونين صديقتي حتى استمع قصة جديدة
شكلك تحب القصص انصحك بروايات تقراهن تعيش وياهن بعالم ثاني وهم بيها اشياء غريبة تروي فضولك وتعرفك على حياة مختلفة
ليش لا نقرا روايات مابيها شي
كملت اكلي وهو بمكانة اجة غضنفر كعد وسحب الماعون ياكل.
كواكب: عفت الاكل كلة ورجعتلي شكوو
غضنفر: انجبي خليني اتزقنب
كواكب: اتزقنب زين.
واني كايمة من مكاني خزرت ضيغم لان يباوعلنا شكو هذا شبية رحت اشوف نيزك ضرغام منطيني ضهرة مغطيها مايبين شكلها لفت يلا شفتها صرت قريبة منهم اسمع كلامة الخايس والساقط مثلة.
ضرغام: دخيلك ربج امشي اغسلي وجهج
نيزك: ممخلية مكياج طوخ
ضرغام: ضغطي ارتفع انتي صاحية تخلين كحل لعيونج وهنا وحدهن يكتلن.
عض شفتة وهي تباوع منا ومنا وجهة انصبغ اشتعلت روحك ضرغام تمنيت اسحلة بس كوة لزمت نفسي وابتعدت عنهم گلبي محتررگ حرراگ مايستاهلها ضرغام والله مايستاهلها ويأذيها.
خلصت الهوسة ورحت اشوف نجمة بس تباوع بعيونها خجلانة وميس منطلقة بالكلام وماخذة راحتها ذبيت نفس من شفت شهب لازكة عيونها الحلوة وي قبس وهو وميس يسولفون مندمجين بقيت بمكاني ابلع بريگي اشوف عيونها مغورگة وهو لا يمها انتبهتلي اباوعلها دارت وجهة عني وراحت للحمامات.
جنت بوحدة صرت بثنين وهاي الفاهية مامنتبهة للناس بس هي العيون تاكل بيها اكل رحت وسحبتها وياي ذبت نفس تكلي.
لج ابوووسج اني همزين اجيتي نقذتيني ردت اموت
كواكب: ابقي هيج فاهية وعوبة
نجمة: شفتيهم انتي كلها اغنياااء واصلين الواحد يحسب للكلمة حساب
كواكب: الموجودين اكثرهم بدون اخلاق لاتغرج مضاهرهم التلمع
نجمة: اي لج شفتي ذني ولج تموووعن ويسون حركات مال هتلية علمود الشباب
اخذيها قاعدة ماترتبط بواحد خير لو براسة
حظ تاخذ واحد طايح حظة مثل تصرفاتة وحتى مايطولون
كلامج عسسسل.
كعدنا بطاولة فارغة بعيد عنهم رحت رجعت جبت شهب مطنگرة وجهة كعدتهن سوى نيزك اجتنا من شافتنا وامير وياهن رحت جبتلهن اكل ولو تبقة عليهن فلا ياكلن.
غضنفر اجاني يكلي: راح اروح ترحين وياي
وين اروح وياك ماتكلي
هسة انتي وين ترحين
خل تخلص الحفلة وارجع مو مال اعوفهن وحدهن
انتظرج؟
لا روح اني مامعلوم اجي شوكت
وين جنتي البارحة لو اكلج هالفترة كلها وين تغطين؟
شغل عندي.
اي شنو من شغل شعندج رايحة لمنطقة ××××
كتلك شغل صاير محقق
ادري بيج عقلج لاطش ماكدر اعوفج شسويتي كولي
اشتغلت اسخبارت هالفترة جمع معلومات وتحري هيج شي
درت وجهي عني اريد امسح وجهي بيدي بس اتذكرت مخلية صخام ذبيت نفس واسمعة يضحك يكلي: بير اسرار خرب روحج هسة اني شفتهمت
ترة وضحت هوووواي بس انت غبي شسويلك
ماكو غيرج غبي
انجب يلة
سوى روحة ماسمع يباوع على الموجودين صوفر خفيف وكلي.
لج شلون نسابة ذولة
ترة هنا نفسهن مو اخواتي
اي هسة اليسمعج ماكاتلة روحج عليهن ومشاكلج وعركج وطلايبج وضيم گلبج من وراهن هو انتي وحدج شعندج افرغ من حياتي بس غير من وراهن
علي مودهن صحح كلامك
هذا قبس يتلامع وشلون شخصية
شنو الفايدة مو بحال اختي ومن هسة بجاها
خو ضرغام فد زلمة معدل والفلوس ينام عليهن نوووم
شنو الفايدة ساقط سقوط نخلص من ساقط يطلعنا اسقط منا
هسة واذا ساقط شبيج مو يحبها وميت بيها دباوعي باوعيلة.
كلبت عيوني ماريد اشوفه وهو مركز وي الكل
كواكب: ماتروح يلة
غضنفر: فقار والله زلمة ثگيل وخلوق مو بلة
اول مرة تحجي صح
والله حباب
كلش
لا خوش ولد حتى ذولة الوياهم
اتفق
اروح اسلم عليهم.
راح يمهم واني رحت طلعت الهدايا باركتلها على ميس على انفراد وانطيتها الهدية جانت كلادة ذهب جنت مجمعة فلوس من زمان فكرت هواي بهديا هذا اقل شي اقدمة الها اكلتني بلسانها هالبنية ماكو بلطافتها رحت لنجمة ونفس الهديا الها انبهرت بيها ونيزك من عرفت ذهب بس ترزل بيه.
نيزك: الفلوس تفيدج ياغضب منو عاتب عليج تشترين ذهب
هسة انتي شكو فلوسي لو فلوسج تعبي لو تعبج
نيزك: مو داحجي من صالحج
نجوم ذهب ومايلوكلها غير الذهب.
نجمة: والله ماكو غيرج ذهب
بس انجبن هسة اني دايخة
باوعتلي نيزك بحيرة ولمعت عيونها اعرف كلامي ما راح من بالها وخايفة من الطلعة إلى حتى اني خايفة منها وخايفة لاترفض ساعتها بعد ما اشوفها ولا اتقربلها اعوفها هي وقرارها وهي تعرف كلش زين هذا الكلام لذلك ماترفض كلامي.
طلعت ورة غضنفر اوصية لان گلبي وياة والله وخايفة علية امشي وراة احجي.
لا تولي بغير درب خلصني
غضنفر: هلاا هلااا هلااا لك منو هذا اليغار.
هسة الا تمسلت ولك وين الغيرة بالموضوع اخاف عليك يالغبي
اي وليش تخافين؟
غمزلي كورت ايدي انتر بية: والله لو ما ناس جان عميت عيونك براجدي ولي ولي انت مو مال واحد يحجي وياك
طلع وهو يضحك رحت لكيتهم يسلمون هدايا ونجوم شايلة علب شكد بقيت بمكاني اباوعلهم من ابتعدو رحت يمهن.
نجمة: شوفي كواكب الهدايا جابولي
مو فرحانة لا طايرة فرح ولاول مرة احد يهديلها شي فقار وسمار وحتى قبس الكل الكل جايبيلها هدايا مثل ميس.
شوفي الاستاذ شنو جابلي
ابتسمت وهي تضحك تكمم بفمها علبة شكولاة بشكل جميل بسعادة تشرحلي.
هاي يوصيها من الخارج وما ينطي منها لاي واحد بس اني انطاني منها تدرين بس هو حباب
اعرف والله
اي وحتى قبس جابلي هدية حلوة كلهم حبابين
ميس: ااالله هاي شنو شكولاة
نجمة: هاي استاذ فقار جابها
غادة: لان شافج زعطوطة والله وين اكو وحدة متخرجة يجيبولها ككو
نجمة: معليج اني احبة.
غادة: سوالف زعاطيط عود شوفوني اني طفلة كيوت عبالج ينعجبون بيج هيج عزيزتي اعقلي شوية وبطلي هاي السوالف
طيبة: اني من البداية ردت انصحج تغيرين اسلوبج حتى لاتصيرين مضحكة لليسوى والمايسوى ترة تضحكين باسلوبج هذا
رزان: شبيجن بنات
غادة: انتن هم تضحكن عليها شفتنها صغيرة وتردن بس الجن الانظار
ميس: يا انظار هاااي شبيجن انتن.
عيونها انترست دموع ورجفة بيدها بينت سحبتها عنهن وصرت بمكانها تخوصرت رافعة حاجبي كدامهن مباشرة احجي.
كواكب: وانتن شكو؟
غادة: ننصحها حتى تحس على نفسها شوية
حلو زين اني هم عندي نصيحة الجن تدرن شنو النصيحة؟
ابتسمت اجاوبهن: من تدخل في ما لايعنية يجية راشدي على عينة ويعمية
طيبة: شلون عائلة ايععع وحدة تسوي نفسها طفولية والثانية شقاوة
غادة: يجوز ادور بنات حلوات.
بنفس اللحظة النطقتها سطرتها براشدي رررن رررن باذني من قوتة طفيت عيونها صاحت بالم وخلت ايدها على وجهة درت وجهي للثانية وقبل لاتحجي وتصرخ سطرتها راشدي مو اقل منه قوة بحيث مي بارد ونزل على گلبي اني ادور بنات وحلوات هنا لو ما منحطات مايكولن هيج كلام وكدام كل البنات.
رادت وحدة منهن تكمشني احنا هنا صايرين باخر القاعة بالختلة الكعدت بيها اخواتي هنا اجن يمنة سحلتها من شعرها لجهة الحمامات وكع نصة بيدي كفختها تكفخ والبنات صايرات بينة هي بس صوتها عالي ماحس الا الموسيقى اشتغلت وصوتها اختفى ضحكت بصوت عااالي وشمرت السترة رجعت عليهن يفشرن ويغلطن يكول يعرفنة من زمان ومحملات علينة رجعتلهن وكوة طلعني منهن.
من طلعت يلا شافوني نجمة كدامي تركض فددد جباانة راح تموت خوف لاحظونا من طلعنا سترتي على جتفي شمرتها مبينة متعاركة صار سمار كدامنا يم الموسيقى يحجي بصوت عالي ويضحك.
شلوووني؟ خليتج تفوخين كلبج بعد كلبي
نجمة: هاي انت الشغلت الاغاني ولك ليشش
سمار: گلبي محمل عليهن جنت فايت وسمعتجن كلت خل اركص على صياحهن
كواكب: ما انساها الككك هاي
سمار: بالخدمة بعد اعزمج بكل المناسبات حتى تبردين گلبي.
ضحكت وهو يهز رگبة طلعنا برا ذبيت نفس براحة لفحني الهوا البارد ونجمة تلطم.
نجمة: ولج بس لايشتكن علينة يمااا
وغما التغمج انعل ابهاتهن ياشكوة هاي
عفتها امشي ليكدام طلعت نيزك وشهب ضرغام وراهم شايل اموري نايم على جتفة فتح سيارتة مددة ليورة واجة نيزك تحجي ما قابلة واني اسمع منا اطلع منا اهزلها براسي.
راحت نجمة صعدت يم امير ونيزك صفكت ايد بيد تصيح.
ماكو شي اسمة تفاهم كلة سسسحل سحل يعني شنو موقفنا كدام الناس نتعارك ونطلع بالوجة الاسود.
الما يحترمني ادوسة بقندرتي.
صاح عليها ضرغام وهي تكلة بعصبية
ويامن يرحن ذني امشن يلا اصعدن لانتخزة
ضرغام: يرحن وي قبس هو راجع للبيت
كواكب: امشي روحي للبيت
نيزك: ماعوفج اصعدج كدامي هسة بنص الشارع تتمالخين
كواكب: اذا عادن عدنا.
ابتسمت وهي فحطت ضرغام صعد وشغل السيارة منتظرها تصعد اجو الولد وقبس بالمقدمة يمشي باتجاهنا دنكت راسها شهب تلعب برجلها متوترة
شهب شنو رأيج نفصخ الخطوبة واخذجن بعيد اذا تردن اطول الفترة بين ما ادبر بيت خارج المحافظة؟
رفعت عيونها فاتحتهن بصدمة
شهب: شلون وليش؟
ذولو مامنهم خير خل نطفر النهر مادام بعدة قصير
بلعت ريكها تكلي
شهب: زواجنا هذا الاسبوع كال!
هاي شوكت كال؟
اجة طلعنا مطعم وكلي مادام ماكو مشاكل.
كطعنا كلامنا من صار قريب علينا شهب ابتعدت عنا وهو طگطك ركبتة متآلم.
قبس: يلا تروحن؟
شوكت قررت تتزوج شو ماكلتلي
مو ضروري اكلج
لا والله
ابتسم بدون لايجاوب واني خازرتة حك لحيتة يكلي: هو لعب جهال كدام العالم نعقد ونطلك هيج بسرعة
والله حرنا وياكم دوختووووني
الج الصافي انتي
اجت ميس تعتذر مني فحطانة وجهة احمر
ميس: هنا سم يذبن لو ادري ماعازمتهن
كواكب: يولن بردت كلبي بيهن لاتعتذرين
قبس: شكو شنو صاير.
ميس: ماكو شي بس البنات زودنها بالكلام وي نجمة وكواكب سحلتهن
ضحك ياشر علية مامصدك
قبس: صدك تحجين!
كواكب: اليحرگ گلبي على اخواتي اشهرة واخزية اخواتي خط احمر مو صح النسيب.
قبس: فهمت فهمت قصدج
خوش نسيب هسة انت
باوعتلنا ميس وبخفوت كالت
منو النسيب
كواكب: شنو ماتدرين قبس نسبيي صار؟
نسبيييج!
اممم عقد على شهب وراح يتزوجون.
جمدت ملامحها ماحركت جفن بقيت اترقبها قبس راح لسيارتة وصاح لشهب صعدت ميس ماتحركت الا من اجو كلهم الشباب سمار من حجة يلا رمشت عيونها.
سمار: شقاووة اويلييي شلون عرركة
تخبل عاشت ايدك
سمار: الله يريحج مثل ما ريحتيني علة مخلياتلي افيشش
لبست سترتي من فقار وضيغم اجو يمي بعيونهم يتسالون سكتنا احنا استرخصت اكلهم.
كواكب: عن اذنكم اروح اني
ضيغم: يم ذهب ننجمع كلنة.
هزيت راسي ورحت وي قبس لبيت ذهب ضرغام قبلنا واصل والولد ورانا كل واحد بسيارتة دخلت الهلاهل والجكليت استقبلني ذهب تهلهل وتصفك لنجمة.
بعد ماكملت سلمت عليها واستلمتني معاتب وكعدنا نشعل بسالم ولدة كلوبنا ورمت اخذتلي شوية مابقيت على العشا خفت لا يضلم الجو بسكتة طلعت بس نيزك جلبت بية تكلي ابقي والصبح روحي.
دراهم مريضة اليوم كلة اني مادري شي عنها لازم اروح خطية وحدها.
انتحست وضاجت لان فضلت دراهم عليها حسب قولها واني اشرحلها: دراهم مرة جبيرة وصاحبة فضل علية محتاجتني هسة هي وحدها والوحدة تخوف انتن بين ناس كاعدات ماعليجن شي.
طلعت وسهلة خلتلي اكل بعلب تكلي
عشاج هذا وعشا الحجية سلميلي عليها
يوصل خالة
سهلة: هسة ذهب تشهرني لان ما بقيتي
غير مرة ان شاءلله
نيزك بقت تتشكر منها تكلها
نيزك: خالة والله ماعرف شلون اشكرج تعبتي ويانة تعبناج.
سهلة: هسة شسويت ياعيني مو زين اجتمعو ولدنا من سببجن وشفناهم
طلعت وضرغام طلع اجة وراي وقبل لا اطلع كلي
جاي نجهز للعرس لاتخربينها
لا عرس ولا بطيخ
وحق ربج احلها بس انطيني وقت
الك وقت قبل العرس انت ناهي كلشي
ماكدر قبل العرس مابقالة شي اريد وقت
ماعندي وقت ولا احتمال ثاني يلا باي.
طلعت واني افكر وين اخذهن الولد كل واحد عندة حياة خاصة بيه واخواتي دخلن بحياتهم بدون تخطيط سوو العليهم ساعدوهن بس وقت المساعدة خلصت هسة صار دوري احميهن ماسويت شي اذا بقيتهن، كلشي يكلي اطلعي من المحافظة وطلعيهن بعيد عن سالم بمكان مايفكر بية هناك نعيش مرتاحين احميهن اني بس اريد اناقش نيزك واخذ موافقتها حتى ابدي اجهز للطلعة واخلي غضنفر يساعدني.
رجعت لبيتهم ويا ريتني مارجعت.