رواية المنجمة للكاتبة كفاية كاظم الفصل الثالث
طفرت نجمة من ايدي وطلعت من الغرفة صحت و
بصوت عالي...
نيزك: ووووين رررايحة نجمووم.
ركضت وراها واشوف باب الشارع مفتوح والشارع متروس زلم ملتمين على عمي يتصايحون باصواتهم العالية افنان واكفة تسمع و وجههة مخطوف لونة باوعتلي وعضت اصبعها بحركة وتصيح ااااخ ابتسمت بخباثة وكفت اباواعلهم متشمتة فرحانة بخرابهم كتفت ادية وبقيت استمعلهم لعركتهم وكلبي يفووور نااار يفوررر لو شكد مايتأذون ما يبرد گلبي ولاتطفة ناري عليهم.
دخلت جوة من الاصوات انخفضت و العركة تقريباً فضت رجعت للغرفة وسديت الباب وراي سالتني شهب بخوف.
شهب: شنو هاي الهوسة؟
سامر ماخذ فلوس بمبلغ ضخم من عالم وهسة ناكرة والعالم اجت هدادة تريد فلوسها مادري عمي شكالهم وراحو
شهب: وهذا الصوت شنو جان؟
مادري والله بس جنا قنبلة صوتية.
كعدت افكر معقولة هاي القنبلة هما شمروها شنو يستفادون هما طلابة حق يمنة يجون ياخذون فلوس مو يرمون قنابل صوتية مامعقولة هاي الزلم العاقلة والملسونة تتصرف برعونية ويبدر منها هذا الفعل غريب.! خليت ابني بحضني العب بشعرة واسمع عمي يخابر بشيخنا ولد عمة على الموضوع محترك دمة وينعل بسامر اخس وانكس كون اي والله شوية ودخلت نجمة تركض وجههة يتلاطم جامعة السوالف كلهن وجاية.
نجمة: ولجن بنااات اات اتتت.
نيزك: اخذي نفس اخذي
ولجن ساامر راح تعارك وي الولد الماخذ منه فلوس شلون شامر على بيتنة صوتية ومتضارب هو وياة وجامعتة يگلج كالتلينة كتلة غسل ولبس وهو مصوب واحد بيهم وهسة ماخذتة الشرطة وصايرة طاخ طييخ
نيزك: اريد حوبتنا ما تتخطاهم يارب تاخذ حقنا منهم يارب
شهب، نجمة: اااامين.
طلعت شايلة ابني وشهب تسوي اكل النة صبوحة اجت ودك ولطم على ابنها ومينا مانزلت من غرفتها ولا اجت شافت عمتها تواسيها لو تسكتها اجن اخواتها ترسن البيت يواسن بيها طلعت اباوعلها وعيوني كلهن حقد وشرار شكد ماحالها يكسر كلب المايعرفها من يشوفها اني العكس!
انتبهتلي اباوعلها لطمت على رجليها بحركة وصاحت.
صبيحة: شماتة علييية شماااتة بناات جبااار علگلن راية بيضة علگن من شفتن دمي محروك على ابني وانتي نيزك انتي تشمتي ودكي وركصي
ابتسمت وكتلها
نيزك: ليش اتشمت بيج عزيزتي ليش انتي شمسوية الي؟ مو انتي الاخذت ابني مني ورجعتة لاهلة وكالت مانربي جهال الغربة؟ واكيد مو انتي رادت تنطي ابني الاول لناس ماعدهم جهال وتاخذ بداله فلوس تحطهن بجيبها؟ تجيبين غيرة كلتي وشتسوين بية هسة انتي هم شتسوين بسامر عندج سراج؟
صبيحة: يدعن علية بالعمة عگااارب مخلية بيتي عگااارب يلدغن بية لددغ بس يجي سالم اخلية يطردجن لو اني لو انتن بهذا البيت اكول يتامة اكووول
نيزك: صح يتامة وخفتي الله بيهن ذاك التعامل الحلو والحنية مادكول شافن نجووم الضهر الله ينطيج على كد حسن نيتج ان شاءلله وهذا البيت مو بيتكم هذا من فلوس ابوي تعب ابوي وكدة.
تذكرون شلون جنتو عايشين بالايجارات وكاتلكم الضيم من مات ابوي استوليتم على كلشي وهذا كلة بخيرة حتى وظيفة رجلج بخير ابوي اكلو وذمو بيهم
ودمغو بناتة بس ماتتهنون ابد ماتتهنون ولاتضوكون طعم الفرح والراحة مادام على باطل
دخلت جوة وهنا ضلن يحجن علينا وعلى تربيتنة ما اهتميت وكعدت اكل واوكل بابني نجمة رايحة بيدها صينية جاي وراجعة تاخذ ماي النسوان صارت تروح وتجي على بيتنا صار هوسة.
نيزك: تعالي اكلي عوفيهم يشربون سممم
نجمة: هسة اجي هسة عوفلي اكل وياجن
نيزك: استغفر الله رربي وتالي وي هاي البنية
طلعت نجمة مخبوصة وياهم والمطبخ صار هدوء محد اله خلگ يحجي لو ماشهب كالت بصوت خافت.
شهب: تدرين نجمة تخدمهم حتى تكمل دراستها؟
رفعت حاجبي مافاهمة
شنو
شهب: من تزوجتي بطلوني من المدرسة وراها بفترة بقت بس هي تداوم كالولها ماكو ترحين وحدج اكعدي وي اختج واسكتي و...
فتحت عيوني بصدمة وجهي اشتعل نار.
نيزك: اووكفي اووكفي انتي مو بطلتي من المددرسة بكيفج كلتي ماكدر افهم بعد ورسبت بكلهن؟
نزلت راسها والدموع بدت تتجمع بعيونها صارت تلعب باصابعها وكالت بكسرة خاطر.
شهب: سراج بطلني من المدرسة لان من اجة ياخذني للبيت شاف ولد يم مدرستنا سواله سالفة وكال لابوة يبطلني سوى عركة وكال ماتداوم بعد عمي كالة بكيفك.
جمدت ملامحي وعقلي وكف ماكدر استوعب كلامها شلون يبطل اختي من الدراسة وهي تموت عليها شلون حطم مستقبلها وكعدها! كل هذا مادري عنة شي! لعد شسوو بغيابي وهيج غيروهن؟ شنو شوفوهم؟
گلبي صار يفوور لو احركهم هم ما ارتاح
شهب: نجمة من بطلت ماسكتت تعرفين نجمة شلون جانت وكحة اني سكتت لان ادري لو شنو اسوي ما ارجع هاهي خلصت الدراسة وخلص كلشي يخصها بس نجمة لا لعبت بيهم لعب وشنو صار بس الضرب حصلتة.
كامو يحبسونها بالمخزن منا لمن يروح وقت الدوام ويفتحولها الباب هي هنا تتسودن عليهم وتنكتل كلهم يلتمون عليها يكفخون بيها كواكب جانت يطلعونها للشغل من الصبح وهي كامت لاتشتغل ولا تسوي كلشي بس كاعدة واني اخفي روحي عنهم حتى من يجي سراج اقفل الغرفة علية
نيزك: صبررررني يلعبااااس عليهممم صبررررني ووولجن اكوووم اذب دبة نفططط واشعلهمممم.
بس على كيفج نيزك احنا ليش مانكلج نخاف عليج من هاي سوالفج ندري بيج يس تتاذين ماتسوين شي
اااخ والعباس موتهم حلااال الصبر يا اللهي الصبر كملي ولج كملي سالفة نجمة.
شهب: افنان ملت من شغل البيت بس هي تشتغل وعرك صارت وي صبيحة وجناينها ما يشتغلن بوكتها كلهن جانن بالمطبخ كالن لنجمة تريدين ترجعين للمدرسة نخليج بس بشرط تصيرين خدامتنا واحنا بالمقابل نقنع زلمنا يرجعونج وما يعارضون لان هما مايحبون الدراسة صبيحة كالتلها بس انتي اختج ما ترجع لان هذا المخبل يكلبها علينا.
نجمة ماعدها غير هذا الحل رجعت للمدرسة ومن ذاك يوم وهذا يوم نجمة خدامتهن شيريدن تسويلهن ماتفتح حلكها بحرف وياهن خسرت كرامتها وكسبت دراستها.
نيزك: واني واني ليش محد گلي؟
شهب: تعاركت وي نجمة من شفت شلون يذلن بيها ومافاد لان هي قانعة وتعاركت وياي تكلي لاتدخلين عفتها ما احجي وياها وانتي جنتي ما موجوده كواكب من درت مبطليني تعاركت وياهم وبوكتها كتلوها وحبسوها بالمخزن ومرة طردوها من البيت بنص الليل لان ضربت سراج
ضربت على رجلي بقووة وعضيت اصبعي بحركة كلب.
نيزك: ويلاة يمة ويلاااة.
شهب: شكد شبعت كتل من ورانة كواكب بس تشوف تعاملهن وي نجمة تتخبل عليهن وتاكلها لو يطردونها وتضل ايام بالشارع ماندري عنها اروح اتوسل بافنان تشوفها ورجعتها وبذاك الوكت شكد توسلت بيها ماتفتح موضوع الدراسة يلا هادت
نيزك: زين كون تدرين بنجمة مجبورة تسمعلهم وتنفذلهم اوامر ليش ماتصدكينهاااا هي ما مأذيتج بشي؟ ليش ماتصدكين هي تحبج ما تتمنالج الشرررر؟
شهب: اني ما اكرهها اني حاقدة عليها ذاك موضوع غير سدية نيزك.
دخلت نجمة بيدها صينية استكاين الجاي خلتنهن على الكاونتر واجت كعدت يمة خدودها حمرر دم من الركضة سحبت خبزة صارت تاكل بسرعة وتحجي.
نجمة: وولجن انهبنا انهبناااا
نيزك: لاتغصين على كيفج احجي
نجمة: اي ولج اي الناس تريد فلوسها منين نجيبب ولجننن راح تصير طااخ طيخ الناس تتكاتل علمود الفلوس مدري منين راح يجيبون الهم هيج مبلغ
نيزك: ماكال عمي شلون يسدد الناس يداين لو يلم.
نجمة: لا ماكال بعدة حاير انسطر سطر لازم يشاور صبيحة وافنان يلة يتصرف
نيزك: عساهم لاتصرفو
لليل عافتهم الناس بقو بالاستقبال سالم وسراج وابو عامر وطلال ولد عمة كالولة نجمعلك وانت هم اجمع العندك بعدهم مارايحين وطلعنا نشوف افنان تملخ بروحها وبشعرها تصرخ صريخ مفجوعة وتلطم لطم التمو عليها يعرفون سالفتها وهي تصرخ وتكول.
افنان: انهبنااا انبگنا رراحت فلووسنا رراح تعبنا انبگنا صفينا تراااب.
ضربت على صدرها وجههة وطاحت مغمي عليها صارت زرگة نيييل ركض عليها سراج شالها وركض بيها اخذوها للمستشفى والبيت انكلب صبيحة مافهمت شنو السالفة وكلساع وصرخت تفسر بكيفها ماكو ساعة ورجع عمي سالم صاح بصوت هز البيت هز صرنا نرجف رجف.
سالم: طلعوووو الفلووووس طلعووووهن واحد واحد بهذا البيت احاسبة واطلعهن من عيووونة ولكمممممم طلعوووووهن
ركضتلة مرتة ترجف وجههة مزلغتة.
صبيحة: لاتجلطني شكاعد تحجي شبيهن الفلوس يا فلوووس هنا يافلوووس غير تفهمووني
دفعها عنة وصاح لازم راسة
سالم: انهبناااا الفلوس والذهب انباگنننن ررراااحن
راح لغرفة افنان والولد اجو وراة يوسف راسة مضبر خزرني بحقد ودخل لغرفة امة بقت كلها ملتمة بالصالة تسمع شكو طلع كعد على الدرج لازم راسة بثنين ادية ساكت مايعرف يفكر من الصدمة حتى حجي ما حجة.
سراج: منو الداخل بيتنا هالفترة؟
صبيحة: منو اليدخل بيتنا غير كرايبنا محد غريب داخل لبيتنا
يوسف: مايطلع هالمبلغ من البيت دوروة بالبيت موجود بعدة
عمي بقة ساكت طلع من البيت وبقت هوسة ورة فترة رجعت افنان كوة تمشي منتهية من الحركة تلكتها صبيحة تتحمدلها على السلامة وهي عاطت بيها.
افنان: اخذتن الفلوس ترجعنهااا لا مااا يصبح عليجن صببح
صبيحة: يافلوس تحجين صدك انتي اني اخذ فلوس! وفلوسمن فلوس رجلي يااااع.
افنان: مو بس فلوس رجلج ذهببي وياهن عزوتي وتعبيييي راح والله اطلعة من عيونجن والله طلعناااا حرررامية
نور: شو ماتعرفين تحجين شنو احنا نبوگ فلوس! لاتشملينة بالموضوع شوفي وين وديتي الفلوس وسويتي هذا الفلم حتى تبرين روحج منها
افنان: ولج اني ابوووك الفلوس اااااني؟
نور: اي انتي شكلج راحن انباكن وهنا عندج سالفتج مكشوفة حبيبتي
افنان: بسيطة اني اعلمج الاافرك حلوگجن والفلوس اطلعها من عيونجن.
دخلت جوة ماكو شوية واجن بناتها يهفن بعبيهن كل وحدة شطولها وشكدها عمالقة صاحت وحده منهم
: يلا نشووف تاليتها وياجن ولو ماكو حرامي يضم بوكتة بغرفتة بس نشوف
افنان: اي يبعد امجن انكتن البيت نكت.
صعدن فوك ونور ومينا وراهن راحن واحنا كاعدين نسمع العيطة كلساع تكب بينهن لان نثرن غراضهن نثر يدورن على الفلوس والذهب وما لگنها اجن لغرفتنة ماحجيت وياهن واخواتي مثلي طلعنا وعفنا الغرفة الهن دورن براحتهن وطلعن كملن البيت كلة راحن لامهن يكللها.
مو بالبيت الفلوس مطلعينهن مو هنا اثرر هذا الاثر ما الهن
افنان: صبوحة طلعي الفلوس وين مخليتهن انتي وجناينج الملطلطااااات.
صبيحة: صخاااام الوجههة تعالن شوفن شتكوول ولججج هو غير فلوووس رجلي ولدج
افنان: فلوووس رجلج منين من شغلة جابهن غير كلهن فلوس الكاع والمحلات عافهن عندي لان ما يامنج بييييج
مينا: مو علينة هاي السوالف شوفي شسويتي بيهن وهسة من رادوهن سويتي هذا الفلم وذبيتيها بروسنا
طلعيهن طلعيهن
صبيخة: افنان ولج تالي عمري تهميني اني اخذ ذهبج والفلوس ولكممم يبوووووووووو.
افنان: اي اي انتي صارلج جم يوم انتي وجناينج رايحة راجعة وكله تحجين بالذهب والاسعار ماكو غيرجن انتن سطتين عليهن واخذتنهن
وهيج مرت تلث ايام عركة من الروس ناس تتهم ناس وناس تشمرها على ناس وراحت الفلوس والذهب حلال ابوي هذا تعبة من مات اخذو كلشي يخصة وتصرفو بية راحن بساع بساع والله احترك گلبي بس بعدين اكول لا خلي الاخذهن يتهنا بيهن عوافي علية ومحالل وموهب خل ياكلهن ولا هما ياكلونهن.
ما خلو واحد ما اتهمو صار واحد يتهم الثاني واحد يكول فلان اخذهن واكيد اتهمونا النة لان كاعدين وياهم وجان جوابي.
نيزك: لو احنا بگنا الفلوس ماضلينا يمكم ناخذهن ونشرد بعيد بعيد عنكم شكو باقين لو اخذناهن نعيش مرتاحين ونتصرف بيهن احسن ماباقين بذلكم حسرة علينة الربع.
سكتو عنة ولا جابو طارينة لان يعرفونة مانمد ايدنة على الفلوس لو ذهب لان عيونة شبعانة واحنا بنات خير وعز مو مثلهم اهل فگر من ماتو اهلي يلة عاشو مثل البشر وصارو يتصرفون مثل الحيوانات شلفايدة
عمي سالم متخبل وحاير شيسوي شلون يسدد العالم فلوسهم عرض البيت للبيع وبيوم وليلة هيج هيج انباع البيت سددو الفلوس ودفعو فصل لان الولد الضاربة سامر متاذي وهنا يلة سقطو الدعوة عنة واحنة تبهذلنة فوك بهذالنة...
البيت كل يوم تكب عركة بية على الفلوس تعودنا على الوضع الجديد صار الوضع طبيعي وهما بهلفترة خفو عنا هوواي حايرين بمشاكلهم عساهم لاتفرغو لشي ويطلعون سمهم وخباثتهم علينة.
امشي بالغرفة رايحة راجعة وروحي تلوب اتمنى ارگع راسي بالحايط واخلص من كلشي صار ومن ذكرياتي عصرت راسي بقوة وكعدت يم راس ابني ايدي ترجف بشكل مو طبيعي مسحت على شعرة وگصتة مسخن صاير نار شهب تسوي كمادات الة فوك الساعتين ومانزلت حرارتة لازم اخذة الدكتور بس فلوس ماعندي فلوس منين اجيب؟
باوعت لشهب بحيرة وفركت ايدي
نيزك: منين اجيب فلوس لابني روحي الهم؟
لا نيزك لالاتسوينها حتى لو طلبتي محد ينطيج ربع هذا الربع من جانو كبل شلونهم مو هسة وفلوسهم راحت وضالين على الحديدة بس يوسف اذا سمع يصير ماكو منة ياخذج انتي وابنج
والله لو اعرف اجدي بالشارع وما اطلب منة
روحي لكواكب اكيد عدها فلوس هي تشتغل احسن منه محجوزين هنا
يلا رايحة الها وخل شيصير يصير.
لبست عباتي واخذت ابني شلتة على جتفي وهو سودة علية نايم وخدودة حمر صايرة من الصخونة طلعت وشهب وراي تبوس بية وتكعدة وهو بس يبتسم الها. افنان من شافتني طالعة كامت تصيح وراي.
افنان: وووين مولية وووين تطرگين بيا شاااارع راييحة
نيزك: بشارع الخلفج وذبج علينة
افنان: ايااا يجي عمج واني اعرف شغلي وياج.
نيزك: صبوحة حبيبتي حافظي على رجلج لان افنان ارملة واحسها تركض ورة عمي وهو اخو رجلها وانتي تعرفين ياما زلم اخذت نسوان اخوتهم
انبهت لونها ضلت مصدومة صبيحة وكان حست على روحها اما افنان ماعرفت شنو تحجي بعد من قوة الكلام الكلتة الها فتحت الباب واني اضحك على شكولهن شلون صارت.
نيزك: شهبة لاتطلعين من الغرفة بين ما اجي هسة نجوم تجي من الدوام لاتخافين اغفلي الباب عليج
شهب: روحي حبيبتي ماعلية.
سدت الباب ودخلت جوة واني رحت امشي للسوك اموري نايم على جتفي عيونة ذبلانة من الصخونة سودة علية بنص الطريق يلا حجة وكال.
امير: نانا وين لايحين؟
نشوف خالة كواكب
ااالله اني اهب تواتب
وهي تموووت عليك روحها انت روحها
ضحك منتعشة روحة اموري يفرح من شخص يكلة احبك لو يهتم بية بحيث كل يوم يسالني ويسال خالاتة.
امير: ادلج تهبيني؟
وفد يفرح من نجاوبة بست ايدة احضنة بقوة لصدري ياروحي يايمة شعندي غيرك انت روحي ودنيتي وصلنا للسوك ندور على كواكب رحنا للمكان التبيع بية مخضر لكيتة معزل بهت وجهي وگلبي لجمني ليش معزلة، رحت اسال اهل المحلات عليها.
خوية وين البنية التبيع هنا هي والمرة الجبيرة ا
ذبلت ملامحة حزن وگال بحسرة خمشت گلبي
والله ياخوية ام حربي انطتج عمرها من فترة والوليد الوياها اختفى من يومها.
تبخرت قوتي ونزلت ابني اكعد على الصبة واكعدة بحضني صرت ادك على رجلي وروحي تلوب عليها وين راحت شنو تشتغل هسة هي وووين؟
كعدتي ماجابت نتيجة وابني بعدة مسخن كمت بية اسحل بروحي سحل داخلي ينزف شسوي اگلهم اريد فلوس اعالج ابني شلون تطلع من حلگي والله ماتطلع ماكدر اطلب فلوس! رحت اسال اصحاب المحلات مايعرفون اسمها ومن اكلهم جانت تشتغل هنا يكلولي قصدج الوليد اخ منج ياكواكب باي ارض صرتي صرت اتحسب على عمي ولدة وادعي عليهن بگلب محروگ ابني بيدي مريض واني بطرك روحي اجاني ولد يركض من بعيد وكف كدامي يتنفس سريع.
تريدين كواكب؟
تعرفها.
شلون ماعرفها اني محمود كواكب ضلعتي
يحجي بحماس وفرح ابتسمت وعيوني غوركت بالدموع...
نيزك: ياريت وينها هسة
والله مادري عنها هالفترة بس روحي لاهل المعارض اساليهم عنها يمكن هالفترة تشتغل عدهم لان ماكو
وين صايرة المعارض هاي
دلني على المكان تشكرت منة رحت امشي وبالي الف حسبة وسؤال شعدها وي اهل المعارض؟ واذا جانت تشتغل شنو الشغل التحصلة بهيج مكاان!
امير: نانا اليد مصاصة.
ها حبيبي هسة اشتريلك كومة مصاص بس الكة خالتك ياروحي
تذبن (تجذبن) الية
لا ياروحي ما اجذب هسة اشتريلك وصلنة تنزل تمشي
اااي
نزلتة يمشي بالكاع لزمت ايدة ودخلت للمعرض وجهي اشتعل نار من دخلت كله سيارات دفع رباعي وغيرها من السيارات الراقية شكو اني هناااا؟
صار كدامي شاب منطيني ضهرة اكتافة عراض وشعرة صفر محلقة قبل لا احجي التفت علية گلبي تسارع بقوة من شفت شكلة ملامحة عابسة حاجبة مطبور ولحيتة شوية طويلة حجة بصوت خشن.
تفضلي بشنو اكدر افيدج
نيزك: اني اجيت اسال على وحدة اسمها كواكب كالو تجي هنا
بهتت ملامحي من ضحك بصوت عالي هذا ليش يضحك شنو كتلة نكتة مثلا!
نيزك: عفواً ليش الضحك مجرد سؤال
مسح على لحيتة ودنك راسة إلى يحجي بخفوت.
جاية تدورين على المنجمة حتى تعرف حبيبج يخونج لو لا؟
لاااا
ها لعد اكيد حتى تعرفين يتزوجج لو يضحك عليج
نيزك: اشوووو انتتت ماتعررف تحجيييي اشفتتتني
اووو اعصابج هسة اني شكلت غير عود اتوقع بلكت اصير منجم بس تردين نصيحة ابتعدي عن هاي السوالف لان تضر وهاي البنية بالذات ابتعدي عنها
شكراً على النصيحة بس هاي البنية اختي واريد اعرف وين هي
فتح عيونة مصدوم ابتسم وهز راسة لا مامصدك.
شبيك وين هي؟ تعرف شي عنها كووول شبيها اختييي!
مستحيل هاي تكون اختج شلوووون
شكو شلون شكووو جاوبنييي وووين هي؟
نفس العصبية ثنينجن بس لاشكل ولا اخلاق تشابهن سبحان الله مستحيل يكول تقربن لبعض
اعرف وين هسة هي
امشي اخذج الها
لا شكراً اني اروح
مايصير وحدج ترحين
مافهمت ليش واصلاً ماخلاني اسال لان طلع كدامي يمشي والمفروض هسة الحگة دنكت شلت ابني ومشيت وراة جان سريع كلشي فحطت وكفت وهو مكمل بمشية صحت وراة.
اوووكف شوية نفسي انگطع ووين ماخذني ووين
التفتت علية من شافني وراة رجع علية صار قريب مني استغربت شيريد هذا وقبل لا احجي اخذ ابني من ايدي شالة بحضنة ويبعد شعرة النازل على عيونة ابتسم وگال.
اروح فدوة ونذر لهذا الوجة
ابتسمت وهو فوراً انتبة علقت
نيزك: هاي الكلمة كواكب دوم دكولها
عفس ملامحة من ذكرت اسم كواكب وكلب عيونة يهمس بخفوت كدرت اسمعة.
ام سجينة ام دچة الرعنة الدايحة الصايعة السحارة ام الجنانوة.
هااااي اختييي التحجييي عليييهااا هيييي
لا مو عليها وحدي مخبل شعليج
اخذ ابني ومشة كدامي يسولف وياة ماسمع شنو يكلة بس صوت امير عالي لان يحجي بحركة.
امير: نانا وندوم وتواتب تلهن تدابات مايزيبلي مصاص يطحكن علية.
مو خوش سالفة شلون يضحكن على رجال مثلك
برطم شفتة يفكر وهو عينة صارت بعيني كال
ترة مسخن
اي اعرف هو اجيت علمود اخذ كواكب
حتى تتعارك وي المراجعين وتدخل قبلهم تكلبها طوارى هالخبلة.
اشو انت تحجي على اختي كداامي!
اسف يابة انتم عائلة اعصاب اني اعتذر جنت اتشاقة وياج
سرع خطواتة واني اركض وراة عليك يا الله وين يوصل مادري وين كواكب هم ما ادري! قبل لا افتح حلكي واحجي اشرلي على مركز تجميل رفعت حاجبي باستفهام.
هنا تشتغل اختج بهذا المركز
وانت وين تعرف
الچلب العندي قنعها تشتغل هنا.
ضحك واني دخلت جوة احسة مو صاحي او يمكن هيج احس لان شكلة يخوف ديلا هسة اني شلوني عاد دخلت جوة ادورها بعيوني المركز جبير مادخلت جوة سالت العاملة عليها گالتلي بالضبط.
هاي البنية ام شعر الولادي بطلت قبل فترة
ليش بطلت ماتعرفين؟
تعاركت وي الزبونة وعافت الشغل
ماتعرفين مكانها؟
لا والله لان هي مابقت هواي يمنا.
تشكرتها وطلعت وجهي نااار اختلطت مشاعر الحزن والحيرة والخوف مادري شي عن اختي الضالة بالشوارع ماعرف بيا مكان لو ابني المريض لحظة ابني اني شلوون اعوفة يم الولد طلعت بسرعة وكفت لازمة بريك من شفتة يمسح على خد امير باصبعة ويحجي وياة تقربت عليهم اندارلي مديت ايدي اخذ ابني ماقبل.
ها شو ماكو ام دچة وياج؟
مبطلة من الشغل
اكيد ساحلة وحدة من شعرها واكعة راسها بالحايط لان طاكة علجها بوجهة.
مو لهدرجة كواكب ماتسوي هيج
اااخ ياكواكب اااخ
احسك تعرفها شلون تعرفتو على بعض
اساليها تكلج
اي بس انطيني ابني
رفع حاجبة وصفن بوجهي
نيزك: ممكن تنطينياة؟
عبالي اخوج الصغير تدرين؟
هزيت راسي اخلي ادية على وجهة الحار كال
ترة مسخن لاينشمر خطية تلاحكية هاي كواكب ماتحصلين من وراها خير اتصلي بابوة خل يجي
فز گلبي بخوف ورجف جسمي هذا وجهي احسة نار اشتعل من جاب طاري ابوة هزيت راسي مثل المخبلة وكلني صرت ارجف وي ذكرة.
لا لا اني ابوة اني ابوة ماعندة ابو هو
مشيت بخطوات سريعة حالتي مو طبيعية اعصر ابني لحضني واهز راسي بخبال.
نيزك: ابني هو ابني ماعندة ابو هو ماعندة بس اني الك امير ماما نانا الك ماكو بابا ماكو شبح باح باح تسمعني مو
نزلت دموعي بغزارة احس گلبي دكاتة تسارعت بعد ماعندي طاقة امشي اختنگت التفتت وراي شفتة بعدة يمشي وراي صحت علية ابجي بخبال وابني خايف بحظني.
تعااال تعااال اخذ ابنيي اخذة رراااح يموووت تعاال اخذة فددووة
صار كدامي ارجف كلني ارجف اخذة مني متعجب من الحالة الاني بيها ضربت على وجهي اصيح بية
نيزك: اخذةةة فددووة اخذة فددووة ررراح يموووووت.
هز راسة وطلع بية ليكدام واني باقية بمكاني ماتحركت خطوة رجلية تجمدن بالكاع احس نفسي مو بعقلي مثل الرجعت للماضي اباوعلة شلون يبتعد عني وابني وياة الى ان اختفى واني بمكاني بس اصرخ اصرخ بدون صوت مخنوكة كان الجاثوم نايم على صدري بس دموع تغمر وجهي ماكو دقايق دقايق وشخطت سيارة رجعتني للواقع صارت كدامي وهو يسوق فتح الجامة يكلي اصعدي صعدت ورة جسمي يرجف رجف صرت اكل باضافري بدون ماحس على نفسي.
اخذي مااي الوووو ويااااي انتي
فزيت علية واكف مدخل راسة من الجامة البصفي بيدة بطل مي مفتوح اخذته منة بيد ترجف ردت اشربة ورجعت باوعت بوجهة رجعتة.
نيزك: ماريد ماريد اني مو عطشانة والله
ميخالف بس اشربي حتى تهدين ابنج زين
نيزك: اي هو ابني اني زين مايعوفني حتى اني ما اعوفة للموت
بالضبط مايعوفج ولا احد ياخذة منج بس اشربي.
رجع قدملي البطل اخذتة منة اشرب ويتكبكب على ملابسي من الرجفة رجع لمكانة يسوق ماكو دقايق وصلنا للمستشفى اخذ ابني شالة وهو ساكت بيدة بقيت بس اباوع عليهم من بعيد رجع يكلي بامر
امشي وراي لاتبقين واكفة امشيي
هزيت راسي وصرت امشي وراة بس مو واعية لشي امشي جسد بلا روح، كاعدة على الكراسي اهز رجلي بجنون ودموعي تنزل من ذيج اللحظة لهاي اللحظة ما انكطعت ابدد.!
اساعدج بكلشي تحتاجينة بس لاتبجين.
مو اني ابجي هما هما بجوني
عساهم بالعمة ماعدهم رحمة يبجون هاي العيون الذ.
قطع كلمتة وابتعد عني مسافة كمت رحت يمة التفت علية.
اريد اختي كواكب حباب خليها تجيني
ان شاءلله بس اهدي ولا تخافين
سحب موبايلة واتصل بماعرف منو رجعت كعدت بمكاني روح تطلع وترجع بهلاثناء تعبت من كلشي تعبت!
اووووكفييييي ووولج اوووكفييي.
وسمممم ومرررض شكووو لاحگنييي
وكفت اتنفس بعصبية نفسي عالي تقدم علية بخطوات سريعة وگف كدامي خليت ايدي على خصري هالحركة للموت ماعوفها بكل مكان وزمان مرافقتني نترت بوجهها قبل لايحجي.
كواكب: شتريد لاتخبلني
ضيغم: اريد احجي وياج شلون يعني فد شخصية انتي؟
عفية شخصية مهمة هم مو عبالك
ركزت بعيونة دقايق غمضت عيوني وحجيت بهدوء
كواكب: ناوي على شر يا ضيم لاترتكب بيهم جريمة تروح بيها والله.
مسح على شفتة يتوعد بغل وحقد
ضغيم: الموت ارحم الهم شفايتهم لو ارتكب بيهم جريمة شفايتلهم هالخونة
گلي شناوي احس راح يتاذون باي طريقة
ميخصج
لا والله شبيك انت بابا اذا مايخصني شكو جاي وراي؟
ليش تركتي الشغل بالمركز وين تحصلين مثلة بعد
دكيت وشوم وعفتة شعليك انت
تربية شوارع ما اعتب عليج
باوع للوشم الورة اذني جانت جمجمة شكلها واضح ومنبت بيها خنجر رفع حاجبة بتعجب وكال.
شلون تعرفعها ام سحورة جمجمة داكة البنات يدكن فراشة وردة وهي سجاجين وجماجم
هاي هيج ترى اكو وشوم دكيتها تخلس خلس وحتى البنية ماقبلت توشمهن وترردت كوة قنعتها
ضيغم: صار عندي فضول اشوفهن
انجب شو انت ماتستحي
شمدريني اني داكتهن باماكن خاصة ترة هيج كلتها ما اقصد شي بس انتي السانج والغلطة نيتج خابطة بت شوارع بعد
عفية ودير بالك تتورط وي بنت الشوارع شي يوم
الله يبعدني عنها
امين اااامين.
عفتة ومشيت اغلط علية اجة وراي يمشي سريع يلاحكني وكفت التفتت علية باوع بعيوني ذبيت نفس.
كواكب: شنو راح تسوي وياهم
كسرهم جبير صدكي اسوي بيهم الماصار
اشوف بعيونك نار تريد تاكلهم بس لاتتهور لاتحرك الاخضر بغلط اليابس
اني اجيتج على هاي اريد اتاكد من شخص واحد اخاف اذية ويطلع مالة علم بالموضوع
تاكد منه قبل لاتكسرة
واني اجيتج بخصوص هالموضوع
ضحك بانكسار ينزل راسة بالكاع رفعة يباوعلي عيونة مدمعة.
ضغيم: والله وكت الخلاني افتر ورة منجمة تعرفلي حقيقة ناسي ومنو وياي ومنو علية
ديلا يلا
امشي وياي كواكب
لو تموت
ساعديني لا اهلك نفسي شايفة لو اذيتة وطلع مو وياهم اموت بقهري
امري لله بس شنو المقابل تعرف بنت الشوارع ماتشتغل بلاش
التريدينة
مقابل موخر
شلون يعني
اريد منك تساعدني بيوم اطيح بشدة بيوم يجي شخص يكلك كواكب هيج صاير وياها هنا انت تساعدني ويكون هذا المقابل.
مشيت وياة للسيارة عفتة وراي صافن بكلامي صعدت بالصدر اجة صعد وشغل بقيت ساكتة لو ماهو حجة وكال.
صاير وياج شي
هسة لو لو منتبة كتلك بالمستقبل يعني ما احتاج منك هسة شي تكدر تعتبرة دين بطريقة مختلفة
لازم متورطة بشي وتفكرين توكعين
امممم
الله كريم تدرين اتمنى اعرف قصتج شنو منجمة وبنية تشتغل بالشارع حالها حال الولد شي غريب
ماكو شي غريب بهاي الدنيا ضييم.
ابتسم لا يجاوبني هو يدري كل الزين ماراح احجيلة على شي يخصني لذلك سكت وبعيونة فضول يابو فضول حقة والله حاسة بية طول الطريق ساكتين كل شخص يفكر شراح يسوي لباجر.
وصلنا للمكان الجايين علية نزلت ابتعد عنة وعن سيارتة نزل يمشي راح لولد يبيع جاي دفعلة فلوس واجة يعدل بشعرة السرح.
ضيغم: جيبي الجاي وتعالي ورانة.
هزيت راسي وخليتة يروح دقايق مرت يلا سويت الكالة اخذت الجاي بصينية صغيرة ورحت لكيتة يسولف وي شخص منطيني ضهرة يحجي بانفعال وضغيم صافن بوجهة عود يقلدني لوووو تموووت ماتعرف شي والله.
صافي: شبييك وولك شو صافن بوجهي بس لاتكول هذا ليش هيج بشرتة صافية وشعرة يلمع ورموشة طووال اييي اييي لاتخلي عينك صح اني احلى منك بس ميخالف انت هم حلو
صافي
بيك شي؟!
من وصلت التفتتو يباوعولي باوعت بوجهة ضيغم خافي تعابير وجهة لوضع الجمود عبالة ماكدر اشوف الخوف البعيونة خايف لايخسرة ومبين شكد يحبة وعندة مكانة بگلبة هزيت راسي وقدمت الصينية اخذ استكان الجاي وقدمتة ل صافي ركزت بعيونة وطووولت طولت اقرا المدفون هل فعلاً هذا وجهة لو قناع لابسة؟
صافي: ووولكم راح اقددم بجمال العراق شني وجهي شبيةةة هييييي
ضيغم: انجب صاافي انجب
صافي: مو كدام الغررربة وولك احترمني شني هاااي.
ابتسمت ودرت وجهي لضغيم الواكف على ناااار من شاف ابتسامتي عرف صافي مو وياهم مي باارد ونزل على گلبة ابتسم وعرضت ابتسامة يضرب على زند صافي بقوة.
ضيغم: صديق العمررر انت
ضحك صافي بخجل يمسح على زندة
صافي: ررروح الرروح
رفع عيونة اله متفاجا بفرحة ضيغم سالة بهدوء
صافي: احسك فرحان وانت ماتفرح بس بفرحة الزهرة.
انسحبت بهدوء بداخلي سعاده حقيقة لاول مرة اشعر بيها بعد ايام تمنيت ولاول مرة تتحقق امنيتي تمنيت صافي فعلاً يطلع صافي مثل اسمة ومامتفق على ضغيم وياهم، اسمع سوالفهم وضحكهم من بعيد
رحت وكفت على جهة رفعت راسي اباوع للسما والسؤال العجزت افهم جوابة.
اني منجمة؟
كالت دراهم انتي منجمة تكدرين تقرين البشر من عيونة وماجذبت بس شلون اكدر اكشف هل اني فعلاً منجمة لو عندي بصيرة عجزت افهم نفسي وافهم غيري كالتلي نيزك التنجيم حرام محد يعلم بالغيب مايصير تكشفين بس اني ما اسمعلها ابد.
يلا امشي اوصلج
التفت علية وهزيت راسي صعدت بدون لا احجي شي مشت السيارة سريع التفتت علية اركز بملامحة من يحجي.
ضغيم: قسم وعهد علية يا كواكب لو تدخلين بمشكلة الها اول مالها تالي راح اساعدج مثل ماساعدتيني
ابتسمت واني اهز راسي اشعر بالراحة اول مرة اشوف شخص فرحان بسببي ذب حسرة وكال بحركةكلب.
تدرين هذا الليل اني مانايمة من وراهم
رجع ذب حسرة عالية وسكت واني اكتفيت بالسكوت لحد ماوصلت للسوك كتلة ينزلني نزلت من السيارة وعيوني بعيونة. بقت كتلة بجمود.
كواكب: انتهى شغلك وياي كمنجمة وانتهى شغلنا.
ضيغم: بقة بس الدين انتي ساعدتيني حتى اعرف الحقيقة واني راح اساعدج بيوم من الايام
بس هذا الراح يجمعنا ويكون مرة وحدة بالعمر باي
عفتة ورجعت للسوك گلبي يفور بعد ماشفت البسطية شلون معزلة رجفت بقهر ابلع غصتي احاول امنع دموعي ماتنزل هنا جنت اشتغل سنييين هنا ام حربي جانت تتلكاني بذاك الملكة الحلو نشتغل سوية بالمخضر ماقصرت وياي تنطيني يومة كاملة عايشة بسدها جنت واجة الموت اخذها مني وعافني بلا سد احتمي بية.
ذكريات سنين وايام موجوده هنا راحت وي ام حربي كل يوم امر لبيتها بلكت تطلعلي وتطلع عايشة ماميتة جذب بس ياجذب واني المشيت بتشييعها
وصحت لا اله الا الله واشتغلت بفاتحتها ضربت على گلبي احس بركان يغلي بداخلي كلشي حلو يروح مني وتبقى ذكرياتة تخنگ بية خنگ
كووواكب ووولج
هه هلا محمود
محمود: واخيررراً نور السوگ بعد بيتي وينج
رجعت محمود الشغل برا السوك مايناسبني هل رجعت افكر افتح البسطية وارجع الشغلي.
ايييي ولج هاي الاخبار الحلوة ترة اطلبج كلاصين جاي
واني اطلبك فلوس لفة لاتنسة
دهر ولاتنسين.
وحد عنك يلا طيحهن وحدة بوحدة صارت
صار طايحات لعيونج، اكلج صدك اليوم اجت بنية وياها ولد تسال عليج
فز گلبي من مكانة جاوبت بخوف
شبيهااا نيززك؟ وينهااا ماتجي هي الا صاير شي
مادري والله بس صح بيها شي جانت مو زينة هوواي سالت عنج بالسوك
ووين راحت فدوة محمود ووين؟
وديتها للمعرض كلت بلكت هناك تلكاج روحي اساليهم اجتهم لا.
رحت اركض كلبي طاير احساسي يكلي نيزك بيها شي سويت الطريق خطوتين خطوتين واني بالمعرض اسال الولد عن ضرغام الغثة بس جاوبوني بشي اخذ روحي وگلبي اختي بالمستشفى وضرغام مبلغهم يدورن عني اجيت برجلية الهم رجف جسمي خوف وكتلة يخابرة احجي وياة اتصل وانطاني الموبايل اخذتة بدين ترعش حتى صوتي يرجف من الخوف.
الو ها ولك ها وين اختي وينها بيها شي نيزك
ضرغام: لا بس تعالي شوفيها محتاجتج احنا بمستشفى
صدك اختي مابيها شي؟
جذب اختج سوت حادث.
كال هاجملة وسد الموبايل بوجهي واني ماعرف شلون رحت ماعرف شلون وصلت من حركة كلبي اركض مثل المخبلة روح هاي الروح مابية بين ماوصلت للردهة الكالي عليها طالعة روحي وعقلي هنا واشوف نيزك كاعدة تعض باصابعها وتبجي بدون صوت روحي خرت مني بشوفتها سالمة وكعت على اركبي اجر النفس جر ودموعي تتسابق فرحة على عدم تصديق ارفع راسي اباوعلها مابيها شي مامسوية حادث اختي عايشة ومامتاذية الف الحمدلله والشكر ياربييي!
شافتني وهي نشغت اجتني تركض كعدت كبالي تحضني بكل قوتها وتبجي واني احضن بيها واشم بعطرها.
نيزك: وينج انتي والله اني بعازتج
ياروحي يا عمري انتي مابيج شي ماتصدكين فرحتي شلونها
ابتعدت عني تلزم وجهي بثنين اديها وترجف
نيزك: ابني كواكب اموري راح يروح مني امشي شوفية فدوووة
حجتها وغطت وجههة ترجف كمت من مكاني ادور بعيوني علية لكيت ضرغام واكف يباوعلنة مسحت وجهي بيدي وتقدمت تجاهة كلني حقد وغل علية.
كواكب: اذا ما احرك گلبك مثل ماحركت گلبي وخليتني مثل المخبلة، تجذب علية بهيج خبر انت صاحي!؟
ابتسم وكال برود
ضرغام: تستاهلين ليش تلحين مو تعرفيني ماحب الملحة
هزيت راسي اتوعدلة
سهلة سهلة هسة وين امير وينة.
اشرالي على الردهة رحت امشي سريع دمعت عيوني من شوفتة مشكليلة مغذي ونايم مثل الطير ياروحي رحتلة ابوس بدية وبوجهة وهو نايم سالت الممرضة كالت نزلت حرارتة بس يخلص المغذي يكدر يطلع عفتة و رجعت لنيزك مثل المخبلة كاعد تاكل بروحها من شفتها بهذا حالتها قسمت وحلفت بكل مقدسات الكون اخبلهم مثل ما خبلوها وخلوها بهذا الحال حضنتها ونزلت راسي احجي قريب عنها لازمة اديها.
حبيبتي نيزك اموري زين تكدرين تشوفينة لاتخافين
نيزك: اخاف يطلع جذب وبية شي
اني اجذب اني؟ اني كواكب اختج وسندج ركزي وياي بس ركززي
هزت راسها وهي تباوع بعيوني رفعت ايدها بستها وايدتها تكوم تشوف ابنها كامت مترددة ترجف عبالها ابنها بية شي وكل ما اشوفها بهاي الحالة الشياطين تفتر براسي وكل واحد بيهم يوسوسلي على مصيبة اكبر واني اسكت بيهم واكول مو وكتها ارجعلكم ارجعلكم وانفذ الكلتوة.
راحت يم ابنها تبوس بية ودموعها ماتسكت كعدت يمها امسح بدموعها واعصر باصابعها قوي.
كافي يمة كافي هذا ابنج مابية شي هي صخونة
خفت كواكب خفت عبالي مات عبالي بقيت وحدي مالكيتج دورتج هواي ومالكيتج عبالي بقيت وحدي بس اني وابني حتى فلوس ماعندي هذا الربع مابجيبي
كلة من وراي اني ماعفتلجن فلوس طاح حظي.
لاتلومين بروحج بكل شي يصير كلة من سببهم هما شوفي حتى من حقدهم علينا الله سلط واحد يبوك فلوسهم كلهم وهسة كل يوم عركة بينهم تخيلي كواكب شارتج خلتهم مايكعدون سوى ولا يجتمعون مثل قبل باقين واحد حاقد على الثاني واحد يتهم الثاني تذكرين الكلتية تحقق كلة
ضحكت اضرب على رجلي صوت ضحكتي عالي اتوعدلهم بكلبي واكول اني الكم بس انطوني صبر اذا ماخبلتكم وهجولتكم ما اطلع بنت الحرام الطردتوها الف مرة من البيت.
صحى امير وصار يسولف ويانة فررح بشوفتي يضحك مامصدك ويعبرلي عن اشتياقة بسوالفة الحلوة.
امير: اتي وين لحتي تواتب عبالي التلب اتلج
كواكب: افااا اني جلب ياكلني مو عيببب
امير: هم صح تواتب عوية (قوية)
كواكب: اي اي هذا الحجي الحلو كواكب باتمان وجنتل مان وسوبر مان
ضرغام: كله مااان مااان شوكت تتذكرين انتي بنية؟
التفتت علية واكف بالباب بيدة علبة شايلها كلبت عيوني وطفرت من الفراش اروحلة.
كواكب: لاتدخل انت خوش يلااااا اطلع منا عابت هالشكل الازرگ خرب شكلك مابية لاقبول ولارحمة
ضرغام: هسة شكلج اليخبل متروس قبول ورحمة اشو جنج ولد خشبة وتمشي بالشارع
كواكب: درروح رروح جنك بعيجي يكول امك متنسية بيك ببعيجية وطلعت طبق الاصل عنهم
رص على اسنانة بقوة يريد ينفجر بوجهي ابتسمت ارفع بحواجبي استفزيتة استفزيتة والله يبرد گلبي من استفزة اجت نيزك من شافت الوضع حامي تكول بصوت ناصي تعبان.
كولو يا الله شبيج كواكب وي الرجال
كواكب: هاي كدامة احجي لو تحتركين يانيزك وبيدة الماي لاتكليلة طفيني افتهمتيييي ديربالج توصلين لضرغااام.؟
سكتت تباوعلنا ثنينة ومستغربة من هالعداوة هزتلي براسها اسكت انطيتهم ضهري واسمعها تحجي وياة.
نيزك: ممتنة الك كلش هواي وموقفك هذا ماانساة للموت جنت بوضع كلش حرج وابني بيدي ماعرف شنو صار لو مامساعدني وجايبنة للمستشفى
ضرغام: ماسويت شي واجبي هذا بس عادي اشوف امير.
التفتت علية رافعة حاجبي بمعنى لابلة عرف قصدي وابتسم بخبث يكل لنيزك.
ضرغام: انتو حبابين ماعرف شلون هاي خالة الطف طفل واختج
نيزك تاشرلي اسكت واني اريد اهد علية اخرب وجهة واطير برستيجة الماصخ حركت كلبي نيزك والله لو ماهي ماريد اواريها وجهي الحقيقي راح لاموري قدملة علبة حلويات فتحة اله بيها مصاص واشكال اموري خدودة صارت حمر يخلي ايدة على حلكة ويضحك يباوع لامة وهو يحجي وياة.
ضرغام: عجبتك احجي.
امير: اي اي هواي عزبتني انت هباب امو (عمو)
ضحك منتعشة روحة على طريقة كلامة وشكلة ماتحملت هالقرب من شي يخصني اخواتي وامير شي يخصني ما من حقة يتقرب هالقرب عليهم امووت نارر تاكل بيه وقبل لا اطردة نيزك سحبتني من ايدي تهمس همس.
فدوة كواكب اسكتي ولج عيب الرجال فوك ماعايف شغلة وباقي وياي هيج تعاملينة
هذا حقير نيزك اخر مرة تباوعلين بشكلة وتحجين وياة شوية وخلية يطلع.
طلعت من الغرفة اكل بروحي شجابة هذا على اختي اكثر بشر اكرهة ومااطيقة يوكف لاختي ويعرفها اااخ رحت ادفع فلوس المستشفى وابن الشريفة دافع الفلوس رجعت للغرفة ماشوف كدامي شنو يدفع الفلوس شيقصد هذا بسيطة اني اعلمة؟
ووينة وجهة البعيجي وووووينة؟
نيزك: يبوو يكواكب راح الرجال عنده شغل
ابن الشررريفة اني اعلمة
شعندج وياة ولج شمسويلج
شحدة يسويلي شي غير احرك المعرض هو والبية بس يحاجيني
بعد شكو.
ماكو شي بس دااافع الفلوس ورايح
وحتى راد يوصلني بس رفضت كلت تتعاركين وياة اشوفج حامية علية
كلششش
بعد فترة طلعنا من المستشفى اموري صار زين وفد فرحان بالحلويات احتركت كواكب بنار ونفط من اشوف فرحتة بشي بسيط انعل روحي الف نعلة وين عنة اني مو خالتة معتبرة روحي طاح حظج ياكواكب على هذا الاهمال رجعنا للبيت ونيزك جلبت بية الا اروح وياها واني ادري كل الزين تصير عركة بس كلت ما اكسر بخاطرها واشوف البنات وارجع.
نيزك جانت خايفة ترجف منهم خاف يحاجونها ويكللوها وين جنتي ومايرحمونها هي وابنها واني اطمن بيها طول الطريق مديت ايدي بجيبي السجينة موجوده كلت بس يحاجونها انحرهم كلهممم نحرر من الوريد للوريد واخلص اخواتي منهم تالي ادخل بيهم سجن مايهمني كلشي توقعت الگة كدامي بس الگيتة صاير ماتوقعتة ولا مخليتة بالحسبان.
جمدنا بمكانا الدم هذا الدم وكف بعروكنا شعر راسنا وكف نيزك انهارت بيدي واني الشياطين عمت عيوني
عمي...