رواية المنجمة للكاتبة كفاية كاظم الفصل الثالث والعشرون
الله اكبررررر الله اكبررر
لا اله الا الله
حي على الصلاة
حي على الصلاة
غطيت راسي الف بروحي لف اني مانايمة افز واكعد رغم ميتة تعب اخاف يصير شي وهسة اسمع الاذان يأذن
احساس غريب يجيني روحي تعصرني عصر صوت المؤذن باذني يكول اتكلب بمكاني اريدة بس يخلص وانام مثل كل مرة لحظة وحدة بس جمدتني بمكاني اني اتخيل لو حقيقة طفرت مرعوبة اي مرعوبة.
شمرت الغطا وكمت البيت فارغ بس اني وبلقيس نايمة مأمنة رغم ماتعرفني طفرت للحوش
فاتحة اذني وگلبي يدك بقوة ماكو اذان هنا منين هالصوت منين! مسحت وجهي بحيرة وخوف كعدت برا هوى بارد يلفحني يهديني صفنت اباوع بالجو وقت الفجر هسة والله اني متاكدة من الاذان اذن بس ماكو بالحقيقة اي اذان وبعدة الصوت براسي.
كمت افتريت بالكراج ماعرف بشنو احس فكرت وحجيت وي روحي بكلام منطقي.
كواكب: باوعي انتي سمعتي الاذان اذن بس ماكو جامع هنا! ليش برأيج شدكولين ها؟ اي اي يريدج يريدج هاي فرصة هو كعدج لاتضيعينها هو دعاج للعبادة ماعندج بعد حجة امشي اقبلي الدعوة.
رفعت شعري متوتؤة وافتريت حول نفسي بضياع بيت غربة بشغل خطر مامعروفة نهايتي يمكن قربت زين اذا متت شلون اقابلة واني ما اصلي موعيب كواكب مو عيب شدكلليلة لان يكلولي بت حرام ابتعدت عن الدين وكلشي يخصة مو نيزك تكول ابن الحرام مايتحاسب ذنب اهلة مو ذنبة يلا امشي يلا ماكو درب ثاني هو واحد طريق الله.
كعدت يم التانكي شغلت الحنفية وتوضيت مثل ماعلمتنا هيلة (ام نيزك) حافظة كل الخطوات كلامها براسي وشلون تشرح وتعلمنا من جنا صغار ما التزمت اني ابد خاصة بعد موتهم كطعتها للصلاة جنت اصلي ماتخليني بدون صلاة الله يرحمها وينور قبرها.
مسحت وجهي من المي ودخلت جوة ادور على شي البسة حتى اصلي واذا الكة روحي مخلصة صلاة ودموعي تنزل وحدهن هاي دعوة دعاني لموعدة بين دموعي ابتسمت وحمدتة.
خلصت وبقيت كاعدة عيني ماخذت نوم طلعت برا صوت زلم تتعارك فتحت الباب على كيف مديت راسي اشوف شكو ماكو بس صوتهم قريب مشيت شوية واشوفهم من بعيد كل واحد شكبرة وشكدة ثيران يكول شياكلون ذولة لحم خنازير واحد يملخ بالثاني اي عفية تمالخو بعد بعد ردت اصفكلهم واصيح السبع يطلع دممم بس خفت يخلوني ويكتلوني رجعت بسرعة من سمعت اجو يفازعونهم وبالليل غير ليل هما يشتغلون مايكعدون كون مرض يالمجرمين الحرامية.
دخلت وصعدت من الحايط اشوفهم اتونس عليهم العركة كبرت مافكت امالخ صارو فتحت حلكي اضحك من خطرت فكرة براسي نزلت اركض جبت مصيادتي ولميت طابوك وحصو صعدت فوك ومن السياج طحتلوهم كلساع تجي بواحد مايعرفون منين يجيهم الحصو هما بحال الحصو هسة.
بعد روحي فرررحت من فشختهم طفرت للكاع همزين ماشافني ابو راسين لازم ضهرة من الطابوكة الضربتها بية ضحكت بصوت اكتم ضحكتي لايسمعوني نعلعلة عليكم يلوصخين.
فكت العركة اسمعها والفهمتة متعاركين على مود فلوس جلاب يكتلون روحهم علمود الفلوس حشا الجلاب.
مرت فترة قليلة رحت للمطبخ كتلني الجوع فتحت الثلاجة طلعت جبن وخبز خدرت جاي بلقيس نايمة هسة ماتخاف اكتلها بفراشها عجيب مامنة هيج وهي ماتعرفني، سويتلي لفة وصبيت كلاص جاي طلعت بالطارمة اكل حنيت لداري حنيت لمنظر البعيجية بعدني مامتسممة وسممني بشوفتة القذرة.
ضحك من شافني اجة يسحل برجلة سحل وكف كدامي كلة تراب وصخ.
الاعرج: ههههههاااهااااهااا
قلدت ضحكتة وكلت
وسم من الصبح تضحك شكو
كفخني على راسي طفرت والجاي تبدة
كواكب: ارتاااحيت هسة حتى سم ماتخليني اتسمم مثل الناس
الاعرج: اجيبلج انواع السم ولايهمج
شوفتك تسمم اكبر مرتاح
اروح اسبح وارجعلج حضري روحج
وين
مارد علية دخل جوة بعد ولا دخلت للبيت بقيت بالطارمة رجعت شمرت الكلاص بالسنك وطلعت مي اشرب واسمعة يحجي.
الاعرج: شلونج وي هاي العوبة خو مامسوية شي.
بلقيس: ماصارلها اسبوع من اجت ماتعرف شبيها مابيها واشو هي وينها غير وياك
ماجايبها تكعد هاي ماتحب الكعدة بس اسحبي لسانها هاي ماتكعد وتسكت منها لله لاتشوفينها هيج عبالج فقيرة انتي الفقيرة
طلعت بسرعة لايدخلون ويشوفوني اتصنطت عليهم يعرف بشنو افكر شمتوقعين اخلص عمري وياهم مخبلة صاحية اضيع عمري وي هيج شكول قذرة اني بس اريد اعرف هما منو اذيتهم شنو وشلون احمي اخواتي منهم.
طلعت بالشارع المنطقة تصوصي ولابيها طير عبالك مكطوعة بس مشيت اريد استكشفها اشوف شكو ماكو منين اطلع منين اطب رجعني واحد كاعد بمحل تيصيح وياشر بيدة.
لمكااانج ارجعي لاتفتررين
وانت شعليكككك بيتك هووو
شهكت فاتحة عيوني من طلع المسدس عبالي يخوفني بيه بس هذا صار يرمي جوة رجلية طكيتها ركضة كلبي يدك بقوة مخبل هذا مو صاحي بلا صوبني ولا يهمة.
خليت ايدي على صدري الهث فحطانة واجر النفس جرر لاكاني ابو راس المصلبخ يباوعلي اشرت بيدي اكلة.
ذولة مو صاحين لان افتر رماني رمي
بلا صوبني مايهمة
الاعرج: عفية مو صااااحين
انرسمت على شفتة ابتسامة خبيثة بلعت ريكي
الجملة اطن براسي صدك مو صاحين من شكلهم وخاصة ذولة الجانو يتمالخون بدون احساس واحد يملخ بالثاني.
الاعرج: يلة امشي
وين؟
رفع حواجبة ماعاجبة سؤالي دفعني كدامة ينتر بية: لاتسالين كلة على بعضة شغل.
اي اي بس ابدل ماعرف هيج اطلع
باوعلي من فوك ليجوة وباستهزاء كال
شلابسة انتي شلابسة سيت نوم
ابتعدت منة رحت ادخل للبيت وصحت
سيت نعلة براسك هذا المصلبخ
اسمعة غلط على دخلت اركض بدلت بملابس الشغل سجينتي بجيبي وشفقتي لبستها مريت بالمطبخ طلعت من الثلاجة فواكة ترست جيوبي
بسرعة.
بلقيس: راح ترحين
اي شغل
البارحة بالليل بس تتحلمين ماخليتيني انام
بهتت وانداريت عليها ميلت براسي بصعوبة كلتلها
كواكب: حجيت واني نايمة؟
اووو يا حجي صريخ تصرخين
بللت شفتي بتوتر وتقربت منها بصوت ناصي
شسمعتي بلة؟ حجيت شحجيت؟
مامفهوم كلساع تحجين بشي تخبطين خبط عتاب على وجع على صريخ مامفهوم حجيج
هزيت راسي وطلعت وبعد هالسنين رجعت اهلوس واني نايمة خفت والله گلبي وجعني خفت ارجع لحالتي القديمة منو إلى كبل عالجني هنا ماخلني هسة منو يهتم يكتلني الالم محد بحالي.
رحت واني واهسي مو وياي الهم كتلني وحتى هذا الجلب من حشا الجلب سالني: شبيج.
مارديت علية ودرت وجهي رجع حجة بعد فترة
الاعرج: اكو نفر يريد يشوفج
ههههه منو هذا
تعرفين هسة
ماخذت كلامة بالاعتبار ادري بية يجذب ماعندي احد اني اخواتي وراحن عاشن ونسني متت عشت اكو من يسأل اكو من يهتم؟
وبلحظة واحنا نمشي كسرت علينا سيارة بكل سرعتها همزين مالطشتنا لطش لو ماربك سترنا ما احتاجيت دقايق وشفت غضنفر هالزمال نزل بسرعة اجة علينا.
الاعرج: ها لككك ك تخبلت علينا
غضنفر: انعل ابو ابووووك جيبها جيبها.
ما احتاجيت اعرف شنو مقصدة بجيبها اجة علية فتحت الباب وسحبني وراة مخليني والاعرج نزل مرتجي على الباب.
الاعرج: مثل مايعجبني اخليها تروح وياك
ارجع اخذها
بدون مايرد علية سحبني يريد يصعدني وياة بالسيارة فلتتت روحي منة بصعوبة بصعوبة طلعت ايدي تملخت يلا فكها صرت نار ولو الزمة اموتة بمكانة بصوت عالي يصيح بية عيونة دمممم
غضنفر: اصعديييييي
كواكب: كلة من ورررراك ابن الكلببب.
دورت بعيوني على طابوكة اخذتها بيدي وهجمت علية لزمني بس ضربتها مرة وثنين وتلاثه كوة ثبت ايدي وسحبها من ايدي بقوة احس بيدي تملخت شمرها وبكل قوتي ضربتة راجدي على عيوني سكتت اتنفس بسرعة الهث نفسي مكطوع لزم خدة رجعت ليورة وضحكتة الاعرج رجت المكان رج
ردت اشرد عن لايضربني بسرعة سحبني يدخلني وبصوت عالي اصيح على الاعرج.
كواكب: اخذنيييي لاتعوفني وياااة هذا غداررررر
دفعني بالسيارة كسرني يصيح.
مو غداااار يمتهااا غدرتج
بدية ورجلية رفست بية طبك الباب وصعد بس عدلت روحي شغل السيارة من الجامة مديت راسي اصيح للاعرج.
ليييييش سلمتني اله ليييييييش؟
حتى ماسمعت شي طير السيارة بينة وطسات ومنا سرعة صرت انشال وانركع بمكاني متت احس مصاريني تكطعت صحت بصوت عالي بلكت يسمعني ولو احسة فاصل.
كواكب: موتتتنييييي على كيفك سوووق
خرررب باهلك رراااااح امووووت.
ولاكانة يسمع زحفت اصير وراة واضرب على ركبتة بكل قوتي ولاعبالك تاثر فحطت وهو عبالك حايط حتى ما التفتلي رجعت لمكاني منا لمن طبك السيارة ونزل فتحلي الباب عيونة من كد ماحمر شكلة صاير يخوف مو ذاك غضنفر اليضحك ويحشش واحد ثاني هذا.
بلعت ريكي بخوف ردت اجمع كم كلمة واحجي خلة اصبعة على شفتة يصيح: اششش.
اشر بيدة على بيت صغير تعبان خفت لاهذا غضنفر الاعرفة ولا اعرف شيريد مني زادت صدمتي منه وخوفي من كال بطريقة امر مابيها نقاش.
انزلي للبيت
من مانزلت وردت احجي شالني واني بيدة اصرخ.
ورد...
لطم على رجلة حيل محترك كلبة وروحة يصيح
ضرغام: راااحت كوة جبتهاااا كوة من وراج
نزل فشار وغلط عليها ضيغم لازمة وهو يتهدد وبصوت عالي يصيح: طلعوووها من البيت لا اكتلهاااا موووت طلعوها.
كامت حفصة تصيح بية وهو متخبل يريد يطلعها سحل لو صايرين بوجهة مايخلونة.
حفصة: ولك حبلة بابنك انت مخبل؟
متزوجها وعلى ذمتك ابنك بطنها شني ماتريدها
انفاسة عالية يلهث ويحجي كوة على اعصابة وبدون صياح كال
خل تاخذ نغلها وتطلع لا معترف بيها ولا بالبطنها
ذهب: هسة غير تفهمنا هو ابنك؟ مرتك هي شو كلشي ما افتهمنا اجت امها شمرتها وراحت وانت تصيح علينا ماصارت فهمنا!
مسح وجهة بقوة ينزل راسة يحجي وياها كوة لازم روحة.
ضرغام: متزوجها متعة ومتفقين ماكو جهال
وهاي طلكتها هسة حامل لو تموووووووت مااعترف بالنغل ولا بيها
طلعت هي صاير وجهة دم تصيح
اسيل: مرتك اني شنوو نكرتني! بالحلال اخذتني عقدددد عقددد بينة
ضرغام: تزوجتج متععععععة هيج خل كلها تسمع انتي اجيتيني برجلج للمعرض وامج تتوددن علية بحجة السيارة وانتن ولا عدجن ررربع.
حتى بالحرام ردتي اخذج ماعندج مانع بايعتها برررررخص تالي من شفتج هيج عقدت عليج سيد وبفلووووس اعترررف بيج وبابنج المدري منين جايبتة كل عقلججج!
هز ايدة باستهزاء وهي لطمت وجههل ودعاء تلزم بيها صايرة لوكية عبالك تعرفها من زمان مو البارحة اجت.
اسيل: صررت رخصية وتكوول مو ابنك
طلعت كو حسبي الله ونعم الوكيل عليك
اخذني اخذني هسة سوي تحليل ولو مو ابنك
اكتلني حلال علييييك
هجم يريد يلزمها وضيغم دفعة يصيح بية متخبل.
ضرغام: ولو صدك ابني لو اموووت مااسجلة باسم وحدة مثلج وتصيرين انتي امة امشيييي لج امشيي خربتي علية عبالج تصيرن مرتي هههههههههههه
حلم حلمممم
اسيل: لان شفتني فقيرة وماعندي احد هيج استوليت علية
مد ايدة يصف ويعد الها بصوت عالي.
ضرغام: ماعندج احد؟!
عندج ام وبيت واخوال وكرايب وشمرتي روحج برخص بفلوس كلشي دفعت حقة بفلوس.
لج هي لا اهل ولا عمام ولا اخوال وبس بنات وعاشت بشرف اشتغلت تبيع بيدها تشتغل الفررررق الفرررق هي شريفة وانتي بلا شررف
هي غالية انتي رخيصة لو تموتين ما اخليج بمستواها واسجل اسمج على اسمي فقيررة كالت فقيرة التزوج متعة فقيررررة؟
نكتهن بوجها وحدة وحدة خلاها ماتعرف تحجي راد يسحبها رجعت ليورة ماتريد تطلع بعد كل هذا الكلام، دموعها نزلت صيحت بصوت عالي.
اسيل: وين اروح ابنكم هذا حرررام عليكم.
ضرغام: خلية الج ولامج
ماتردينة جيبية وووولي
هسة ماريد اشوف شكلج اطلعي
لا احررررك البيت فوك راسج حررررررك
امة ساكتة ولاتدخلت ذهب سحبتة عليها تحجي وياة وعمامة وابوة دخلو جانو يتسنطون ماتدخلو.
ذهب: لاتضل تصيح مثل الثووور وتخبصنا فهمنا فهمنا البت مرتك بعدها
ضرغام: مارررريدها تفهمووون
شمرت روحها علية لان شافت عندي فلوووس
باعت روحها علمود الفلوووس
اكعدها بيتي شلووون؟
اندار عليها بتهدديد كال.
اروح وقبل لا ارجع ما الكة اثررررررررر الج
ترجعين منين ما اجيتي والبراسج ماتوصليلة
طلع وابوة صدة مانعة
فرقد: وين رايحة شنو هالمزلة عايفها ورررايح علينا حل مشاكلللك واطلععع
ضرغام: خليني اطلع لا احرررررك البيت
طلع وضيغم وراة خطية متبهذل طلعت اسيل شمرت روحها كدام ابوة تبجي وتملخ بروحها.
اسيل: زوجتة والله زوجتة
وهذا ابنكم ابطني وين اررروح وين
عمامي واخوالي مايستقبلوني بعد
وحتى امي راحت لاهلها ابنكم ماتريدونة؟
ابتعد عنها والباقين طلعو ونصهم طالع اولهم فقار اشر عمي نجي ناخذها محد تقربت عليها بس دعاء سحبتها لعبت روحنة منها بعد كلامة عليها هنا اكدت مقولة الانسان يعز نفسة ويذلها بيدة
اليبيع روحة برخص ينشمر واليعزها ينصان ماينهان
غسلت وجهة وشربتها مي وجهة دم صار وحفصة تحجي: اكو واحد كلة روح تزوجها فوك ماتكلة حبلة بابنك هيج يسوي بيها هو منيلة الجهال ياريت عندة تلاثة ثنين هاي بدال مايحمد ربة على النعمة.
سندس: اي والله يمة كلامج صح هو حتى مرتة هاي الاخذها مريضة قلب خلفة بعد ماتخلف وهو حاير بابنها بس يكبر يروح لاهلة هسة مو تكولون تدخل بس كلمة الحق تنكال
راحت اسيل لحفصة تتوسل بيها
اسيل: فدوة بيبي شوفيلي حل
ماعندي احد اني انوب حامل.
رفعتها تكلها
حفصة: ضلي هنا بيبي محد يتكربلج
حالج حال نسوان هذا البيت مو باسمة هو حتى يطردج منه هالبيت الكل بية حصة.
طلعت ماتحملت ابقى اكثر طكت ولعبت روحي هسة انتن شعليجنننن يبوووو دورت بعيوني على شهب مالكيتها دخلت جوة حتى البنات مختفيات صعدت فوك لكيتهن بالغرفة.
بنات شفتن شهبة؟
ريا: لا احنا صعدنا من صارت العركة
هزيت راسي ونزلت صار بوجهي قبس اخترعت ورجعت اريد افلت لان مطلوبة للعدالة بس يكمشني يكفخني سحبني من ايدي صاير نار نزل وسحبني وياة ملخ ايدي.
عليك الله عوف ايدي نزلت نزلت
ترك ايدة خلاني كدامة ايدة على كتفي.
قبس: اخذيها راح تموت سكتيها بين ما اجي
منو شهبة؟
اي اي
صار بوجهنا تميم وجهة مايكصة السيف عاكد حواجبة باوعلنة بنظرة ماعاجبة وصعد فوك مر من يمنا هستوة جاي، اخذني للحديقة يسوحل بية فني احجي وياة لزمت كلبي بيدي انقهرت من شفت شهب كاعدة بركن الحديقة مغطية وجهة بثنين اديها وبس تشهك بقهر رفعها قبس اخذها بحضنة يوخر اديها
من وجهها ويمسح بية.
قبس: هسة شكووو تبجين خرر بضرغام
امشييييي روحي جيبي مااااي.
كمزت وطفرت اركض من صاح بية عوزة بس يحطني ويكتلني يكول اني مبجيتها بس يلة شهبة تستاهل الها جايبة مو اله الغثيث.
ركضت جبت واجيت فتح ايدة صبيت بيها ماي غسل وجهها شهكت بارد وجهها صاير قطعة حمرة اخذ الطاسة مني شربها ومسح وجههة الشهكة لازمتها خطية جلبت بية من قميصة تتوسلة كوة تحجي.
شهب: اختي فدوة
وين، وين. راحت
قبس: ماتروح وين تروح هسة تجي
شهب: ماتجي بعد، ماتجي.
كالتها وشهكت رجعت تبجي حرنا شلون نسكتها لزم اديها رافع راسها يحاجيها.
قبس: اسكتي واني رايح اشوفها وين
ها؟ شوية وارجع اخذج؟
هزت راسها اي تمسح بوجهها
قبس: بس اذا بجيتي ما اخذج اتفقنا؟
رجعت هزت راسها دار وجهها علية
قبس: كولي اتفقنا كولي
شهب: اتفقنا
سلمها بيدي يكول راح تشرد منه اخذتها يوصي بية
قبس: لا تخلينها تبجي وردة
صار هسة اركصلها واضحكها.
ضربني وراح الحقير صحت وراة من شفتة ابتعد خاف يرجع علية اشرد ما يلزمني.
ورد: هو مو صووجك صوجي اني الاصفررررر
الغثيثثثث
اندار شال شحاطة راد يهفها خليت شهب كدامي احتمي بية نزل الشحاطة وطلع وخرتها مني اركص ايدي بالهوى اضحك.
ماضربني هلا هلاااا
درت وجهي تفشلت من شفت تميم طالع يباوعلي
تحمحمت وسويت روحي حبابة بين ماراح
شو هذا هم يخنزر يععع مثلهم ماحبيتة
هما ليش الحلوين هيج غثة وشايفين رواحتهم علينة اوووع.
اخذت شهب وصعدت ولا وياي فاصلة حرت شلون اغيرلها جو جوري يمها هم ساكتة الخوينسات اجتمعن مو حلوة نزلت جبت حلويات وعصايري اسويلهن جمعة يكرزن احسن ينوحن
صاحت بية سندس.
تعاي انطيني وياج من ذني
البيدي قصدج؟
اي ولج من هاي العندج
ذني يرفعن السكر والضغط مصنوعات من دهن الخنزير
عكشت وجهها لعبانة روحها رحت يمها مديتهن الها
هاج شوفي اقريهن مكتوب عليهن دهن الخنزيررر.
سحبت مني بطل عصير طكت القبق وشربتة بقيت فاتحة عيوني مصدومة نزلتة فارغ مسحت حلكها تكلي.
سندس: كون من الخنازير مصنوع شلون تاكلينة؟ ها مو شسمة فوائد بية لان عندي فقر دم
خلت عينها على الجبس قبل لاتحجي وتاخذة طكيتها ركضة كلشي ولا جبوستي وحلوياتي اريد استدار وانركعت تطشرن الحلويات وواحد من العصاير كزاز انكسر تفلش طفرت بعيد عنة يا ويلييي وسواد ليليييي راح عصيري نفستة سندس نفستةةة.
تميم: شبيج تركضين؟ هيج ارتاحيتي؟
رفعت عيوني اله خازرني عكدت حواجبي نترت بية
ورد: لا والله فووك ما كسررت عصيررري هسة تخسرررة يلا هذا بالف الزين مو العادي
هز ايدة وراح كال
عود من اصرف انطيج الف
ايا حقير شلت النستلة ردت اضربة بيها ونزلتها عيب بعدة جديد لميت البلكاع ودفرت الغرفة دخلت شمرتهن على الجرباية.
ورد: هاجن اكلن بخيرري يلا غيرن نفسيتجن.
ذبيت نفس وكعدت ساكتة شهب جانت تبجي وجوري حاضنتها كعدت يمهن ساكتة جريت نستلة اكل بيها بهدوء وجوري تحجي وياها.
ورد: هسة يمكن لكوها
لو هي بالبيت وما شافوها
بلة اتصلن بيهم شيكولون
جوري: كومي اتصلي انتي
اخذت موبايل شهب حتى مابية رمز طلعت رقم قبس دكيت شوية وجاوبني: ها شهبة؟
ورد: هلو قبوسي مالكيتو نيزك؟
لا
وين راحت شنو السالفة
والله محد يعرف
خالها ومرتة موجودين
جانو بالمستشفى.
باوعت لشهب عيونها علية ومن كثر البجي صارن دم همست بصوت انصى: وهسة؟
ماعرف جاي ندورها يلا بعدين اتصل بيكم
كليلها لكيناها موجوده
اي خوش
سديت الاتصال مايحتاج اجذب هي عرفت ماكو
لزمت راسي وطلعت وين راحت نيزك ولهسة ماكو!
نيزك.
السكوت يخنگ والحجي يذبح ذبح بالاثنين تأذيت
بس الاذية الاكبر من اعرف روحي وحيدة مالي احد وحتى من جان إلى امل بخالي تبخر وطار هالامل من سمعتة هو ومرتة يحجون يم راسي عبالهم اني نايمة.
بدت بالكلام مرتة بعد ماذبت حسرة متالمة وكالت بقهر.
هالبنية ولاترتاح منين ماتجي سودة مصخمة
لاوي ابن اخوك ولا وي الغريب ارتاحت
همام: ضرغام احسن من ابن اخوي بمليون مرة
لاتقارنينة ب ذاك النذل
ها شكو شو ادافع عنة!؟
ليش هو شمسوي حتى ما ادافع عنة؟
همام صدك تحجي!
بنية باسبوع عرسها تجي مرتة وحامل؟
همام: هو مطلكها بس طلعت حامل
شيسوي الولد يكتلها غير سالفة هاي!
مطلك كال ماجذب وكال عزابي وهسة مطلكها المرة.
حتى لو مطلكها جان يشوفلها حل خل يطلكها من جديد مادام عرف بيها حامل حتى طلاكهم يصير بشكل صحيح
واذا ماطلكها؟ محد يكدر يحاجية
حررام نكلة طلكها حامل بابنة شكد نحمل ذنب من نفرقهم والطفل يتربى بعيد عن ابوة
المرة ماتاكلها خل تهدا الامور ويشوف شلون يكعدهن ويتفاهم بينهن.
دك تليفون مرة خالي جاوبت
ها نجمة اي اجيت يلة لا ما اتاخر.
زينة اختج اليوم تطلع ان شاءلله.
سدت الاتصال وطلعت من الغرفة هي وخالي بقيت وحدي لكيت دموعي مغركة وجهي وكلامة دك براسي دككك وفكرت من جهة ثانية هي حامل والطفل شنو ذنبة يتربى بعيد عن ابوة
عدلت كعدتي دخلت المضمدة شالت المغذي
وطلبت منها تشيل الكانونة كامت تحكني شالتها طلعت وسهلة وراها اجت بيدها اموري فتحتلة ايدي اجة يركض يبوس بية ويحضن بوستة اشمة بقوة واحمد الله امير مو ابنة لو ابنة هسة يهددني بية لو يخليني عندة علمودة.
سهلة تستحي تباوع بوجهي وتستحي حتى تحجي وياي واني اعرف ومتاكدة هي ماتعرف بزواجة وهذا الصدك.
اجت يمي تباوع ساكتة ابني نام على صدري كلساع يباوع بوجهي خايف يتاكد مابية شي احسة كبر على عمرة عمرين هالولد رفعت ايدة ابوس بيها
تروحلك فدوه نانا حبيبي
رفعت عيوني لسهلة بحنية تسال
شلون صرتي حبيبتي؟
زينة
سودة علية ماشفتي الراحة عبالي ترتاحين
بالزايد تعبتي
هزيت راسي اكلها
تضل سوالف مثل غيرها.
والله يمة مدري شجاكم ذاك ضرغام
من طحتي طاح ولحد الان مامستقر ضغطة
يصعد صعدة مو طبيعية حايرين بية
نزلت امير بالكاع اختنكت اي والله اختنكت لكيت عباية يم راسي ماعرف منو جايبها لبستها ولزمت امير بيدي كامت تباوعلي باستغراب كتلها.
اغسل وارجع. اكلج ماعندج فلوس اشتري لامير خاف من انزل للكافتريا يريد شي
سهلة: جنج على فلوس صدك تحجين
وخرت عباتها وطلعت من جيبها خمسة وعشرين اخذتها منها اكلها.
ابقي هنا ارتاحي شوية وراجعين
سهلة: اروح وياج خاف يصير بيج شي
مابية شي وداعتج اتعودي علية اني هيج اطيح واكوم ارتاحي الليل مانايمتة مبينة
سهلة: اي والله بقيت كاعده ادعيلكم ربي يهدي النفوس ويلم شملكم
ان شاءلله.
همستها وطلعت الممر فارغ طلعت بوجهي بسرعة ماعرف اني وين رايحة ولا بالي مكان بس اريد اطلع ماريد اشوفهم والله صعبت علية ابقى واني ماعندي غير ارجع وياة ومرتة وياي وتحرك بگلبي منا اني عصبية وگلبي ياذيني بس احترك واصيح.
شفت ابوة بالمستشفى ما انتبهلي تغطيت وطلعت ابني لافتة بعبايتي اول ماطلعت تنفست بصعوبة الهوى ياذيني مايريحني، درت عيني على الشارع وين اروح اني اريد ناس تحتويني من بعد اهلي بس كواكب راحت وعافتني وبس مرت بالي دموعي نزلت من وحدها لو اعيش عمر ما انسة كسرتها.
بيج شي خوية؟ محتاجة شي؟
انداريت اشوف ولد شاب يسالني هزيت راسي وابتعدت عنة وكلمة خوية تلجم كلبي ياريت عندي اخو الناس تهابني يطلع وراي يهد لو عندي اخو محد يحاجيني.
مشيت مسافة اهل التكاسي تطبك علية تسالني تكسي؟ وبلا تفكير باي شخص هزيت راسي ودنكت اسالة: تروح للنجف؟
ابو التكسي: عمو قلة يرحون محافظات اذا تردين اصعدي نفرات يذبونج بالنجف اذا تردين اوصلج للكراج.
هزيت راسي بدون مارد صعدت ذبني بالكراج واخذني لسيارات النجف صعدت كلها تباوعلي باستغراب بس وحدي اريد اكلهم اني يتيمة واليتيم بعد اهلة يبقى وحيد.
كعدت بصف الجامة ابني بحضني خليت راسي على راس ابني حاضنتة لاحجة ولا طلع صوت بين ماقبطت السيارة طلعنا من حركة گلبي نمت الطريق كلة اني من انقهر انام ولا ادري بروحي
لكيت امير بيدة نستلة مامفتوحة لزمتة من وجهة كلبي ممرود علية.
منيلك هاي حبيبي؟
باوع بعيوني ومد ايدة ينطينياها
امير: من هذيس المرة
دار وجهة يباوعلها بنية عدها جهال ابتسمت واخذتها من ايدة فتحتها الة وندكت علية بستة
هسة من ننزل اشتريلك اعتذر بحجم السماء
اني مو زوعان هبيبتي
ضحكت على كلامة المكسر وصدك لو كالو مايحن عليك الا من دمك ولحمك ما اكل الا يوكلني يدري بية ما ماكلة، اول ماوصلنا نزلت اشتريلة اكل ولا راد اخذتلة عصير وبسكت ورحنا للامام بس اني وابني لا براسي احد ولا افكر باحد.
ايدة بيدي واخاف اضيعة كل خطوة اباوعلة يلة اتطمن وصلنا الامام القبة الشريفة تضوي من بعيد دموعي ينزلن عشرة على عشرة الشهكة تطلع تذبحني ذبح
ماحسبت شوكت دخلت الضريح كعدت ابجي واشكي اخذت ابني بحضني رفعتة للامام.
ها يبو الحسن ياعلي يتامة احنا يتامة
واليتيم مايرحمونة يذلونة ويعذبونة
لان مالة احد شلعو كلبونا شلع من تيتمنا
اهلنة جانو خيمة وسند عايشين بنعيييم
راحو وشكو ذلة شفناها وعشناها.
هاي الدنيا وناسها ماترحم اليتيم
ولا تريدة مثل اهلة.
اني يتيمة لا ام ولا ابو واني بحاجة ام
عندي طفل يريد ام يتيم واهلة عايشين
اجيت اشكي وامشي واطلع ضيم كلبي بحضرتك
تعبت وكعدت قريت الزيارة كملت وبقينا نباوع بهدوء للناس للمكان صارلنة شكد ماجايين
حتى من الزيارة محرومين.
بعد ماشبعنا طلعنا بالصحن واكفين نباوع اودع المكان بعيوني وروحي نفسيتي ارتاحت، اجاني صوت طير كلبي.
وخررررررري.
التفتت اشوف طلي يركض باتجاهنة شارد من اهلة لكفت ابني وركضت وخرت من طريقة كلبي يررعد رعد راحو وراة ولد ثنين شباب يركضون ويصيحون.
مسحوور حتى الطلي مشرباتة
شابعاتة سحورة تخبل علينا الطلي يمكن طلع السحر وولك الزمة
دفع صاحبة كدامة راد يلزمة اندار عليهم الطلي هذا راح هيج وذاك راد يرجع ليورة زلك وتمدد بالكاع على ضهرة دتعال يالطلي وارفس بطنة وطفر اموري طكها بضحكة عالية يسحب بيدي يصيح.
طددددا (طكة) طدددااا.
اجة صاحبة يلطم على راسة ويصيح الناس كلها تباوع علية وشي تمر وشي توكف تضحك عليهم
يبووو ماات من ورة الطلي مااات
كتلك لاتنذر كتلك الطلي هذا كتالك لحمة مررر
مشبع بالسحورة ماينوكل لا كتلت روحك وسحلتني وراك
كومة رفع تشيرتة يكلب بطنة وذاك عافس وجهة متوجع: مصارينك انمدرررن تزرفن بعد اي شي تشربة يطلع مثل توم من تزرفت بطنة
خطية الولد تخبل يضغط على بطنة مصدك كلامة.
اجو اهل العتبة يسحلون بالطلي طفرو من مكانهم مبتعدين عنة يحاجون اهل العتبة.
اخذو الكم هالطلي احنا جبناه هدية ماوراها جزية
نستودعكم عوافي على كلبكم اول مرة اشوف طلي بية جلب
كالوها وفلتو واهل العتبة وراهم هما والطلي ضحكت من كلبي عليهم حتى اهل العتبة يضحكون لزموهم يحجون وياهم واحنا طلعنا للمقبرة.
لهناك وصلت لاكبور اهلنا
كلهم بمكبرة وحدة
امي ابوي
اهلهم شكو واحد بية حنية وخير موجود وياهم.
اجدادي كلهم تمالكت نفسي وزرتهم بجي وعتب
اشتياق شكوى خلصتهن كلهن رحت لكبر امي
ابلغها اخر انكساري.
نيزك: يمة مو جنتي دكولين كواكب اختجن
صح اني ما جبتها ولاهي من لحمجن ودمجن
بس تبقى اختجن وما تفرقنها عنجن؟
مسحت وجهي اكلها والشهكة ذبحتني
يمة والله مافرقناها عنة ولا حسسناها بشي
عافتنة يمة عافتنا ماتريدنة حرمتنا من شوفة عيونها تفرقنا يمة عافتني تكول علمود اهلجن
جنت حايرة بيجن ماتحبنا هي.
بعد كل الكلام فرغت حسيت نفسي خفيفة كلشي عندي حجيتة بس اريد انام وارتاح بست كبورهم اودعهم مشيت وهسة يلا تذكرت شهب ونجمة
شفت مرة طلبت منها اخابر دكيت رقم نجمة بس هذا الحافظتة اتصلت بيها انتظر رد.
اجاني صوتها مبحوح كوة تحجي
الو نجمة
شهكت من سمعت صوتي
نجمة: نيزك نيزك هاي انتي وين
انتي وين؟
يم اهلي
سكتت بس نفسها قوي حجت وياريتها ماحجت
نجمة: يا اهل منيلنا اهل احنا
درت وجهي اباوع لقبورهم واكلها.
ماضل من اهلنا غير كبورهم يمهم اني
يسمعون سوالفي وقهرر ويانة نجمة الاهل من يتااذة ابنهم ينوجعون قبلة ما بالج بعد كل الصار بينة؟
شهكت تحجي بخنكة
نجمة: سلميلي عليهم واحضني امي وابوية
حيل كليلهم ماشبعت منهم.
وصل
نجمة: تعالي نيزك كلها تدور عليج
شوية والتليفون انسحب منها وصوت خالي يصيح بعصبية زرف طبلة اذني
: وووينج انتي تخبلتييي ترحين للنجف
ماخلينة مكان يعتب علينة مادورررناة شلون اطلعين هيج وماكلتينة؟
ابرود جاوبتة
رصيد المرة راح يخلص
همام: لاترررجعين وحدج تبقين بالامام جايج انيييي
غلقتة وانطيتة للمرة اتشكرها طلعنا من المقبرة للامام غسلت ورحت كعدت بالصحن اشتريت لفة لامير اوكل بية شوية اكل منها وعافها شمرتها بالزبل روحي ماتشتهي العسل لفيتة بعباتي خطية نام الدنيا صارت عصر والجو برد لفيت روحي ونمت لو شكد ما انام ما اشبع من قهري.
طفرت من حسيت حضني فارغ فركت عيوني ادير بوجهي منا ومنا مالكيت امير لزمت كلبي بيدي حيلي راح ردت اكوم وتنفست براحة لازمة الكاع بقوة، مخلية ضرغام بحضنة ومدنك يقرا الزيارة
شجابة؟ وين لكانة؟
بقيت اباوعلهم من شافني امير طفر من حضنة واجاني يركض يلزم بوجهي يديرة علية.
نانا نانا ازة غغام (ضرغام) الهباب ازة
سوفية سوفية
نزلت ايدة بستة
اي حبيبي شفتة
راحلة يركض فرحان ويركض حضنة من ركبتة.
لزمة ضرغام كلبة بحضنة يبوس بية ويشم بركبتة
شالة وكام صار كدامي منزل عيونة علية بقيت خازرتة نزل امير وكعد نص كعدة عيونة دددم صايرات من ردن العباية سحبني يحجي كاز على اسنانة بقوة
ضرغام: تردين تموتيني بس كليلي؟
ماجاوبتة رجع ينتر بية
مرتين شاغت روحي مررتين
من اخذوج من ايدي هدمتي حيلي هددم
ومن مالكيتج ادور عليج وين ادور شوغتي رروحي شوغتيها.
دار وجهها يمسح بية فركت عيوني من النعاس وتثاوبت شافني يريد يخنگني كام سحب امير لازمة بيدي يكلي: كومي يلة كومي
سحبت امير من ملابسة علية فتح عيونة على وسعهن مصدوم واني ماريد احجي وياة بس من شفت ردة فعلة هيج حجيت.
ماروح وياك هسة خالي يجي ياخذني
دنك لازم ضهرة يهدد
ضرغام: يا لطااام هذا لاتخليني اتخبل هنا
امشي وياي مو روحي رايحة.
كعدت امير بحضني ولا رديت علية هي الزلم مو مال واحد يرد عليهم ويرجف منهم رجف مال واحد يخليهم يررررجفون رجف.
مسح وجهة احسة تشنج راح للبرادات شرب كلاص مي ورجع شرب الثاني والثالث والرابع ادري جنت بصحراء غسل وجهة وراح يفتر من عصبيتة اعرفة
رجع علية كعد بصفي يباوع بوجهي فتح ادية لامير شمر روحة بحضنة باسة يباوعلي.
ضرغام: لاتباوعين هيج خليني ساكت عنج
هههه عود شتسوي بلة؟
تضربني؟
وحگ على الصلافة والعررامة تصيح الغوووث الغوووث رايحة وحدج انتي وابنج للنجف هنا هنااااا اااخ يا على صبرررني تجلطط تجلططط
ضرب على رجلة بحركة يحوس بمكانة يريد يلزم شي وبكسرة بس ماكو.
نيزك: لاعبالك ارجع وياك عود تخليني كدام الامر الواقع
هزيت ايدي وكتلة
ماريد احجي يم الامام لاتفتحة هنا
لا اتخبل واهج بين الكبورررررر
لا تعصبين ولا تصيحين مشي عليج عليييييي
احجي بهدوووء بهدووووء
انت تخلي الواحد هادئ اااانت؟
رفع ايدة يسب
ضرغام: نعلعلة علية وعلى شكو واحد گ
الامام لسااانك
كام من مكانة ايدة ترجف بيدة الباكيت طلع جكارة شغلها ياشرلي كومي بقيت اباوع منا ومنا بلكت خالي يجي مو كال جايج وينة؟
ضرغام: امشي كومي محد يجي
خالي كال ا...
اني اجيت بمكانة
صفنت لثواني بلعت ريكي كمت عدلت عبايتي ومديت ايدي لامير: ترجعني لخالي مارجع وياك
كلت هالكلام ولازمة كلبي من خالي اخاف يفشلني ويطردني لو يجبرني ارجع لضرغام واحنا بهذا الوضع.
هز راسة مشى كدامي عيوني تعلكت على الامام نخيتة يلين كلب خالي ومايصير مثلهم ويعوفنا واحنا ماعدنا احد غيرة واخر شخص اجة على بالي قبل لا امشي كواكب رددت هواي احميها ياعلي ورجعها النة.
مشيت وراة بدون صوت اسمعة يحجي وي روحة ماكدرت اسمعة تخبل هو انت مخبل من الاساس
فرد مرة بعد، لزمت صدري فحطانة اجر النفس جر فحطت بس امشي وراة وكفت راح كدامي شوية وهو يمشي ويلتفت علينة شوية واندار رجعلي.
خايف يركز بوجهي يريد يلزم ادية رجعت ليورة
بعيونة تفحصني مد ايدة بجيبة ركزت بيها لحظة
ضرغام: ها ها بس لاتأذيتي؟ اخذج مستشفى؟ اخذج؟
لا لا بس فحطت
طلع شريط حبوب واندار راح مسافة اشترى بطل مي فتحة وقدمة إلى اخذتة وفتح حباية مد ايدة اخذها من ايدي طخت ايدة جان نااار يكول جان يتحما على صوبة، شرب الحباية بدون ما اسالة مالت شنو كال من ذاتة.
هذا اقوى علاج كتبة الدكتور مرة وحدة تاخذينة ومن تصيرين زينة اكطعية.
مسحت حلكي بقة بمكانة صافن بوجهي رفعت تك حاجب واشرت بيدي شكو هز راسة واخذ امير من ايدي شالة مشة على كيف وي مشيتي بصوت هادئ وعيونة ليكدام كال.
ضرغام: وحگ هذا على فحل الفحول
قالع باب خيبر يشهد على كلامي هنا واني بدارة وبضيافتة يا نيزك لو تعمي عيوني ماباوع بعيون غيرج ولا تحلى بعيوني غير عيونج.
اني احبج؟ لا وعلى لا اني ميت بيج، ميت بطاريج
نسوان الدنيا كلها ما ابدلها بشوفتج بس بشوفتج.
لاتظلميني واني ماعندي غيرج ما اهم بس بيج
كلبي والله كلبي يوجعني عليج.
تتاذين؟ اتأذى اضعافج انتي ماتحسين
وحك على ماتحسين
ذب حسرة بصوت عالي عيوني دمعن واحس كلبي وجعني من كلامة رديت بنفس هدوئة ونبرت صوتة
نيزك: وحق هذا على البكاعة احنة ياضرغام
ما اصيرلك مرة ولا ارجع وياك اذا ماتسوي حل
همس بصوت ناصي
سهلة.
ثنينة سكتنا الغصة بقت بكلبي جان بلساني اكلة غير هذا الحجي جنت اريد اعبر واشرحلة مثل ماشرحلي بس اني مو نفسة اخاف احجي واتندم
وصلنا لفندق قبل لا ادخل حاجيتة
المن داخلين فندق ما نرجع هسة
اندار علية عيونة دم وفد تعبان وجهة صاير تراب
اشر على وجهة بصوت تعبان كال
خليتي بية حيل ارجع محافظات
حيل مابية حيل ميت من التعب.
ماحجيت شي سكتت كمل الإجراءات واخذ مفتاح الغرفة صعدنا كوة اسحل بروحي اول مافتت نزعت العباية رحت للمراية بهذال شكلي بهذال ماعرف شلون جنت وامشي، نزعت شالي مركزة وياة هو وامير يحجون.
ضرغام: حبيبي جوعان؟
امير: سوية
شكلتو؟
بس اني اتلت نانا ما اتلت
تريد اكلة بالك اجيبلك؟
لا بتيفك
اكو الطف من ابني؟ انتو كولو
يمة امير نسمة باردة ولا يعاند ولا يشلع الكلب ويخبث النعمة الوحيدة الصارت من زواجي هو.
نزلة بالكاع وبصوت عالي يسمعني كال.
ضرغام: شوية وارجع لاتفتحون الباب امير بابا
امير: صار هبيبي باي
يروحلك فدوووة هبيبك
ضحك امير ختل بضهري مستحي وطلع ضرغام صفنت على ابني حسيتة كلش تعلق بية وخايفة من هذا التعلق لزمت ايدة وسالتة.
اموري تحب ضرغام؟
فتح ادية يوسعهن ويكول
توووووووومة توووومة
اي ليش تحبة؟
هو هباب
كالها وفلت يفتر بالغرفة ويلعب كمت وهنا تمنيتة مايحبة خفت على ابني اول مرة يحب واحد غريب غير خالاتة.
فتت للحمام غسلت وجهي وركبتي طلعت صحت لاموري غسلتة الحمدلله ملابسة نظيفة ما وصخهن جان احتاريت هو احنا طالعين بطرك اعمارنا، اخذتة وتمددت على السرير خليتة بحضني العب بخصلات شعرة انفتح الباب دخل ضرغام عيونة تركزت علينة محمل مسواك امير طفرلة يركض عدلت كعدتي اعدل بصدر دشداشتي.
نزل العلاليك امير واكف يباوعلة حتى ما لزم العلاليك هو من ذاتة فتحهن طلع علاكة بيها سيارة حجمها متوسط توسعت عيون امير يلمعن من الفرح كمم حلكة بيدة يضحك، خلاها ضرغام بالكاع بيدة ريموت يمشي بيها ويضحك من يباوع على امير ويشوف فرحتة.
هاي تمشي بس دوس الريموت هذا
ها اميري عجبتك؟
هز راسة بدون مايحجي تقدم اخذ الريموت من ايدة يمشي بالسيارة ويضحك اندار على ضرغام من كلة: شو ماكتلي عجبتك ها لك فصعون ليش تغلس؟
ركض امير حضنة اخذة على صدرة يبوس بركبتة باوعلي وكال: نفس العطر الله مايكطع بعبدة
ضحك وكام يقصد على عطري شكد فاسد تبوس بابني حتى تشم عطري صدك مايستحي هو يعزل بالغراض صحت بية.
حتى امير ما اخليك تبوسة على هاي نيتك
رفع حاجبة يغمز
شبيها نيتي؟
يممة يممة سويت روحك ميت تعببب بس دخلنا الفندق صرت تغامز وتلامز ولا الك امان حتى بعد ولا اصدك بيك.
ضحك وشال علاكة اكل خلاها على الميز وبعد علاكتين راح للمميز خلاها بية على كيف والثانية اخذها للحمام ودخل، بقيت بمكاني اباوع لامير لا ارادي اضحك من اشوف ضحكتة.
بطني سفطت من الجوع ريحة الاكل القوية ذكرتني بروحي ما ماكلةرغم هاي ماتقربت عليها ولافتحتها ابد طلع سابح شعرة مبلل برمودة لابس ضحكت من شفتة هيج بس سويت روحي مو وياة
ضرغام: حتى الاكل مافاتحتة شنو السالفة
يلا ناكل سوى.
مدد بالكاع يفتح بالكاع اني سحبت مخدة كمزني من صاح بية: والحسين اجيج اكلب خلقتتتج
تعالي لا اكوملج
خيررر شكو
عبالها سااااكت وتكول شكووو غير كوة لازم روحي عليج تعالي اكلي يلا كابليني
تسد النفس شكابل منك
فتح عيونة مصدوم خرررب خررب لزمت لساني عضيتة بقوة احس وجهي صار نااار بية مرض الا احجي سكت مارد دنك عيونة يرتب بالاكل نهضت من مكاني سحبت امير كعدت كدامة بحضني مخليتة باوعت بوجهة مايباوعلي.
ماقصدي احجي هيج وياك
شوف باوعلي والله اني هيج من اعصب انتر واحجي كلام مو بالي
مارد علية ولا كانة يسمعني لزمت ايدة اريدة يباوعلي رفع عيونة إلى اشر على روحة انقهرت والله انقهرت من كال: اني اسد النفس؟ شكلي يسد النفس راح اخذ لفة واروح انام اكلي وحدج
تخبلت من كال هيج اخذ خبزة يسوي لفة سحبتها منة نزلت امير من حضني حتى مو ويانا مركز بالسيارة.
شبيك ضرغام ترة مبينة ما اقصد
لا تقصدين حقج اني كلت ليش؟ حقج يابة.
كام من مكانة نكت ادية
ضرغام: اني هم بعد ما اشتهي اروح انام عوافي على كلبكم
كمت وراة من الفشلة والقهر صرت ارجف احجي بدون ما افكر هسة هاي هم حجاية جلبت بية من ضهري اريد بس اديرة ما يندار.
ضرغام والقرآن مو قصدي
اصلا انت تسوي شهية للاكل
صرنا وجهة بوجهة وبكل ضمير ابرر واشرح زلتي
نيزك: حتى من جنت اسويلك دولمة وتاكل
اشتهي اكل وياك شبيك انت حتى تسد النفس مابيك شي والله.
توسعت عيوني من سحبني علية ايدة مطوقة خصري بصوت ناصي متحسر كال
تمنيت نرجع مثل قبل تسويلي دولمة واكل بكل شهية من اشبع اتمنى ابوس اصابعج واحد واحد
دنكت راسي ذبيت نفس
نيزك: انت اول زبون إلى كلت لو وين ما اروح ما انسى هذا الزبون حتى اسمك ما انساة
اول واحد شجعني اشتغل وسوالي واهس اشتغل واكبر مشروعي هو انت
ضرغام: تبيعيلي جدر دولمة؟
ابتسمت اهز براسي
من نرجع مثل قبل احتمال ابيعلك
بس ما اطلعلك اني.
فلتت ايدة رخت كلش سحبتة من ايدة اكلة
يلا تعال ناكل
كعدنا وامير ويانة هو يوكل بية ويخلي كدامي ماحجينا شي خلص امير اكلة وبقة يلعب
خلصنا اكل لميت الاكل وغسلت لكيت ضرغام مخلي امير بحضنة يدك علية ينومة من تقربت لكيتة نايم همست بصوت ناصي.
شعجب نام امير شبعان نوم
منين شبعان النوم الج بنص العالم رايحة بسابع نومة خطية هو كاعد شكد بقينا كاعدين نتتظر حظرتج تحسين وتكومين.
لاتجذب مانمت هواي أصلاً
دار عيونة خازرني.
ضرغام: كلمة لا تجذب لاتعيدينها مرة ثانية
هسة انكلبت الدنيا من كلتها
خلة امير على صفحة رحت طفيت الضوة ورجعت اتلمس خفت اوكع عليهم همست: ضرغام افتح موبايلك ضويلي
همس بصوت ناصي كلش
تعالي اشوفج
خاف اوكع
لا تعالي امشي باتجاهج
مشيت الخبط بيدي عن لا اتعثر بشي وصلت للجرباية لزمتها بيدي ايدة سحبتني تمددت بيدي الثانية اريد افتح ايدة مني بالزايد صارت وسحبني لحضنة دنك راسة يشم بشعري.
ضرغام وخر اريد انام.
نامي ما اسويلج شي
بس وخر مني
اريد انام تعبان والخلقج
نام بس عوفني
لاتلحين
الح والح والح لاعبالك هيج انسى الصار أصلاً اي گلبي مجمر جان لو ماعلي برد كلبي
ضرغام: وكلبي اني گلبي ماتكولين شصار بية؟
كلت احاول اعيش وياك وبمرور الوقت اتاكد من نيتك تجاهي وانسى ماضيك بس زودتها علية من اجت تحلم تحلم ابقى وياك ومتزوج غيري.
اني تعبت والقرآن تعبت محد يدري بية مو اليوم من زمان متعوبة مابية حيل ارادد واعارك بعد طاقتي صفرت.
مد ايدة يفتح بشعري وعصرني بحضنة ساكت يسمعلي كملت احجي وافهمة بهدوء.
نيزك: اني فهمت متزوج قبل لاتبرر انطيني شي جديد وحل وها لاعبالك ماعندي احد واقبل بالموجود والله اسند روحي بروحي واسوي ديرة وعشيرة إلى واجيب ناس تنسيني ذكرك وما ابقى وياك
عصر شفتي بيدة بقوة نترتها عني
ضرغام: اني اهلج وناسج وعشيرتج وسندج.
ماكو واحد يتقرب منج واني عايش
ولا اخلي مكاني فارغ حتى تجي ناس تاخذ مكاني
من يوم النطقتي الموافقة عقدتي روحج بروحي
ردت اكوم سحبني ما خلاني بالضلمة صرنا نتلاوة اني عصبية وهو يعصبني يريدني بحضنة واحجي اليريدة.
ضرغام: ارركدي خل نسولف
ماعندي حجي وياك كتلك العندي
سهلة وداعتج هسة نرجع ولا كان صاير شي
بس اااااخ اااخ شيسكت كلبي من اتذكر هاي طلعتج ودكتج بية
اليكول طالعة وي واحد
زفر نفس عالي لفحني ويضغط علية خنگني.
ضرغام: گلبي نااار، ناااار وحدج رحتي والناس تباوع بيج عبالهم ماعندج احد
شافووج وانتي وحدج ماخزرت كل عين حاولت تباوعلج دكة هاي دكة والله لو مصوبتني ولا رايحة وحدج من سمعت كلت املصها ملص ولو لازمج بساعتها
رفعت راسي اريد احجي كطعت كلامي من سحب راسي واخذ شفتي بين شفتة، عبالك ينتقم مني طلع روحي يلا عافني كوة اجر النفس والله مال اشبعك بوكسيات بهليل بس خفت منه انوب حتى ماشوف دربي.
زحفت روحي سحبني ضربت ايدة مافاد رجعني غصب خل راسة بركبتي باسها بقوة وبصوت رايح كال: خل انام لاتتحركين
يكول عبالك صرت جثة ماتحركت ولاشوية منا لمن ثكلت انفاسة وعيوني انسدن على الواهس ونمت كعدت افرك بعيوني واعدل بروحي مستغربة طريقة كلامة بالتليفون وخوفة.
ضرغام: جايكم جايكم فقار الزمهم ذولة مخبلين
يا مستشفى يلا يلا جايين.