رواية المنجمة للكاتبة كفاية كاظم الفصل التاسع والعشرون
نجمة.
صفنت مبحلقة عيوني بوجههة وهي تخزر بية وتباوعلي من فوك ليجوة عصرت ايدي قوي انتبهت وسحبتها مشت تكعد كدامي وكالت.
بيج شي
نجمة: لا
اشوفج استغربتي
خلت رجل على رجل ورجعت ضهرها على الكرسي
نجمة: الصراحة اي هو استاذ فقار منفصل مامتزوج اني هيج سامعة وانتي كلتي زوجتة
ابتسمت بتسليك
جنت اريد اكول السابقة
هزيت راسي وكعدت بمكانة اختفتت ابتسامتها ومعاني وجهها انكلبت للجدية كالت.
هذا مكتب فقار كاعدة بية بصفتج شنو؟
سكرتيرتة وهذاك مكتبي بغرفتة
اشرتلها بيدي دارت وجهها تباوع مامصدكة عبالك رجعت باوعتلي وكالت.
حلو بس.
سكتت ماكملت كلامها اخذت نفس وغيرت كالت
شنو اسمج
نجمة وحضرتج؟
جمانة
عاشت الاسامي
سكتت متوترة هسة شحجي وياها وهي بس تخزر بية وبالمكان.
جمانة: يطول فقار
لا كال ما اتاخر.
من شفتها ماتاخذ وتنطي كملت الملف الكدامي وكل شوية ارفع عيوني اخذ منها نظرات حلوة وشخصية تحسها بمجلس النواب او مديرة هيج شغل يلوكلها اندارت وكامت من مكانها اول ما انفتح الباب ودخل استاذ فقار تقدم خطوتين وانصدم وكف بمكانة مامصدك يشوفها كدامة
ابتسمت وكالتلة
جمانة: شلونك فقار
فقار: اهلا جمانة.
الثول اخذني وبقيت كاعدة بمكانة نسيت روحي من شفتة دار يريد يكعد يلا حسيت وكمت الملم بالاوراق زرك الملف وكع جوة تطشرن اوراقة حسيت وجهي صار نار دنكت الملم بيهن واغلط على روحي دنك يلم وياي التفتت صارت عيني بعينة ابتسم واحس من الفشلة اريد انفجر دنك عيونة شال الاوراق وكام اخذت الملف اعدل بيهن رتب البيدة وخلاهن بملفي بصوت متوتر نطقت.
اسفة استاذ راح اطلع من المكتب
تحركت خطوات وصوتها وقفني كالت.
ابقي بمكتبج عزيزتي كملي شغلج
لا لا اطلع ابقو انتو احجو
جمانة: تفضلي على مكتبج ميحتاج تطلعين
باوعتلها نظراتها مصرة على بقائي وكان تكلي اذا تطلعين اكفخج تكفج جذب موهيج بس اني فسرتها باوعت لاستاذ فقار ورحت لمكتبي شمرت روحي خليت ايدي على كلبي اتنفس بقوة دهر صابني مديرة كاعدة بمكانة عدلت الاوراق ورجعت ادقق بيهن ما اشوفهم بس صوتها يجيني بوضوح
جمانة: اي عيوني شلونك شخبارك.
فقار: الحمدلله شنو الموضوع الجاية بية
جمانة: حلو تريد ادخل بالموضوع بدون مقدمات
ادلل فقار الموضوع الجاية بية يخص بنتي ود
فقار: وشبيها ود
جمانة: وصلتني اخبارها بنتي اريدها تبقى يمي
فقار: ماسمعت زين منو التريدينها
جمانة: ود بنتي واني الشلتها بطني تسع اشهر وجبتها وتعبت بيها مالك حق تمنعها مني
فقار: حجي قديم عندج غيرة؟
جمانة: فقااار لاتستفزني بنتي خبلتوها ارجعهااا وياي اطلعها من حالتهااا اني امها افتهم عليها.
فقار: هو منوووو سببب حالتهاااا؟
لا ترجع تعيد بالماضي مشكلتك ماتتقبل تطلع منه انت عااااايش بالماضي انسى الموضوع انسااة كافي تحملني السبب
ماريد اجرحج بالكلام بس انتي ما ترهم تكونين ام خصم الكلام
ها حلو بس انت يرهم تكون ام وماخذ دور الام في سبيل اطلع اني المو خوش وتحجيلها عني بالموزين
بنتج كل فترة تاخذينها تشوفينها ومو اسلوبي احجي عليج كدامها تعرفين كل الزين هذا اسلوب رخيص.
والجاي تسوية ارخص من الرخص حارمني منها تبهذلت بنتي بيد النسوان هنا مو امها ولا يحبنها اكثر، مني افتهم هالشي
اعرف اعرف انتي كلش حنية لدرجة صار كل إلى صار احجي من الاخير شرايدة هسة؟ تعبان وماعندي طاقة احجي زايد
جمانة: اجيت اخذ بنتي واروح بس
تشوفينها طبيعي مثل كل مرة بس تاخذينها تحلمين بعد كل هاي المدة والسنين يلا عرفتيها
عرفت حالتها مو زينة وكلبي واجعني عليها.
سكتت من انفتح الباب دخلت روان بيدها ود يضحكن من تقدمت غابت ابتسامة الطفلة وصارت تباوع لابوها وروان انصدمت اسمع صوت جمانة تكول بفرحة.
هلا هلا تعالي يماما تعالي يروحها
ود خلت اصبعها بحلكها وبقت واكفة تباوع باتجاة ابوهة دفعتها روان ليكدام وامها اجت اخذتها بحضنها تبوس بيها لزمت وجهها تسالها...
جمانة: حبيبتي ما اشتاقيتلي؟
مانطقت ود بحرف تباوعلها باستغراب رفعت جمانة شعرها النازل على عيونها وكامت خلتها كدامها حاضنتها بيدها وجهت كلامها لاستاذ فقار التحرك من مكانة.
جمانة: ود تروح وياي
الجو انشحن الى درجة اصفرت وجوهنا اني وروان عبالك احنا النا دخل بالموضوع تقدم فقار بخطوات سريعة واخذ ود بحضنة بقت البنية تباوع لامها.
فقار: ارجعي منين ما اجيتي لا تركبين الموجة عبالج تاخذين جائزة غلطانة.
لزمت جنطتها بقوة وعيونها تنكط غيظ وشر بحدة نطقت كلماتها بتوعد.
جمانة: هالمرة لو اني لو اني ود ترجعلي انتهى زمانك
طلعت فاير دمها تمشي سريع فقار اباوعلة احتار بود يبوس بيها ويشمها بقوة عبالك صارلة فترة ما شايفها مسح على شعرها عيونة مركزة بملامحها.
ود يا روح ابوج
ود: هاذي ماما
فقار: اي شافتج ومشت تعالي تعالي سولفيلي شسويتو بغيابي
اخذها لمكتبة روان باوعتلي وطلعت تهفي بوجهها.
اسمع صوتة وهي ود يسال بيها شسوت وبطفولية تسولفلة شلون لعبناها واكلت.
ود: بابا حبيبي اريد چوكليت
اكو جنية هنا تاكلهن يمكن خلصن
دنكت لمكتبي بعدها العلبة بيها شلتها ورحت الهم رافعتها بيدي.
نجمة: تاااااررررااا هاي شنو؟
كامت من حضن ابوها نزلتلها العلبة اخذت منها
نجمة: هاي لان صرتي صديق انطيتج منهن ذني عزيزات على كلبي
فقار: والله نجوم عندج سوالف بكد المجرات
نجمة: يو استاذ خو سوالفي ماتخلص.
ضحك يهز براسة ود اخذت من الشكولاتة نزل عيونة فقار الها وبصوت هادء طلب منها.
فقار: كولي لنجوم الحبابة شكراً
باوعتلي ضامة الحلوى بيدها
ود: شكراً نجوم الحبابة
نجمة: والعباس انتي حبابة استاذ خل ابوسها بعد ما اتحمل
فقار: ما تبوسينها نجوم حتى تحسين بنفس شعور غيرج
نجمة: استاذ شنو السالفة طلعت انت تحيل بيها حتى ماتخليني ابوسها.
ضحك يعض بشفتة طنكرت ومشيت احجي علية بصوت مسموع كعدت اشتغل وبعد فترة اجة هو وبنتة لمكتبي رفعت راسي اخزر بيهم مبتسم مصبر روحة مايضحك كلي...
تعالي بوسيها راح نطلع لاتبقة بنفسج
نجمة: ماكدر اقاوم الجهال الحلوين عود زعلت ولا اكدر.
دفعها اجتني بستها برقة وابتسمت اخذ شكولاتة ترست اديها طلعو يضحكون واني اضحك بمكاني وراهم بفترة خلصت شغلي طلعت ولاول مرة اشوف سمار صاير عصبي استغربت اسمعة يخابر بمنو وهيج وجههة احمر صاير الحظ العاثر اندار شافني قبل لا اوصل نصة صوتة وراح من غير اتجاة بقة الفضول ياكل بية اكل.
مريت من غرفة على الباب مفتوح مخلي ادية جوة فكة مستند عليهن وجهة مايتفسر من الضوجة خفت وگلبي علمني صاير شي ماكدرت اكمل طريقي وارجع للبيت دكيت الباب فز من صفنتة دخلت وبكل هدوء كعدت كدامة.
نجمة: ها على شصاير؟
هز راسة ماكو شي رفعت حاجبي
هو شنو ماصاير شي بكيفك دكول كول اعرفك ماتجذب انكتهن إلى يلا عليوي يلا.
صفن يذب حسرات سحب قصاصات وقلم يكتب كوة عن نفسة قدمها إلى قريتها وكلبي وجعني رجعت قريتها بصوت بيني وبين نفسي.
علي: امي تريد تشوفني تكول مريضة
باوعت بملامحة حزين محتار لمعت عيوني وكتلة
تروح؟
رجع كتب خليت راسي اقرا اليكتب كتب
ماريد اشوفها
بلا وعي نطقت: حقك
باوعلي مسح وجهة رفع راسة وضرب على بلعومة بحركة ودموعة تجمعت بعينة فهمت علية وفسرت الماكدرت يحجية.
اعرف مو سهلة تروح تشوفها وانت خسرت صوتك بسببها لاتروح اذا يزعجك الموضوع
بحركة سحب الورقة وكتب يضغط عليها بالقلم
ما اروح
اليريحك سوية اهم شي لاتقهر نفسك يلا يلا قبل لا امشي اضحك ابتسم مامتعودة عليك هيج
ابتسم بهدوء ضحكت بالجذب وطلعت كلبي ممرود علية مرد هسة كون اكعد وابجي علية وي طلعتي شفت سما تباوعلي واكفة مكتفة اديها كملت طريقي واول ماطلعت لكيت ميس بسيارتها ضحكت ومشيت قاطع طريقي زيد ذبيت نفس وكتلة ها.
زيد: نسيتي عندي موضوع وياج
نسيت هسة يلا كول شرايد
هنا احجي!
لا بالفندق اروح احسلي من واكفة
مشيت صاح وراي
لا اوكفي نحجي وامشي
كتفت ادية وبعصبية كتلة
يلا احجي
باوع داير مدايرة ماعاجبة الوضع
زيد: بس اني احجي بالشارع
كول زيد ترة طلعتها لروحي
بكل جراة وصلاقة نطق بدون مقدمات خلاني فاتحة عيوني على وسعهن.
اريد نرتبط
عفواً
ماسمعتي ليش!؟
عمي روح مو جوك اني
مشيت صاح وراي بس راد يوكفني
زيد: اخطبج اخطبج اوكفي.
حسيت جسمي رجف هذا شكاعد يحجي ركضت على سيارة ميس وهو وراي فتحت الباب اريد صعد وكال.
زيد: يلا راح اخطبج كولي موافقة
صعدت بسرعة وهو يحجي طبكت الباب وميس باقية مفهية باستعجال كلتلها: -سوقي بسرعة
شخطت السياره عفناة ورانة ذبيت نفس وجهي حار من الشمس من كلامة ماعرف بردت شوية على التبريد وميس منتظرتني اكمل حتى تسالني
شعندج وي هذا؟
ماعرف هو اجة للشركة يريد يحجي وياي
اي شنو حجة وياج؟
يكول نرتبط بعدين يكول اخطبج.
رفعت حواجبها متفاجاة وبذهول نطقت: صدك
والله شبيج ماتشوفين شردت وعفتة
سحبت كلينس مبلل امسح بوجهي وهي تسالني
وانتي شنو رايج؟
يا راي شبيج
يعني شخص خطبج توافقين لا
لا يمة اخاف
من شنو تخافين
ماريد اتزوج اخاف من الفكرة كلها
الى متى تبقين هيج عيني؟
والله مادري نشوف
واني هم ماعرف شكلج بس فكري
هو حلو الولد
اي مرتب واهلة ناس واصلين عمة صاحب شركة ابوة متوفي عمة متكفلة من الصغر امة متزوجة
تعرفينة شنو؟
شخصياً لا بس هيج اعرف من ابوي تعرفين بية اعرف عن شغلة ودائماً يعرفني على رجال الاعمال والاشخاص اليتعامل وياهم اي معلومات يحصلها يجي يسولفهن الي
حلو بس ليش
الة نية يسلمني الشغل
اااالله واني اشتغل وياج غصباً عليج تنطيني منصب
ضحكنا ثنينا ركزت بوجهة اختفت ملامحها وبجدية كالت.
تعرفين وين ماخذتج؟
لا والله بس مو تبيعيني للعصابات
تفكير خايس لا
ها
نروح للبيت نجهز للعرس.
فتحت عيوني بصدمة ماتوقعت بهاي السهولة تزوج گلبي وجعني والشعور الحسيت بية من تزوجن اخواتي زارني واصعب لزمت روحي ما ابجي ومثلت اكلها.
شو بسرعة احس تشاقين
لا والله جد بس اليوم باجر طيارتي
هناك بتركيا تسوون العرس
اي بس اريد نختار بدلة وتحظيرات ساعديني
ليش مو بالعراق تتزوجين
هناك احسن ماكدر بالعراق
واني
ما اسوي عرس نجوم البس فستاني ونروح نتزوج بالكنيسة وتفض
ها حلو وهسة وين ماخذتني؟
لبيتنا ابوي ماموجود.
خلص لعد ابلغ خالي اول
طلعت تليفوني ادية ترجف راسلت خالي بلغتة وعيوني غوشن بعد صرت ما اشوف شي غلقت التليفون ودموعي نزلت التفتت على شهكاتي من شافتني ابجي طبكت السيارة وكفتها وسحبتني لحضنها تمسح على ضهرها.
كافي نجوم كافي
حتى مو بالعراق واشوفج ميس اني ماعندي غيرج صديقة عبالي نشتغل سوى بس ماكملت
تصادقين غيري وابقى اني صديقتج اتواصل وياج ومن تريديني اجيج والله.
كالتها ودارت وجهها نزلت دموعها ماتحملت حضنتي بقوة تبجي وتشهك حرت اسكتها اسكت روحي وثنينة من وحدنا سكتنا السياره صارت هدوء اندارت باوعتلي ذبت حسرة وكالت.
ميس: تعبتي انتي ورة الفطور نحجي بهواي مواضيع
وصلنا لبيتهم سلمت على امها صعدت لغرفتها راحت طلعتلي تراك واجت تكلي...
جديد هذا اسبحي وارتاحي بين مايصير الفطور
اخذتة ورحت سبحت صليت ونمت بغرفتها تبريد وضلمة ماحسيت غير كعدتني تكلي صار الفطور.
غسلت وجهي ونزلت بس هي وامها محضرات طاولة متروسة اكل فطرت والمواعين امها خلتهن بالغسالة ماعدهم شي اخذت تليفوني لكيتة محترك خالي ومرتة ثنينهم متصلين بية خفت اتصل بخالي دكيت على مرتة جاوبتني بنفس الدقيقة.
ها نجوم وين انتي؟
خالة يم ميس مو كلت لخالي
اخذت ميس التليفون منها وكعدت تحجي وياها وختمتها ب اني بس اليوم بالعراق اريدها تبقى يمي باجر مسافرة بعدني حتى بدلة مامختارة.
خالي يعرف ميس ومرتة مسولفتلها عن كلشي يخصها بس ماجنت متوقعة توافق بسهولة تشكرت منها ميس وشمرتة ترفس برجليها فرحانة تصيح
راح تباتين يمييي اليوم
ضحكت بصوت عالي وطفرت فوك جربايتها تباوعلي وتسويلي بيدها مخبلة كعدنا نختار بدلة او بالاصح فستان اختارت فستان بسيط نازل جديد تسمية فستان الحوريات ردنة تول خفيف منفوخة والباقي قماش يختلف مزخرف كصة صدرة قلب
ميس: ها حلو
يجننننننن وعليج يطلع يشك شگ.
ابتسمت بهدوء تختار المجوهرات وباقي التحضيرات بدون واهس سحبت الجهاز منها وكلتلها.
منو هذا شنو وضعة ما افتهمت شي
اخذت مني التليفون طلعتلي صورتة تكلي
هذا شوفية يعرف بابا وعندة شغل خاص بية شركة بتركيا عندة بس صغيرة
ذبت نفس باوعت بوجهها وهزيت راسي
نجمة: عوفي كل هذا مو مهم المهم انت رايدتة؟
دنكت راسها ودموعها نزلت مسحتهن كطعت كلبي من شفت حالتها هيج.
ميس: نجوم گلبي مو إلى والله احتاج انساة اعرف راح تحقدين علية لان اختج والله والله مايعرف ولا اخلية اموت حبة بداخلي وما اخلية يعرف
طفرت جبت مي غسلت وجهها ابعد شعرها عن وجهها تشهك وتحجي عيونها ورمت من البجي حقدت على قبس وكرهتة من شفت حالتها رغم هو مايدري.
ميس: تذكرين نجوم شكد صارلي احبة وشكد اسولفلج عنة مو تذكرين ماريدة بعد والله ماريدة الله يسعدة وي اختج شهب يتيمة تستاهل يحبها ويهتم بيها والله طلع من نفسي بس ماكدر احس بشي هسة مالي نفس بكلشي وافقت حتى انسى ماعرف ليش وافقت دايخة اني
لزمت وجهها بيدي مسحتة قويت روحي وحجيت وياها.
نجمة: ما مستعدة لا توافقين هسة تلزمين التليفون يا تنهين كلشي يا تاجلين.
لا لا ماكدر انطيت كلمة بعد.
زين هسة تنجبين وتصيرين مثل العرايس تفرحين تركصين وطك اصبع اشتعلت روح قبس المكسب الغثيث الحمدلله خلصتي منه ويلا كووووومي
طفرت فتحت الباب نزلت جوة اركض وهي وراي خايفة من تصرفاتي رحت لامها.
خالة اريد ديجي عدكم
عد ميس تلكين
زين خالة عرس بنتج شنو شو سكتة خلينا نسوي حنة هسة وانتي اعزمي التعرفينهن واني اعزم هم وخلينا ندك ونركص نسوي اجواء لهاي العوبة
هي ماتقبل رافضة
مو بكيفها يلا خالة بين مانجهز.
لزمتني تهز بيدة وتصيح
ميس: لج شنلحك هسة
نلحك كلة نطلبة من النت نسوي شي بسيط
ام ميس: الحلويات والتجهيزات يمي ساعة كلشي يجهز بس انتن رتبن روحجن
سحبت ميس وهي ماقابلة بس غصب عنها شنو فاتحة فصلية هيج تروح اريد اركص افرح بيها.
اختاريتلها فستان بدلت واني اخذت فستان مشلتح عليها بس علية زين طلع بما انو هي اضخم مني شوية، عزمنا البنات انصدمن بس كالن يجن تمكيجنة وسوت شعرها وشعري ماكو ساعة ونص كلشي جاهز امها مامخلية شي مامسويتة حتى استغربت شلحكت رحت ابوسها واكلها...
والله مرة كفو انتي عفية عليج
ام ميس: اعجبج اني يلا عيني وصلن كرايبي
خلال ساعة البيت انترس نسوان والبنات وصلن شغلنا الديجي ودك ركص للكاع للكاع وشعر شعررر.
فحطنا من الركص وهي ركصت غصب عنها وغيرت جو تضحك وتسولف خلصت الحفلة البسيطة طكبتها ركضة بدلت ونزعت المكياج فحطت شمرت روحي على القنفة وامها تمدح بية وتحجي بية
خليت ايدي على صدري ادك وميس هزت راسها صعدت...
خالة ادللي شفتي شلون غيرت جوكم والله خالة لو تاخذيني يمج بدال هاي العوبة اخليج اسعد وحدة بالدنيا
ميس: نجوم راح انزلج
دولي هو انتي راح تزوجين وتعوفينهم.
جانت ساعات ردتها ماتخلص ومايطلع الصبح لكن لابد للصباح ان يأتي وتذهب تلك الجميلة المرحة نحو المجهول كان الوداع لحظات صعبة علينا.
راحت ميس هي واهلها بعد المحاضن والدموع كتلها: دزيلي الصور وكلشي اشوف
اول ما ابتعدو احس روحي انسحبت وبقيت يوم كامل ابجي ماطلعت من غرفتي مر اليوم ودزتلي صور عرسهم طالعة لعابة لكن حزينة مبين حزنها عكس زوجها يضحك.
دعيتلها من كل كلبي ان تنسعد وتبني حياة جديده سعيدة، ماكو تغير صار بهالايام غير حدث غير حياتي كلها...
نيزك: بيدي سلة ملابس نزلت اشرهن واسمعهم يسولفون واصواتهم عالية.
جواد: والله فقار كبرتو علينا وصار مايسمع لاحد والبراسة يمشية هسة شنحجي وي العالم
ذهب: لاتحجي على ابو ود لا اتحزملكم احزام
جواد: انتي ابقي وياة وياة للموت ماتشوفين المرة تريد بتها واهلها وعمامها اتصالتهم تركع علينا
ذهب: هسة يجي ابو ود ونشوف شيكول
خلصت شر ملابس دخلت وانفتح الباب دخل فقار سلم علية يمشي بعصبية قابض جف ايدة دخل واستلموة.
جواد: انطي البت لامها ماتشوفها شصاير بيها
كلبها على ساعة يوكف من البجي
بعدة مارد علية ودخل اسامة هسة اجة من السفر ملامحمة ماتبشر بخير حتى ماسلم استلم فقار راساً.
اسامة: هسة هسة تنطيني حل يا ترجع البنية يم امها يا ترجع امها
برود رد علية
فقار: لا انطيها بنتي ولا ارجعها على ذمتي وشتريد تسوي سوي.
كالها وصعد فوك انهد اسامة علية بالكلام والرزايل لاول مرة اشوفة عصبي طلعت دعاء شايلة ود والبنية ذبلانة وجهها اصفر عبالك مريضة جدها من شافها نشغ وفتح ادية راحتلة دعاء اخذها منه يبوس بية ويبعد شعرها تفرفح يحجي بعصبية وروحة تشيط كل مايباوع بملامحها...
اسامة: بنفسي اخذها لامها وشيسوي خلية يسوووي
تحرك طلع ونزل فقار يركض طاير كلبة بصوت عالي رج البيت رج يصيح.
باباااا ود.
ركض على ابوة سحبها منه بالقوة وبكلب محروگ يصيح.
فقار: على اي اسااااس تاخذ بنتيييييييي
احرك البيت والشركة والدنياااا على روسكم بس تتقربون عليهااااا
اسامة: ماتشوووف شصاير بيهاا انطيها لامها انطيهااا
لطم على راسة يصيح مايشوف كدامة
فقار: هو منو السببب بحالتهااا وين جانت عنهاااا وين عوووفوني لا اعوووف البيت واهجججج.
ود تبجي بحضنة وهو يصيح تخبل عليهم صعد لغرفتة طلعت ذهب تحجي على اسامة يسكت طلع من البيت هدأ البيت بقت بس النسوان يحجن.
حفصة: خل يتزوج وحدة تداري بنتة عليش هيج مبهذل مجلبة بيه خل تتعود عليها وتعوفة لوين هيج يضل
دعاء صعدت فوك تشوف ود وهنا يحجن
هاجر: لو يريد يرجع امها اولى بيها والمرة بعدها مامتزوجة
ام تميم: اذا يتزوج يريد هاي دعاء بنية شابة وخريجة حلوة وتحب ود احسن ماتجيبون وحدة مامعروفة.
صعدت فوك وهنا يسولفن باب غرفتة مفتوح وهي تتحرك بالغرفة اشوفها رجعت لغرفتي امير نايم خليت ايدي على كصتة حارة كعدتة مايكعد شلتة اخذتة للحمام سبحتة بمي بارد يلا فز نشفتة ورجعتة البسة السبلت طفيتة وبدلتة.
شغلتلة التليفون عفتة يباوع نزلت اسويلة اكل هاي دوم حرارتة تصعد ياسمين وسهل يكطعن دجاج صينية جبيرة وقبل لا اسال عرفت من كلامهن ثواب للامام على (علية السلام) سويت اكل وصعدت وكلت امير مريت على شهب دايخة من النساوة ومخلصتها بس نوم كعدتها تاكللها لكمة باقية على الريوك عفت امير يمها ونزلت اشتغل وياهن ورة الفطور بشوية احنا نغسل مواعين والمطبخ مكلوب كلاب شفت دعاء راحت تركض عفت البيدي ورحت وراها هاي ركضتها مو خالية وفعلاً جانت هيج هما بالحديقة كعدتهم صايرة ودخلت بنية وياها رجال جبير يحجون ومن تقربت اسمع عرفت هي نفسها طليقة فقار.
جمانة: اجيت اخذ بنتي وامشي بدون مشاكل
هاجر: فقار اخذ بنتة وطلع مو هنا
جمانة: يرجع شكد يريد يبقى برا اول وتالي يرجع وهاي كاعدة منتظرتة
تدخل ابوها يحجي حتى ماعرف ابوها لو لا وعمام فقار واسامة يحجون وياة ختموها ب.
فقار ماينطي بنتة لو شما حاولنة وياة لكن اكو حل ثاني وهو ترجعون لخاطر البنية
جمانة: اني ماعندي اشكال علمود بنتي ارجع بس هو يوافق.
اشوف دعاء انحمست حمس دخلت جوة ماتحملت كلامهم اسامة يفتر يتصل بية ومايرد كلهم صارو يتصلون بية ومايرد عليهم قدمنالهم ضيافة وشوية رجع فقار بحضنة ود تضحك بيدها شعر بنات.
مر عليهم سلم ود بحضنة ماينزلها للكاع عبالك راح ياخذونها منه مبين شكد يحبها ومتعلق بيها وهي هم بقة واكف وهما كلولة.
احنا نريد حل يرضي الطرفين شنو رايك بقرارنا.
باوع بوجهم واحد واحد بعدم رضا يعرف راح يحركون كلبة بكلامهم التفتت لطليقتة من حجت
جمانة: وافقت ارجعلك لخاطر بنتي لان اعرف ماراح تنطيها الي
فقار: ومنو كلج اني رايد ارجعج!؟
لحظة صمت صارت وهي تفشلت تخزر بية كملت بحدة.
جمانة: مو لخاطرك لخاطر بنتي
فقار: حلو افتهمت واني ما ارجعج على ذمتي لو مو بنتي ولا انطيها
جمانة: واني اريدها
فقار: ما انطيها وانتي تعرفين ليش خليني ساكت لا اخليج.
كطع كلامة وسكت عافهم يحجون وحدهم فوراً طلعت من البيت وجهها صار اصفر وكانة لازم عليها لزمة وهددها طلعت وابوها وراها راح.
دخلت اكمل شغلي واسولف لشهب السالفة اتصلت تحجي وي نجمة غسلت ادية وصعدت وراها اخذتة منهة اسالها.
اكلج هم رحتي لكواكب
نجمة: اي رحت
فزت كلبي من كالت اي اخذت الموبايل افتر بية واحاجيها متلهفة اسم اخبارها: شلونها نجمة
نجمة: زينة بخير
هم سالت علينا كالت اخواتي شلونهن
اي سالت سالت.
بعدها زعلانة؟ صدك ماتريدنة؟ سمعت اخبارنا
بهتت ملامحي وكلبي وجعني من كالت
نجمة: عوفيها تعيش حياتها تشتغل يوم وتكعد عشرة لا تصرف على واحد ولا محتارة باحد بس هي بطرك عمرها متونسة وي دراهم لا نوصلها ولا توصلنة مشاكلنا هواي خل نبقى بعيد
هسة اني شرايدة منها رايدة سلامتها بس.
انطيت التليفون لشهب وامير يحجي وياهن رجرجعت لغرفتي گلبي ممرود وكلامها خشن گلبي ريتني ما سالتها واني على الجرباية شامرة روحي ودموعي مبللة الفراش شعري مفتوح انفتح الباب ومن شفتة ضرغام خليت ايدي على عيوني وسويت روحي نايمة ماتمشي علية كعد وسحبني لحضنة خلاني على رجلية فتح شعري ضميت وجهي ماريدة يشوفة دخل اصابعة بشعري يسويلي مساج غفيت ماحاسة على روحي.
كعدت الغرفة ظلمة ذبيت الغطا وكمت فتحت الضوة ضرغام ماموجود الساعة 30: 12
شلت التليفون اتصلت بية جاوب بنفس اللحظة
وين انت؟
برا وي جماعتي
يا جماعة هسة
غير رمضان يلا جايج حظري روحج
ضحك وسد التليفون بقيت انتظرة فتحت الشباك اباوع للشارع طبكت سيارتة ونزل يفر بالمفتاح بسرعة سديتة لا يشوفني ويبقة يحجي علية.
حسيت بية تاخر وتفكيري راح لبعيد طلعت من غرفتي بعدني بالممر بالوفة وكفت وكلبي يدك بقوة بكل وضوح اشوف اسيل بملابس نوم لابسة فوكهن روب طويل من ورة مايبين شي بس الكدام ضاهر علية وشعرها مفتوح والمكياج الراسمتة تجيب اكبر راس يبتعد منها وهي تقترب لزمتة من زندة تقربة عليها نتر ايدها وهي تكلة.
اسيل: ما مشتاقلي ضرغام؟
هز راسة يريد يعبر سحبتة تكمل وتسوي حركات وصوتها تنعمة.
لا عبالك حامل بعدني ماياثر علية الحمل.
اسويلك ليلة مثل مايحبها گلبك كدامك اني شتسوي ما اكلك لا
بقوة دفعها قرب وجهة يكللها وياشر بيدة يفهمها
ضرغام: روحي هاي روحي جزت منج ومن النسوان مالي نفس بيج لو يصوغونج ذهب ماريدج ولا اتقربلج
ليش ضرغام ليش مو ان.
ما خلاها تكمل كلامها وكفخها من كاللها
ضرغام: مالي يمج شي غير ابني
من يوم الشفتها ماشفت غيرها ادخلي واستري على روحج لاتنتظرين مني ليلة وحدة.
عافها ومشة رحت اركض للغرفة بوجهي ركض للحمام دخلت وسديت الباب خليت ايدي على صدري اجر نفس رتبت روحي ومن دك الباب فتحتة باوعلي يتفحصني سحبني بدون مقدمات وباس راسي يكلي.
شلون صرتي زينه؟
اممم
باس عيوني ورفع راسة كلي
عيونج جريمة يبجن حرام عليج تبجين نازك
صار.
رفع حاجبة تفاجا من ردي ابتسمت بوجهها واحس گلبي يريد يطلع من مكانة ماتوقعت هيج يحجي وياها اني مخلية ايدي على كلبي خاف لايروحلها وهي حلوة بس برد گلبي من سمعت كلامة.
رمشت بعيوني وهو صافن بوجهي ملت علية
وهمست باذنة احبك
ابتعدت وهو حتى رمشة مايرمش ضحكت من شفت ملامحة وابتعدت لحكني سحبني لازم وجهي ويحجي مامصدك.
ضرغام: صدك كلتيلي احبك لو سمعت بالغلط لو شنو
هو اني كلتها بس يمكن بالغلط.
فتح عيونة على وسعهن رفعت ايدي وكتلة
جذب بالصدك كتلك مو بالجذب
سحبني يبوس بيه ويتغزل بانواع الغزل خلاني اصير نار وامتمت بحلكي ماعرف شحجي.
جحظت عيوني وفريت راسي من خلة بيدي شريط حب مانع اخذتة من ايدة شمرتة سحبة وطلع حباية قربها من حلكي ابتعدت عنة رفعت ايدي ترجف ماكدرت احجي والافكار صارت تتراكع.
ضرغام: اشربيها وريحيني
نيزك: ما اشرررب وخر مني
اشربي لاتعبيني
ضربت ايدة بقوة عيوني يردن يطلع وهو يفهمني.
ضرغام: الدكتور دكلي ممنوع الحمل كلبج تعبان نيزك بعدج مريضة هاج اشربي
نيزك: ما اشرب مابية شي اني
سحبني بقوة ولزم وجهي يمسح على خدودي
ضرغام: بس تمر فترة وتصيرين زينة اكطعية
منو كلك اصير زينة وضعي مايختلف اليوم عن بعد اشهر واني اريد طفل
اني ماريد طفل عندي ثنين يكفوون.
هزيت راسي ودموعي نزلت من بلعها إلى غصب بقة يحجي وياي شكد ولا فاد حزت بخاطري والافكار تروح وتجي بالي اريد طفل منه حتى ابقة وياة وهم اخو لامير منه بس ماصار.
لثاني اليوم الطبخ وعلى وذهب كاعدين بالحديقة على يخوط بخزان ماش وتمن اجو حسين وحسن يدخلون صناديك روبة وسفري للعصر كلها كعدت تصب دجاج وتمن وحدة وماش وروب هم وحدة
صناديك ببسي كعدو يصبون وذهب تمسح براس على وتنخة بشوغة.
طلبتة منك ياعلي العافية واريدنة يعرس وافرح بية كون يابو الحسن لو عرس اسوي ذاك الطبخ والثواب نذر لوجهة الله وبثوابك
حسين: حبوبة ماتنخين لحسن يتزوج ويفتح جبستنة
نضال: خاب انتو غير زعاطيط يا تنحل جبستكم
حسين: شكد يصير عمري بعد الله اكبر ذهب ترضين بهذا الحجي
ذهب: ماعليكم بامكم كونكم خوش ازلام اني اعرسلكم
طفرو عليها يبوسون بيها ويمدحون وحفصة تخزر بيهم ماعاجبها راحو وي على وزعو الثواب.
لليل اجت ورد تحجي وياي بصوت ناصي
اسيل تحجي وي سهلة وتبجي تكلها حرام علية اني هم مرتة والله من فوك مايرضاها بنفس البيت ومايتقربلي.
اشتعلت نار وعرفت غايتها تريد تسحبة واني متاكدة لو راحلها مايرجع ضرغام القديم شبت براسي الغيرة وصرت بساع بساع اكف الشغل واتحظر من وقت احبسة يمي بالغرفة حتى ما اخلية ينزل جوة قبل السحور وقبل لا يكعدون اجهزلة صينية وابقة على اتصال وياة خاف تدخل غرفتي بغيابي وهيج عدت الفترة هاي ويوم اجت ام ضرغام تحجي وياي وتكلي.
يمة خلية يتقربلها تحرم علية اذا مايتقرب كل شهر مرة
نيزك: ذاك هو وروحي احجي وياة اني شعلية.
وهو اول مايدخل اطلع سوالف من جوا الكاع واخلية صافن احس حتى شخصيتي تغيرت مرات اصفن على روحي واكول هاي منو التدلع وتضحك وين نيزك العصبية الروحها بخشمها؟ وهو مكيف ومتونس على سوالفي ورغم هذا كلة جنت مخلية ايدي على كلبي من الجايات.
ود حالتها مثل ماهي وامها تفتر عليها وفقار متخبل منها يصيح مايريدها ويكلولة اتزوج ورافض
الا ان بيوم اجت طليقتة بيدها جنطة ملابس جبيرة وياها نفس الرجال سلم وهي تحجي.
جمانة: اجيت يم بنتي مايهمني فقار ولا قرارة
اشوف حالة بنتي بعيني واكف على علتها
وهذا الخبر جان صدمة لفقار بس ماحجة شي وكال كلمتة كدام الكل: مالي شغل وياج حالج حال مربية اعتبرج
فرغولها غرفة جوة وكعدت جمانة البنية لاتاخذ ولاتنطي وي اي شخص شغلها وي ود ودعاء متخبلة لان ما تنطيها ود مثل قبل جانت كلة يمها
سندس: شدعواج عيني هسة يلا عرفتي عندج بنية وحنتيتي بنتج جانت يم دعاء تبدل وتغسل هسة تحرمينها منها.
جمانة: وهسة اني اجيت ما احتاج لبنتج شكراً الها على مداراتها الها واذا تريد مقابل تحدد مبلغ واني انطيها
دعاء: اشفتيني عايزة فلوس احتفظي بيهن لروحج واشتري كرامة اذا تردين
جمانة: عندي كرامة مايحتاج
دعاء: واضح كرامتج باقية بيت رجلج القديم وهو لايباوع بوجهج وكدام الكل كال ماريدج لا عقد ولا صخام كاعدة بيتة بحجة بنتي وين جنتي عنها كولي اريدة وفضيها
جمانة: وانتي شخصج اعصابج ماما.
دخلت وعافتها تلغي فد شخصية وثكيلة الى درجة حركتها حرك ولا تلتغي بيهن هنا يحتكن بيها وبالنهاية تحركهن حررك.
قبس خلال هالفترة اجة كم يوم وقبل العيد رجع سافر يبقى اتصال وي شهب وتكول كم يوم ويرجع
قرب العيد والبيت مختبص خبصة على التجهيزات والترتيب اتصلت بنجمة وكلتلها تجيني ماكلتلها السبب.
اخذتها لغرفتي وشهب اجت يمنا مستمرة تسولف على ميس وعرسها وراوتني صورها طالعة تجنن
ذبت حسرة وباوعتلي بتوتر كالت.
نجمة: اكو ولد خطبني هواي
منو هذا
اسمة زيد يشتغل بشركة يعرفونة الولد
اي وانتي شدكولين
خيولي يريد يحجي وي خالي
كامت تغير الموضوع ما سالتها بعد هي من ذاتها تحجي طلعت فلوس وخليت بيها انصدمت من المبلغ واصفر وجههة من طلبت منها.
نيزك: ترحين لكواكب تعايدينها مقدماً وتبوسينها وتشمينها
كطعت كلامي ماكدرت اكمل نزلت دموعي مسحتهن وكملت اتماسك اعصابي.
هاي الفلوس تنطيها الها مو من ضرغام هاي الفلوس الجابتهن وتعبت بيهن.
نجمة: الباكتهن
اي تعوفينهن يمها غصب عنها تاخذهن عاد مصرف الها بلكت ماتطلع لو تشوف شغل بيهن
ماتحملت ابقى طلعت اكمل بجي ومن وراها طلع شيب براسي مستحيل يمر يوم اذا ما اعاتب روحي
واحجي وياها عن السبب رجعت لكيت شهب مجلبة نجمة تتوسل بيها تروح...
شهب: خل على ياخذنا نسلم عليها ونرجع قبس هم مايكول لا
نجمة: لا لا ابقي عمي ماتريدجن كوة كالت بس يجن اعوف المكان واشرد خطية احسن تتبهذل مو جاي اكلجن زينة شبيجن تلحن.
بقت شهب مكسورة خاطر تريد تشوفها ايدت نجمة وخفت عليها لاتترك المكان طلعت نجمة مخطوف وجهها رحت وراها وي طلعتها صادفتها جمانة سلمت عليها وبقت تحجي وياها راحت نجمة لذهب صاحتها تكلها...
بالعيد تعاي علينة محظرتلج عيدية انتي واختج السباعية مو تنسين تجيبينها كليلها ذهب مشتاكتلج
هزت راسها مانطقت بحرف واحد وعيونها غركت بالدموع سحبتها من طلعت اسال بيها...
جمانة حجت وياج شي غثتج؟
لا لا والله.
انتظرت على يوصلها احسن ماترجع وحدها رحت اشوفة يتاخر لا لاكاني فقار عبرني بين مارجعت لكيتة واكف مكتف ادية وعاكد حواجبة مخنزر ومتعصب بفضول باوعت بالاتجاة اليباوعلة شفت نجمة تحجي وي ضيغم من شافني نزل ادية طلعت وهو على وكفتة بقة شافتني نجمة كالت.
ضيغم طالع راح يوصلني بطريقة
خزرتها ردت منها ولاحست طلعت وهو افتهم علية كال: نجمة حالها حال ورد اختي الصغيرة هاي
طلعو رجعت لكيت فقار من بعيد يسال بجمانة.
شلون صارت ود هالفترة؟
جمانة: لاحظت التغيير بعيونك والكل لاحظ حالة ود وشلون صارت ماتبجي
فقار: تتوقعين ليش رجعت الها الحالة؟
جمانة: يا حالة عيني لابعدك مجلب بالموقف الصار قبل سنين وعبالك رجعت حالتها سائت بسببة؟
فقار: المعنى؟
جمانة: من اكتشف اكلك
عافتة ودخلت وللامانة البنية ماشفنا عليها شي للان ابد ماتصعد فوك حدها غرفتها وبنتها طول الوقت تعلم بيها اشياء احس ود صارت اجتماعية اكثر بس هي بضهرها.
بقة بمكانة واكف واني اشتغل واطلع اكل من الثلاجة كتلة.
للامانة ود كلش تغيرت من اجت امها ها طبعاً للافضل بس سؤال حيرني خل نكول فضولي
انداريت اباوع بعيونة عن لا يجذب وكتلة
احس جمانة ام مثالية شعجب كل السنين الفاتت عايفة ود عندك وما اخذتها
المفروض تسالينها هذا السؤال
احب اسمع منك لان احس جوابك اصدق.
صارلي فترة اقرا علم النفس وحيل واساليب للاعتراف وشلون اعرف اذا الشخص يجذب او لا وبعد هواي اشياء طبقتهن على ضرغام جابن نتيجة
بس وياة مافاد.
فقار: الندم قبل فوات الاوان انتي شنو رايج؟
نيزك: تقصد بعدها ود صغيرة حتى لاتكبر وتنساها
هز راسة اي كطعت كلامي من اجت دعاء وهاي وين ماكالو اجة فقار طفرتلة اسويلك اكل اسويلك جاي ومرات بدون مايكول تسويلة وتاخذلة.
فقار: مثل ماكتلج راجعي بابنج اي شفتي علية اعراض.
نيزك: اكيد اذا صارت حالتة اسوء
طلع بسرعة ودعاء عيونها وراة ماتحملت وكتلها
لاتتاملين بية زوجتة موجوده احس عن قريب يرجعون
دعاء: لاتحسين هو مايباوع بوجهة شيرجع منها ماتشوفينها جبيرة علية
لا نفس العمر عاقلة ورزنة كلش مناسبة لعمرة
حبيبتي الرجال يريد وحدة اصغر منة مو بعمرة هيج يلعب عليها يضحك على سوالفها الا هاي عبالك ضابط.
هزيت ايدي وبكلبي كلت عاد انتي شلونج ناعمة والكياتة فول اشو كلة عيارة واحنا البنات من نسمع سوالفج ننغث
صار الليل عفتهن يسون كليجة وصعدت لغرفتب طلعت شخصيتي الثانية لبس مكياج عطور بالعشرة ضرغام بالغرفة ينزرع عمرتلة النركيلة واخذت صحن فواكة كعدت على رجلة وبالشوكة اوكل بية.
اوي على كيفك
دوختيني احس مسويتلي سحر وين ماروح بالي بس اطلع من الغرفة اشتاقلج واشتاق لسوالفج
ضحكت بصوت باس ايدي رفع شعرة ماينرفع.
وبدلع كتلة: حبيبي من الله ساحرتك مو شغل ام عباس
بكل الحالتين طايح حظي وقابل بيج
تحلم تفكررر بغيري
لاعمي مافكر بغيرج بية حيل افكر بغيرج
وتفتر بية بالمستشفيات
لاتطيرين كلبي بيش ذكرتيني اسكتي هو موتي على ايدج
عمرك طويل حبيبي
ضحك بصوت مامصدك اكلة حبيبي ضحكت وياة من كل كلبي على سوالفي وكتلة.
نيزك: هاي منو ماعرفها ضرغام رجاءً اريد شخصيتي القديمة
بالحالتين احبج ان جنتي هيفاء وهبي لو جاسم.
افففف هيج جاسم صرت لا ضلمت بختك يحاج
عاف النركيلة وغص بالضحك اكلت فواكة وبررتلة
نيزك: احس السوالف تطلعني وتطلع شخصياتي
واني كاعدلج وكاعد لسوالفج متونس عليج
سحب خدودي وكمل يدخن باوعلي مقلص عيونة وكال: انتي مو جنتي ما اقبل ادخن شو هسة تعمرين النركيلة بيدج
شوية تاخذ منها حتى ما احرمك من شي انت متعود علية.
راد يبوسني وطفر من اندك باب غرفتنا استغربت وخفت صاير شي طلع هو صرت ورة الباب مخلية اذني اسمع ابوة شيريد منه جفلت من كال.
فرقد: شنو بس هاي مرتك ولك ماتعرف شرع الله مادام ذيج بذمتك تروحلها
ضرغام: يابة عوف المرة حبلة شعليك بيها
تحرم عليك يازمال
مالي نفس بيها شسوي
حتى لو كل اسبوع مرة عمي كل شهر مرة مايصير هيج من اجت ولجاي ولا داخل غرفتها.
ضرغام: ولا يخلون الواحد مرتاح روح بوية شوف روحك بالاول سهلة من السقوط ما بايسها
ايا جلب اني اعلمك اذا ما اشهرك واطيح حظك
سد الباب صرت كدامة خاتلة وجهي صار دم وكلبي يدك بقوة رمشت بعيوني وكتلة كوة عن روحي
روحلها عادي هي مرتك
سحبني لحضنة خلة ايدة على كلبي وكلي
ما اروحلها بس هدي هدي كلبج لايوكف
ماعليك هو هيج عادي
بوية يردوني اعيد بالمستشفى انتي اسكتي لا ابتلي بيج مو صرتي حنينة عليها امشي انطيج عيدية تسوة.
كعدت بمصباح العيد سبحت وي الاذان صليت ضرغام رجع نام واني ولا غفيت قريت زيارة عاشوراء وشوية من القرآن ختمتة.
نمت شوية وكعدت طلعت دشداشة العيد تعطرت وخليت شوية حمرة وكحلة ومسكارة لفيت شالي ورطبت ادية طلع ضرغام لابس دشداشة بيضة ضابتة وبارزة عضلاتة تعطر ومشط شعرة لبستة ساعتة ومحبس اخذت السبحة خليتها بيدة ذهبية وشلت العطر مخلي هو بس حبيت اني بنفسي اخليلة ردت ارشلة على نحرة رفعت رجلية مالحتة.
خزرتة وكرصتة...
نزل راسك خليني احطلك عطر لا اعرس عليك
عرسي يابة شعندي غيرج
دنك يبوس بية سحبت روحي كوة رفع روحة من ردت ارشلة عطر ردت اغرد فاجاني من شالني ضحكت ورشيتلة عطر شميتة.
الله هسة توب.
نزلنا سوى البيت يلمع ريحة البخور والبلازمة مشغلينها صفكات عمامة لابسين دشاديش متطشرين على القنفات هما ونسوانهم وذهب كدامها علبة جكليت واحفادها محاوطينها حسين واخوة خانكينها خنك منا ومنا وعلى يخزر بيهم ضايج صبحنا عليهم وعايدناهم دنكت على ذهب بست راسها وايدها ومطرتني بانواع الدعوات التفتح النفس اخذت بيدها جكليت وانطتني وغمزتلي تهمسلي.
ذهب: عيديتجن ضامتها بس يروحون انطيجن.
ضحكت وكعدت بسد ضرغام رفعت راسي نزلن البنات برئاسة وردة القائد مالتهم لابسة فستان على شكل بدلة والشعر فاتحتة طالعة لعابة وراها البنات كل وحدة لبسة وشكل غير بعدها نزلو قبس وشهب شكلهم يرد الروح.
ذهب واحفادها محلين المة بسوالفهم وضحكتهم بس ما ادوم الهم ابد كان مكتوب راح تبجون هواي بعد هاليوم وكل واحد بيكم يضوك عذاب غير
حسين: الله ذهوبة انطتنا عيدية وانتو محد انطاكم عيدية.
هو واخو يطلعون بعيدياتهم يغورون بالشباب
ضرغام: ها ذهب تريدين اسميج فافونة احسن
ذهب: خفة هالشكل جنك تمرة غاطينها باللبن
ضحكنا بصوت عالي الا هو وياها واحد يخزر بالثاني اشر عليها بالسبحة.
ضرغام: وانتي جنج ليمونة طاكها جفاف
ذهب خزرتهم واحد واحد محد يتجرا بعد يضحك كلهم حاصرين ضحكتهم كالتلة...
ذهب: ماتضحك ماتضحك يالتمرة
تمر ولا حموضة
ماتحملنا ضحكنا كلنا حتى ولد حفصة وهي تهز بيدها ضربت التؤم ذبت حركتها بيهم...
ذهب: ماغزرت العيديات ادحسلكم وتضحكون علية كومو منا كوومو
محسن: مو نحبج ليش هيج ويانة انتي والزمن علينا
كامو يجمعون عيديات وغطو الولد غط ورد كاعدة بحضن ضيغم تمد بيدها تريد عيدية طلع من جيبة شدة خمسة وعشرين انطاها وانطة جوري وباقي البنات وزعهن حتى شهب انطاها واندار علية بيد ضرغام كلة.
هاي عيدية ام امير
ضرغام: وامير.
سحب ثانية وهو امير اجة يسحل برضا ثنينهم كاشخين ومبدلين اخذهم يبوس بيهم وانطاهم عيديات وامير ورضا حملو عيديات كل اليروحولة ينطيهم لو عشرة لو خمسة وعشرين اجاني يضحك ويراوي بية.
نانا تومة فلوس توومة صارن عندي
راح لضرغام يكلة
اليد تراجة مثل تواتب اليد اروحلها تعلمني اسوعها
اختفت ابتسامتي وضيغم عينة صارت علية
دخل فقار شايل ود منظرها يرد الروح متفحة هالايام ولابسة بدلة مسوية تسريحة ومن واحد لواحد.
اجواء العيد بين الخطار المايخلص قبس رجع سافر وشهب كلبت خلقتها وتبجي كوة غيرلها البنات جو خالي ومرتة ونجوم عايدونة العصر وراحو.
جنا كاعدين بالحديقة فارشين حصيرة والكليجة والجاي رايح راجع الولد كلهم موجودين جناين حفصة راحن لاهلهن وضيغم اخذ امة واخواتة لاخوالهن البيت فرغ الكعدة جانت تخبل وتونس لوما اجة خطار لا علبال ولا على الخاطر كلب الاجواء الى مشاحنات.
اول شخص طفر من مكانة فقار وامة جحظت عيونها اسامة رفع ايدة وطلع فوراً دخلو ولد بكد فقار وياة زوجتة واطفالة وامة مرة جبيرة تقدم علية فقار بعصبية فاتح عيونة يصيح بية.
شعندك جاااي شعندك
رد علية برود
جاي اعايد وامشي منعتني كل هاي السنين ماتكدر تمنعني بعد
التفت فقار بنفس اللحظة وجهها اصفر متعرق شاف امة فاتحة عيونها بقوة تباوع للاطفال وترجف بشكل مو طبيعي راحلها يركض يدك على خدها بخوف وقلق يحاجيها.
يمة لاتباوعيلهم فدووووة يماااااا
رفعت اصبعها تاشر علية وبلسان ثكيل كالت
هو هو اكرهة من وراة راحن
شالها فقار وطلع بيها يركض متخبل وامة تحجي
شلون نكطع صلة القرابة بينة قدر وصار ابني ما اله دخل بالموضوع كافي تلح
صاحت بيها ذهب وهي كاعدة
اسكتي لاتفتحين الموضوع سدية سدية
التفتت اشوف دعاء جانت تركض تاشر بيدها وتكلي: الحكي اختج طاحت الحكيهاااا.
كواكب: فتحت الباب جمدت بمكاني اباوع مامصدكة بالتشوفة عيني ردت احجي ماكدرت من الصدمة دفعتني ودخلت باناقتها وبعطرها يهفي وراها سديت الباب ومشيت وراها حجيت بصدمة
ميار شجابج هنا
عيني اجيت علمودج
وخرت شعرها انثر وطكت علجها بحلكها دوم
كواكب: شكو جايتني شعندج يمي؟
بقيتي براسي
راح تساعديني؟
لا اخلصج من هذا الشغل
رفعت حاجبي
شنو من شغل
ميار: اكو مرة مقعدة تدارينها بس.
استغفرالله دروب دروب عدكم من الاخير كولي غيرها
شبيج ماما منو المجذب عليج
شنو الشغل
مثل مكلت
اني بنية احب اثباتات واكو اسئلة تجي بعقلي يردن جواب
بسرعة اجاوبج يلة ماعندي وقت
مرة مقعدة قلة الممرضات لو النسوان التشتغل
كتلج عجبتيني لو اريد اجيب احسنهن وجانت عندي صارت مشكله وطردتها اريد وحدة ثقة
وها اكو ممرضة وياج وانتي هم عينج منا ومنا ذني مايفيد وياهم كامرات.
طلعت بلقيس تباوع باستغراب وعيونها تفصل بيهابقت ساكتة تباوع.
ميار: ها تشتغلين احسن من هالشغل والمكان الزبالة
باوعت لبلقيس وهزيت راسي بموافقة
كواكب: اروح وياج ميار عندي ثقة بيج اتمنى ماتكسرينها
بلقيس سحبتني تحجي بيني وبينها
ولج ياغبية وين رايحة وي هاي ال ماتعرفين شبيها مابيها ماجايتج منها لله عوفيها وابقي اني اشردج.
باوعت لميار عيونها علينة صفنت بعيونها واني كلي امل بلغة العيون قريت الامان بيها وشي بداخلها عكس شخصيتها ابتعدت من بلقيس واكدت لميار
اجي وياج شوكت ماتردين
ميار: اوكي بس احجي وي الاعرج واخذ موافقتة
راحت وبعد مارجعت جنت متاملة بيها ترجعني اطلعني منا بس خابت امالي وتوقعاتي سالت بلقيس: ليش ميار مارجعت.
وانتي متخيلة الاعرج يعوفج وانتي تشتغلين شغل زلم ونسوان شوفي الاعرج جلب بيج لان ماعليج سوابق ومحد يعرفج وهو هيج شكول تصعب علية يجيبها يلكة العاهرات وذني مايفيدنا بشغلة يونسن مايطلعن فلوس ياخذن فلوس
طمع بية
كلش
شسوي
انتظري ابن عمي يطلعج ماكو غيرها.
ومن هذا اليوم ننتظر ابن عمها وذاك يوم اندك الباب طفرت اشوف بلقيس تحجي وي واحد خفت ونسيت السالفة فكرت بغير شي ركضت للمطبخ طلعت سجينة ولزمتها بقوة من شفتها اجت باتجاهي ضميتها وراي.
بلقيس: اجة اجة يلا بساع تحضري
منو هذا
ابن عمي ياخذج يلة
بقيت بمكاني لا اخذ ولا انطي صفنت بيها وهي باستعجال تكلي وتاشر.
فرصة اجتج اطلعي تحرري ولج مادام الاعرج وصحبانة طالعين بشغل.
هزيت راسي ودخلت للغرفة بسرعة واني اركض لبست ماخليت شي يطلع من شكلي اخذت جنطتي لبستها وتذكرت سالم من شمرها وطردني ضحكت اكول بكلبي اجيتك يسالم ما نسيت ذاك اليوم وحك صريخها ولوعتها علية الا الوعك
خليت سجينتي بجيبي وهاي اخذتها احتياط طلعت بلقيس حضنتني وبجت تكلي: اعذريني وادعيلي وياج
بستها ومشيت اوعدها
وعد ما انساج واطلعج من ابو صلعة واسجنة.
طلعت وي الولد صعدت بسيارتة سكراب باقية وهو يترقب منا ومنا الدرابين فارغة صعدت ورة شغل واني لازمة كلبي بيدي قبل لايدخل بفرع جديد كلي
انبطحي وغطي روحج بالغراض
اكو غراض هواي وصلة خليتها علية ومنا ومنا رتبتهن وابطحت وكفت السيارة واسمعة يسولف وي واحد ويضحك لعبت روحي من سوالفهم طولو يلا كلة.
روح عطلناك
سلمولي على الاعرج وكلة اجيتك بشغل
تامر امرر.
ذبيت نفس من طلعنة من المنطقة السودة مامصدكة رفعت روحي من انطاني كلمة احس كلبي يدك بقوة وعيوني نزلت دموعهة برجفة صوت كلت.
عمي طلعنا بعد ماكو الاعرج ارجع لاخواتي
اي بس قبلها تقدمين بلاغ بيهم وتكشفين كل اماكنهم
هزيت راسي بخوف ومسحت وجهي
لا مالي دخل بيهم بس اطلع
وكف السياره واندار يحجي بعصبية
لج اني طلعتج وخاطرت بحياتي بس حتى تطلعين وتخلصين عليهم
افهمني افهمني اني مالي شي وياهم بس اطلع ما اذوني.
يرجعونج بالغصب وتشتغلين اضعاف شغلج خاف هسة متعاطفين وياج وساعتها اني الاتبهذل وتنكطع ركبتي لان يكشفوني ماسوينا شي اذا هيج زدنا الطين بلة تمشين تشتكين هذا لولاء مخلص بشغلة يسحلهم سحل
تذكرت الاعرج خفت لا يبقى مهزوم ويرجع يعذبني
بخوف كتلة: عمي اني انزل هنا انت اشتكي اذا تريد
جفلت من صاح بصوت عالي وهدد
ارجعج الهم والوفها عليج بس ماتشتكين
دار السيارة يرجع صحت بية
لا لا اخذني اشتكي لا ترجعني يمهم.
رجع دار السيارة وحرك الهوى ضاك بصدري خفت منهم وكان كلبي علمني بالطريق وهو يعلمني شحجي وينطيني معلومات عنهم كلش جبيرة وخطرة حتى اماكن شغلهم وكلشي يخصهم قراة براسي وانطبع طبع كد ما مركزة وياه.
ها فهمتي شتحجين
فهمت بس ليش كتلي هيج انت مو منهم وبيهم
اي بس مانطوني حقي علسوني
وانت راح ترفس بطنهم.
ضحك من حجايتي وفجاة موبايلة رن فتحة وبنفس الثانية صار يسوق بسرعة رهيبة ماكو خيارين يا نموت يا نموت سلمت على روحي وجلبت بقوة يحجي بصوت عالي ويردد
انهيهم قبل لاينهوني.
بدل طريقة والسيارة تنشال بينة وتنركع بالكاع حسيت مصاريني طلعن من حلكي وبنفس السرعة كسرت سيارة علينة طايرة مالحكت افتح الباب ونزلو ثنين ملثمين شهرو مسدساتهم ورمو باتجاة السايق صرخت بصوت عالي مرعوبة حركو وعافوني وي شخص يلقط انفاسة الاخيرة ثواني بس ثواني وسلمها طلعت ملخت روحي تملخ من الخوف كلبي راد يوكف دمة يسيل وصدرة مزرف بالطلق انداريت حول نفسي الطم على راسي مصيبة هاي مصيبة اشوف شخص ينقتل كدامي اكبر مصيبة.
لا هاي مو مصيبة المصيبة الجبيرة من اجت سيارة الاعرج وكفت كلبي وكلشي بية من الصدمة ماتحركت نزل هو وقامة وجوهم مابيها اي رحمة غير ذولاك الاعرفهم والاغلط عليهم وكف قامة يمي يخزر بية والاعرج فتح الباب وباوع للشخص المقتول وبشماتة وخبث كلة.
ها ولك هاي تاليتك لجهنم كبل على الاعرج علية ي.
راد يتفل علية ولزم نفسة وحتى راد يضربة بس ماكدر خاف بصماتة تلزك بية وهو رغم هذا فتح الباب ورجع مسح الاثر بملابسة اجة علية وانشمرت بالكاع من قوة الراجدي الضربة الي
بقوة رفس بطني حسيت امعائي انمردت وكمت اتفل دم استمر يضرب بية اسحل بروحي وضرباتة ماترحمني رفعني من الكاع يهدد.
تردين تسلمين ماضيي والحاظر للدولة اسلم روحج لعزرائيل ومايرتاح بالي بيج.
بصوت عالي صاح قامة زحفت من التراب ابتعد وابجي خايفة مد ايدة خلة بيدة قامة ابرة صرخت وشردت عثرت على وجهي ثبت رجلة على ضهري منع حركتي وقريب من اذني نطق...
بداية انتقام
صرخت بصوت عالي مليان الم احس كلةالبشرية سمعتة من قوتة نبت ابرة بضهري خرت ادية وجسمي انشل صرت ماحس بية عيوني شوية شوية غمصن وانعدمت الرؤيا والحياة مني.
فتحت عيوني ادور بيهن عبالك كاعدة بثلاجة موتى البرد يجمد ويدك بالعظم المكان مهجور هجر فارغ مابية اي شي غرفة بس الحيطان وبابها مقفول تحركت جسمي ينمل ويحرك بية مكان الضربة تشوغ روحي وترجعها زحفت للباب لا طاقة عندي ولا حيل.
فحطت وبقيت بمكاني اللقط انفاسي اختنكت والهوى اختفى عني كوة سحبت نفس بعد ماتحركت بقيت بمكاني التفتت عيوني بس عيوني للباب دخل الاعرج بهيئة شيطان عيوني ذبلت من الالم من شافني بهذا حالي ابتهج وابتسم يكشر عن اسنانة كعد نص كعدة كدامة قرب وجهة مني
وبابتسامة خبيثة كلي.
ناوي اعذبج عذاب اويلااااة
كام يضحك طلع شوية ورجع بيدة سيخ حديد حامي لونة صاير احمر وحرارة تطلع منه رجفت ورجعت ازحف اريد اصرخ صوتي مايطلع.
كعد كدامي والحرارة لفحت وجهي لفح هزيت راسي ودموعي نزلت وبكل خباثة وحقارة كال
هسة اني يم الحكومة لو ما واصلين واني يدكون فوك راسي وذليل بديهم يعذبون بية الضباط وصايرين صفنة.
تمنيت اكدر احجي واكلة ماردت اشتكي عليك بس هو جبرني وخيرني الساني راح مني وقت الحتاجيتة سحب ايدي وخر الملابس منها سحبتها ارفرف بيها وهز براسي لا ضحك ضحك على حالتي وخلة السيخ على ايدي بصوت عالي صرخت وطلعت روحي من جسمي تمنيت ميتة بساعتها ولا اشوف جلد ايدي انصلخ والدم ينزل الجلد الاصفر طلع طفرت ارفرف مثل الطير المذبوح اروح منا ومنا اصرخ اصرخ الالم موتني ركعت راسي بالحايط مامهتمة رجعت اتوسل بية واصرخ صريخ.
ساااااعدني مووووتني مووووتني اريد اموووووت مووووتني
طلع رحت اركض وراة واحس كلبي راد يوكف من الصريخ جلبت بية اتوسلة يموتني.
لا ماعجبني هيج احب بدون صوت
ضحك وطلع من جيبة ابرة انكطعت انفاسي ابتعدت يضحك بشيطنة مستلذ باذيتي.
الاعرج: اخلصج من الوجع تصحين تلكينها يابسة
ركضت اصرخ وروحي تفرفح صرخت اكثر، من نبتها بضهري بيدة خريت وكعدت بالكاع تبنجت وكل جسمي ثلج وانتهى وجانت هاي نهايتي بوقتها.