رواية المنجمة للكاتبة كفاية كاظم الفصل الأربعون
كواكب: طلعت اصعد فوك عمهم ماقبل اصعد
بس صار عندي فضول اشوف شغلهم وشلون يفكونة شنو من سحر لحد هذا الوقت ومانفتح
بس خطيت كم خطوة وتجمدت بمكاني على صوت هز البيت هزززززز.
نزلت اركض وجمدت بمكاني من شفت اسيل كاعدة بالكاع وتنزف دم وتصررخ بصوت عالي الدم منين اجة واكعة لو شنو الفلم ما افهتمت التمن عليها نهضنها بس تصرخ وبطنها نزلت بشكل اخذوها بسرعة للمستشفى وسهلة لمت غراضها وطلعت وراها.
صعدت فوك نزلت دراهم تصيح ماي حلكي يبس والشيخ نزل وراها بيدة علاكة انطوها مي شربت
وكعدت كالت:
انفك السحر وبعد الشيخ ياخذة لربعة يتاكد منه
ذهب ارتفع ضغطها اخذوها وجناين حفصة طلعن يصيحن ويدعن عليها لان هيج سوت.
نضال: هسة شذنب هاي الشباب تسويلهم
وتدهرينهم ولد شاب خليتية يطيح الف طيحة ماتخافين من الله دين ماعندج شلون تصلين
شلون تصومين
ام تميم: كلشي توقعت بس هاي سوايتج ماتوقعتها بهذلتينا تبهذل الله لايوفقج.
شكبرج بعد تصيرين
طلعت لابسه عبايتها تخزر بيهن بحقد بس مشت خطوتين وهنا يدعن عليها اندارت عليهن بيدها مثل التراب اسود رشتة عليهن وطلعت ماكو دقيقتين والنسوان صارن يتصارخن عيوني عيوني
صارن مايشوفن شي دراهم جانت موجوده بس الشيخ ماكو صاحت بزلمهن.
امشي ناخذهن للشيخ راح يعمن هالمسمومة
سممتهن وطلعت.
لبسناهن شلون ماكان ولدهن خطية اصفرت وجوهم وطلعو وياهن بقة البيت فارغ بس صوت القرآن بيه عالي يدوي ودنيا الصبح كعدت على اخر باية من الدرج احس حيلي باد وراسي انسطر البنات يبجن منهارات على امهن اشرت لياسمين
نغسل البيت بماي وملح كامت هي وبناتها واني افتر عليهن جلفن البيت جلف حتى السطح
اني ماصعدت فوك بقة براسي الشفتة.
جوري راحت تسوي ريوك ريكت الموجودين وشهب وكلتها بس ردت امشي رجعت ذهب وضيغم وياها.
اخذ نعمان وعدنان وطلعو للضهر رجعو اشوفهم يلمون بغراضهم والولد تنكل بيهن رحت لضيغم سالتة كال: الكعدة وياهم خطرة علينا
هسة احنا تقريباً نص سنة كعدنا سوى وبعد الدلائل
تبطل الوصية ويتوزع الورث
وهذا البيت داخل بالورث؟
لا كل واحد ياخذ حلالة هما عدهم بيوت اكبر
ومعامل بس مو باسمهم باسم جدي بعد اليوم يتسجل كل ملك باسم صاحبة هالبيت يبقة باسم ابوي
والشركة؟
لفقار اكيد احنا نتنازل هو تعب بيها من زمان دايرها.
ماحجيت شي وياه ورحت لشهب اطمنها حتى ارجع لنيزك ذهب صاحتني رحتلها: ها بيبي
تعاي احبج
دنكت باستني وكالت: مثل ماوعدتج بيت اسجل باسمج شتردين
ضحكت اهز براسي: ماريد شي اني بقيت هنا
لان اخواتي تضررن واذيتهن اذيتي
ذهب: لا انا وعدتج كولي افتحلج مشروع تشتغلين بيه التريدينة من خلصتينا من هذني السحارات.
قطعنا كلامنا من دخلو جايبين ضرغام كوة يمشي كامتله باستة رادو ياخذوة لغرفتة ذهب مارضت كالت بغرفتي يبقة بس تمدد نام وتليفون ضيغم دك جاوب شوية وكال يباوع بوجهة ذهب.
مرت ضرغام جابت
ابتسمت بانكسار وكالت
ياصلوات كون الوليد زين
يكولون زين بالخدج خلوة
طلعت من البيت ضيغم طلع وراي كال اوصلج.
ماحجيت شي بس صعدت بسيارتة نمت وصلني وراح لكيت نيزك كل عين شكبرهن مطگگتهن عليه حقها الليل كله وحدها عايفتها من شافت وجهي والتعب بية سكتت وتمددت وخليت عيوني على وجهي احجيلها الصار بس ماكلتلها على اسيل
نيزك: واسيل معقولة مو وياهن؟
اكيد وياهن غير تفتر عد السحارين بس ما صعدت وياهن
هنا ثنينهن وابنها عدنان شاكة بية وياهن
هذولة بس اعتقد ذولة سحرهم غير هل مو وياهن
غفيت بعدها ماحسيت غير الدنيا العصر وجسمي مكسر.
ليش ماكعدتيني
نيزك: شكد كعدتج بس انتي الله يسلمج
ميتة مو نايمة
حقي غير مانايمة من وراهن السحارات
اخذت ملابس رحت اسبح واتذكرت ذيج الايام الجنت اعاني من الادمان دموعي وحدهن نزلن سبحت وطلعت اتذكر كلشي وكلبي يوجعني باوعت لايدي وشاغت روحي قهر هاي اني حركتها من الوجع اخ ياذيج الايام الله لايرجعها.
نيزك تلعب بامير يركض ويضحك راح يلبد ورة الشجرة يلعب غميضان رحت يمة وكعدت مثل قبل شجرتي الحلوة اجت نيزك كعدت يمي خليت راسي على جتفها ونزلت دموعي حضنتها واني اتذكر كاعدة هنا وافكر بيها حتى الشجرة تعرفها من كد ماسولفتلها عنها حضنتني تمسح على راسي وتبوس بية ردت اسولفلها على كلشي واكلها كل الكلام الكلتة الج مجبورة علية بس خفت عليها.
لاتنقهر وتتاذى رفعت ايدها خليتها على وجهي شكد رادتني احجي ماحجيت نمت بحضنها تلعب بشعري
وامير يكمز منا ومنا.
نيزك: كواكب احس بيج شي انتي ماجاي تحجين الحقيقة اكو وجع بروحج اتمنى اسمعهة منج
واتمنى اسمع الكلام الحقيقي الخلاج تعوفينة
وتقسين علية
بقة قليل وتعرفين كلشي بس صبرج علية
منتظرتج ومنتظرة هذا اليوم
راح نبقة هنا الى متى؟
وانتي شنو ماتردين ضرغام بعد!؟
سكتت واني اباوع بعيونها
ها مو جنتي تحبينة؟
تعبني هواي تعبت ماريدة اي والله ياكواكب
من اجت مرتة مابقيت وياة بس رجعت لان ماعندي مكان اروحله
خلص اسكتي لاتحجين بالماضي ماطول اني موجوده احلها وارجع حقج وخاف ماخذين فكرة ماعدجن احد ولا عدجن بيت ابخر هاي الفكرة
شنو راح تسوين؟
الله كريم دمشي سويلي اكل متت جوع
اكلت وطلعت الحارس مبدلينة جاي رجال جبير
كتلة يخابر ضيغم كال ماعندي رصيد.
رمش هو يتصل بيك عندة فاتورة
رمش اكثر من مرة نزلة يكلي: مايسمعة يجوز.
كعدت صافنة هسة اروح لدراهم لو انتظرة
مليت وكمت ردت اروح لبيت دراهم بس اوصل الغروب شيوصلني ارجع للصبح عفتها رجعت جوا
وضيغم مامنة خبر.
ورد: ودعنا البنات بدموع تعودنا عليهن وعلى وجودهن من راحو البيت فرغ وبقت وحشة الهن جوري بس تبجي عليهن حسين محسن ذولة احلى ثنين راحو انقهرت على ذولة راح يرجع بيتنا فارغ
بس اني وجوري بيه شلون بينا لو راحت شهب
مخلين كلبنا على ادينا قهر ماينوصف.
كاعدين يسولفون باسيل وحالتها مسويلها عملية حالتها خطرة كعد ضرغام سمعهن فرك عيونة وكال: شكو شبيها
ذهب: جابت
ضرغام: ماكلتولي وين الطفل
ذهب: بالخدج بعدة.
راح يمشي وهي تصيح وراة
وين رايح وحدك
اشوف ابني
طلع وبقينا واحد يباوع بوجهة الثاني
مرت ساعات ورجع نام مرت فترة يروح الهم وبيوم رجع بيدة ابنة يبوس بيه ذهب تلكتة بلهلاهل وهو فرحان بيه غابت ابتسامتي من شفت اسيل وراة شنو معقولة راح تبقة هنا وياة؟
اخذوها لغرفتها وهو كعد يم ذهب اخذتة منه
تقرا عليه باوعتلة بفرحتة ماتنوصف وحقة حتى لو من اسيل كبر عمرة وماعندة طفل.
ذهب: شسميتة؟
سيف ضرغام
بالمبارك عليك سيف يتربى بعزك.
ومر اليوم ضرغام مارجع لصحتة بعدة يصفن وتعبان ماله خلك بس ميت على سيف رغم بعدة كلش صغير يبوسة ويلعبة لحد مايتعب
واسيل بغرفتها نفسة محد حاجاها واعتقد منتظرين يمر وقت حتى يتفاهممون على كلشي
وين تكعد الى اخرة. ضيغم لحد الان يركض بسالفة الورث والوصية البنات عدنة تواصل وياهم
كعدنة الصبح صافنين وكلبنا ملجوم قبس جاب شهبة يمنة وصعد ولد تنزل الغراض معناها راح يرحون لبيتهم شهب من البجي وجهها صار دم.
حجينا وياهم يبقون بعد اكثر ما قبلو وكالو نريد نرتاح بيتنا ونرجع لحياتنا طلعو واحنا ندعيلهم
ونستفقد وجودهم.
فرغ البيت وغسلنا الغرف والطابق الفوك قفلناة
جان محد يصعدلة الطابق الثاني غسلناة رجعت لغرفتي وشهب لغرفتها حتى رضا سوينالة غرفة
هو البيت جبير لان كلهم جانو بية ومحسبين حساب حتى الولد يتزوجون بيه تالي كل واحد طلع.
نزلت هلكانة امسح بالدرج بقة بس الطابق الارضي ما منظفينا امي كالت عوفنة مو هسة انظفة دخلت امسح غرفة ذهب لكيت يمها ضرغام دكلة.
ومرتك ام امير ماترجعها عايفها وحدها هذا وضع
انا ما ارضاها
ضرغام: خليها ترتاح شوية واشوفها شتفصل
ماترجع ولاتقبل بهذا الوضع
وانت على شني ناوي؟
بس خل تمر فترة وارجع لحياتي.
كواكب: من ذاك اليوم مارجع ضيغم بس يودي مسواك بيد الرجال ماعرف هو متسوك والرجال يجيبة النه لو بس يخابرة وهو يتسوك هاي الوضعية كلها ماعاجبتني وبالي تدك سالفة
اتمنى تصير اليوم قبل باجر واحسها قريبة
نيزك صحتها النفسية تعبانة اكثر من الجسدية تاخذ علاج ومنتظرتني شسوي.
طلعت لدراهم اخذت دراجتي لازم ارجع اعتمد على روحي انسى ضيغم وانسى اهلة ارجع اشتغل.
بس ماكو شغل بس العصر اطلع امسح جام سيارات وي محمود ابيع مي وارجع ورة الاذان لان الطريق طويل.
بس اني واختي وابنها محد اجة علينا ولا سمعنا اخبار عن احد الكاه اختي مسوية عشة اكل واتلفلف انام.
نيزك: ماعندج اخبار بيت ليث شو ماكو
ماعرف شي عنهم
شعجب
ماعندي شغل وياهم خلص
دخلت لبيتهم وطلعت بشغل وانتي يمي
شعندي وياهم شهب اكيد زينة بس ارتاح
اروح اشوفهها
ضيغم بعد مارجع غريب امرة
شعندة جاي يمعودة عبالج كاعد.
تلكينة يركض ومايلحك بس ضيغم مايخصنة
ولااله يمنه كولي ضرغام الما سئل ولا اجة
خيولي لاتجيبين طارية بعد
صار اني هم ماعاجبني احجي بيه
طلعت للشغل من الصبح عسى ولعل الكة
بس صعب بيوم وليلة الكة طلعت للشارع ابيع مي بارد يمشي لان حارة وبالتقاطعات ينباع عد محمود مجمدة اخلية وياة وابيعهن من يبردن.
خلصت اخر صندوك ماي تعبت كلش نزعت شفقتي وغسلت وجهي مشيت على صفحة حسبت فلوسي.
خوش شغل اخذت دراجتي ورحت لدراهم لكيتها تريد تتغدة اكلت وياها ونمت على المبردة العصر كعدتني طلعت بالباب وكفت وطبكت سيارتة
نزل سلم رديت السلام وكتلة.
شعندك جاي
وليش حتى ما اجي
اذا جاي لدراهم فوتلها اني ماشية
شبيج
عندي شغل
شغلت الدراجة وطلعت عفتة يحجي وراي وين جان هسة تذكرني واجة؟ وليش حتى يتذكرني أصلاً بعد السواة كفة وفي اني هسة بفضلة موجوده اشتغل وبكامل وعيي وصحتي.
شغل سيارتة اجة وراي وكفت دراجتي اكلة.
كول شتريد لاتاخرني
نزل من السيارة صار كبالي يحجي بعصبية
وين رايحة رجعتي للشغل
لا انام براسك احسن لا تدوخ روحك بامور
ماتفيدك روح لشغلك اني هم عندي شغل
بس اكعدي هالكم يوم وبعدها
كطعت كلامها
ماكو تكملة كل واحد يرجع لطريقة باي
شغلت وعفتة بالاساس احنا ماننجمع شكو جايني.
وليش يدوخ وياي حياتي عاوجة من صرت تالي وكت تتغير اشتغلت ورجعت هم نعمة احسن من الكعدة واحد يطلعلة كم فلس رجعت دخلت لبيت دراهم جنت جايتها انطيها كلادة سن الذيب
وتجمدت بمكاني من شفت النسوان البعت عليهن الحصو يمها باوعلي وكاللها.
هاي انطتنة خزر كلشي مافاد
خزرتني دراهم بسرعة رجعت لشخصيتي وكتلهن
شلون خليتها؟
وي ملابسة كلتيلي
اي صح بس يا ملابس
ملابس الطلعة
هااااا وتكولين ماتشتغل أصلاً انتي هيج.
خربتيها بعد ماتفيد لشي المفروض تخلينها
بملابس البيت الكل يوم يلبسهن مو الجدد
خرب مفعولها بعد اني مدخلني
بس انتي كلتي وي ملابسة ماحددتي
واني شمدريني هيج راح تسوين وتخلينها بملابسة الجدد ادري بيج مادري
سكتت وحجت الثانية
واني ابني كلشي مافاد وياه يريد يتزوجها
اي انتي الماي التشربينة اله شوكت وجم مرة
مو دوم الحك علية بس من اتذكرها انطية ماي
تقريباً مرة كل يوم اشربة.
خربتيها راح مفعولها أصلاً مفعولها باول ايام يشتغل وانتن استخدمتنها غلط شعلية بعد اني
بعتهن الجن شغالات ابنج باليوم تلث مرات تشربينة وكون الصبح على الريك مرة وقبل لاياكل يشرب مو هيج تعذرني خرز وخربتن مفعولة
ماكدر اسوي شي
حجن رادن انطيهن غيرهن كتلهن بعد ماتوصلني.
بقن يم دراهم واني رحت اغسل طلعن شيسون ولو يحجن ويردن فلوس العب بيهن طوبة وافضحهن ببيوتهن بس كفن ومشن مبينات امهات دروب وعادي عدهن يصرفن هيج ثكال مو نسوان صحت متوجعة من لوت اذني دراهم.
يمعودة على بختج اذنيييي
ولج تشتغلين من وراي
مبردة جبتلج مو احسن من ذيج مبردتج
صوتها جنة جلب ينبح هاي حتى سوت وجهج
ابيض تلفح تلفح ايرانية فول تبريد
ودكليلي من البزاز ايا ماتستحين
شلون هيج تجذبين.
عادي مو حرام هسة لو ماماخذة منهن فلوس
راحن سون سحر اصلي وطشرن العربان
والله مصيبة انتي
اندك الباب ذبيت نفس ودراهم تكلي استلم مشيت واني احجي: وعلى الزمهن اكتلهن كتلة معدلة دينار ما انطيهن بطل مي ما انطي وبت امها التحجي وتفك حلكها
فتحت الباب وانصدمت جمدت بمكاني واخر شخص متوقعة اشوفة يجي ويدك الباب
رمشت بعيوني وكلبي دك بقوة اتخيل الراح يصير
شجابج
صبيحة: اجيت بعد ماطردوني من البيت.
اريدج تساعديني وتاخذين حكي منهم
بجت بقهر دخلتها افتهم منها كعدت تبجي بحركة وعيونها حمر دم جبتلها مي بارد: غسلي وجهج
واشربي حتى اساعدج
غسلت وجهها وشربت مي فحطانة كوة تتنفس
دكت على رجلها ابد ما انقهرت عليها بس سايرتها لان شغلي يمها.
صبيحة: غدروني رجلي ومرت حماي الجنت حاسبتها مثل اختي طلع عاقد عليها وجابها كدام العالم علساس مرتة حتى محد يحجي علية
ويكلي ماعاجبج اطلعي الباب يوسع جمل
تالي طردوني.
ضحكت بصوت عالي من كل كلبي ودراهم تخزر بيه اسكت.
صبيحة: حقج تشمتين بيه مارحمت بيجن
واني وياها طبكنا عليجن وهججناجن
اضحكي واتشمتي حقج هذا بس ساعديني اجيتج تساعديني
كواكب: اني اتشمت بيكم كلكم واحد واحد مو بس انتي كلكم ذليتو اخواتي واذلكم كلكم ارجع حقهن البكتو اساعدج اني اجيتج لبابج وكتلج تساعديني اساعدج حتى لو ماحبج وما اتمنالج الخير بس شي عن شي يختلف
صبيحة: بعد ماعندي احد غيرج ادري.
بيج. داهية وتفترين عليهم ابني سكت وي ابوة
خاف لايطردة
والثاني بالسجن بس انتي ضليتي
شوفي من هسة وهاي كدام دراهم
بيت اعوفلج باسمج وراتب بس بشرط
تنفذين الاكولة الج
شتفصلين البس
من الاخير تعترفين سالم كتل اخوة
جبار وبصمة على املاكة قبل لايموت
وهاي هية اوكل محامي وولدج يشهدون وياج
البيت يسجل باسمج احنا مانريد بس بيت جبار القديم والمحلات الفتحتوهن بفلوسة اخلي ولدج يشتغلون بيها شكد يحصلون انطيهم
وراتب الج.
اصفر وجهة وسكتت
صبيحة: ماعرف شي عن السالفة
جبار هو مات سوى حادث ومات
كواكب: ما مات بحادث هو بعد الحادث
ماشكل خطر علية اني وياج نعرف كلش زين
هو بصمة بالمستشفى بعدها مات من الله مات؟
لا هو كتلة مثل مامات اخو الثاني من وراة
فاني هذا العندي تمشين وياي تعترفين
علية انطيتج كلمة واوفي بيها حتى لو اني اكرهج
اخلي كرهي على صفحة وانتقامي منج
واضمن عيشة محترمة الج راتب وبيت باسمج.
وشغل ابنج مايتغير ولاينقص من فلوسة وهيج انتي انتقمتي منهم اشد انتقام
كمت من مكاني وهي تباوعلي ماحجت شي
كواكب: اني رايحة وانتي شوفي ولدج
هما يعرفون بالسالفة اكيد يشهدون وياج
اقنعيهم
واذا ماكدرت اقنعهم
ترجعين للبيت تكعدين لاتسوين مشاكل
سوي روحج راضية عليهم وافتحي الموضوع وياهم ذكريهم بيه وسجلي كلامهم بيه اعتراف سالم بعد انتي وشطارتج شلون تفتحين الموضوع
وهنا اسهل علينا يصير بس اعتراف بلسانة ينسجن.
لا كالت اي ولا لا بعدها الموضوع ماداخل براسها طلعت من البيت رجعت لنيزك سيارة ضيغم طابكة بس نزلت لاكاني دخلت بدون ما احاجية لو يريد يحجي جان وكفني تلكاني امير بيدة حلويات
امير: تواتب هذا ضيضم زابلي
خوش ولد طلع ضيضم
انطاني نستلة اخذتها منه اكل بيها نيزك تصلي
وبس خلصت صلاة كالتلي: اصبلج اكل
لا راح اسبح كملي
اخذت ملابسي وهي اخذت مفاتيح الجنان تقرا
امير يلعب عفتة طلعت انكت بشعري.
موري ضيضم موجود.
اي هنات يم سيارتة التبيرة
مشيتلة صدك لكيتة يم سيارتة يراسل بتليفونة رفع راسة من شافني ذب حسرة وضم تليفونة
كواكب: شصار ماصار ضرغام شلونة؟
زين مرتة جابت
حلو وبعد شسويت
جاي اركض بسالفة الورث
شالو مو؟
اي كلها طشت
والسحار هم اشتكيت علية لو عفتة
شالتة الشرطة قدمت التسجيل
هم زنا وهم اعمال شيطانية راح بيها
يستاهل بقن ذني الشيطانات شلون اسيل كاعدة بالبيت محد طردها
بعدها نفسة اعتقد فترة تمر يلة يتصرفون وياها
حلو وانت؟
شبية اني؟
شوكت ننفصل
ليش هسة احنا مرتبطين
بالاسم اي
وضارج
هسة لا بس بعد كم يوم اي
سهلة بس افرغ ننفصل
وعد
وعد رجال
اكلك تعرف محامي شاطر؟
شتسوين بيه
محتاجتة
كولي لاتحجين حزازير
هو المفروض ما اسولفلك بس يلة ميخالف
هم اعرف رأيك افكارك
عفية هيج وسولفي
خليت ضهري على السيارة وكتفت ادية احجيلة
الصار وفكرتي.
ضيغم: اذا اعترف بالتسجيل ومرتة شاهدة
يروح بيها بس ماعتقد بسهولة تصير.
تصير بسهولة هذا ربك يسهلها لازم تطلع شمس على الحرامية وماكو مجرم مايتعاقب على جريمتة
مو اني ولا صبيحة نكشف سالم ونخلية بالسجن
لا رب العالمين حتى يحق العدالة وكل واحد ياخذ جزاتة يمكن يخليني وسيلة لان بداخلي رغبة
ان شاء الله عاجلاً
اي هسة انطيني رقم المحامي
اني احجي وياة
هم خلة روحة بالنص ماترهم
يلة اسكتي كتلج اني احجي وياة واشوفة شنو يكول
هسة اتصل بيه
لاهسة مشغول بعدين اتصل بيهة
زين انطيني رقمك اتصل بيك.
اذا احتاجيت
اوكفي اشوفلج ورقة وقلم
راح يدور بالسيارة اجة بيدة بس قلم كال
مالكيت ورقة بس قلم
شعجب مو عندك فايلات شي
ماكو لللاسف
امرنا لله دجيب اكتب على ايدي
مديت ايدي اخذة منه كال
اخربط بيه اذا اردة اني اكتبة احسن
سحب ايدي كتبة بخط حلو ومن خلص رسم وردة صغيرة وكتب بخط ناعم كانها انتِ
ضحكت وسحبت ايدي وهو عيونة تلمع مبتسم
المثقف خوش عندك سوالف
عندي هواي سوالف بس اخاف منج
غير صاحب تجارب شلون ماتصير عندك هواي سوالف.
عافت كلشي وركزت بهاي شيخلصني بعد
لابعد ماتخلص يلة روح لاهلك شعندك باقي هنا
مشيت اريد ادخل وكفت من كال
كوكبة
التفتت علية: ها
بداعت اعزاز كلبج لاتطلعين تشتغلين
ابتسمت ارجع كذلتي ليورة
شلك بيها هاي تعرفني ماكدر اكعد
اليكعد مايعيش
بس اكعدي شتردين اجيبلج
بصفتك منو؟
اليريحج انتي شنو اعتبريني
انت خوش انسان بس ماكدر اخذ منك
دينك هواي احاول اسدة مو ازيدة لاتهتم بيه
اني متعودة
بس هالفترة وبعدها اشتغلي اليعجبج.
شنو اليتغير بهاي الفترة؟
يتغير هواي بس اسمعي مني واكعدي
ماكدر امنعج بس ياريت تسمعين مني
عندي شغل باي
عفتة ودخلت نيزك سالتني وين جنتي
احجي وي المثقف ابن المثقفين
لشوكت نبقة هنا
بس فترة
وين نروح كواكب
بس عوفيها. تصفة شهب ما اتصلت بيج
خاف تبقة بقلق عليج
اتصلت بيها لكيت هواي مكالمات منها
رجعت لبيتهم دكول هدوء والبيت فارغ
بس هي وعمتها جاياتها حمواتها منضفات
البيت ومعزلاتة دكول راحن مابقن.
همزين مو حياية جان صرنا بثنين
لا خوش بنات حبابات على امهن
ابوهن مثقف كلش تحسينة سياسي
فد شخصية مرقومة بالمجتمع
طريقة كلامة اسلوبة لبسة حتى حركتة
مال ذولة الشخصيات المهمة المهمة
وانتي شدعوة مركزة بيه
الصراحة حلو اكول ولدة عليمن طالعين
شخصيات
الله يحفظهم
ما سالتي فقار رجع بنتة خطية؟
لا والله ما سالت
خل نخابر نجوم نشوف اخبارها مشتاقتلها
يلة اني راح اكشر وانتي الزمي التليفون.
طلعت خضروات كعدت تكشر واني لازمة التليفون احجي وياها سلمنا على مرت خالي وهي تحجيلنا عن الوضع هناك.
نجمة: كعدت الصبح بتوقيت تركيا كلبت الغرفة رايحة راجعة اروح ما اروح اطكطك باصابعي واحجي وي نفسي بصوت مسموع
روحي نجوم الى متى تبقين كاعدة بالبيت
وين تحصلين مثل هاي الفرصة اطلعي اشتغلي لشوكت عايشة بنفس اليوم الشؤوم ليل ونهار براسي الموضوع عاد اخلص بس النهار وبالليل اتعب وانام من وقت.
ومثل الحبابة اقتنعت بسرعة بكلامي رغم كلها تحجي عليه ما اقتنع منهم، فتحت خانتي اكلب بالملابس اختاريت
فستان رسمي بالون النيلي وياة شال ثلجي
وجنطة وكعب بنفس اللون على السريع بدلت
وجهزت نفسي طلعت اخابر ابو ميس كلي منتظرج برا وهالفترة اجة علمود الشغل لتركيا ميس حاجية وياة علمودي وكال مادام موجود اخذها بنفسي
طلعت لكيتة منتظرني سلمت وصعدت.
شلونج بابا شخبارج
الحمدلله عمو ميس شلونها
بطلة ميس رجعت تشتغل بالشركة.
مثل اللبوة دارت الشغل وصارت الكل بالكل
تامر وتنهى وموكفة الموظفين على تك رجل
ههههههههه
هاي اخذها الواهس كلش
كنالها تشتغل بس ماتاخذ الدور
بينا الحجي بابا مو توصلينة الها
لاعمو ابد ماحجي كول سرك بكهوة اقصد بير.
هي وصتني الكالج شغل بعدين كالت
لا بابا لاتلكالها هاي بس تلكة شغل ماترجع للعراق
فر بيها وارجع وهاي ادز مسجات وبصمات
دكلي لاتلكالها شغل ارجع
ايا حقيرة تندمت من كالتلك
العوبة اني الها.
لا بابا بس هي تريدج يمها
دكول ماعرف اشتغل وهي مو وياي
مثل ماعافتني وبقت بتركيا
الا اعوفها هي حتى اتصال ماتجاوب عاد اني احسن كل يوم احجي وياها
ليش شنو صار بينجن حتى كطعت وياج
ها لا ماصاير شي بس هي ماترد حتى لا تتاثر وترجع
يمة همزين ماجفصت وكتلة علمود قبس راحت لتركيا غير الموضوع للشغل واني اجاوبة اذا اعرف واسالة بمواضيع ماعرفها وهيج خلصنا الطريق
نزلنا كدام شركة بسيطة مشينا سوى وهو يكلي.
هذي الشركة لصديقي عراقي
من ام تركية راح تلكين موظفين
اتراك وعراقين وباقي البلدان العربية
اكثرهم السوريين بالبداية راح يختبرونج
باشياء انتي تعرفينها بعدها تبدين شغل
سلم على الرجال الكاعد بالرسبشن
الولد سوري او لبناني ماميزت.
نجمة موظفة جديده اعتبرها
اني عندي اجتماع مهم ياريت تاخذها
لمكانها
ولو تامرني امر
كام من مكانة واجة وياي يحجي
اهلاً نجمة كيفك احوالك
الحمدلله
رفع ايدة اشر لبنية وصاحلها.
ولييي لبنى معاك عم بحكي
تعالي لهون
اجت البنية تفتل بشعرها
انا رايح لشغلي
خذيها تشتغل معاكن موظفة جديدة
لبنى: اهلين حبيبتي
امشي معاي
اخذتني لصالة مليانة بنات من مختلف الجناسي
كدامهن حواسيب يشتغلن والمكتب الكدامهن متروس حلويات وكرزات ياكلن ويشتغلن استغربت ماكو كاميرات سالتها كالت.
المدير مابيحكي اهم شي نخلص شغل
والله مبين خوش مدير
كتيررر كتيرر كتيررر.
اخذتني لغرفة التسجيل كملت من الاختبار وعلموني على الشغل مو شي جديد علية
طلعن استراحة بقيت وي كم وحدة نكمل شغل
تعبت وجعت رجعن يسولفن نصهن سوريات.
لك شفتية ولييي يئبرني ابررر شو طول
شو جسم شو جمال هلئ هيدا مدير والعدنا مدير
كتير حليو يشكل ئاسي
كمت من مكاني اروح اكل قبل لاتخلص الاستراحة
بقة عندي فضول كلهن يحجن بشخص سالت لبنى
اكلج حبيبتي شكو منو اجة
مدراء عرائين.
هزيت ايدي ونزلت واذا مدراء عراقيين هسة شنو نازلين من الجنة شبيهن ذني نزلت للكافتريا ماعدهم لفات سالت بنية: يبنية ماكو لفات شي هنا
لا حبيبتي هنا ماكو اطلعي من الشركة كدامج كافتريا يسوون اكل اطلعي جيبي وتعالي
طلعتي عراقية واخيراً لكيت وحدة من بلدي
جاية وياج بت بلدي العراق
طلعنا نسولف ماحسيت بالوقت خلصت الاستراحة رجعت بيدي اكلي كلت اكلة جوة واحنة داخلين طلعو خمس زلم من الشركة صارو بوجهنا.
رفعت راسي وتبخرت ضحكتي من شفت
فقار وياهم وحسن وابو ميس وثنين ماعرفهم
باوع بوجهي وابتسم رجعت المشاهد تتكرر براسي
رخت ايدي وكعت العلاكة دنكت البنية تاخذهن وتسالني شبيج لزمت بيدها ومشيت بدون مارجع اباوعلة بس اريد اختفي من كدامة وصلت لمكاني
نفسي مكطوع وجسمي كلة يرجف ما اسمع شي
حتى من البنية تحجي وياي اخذت بس مي شربتة يوكع مني ودموعي صارت تنزل بس شفتة هيج
صار بيه لذلك ماريد ارجع واتذكر شي.
كلهن صارن يباوعلي ويحجن بيناتهن مسحت وجهي وحاولت ما اتذكر شي رجعت اشتغل و الاكل انطيتة الهن اكلنة نفسيتي انسدت ولعبت روحي خلصت دوام على اعصابي طلعت لكيت ابو ميس متصل بيه رجعت اتصل بيه.
ها نجمة خلصتي شغل؟
اي هستوني طالعة
اوكفي اخذج بطريقي
لا شكراً عمو اندل الطريق مايحتاج
لابنتي مايصير ترجعين وحدج اساساً اني قريب منج.
بقيت واكفة منتظرتة وصافنة بالاشي فزيت على حركة شخص يمي اندريت فتحت عيوني على وسعهن ورجعت بلا وعي ليورة.
نجوم
اشرت بيدي لا ومشيت بسرعة بلا مارد علية مشى وراي يحجي واني دموعي تنزل.
شبيج نجوم اوكفي احاجيج
رررروح منااا رررروح ماريد احجي وياك.
امسح بدموعي ويرجعن ينزلن صرت ماشوف كدامي شهكت سحبني من ايدي ضهري انصدم بيه والسيارة فاتت من كدامي الرجال يحجي بالتركي بصوت عالي علية بقيت جامدة بمكاني لو ما سحبني جان اندعمت ايدة لازمة زندي حسيت وابتعدت مغمض عيونة بس وخرت فتحهن ذبلانات
وجهي كلة دمع ومن بجيت ضاك نفسي كوة اتنفس من ورة خشمي.
شتررريد مني لاحكنيي شترريد
مو شردتت المن لاحكنييي
بلع ريكة واشر على نفسة
ليش نجوم اني فقار نسيتي منو فقار.
بجيت بحركة يريد يلزمني ويمنع نفسة
والله مانسيت ولا انسى انت اكثر شخص
حباب تعاملت وياة بس ماريد اشووفك
اتعب من اسمع بطاري اسمك اتذكر كلشي
اتذكر من كال.
كطعت كلامي مشيت سحبني من ردني
بس اني اريدج نجوم من رحتي ولهذا يوم
واكفة الايام عندي وكارة كلشي مابية ذكرج
اباوع لمكانج ولشكولاتة واشبع قهر
نجوم ارحمي بحالي طك الشيب حتى بگلبي
ماريد اشوفك اسفة ماكدر
الصار بيه بسببك فهمت روحي مالك غرض
بس يبقى بسببك اسفة استاذ.
نجوم والله اخذت حيفج منه
طلعت روحة الف مرة
خليت ايدي على اذني اتهسترت بمجرد ذكرة
فقار: وداعت ضحكتج حتى بالشركة اذا
رجع ماخلية...
نجوم كافي مليت اني احبج الى متى ابقة كاتم بگلبي رحتي من ايدي مرة ماريد ترحين مرتين
احبج تسمعين فقار ميت بطاريج
بضحكتج بكلماتج بسوالفج احببببج
نجووووم احببببج
ماحبك انييييي
وانييي احبج واموت عليج
واعشقججج ماكو واحد يحبج
بكدي نجوم استوعبي خليها بالج اني عاشق نجوم.
من كثر ماحبج مكابل السما واباوع على نجومها
نجمتي انتي بنتي وحبيبتي وكلشي حلو
شفتة انتي
شهكت بقوة ونترت ايدي منه ومشيت
بس شفت ابو ميس صعدت وياة اباوعلة بقت عينة علية: عمو حباب امشي بسرعة.
شغل السيارة يسالني شبية ماكدر احجي صعب علية النفس طمنت ابو ميس نزلت مسحت وجهي ودخلت للشقة بوجهي لغرفتي سديت الباب علية شلون اكدر افهمة من اشوفة اتذكر اللحظة من ضحك بحقارة يكلي خطبتج علمود فقار وراح اخذ عذريتج حتى ماتحجين اسمة انطبع بذاك الموقف
اخذت ملابس ورحت اسبح ارتفعت حرارتي رجعت لغرفتي لفلفت روحي ونمت ارجف ميس تتصل بيه جاوبتها: ها ميس
نجوم شبيج افتحي خط على الرجال بس طمنية.
عليج والقرآن خبصني خبص ارحمي بحالة بس جاوبية
قفلت الخط بوجهة وغمضت عيوني كلامها يدك براسي ورجعت اتذكر كلامة بجيت اكثر شلون يحبني ويكول اعشقج ليش ماكالي ليش ماحسسني
بحبة وهسة شيريد بعد الصار يعرف كل الزين ما راح اقبل بية ولا بغيرة.
مرت ساعات غفيت بيها فزيت على دكة الباب مرت خالي تحجي كتلها: تعبانة اريد انام.
باوعت للتليفون اخذتة وادية ترجف دخلت على صفحتة مسويتلة كتم لكيت الرسايل والمكالمات ماتنعد ماكدرت اقراهن
رحت على اخر شي كاتب.
بس حاجيني نجمة
مو فتتي كلبي اذا تشوفيني اأذيج اأذي روحي
وما أذيج
اتصل ترددت افتح اتذكرت ايام جنت يمة جاوبت بدون ماحجي شي خليت التليفون اسمع صوتة
الو نجوم تسمعيني
شلونج زينة احجي شي
لا، مو زينة استاذ
سحب نفس قوي كال
نجوم هسة اني يم الشقة
اطلعيلي
لا
ليش تشعوطين بيه بس خل اشوفج.
واطمن اطلعي بس شوية
مابيه حيل امشي
اجييج كولي جاايج
غمضت عيوني شوكت انسى واتخطة الصار كل ما اباوع للمراية اشوف خشمي اتذكر الى درجة صرت ما اباوع بالمراية حتى لايخطر بالي نسيت الاتصال مفتوح ونمت فزيت الباب يندك بقوة وجهي كلة عرك كمت فتحت الباب مرت خالي وجهها اصفر
شبيج نجوم مو صارلي شكد ادك بالباب عبالي صارلج شي
جنت نايمة ما اسمع
فقار جوة يريدج
ما اطلع
بس اطلعي شوفية شنو يريد وارجعي.
والله عيب عليج الرجال شكد صار منتظر
ما اطلع
اطلعي مو بكيفج
راحت ادور بملابسي شمرت علية فستان صيفي وشال: تلبسين بسرعة واطلعي يلة حبيبي يلة عمري لخاطري
بدلت وطلعت راسي مسطور لكيتة واكف مدنك راسة كتلة: ها
رفع راسة ابتسم
ها عمري ها عيوني
رفعت حاجبي هذا شبية هيج يحجي
مد ايدة بجيبة ابتسمت طلع شكولاتة مديت ايدي
ترددت اخذها باوعت بعيونة كال
بنتي الاولى رجعتلي بقت الثانية اخذيها
وارجعيلي
اخذتها من ايدة.
بس مارجع بس اخذها
ضحك وهز راسة
المهم عمري المهم شفت ابتسامتج الترد الروح
شبيك
البيه انتي ارجعي للعراق
ماكدر
تكدرين صدكي
بوسلي ود باي
دخلت والشكولاتة بيدي ما اكلتها مليانة عطرة
اجاني اشعار، عبالي من فقار بس من دخلت علية كزبر جسمي من سمعت الرسالة وفهمت مضمونها.
كواكب: رجعت اشتغل وبالي كلة يم صبيحة طلعت جبانة مو مثل ماتصورتها واللحظة الانتظرتها من سنين جانت كفيلة تساعدني بيها واحقق مطلبي بس اختفت هي واخبارها واعتقد تقبلت الوضع شترجة منها.
الشمس تسمط عود لابسة شفقة واني اشتغل وبالي مو يم الشغل وحتى شكد اطلع فلوس عادي واني اركض خلصت المي محمود كلي.
روحي جيبي صناديك من المعمل للعصر نبيعهن
عوفيهن يبردن
يلة رايحة اجيب إلى بس
لا اوكفي اروح وياج حتى اجيب إلى هم.
انتظرتة شوية بين ما باع ورجعلي طلعنا سوى للمصنع انطيتة فلوس دخل جاب صناديك خليتهن جوة رجلية ونصهن بحضنة طلعنا نزلهن وطلعت
من بعيد شفت سالم بسيارتة طبك خليتة ينزل
راقبتة كعد يسولف بالمحل باوعت منا ومنا محد
طلعت سجينتي ونزلت للتايرات بكل حركتي
دججتهن عبالك هو كدامي وادج بيه
افتريت عليهن كلهن ملختهن نزلت السيارة للكاع
ماكتفيت ولابرد كلبي باوعت محد جريت السيارة.
بالسجينة من الطول للطول صار شخط واضح من بعيد رجعت للصفحة الثانية هم شخطتها
وركضت لدراجتي صعدت وشخطتها لو ماخفت واحد يشوفني ماخلي شي بيها ما اكسرة.
رجعت لدراهم وهاي كل يوم اتغدة يمها وانام ساعتين واطلع للشغل ماكدر ارجع يم نيزك بعد
لكيتها تسوي بطفل يصرخ رحت احمي الاكل بين ماطلعت النسوان نمت بين الحلم والواقع اسمع صوت صبيحة تحجي فزيت افرك بعيوني عدلت
كعدتي من شفتها باوعتلي على وجهة ابتسامة نصر.
ها شو هالمرة ماتبجين
صبيحة: شكد هما خبيثين وحقيرين
مايوصلون لربع من خباثتي
راضعة وي الشيطان ادري بيج
صبيحة: تتحوقر وياي وطلعت وجهها الثاني علية
تلبس وتكشخ تبقة منتظرتة بالباب تاخذة كدام عيني حاسبة روحهة هستوها متزوجة وفرحانة
الدنيا بعينها وردية مادامة صار الها اشوفة يموت ولا احن علية
ها سالمة غير تحجين شمسوية
طلعت تليفونها من جوة عبايتها ردت اخذة رجعتة لصدرها تهز راسها لا: شنو يضمن انتي توفين بكلامج.
ماعندي شي يضمن كلمتي كلمة
كتلج حتى لو اكرهج اوفي بوعدي الج
بس شنو سجلتي
اتمنى ماتغدريني وتنتقمين مني
لاتخافين كلشي وحد
فتحت تليفونها كلبي دك بقوة فتحت تسجيل غمضت عيوني ورجف جسمي.
سالم: اتذكر جان جبار عندة خير من الله اروحلة ينطيني ومن ارجع علية يكلي ماتشتغل
كل يوم جايني انطيك ابتليت خوما ابتليت
تالي سوى حادث دلاني على فلوسة حتى اصرف علية وعلى مرتة ماعبالة مرتة ماتت.
اني هناك والكة الفلوس هو مدير مدرسة ومرتة مدرسة كلة ضبات فلوس
افنان: شاهت عينك هههههه
سالم: رجعت للمستشفى بيدي اوراق التنازل عن كلشي يمتلكة ماردت اكتلة بس احول املاكة باسمي حالتة استقرت شوية كطعت المغذي عنة ماوعى بصمتة وهو نايم
افنان: قابيل ماسوى سوايتك
سالم: تحجين علية مو جنتي فكر لوما اني يلشيطانة علساس ما تدرين مو فكرتج
افنان: ماكتلك اكتلة كتلك بس حول كلشي باسمك
سالم: من وعى عرف من ايدة.
افنان: تالي خنكتة بالمخدة
سالم: اي شسوي مافكرت اعوفة وامشي كلت راح ياخذ فلوسة وبيتة مني وخاف كبل ينطيني هسة ربع ماينطيني
افنان: قابيل الفلوس صارت كلشي كدامك
لهنا وكف التسجيل واحس نفسي وياة وكف
شنو من بشر شيطان هذا بس اريد اعرف شنو من مخلوق هذا ماكدرت احجي شي مديت ايدي طلعت الرقم وبصوت يرجف كلتلها.
دكية واتصلي
اتصلت اجاني صوتة
تعال ضيم
جايج
دزيت المقطع اله وكتبت احفظة يمك
ودزة للمحامي اخذت الموبايل مني.
وكامت كالت: اني رايحة خاف يشكون بيه
عود لاتغدرين تذكري اني منو
بقيت جامدة بمكاني اعيد بالصوت واكول هاي شلون فتحت الموضوع شلون خلتهم يحجون بيه بكل اريحية ومن كد ماذكية ماحجت اي شي بس صوتهم طلعتة
لهناك واجة ضيغم واني على كعدتي حيلي بايد اتخيل شلون خنكة وشلون اذاة وهو جبار ماكو احن منه اني مو بنتة وعاملني نفس بناتة وازيد
يفرفر بيه بالدكاترة وشكد دفع فلوس مايهمة
كمت من شفتة ودموعي نزلت اجة بدون تردد.
اخذني لحضنة بجيت گلبي يوجعني من القهر
شلون لو البنات سمعن التسجيل شيصير بيهن
ضيغم: خلصت الايام الصعبة كافي عيوني
رفعت راسي امسح بعيوني
لزمت ايدة وبنظرة توسل كتلة
اريد اشوف سالم واباوعلة من ياخذونة للسجن اخذني الهم
صار من عيوني
صعدنا بسيارتة ورحنا لبيتهم طبك على صفحة سيارتة بالباب طابكة كال: هسة تجي الشرطة
انطيني تليفونك.
بدون ماسال انطانياة فتحت كاميرا ونزلت نزل وراي وصوت سيارات الشرطة دوت بالمنطقة طبكت بابهم ونزلو دكو الباب طلعلهم يسالهم شكو
تقربت اصور وضيغم بضهري باوعلي متفاجا كال
الضابط.
عدنا مذكرة قبض باسم سالم
ليش شنو مسوي سيادتك
صاح بالشرطة شيلوة رفعت ايدي وضحكتي على وجهي ضحكت بصوت عالي عيونة تريد اطك وبس يريد يفهم ليش ماخذينة.
كواكب: سالم تذكر من خليت الشرطة تاخذني.
وعدتك كتلك يجي يوم واخليك بمكاني الفرق تدري الفرق وين اني طلعت بكفالة وانت مؤبدددددددددد
خلوة بالسيارة يصيح
بت الزناااااااا بت الحررررام صوجي ما كتلتج وخلصت منج
راحت سيارة الشرطة واني اصور بقة التصوير مفتوح انداريت للبيت نسوان نزلت سحلن افنان وهي تصرخ بصوت عالي صعدوها بالسيارة
وصبيحة وراها تسويلها باي وتضحك شيطانات ثنينهن مديت راسي احجي بصوت عالي لافنان
تذكرين من تاخذين مني ربع ربع.
ولاعبة بينا طوبة ارتاحي باخيس مكان
ياخيسة
الجيران طلعت على الصوت سحبني ضيغم اخذ تليفونة وصبيحة فرحانة اكبر شيطانة ماينكدرلها
مشيت للسيارة صعدت.
شوكت يرجع كلشي لاخواتي
يحتاج وقت مو بليلة ويوم
خلي المحامي يستعجل بتدوير الاملاك
ان شاءلله
خليت ايدي على كلبي يدك بقوة مو طبيعية باوعتلة عيوني مدمعة من الفرح واحس روحي بحلم غمضت عيوني من مسح عليهن
هاي عيونج كارثة
وفيت بوعدي رب العالمين اخذ حقي وانسجن
وحق اخواتي رجع.
رب العالمين ماينسى عبدة ولايغفل
عن عين تبجي من الظلم
ضحكت ونزلت دموعي
حتى ماعرف شكلة هسة
سحب راسي لصدرة يبوس بية
مسحت دموعي وكتلة ياخذني لنيزك
اول ماشفتها حضنتها ابوس بيها بقوة
استغربت وضعي تسالني شبيج
كواكب: تذكرين من اكلج سالم نهايتة على ايدي
هم رجعنا لسالم كواكب هذا مو وجهة خير لايسويلج شي
مايسويلي سلمتة للشرطة
طلعت التليفون من جيبي فتحت المقطع شافتة جمدت بمكانها.
ليش اخذوة؟
صبيحة سجلت صوتة اعترف هو كتل ابوج
شهكت بصوت عالي فاتحة عيونها على وسعهن
لزمت ايدها: افرحي لاتبجين بغلاتة عندج
راح للسجن يخلص باقي عمرة ويرجع حقجن
مثل ما اخذة منجن
هالخبر اخذ دموع من اختي دموع حزن ودموع
فرح وخلصت الليل كاعدة تسبح ودموعها ماسكتت هاي ماسمعتها البصمة وهيج صار لو سمعتها شتسوي.
ثاني يوم قبس جاب شهب وراح لشغلة
بقت يمنه ونيزك من سولفتلها احتارت شلون تعبر عن مشاعرها حضنتني تبوس بيه ونيزك دكول.
امي جانت دكول لابوي هاي البنية
شكد تعبت عليها راح يرجع الك بالدنيا وبالاخرة
وابوي يكول ماريد بس عينها على اخواتها وحدة تحمي الثانية تالي صدك رجعت تعبهم اضعاف
وطلعت حقه الراح من سنين
ومن هذا اليوم ملتهين بالقضية نيزك حتى نست ضرغام وحالتها النفسية تحسنت ضيغم هو والمحامي تكفلو كلشي ومن كمل الشغل اجة وكال
البيت باسم منو يصير
باسم نيزك.
نيزك ماتدري من كلتلها كالت لو اموت ما احولة باسمي كعدت اقنع بيها عندت دكلي انتي تعبتي بيه باي حق اسجلة باسمي صحت بيها دمي فاير
ملك ابوووج ابووج نيزك فحطتيني بعد ماتشوفين وجهي هي ورقة وعليها اسم
عندج ابن وراة مستقبل سجلية باسمج
اني لو تنكلب ما احولة باسمي
نيزك: انتي ليش تعاندين
انتي ليش تعاندين هو اني وين اكعد بالشارع غير وياجن
اخذتها كوة عنها
المحامي جان يحجي بعدة ولد شاب
بكد ضيغم تقريباً.
المحامي: المحلات تعتبر املاك ابوجن
لان بفلوسة
كواكب: حولهن باسم ام مير
اطكك بعيونها علية عبالها اخاف منها لهناك كلبت علية وصرنا عرك يلة كملت الإجراءات بقة بيت
لسالم هو جان عايش بالايجار وكل العندة بفلوس جبار جابهن البيت هم للبنات يعتبر بس اني واعدة صبيحة اجت وحدها وقعت على املاك البيت
وقبلها اني كاتبة شرط يوسف ضمن البيت يبقة
هي تدري من وقعت كلتلها سكتت
يبقى يوسف خطية وين يروح والبيت جبير
الهم.
صبيحة: بالعافية عليجن
كل هذا الخير، لاتنسين كواكب دزيلي راتب
كل شهر
كواكب: ما نختلف على الصغار
صعدنا وي ضيغم
اخذنا لبيت جبار النذل ماجرة طلع
واحنا كل ضنا باعة واكول بعد ماصارت عركة سامر ودفع فصل وشال من بيتة اخذ غيرة شلون هيج رجع سيارة وامورة عالية كلها من المحلات طلع من الايجار راح ضيغم يحجي وي اهل البيت
يفرغونة انطيناهم مهلة تلث ايام.
وبهاي الايام شالو الناس ورجعنا للبيت جنطنا بيدنا بس اني ونيزك دخلنا فارغ البيت نيزك كعدت تبجي حضنتها ابجي وياها البيت متغير ماباقي على حطتة بس بعيونا ماتغير والذكريات بيه هنا جبار هنا هيلة هنا جنا نلعب ناكل هنا ذكريات بكد ماحلوة توجع الكلب.
شكلت الصوندة اغسل بيه ونيزك تساعدني ماكو ساعة وطبكت السيارة رحت افتح الباب جوري وردة وشهب جاية نزعت وردة صايتها شمرتها وصاحت بفرحة.
اجينا نساعددددجن
اخوج جابكم
اي.
زلمة معدل ماكو ازلم منه
شهب اخذتها نيزك تسكتها انتهت من البجي
غسلنا البيت كلنا شغلنا المراوح نشف وخابرت على ضيغم اشوفة وين كال بالشغل.
اي عفية مو تجيب شي
اخذت فلوس من مردود المحلات اشتريت بيهن غراض للبيت نزلوهن الولد ومن اجة ضيغم شردت منه كد ماصار عصبي.
كتلججج عندي شغل ترحين تصيررين زلمة ليش ماتنتظريني ك اني
المثقف ابن المثقفين حشاك.
اجة قبس العصر شدو الغراض وقبس فرشتلة نيزك كال ابات هنا باوعت لنيزك صفح واخذتها جوة
اكلج ذولة مايخلونا نكعد هنا الضاهر
هسة هذا يكدر ياخذ مرتة ويروح شكو باقي
نيزك: عيب اكلة شكو باقي نشوف باجر يروح لو لا
شعدهم ويانة نسوان مالهم بعد
صفنت ونطقت بصعوبة هم صح
طلعت من البيت ضيغم اخذ اخوتة صعدت وياهن كتلة عندي شغلة وصلهن للبيت كلي
ها شنو الشغلة
ننفصل اعتقد
ذكرتيني مادام فرغت يلا.
حرك السيارة سكتت مانطقت ولا حرف جنت اريد احجي هواي عندي حجي اريد اكولة اله بس من وصلنا لبيت الشيخ وطلع سلم علينا هنا سكتت.