رواية أغلال زمن الغيهب للكاتبة مرمر الدليمي الفصل الحادي والعشرون
چنت حيييل احب اطبع صورنه
وتارسه الحايط مال غرفتي بس صورنه سويه
اني وبابا اني وماما اني ورسلان
وكفت كبالهم مبتسمه عيوني كلها دموع
هُذال: يا روح هُذال انتو ياكل كلبها.
كعدت بلغرفه اباوع الها وكل تفاصيلها هنا رسلان ذب عليه مي وفززني ب أخر يوم
يوم وفاتهم وهنا بابا شاله وصف وياه يكلي كعدي نريد نروح
فتحت جراره رسلان ابتسمت من شفت المشط مالته والسور إلى جبته اله وانكطع وضل حاط الخرزات ملاته بلجرار مالته.
مسحت دموع عيوني وطلعت الدفتر مالته اكلب بأوراقه وخط ايده الدفاتر الچان يكتب بي الحروف اعلمه عليهن قبل ليدخل روضه حتى ما چنت احسب حساب للموت يدخل بيناتنه ويفرقنه وابقه بس اني من اهلي
أني الچنت قبل ما اطلع اذا ماما لو بابا وياي لو رسلان هسه بطرك روحي
مسحت دموعي ورجعتهم المكانهم باوعت على الباب غهيب واكف يباوعلي فتحلي أيده يباوع عليه ساكت.
نزلت دموعي المسحتهم علمود اسوي نفسي قويه بس من شفت غَهيب فاتحلي حضنه رجعت أبچي تقربت حاضنته حيل ابچي بكل حركه وهوه يمسح على راسي وأيده الثانيه على كتفي تمسح
خلاني على راحتي ابچي اخذني للچربايه كعدني ورجع حضني ساكت كأنما يكلي طلعي كل إلى بكلبچ بدون لاتسكتين وكل ما أشهگ يفز جسمه وي شهگتي ويهمس بصوت ناصي
- أسم الله.
بچيت الحد ماتعبت اني وتعبت عيوني أبتعدت منه امسح بوجهي الشهگه مچلبه ببلعومي.
غهيب: فرحانين وهمَ يشوفوچ واكفه على رجليج وبس هلسنه وتخلصين دراسه وتحققين حلمهم انتِ مو تكولين اريد اصير صيدلانيه؟ مو تكولين هذا حلم ابويه وامي.
هزيت راسي أي
غهيب: مو تردين تفرحيهم؟ كل ماتتعبين تذكري هم راح يفرحون حيل اذا حققتي حلمهم وكملي الحد ماتوصلين وتذكري أني وياچ ما عايفچ خطوه بخطوه بحزنچ اني موجود بفرحتچ اني موجود ووين ماترديني اكون وياچ.
باوعت لعيونه عيوني متروسه دموع ما أعرف شنو واحچي وشنو أكول اله ومنا الشهكه مچلبه ببلعومي
اكتفيت أعبر اديه على ركبته
حاضنته ضامه وجهي بركبته
هُذال: ما انساهم الك هواي صارن غهيب هواي شلون اجازيك بيهم.
باس كتفي ساند راسه عليه
غهيب: يكفي بس تبقه ضحكتچ على وجهج وكلش كافي هم.
ابتعدت منه اباوع الوجهة ولعيونه إلى تحچي كلشي ببداله
هُذال: غهيب.
غهيب: عيوني.
: اريد ابوسهن.
ضل يباوعلي مامستوعب
اول مره احچي وياه هيچ.
: دائماً اشوف نضره الحنان بيهن ودائماً اشوف نضرات تباوعلي ومنتضره نجاحاتي علمود تفتخر بيهم رغم بداياتنه الچانت مليانه كره بس هنه چانن يحچن شي والسانك يحچي شي.
ضل يباوعلي بنفس هاي النضره ألي كأنما ماكو غيري بهلدنيا وبس اني شايفاتني
رفعت نفسي بايسه عيونه ثنيناتهم.
فتح عيونه ذبلانات يباوع بوجهي لزم ايدي وباس باطنها مدد على الچربايه وحط راسه بوسط حضني لازم أيدي حاطه على شفايفه يبوس كل اصابع ايدي باوع بوجهي وأني ايدي صايره على لحيته امسح عليها
غهيب: هُذال.
هذال: همم.
: هواي حاب وجودج يمي.
ابتسمت استمعله منتضرته بس يكول الكلمه إلى واكفه بشفايفه وماراضي يكولها.
غهيب: حياتي چانت حيل فارغه بَس من اجيتي أكتشفت اني هَم بشر أحب و أنحب چنت طول عمري عايش بس علمود اعيش امي وخواتي ثنينهم ومهاف وما اخليهم بعازه شي ومن اجيتي صرت ما احس بطعم اليوم كله غير يمچ چنت عبالي اني حياتي شغل ونوم وخلص وعبالي هيه هاي احلا حياة بس من اجيتي أكتشفت أني ما عايش هلدنيا كبلچ صرت افتقد وجودج صرت بس اشوف شي حلو اتذكرچ ومن اشوف شخص يوصف حبه الفد شي عادي اني أكول يجوز هذا الشي ينطي الحياة مثل ما اماسيلي أجت وانطتني الحياة هُذال انتِ معزتچ بكلبي بكد معزه امي.
طول ماهوَ يحچي اني عيني بعيونه لازم ايدي الثانيه يمسح عليها بلعت ريگ عيوني بعيونه
حاچيه كل إلى بخاطري احچي.
هُذال: انتَ العوض الأجاني وره مافقدت اهلي غهيب أنتَ واحد دائماً اشوف نضرات عيونك نفس نضرات اهلي إلى مايهمك شي غير نجاحاتي وتعرفني من احچي شي واني مو بقصدي احچي ومن اريد شي وانتَ تعرفه هوة شي تافه بس تقبل وتسوي وياي بس علمود لاتكسر خاطري وكفت وياي من مات رسلان وچنت احن شخص عليه احتويتني بفتره اني محتاجه احد يحتويني بيها وچنت اكلك اهلي عافوني وتكلي اصيرلچ اهل وفعلاً صرت اكثر من اهل إلى بدراستي واكف وياي بفتره حزني واكف وياي وحتى من عرفت عندي فتحه بلقلب وكالو الك خطره چنت متبين إلى هذا الشي وتقويني أني چنت اشوفك ضايج حيل وما الك خلك أكول مل مني بس العكس انتَ چنت ضايج لأن التعب مرافگ گلبي انتَ الصدفه الحلوه بحياتي وهواي شغلات سويت علمودي شكد ماچنت تكرهني واني اكرهك بس ماسويت شي يكرهني بيك عمدتاً انتَ الشخص الصنعلي حياة وره ماتوفو كل اهلي.
طول ما اني أحچي هوَ يمسح على ايدي الحاطها على كلبه ألي ينبض بكل قوته وي كل كلمه احچيها
عدل كعدته لام وجهي بين أديناته
قرب وجهة كصتي على كصته خشمي يطخ بخشمه كال بصوت ذبلان
غهيب: هُذال.
جسمي يرجف روحي مسلوبه وي حرگه خشمه على خشمي وانفاسه كوه طلعت من حلكي الحچايه
هذال: ها.
غهيب: حيل احبچ.
ابتسمت داخلي يرجف أبد مافتحت عيوني
عاصره لحاف الچربايه مالتي بأيدي.
بدون تردد منه وبدون رفض مني باسني ايده وحدع منهم لازمه ركبتي ابهامها على خدي وأيد وره راسي تمسح على شعري تقربني اكثر اله مغمضه عيوني عايشه كل تفاصيل هذا اليوم قابله بكل اليسوي بدون لا أرفض اي شي يبدر منه ابتعدت اجر نفس كصتي على كصته
هذال: غهيب.
غهيب: درابين كلبه.
ابتعدت مرتبكه احچي بتلعثم
: ا ءءءء اريد اكوم.
عفته وطلعت من الغرفه ايدي على گلبي يدك بكل قوته اجر نفس وكفت كدام المغسله غسلت وجهي.
باوعت بلمرايه على وجهي كلمته دكات گلبي مخربطه رفعت عيني لكيته واكف يم الباب مرتاچ عليه مكتف اديه
غهيب: خنستي يل السانچ يصلي صلي؟
بقيت ساكته اباوعله ما اجاوبه ضحك يباوع الأرتباكي
دنك مكمل ضحكته رفع راسه إلى وفتح ايده مسويلي طريق
غهيب: أمشي أمشي وجهج انكلب احمر ماعرفتچ عدچ مستحه.
حته على هاي ماجاوبته وبسرعه طلعت
تنفست بعمق عدلت ملابسي انكت بيهن وهنه مابيهن تراب حتى.
مسحت وجهي حيل اخذت مكناسه ودخلت الغرفتي أنضف بيها كلساع اعوفها واصفن على المرايه فتح الباب غهيب
غهيب: راح اطلع اجيب مسواك.
هزيت راسي بدون مااحچي مادري شبيه خجلاانه حيل واول مره هلكد استحي
طلع هوه واني طلعت من ملابسي القديمات هواي دورت على دشداشه سوده وكوه لكيت اغلبهن كيمونات وبرمودات هذا چان لبسي بلبيت.
طلعت دشداشه قصيره ومنا اني سمنانه صايره ضيكه عليه باوعت للساعه ب 1 ونص هستوه راح غهيب يعني يجي ب 2: 00 بين مايتسوك اخلص تنضيف وابدلها قبل ليجي
لفيت شعري كبايه وبديت انضف بلبيت
نضفت غرفتي وغرفه ماما وبابا حاطه الكتاب على الچربايه اروح وارجع اقره شي واضل اردد بي الحد ما احفضه وارجع اخد غير شي.
مسحت الصاله والستقبال غسلت الوصله وطلعت شريتها ورجعت غسلت أديه جمد جسمي من شخص حضني من ورا وباسني بخدي حيل شميت عطره
ومن عرفته غهيب ماحچيت ساكته أبلع ريگ متوتره حيل واكفه بمكاني
وهوَ ضحك ضحكه خفيفه يحاچيني
غهيب: شلون يابه نكضيها سكتاوي؟
بلتت شفايفي مامتعوده هيچ
هُذال: ما ادري.
ابتعد مني يباوع للمسواك واني درت عليه
مكمل حچي مامنتبه ال لبسي
غهيب: جبت سمچ اليوم نشوي.
رفع عينه إلى باوعلي من فوك ليجوه ورفع عينه الوجهي بلع ريگ عينه بعيني
غهيب: هُذال.
: ها.
: بدليها.
هزيت راسي اي امشي لغرفتي يعني اذا أنتَ طبيت كبل شلون ابدل اني شجابك هسه أنتَ شبسرعه
فتحت كنتوري اباوعله يعني شكلتي الروحج من ماجبتي ملابس وياج هذال!
ملابسي الهنا كلهن خزي لأن بيتنه منغلق وماخذه راحتي بلبيت كلهن مشلتحات وصلوخ
طلعتلي فانيله ربع ردن وبرموده بدلت وطلعت
وكفت بلمطبخ وغهيب كاعد بلصاله
هُذال: غهييب.
غهيب: گلبي.
سكتت أكور ايدي وافتحها أطكطك بأصابيعي متوتره اضم ابتسامتي كوه عليه
هذال: نشوي سمچ هسه لو بليل؟
غهيب: بليل هسه شتسوين سوي جبتلج دجاج اني.
شلت الجدر وضليت صافنه شنو اسوي رحت اني وجدري الغهيب متمدد على الكرويته جهازه بأيده وكفت كدامه جدري بأيدي
من رفع عينه وشافني عض شفته السفليه يباوع الوجهي والرجليني
هُذال: غهيب شسوي غده ما ادريي حرت.
غهيب: عوفي الغده أنتِ كافيه.
: اهوو غهيب عفيه احچي زين مثل قبل والله استحييي.
ضحك بصوت عالي
ورد عليه، تعرفين تسوين كبسه؟
باوعت أله بطرف عيني، ليش يمه شكالولك عليه ام بيت ترى كلشي مااعرف.
: نسويها سوى؟!
: احللفف تعرف؟!
غهيب: من ضليت فتره ببيتي تعلمت كلشي.
عكدت حاجبي مستغربه
: يعني عشت وحدك؟
هز راسه اي
: ليش.
: خاطر لا اأذي احد من انفعل.
: شكد ضليت وحدك
: 6 اشهر.
: ليش رجعت؟
اخد نفس متحسر
: زعل أمي ثكيل على گلبي.
: شكدد تحبهاا.
: بمعزتا أنتِ.
سكتت وهوه كام وياي للمطبخ اني اثرب بصل وكصكصنه الدجاج سوه طلعت تمن نكعته وهوَ بده يطبخ واني تربعت على الكاونتر اسولف وياه
هُذال: الله غهيب بعدد كله أنتَ تطبخ ببدالي حبيت اني هاي النقطه مال طبخ بيك حبيتتتها.
غهيب: ما استاهل تحبيني كُلي؟
بقيت اباوع بعيونه أتصل مبايله بصفي شلته
شال عليه خط من شافه مهاف ضل لازمه حاطه على اذنه يحچي وياه.
غهيب: هلا مهاف، اي، لا ذاك السبوع دزيت، شفتها؟، خوش، اي اي اندله، سكندر طلعلي الموقع، ما ادري مهاف ما ادري كلبي موچر، حته لو الضيم ميبين بلوجه يجوز الكلب محترك ومحد يدري، لا ما اعتقد كايل الها ياخذ مصرفها منه، مهاف اكثر من مره كتلك تدمر اذا عافته! متفهم انتَ، مدام مامسوي شي خلي يولي، دمشي لاتخليني اغلط حته على خالتك حنان، هههه اي يلا يلا، مو تكول مهاف!
سده منه وحط الجهاز بصفي مكمل طبخ واني كتله.
هذال: منو هايَ إلى ياخد مصرفها منك.
غهيب: عود يعني هسه معرفتيها.
: خالتك حنان؟
اتصل الجهاز مالته شلته اباوع للأسم
غهيب: منو؟
هذال: سكندري.
رفع حواجبه ماراضي
: سكندر مو سكندري.
: غير أنتَ كاتب عليه هيچ
: اي بس أنتِ تكولين سكندر بدون سكندري
: هسه حيخلص الاتصال تفضل
عاف الچفچير واخذه مني ورد عليه فتح سبيكر وخلا على الميز يسوي بلاكل
سنكدر: الررووح.
ابتسم غهيب يقلب البصل بلجدر
غهيب: هلا سكندر.
: هلاا بيك.
: اليوم مبينه الاوضاع فول.
: طلكت.
: ها؟ شوكت
: وداعت امك من البارحه.
: سنكدر.
: ها
: نچب.
: هههههههه ضجت لان كلت امك؟ ترى صدك امك.
: راح اطيح حضك.
: هههههه
: زمال.
: غهيب بشرفك خل امك تدورلي مره اشو انتَ بس تزوجت نشنشت والاوضاع صارت فول عدك ولاچنك غهيب المالك خلك كلشي روحك اشتغلت السر بأختيار امك لو بيها.
: ليش ماتنچب هي ساقط.
ضليت صافنه على حچيهم وشلون بينهم ميانه وذلك متصل مكيف طلك والله نقهرت عَليه خاصتاً همَ عدهم طفله.
سكندر: وين انتَ.
: طالع.
: اي.
: منو وياك من الجماعه.
: مو وي الجماعه.
: اهااا أحممم.
: وسم.
: شني غهيب معقوله الحد هسه ماحبتك اني من يمي حبيتك وخليت عليك من تزوجت.
باوعت اله وهوَ عينه ع الجهاز رد عليه
غهيب: مو شرط هيَ تحبني يكفي اني حابها.
: غهيب خل اعلمك حبيبي اني هسه رجال مخلف ومطلك وشايف وعايف ترا المره حته لو تحبك ماتحچي غير انتَ زلمه وتروح تكلها عاد اذا نرفضت عادي طبك مرض بس هيه اذا نرفضت من الشخص الاعترفتله بعد كرامتها متسمح الها تباوع بوجه اي شخص.
: كملت؟
: اي
: يلا نچب.
: صوچ الينصحك الكلب كون الحسن وتمرمر كلبك مرتك الحد مايطيح حضك يلا تكلك يابشر حبيتك.
: اي خوش.
: اكلك ماعدها خوات شي.
: راح احرگگ اسكت.
اني بس صافنه على غهيب وشخصيته وي سنكدر وحته غلاط يغلط عليه وعادي قابل غهيب ومضايج منه حط الدجاج غهيب صار صوت بلزيت من الحروره
كال سنكدر مستغرب
سكندر: شو صوت تكركع يمك؟
غهيب: جاي اطبخ.
سكت سكندر وأخد فتره يلا حچه بصوت جدي
: غهيب رجعت عزلت روحك؟ هم تريد روحك تحترك 6 اشهر بس من بعيد تباوع؟
: لأ، ب بيت ابو هذال نبات ونرجع.
: اهاااا.
: اي
سكت شويه يستوعب سكندر
وضحك بكل قوته ابتسم غهيب
بخفه منتضره يحچي.
: ههههههههه يعني تطبخ بدالها.
: وتدلل.
: اه!
: وداعت عيونها.
: منيه.
: خالتك.
باوعت على الجدريه اشر الغهيب بعيوني عليها
وهوَ ميباوعلي همست بصوت ناصي
هذال: غهيب احتركت!
فتح الجدر وسده هز راسه لا
سكندر: غهيب.
غهيب: هااا
: فاتح سبيكر؟
: yes. نعم
: Hey dog. أيها الكلب
: she understands some words. انها تفهم بعض الكلام
: lt s a disaster. انها كارثه
: l told her what what was in my heart today. اخبرتها اليوم مافي قلبي.
: what did she asy ماذا قالت
: she didn t say. لم تقل
: اخذ راحتك حبيبي.
: سكندر.
: ها.
: هندس؟
: كل خميس يمي.
: واني؟
: شنو.
: شلون بيه بس الخميس اشوفها؟
: لأ، بس هلفتره اخليها يمها كل عقلك أمن بنتي يمها بعد السوته؟
: شكد وترجع يمك.
: 3 اسابيع.
: خير ان شاء الله.
: من ترجع اتصل عليه اجيك.
: ان شاء الله.
سده منه واني بسرعه نهديت عليه
هذال: عود تحجوون بلانكليزيي علمود ماافهم عليكم.
ضل مبتسم ماجاوبني
هذال: غهيب.
مارد عليه نزلت من الكاونتر وعفته ومشيت ضايجه اخذت الكتاب مالتي وبقيت افتر بلمطبخ اروح وارجع واني بالي مو ويه الكتاب وهوه احسه متونس عليه منتضرني احچي واني دكيت رجلي بلكاع من شفته مامهتم.
هذال: غهيييييب.
ومثل عادته يضحك مرتاح حاب اسمه بلساني
: كلبه انتِ كلبه.
: شجنتووو تحچووون.
: سوالف مال كبار بابا.
تخوصرت واكفه احچي محترگه.
: اهااا هسه صارت مال كبار؟! خوش غهيب بعد اي شي مال كبار لاتحچي ويايي لااان اني صغيره خووش؟
: هاهيه.
بقيت اباوعله ميته قهر اريد اعرف شچانو يحچون وحتى الكلام ماحفضته علمود اترجمه بس فهمت ال yes، dog والباقي لا.
كعدت بلصاله اقره رحت للمطبخ حضرت الصينيه وزلاطه وروبه بقى بس اصب وناكل من تستوي.
تغدينه واني صعدت للطابق الثاني انضفه وسكندر اجه على غهيب كملت الطابق الثاني وكعدت اقره بلصاله ابتسمت من تذكرت هذا المكان من كاعدين بي نتعشه هستوني ناجحه من الرابع علمي وكالي شوكت يبدي دوامچ وماما تحدد موعد نروح نشتري بي صداري الي
مسحت وجهي حيل اركز بلكتاب دخل غهيب للمطبخ واني بلصاله صاح من يمه
غهيب: هذال حبيبي وين حطيتي الفحم.
هُذال: يمك بلكاونتر الفوك اول خانه.
حطهم على النار وكف بباب الصاله انطاني بوسه بلهوى وطلع حطيت ايدي على وجهي فررحااانه وجهي يطلع منه نار
كملت قرايه لل 5 ونص سكندر راح وغهيب طلع يحضر الاشياء مال شوي وهوه اشتغل السمچ كله اني كلشي مااعرف اخذت فرشه صغيره وفرشتها يم مكان الشوي وجبت كل الاغراض
ننتضر السمچه تستوي باوعت
علي الشجره أبتسمت اباوع الها
هفه غهيب على السمچه وكعد بصفي
رچيت راسي على كتفه
هُذال: قبل سنتين من هيچ وقت.
بابا يركض ورايه اجيت اركض ولزمت الشجره ودخلت خشبه بأديه
غهيب: سوده عليه.
: بابا چان يضحك بس من دخلت
الخشبه بأيدي اجه يركض خايف عليه
وباس ادياتي ثنيهن وراح جابلي كومه حلويات
واني اصلا بس شويه وجعتها.
اخذ ادياتي ثنينهن باس باطنهن
غهيب: اقلعها للشجره وعيونچ.
رجعت راسي الكتفه بقينه النار ماطفيناها تعشينه وهوه يسويلي لفات وكتابي بصفه يباوع ويسألني واني اجاوب
هُذال: غهييب نخدر الچاي هناا.
غهيب: جيبي القوري ووياچ بطانيه.
ركضت جبت القوري وبطانيه وتليفوني
حطيت القوري على النار وغهيب فتح البطانيه ولفها علينه سوه من وره اني لازمتها من طرفها وهوه من طرف ثاني
هُذال: غهيب.
غهيب: ملسونته.
: أريد اصور.
: المطلوب.
: احمم.
ضحك ولزم ايدي مفتهم قصدي فتحت تصوير
صورت فيديو أديناتنه مشبوكات ببعض
ورفعت الكامره للجمريه الكدامنه.
والحديقه ورجعت الكامره لأدينه غَهيب يمسح على ايدي يدفي بيها سديته ودخلت اختار اله صوت
هُذال: شخلي صوت؟
: بكيفچ.
حطيت عَليها صوت كُلش راهم عليها
بحيث ضليت اعيد بلفيديو
: ياا نسيت الكلاصات خل اجيبهم.
وخرت البطانيه مني ودخلت للبيت طلعت الكلاصات وطفت الكهرباء صارت ضلمه حيل رجعت ليوره
: يمه
مشيت اتلمس بلحايط اريد اطلع الغهيب
صحت بصوت ناصي اتخيل شي كدامي واكف
: غَهيب.
مشيت مغمضه عيوني انردمت بشي صلب كمشت بفانيلته بسرعه من عطره عرفته غهيب
: غَهيب.
مارد
: لا عبالك تخوفني اعرفك من عطرك غهيب.
شهگت من حسيت خشمه يشم ب نَحري
لزمني من خصري منزل راسه ألي كل مره يرفعني اله هلمره هوه النزل راسه
غَهيب: يم شامتچ بس نزل راسي.
اريد ارفع راسه مني ضلمه اتلمس عشوائي صار اصبعي على شفايفه باسه لزم ايدي ونزلها مانعني المسه رجف جسمي وارتديت ليوره من حسيت ببروده شفايفه غمضت عيوني منتهيه بأيده لزمني ضاغط على خصري اريد اكله غهيب اشعل فلاش مجاي اكدر احچي
خشمه مشه الحد اذني شامني حييل حرك خشمه بلزاويه التصير وره أذني
هذال: غهيب.
غهيب: كلبه انتِ.
: اخاف.
: وانه يمچ؟
ضميت وجهي بصدره ما اباوع اخاف اتخيل شي.
سحبني وطلعني من المطبخ للطرمه ابتعدت من غهيب من صار ضوه الكمر مضوي وضوه الجمريه فتح فلاش وراح جاب الكلاصات وكعد بصفي دخل ويأي بلبطانيه
غهيب: هُذال.
: ها.
: تضلين تسكتين كلما سكرت؟!
: شنو تسكر؟
باوع عليه عيونه بعيوني
: كل ماصرتي قريبه عليه اسكر وتعتني نفسي اكثر الچ خمر أنتِ مو مره.
اقوه من الخمر تأثيرك إعلى الروح
انعد عل سكاره وماضكت كطره
غهيب: نونو.
باوعت أله بسرعه گلبي دك بقوه ورجعت ذاكرتي من ماما وبابا يكلولي نونو طلعو ألي لان اسمي صعب على رسلان ف كام يصيحلي بي واهلي تعودو وياه
: منين تعرف دلعي.
: اول ماعرفتچ عرفته.
: شوكت؟ ما اتذكر رسلان مره كدامك كالي نونو.
: شفت تعليق الأبوچ الله يرحمه بعيد ميلادچ كاتبلچ نونو وامچ هم.
: هممم شچنت تريد تكول.
: نسيت.
: تذكر.
: أنتِ اليصفن بوجهج تضل ذره عقل براسه؟ شيذكر.
: ليش ماكتلي هذا أنتِ من جيت بلمطبخ.
: جيت ادور عليچ واول مدخلت انردمتي بيه صار خشمي بركبتچ بدون قصد
سكت يباوع على النار يحچي بهدوء مكمل كلامه
: دنت نفسي عليها.
بقيت ساكته گلبي يرجف بس يحچي هيچ وياي وكلامه الصبح ابد ميطلع من راسي وكل ما اذكره تصير فراشات بمعدتي
طلع جگاره وشعلها من الجمريه
قدمها بلبدايه ألي يباوع لشفايفي
غهيب: اول نفس أنتِ سحبي.
بدون ما احچي واعترض حطيتها بحلگي سحبت نفس وزفتره بوجهة قدمتها بأتجاها وهوَ اخذها مني ومسحها بشفايفي وحطها بحلكه
غهيب: هيچ تصير اطيب.
هُذال: غهيب.
: ملسونته.
: ليش صايره تصرفاتك مال ناس سرسريه.
فتح عيونه يباوع بوجهي واني اريد الطشها كتله
: يعني تصرفاتك مو أنتَ السرسري.
: وتصرفاتي منو يسويهن غير انيي؟
: لاتخزر ترى صدك.
: هذاال احمدي ربچ كاض نفسي بعدچ ماشايفه السربته شلون صايره.
: شلون يعني بلا؟ غير هيه هيچ.
: لأ اني اعلمچ عليها بعدين.
: ترا دا انتقدك لان صايره تصرفاتك سرسريه يعني اني دا انتقد ما اريد اتعلم واصير مثلك.
: انه السرسري؟ لو أنتِ المسربته.
فتحت عيوني بوجهة
: انييي؟
: لا أني.
: تسوي وتذب براسي صاير فدمراا مو داكلك.
: هذال.
: هاا.
: اطلبچ شغله قديمه.
: لا تطلبني ولا اطلب انتهت الصلاحيه.
ضحك حيل باوعلي شلون ارتبكت صبينه جاي وشربنه هواااي ضلينه نسولف ويقريني خلصنه سكت ساحب نفس بحسره.
طلع ورقه من جيبه وانطانيها عكدت حاجبي مفاهمه
: شنو هاي.
: فتحيها.
فتحتها وابتسمت واني اشوف خط
ايدي مكتوب بي التاريخ إلى اول ماعرفته
كتبته اله وكتله تذكر هذا اليوم.
منزل راسه مبتسم يحچي
غَهيب: چنت أكول كلها خلك بنيه صغيره متتحملني ولا تتحمل سلوبي وبرودي
وتفصخ متبقى وياي چنت احچي بزودي
متأكد تذكرين شچنت اكلچ بذاك اليوم؟
هزيت راسي اي راده عليه
هُذال: اذا چنتي صاعده السابع سماء
انزلچ الأولها.
غهيب: تالي وجودچ وياي صعدني لسابع سمه وحبيتچ گلبي هم طايح حضه.
هُذال: منو الفاز؟
: اكو غيرچ گلبي طاح حضه ساعه الحبچ
شاف بيچ برائه طلع السانچ شطوله.
: هههههههههههههههه محد كلك لاتنسحب.
: اكدر بعد اني؟
: غَهيب.
: ها بابا عيوني.
: سمعتك بلعمليه مالتي تحچي وي خاله آيات.
: همم وسمعتي وماكلتي وسويتي نفسچ نايمه.
: شمدريك!
: دارسچ.
: تذكر شنو كلت الها أنتَ؟
: گلبي تعلعل يمه عليها أني اكتسب قوتي من عيونها شلون بيه لو صارلها شي شيصير بيه يمه شيصير.
نزلت راسي العب باصابعي احچي بهدوء
: من شوكت حابني.
: من شفتچ بلمول ماحبيتچ بس
بقه شعرچ ببالي لأن طويل ودائماً
تصير صورتچ كدام عيوني واني
اضوج لان أسلوبچ ابد مچان محترم چلن بنفسي ارزلج واطيح حضج بس مااكدر ارزل بنيه غريبه.
: من شفتك بلمدرسه ماعرفتك ابد صراحتاً و ولا بقيت ببالي اصلاً بسرعه نسيت.
: النوب اجيتي للمدرسه مالتنه ضليت مركز عليچ وخاصتاً ما احب احد من اشرح باله مو وياي چنت الكاها حجه علمود اخليچ تنغثين.
ابتسمت بستهزاء اتذكر
: چانت كل صفناتي على رسلان وشلون احافظ عليه.
: ومن غبتي 3 ايام ورجعتي داومتي وضربتي بنات ثنين.
: من رزلتك.
: أنتَ استاذ چبير وواعي.
: صح، مناسي شي أنتَ.
: ومن عرفت اسمي اماسيل اجيت اتعارك وياك بس سحبتني اسينات.
: من نحل شعرچ.
بأثناء مدا نحچي دك التليفون رقم سفانه.
جاوبها بهدوء
: ها بابا.
فتح عيونه على وسعهم وبسرعه كام
يتعثر بخطواته
: شكوو غهيبب!
: حضري غراضچ بسرعه هُذال بسرعه.
في مكان آخر:
حاطه ايدي على خدي انتضر محمد يجي
نداريت من ندك الباب مال شارع ركضت فرحانه فتحتله الباب دخل مبتسم كرص خدي
محمد: فدوه للينتضرني فدوه.
: ههههه الله يساعدك حبيبي.
باس راسي معبر ايده على كتفي نمشي دخلنه للبيت
تنفس بعمق شام ريحه الاكل
محمد: الله.
: فوت غسل ملابسك محضرتهم.
دخل واني حضرت الزلايط وصبيت الأكل طلع من الحمام واني حطيت الصينيه كعد وياي ياكل
: محمد.
: ها حبيبي.
: حچيت وياهم؟
هز راسه لأ مكمل اكل
: ليش محمد انت مو كتلي راح تحچي؟
: تعبان ومجاي يصيرلي مجال من افرغ احچي وياهم.
ابتسمت بوجهة خلص اكل شلت المواعين غسلتهم وصبيتله جاي انطيته اله سحبني وكعدني بصفه ايده معبرها على كتفي رچيت راسي على صدره عيني للبلازمه
: محمد.
: عيني؟
: الحمد لله على وجودك بحياتي انتَ نعمه من ربي الي.
باوعت عليه تحسر يبوس براسي
: انتِ نعمتي والله.
بقينه شويه كاعدين نباوع على فلم وهوه كالي
: راح انام تعبان عندي طلعه ب 1: 30 كعديني.
: وين؟
: صديقي يسوي عمليه اروح يمه ابات.
: تمام.
كام للغرفه مالتنه نام واني بقيت اباوع على الفلم اخذت جهازي كلساع افوت على صفحه واحد منهم ابتسم اباوع على صورهم ذبيت حسره
: اااخخ لو ماعارضيلي ااخخ.
كمت لملمت البيت طفيت البلازمه دخلت امشي على اطراف اصابعي اخاف يفز من النوم وهوه تعبان اريد اروح للجهة مالتي من الچربايه وشفت الشاشه مال تليفونه تشتغل وتنطفي تقربت اباوع بلجهاز الأسم
سمير
شلت الجهاز بأيدي اريد اكعد محمد لان دائماً من يتصل سمير يكول على شغل ومهم ويروح خلص الأتصال قريت رساله خلتني اتصنم بمكاني ايدي رجفت الرساله من نفس الرقم إلى هوه سمير مكتوب
. ابنك مريض الله يخليك تعال حيموت.
. محمد اني يطبني مرض اتمرض چبيره واتحمل بس هذا ابنك يابشر ميتحمل
. ابنك راح يروح محمد
. عساها بحضك وبختك لكك ابنكك هذااا ابنككك ردد
رساله وره الثانيه توصل على الجهاز اشوفهن من الاشعارات غوشت عيوني بلدموع
أبنك؟
ابني؟
چبيره؟
وكع الجهاز من ايدي من قوه رجفتها فز محمد واني بسرعه درت وجهي ألزم بدموعي امسحهم من وجهي ضمله مايشوفني صديت عليه وشلت الجهاز
: سمير يتصل عليك جهازك صامت.
فز وكام بسرعه اخد مني الجهاز باوع للساعه ب 10: 50
محمد: حضريلي ملابس هسه اجي.
طلع لازم تليفونه گلبي يدك دمام وجسمي كله يرجف عيوني تغوش وترجع توضح الرؤيه عندي طلع من الغرفه واني مشيت وراه بدون ميحس عليه حصرت نفسي وره المبرده وهوَ تلفت يباوع للغرفه
رد معصب الجهاز يدك بأيده
محمد: هاااا هاااا ساره شكوو.
تغيرت ملامح وجهة الخوف يباوع وراه.
محمد: شبيي؟، جااي جااي، ساره عينچ عليه، لااتدعيييننن لاتدعييينن لاتحسسيني انيي مخايف عليه وبس انتِ الخايفه مثل ما أنتِ امه اني ابو وهمم اخاف عليه، چنتتتت منطمررر والله منطمرررر.
سده منها يغلط منفعل وجهة احمر
محمد: خللص الرصييدد خررببب بل.
وأني فلتت شهگه مني حاطه ايدي على حلكي دموعي تنزل بغزاره كمت ما اتنفس فتحت حلگي اجر هوه ومحمد بسرعه تلفت يدور راح على الجهة الثانيه واني دخلت اركض للغرفه طلعت اله ملابس على الچربايه ودخلت للحمام علمود من يدخل ميشوف وجهي.
كل إلى سمعته واچذب اذني أكول لا لازم غلطانه متززوجج؟! محمد متزوج! وفوكها عنده طفلل؟! كل هلحب إلى وحارب الكل علمودي وچان مستعد يكتل نفسه اذا ماخذاني تاليها يطلع متزوج بهذا اليوم كلشي انطفى بعيوني وضلمت الدنيا بعيوني حيل
اقرب شخص إلى هوَ زوجي وحبيبي واهلي وصديقي واهلي كلهم عاديت الكل علموده ووكفت بوجه الكل واني رافعه راسي واسولف بي تاليتها هيچ جزاتي؟ سمعت صوته اجاني بلغرفه رديت عليه
: ها بلحمام.
محمد: راح اروح مقدمين موعد العمليه.
: تمام.
بدل وطلع من سمعت طكه الباب طلعت وكعت على ركبي ماعايناتني ابچي بكل قوتي گلبي يوجعني حيل نفسي مخربط
ركضت على الكنتور طلعت جنطه زغيره فرغت الذهب مالتي كله حته فلوسه إلى يستلمهن من الشغل اخذتهن 7 ملايين.
لبست جبه فوك ملابسي حته ماسديتها وطلعت اركض وراه ادعي بلكت واكف يجيب رصيد ومن بعيد شفت واكفه سيارته ركضت ومن وصلت يمه كتمت صوتي واكف يم المحل فتحت السياره وضميت نفسي جوه المقاعد مال سياره عيني على الجامه مقلصه جسمي حطيت ادياتي ثنيهن على حلكي من سمعت الباب نفتح
دخل مستعجل يدعي بصوت ناصي وشغل السياره ومشه الجهاز مالته يتصل محد يجاوب
ضرب الستيرن حييلل يردد.
محمد: دخيلك يا ابو عبدالله ابني بأمانتك دخيلك يا ابو الخير دخيلك.
يدعي واني گلبي حسيته من كد الوجع يريد يطلع من حلكي كامت عيوني تغمض جسمي ما احس بي اتصل وفتح سبيكر شامر الجهاز بصفه سمعت صوت بنيه تبچي وهوه انهد عليه
محمد: ليييششش متردييينن ليشششش
ساره: محمد الله يخليك الحكله حيموت أبنيييي حيموووتتتت.
تبچي وتشهگ فتحت عيني من سمعت صوت محمد مال شخص دا يبچي يكلها.
محمد: اسكتي مابي شي مابي شي راح اوصل سااره ضلي وياي راح اوصل.
البنيه تبندت من البچي ومحمد كلساع اسمع ضربه ايده على الستيرن يدعي بصوت ناصي
وكفت السياره وهوه نزل يركض فتحت الباب ونزلت وراه حتى باب البيت عافه مفتوح.
دخلت امشي وراه وهوه مايهمه شي ولا حته يباوع وراه وكفت بلباب بنيه كاعده آيه من الجمال تحسها ملاك مو بشر من كد الحلا وطفل يطلع عمره تقريب السنه حاطته بلكاروك ركض محمد شاله وهيه بچت حيل بس شافته حضنه الكلبه دموع محمد تنزل وكف متصنم من شافني واكفه بلباب فتح عيونه على وسعهم
دموعي تنزل جمر على خدي كلت بكل أنكسار وخيبه الغصه واضحه بصوتي
: عساك بكسره گلبي وتعب روحي عساك بحركه مثل حركه گلبي هاي يمحمد.
ابتعدت من الباب مسويتله مجال
: روح الحك على ابنك.
بقه واكف بمكانه عيونه متعلكه بيه البنيه
تهز بمحمد وتحچيله على ابنها وهوه فاصل عنها صحت بكل صوتي ابچيي
: ابنككك راححح يمووتتتت روححح!
باوعلي بنضرات توسل يحچي بغصه
: نبض.
وبكل صلافه يكول لقبي ألي اول ما اعترفلي سماني بي بعز كسرتي منه وبعز حرگتي اني
مامهتمه اله كد مابالي وي الطفل كعدت
علي القنفه اباوعله
محمد: لا تروحين من اجي افهمچ كلشي.
: منتضرتك.
طلع هوه يركض والبنيه وياه ابد ماحچت وياي ولا رفعت عينها إلى كل همها ابنها إلى متبدر اي حركه منه بقى البيت فارغ من سمعت شخطه السياره
طلعت اركض حاضنه جنطتي بكل قوتي
اركض على الشارع بدون وعي الساعه متأخره
بليل اأشر على السيارات وكفلي رجال جبير بلعمر حته مبين مو تكسي واني احچي وياه لهثانه وابچي واشهگ
: توصلنييي عمووو عفيه شكد متريد انطيك والله بس وصلني لأهلي.
: اكو احد يركض وراج؟!
: لا والله بس عفيه وصلني اريد اهلي.
: صعدي عمو.
صعدت وره وأنطيته العنوان عيوني على الجامه ابچي واتذكر كلامهم واحد واحد من كالولي عوفي ميفيدچ عوفي موزين عوفي يوجع كلبچ عوفي عوفي بس اني عاندت وحاربت الكل علموده شفته سند وأمان طلع يلعب من وراي
للساعه ب 12: 44 وصلت سحبت خمسه وعشرين من جنطتي وانطيتها اله
حط ايده بجيبه يطلع صرف
: اخد الباقي الك عمو.
: لاا ميصير انتضري.
: اخذها بثواب ابويه وادعيلي الله يريح گلبي.
: الله يريح كلبج أن شاء الله ويرزقج.
نزلت اشهگ واكفه كبال باب بيتنه واتذكر اخر طلعه إلى منه وأني عايفه كل اهلي ومفضله محمد القذر عليهم اهلي ألي همَ ربوني وتعبو عليه قطعت وصالي بيهم الخاطر شخص ميستاهل
اغص بشهگاتي رجليه امشي عليهن كوه
وكفت كدام الباب ما اعرفهم أذا راح يطردوني؟ راح يعيروني ويكلولي كنالچ عوفي ومعفتي؟
يضربوني؟ يتقبلوني لان بنتهم وغصباً ماعليهم بدون ميتقبلون وجودي وياهم؟
تزاحمت الأفكار براسي غمضت عيوني
ودكيت الباب مره مرتين محد رد بچيت بلزايد دكيت الجرس اول مره محد اجه والثانيه هم بلثالثه سمعت صوت اقدام اختي طلعت
وصوتها اجاني تصيح
: منوو
: اني.
ما أعرف اذا سمعت صوتي لو لا او حته عرفته لو لا لأن صوت بچي وابد مامبين صوتي.
أنفتح الباب صارت بوجهي فتحت عيونها على وسعهم متصنمه بمكانها أمي واكفه وراها تباوع منو العلى الباب ويمكن متوقعه الكل يجي أله اني اي هاي امي العفتها تبچي وراي وتتوسل بيه ما اروح وياه هاي نفسها العفتها واكعه على رجليها واني فضلت محمد عليهم رغم حبي الهم اني ألي تهاونت بمشاعر كل اهلي وانطيتهن الشخص ميستاهلهم وهاي اختي الضلت مچلبه بيه تبوس بأيدي علمود ما اروح لأن چانت متعلقه بيه حيل وماعدها غيري اخت.
كالت بصدمه صوتها يرجف
سفانه: رُسل!
، يتبع
تخاربنه وي أهلنا وما خربنا وياك
وماحسبالنه بهل رخص تنطينا.