رواية أبناء الشنار للكاتبة مراسيل الفصل السادس
ما ادري شگد مر وقت اول شيء حسيته اول ما فتحت عيني ريحه طيبة تحاوطني جسمي ثگيل شكد ما احاول افتح عيوني احس الضوه يعميهن وارجع اغمض.
حاولت اصحصح واستوعب گعدت على حيلي بصعوبه لزمت راسي بين اديه باوعت داير ما دايري بصدمة اني وين احس عقلي متفرمت كل شيء ما جاي اتذكر.
هاي مو نفس الحياطين مو نفس الغرف ماكو صوت صريخ بنات ماكو بچي مال اطفال ماكو ريحة عفن تخنگ.
نايمه بمكان نظيف و واسع الشمس داخله من الشباك تضرب على عيوني والبردة ترفرف من الهوى عيوني تاهن هزيت راسي بنفي ضليت اصرخ بدون وعي واني اتذكر تَسنيم.
: - تَسنيم وين أختي وين.
سمعت صوت اجه من وراي ويگلي
: - شبيچ تصيحين شني.
فتحت عيني مصدومه والتفتت بأتجاه الصوت رمشت عيوني بعدم استيعاب واني أشوف رجال لابس تشيريت صلوخ بارز عضلاته وجسمه متروس وشوم وشم يبتدي من من رگبته لحد أكتافه خطوط سوده وملتويه مثل ثعابين ملتفه على عضم وهواي اكو ما گدرت اركز عليهن و لازم بأيده بطل مي يرج بي ويباوعلي بقلق.
اني وين وهذا منو وشجابه يمي دخيلك ياربي.
: - انتَ منو وين جايبني اختي وووين وديتها؟
احجي بأعصاب وهوَ ممهتم من وصلت لأختي عگد حاجبه مستغرب
: - اختج؟
ملت راسي ودمعت عيوني اتوسله
: - عليك الله گول موجودة.
حچه بهدوء من شاف ردة فعلي
: - وين چانت بنفس المكان الچنتن مخطوفات بي؟ اذا بي لا تخافين لان ما بقينا وحدة هناك.
بنفس المكان الچنتن مخطوفات بي يعني يعرف يعني چان هناك بس شجاب هل شخص لمكان مثل هذاك علمود ينقذنا؟
چنت احاول اربط بس راسي ما جاي يلحگ حسيت حيلي انهد بثواني ياربي اختبرني بكل شيء ألا بيها.
: - شلون ما تعرف انتَ طلعتني من هناك مو ليش ما طلعتها وياي ليش خليتها هنااك؟
گلتها وگعدت حيلي بايد مخليه اديه على وجهي وابچي بصوت على روحي الضلت هناك حسيت الدنيا انطفت بعيني
حسيت بي اجه گعد بصفي بهدوء قدملي بطل المي.
: - هاچ اشربي انتِ جسمج تعبان.
: - شنو اشرب يمعود صاحي انتَ جاي اكلك اختي اريدها.
صاح بيه بقلة صبر متنرفز
: - شلون راح ارگعها بالبطل هسه اشوفلچ اختچ بس حلگج سدي خلي افتهم سالفتچ عدل شلون انخطفتن وليش شنو تعرفين معلومات گليلي ساعديني حتى أساعدج.
: - شنو تريد تعرف اگلك بس رجعها إلى بدونها ما اعيش صغيرة والله ما تعرف تتصرف ما تعرف تبقى وحدها اعتبرها عرضك.
: - اكو وحدة مثلچ هم هيچ چانت تحب اخوها وتخاف على اخذوها منه بس لا راحت ولا فارگت گلبة.
چنت اباوع عليَّ ودموعي يطيحن ما اعرف شحچي وكل شيء ما افتهمت اصلاً مسحت دموعي وگتله.
: - وگدر يلگاها؟
ابتسم بقهر ما جاوب ضرب فخذه وگام واگف على حيله محروگ گلبه اتحمحم وحجه بجدية عكس قبل شويه.
: - اهلچ وين؟ انطيني عنوانهم رقمهم أي شيء يوصلني الهم حتى ارجعج الهم.
بهت وجهي ضليت ابلعم لا ياربي ألا هاي
: - ما عندي اهل بس اني واختي اني اخذها واختفي منا بس تجيبها.
باوعلي مضيگ عيونه عبالك ما مصدگني
: - شاردة منهم؟
: - احترم نفسك شاردة شنو؟ بس عايشة وحدي اني واختي.
باوعلي ما مقتنع اديه بجيوبه
: - حلو.
سَنابل: شوكت تجيب إلى اختي راح اموت.
: - لا تموتين ماتسوى، هسه طالع رايح للمركز أسمها شني؟
سَنابل: تَسنيم غانم.
: - راح اطلع يمكن اطول وراح اقفل عليچ الباب من برا للأمان اكل اكو بالفرن طلعي واكلي لا تتخربطين وانتِ لوحدج شتردين تسوين سوي اعتبري البيت بيتج ولاتخافين ولا تتقيدين محد يوصلچ وانتِ هنا.
بلعت ريگي وباوعتله حايرة
: - تَسنيم عليك الله ترجعها إلى ما تجذب عليه مو منهم انتَ؟
: - شجاي امسلت چا انا مو كتلج راح ارجعها اذا منهم شكو مخليچ هنا اعاين لطولج؟
سَنابل: شنو إلى يثبت.
: - وكفيل اخته الله يذب عليَّ بس الشاخطين.
هز ايده وطلع معصب راگع الباب وراه حيل وانوب اسمع بس طگه القفل ضليت وحدي هنا ما اهتميت ما دام رايح يرجعها
گمت بصعوبه أكو مراية طويله صايرة على الحايط باوعت لروحي انصدمت ملابسي متشگگه حرفياً وكلهن دم يابس على طين على تراب.
وجهي ازرگ من الضربات بس اكو سترة سودة ملفلفه بيها ساترتني ما مخليه شيء يبين مني مالت هذا الرجال؟
هسه شسوي شلون ابقى هيچ وهنا چنت واكفه بس جسمي كلش ثكيل خطيت خطوة ورا وشمرت الستره بعيد
چنت خايفة رحت للباب اتأكد كل شيء مقفول بديت افتر بالبيت ما افتش بس احاول الهي افكاري.
لحظات ورجعت اگعد اخذني التعب يمي بطل الماي سحبته شربت منه ورجعته ايدي ترجف احس صارلي قرن ما شاربه سوده عليه تَسنيم شربت اكلت هسه؟
گاعدة بمكاني عيوني نص مفتحه ونص مغمضه افكاري تجيبني وتاخذني چنت احس جسمي متوسخ تراب دم اختنكت حسيت روحي تريد تفر.
گمت بصعوبه امشي شوي وارجع اگعد فتحت باب وحدة من الغرف بس ما كدرت ادخل
وگفت على العتبة اجتني رعشه اني هسه شفته وهسه صحيت ولگيت روحي ببيته شلون هيچ اخذت راحتي وراح اسبح بحمامه هم؟
بس قابل ابقى هيچ كلي دم حتى لعبت روحي مني فتحت الباب بهدوء ودخلت عيوني تدور على الحمام فتحت باب صاير بنهاية الغرفة.
دفعته ودخلت عيوني ثبتت على الرف مناشف مطويه، شامبو رجالي صابون مربعات لونه ابيض كله جديد ومابي أثر استعمال
حسيت نفسي اختنگ من فكرة اسبح ببيت رجال غريب وما اعرفه دخلت بهدوء وسديت الباب وراي.
فتحت الدوش نزل الماي على راسي ونزل وياه كل لحظة عذاب مريت بيها كل صرخه انبلعت واني اسكت.
سحبت صابونه من الرف جديده فتحتها ريحتها رجالية ما اهتميت اريد بس انضف روحي من ريحتهم غسلت جسمي وغسلت راسي اكو منشفه جديده هم.
لفيت روحي بيها بتعب وطلعت كل خطوة اخطيها احس عظامي يصلن عليَّ وگفت صافنه عبالك استوعبت هسه شنو البس انوب ياربي شلون ما فكرت بيها.
اتقربت اكثر وفتحت واحد من بواب الكنتور اول ما فتحته كفختني ريحه العطر القوي لگيت ملابس رجالية مسفطه بترتيب تشيرتات كبار وبناطير هواي كل شيء مسفط ومعلگ بعناية.
بدون تفكير سحبت تشيريت من عدهن رمادي طويل لبسته وصل لركبتي وشعري لفيته بالمنشفه رحت على السريع للحمام غسلت ملابسي وعلگتهن واگفه گبالهن كل عقلي انتضرهن ينشفن شينشفهن هسه.
رجعت گعدت بمكاني وشعري بعده مبلل ضامة نفسي وگاعدة كل دقيقة اكول هسه يرجع ويجيبلي تَسنيم گلبي يركض اسرع من الوقت.
فجأة حسيت بصوت القفل مال الباب ينفتح وگف گلبي هوَ رجع؟
چنت دافرك بيدي هسه جاي اگوم حاولت اگعد عدل بس ما لحكت الباب اندفع حيل ودخل رجال ثاني غير هذاك وشايل بأيده علاگه يدندن ما منتبه الي.
رفع راسه عليَّ مصدوم واني بعدني گاعده واليخزي اكثر بهالتشيريت! اتمنيت اتبخر واختفي من گباله هوَ رمقني بنظرة ودنگ وكال.
: - استغفر الله يمعوده منو انتِ؟ الله يطيح حظك يالمَوتور ما وراك بس المصايب وطياح الحظ.
اني اخترعت عرفته فكر بيه غير تفكير هزيت راسي بنفي واحچي بدون تفكير بنفس واحد
: - لا تفهم غلط اقسم بالله مادري التشيريت مو إلى اني بس چنت اسبح والله العظيم!
رفع حاجبه وگال بأستغراب
: - يعني چنتي تسبحين بتشيرتج؟
: - لا يعني مو تشيرتي بس. يعني هذا إلى لگيته وترا اني ما شايفة رجال صار شهر!
هزيت راسي مغمضه عيوني عرفت روحي ضليت امسلت ضحك بصوت عالي وصوت ضحكته يرن رن بالبيت
: - انا ما شايف مخلوقة تبرر بهالسرعه قبل لا اسأل.
: - اني ما چنت ناويه اسبح ببيتكم بس شفت ملابسي وصخه و كل شيء نظيف هنا ف.
قاطعني وهوَ بعده يضحك ويستغفر
: - خاب هوب منين تطفى هاي ترا مو بمحكمة انتِ انا محراب اخو المَوتور هوَ وداني عليچ اشوفچ ميته عدله ردت انصب عليج بس ما تساعدين.
عگدت حاجبي مستغربة
: - الماطور منو هذا انوب؟
باوعلي يحاول يبلع ضحكته
: - اريد من الله يسمعچ ويشوفج ياهو الماطور.
: - ابو عضلات إلى چان هنا؟
باوعلي حچه متحمس
: - اويلي صار بيها عضلات اي هوه.
: - راح يرجعلي اختي شتگول يرجعها؟
: - ما دام گلج يرجعها هاي هيه يعني يرجعها لاتخافين.
دنگت عيني مستحيه بنفسي الگاع تنطم وتبلعني على الوضع الاني بي ما اعرف ليش هيج جاي يصير بيه ضليت مدنگه واللعب بخيط بالگاع ما ادري هوَ وينه گال.
محراب: يبنيه.
رفعت راسي اباوعله گاعد على الكاونتر ويمه العلاگه بس باوعتله شمرها عليَّ بخفة وگال.
: - الموتور وداني اشتريلج ملابس تلبسينهن هاج البسي بگته من اختي ترا وجديد ما ملبوس خاف انتِ من امهات الأيع.
مدنگ عينه ما يباوعلي ويحچي فتحت العلاگه طلعت منه ثوب وردي وبي اصفر خفيف وبعلامته هم وانزاح مني ولا ابقة بتشيريت هل زلمة حتى عيب شيگولون عليَّ.
رحت للغرفه بدون ما احچي قفلت الباب واتأكدت منه انقفل وبدلت همزين على گدي فيت طلعت وگلبي نار اريد بس ينطوني خبر عليها.
لگيت المَوتور واخو گاعدين بالگاع يسولفون مدري بشنو وگدامهم صينيه مال اكل مبين جاهز احتاريت شسوي وين اروح هسه؟
درت وجهي اريد ارجع احبس روحي بين ما يطلعون عاد وصاحني
المَوتور: تعالي وين.
التفتت مستحيه من روحي ومن الوضع الأني بي
: - ها؟
المَوتور: شنو اسمچ انتِ؟
: - سَنابل اسمي.
المَوتور: تعالي اكلي سَنابل وجهج اصفر.
سَنابل: اختي ما لگيتها؟
المَوتور: ما اكلچ الا تجين تاكلين.
محراب: احممم.
طگه على ضهره حيل من يمي ضهري وجعني ويگله
المَوتور: وشحط الشحطك.
ضليت واگفه بمكاني محتارة
المَوتور: يابه دتعالي شني السالفه جاي تاخذين خيرة.
هزيت راسي بخفة ورحت گعدت بنهاية الصينيه ما إلى نفس اكل بس حتى يگلي أي شيء يريح گلبي يخصها.
بقيت اكل گوة وعلى كيفي وهمه يسولفون بمواضيع مختلفة وهذا الماطور ما شاء الله لسانه بس غلط انوب ينتبهلي ويسكت يغير السالفة.
اباوعله سوه لفة صغيرة مال دجاج وقدمها إلى بدون لا يباوعلي اخذتها بتردد ايدي ترجف ما جاي اگدر اكل عدل قاطعت كلامهم.
سَنابل: شوكت تگلي اختي وين؟
المَوتور: كملي اكلج.
محراب: اختج ترجعلج يعني ترجعلج.
دنگت ماريد اسمع اكثر لان راح ابجي وماحب ابجي كدام احد وهذولي يبچوني گوة.
صفنت على روحي گاعدة بين ثنين زلم واكل وياهم بصينيه وحده بس من اگول زلم همه فعلاً زلم ما اعرف همه فعلاً هيج لو اني هيچ احس لان أملي متعلگ بيهم.
المَوتور: باوعي.
رفعتله راسي والدمعه متعلگه برموشي يباوعلي بنظرة ما عرفت افسرها
سَنابل: ها؟
المَوتور: اختچ ما موجودة وي البنات إلى طلعناهن.
مَياسة.
رجاح: چا خوش اسمع عزمت الناس حتى عشيرتنا كلها تدري انا مسامح عمك فداء واليوم جايب عائلته وراجع من بغداد وراجع يعيش بيناتنه.
نطق هل كلمات وكلهم فتحوا عيونهم على وسعها مصدومين واحنه هم انصدمنه من شوكت عدنه عم وليش ما نعرف بي وليش زعلان من عدنه اصلاً وين چان الاسئله ترست راسنا.
ضلينه وحده تباوع للثانيه بصدمه وهذا اتخبل
المَوتور: تتصرف بكيفك انتَ ياهو كلك تررررجعه عايزنه طياح حظ كافي علينه انتَ وفواينك تجيبلنه نسخه منك احررگه گبالك احرگه.
مُهران: اصبر هي خلي نفتهم ليش قبلت يرجع شني الأستجد مو چنت تشوف دم سنونك ولا تشوفه؟
جدي يباوعلهم بدون اهتمام فر سبحته وگاللهم ببرود
رجاح: صوتكم ما اسمعه لا تهرجونه عمكم بيته وحلاله كله غادي تراب نايمين ومحترك البيت بيهم ما اعرفن شلون وگوة الناس مطلعينهم من الموت وضالين مهجهجين بالشوارع خابروني يگلولي ابنك فداء دايح ماعنده مكان ينام بي انا الشيخ رجاح الأستر بالناس الناس تجي تكلي ابنك دايح بالشوارع تردون اصير علچ بحلوگ الوادم؟
وهذا متخبل يحچي بحرگه
المَوتور: انتَ شيخ؟ مقتنع بروحك شيخ خاب بدجاجه ما اسرحك وعلى شيخ على الكاولية ما اخليك تريد تجيب هيچ ناس سگط للبيت مو بكيفك اطردهم بس يجون وعينك تشوف.
عدل عگاله وضرب عوچيته بالگاع بعصبيه وصاح
رجاح: البيت بيتي وانه اقرر منو يفوت ومنو يطلع وفداء يرجع بيناتنه وعينك تشوف غصباً على خشمك يرجع.
مُهران: مخبل صاحي انتَ تريد نستقبله ببيتنا هوَ وعائلته الفيطي شلون نأمن على اهلنا واحنه نعرف سوالفه انتَ مقتنع؟
رجاح: اي مقتنع وراح يوصلون وحلگگم ما تفكونه غلطة وصارت سبحانه المايغلط شني انبياء احنه.
المَوتور: سهله تتدلل.
شال اصبعه يهدد ويخزر بي
رجاح: اذا سويتلك سالفه ما تلوم الا نفسك الوادم على جيه دير بالك تفشلني ترا انتَ اكثر واحد تدري شسوي.
هز راسه يحچي مستهزء يلعب بلحيته
المَوتور: وسفه شيخي فوت بزودك ما افشلك انا.
فجأة سمعنا اصوات هواي برا عرفنه اجو من اصواتهم واصوات السلام برا الزلم دخلوا بالديوان والنسوان دخلن جوه متجهات للصالة بعدهن بالحديقة نزعن شحاطاتهن جاي يدخلن وصارو بوجههن الولد
جاي يطلعون سلموا شلون ما چان وطلعوا.
اتوافدت الناس وانترس البيت ترس ضهرنا انكسر من الچاي والماي والفره اجن النسوان للمطبخ وبدن يصبن بالأكل اكثر شيء لَيال وبيبي انكربن صبينا بالصواني الكبار وسوينا تشريب و كل شيء.
وگفت احضر اللبن والگلاصات والمي دخل محراب يصيح
محراب: يا الله.
دخل وعينه ما صدت على وحده بيهن ابد صارت عينه عليه وگال بهمس
محراب: صايره معدله اليوم ميسو.
مَياسة: چا شعبالك مرة حوك اني بس انتم ما تقدرون النعمة كمل كل شيء بعد بس تاخذونه صيحلهم خلي يشيلون وياك.
محرَاب: اويلي ما عرفتچ عاشت ايدج.
ربيعة: شني يمه بس هيه اشتغلت وعاشت ايدها واحنه مو محموسين هنا والبنيات كلهن يشتغلن عين الله عليهن.
باوعلها رافع حاجبه متفاجئ من نبرتها غمزتله وهوَّ ابتسم فاهمني وجاوبها
محرَاب: لا خالو مو بنياتنه ما متعودات على التعب وينهن وين الشغل.
ربيعة: اي بعد حطهن وهفي عليهن.
باوعتلها خازرتها متنرفزه منها شهالحشرية إلى بيها اتمنيتها مو مرة جبيرة ورجليها بالگبر باوعلي خازرني ويعض شفته بمعنى
لا تحجين.
مَياسة: خاله انتِ ليش ضايجه هسه خاف غرتي وتريدين واحد يهفي عليچ و.
قاطعني من طيح الگلاص بالگاع وانكسر وهوَ يصيح
محراب: اخ ولچ طبت گزازة برجلي راح اموتن.
باوعتله متنرفزه متخوصرة ادري بي جذاب وهو يباوعلي ويغمز انوب يخزرني عود يحاول يصير عصبي بس ما يگدر سمعنا صوت صياح قوي برا واجه طفل يركض يكول لمحراب.
: - الحگ بيت عمك اجو والمَوتور كتلهم دمهم ترس الشارع.
ركض طالع بره بسرعه واني طلعت وراه بلا شعور وهنه هم طلعن يركضن وبيبي تمشي گدامنه وتطگ بعوجيتها بالگاع وتگول النه.
نبعة: امشن ارجعن طبن جوه لا يشوفونجن.
بس وسفه اني اطب وماعرف شنو صاير؟
الحديقة فارغه تصوي كلهم بره بس احنه ترسناها الباب مفتوح خفيف ومطلعات بس عيونهن يريدن يشوفن دحست روحي بنصهن وطبيت شلون من اقاتل حتى الزم شباچ الحسين هنا نفس الشيء.
وصلت مختنگه وهنه بس يخرطن بخدودهن ويصيحن بس محد يسمعهن انصدمت وانصعقت بالمنظر.
المَوتور نايم فوگ واحد ما شايفته وطايحله كتل وين اليوجعك وجهه ما ينشاف من الدم ويگومونه منه يرجع للزلمه إلى بصفه يطگ بي كلهم يسحلون بي وما كادريله.
وجدي واگف متفرج وجهه احمر دم متفشل من الناس لحد ما مُهران سحب المَوتور حيل طگه راشدي يريده يصحه ولزمة من ياخه قميصه يهمس بأذنه ماعرف شنو والولد صاير جنازة بالگاع.
والشيوخ تتهامس بيناتهم ونص منهم يفرغون بيهم لحد ما اجه محراب عيونه صايرات بگصته عاط بينه.
محراب: طبن جوة لا افگس عيونچن.
گالها ودفعنا قوي وسد الباب حيل احنه هم رجعنا دخلنا جوه وبيبي تلوب تلوب گلبها النار وهذني يزيدن عليها.
ربيعة: ولدچ واحفادهم يتكاتلون ينبعة گرة عينج وعين الشيخ عود مسوين عزيمة گلنا اتصالحوا طلعتوا مسوينها تكتلونه بيها.
نبعة: ربيعة احنه بمشكله لو تحچين حچايه بيها غير لو تسدين مجبوحج!
هيه سكتت بس عيونها تتطافر ما حجت بعد وبيبي فايره تريد بس تلوح واحد منهم ويحچيلها شنو صاير مرت نص ساعه واحنه على نفس الگعده لحد ما دخلوا مُرتاد ومحراب ياخذون العشى.
مبين الوضع هدء يعني رحت للمطبخ لگيت دُجى وليال هناك يصبن وينطن الهم ينگلون بي.
مُرتاد: ميمي لوزة اكلت وينها شو ما اشوفنها.
مَياسة: اكلت العصر ما قبلت تتعشى ونامت من تگعد اعشيها معليك.
ابتسم ساكت يهز راسه
محراب: الله شوكت تصير عندي بنية مثل لوزة تنگرط وهيچ تتلگاني وتگلي بابا احبك وتتنعوص عليَّ بويه اموت وعلى ما اتحمل.
يحجي متسرسح عبالك جاي يشوف احلامه گدامه واحنه نضحك عليَّ
دُجى: چا اتزوج يلا.
جاوبها ويباوعله يهز بأيده
مُرتاد: شبيچ ياهيَ تقبل بي شو طگه ونص الياخذها تشرد بليلة ضلمه.
مسح على لحيته وحچه مبتسم
محراب: خاب انا گلبي قافل على وحده لو اخذها لو اضل طول عمري بلا مرة.
فكينا عيوننا مصدومين واحد يباوع للثاني باوعله مُرتاد مضيگ عيونه ويگله بصدمة
مُرتاد: عليك على عاشگ صدگ؟
وهو يحچي ذايب وولهان
محراب: عاشگ طاريها وميت بتفاصيلها.
مُرتاد: منيه هاي؟
محراب: عيب عليك شايفني گرن حتى احجي بعرضي وابو فاضل اجي اطيح حظك حيوان ساقط.
يحچي معصب منفعل واحنه واحد يباوع للثاني گوة بالعين الضحكه احنه صايرين بنهاية المطبخ اني ودُجى ومحراب ومرتاد والباقيات بيبي والنسوان بالبداية يعني ما يسمعوننا شنو نحچي.
مُرتاد: ومرض المرضك ومرضها وين ماشوفها اتفل بوجهها مو تگول ما كتلك.
خزره ويحچي متوعد
محراب: اذا ما اجيبها واحطها هنا واخليك تكلها تاج راسي سهله.
هز راسه مأيس
مُرتاد: انتَ واصل مرحله ما تفيد بعد انتهيت.
ضلوا يتداهرون واني ودُجى نضحك عليهم صاحت بيهم بيبي لان نسوا الاكل والتهوا يسولفون بعشگ محراب اخذوا الاكل كله وسدوا الباب حتى خاف احد يطلع يغسل ما نبين.
وبدينا نصب للنسوان اخذت السفره فرشتها وهنه يصبن رجعت لگيتهن مكملات خليت قوري الچاي الچبير على النار ونصيته ورحت اشوف بيبي خاف محتاجه شيء وهيَ تگلي.
نبعة: تعاي اكليلج لگمه خويتي من الفره.
عاد اني ما گلت باطل رحت گعدت بصفها لان چنت ميته من الجوع ودُجى گعدت بصفي وليال انضمت للمجموعه والبنات گدامنا ووياهن رواء يتبسبسن ويضحكن بصوت عالي.
ما اهتميت اتسرفنت وشمرت الخاشوگه احب اكل هذا الأكل بأيدي ودُجى وليال يضحكن يصورن بيه اني ممهتمه اشيل اللگمه بأيدي واكل متلذذه.
دُجى: وعلى اشهرچ شهيره اليوم.
مَياسة: عاد والله لگيتيني استحي اصلاً اني اشهر روحي.
ليال: وجهه نظر.
بقيت اكل لحد ما شبعت وگمت اغسل طفيت الجاي وحضرت الأستكاين وخليت شكر وخواشيگ وعفته الهن هنه يصبن لان احس ضهري انقسم بالنص هسه اني والله ما مشتغله هواي بس الفرة هم تتعبني.
رحت لغرفتي وسديتها ما همني احد برا اني نيتي بس ارتاح شوي ما ادري شلون نمت بس فزيت على صوت صياح كلش قوي اريد اللوح الباب ما اگدر.
رحت للأستقبال وانصدمت بالمنظر بنات ثنين گاعدات على التخم لابسات فساتين لا تستر ولا تدفي.
ويمهن امهن وكلهن دموعهن على خدهن وببداية الصالة واگف المَوتور متكتف ومنتچي يباوع للكل بقرف احسه يسب بينا بگلبه
وجدي ويمه ولد شاب يشبه ولدنا ورجال يشبه عمامي بس ملابسهم مختلفة إلى فهمته هذا عمي وهذا ابنه.
صارت عيني على مُرتاد گاعد على صفحه وحاضن لوزة بس شافني أشرلي بمعنى تعالي ما اهتميت الأحد رحت دحست روحي يمه من هذيج الصفحه ولوزة من صفحه باس راسي ويگلي.
مُرتاد: بويه بنيتي ليش نايمه مريضه شني؟
لوزة ؛ لا منيلها مريضه جنها حصان.
مَياسة: خايبة ام كرون هذني كرونج اجي اهلسهن هسه الغيورة.
لوزة: يلا فنج اذا انتِ مرة مدي ايدج.
ضحك يبوسها ويحاچيها
مُرتاد: بابا انتِ راضعه صلافة بصغرج؟
لوزة: لا سم الحيه.
گالتها وضحكت وضمت روحها بحضنه وهو يضحك على ضحكتها مكيف ناسيهم كلهم قطع ضحكتنا صوت جدي
رجاح: المشتمل إلى برا هذا من اليوم العمكم وعائلته سمعتوا لا احد يوصله بعد.
المَوتور: لا ليش حرامات ردته يعيش بيناتنه وين مطفرة انتَ.
رجاح: اسكت حسك ما اسمعه عبالك إلى سويته اليوم اعبره الك ويمر مرور الكرام؟ ولك سودت وجهي وفشلتني خليتني مضحكه لليسوى والمايسوى خليتهم يگولون الشيخ رجاح ما يگدر يگض حفيده راح اندمك وراح تشوف.
المَوتور: اعلى ما بخيلك اركبه شيخ.
يحجي بكل برود وجدي يشيل روحها ويرگعها باوعت للولد إلى گاعد إلى يگلوله أسعد يباوعلي خطف ضميت روحي بحضن مُرتاد اكثر ما ادري ليش ما مرتاحتلهم ابد شكلهم مو راحه.
مُهران اخذ المَوتور وصعدوا فوگ حتى لا تعلگ صعدوا عايفين جدي صاعد ضغطه وراهم وتهاني اخذت دُجى وصعدت هم
بعد هواي كلام وهواي تبسبس بين عمي الجديد وجدي وابوي گام وأشر لعائلته بمعنى تعالوا وطلعوا رايحين للمشتمل إلى بره هسه يالله اتنفست.
مُرتاد: روحي كملي نومتج.
مَياسة: لا وين هسه گعدت شينومني بعد.
هز راسه وصعد فوگ لاحگهم وبيبي تصيح عليَّ
نبعة: ولج روحي اسگي الزرعات اتوسل بيج؟
مَياسة: بيبي ما بيه حيل الصبح والله.
نبعة: لا شو اله هسه.
بعد بيبي وحجت حچاية نفخت بملل وگمت فتحت الباب وطلعت بالحديقة الهوى يداعب خدودي مشيت على الثيل بخفة ماكو صوت البيت هدوء كلهم خانسين بس ضوه القمر يعكس على الزرعات شكلت صونده المي وفتحتها وبديت اسگي بيهن دنگت اشم الورد اموت على ريحته فجأة سمعت صوت غريب وراي يهمس.
: - اوف ورد يشم ورد.
ميرار.
: - اثبتي بمكانچ لا اخسرچ حياتچ.
جمدت بمكاني حرفياً النفس نسى شلون يطلع مني دموعي متعلگه برموشي رفعت راسي ببطئ كل شيء چان يدور بيه بهذيج اللحظة ودگات گلبي تنسمع.
ميرار: منو انتَ؟
: - مو انا إلى المفرض اسأل هل سؤال؟
گالها ونزل جاي بأتجاهي واني تذبحوني قطرة دم ما تلگون بيه بلعت ريگي بخوف وهوَ صار گبالي ما لابس تشيريت وجسمه متروس جروح هوَ ووجهه دنگت عيني هسه شلون لا يخليني ابقى ولا يخليني اروح.
: - خليني اطلع عفيه.
گلتها صوتي يرجف باوعلي من فوگ ليجوة وگال
: - وين تروحين دنيا الليل مخبله غير ينهشون لحمج الموجودين برا هسه شجابج هنا ما تكليلي.
: - شسوي لعد؟
: - ابقي هنا والصبح اتوكلي منا شوفي راح اسويها لوجه الله اذا طلعتي منا وگلتي شفتي احد هنا اعتبريني گتالج ولو تطيرين للسما هم الگفج.
: - لا لا والله ما احچي بس يطلع الضوه ما تشوفني بعد.
: - وهذا الأحسن إلى و الج.
بقيت واگفه جامدة بمكاني ما ادري شنو اسوي هوَ بقى يباوعلي انوب راح گعد بالغرفة إلى چنت بيها الباب مفتوح راح اتمدد بس احسه قلق.
گعدت بالگاع وبگلبي نار اريد بس الضوه يطلع واطفر بريشاتي منا بس المشكلة وين أروح؟
اني گاعده مقابيل الغرفة وضامه رجليه لصدري وهوَ متمدد ومخلي ايده جوه حنچه يباوعلي مضيگ عيونه وترني گلي.
: - منين انتِ؟
ضميت روحي أكثر حسيت اريد ادخل بالحايط
: - من بغداد مو منا.
: - وشجابج لمكان مثل هذا؟
: - مو هذا واحد ماعنده غيرة ركض وراي يتحرش بيه رگعته بطابوگه على راسه وراسه ضل ينزف عفته ميت مدري عايش بس ختلت هنا لان ماعندي غير مكان.
باوعلي فاتح حلگه صافن
: - عليچ الله؟
بلعت ريگي اباوعله
: - اي والله مداجذب عليك.
كتف اديه الصدرة وصافن مثل اليفكر
: - يعني هسه ثنينا مجرمين هنا ها؟
اخذني الواهس ارتاحيتله زايد يمكن حچيت بلا وعي
ميرار: هسه مو سولفتلك جريمتي سولفلي جريمتك.
هز راسه لا
: - لا جريمتي ما تنحچي صعبه.
ميرار: يعني مجرم صدگ؟
: - اي مجرم صدگ چا انتِ شني ام صالون شو هم مجرمه مو نومتي طابوگه براس الفرخ ومات لو حلال عليج وحرام على والله يا الله.
: - ما مات ماكو صوت فاتحه صوت صريخ چا شنو ميت الهم چلب.
: - هوه هم چلب ماكو فرق.
سكتت وهوَ هم سكت حسيت بي عيونه تغمض وتفتح يريد يغفى بس متماسك گام وگف يفرك بوجهه وينكث براسه وعيونه حمر دم راح ما ادري وين.
رجع لازم بأيده لفات ثنين ما اعرف مال شنو وثنين بطاله مي جاب علاكه فرشها گبالي مخليهن عليها واتربع گدامي ضليت متجمده وهوَ يگلي.
: - اكلي لج ترا مو لسواد عيونچ بس حتى ما تفضحيني من تطلعين منا يغزر بيچ بلكي.
: - والله ما افضحك شبيك انتَ مبين خوش رجال مو مجرم صدگ من وجهك.
باوعلي ضايج حسيته اتندم لان جابلي
: - اي اطرد عيون.
: - هههههه اي اي واضح وين اكو مجرم ينطيني مي ولفه.
هز ايده حاير شيحچي شال اللفه مخليها بأيدي واني منا ميته من الجوع أكلتها چانت لفة خيار بس حسيتها افخم اكله بعالم بهذيج الساعه.
وهو سواها لگمه وحده اكلها وشرب بطل الماي وگام گاعد گبالي ومدد رجلي كل ما تصد عيني على صدره تكش روحي اكو جروح بعدهن مفتوحات يخوفن.
: - ترا تگدر تنام عادي ما افضحك ما اطلع والله اصلاً اخاف.
فرك عيونه بتعب ويگلي
: - وين راح تروحين من تطلعين منا؟
: - ما ادري الله يحلها بس راح اطلع من كربلاء.
ضل ساكت يهز راسه
: - طالع من كربلاء انا بس يطلع الضوه تروحين اوصلج وين ما رايحه.
: - يمه وين؟ اكلك لا ياخذك الواهس ترا اني ما صارلي ساعه من عرفتك شدعوه واثق راح اثق بيك واروح وياك.
شال اديه ثنينهن صفگهن وغماني ويحچي متنرفز
: - خاب الغبره وعلى اذا اكوملج احسن تضلين دايحه بالشوارع؟
باوعتله مستغربه نرفزني
: - احترم نفسك انتَ الدايح.
: - ثنينا ماكو فرق شسمج انتِ؟
: - ميرار.
: - طلاسم مو اسم.
: - وانتَ؟
: - خنجر.
: - ضيجه خلگ مو اسم.
هز ايده معصب
: - شيسوي بيج الله بعد.
: - مثل ما يسوي بيك.
: - صوجي انطيتچ لفتي ما تستاهلين.
انتچيت مخليه راسي على الحايط حايره فكرة تجيبني وفكرة تاخذني دموعي ينزلن وامسحهن ما اسيطر عليهن نسيت كل شيء حتى وجودة نسيته
اسمع بس صوت الچلاب تنبح برا وصوت الصراصر تارس البيت واضم روحي بخوف.
رفع راسه من فراشه يباوعلي بعيون حمر
خنجر: بعدج مُصرة تبقين؟ وين تروحين انتِ هنا وخايفة عبالچ الحياة سهله والله العظيم لو بيدي چان عفتج ورحت بس تضيعين!
انتِ بنية وبعدچ ببداية عمرج حرامات تضيعين روحج واذا بقيتي بالشوارع تضيعين خليچ وياي ع الأقل اطلعج من هنا.
باوعتله ساكته گلبي يريد يطلع من مكانه ودموعي ما اسيطر عليهن منو هذا وشنو يريد مني لو فعلاً هوَ خوش واحد ليش عايش هنا بهالخراب واذا مجرم ليش مخليني عايشه اصلاً ويريد يساعدني!
جاوبته بهمس صوتي يرجف
: - افهمني ما اگدر شلون اثق بيك؟ انتَ بلسانك جاي تگول انتَ مجرم شلون أمن روحي وي مجرم انتَ گلي اضيع روحي فوگ ضياعي؟
ابتسم ابتسامه خفيفة وگام للزاويه سحب جنطته
خنجر: هذا اسمي وشغلي قبل لا تنگلب احوالي.
شمر الهويه عليَّ ويگول
: - چان عندي اهل شغل بيت وحبيبة تنتضرني ارجع وتحبني بس كل شيء راح بيوم ومن يومها انا ادور على طريقة ارجع بيها انسان.
انا اساعد كل شخص يطلع بدربي علمود اكفر عن ذنوبي واغلاطي يعني مو بس انتِ وثقي بالله بس أمن عليج ما تشوفيني بعد.
: - ليش تحچي چنك تعرفني وليش يهمك اطلع؟
: - خاب شلون راح ارگعها جا شجاي امسلت صارلي ساعه مطي متمدد براسچ انتِ؟
: - لا تصيح عليه لا اصيح عليك.
: - اشمرج يم الجلاب بره خطيه جوعانات.
نزلت عيني على الهويه رجعت شمرتها على وضميت ركبي لصدري من جديد احس كل شيء جاي يضغط عليَّ
: - راح يطلع الضوه ما بقى شيء.
: - انا گدامج ما اجبرچ على شيء بس اخذج بمكان أمان والباقي عليچ.
سكتت وضلينا نسمع بس صوت الصراصر يدوي بالمكان جزء بيه يگلي اشردي وجزء يگلي روحي
: - لا تحيرين إلى ترتاحيله سوي ما اجبرچ.
: - زين راح اروح وياك بس لاتحچي ولا تسأل ولا توصلني بس احس تصير نيتك مو خوش انوم الطابوگه براسك مو تگول ما گالت.
فتح عيونه مصدوم وهز ايده
: - شني ماخذتني فصلية؟
باوعتله خايفه وهوَ مبتسم هادء راح لمكانه ومشى بهدوء اتمدد مخلي ايده جوه راسه ومغمض عيونه ضليت اباوعله وهمست بيني وبين نفسي.
: - ما ادري شنو نيته بس ادري ما ضل عندي شيء أخسرة.