رواية أبناء الشنار للكاتبة مراسيل الفصل السادس والأربعون
مُرتاد: اقفلي بيبان الدنيا كلها بوجهي بس باب گلبچ لا تسدينه انا الأعتذر وانا الغلطان بس لا تروحين.
نظراته الچانت تايهه وضايعة خلتني اجمد بمكاني احس بصراع بداخلي اني صدگ ما اعرف شعوري تجاهه وشنو هوَّ احساسي بالضبط بس حيل عزيز عليه واحب وجودة مُرتاد چان الحايط إلى استندت عليَّ من مالت الدنيا بيه خلاف ابوي باوعت لملامحه إلى تباوعلي بضياع وأتذكرت ذيچ السالفة الچانوا يتهامسون بيها.
شلون مرته الأولى غدرت بي وخانته ويَّ ابن عمة ببيته وخلته يمشي ويحچي ويَّ روحه بشنو مقصر وياها وليش هيچ سوت حسيت بغصة بگلبي هسه استوعبت ليش ضل يرجف واتسودن مجرد شافني اسولف ويَّ ابو ناصر وهوَّ رجال جبير ومُرتاد من اول ما عقدنا گلي كل ابتسامة منچ لغيري هيَّ سچينه بخاصرتي.
گلت بگلبي يا بَرائه وين تلگين مثل مُرتاد صح خنگني بغيرته وعصبي وشاخط بس هوَّ الشالني بوكت چنت بي وحيدة هوَّ خوش زلمة وعرفت طبعه ذيب على الغريب ويمي ماكو ألطف منه وحنين هواي أنوب رجعت گلت يجوز ما انطي نفس المشاعر ليش اورطه عايز غدرات هوَّ!
رفعت ايدي بتردد حطيتها على صدرة حسيت بدگات گلبه سريعة حيل عبالك چان بمعركة وخسرها مسحت على قميصه على كيف وگلت.
: - مُرتاد كافي تسوي بروحك هيچ انتَ متأذي واني أنقهر من اشوفك هالشكل گتلك ما عندي مشكلة لو ابقى عمري كلة على ذمتك لان انتَ خوش انسان بس.
لزم أيدي إلى على صدرة وعصرها حيل انوب رفعها على وجهه وحسيت بلحيته الخشنه تلوح جلدي حچه بلهفة.
: - ما راح نتطلگ؟
الكلمة طلعت منه مهزوزة عبالك طفل جاي يسأل عن أهله بعد ضياع چبير عيونه تدور بوجهي تتوسل جواب يطفي النار البضلوعه باوعتله گلبي موجر عليَّ هزيت راسي وهمست.
: - ما نتطلگ بس الأريدة منك تفهمني وتثق بيه هواي.
اول ما نطقت هالكلمة جر نفس طويل حيل نزل راسه حط گصته على چتفي وغمض عيونه وبقى عاصر أيدي على وجهه حچه مخنوگ
: - عبالي صدگ عفتيني عبالي رجعت غريب بَرائه.
اتجمدت بمكاني جسمي كله يرجف خليت ايدي على شعرة وهمست
: - اني يمك.
اول ما لمست شعرة حسيت برجفه سرت بجسمة كله وراسه ثگل على چتفي بأستسلام.
: - لا تعيدينها بعد وراية العباس هديتي حيلي انا ما ادري بروحي هالگد اتعلقت بيچ.
غمضت عيوني حيل والغصة خنگتني واني أحس بمسؤوليته على أچتافي بلعت ريگي وگتله.
: - مُرتاد اني باقيه وياك بس خلي نبقى اصدقاء يعني خلي نبني الثقة وحدة وحدة لا تضغط على گلبي بهواي مشاعر واني بعدني خايفة.
رفع راسه بهدوء يباوعلي عيونه ذبلانه أبتسم وگال
: - اصدقاء، صحبان، رجال ومرته، انا التردينه المسميات ما تهم انتِ يمي صيري التردينه بس لا تصيرين بعيدة انا ربي رزقني بيچ خاطر يداوي جروحي ومستعد انتظر عمر كامل لحد ما گلبچ يگول مُرتاد بنفس لهفة گلبي المهم هسه سدينا باب الشر وماكو محلات بعد.
: - منو گلك ماكو؟
مسح گصته بقلة صبر وگال
: - صارلي ساعه امسلت حتى ما تجيبين طارية راح ارگعچ بالگاع.
: - ها حلو طلعت حقيقتك هيَّ هاي بداية صداقتك مراد؟ توني وافقت ابقى وانتَ تهدد تركعني بالگاع؟
زفر نفس واتقرب مني مرة ثانيه مخليني بين أديه والميز
: - صلافة والله تطلعين الروح ولچ انا ماعرف احچي حبچيات عدل وعصرت گلبي عصر وطلعتلج درر من حلگي خاطر ارضيچ وانتِ بنص هاللحظة العظيمة تذكريني بالمحل؟ وترديني ما ارگعچ بالگاع؟
عقدت حواجبي وگتله
: - اي اذكرك چا اني علموديش ردت اتطلگ؟ احنه صحبان والصاحب المايسند صاحبه امداه.
فتح عينه حيل يباوعلي
: - منووو امداه؟
: - انتَ ساندني اكيد مو عليك جاي اگول الصاحب الماينسد صاحبه بس لا انتَ هيچ خرب لاا حرامات.
ابتعد خطوة وهوَّ يمسح وجهه بأيده بقلة صبر يباوعلي بيأس
: - والله يا صلافة انتِ لا صحبان تصيرلچ ولا زواج يرهم عليچ انتِ يرادلچ كون مستشفى مال مخابيل وانا مديرها.
: - عندك استعداد تخليني ويَّ المخابيل وماتخليني بمحل؟
: - اي چا غير راح احجز غرفة بصفچ لان اذا ابقى على هاي وضعيتي وياچ ما أظن يضل عقل.
باوعتله بحقد وهوَّ مد أيده گرص خشمي مبتسم وگال
: - وحق الزرع غلاتچ بگلبي اصيرلچ السند التحلمين بي بس كون عيونچ ما تلوح غيري المحل يظل مفتوح أحط بي عمال ما ينسد محل ابوچ والرزق هوَّ يجيچ بس أريد وجودچ يمي ما اريد أكثر.
: - ليش حتى تقدملي كل هذا؟
مرر اصابعة على خدي يباوع وين ما يتحركن أصابعه
: - حسيتچ أمان بدنيا ما بيها أمان انتِ مكاني الصح أقدم الچ روحي وعمري كله بس خاطر ما احس بخسارتچ بيوم لان انتهي انا اوعدچ اصيرلچ الزلمة اليرفع راسچ وين ما تحطين جدمچ بس حبيني من گلبچ عادي تحبيني؟
كلماته ونبرة صوته ترن بأذني باوعت لعيونه التلمع وگلت
: - مُرتاد الحب مو دگه باب وتدخل الحب رزق من الله واني ما اگدر اوعدك بشيء بعده ما نابت بگلبي بالصورة الانتَ تتمناها بس اوعدك بشيء ثاني اوعدك ما يلوحك مني غدر ولا يمس كرامتك شيء طول ما انا بذمتك والحب يجوز يجي ويَّ العشرة.
سحب نفس مرتاح يباوعلي مبتسم
: - چا شريد اكثر؟ انا الأصبر وانا الأتاني هالگلب لحد ما يميل صوبي المهم ماكو طلاگ والمهم صلافة تضل تارسه عليَّ الدنيا.
هزيت ايدي وگلت
: - حرامات عود سويت كيكه طلاگنا.
عگد حواجبه ابتعد مني شوية يباوع للكيكه بحقد فجأة رخت عقدة حواجبه يأشر بأصبعه.
: - هذا مو حرفي شيسوي هنا؟ انوب لاعبه بي فلك المفلوكه چا حتى بالكيكه معاديتني ولج شنو انتِ.
ابتسمت وجريت سچينه من على الكاونتر گصيت قطعه وخليتها بصحن وحطيت شوكه وقدمتها اله مكسور گلبي.
: - اي كتبت حرفك اتذكرتك گلت حرامات سويت كيك ومُرتاد ماكو ياكله هاك اكل وجهك يكسر الخاطر تعبان.
اخذ الصحن من ايدي وانتچه على الكاونتر ياكل ويحچي حلكه متروس يهز براسه متلذذ انوب گال بشك
: - احسچ تگولين اكلها احسن ما نذبها للچلاب؟
: - والله مو صوجك اني صدگ انقهرت لان مبين ما ماكل عيب اذبها للچلاب شهالحچي انتَ أولى.
احچي وهوَّ حتى اللكمة جمدت بحلكه ردت الزگ السالفة گتله
: - قصدي عيب اكلها لوحدي وانتَ تحبها.
غص باللكمة يباوعلي بطرف عينه وعاف الصحن على الميز
: - صلافة لو ما طعمها ما يتفوت چا لبست الصحن براسچ بس سهله.
باوعلي ضايج اتقرب شويه وبحركه ما اتوقعتها لزمني من خصري بأديه الأثنين فزيت خليت اديه على چتفه بسرعه شالني حطني على الميز وگعد هوَّ بالكرسي الگبالي صار مستواي أعلى منه بشويه حچيت معصبه.
: - اگلك انتَ شمالك متسودن اليوم چنك؟
اهتزت اچتافه يضحك وعض شفته وهوَّ يباوعلي من جوة ليفوگ عاجبه المكان المگعدني بي انتچه على الكرسي رفع حاجبه وگال.
: - متسودن يا صاحبتي العزيزة، ضلي هنا خليني اشوف طولچ ولسانچ الأطول منه بشبر وانا أكل.
من نظرته احس استوعبت طفرت من الميز بسرعه أصيح
: - حجابي خرب نسيته حجابي
مسح طرف شفته بأيده يضحك وگام من الكرسي يريد بس يسد حلگي واني مخليه أديه على راسي اريد اطلع من المطبخ اروح البس.
قطع طريقي واني متخبله شلون نسيت
: - ولك حجابي خرب شگد ما عندك اخلاق دور وجهك
: - مو گتلچ أشتريلچ قفل اله ما ذكرتيني
: - ولك...
بعدني ما مكمله كلمتي وحط ايده على حلكي مخليني بين جسمه والحايط وجهه قريب من وجهي وعيونه بعيوني خزرته
: - أفگسهن اذا باوعلي هيچ.
عضيت أيده إلى على حلگي حيل وهوَّ حتى ما رمش
عينه بعيني مبتسم ويهمس
: - عضي بعد أقوى طلعي الأستجلاب البداخلچ.
شلت اديه ثنينهن دفعته من صدرة حيل
: - چا شعندك تريد تتزوجني اذا ما عاجبك
: - عاجبني، راح افرك حلگچ أعرفچ تردين بس تگولين طلگني.
: - أمداني اذا ذكرتك بالكيكه بعد صدك أمداني.
ابتعد مني يعدل بقميصه انوب باوع لمكان العضه صاير أثر
: - عضاضة مو بت.
درت وجهي منه ضايجه التهيت الملم بالمطبخ حتى حجابي نسيته گلت بعد هوَّ اني رضيت اضل على ذمته لشوكت ابقى خانگه روحي ومتقيده شويه وگال.
: - رايح صلافة نامي انتِ لا تسهرين.
درت وجهي عليَّ بسرعه
: - الوكت متأخر چا وين رايح ما تنام هنا؟
: - انتِ ترديني اضل؟
: - لا، هيله تريد هيچ هيَّ تگلي اذا اجه بوكت متأخر لا تخلينه يروح لا يسوي حادث بالليل.
: - هذا الچذب، والصدگ؟
رفعت اكتافي ما ادري
: - روح شعليه بيك هسه اني.
هوَّ واگف يم الباب منتچي على الحايط مكتف ادي الصدرة يباوعلي مبتسم ما يرمش واني گبالة والمطبخ ضواه خفيف حيل أظن اذا شافتنه هيله هسه تطيح حظنا بعدني أفكر بيها وما حسينا أله الضوه القوي مال المطبخ اشتغل وهيله نظراتها تفتر علينا بصدمة عوجيتها بأيدها.
هيله: ياع ولكم صخام الصخمني شجاي تسوون؟
مُرتاد بسرعه دنگ يخفي ضحكته انوب باوعلها وگال
: - رجال ومرته جاي ياكلون كيك هيله شعليچ؟
هيله: ولك انتَ مو زعلان؟
باوعلي و رجع باوعلها وگال
مُرتاد: اليراضونه ما يضل زعلان يمة.
هيَّ باوعتلي واني صحت
: - ما راضيته اني معليه!
رفع أدي مستسلم وگلها
: - خابرتني تگلي سويتلك كيك يلوگ الهالحلگ تعال اراضيك انا مالي شغل بعد.
فتحت عيني بصدمة على جذبته وهيَّ گالت ما عاجبها
: - چا وانتَ هيچ رايدلك دفعة بسرعة أجيت انا گلت على هاي عصبيته وشوطته بعد ما يباوع لوجهه.
: - چا جنچ ما تدرين كل قوي اذا السالفة وصلت گلبه يلين.
هيله: خلتك تجيها بنص الليل وهيَّ دايسة ببطنك چنك مسلمها يمُرتاد
مُرتاد: شتشوفين؟
احس اريد اتبخر من گبالهم وهيَّ بعد سكوت قصير رجعت گالتله
: - وشنو نيتك؟
مُرتاد: اظن واضح نيتي أخليها تضل بذمتي كل العمر
هيله: وهيَّ راضيه؟
باوعولي ثنينهم واني دنگت العب بأضافري
اسوي روحي ملتهيه وهوَّ گلها
: - متقبله.
هيله: عوزها ما تتقبل وين تلگه مثلك؟
رفعت راسي باوعتلها بضوجه وهمست
: - هيله اذا تردينه اخذي انتِ من هسه حاطه عينچ.
باوعتلي بصدمة وهوَّ ضحك وصاح
: - بداية خير إن شاء الله.
هيله: خايبة باعي اذا گلبتي عليه وعلى يبريئه أفصم راسچ
بَرائه: اخلي حتى بوجهج ما يباوع بعد بس أنطيني درب.
هيله: مو وجه نعمة، طلگها انتَ يلا.
مُرتاد: صدگ چذب، على گولة محرَاب لو يگلولي هذاك جدك العزيز يرجع يعيش ما أطلگها.
هيله: الله يرحمة برحمته الواسعة مبين شگد زارع خير بيكم.
صفن شوي انوب هز راسه اي
: - اووو شحچيلچ اذا حجيت بي لباچر ما أگضي.
هيله: تعال نگعد شويه خاب انا طار من عيني النوم.
هز راسه خوش مبتسم طلعنا من المطبخ وهيَّ شغلت أضويه الهول گعدت بالگاع على جودليتها ممده رجليها ومغطيتهن ببطانيتها ام النمر وگبالها الهيتر وهوَّ گعد بالگاع گبالها منتچي على القنفه مبتسم يسولفون وهيَّ كل شويه تتغزل بي راح تكبر راسه علينا رحت گعدت بصف هيله أتدفى على الهيتر لان بردت شويه وگلها.
: - انا ترى من جاي أبني ببيتنا بكلشيء جاي أخليلچ مكان ويانه خليها ببالچ أخذچ وياي ما تضلين.
هيله: ياع شمالني اتخبلت بيت ابني شماله وأعيش بغيرة؟
: - چا شني تضلين لوحدچ هنا ياهو ألچ ولا فلا أرضى
: - ضل انتَ عيش يمنه
فتح عينه حيل يحچي بعصبية
: - گعيدي؟
بَرائه: چا تريدنه احنه گعيديات؟
مسح وجهه بقلة صبر انوب گال
مُرتاد: مو هيچ بابا بس هيَّ المرة وين تعيش غير يم زوجها؟ هيله ترى وعلى نفس العيشه هنا هناك ما راح يتغير شيء مشتملنا لوحدنا ونبعة تتونسين وياها احسن گاعدة هيچ بين أربع حيطان؟
هيله: ما اريد ما اعوف بيت ابني
مُرتاد: حبچ بس كلام وعلى كل فعل ما عندچ
لو تحبيني چا رضيتي نعيش سوى بس ما ترديني.
شالت راسها تباوعلي واني گلت
: - لا تباوعيلي هيچ، ترى اذا ما عشتي ما اروح يمه ويطلگني اهم شيء أضل گاعدة يمچ كل عقلچ أعوفچ لوحدچ؟
مُرتاد: تموت اذا ما تگول طلگني تموت بت فاضل.
خزرته وهوَّ يأشر أفگس عيونچ وهيَّ گالت
: - چا المحل نرجع نسدة؟
: - لا، لگيت عمال ثقة وشاغولين من باچر يطلعون يباشرون شغل بي وانا كل فترة أخذچ تجيكين الوضع لا يضل بالچ.
هزت راسها خوش تفكر اني اعرفها تفكر اذا صار بيها شيء اسم الله راح اضل لوحدي ومحد إلى اذا مُرتاد طلگني وادري بيها تسوي المستحيل علمود أضل وياه وتأمن عليه همه يحچون واني بعدني ما مستوعبه شلون أطلع من هالبيت الگضيت عمري بي هيَّ مقهورة وهوَّ محتار شلون يرضي كل الأطراف اخر شيء گال.
مُرتاد: ينمرد گلبي من اشوفچ ضايجه هيله انا هم احب هالبيت خلي نتنفق نجي اسبوع هنا واسبوع هناك ترضين هيچ؟
نزلن دموعها وشالت شيلتها على وجهه تبچي
گام من مكانه حضنها يبوس براسها وهيَّ تگله
: - حنيتك تبچيني اني اذا غمضت عيني مرتاحة ما دامها بأيدك.
نزلت دموعي ومسحتهن بسرعه لايشوفني ويجي يشبگني مثلها وخرت منه وهوَّ ضل مخلي راسها على صدرة يحاچيها
مُرتاد: أسم الله عليچ يومي گبل يومچ لا تبچين بعد حيلي لا يصعد سكرچ.
بعدها شويه وجاب علاگه العلاج مالها مخليتها يم راسها طلع جهاز السكر قاس الها طلع صاعد شويه انطاها حبة منظم وشربها ماي ضلت گاعده ومتغطيه تباوعلنا وهوَّ التفت عليَّ شاف الضوجه مبينه على وجهي گال.
: - بيبو لا تضوجين انا جاي احضرلچ شيء احلى من المحل بهواي وهواي راح تحبينه.
بَرائه: شنو هوَّ؟
: - بوكته راح تعرفين.
گام من مكانه يوصي بينا
: - لا تخافن من شيء البيت مراقب محد يوصلچن نامن مرتاحات انا أخلص شغلي واجي باچر.
هيله: مودع بالله بعد روحي الله يفتحها بوجهك وين ما تروح بجاه الحسين.
اجه باس راسها مبتسم وراح هيَّ گلتلي گومي اقفلي الباب وراه گمت ولگيته بعده يفتح بي بس شافني جايه وراه التفت عليَّ
: - جاية تودعيني؟
ابتسمت وهزيت راسي اي
: - شنو ما يصير؟
مسح على لحيته مبتسم وهمس
: - اي ما يصير لان تخليني اتهور واخذچ وياي واخلي هيله تدگ وتلطم.
: - چا خوش خلي أرجع
درت وجهي اريد ادخل جوة وما احس إلا انجريت من ايدي التفتت وجهي بوجهه وعاصر زندي بأيده يرخي ايده ويرجع يضبها خاف اروح باوعت لعيونه الذبلانه يفترن على وجهي همس.
: - ضيعتيني بَرائه ما جاي اعرف أسيطر على روحي يمچ وأخليچ تحبيني بهداي اريد كل شيء حار بحار حبيني هسه ما يصير؟
: - تحسسني هيَّ دگمة وأدوسها هيَّ تنلام من تگلك الشاخط والله ما تنلام عوف ايدي.
احچي خازرته وهوَّ يگلي من بين أسنانه
: - مو گتلج لا تخزرين أفگسهن اذا يخزرني
خليتهن بعيونه اتحداه
: يلا هاك افگس شو.
ايده رخت من أيدي وانفتحت عقدة حاجبة وهوَّ يباوع لعيوني قرب وجهه من وجهي غمضت گلبي يدگ حيل من حسيت بدفو شفايفه ونغزات شواربة على عيوني ثنينهن باس الأولى وباس الثانيه وهمس بدون لا يوخر شفايفة.
: - أفگسهن هيچ أحسبي حسابچ كل ما تخزريني هذا عقابچ.
ابتعد واني فتحت عيوني اباوعله طبيعي واحاول ارخي عيوني ما يخزرنه ويعيدها حطيت ايدي على گلبي وگتله.
: - ترا گتلك اريد وقت مُرتاد لا تتصرف وتحچي هيچ والعباس أحس گلبي داخل بعركه.
ضحك ومسح وجهه يستغفر
: - لا يابة أبوس گلبچ.
: - خايب چا شجاي احچي.
: - بيبو ما اعرف أضم شيء انا هذا طبعي أتعودي عليه الأحس بي احچي گبل لان يجوز ماكو باچر وما الحگ احچي وتضل حسرة بگلبي.
: - أسم الله على گلبك
مال راسه على صفحه مبتسم
: - اوف فدوة، بيبو انا اطبق اليجي براسي وهسه عقلي جاي يگلي أخطفها انتَ گدها.
: - يمه
گلتها ودخلت جوة اركض ختلت ورة الحايط اباوعله وهوَّ شال ايده الچان لازمني بيها على خشمه شمها حيل منتعش ابتسم وطلع من شفته طلع يالله رحت قفلت الباب ورجعت دخلت جوة.
هيله بعدها على گعدتها تباوعلي بشك
: - شو اتأخرتي جنچ؟
: - اي مو شسمه الباب ما انقفل بسرعه.
باوعتلي ما عاجبها وگالت
: - اي عمت عيني، ترا صوتچ واصل إلى ام اسم الله على گلبك.
حطيت ايدي على وجهي بفشله ودخلت لغرفتي وهيَّ تصيح
: - ترا هوَّ هذا مُرتاد اليعاشرة يصير حنين مثله من حنيته شمالچ بعد مستحيه.
تَسنيم.
گعدنا الصبح على صوت محرَاب يريد يسحل فرات لبيت الولد يقنعهم على العرس گبل لا يكمل البيت يريد بعرس بشقته وبعدين ينتقلون أخذه وراح مثل الحباب لليل اجه ضايج يگول.
: - لا هلا بيهم ولا مرحبا يبسوا ريگي يالله اقتنعوا
تَسنيم: يمه شوكت العرس؟
فُرات: هالأسبوع، يلا بعد ما اوصيچن العرسان ثنين والمجانين الفين.
واحنه صدگ هالأسبوع كله نحضر گضيناها نطلب طلبيه ورة طلبية وفُرات المكرود يدفع و يرد ليورة وبلمح البصر بين تحضيراتنا وخبصتنا اجه يوم العرس بدلنا كشخنا ورحنا كلنا اليشوف الناس إلى بالشارع يگول ماكو ناس ضالة بهالمحافظة بعد صوت رمي وصوت هوسات يرن بأذني غشينا وجهنا مثل ما گال فرات ودخلنا جوة.
الصالة مزينة عبالك قاعة والنسوان تارساتها وعلى الكوشة گاعدة مَياسة ببدلتها البيضة وشعرها القصير المفتوح ومكياجها الهادء عبالك أميرة چانت طالعة مثالية من كل النواحي وأختيارها حلو لكلشيء للكوشة وللبدلة والمكياج والتسريحة البسيطة المسويتها بشعرها وبصفها گاعدة دُجى اتقربنا وهيَّ بس شافنا ضحكت بسناها وباركنالها.
مَياسة: يا بعد روحي
دُجى: ولچ خافي بالجذب عاد اتذكر بعرسي بليتهن بلوة
مَياسة: چا ما خايفة ولا ارجف هيَّ گوة تردن ترجفني انتِ بيچ بخت سادة وترجفين انا بطرگ محرَاب.
طگتها على چتفها تضحك تريد بس تسد حلكها رحت للمطبخ اجيب كاسات ماي لملك وكافل ومن الشباك لمحت جسام بالحديقة لا كملت انوب جايين همه وجايين وياهم عائله ثانيه بيت عمهم مثل ما سمعت وعلاقتهم قوية ويَّ نبعة والولد.
بنص هالهوسه صارت عينه عليه جر نفس مرتاح وابتسم بوجهي والبنيه إلى بصفه باوعت وين ما يباوع بس شافتني عقدت حواجبها وهوَّ ما مهتم عينه ما نزلت من عيني لحد ما گرصته البنيه بصلافة باوعلها مستغرب يسويلها بأيده شكو.
هزيت ايدي ورجعت يمهم البنيه دخلت ويَّ بيت خاله فضه سلمن وگعدن واشوفها تحاچي وتسأل بالنسوان وتأشر عليَّ مبينه جاي تسألهن عليَّ بس وجهه مسموم ما ارتاحيتلها.
چنت واگفه بالممر اريد اعبر للمطبخ وأستوقفتني نفس البنيه وعرفت تصير بنت عمة صغرت عيونها وباوعتلي من فوگ ليجوة بأستهزاء وگالت بصوت عالي.
: - خطيه والله الوحدة تضل تفر من بيت لبيت وعايشه بركبه زوج اختها لا بيت يلمها ولا اهل يسدون عليها الباب.
احترگ دمي احس نار شبت بگلبي من الصلافه الشايلتها.
تَسنيم: بيت فُرات هوَّ بيتي بس انتِ شعندچ حاشرة خشمچ بحياتي هيچ وين أعرفچ اني عوذة شگد مسمومة.
ضحكت وگالت
: - حبيبتي اني ببيت اهلي معززة مكرمة مو مثلچ حمل ثگيل وكلهم ينتظرون الفرج حتى يتخلصون منچ.
تَسنيم: خطيه انتِ جاي تراقبين حياة الناس لان حياتچ فارغه فُرات اخوي اكثر من رجل اختي وبيته مفتوح إلى بكرامتي مو مثلج مبين تتوسلين النظرة والكلمة يا ذليلة.
عگدت حواجبها ما راضيه
: - انتِ شلون هيچ تتجاوزين؟ اني بس گلت الحقيقه والكل يدري بيها حتى انتِ.
ضليت متچتفه اباوعلها وهيَّ تجيب وتحچي ما خلت حچايه بگلبها واني بس اهز براسي صحت بيها بقلة صبر.
تَسنيم: دوختيني هسه شتردين من الأخير؟ مشكله؟ كتله عركه؟ تتدللين بس تخلص الزفة اطلع سمومچ من عينچ.
هزت ايدها ورجعت طلعت مبينه گبال الكل ما مهتمه بس وحق الله كل حچايه حچتها نبتت بگلبي مثل السهم احس الغصه ذبحتني اريد بس مكان أختلي بي طلعت و وگفت ورة شجرة چبيرة والدموع الچنت حابستهن نزلن مثل الشلال اني بشنو أذيتهم حتى هيچ يحچون؟
مسحت عيوني حيل حتى لا يبين عليَّ باچيه وأخرب فرحة البنات رجعت دخلت جوة للمطبخ وگفت بصف ميرار وسَنابل ما چانن موجودات قبل شويه هسه أجن بس شافتني ميرار چانت بأيدها كيكه تاكل بيها قدمتها من حلگي.
ميرار: اكلي بُلبل بعد روحي شضال بيچ
اكلتها من ايدها مبتسمة
: - اكل ليش لا.
سَنابل: وين چنتي؟
تَسنيم: أفتر.
هزت راسها خوش و تغسل بأدين ملك وكافل من الكيك بالسنك طلعت ميرار شويه وصاحتني طلعت للحديقة على صوتها لگيتها متچتفه ومنتچيه تأشرلي بعيونها على الگدامها بعصبيه بنص الهوسه والازدحام جسام چان واگف بصف نفس البنيه التوني اتعاركت وياها.
لابس قميص ابيض مصعد رداناته مبينه عروق ايده والساعة الجلد السودة إلى محطوطه بمعصمه اول دگمتين من القميص مفتوحات وجهه چان محدد نظيف وبشرته السمرة تلمع جوة اضويه الحديقة القوية شعرة الأسود الفاحم مرجعه ليورة بس چم خصله نازله على گصته تزيد من وسامته المستفزة كل شويه يشيل ايده يرجعهن ويرجعن ينزلن.
مخلي ايد بجيب البنطرون وايد يحرك بيها وهوَّ يسولف وياها ويضحك بهدوء مبين الحچي وياها ماخذه لغير عالم كل ما يشوفني ما يرتاح اذا ما يعاركني هسه صاير حنين ويحچي بهدوء ويَّ هاي الماصخه؟
تَسنيم: سبحان الله وياي السانه يلوح اذانه و ويَّ هاي ماكو بهدوئه.
هيَّ معصبه اكثر مني
ميرار: احترگ گلبي بُلبل وبُلبل و احبچ واعشگج و واكف يتمضحك وياها؟
تَسنيم: لفووو السادة بعد وين اكو سيد يسولف ويَّ نسوان؟
ميرار: اندري؟
درت وجهي معصبه بس عيني غصب ترجع عليهم
تَسنيم: ترى ما يهمني خليه يضحك ويسولف اصلاً لايگين لبعض ثنينهم ملعبين حقه اني اتعب اعصابه.
ميرار: ولچ شوفي شلون يضحك عبالك گاعدين ببيتهم مو بعرس والناس تباوع؟
وبهاللحظة سمعت ضحكه عاليه من جسام رنت بمسامعي سمعته يگلها بصوت مسموع رغم الهوسه.
جسام: چا بعد شسوي اشغال الدنيا هواي ما يضل شيء مثل گبل بس ان شاء الله ارجع على گولتچ.
وهيَّ ردت عليَّ بضحكه مايعة تتدلع وتعدل بحجابها
: - اي سيد، كل الهلا بيك عين غطى وعين فراش ميتين على شوفتك ارجع تعال النا هواي مثل گبل.
ميرار لزمت ايدي حيل عبالها راح اهجم عليهم بس اني چنت جامده عادي صارت عينه عليه رفع حاجبه و ضحك مرة ثانيه يگلها
جسام: ما تقصرين من طيب أصلچ
: - بعد عيوني.
كشيت وجهي بقرف وهوَّ مسح على رگبته
تَسنيم: شگد ايع امشي ندخل الله راح يگلبها بينا من ورة هذول فكس بعيونهم ثنينهم.
درت وجهي عنه وعنها واني احس روحي جاي تلعب وايدي ترجف ميرار سحبتني وهيَّ تدردم واني امشي واردد بگلبي يا رخصكم و يا رخص هالسوالف سمعته من يضحك احس عبالك شمر نار بأذني هذا لفو السادة المسوي روحه يحبني وكاتل روحه هيچ الكلمة سهله بلسانه؟
ميرار: لا تضوجين هوَّ بس يريد يخليچ تغارين.
مسحت عيوني احاچيها
: - ما اغار اصلاً اني گتله شوف حياتك ما اريده.
اول ما دخلت للصالة صار بوجهي فُرات لازم ايد كافل يريد يطلعه وياه چانوا واگفين بزاوية على صفحه محد يمهم هوَّ وسَنابل بس شافنا أشرلنا نروحله اتقربنا وهوَّ باوع لوجهي وگال.
فُرات: وجهج مگلوب وين چنتي؟ ياهو غاثچ؟
تَسنيم: محد بس تعبت يمته نرجع للبيت؟
فُرات: لا تچذبين عليَّ احچيلي شبيچ؟ هسه ورة الزفة نروح.
جريت نفس مختنگه وحچيت بصوت ناصي
: - فُرات اني صدگ حمل ثگيل عليك؟
عگد حواجبه بأستغراب عاف كافل من ايده واتقرب حضن وجهي بين أدي يحچي بحنية.
: - يا نغل گال هيچ وحق من حط الروح بيه انتِ بنيتي المدلله انتِ شمعة البيت اليگول عنچ حمل أشيله وأشمرة برا البيت كله!
نزلن دموعي ومسحهن بسرعه بدون لا يگلي ليش تبچين عبالك فهم السالفة حچه بعصبيه
: - گليلي منو حچه؟
هزيت راسي لا وابتعدت
تَسنيم: يمعود حچي بنات انسى.
دخل جسام و وياه البنيه صارت عينه علينا عگد حواجبه مستغرب الابتسامة الجانت على وجهه اتبخرت اول ما شاف فُرات حاضن وجهي والدموع بعيوني عيونه ضلت تتنقل علينا بنظرات غريبة وهاي من شافت الموقف لزگت بصفه اكثر.
فُرات من شاف جسام دخل ما وخر ايده عني بالعكس سحبني لصفحته وباس راسي من فوگ الحجاب گدامهم كلهم وگال بصوت عالي مسموع للكل.
: - بنيتي انتِ، تضلين تاج على كل راس واليغثچ بكلمة يغث فُرات واليغثني كلها تدري مصيرة شنو كل البيوت بيوتچ والما عاجبه الدرب يودي وما يجيب و روحة بلا ردة.
صوت المهامس صار بفلس ابتسمت اباوعله الناس بالناس وميرار تباوع للبنيه بحقد متحلفتلها وذيچ تباوعلنا وتسمع ما عاجبها جسام عافها واتقرب يحاچي بفُرات بقلق
: - شكو شنو مناسبة هالحچي؟
فُرات: هيچ عجبني احچي مالك علاقة.
هز راسه خوش وطلع برا ينطح بالبيبان شويه وفُرات گال يلا نرجع للبيت حتى الزفة ما ردت اشوفها راسي ضل يوجعني سَنابل لزمت ملك وهوَّ لزم كافل من ايده يمشون گبالنا واني وميرار نمشي وراهم همستلي.
ميرار: انتِ شكو تاخذين بحچي هالمسمومات وتضوجين بروحچ؟
تَسنيم: اني طبعي ما أهتم لكل شيء بس مرات انقهر اكو اشياء تحز بالخاطر وما اگدر اتخطاها.
ميرار: سودة عليه، ياهيَّ منهن مضوجتچ نكتلها؟
تَسنيم: اي بعد كتلتي حنان وأخذچ الواهس
ميرار: حالفة وين ما اشوفها اكتلها ام الزلم.
هزيت ايدي مبتسمه وهيَّ تحچي فايره صعدنا بالسيارة و فُرات مثل الاتذكر شيء دخل مدري شيريد شيوصي الولد نزلت الجامة اتنفس والبنات گاعدات بصفي منتظرين فُرات يجي عيني تروح وتجي على البيت.
طلع جسام وأهله وهيَّ وأهلها سيارتهم چانت صافة قريبة على سيارتنا يمشي بعصبيه القميص مشدود على ظهرة من كثر ما متشنج وهيَّ عايفة اهلها وتمشي وراه تريد تلحگ خطواته السريعة اول ما وصلوا يم سيارته وگف فتح الها الباب إلى بالصدر وهيَّ قبل لا تصعد بكل وقاحه رفعت ايدها عدلت ياخه قميصه تحاچي
: - قميصك متدمر
دفع ايدها حيل يتلفت وصاح
جسام: ايدچ شني السالفة!
خشمي گام يحكني حسيت بحرارة صعدت لراسي اباوع عليهم ما وعيت على روحي إلا واني احس بحرارة قوية تنزل من خشمي حطيت ايدي وشفت الدم تارس ايدي ميرار فزت وصاحت
ميرار: تَسنيم خشمچ!
جسام من سمع صوت ميرار فز و دار علينا بسرعه عيونه اتوسعت من شافني والدم يصب على ملابسي وأيدي عاف البنيه وعاف السياره وركض بأتجاهي فتح باب السيارة مد ايده يريد يلزمني دفعتها حيل وهوَّ صاح
جسام: شمالچ دخيلك ياعلي منين هذا الدم؟
تَسنيم: ما بيه شيء وخر خرب وخر.
چان فاقد عيونه ما تشوف غير الدم الترس وجهي تسنيم وميرار يخلن كلينس ميتات من الخوف والجهال يبجون وفُرات بعده ما جاي مد ايده بكل جرأة يريد يطلعني من السيارة ويشوف خشمي اني شطت رفعت ايدي ضربته على صدرة ودفعته حيل أصيح.
تَسنيم: لا تلزمني بأيدك الوصخه روح لذيچ المنتظرتك صعدها بسيارتك و ولي من وجهي الله ياخذك وياخذها بليلة وحدة.
عيونه صارن بگصته يحچي بحرگة
: - انجبي واسكتي راح يخلص دمچ وانتِ تعاركين انزززلي!
تَسنيم: لو نخله تطلع براسك ما انزل ولي عن وجهي ومالك غرض بيه لو اموت هنا لا تشيلني.
البنيه چانت واگفه يم سيارته وجهه مگلوب ومصدومة صاحت بصوت عالي.
: - سيد وين عايفني انتَ السيارة مفتوحه والناس تباوع تعال يلا.
باوعلي شلون اخزر بيها ومسح على گصته يستغفر دار عليها
جسام: روحي ويَّ أهلچ لا تچلبين زهراء!
فُرات چان بعده ما جاي ما يدري بالصار وهذا المسودن ما انتظرة يجي بدون تفكير عاف سيارته مفتوحه وفتح باب السيارة مال فُرات وصعد يريد يسوق ودار على ميرار وسَنابل عيونه دم
جسام: سدن الباب حيل وألزمنها.
خبلني بتصرفه گمت اضرب بالكرسي مالته واغلط
: - انزل خرب روحك انزل هاي سيارة فُرات وعلى اذا وصلتني أملخك.
ما رد عليَّ بكلمة شخط السيارة بشخطه خلت الوادم كلها تتلفت وطار بينا مثل المخبل چان يسوق بأيد والأيد الثانيه يمدها ليورة يحاول ينطيني كلينس او يلمس گصتي حتى انزل راسي واني ادفعه
: - لا تگضني يا حقير أيدك وخرها.
عاصر الستيرن حيل وصاح بيه عينه على الطريق
جسام: اغلطي اضربي بس نزلي راسچ وخلي كلينس فدوة لربچ تَسنيم راح يخلص دمچ!
وصلنا للمستشفى و وگف السيارة بباب الطوارئ ونزل فتح بابي وقفلت ما انزل رغم الدوخه اخذتني واحس عيوني جاي تغوش.
تَسنيم: لو تموت ما انزل وياك لا تبالغ هسه ينگطع ما بيه شيء.
جسام: لا تعاندين شوفي وجهج بالمراية صار ابيض گطن انزلي لا وحق الصورچ اشيلچ وانزلچ غصب لا تطلعيني عن طوري.
سَنابل تمسح بوجهي وتحچي ميته من الخوف
: - سمسم انزلي خلي يقيسوون ضغطچ احنه أجينا بعد.
حچيت بصوت يرجف الدوخه بدت تسيطر على حواسي
: - رجعنا للبيت كافي تسوي روحك خايف تمثيلك صار ماصخ مثلك.
اتقرب حشر روحه بالسيارة لزم چتفي يحچي معصب
جسام: ولچ خلص دمچ شتحچين احچي بس انزلي!
رفعت ايدي المتروسه دم ضربته على صدرة
: - أكرهك وخر لا تلزمني.
ما وخر بالعكس لزم أديني ثنينهن الچنت اضربه بيهن بأيد وحده وبالأيد الثانيه سند ظهري ورفع راسي لفوگ وهوَّ يهمس بحرگه صوته قريب مني لدرجه شميت ريحة عطرة.
جسام: اغلطي بعد طلعي كل شيء بگلبچ وحق على ما تسوى نظرة من عينچ بس انزلي وياي بُلبل فدوة شلعتي گلبي!
تَسنيم: مالي علاقه بيك لا تبرر ترا اني ما اشوفك شيء بس رجعني للبيت تعبت.
غمض عيونه بقهر بس عافني شالني بين أديه بحركه سريعه منزلني من السيارة واني ارافس واضرب بجتفه حيل قميصه الابيض اتلطخ بدمي وهوَّ يمشي بيه بخطوات سريعه للطوارئ وكل خطوة يهمس باذني.
جسام: گولي التردينه بس صيري زينه وحسابي وياچ بعدين على كل كلمة حچيتيها.
سَنابل وميرار يمشن ورانا خايفات واني اضرب واخرمش بي اريده ينزلني واني امشي ما رضى يهدني الا بوحده من الغرف حطني على السديه يخزر بيه اجه ممرض يريد يشوف خشمي ويقيس النبض جسام دفع ايده وصاح
جسام: ممرضه صيح الممرضه!
هز راسه متفهم وطلع شويه واجت ممرضه وهوَّ واگف فوگ راسي چنه شمعه فگر وميرار وسَنابل يباوعلي بخوف شوي ودگ تليفون ميرار خلته على اذنها وگبل سمعت صيحه فُرات طلعت برا تحاچي.
لفت جهاز الضغط على ايدي واني بعدني اباوعله بكره وهوَّ يمسح وجهه بتوتر وعيونه ما فارگت وجهي الممرضه عقدت حواجبها تباوع للجهاز
: - ضغطها صاعد لل 16.
باوعلي بنظرة مليانه عتب وقهر دنگ راسه يمي وهمس
: - ارتاحيتي؟ صعدتي ضغطچ وگطعتي گلبي بلسانچ كل هذا ليش؟ لان حچيت وياها؟
رديت عليَّ بصوت مخنوگ الدوخه بعدها براسي
: - شهالثقة العندك؟ ضغطي صعد من شوفتك مو من الغيرة انتَ وجودك بحياتي هوَّ الضغط بذاته.
: - خرب عشيرتچ خرب بالجابني عليچ
: - خرب راح يخليني الطخ راسه بالحايط.
اجت سَنابل بصفي خلت ايدها على چتفي وباوعتله بمعنى وخر
هز راسه متفهم وأبتعد دخل فُرات للغرفة عيونه تدور علينا جسام بس شافه ابتعد مچتف أدي والدم البقميصه والخراميش إلى برگبته و وجهه شاهدات على المعركه الصارت بيننا.
فُرات وصل يمي حط ايده على راسي يحچي بخوف
: - شبيچ بعد روحي ليش خشمچ طگ دم؟
الممرضه ردت علي
: - لان ضغطها صاعد حيل و لازم ترتاح.
فُرات دار وجهه لجسام باوع لقميصه وگال بعصبيه
: - انتَ شجاب دمها على قميصك وشلون اخذتها بسيارتي وجبتها هنا منو سمحلك؟
جسام: حضرتك چنت ما موجود اتاني يخلص دمها لو شتگول انتَ؟
فُرات: لا المفروض تدخل تگلي وانا أخذها؟
جسام: وشصار هسه انگلبت الدنيا؟
مسح گصته يريد يتمالك اعصابه واجه بأتجاهي يصيح علي
فُرات: سد حلكك يلا اسكت.
طلع كلينس من جيبه يمسح بخشمي من الدم وينظف وجهي شويه وسندني طلعنا من المستشفى ركبنا بالسيارة رجعنا للبيت راسي يريد ينفجر فُرات انطاني علاج اخذته ودخلت لغرفتي شمرت روحي على الجربايه بملابسي راسي احسه يريد ينفجر طالعه روحي اريد بس عيني تغفى بس هيَّ من تلتم تلتم حچي هاي المسمومة بعدة يفتر براسي حمل ثگيل، ينتظرون الفرج حتى يتخلصون منچ، وبعدها اتذكرت ضحكه جسام وكلامة وياها.
گعدت وحطيت راسي بين أديه احچي ويَّ روحي
: - اني اصلاً ما احبه ومايصير احبه جسام مجرد شخص مستفز يوزع احكام ونصائح وهوَّ اول اليغلطون اني ضايجه لان استهظموني هوَّ بصفها يضحك وهيَّ تقهر بيه وبعدين يجي ويگول احبچ امداك وامده حبك اي والله.
سكتت شويه والدموع غرگت عيوني اتذكرت الحقيقة المرة
: - اني ما احبه بس حتى لو چنت احبه وحتى لو هوَّ رادني صدگ اني وين وهوَّ وين السادة وهمه بالذات يرگضون ورة النسب والسمعه الصافيه واني چنت بنادي ليلي إلى هوَّ مال امي من چانت تجبرني جسام مستحيل يباوع بوجهي اذا عرف الحقيقة ويعرف بكل شيء ضامته.
مسحت دموعي برداني بعصبيه ادردم
: - احسن خليه يروحلها، وخلي يشوف حياته بعيد عني اني لا احبه ولا هوَّ من ثوبي فُرات يحبني وهاي كافي وجسام مجرد واحد غريب حيل عني وعن عالمي.
حاولت اقنع روحي بهالحچي بس نار گلبي چانت تگول عكس هيچ نمت واني أردد ما احبه والله ما احبه هوَّ شكول حب هذا لفو السادة.
مَياسة.
مر الأسبوع كله مثل الحلم وصار يوم العرس والزفة كل شيء مثل ما يتمناه محرَاب الشوارع كلها اهتزت لهوساتهم وفرحتهم واكثر واحد فرحان فُرات صعدنا بالسيارة ومحرَاب لازم ايدي حيل كل شويه يرفع چفي يبوسه وما هامه احد.
محرَاب: أخيراً ميسو راح تصيرين ببيتي يا بيتي.
وصلنا لفرع الشقه والهوسات والرمي تارسات الشارع باوعت من الجامة السيارات سرب ورانا هذا المطلع روحه من الجامة يرگص وهذا الرافع سترته يهوس بيها وصوت الهورنات طرش أذني نزل محرَاب سندني بأيده ونزلنا وگفنا گبال الباب واجو مُرتاد ومُهران وجوههم مطعونه من القهر التفت الهم مبتسهم وباسهم وحضنهم واحد واحد
محرَاب: بأمانتي وداعة عيونها بعيوني گبل لا توصوني.
فتح الباب ودخلنا سد الباب وراه وعزلنا عن هوسه الناس وهوساتهم چانت الشقه هادئه دافية ومتروسة بريحة بخور وعطرة الخاص التفت عليَّ نزع السترة يتنفس بتعب ضل بالقميص اتقرب شال البرنص من وجهي وضل صافن بملامحي عبالك اول مرة يشوفني.
لزم وجهي بچفوفه الترجف من اللهفه وهمس
: - نورتي ظلمتي مَياستي مبروك عليَّ انتِ ومبروك على گلبي أستقرارة.
نزل راسه على كصتي باسني بوسه طويله وحچه مختنگ
: - يا حلالي يا مالتي يا عشگ روحي وطفولتي يا حلمي الصار حقيقة.
خليت ايدي فوگ أيده إلى على وجهي ابتسمت عيوني مدمعة
مَياسة: حبيب روحي، هاهيَّ صرت يمك بعد شبيك مختنگ؟
باس خدي حيل وابتعد يمسح بعيونه واني همست
: - جوعانة.
ابتسم وگرص خشمي
محرَاب: والله انا هم روحي ذبي بدلتچ وارتاحي بين ما أصب الاكل الجايبه فُرات النا.
رحت للغرفه نزعت البدله بصعوبه چانت ثگيله حيل دخلت اسبح طلعت لافة روحي لبست ثوب النوم إلى مخلياته إلى أبيض وقماشه ناعم بس ما لبست من المشلحات لبست واحد مستور رحت للمراية اخذت كلينس مبلل امسح بوجهي لان المكياج قافل مخليات مدري كم كيلو نشفت شعري عفته مفتوح واتعطرت وطلعت امشي على كيفي.
لگيته واگف بمطبخنا الصغير حاط العشى بالصحونه المشويات وگلاصات العصير بس عيونه مو بالاكل عيونه چانت تراقب الباب منتظرني اطلع اول ما شافني جمد بمكانه نزل الخبزة من ايده وضل يباوعلي بنظرة خلتني اتمنى الگاع تنشگ وتبلعني من المستحى.
اتقرب وحسيته يرجف اكثر مني دنگ راسه على شعري شمه حيل مغمض عيونه
محرَاب: ترديني اعوف العشى وأكلچ انتِ؟ ترى ما عندي مانع
شني هالطرگاعة السودة كتلتيني بالعباس.
مَياسة: مو گلت جوعان خل ناكل محرَاب ترى اني بيه طبع اذا استحيت اشبع عوفني بجوعتي.
ضحك ضحكه دافيه وسحبني من خصري عليه لزگ ظهري بصدرة وهمس يم اذني.
محرَاب: الخاطر هالعيون ناكل ونشرب وبعدها حسابي وياچ طويل ميسو راح تملين من عندي اريد اعوض كل ليلة نمت بيها وحدي وانا أحلم بحضنچ.
هوَّ يحچي واني عيني على الصحونه ابلع بريگي
مَياسة: يمعود راح اموت من الجوع.
ضحك وابتعد يمسح بوجهه
محرَاب: جوعية لا احساس ولا ضمير من يومچ.
گعدنا ناكل وهوَّ عينه ما فارگت وجهي يسوي لگمات ويخلي بحلگي يباوعلي كأنما خايف اختفي لو يطلع حلم لحظاتنه چانت هاديه بس عيوننا تحچي فرحتنا وحبنا.
مسحت عيوني احاچي
مَياسة: محرَاب نعست
: - هسه انومچ يا روح محرَاب.
خلصنا اكل شال الصحونه خلاهن بالسنگ وبسرعه رجعلي عيونه ذبلانه وبيهن شوگ لو يتوزع على الدنيا تفيض لزم ايدي وگومني اتمشينا للغرفه واني احس خطواتي ثگيله من المستحه وگلبي يدگ طبول.
اول ما دخلنا سد الباب بهدوء واتقرب مني شافني افرك بأديه ارجف عرفني خايفه ابتسم وسحبني لصدرة شابگني حيل نزل راسه على رگبتي جر نفس بشوغة وهمس
: - چنچ عصفور بين أديه، محرَابچ مو غريب انا امانچ وانا حماچ الليله بس اريد اشبع من حضنچ وانام واني متأكد صرتي حلالي.
شالني بهدوء حط راسي على المخده اتمدد بصفي وسحبني لحضنه خلى راسي على صدرة وايده تمسح على شعري بحنيه چنت اسمع دگات گلبه العاليه چانت تحچي قصه تعبه و وحدته الخلصت اليوم.
محرَاب: هسه يالله حسيت ردتلي روحي هسه بعد انام وانا مرتاح لا افكر بباچر ولا افكر شلون أوصلچ.
شلت أيدي مبتسمة العب بلحيته رفعت روحي بسته بخده غمض عيونه براحه وحسيت بتنهيدة طويلة طلعت من صدرة وهسه ذبها سحبني اكثر لحضنه يشم شعري حيل
مَياسة: مو وحيد ترى اني يمك دوم.
محرَاب: أهلي وناسي و كل دنيتي انتِ لا تبتعدين خليچ هيچ اريد دگات گلبي تصير وي دگات گلبچ.
ضل يهمسلي بسوالف طفولتنا واني اضحك ناسيه الدنيا وياه شلون چان يغار عليَّ من الهوى ويروح يكتل الجهال يگلهم هاي مرتي لا تلعبون وياها.
نزل راسه شويه باوع لعيوني لزم وجهي بأدي ثنينهن وهمس مبتسم
: - صبرت صبر ايوب هسه انتِ بحضني وبالحلال احس عقلي راح يطير تدرين شنو يعني تصيرين حلالي ومحروم من بوستچ؟
نزلت عيوني بخجل وهوَّ رفع راسي بأيده ما خلاني اتهرب منه طبع بوسه هادئه على شفايفي بس سرعان ما اتحولت لبوسة عميقه أخذت روحي.
: - أحبچ يا كل احبابي ياحلالي و كل هلي
استسلمت لمشاعرة شال الخوف مني بلمساته الحنينه وبكلماته التذوب الصخر غاص بداخل عالمنا الخاص يكتشف تفاصيل وجهي وكأنما جاي يرسم لوحة يطبع بوساته على عيوني خشمي رگبتي وبكل لمسة يگلي انتِ مالتي اتلاشت كل الحواجز بيننا وضل بس نبضنا يحچي
صارت مَياسة قطعة من روح محرَاب مو بس بالأسم بالجسد والروح.
فزيت الصبح على ضوى الشمس إلى يتسلل من ورة البردات اول ما فتحت عيوني حسيت بدفو غريب يحيط بيه ردت اتحرگ بس حسيت بايد ثگيله ملفوفة على خصري رفعت راسي شويه وشفت وجه محراب ساند راسه على أيده وابتسامة هادئه مرسومه على وجهه وجهه ما بي نوم عبالك صار ساعات يراقبني واني نايمه.
محرَاب: صباح الخير يا وجه الخير.
غطيت وجهي باللحاف اضحك
: - اكلك ترى ما متعودة احد يشوف شعري مخربط اول ما اكعد.
سحب اللحاف يضحك وباسني من خدي بوسه قويه
: - خاب انچبي وعلى غير جنچ ملاك نازل بوسط غرفتي.
سحبني من ايدي يضحك كومني من الفراش واني اصرخ وگفني گبال المراية وشفت شعري صدگ مخربط التفتت عليَّ اهز بأيدي
: - هسه هاي تسريحة عروس بالله؟
محرَاب: أحبها يابة والعباس احبها تعالي خل امشطلچ لا تضلين تنوحين عليَّ مثل العجايز.
اخذ المشط من الميز وسحبني گعدني بين رجليه وهوَّ گاعد على طرف الفراش ضل يمشط بشعري بس احسه هلسه جر المشط بقوة لحد ما طلعت روحي صرخت بوجهه.
مَياسة: جاي تمشط لو تهلس ريش دجاجه؟ دعوفه اني امشطه
وهوَّ يا جبل ما يهزك ريح يمشط
محرَاب: انچبي لچ محد طلع من بطن امه يعرف غير اتعلم.
مَياسة: خليني أكوم لا أصلع بأيدك اليوم
ردت اكوم بس هوَّ غافلني وسحبني من خصري طحت بحضنه ضل يدغدغ بيه واني اتلوى واضحك بين أديه احاول ادفعه
مَياسة: ههههههههههههه محرَاب وخر حباب والله جعت مرة ثانيه.
محرَاب: ماكو روحه إلا تگولين محرَاب احسن رجال بالعالم گوليها يلا لا أحفر ضلوعچ هسه.
مَياسة: والله ما أگول ولك انتَ تمشيط ماعرفت تمشطني يمة الحگيلي نبعة ههههههههههههههه
حط وجهه بركبتي يضحك يدغدغني بلحيته
محرَاب: نبعة بالبيت هسه بس انتِ بغابة المحراب وماكو مفر.
دفعته ورحت للمطبخ اضحك محرَاب اجه وراي شال الطاوة مسوي نفسه شيف وهوَّ حتى البيضه ما يعرف يكسرها عدل حط الدهن وقوة النار وبدال ما يستوي البيض احترگ والريحه ترست المكان الدخان صعد ليفوگ.
باوعت لوجهه وللطاوة اهز راسي بأسف
: - راح تموتني من الجوع محرَاب هاي بدايتها
محرَاب: ردت اطلع بطولاتي بس ربچ راد يكشفني.
ذب الطاوة بالسنگ گوة لازم ضحكته
محرَاب: امشي بدلي هدومچ يلا خلي نروح نداهمهم عود عبالهم خلصوا من عدنه بعد.
مَياسة: محرَاب هسه نبعة تتلگاني وتتشمت بيه تگلي مو گتلچ تموتين الوليد من الجوع وتضل تحچي لسنه ليگدام.
محرَاب: چا شلون؟
مَياسة: يلا عادي خلي تحچي راح ابدل اصلاً ميته على شوفة اخواني.
بدلنا ملابسنا بسرعه وطلعنا واني دگيت رجل إلا نروح بالدراجة احبها نشنشت من سحبها وشغلها صوتها احسه طرب اتقرب لبستي الخوذة ولبس وحدة صعدت وراه وچلبت بقمصلته گضيتها حيل وهوَّ انطلق يضحك الهوى يلعب بوجهنا واحنه عبالك طيور شاردات من القفص اضحك من كل گلبي وهوَّ كل ثانيه يميل راسه يباوعلي بالمراية ويغمزلي.
وصلنا للبيت شگد مشتاقه يا الله احس صار قرن ما شايفتهم نزلت اركض گبل محرَاب وهوَّ يصيح انتظريني اطبگ الدراجه دفعت الباب اضحك اول ما دخلت الحوش شفت مهران ومرتاد گاعدين بالحديقة يتريگون ونبعة تصب چاي الضوجه مبينه على وجههم ثنينهم صحت حيل.
مَياسة: صباح الخير أشتاقيتلكم و رجعت گوموا استقبلوني.
بس سمعوا صوتي بدون لا يباوعون عافوا إلى بأيدهم و گاموا ومُرتاد من گد ما متخردل بده استكان الچاي بس ولا اهتم ركض عليَّ وشالني من الگاع يضحك من كل گلبه فرحان واني مچلبه بركبته
مُرتاد: يا بعد روحي مشتاگلچ ميت على شوفة وجهج.
مُهران: تعاي ولچ تعاي طگ گلبي
جرني من أدين مُرتاد حضني حيل يبوس براسي ومُرتاد بعده يريد يجرني منه ومُهران يدفعه حيل ويخزرة.
مُرتاد: وعلى البيت عبالك مگبرة بدونچ البارحه الليل كله ما نمنه مگابلين غرفتچ.
نبعة كامت من مكانها تهلهل
: - گللليش يمه وجهه مورد بعد روحي روحك محرَاب.
ضميت وجهي بحضن مهران اكثر مستحيه وهوَّ صاح
: - شني السالفة جدة؟
بهالاثناء دخل محرَاب باوعلنا يضحك
: - ها عقيد مشتاقين.
مهران من سمع صوت محراب شدد حضنته اكثر عبالك يكله لو تموت ما توصلها هسه رفع راسه وخزرة يگله بقهر
: - مياسة ما تطلع منا بعد، وعلى اخذت روحي وياها البارحة.
باوعلهم يحچي بجدية
محرَاب: شني السالفه باع شكولكم عبالك كبرانين مية سنة عمي هيَّ كلها كم يوم ونعيش سوى العمر كلة واشبعوا منها ومني.
مُرتاد اتقرب طگه بچتفه حيل يصيح
: - الصلف فايت لبيتنا يتمضحك المفروض هسه انتَ متغطي من المستحى لان اجيتنا ركض بأول يوم حتى ما انتظرتنا نجيك بس ادري بيكم طينه وحده انتَ وياها ما تصبرون.
ولا اهتم لحجيهم راح گعد بصف نبعة وهيَّ جرته شبگته وباسته حيل تباركله وصبت اله چاي يحچي واللگمة بحلگة
: - انا اجيت اواسيكم اصلاً، ادري بيكم يتامة بلياها.
مُهران هز راسه خوش متحلف وگال
: - انتَ ضيف ثگيل هسه تگعد بأدب تتريك وتتوكل وبالليل احنه نفكر نجيبها لو لا.
محرَاب طفر من مكانه نسى حتى الريوگ
: - عقيد لا تخليني اخنكك بأول اسبوع عرس يا ليل؟ ميسو وياي بالدراجة مثل ما اجت ترجع وعلى ما أروح اضل على گلبكم تحچون صدگ.
مُرتاد: اللعب انووووب بالدراجة جايبها؟
مُهران: لا يابة الدراجة مو أمان وبتنا عروس نخاف عليها من الهوى الطاير روح انتَ اگضي شغلك ومياسة تضل يمنه عدنا كومة سوالف وياها مو مَياسة؟
هزيت راسي اي اضحك ومحراب يشيل روحه ويركعها
محرَاب: ميسو احچي شيء؟ شني السالفه مهران والله اخذها وأهج بيها والله.
مهران حط ايده على چتفي گوة گاض ضحكته
: - جرب ويشوفني شسوي بيك يلا يابة مياسة لغرفتچ نتريگ بعيد عن هل صلف مشتاگلچ.
مُرتاد: اكل وياكم انا ما شبعت.
محراب لزم راسه يضحك حيل ويصيح
: - مَياستي لا تروحين وياهم ترى يغسلون دماغچ يخلونچ تطلبين الطلاگ واحنه بعدنه اول يوم.
مُهران شالني يضحك دخلني جوة ويصيح عليَّ
: - روح اتأمل الحيطان لحد ما نحن عليك.
دخلني مهران للصالة يضحك من كل گلبة وسمعنا صوت باب الحوش انرگع حيل وصوت دراجه محراب طلع محروگ دمة منهم مُرتاد دخل ذب روحه على القنفه ميت ضحك يمسح بعيونه.
مُرتاد: وعلى كسر گلبي وجهه انگلب احمر من القهر بس يستاهل عباله السالفه هينه ياخذ بنيتنا ويطلع.
مهران كعد يمي شال ايدي باسها
: - خلي يضوگ شويه من الضگناه البارحه البيت چان وحشه يخنگ وعلى اللكمة ما تنزل ببلعومي وانتِ مو ويانه على السفرة.
دمعت عيوني من حجيهم محاوطيني كل واحد من جهه
مَياسة: يا روح اختك اروحلك فدوة.
اجت نبعه شايله صينيه الريوگ وتحچي ما راضيه
: - ولكم شمالكم لا خليتوا يرتاح بحب لا بخطوبة لا بعرس وسطر السطركم.
گعدنا ناكل اربعتنا شويه وگعدت ليال بس شافتني تضحك كمت حضنتها وهيَّ تبوس بوجهي وتباركلي كعدت تتريك ويانه مرتاد مضيگ عيونه يگلي.
مُرتاد: اذا غثچ بكلمة بس انطينا أشارة وعلى نخليه يتأمل الحيطان للسبت اليجي.
ضحكت وگتله
: - لا يمعود محرَاب وين اكو بحنيته.
ثنينهم انگلبت وجوههم من حجايتي ضايجين بهاي اللحظة موبايلي بأيدي ما سكت اشعار ورة اشعار طلعته وشفت محرَاب گالب الدنيا بالرسائل كاتب.
: - ميسو والعباس اذا ما طلعتي هسه افلش الباب على روسكم. ولچ ردي لا تخليني ارتكب بيكم جريمة. هاي هيَّ بعتيني؟ البيت ما ينطب بدونچ ام البراغي.
مهران لمح الموبايل بايدي سحبه مني يضحك قرا الرسائل بصوت عالي ومُرتاد انبطح بالگاع من الضحك.
مُهران: شوف الصلف يهددنا ببيتنا! خلي ارد عليَّ.
فتح فويز يحچي گوة گاض ضحكته
: - محراب مياسة قررت تنام بغرفتها والموبايل راح ينسد روح اطبخ بيض محروگ واتغدى ونام زين و الله كريم لليل بلكي تگعد.
داس ارسال يضحك وشمر التليفون مرت نص ساعة تقريباً وسمعنا صوت هوسه برا وصوت دراجه محرَاب گبال البيت طلعنا كلنا للحديقة ما لحگنا نستوعب ومحراب ما انتظر احد يفتحله الباب طفر من السياج ونزل بنص الحوش يعدل بياخه قميصه ويصيح
: - تعاي وياي ميسو وعلى أهجمكم هجم.
مهران ومرتاد يصيحون عليَّ گوة لازمين ضحكتهم واني خاتله وراهم اضحك محراب اتقرب من مهران يحچي مختنگ
: - والعباس طبيت للصالة حسيت حتى الحياطين تسألني عليها انا ما اتحمل دقيقة وحدة بلياها ميسو تعالي يابة حبيبتي وعلى اسويلج احلى بيض بالعالم ما احركه.
مُهران: ولك ساعة ما صبرت؟
مد راسه ورة ظهر مهران باوعلي بنظرة كلها شوگ مد ايده إلى وگال
: - ميسو ما ترجعين وياي وتعوفيني؟ شلون ينطيچ گلبچ؟
مهران من شاف ملامح محراب وشافني شلون لنت من كلامة گال
: - چنت ناوي اخليها لليل بس دوختنا هواي تلغي مياسة حبيبتي روحي ويَّ زلمتچ وداعة عيونچ باچر الصبح يمچ انا ومُرتاد وشرط تسوولنا بيض من ايد محراب.
هزيت راسي خوش اضحك ومحراب زفر نفس مرتاح وسحب ايدي باسها گبالهم وصاح.
: - كفوووو منك البيت بيتكم وعلي، تعيش الدولة تعيش حماة الوطن.
ضلوا يضحكون وهوَّ ما صدگ سحبني من ايدي ومشى بيه سريع يريد بس نطلع خايف يغيرون رأيهم طلعنا ولبسني خوذتي يخزر بيه سمعنا صوت مُهران جاي من جوة.
مُهران: دير بالك عليها، باچر نجي تفتيش بالعشرة الصبح البيض اذا محترگ لو اكو أي تقصير تتغرم.
صعدنا وشغل الدراجه يصيح عليهم
: - هاي هيه يولد لا تشيلوون هم بس خلي افلت بريشاتي هسه يا زوج يوصل الكم لو يخليكم توصلوله بعد.
انطلقنا بالدراجه وهوَّ كل شويه يشد على ايدي اللازمة قمصلته حاچاني بعتب گوة اسمع صوته من صوت المحرك
: - والعباس يتيم بدونچ انا ما جاي أبالغ
حضنته من ورة وسندت راسي على ظهرة مبتسمه.
وصلنا و اول ما سدينا الباب ذبيت حجابي وخوذتي ذب الخوذه وسحبني لحضنه حيل وخر خصلات شعري عن وجهي يبوس بيه
محرَاب: هسه ردت روحي، امداچ وامده اخوانچ.
ضحكت وگلتله
: - شسوي ما شفتهم شلون چانوا مشتاقيلي وحتى اني مشتاقتلهم.
محرَاب: وانا مالي نصيب من هالشوگ؟
حضنت وجهه بين أديه ورفعت روحي بسته من وجناته
مَياسة: حبيب الروح انتَ.
مال راسه على صفحه مغمض وصاح
: - أخ أروحلچ فدوة
طكيته على وجهه خفيف حتى يصحصح فتح عيونه يضحك
محرَاب: تدرين شسويت؟ وانا راجع بالطريق اشتريت سمچه بنية تلوگ لحلگج الحلو ادري بيچ تحبينه راح اشويها الچ بالفرن وانتِ تسوين تمن أحمر ها؟
مَياسة: الله سمچ أبيعك انتَ واخواني علمودة
ضحك و هز راسه
محرَاب: ادري بيچ جوعية.
ضلينا ساعة نسولف ساعة نلعب حتى ختيلان لعبنا أختل ورة البردة وهوَّ يدورني ويكشفني من رجليه الطالعات من جوة البردة ومن يلكاني ازعل ويراضيني للظهر دخلنا للمطبخ محرَاب حط التتبيله للسمچ واني غسلت التمن وبديت احمس البصل والبهارات وريحه الاكل تفتح النفس چنه نشتغل و واحد يطخ بالثاني نضحك لو واحد يباوع للثاني ونضحك بدون سبب بس لان صرنا يمكان واحد وسگف واحد.
حط السمچه بالفرن التفت على شافني ملتهيه اهدر بالتمن اتقرب يشم بريحه الجدر ضحكت وگلت.
مَياسة: وين راحت نبعة والله لو تدري انتَ تطبخلي.
محرَاب: غير مرتي وحبيبتي اذا ما اطبخ الچ اطبخ المنو قابل اخليج على البيض المحروگ؟
مَياسة: جاي أحبك زايد ترى دير بالك.
گرص خدي مبتسم
: - ما اريد ادير بالي حبيني بكل حيلچ.
بين سوالفنا وضحكنا كمل الغده صبينا السمچ والتمن بالصينيه وگصصت ليمون وطماطه وفلفل زينتها واخذنه الصينيه بالصالة گعدنا واحد گبال الثاني وصدگ السمچه چانت تذوب بالحلگ والتمن الأحمر نثري يخبل اول مرة هيچ يضبط وياي وهوَّ يفلسلي سمچ ويخلي گدامي حتى لا تتلف أديه مسوية روحي رقيقة اول ايام بعدين أصدمة مو من اول يوم.
اكلنا وكملنا گمت غسلت المواعين وبخرت البيت سويت چاي مهيل كوبين و رحت گعدت بصفة انطيته كوبة سحب راسي خلاه على چتفه واخذ ايدي يلعب بأصابيعي مبتسم
محرَاب: فدوة أروح الأيدچ.
تَسنيم.
گعدت الصبح على صوت المنبه رحت للدوام شغلت روحي ويَّ البنات والمدرسين سوالفهم تصفنني كل ما اصعد الدرج وانزل يشوفني واحد وكلهم على نفس الجملة
: - تَسنيم لا تطيحين ونخسر مية ترى الشاطرات تنحسبن
: - ما اطيح استاذ محصنه
: - علوية دخيل بختچ.
ضحكت بوجهه مجامله حتى هنا يذكروني بي وين أهج منه بعد اجه استاذ صادق بأيده الاوراق بس شافني دار على الاستاذ يگله
: - تسنيم واگفه ولك المية واگفه.
تَسنيم: استاذ صادق ابو عيون الزرگ راح تحسدني لان تدري العيون الزرگ حاسودات.
ضحك حيل على سالفه ابو عيون الزرگ يزودني درجات كل ما اكله ابو عيون الزرگ رجعت للبيت الظهر اول ما فتحت الباب كفختني ريحه مرگة البامية وصوت ضحك كافل وملك واصل للشارع دخلت للهول وشفتهم فُرات گاعد بالگاع منطي ظهرة للحايط كافل يجر بالشماغ إلى على امتونه وملك تحط قراصات بشعرة وهوَّ يضحك ويصيح
: - ولكم بوية هدوني لا أگوم انعنع عضامكم
كافل: بويه شبيك خل نلعب بيك.
سَنابل طلعت من المطبخ تضحك وتگله
: - والله يا ابو كافل انتَ عودتهم اتحمل نتيجة دلالك.
اول ما شافوني ملك ضحكت واجت طفرت عليَّ
: - عمة عمة جبتيلي نستله؟
شلتها وبستها حيل
: - جبتلچ نستله وجبتلچ روحي وياها
كافل: شتسوي بروحچ تريد النستله طلعيهن يله وين مالتي.
يحچي بقلة صبر ما عاجبه واني لعبتي اخلي عقلي بعقل الجهال فتحت جنطتي طلعت النساتل ثنينهن الاجيبهن الهم كل يوم انطيت وحده لملك وفتحت الثانيه مال كافل اكل بيها گباله متلذذة
تَسنيم: الله اول مرة اكل هيچ نستله طيبة.
كافل وگف مصدوم عيونه صارت بگصته دمع وهوَّ يشوفني اكل بنستلته بكل برود سَنابل وميرار وفُرات يضحكون ثاري كلنا نقطه ضعفنا دموع الجهال وگف يفرك بأديه وجهه صار احمر
كافل: عمة والله هاي مالتي؟ فُرات شوفها؟
فُرات: شسوي يا بعد ابوك انتَ زلمة ميخالف هذا اختبار.
باوعت لكافل وغمزت لملك لجانت تاكل وانوب تخلي اديها على حلكها تضحك.
: - والله يا كافل تخبل طعمها عبالك بي عسل تعال هاك عضه
مديتله اللگمة الأخيرة وهوَّ فتح حلكه واتقرب يريد ياخذها بس سحبتها بسرعه واكلتها.
: - خلصت يلا المرة الجاية من اجي استقبلني ببوسه مو بطلعي النساتل حتى احبك.
راح گعد بصف ابو عود ما مهتم
: - بطلت ما اريد بس يجي جسام اكله يجيبلي كارتون هوَّ يحبني واذا اجيتي وگلتي انطيني وحده والله ما انطيچ واكلهن گبالچ.
حسيته ضربني على راسي من جاب طاريه اتحمحمت بسرعه وفُرات باوعلي بنظرة سريعة يريد يتأكد الأسم أثر بيه لو لا.
فُرات: روحي بدلي وارتاحي حتى نصلي ونتغده واليوم سوينا تمن ابو الحكاكة علمودچ لان تحبينه.
ضحكت وگلتله
: - اويلي نقطة ضعفي.
عفتهم ودخلت الغرفتي ابدل ضحكت بأستهزاء حتى الجهال يتعمدون يجيبون طاريك گبالي عساك دوم ببالهم وبعيد عن بالي.
بدلت ملابسي ولگيت سنابل وميرار فارشات السفرة بنص الهول وريحه الباميه تضرب بالراس صلوا وكملوا بقيت بس اني رحت اتوضيت وصليت وأجيت گعدت يمهم فُرات گاعد يشاقي بكافل إلى بعده مطنگر ومنفخ خدوده علينه وسَنابل توزع بالخضرة على السفرة اكلنا بهدوء.
وفُرات شال وصلة اللحم الچبيرة حطها بماعوني وگال
: - البارحه خبلتينا بدمچ اليوم اريد تعويض.
احاچي حلكي متروس
: - اني اكل بدون ما تطلب اصلاً لعبتي.
ضحك يغم بيه وكافل زعلان عليَّ واني زعلانه على منتظرين واحد من عدنه يبادر يراضي الثاني بس ثنينا ذابحنا الكبرياء.
كملنا وشلنا السفرة رحت وياهن للمطبخ اساعدهن بغسل المواعين خليت قوري الچاي على النار وحضرت الكوابة وانتچيت على الكاونتر سَنابل شغلت المكناسة الكهربائيه كنست البيت وبخرت وميرار واگفه تغسل بالمواعين وتباوعلي بشك هزت راسها وحچت.
: - اشربي چاي زين لا يطگ خشمچ دم ترى مو سادة احنه و بس نشيلچ بحضوننا تصيرين زينة.
هزيت ايدي ما عاجبني
تَسنيم: شلون حضن مال واحد ابو نسوان شجابة شوداه على السادة هذا والعياذ بالله أحنه ساده اكثر منه.
ضحكت تگلي حرام لا تحچين هيچ انوب ترد تگول
ميرار: شوهتي تشوه وجهه خرمشتي رگبته خرمشتيها بس براسه ما عضيتي هيچ الغيرة تسوي صار يوسف من وراچ كل يوم شاگه قميصه.
تَسنيم: يمه هجم بيت العيارة تذكرين من غرتي على مهران و ردتي ترگعين المزهرية براس حنان وتموتينها لو ما فُرات؟
ميرار: الوضع چان يتطلب هيچ عيني.
تَسنيم: امداچ وامده الوضع وياچ اذا جبتيلي طاري لفو السادة بعد أغط راسچ بالسنگ
گلت هيچ وهيَّ سرفنت رداناتها تغرد
ميرار: هيچ خوش مرة! وعلى أيدچ اكسرها الجاهله الزعطوطه ام السادة مسوية روحها ما تغار عمي هذني طاكات جواي ترى گولي احبه وريحي گلبي تعبت اني.
تَسنيم: ما احبه لو تموتين ام الرتب تموتين ع الرتب
ميرار: ههههههههههههه حلوة حبيتها حبيتها.
سكتت اهز بايدي وهيَّ كل شويه تتذكر ام الرتب وتضحك للعصر ودخل كافل يضحك بأديه كارتونه مال نساتل يعيب عليَّ ويصيح
: - عمو جسام جابلي ضلي انتِ كاتلچ الفگر.
عضيت اصبعي متحلفتله
: - انعل ابوك وعمك جسام بهالساعة خلي يطلع ابوك وأكتلك اصبرلي.
ضحك ما مهتم و انطه لملك وحده ولميرار وسنابل وزع الهن وضم الباقي يباوعلي متشمت فرحان لان أخذ ثاره سهله يا كافل اذا ما انتقمت منك.
طلع فُرات بالديوانيه لان أجو بيت خالة فضة البنات راحن للديوانيه بس اني بقيت بالصالة گاعده ما مستعدة اواجهه مرة ثانية صوت ضحكهم يوصل ليمي ميرار دخلت تضحك بأيدها نستله تاكل بيها وتباوعلي
ميرار: كافل گال لجسام خالة ما انطيتها نستله وضلت تبچي وجسام ضحك وبكل صلافة گبالهم كلهم گال خالتك تستاهل مو بس نستله تستاهل ماي العيون.
تَسنيم: خرب شيريد مني هذا شيريد فگس بعينك كون.
ميرار: وعلى كسر گلبي عينه على الباب مقهور منتظرج تدخلين.
تَسنيم: اني من اشوفة ضغطي يعلگ لا ارادي واليوم راسي يوجعني يريد ينفجر ماريد اشوف وجهه لان راح يقهرني لو يغثني حتى لو ما يسوي شيء.
دخلت سنابل مبتسمه وگالت
: - تسنيم ميرار خالة فضة تريدجن تگول چا اني غير اجي علمودهن تعالن عيب تسأل عليچن.
نفخت بضوجه وگمت عدلت حجابي اهمس لميرار
: - وعلى اذا جسام فتح حلكه وياي اطلع ضيم گلبي كله بي.
مشيت لباب الديوانيه گلبي يدگ سريع اول ما دخلت عيني طاحت بزاوية الديوانيه چان گاعد بصف فرات لابس الدشداشه والسبحه بأيده اول ما شافني عدل گعدته والسبحه وگعت من ايده على الزولية.
تَسنيم: السلام عليكم.
ردوا السلام كلهم وخالة فضة فتحت ايدها تريد ادنگ تبوسني بوستها وهيَّ تتلمس بوجهي گعدت يمها وهيَّ تحچي بخوف
: - هلا يمة هلا ببنيتنا الغالية شبيچ يمة يگولون البارحه اتخربطتي؟
باوعت لجسام شفته عاصر ايده منتظر جوابي ابتسمت وگلتلها
: - اي والله خالة الجو چان مسموم مدري شلونه و صعد ضغطي
دنگ يفر بالسبحه يريد يسمع اكثر.
فضة: والله يمه الناس اشكال والوان الوحدة لازم تحصن روحها من العين ومن غثيث الكلام
تَسنيم: وعلى صحيح كلش صحيح.
فُرات اتحمحم يخزر بيه انوب مسح وجهه وگال
: - تسنيم سباعيه ما عليها خوف.
خالة فضة ضحكت والتفتت على فُرات تگله
: - وعلى اني جاية اشكيلك من جسام شلع گلبنا ما يرضى نفرح بي بنت عمه شفتوها بالعرس ما شاء الله عليها مثل الگمر و كل الوادم تگول ثنينهم لايگين لبعض شيريد اكثر حتى مبين جاي يهواها.
رسمت على وجهي برود الدنيا كلها فر السبحه حيل عينه بعيني
جسام: بنت عمي مثل أختي يمه، الگلب وما يهوى وانا گلبي ما يلوگ الأي وحدة إلا الأهواها.
لويت حلكي بأستهزاء ما يلوگ الأي وحدة ويدگ سوالف وياها لو يلوگ شلون شگد متناقض.
فُرات ساكت على اعصابة ما يريد يزعل خاله فضه اخر شيء ما اتحمل
: - تسنيم گومي شوفي الجهال حبيبتي
هزيت راسي وطلعت من الديوانيه اهفي على وجهي خرب روحك جسام كل يوم تخليني بموقف اضرب من القبله رحت للمطبخ شربت ماي بارد دفعه وحده حتى سنوني وجعتني اجت وراي ميرار تضحك واني ادردم.
تَسنيم: شفتيها شلون تحچي بيها گبالنا يعني السالفة مو بس كلام السالفه بيها خطبة وهوَّ يسوي روحه الگلب وما يهوى شگد جذاب.
عفت ميرار تضحك وتدردم و رحت لغرفة الجهال لكيت كافل نايم وملك تلعب بلعابتها كعدت بالكاع وسندت راسي على الجرباية فجاة سمعت صوت حركة قريبة گمت طلعت وگفت على صفحه ما انشاف بيها شفته واگف گبال ميرار بباب الصالة هيَّ تضحك وهوَّ يحچي بقهر.
جسام: خوية عليچ محمد روحي صيحيها كلمتين بس خليها تسمع مني لا تروح تصدگ بحچي امي وتزيد عنادها انا گوة جاي اخليها تميل إلى الله يشهد انا ما حاچي وماريد غير بُلبل.
ميرار: البنية ضغطها علگ امس من وراك وبعدها مقهورة منك اذا طلعت هسه راح تقهرك اكثر عوفها ترتاح.
جسام: راضي تقهرني بس خلي أحاچيها بداعة مهران
گلبي وگع بين رجليه هذا شبي؟ مخبل؟ فُرات لو شافه هسه يذبحنا كلنا.
من حلفها بمهران باوعتله بحيرة ودخلت تريد تصيحني طلعت قبل لا تجي تحاجيني بسرعه وگفت گباله ضايجه وگلت بصوت ناصي
: - ما يحتاج ميرار تصيحني اجيت اسمع هاي الكلمتين حتى تروح الأهلك وارتاح ونرتاح.
جسام: وحق من انزل القرأن ومعزتچ عندي امي تحچي من يمها انا عيني ما شافت غيرچ ولا راح تشوف.
تَسنيم: انتَ عايش بوهم جسام أطلع منه.
باوع الأنحاء وجهي يحچي بشرود
: - وهم؟ ليش وجهج ذبلان؟ ليش عيونچ حمر؟ لا تگولين ضغط وتعب دوام القهر والغيرة البگلبچ عليَّ هيَّ سوت بيچ هيچ ليش ما تعترفين انتِ ذبلتي من شفتيها واگفه يمي؟
لويت حلكي بأستهزاء گوة مسيطرة على روحي احجي ببرود
: - شنو انتَ واذبل عليك سيد هذا كله من قلة النوم مو من قلة عقلي حتى أغار على واحد مثلك.
عصر السبحه بأيده حيل
: - واحد مثلي گلتي؟ چا وهذا الواحد ليش البارحه خشمچ طگ دم من القهر لان شفتي يضحك لغيرچ؟ تسنيم شلعتي گلبي من مكانة انتِ تدرين بگلبي وين ليش تغارين ليش تعذبين روحچ وتعذبيني بهالعناد گلبي ينمرد من أشوفچ متأذية من وراي.
مسحت عيوني حيل وحچيت عيني بعينه
: - جسام اني اتأذى وانقهر من تحچي هيچ.
: - ليش؟
: - أحسك متأذي هم ما احب احد يتأذى من وراي احس بذنب.
باوعلي يحچي بصوت مخنوگ
: - وانا اتأذى من اشوف عيونچ تذبل اتأذى من احسچ بعيده عني وانتِ اقرب من الروح غيضچ عليَّ يذبحني عقل ما يضل براسي من تدورين وجهج عني عاركيني شتسوين سوي بس لا تعزين وجهچ علي.
سحبت نفس طويل والرجفه البأيدي حاولت اخفيها واني اضغط على اطراف ثوبي.
تَسنيم: جسام انتَ جاي تحملني فوگ طاقتي جاي أكلك اتأذى من تحچي هيچ ليش مستمر.
جسام: حبي الچ أذية؟
سكتت والكلمة بقت تدور براسي باوعتله تايهه وحسيت گلبي انلچم من نبرة صوته ما ردت اضعف ولا ابين اله كلامة يهزني.
تَسنيم: لا تفسر كلامي بكيفك اني جاي اكلك لا تحملني ذنبك وذنب تعبك هذا روح عيش حياتك واتزوج غيري.
يحچي بعتب يذبح
جسام: علمود تموتين بساعيتها، لو يجيبون بنات الدنيا كلها يخلوهن بصوب وانتِ بصوب عيني ما ترف لغير خيالچ لا تظنين برودچ هذا يخليني امل منچ بالعكس يزيدني حرگة برودچ يحرگني يشعلني.
عضيت شفتي اسيطر على دمعتي
: - زين شوكت تمل وتعوفني؟
همس بنفس هدوء صوتي يباوع لعيوني
: - من تغمض عيوني بالگبر، ساعتها أمل وأعوفچ.
عافني وطلع قبل لا يسمع مني اي حرف بقيت واگفه بمكاني وصدى كلماته يتردد براسي أحس روحي عاجزة من كل النواحي.
ميرار.
جريتها من أيدها گعدتها على القنفة وهيَّ صافنه بالفراغ دمعتها بعينها جامدة وايدها ترجف وضعها يكسر الخاطر.
ميرار: شبيچ حبيبي بردانة تتغطين؟
هزت راسها لا وگامت من مكانها
تَسنيم: ما بردانه بس راسي يوجعني يمكن نعست
كمت جبت الها براسيتول وكلاص ماي شربتهن ودخلت لغرفتها تنام وترتاح.
راحوا بيت خاله فضه وجسام طلع كاتله القهر ملامح وجهه ماتتفسر يباوع للباب بحسرة.
وهيچ مرت الأيام بحلوها ومرها خلصت امتحاناتي النهائية الحمدالله كل شيء سهل بوجود فُرات ومُهران وسَنابل ودُجى سوون سونار سوية دُجى بيها بنية وسَنابل بيها تؤام بنية و ولد طرنا من الفرح بيهن على فرحتهن وكلنا متحمسين شوكت يكمل البيت الجديد نلح عليهم ياخذونا على ما خططوا باچر نروح كلنا حتى لو ما كامل.
گعدنا الصبح وطلعنا متقسمين على السيارات طبگت سياراتهم گبال البيت الجديد التراب مال الطابوگ والعمال تارس المكان اول ما نزلنا فُرات لزم ايدي لا طابوگ بالگاع خاف اعثر ونزل سَنابل وتسنيم والجهال.
محراب نزل من الدراجه ومياسة وراه لازم ايدها
: - شوفي مياسة هنا راح يصير مطبخچ اريد الطبخ توصل ريحته لراس الشارع.
: - هاي شلك بيها خلي يگضي السگف اول، بعدين انتَ تطبخلي اني ما بيه حيل عندي دوام
: - حبيبتي چا انا شعندي لعب؟
ومُرتاد فتح الباب لبَرائه بهدوء عيونه تراقب بس عمال ثنين فوگ يشتغلون
: - ديري بالچ بيبو لا تعثرين، مهران شوف العمال ذولاك ليش واگفين؟
هز راسه خوش و راح مادري شيحاچيهم شويه وراحوا رجع وگف بصفي فُرات ابتعد مسافة لزم أيدي حيل وهمس
: - تعاي نصعد أشوفچ بيتنا؟
اجه فُرات بسرعه سحب ايدي من ايده عدل حجابي وگال
: - لا تلوحين الحايط بابا حبيبتي يدمر ملابسچ امشي وراي خطوة بخطوة.
مهران صار بظهري بالضبط وگله
: - فرات عوفها انا يمها امشي ساعد محراب يفرش الحصيرات حتى نگعد.
فُرات: ما تروح انتَ تفرش اشتغل عدكم انا؟
بوسط هاللغوة نزلن نبعة وهيله الصارن صاحبات بسرعه چنهن صحبه عمر كل وحدة لازمة عوجيتها
نبعة: ولك فريت عوف البت تتنفس خنكتها صاير خيالها ترى مهران زلمتها بشرع الله خرب عقولكم القافله.
هيله: واحد يجر طول واحد يجر عرض تعالي يمه ميرار تعالي.
ضحكت و رحت يمهن وهنه يبوسن بيه مهران صاح عليَّ
: - لا تنزعين الكاسكيته زمزم لا الشمس تحسس وجهچ.
فُرات: ترى انا جايبها يعني لا تسوي روحك حنين براسي.
محراب اجه من بعيد شايل الحصيرة شمرها بالگاع وگال
: - مهران عوف ميرار هسه تعال شوف المطبخ السيراميك مالته اعوج.
راح مهران يشوف السيراميك وفُرات فتحلي ايده رحتله اضحك شبگني يبوس براسي ونبعة تتردم
نبعة: يختنگ بدونها يختنگ اذا ما يشفط بيها كل دقيقة
كرص خدودي يجاوبها
فُرات: روحي بيها جدة ما اگدر اتنفس اذا تبتعد ثانية وحدة هاي ميرار هاي نفس ريتي.
هيله: الله يحفظك الها ياحبيبي الأخو سند وانتَ سندها المايميل.
اتحسرت اتذكرت خنجر چان دوم يگلي انا سندچ الما يميل الله يرحمك يا روحي ابتسم يتشكر منها جرني من ايدي يهمسلي.
: - تعالي اشوفچ مكاناتي حتى تحفظينهن وتگضينها بس يمي ما تصعدين فوگ.
اتمشينا بوسط الطابوگ والبيت كله ريحه اسمنت وتراب بس چان صوت شقاهم وضحكهم مسوي للحيطان روح فُرات يأشرلي على الغرف ويحچي.
: - شوفي هناك فوگ راح تكونين انتِ وهذاك عود بس لا عبالچ تخلصين احنه كلنا جوة بنفس واحد منچ اطفرلچ انا وزعاطيطي كلهم طبعاً زعاطيطي اقصد البيت كله عدى نبعة وهيله.
: - وعلى اكيف اموت عليك اضل مگابله وجهك ليل ونهار
ضحك وباس راسي مرة ثانيه
: - يا دنيتي كلها انا الأموت عليچ والله أخلي يتندم لان بنى طابق ثاني انتِ بنيتي ياخذچ مني شني؟
: - اندري؟
سمعنا صوت جاي من ورانا
مُهران: خلصتوا غزل لو بعدكم طرگاعة الطاحت على راسك فُرات خلصت الكلمات الغزلية كلهن بعد يومين شلون اغزلها كلهن بگتهن.
حط ايده على چتفي بعنادة و درنا عليَّ يباوعلنا ضايج
فُرات: خلي الغزل الأهله انتَ خليك ويَّ ممنوع وأمرك سيدي ميرار تريد واحد يضحكها هيَّ بس تحبني ما تحبك ترى.
باوعلي ومسح على شاربة
مُهران: صدگ زمزم؟
فُرات: زمزموا راسك ان شاء الله أمشي حبيبتي جعنا
جرني من ايدي طلعنا واني اضم وجهي بزنده ميته من الضحك على ملامح مهران.
اول ما طلعنا لگينا اللمة تخبل مرتاد گاعد يراوي الخارطه بَرائه الخارطه بالموبايل وهيَّ تهز براسها ومحراب گاعد يمسح بوجهه من التراب ومياسة بصفه تنطي كلينس تضحك نبعة بس شافتنا صاحت
: - يا هلا بالباشوات وين صرتوا! ولكم سودنتوا البنيه عوفوها ترتاح.
جرني بصفه وگعدنا بصف نبعه شال استكان الجاي يشرب ويگلها
: - جدة انا قررت الغي الطابق الثاني مال مهران واعيشهم ويانه بالهول.
مُهران: اي اي بعد دوس ببطني بعددد طلع روحي شيگضيها وشيفضها وياك ما ادري الله يساعد گلبي بالحسين
فُرات: على كيفك ابو المواطنات لا تنجلط علينا.
سوالي لفة مال جبن وانطاني جاي ضليت اكل واستمع لسوالفهم مبتسمة فرحانة طول عمري أحلم بالعائلة والله رزقني بيهم يا رب لا تحرمني منهم ومن حنيتهم ولا توجع گلبي بواحد بيهم.
كملنا وگعدوا كل ثنين يسولفون بصفحه ساعه يتعاركون ساعه يتصاحبون راح فُرات طلع يشوف السيراميك الاعوج على گولتهم گمت من مكاني دخلت جوة استكشف كلش چبير عبالك قصر.
عيوني تايهه بالبيت حسيت بأيد قوية حضنتني من خصري عرفته مهران ابتسمت وخليت راسي على صدرة.
مهران: انتِ حالياً رهن الأعتقال وعندچ تهمة چايدة لازم نحقق بيها فوراً.
ميرار: يا ستار سيدي شنو تهمتي؟!
مُهران: تهمتچ سرقة راحة بال ضابط برتبة عقيد وتشتيت انتباهه بنص الواجب هاي عقوبتها حبس مؤبد بين ضلوعي.
ضحكت وگلتله
: - موافقة سيدي بشرط انتَ السجان وانتَ الكفيل.
همس يم اذني مبتسم
: - ماكو، تضلين بين ضلوعي لا كفالة ولا طلعة للموت.
ميرار: چا على الأقل حقق وياي سيدي ليش واگف.
مُهران: التحقيق وياه اعتراف تعترفين سلبتيني بگتي گلبي وعقلي وخليتيهن يمچ؟
ميرار: اعترف وابصم بالعشرة اني نويت احتلالك مو بس بگتك.
ضحك من كل گلبة وصاح
: - مو بنية فتنة! رسمياً راح اصدر امر القاء قبض عليچ بتهمة اغواء ضابط اثناء الواجب والتحقيق هالمرة ما بي محامي بس انا وانتِ وسهرة للصبح.
ميرار: وفُرات يلطم بالزواية مو.
دارني عليَّ مبتسم حاضن وجهي بچفوفة
مُهران: اموت على سوالفچ تنسيني الدنيا
: - يا بعد سوالفي عقيد.
قرب وجهه باس خدودي ثنينهن دفعته
ميرار: مو گتلك يچكچكن خدودي
مُهران: هاي شلون سالفة وين أوديهن زمزم اتعودي بروح ابوچ.
بحركه صلفة مني رفعت رجليه وبسته بخدة
: - اني ابوسك بس لا تبوسني لحد ما توخرهن
غمض عيونه عبالك كهرباء سرت بجسمة و لزم ايدي حيل
مُهران: خرب اروحلچ فدوة، تشعل اهل اهلي وتگلي لا تبوسني منين اجيب صبر ايوب.
ميرار: اصلاً اني احبهن ما اقبل تزينهن چذب بس خليك بعيد عن خدودي.
مُهران: چا اروح اموت أحسلي
ضحكت بصوت عالي على ملامحه الأنخطفت
ميرار: اسم الله عليك من الموت سيدي چا بعد منو يحقق وياي ويحبسني بضلوعه؟
ابتسم گرص خدودي وجرني لصدرة شابگني حيل ضايعة بحضنة
مُهران: وسيف على انتِ عمر ثاني انكتبلي أعشگچ ميرار وروح أمي احس روحي طفل ضايع وذبوه بحضن امه.
ميرار: اني هم
مُهران: انتِ شنو احچي يا بعد مُهران
رفعت أديه شبگته وهوَّ دافن راسي بصدرة عطرة ترس ريتي
ميرار: أحب وجودك هواي
مُهران: چا حبيني هم ليش بس وجودي ما كسرت خاطرچ؟
رخى جسمة بين أديه ابتعدت وعيت على روحي هسه وكت مشاعري تطلع وبهالمكان! هوَّ يباوعلي عيونه ذبلانه مسح گصته حيل ومدلي أيده
مُهران: هالبيت راح يگضي روحي وما يگضي زمزم شلون بيه.
لزمت ايده الدافيه وهوَّ عصرها انوب شالها لشفايفه يبوسها
مُهران: شگد ترفة شواربي من تلوح أيدچ تنگلب حمرة
ميرار: چا حتى من أگلك يبزن تصدگ عمي غير چنهن سچينات.
مُهران: بربچ زمزم چا أصير زلمة ضيجة خلگ بلا شوارب اذا زينتهن اطيح حظج اذا قبلتي بيه صدگ چذب غير تصيرين مضحكه.
: - هههههههههههه لا والله ترى الحلو حلو
مُهران: حلو واملط مثل جسام لا هلا ولا مرحبا
: - ترى جسام لايگ لملامحه هيچ.
رفع حاجبه ما راضي
مُهران: راح افرك حلگچ أحچي عدل زمزم لا أشمرچ منا.
: - ما حچيت شيء
: - أموتچ، هالگلام ما ينگال لغيري اشتعل واشعل اهلچ حتى لو ما مقصود.
ميرار: انتَ الأصل وكلهم تقليد بعيوني لا تحرگ دمك.
اتبخرت عصبيته ورخت ملامح وجهه مبتسم
: - لا تخلين لسانچ يزل بغير أسمي بعد، صبري يخلص عند عيونچ ينتهي.
باوعتله وضيگت عيوني
: - واذا زل شتسوي؟
اتقرب ونزل راسه لمستوى وجهي
: - اعض لسانچ أخليچ ما تندلين دربچ لا تلعبين بالنار ترى نار عشگچ واصلة لسابع سما يجوز حتى تحرگچ بدون لا أحس.
ميرار: تحرگني مهران؟
هز راسه لا وباس گصتي بوسة خاطفة
مُهران: تعبير مجازي بابا من أروح فدوة الهالعيون السبتني.
ابتسمت وهوَّ يبتسم على أبتسامتي طلعنا رجعنا يمهم لگينا الجو منخبص واحنه ما حاسين اتقربت اريد بس افتهم شكو وهمه وجوههم تنطي الوان وفُرات يفتر عليهم واحد واحد ويصيح متسودن
فُرات: ملوكة ماكوووو بنتي وين أختفت حاچوني؟