رواية أبناء الشنار للكاتبة مراسيل الفصل السابع
: - اوف ورد يشم ورد.
جمدت بمكاني حتى ما گدرت التفت شمرت الصونده من أيدي والتفتت بسرعه وصار بوجهي اسعد يباوعلي مبتسم.
شعره نازل على عيونه وجهه عاكس عليه الضوه ومكتف اديه الصدره اتوترت ما اعرف اروح لو ابقى لو شنو اسوي درت وجهي اريد ادخل ما احس ألا انجريت من ايدي وانضربت بصدره نترت ايدي من ايده بعصبيه وصدمه من تصرفه.
: - أيدك اكسرها لو گضيتني هيچ انوب.
مال راسه على صفحه يباوعلي
أسعد: اوف اخرب ع الصعب.
: - تخرب على الأهانه مو على الصعب.
خزرني وعض شفته وهمس
أسعد: بنات عمي حلوات بس لسانچن مال گص.
ابتعدت عنه افور بنفسي اركع السندانات براسه بس خفت اخواني يجوونه يكتلونه فوگ كتلته شباقي منه هوه ايده مجبرة ووجهه متروس لزگات جروح ردت ادخل وصحت عليَّ قبل لا أسد الباب.
: - حظك اطيحه لو وصلت لصفحتنا بعد اگعد بمشتملكم واستچن لا اخليهم يكسرون ظهرك.
گلتها وطبگت الباب واسمعه يسب ويفشر دخلت الغرفتي ركض ارجف ايدي على گلبي كل شوية اگول هسه يسمعونه ويتخبلون على وهذا مبين سگط يذب عليَّ تهمة كلش عادي.
قفلت الباب واتمددت بفراشي لگيت لوزة غاطة بنومها على جربايتي رحت نمت يمها وحضنتها وغمضت عيوني احاول انام.
سَنابل.
المَوتور: اختچ ما موجودة وي البنات إلى طلعناهن.
نطق هل كلمات واحس الدنيا انطفت بعيني عيوني غوشن من الدموع صرت احس الدنيا تفتر بيه ما اريد اصدگ تَسنيم ما موجودة جاوبته بصوت يرجف
: - يعني ميته اختي ميته؟
هز راسه لا ويگلي
المَوتور: خاب لا شمالج لو ميته چا گتلج بس ما موجودة بالمكان إلى چنتن بي اصلاً.
سَنابل: شلون والله اني مو مخبلة جاي اكلك چانت وياي احنه بنفس المكان وين راحت؟
باوع المحراب وصافن بحيرة ما اگدر اوصف شعوري بهاللحظة كل شيء انسد بوجهي گمت ارجف جسمي كله يرجف ودموعي ينزلن ماكدر اتحكم بيهن.
: - شلون ما موجودة شلون؟ والله چانت وياي چانت تلزم ايدي چانت ترجف بحضني ودمعها ما نشف لحظة چانت گدامي لا تگلولي ما موجودة لا تخبلوني!
اباوع بوجههم ادور واحد يصدگني بس محد يرد منهم احس روحي جاي تطلع عالبطيئ قدملي كلينس ويهمس
المَوتور: امسحي دموعچ واخذيها مني اختچ ترجعلج انطيتج كلمة مو انا اليرجع بكلمته.
محراب: كافيچ خوية شني السالفه هيه هيچ حتى مو زين هيج تفاولين عليها اسكتي خلي نسألج كم سؤال جاوبينا واحنه نرجعها الج واحنه الممنونين.
هزيت راسي ب أي واخذت الكلينسه من ايده مسحت دموعي واباوعلهم انتظرهم يحجون خايفة من الجاي خايفة اسمع بعد خبر ما يتحمله عقلي گعد گبالي وباوعلي بتركيز.
المَوتور: ركزي وياي اريدچ تروحين للحظة إلى چنتي بيها هناك تتذكرين شكلهم لهجتهم ملابسهم أي شيء براسچ سولفي.
هزيت راسي مسحت خدي برداني احاول استجمع افكاري كل شيء چان فوضى بس لازم احاول
سَنابل: چان اكو واحد منهم كله هوَ يدخل لغرفتنا چان طويل وصوته خشن ويگول طلعوهن بسرعه وهمه يسحلون بينا من مكان لمكان چان يمشي ويهدد بينا يگول اذا صيحتن بعد راح تختفن من الوجود ومخلي السلاح براسنا بس وحده تبچي لو تصيح يحط طلقة براسها ويكتلها گبال عيوننا.
قبض اديه حيل يعصر بيهن ويحجي من بين اسنانه
المَوتور: شكد عددهم وانتم هم شكد عددكم.
سَنابل: بالغرفة إلى اني بيها خمس بنات ويه تَسنيم وتلاثه أطفال وراها دخلوا 3 زلم من عدهم اخذوا نصهم بس اكو واحد منهم چان بس يسوي أشارة والباقين ينفذون احس هو الراس المدبر بيهم.
محراب: شفتي شكولهم؟
سَنابل: لا چانوا لابسين اقنعه بس عيونهم مبينه واحد منهم چان عنده بس عين وحده وشكله يخوف.
بس حجيت هل جملة فتح عيونه وصفگ اديه والتفت على محراب يكله
المَوتور: شفت مو گتلك العار مقسمهن اقسام كل قسم بمكان تگلولي لا خرب بيكم خرب باليمشي بحجيكم.
اتخبل ضل يصيح وهذا هم يجاوبه بصياح
محراب: وشمدرينا لا تصيح انتَ مو هيج تنحل الأموررر.
المَوتور: ديله هسه انتَ گلي شلون راح نطيح بيهم بعد؟ عبالك سهله هسه عرفوا وغيروا اماكنهم خرب انا شبيه ومشيت بحجيكم اعرفكمممم زمايل گلتلكم مو بس بالبناية هاي يابه مقسمينهم كل مجموعه بمكان.
وانا چنت اريد ندخللهم وهمه بمكان واحد بس لا كلكم تگولون ننتظر ندرس الوضع وهاي النتيجه حلوها هسه يله.
محراب: سد حلكك يله لا تمسلت انتَ تريد كلشي عمياوي ارعن ما تفكر بالعواقب احنه نفكر بعقل مو برعونه.
خليت اديه على اذاني وغمضت عيوني ما اريد اسمع صياحهم احسه سچاچين بگلبي ما اگدر ما جاي اگدر اتحمل كل هذا.
حسيت بي گعد صار بمستواي واني لامه رجليه لصدري ومغمضه عيوني واديه على اذاني ما اسمعهم شنو يحجون فتحت عيوني وصار بوجهي خفت منه رجعت ليورة فرك وجهه واستغفر.
المَوتور: كافي اسكتي ثولتيني بدموعج كافي تبچين خرب بررراسك محراب خرب بالجابك.
محراب: خاب اكل نعل شعليه انا رايح واذا خابرتني وگتلي على شيء حظك اطيحه انوب.
دار عليَّ خزره ويحچي معصب
المَوتور: الله لايعوزني الك الخوينس ابو النسوان امشي اطلع بره امشي مسوي روحه شريف ونص الليل يطحن جكاير ويسمع اغاني چنه مطلگه وبرگبتها خمس جهال.
محراب: جاي تفتري عليه خلي اطلع عمي انتَ تذب طراگيع ما اوصلك بعد.
گالها وطلع بسرعه وطبگ الباب وراه واني بعدني على گعدتي والمَوتور گاعد ركبه ونص گبالي
المَوتور: باوعي.
: - ها.
مسح گصته بأيده وگام يفتر واني بعدني على گعدتي
: - راح ادورلج اختج وارجعها لاتبچين خوش؟
مسحت دموعي اهز راسي ب أي
: - خلي اطلع ادورها وياك؟
باوعلي مستهزء
: - شلون تدورينها بله؟
مسحت دموعي مختنگه
: - ادور على هذا ابو عين المفقودة وأجيبها.
باوعلي صفن وهز ايده
: - المفقودة؟
روحي طالعه باع اني شنو احچي وباع هوه وين مركز
: - اكلك لا تسهتزء؟
: - احاول.
: - شوف.
: - شفت غردي ولو اعرف ما عندچ حچاية بيها خير.
: - اريد اطلع ادورها شعليك بيه انتَ وليش تقفل الباب علي؟
باوعلي يخزرني درت وجهي عنه بگلبي النار
: - علمود اكسر رجلج بس تطلعين منا ترجعين تنخطفين لا تتصرفين بغباء بروح الحسين حيلي خلصان.
: - اني اريد اتصرف بغباء ياهو مالتك انتَ
: - اي ميخالف اسكتي يله.
حجاها بنتر ويعصر براسه بألم اختنكت ردت مكان ما بي هوه گمت بهدوء وهوَ حتى ما منتبه إلى دخلت بوحده من الغرف وذبيت نفسي على الفراش خنكت روحي بالبطانيه.
وموتت روحي من البچي حتى دموعي احسهن خلصن ما اعرف شلون وشوكت فزيت من نومي على صوت يدوي بالبيت مشغل بمسجل ماعرف شنو بس الصوت حيل عالي باوعت للساعه ب 12 ونص بالليل حيل هاي شگد نايمه.
مطيت جسمي بكسل وكمت اريد اطلع بس متردده الجو هدوء بس صوت قصيده لباسم الكربلائي يدوي بالبيت گعدت على الچربايه لامه رجليه الصدري وصلت القصيدة للمقطع هذا واحس دموعي تطيح جمر على خدودي كل كلمة تحرگ روحي.
فرگتك ذلتي وشوفك يفرحني
كلام الشامت بفرگاك يجرحني
يريت الموت اخذ روحي ويريحني
اذا انساك الله لا يسامحني
اخاف اشتكيلك واعذب دليلك
واريد بدموعي ابرد غليلك
تودعك دمعتي واخاف برجعتي
بعد ما اشوفك.
مسحت دموعي برداني وگمت فتحت الباب بهدوء مشيت شوي باوعت الأضويه كلها مطفيه بس ضوه البلازما مشتغل على هل قصيده بالبيت و كل ما تخلص ترجع تنعاد مرة ثانيه من البداية.
صارت عيني على المَوتور حاط ايده على عيونه ونايم مادري مغمض اتقربت عليَّ اباوعله وجهه احمر وعرگان ونفسه يصعد وينزل خطيت بعد خطوة صرت گباله دنگت حطيت ايدي على جبينه ياربي! مشتعل نار حرارته فوگ المعقول.
: - يمعود تسمعني يمه لا تموت شبيك مو وكتها.
ما رد بس اتحرك شويه هزيته بأصبعي خفيف
: - احجي عليك الله.
جفنه اتحرك عينه انفتحت شويه لسانه ثگيل
المَوتور: ماي شمالچ حسي.
رگضت للمطبخ بالظلام فتحت الثلاجه اخذت بطل ماي ورجعت گعد بصعوبه وقربت بطل الماي من شفايفه اديه ترجف شرب شوي ورجع احسه ما يگدر يفتح عيونه.
حجه بصوت مبحوح يأشر بأيدة
المَوتور: باوعي افتحي الجرارات إلى گبالج اكو طبقة مال حبوب تلگينها گبالج جيبيها.
سويت مثل ما گال جبتله الطبقه انطيتها اله اخذها بأدين يرجفن اخذ منها حبايتين ونكث راسه عبالك يريد يرجع لوعيه گعدت يمه حجيت بهدوء.
: - اسمعني مو تموت انتَ وعدتني تدور على أختي مايصير تعوفني بنص الطريق حرام عليك.
هز راسه مبتسم بقهر وهمس
: - صدگ لو گالوا كلمن يدني النار الخبزته.
صفنت ما فاهمه معنى الحجاه
: - يعني شنو؟
فرك عيونه حمر ينفتحن وينسدن
: - يعني انتِ ما تريديني اموت بس علمود الگه اختج؟
: - يعني اي بس بكل الحالات يارب تبقى عايش انتَ خوش رجال مبين.
: - هم انعم الله هيچ احسن من الماكو.
رجع اتمدد ومتغطي مغطي حتى راسه بس ما نايم يتحرك ضليت گاعده گباله خاف يموت وبعد منو يدور اختي ويلگاها مرت نص ساعه وهوَ على نفس الوضع واني گاعده گباله حسيته اختنك.
گمت بهدوء گضيت طرف البطانيه اريد ارفعها من وجهه وخرت منها شوي مديت ايدي اتلمس جبينه هذا بعده مصخن گاب نار بعده مغمض واخترعت من سمعته يگول.
المَوتور: تريدين تغتصبيني تستغلين ضعفي؟
وخرت ايدي من وجهه وبنفسي اطگه راشدي اعدل ملامح وجهه بس مريض خطيه لا يتخبل عليَّ وين اولي بهالليل
: - احترم نفسك شكد اللفاضك بذيئه من حورك وا...
ردت اكول الكلمة الگالها بس گضني المستحه همزين ما كملتها
المَوتور: شگد مؤدبة ما كملتها ناوشيني الريموت وروحي كملي نومتچ يلا يحلوة.
شمرت عليَّ الريموت وگمت
سَنابل: خوش بس مو تموت.
المَوتور: عود اخابر ملك الموت اگله عوفني چم يوم ولايهمچ.
هزيت ايدي ورجعت للغرفة سديتها ورجع شغل القصيده مرة ثانيه وبقت تنعاد وتنعاد الى أن غفيت مرة ثانيه بدون لا احس.
دُجى.
دنيا الليل ومحراب طالع وامي وابوي بغرفتهم وسادين الباب مخليه ايدي على گلبي بخوف ورهبه واني اسمع حديثهم.
تهاني: رجعت صفوة وفداء راح تفتح علينا بيبنان ما تنسد وراح يصير بحر مال دم ما اله نهاية!
معتصم: ما يصير شيء ابوي ما يخطي خطوة اذا ما متأكد منها.
وامي تحچي بهمس بس العصبيه طالعه من صوتها
تهاني: تدري شيصير اذا ابن ثابت عرف معتصم هذا شيطان مو بشر ما يوگف بعينه أحد ولا يهاب أحد بس تطبگ عنده يسحبنا للشارع واحد وره واحد نخسر كل شيء نضل مشردين استوووعب.
معتصم: هوَ احنه ساكتين ليش مو لان هالبيت إلى لامنا بأسمه؟ والا چا من زمان نهيته من الوجود ومحد عرف گاعه وين.
سكتت ثواني ورجعت كملت كلامها بنبرة واثقة
تهاني: المَوتور ينهيكم وما ينتهي واتذكر كلامي زين.
معتصم: ما يگدر يسوي شيء لا يضل بالچ گاضينه من ايده التوجعه.
تهاني: ايده التوجعه يبترها ومحد يعرفة بگد ما اعرفه!
معتصم: راح تشوفين.
تهاني: ما ادري شنو تسوون سووا اهم شيء محراب معتصم محراب روحه معلگه بروح المَوتور اذا صار بي شيء ابني يموت وساعتها اني إلى راح اصير ويا ضدكم!
معتصم: هوَ بس محراب ولدنا كلهم حگ باطل همه وياه عاميهم على عيونهم الله لا يراوي الخير وينتقم منه.
سمعت خطواتهم تقترب من الباب رحت گعدت بالمطبخ على الكرسي حيلي بايد وراسي يريد ينفجر من الصدمة البيت إلى عايشيت بي بأسمه؟ مو بيت جدي؟ مو بيتنا احنه شلون ما دريت وشلون ما حسيت.
شلون ما سألت روحي ولا مرة ليش يسكتون اله وهوَ يدوس ببطنهم ويمسح بيهم الگاع وليش محد يناقشه ودائماً كلمته إلى تمشي غصباً عليهم حسيت النقط صارت على الحروف واجاني جواب لنص الاسئله إلى براسي.
انفتح الباب ودخل محراب يفر بالسويچ ويدندن مثل كل مرة
صارت عينه عليَّ عگد حاجبه مستغرب اجه بأتجاهي ويگلي
محراب: شمالج ولچ مريضه شني؟
ما اعرف هوَ يعرف لو لا بس سكتت وراح اسوي روحي ما سمعت شيء حتى ما اطيح بمشاكل اني في غنى عنها مابيه حيل حبسة المخزن
: - لا حبيبي ما بيه شيء.
انفتح باب غرفة اهلي طلعت امي ابتسمت من شافت محراب وهوَ راح الها يحضنها ويكرص بخدودها ويكول
محراب: بويه كيك كيك مو مرة شگد مشتاقلج خرب.
تهاني: انتَ صاير ثكيل ما تنشاف غير نشوفك يا ماما ما يصير كله شغل شغل شيبقى بيك هيچ
محراب: چا شسوي تدرين بيه ما احب اگعد بدون شغل اختنگ.
گاعده بمكاني اباوعلهم يحجون بمواضيع مختلفه وهوَ كل شوي يتغزل بيها ويكرص خدودها وهي تخجل وتضحك وتبوسه.
حسيت روحي غريبة بيناتهم وحسيت گلبي يوجعني شيصير لو تحبني مثل ما تحب محراب شيصير لو ما تكرهني وشيصير لو اعرف ليش تكرهني اصلاً مخليه ايدي على خدي وهوسه مال افكار براسي فززني من صفنتي محراب يگلي.
محراب: الصفنه مو الچ الأبو صابر.
: - الك يعني.
تهاني: احترمي اخوج!
محراب: چا ما كلتيلي احترم اختك يابويه من النسوان غضب الله عليجن.
دُجى: حيايه مو نسوان اعوذ بالله.
محراب: الله لا يبلانا خويه شو تعاليلي.
ابتسمت وگمت گعدت بصفه وهوَ حاضني ويبوس بخدودي وانوب يطگني راشدي وانوب يعضني طلعت روحي
دُجى: يمااااا اختنگت.
گضيته من شعره اريد أوخره مني وهو گضني من بلوزتي ويصيح
محراب: ولچ هديني هلستي شعري خرب اهلچ.
دُجى: خرب عشيرتك انتَ هدني اول واني اهدك ولك عوفني چلبت المچلوب الما ملقح سممتني لا تعض.
محراب: بنت الكلب انعل اهلج من ساسهم الراسهم ياهو المچلوب.
دُجى: انتَ وعلى انتَ هسه هاي سوالف واحد عاقل.
هديت اصبع وهوَ يهد اصبع الى ان فكيته وفكني باوعت لروحي شعري مكفش وبلوزتي مشكوكه من الركبه ونص شعره متهلس بأيدي وهوَ اديه متروسات خراميش وشعره متخربط ونازل على عيونه باوع عليه وباوعت عليَّ واتمرغلنا من الضحك.
محراب: يابويه خرب راسج.
صارت عيني على امي تباوعلنا صافنه وعيونها مدمعة وانوب هزت راسها بنفي وگامت للمطبخ مادري شتسوي فجأة فزينا على صوت صياح رج البيت رج.
وگف گلبي عقلي وروحي كلهن يم البنات خفت احد سوالهن شيء محراب ركض قبلي فتح الباب وسوه الدرج شبختين واني وراه وچان نشوف الأستقبال مخبوص خبص كلها تتصايح وشيء تتهادد على شيء.
بنات فداء واگفات يبجن يم امهن وفداء واكف يم جدي وأسعد مُهران زانگه من قميصه ويجيب بي منا ويودي منا وهذاك يطگه يريد يفلت روحه ومهران يصيح.
مُهران: اول ما دخلت الهالبيت گنالك تحترم روحك وتگعد وتسكت حتى تحفظ كرامتك الممسوحه بالگاع تلعب بذيلك وتجيب نهايتك ليش تحب الكتل؟
واسعد بس يسب ويفشر ومهران يلطمه على حلكه وهذاك يرجعله الطگ بس حيله خاوي صاح بيهم جدي
رجاح: ولك خلي نفتهم شصاير انتم ليش ضاربيننا بعرض الحايط؟
فداء: انا اكلك ليش لان جاي ولاگي أسعد نايم بالباب مالكم بالغلط واذا يعني شنو انگلب الدنيا مو بيت واحد احنه مو اهل.
مُهران: احجيها عدله گول لان لگيته سكران ويتطوطح ومنجبح يم بابنا! هاي السوالف ما تصرف عندي وحق الحسين اموته.
جدي رفع راسه يخزر عمي
رجاح: فداء ابنك يشرب!
حجاها عبالك مفتخر بأبنه
فداء: عادي بويه چا كل الشباب تشرب.
باوعله وجهه دم من العصبيه يهز بأيده يريد يحول عليَّ
مُهران: تربيتك معروفه عمي هذا اعتبروه اول وأخر تحذير اذا وصل أسعد لبابنااا ادفنه بمكانه يشهد الحسين اشيلكم كلكم للسجن وابن امه وابو اليگلي انتَ غلط واحنه اهلك.
رجاح: ما تحترم انتَ هم يرادلك جررررة اذن.
اتكتف يباوعله ببرود
مُهران: يله أيدك الك جرها اذا تگدر.
أسعد متمدد بالگاع وعيونه حمر دم مايگدر يگوم ولايگدر يحجي بس يفرك بوجهه ومحراب راح وگف بصف مُهران ويعارك بيهم وياه حتى قبل لا يحجي مهران ونعرف السالفه شنو.
محراب: فداء گض ابنك انوب علينا اهل العرگ والعباس الگفگم الباب شعدنا ملهى!
فداء: انتَ اسكت من نحجي احنه انتم تنجبووون وتسكتون.
وهذا يصيح متخبل
محراب: مانسكت مو النا السكته احنه نحجي واليدوسلنا على طرف ندوس راسه كف عننا فداء!
گعد جدي من الصياح على التخم يفتح بأول دگمه من دشداشته مختنگ وفداء وعمي معاذ انخبصوا بي
يقيسون بالضغط ويغلطون على محراب ومهران إلى الدنيا انگلبت وجدي مختنگ وهمه واگفين على صفحه يتبسبسون.
صارت عيني على مَياسة خزرت أسعد وهوَ منتچي على الحايط گاعد حيله بايد ما واعي وهوَ باس ايده ودزلها بوسه بالهوى ورجع غمض عيونه وابتسم راسه مايل على صفحه جمدت بمكاني باوعتلهم واحد واحد الحمدالله محد انتبه عليَّ ومَياسة دارت وجهها متوترة.
اتسحبت من بينهم رحت وگفت بصفها وهي تعض شفايفها بقلق همستلها
دُجى: هذا قبل شوي باسچ لو اني حوله؟
ثبتت نضرها عليَّ تخزره وجاوبتني
مَياسة: هذا هسه اروح ادوس ببطنه ابو العرگ.
صفوة وبناتها يتبسبسن بيناتهن ويأشرن على الولد بأصابعهن ما اعرف شنو يحجن اتقرب فداء سند أسعد واخذه يسحول بي بس طلعوا هيه هم اخذت بناتها وبعدهن بالباب صفوة ضلت تصيح.
صفوة: هاي اول واخر مرة احد منكم يمد ايده على أسعد امده الوگت الأغبر إلى جابنا يمكم عود اهل انتم ا.
ما خلاها تكمل كلامها وضل يصيح
محراب: يله برا يله لاهله بيكم.
گالها وسد الباب بوجههم ويسب ويتوعد بيهم ومهران يتهادد يريد يسجنهم وهذا يريد يطردهم هذا كله والمَوتور ومُرتاد مختفين حرامات فاتهم هواي اكشن.
راسي وجعني من صياحهم وبيبي اخذت جدو لغرفته وانطته علاج بقوا بس محراب ومهران عود يتناقشون بس نقاشهم صياح.
گعدت على التخم ومخليه ايدي على خدي انتضرهم يخلصون واجن ليال ومياسة يمي حالهن من حالي ومياسة مخليه راسها على چتفي وتهمس بشرود.
مَياسة: ياربي لو خالقني بالشماعيه ولا عد بيت رجاح.
ردت اصدمها واگلها مو بيت رجاح هذا بس عفتها بواهسها شوي ودخلوا مُرتاد والمَوتور يسولفون ما منتبهين النا من صارت عينهم علينا باوعولنا بأستغراب ورجعوا باوعوا على محراب ومهران.
مهران: بعد وكت لو باقين شني السالفه واذا نص الليل
مهران يصيح وهذا يجاوبه ببرود
المَوتور: ريلاكس مهراني شبيك عصبي منو وياك.
مُهران: الريلاكس بعينك ولكم شني بيت كاوليه كل واحد يلعب بصفحه بس گلولي انتم وينكم وجه الفجر يالله تبينون شتسوون عدكم نسوان وضامينهن تباتون يمهن!
المَوتور: خاب عندي مرة و اوصللكم شني شمالني.
مُرتاد: وانا رجال متزوج.
هز راسه بيأس وجهه احمر من العصبيه وعروگه ناطات وهذول ماخذين الامور بضحك.
مُهران: تجلطوني وعلي.
اتقرب المَوتور عليَّ حضنه حيل كسر ضلوعه جعصه جعص ويگله
المَوتور: خاب احبك شمالك جلطة الحبيب زبيب.
وهذا دفعه منه حيل يصيح متنرفز
مُهران: مو صاحبتك انا وتضحك عليَّ بهاي سوالفك.
المَوتور: طبك مرض دضل صحلها رجل وگالت اعور.
مُرتاد: شني!
ضحك وحك راسه
المَوتور: سمعت نبعة تگوله لوحده من خواتكم ذاك اليوم وحسيته يرهم وگلته.
التفت علينا يسألنا
المَوتور: خوما بي شيء؟
جاوبته ليال بضحك
: - مابي شيء فوت بزودك.
المَوتور: هاي وگفتج ما أنساها.
همه يباوعوله حايرين شيحجون گامت مَياسة مدري وين دنگت راسي مسطورة هستوني اريد اگوم اصعد بس رجعت مَياسة تمشي وتتلفت وجهها اصفر وخايفة وگف گلبي حسيت صاير شيء رجعت گعدت يمي مچلبه بأيدي حيل همست الها.
دُجى: شبيج شنو صاير؟
مَياسة: راح اگوم للمطبخ تعالي وراي.
گالتها وگامت قبلي انتظرت دقايق وگمت وراها بهدوء لگيتها تلوب تلوب تفتر منا وتجي منا وتمسح بوجهها واحس الدم جمد بجسمي من گالت.
مَياسة: قبل شوي طلعت للحديقة من وره اتأكد من الأضويه وشفت فداء وصفوة واگفين يم الشجره وسولفوا هواي سوالف بس سمعتها تگله هذا بس اخلي اله ما يطول لو يموت لو يتسودن ولچ ما عرفت ياهوه يقصدون راح نموت!
ميرار.
: - ما ادري شنو نيته بس ادري ما ضل عندي شيء أخسرة.
الضوه چان يتسلل بالبيت يگطع النوم عن عيوني التعبانة والعصافير بلشن يغردن صوت نباح چلاب جاي من بعيد وصوت الصراصر تارس راسي.
كل دقيقة تعبر واني عايشه احسها انجاز عيني ما تگدر تغفى مرة اتخيل اسعد يلكاني ويكتلني مرة اتخيل صفوة وهسه جاي اتخيل خنجر يكتلني اباوعله وهوه نايم وجهه ما بي رحمة عكس كلامة واسلوبه.
فتح عيونه صايرات حمر باوع فوگ وانوب لزاويه الغرفه گام قبلي باوع بأنحاء البيت وانوب باوع للسما ويلعب بلحيته صارت عينه على بعدني گاعده بمكاني ما گمت متردده خايفه ويمكن ناويه اغير رأيي.
خنجر: چنج اتراجعتي.
هزيت راسي ب لا وگمت بهدوء چانن رجليه ما يشيلني من التعب والسهر والركض مال البارحه رحت للمغسله غسلت وجهي خفيف وعدلت حجابي عدل وحاولت اتشجع احس عيوني يحرگني لان ما نايمة لبس جنطته على ضهره ولبس كاسكيته وكمامه وملابسه كلشي اسود گلي.
خنجر: خليچ وراي لا تتراجعين ثقي بيه اذا گتلج اوكفي اوكفي واذا گتلج ارگضي ارگضي زين؟
: - زين.
خنجر: عاقله اليوم.
: - لا بس نعسانه.
ابتسم خفيف وهز راسه مشى گبالي فتح الباب ولو هوَ مكسر بس احد يلمسه يطيح وگف شوي بالباب واشوف بس شفايفه تتحرك ما اعرف شنو يهمس.
مشينا الدنيا بعدها ما نورت زين الضوى خفيف والهوى يضرب بوجهي وهوَ بس ساكت احسه يمشي بخطوات محسوبه
صرنا نعبر من بين البيوت القديمه الحيطان متفلشه الشبابيك متكسره والهوى يحرك البيبان ويضربهن ببعض كل زاويه تخوفني كل صوت ارجف منه.
بعد ما گطعنا 3 درابين ضيگات گعد منتچي عالحايط يتنفس سريع
خنجر: اوكفي نرتاح دقايق لازم ننتظر يخف المرور شوي.
كعدت على حايط نصه طايح
: - شنو بايگين ناهبين.
باوعلي وحچه مبتسم بتعب
خنجر: لا بس وجودنا هنا بحد ذاته غلط المثلي ومثلج ما لازم يكونون هنا هاي المنطقه صارت سهله للمخبرين واللي يدورون على الخارجين عن القانون مثل ما يسموننا.
سكتت صافنه وهوَ رفع راسه يباوع للسما يحچي بغصة
خنجر: چنت اگعد بمكانج بالضبط چنت انسان عادي عايش وي عائلته واحب وحده واعشگها روحي من الدنيا فرح.
سكت شوي عبالك شريط حياته مر گدامة
: - خريج هندسه واشتغل بالمحل مال ابوي وهيَ جيراننا أموت عليها 5 سنوات انا احبها وكلمة ما سامع منها مجرد أشوفها من تروح للمدرسة انا گلبي يرتاح وهيه شوي شوي ضلت تميل إلى وحبتني مثل ما حبيتها وگلت اخيراً يا خنجر ضحكتلك الدنيا وراح ترتاح بحياتك وتعيش مثل البشر بعد سنين من الوحدة والفراغ.
اتنهد من گلبه وابتسامة باهته مرت على شفايفه
: - بيوم من الأيام اجتني دموعها تارسه خدودها الأحبهن شفت الخوف بعيونها ومن گلتلي واحد يتحرش بيها ما گدرت اسكت طلعت دورت على ذاك الحيوان وكتلته بأيدي.
هوَ يسولف واني مصدومة من نبرة الشر والحقد إلى يحچي بيها
ميرار: وبعدين شنو صار؟
خنجر: بعدها اتبهذلت اتهربت وانحبس ابوي لان السلاح مالته وما اتحمل ثاني يوم ومات بالسجن وفرح راحت اختفت كل شيء انمحه ضليت وحيد لا اهل لا اسم بس لقب
المجرم.
ميرار: زين ليش انتَ مطلوب اذا مثل ماتكول السلاح مال ابوك وحبسوه هوَ مو انتَ؟
خنجر: السلاح صحيح بأسم ابوي بس البصمات بصماتي والجريمة چانت واضحه وعرفوا نيتي قتل مو دفاع عن النفس لان الكلب چان ما شايل سلاح.
وحتى لو القانون چان يبريني انا ما اگدر ما ندمت لان كتلت واحد خسيس ولو يرجع بيه الوكت هم ارجع واكتله بس ندمت لان ضيعت حياة ابوي وضيعت روحي وفرحتي ضاعت مني لليوم.
مسح گصته وابتسم مقهور
: - تدرين احنه هسه رايحين لبيتنا عسى ولعل الگالها أثر الها لو الأمها بلكي وچهج خير عليَّ ساعتها صدگ اسلم روحي وانا مرتاح ميرار انا فقدت كل شيء وماريد احد يمر بهالشعور انتِ بعدج عندج فرصه لا تضيعين روحج.
ضليت اباوعله بوجهه ندم مو طبيعي شفته وهوَ ضايع حتى من نفسه متت من القهر على وعلى حبيبته هزيت راسي بخفة احاول اهون علي.
ميرار: الله يرحم ابوك ويرجعلك فرحتك يارب.
ما خلاني اكمل كلامي ضحك بقهر وگال
خنجر: چنت كل ما افرح اروح الها واگول الها اسمچ تارس عيوني يا فرح.
دنگ عيونه مايريد أشوفه وگام يمشي گبالي ويأشرلي براسه بمعنى يلا نهضت وراه جسمي تعبان ومتخربط من قلة النوم والضغط إلى جاي امر بي.
الهوى يلفح بوجهنا واحنه ماشين للمادري وين ريحه البيوت القديمه وريحه الطين سمعت صوت چلب ينبح قريب طفرت صرت وراه مباشرتاً وچلبت بردانه من فوگ القميص.
التفت عليَّ مبتسم واني اباوعله بخوف مد ايده يريد يكرص خدي رجعت ليورة مانعته لزمت خدي بخوف من تصرفه وهوَ يگول
خنجر: اختي الصغيرة إلى عرفتها البارحه انتِ وعلى اول مرة ارتاح لوحدة من بعد فرحتي.
ابتسمت اله بأمتنان
ميرار: شكراً، يارب ترجعلك راح ادعيلك هواي.
خنجر: بخدمة الحلوين مرمره.
ميرار: گلبت اسمي هوه عايزه.
خنجر: چا شتكولين على اسمي.
ميرار: خنجر لو سچين.
خنجر: ميرار لو علچ مر.
ميرار: لاتعيدها بعد.
ابتسم يهز راسه كملنا مشي لحد ما وصلنا گبال سيارة چبيره يعني مبينه مال حمل وواحد گاعد يسوق بيها
ميرار: لا تگلي راح نصعد هنا؟
باوعلي روحه طالعه
خنجر: لا هسه اجيبلج تاهو اصعدج بيها دصعدي لا احطج جواها واسحكج البطرانه.
واگفه كدامها وصافنه شيصعدني چنت ميته من التعب والخوف ومن فكرة أن رايحة وي خنجر للمجهول.
صحت على بصوت عالي
ميرار: مو عاليه؟ شلون اصعد.
وهم هم صيح يهز بيده
خنجر: جاي تصيحين عليَّ لو تصعدين؟ دتعالي تعالي الفاهيه حتى هاي ما تدبرينها.
اتقرب وبلمحه بصر سحب گونية طحين چانت طايحه على صفحه قربها من التاير وسندها مسوي منها درج صغير نكث اديه وگلي
خنجر: دوسي عالطاير واصعدي وانا اسندج ماتطيحين لاتخافين يلا لا تفهين.
باوعتله بخوف وصعدت على الگونيه وهوَ مخلي ايده وره ضهري بدون ما يلزمني خاف اوگع چلبت سريع وسحبت روحي لگيت نفسي جوه سگف السياره.
باوعت داير مدايري متروسه بطانيات وكواني عدس وشكر وطحين وخنگه حتى هوى ماكو هنا.
خنجر صعد وراي بثواني وسحب باب الحديد وسده وصار كل شيء هدوء مشت بينا السيارة.
چنت محشوره بين گونيه مال طحين وبطانيه روحي رايحه من القهر والخوف خنجر گاعد گبالي وسلاحه بحزامه ما مرتاح عيونه تتحرك منا ومنا ويمسح بگصته.
ميرار: شبيك؟
خنجر: راح نعبر من يم سيطرة.
حسيت اطرافي جمدت السيطره إلى يحجي عنها من امس ويخطط الها ضليت اكل بشفايفي بخوف خاف يلزمونه فجأة السيارة وگفت وصوت السايق يصيح.
السايق: انا احمل غذائيات والكل يعرفني مايصير تعطلوني كل مرة.
واحد من العساكر سمعته يدگ بالباب مال السيارة ويصيح
: - افتح الباب هذا!
بديت ارتعش واخاف بس هوَ ثابت عيونه على الباب همسلي
خنجر: اش لا تخافين اذا فتحوا الباب لاتصيحين بس ضلي ساكته انا احجي معليج انتِ خوش؟
بس لحظتها مثل رحمه نزلت من السما صوت واحد صاح على إلى يريد يفتح الباب يگله.
: - يمعود عوفه ابو اسراء هذا.
ودگ على السيارة بمعنى روح اتنفست براحه بس خنجر بعده على وضعه متوتر يحرك بركبته منا ومنا يطگ بيها حسيت عيوني يغمضن ويفتحن ما جاي اگدر اركز.
سفطت البطانيه إلى يمي على شكل مخده وخليت راسي عليها بس خليت راسي غفيت ما ادري شلون نمت كل شيء چان يضرب براسي صوت الباب الحديد صياح العسكري صوت انفاسي حتى ريحه الطحين جاي تخنگني.
بس نمت بدون لا افكر بشيء الدنيا تهتز بعيني والسياره تمشي بتعرج وكل شوي افز حسيت صوت يمي يهمسلي.
خنجر: أگعدي ولچ.
چنت تعبانه ما اگدر ارد بس رفعت راسي وهوَ يكلي
خنجر: راح نوصل.
فتحت عيوني بتعب وگعدت افرك بوجهي اريد اصحصح وهوَ يگلي
خنجر: خلي اطكج راشدي اصحيج اسبوع وعلي.
ميرار: خلي ارگعك بطابوگه بنص راسك اريحك من الحياة.
خنجر: علواه شلون حياة هيه عندج سوابق وي الطابوگ.
ميرار: لا افا تموت وتعوف فرحتك؟
باوعلي مبتسم يمسح بگصته
خنجر: خاب وينها هيه انا محصلها حتى اعوفها.
ميرار: خلي ندور عليها ونلگاها؟
خنجر: اي نسوي خطة تروحين لجيراننا عود انتِ صديقتها ومشتاقتلها وهالحجي بلكي يدلونج انا ما يگلولي وين ولد الكلب عبالهم اكتلها مدري شني.
ميرار: كل شيء يصير الزلم منيلكم أمان.
باوعلي بضوجه
خنجر: حتى انتِ عليَّ؟ هسه شلون تخليننا نمسلت.
سكتت خانسه لا ينگلب عليَّ اسعد انوب شوي ووگفت السيارة
خنجر: وصلنا.
وصلنا بعد طريق طويل ومتعب جسمي متكسر من السيارة فتح الباب وطفر نازل قبلي اتقربت اريد انزل باوعت للسما الجو مغرب وصوت الأذان يدوي جسمي كزبر من الطمأنينة نزلت بمساعدته.
اتلفتت اباوع داير مادايري نزلنا گبال بيت قديم متهالك بس مرتب طابق واحد بابه خشب مصبوغ ازرگ ومتزلغ شبابيكه مسدوده بستائر صفر الحايط متفطر واكو نخلتين بالحديقة هوَ يمشي گبالي وجهه احمر دم مشى كم خطوة وگعد ساند روحه على الحايط اتقربت عليَّ شوي.
ميرار: انتَ زين؟
ضل ساكت وكل نفس يطلع منه حسرة حچه وصوته مبحوح
خنجر: هنا چان ابوي يگعد يحب يگعد يم هذني النخلات منا جانت فرح تعبر منا هيَ وامها منا امها چانت تجي ترزلني وتگلي شوكت تعوف بنتي وانا اعاندها اگلها اخذ بنتج لو اخر يوم بحياتي وهيَ تشيل روحها وتدگها وتحلف ما تخليني اوصللها.
يحچي ويأشر بأيده على كل مكان اسمعه واحس گلبي يتگطع ما اتوقع اكو كلام ممكن يبرد گلبه گام قبلي دخلنا للبيت ريحه البيت قديمه بس بيها دفو.
الأرضيه مفروشه والحيطان عليها صور قديمه معلگه وصورة الأمام العباس قماش مدگوگه بنص الحايط بس شفتها حسيت الطمأنينة بگلبي زادت.
خنجر: هذا بيتنا ميرار ارتاحي محد يحس انا هنا هسه بس يطلع الصبح نطلع منا.
ميرار: جوعانه.
ابتسم مثل الأتذكر شيء
خنجر: شو احنه لا نتذكر لا ناكل لا نشرب ماي عايشين على الطاقه الشمسيه؟
ميرار: اندري ما چنت جوعانه هسه جعت شو.
خنجر: يخسى الجوع هسه طالع ما اطول اجيبلنا شيء ناكله انا هم جوعان ميت.
گعدت بالگاع ممده رجليه بتعب
ميرار: يلا شمتاني.
هز راسه ب أي يضحك وطلع وسد الباب وراه بس گام گمت بتعب للحمام چان بسيط اخذت دوش على السريع قبل لا يرجع وغسلت ملابسي ونشفتهن چان اكو غساله بالحمام كيفت لان ملابسي كلهن طحين اسوي كل شيء ركض ركض اخاف يجي ويلگاني ماخذه خاوه على بيتهم زحمه چا وين الثگل.
لبستهن ما ناشفات كلش بس احسن من الماكو شمرت الحجاب على راسي شمر بس ما طالع شيء مني.
بقيت افتر بالبيت استكشف دخلت لوحده من الغرف چان بابها مفتوح بيها بوفيه خشب وثنين جودليات مفروشات وصوبه قديمه كلها تراب مطفيه.
رحت للغرفة الثانيه بيها چربايه ام نفر واحد وكنتور هم باب واحد ومفروشه باللون الأسود الارضيه والصبغ وكلشيء تقبض الگلب.
گعدت على التخم مليت واني انتظره وين راح هذا كتلني الجوع اكثر شيء ضوجني هنا هوَ السكوت لا صوت لا جيران لا صياح اطفال كل شيء ميت هنا.
رفعت عيوني للسگف وصوت دگات الساعه جاي من الغرفه الأولى يرن بأذني گمت افتر بالممر چنت راح ارجع لمكاني بس سمعت صوت خطوات قريب من الباب جمدني.
رگضت للباب بدون ما اطلع صوت وباوعت من الفتحه ما شفت احد بس خفت بديت ارجع وره اريد ارجع ادخل واسد الباب عليَّ بس فجأة سمعت احد يدگ الباب بهمجيه.
حسيت الهوى انگطع عني واني أسمع واحد يصيح بصوت عالي
: - افتحوووووا الباب لا نكسره نعرف انتم هنا.
حسيت بدمي نشف ما ادري شنو اسوي والدگ صار اقوى خليت ايدي على گلبي وگعدت حيلي بايد وهوَ يصيح ويدفعون بالباب.
: - راح نحسب لل 3 ونكسررررة.