رواية أبناء الشنار للكاتبة مراسيل الفصل الخامس والأربعون
شمرت الدشداشه من ايدي ونزلت جوة أرجف لعبانه روحي من روحي دخلت للمطبخ توني طلعت علاگه سودة جاي الفه بيها العلاگه بأيد والبطل بأيدي الثانيه ما حسيت شوكت عمي صاير وراي بباب المطبخ
مرتضى: شني هذا بأيدج ولچ؟!
غمضت عيني حيل وادعي بگلبي يارب تصير معجزة ويختفي حسيت بخطواته تتقرب على اكثر واني اتجمدت بمكاني لا اگدر أخلي البطل بالعلاكه واني ادري بي وراي ولا اكدر اضل واگفه بسرعه حسيت بصوت زين العابدين يحاچي بيه.
زين العابدين: ها دُجى بوية ما عجبج؟
حسيت اجه المنقذ بهاللحظة بسرعه خليت البطل بالعلاكه ولفيتها ودرت عليهم لگيت عمي يباوعلنه بشك و زين واگف بصفه
دُجى: اي ما عجبني منين جبته هذا، ها عمو هذا عصير عود اتوحمت على وراح زين جابلي هسه سوده عليه بس طلع مو طيب.
زين العابدين: اي حبيبتي هسه اجيبلج غيرة اروح هسه؟!
مرتضى: شني السالفه وين رايح هسه يطلع الصبح وانا اروح اجيبلها عصير شنو مشتهيه بوية؟
دُجى: عصير تفاح
ابتسم وهز راسه خوش قبل لا يطلع من المطبخ
مرتضى: صار تدللين انتِ وحفيدي بس جيبي هذا اشربه شو گعدت ريگي يابس.
مد ايده إلى يريد انطي اله بسرعه ضحكت بتوتر وگتله
دُجى: لا عمو مو طيب والله يلعب النفس ما انصحك.
هز راسه خوش ودار على زين يحاچي
مرتضى: زوين ولك من تجيبلها الصبح جيبلي وياك
زين العابدين: من عيني يابة.
طلع من المطبخ رجع لغرفته وسداها واجاني زين يتلفت أخذ العلاكه من أيدي يسب ويغلط على جسام.
دُجى: زين انتَ انقذت حياتي
لف العلاكه بعلاكه ثانيه وفتح الحاوية ذبها بيها وانوب اجاني
: - ولچ يا حياة جسام راح يصخم حياتنا ثنينا.
دُجى: نام هسه لو وينه؟
: لا وين نام من نامت على بلوكة كون جاي يهذي بعده هل سم ما طالع من راسه.
صعدنا فوگ ثنينا نتلفت ورجعنا دخلنا لغرفة جسام شعرة مبلل وناگع متمدد على جربايته و زين كل شويه يجيبه براشدي يفر راسه يريده يصحى.
دُجى: مو هيچ حبيبي شبيك انطي صبر هوَّ هسه يصحى بس ينام ويگعد.
احچي بكل ثقة بالشرب لان ابوي چان يشرب واعرف باوعلي بشك وگال
: - وانتِ شمدريچ؟
دُجى: احس يعني أحساسي ما يخيب.
جسام طگ على راسه حيل مغمض
: - طلعها من راسي والله ما اغثك بشيء بعد بس طلعها منا تعبت.
: - هسه اطلع روحك مو بس اطلعها سهله جسام سهله خرب روحك على هل سواية بشر انتَ؟
: - مو بشر عوفني گوم أطلع برا عوفوني كلكم.
: - اعوفك بهالنگاسة الأنتَ بيها؟
رفع ايده على راسه يحچي بدون وعي
: - أش لا تحچي جاي تشوش على عقلي وصورتها تتلاشى بعقلي أسكت لا أگوملك.
عته من ياخته يطگ بي حيل
: - اموتك ورسول الله اموتك ولك شسوي بيك هسه بس گلي؟
رحت فكيته من ايده وگومته وهوَّ يرجف من العصبيه
دُجى: هده زين شبيك يعني من تسوي هيچ راح يصحى! عوفه ينام هسه من يگعد احچي وياه.
: - ولچ باوعيله جساااام اول تالي يسوي هيچ ولچ هوَّ يحچي على اليشربون ويسوون المحرمات وطلع انگس منهم.
دُجى: يگعد واتفاهم وياه وانتَ هم تهدء عوفه هسه امشي نام انتَ هم.
هز راسه متحسف يباوعله بقهر
: - ولك حشى رسول الله منك يا عار عود سيد انتَ.
ما يسمع شنو يحچي زين عبالك بعالم وحدة اخذته من ايده وطلعنا من الغرفة وسديتها رحنه لغرفتنا و زين متسودن يلوب يلوب گعد على الجرباية يمسح بوجهه بقهر جبتله گلاص ماي شربه وخليت ايدي على چتفه اريده بس يهدء.
دُجى: على كيفك ويَّ روحك خل يطلع الصبح واتحاسب وياه وهوَّ صاحي وشوف شوصله الهالمرحله.
فرك گصته حيل
: - بنية الوصلته الهالمرحلة بنية انعل ابو الحب اليخليك تعصي ربك اتسودن جسام ما يفيد بعد.
: - لا اتسودن ولاشيء ماكو شيء ما اله حل بس اهدء انتَ.
گعدت بصفه خليت ايدي على أيده رفع ايدي باسها وگال
: - نامي حبيبتي حتى باچر نروح للدكتورة تعبتي انتِ مو زين عليچ.
: - وانتَ هم تعال نام يمي.
: - صار تعالي يلا
اتمدد يجر حسرات ضميت روحي بحضنه لمني على گلبة حيل يمسح على راسي بحيرة لحد ما غفيت ومادري هوَّ شوكت نام گعدت الصبح ما لگيته يمي.
غسلت ونزلت جوة لگيت بس عمي وخالة فضة گاعدين بس شافوني ابتسموا وعمي صاح.
: - هلا بعزيزتي هلا صباح الخير والعافيه
ابتسمت بخجل
دُجى: هلا بيك عمو الخير بوجهك.
ما حسيت شوكت گامت خاله فضه صبت إلى صينيه الريوگ وحطتني بنصهم إلا اكل عاد اني ما گلت باطل لان صدگ نفسيتي مفتوحه ضليت اكل واسولف وياهم وهوَّ كل شويه يخليني اغص بلگمتي من يگول.
مرتضى: اكلي يا بعد ابوچ اريد صحتچ وصحة الببطنچ زينة دوم.
دُجى: إن شاء الله.
گلتها وابتسمت عفت الصمونه من ايدي وگمت اغسل بوجهي كل ما احد يجيب طاري الأبو اختنگ ابوي شگد ما چان مو زين ومؤذي اني اريده واحبه واحتاجه رغم كلشي يبقى غصة بگلبي وجرح ما يطيب چان عندي امل يصير زين ويستعدل ويخلينا نعيش بسعادة كلنا بس ماكو ابوي بعد طلعته مستحيله وهذا الكاتلني.
رجعت صعدت فوگ وهمه يگلولي لا تصعدين وتنزلين كل شويه مو زين عليچ لگيت جسام بالممر يمشي مستعجل يلبس بساعته بس شافني وگف يباوعلي.
جسام: شمالچ ياهو مبچيچ؟
مسحت عيوني وگتله
دُجى: مالك غرض مسوي روحه كل شيء ما مسوي هاي عود انتَ سيد.
جسام: لاااااا چنتي موجودة شفتيني؟
دُجى: لك شتحچي انتَ حتى ابوك شاف البطل بأيدي واني اريد اذبه لو ما ربك ستر واخوك نقذني چا هسه عباله اني شرابة قديمة.
فتح عيونه حيل يگلي
: - وشگلتوله؟
: - گلناله هذا عصير تفاح اتوحمت عليَّ انوب يگلي انطيني أشرب عمي احنه السادة مو انتم عمت عيني وينك محراب تعال اخذني شوهوا برائتي.
ضحك يغطي وجهه بأيدة
: - هيه تنلام من تگلي انتَ لفو على السادة؟
: - لا والعباس ما تنلام بس گلي انتَ شوصلك هل مرحلة؟
انتچه على الحايط عيونه يلمعن دنگ يحچي.
: - لا تسأليني ما ادري شلون عشگتها چنت اگول بيني وبين روحي طفلة هاي ليش دوم حاط عقلي بعقلها؟ بس لسانها يابويه لسانها يجرني جر ما يوم شفتها اذا ما حرگت دمي وعنادها تعاند بكلشيء وانا هذا اكثر شيء اكرهه انا وما اتحمله بس لگيت روحي ادور عنادها دواره حتى بس اشوف عيونها وهيَّ تتحداني ورة كل شيطنتها ولسانها گلب ابيض يخليني احس الدنيا بعدها بخير من اشوفها تضحك احس روحي ترد ومن تضوج اريد بس اراضيها وماعرف شلون.
رفع راسه جر نفس طويل يحچي بقهر
: - رغم رفضها و رغم صدها إلى ما گدرت اكرها ولا اطلعها من راسي رغم حچي اهلي إلى يسم وهمه يگلولي مو گلنالك ما تريدك؟ يلوموني عبالك مسوي جريمة لان حبيت وحدة ما تحبني.
حاربوني ويگلولي ما تريدك انساها بس هوَّ الگلب شلونه؟ لو تنطبگ السما عالگاع يبقى گلبي يرف عليها هيَّ رفضتني هواي بس انا ما رفضت حبها وراح ابقى انتظرها وماعوفها بلكي يجي يوم وتعرف محد راح يحبها بگدي.
دُجى: عمت عيني مكتوبلي وين ما اروح الگه بوجهي عشق ممنوع هسه اني وياك بحچيك كله وادري تسنيم تنحب وتنحط بنص الگلب هم ومحد يلومك على حبك الها بس سوايتك صحيحه تشوفها! تروح تشرب؟
هز راسه لا بسرعه يحچي بأحراج
: - لا والعباس انا غلطان وطحت من عين نفسي قبل ما اطيح من عيونكم انتِ و زين بس چانت الدنيا ضايگه بيه اسمع حچي اهلي ينهش بگلبي وصورتها وهيَّ تگول ما اريدك تفتر براسي رحت لهذا الطريق عبالي تسكت الاصوات البراسي هيچ بس وحق محمد ما زادني إلا ضياع فزيت لگيت روحي خسران رضا ربي.
يحچي بقهر ما يگدر يحط عينه بعيني انوب همس
: - لا تخلين تسنيم تدري بداعة أعزاز گلبچ.
: - لا تكسر روحك هيچ انتَ بشر مو معصوم جسام الهم ساعات يسوي بالبشر سوايات ما تخطر على البال والتحملته انتَ مو قليل نار العشگ من جهه ومحاربه اهلك الك من جهه هاي الغلطة اعتبرها درس واتعلمت منه وذنب وامسحه ربك غفور واهلك ما يكرهونك بس اسلوبك وياهم غلط بغلط ما يصير تحاچيهم بطريقتك الهجومية.
لا تنكسر من اول مرة وتضعف بالعكس ارجع لربك وصلاتك الماتفوت منها فرض مثل اول ما اجيتكم وبالنسبة لتَسنيم اذا هيَّ قسمتك راح تصير الك لو ترفض الف مرة ولو الدنيا كلها توگف بوجهك.
مسح وجهه بچفوفه حيل مقهور وگال
: - من باچر ارجع مثل ما عرفتيني وعد راح اترك امرها للخلقها واتمنى من كل گلبي الله كاتبها بأسمي ولو بعد حين وعسى ولعل الله يبرد گلبي بس گليلي زين شلون راح اواجهه وهوَّ يباوعلي بنظرة الخايب؟
: - زين ماكو مثل گلبة بس يشوفك متندم راح يسامحك انزل هسه سلم على اهلك بوس راسهم واعتذر منهم وهمه من يشوفونك هيچ ما يقهرونك بعد والله ويصيرون وياك بكلشيء.
ابتسم بوجهي وهز راسه خوش
: - صار نازل هسه، ديري بالچ على روحچ.
هزيت راسي خوش مبتسمة وهوَّ نزل وگفت اباوعله من الدرج من بعيد واشوفه دنگ باس راسهم واعتذر منهم هواي وابو هم شبگه وباس خده لان طگه راشدي بقى بس زين بعد بس اعرفه ما يشيل بگلبه وبالخصوص على جسام لان يعرفه طايش.
شويه واجه زين أخذني للدكتورة فحصتني وگالت بعدني ببداية حملي وكل شيء مستقر الحمد لله و همه طايرين بيه من الفرح بس گلتلهم عمي طلع تخم مال ذهب جايبه إلى هديه لبسه إلى يضحك ويگلي
مرتضى: تستاهلين ماي العين.
متت من المستحه من حچيهم وجسام واگف على صفحه مچتف ادي الصدره يباوعلنا مبتسم من بعيد ما يتقرب يخاف من ردة فعل زين المخلي ايده على چتفي يضحك ولا يباوع بوجه جسام.
لليل صعدنا خابرت محراب اسولف ويا شويه زين بعده جوه يمهم اتمددت على الچرباية اسأل على وضعه.
محرَاب: زين يا بعد گلبي ديري بالچ على روحچ هواي اكلي اكل صحي ولا تتعبين روحچ بالصعدة والنزلة.
: - مشتاقتلك ليش گاطع بيه محرَاب.
: - والله اليسمعچ يصدگ ولچ اول امس يمچ باچر أجيچ يا بعد روحي هسه دنيا الليل.
: - شبيك شو چنك تعبان.
ضحك وگال
: - هلكان مو بس تعبان ولچ ابتلينا گلنا لفُرات نريد نشارك بكلشيء بالبيت الجديد طرد اله چم عامل وخلانه احنه بمكانهم.
: - ترا والله السالفه تقهر انتم منجمعين واني مو وياكم اخذوني حبابين.
: - ترا خوش فكرة باچر اجيكم واسولف ويَّ السيد نص ردن بالسالفه.
ضحكنا ثنينا مادري جاي ياخذني على گد عقلي لو يحچي صدگ ودعته وسديته منه سمعت اصوات بالممر مديت راسي على كيف.
شفت زين و واگف گبالة جسام يباوعله بقهر ويگله
: - اكتلني موتني بس لا تدير وجهك عني والله ما تنعاد غلطة هسه انتم ما تغلطون؟
: - اليغلط مرة يغلط مرتين وتلاثه يجوز عجبك هالدرب وتريد تستمر بي؟
: - لا والله لا ساعتها صدگ لا تباوع بوجهي بعد.
لانت ملامحه يباوعله بحيرة وجسام ذب روحه بحضنه
: - اشبكني راح اموتك اهووو مو گتلك ما اعيدها
رفع أدي يضحك شبگه انوب حمسه على ظهرة حيل
: - لفووووو على السادة اعوذ بالله من وجهك.
وهذا ما اتوجع من الطگه بالعكس سنح على چتفه مغمض عيونه
: - الله شجاي تذكرني انتَ راح ابوسك.
ما اتحملت طلعت من الغرفه جريت زين من ايده من جسام خليته وراي
: - هيو رجلي ترا شتبوس چفينا شرك لا اطفي عينك.
زين حط ايده على وجهه يضحك ومسوي روحه مسكين وجسام يلعلع
: - ولك زوين جرتك من حضني وما حچيت عمت عين الخوة ولك احچي بالچذب عاد؟
التفتت على زين خازرته وهوَّ رفع أدي مستسلم
: - ما احچي من بعد مرتي أعذرني.
فتح عيونه حيل يصفگ بأيده
: - خرب بالخوة التخربها مرة ولچ دُجى والعباس الولحچ من الدرج لا تلعبين وياي.
دُجى: زين ترضاها؟!
هز راسه لا ودار عليَّ خازره گوة گاض ضحكته
: - علمود افلش راسك لا تضوجها حيوان أمشي ولي أمشي.
هز راسه بأسف يحچي متأثر
: - عمت عينك ولك كون ميت ولا شايفك هيچ سحرتك هاي الخوينسه مسويه روحها فقيرة وهيَّ اكبر حيه تحرم اخو من اخوه.
باس راسي گباله واني باوعتله متشمته
زين العابدين: القاضي راضي انتَ ياهي مالتك؟
دُجى: يلا روح يا لفو السادة زوين ما يبيعني علمودك
جسام: شيبيعچ عمي يبيعني ويبيع اهله علمودچ امدة الزلم الخشنه.
دُجى: تعال زيون تعال هذا دوخنا هواي يحچي
هز راسه اي مبتسم
: - كلامچ كلام حبيبتي أمشي ننام.
مشينا ندخل لغرفتنه والتفتت عليَّ اعيب واضحك وهوَّ صفگ أدي ثنينهن بحرگة وغماني.
جسام: يرجع حقي يرجع يالحية الظلم ما يدوم.
دُجى: لا تزعجنااااا كافي.
دخلنا وسدينا الباب نضحك وزين وگف على الميز ينزع بساعته
: - جاهل والعباس فلا يكبر هالولد شلع گلبي.
: - عادي سيد خلي چا اذا يكبر ياهو يونسنا بعد.
: - وجهه نظر يرادلها بوسه.
: - بوسها چا.
اتقرب عليَّ بخطوات بطيئه مبتسم بشر وجر وجهي يبوس بخدودي
: - ابوسها اذا ما ابوسها ابوس منو خرب وجهج شگد احبچ.
: - حبيبي انتَ.
ابتعد حاضن وجهي بين أدي مبتسم
: - حبيبة عمري انتِ، علوية گلبي
: - سيد گلبي انتَ.
غمض عيونه منتعش
: - أفيش يروحلچ فدوة.
مشت الأيام خفيفة على گلبي والحمد الله حملي ما چان متعب ولا نساوتي نحسه مو مثل سنابل خطية حملها متعب متعب كل يوم اخابرها لان احنه حملنا بنفس الوقت واشوف الفرق گدرت اوازن بين دوامي وبين البيت والحمل بصعوبة بوجود زين اجي ميته تعب وهوَّ وياي بكلشيء ما يخليني أحس اهله يگلولي اگعدي هالسنه خاف ما تگدرين وهوَّ ما يرضى يگول حرامات تروح سنه عليها.
مَياسة.
رجعت من الدوام وبوجهي نمت وگعدت المغرب ويَّ الصلاة اتوضيت وصليت ورحت للمطبخ اجهز العشه ويَّ لَيال لكيتها مكمله كل شيء بس اخذت السفرة افرشها وانصدمت من لگيت محرَاب گاعد بين أخواني بسرعه غطيت وجهي وحچيت بملل
: - اهو المن أجيت ما مشطت شعري.
خزروني ثنينهم وهوَّ ابتسم فاتح ايده
: - هلا يا بعد گلبي تروحلچ فدوة هالوجوه لا تمشطين احبچ بكفشتچ تعاي انطيني شبگه خل تردلي روحي.
مُرتاد: اهوووو راح يسوي العشه علينا زقوم جدة صيحي علي.
نبعة: شعلي انتَ ليش تغشم روحك ولك ما تشوف اختك هيه التعيل.
رحت گعدت بصف مُهران يباوعلي ما عاجبه شلت أيده خليتها على چتفي وضميت روحي بحضنه
مُهران: صلفة صلفة راح ارگعچ بالگاع.
: - ارگعني فدوة الك
باس راسي ونسى السالفه صدگ الزلم بسرعه تتقشمر بحچايتين حلوة.
مُرتاد گاعد بصف محرَاب ثنينهم يسولفون على البيت ويخططون كل شويه يباوعلي بنظرة يذوب گلبي بيها صارت عيني بعينه دزيتله بوسه بالهوى بدون ما احد ينتبه گض گلبه وغمض عيونه منتچي
: - أخ راح اموت.
همه يباوعوله ما فاهمين گام مُرتاد فرش السفرة يهز بأيده وليال جابت الاكل سفطته وبدينا ناكل كلنا اني گاعده بين مُرتاد ومهران وثنينهم يخزرون بي محراب سوه لگمة وقدمها لحلكي گبالهم ابتسمت وأكلتها فتحوا عيونهم حيل مُهران غص ومُرتاد انطاه گلاص ماي يدگ على ظهرة.
مُرتاد: اشرب خويه اشرب هاي الالله كتبها علينا بعد.
مُهران: شبعت الحمدالله
حلگه متروس وهز راسه يسأل بي
محرَاب: ليش شبعت ما اكلت شيء.
مُهران: شبعت مغثة يا مغثة.
محرَاب: لاااا چا بعد يومين شلون تگابل وجهي؟!
مُهران: ابطل محرَاب والحسين ابطل لا تستفزني وعلى الطخ راسك بالحايط.
محرَاب: اعصابك عقيد لا ما مرجية منك هاي تبطل وتعوف زمزم بوية زمزم گلبي انتِ.
بس جاب طاريها اتبخرت عصبيته وابتسم نسى روحه باوع للگتر إلى بأيده وبسرعه رجعت ملامحه طبيعيه
: - اعوف روحي وما اعوفها.
محرَاب: اعوف روحي وما اعوف ميسو حبيبة الطفولة والشباب والمشيب هاي.
ابتسمت اباوعله ومُرتاد حمسه حيل على علباته
مُرتاد: ولك سد حلكك تعبتني خليني احبك شوية.
محرَاب: يابة ما اگدر اسيطر على مشاعري لو من يمكم غفور رحيم ومن يمي شديد العقاب؟ بعدين شنو تحجون بأخت فُرات گبالي ما تستحون والعباس إلا اكله اخلي يجي يرعد عليكم.
مُرتاد: الحلو بالموضوع ما نگدر نحچي بزودنا حتى هوَّ لان الكل بالحلال.
مُهران: الحمد لله الف الحمدل لله والشكر
كامت نبعة وصاحت الهم من كملنا عشه ادري بيها سوت هيچ حتى نضل وحدنا بالديوانيه.
گام سد الباب مبتسم وأجه هجم عليه يبوس بوجهي وخدودي ادفعه من صدرة اضحك بس ما يندفع عطرة ترس ريتي ابتعد يباوع لعيوني بلهفة عبالك صار سنه ما شايفني مو قبل شويه چننا على السفرة
محرَاب: تيهتيني وعلى نظراتچ بوستچ الشمرتيها قبل شوي كل شيء بيچ دوخني ميسو.
مسحت على خدودي احسهن راح ينفجرن من الخجل
مَياسة: لا تخليني أستحي وأفعل شخصية اخوتي عليك أحچي عدل.
محرَاب: أكرط اليستحوون ميسو خل نتزوج كافي أريدچ يمي.
فتحت عيوني حيل باوعتله وهوَّ من ملامحه يحچي صدگ
: - شلون نتزوج غير يكمل البيت؟
اتقرب مني اكثر ولزم أديه ثنينهن يحچي
: - ولچ يا بيت انا ما اصبر بعد تدرين شنو يعني ارجع كل يوم للشقه والگاها ظلمة؟ تدرين شنو اشتاق لضحكتچ نص الليل وما اگدر اسمعها الا بالتليفون ومن اجي هنا يطلعوون روحي ميسو انا جاي احس بالوحدة تاكل بضلوعي أريدچ يمي دوم جاي تفتهميني؟
عندي الشقه كاملة وما ناقصها شيء نلم روحنا بيها ونعيش احلى ايامنا بين ما يكمل البيت اريد اگعد والگاچ بوجهي كل يوم مو اضل اتاني اتعشه ويَّ اخوانچ علمود اشوفچ ويگضونها عليَّ خزرات.
دمعت عيوني من كلامة حاس بالوحدة هواي ما يحب هيچ هوَّ
: - سودة عليه لا تنقهر محرَاب اني أصيرلك اهلك كلهم.
سحبني لحضنه شابگني حيل حسيته راح يكسر ضلوعي وهمس
: - ادري، انا كل احبابي انتِ شايفچ أهل مو بنية.
دفن راسه بركبتي وهوَّ حاضني يتنفس حيل
: - اريدچ ببيتي وبغرفتي اريد من اتعب اذب حملي كله بحضنچ لا يهمچ البيت النبني بي انا بيتچ وانتِ سكني باچر من الصبح احچي ويَّ مُهران ولو ادري بي راح يسويها طلابه بس لعيونچ اتحمل كل شيء.
: - گولها عدل
ابتسم وگال
: - شيجي منچ اتلگه الخير والمو خير وعلي.
ضحكت وهوَّ ابتعد عني حاضن وجهي بچفوفه الدافيات
: - هسه شگلتي راضية؟!
: - بكيفك حبيبي اذا اخواني قبلوا راضية.
سحبني على بكل قوته حسيت ضلوعي انطبگن بصدرة رفع راسي وهوَّ يباوع لشفايفي بنظرة خلت جسمي يرجف مال رگبته بهدوء وهوَّ يغمض عيونه وبحركة سريعة اخذ شفايفي بين شفايفه بكل رقه بالبداية لحظات واتحولت هاي الرقه لبوسة طلع بيها كل صبرة غمضت عيوني مقشعرة دفعته حيل ابتعد عني شويه وسند گصته على گصتي مغمض عيونه
: - كل ما تگولين حبيبي تنباسين هيچ أحسبي حسابچ انا طماع بيچ وما أشبع من هالنعمة.
الهوى يا دوب يوصل لصدري وگلبي يدگ حيل رفعت عيوني لعيونه الذبلانه وابتسمت وهوَّ رجع طبع بوسة سريعة على طرف شفتي
محرَاب: اوف گلبي هسه أگدر اتنفس راح تموتيني انتِ.
مَياسة: ولك كوم كافي هسه رضيت تبوسني ورضيت اتزوجك شتريد بعد راح يطبولنا يصخمون عيشتنا.
ضحك حيل وگام من مكانه عدل قميصه ورجع شعرة ليورة مرتاح
مَياسة: اطلع منا لا تخليهم يشوفونك حتى اكلهم چنت انظف الديوانيه.
محرَاب: اي عمت عيني والديوانيه ورمت شفتچ هيچ.
مَياسة: صخام الصخمني مبين؟
هز راسه اي مبتسم ورفع أدي بأستسلام
محرَاب: انتِ مرتي وانا احبچ بس الروح عزيزة ثيمالا شويه واخابرچ اشوفچ بخير لولا عود انطيني خبر اذا عرفوا حتى اشرد.
مَياسة: لو تموت ما اتزوجك روح يلا
محرَاب: اموت عليچ ميسووو اذا ما تتزوجيني المن عايش ما تگليلي.
قشمرني بكلمتين وراح عافني حايره شلون اطلع اذا انكشف هم فشله و هم ننكتل اتسللت وبالف ياعلي وصلت لغرفتي وسديتها مخليه ايدي على گلبي خرب يومك محرَاب طير المادة كلها من عقلي.
ميرار.
ما ضل شيء على امتحاناتي وأحسني راح اموت من التوتر وما قريت زين لان عيوني مغوشات ما اشوف عدل وفُرات ميت من القهر رغم شگد اسوي روحي ما بيه شيء گدامة واشوف بس كاشفني ويفهمني من نظرة عيني.
قبل الامتحان بيوم وهوَّ سهران وياي حاط الكتب گبالة ويقريني
فُرات: جوعانة تاكلين حبيبتي ترتاحين شوي؟
ميرار: لا والله شبعانه روح نام انتَ تعبت.
فُرات: ما تعبان والله ما تعبان ما دام يمچ راح اسويلچ شيء خفيف تصحصحين انوب نراجع خوش؟
ميرار: اذا تاكل وياي خوش واذا لا ماريد.
فُرات: خرب روحه الما ياكل وياچ.
ابتسمت وهوَّ گام للمطبخ گاعدين بالصالة والبنات نامن خطيه كمت دنيت الهيتر علينا متلفلفه باللحاف شوي واجه بأيده صينيه بيها كوبين گهوة وكيك وفطائر بصحونه مخليهن حط الكوب بأيدي و يوكلني مخلي قلم ورة اذنه وشايل الكتاب بأيده.
فُرات: ركزي وياي بابا هالنقطة تجي متأكد.
ميرار: مخي طفى فُرات احسه ما يشتغل بعد.
فُرات: تعاي ابوسه ويشتغل
قدمت اله راسي وهوَّ باسة يضحك يگلي
: - وهسه؟
ميرار: والله اشتغل عمي شنو انتَ المفروض بوستك تنباع بالصيدليات انتظرني ابيعها بصيدليتي.
فُرات: لا مو هيچ كل مرة شتگولين؟
ابتسمت اعرفه يريدني أكولها
: - لك شنووو انتَ حلاوة بقلاة.
كرص خدي وباس اصابيعه يضحك
: - أكرطچ كرط ماكو غيرچ حلاوة وعلي.
ضل يقريني للصبح واني بكل ثانيه اتذكر امتحانات الثالث ويَّ خنجر وشلون چان وياي بكل خطوة ونجحني يالله ارتاح گلبه متأكدة هسه هوَّ راح يفتخر بية هواي اذا نجحت.
6: 30 الصبح واندگ الباب عقد حواجبه فُرات مستغرب وگام فتحه شويه ودخلوا هوَّ ومُهران بس شفته ابتسمت وهوَّ اتقرب گرص خشمي وگعد بصفي يباوعلي.
مُهران: شلونها المعنويات زمزم شلونچ يا بعد گلبي
ميرار: زينة.
فُرات گوة متمالك اعصابه باوعله رافع حاجبه
: - هسه شتريد انتَ جاي من صباحيات الله؟
مُهران: أخذها للامتحان
فُرات: لا انا اخذها انتَ شنو.
مُهران: ثنينا يلا أسكت خرب والله عندك طاقة للطلايب.
هز ايده يخزر بي واني گمت بدلت ملابسي لبست گوت وأشياء تدفي جوة طلعت حذائي الرياضي خليته يم الباب وهمه شكلهم يضحك واحد متاني على الثاني الزلة.
گعدت على الكرسي وفُرات وگف فوگ راسي يعدل بحجابي ولبسني چفوف صوف ما ادري يمته جايبهن
فُرات: هاي حتى أديچ تدفى وما تجمد من تگضين القلم
ابتسمت فرحانه بيهن يدفن
: - اروحلك فدوة.
ومُهران شال الكتاب يسألني ويخليني اجاوبه ويعيد من جديد أخذ منه فُرات الكتاب يراجعلي گمت من مكاني حسيت راح نتأخر چنت اريد ادنگ البس حذائي بس مُهران چان اسرع مني نزل على اركبه يلبسنياه ويأشرلي بعيونه اجاوب على اسأله فُرات و لا اصفن فُرات باوعله رافع حاجبه يگله.
: - هااا عقيد.
وهو ولا كأن يسمع ولا باوعله حتى چان مركز بيه شد القيطان بهدوء وبترتيب وگام رفع عينه باوعلي وهمس.
: - جواريبچ خفيفات غير تدفين رجليچ زين باردة بابا.
فُرات: استغفر الله كافي ولك فحطتني الله يفحطك كون ميرار شوفي حچيه؟
ميرار: اندري حالي حالك شنسوي بعد حبيبي امشيننا يلا راح اتأخر.
مُهران: هههههههههههههه.
طلعنا من البيت وصعدنا بسيارة فُرات ثنينهم گدام واني صعدت ورة وصلنا للمدرسة وهمه يوصون بيه ويذكروني اقره ايات والفاتحه الأم البنين خاف انسى شيء دخلت لقاعتي عدلت نظاراتي على عيوني عدل حتى اركز انطونا الاسئله وچانت سهله نوعاً ما وكله مار عليه ودارسته جاوبت الأتذكرته وطلعت فرحانة لان احسني جاوبت زين.
لگيتهم بعدهم ثنينهم برا واحد مخلي أيده على چتف الثاني يضحكون ثنينهم ويسولفون منتچين على الحايط فتحت حلكي بصدمة معقوله اني الشيطان الداخل بيناتهم؟
بس صارت عينهم عليَّ واحد دفع الثاني وأجو بأتجاهي يسألون بيه
ميرار: مجاوبة والله مجاوبة.
فُرات: أكيد؟ أكو نقطه صعبت عليچ؟
مُهران: جاي تگلك مجاوبة ليش تلح.
فُرات أخذني من ايدي وصعدنا بسيارته وسد البيبان قبل لا يصعد مُهران.
فُرات: امشي ولي الأهلك يلا
مُهران: خرب اهلك.
شخط السيارة ومشينا عايفينه ورانا وهوَّ يضحك ويگلي
: - خيولي مو؟
: - صح
: - يا بعد ابوچ شگد تريحين الگلب.
ابتسمت بوجهه متوترة والله لو يدري بسالفه الشباك يتبرى من عدنا رجعنا للبيت ونفس القوانه هم رجعت اقرا وبين مناگرهم وتعبهم وتعبي خلصت أيام الامتحانات بألف ياعلي خلصت الامتحانات التمهيديه وخلصت فُرات راد يطلعني من الجو أخذنا طلعنا واتونسنا انوب مرينا على نبعة نسلم عليها رحت يم البنات بالغرفة وگعدنا نسولف.
نزعت حجابي ماخذه راحتي لان مُرتاد مو بالبيت ولا محراب بس فُرات ومُهران گاعدين بالديوانيه دخلن هنه للديوانيه ولمحت باب غرفة مُهران مفتوح رجليه اخذتني استكشفها بفضول دخلت عيوني تفتر بيها شگد مرتبة الفراش مرتب بنظام وريحه عطرة وجگايرة تارسه المكان مشيت بهدوء اتلمس بغراضه وصورتة إلى عالميز وفجأة حسيت الباب انسد على كيف ما احتاجيت التفت حتى اعرفة همست
: - مُهران؟
سمعت خطواته تتقرب لحد ما وگف وراي مباشرة حسيت بدفو جسمة قبل لا انطق حرف حاوطني من خصري بأدي ثنينهن وسحبني على صدرة باس رگبتي انوب باس خدي بوسة طويلة و جر نفس غمضت عيوني منزعجة لان شواربة تچكچك بخدي وهوَّ أبتسم.
مُهران: اندار فدوة لطولچ شحلاتچ وانتِ تفترين بغرفتي هسه ردت بية الروح.
ما التفتت على عجبني منظرنا بالمراية الچبيرة اللي گدامي هوَّ بطولة وهيبته محاوطني وصاير وراي واني گدامة اباوع الأنعكاسنا باس چتفي وباوع للمراية بأبتسامة نصر ورجع باوعلي عبالك ما مصدگ اني فعلاً هنا التفتت باوعتله وجهي صار بوجهه أبتسمت وهوَّ صاح
: - يا بعد وجهي.
ضحك ورجع باسني حيل
: - كافي تبوسني مُهران شواربك تچكچك
دارني عليَّ حضن وجهي بچفوفه ثنينهن مبتسم احس وجهي ضاع بوسط أديه قربني عليه لدرجة صرنا نتنفس نفس الهوى
: - شسوي زمزم ما جاي ارتوي منچ
: - مُهران
: - مدمنچ.
: - استحي والله أثگل عقيد شبيك.
: - ولچ هوَّ اليعشگج يضل بي ثگل گمت امشي واتعثر بطيفچ گليلي وتيهيني يابعد مُهران وعشيرته تحبيني؟
دنگت راسي الخجل اكلني وهوَّ يتلمس بخصلات شعري
: - انتَ تدري ما اعرف ارتب حچي مثلك بس ميرار تضيع اذا ما لگت عيونك تحرسها.
سكت ثواني جمد بمكانه عيونه ذبلت وهوَّ يباوع لحلگي من احچي سحب نفس عميق وضغط على وجهي بثنين أديه اكثر وقرب گصته من گصتي لحد ما عيونه صارت بعيوني وهمس.
: - تروحلچ فدوة عيوني تيهي بية زمزم تيهي و الله لا يخليچ تلگين طريق غيري وحق الحسين الشهيد انتِ روحي من الدنيا سنين مرت بالحروب والمداهمات الطلق يمر من يم راسي وما ارمش والموت يمر گدامي وما أهتز سنين انا ادرب زلم وأقود ارتال ما فد يوم روحي رجفت.
سحب أيدي وحطها على صدرة بالضبط فوگ گلبة إلى چان يدگ حيل وكمل وهوَّ يباوع بعيوني.
: - وحگ عينچ كل قوة تتبخر من اوگف گبالچ بس يمچ روحي ترجف على الكلمة التطلع من حلگچ انا الما رجفت بساحات الموت هسه جاي ارجف بين أديچ صرت مثل جندي ضيع سلاحه بنص المعركة وما لگه غير حضنچ ساتر.
سكتت واني احس بكلماته دخلن بوسط روحي باوعت الأيده إلى لازم بيها ايدي حيل ومخليها على گلبة مديت أصابعي اتلمست الگتر مال شعري إلى ملفوف على معصمة عبالك جزء من جلدة
: - ما تنزعة مو ضيگ على أيدك؟
اول ما سمع سؤالي ابتسم عرفني استحيت وجاي اغير الموضوع واني اباوع للگتر شلون حاز بأيدة ومبين عروقه الناطه إلى برزت اكثر لان مضبوب حيل على ايده عبالك جاي يعصر بدمة.
مُهران: خلي يضيگ ما دام بي ريحة شعرچ عساه يگطع نفسي ما انزعه حرزي مو بس گتر شعرچ هذا اطب بي للموت وأطلع سالم لان ريحتچ ترافگني.
ميرار: بس اخاف يوجعك مبين شاد حيل
سحب ايدي باس باطنها وحط وجهه بوسط چفي وغمض عيونه حيل
مُهران: انا اريدة يطبع اثرة بجلدي حتى من اموت يلگون أثرچ محفور بية.
فز گلبي من حچايته مديت ايدي الثانية مسدت على خدة
ميرار: اسم الله عليك لا تگول هيچ والله اموت بلياك
لزم ايدي إلى على خده وضغط عليها فتح عيونه مبتسم
مُهران: يا بعد حيلي زمزمي تخافين عليَّ!
هزيت راسي أي عيوني مدمعة وهوَّ عيونه ضايعة بوجهي
مُهران: چا هسه صرت أعز روحي لجل عينچ.
أبتعدت عنه ميته بدمي ردت اروح ولزمني من زندي
: - وين رايحة ما شبعت منچ خرب فُرات الحارمني منچ انوب حس بيه اجيج بالليل مدري شني ضل حتى ما ينام.
ميرار: لا تحچي عليَّ والله ازعل.
: - اموت اذا تزعلين زعلچ فلا هين وسيف على احب فُرات وأحب اخته واحب كلمن يحبهم.
: - همه هم يحبونك عقيد
ضحك وگرص خشمي وخدودي وباس أصابعه
: - وانا اموت باليحبوني.
اندگ الباب واجانا صوت مَياسة
: - راح تنلگفون وعلى فُرات يسأل عليكم اللهم اني بلغت.
مُهران حط ايده على وجهه بملل حسيته راح يشگ هدومه طلعت اركض وهوَّ يصيح وراي أرجع يگلي ما شبعت منچ رحت بالمطبخ شاردة منه واستوقفني منظر تسنيم وجسام واگفين بالحديقة من الجهه الثانية هوَّ يحاول يحچي وياها وهيَّ صاحت بي.
تَسنيم: عوفني جسام طلعت روحي بالقرأن ما اتزوجك.
مسح وجهه يگلها
: - تتزوجيني مو بكيفچ انا أحبچ ليش هيچ تسوين تعبتيني وحق الخلقچ ذليتيني انطيني سبب واحد ليش رافضتني وانا أگول حقها انا مشتريچ بروحي ليش ما جاي تفتهميني؟
باوعتله بيأس غطت وجهه بأيديها تبچي حيل وهوَّ اتسودن لا يگدر يلزمها ولا يگدر يضل بمكانه.
تَسنيم: والله مو بأيدي جسام لا تخليني اظلمك واظلم روحي وياك.
لانت ملامحه يباوعلها ومال راسه
جسام: بس انا راضي بالظلم اذا منچ والله.
عيونه انملت عتب وحسرة وهوَّ يباوعلها شلون تبچي لان ما تريده
: - انا راضي بمرچ قبل حلوچ بُلبل بس انطيني امل صغير أعيش بي وانا انتظرچ عمري كله شبي گلبچ عليَّ حجر؟
مسحت دموعها بردانها حيل تگله
تَسنيم: عوفني فدوة اروحلك جسام اني ما اصيرلك ولا بأي شكل من الأشكال روح شوف حياتك ويَّ وحده تگدر تسعدك.
جسام: يا حياة هاي الأشوفها بدونچ؟ و يا سعادة التجي من غيرچ؟
اتقرب منها كم خطوة بهدوء عيونه يلمعن يحچي بغصة
: - ما اطلب منچ تسعديني ولا طلبت نصير احلى ثنين كل الطلبته امل صغير طلبت تخليني احاول امسح كل الخوف البعيونچ صعبة عليچ هاي! وحق محمد السواد البداخلچ ابيضه وكسرچ أجبرة بگلبي بُلبل.
رجعت خطوة ليورة ترجف
تَسنيم: لا تگول كسرچ اجبرة ما مكسورة اني انتَ ما تدري شيء عني جسام انتَ حبيت صورة رسمتها ببالك بس الحقيقه تكتل عوفني بحالي لا تصير انتَ والدنيا عليَّ.
تشهگ وتحچي كل كلمة تگطع روحها
: - اني منتهيه اني ميته من جوة لا تخليني احچي حچي يخليك تندم على كل لحظة وگفت بيها گبالي وحق الخلقك لو صرت الك راح اتعذب واعذبك وياي راح تضل تباوع بوجهي وتدور تسنيم القديمة وما تلكاها وتاليها تمل وتكرهني اذا صدگ تحبني مثل ما تگول اعتبرني متت لا تلح عليَّ اكثر.
شاطت روحه وبمكان ما يبتعد اتقرب عليها اكثر
: - انا من محبتچ ما امل وحق على ابن ابي طالب لو صرتي ببيتي افرشلچ رموش عيوني وتنامين عليها لو الدنيا كلها ذبت سوادها بداخلچ انا اغسلچ بدمع عيوني وارجعج بيضه مثل ما اعرفچ لا تكولين عوفني هاي تگولينها لواحد جاي يلعب مو لواحد محارب اهله والدنيا كلها لخاطرچ.
اذا خايفة من شيء انا احميچ بروحي واذا شايله هم سر ف انا البير الغميج بس لا تكسرين بختي وبختچ هيچ بُلبل.
نزلن دموعها اكثر وهيَّ تگله
: - والله لو تدري البگلبي چان انتَ اول واحد تنهزم مو اني الأنهزم منك ضيعتني وشيلتني ذنبك وضيعت روحك وياي ياريتني ما عرفتك.
الكلمة چانت مثل الملح على جرحه عقله طار فقد اعصابه
: - تگول اظلمك تگول هوَّ اكو ظلم اكثر من هذا ولچ انا جاي اكلج راضي بيچ لو بيچ عيوب الدنيا كلها انا راضي بيچ لو اعرف وراچ الموت بس انتِ ما ترديني وهذني كلهن أعذار حتى تخلصين.
تَسنيم: اي چا همزين عرفت.
هز راسه خوش ودنگ اباوع الأيده ترجف ترجف
: - هاي هيَّ تتدللين، امسحي دموعچ وامشي ادخلي يلا.
مسحت دموعها ودخلت للمطبخ تبچي تريد تغسل وجهه بس شافتني ذبت روحها بحضني مسحت على راسها ابچي وياها وهيَّ حچيها نصه ما مفهوم.
تَسنيم: هسه شبي ما يعوفني شبي ششاف بيه بس اريد اعرف؟
ميرار: يحبچ ما يعوفچ لا تبچين يا بعد روحي شهالرجفة؟
تَسنيم: خرب روحك جساااام خرب روحك.
اني من حجيها ويا فهمت طرف السالفه تقريباً بس ادعي بگلبي يارب مو هيچ السالفه واطلع فاهمة غلط مسحت دموعها بأيدي وغسلت وجهها وهيه تسب وتغلط على انوب ترجع تبچي.
تَسنيم: يركض وراي وين ما اروح بوجهي اليساا اني اليسا
ميرار: تروحلج فدوة اليسا
تَسنيم: خرب روحچ انتِ هم.
ابتسمت بوجهه وهيَّ ميته من القهر شويه ورجعنا للبيت فُرات وهوَّ طلع گلت لسَنابل على وضع تسنيم والكلام من دخلت لغرفتها وهيَّ انخطف لونها بچت وتهمس.
: - سوده عليه.
ميرار: يمكن اني ما افهمها عدل لان ما شايفتها بس من تسولف وتضحك انتِ اختها تفهمين عليها روحي سولفي وياها سكتيها.
هزت راسها خوش ودخلت الها مرت ساعتين او اكثر وطلعت تسنيم عيونها مورمة من البچي بس طبيعيه تضحك وتسولف گوة على روحها وسَنابل شايطه من فُرات تريد بس تگضه وتعاركه بس ما ينگض بس شغل.
سَنابل.
گعدت نص الليل راسي يريد ينفجر بگد ما يوجعني وحاصرتني البچيه الأضويه مال الصالة مطفيه بس ضوة الهيتر بيها تَسنيم وميرار كل وحدة بغرفتها والجهال توني نومتهم شلعوا گلبي يالله غفوا وطلعت وفُرات بعدة ما جاي عيوني مغورگة مدري من التعب مدري من الثكل الجاي احس بي يوم على يوم والليل طويل حسيت بي دخل بهدوء وسد الباب شفت بس خيالة بالصالة شمر السويچ مال السيارة على الميز و بس انتبهلي عقد حواجبة.
فُرات: سُنبلتي!
ما سمع مني جواب جنت گاعدة وحاضنه نفسي اجاني بسرعه گعد بصفي عيونه كلهن خوف مسد على خدي بأيده وگال
فُرات: شبيچ حبيبة گلبي؟
وخرت ايده من خدي بحركة وسحبت نفسي عنه
سَنابل: لا تگول حبيبة گلبي الحبيبة ما تضل لوحدها لنص الليل تلاوي الوجع اني اخر شيء تفكر بي من يخلص شغلك وتعبك فُرات.
سحبت نفسي لزاوية القنفه ودموعي الچانت محبوسة ضلت تنزل وحدة ورة الثانية وهوَّ يباوعلي باهت.
فُرات: سُنبلة هذا حچي يابة! انا افكر بيچ آخر شيء؟ وحگ السواچ انتِ اول فكرة ببالي من افتح عيني واخر فكرة أغمض عيني عليها شبيچ يا بعد روحي؟
قاطعته مقهورة منة
سَنابل: لا تچذب عليه انتَ تطلع من الصبح ويومك يخلص كله مشغول واني كافل وملك شلعوا گلبي واحد يملخ بالثاني واني حايرة بيهم وبثگل جسمي تسنيم وميرار خطية ما قصرن شالن البيت كله بس اني تعبت فُرات انتَ تجي مهدود حيلك تذب روحك وتنام لا تگول شغل ادري تشتغل وتتعب علمودنا بس شسوي بالخير اذا صاحب الخير ماكو اريد وجودك اريدك يمي والله العظيم تعبت.
اتقرب مني وسحبني من زندي الحضنه اني ادفع بي من صدرة حيل وهوَّ مقيدني بحضنه ويحچي بقهر
فُرات: كل هذا شايلته بگلبچ عليَّ؟
سَنابل: وخر عني فُرات وخر تدري شنو يعني اشتهي اگعد لو اسولف وياك واگول خطية تعبان واسكت؟
لمني على گلبة حيل يبوس براسي يحتار شلون يراضيني
فُرات: حقچ وحگ كل دمعة حرگت خدچ حقچ انا المقصر تدرين بالدنيا ورگضها المايخلص والله من خوفي لا أقصر عليكم بشيء ما جاي انطي لروحي مجال بس مو عذر والعباس مو عذر انتِ صاحبة الحق وانا الممنون بس لا تگولين انا لوحدي وانا حزام ظهرچ.
سكتت واني بحضنه ودموعي بللت قميصه ادري بي يحبنا وادري بي ما يرگض إلا الأجلنا بس اختنگت.
سَنابل: كل يوم الوجع ياكل بيه واني اگول لا تگعدينه خطيه تعبان بس اني هم تعبت من دور الصابرة على بعدك.
رفع راسي بأيده وعيونه غرگانه بالحزن مسح دموعي بأبهامة بحنية خلتني أشهگ من جديد.
فُرات: يا كسرة ظهري بهالحچي انا الچنت أظن جاي تفرحين لان جاي اتعب ببيتنا وعلى مستقبلنا حتى نعيش براحة وحگ المعبود حگچ بكل حرف تحچينه من هالساعة لو تنطبگ السما على الگاع وگتچ ما يمسه الشغل انا الخسران اذا ضيعت ضحكتچ وانا الفقير اذا انترس جيبي وفرغ بيتي من وجودي يمچ.
دنكت وجهي على صدرة مسحت دموعي بقميصه ورجعت باوعتله
سَنابل: بعدني زعلانة بس احبك
ابتسم وجر وجهي باس خدودي ثنينهن
فُرات: عساچ دوم تحبيني واذا على الزعل انا اراضيچ لو تطلبين عيوني اشلعهن واحطهن بأيدچ.
بهالاثناء انفتح باب غرفة تسنيم وما نسمع بس صيحتها
: - يبووووو راح الشرف راح ولكم هوَّ هنااااااا ما تخافون على برائتي انتم.
انا فزيت حاولت ابتعد بس فُرات ما هدني ضحك وبقى حاط ايده على چتفي يباوعلها بطرف عينه.
فُرات: امشي روحي نامي لا أگوملچ.
تفرك بعيونها النعاس بيهن حطت ايدها جوة حنچها تگله
: - أروح انام وافوت على روحي هالمشهد التاريخي؟
فُرات: انتِ والله ما تستحين ما شايف بصلافتچ رجال ومرته شعليچ بينا؟
تَسنيم: على كيفك رجل أختي شني السالفة رجال ومرته بغرفتهم مو گبالنا حاطها وتبوس بيها ترا والله من وراكم اتهور واتزوج.
فُرات: صلفة بت الصلفة جسمي متكسر چا گمت بچيتچ
تَسنيم: شمر تالي وكت يبچيني هوَّ.
فُرات: والله هيَّ خوش فكرة اتزوجي وفكينا بس يا مگرود يقبل بيچ وانتِ لسانچ بطول النعال؟
تَسنيم: ما اتزوج شبيك صدگت أصلاً اضل على گلبك العمر كلة.
ضحك وهز راسه موافق
فُرات: ولوعة زينب اكيف بس كون تضلين عد كلمتج مو كم يوم وتصيحين زفوني ماريد العشى
تسنيم: لا افااا عليك.
باوعلي وباوعلها انوب گلها
: - سُنبلتي تعبانة واريد اطلعها اشممها هوى تبقين يم الجهال لو اسحب منچ الأمتيازات.
تَسنيم: والله يا ابو كافل السوگ صاعد والخدمة بالليل دبل يعني اظل يمهم واداريهم واذا گعدوا اسكتهم هاي ينرادلها ميزانيه تلوگ الهالتعب.
طلع محفظته يضحك سحب خمسين الف
فُرات: هاچ بس كون من نرجع نلگه البيت هدوء والجهال نايمين هذني كافي لو تردين بعد؟
اتقربت اخذتهن من ايده وضلت تهفي بيهن على وجهه گبالنا
تَسنيم: هسه صار الحچي حلو كسرتوا خاطري وراح اسوي الكم تخفضيات واقبل بهذني روحوا اتونسوا اني راح اسويلي لفة جبن واگعد احرس المملكه.
غمزلها مبتسم يگلها
فُرات: بدونك أتيه انا ابو السوم
تَسنيم: اتونس ما دامني عايشة ضلعي.
سحبت نفسي من حضنه ابتسم على حجيهم
فُرات: گومي بدلي حبيبتي يلا
سَنابل: بس وين رايحين؟
فُرات: گومي ومعليچ.
گمت من مكاني دخلت للغرفه شفت كافل وملك نايمين واحد شامر ايده واحد فاتح حلكه بستهم من بعيد خاف يفزون گلبي گرصني عليهم احس جاي اخونهم واطلع لوحدي الصبح بس يدرون يگعدون يرطنون فوگ راسي دخلت للحمام غسلت وجهي بماي بارد ونشفته خليت مكياج خفيف يخفي تعب عيوني لبست قميص صوف ناعم وفوگاه كوت شتوي طويل لونه بيجي يدفي جسمي من برد الليل لبست حجابي وحذائي وطلعت للصالة شفته واگف يم الباب ساند ظهرة على الحايط يگلب بتليفونه بس شافني شمرة بجيبه وعدل وگفته.
فُرات: اللهم صلِ على محمد وآل محمد چا هيَّ هيچ النساوة تطلع الوجه ينگط عافية يروحلچ فدوة فُرات وعشيرة فُرات.
سَنابل: حبيبي انتَ أسم الله عليك.
تسنيم گاعدة بنص الصالة تاكل بلفة الجبن وگبالها گلاص الچاي تباوعلنا بحقد بحلكها حچي بس بحلگها لگمة بلعتها وحچت
: - يابة ترا اني هنا يلا عيني الشمر اخذ مرتك واطلع لا تدوخوني بغزلكم ترا جاي اتعشى لوحدي مثل الارامل.
ضحك ومدلي أيده رحت لزمتها وهوَّ شد عليها حيل
: - يلا سُنبلتي امشيننا.
طلعنا وسدينا الباب چان الجو بارد والهوى يطرد النعاس فتح إلى باب السيارة صعدني سد الباب ودار صعد بمكانه اول ما شغل السيارة التفت عليَّ وحط ايده على ايدي.
فُرات: وين تريد تروح الحلوة؟
سَنابل: وين ما چان حَبيبي بكيفك ما ببالي شيء بس ما اريد انزل من السيارة باردة.
شال ايدي لشفايفه باسها وهوَّ يسوق
فُرات: تتدلل ام كافل.
حرك السيارة بهدوء والشوارع فارغه بس ضوه المحلات المعزله ينعكس على الجام والبرد يطگ بالعضم رغم مشغل تدفئه السيارة يدفي بأديه عليها ساندة راسي على الجام اباوع على البيوت والمحلات فجأة عيني وگعت على محل حلويات مشهور بالمنطقة المحل چان معزل.
فزيت من مكاني أشرتله بأيدي
: - فُرات فُرات.
گلبه فز من صيحتي داس بريك يسأل بيه
: - ها يا روحه شبيچ يوجعچ شيء نروح للمستشفى؟
هزيت راسي عيني متعلگه بالمحل
: - لا بس باوع لذاك المحل والكيكه ذيچ ام الككو المعروضه بالجام والله ريحتها اجت بخشمي هسه اريد كيك فُرات روحي راحت عليه احس طعمه بحلكي هسه.
صفن يفكر شويه انوب گال
: - بس المحل معزل سُنبلة نرجع للبيت وأسويلچ كيك بأيدي؟
: - لا وين اكو كيك يسوي كيك، اريد إلا ذيچ.
ضحك من كل گلبة يهز براسه عبالك الكلمة دغدغت گلبه طفه السياره والتفت عليَّ عيونه تلمع.
: - چا وحگ هاي الكلمة الحلوة لو المحل محصن بكونكريت هم افتحه الچ وأجيبها.
: - عزا بعيني فُرات نبوگ؟
: - لا أفا عليچ.
: - چا شلون؟
مسح على لحيته وگال
: - ابو كافل انا مو عيب مرتي تشتهي ذيچ الكيكه وانا گاعد؟
صفگت بأيدي احمس بي واگله
: - اي والله عيب كفو ابو كافل روح واني بظهرك.
جر وجهي باس خدي يضحك نزل من السيارة وسد الباب عدل قميصة واتقدم على المحل ضل يدگ على جام المحل دگات خفيفه واني اراقبه واضحك اتشمت بي شال أيده وغمني وره شويه انفتح ضوه المحل وطلع زلمه جبير مبين جان نايم بالمحل او بالمخزن فتح الجام الصغير مال الباب وباوع لفُرات بأستغراب.
: - خير يا اخوي! دنيا الفجر والمحل معزل.
فُرات: يا بعد اخوك انا اسف وحقك عليه على الأزعاج بس ام الجهال بالسيارة وتتوحم وعينها ما طاحت الا على هاي الكيكه ام الككو المعروضه بالجام و لو تطلب سعرها دبل ما اگول لا.
الرجال باوع للسيارة ابتسم وهز راسه يمسح بوجهه ويگله
: - ما نردك يالذيب تتدلل انتَ و ام الجهال
: - يا بعد روحي.
دخل الرجال جوة وشفت فُرات واگف بالبرد يفرك بأديه وينتظر بلهفة عبالك هوَّ الراح ياكل مو اني ورا دقايق اجه الرجال وبأيده الكارتونه إلى بيها الكيكه انطاه فُرات الفلوس يتشكر منه واجه شايلها بيده مثل الكنز.
فتح باب السيارة وصعد وريحه الككو ترست المكان قدمها إلى مبتسم
: - الكيك للكيك.
اخذتها منه بلهفة افتح بيها اضحك
سَنابل: خاب وعلى ماكو غيرك كيك دتعال اكلك تعال.
ضحك من كل گلبه وذب روحه على الكشن يباوعلي بحب اخذت الشوكه امرد الكيك بيها سويته عبالك تشريب وكله ككو اكلت اول لگمة وغمضت عيوني چان الككو بارد ويذوب بالحلگ احس السكر سرى بدمي وعدل مزاجي الچان مگلوب وهوَّ عيونه ما فارگتني.
فُرات: هنياله ثريد الكيك الينوكل بهالضحكة.
: - تعال اكل وياي والعباس تفوتك.
مديت الشوكه المتروسه ككو الحلگه اكلها ومسح طرف شفته بطرف اصبعه وهوَّ يباوعلي بنظرة ذوبتني اكثر من الكيكه.
: - ما احب الكيك بس طعمها طيب لان من أيد سُنبلتي.
: - يا بعد روحها وعمرها.
: - كل العمر انتِ.
: - والعباس أحبك اكثر من هذا الكيك وانتَ قيس بعد.
ضحك يمسح على لحيته
: - اموت عليچ انا تعاي ابوسچ بوسه ام الككو.
قربت اله وجهي أضحك احس صايرة ادب سزز كلش وهوَّ ما صدگ جر وجهي شفط خدودي شفط و كل شويه يصيح.
: - أووف.
ضحكت من كل گلبي متدغدغه وهوَّ يضحك على ضحكتي ويگول
: - ولوعة زينب الدنيا تضحك بعيني من تضحكين هيچ.
ابتعدت عنه غطيت وجهي بأيدي اضحك واني اتذكر
: - اتذكرت من چنت حامل بملك وكافل واتوحم فوگ راس تسنيم بشغلات غريبة عجيبة وهيَّ تغلط عليك وتگول گاضينها عليَّ احميك وتحميني وانتم مسوين سالفتكم.
: - هههههههههههههه انا ألها همزين گلتيلي چانت تضوجج؟
: - لا والله اصلاً ابتلت بيه بلوة.
باوعلي مبتسم بقهر وگال
: - بعدها السالفه بگلبي ومقهور لان ما چنت يمچ بوكتها.
خليت ايدي على أيده
: - انتَ موجود بگلبي حتى لو ما چنت يمي راحت ذيچ الأيام راحت.
: - بس فرحان انا هسه والله فرحان بعائلتنا الصغيرة اطفالنا وميرار وتسنيم وانا وانتِ الحمد لله يارب على نعمتك عليَّ.
سكتت شويه واني اباوع لوجهه المبتسم براحه
: - الله يحفظك النا.
: - ويحفظكم الي، يارب تكبر عائلتنا اكثر ويجوون روح أبوهم بصحة زينة وينترس البيت بهوستهم اليرتاح بيها گلبي.
: - شنو تتمنى يجينا؟
: - اليجي من الله حلو بس تعرفين الجواب
: - اعرفك فُرات تريد تؤام ثنين بنات.
: - اذا الله راد وحقق حلمي، وأسمي وحدة عقيق على أسم امي والثانية انتِ تسمينها رزق البنات والله رزق.
: - زين انتَ ليش واثق تؤام؟
: - غير ادري بروحي نچر.
طگيته على چتفه حيل وهوَّ يضحك وجر أديه ثنينهن بأيد وحدة لازمهن يبوس بيهن.
فُرات: والله نچر والوكت راح يثبتلچ وشوفي اذا ما اجو تؤام وعيونهم وساع مثل عيونچ ذيچ الساعة عاتبيني.
سحبت ايدي من ايده اضحك
: - والله صاير صلف وتطلع سوالف هسه خلي نركز عقيق عرفناه والثانية شنو تسميها؟
عدل كعدته وشغل السيارة يسوق بهدوء مبتسم
: - الثانيه اذا رضيتي دُر حتى يصيرن عدنا ملك وعقيق ودُر يابة بس اتخيلي الصبح اگعد بين 3 بنات وحدة تشبه صلافه تسنيم والثانيه هدوء ميرار وملوكه تشبهچ بحنيتها چا غير البيت يصير جنة.
: - الله يسمع منك ويرزقنا العافية والتمام تدري چنت شايله هم هالحمل بس من شفت لهفتك هسه احس حتى الثگل صار خفيف على گلبي.
سندت راسي على چتفه وهوَّ يسوق لزم چتفي وقربني اله اكثر باس راسي وزفر نفس مرتاح.
: - لا تشيلين هم وانا موجود والله لو بأيدي اشيل التعب منچ واحطه بگلبي وانتِ ترتاحين.
: - چا ليش ما يصير تصير حامل بمكاني والله ضلم هذا.
طگني على راسي يضحك بدت شوارع منطقتنا تبين لان احنه اصلاً ما اتبعدنا كلش طبگ السيارة بباب البيت طفاها والتفت يگلي
فُرات: اتأخرنا امشي على كيف من ندخل هسه تريد بعد خمسين.
سَنابل: لا جبت الها كيك بلكي ما تحچي.
نزلنا وسدينا بيبان السيارة على كيف فتح الباب فُرات بالمفتاح ودخلنا نمشي على اطراف اصابعنا اول ما دخلنا چان ضوه المطبخ يرمش خفيف تقدمنا وشفنا المشهد إلى خلى فُرات يغص بضحكته واني غطيت حلكي بأيدي من الصدمة.
تسنيم چانت نايمة على القنفه الطويله بالصالة رجل بالگاع ورجل فوگ وكافل وملك الظاهر فزوا نص الليل وما لگونا ف قرروا يعتنون بيها بطريقتهم كافل جايب اللحاف ماله وشامره فوگ راسها بحيث بس خشمها طالع وملوكه مخلصه المكياج مالي وصابغه وجه تسنيم صبغ الحمرة واصله الأذانها والظل الازرگ فوگ حواجبها مستمرين يلعبوون بوجهه ما منتبهين النه وهيَّ بسابع حلم.
كافل: ولچ مو هيچ هذا خلي بحلگها.
لابسه البوند مالي إلى اشيل بي شعري من اسوي عنايه وتگله بضوجه
ملك: لا كافو أسكت لا تزعجني ضل بشغلك.
هز ايده ما راضي ومستمر يغطي بيها بلحافة فتحت حلگي بصدمة وصحت.
: - يبوي ولچ ملوكه هاي حمرتي الماركة مخلصتها على خدود تسنيم!
بذيچ اللحظة فزت تسنيم من الخرعه سحبت اللحاف من وجهه تتثاوب وتفرك بعيونها إلى متروسات كحل وحمره وكلشي
تَسنيم: الله جابكم قرودتكم چانوا خوش اوادم نوموني بحضنهم وعاملوني معاملة الملكات ترا.
فُرات: ههههههههههههه بس والله ملوكه مسويتلچ تاتو عالمي.
فزت ورگضت للمراية بس شافت وجهه صرخت صرخه فززتنا
تَسنيم: ولكم هيه هاي خلفتكم انا احرسهم وهمه يصبغون بوجهي يالشمر الخمسين ما تكفي بعد اريد تعويض نفسي ومادي وجلسة تنظيف بشرة بلبنان.
فُرات: امشي ولي خلصت مصلحتنا بعد ما نحتاجج تعالوا بابا تعالوا عفية بالسباع.
راحوا اله يضحكون وهو حضنهم حيل واني گلبي متكسر على مكياجي
تَسنيم: والعباس اذا ما اخذت الخمسين الثانيه هسه انزل بيك ستوري وافضحك اگول عاف جهاله وراح ياكل كيك بنص الليل أب مو صالح.
هز راسه لا وطلع خمسين ثانية من جيبه انطاها الها
: - عود روحي سوي جلسة تنظيف بشرة مدري شني كل شيء ولا انفضح گبال فضة ونبعة ومشتقاتهن شيفكني.
اخذتها منه تضحك وخلتها فوگ راسها
: - تاج على راسي احطك مثل هاي الخمسين
: - بنص گلبي احطچ بس نظفي وجهج خلستينا راح يصير بينا توحد من الصدمة.
تَسنيم: سهله اتشمت بيه هسه يالشمر بس دشوفني الصبح إلا ما تعرفني من گد ما المع.
راحت من عدنا تتوعد وتغلط عليهم دخلنا للغرفة نضحك واني اباوع للجهال احير منين ابدي لاعبين بروحهم لعب بالمكياج شفت فُرات نزع قميصه ضل بالتعلاگه.
فُرات: ارتاحي حبيبتي انا هنا.
شالهم واحد ورة الثاني بحنية اخذهم للحمام وبقيت اسمع صوت الماي الدافي وصوت شقاهم وياه يسبحهم ويسولف وياهم بصوت ناصي
: - ها زلمة ابوك صرت نظيف؟، ملوكة بابا باچر نشتري مكياج احسن من مال امچ.
ورة شويه طلع شايلهم سابحين وريحتهم شامبو وصابون نشفهم وغير ملابسهم لبسهم بجامات دافية وشعرهم مبلل وناعم مشطهم ورش الهم عطرهم الخاص مال الاطفال كمل وگعد ركبة ونص گبالهم.
فُرات: هسه شنسوي بعد؟
اتقربوا ثنينهم باسوا خدة وگالوا بصوت واحد
: - نروح ننام.
فُرات: وين تنامون؟
: - بغرفتنا
: - عفية بالسباع يلا.
اجوني يركضون شمروا روحهم بحضني شبگتهم وبستهم حيل
: - يا گلبي انتم يا روحي تنامون يمي؟
فُرات: سُنبلة لا تسويلهم واهس گوة علمتهم خلي يتعودون.
وخروا مني مبتسمين لوحولنا بايدهم وطلعوا وسدوا الباب بهدوء ابتسمت عيني عليهم.
سَنابل: احس اتعودت على رفسات كافل نص الليل.
فُرات: انا هم اتعودت على عضات ملوكه تعضني من خشمي تحبه.
ضحكت وگمت غيرت ملابسي لبست شيء خفيف واتعطرت لگيته على الچرباية متمدد شلت اللحاف ودخلت ضميت روحي بحضنه شبگني حيل ونمنا.
بَرائه.
من بعد تفكير طويل قررت اسوي إلى براسي تعبت من الملل والگعدة ونفس الروتين ماكو شيء يتغير لشوكت أضل هيچ گاعدة وساكته أيام تمر واني على نفس الوضع ما احب هيچ ما متعودة گعدت بصف هيله احاچيها بهدوء أريدها بس كون ما تگب بوجهي شرحت الها كل شيء براسي وشلون بنفسي نرجع نفتح محل ابوي ونعيش اني وياها بعيد عن الدنيا كلها.
بَرائه: ها بيبي شگلتي؟
هيله: ورجلچ؟
بَرائه: شوكت تستوعبين إلى بيننا اتفاق وبس بس نتطلگ بعد ما اله شغل بيه ولا إلى شغل بي وهوَّ سوه إلى على وزيادة هم
هيله: أخر كلامچ؟ ما تتندمين بعدين؟
هزيت راسي اي وهيَّ عدلت شيلتها وگالت
هيله: چا خوش نتوكل على الله انا بعدين اطلع اتسوگ النا حتى نگعد بالليل نسوي ونكملهن وباچر من غبشة افتح المحل.
بَرائه: واني أروح وياچ؟
هيله: نشوف.
بَرائه: احم همه عمامي بعد ما يوصلولنا النا صحيح؟
هزت راسها اي
هيله: خاب شحدهم يوصلون كفيلچ الله سچينه وانومها بگلبهم شافوني طحت ذيچ الفترة واستولوا عليچ لا تخافين من شيء هسه ما دامني عايشة محد يمس شعرة من راسچ عزيزتي و عزيزة أبوچ انتِ.
اتقربت حضنتها حيل وبست راسها
: - الله لا يحرمني منچ.
ابتسمت تمسح على راسي نامت الها شويه واني گمت نظفت البيت وغرفتي على السريع و بس گعدت العصر أخذت الفلوس الضامتهن من چان ابوي عايش الله يرحمة و راحت تتسوگ بيهن واني صارت بيه طاقة عجيبه احس ابوي يباوعلي من بعيد كل شوي دموعي تجري.
رحت للمطبخ طلعت الغراض القديمة الچنه نشتغل بيهن الطاسات و الصواني والجدورة وقوالب الكليجه و كل شيء غسلتهن من جديد وعقمتهن الفرن لمعته ونظفته زين فرشت بالمطبخ سجادة مربعة فوگ الفراش حتى من نشتغل عليها ما يتدمر فراشنا ويضل نظيف.
للمغرب يالله اجت نفسها مگطوع من التعب اتلگيتها اخذت العلاليگ من ايدها وهيَّ تبتسم على ابتسامتي اتربعت بالگاع افتح بيهن جايبة كل شيء نحتاجه گعدت بالگاع مادة رجليها تسولف.
هيله: لاگوني زبائن فاضل كيفوا من شافوني جاي اتسوگ يگولون انقبض گلبنا وأحنه نشوف مكانة فارغ.
بَرائه: حتى اني گلبي انقبض والله
هيله: يمته نبلش بيچ حيل من هسه؟
هزيت راسي أي وگمنا للمطبخ بدت ريحه الهيل والدارسين والسمسم المحمص تفوح وصار للبيت روح ثانيه غير الخوف والمرض چنه عايشينها چنت اشتغل بواهس اعجن واطبع بقوالب الكليجه وهيله تباوعلي تسبح وتسمي بأسم الله وتبتسم.
بينما احنه بنص الشغل والفرن حامي نخلي بي وجبة ورة وجبة سمعت صوت الباب الخارجي انفتح وصوت هيله تگول.
: - هذا مُرتاد هلا يمه هلا بطولك.
دخل للمطبخ وجهه چان تعبان شافت عيونه المنظر المطبخ المگلوب بالغراض والريحه مال الاكل واني متربعة بالگاع رفع ارداناته يباوعلنا بعتب.
مُرتاد: الله بالخير، شني شجاي تسوون؟
هيله: الله بالخير والعافية، تعبنا من الگعدة بدون فايدة گلنا نرجع نفتح المحل نلهي روحنا بي ونرجع ذكر فاضل بشغلة.
مُرتاد: ها بيها الخير.
شفت فكه انشد وعيونه مركزة عليَّ بنظرة غريبة اكثر من نظرة عتب سحب الكرسي وگعد بهدوء گوة كاتم عصبيته بس ما يگدر يحچي من بعد هيله دار وجهه عليها يحاچيها گوة محافظ على هدوء صوته.
مُرتاد: يمة انتِ ترضين مرتي تفرفر بالسوگ انتِ شتگولين انا اقبلها على عرضي تبيع وتشتري والجاي والرايح يتفرج؟ زين انا بشنو قصرت ليش هيچ تسوون؟ ليش ما جاي تاخذين كلامي بعين الأعتبار بَرائه؟
بَرائه: انتَ ما تفتهمني مُرتاد مو كل مرة نعيد نفس السالفة.
هيله: لا تسويها سالفة وفرفرة بالسوگ هذا محل ابوها ومأمن بنص خوش أوادم وانا وياها ايدي بأيدها تتوقع اخليها تبيع لو توگف گدام الرايح والجاي ترا اخافن عليها اكثر منك.
مُرتاد: والعباس ما قاصد اشكك بحرصچ بس النار بصدري مو بصدرچ الفكرة لوحدها تحرگ گلبي ما راح تفتهميني.
دار وجهه عليَّ عيونه مليانه عتب وحسرة وگال
مُرتاد: انا ما افهمچ بَرائه! لا وعلى افهمج وافهم البراسچ كلش زين انتِ جاي تتحضرين لكلشيء حتى تتطلگين مني ما يكسرچ شيء مو؟ بس الماجاي تفتهمينه انا خنگتي مو بس من فكرة المحل خنگتي منچ لان مخليتني مؤقت بس انا لا.
هيله تباوعلنا مضيگه عيونها جريت نفس وگتله
بَرائه: مو شغلة مؤقت مُرتاد بس گتلك انتَ جاي تفتح بيبان مسدودة ما لازم تنفتح.
مُرتاد: وعلى انتِ الجاي تسدين بيبان الدنيا بوجهي بأعذارچ هاي المحل ما يسندچ اليسندچ زلمة يبيع روحه ويشتري خاطرچ بس انتِ جاي تعمين عيونچ بخوفچ.
هيله: حلو حلو.
بَرائه: اني ما خايفة مُرتاد بس اني ماريد انتَ دتشفق عليه و بس أحلفك بعزيزة گلبك لا تصير عائق بشيء اني رايدته.
مُرتاد: والعباس صعبة هالحچاية تطلع من حلگچ وانا الچنت حاسب روحي سند الچ طلعت عائق؟
هيله: ولكم كافي! بَرائه؟
مُرتاد: لا يمه خلها تحچي، حلفتيني بعزيزة گلبي وداعتها هيه ما راح اصير عائق روحي بَرائه افتحي المحل بيعي واشتري وصيري البنية الما تحتاج احد هذا التردينه انتِ.
بَرائه: ما تقصر.
ضرب على فخذة وگام من مكانة باوعلي وگال
مُرتاد: بس حطيها ببالچ المحل يرزقچ فلوس بس ما يرزقچ راحة بال وانا من اليوم ما راح اكون عائق ولا شيء راح اكون مثل ما ردتي انتِ ورق بورق لحد ما يخلص الوكت وتطوين هالورقه بأيدچ.
دار وجهه وطلع من البيت كله ينطح بالبيبان واني بعدني جامدة بمكاني غسلت اديه وغسلت وجهي بماي بارد احس گلبي احترگ مادري ليش.
بَرائه: هوَّ ليش ما يفهم؟ ليش يريدني بكل شيء اعتمد عليَّ وهوَّ يدري السالفه كلها فترة وتعدي؟
هيله: مُرتاد ما جاي يشوفج اتفاق جاي يشوفچ روح وانتِ بكل حچايه تذكرينه انتِ عابرة سبيل.
بَرائه: بس هوَّ اني صح عابرة سبيل وراح نتطلگ.
هيله: اليريحچ سوي حبيبة وانا وياچ واسندچ بكلشيء ابد لا تحسين روحچ ما عندچ سند انا سندچ ترا عدال عشر زلم.
بَرائه: خرب بالزلم اذا يلحگونچ.
ابتسمت واتناسيت كلام مُرتاد كله وركزت على جودة الأكل وترتيبه نظفنا المطبخ الأخر مرة ورتبنا الأكل بمواعينه ورحنا ننام غفيت واني حاطه ايدي على گلبي احس بخوف ممزوج بأصرار غريب.
المنبه رن الساعة 5: 30 الفجر والبيت بعده غرگان بريحه الهيل والكليجه دخلت للحمام الماي البارد فزز كل خلية بية اتوضيت وطلعت فرشت سجادتي بزاوية الغرفة اليمر بيها ضوى الفجر من الشباك صليت الفجر وصليت ركعتين لوجه الله وبقيت گاعدة شويه اقرا قرآن وآيات الله تنزل بگلبي برد وسلام دعيت من كل گلبي يارب انتَ تدري بحالي وتدري اني مو طماعة بس رايدة اعيش بكرامة واستمر بحلم ابوي يارب افتحها بوجهي ولا تخليني عالة على احد.
لميت السجادة وگمت لبست حجابي وعبايتي طلعت من الغرفة لگيت هيله لابسه ومنتظرتني طلعنا شايلين الغراض وقفلنا الباب ورانا وگفنا تكسي وركبنا صوت العصافير بدى يعلى ويَّ خيوط الشمس وصلنا باب المحل هذا المكان الشفت بي احلى ايام حياتي ويَّ ابوي هسه جايتله وحدي.
نزلنا من السيارة لزمت المفاتيح والحديد بارد يچوي الأيد درت المفتاح بالقفل و دفعت الباب.
بَرائه: يا الله. بسم الله الرحمن الرحيم.
اول ما دخلنا ريحه التراب خنگتنا بدت الشمس تتسرب من فتحات الباب ترسم خطوط ضوى بنص التراب سديت الباب ورانا ونزعت عبايتي حطيتها على زاوية ورفعت رداناتي غسلت المكان كله ونظفته وعطرته دموعي تجري واني اشوف ابوي بكل شبر هنا.
هيله بدت تطلع الصواني وبكل حرص تسفطهن على الميز الخشبي العريض المنظر چان يفتح النفس الكليجه مسفطتها بالصواني جنها ليرات ذهب وصواني الفطائر وجدر الدولمه وكل شيء تمام الريحه بدت تطلع للشارع وتجيب الناس.
هيله: يمه بَرائه اطلعي رشي ماي گدام الباب الخير يجي ويَّ رشه الماي.
اخذت سطل الماي وطلعت رشيته بعتبه المحل السما چانت صافيه والجو بي برودة ترد الروح بدت الناس تمر واليعرفون ابوي يوگفون بأستغراب ويگولون هذا محل ابو بَرائه انفتح؟
: - اي يابة انفتح وبنتك واگفه بي
هذا اليسلم وهذا اليترحم الأبوي وهذا اليشم الريحه ويگول رجعت ريحه الخير هيله چانت گاعدة ورة الميز بمكان ابوي تبيع للناس وخرت عن الأنظار گعدت ورة ميز ما ابين منه وعيني ما انشالت عن راس الفرع واحچي بگلبي.
بَرائه: معقوله يخليني وحدي؟ معقوله كلمتي جرحته الهالدرجة وما راح يمر يشوفني شجاي أسوي؟
بينما چنت غاطه بصفنتي فززني صوت هادء بي ذكريات ومو غريب على مسامعي ابداً.
: - صلوات على محمد وآل محمد وعلى چني جاي اشوف فاضل گبالي بس بملامح اصغر.
رفعت راسي بلهفة وشفت ابو ناصر رفيق عمر ابوي صاحب الطفولة چانوا يگعدون سويه للفجر يسولفون ويضحكون عيونه چانت تدمع وهوَّ يباوعلي.
وگفت بلهفة وفرحه
: - هلا بيك يا ريحة الغالي اتفضل عمو اگعد والله المحل نور بيك.
ابو ناصر: يا بعد عمو والله بَرائه من شفت الباب مفتوح رجلي الجابتني فاضل چان دوم يگول بنتي بَرائه هيه راح تشيل اسمي وصدگ ما جذب عفية عليچ يا معدلة يا بت الأصول.
گعد على الكرسي اندمجت وياه بالحجي ضل يسولفلي على ذكريات ابوي وشلون چان يحب هذا شغله وفرحان بي وشلون جان يسولف بيه ويوصي عليَّ الكل لان يدري ماعندي أخ ولا أخت ضحكت وبجيت من كل گلبي على كل سالفة يحجيها تخص ابوي وهوَّ عايفني على راحتي وهيله تسمع ويانه مبتسمة بقهر.
فجأة انفتح الباب مال المحل بس هالمرة دخل مُرتاد بملابسة الرسمية إلى ما راهمة لهيچ مكان شعبي ابد قميصه مفتوح من البداية صارت عينه علينا شلون گاعدين باوعلي بنظرة ما عرفت افسرها و هز راسه گوة مسيطر على أعصابه أحسه راح يلطخ راسي بالميز.
مُرتاد: السلام عليكم.
ردينا السلام بصوت واحد اتحمحمت وگمت من مكاني اريد بس اشرد من نظراته وهوَّ وگف يسولف ويَّ هيله ويسأل بيها بس على أعصابه.
ابو ناصر: منو الوليد هذا ام فاضل شيصير الكم؟
مُرتاد: اصير زوج بَرائه بَرائه تصير مرتي!
گالها يباوعله مبتسم على أعصابة
ابو ناصر: هلا ومرحبا چا بالخير عليك والله أخذت جوهرة بنت الغالي أمانة عندك وداعة فاضل غالية.
مُرتاد ما رد بس هز راسه اي بثگل وعيونه بعدهن مركزات عليَّ گام ابو ناصر من مكانه وهوَّ يدعيلنا بس طلع عتبة المحل صاحني مُرتاد.
مُرتاد: اتقربي بَرائه اتقربي.
وگفت گباله افرك بأديه و وجهي احسه ضل يحرگني من نظراته
بَرائه: ترا صديق ابوي الروح بالروح وچان يحچيلي عن ذكرياته.
مُرتاد: يا ذكرررريات بَرائه لا تسودنيني تدرين بالنار الواجه بصدري وانتِ واگفه هنا الجاي والرايح يتلمس ملامحچ بعينه انوب اجي الگاج تضحكين وتبجين وتسولفين ويَّ رجال غريب!
بَرائه: غير الرجال شافني واجه يسلم اطرده؟ اكله لا تسولف على ابوي؟
ضرب الميز بأيده حيل غمضت عيوني
مُرتاد: ما گلت أطرديه! الضحكه التطلع من الگلب هاي والدمعة التلمع هذني ما يطلعن إلا يم زلمتچ انتِ فطيرة ما تفتهمين نظرات الزلم تحسبينها كلها مثل نية ابوچ.
بَرائه: لا تصيح بوجهي.
گامت هيله من ورة الميز اجت وگفت بنصنا
هيله: استهدوا بالرحمن مُرتاد ابو ناصر زلمة جبير وجار قديم وبحسبه ابوها لا تضل تحفر ورة السالفه وتخرب فرحتها!
مُرتاد: لا تدافعيلها لا تدافعين يعني يا رجال چبير صاحب ابوها لازم تگعد وتسولف وياه وانا اشكل گروني وأگعد اباوعلها هيچ تريدن مو؟
بَرائه: يعني هسه اني سويت غلط! مُرتاد والله ما قصدي شيء بس مشتاقه الابوي ومن شفته حسيت ريحته رجعت.
نبرته لانت شويه بس بعده شايط من العصبيه
مُرتاد: اشتاقيتي الأبوچ تعاليلي وابچي بحضني واذا محتاجه حتى أخذچ اله بأيدي مو تفرشين ذكرياتچ بنص السوگ بَرائه وعلى لو ما احترم شيباته چا توبته شلون يسولف وياچ بعد.
هيله: صحيح حچيك هنا بنيتي لا تزعلين مُرتاد حقه انتِ بعدچ غشيمه على لغوة السوگ وانتَ كافي تسولف البت انخطف لونها.
مسح على رگبته و وجهه العرگ رغم البرودة وگال
مُرتاد: ماشي يمه ما راح احچي بعد بس من هسه بس انتِ تبيعين بَرائه ما توصل هنا بعد واذا عاندتني وحدة بيچن وعلى اسد المحل واشيل مفتاحه واشمرة بالشط.
بَرائه: عندي نسخه ثانيه.
هيله تباوعلنا حايره انوب راحت بمكانها هزت ايدها وگالت
: - انعل ساس اهلكم بهالساعة ناركم تاكل حطبكم موتتوني.
اتقرب مني مُرتاد كم خطوة باوعلي عيونه بيهن لمعة غريبة وگال
مُرتاد: اسف على الراح اسوي بس انتِ جبرتيني.
بَرائه: شنو؟
ما لحگت ارمش ولا لحگت افتهم قصدة حسيت الدنيا افترت بيه بحركه سريعه وخاطفه مد أدي وشالني بينهن أيد على ظهري وايد جوة اركبي ورفعني على صدرة بقوة خلتني اشهگ غصباً عني.
بَرائه: عزا بعيني شجاي تسوي نزلني اتخزينا يبووو.
هيله ضربت على صدرها وتگله
: - ولك هوَّ هيچ اليغار يتسودن يطير عقله؟
مُرتاد: ماخذها ورايح انا الله وياچ عود خلي المحل يفيدچ انتِ هم.
هيله: ولك الشااااخط.
ما حچه ولا كلمة بعد ولا التفت السيارة چانت طابگه بالباب كلش خطوتين بس عبر عتبة المحل وهوَّ حاضني على صدرة حيل خايف لا اطير حط ظهرة للناس والمارين خاطر محد يلمح وجهي وبأيد وحدة وهوَّ شايلني فتح باب السيارة بسرعه وحطني بالكرسي إلى يمه.
بَرائه: نزلني مُرتاد اتسودنت عوفني.
مُرتاد: اي اتسودنت كلش اتسودنت.
ما انطاني مجال سد الباب حيل برگعه هزت السيارة كلها دار صعد نفسه عالي وعرگه يصب رغم البرودة التدگ بالعضم وقبل لا افتح حلگي واحچي قفل بيبان السيارة كلها حط ايده على الستيرن يسوق وباوعلي يرجف من الغيرة وگال.
مُرتاد: نسخه ثانيه مو؟
بچيت بقهر احسه محاصرني من كل الجهات
بَرائه: مُرتاد انتَ جاي تدمر فرحتي هذا حلم ابوي الچنت انتظر احققه ليش تسوي هيچ.
مُرتاد: انتِ ما جاي تفهمين؟ انا اغار من الهوى اليمر عليچ تالي اجي اشوفچ تسولفين وتضحكين وتوزعين ابتسامات چا انا شنو ناطور؟
بَرائه: ما اضحك لغريب بعد
مُرتاد: ولا لقريب!
وصلنا للبيت نزل قبلي دار وفتح بابي بحركة سريعة لزم ايدي وسحبني وراه جنت امشي واتعثر دموعي مغوشه عيوني ما اشوف دربي بس احس بأيده وهيَّ تعصر معصمي دخلنا للبيت و سد الباب البيت چان فارغ هدوء يكتل بس صوت انفاسنا ينسمع.
نترت ايدي من ايده امسح بدموعي وهوَّ ذب سترته بأهمال على الكرويته ضل بالقميص المفتوحه بدايته طگطگ رگبته من الجهتين والتفت الي.
بَرائه: لا تباوعلي هيچ ما ضحكت الأحد غريب ابو ناصر بحسبة ابوي ليش جاي تضخم الأمور خنگتني خنگ سجن هوَّ؟
مُرتاد: اي سجن سجن لان اريد احميچ ما تدرين السوگ شبي ما تدرين الناس شلون ذياب وشلون يباوعون للوحيدة وانتِ اليوم بلسانچ گلتي عندي نسخه ثانيه يعني بعقلچ ناويه تكسرين كلمتي وتطلعين من وراي وكلامي وخوفي يطب من هاي الأذن يطلع من هاي الأذن.
بَرائه: گلتها من قهري لان تريد تحرمني من تعبي.
گعدت على الكرويته مدنگه دموعي ينزلن وامسحهن ثنى ركبته گبالي نزل لمستواي لزم وجهي بأدينه الاثنين وجبرني اباوع لعيونه.
مُرتاد: والخلقچ مالي غرض بمحل ولا بفلوس ولا اريد احرمچ من شغل ابوچ واطفي فرحتچ بس عيوني ما تطيق اشوف مرتي وعرضي واگفه بنص المحل جاي تفتهمين عليَّ! اتعبي اشتغلي سوي التردينه بالبيت وانا اجيبلچ ميه عامل يبيعون ويوگفون بس انتِ لا رجولتي ما تسمح أشوفچ هناك مرة ثانية!
بَرائه: طلگني مُرتاد هسه انتَ شلك بهالدوخه والله تعبتني.
أدينه إلى على وجهي جمدت رخن عن وجهي وابتعد يباوعلي
مُرتاد: طلعتي صدگ حاسبتني مؤقت ومنتظرة الزلة خاطر تخلصين.
صحت بي بقهر
بَرائه: لان جاي تخنگني بكل خطوة تطلعلي بسالفه الغيرة والرجولة اني مو طفلة مُرتاد اني بت فاضل الجابت عمرها كله سانده ابوها تعبت واني احس روحي مذنبه لان اريد اعيش.
رفع راسه يباوعلي بقهر وبنظرة طويلة عبالك جاي يودع ملامحي.
مُرتاد: تريدين تعيشين بعيد عن خنگتي هذا اخر كلام عندچ؟ تريدين نتطلگ ما اتقبلتيني ابد؟
وگف گبالي بمسافة كلش قريبة دنگ راسه لمستواي يباوع لعيوني عيونه ذبلانه مد ايده مسح على خدي بهدوء.
مُرتاد: تردين ما اشوفچ ولا تشوفيني بعد؟
نزلت راسي ما رديت بس هوَّ لزمني من حنچي رفع راسي جبرني اباوع لعيونه.
مُرتاد: باوعي بعيوني بَرائه لا تشردين، اذا اتطلگنا وعبرتي من يمي بدرب شلون راح تگدرين تسوين روحچ ما تعرفيني؟ شلون راح تگدرين تگولين لگلبچ هذا غريب وانتِ نمتي على ذراعي؟
بَرائه: بس انتَ جاي تخيرني مُرتاد واني ماشيه على قاعدة بحياتي إلى يخيرني ما أختارة اني ماعندي مشكله لو اضل عمري كله على ذمتك لان ما ضارني بشيء بالعكس بس انتَ جاي تخيرني ما احب هيچ ما احب.
مُرتاد: ما جاي اخيرچ بَرائه انا جاي احميچ الفرق چبير بين اليخيرچ وبين اليغار عليچ من الهوى!
نزلت دمعه تايهه من عيني حسيت ايده إلى على حنچي ترجف
مُرتاد: اذا صدگ بايعة وداعة عيونچ أطلگچ هسه وامشي لمكان حتى اهلي ما يندلونه بس كون اعرف گلبچ هم يريد الفرگه مثل لسانچ؟
كلامة هذا احسه يأذيني اكثر من صياحه وعصبيته ونبرة صوته المكسورة خلتني احس بذنب رفعت ايدي بتردد لزمت ايده إلى على وجهي وحسيت بنبضه يدگ سريع.
بَرائه: مُرتاد لا تگول هيچ والعباس عزيز عليَّ انتَ بس لا تخيرني.
دنگ راسه حط گصته على گصتي وغمض عيونه
مُرتاد: ما جاي اخيرچ انا بس اريد اصير الأول بگلبچ.
جمدت بمكاني ما حچيت شيء ولا شاف مني ردة فعل باس خدي وشمني حيل وابتعد يمسح بوجهه گال بصوت ناصي.
مُرتاد: اخر قرارچ تريدين نتطلگ؟
دنگت افرك بأديه وهمست
: - أي.
ابتسم بأستهزاء وهز راسه خوش
: - ماشي يا بت فاضل تتدللين ما اجبرچ على عيشه تشوفينها سجن وما عاش اليذل روحه لوحده بايعته برخص خليها ببالچ بَرائه اذا انتِ تردين تطويني صفحه انا احرگ الكتاب كله.
: - مُرتاد.
ما جاوبني بس يباوعلي بمعنى احچي بس ما لگيت شيء احچي هز راسه وأخذ السويچ مال سيارته إلى شمره اول ما دخلنا أخر كلمات گالها قبل لا يطلع من البيت.
مُرتاد: چنت اظنچ الربح طلعتي خسارة جديدة على خساراتي.
عافني وطلع ضليت بحيرتي احس حتى دموعي نشفن بگد ما بچيت احس البيت صار وحشه الوكت مر ثگيل الشمس غابت والظلمة بدت تتسلسل لزاويا الهول صارت الساعة ب 8 بالليل وسمعت صوت مفتاح الباب يتحرك دخلت هيله التعب مبين عليها شافتني گاعدة بالهول لا ضوه مفتوح ولا عشا محضر.
هيله: يا ستار يمه شبيچ شسوالچ وينه؟
ما جاوبتها بس رفعت راسي باوعتلها وهيَّ فهمت كل شيء من نضرتي ذبت عبايتها تتحسر وگعدت بالگاع على الجودليه گبال الهيتر رحت افرك برجليها المورمات من الوگفه.
هيله: أخ يمه أنهد حيلي والله الوگفه تاخذ الحيل وانتَ والشاخط ذاك چملتوها عليَّ.
: - سودة علية.
مسحت وجهي وگمت سويتلها شيء تاكله حتى انطيها علاجها حطيت الصينيه گبالها أكلت شويه وشربت علاجها وماي واتمددت غطيتها وخففت الأضويه حتى ترتاح غمضت عيونها بتعب وبسرعه غطت بنومها ورجعت السكته تارسه المكان.
اني ما اتحمل الظلمة ولا الكئابه احس روحي تختنگ وگفت افرك بأديني احچي ويَّ روحي.
: - بَرائه خرب حظج المصخم لا تضلين هيچ لا تموتين من القهر سوي شيء ينسيچ.
رحت للمطبخ غسلت المواعين وجلفتهن جلف صارن يلمعن بس عقلي مو يمهن عفتهن ورحت لغرفتي لبست دشداشه قطنيه وردية احبها ومشطت شعري سويته ظفيرة طويلة فكرت بيني وبين نفسي خل اسوي كيكه بلكي تخف الضوجه.
طلعت الطحين والشكر والبيض وبديت اخفق بيهم حيل افرغ قهري بهالعجينه صبيتها بالقالب وحطيتها بالفرن وگعدت بالگاع بالمطبخ سانده ظهري على الكاونتر واباوع لجامة الفرن انتظرها تستوي.
ريحه الكيك بدت تطلع ترست المطبخ بس احس خنكتني العبرة چا اني چنت اسوي الكيك ومُرتاد يحبه من ايدي وياكله كله هسه منو ياكله من ايدي؟
طلعت الكيكه من الفرن وهيَّ حاره رحت جبت نوتيلا ومكسرات ازين بيها سويت وجوه تضحك واكتب عليها بالكريمة بكلمات عشوائيه لگيت روحي بدون وعي ارسم گلب چبير وبالنص أسم مُرتاد من شفت الحروف فزيت مسحتها بأصبعي واكلتها دموعي نزلت
: - خايبة امداچ بَرائه شكد ما عندچ شخصيه وكلمة عاندتي وكسرتي الزلمة وهسه جاي تدورين حروفه؟
بينما امسح حروف اسمه بأصبعي واغص بطعم الككو سمعت صوت حركه اعرفها وصوت خطوات ثگيله اميزها حتى لو چنت بسابع نومة فزيت من مكاني ايدي ترجف عدلت ظفيرتي والگلب يدگ حيل.
ما لحگت اتحرك وشفته واگف بباب المطبخ يدخن چان منظرة يكسر الخاطر عيونه دم هدومه مخربطه وشعره نازل على گصته اول ما طاحت عينه على الكيكه وعلى وجهي الملطخ عيونه صارن جمر.
مُرتاد: جاي تسوين كيك وتحتفلين عفيه ام المحلات عفيه، شگد گلبچ شايل قساوة دخيل ربچ؟
بَرائه: يبو خايب لا والله لا.
اتقرب مني بخطوات سريعه صار گبالي مباشرة ريحه عطرة اختلطت بريحه الكيك دفعني على كيف على الميز وحط أدينه ثنينهن منا ومنا انحصرت بينه وبين الميز محاوطني بطوله وعرضه چنه دنگه صدگ دنگ راسه لمستواي نفسه الحار صار يلوح وجهي ويختلط بأنفاسي الترجف.
بَرائه: والله مو هيچ بس چنت ضايجه واريد انسى و ردت اشغل روحي وخر.
قرب وجهه اكثر طخ خشمه بخشمي
: - تنسين شنو؟ تنسين زلمتچ العاف روحه هنا وطلع؟ صارلي ساعات افتر بالشوارع چني مخبل أدورلچ عذر وأگول ما قصدها بكل حچايه تحچيها تحچي بدون ما تفكر وانتِ هنا تسوين وتزينين كيك! وعلى عبالي مقهورة شوية على الأقل ما عبالي گلبچ صخر ما يهتز لغيابي ولا شوي.
بَرائه: مقهورة والله مقهورة امداني اذا ما انقهر بس ابتعد شويه.
حسيت بحرارة جسمة وبنبضات گلبه التدگ بصدري بگد من چان قريب أيدينه إلى چانن ساندات على الميز انشدت عروقهن وفجأة خفت نبرة الغضب إلى بوجهه واتبدلت بأنكسار نزل راسه ودفنه برگبتي وهمس
: - لا تعوفيني بَرائه بروح أبوچ.
رخى أيدينه من الميز ولفهن على خصري حيل وحضني على صدرة واني احس بحرورة انفاسه على رگبتي رفع راسه باوع لوجهي بضياع ملامحه الچانت مشدودة لانت وهمس وهوَّ ياخذ خصله من شعري يخليها ورة اذني.
مُرتاد: اقفلي بيبان الدنيا كلها بوجهي بس باب گلبچ لا تسدينه انا الأعتذر وانا الغلطان بس لا تروحين.