رواية أبناء الشنار للكاتبة مراسيل الفصل الثاني والعشرون
بعدنا جاي نحچي وسمعنا صوت الصياح برا گاب ومن بينهم صوت حنان يلعلع فرح خرطت خدودها وهزت راسها لا وكامت من مكانها تبجي ضمت روحها لصدرها وتهتز مثل السعفه.
گمت اريد اهدئها وما فاهمه شكو لزمتها من اكتافها احاجيها
ميرار: شبيج فرح تسمعيني؟
شالت راسها تبجي وكامت من مكانها ختلت وراي
فرح: راح يجي راح يجي ضميني عفيه لا تخلينه يوصلني.
ميرار: شبيج ياهو اليوصلچ؟
ترجف ومچلبه بضهري اريد بس ازيحها ما تنزاح الصياح بعده برا وأسمع حنان تصيح وهوه يصيح ثنينهم هرجوا البيت هرج.
حنان: اطلع برا اطلع گتلك ما عندي فلوس من اجيب اخلق الك.
وهوه ضل يصيح محترگ گلبه
: - ولچ انا تضحكين عليَّ وتاخذين فلوسي؟ اليوم اسودنجن اليوم اخليهم يكتلونها گبالج يا قفاصه تاخذين بفلوسنا.
حنان: انتَ قشمر اني شلي علاقة.
فرح: راح يكتلني ميرار راح يكتلني عفية.
لزمت راسي حايرة ودرت عليها خايفة اكثر منها
ميرار: معليچ اني يمج ما يوصلچ.
طلعت جهازي دخلت على رقم خنجر أتصلت واجاني صوته خايف
خنجر: ها أجيج شكو؟
ميرار: عفية تعال بسرعة ما اعرف شجاي يصير.
سد الخط حتى ما جاوبني وهذول يتعاركون برا
فرح: راح يدخل راح يدخل يكتلني احميني عفية.
روحي راحت من الخوف بگلبي اكلها هوَ اني اريد واحد يحميني
ميرار: اش ما يسويلچ شيء اهدي.
فرح: راح يذبحني عفية احميني لاتخلينه يكتلني.
الباب ضل يندگ حيل بس هيه قافلته وصوته يصيح
: - افتحي الباب لا اهدمه على راسچ.
ميرار: ديلا اوصللها فنك والكافل اشلع عيونك.
فرح ضلت ترجف اكثر حچيت لان ردته يعرف احد يمها حتى يخاف ويروح بس شو هذا زاد وفرح بعدها مجلبه بضهري حيل تعصر بحجابي.
؛- انوب ثنين حلو، افتحنه بالعيني واغاتي لا افتحه بطريقتي وفريحه اموتج اليوم.
ميرار: علمود يخلي دمك يصبغ العتبة گبل لا توصلها.
هوه ضل يضرب بالباب ويشتم بكل صوته خليت أيدي على گلبي خايفه من حنان ضلت تصرخ وهوه يدفع بالباب يريد يكسرة الباب ضل يهتز حيل ويا كل هزة روحي تروح انكسر الباب وفرح صرخت مچلبه بيه حيل تبچي مغمضه عيونها.
صار گبالنا القذر يباوع من فوگ لليجوة واني خازرته حيل اتقرب جرني من زندي بخفة أيده وشمرني حيل انردمت بالحايط كضيت أيدي بوجع وهوه راح لفرح ويگول.
: - نبدي بيچ اول وانوب بالحلوة الثانيه.
اتقربلها وهناك واحد گاض امها يمنعها تصرخ درت عيني ادور على شيء اطگه بي صارت عيني ورا البوفيه اكو شيش بس طويل وثكيل حيل اتقربت أخذته ومشيت طكيته بي على صلعته بس مو طگه موت الدم ضل يفور بالگاع وهوه داخ وخر گاض راسه
ميرار: الحقير القذر ابو صلعه شيسوي بيك الله بعد وخر منها وخر.
طاح بالگاع وفرح تصرخ وهذاك الثاني گاض حنان يهددني بيها خاف اطگه يأشرلي اذبحها بگلبي اكله اذبحها وخلصني تختفي كل المشاكل حتى نعيش بسلام وراحه الباب مالهم مفتوح على حيله بنفس اللحظة دخل خنجر مخبوص جسمي باد من شفت السلاح بأيده باوعتله اهز براسي لا.
وهوه اتقرب ما شايف أحد گدامة عبالك عرف السالفه بدون لا نحچي دخل للغرفه وشافها شلون لامة روحها لصدرها وتهتز مثل السعفه بس رفعت راسها شافته فتحت عيونها حيل وبسرعه گامت تركض فاتحه اديها حضنته وهوه ما مستوعب يرجف طاح السلاح من ايده رفع راسها بأيده يباوعلها ورجع لمها لصدرة حيل يحچي بشوغة
خنجر: يا فرحه يا بعد حيلي ولچ ياروحي.
وامها صاحت من بين ادين هذاك المخلي السلاح براسها
حنان: ولج فريحه اموتج وخري منه اني الچ تموتين على المجرمين.
دنگ أخذ السلاح من الگاع وباوعلها
خنجر: ها حنينه ام السحورة مو وروح الحسين انطيهم فلوس واخليهم يصفونچ تدرين بيه مجرم أسويها لو شتگولين؟
ابتعدت عنه تبچي وگوة تطلع منها الكلمة
فرح: السلاح خنجر السلاح عوفه عليك الله لا تهدني بعد.
دار عليها يحاجيها رايحه روحه
خنجر: بس حاجيني شسوولج ريحي گلبي وصلولج؟
فرح: لاااا لااا محد واصلني بس طلعهم برا اخذهم عفية خنجر.
هذاك شمر حنان وطلع يركض شارد وهذا جنه ثور بالغرفه دمه ترس الكاع انوب اني بس اشوف دم احوالي تتخربط گعدت حيلي رايح باوعلي وباوعلها وهز ايده يجر بالرجال من رجله يسحله برا
خنجر: شگد كلوبچن رچيچه.
طلعه وطلع يحچي ويا حنان بصياح صوته هرج البيت هرج
خنجر: حنان وروح الحسين اذا فرحه هيچ انشخطت شخط صغير اسودنچ حتى سحورتچ ما تطيبچ بعد واصبريلي كم يوم وجاي اخذها وافكها منچ وراح ابقى مرابط بالباب هنا خاف احد من چلابچ يوصل.
حنان: اوي هاي شنو والمهر الطلبته كملته؟ شعجب عاد انتَ فگر.
خزرها يحچي من بين اسنانه ما يريد يسوي شيء يندم عليَّ
خنجر: خليني فگر ولا مثلچ تكسي للرايح والجاي، ميرار وينچ تعاي اوصلچ وارجع يلا.
گامت يمي فرح تحاجيني بخوف
فرح: عليج الله خنجر امانه بركبتج لاتخلينه يوصل للسلاح حبابه لايكتل احد.
هزيت راسي اي احاچيها
ميرار: صار حبيبتي ديري بالج على روحج باجر هم اجيج ورا الامتحان خوش؟
هزت راسها اي طلعت متانيني بالباب يسحل بهذا شمرة على الشارع يدفر بي دفر والمسدس بأيده الشيطان شاطر گلبي دگ حيل سحبته من بين ايده خمشته بدون لا ينتبه خليته بجنطتي باوعلي ومسح وجهه فاتح أيده.
خنجر: شتسوين جيبي.
ميرار: لو تموت وخر، امشي يلا عوفه خيولي ما يصحى هسه طگيته خوش طگه.
خنجر: انوب انتِ الطاكته! يابويه ولج بس جيبي السلاح دخيلك ربي مومال جهال ترا ميرار شمالچ لا تشخطين.
مشيت گباله ما مهتمه
ميرار: من نوصل انطي الك عود امشي لا تعاندني لا ارميك.
مشى مثل الحباب يستغفر وانوب يسب بروحه چنه مسودن صعدنا تكسي أخذني لشقتي وبس نزلنا يوصي بيه مستعجل
خنجر: رايح ميرار عليچ العباس تقرين الامتحانچ باجر ولاتسختين، بعدين اجي اراجعلج ولاتطلعين الدنيا راح تضلم سمعتيني؟
ميرار: اي هاي هيه روح.
هز راسه خوش ورجع بنفس التكسي راح يضل مرابط يم بابهم شلون بي ما ادري دخلت جوة خليت المسدس بالجرار من يجي ياخذه اول ما فتحت الباب ودخلت احس عطر غريب بالشقه ما شامته گلبي لعب بس ما اهتميت لان المفتاح عندي منو يدخل قابل؟
غيرت ملابسي و بديت اقرا للامتحان بأيدي ورقه وقلم واكتب وامسح انوب اگوم افتر واقرا بصوت واغلط وارجع اعيد صارت الليل وحسيت اختنگت گمت لبست اريد اروح لبيت عمو فاضل اتنفس اتونس على سوالفهم المهرب الوحيد بعدني ما طالعه وشفت خنجر من بعيد يلوحلي بأيده.
خنجر: وين هاجه وين؟
ميرار: يعني هوه اني وين اروح؟ بس لبيت عمو فاضل شمالك.
هز ايده ما راضي
خنجر: عمي باجر امتحانج يابيت عمج فاضل؟ كضي روحج بس هل ايام ميرار شبيج شهالاهمال ما اعرفج هيچ انا؟
ميرار: والله اختنكت شبيك ماتحس؟ بس اقرا اقرا اقرا شنو روبوت.
خنجر: ميخالف اتعب تلعب.
ابتسمت بوجهه وهزيت ايدي اريد اروح مايخليني
ميرار: ما العب اني بس اتعب.
خنجر: اتفائلي شبيچ اقداركم من افواهكم.
باوعتله شصاير بي جلد وعضم من التعب والسهر ماخذ حيله وعيونه ورغم كل هذا ما يبين يضحك دائماً ضل يسألني شيسوي وحاس بذنب لان فرح حضنته من جانت خايفه ما يريد ذنوب تلوحه لو تلوحها يكول الله ما يوفقنه وما يجمعنه اذا علاقتنا صار بيها حرام يخليني گوة اگزگز عليهم.
ميرار: هسه شسوي؟
خنجر: تروحين تقرين مثل الحبابه لو تنامين وانا ادگ عليچ بالاربعه بالخمسه تكعدين تراجعين متفقين؟
ميرار: اي خوش وانتَ؟
خنجر: راجع يم بيتها اجيت اشوفج.
ميرار: خنجر تحجي صدگ ترا المسافه بعيده؟
باوعلي مقهور عيونه حمر
خنجر: جا شسوي ميرار انتِ كليلي! اذا تضل عد حنان تضيع تضيعها وتضيعني وياها لازم عيني عليها كل وكت.
ميرار: لا ماقصدي هيچ بالعكس دير بالك عليها احسن بس اني قصدي عوفني لاتجي اكدر ادبر روحي والله ماعندي شيء اصلاً عليمن هيچ متعب روحك؟
باوعلي ما راضي
خنجر: انجبي ولچ اخر مرة تحجين هيچ اخيتي انتِ.
ميرار: شكد كيوت.
خنجر: ما غيرچ امشي طبي يلا.
لوحتله بأيدي ودخلت مبتسمه صعدت للشقه دخلت وسديت الباب ما انكر دائماً اخاف وما جاي اتعود واكره الهدوء يخنگني بس احاول الهي روحي واسوي لروحي جو بالبيت حتى لا اختنگ.
راجعت وماحسيت على روحي شوكت نمت گعدت على صوت التلفون ماضل شيء للامتحان يمه غسلت وبدلت على السريع ولكيت خنجر منتضرني برا شبعني رزايل روحه ورجعه وانتِ مهمله وانتِ تسختين وانت تهجين امتحنت وطلعت وهم احس مجاوبه الحمدالله.
وهيج عدن ايام الامتحانات ما چانت سهله بس خنجر سهل هواي عليَّ جان وياي بكل خطوة ما هدني ابد من يگول اختي مو بس حچي لسان لا هوه فعلاً افعاله مال اخو كل يوم ادعيله بصلاتي الله يريح گلبه ويجمعه ويا عزيزته.
اليوم خلصت امتحانات وگلبي مرتاح احس روحي طايرة بدلت واريد اطلع اروح لبيت عمو فاضل گلبي يدگ حيل راح اشبع رزايل محذرني ما اطلع بهالوكت بس شسوي اختنگ وبيتهم قريب مو بعيد.
قفلت الشقه وطلعت الدنيا ليل والشارغ فارغ بس صوت نباح الجلاب ينسمع امشي واتلفت لا يلحگني چلب دخلت بالدربونه مال بيت عمو فاضل وشفت گاعدين على الرصيف ثنين ولد جكارتهم بحلكهم بس وجوههم مو طبيعيه من كد ما عشت ويا اسعد صرت اعرف اليدخنون مخدرات شلون شكلهم هذول هيچ.
گلبي دگ حيل درت وجهي اريد ارجع للشقه صرخه طلعت مني من ثنينهم جروني من ورا كل واحد من ايد.
مَياسة.
ضليت صافنه بوجهه وهوه عاصر فكي حيل ويباوع لوجهي بلعت ريگي وحچيت مصدومة بي بس ارمش بعيوني
مَياسة: محراب وخر أيدك عورتني.
بس وخر ايده درت وجهي اريد أدخل وبسرعة لزمني من زندي دايرني عليَّ خزرته ما مستوعبه تصرفاته
مَياسة: شبيك دخيل الله شبيك؟
هد ايدي ومسح وجهه ورجع باوعلي
محراب: تنخطبين تريدين؟
مَياسة: واذا شنو جريمة؟
محراب: مو بكيفج بالعباس اموتچ مَياسة مخبل أسويها إلى انتِ ما تصيرين لغيري لو انا أخذج لو للگبر!
فتحت عيني مصدومة حيل ضليت بس ارمش بعيوني حتى الحچي اتبخر واجتني دوخة مادري شنو
مَياسة: تحچي صدگ لو ناصب عليَّ هسه انتَ؟
گعدت عَ الكرسي اريد يگلي اتشاقه أستغفر بصوت ناصي وثنى ركبته گعد گبالي ولزم اديه ثنينهن حيل عاصرهن ويباوع لعيوني اديه بارده وايده جمر ولازمهن حيل مايخليني اوخرهن.
محراب: ما ناوي أحچي هسه بس فكرة خسارتچ سودنتني
گلبي متعلگ بيچ مَياسة ومو اليوم ولا أمس من چنتي طفلة وتركضين بالحوش وضحكتج تارسه المكان وانا اوگف اتأملج واگول ماتروحين لغيري كبرتي گدامي يوم بعد يوم وكل يوم اشوف بيچ شيء يخليني احبچ اكثر من جنتي تدرسين وتضمين راسچ بالكتاب ساعات انا اتأملج وما امل واجي ادرسج على ما تحفظين كل شيء جنتي ما واعيه تبوسيني وتشكريني وتروحين تشعلين گلبي شعل.
من تتمرضين اتمرض گبلج الليل ما انامه مرضچ يوصل لروحي أضل گاعد بباب غرفتج لحد ما أسمع صوتچ واحس انتِ زينه يالله يهود گلبي ما چنت احچي خايف لا اخسرچ خفت ما تفتهميني وانتِ بعدچ صغيرة وانا حبي الچ چبير حبچ مو نزوة ولا شعور عابر حبچ جذور نابته من سنين الطفولة اتعذب من فكرة أحد يحاچيج احد يگعد يمچ من فكرة لسانچ يلهج بأسم غير محراب.
انا كبرت وياج و كل لحظة حلوة مرت بيه مربوطه بيچ وانا لو عليه اخذج هسه واحطج بگلبي وأسده حتى محد يوصلچ انتِ إلى لو كلها وكفت بوجهي حتى انتِ.
دفعت أيده من أيدي ارجف وگمت وگفت
مَياسة: شتحچي محراب شتحچي وحبيبتك؟
بلع ريگه وحچى بقلة صبر
محراب: يا حبيبة ميسو ياحبيبة؟ ماعندي انا چنت أحاول وياچ بلكي تغارين بلكي صارنلچ مشاعر تجاهي حتى أخطي هل خطوة بس بالعكس جنتي تفرحين وتحرگين گلبي واگول خاف تدري احبها وتبتعد.
مَياسة: يا وصورتها؟
هز ايده ضايج
محراب: خاب امداچ يالغشيمة من الگوكل هاي.
مَياسة: محراب والله ما ادري شگول راح اروح أصيح الدُجى خلي تشوفك اوگف لاتروح.
محراب: لا اوكفي لا تصيحينها زينه هيه؟
مَياسة: لا مو زينه مريضه كلش وبس تبچي عليك شلون تعوفها هيچ؟
محراب: شبيها مريضه؟
مَياسة: من يوم العرفت بيك سافرت حتى صار بيها صرع.
عيونه اتوسعت مصدوم
محراب: دخيلك ياعلي تحچين صدگ صرع؟
درت وجهي اريد ادخل وصحت عليَّ
مَياسة: داخله اصيحها عليك العباس اذا لكيتك رايح يسطرك كون.
گلتها ودخلت صعدتلها اركض نفسي مگطوع خاف ما ألكاه وهيه مشلوع گلبها عليَّ الليل كله تبچي فتحت باب بيتهم چان مردود ضلمه ياخذ الروح ولا اكو قطرة ضوة كل شوي اكول هسه تهاني تطلع إلى وتخلسني وين انطي وجهي.
اتقدمت لغرفتها بسرعة وفتحت الباب لگيتها گاعدة على جربايتها تلفونها بأيدها وتباوع على مقاطعهم هيه ومحراب وتبچي بس شافتني طفته ومسحت دموعها بتشيرتها أخذت نفس وگتلها.
مَياسة: محراب اجه بالحديقة هذاك هوه.
فتحت عيونها حيل وگامت من مكانها مخبوصه
دُجى: چذاااابة؟
مَياسة: وعلى روحيله منتظرج.
نزلت تركض قبلي وأحسها ما مستوعبه او ما مصدكتني نزلت وراها كوة اجر النفس من الصعدة والنزلة تعبت وصلت لباب الاستقبال تخاف تفتحه وتطلع للحديقة وما تلكاه التفتت إلى عيونها مدمعة قبل لا تفتحه ضحكت بوجهه.
مَياسة: يلا ولچ لا يتبخر.
غمضت عيونها وفتحت الباب صار بوجهه محراب واگف مخلي اديه بجيوبه شعرة مخربط نازل على وجهه وعيونه حمر وجهه تعبان ابتسم بتعب وطلع أديه من جيوبه فتحهن ألها وهيه فتحت عيونها شافته وضلت ترمش خايفه يختفي من گبالها
محرَاب: ولچ تعاي طاگ گلبي.
ضحكت وبچت بنفس الوقت و صرخت بصوت
دُجى: هذا انتَ ما اتخيل يااا بعد روحي.
رگضت اله حضنته اتعلگت برگبته چانت فاقدة امان الدنيا كلها وهسه لگته بي اعرفها مو گد حمل فراگ محراب تبچي وتعاتب بي
دُجى: ليش عفتني محراب ليش والله حرام عليك.
وخرها يمسح بدموعها وحاضن وجهه بين اديه يحاجيها مختنگ
محراب: يابعد روح محراب وين أكدر اعوفچ انا روحي بيچ.
دفعته من صدرة ضايجه تحچي محروگ گلبها
دُجى: جذاب جبت عمرك تكول ما اعوفج و وياچ وهاي صارلك شگد عايفني ولا تجاوبني من اتصل عليك ولا من اراسلك.
محراب: حقج وأسف بس والله احترگت روحي، جنت ضايج ما ردت اخشن خاطرج بكلمة بدون ما اقصد ما متحسف أهلي انا بس مختنگ لان طلعتي مو أختي وطلعت أبن حرام وانا اكثر شيء اكرها الحرام واكثر شيء احبه انتِ.
حطت أيدها على حلگه تسكته
دُجى: أسكت لا تگول هيچ حتى لو ما يربطنا دم ارواحنا مربوطه سوى اني والله حتى لو چان عندي اخو من دمي ما احبنه بگدك انتَ أخوي محراب ما عليك بيهم شما يحچون.
هز راسه خوش وشال ايدها يبوسها ويحاجيها بقهر
محراب: ليش هيچ وينچ وين الصرع يابعد حيلي كله من وراي عمت عيني كون فكرت بس بروحي.
دُجى: لا تحچي هيچ اسم الله، الله اذا حب عبد أبتلاه واني راضيه بكل الابتلائات إلى تجي من رب العالمين بس كون انتَ سالم.
گرص خدها وباس أيده مبتسم بقهر
محراب: ما ادري شلون انسيچ العشتي وشلون أعوضج شگد اتحملتي علمودي والله ما استاهل.
دُجى: ما رايده منك شيء بس أبقى ولا تختفي بعد والله أنقهر.
مسحت دموعي احاجيهم
مَياسة: كافي بجيتوني اسكتوا.
باوعلنا ثنينا ومسح وجهه أحسه يريد يبچي ويانه بس يستحي
محراب: عمي كافي شادات تانكيات بعيونچن اخوتجن وين؟
دُجى بدت تسولفله عليهم وتعدد بأصابعها
دُجى: المَوتور يگول بس الكاه اربطه بالچول مادام هيچ عافنا وهذا تدري بي ماعنده لحيه مسرحه ولاعنده صاحب يسويها، ومُرتاد يكول اربطه بالدرج وكل ماواحد يعبر اخلي يتفل عليَّ هذا گلبه حنين بي مجال يلين، ومهران يكول وين ما اشوفه اسجنه اتوبه شلون يسافر وهذا نفس صاحبنه الاول هم يسويها.
محراب: لا يابة! يعني ارجع اسافر احسن عاد بلكي تنكلب بيه الطيارة ولا اطيح بأيد هذول.
دُجى: لا شبيك جذابين ما يسوونها المهم دريت؟
محراب: شني؟
رگصتله بحواجبها متحمسة
دُجى: ميسو راح تنخطب راح نخلص منها.
باوعلها ضايج وهز ايده
محراب: ختولي ما تنخطب ياهو كلج! يسولفون لوحدهم.
دُجى: يا شبيك انتَ غير قبلوا كلهم.
صاح بصوت عيونه تتنقل بيننا
محراب: عمي احبنها شني شبيه بكيفها لو بكيفهم تنخطب؟
دُجى: دخيلك ربي!
محراب: اي ميسو اذا انخطبت إلى بس يعني مرت اخوچ.
دُجى: ها؟
گلبي دگ حيل وهمه ثنينهم يباوعولي يعني يحچي صدگ! بعدني ما مستوعبه شنو يحبني ما متقبلة الفكرة اني طول عمري حاسبته أخ ما يوم فكرت بي غير شيء ولا راح أفكر
مَياسة: محراب! لاتحچي هيچ كافي.
محراب: ليش! خلي كلها تدري احبچ شني خايف لو مستحي.
مَياسة: ولك شتحبني خرب اسكت.
دُجى سكتت صافنه من فهمت الموضوع وأيدها على خدها بحيرة نضراتها تتنقل بيناتنا اعرفها تفكر بمشاعري اليوسف ومشاعر محراب إلى ماتريد اخوها ينسكر وماتريدني انكسر واحنه برا سمعنا صوت أحد ينزل من الدرج التفتنا على الباب طلع المَوتور يفر بالسويچ ويدندن بصوت ناصي ما منتبه النا.
بس صارت عينه على محراب فتح عيونه حيل وصاح
المَوتور: ولك!
محراب ابتسم واتقرب يريد يحضنه
محراب: عليك العباس لا تطگني مشتاگلك.
حك خشمه وهز راسه أي بس اتقرب لزمه من ياخته يعت بي حيل
المَوتور: ولك جلب ابن الجلاب احنه تعوفنا وتروح! ولك مُرتاددد أگعد وينك الحگ.
صاح بصوت عالي ويطگه علابيه حيل
المَوتور: تعيدها بعد؟
محراب: ما أعيدها خرب ركبتي كافي.
طلع مُرتاد من غرفته بالكيمونيه گوة فاتح عيونه مهبوط
مُرتاد: شكوو شصاير شمالك تصيح.
صارت عينه على محراب صفگ ايده وبدون تفاهم هجموا عليَّ ثنينهم يطكونه ويغلطون ممددينه بالكاع ودايرين عليَّ وهوه مغطي وجهه بأديه يريد يحمي روحه من طكاتهم ويصيح.
محراب: ولكم كافي ولية مال غمان هيه والعباس اسافر هدوني أخ ولك ايدي خرب ويجي چلب ابن چلب يگلك ضل يمهم.
مُرتاد: ولك حالف اربطك بالدرج واخليهم يترسونك تفال احنه تعوفنا؟ شلون انطاك گلبك.
المَوتور: چا الچول بيش مقصر! وعلى يتوب بعد ما يفك حلگه اسأل رجاح هوه مجربه اذا ما يضل يمشي مثل ميل الساعه انا معتب.
ابتعدوا عنه فحطانين وهوَ كام ينكث بملابسه حتى قميصه مشگوگ باوع للقميص وباوعلهم وضحك وهمه حضنوه ثنينهم كل واحد من جهه
المَوتور: ولك طاگ گلبي خرب اهلك يا بوية.
ابتعد عنهم گض أيده بوجع يباوعلهم
محراب: هاي طاگ گلبك وهيچ؟
مُرتاد رجع سنح على چتفه كل شوية يبوسه وهذاك يدفرة مايرضى
مُرتاد: ولك شني أول مرة اشتاقلك بعد بوسه تعال.
بعده عنه يسد بقميصه يخزر بي
محراب: لا ولحسين مشكوك بأمرك انتَ دوخر.
المَوتور: مو وجه نعمة مال دمغ انتَ.
أخذاهم الواهس وگعدوا بالحديقه بالگاع ناسين الدنيا واحد متمدد عَ الثاني مُرتاد نايم على رجل محراب ومحراب منتچي على چتف الموتور إلى منتچي ع الحايط ويسولفون دقايق ودخل مهران وانعادت نفس القوانه وهم رجعوا كتلوا محراب كلهم هوه هذا تعبيرهم عن الاشتياق وهوه يسب ويغلط يريد يفرغ روحه منهم ما يكدرلهم همه هواي وهوه وحده.
محراب: وسطر السطركم ما الفي بعد والعباس أهج.
مُهران: والقران اسودنك وين تطير للسما هم أجيبك.
گعد يمهم يتداهرون ويتعاركون يصيرون دمايه انوب واحد يحضن الثاني واني ودُجى واكفين على صفحه نباوعلهم عبالك مسلسل هزت ايدها ما راضيه.
دُجى: گطعوا اخوي تگطع.
مَياسة: اخوچ الغلطان حبيبتي ياهو گله يسافر ماعدنه زلم تسافر.
دُجى: دكضي أخوتچ لا تصير موخوش.
مَياسة: هذولاك همه وروحي حاجيهم لو ابوي يگدر بس على أمي.
دُجى: لا اخاف يطبگوني ويا.
مبتسمه وتضحك ويا ضحكته راحت گعدت عالميز قريب عليهم تباوعله وايدها على خدها رحت گعدت يمها احنه عالكراسي وهمه بالفراش المفروش بالگاع مثل الحصيرة مخلينها للوزة تحب تگعد برا تلعب ومرتاد خلاها حتى لا تتوصخ ملابسها هسه انوب همه گاعدين عليها صارت عيني على محراب شگد ما يحاول ما يبين ويضحك لخاطرهم بس الكسرة ذيچ هيَ بعيونه مو محراب القديم أبد.
مُهران طلع جكارة ورثها يدخن ويحاچي
مُهران: باب الحوش ما تخطي بعد مو أمان انتَ.
محراب: لا شني! ما اسافر بعد هاي هيه أخذلي شقه قريبة واستقر قريب عليكم انا مو حمل فراگ واحد منكم.
مُهران: چا احنه الحمل فراگك! ما تأجر ولاتطلع هذا بيتك عجبك خير على خير ماعجبك وحق الحسين اكسر راسك.
محراب: منين اجه بيتي! انا الحمدالله مجمع فلوس شغلي ادبر روحي بيهن ما اضل هنا ما إلى خلگ يعيروني.
المَوتور جابه براشدي ابو الونه وصاح بي محروگ گلبه
المَوتور: ولك هوه ياهو اليگدر يحاچيك واحنه وياك! عبالك يأثر بينا حجيهم لو شني واذا عَ البيت من باچر نروح واسجله بأسمك واريد اشوف حجتك شني همه وحچيهم البسهم برجلك واعبر.
گض خده بوجع يصيح عليهم
محراب: حايط نصيص انا؟ يابه لاتطگوني خرب شفتوني ساكت الكم والعباس اكوم.
المَوتور: شتسوي؟
باوع عليهم شلون يتانون الزله ورجع انتچه
محراب: كلشي ما اسوي، ما راح اهوبز لان الكثرة تغلب الشجاعه.
المَوتور: ابو خمستها كروة ما يستقر هوه انا من هاي سحكتك غسلت ايدي منك وين ما نحطك مفشلنه.
دنگ مبتسم وحك راسه
محراب: هسه شني انتم ما تغلطون؟ بعدين ترى ما غلطان بالجمله هواي هنه الاحرف متعاركات بيناتهن مالنه شغل.
واحنه گاعدين اندگ الباب حيل دكات متتالية گام مرتاد يفتحه وعگد حاجبه مستغرب وصاح.
مُرتاد: شجابج؟
فتحت عيني على وسعها من دخلت صفوة حال الضيم حالها وجهها مزلغ ملابسها مشككه مادري شبيها ودموعها تارسه وجهه مدنگه
صفوة: اني. اني ماعندي مكان ماعندي احد.
گاموا يشوفون حالها شصاير بي حالها يقهر
المَوتور: فداء وينه شلون متيه مرته هيج هالخنيث؟
صفوة: ماكو فداء ما يريدني بعد اخذ بناته وراح عافني يگلي من وراج أسعد كتلوا ذبني بالشارع.
مُرتاد: شني من وراج جا شسويتي انتِ؟
نزلن دموعها تحچي بقهر
صفوة: يكلي هيه هاي تربيتج انتِ هيج علمتي اني ماعندي مكان خلوني يمكم.
مسح وجهه مقهور يحاجيها
مرتاد: فوتي شني السالفة هذاك بيتكم على حطته.
هزت راسها أي تمشي وتتعثر دخلت وسدت الباب حيل
المَوتور: ما مرتاح أحس وراهم شيء.
مُرتاد: خطية يمعود كسرت گلبي وين نعوفها بالشارع؟ مرة ولوحدها شتگدر تسوي عوفها ما تكدر تسوي شيء مادام فداء ما وياها.
المَوتور: شمدريك ما وياها شمدريك ما هوه موديها لاتصير غشيم! هيه صفوة تلعب عليك وعلى عشرة مثلك.
مُرتاد: هسه شني نطردها يعني! شو مدري شلونك انتَ ماتشوفها محد الها خطيه.
المَوتور: لا تطردها يابه هاي هيه بكيفك.
رجعوا گعدوا يسولفون لمحراب على أسعد وشلون كتله واني أحس گلبي مادري شصار بي وعيوني ضلن يدمعن گمت من يمهم گعدت بالاستقبال كل شيء هدوء والضوه مطفي بس اصوات سوالفهم تنسمع من برا انتچيت وغمضت عيوني أسمح لدموعي تنزل والله اتندمت وتأنيب الضمير موتني حتى لو چانوا سيئين روح انكتلت لان فضحتهم فكرت لو ساكته ما چان صار شيء.
فتحت عيوني امسح بدموعي من حسيت أحد گعد يمي التفتت وشفته محراب يباوعلي عاگد حاجبه مستغرب
محراب: شبيچ تبچين شني ياهو وياچ؟
مَياسة: مابيه شيء.
محراب: لا تجذبين عليَّ حافظج بصم.
مسحت عيوني ودنگت اللعب بطرف الشال
مَياسة: مقهورة ما جاي اكدر أتخطى فكرة هوه مات بسببي.
هز ايده يحچي منفعل
محراب: صدگ تحچين! چلب ومات انتِ تدرين بالسوالف المسويها لو لا حتى ضايجه عليَّ! ولچ جهال مخليهم مدمنين ومضيعهم حتى يسوون إلى يريده مقابل المخدرات مسويهم مثل اللعبه بأيده بنات صغار بعمر الورد مغتصبهن وشامرهن ميتات بمكانهن هاي نقطة ببحر فواينه ما تتسولف لو تسمعين الباقي يشيب راسچ هذا حتى الكتل قليل بحقة والكافل بنفسي أطلع جثته واحركها وهم ما يبرد گلبي.
بلعت ريگي مقهورة واختنگت بس جاب طاري الادمان
مَياسة: يمه أسم الله.
محراب: اي والله ما اريد اشوفنچ مقهورة عليَّ ابد زين!
مَياسة: مو انتم ما تفتهموني.
محراب: انا افتهمج والله بس السويتي چان حق و واجب حتى ما يضل يضر ناس اكثر الأسلام أمرنا بالأمر بالمعروف والنهي عن المنكر وانتِ كشفتي المنكر وكدرتي توگفينه وهاي شغلة زينه ليش ضايجه! ما مات بسببچ بس هاي نتيجة سوء افعالة يعني شني تريدين نصفگله؟
مَياسة: صدگ؟
محراب: اي يابعد روحي غاشچ قبل؟
مَياسة: اي.
محراب: چا شبيچ مستغربة.
ابتسمت من بين دموعي وهوَ باوعلي وگال
محراب: ما اريد اشوف دموعچ بعد اتنازلت ودخلت وانا حالف ما اطب بس شفت وجهج انگلب عرفت ناصبتها مناحه وماعندج محراب يسكتج.
مَياسة: شكراً والله انتَ خوش رجال.
ابتسم وگام من مكانه
محراب: جسر للحلوين، هسه هاي هيه؟
مَياسة: على شنو؟
رجع اتقدم يمشي بأتجاهي اني گاعدة على التخم عاگدة حاجبي ما فاهمه وهوَ يباوع لعيوني منتظر جواب
محراب: تشيلين الخطوبه من راسج بعد؟
بلعت ريگي اريد افهمه بدون ما اجرحه
مَياسة: محراب والله انتَ مثل اخوي ما اكدر اشوفك غير هيج احنه ربينا سوى بنفس البيت اشوفك حالك حال مرتاد ومهران تفتهمني؟
هسه لو حاجيلي من قبل مخلي الفكرة براسي على الأقل موهيچ يعني والله حتى ممتوقعه.
هز راسه اي ومسح عيونه
محراب: ميخالف حقچ بس عوفي الخطوبه بعدچ صغيرة ترى!
ضل يباوع لوجهي ينتظر جواب واني ما ادري أحس اديه ورجليه مربطات لا أگدر اجرح يوسف ولا أگدر اجرحه ثنينهم ما يستاهلون ما انطيته جواب دنگت اللعب بأضافري مختنگه واسمعه يگلي.
محراب: عاينيلي احچي ريحي گلبي گولي ما اريده.
رفعت راسي اباوعله والدمعه بعيني گوة طلعت من حلگي الكلمه
مَياسة: شبيك وين أعرفه اني.
واخيراً شفت ابتسامته هز راسه وطلع رجع گعد يم الولد لزمت راسي بوجع أحسه راح ينفجر سمعت هزة التلفون عرفته يوسف گلبي يدگ سحبت جهازي فتحته لگيته دازلي.
: - خطيبتي اشتاقيت انا.
ضليت صافنه ما جاوبته رجع دز صورة اله وجهه يضحك وصاعد على الدرج و وجهه وملابسه كلهن صبغ يصبغ بالغرفه لازم بأيده فرچه الصبغ وهم مسوي علامة الانتصار هسه عليمن منتصر على سطل الصبغ! كاتب جواها
: - جاي اصبغ غرفتنا انا وياچ.
ابتسمت وجاوبته
مَياسة: شبسرعه شبيك ما مصدگ.
: - اي ما مصدگ انچبي يلا فوگاها.
: - ولا اتزوجك لو تموت.
: - لا مروتج.
: - ابد.
: - ام الغيرة! دخيلچ اعنس خلافج.
: - عنس بعد أحسن.
: - انتِ شبيچ وياي! حاط وياج ابو فاضل اذا ما تحبيني ديلا.
: - الاهتمام لا يطلب عود.
: - اجدي منج جداوة يا ما يطلب.
: - يلا تصبح على خير لا تقوي العلاقة ترا ما أخذك.
: - باجر امي تجيكم.
: - كل يوم هيه؟
: - نتفق على سوالف الخطوبه حبيبي.
رحت لغرفتي نمت على الجرباية واخذتني السوالف ويا ضلينا للصبح نحچي ويسولفلي على حبه إلى وعلى خطوبتنا وشنو محضر واني طاكتها صفنه مصدومة يمته لحگ يحبني هالگد! هسه اني ما انكر انعجبت بي وانجذبت اله بس ما اگدر أسمي حب مثله.
گعدت على صوت دُجى هم فوگ راسي بس هالمرة لا تضحك ولا صاحت بحماس مثل كل مرة واعرف السبب
دُجى: كافي نوم ام يوسف عدنا بيبي تريدچ.
فتحت عيوني وهزيت راسي اي امسح بوجهي گعدت لميت شعري وكمت للحمام غسلت وجهي وغيرت ملابسي طلعت دُجى گاعدة على طرف الجربايه وطاگتها صفنه ايدها على خدها.
بلعت ريگي ورحت گعدت يمها دغيتها بأيدها
مَياسة: شعندج صافنه وأيدج على الخد.
دُجى: ماكو شيء ولچ گومي يلا اطلعي بيبي مادري شتريد منچ.
مَياسة: اهو شو مالچ خلگ؟
باوعت لوجهي وابتسمت
دُجى: يتراولچ.
گمت من مكاني ورحت للأستقبال يم بيبي المرة هستوها طالعه بعدها صينيه العصير والماي بالگاع بيبي طلعت وراها للباب ورجعت تتوچه على عوجيتها بس شافتني عضت اصبعها متحلفه
نبعة: ولچ دنيا المغرب العالم اجت وراحت والمسعدة نايمة.
مَياسة: شني بيبي غير صايمة هديني.
نبعة: جا صايمة بس عن الأكل؟
مَياسة: لا شلون أصلي الفجر وانام وانوب اوقت تلفوني اكعد اصلي الظهر وارجع انام وانوب افطر واصلي المغرب جا المن كاعدة بعد اكابلج ترزلين بيه؟
نبعة: غياباتج كثرانه الا احاچيهم يلوون اذانج حتى تتوبين.
مَياسة: شبيچ اليوم حبيبتي.
گعدت بمكانها تباوعلي صفح ما راضيه حاچتني
نبعة: الناس مستعجلين يريدون يكفون رواحهم والوليد بيته كمل ماعنده شيء يريدون الخطوبه هل اسبوع كلت يجوون اخوتج واحاجيهم.
هزيت راسي خوش ورحت يمهن بالمطبخ ويصبن بالاكل دُجى گاعدة بالگاع تنظف بالخضرة وليال تحضر الصحونه والكاسات حتى بيبي تجي بس تصب ولوزة گاعدة گبال دُجى مسويه گرون جنها عبسي و تاكل خضرة وهيه تضحك وتحاجيها.
دُجى: ولچ ما مغسوله هديها.
لوزة: ميخالف تصفيها المعدة.
رحت يم دُجى كابلتها الگط وياها ونسولف وهنه خلصن گمت غسلت اديه سويت روحي تعبانه واشتغل لان بعدين يحچن عليَّ گبال بيبي
مَياسة: محتاجات شيء بعد؟
دارت عليَّ مضيگه عيونها ورجعت تطلع الخواشيگ من الكاونتر
ليال: اي حبيبتي همه منتظرين الاذان يصلون وياكلون بس أذني.
مَياسة: صوج الساعدتجن.
هزيت ايدي اخزر بيهن ومسويه روحي ضايجه حتى لا ينطيني شغل قوي ما بيه حيل وهنه يضحكن كاشفاتني.
ليال: عود عروس وماتريد تشتغل
مَياسة: اهو هسه شني الربط؟ والله أبطل ترا.
دُجى: شو محد بين من الولد؟
ليال: مُهران گلي ما يجوون يتفطرون يم محرَاب هناك.
هزت راسها مبتسمه بقهر، أخذت السفرة افرشها صوت القران بالبيت وريحه الطبخ والبخور ترد الروح فرشتها وراحت بيبي تصب وبدينا ننقل بالاكل للأستقبال جدي دخل وكالعادة اول مايدخل يصيح يا الله حصرتني الضحكه اتذكرت المَوتور كل ما موجود وجدي يصيح هيچ يجاوبه لا شافك الله كون.
نزع عگاله وعباته خلاهن يمه وسرفن رداناته وگعد منتظر الأذان اجه ابوي وعمي وكملت السفرة كلنا گعدنا ناكل عمي معتصم ودُجى صارلهم مدة جوه ياكلون وينامون ويكعدون من يوم السالفه لان تهاني تطردهم وهمه عود مقدرين حزنها ومرضها.
أذن وشربوا لبن وتمر وبلشوا ياكلون وجدي گال الابوي
رجاح: ابن الحرام القذر رجع شفته اليوم ماريده يوصل هنا بعد دوم.
معاذ: مايوصل خلي يولي شحده.
عمي معتصم أخذ دولكه اللبن يشرب بيها ويحچي ما مهتم
معتصم: من زمان ما رايده انا بس چانت واگفه بعيني شغله وبعد ما صارت، خلي يروح ما ضل شيء يربطنه بي بعد لا اله شيء يمنا ولا النه شيء يمه.
رجاح: نكس ابن النكس ركضت سجلته بأسمك تخلي ابن حرام يشيل اسمنا راسنا ينزل للگاع اذا احد عرف سنين احنه مربين ابن حرام بنصنا! ياحيف.
معاذ: اي والله شني هل فضيحه!
معتصم: محد يعرف بويه كتلك بعد ما يوصلنا ولا نوصله أبد.
دُجى وجهه انطعن احمر دم عافت الخاشوگه من ايدها وگالت بهدوء
دُجى: ابن حرام؟ زين هوه منو كتب هالكلمة على جبينه هوه جان طفل ما يدري منو ولا يدري وين الذنب موذنبه الذنب ذنبك بابا لان اخذته وربيته وهسه جاي تحاسبه على ماضي ما اختاره.
معتصم: ما تعرفين انتِ بويه الناس تحجي والاسم يضل ملطخ.
مسحت وجهه تحچي بغصة وايدها ترجف
دُجى: تحچي صدگ محراب يلطخ اسمك؟ العار مو عليَّ العار عليكم انسان عاش بينكم شريف وما قصر ويا احد بيوم من اول ما فتحت عيني عالدنيا بحچايه ما غثني تعرف شگد صبر واتحمل؟ تعرف شگد چان ينقهر ويجي يسألني انا سويت شيء؟
أبوي شبي وياي ليش يكرهني! چان يدور رضاك بابا چان يشتغل ويدرس وهالك روحه يريدك تشوفه يريدك تشجعه بس ما سويتها خليتها بگلبه ليش جبته من الشارع اذا مو كدها جا عفته بلكي يجيه الارحم منكم.
تحچي بحرگه گلب وتعاينلهم تريد جواب يريح گلبها وجدي عيونه ثبتهن عليها وگام من مكانه يلوب بمكانه وكض عكاله يريد يكتلها
رجاح: ولكم كضوها إلى هاي طالعلها لسان خلي اتوبها تدافع ع ابن الحرام النگس اتصخم وجهك يارجاح عبالها اخلي يلفي للبيت بعد موكافي سترنا عليَّ.
ابتسمت بقهر تباوعلهم
دُجى: هوه ستر عليكم اكثر من ما سترتوا عليه اذا هوه يطلع برا اني اطلع وياه وامشي رافعه راسي لان محراب اشرف من حجيكم واشرف من كل اسم تتباهون بي، الدم مو كل شيء حتى لو مو من دمي الرجوله بالأفعال وهوه افعاله تغطي عيوبكم كلكم.
گلبي دگ حيل من نضراتهم جدي اتقرب يريد يطكها كام عمي معتصم بسرعه مخليها بضهره مايخلي يوصلها.
معتصم: عوفها بويه محروگ گلبها ما تدري شتحچي.
رجاح: اذا ما جبتها اطگها اتبره منك صدگني معتصم لا تجني على روحك! تخلي بت بكد زري تتجاوز علينا لازم نأدبها.
معتصم: اعذرني بويه وحيدتي هاي اموت ولا اشوفنها تنطگ.
دُجى بس دموعها تجري وتمسحهن ورا ظهر ابوها تباوعلهم بخزر تريد بس واحد يحچي حتى تحول عليَّ من حرگه گلبها بس ابوها حچه هيچ باوعت لجدي متشمته وهوه اتسودن.
رجاح: امشي اطلع برا يا چلب يا ابن الچلاب وانا الك.
معتصم: موبيتك واطلع انا سكتت على كل شيء وياك بس لهنا وبس بنتي بيها غلط انا اعدلها مو ناقص واخليك تطگها وانا اباوعلك.
معاذ: تعز بزرك على ابوك عمي شني انتَ؟
ضل يباوعله باهت ما متوقع هذا رده بس اني متوقعه لان ادري بعمي يحب دُجى مو مثل امها أخذها لازمها من اكتافها وصعدوا هوه وياها فوگ عايفهم جوة واحد يباوع بوجه الثاني مصدومين.
معاذ: هذا صدگ يحچي؟
رجاح: سهله.
هز راسه متوعد وطلعوا سويه ثنينهم گلبي نار على دُجى واخاف من اهلها ما اكدر اصعد كون هيه تنزل هسه شلنا الاماعيين و وگفنا نغسل بيهن هيه تغسلهن واني انشفهن واخليهن بمكانهن باوعتلي وتحچي متشفيه.
ليال: والله ارتاح گلبي غسلتهم غسل بعد ايدي.
مَياسة: ارتاح گلبي من عمي معتصم اكثر شلون فشلهم خرب اول مرة احبه.
ليال: هنياله بهيچ أخت محراب يستاهل، توگف بوجه كل واحد يجيب طاريه ما يهمها احد صدگ الله ياخذ شيء وينطي شيء انطاه دُجى تفدي بروحها.
مَياسة: شگد اتحملت وسكتت على سوادين امها علموده چانت تتفنن بتعذيبها وتسكت كله علمود لايعرف هوه ابن حرام وينقهر.
سدت السنگ ونشفت اديها لان خلصنا
ليال: بعد عايشة ويا عمرها كله تدري شني يضوجه وشني يقهرة، الله يريح گلبهم ويعوضهم ثنينهم تعبوا.
شويه وسمعت صوت مُرتاد ومُهران بالأستقبال گاعدين يم بيبي يسولفون خرطت العافية من سمعتها تحجيلهم بالخطوبه راح يشبعوني خزرات بلعت ريگي وطلعت من صاحوني باوعولي من فوگ ليجوة ومرتاد طبطب إلى على المكان إلى بصفه رحت گعدت وعيني بالگاع مثل الحبابه باوعلي ما راضي يهز بأيده.
مُرتاد: جا انتِ مو كلتي ما اتزوج تضحكين علينه؟
ما فكيت حلكي وحجيت ومهران يباوعلي
مُهران: اسكت انتَ، باعي بابا مياسة هذا زواج عشرة عمر مو يوم يومين همه الناس خوش ناس والولد خوش ولد بس انتِ مستعدة لهيچ خطوة! خاف تهملين دراستج اعلگج من اذانچ وكتها هذا البيت قريب شبختين اوصلچ!
ومرتاد ضايج حتى ما يضحك مختنگ
مُرتاد: دختولي شبختين شني! اطفرلها من السياج بس ترا والله مو مال زواج مهران.
مهران: هيه تودي بجدتك تكلها راضيه انتَ ياهو مالتك؟ هيه البت ما تريدنه گوة.
حچاها ضايج كل عقله مرد گلبي گمت من مكاني حضنته واحچي مختنگه گوة كاضه روحي لا ابچي
مَياسة: يمه مهران وعلى روحي انتم شني ما اريدكم ما اريد اتزوج اصلاً جذب لاتقهرني.
اهتز صدرة يضحك وباس راسي
مُهران: الله يسعدچ يابعد الروح.
مُرتاد: صارت صدگ؟
نبعة: ولكم كافي الله اكبر حتى لو عدها نية راح تبطل من وراكم بس انتم عدكم اخت؟
اجت لوزة تركض چانت فوگ گعدت بحضن ابوها وتهز بشعرها
لوزة: بابا شوف كروني حلوات؟
ابتسم يبوس بيها
مُرتاد: الله يخبلن ياهو سواهن؟
لوزة: المَوتور سواهن إلى يگلي نفس من چنت امشط أختي سويتلچ مثلها.
اتغيرت ملامح وجهه للقهر
مرتاد: عمت عيني عليك وعليها، شوكت يرتاح گلبك.
شغل جكارة مهران ويحاچي
مُهران: ما يرتاح اذا ما يلگاها، وصلت بي مرحله من گد اليأس يدگ البيبان واحد واحد مثل الغرگان ومتعلگ بگشاية.
مرتاد: يخوي والله هدم حيلي زلمة طول بعرض من يوصللها الموضوع يصير مثل الجاهل هذا الليل اليمر على بنادم ما ينامه.
مهران: حقه ياهو يلومة؟ رباها من عمرها يوم وثنينهم لا عدهم ام ولا ابو يخاف عليها من نسمه الهوى وتالي يجي رجاح النگس ياخذها عبالك ماخذ لعابه وعلى هضيمة.
بلعت ريگي اسألهم مقهورة
مَياسة: هوه ليش أخذها؟
مُرتاد: ما گدر يلوي ذراع المَوتور الا بيها لان ماعنده غيرها.
مَياسة: بس مو هيچ! سوايته ماكو عاقل يسويها يعني تبقى بنت ابنه ابد ما حب عمي ثابت وطشر ابنه وبنته فوگ ما معيشه ببيته؟
مهران: كل شيء ما يغزر بعينه، يريد يمحي نسل ثابت من الوجود بس يخسى ما دامنا نشم الهوى هوه الينمحي.
حچت بيبي بقهر دموعها يجرن
نبعة: بيوم حادث عمكم و وفاته ما أنسى ضحكته وين اكو ابو يضحك بفاتحه ابنه وجبيرة؟ حتى شكيت هوه الكاتله بس بساعة الحادث هوه بالبيت من يومها والمَوتور انگلبت احواله لعب بي لعب جدكم كبرة عمرين فوگ عمرة.
مَياسة: شسوه يعني مثليش؟
الولد يباوعون ويدخنون ما يريدون يسمعون لان اصلاً يعرفون كل شيء بس اني بقيت اسأل بفضول.
نبعة: من اتوفى ابو ضل المَوتور بس هوه وامه عقيق چانت الدرة الوحيدة بحياته بس بعد وفاة عمكم كل شيء صار صعب عقيق حاولت بكل طريقة تحمي ابنها بس جان جدكم يضغط عليهم بكل شيء يريد بكل طريقه يخليهم جوة سلطته جان يحمي الحديده ويچوي بجسمه گبالها وهوه حتى اخ مايگول كله في سبيل ما يوصل الامه ويحاچيها بكل مكان مخليله أثر وحجته شني! يگله اريد اقوي گلبه ومايخاف من شي وبعدين قوى گلبه صدگ بس على رجاح بس انگلب السحر عالساحر من كل شيء نملكه طلع بأيد المَوتور بيتنا المعرض المزارع وهنا اندفن فرات وكبر المَوتور بس شالفايدة! امه شمعه سنينه ماتت وعافتله أمانة بركبته.
بس انذكر وفاة الام انمرد گلبي اتذكرت امي من ماتت وهيه توصي علينا ماتت بحضن مهران ماتت بمرض السرطان اكلها اكل كبال عيوننا الكيمياوي اخذ حيلها وبالأخير انتصر السرطان وكل واحد دفن جزء من عنده وياها ماتت وهيه توصي عليه وعلى مرتاد امنتنا بأمانه مهران ولليوم صدگ نحسه ابونا شايل مسؤليتنا ثنينا دمعت عيوني اسألها
مَياسة: شلون ماتت امه؟
مسح وجهه يحچي بقلة صبر عيونه انگلبن حمر
مهران: يابه كافي شني غيروا الموضوع.
نبعة: من ماتت امه واخذوا اخته هنا دفن اخر ذرة رحمة بگلبة، كبر واتغير كل شيء طرد رجاح ومعاذ ومعتصم من البيت خلاهم يتمنون اللگمة ومايخلي أحد يشغلهم عيشهم نفس الذله العيشوه بيها من چانوا يحبسونه هوه وامه برا والدنيا تمطر وهيه حامل بشهرها تتوسل بيهم تكلهم عوفوني برا بس دخلوا فرات وهمه يضحكون على وجعهم. باسوا ايده حتى يعيشهم عنده لان محد يلفيهم وقبل بس مو لسواد عيونهم لا بس علمودكم انتم ما راد يلوحكم طشار ضل ينتقم منهم على البارد واول شيء گاله انا المَوتور ماكو فرات اندفن ولليوم ماطفت نارة.
مَياسة: زين شنو معنى أسم المَوتور؟
نبعة: المَوتور يعني الينكتل اله أحد ومايگدر ياخذ ثاره.
مَياسة: بس هوه محد اله مكتول ابوه بحادث وامه؟
نبعة: ماتت بالولادة ولدت ميرار وماتت وهيه توصي بأخوها عليها وصية امة وصية عزيزته ضيعها الله لا ينطيك يارجاح.
مُهران: جدة كافي أسكتي راح اروحن ترا.
نبعة: سكتت كافي مو صوجكم.
لوزة صافنه مندمجه حاطه ايدها على خدها ويانه ومُرتاد صافن خلاها على گلبه باسها براسها بشوغه ويحچي
مُرتاد: انا بنيتي بحضني وميت عليها مجرد تفكير تروح من أيدي لو يوصلها رجاح يابويه أموتن ياعزيزتي يابويه الله لا يختبرني بيج بجاه الحسين الشهيد واشوفنچ تكبرين گبال عيني واكحل عيني بطولچ.
وهيه ضحكت وكامت حاضنه وجهه بين اديها الصغار وتبوس بي
لوزة: اني هم احبك بابا احبك هالگد.
مُرتاد: شگد؟
صفنت تفكر انوب ضحكت وكالت
لوزة: بگد الزباله.
ضحكنا عليها وهوه يباوعلها مقهور
مُرتاد: لا تكولينها؟
لوزة: بابا حبيبي شبيك ترا الزباله هواي ما تخلص.
ضحك مهران فتحلها ايده
مهران: فدوة اروحن لحلگج ياعمي تعاي خلي احبچ.
راحتله تضحك وهوه باسها حيل من خدودها وهيه حضنت وجهه تگله
لوزة: اوگف اني هم خلي احبك.
باسته وتسوي مثل حركاته وهوه مكيف
مهران: يا بويه عافية مو بوسة.
لوزة: بوسني خلي اگلك سر.
باسها ويباوع لوجهه وهيه صاحت تقلد صوته
لوزة: يابويه عافية مو بوسة.
ضلوا حاطينها ثنينهم ويضحكون على سوالفها انوب گاموا طلعوا گالوا رايحين يم محراب نگعد.
أخذت لوزة وگعدت اقري بيها بسرعه تحفظ ما تتعبني ذكية بس مرات من ما تشتهي تقرا لو مدري شيصير ما تستوعب على مزاجها نمشي ست ليان كملت قرايتها وكامت غسلت وفرشت اسنانها وغيرت ملابسها واجت باستني قبل لا تنام.
لوزة: احبچ هالگد.
مَياسة: اني اموتن عليچ وعلي.
ضحكت وراحت لفراشي واتغطت تنتضرني اروحلها ما تنام الا بحضني لو بحضن ابوها رحت يمها اتمددت وخليتها على أيدي بس خلت راسها غفت أخذت جهازي گلبي دگ حيل عرفته دازلي دخلت على حسابه لگيته داز ومتصل هواي.
: - وينچ ياروحي بالي يمچ.
: - ها هياتني.
: - وين چنتي؟
: - يم اهلي.
دز بصمة صوتية يضحك ويگول
: - حبيبتي كم يوم وتلگيني گاعد بنصكم مو يكولون مو خوش نسيب بس راح احبنهم على محبتج.
ابتسمت وكتبتله
: - عادي اصلاً ثنينا نعيش عدهم.
: - اي گعيدي هنيالي.
دُجى.
يا ضيمي وياحرگه گلبي واني اسمعهم يحجون باخوي حچي يسم الروح اريد اكلهم بسنوني وهم ما يبرد گلبي حقراء محملينه ذنب على شنو ما ادري گاعدة على جربايتي واكل بروحي أمي بغرفتها وابوي اخذ العلاج راح ينطي الها يريدها ترد لعقلها فززني من صفنتي صوت رنه جهازي دگ گلبي حيل من شفته محراب اخذت نفس وفتحت خط.
دُجى: ها حبيبي شلونك.
محراب: هلا بهالصوت يا بعد گلبي انا زين اذا انتِ زينه شبي صوتچ باچيه ياهو وياچ حاجيني؟
مسحت عيوني وحچيت عدل ماريد يبين على صوتي واقلقه
دُجى: لا محد وياي والله بس لان ما نايمه بعدني ما تجي اليوم؟
سكت شوي وانوب اجاني صوته
محراب: انا چم يوم واجي اشوفنچ لو اخليهم يجيبونج إلى حبيبتي لا تضوجين انتِ ما اريدچ تنقهرين ابد انا زين والله انتِ مريضه لاتجيج النوبة لاتخلين بالي يمچ بداعتي.
دُجى: شتاكل شتشرب ياهو يمك؟
محراب: كلهم يمي الولد ما عايفيني أبد لا يضل بالچ انتِ اكل واشرب واطلع ما ناقصني شي.
ضل يسألني على مياسة ويسألني اذا رفضت واني احس روحي مثل بلاع الموس لا اكدر اكله تحبه ولا اكدر اكله ماتحبك ولا تتقبلك غير اخ شيفضها ما ادري ضلينا نحچي شويه ويوصي بيه لحد ما صاحوه سد الخط وراح نمت لثاني يوم گعدت نزلت جوة لكيتهن مخبوصات ومياسة كاعدة صافنه تاكل باضافرها رحت كعدت يمها.
مَياسة: بعد يومين الخطوبه.
گلبي دگ حيل وعيوني دمعت سوده عليه يا محراب
دُجى: مَياسة اكيد مقتنعه بي انتِ؟
مَياسة: اي مقتنعه بس المشكله.
نزلن دموعها بحيرة وهيه اتلفتت تحچي بهمس واحس ضربتني على راسي من گالت.
مَياسة: البخاخ خلص بعدله كم بخه تعرفين شنو؟ يعني اموت دُجى والله اموت ماتدرين بدونه شيصير بيه ماتدرين عفية منين اجيبه شلون.
فتحت عيني حيل وگلبي دگ بخوف
دُجى: عزا بعيني منين جبتي و وين لكيتي؟
مَياسة: عفيه مادري بقت بس بخه مدري بختين راح يگضن شلون بيه.
ضليت اباوعلها وحايره اكثر منها وحلفتني الف امام ما اكللهم تكول اني كلت ليوسف وكلي بس نطلع من هالبيت انا اعالجج ببيتنا وبدون ما يدرون اخوتج وارجعج مثل قبل واحسن.
دُجى: مياسة مقتنعه انتِ؟ ترا والله ما يسوولج شيء ماتعرفينهم شني.
مَياسة: ادري عفية بس همه عايزهم ضيم؟ ما تشوفينهم من مصيبة لمصيبة كل واحد حاير بضيمه ويوسف گال شغلته بسيطه البخاخ بسرعه اخلصج منه مومثل المخدرات التنبلع صعبه بعد عليمن اشغل بالهم.
ضليت اباوعلها حايرة شحاجيها رحنا ثاني يوم حجزنا البدله والصالون اختارت كل شيء بسيط ما حبت يكون شيء هوسه وما رادت نعزم رادتها بيناتنه بهدوء واني گلبي يدگ حيل ما يهدى ما ادري شلون أكول المحراب ومادري شني ردة فعله اذا عرف؟
اجه يوم الخطوبه رحنا الصبح للصالون مكيجت الها وهيه بس مبتسمه عاجبها شكلها ولوزة يمها شنو تسوي لروحها تسويلها وكل شوي تبوسها وتحضنها وتكلها اخذچ وياي ما اعوفج وهيه تكيف.
كملت ولبست فستانها ابيض بسيط مابي شغل هواي مخصر على جسمها وبي فصوص فضية تلمع ويا شعرها القصير وحمرتها البُنية طلعت تخبل.
طلعنا من الصالون اجه مرتاد أخذنا بسيارته للبيت ومايگدر يحط عينه بعينها مختنگ عبالك هسه راح ياخذونها ولوزة تنگرط ببدلتها البيضه وشعرها الكيرلي تفتر عليهم شايله فستانها مثل الاميرات من واحد لواحد وهمه مكيفين بيها.
گعدت على الكوشة ولازمة ايدي حيل اجو اهل العريس هم ما جانوا هواي قليل كلش الزلم بالديوان يقرون الفاتحه شويه واصاحت امه
: - راح يدخل الشيخ يعقد الهم غطنها يوسف يكول عيني.
لبست البرگع على راسها واحنه لبسنا حجاباتنا ودخل الشيخ يعقد الهم كمل العقد والجكليت ضل ينشمر من كل جهه على راسهم وبنفس اللحظة الكمل العقد بيها الرمي نزل على بيتنا مثل المطر حسيت البيت اتزرف من الطلق رجليه ماجاي تعييني والطلق ماجاي يوگف حطيت أيدي على اذني وچن گلبي گلي هذا محراب بعديش يا حبيبي بعديش.
الصريخ گب من كل جهه واني گلبي النار طلعت برا گلبي طاير ويا لمحته التفگه بأيده متحزم للشر ما شايف واحد گباله يريد بس يتعارك مرتاد دفعه يصيح عليَّ ما مستوعب.
مُرتاد: ولك محراب شبيك اتسودنت؟
التفگه بأيده يفتر منا ويجي منا مايخلونه يدخل جوه
محراب: اي اتسودنت هيچ تكسرني مرتاد جا شحچيت وياك البارحه؟ خلي يطلعون وروح الحسين اترس بجثثهم الشارع محد ياخذها انا ابن عمها وناهي عليها محد يوصلها تسمعون؟
بنفس اللحظة مرتاد طگه بنص وجهه راحت روحي اللوب بمكاني الشارع متروس وادم ينحروني اذا طلعت ضليت بس الطم على خدودي من اتعاركوا وصار الصياح ماله والي جره من ياخته يحاچي
مُرتاد: ماريد اشوف وجهك هنا بعد عقدوا وصارت حرمته اسمها ماتجيبه على لسانك امشي منا لا اطلع بروحك هسه وروح الحسين.
فتح عينه حيل وصاح ممروده روحه وحاجبه مشكوك يصب دم
محراب: يطلكها والكافل يطلكها اكتلكم كلكم ولك مُرتاد عاينلي اتسودن والله لا تسوون هيچ.
راد يرجع يطگه وصاروا الوادم بوجهه يريدون بس يكضونه عنه صاح من كل گلبه گلت اذا يطيح بأيده محراب هسه يموته
مُرتاد: محراب لاتشوفني وجهك بعد خرب لا تسودني شجاي تسولف؟
فلت من ايدهم وراح يطگه ومحراب حتى أيده ما شالها يدافع على روحه مثل الفاقد عن الدنيا كلها مرد روحي العالم جرت مرتاد منه
: - صلوا على محمد شني السالفة يابه اخوان انتم اول تالي.
بنفس اللحظة الوخروا بيها مرتاد عنه محراب وگف منتچي على الحايط ايده ترجف ويفتح عيونه ويسدها دايخ صرخت من حلاة روحي
دُجى: يمه محرررراب.
بنفس اللحظة صارت عينه عليَّ خزرني وأشرلي براسه ادخل جوه وخر ايده من الحايط يريد يجيني بس ماكدر مسح عيونه وماكدر بعد طاح من طوله لا يحرك لا ايد ولا رجل الناس التموا عليَّ يريدون يشيلونه والشيوخ تدردم بصوت عالي ركض اله مرتاد يبعد بيهم دخل من بيناتهم واسمع بس صوته يدوي
مُرتاد: حاجيني خويه ولك محراب خرب اهلك لاتغمض، وخروا منه خنگتوه السيارة جيبوهااااا.
راحوا يجيبون السيارة واني احس روحي فقدت عقلي ما ادري شنو اسوي ما ادري بي عدل لو ميت اجت مياسه تبچي ايدها على كلبها
مَياسة: شصار دُجى شصار.
جنت اسمع حجيهم وفجأة حسيت الدنيا صارت ضباب عيوني تغوش صوت يرن براسي مثل الطنين ريگي نشف مدري شصار حسيت جسمي يتيبس ايدي ترجف بغير ارادتي ما ظل عندي وعي لشيء اسمع اصواتهم بعيده تنده بأسمي بس ما اكدر اجاوب جسمي كله ينتفض احس احد يجرني من جوه.
ما اعرف شكد غبت وشنو صار بس من كعدت جسمي كله تعبان راسي مصدع ولساني مجروح من جوه حسيت ثكل ونعاس يغلبني واول كلمة طلعت من حلگي.
دُجى: اخوي وينه محراب وينه؟ عايش.
مَياسة: ها يروحي عايش والله.
فتحت عيوني ادورة بينهم لگيت ابوي گاعد يم راسي ومياسه يمي دموعها تجري باوعتله ما إلى حيل أعين روحي واكعد
دُجى: محراب وينه بابا شبي بس حاجيني؟
معتصم: مابي بس طاگته جلطه حبيبتي كافي زين.
فتحت عيوني حيل وگمت من مكاني احس بچي الدنيا كله مايريح گلبي
دُجى: يا يمه عمت عيني أخذني اله بداعة عزاز گلبك اذا تحبني حباب بابا.
اخذ اله صفنه انوب كال
معتصم: كومي البسي ملابسج ولاتكليلهم وين راح نروح ابد.
هزيت راسي اي ودكات گلبي يتسارعن ايدي ترجف گوة سيطرت اللبس الصايه والحجاب وطلعنا اني وياه كللهم راح ياخذني للطبيب دخلنا للمستشفى و وصلنا كبال غرفته المَوتور واگف يلوب يعارك بالدكاترة صارت عينه على ابوي وصاح
المَوتور: شعندك جاي انتَ؟
باوعتله الدمعه بعيني وهمست
دُجى: عليك الله مو هسه.
هز راسه خوش ودنگ فتحلي باب الغرفه البيها محراب
المَوتور: فوتي خوية.
دخلت وياريتني ما دخلت اخوي ابو ضحكه الحلوة ابو روح الحلوة ضال بس جسد بدون روح الحزن أخذ ثلثين حيله رحت گعدت على طرف الجربايه گاضه ايده حيل دموعي تنزل عليها فتح عيونه بتعب وسحب أيده من ايدي يحچي گوة
محراب: جنتي تدرين بيها راح تنخطب وماكلتيلي شنو گلبج؟ ما كسرت خاطرج وانا احجيلج عن حبي الها ماكسرت خاطرج وانا ابني احلامي وياها گبالج؟ ولچ لحد البارحه انا اسولف وياچ وما جبتيلي طاري.
مسحت دموعي اريد افهمه
دُجى: محراب افهمني اني والله ما ردتك تنقهر هيه تعتبرك بس أخ علمودك ما ردتك تشوف هيچ شيء تتأذة.
وخر جهاز الاوكسجين من وجهه كوة يجر النفس يمسح بوجهه
محراب: تگلي ما ردتك تنقهر شنقهر ولچ اريد اموت راحت من أيدي أخذوها ما جاي استوعب يعني هاي هيه اتزوجت صارت حلال غيري ومايصير افكر بيها؟ يا نار گلبي ويا لوعتي بفراگها شلون؟
هوه يحچي واني ابچي على حچيه گلبي ممرود وهوه ما يدري شيحچي وشيسوي اندگ الباب حيل وابوي يصيح عليَّ أخذني گوة ما اريد ارجع اخوي مكسور كسر ما ينجبر صعدني بالسيارة امشي بايده وين ما ياخذني وصلنا للبيت هدوء محد گاعد.
دخلت للاستقبال ادور على مياسة اريد اسولفلها اذا ما حجيت اختنگ بس ما لگيتها رجعت طلعت للحديقة الهوى البارد لفح وجهي بس گلبي شيبرده.
اتقدمت اكثر ولمحتها من بعيد گاعده بالگاع عالثيل متربعه گدام وحده من النخلات ما مبين بس ضهرها وشعرها المفتوح من ورا گلبي نغزني من كعدتها بلعت ريكي واتقدمت خطوة ورا خطوة صرت قريبة عليها صوت دگات گلبي ينسمع باوعتلها وباوعت للگدامها مصدومة
وما مستوعبه گلبي يريد يطلع من مكانة مَياسة!
السچين بأيدها كلها دم وتهز بروحها منا ومنا تنود وگدامها لوزة مشمورة بالگاع غرگانه بدمها و وجهه شاحب مخلص دمها ومغمضه عيونها مثل الملاك.