رواية أبناء الشنار للكاتبة مراسيل الفصل التاسع عشر
سمعت صوت صياحهم جوة تارس البيت گوة عانني رجليه انزل أشوف شكو نزلت گلبي يدگ حيل واباوع المكان كله كزاز ومواعيين مكسرات وابوي وعمي وجدي مدنگين روسهم ما فتحوا حلكهم بكلمة والموتور يفتر عليهم من واحد لواحد رايحه روحه گوة يجر النفس انفجر عليهم.
المَوتور: اطلعوا برا ما اريد اشوفنكم ما جاي تسمعوون؟
رجاح: جدك انا بويه وين اروح وين انطي وجهي؟
اختنگ باوعله بعيون حمر
المَوتور: لو اغسلك بماي زمزم تضل نگس جد انتَ حاسب روحك! بس انطيني جواب يريح گلبي ليش اخذتها مني ليش صارلك سنين لا انتَ الحميتها ولا الرجعتها إلى بررلي بلكي يبرد گلبي وما احرككم هنا هسه.
اخذ نفس يباوعله مقهور مادري جذاب ما ينعرف ابد
رجاح: اتندمت والله اتندمت عبالي هيج اللوي اذنك بيها لان اعرفنها قطعة من روحك وانتَ ما ترضى تسوي شيء اگلك عليَّ الا هيچ ولو ما چنت تدري بيها عندي چا هسه انتَ طاردنا من زمان جدك واعرفنك راسك ما يطخ.
ما خلاه يكمل ضل يصيح حيل محروگ گلبه
المَوتور: طخ والكافل طخ گتلك رجعها شكد اتوسلت بيك شكد ذليتني گتلك بس رجعها إلى واحوولك البيت انعل ابو تحچي صدگ انتَ يافلوس أختي هاي يافلوس اعترف بيهن انا لو اعيش بالشارع بس ويا بنيتي راضي يا فلوس؟
رجاح: ما ضلمتها خليتها بمكان زين وأمنتلها حياة زينه.
المَوتور: عمرها 4 سنوات من أخذتها شتگدر تسوي لوحدها طفلة منو سندها شدري بيها شني خليتها تعيش انا زلمة وضلمتني هيَ شسويت بيها الله يهلكك شعملت بحالها!
چنت اركض وراك مثل الچلب شتگلي اگلك صار هدمتني هدم ما خليت جريمة ما دخلتني بيها ما خليت عصابة ما شمرتني بنصها.
جدي سكت مدنگ ما رفع عينه اتقرب عليَّ شال راسه بأيده الترجف حيل وهمه محد فتح حلگه وحچه بس صوت صياحه بالمكان فتح قميصه ويأشر على رگبته وصدرة مختنگ.
المَوتور: شوف شوف بعينك افرح هاي أثارك محفورة بجسمي وبگلبي كل حرگ كل جرح شاهد عليك تتذكر شني چنت تسوي بيه وشني چنت تخليني اسوي بروحي حتى تدليني عليها! تتذكر من تخليني اذب على روحي ماي يفور تخليني بيدي أفوره وبيدي احرگ روحي.
احترگ گبالك وانتَ تضحك تتذكر الخيزرانه الچنت تكسرها على ظهري جاوبني تتذكر شلون چنت تخليني اتوسل الك! اخر شيء ختمتها بچلابك الوديتهم وراي لكربلاء يكتلوني تالي رديتهم الك همه المكتولين شفت شلون حتى غدر ما گدرت تموتني؟
صوته على أكثر وأكثر سد قميصه ويلوب بمكانه احترگ گلبي من يمي أخر شيء مسح وجهه وباوعله وحچه بهدوء.
المَوتور: انتَ دمرتني وأخذت روحي ما خليت بيه حيل بعد ما اريد اشوف وجهك ولا وجه ولدك كلكم واحد ورا الثاني من اليوم ما اريد شيء يربطني بيكم لا انتم مني ولا انا منكم وذبني من العشيرة ما ضل يهمني افضحني لفق شتسوي سوي هم ما يهمني شوه سمعة ابوي ابنك مرجعة عليك.
بس روح من وجهي ماريد شوفة وجهك اذا تضل گبالي اطلع بروحك وادخل سجن وخاف تعرف بوجودي بنيتي وما تلگاني ماريد يگلولها اخت المجرم اخت الكتل جده وعمامة.
معاذ: بويه گول يا الله احنه اهلك ماعندك غيرنه.
باوعلهم مستهزء وصفگ ايده متحسف
المَوتور: لا شافكم الله ماعندي اهل اطلع قبل ما أمثل بأجسامكم هسه وخلوها ببالكم انا وياكم والزمن طويل مو المَوتور اليسكت على حگه ولوعة زينب اخليكم تتمنون الموت وما تلگونه استلموا الراح يجيكم انا هيچ تضحكون عليَّ انا؟
الچانت مسكتتني عنكم ضيعتوها.
بقوا يحاولون ويا احنه اهلك وهالحجي وهوَ يصيح ويستريح ويطرد بيهم على ما أيسوا ماعدهم حل لو يطلعون منا لو يكتلهم راحو كل واحد يلم غراضه مياسة اجت بصفي تهمسلي.
مَياسة: اكلج راح نديح وين نروح عود؟ حتى عمام بعد ما عدنه كلهم ملتمين هنا ما مخليلنا واحد برا احتياط خاف ننطرد.
دُجى: ياخذونا وياهم؟
هزت راسها اي وتدردم
مَياسة: حبيبتي طبعاً يعني وين يعوفونا والله ما ابقى غير يتخيلنه رجاح ويكتلنه بگاعنه خاف النبي يوسف لگوا قميصه احنه كل شيء ما يلكون.
دُجى: چا وين نولي ياا.
رفعت اكتافها ما ادري وتهاني صاحتني أصعد رحت صعدت الها لگيتها فاتحه الجنطه وتعبي بيها بغراضنا وعيونها بگصتها وابوي يمها يشيل بالاوراق ويضم بيهن مخبوصين خبص
تهاني: شيلي شنو عندج مهم ما لازم يبقى هنا.
دُجى: كل شيء ما عندي.
شمرت إلى بأيدها وصاحت بكل صوتها
تهاني: وين راح نروح وين؟
معتصم: هسه تعرفين امشي.
سكتت حتى ما عندي فضول وين راح نروح رحت لغرفتي لبست الصاية والحجاب وأخذت تلفوني بأيدي ونزلت جوه لگيت مَياسة مبدله و گاعدة على الدرج تاكل بأضافرها منتظرة اهلها يخلصون لم الغراض ولوزة بحضنها وليال مادري شتسوي بالغرفة گام المَوتور من مكانه مسح وجهه ويتنفس حيل اجه بأتجاهنه بخطوات بطيئه ردنا نگوم وگال.
المَوتور: اوگفن يابه وين رايحات وياهم؟
بلعت ريگي وباوعتله
دُجى: جا غير ويا اهلنا وين باقين؟
مسح على لحيته ودنگ يحچي
المَوتور: لا مو وياهم حشاجن منهم البيت بيتچن انا اطلع وانتن باقيات انا اقصدهم بس همه بكلامي خواتي انتن الله شاهد.
هزت راسها لا وحچت بهدوء
مَياسة: اي بس هذول اهلنا لو شما سووا اهلنا و وين ما راحوا ياخذوننا وياهم وغصباً علينه هم! حتى الولد هسه ما يضلون بس يسمعون بيهم طلعوا منا همه هم يطلعون وشوف اخواني واعرفهم كرامتهم ما تسمحلهم يضلون بمكان اهلهم انطردوا منه.
باوعلها والحيره مستوطنه وجهه انتچه عالدرج وابتسم مستهزء
المَوتور: همه هذول الطلعت بيهم من الدنيا هم اخسرهم من ورا رجاح و ولده؟
مَياسة: ضلت يمك هاي بعد انتَ تعرف طبعهم اكثر مني شتسوي سوي.
هز راسه خوش وحسراته توصلنا راح يريد يطلع طلع تليفونه من جيبه يخابر وقبل لا يطلع دار علينا وگال بهدوء يناقض شخصيته
المَوتور: گليلهم خلي يضلون لحد يطلع منا هسه.
هزيت راسي وسويت مثل ما گال وهمه كيفوا مثل الهم وانزاح على گلبهم رحنا غيرنا ملابسنا واباوع لمياسة وضعها متخربط حيل تحك بجسمها وتصفن بس ما ترشلها البخاخ هيچ يصير بحالها واريد احچي لان الوضع ما ينسكت عنه.
بس ما تخليني تگلي ما بيه شيء ما نحچي بدون دليل محد يصدكنا ورواء ملعبة بدقيقة تلفق الف دليل تريد نصورها ونكشفها انوب نحچي بهالموضوع والحيرة اخذت حيلي.
اسمع بيبي وليال يسولفن بيناتهن
ليال: بيبي شبيچ انتِ كل عقلج يعبرها هيچ؟
نبعة: لا ما يعبرها بس راح يصفي راسه ويبرد گلبه شويه وشوفي المصايب الراح تطيح على راسنا.
ليال: شمدريچ؟
سكتت ما جاوبتها الوضع بالبيت مخربط حيل ثاني يوم گعدنا نروح للمدرسه ومثل كل يوم هذا يگطع دربنا ويضل يمسلت راح يصير شهر كل يوم نلكاه بوجهنا ماكو يوم ما متواجد ويترزل ويرجع حتى من فشخته مياسة ما تاب جاي نمشي وصاح علينا.
: - اوگفوا.
اجه وگف گبالنا واحنه بعدنه على وگفتنه ومياسه تباوعله بقلة صبر
مَياسة: يابه شتريد انتَ؟
مسح وجهه ويحاجيها محروگ گلبه
: - اريدج والله انطيني فرصه مياسة ليش هيچ تسوين مابيه قصور وشيطلب لسانچ وشتحطين شروط بدون لا تگولين موافق عليها بس وافقي اجي اخطبج رايدج بالحلال شلعتي گلبي.
مَياسة: بابا شبيك خطوبة ايش بعدني بكد النعال اريد اكمل دراستي يا عرس يا دنيا اكدر اعوف اهلي اني! عليك الله كف عني جاي احاجيك بأسلوب هسه اني ماريد استعمل الطابوگ.
: - ما تفاركين اهلچ ابنيلج بيت بصفهم دراستج انا وياچ بيها اسندج الاخر العمر گتلج شيطلب لسانچ ما جاي ابالغ جربيني!
باوعتله حايره شتگله نفخت بملل وصاحت
مياسة: وخر وخر.
عبرته ودخلنا وما فك كل يوم گاض المدرسه ونفس الحچي ونفس القوانه ما مل ابد حسيت مياسة من تصرفاتها وابتسامتها بدت تميل اله واني گلبي ما مرتاحله ابد.
زين العابدين.
واگف بالباب متاني صلبني صلب گلي اطلعلي برا جايك وما بين اشتعلت لشتك مسحت وجهي وباوعت من بعيد لمحت سيارته جايه يم بيتنا سفطها ونزل الجامه وجهه ما يگصه السيف.
المَوتور: تعال أصعد يله.
باوعتله گوة گاض روحي ما اروح اخنگه
زين العابدين: اگلك انتَ شاخط اشتغل عندك؟
طلع جكارة ورثها ويحچي بقلة صبر حسيت بي شيء
المَوتور: تجي لو لا؟
رحت صعدت وحركت السيارة وهو ايده تدگ على الستيرن ما وكفت
زين العابدين: شمالك؟
باوعلي ورجع يباوع للدرب
المَوتور: اريدك وياي، ما اريد أحد من الولد ما يخلوني و لان محد ينطي بأهله اريد احس واحد يمي صدگ.
زين العابدين: عد عيناك أخوي انتَ اطيح گبلك انا.
المَوتور: ضامك للصعبات
زين العابدين: بالسهلات والصعبات تلگاني بضهرك.
مسح وجهه متحسر ويردد
المَوتور: سنين احترگ وماطفيت هسه دورهم ينحرگون واحد ورا الثاني وانا اباوع الهم.
باوعتله ما فاهم كلامه
زين العابدين: شني تسوي يعني؟
ابتسم بشر وگال
المَوتور: راح ابدي بأعز شيء على گلبهم بسمعتهم اخلي الناس تدوس وجوهم گبل لا ادوسهن انا راح انهي رجاح إلى ضعفة الشيخة والشيوخ شلون تشوفه.
زين العابدين: بس سمعتهم من سمعتك.
المَوتور: لا ما راح اضر روحي هسه تشوف.
سكتت ما مرتاحله على ما وصلنا للبيت سفط السيارة ونزلنا والهوسه گابة بالبيت وشيوخ طابه وشيوخ طالعه
زين العابدين: شجاي يصير؟
المَوتور: مسويله سالفه ومجمعهم مثل كل مرة حتى يطردني من العشيرة بفضيحه عباله ميت على عشيرته ابن النگس اذا ما سودنته.
سكتت ما رايد اتدخل بسالفتهم بس هوَ يدخلني يبقون عويل بيت و كل شيء يصير بيناتهم بس هوَ سالفته چبيرة حيل دخلنا للديوان سوى العيون كلها صارت على الموتور سلم وگعد بمكانه باوعوله مستغربين وجوده.
وانا خنگتني الضحكه شكله فاول بيناتهم كلهم عگل ودشاديش وخابصين روحهم وهذا داخللهم قميصه مفتوح وموشم من فوگ ليجوة انا منهم اكتله بعگالي واطرده حتى لو على حگ.
مترأس الگعدة رجاح گاعد بصدر الديوان والشيوخ الباقية كلها گاعده ومعاذ ومعتصم وجههم صار اصفر عرگوا رغم بروده الجو و واحد يحچي ويا الثاني بصوت ناصي.
اتحمحم وحچه بصوت مسموع وكلهم مركزين ويا
المَوتور: شيوخنا عمامنا انا أسف اذا گطعت سالفتكم بس سنين وانا ساكت وما فاتح حلگي واليوم لازم اطلع البگلبي لان الظلم ما ينسكت عنه لو شتگولون؟
باوعوله كلهم مأيدينه حچه واحد من من الشيوخ الگاعده
: - افا تنظلم وانتَ ابن ثابت احچي يابه وحگك ما يضيع.
حچه بصوت عالي وبنبرة موزونه وصوته طغى على صوتهم كلهم
المَوتور: جدي گدامكم صارله سنين طويله أخذ أختي مني بدون سبب ولا رضى يرجعها ولا هوَ الحماها ومن ذاك اليوم الهاليوم انا محترگ اريد جواب گلولي بيا حگ ياخذ أخت من يم اخوها ويضيعها!
أختي ما الها ذكر انا اليوم ما دخلت حتى اثير فتنه بس حتى ابري ذمتي گدام الله وكدامكم اذا انا الغلطان اتحاسب واذا هوَ الظالم لازم يتحاسب مثل ما تحاسبون أي غريب لان عشيرتنا ما بيها خير اذا سكتت عن الباطل وعافت بيها شيخ ضالم مو يگولون الحرمة بشارب الخير انا حگ اختي اريده من شواربكم انتم يالخيرين.
رجاح فتح اول دگمة من دشداشته ويحچي بتوتر
رجاح: بويه شني السالفة لا تگول هيچ ادري ضوجتك بس لا تتشاقه هيچ مو وكت شقاك عيب موهنا امشي اطلع برا.
باوعله بحقد بس حچه بأحترام
المَوتور: جدي تاج راسي رغم كل شيء انا بعدني احترمك وسنين انا ساكت لان حاسبك بحسبة ابوي بس الوضع بعد ما ينسكت عنه.
واحد من الشيوخ فر سبحته وصاح
: - بويه اذا هاي السالفه صدگ ما ينسكت عنها الأخت غالية والعرض غالي.
صاح يخزر بي مختنگ
معاذ: جذذذاب شبيكم انتم تصدگون بي.
المَوتور: انا راح اعوف الحچي الأهله.
مد ايده لجيبه سحب جهازه وكلهم يباوعوله دخل على فيديو وخلاه بيد الشيخ و وصلنا الصوت من الجهاز صوت رجاح واضح شلون يهدد بي ويحاچي وحتى شكله مبين وأسمع صوته بالفيديو يگله
رجاح: شبيك بس هذا أكتله وانا اجيبلك أختك وخره من دربي والك اليرضيك عوف المثاليات.
المَوتور: تخسى أصير مجرم مثلك
رجاح: ما صرت مثل جدك گلبك صخر ولك انا اگتل الواحد وامشي بجنازته شبي گلبك بعده راخي.
خلص الفيديو وگام المَوتور أخذ جهازه خلاه بجيبه وهمه كلهم الصدمة محتلة وجههم باوع لرجاح بشماته و وگف گبالهم وگال.
المَوتور: هاي كل شيء گبالكم وعندي بعد دلائل ما يگضن ومستعد اقدمهن حتى للقانون جدي اعذرني ما اگدر اسكت وانا شايف الظلم بعيني وانتم اذا تبقوون ساكتين ورضيتوا بالباطل الكل بريء منكم ومن عدالتكم.
ضل العرگ ينزل من گصته ويصيح
رجاح: لا تصدگون هذا تلفيق هذا حاقد عليَّ يريد يگطعني عنكم لا تخلون هل شيطان يلعب براسكم.
حچه واحد من الشيوخ الكبار كام يعدل بعگاله
: - استغفر ربك رجاح صوتك واضح وشكلك موجود ما اتوقعناها منك.
رجاح: لاتصدگون هذا اتربى على الحقد يريد يطشرنا! مريض نفسي تقاريره موجوده عندي اشوفكم اذا ما تصدكون.
واحد من الشيوخ صاح بعزم
: - الظلم ما يدوم لو تمر عليَّ سنين الصوت صوتك والشكل شكلك و الله اكبر الحق يعلى ولا يعلى عليه إلى ما يصون عرضه ما يظل شيخ انتَ عار علينا اليغدر بحفيده وحفيدته ما يگعد بصدر الديوان.
رجاح اختنگ حتى بعد ما يگدر يبرر ضل يمسح بركبته و وجهه انگلب ازرگ كلها ثواني وطاح من طوله ما يحرك لا ايد ولا رجل والشيوخ بعدهم يصيحون ما يريدونه بعد معاذ ومعتصم اتقربوا عليَّ ويتصايحون عبالهم مات.
المَوتور واگف فوگ راس رجاح مكتف اديه الصدره وصافن عليَّ وهوَ بالگاع مسح وجهه وشبخه وطلع عايف الديوان وراه عاج بالصياح والهوسه.
سنابل.
جنت اسمع الصياح من الديوان تارس البيت واكفه على الشباك شايله البرده واباوع وعيوني تتحرك ويا اليطب واليطلع وهمه اصواتهم مرة تعلى ومرة تهدء ونبعة گاعدة وتدعي واني گلبي ويا خايفه يغثونه بحچايه على أخته من يسمع بطاريها يفقد.
صعدت فوگ وحدي وتَسنيم نامت قبل شوي رحت للحمام سبحت وغيرت ملابسي مشطت شعري بس بعده مبلل حسيت ببروده ترد الروح گعدت على الچربايه واحچي ويا روحي خلي شيصير يصير هوَ يعرف يتصرف.
انفتح باب الغرفه دخل المَوتور يفر بالسويچ مال السيارة ويدندن بصوت ناصي ما منتبهلي.
المَوتور: اخاف من اعوفك بعد ما اشوفك اذا ما تجيني اقدر ضروفك طويلة رحلتي واخاف برجعتي بعد ما اشوفك.
صارت عينه عليَّ الضوجه مبينه على وجهه
المَوتور: بعدچ گاعدة.
هزيت راسي اي ولميت روحي
سنابل: شعندك ويا قصائد باسم الكربلائي؟
اتنهد و راح يم الميز يخلي السويچ ويحچي
المَوتور: باسم هوَ و قصائدة بنص الروح يومي ما يكمل بدون لا أسمعله أحس نقص حافظهن ع الغيب كلهن أحبه واحب كلمن يحبه.
سنابل: حتى ولد عمك انتبهت الهم يسمعوله هواي.
المَوتور: شحده الما يسمعله غير اكتله، انا علمتهم عليَّ من چنه صغار وأخذناها للكبر.
اجه ببالي اسأله على جده وأخر الأخبار اترددت بس فضولي چان اقوى.
سنابل: صدگ جدك زين بعده عايش؟
ابتسم بتعب وهوَ ينزع ساعته
المَوتور: اي للأسف بس طگته جلطه بلكي يصبح ميت اكو أمل نذر عليَّ اذا مات اروح اطش جكليت بضريح العباس.
سكتت أباوعله تعبانه من الوضع وكل شيء مخربط ومن غير تَسنيم كل يوم تلح عليَّ خلي يطلكج ونرجع العالمنا احنه مو مال هيچ عيشه بس هوَ يطلع من مشكله ويطب بمشكله ما ينطي درب للواحد يحاچي اتنهدت وگتله بهدوء.
سنابل: اگلك مو چنها طولت! يمته تطلگني صارلنا هواي محد يحچي بعد اذا اتطلگنا.
باوعلي وبلع ريگه أجه بهدوء گعد گبالي شابك اديه ضليت اباوعله بس ارمش بعيوني اريده ينطق.
المَوتور: ضوجتچ انا احد ضوجج هنا؟
سنابل: لا بس احنه بيننا اتفاق لا تنسى انتَ وعدتني لا تكسر ثقتي بيك اني اثق بيك هواي وادري بيك كد كلمتك.
مسح وجهه العرگان رغم بروده الغرفة وگام من مكانه ورگع الباب حيل دموعي نزلن ما ادري ليش بس انقهرت اتعودت عليَّ هواي بس لازم ما اريد انجرف أكثر ماريد اتعلق بوهم.
گمت من الچربايه خاف يجي ينام ولو هوَ ماينام هنا وماينام بالليل اصلاً بس تبقى چربايته سحبت من على الكنتور جودلية فرشتها بنهاية الغرفة على الحايط وخليت مخده وبطانيه وطفيت الأضوية ورحت بفراشي اتغطيت ودموعي ينزلن بدون صوت.
ما ادري شوگت غفيت بس حسيت ريحه جكاير تارسه المكان فتحت عيني وشفته گبالي گاعد يباوع لوجهي وجكارته بين شفايفه بس شافني فتحت عيني شمرها الغرفة ضلمه بس الضوى الخفيف إلى داخل من الشباك موجود.
حاولت اتجاهله وارجع انام بس ما گدرت غمضت عيني وحسيت البطانيه المتغطيه بيها انرفعت گعدت على حيلي وهوَ گعد گبالي ضايج رجعت ليورة اللزگت بالحايط گلبي يدگ حيل شعوري متناقض وهوَ همس متحسر.
المَوتور: تريدين تعوفيني ملعونة هيچ انا سهل عندچ.
نزلن دموعي مرة ثانيه شال ايده الترجف يمسح دموعي مقهور
المَوتور: لا تبچين يا بعد حيلي تبچين لان ما ترديني؟
هزيت راسي بمعنى لا
سنابل: لازم هيچ يصير فُرات.
مسح وجهه ودنگ ورجع باوعلي
المَوتور: يا عمر فُرات وسنينه ما أگدر اعوفنچ شلون بيه؟
مسحت دموعي اباوع بوجهه
سنابل: اني ضايعة.
المَوتور: وانا هم ضايع لميني وألمچ.
خليت أيدي على وجهي اشهگ حايره بينه وبين اختي وبين الماضي كل شيء متخربط ما ادري شنو أسوي بس يبقى الانفصال احسن حل هاي مو حياتي.
اتقرب گبالي شال اديه من وجهي يباوع لعيوني وسحبني لصدرة شابگني حيل و يمسح على شعري.
المَوتور: لا تبچين كافي شلعتي گلبي هيچ خانگج؟
دفعته خفيف من صدرة وشلت راسي اباوع لوجهه عيونه حمر دم وشعره متخربط نازل على جبينه باوعلي وهمس بتعب
المَوتور: بس اليوم والصبح ننسى.
ما فهمت قصده وهوَ اتمدد على فراشي وسحبني من أيدي نومني على صدرة يريد يدخلني بضلوعه من گد ما حاضنني ومقيدني
سنابل: شبيك عفيه لا تسوي هيچ.
المَوتور: تعبان سُنبلة اريدنچ لا تهديني ماريد افارگج اريد اشبگج حيل بروحي أضمچ.
سنابل: فُراااات عزا بعينك.
المَوتور: احترگ بنار ونفط
جمد الدم بجسمي من نزل روحه حط راسه بركبتي يتنفس حيل يجر نفس مثل المختنگ وهسه اتنفس گزبر جسمي اريد اوخر بس مقيدني
المَوتور: ما تهديني بس انتِ ضليتي ما اعوفنچ لو تموتين.
سنابل: عفيه وخر شبيك راح ابچي.
شال راسه يباوع لوجهي واتقرب حط شفايفه على خدي يبوسني گلبي دگ حيل من ملمس شواربه باس كل مكان بوجهي لحد ما وصل لشفايفي باوعلهن وبلع ريگه دفعته من صدرة حيل ارجف
سنابل: وخر شبيك فُرات اتخبلت وعلى اشرد منك يا.
ابتسم يمسح بوجهه يباوعلي عيونه ذبلانه
المَوتور: ابوس حلگج اليگول أسمي.
رجع نومني على صدرة من جهه گلبه دگات گلبه ترن بأذني أيد لافها على خصري حاضني بيها وأيده الثانيه على شعري تفتر مختنگه شگد ما ادفع بي ما ينزاح وهوَ يحچي بصوت ناصي
المَوتور: اصيرلچ كل شيء تريدينه بس ما تهديني وتروحين.
ضربته بقبضه ايدي على صدرة وشلت راسي
سنابل: والأتفاق؟
رجع طگني على راسي ونومني
المَوتور: خرب بالأتفاق يولي نسوي أتفاق جديد هذاك باطل.
سنابل: ليش شنو الاتغير.
المَوتور: كل شيء اتغير ما اكدر اعوفنچ سُنبلة مو سهله عليَّ روحي تريدج أنتهي ليش مقسوملي كل شيء اريده يروح مني ليش ماكو شيء يدوم وياي حتى انتِ! شلون ادخل للغرفة وانتِ ماكو شلون ما اسمع صوت ضحكتج يدوي بالبيت! تريدين تسودنيني انتِ.
سنابل: لا تحچي هيچ انتَ وعدتني لا تنسى.
حط ايده على شفايفي يسويلي أش سكتت أحس گلبي يريد يطلع من مكانه بگد ما يدگ حيل حچه بصوت ياخذ الروح
المَوتور: بالعباس گلبي تعب أسكتي لا كل شويه تجيبين طاري الوعد راح اموتن تحسسيني مو گد كلمتي.
گمت من حضنه واني أفكر ما اريد العاطفه تاخذني ما اريد اتندم من العواقب بعدين ماريد انطي امل زائف
سنابل: لاتحچي هيچ لا تخيب ضني بيك لازم تطلگني والله اشرد اذا تسوي هيچ ما تلگالي أثر.
فتح عيونه حيل خزرني وگام من مكانه مختنگ دنگ أخذ باكيت الجكاير والجداحه من الگاع وراح يريد يطلع قبل لايطلع التفت عليَّ يباوعلي گوة متمالك اعصابه.
المَوتور: الشردة لا تفكرين بيها لان لو تطيرين للسما هم الوحچ وارجعج هنا نامي يلا لا تفكرين تفكير مابي خير.
گالهن وطلع وسد الباب ضليت بمكاني اتگلب طار النوم من عيوني الضوى بلش يطلع دنيا الفجر گمت من مكاني فتحت الباب على كيف اريد انزل بالحديقة متأكدة گاعد هناك.
نزلت على أطراف اصابيعي گلبي يدگ حيل البيت هادء كلهم نايمين فتحت باب الهول وطلعت بالحديقة حتى النفس گاطعته ماكو مبين طلع جاي ارجع اصعد وسمعت صوت همسات خفيفة.
ما چان قصدي اسمع بس الحديث جمد كل خلية بجسمي من الصدمة بلعت ريگي و وگفت ورا وحده من النخلات بحيث ما انشاف شفت تهاني واكفه گبال دُجى تلوي أذاناتها وتحاجيها.
تهاني: مو بكيفج والعباس يا دُجى اذا ما تسوين مثل ما أكلج أكله وبكيفج بعد.
لطمت على وجهها بحرگه ودموعها مغركات وجهه
دُجى: لا تطلبين مني هيچ ما أكدر ادخل بين ثنين انتِ مستوعبه شترديني أسوي بنتچ اني تريديني ادخل بين المَوتور ومرته واخلي يحبني علمود البيت والفلوس شبيچ انتِ شبيچ؟
تهاني: يطردنا اذا مو هيچ يطردنا سوي الأگلج عليَّ قشمري وناخذ كل شيء منه اگول لمحراب والله أگله.
دارت ضهرها تريد تدخل وتگلها
دُجى: مايتقشمر شنو جديده عليَّ انتِ! شتسوين سوي گليله أهون من السالفة التردين تدخليني بيها.
ضحكت بأستهزاء واحس عيوني غوشن من الصدمة من گالت
تهاني: چا خوش باچر اول ما تگعدين ما تلگين محراب بيناتنا بعد راح أگله هوَ أبن الحرام مو ابننا ولا اني امه ولا انتِ أخته ولا معتصم ابوه شنو ضلته بيناتنه بعد؟
شهكت تبچي فاتحه عيونها حيل ورجعت وگفت گبالها وتگلها
دُجى: لا تچذبين اني ادري هوَ ابن حرام بس هوَ ابنكم انتِ وابوي اخوي محراب اخوي لا تچذبين عليَّ لا تسودنيني والله اكتلج تهاني والله.
تهاني: شفتي شلون خدعتج كل هالسنين وماخليتچ تعرفين بي مو اخوچ تهاني اني محد يگدرلي كلكم خدعتكم.
شهكت تبچي بكل حيلها ما مستوعبه وتهاني تضحك متونسه احس جسمي كزبر وجسمي ما يعييني بعد من الصدمه درت عيني وانصدمت بمحراب واگف من هذيچ الصفحه فاتح عيونه حيل مصدوم ومنتچي على الحايط حيله بايد ومبين من ملامح وجهه سامع الحچي كله!
ميرار.
ميرار: أسعد!
بلعت ريگي وأحس رجليه ماتن اريد بس اتحرك و اوخر قبل لا يشوفني ما أكدر گوة ضميت روحي ورا برائه مغطيه وجهي بضهرها وارجف من فوگ ليجوة التفتت عليَّ فازة.
بَرائه: شبيچ يا اسم الله.
خليت ايدي على حلگي احاجيها
ميرار: اش اسكتي بس خلي نمشي منا حبابه طلعيني.
هزت راسها متفهمه بدون لا تدري شنو السالفه وحاچت ابوها
بَرائه: بويه كافي الباقي موجودات عدنا بالبيت الوكت اتأخر.
باوعلها مستغرب
فاضل: وما اخذجن للمحل تشوفنه؟
بَرائه: لا خليها غير يوم تعبنا.
هز راسه موافقها ومشينا نرجع گلبي يريد يطلع من مكانه ارجف ما جاي اكدر اتمالك نفسي مرت عليَّ كل لحظة چان بيها أسعد وياي كل لحظة عذاب مريت بيها بسببه أحسني بحلم والله بحلم شجابه هنا هوَ مو ببغداد معقوله اتخيل؟
وصلنا لبيت عمو فاضل دخلنا لگينا الحجيه گاعده وگبالها الصوبه عليها قوري الچاي وگاعد يمها خنجر بملابس الشغل يسولفون التعب ماخذ حيله جوه عيونه سواد ولحيته طالعه ماد اديه للصوبه يتدفى وهيَ تصبله جاي وتنطي عمو فاضل وبَرائه اخذو الغراض للمطبخ ردت ادخل وياهم وصاحني.
خنجر: تعاي لچ تعاي أخت جيس حب انتِ.
رحت گعدت يمهم بصفحه هيله ومديت اديه اتدفى لان احسهن اتجمدن خزرته وحاچيته بنفس نبرته
ميرار: شمالك تصيح؟
فتح عينه خزرني عود معصب
خنجر: ادب سزز صوتچ اذا عليتي بعد تدرين شسوي؟
باوعتله وعليت صوتي اتحداه
ميرار: اي شتسوي؟
رخت ملامحه هز ايده وشال گلاص الچاي يشرب ويگول
خنجر: راح اگلج نصي مو زين على بلاعيمج يعني شسوي.
ضحكت وعدلت گعدتي انتچيت عالحايط
ميرار: اي عبالي.
هيله: خايبين اسكتوا شمالكم جهال.
ابتسم وحچه بتعب
خنجر: شلونچ جاي تقرين! ملتهي عنج هل فترة بس ما جاي الحگ حتى نوم ما جاي انام وعلي.
ميرار: لا يضل بالك كلش زينه وجاي اقرا ماعندي شيء.
حاچته الحجيه ضايجه
هيله: ولك يمه ليش ما تعوف هل سالفة باع حالك شصاير بي تشتغل من مكان لمكان التعب اخذ حيلك انه أشوفنلك غيرها.
خنجر: يا غيرها يمه تحچين صدگ؟ لو هيه لو ما اريد گلبي وعقلي وروحي قافلات عليها عيوني ما تشوف غيرها وبعدين ترى زين جمعت ربع المبلغ تقريباً هانت.
هيله: بس انتَ تعبت ما يهون على گليبي اشوفنك هيچ.
خنجر: واذا فدوة الها التعب كل ما افكر نهاية هل تعب انا وياها جوة سگف واحد انا ارتاح بتعبي.
هيله: والله مادري شلون تفكر يايمه الله يهنيك وازفك بأيدي.
خنجر: اويلي وتهوسولي اسمر ويخبل كل القوط تلوگ عليه.
هيله: مو اسمر يمه ابيض انتَ بس اچلح من الشمس.
ضحك يغطي وجهه بأيده
خنجر: والعباس مدري شلونچ انتِ فلا اعزمچ على عرسي بس ميرار ادخلها أخت العريس تصير مثل هذني خوات العريس اليباوعن للمعازيم بنص عين عود هنه خوات السلطان سليمان.
ضحكت ويا ضحكته
ميرار: ترا هم اصير منهن اريد اجرب الشعور شتريد واكفلي عضم بالبلعوم.
خنجر: عادي عمي شتسوين سوي انتِ مخولة بكل شيء بس هيله ما ادخلها ما دام تحچي عليَّ ترا عرسي مو أي احد يحضره بس الأمه داعيتله.
هيله: بس الأمه داعيه عليَّ هجم بيتكم كوموا من يمي لا بارك الله بيكم طايحين الحظ.
هيه ترزل بينا واحنه نضحك الأيام تمر واني بين دراستي وبين الشغل اشتريت تليفون اقرا بي باليوتيوب بس هم بعدني أحس صعب وقليل افتهم خنجر هواي يسألني حتى يقريني بس أكله لا جاي افتهم كل شيء خطيه يكسر گلبي حتى اكل ما يهون يشتري لروحه يخاف ينقص شيء من الفلوس الجاي يجمعهن.
اسم فرح ما يطيح من لسانه كل يوم يسولف بعرسه شيسوي وشنو يحضر متحمس فرحان حتى التعب إلى جاي يتعبه فرحان بي يگول ما دام انطتني امل تنطينياها كل شيء يهون لان هوَ حتى هل امل چان گاطعه.
ضلينا گاعدين شوي بين سوالف وضحك ومواضيع مختلفة لحد ما خنجر ضل يغفي وهوَ گاعد گوة فاتح عيونه گام وگلي
خنجر: گومي اوصلچ بدربي قبل لا اروح.
ميرار: وانتَ ما تروح تنام؟
خنجر: لا رايح للحراسه، گومي هيَ بدربي دنيا الليل مومال ترجعين لوحدج.
هزيت راسي وگمت سلمنا عليهم وطلعنا نتمشى وهوَ مخلي اديه بجيوبه ويمشي قبلي.
ميرار: شلون راح تحرس وانتَ هيچ نعسان؟
خنجر: أشرب كهوة.
الهوى البارد يضرب بوجهنا بنسمة ترد الروح الشوارع شبه فارغه ماكو بس صوت خطواتنا وانفاسنا ينسمع ضوه القمر متناثر عالرصيف يلمع البيوت كلها ساكته واني گلبي يدگ حيل خايفه من أسعد شلون أمن واني ادري بي قريب عليَّ! احس مجرد التفكير گلبي يوجعني.
خنجر: جاي تصدميني.
ميرار: ليش؟
ابتسم باوعلي ورجع يباوع للدرب
خنجر: اول ما شفتچ كلت هاي فاهيه شلون راح تعيش! بس والله طلعتي كفو جاي تديرين كل شيء بنفس الوكت.
ميرار: حتى انتَ جاي تصدمني هواي جاي تشتغل عبالك روبوت مو بشر ما تنطي لروحك مجال خنجر موهيچ تخسر صحتك.
خنجر: جا شسوي ميرار انتِ گليلي شسوي اتانيها تروح من ايدي مرة ثانيه! لا وعلى اموتن هل مرة صدگ ما ضل حيل لفراگها.
ميرار: بس المهر إلى طلبته حيل عالي شلون راح تجمعه بالحراسه والنجارة شگد يراد تشتغل لو ليل ونهار هم ما تكدر جاي تفهمني؟
خنجر: لا جاي ادور على شغل شفت ثالث.
ميرار: هاي هيَ بعد ما دام راحتك هيچ الله يسهل الك ويفتحها بوجهك.
خنجر: يا بعد حيلي.
ميرار: اتأدب.
ضحك يهز بأيده
خنجر: مو صوچج يعني اغلط عليچ تريدين تفشخيني احاجيچ حچي بي خير تگليلي اتأدب شتريدين بالضبط؟
ميرار: اريد افشخك.
باوعلي ضايج وكمل دربه يدردم
خنجر: من زمان بنفسچ ترجميني بالطابوگ يلا سويها هوَ انِت ماخذتني فصلية ضلت على هاي.
ميرار: شمسويتلك و ماخذتك فصلية شبيك؟
خنجر: دروحي چلبه مچلوبه الله يكفيني شرچ.
ميرار: يكرهون الحب يكرهون النساء.
ضحك بتعب
خنجر: عمي هاي مالتي لا تقلديني.
وصلنا قريب على البناية و وگفت احاچي
ميرار: هاي هيَ روح يلا وصلت.
هز راسه خوش
خنجر: روحي يلا ديري بالچ على روحچ اقفلي البيبان زين، رقمي خليته بجهازج خاف ما تدرين يعني اذا احتاجيتي شيء بس خابريني انا قريب عليچ.
ميرار: تمام صار.
ابتسم ودرت وجهي ادخل بالبناية التفتت لگيته بعده واگف منتظرني ادخل لوحتله بأيدي وهوَ هم شافني دخلت يالله راح خليت ايدي على گلبي اريد دگاته تخف احس كل شيء خانگني ملتمة عليَّ من كل الجهات اني هسه ما اريد غير مشاعري لخنجر تروح وتختفي واخلص من هل خنگه وهل شعور الموحلو.
صعدت وصلت لشقتي توني طلعت المفتاح جاي افتح بالباب ومُهران طلع بوجهي مادري منين حتى المفتاح طاح من أيدي دنگ شاله من الگاع قدمه إلى واتقرب مقدمه الي.
مُهران: وين چنتي؟
اخذته من أيده درت وجهي اريد افتح الباب وادخل ما إلى طاقه لسوالفه سحب المفتاح ولزمني من أيدي حيل ودارني عليَّ انردمت بصدرة وهوَ يحچي محترگ احنه بالممر وهوَ ما مهتم الأحد.
مُهران: چنتي ويا مو؟
نترت أيدي منه ارجف خازرته
ميرار: مالك شغل و اول واخر مرة تلزمني هيچ.
مُهران: سألتچ سؤال جاوبيني.
ميرار: ما الك حق تسألني شيء.
مُهران: ليش؟
ميرار: هوَ شنو ليش؟
بلع ريگه ومسح وجهه باوعلي عيونه حمر
مُهران: ليش ما جاي تشوفيني؟
نزلن دموعي حايره ما ادري شنو أسوي اريد ادخل
ميرار: انطيني المفتاح انطيني.
حطه بجيبه ويباوع لوجهي
مُهران: هسه الدموع عليمن شگتلج انا؟
ميرار: عقيد عوفني اعتقني انطيني المفتاح اريد ادخل العالم راح تطلع على صوتنا شبيك شهالسوالف ما احبهن.
مسح على لحيته يلوب بمكانه
مُهران: ما اعوفنچ ما اگدر مو بأيدي خرب ولچ طلعت روحي شبيچ ما تفتهميني؟
سكتت مكتفه اديه الصدري بس دموعي ينزلن وامسحهن منتضرته ينطيني المفتاح لان اختنگت
مُهران: عاينيلي زمزم خلي عينج بعيني.
رفعت راسي اباوعله بلع ريكه ومسح وجهه گوة طلعت الكلمة من حلكه
مُهران: تحبينه انتِ؟
هزيت راسي لا وشهكت ابچي حسيت كل تعب بگلبي قرر هسه يطلع وهوَ صفگ ايده مقهور يحچي بنبرة ما راح انساها طول عمري.
مُهران: باع شهكتها عليَّ وتگول لا خرب بگلبي المايعرف يهوى خرب بگلبي العشگ گلبچ المو الي.
حسيت بزعت ما أكدر اتحمل اضم بگلبي أكثر ردت بس ابچي وافرغ إلى بگلبي حاط عينه بعيني على أمل أگله لا وأثبتله ما احبه عيونه تفتر على وجهي و تتوسلني حچيت من بين شهكاتي.
ميرار: اي أحبه أحبه شتريد هسه انتَ.